𑁧. 𑀩𑀼𑀤𑁆𑀥𑀅𑀧𑀤𑀸𑀦𑀁

𑁧. 𑀢𑀣𑀸𑀕𑀢𑀁 𑀚𑁂𑀢𑀯𑀦𑁂 𑀯𑀲𑀦𑁆𑀢𑀁, 𑀅𑀧𑀼𑀘𑁆𑀙𑀺 𑀯𑁂𑀤𑁂𑀳𑀫𑀼𑀦𑀻 𑀦𑀢𑀗𑁆𑀕𑁄;

‘‘𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸 𑀓𑀺𑀭 𑀦𑀸𑀫 𑀳𑁄𑀦𑁆𑀢𑀺, 𑀪𑀯𑀦𑁆𑀢𑀺 𑀢𑁂 𑀳𑁂𑀢𑀼𑀪𑀺 𑀓𑁂𑀳𑀺 𑀯𑀻𑀭’’.

𑁨. 𑀢𑀤𑀸𑀳 𑀲𑀩𑁆𑀩𑀜𑁆𑀜𑀼𑀯𑀭𑁄 𑀫𑀳𑁂𑀲𑀻, 𑀆𑀦𑀦𑁆𑀤𑀪𑀤𑁆𑀤𑀁 𑀫𑀥𑀼𑀭𑀲𑁆𑀲𑀭𑁂𑀦;

‘‘𑀬𑁂 𑀧𑀼𑀩𑁆𑀩𑀩𑀼𑀤𑁆𑀥𑁂𑀲𑀼 [𑀲𑀩𑁆𑀩𑀩𑀼𑀤𑁆𑀥𑁂𑀲𑀼 (𑀲𑁆𑀬𑀸.)] 𑀓𑀢𑀸𑀥𑀺𑀓𑀸𑀭𑀸, 𑀅𑀮𑀤𑁆𑀥𑀫𑁄𑀓𑁆𑀔𑀸 𑀚𑀺𑀦𑀲𑀸𑀲𑀦𑁂𑀲𑀼.

𑁩. ‘‘𑀢𑁂𑀦𑁂𑀯 𑀲𑀫𑁆𑀩𑁄𑀥𑀺𑀫𑀼𑀔𑁂𑀦 𑀥𑀻𑀭𑀸, 𑀅𑀚𑁆𑀛𑀸𑀲𑀬𑁂𑀦𑀸𑀧𑀺 𑀫𑀳𑀸𑀩𑀮𑁂𑀦;

𑀧𑀜𑁆𑀜𑀸𑀬 𑀢𑁂𑀚𑁂𑀦 𑀲𑀼𑀢𑀺𑀓𑁆𑀔𑀧𑀜𑁆𑀜𑀸, 𑀲𑀩𑁆𑀩𑀜𑁆𑀜𑀼𑀪𑀸𑀯𑀁 𑀅𑀦𑀼𑀧𑀸𑀧𑀼𑀡𑀦𑁆𑀢𑀺.

𑁪. ‘‘𑀅𑀳𑀫𑁆𑀧𑀺 𑀧𑀼𑀩𑁆𑀩𑀩𑀼𑀤𑁆𑀥𑁂𑀲𑀼, 𑀩𑀼𑀤𑁆𑀥𑀢𑁆𑀢𑀫𑀪𑀺𑀧𑀢𑁆𑀣𑀬𑀺𑀁,

𑀫𑀦𑀲𑀸𑀬𑁂𑀯 𑀳𑀼𑀢𑁆𑀯𑀸𑀦, 𑀥𑀫𑁆𑀫𑀭𑀸𑀚𑀸 𑀅𑀲𑀗𑁆𑀔𑀺𑀬𑀸.

