𑁬. 𑀉𑀤𑀓𑀧𑀽𑀚𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁯. ‘‘𑀲𑀼𑀯𑀡𑁆𑀡𑀯𑀡𑁆𑀡𑀁 𑀲𑀫𑁆𑀩𑀼𑀤𑁆𑀥𑀁, 𑀕𑀘𑁆𑀙𑀦𑁆𑀢𑀁 𑀅𑀦𑀺𑀮𑀜𑁆𑀚𑀲𑁂;

𑀖𑀢𑀸𑀲𑀦𑀁𑀯 𑀚𑀮𑀺𑀢𑀁, 𑀆𑀤𑀺𑀢𑁆𑀢𑀁𑀯 𑀳𑀼𑀢𑀸𑀲𑀦𑀁.

𑁩𑁦. ‘‘𑀧𑀸𑀡𑀺𑀦𑀸 𑀉𑀤𑀓𑀁 𑀕𑀬𑁆𑀳, 𑀆𑀓𑀸𑀲𑁂 𑀉𑀓𑁆𑀔𑀺𑀧𑀺𑀁 𑀅𑀳𑀁;

𑀲𑀫𑁆𑀧𑀝𑀺𑀘𑁆𑀙𑀺 𑀫𑀳𑀸𑀯𑀻𑀭𑁄, 𑀩𑀼𑀤𑁆𑀥𑁄 𑀓𑀸𑀭𑀼𑀡𑀺𑀓𑁄 𑀇𑀲𑀺 [𑀫𑀬𑀺 (𑀲𑁆𑀬𑀸.)].

𑁩𑁧. ‘‘𑀅𑀦𑁆𑀢𑀮𑀺𑀓𑁆𑀔𑁂 𑀞𑀺𑀢𑁄 𑀲𑀢𑁆𑀣𑀸, 𑀧𑀤𑀼𑀫𑀼𑀢𑁆𑀢𑀭𑀦𑀸𑀫𑀓𑁄;

𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀣.

𑁩𑁨. ‘‘‘𑀇𑀫𑀺𑀦𑀸 𑀤𑀓𑀤𑀸𑀦𑁂𑀦, 𑀧𑀻𑀢𑀺𑀉𑀧𑁆𑀧𑀸𑀤𑀦𑁂𑀦 𑀘;

𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑁆𑀧𑀺, 𑀤𑀼𑀕𑁆𑀕𑀢𑀺𑀁 𑀦𑀼𑀧𑀧𑀚𑁆𑀚𑀢𑀺’ [𑀦𑀼𑀧𑀧𑀚𑁆𑀚𑀲𑀺 (𑀓.)].

𑁩𑁩. ‘‘𑀢𑁂𑀦 𑀓𑀫𑁆𑀫𑁂𑀦 𑀤𑁆𑀯𑀺𑀧𑀤𑀺𑀦𑁆𑀤, 𑀮𑁄𑀓𑀚𑁂𑀝𑁆𑀞 𑀦𑀭𑀸𑀲𑀪;

𑀧𑀢𑁆𑀢𑁄𑀫𑁆𑀳𑀺 𑀅𑀘𑀮𑀁 𑀞𑀸𑀦𑀁, 𑀳𑀺𑀢𑁆𑀯𑀸 𑀚𑀬𑀧𑀭𑀸𑀚𑀬𑀁.

𑁩𑁪. ‘‘𑀲𑀳𑀲𑁆𑀲𑀭𑀸𑀚𑀦𑀸𑀫𑁂𑀦, 𑀢𑀬𑁄 𑀢𑁂 𑀘𑀓𑁆𑀓𑀯𑀢𑁆𑀢𑀺𑀦𑁄;

𑀧𑀜𑁆𑀘𑀲𑀝𑁆𑀞𑀺𑀓𑀧𑁆𑀧𑀲𑀢𑁂, 𑀘𑀸𑀢𑀼𑀭𑀦𑁆𑀢𑀸 𑀚𑀦𑀸𑀥𑀺𑀧𑀸.

𑁩𑁫. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀉𑀤𑀓𑀧𑀽𑀚𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀉𑀤𑀓𑀧𑀽𑀚𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀙𑀝𑁆𑀞𑀁.