𑁩-𑁮. 𑀧𑀺𑀡𑁆𑀟𑁄𑀮𑀪𑀸𑀭𑀤𑁆𑀯𑀸𑀚𑀢𑁆𑀣𑁂𑀭𑀅𑀧𑀤𑀸𑀦𑀁

𑁬𑁧𑁩. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀲𑀬𑀫𑁆𑀪𑀽 𑀅𑀕𑁆𑀕𑀧𑀼𑀕𑁆𑀕𑀮𑁄;

𑀧𑀼𑀭𑀢𑁄 𑀳𑀺𑀫𑀯𑀦𑁆𑀢𑀲𑁆𑀲, 𑀘𑀺𑀢𑁆𑀢𑀓𑀽𑀝𑁂 𑀯𑀲𑀻 𑀢𑀤𑀸.

𑁬𑁧𑁪. ‘‘𑀅𑀪𑀻𑀢𑀭𑀽𑀧𑁄 𑀢𑀢𑁆𑀣𑀸𑀲𑀺𑀁, 𑀫𑀺𑀕𑀭𑀸𑀚𑀸 𑀘𑀢𑀼𑀓𑁆𑀓𑀫𑁄;

𑀢𑀲𑁆𑀲 𑀲𑀤𑁆𑀤𑀁 𑀲𑀼𑀡𑀺𑀢𑁆𑀯𑀸𑀦, 𑀯𑀺𑀓𑁆𑀔𑀫𑁆𑀪𑀦𑁆𑀢𑀺 𑀩𑀳𑀼𑀚𑁆𑀚𑀦𑀸.

𑁬𑁧𑁫. ‘‘𑀲𑀼𑀨𑀼𑀮𑁆𑀮𑀁 𑀧𑀤𑀼𑀫𑀁 𑀕𑀬𑁆𑀳, 𑀉𑀧𑀕𑀘𑁆𑀙𑀺𑀁 𑀦𑀭𑀸𑀲𑀪𑀁;

𑀯𑀼𑀝𑁆𑀞𑀺𑀢𑀲𑁆𑀲 𑀲𑀫𑀸𑀥𑀺𑀫𑁆𑀳𑀸, 𑀩𑀼𑀤𑁆𑀥𑀲𑁆𑀲 𑀅𑀪𑀺𑀭𑁄𑀧𑀬𑀺𑀁.

𑁬𑁧𑁬. ‘‘𑀘𑀸𑀢𑀼𑀤𑁆𑀤𑀺𑀲𑀁 𑀦𑀫𑀲𑁆𑀲𑀺𑀢𑁆𑀯𑀸, 𑀩𑀼𑀤𑁆𑀥𑀲𑁂𑀝𑁆𑀞𑀁 𑀦𑀭𑀼𑀢𑁆𑀢𑀫𑀁;

𑀲𑀓𑀁 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀲𑀻𑀳𑀦𑀸𑀤𑀁 𑀦𑀤𑀺𑀁 𑀅𑀳𑀁 [𑀢𑀤𑀸 (𑀲𑁆𑀬𑀸.)].

𑁬𑁧𑁭. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀮𑁄𑀓𑀯𑀺𑀤𑀽, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀲𑀓𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁬𑁧𑁮. ‘‘‘𑀩𑀼𑀤𑁆𑀥𑀲𑁆𑀲 𑀕𑀺𑀭𑀫𑀜𑁆𑀜𑀸𑀬, 𑀲𑀩𑁆𑀩𑁂 𑀤𑁂𑀯𑀸 𑀲𑀫𑀸𑀕𑀢𑀸;

𑀆𑀕𑀢𑁄 𑀯𑀤𑀢𑀁 𑀲𑁂𑀝𑁆𑀞𑁄, 𑀥𑀫𑁆𑀫𑀁 𑀲𑁄𑀲𑁆𑀲𑀸𑀫 𑀢𑀁 𑀫𑀬𑀁.