𑁫. ‘‘𑀅𑀣 𑀩𑀼𑀤𑁆𑀥𑀸𑀧𑀤𑀸𑀦𑀸𑀦𑀺, 𑀲𑀼𑀡𑀸𑀣 𑀲𑀼𑀤𑁆𑀥𑀫𑀸𑀦𑀲𑀸;

𑀢𑀺𑀁𑀲𑀧𑀸𑀭𑀫𑀺𑀲𑀫𑁆𑀧𑀼𑀡𑁆𑀡𑀸, 𑀥𑀫𑁆𑀫𑀭𑀸𑀚𑀸 𑀅𑀲𑀗𑁆𑀔𑀺𑀬𑀸.

𑁬. ‘‘𑀲𑀫𑁆𑀩𑁄𑀥𑀺𑀁 𑀩𑀼𑀤𑁆𑀥𑀲𑁂𑀝𑁆𑀞𑀸𑀦𑀁, 𑀲𑀲𑀗𑁆𑀖𑁂 𑀮𑁄𑀓𑀦𑀸𑀬𑀓𑁂;

𑀤𑀲𑀗𑁆𑀕𑀼𑀮𑀻 𑀦𑀫𑀲𑁆𑀲𑀺𑀢𑁆𑀯𑀸, 𑀲𑀺𑀭𑀲𑀸 𑀅𑀪𑀺𑀯𑀸𑀤𑀬𑀺𑀁 [𑀅𑀪𑀺𑀯𑀸𑀤𑀬𑁂 (𑀲𑁆𑀬𑀸.)].

𑁭. ‘‘𑀬𑀸𑀯𑀢𑀸 𑀩𑀼𑀤𑁆𑀥𑀔𑁂𑀢𑁆𑀢𑁂𑀲𑀼, 𑀭𑀢𑀦𑀸 𑀯𑀺𑀚𑁆𑀚𑀦𑁆𑀢𑀺𑀲𑀗𑁆𑀔𑀺𑀬𑀸;

𑀆𑀓𑀸𑀲𑀝𑁆𑀞𑀸 𑀘 𑀪𑀽𑀫𑀝𑁆𑀞𑀸 [𑀪𑀼𑀫𑁆𑀫𑀝𑁆𑀞𑀸 (𑀲𑀻. 𑀲𑁆𑀬𑀸.)], 𑀫𑀦𑀲𑀸 𑀲𑀩𑁆𑀩𑀫𑀸𑀳𑀭𑀺𑀁.

𑁮. ‘‘𑀢𑀢𑁆𑀣 𑀭𑀽𑀧𑀺𑀬𑀪𑀽𑀫𑀺𑀬𑀁, 𑀧𑀸𑀲𑀸𑀤𑀁 𑀫𑀸𑀧𑀬𑀺𑀁 𑀅𑀳𑀁;

𑀦𑁂𑀓𑀪𑀼𑀫𑁆𑀫𑀁 𑀭𑀢𑀦𑀫𑀬𑀁, 𑀉𑀩𑁆𑀩𑀺𑀤𑁆𑀥𑀁 𑀦𑀪𑀫𑀼𑀕𑁆𑀕𑀢𑀁.

𑁯. ‘‘𑀯𑀺𑀘𑀺𑀢𑁆𑀢𑀣𑀫𑁆𑀪𑀁 𑀲𑀼𑀓𑀢𑀁, 𑀲𑀼𑀯𑀺𑀪𑀢𑁆𑀢𑀁 𑀫𑀳𑀸𑀭𑀳𑀁;

𑀓𑀦𑀓𑀫𑀬𑀲𑀗𑁆𑀖𑀸𑀝𑀁, 𑀓𑁄𑀦𑁆𑀢𑀘𑁆𑀙𑀢𑁆𑀢𑁂𑀳𑀺 𑀫𑀡𑁆𑀟𑀺𑀢𑀁.

𑁧𑁦. ‘‘𑀧𑀞𑀫𑀸 𑀯𑁂𑀴𑀼𑀭𑀺𑀬𑀸 𑀪𑀽𑀫𑀺, 𑀯𑀺𑀫𑀮𑀩𑁆𑀪𑀲𑀫𑀸 𑀲𑀼𑀪𑀸;

𑀦𑀴𑀺𑀦𑀚𑀮𑀚𑀸𑀓𑀺𑀡𑁆𑀡𑀸, 𑀯𑀭𑀓𑀜𑁆𑀘𑀦𑀪𑀽𑀫𑀺𑀬𑀸.

