𑁮. 𑀆𑀲𑀦𑀼𑀧𑀝𑁆𑀞𑀸𑀳𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁪𑁭. ‘‘𑀓𑀸𑀦𑀦𑀁 𑀯𑀦𑀫𑁄𑀕𑀬𑁆𑀳, 𑀅𑀧𑁆𑀧𑀲𑀤𑁆𑀤𑀁 𑀦𑀺𑀭𑀸𑀓𑀼𑀮𑀁;

𑀲𑀻𑀳𑀸𑀲𑀦𑀁 𑀫𑀬𑀸 𑀤𑀺𑀦𑁆𑀦𑀁, 𑀅𑀢𑁆𑀣𑀤𑀲𑁆𑀲𑀺𑀲𑁆𑀲 𑀢𑀸𑀤𑀺𑀦𑁄.

𑁪𑁮. ‘‘𑀫𑀸𑀮𑀸𑀳𑀢𑁆𑀣𑀁 𑀕𑀳𑁂𑀢𑁆𑀯𑀸𑀦, 𑀓𑀢𑁆𑀯𑀸 𑀘 𑀦𑀁 𑀧𑀤𑀓𑁆𑀔𑀺𑀡𑀁;

𑀲𑀢𑁆𑀣𑀸𑀭𑀁 𑀧𑀬𑀺𑀭𑀼𑀧𑀸𑀲𑀺𑀢𑁆𑀯𑀸, 𑀧𑀓𑁆𑀓𑀸𑀫𑀺𑀁 𑀉𑀢𑁆𑀢𑀭𑀸𑀫𑀼𑀔𑁄.

𑁪𑁯. ‘‘𑀢𑁂𑀦 𑀓𑀫𑁆𑀫𑁂𑀦 𑀤𑁆𑀯𑀺𑀧𑀤𑀺𑀦𑁆𑀤, 𑀮𑁄𑀓𑀚𑁂𑀝𑁆𑀞 𑀦𑀭𑀸𑀲𑀪;

𑀲𑀦𑁆𑀦𑀺𑀩𑁆𑀩𑀸𑀧𑁂𑀫𑀺 [𑀲𑀦𑁆𑀤𑀺𑀝𑁆𑀞𑀸𑀧𑁂𑀫𑀺 (𑀓.)] 𑀅𑀢𑁆𑀢𑀸𑀦𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸.

𑁫𑁦. ‘‘𑀅𑀝𑁆𑀞𑀸𑀭𑀲𑀓𑀧𑁆𑀧𑀲𑀢𑁂, 𑀬𑀁 𑀤𑀸𑀦𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀲𑀻𑀳𑀸𑀲𑀦𑀲𑁆𑀲𑀺𑀤𑀁 𑀨𑀮𑀁.

𑁫𑁧. ‘‘𑀇𑀢𑁄 𑀲𑀢𑁆𑀢𑀓𑀧𑁆𑀧𑀲𑀢𑁂, 𑀲𑀦𑁆𑀦𑀺𑀩𑁆𑀩𑀸𑀧𑀓 [𑀲𑀦𑁆𑀦𑀺𑀝𑁆𑀞𑁄 𑀦𑀸𑀫 (𑀓.)] 𑀔𑀢𑁆𑀢𑀺𑀬𑁄;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁫𑁨. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀆𑀲𑀦𑀼𑀧𑀝𑁆𑀞𑀸𑀳𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀆𑀲𑀦𑀼𑀧𑀝𑁆𑀞𑀸𑀳𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀅𑀝𑁆𑀞𑀫𑀁.