𑁬𑁧𑁯. ‘‘‘𑀢𑁂𑀲𑀁 𑀳𑀸𑀲𑀧𑀭𑁂𑀢𑀸𑀦𑀁, 𑀧𑀼𑀭𑀢𑁄 𑀮𑁄𑀓𑀦𑀸𑀬𑀓𑁄;

𑀫𑀫 𑀲𑀤𑁆𑀤𑀁 [𑀓𑀫𑁆𑀫𑀁 (?)] 𑀧𑀓𑀺𑀢𑁆𑀢𑁂𑀲𑀺, 𑀤𑀻𑀖𑀤𑀲𑁆𑀲𑀻 𑀫𑀳𑀸𑀫𑀼𑀦𑀺’.

𑁬𑁨𑁦. ‘‘𑀬𑁂𑀦𑀺𑀤𑀁 𑀧𑀤𑀼𑀫𑀁 𑀤𑀺𑀦𑁆𑀦𑀁, 𑀲𑀻𑀳𑀦𑀸𑀤𑁄 𑀘 𑀦𑀸𑀤𑀺𑀢𑁄;

𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄.

𑁬𑁨𑁧. ‘‘‘𑀇𑀢𑁄 𑀅𑀝𑁆𑀞𑀫𑀓𑁂 𑀓𑀧𑁆𑀧𑁂, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄 𑀘𑀢𑀼𑀤𑀻𑀧𑀫𑁆𑀳𑀺 𑀇𑀲𑁆𑀲𑀭𑁄.

𑁬𑁨𑁨. ‘‘‘𑀓𑀸𑀭𑀬𑀺𑀲𑁆𑀲𑀢𑀺 𑀇𑀲𑁆𑀲𑀭𑀺𑀬𑀁 [𑀇𑀲𑁆𑀲𑀭𑀁 (𑀲𑁆𑀬𑀸. 𑀓.)], 𑀫𑀳𑀺𑀬𑀸 𑀘𑀢𑀼𑀲𑀝𑁆𑀞𑀺𑀬𑀸;

𑀧𑀤𑀼𑀫𑁄 𑀦𑀸𑀫 𑀦𑀸𑀫𑁂𑀦, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁬𑁨𑁩. ‘‘𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑁆𑀳𑀺, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁬𑁨𑁪. ‘𑀧𑀓𑀸𑀲𑀺𑀢𑁂 𑀧𑀸𑀯𑀘𑀦𑁂, 𑀩𑁆𑀭𑀳𑁆𑀫𑀩𑀦𑁆𑀥𑀼 𑀪𑀯𑀺𑀲𑁆𑀲𑀢𑀺;

𑀩𑁆𑀭𑀳𑁆𑀫𑀜𑁆𑀜𑀸 𑀅𑀪𑀺𑀦𑀺𑀓𑁆𑀔𑀫𑁆𑀫, 𑀧𑀩𑁆𑀩𑀚𑀺𑀲𑁆𑀲𑀢𑀺 𑀢𑀸𑀯𑀤𑁂’.

𑁬𑁨𑁫. ‘‘𑀧𑀥𑀸𑀦𑀧𑀳𑀺𑀢𑀢𑁆𑀢𑁄 𑀲𑁄, 𑀉𑀧𑀲𑀦𑁆𑀢𑁄 𑀦𑀺𑀭𑀽𑀧𑀥𑀺;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺𑀦𑀸𑀲𑀯𑁄.

𑁬𑁨𑁬. ‘‘𑀯𑀺𑀚𑀦𑁂 𑀧𑀦𑁆𑀢𑀲𑁂𑀬𑁆𑀬𑀫𑁆𑀳𑀺, 𑀯𑀸𑀴𑀫𑀺𑀕𑀲𑀫𑀸𑀓𑀼𑀮𑁂;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺𑀦𑀸𑀲𑀯𑁄.

𑁬𑁨𑁭. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀺𑀡𑁆𑀟𑁄𑀮𑀪𑀸𑀭𑀤𑁆𑀯𑀸𑀚𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀺𑀡𑁆𑀟𑁄𑀮𑀪𑀸𑀭𑀤𑁆𑀯𑀸𑀚𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀅𑀝𑁆𑀞𑀫𑀁.