𑁧𑁧. ‘‘𑀧𑀯𑀸𑀴𑀁𑀲𑀸 𑀧𑀯𑀸𑀴𑀯𑀡𑁆𑀡𑀸, 𑀓𑀸𑀘𑀺 𑀮𑁄𑀳𑀺𑀢𑀓𑀸 𑀲𑀼𑀪𑀸;

𑀇𑀦𑁆𑀤𑀕𑁄𑀧𑀓𑀯𑀡𑁆𑀡𑀸𑀪𑀸, 𑀪𑀽𑀫𑀺 𑀑𑀪𑀸𑀲𑀢𑀻 𑀤𑀺𑀲𑀸.

𑁧𑁨. ‘‘𑀲𑀼𑀯𑀺𑀪𑀢𑁆𑀢𑀸 𑀖𑀭𑀫𑀼𑀔𑀸, 𑀦𑀺𑀬𑁆𑀬𑀽𑀳𑀸 𑀲𑀻𑀳𑀧𑀜𑁆𑀚𑀭𑀸;

𑀘𑀢𑀼𑀭𑁄 𑀯𑁂𑀤𑀺𑀓𑀸 𑀚𑀸𑀮𑀸, 𑀕𑀦𑁆𑀥𑀸𑀯𑁂𑀴𑀸 𑀫𑀦𑁄𑀭𑀫𑀸.

𑁧𑁩. ‘‘𑀦𑀻𑀮𑀸 𑀧𑀻𑀢𑀸 𑀮𑁄𑀳𑀺𑀢𑀓𑀸, 𑀑𑀤𑀸𑀢𑀸 𑀲𑀼𑀤𑁆𑀥𑀓𑀸𑀴𑀓𑀸;

𑀓𑀽𑀝𑀸𑀕𑀸𑀭𑀯𑀭𑀽𑀧𑁂𑀢𑀸, 𑀲𑀢𑁆𑀢𑀭𑀢𑀦𑀪𑀽𑀲𑀺𑀢𑀸.

𑁧𑁪. ‘‘𑀑𑀮𑁄𑀓𑀫𑀬𑀸 𑀧𑀤𑀼𑀫𑀸, 𑀯𑀸𑀴𑀯𑀺𑀳𑀗𑁆𑀕𑀲𑁄𑀪𑀺𑀢𑀸;

𑀦𑀓𑁆𑀔𑀢𑁆𑀢𑀢𑀸𑀭𑀓𑀸𑀓𑀺𑀡𑁆𑀡𑀸, 𑀘𑀦𑁆𑀤𑀲𑀽𑀭𑁂𑀳𑀺 [𑀘𑀦𑁆𑀤𑀲𑀼𑀭𑀺𑀬𑁂𑀳𑀺 (𑀲𑀻. 𑀲𑁆𑀬𑀸.)] 𑀫𑀡𑁆𑀟𑀺𑀢𑀸.

𑁧𑁫. ‘‘𑀳𑁂𑀫𑀚𑀸𑀮𑁂𑀦 𑀲𑀜𑁆𑀙𑀦𑁆𑀦𑀸, 𑀲𑁄𑀡𑁆𑀡𑀓𑀺𑀗𑁆𑀓𑀺𑀡𑀺𑀓𑀸𑀬𑀼𑀢𑀸;

𑀯𑀸𑀢𑀯𑁂𑀕𑁂𑀦 𑀓𑀽𑀚𑀦𑁆𑀢𑀺, 𑀲𑁄𑀡𑁆𑀡𑀫𑀸𑀮𑀸 𑀫𑀦𑁄𑀭𑀫𑀸.

