𑁧. 𑀫𑀳𑀸𑀧𑀭𑀺𑀯𑀸𑀭𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧. ‘‘𑀯𑀺𑀧𑀲𑁆𑀲𑀻 𑀦𑀸𑀫 𑀪𑀕𑀯𑀸, 𑀮𑁄𑀓𑀚𑁂𑀝𑁆𑀞𑁄 𑀦𑀭𑀸𑀲𑀪𑁄;

𑀅𑀝𑁆𑀞𑀲𑀝𑁆𑀞𑀺𑀲𑀳𑀲𑁆𑀲𑁂𑀳𑀺, 𑀧𑀸𑀯𑀺𑀲𑀺 𑀩𑀦𑁆𑀥𑀼𑀫𑀁 𑀢𑀤𑀸.

𑁨. ‘‘𑀦𑀕𑀭𑀸 𑀅𑀪𑀺𑀦𑀺𑀓𑁆𑀔𑀫𑁆𑀫, 𑀅𑀕𑀫𑀁 𑀤𑀻𑀧𑀘𑁂𑀢𑀺𑀬𑀁;

𑀅𑀤𑁆𑀤𑀲𑀁 𑀯𑀺𑀭𑀚𑀁 𑀩𑀼𑀤𑁆𑀥𑀁, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑀁.

𑁩. ‘‘𑀘𑀼𑀮𑁆𑀮𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀺, 𑀬𑀓𑁆𑀔𑀸 𑀫𑀬𑁆𑀳𑀁 𑀉𑀧𑀦𑁆𑀢𑀺𑀓𑁂;

𑀉𑀧𑀝𑁆𑀞𑀳𑀦𑁆𑀢𑀺 𑀲𑀓𑁆𑀓𑀘𑁆𑀘𑀁 [𑀫𑀁 𑀦𑀺𑀘𑁆𑀘𑀁 (𑀓.)], 𑀇𑀦𑁆𑀤𑀁𑀯 𑀢𑀺𑀤𑀲𑀸 𑀕𑀡𑀸.

𑁪. ‘‘𑀪𑀯𑀦𑀸 𑀅𑀪𑀺𑀦𑀺𑀓𑁆𑀔𑀫𑁆𑀫, 𑀤𑀼𑀲𑁆𑀲𑀁 𑀧𑀕𑁆𑀕𑀬𑁆𑀳𑀳𑀁 𑀢𑀤𑀸;

𑀲𑀺𑀭𑀲𑀸 𑀅𑀪𑀺𑀯𑀸𑀤𑁂𑀲𑀺𑀁, 𑀢𑀜𑁆𑀘𑀸𑀤𑀸𑀲𑀺𑀁 𑀫𑀳𑁂𑀲𑀺𑀦𑁄.

𑁫. ‘‘𑀅𑀳𑁄 𑀩𑀼𑀤𑁆𑀥𑁄 𑀅𑀳𑁄 𑀥𑀫𑁆𑀫𑁄, 𑀅𑀳𑁄 𑀦𑁄 𑀲𑀢𑁆𑀣𑀼 𑀲𑀫𑁆𑀧𑀤𑀸;

𑀩𑀼𑀤𑁆𑀥𑀲𑁆𑀲 𑀆𑀦𑀼𑀪𑀸𑀯𑁂𑀦, 𑀯𑀲𑀼𑀥𑀸𑀬𑀁 𑀧𑀓𑀫𑁆𑀧𑀣.

𑁬. ‘‘𑀢𑀜𑁆𑀘 𑀅𑀘𑁆𑀙𑀭𑀺𑀬𑀁 𑀤𑀺𑀲𑁆𑀯𑀸, 𑀅𑀩𑁆𑀪𑀼𑀢𑀁 𑀮𑁄𑀫𑀳𑀁𑀲𑀦𑀁;

𑀩𑀼𑀤𑁆𑀥𑁂 𑀘𑀺𑀢𑁆𑀢𑀁 𑀧𑀲𑀸𑀤𑁂𑀫𑀺, 𑀤𑁆𑀯𑀺𑀧𑀤𑀺𑀦𑁆𑀤𑀫𑁆𑀳𑀺 𑀢𑀸𑀤𑀺𑀦𑁂.

𑁭. ‘‘𑀲𑁄𑀳𑀁 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀤𑀼𑀲𑁆𑀲𑀁 𑀤𑀢𑁆𑀯𑀸𑀦 𑀲𑀢𑁆𑀣𑀼𑀦𑁄;

𑀲𑀭𑀡𑀜𑁆𑀘 𑀉𑀧𑀸𑀕𑀘𑁆𑀙𑀺𑀁, 𑀲𑀸𑀫𑀘𑁆𑀘𑁄 𑀲𑀧𑀭𑀺𑀚𑁆𑀚𑀦𑁄.

𑁮. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀓𑀫𑁆𑀫𑀫𑀓𑀭𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁯. ‘‘𑀇𑀢𑁄 𑀧𑀦𑁆𑀦𑀭𑀲𑁂 𑀓𑀧𑁆𑀧𑁂, 𑀲𑁄𑀴𑀲𑀸𑀲𑀼𑀁 𑀲𑀼𑀯𑀸𑀳𑀦𑀸 [𑀲𑁄𑀴𑀲𑀸𑀲𑀺𑀁𑀲𑀼 𑀯𑀸𑀳𑀦𑁄 (𑀲𑁆𑀬𑀸.)];

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀸, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁧𑁦. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀫𑀳𑀸𑀧𑀭𑀺𑀯𑀸𑀭𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀫𑀳𑀸𑀧𑀭𑀺𑀯𑀸𑀭𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀞𑀫𑀁.