𑁧𑁬. ‘‘𑀫𑀜𑁆𑀚𑁂𑀝𑁆𑀞𑀓𑀁 𑀮𑁄𑀳𑀺𑀢𑀓𑀁, 𑀧𑀻𑀢𑀓𑀁 𑀳𑀭𑀺𑀧𑀺𑀜𑁆𑀚𑀭𑀁;

𑀦𑀸𑀦𑀸𑀭𑀗𑁆𑀕𑁂𑀳𑀺 𑀲𑀫𑁆𑀧𑀻𑀢𑀁 [𑀲𑀁𑀘𑀺𑀢𑁆𑀢𑀁 (𑀲𑁆𑀬𑀸.)], 𑀉𑀲𑁆𑀲𑀺𑀢𑀤𑁆𑀥𑀚𑀫𑀸𑀮𑀺𑀦𑀻 [𑀫𑀸𑀮𑀺𑀦𑀺𑀁 (𑀲𑀻.)].

𑁧𑁭. ‘‘𑀦 𑀦𑀁 [𑀦𑀸𑀦𑀸 (𑀲𑀻. 𑀲𑁆𑀬𑀸.)] 𑀩𑀳𑀽𑀦𑁂𑀓𑀲𑀢𑀸, 𑀨𑀮𑀺𑀓𑀸 𑀭𑀚𑀢𑀸𑀫𑀬𑀸;

𑀫𑀡𑀺𑀫𑀬𑀸 𑀮𑁄𑀳𑀺𑀢𑀗𑁆𑀕𑀸, 𑀫𑀲𑀸𑀭𑀕𑀮𑁆𑀮𑀫𑀬𑀸 𑀢𑀣𑀸;

𑀦𑀸𑀦𑀸𑀲𑀬𑀦𑀯𑀺𑀘𑀺𑀢𑁆𑀢𑀸, 𑀲𑀡𑁆𑀳𑀓𑀸𑀲𑀺𑀓𑀲𑀦𑁆𑀣𑀢𑀸.

𑁧𑁮. ‘‘𑀓𑀫𑁆𑀧𑀮𑀸 𑀤𑀼𑀓𑀽𑀮𑀸 𑀘𑀻𑀦𑀸, 𑀧𑀝𑁆𑀝𑀼𑀡𑁆𑀡𑀸 𑀧𑀡𑁆𑀟𑀼𑀧𑀸𑀯𑀼𑀭𑀸;

𑀯𑀺𑀯𑀺𑀥𑀢𑁆𑀣𑀭𑀡𑀁 𑀲𑀩𑁆𑀩𑀁, 𑀫𑀦𑀲𑀸 𑀧𑀜𑁆𑀜𑀧𑁂𑀲𑀳𑀁.

𑁧𑁯. ‘‘𑀢𑀸𑀲𑀼 𑀢𑀸𑀲𑁆𑀯𑁂𑀯 𑀪𑀽𑀫𑀻𑀲𑀼, 𑀭𑀢𑀦𑀓𑀽𑀝𑀮𑀗𑁆𑀓𑀢𑀁;

𑀫𑀡𑀺𑀯𑁂𑀭𑁄𑀘𑀦𑀸 𑀉𑀓𑁆𑀓𑀸, 𑀥𑀸𑀭𑀬𑀦𑁆𑀢𑀸 𑀲𑀼𑀢𑀺𑀝𑁆𑀞𑀭𑁂.

𑁨𑁦. ‘‘𑀲𑁄𑀪𑀦𑁆𑀢𑀺 𑀏𑀲𑀺𑀓𑀸 𑀣𑀫𑁆𑀪𑀸, 𑀲𑀼𑀪𑀸 𑀓𑀜𑁆𑀘𑀦𑀢𑁄𑀭𑀡𑀸;

𑀚𑀫𑁆𑀩𑁄𑀦𑀤𑀸 𑀲𑀸𑀭𑀫𑀬𑀸, 𑀅𑀣𑁄 𑀭𑀚𑀢𑀫𑀬𑀸𑀧𑀺 𑀘.

𑁨𑁧. ‘‘𑀦𑁂𑀓𑀸 𑀲𑀦𑁆𑀥𑀻 𑀲𑀼𑀯𑀺𑀪𑀢𑁆𑀢𑀸, 𑀓𑀯𑀸𑀝𑀕𑁆𑀕𑀴𑀘𑀺𑀢𑁆𑀢𑀺𑀢𑀸;

𑀉𑀪𑀢𑁄 𑀧𑀼𑀡𑁆𑀡𑀖𑀝𑀸𑀦𑁂𑀓𑀸, 𑀧𑀤𑀼𑀫𑀼𑀧𑁆𑀧𑀮𑀲𑀁𑀬𑀼𑀢𑀸.

𑁨𑁨. ‘‘𑀅𑀢𑀻𑀢𑁂 𑀲𑀩𑁆𑀩𑀩𑀼𑀤𑁆𑀥𑁂 𑀘, 𑀲𑀲𑀗𑁆𑀖𑁂 𑀮𑁄𑀓𑀦𑀸𑀬𑀓𑁂;

𑀧𑀓𑀢𑀺𑀯𑀡𑁆𑀡𑀭𑀽𑀧𑁂𑀦, 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀲𑀲𑀸𑀯𑀓𑁂.

𑁨𑁩. ‘‘𑀢𑁂𑀦 𑀤𑁆𑀯𑀸𑀭𑁂𑀦 𑀧𑀯𑀺𑀲𑀺𑀢𑁆𑀯𑀸, 𑀲𑀩𑁆𑀩𑁂 𑀩𑀼𑀤𑁆𑀥𑀸 𑀲𑀲𑀸𑀯𑀓𑀸;

𑀲𑀩𑁆𑀩𑀲𑁄𑀡𑁆𑀡𑀫𑀬𑁂 𑀧𑀻𑀞𑁂, 𑀦𑀺𑀲𑀺𑀦𑁆𑀦𑀸 𑀅𑀭𑀺𑀬𑀫𑀡𑁆𑀟𑀮𑀸.

𑁨𑁪. ‘‘𑀬𑁂 𑀘 𑀏𑀢𑀭𑀳𑀺 𑀅𑀢𑁆𑀣𑀺, 𑀩𑀼𑀤𑁆𑀥𑀸 𑀮𑁄𑀓𑁂 𑀅𑀦𑀼𑀢𑁆𑀢𑀭𑀸;

𑀅𑀢𑀻𑀢𑁂 𑀯𑀢𑁆𑀢𑀫𑀸𑀦𑀸 𑀘, 𑀪𑀯𑀦𑀁 𑀲𑀩𑁆𑀩𑁂 𑀲𑀫𑀸𑀳𑀭𑀺𑀁.

𑁨𑁫. ‘‘𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀦𑁂𑀓𑀲𑀢𑁂, 𑀲𑀬𑀫𑁆𑀪𑀽 𑀅𑀧𑀭𑀸𑀚𑀺𑀢𑁂;

𑀅𑀢𑀻𑀢𑁂 𑀯𑀢𑁆𑀢𑀫𑀸𑀦𑁂 𑀘, 𑀪𑀯𑀦𑀁 𑀲𑀩𑁆𑀩𑁂 𑀲𑀫𑀸𑀳𑀭𑀺𑀁.

𑁨𑁬. ‘‘𑀓𑀧𑁆𑀧𑀭𑀼𑀓𑁆𑀔𑀸 𑀩𑀳𑀽 𑀅𑀢𑁆𑀣𑀺, 𑀬𑁂 𑀤𑀺𑀩𑁆𑀩𑀸 𑀬𑁂 𑀘 𑀫𑀸𑀦𑀼𑀲𑀸;

𑀲𑀩𑁆𑀩𑀁 𑀤𑀼𑀲𑁆𑀲𑀁 𑀲𑀫𑀸𑀳𑀦𑁆𑀢𑀸, 𑀅𑀘𑁆𑀙𑀸𑀤𑁂𑀫𑀺 𑀢𑀺𑀘𑀻𑀯𑀭𑀁.

𑁨𑁭. ‘‘𑀔𑀚𑁆𑀚𑀁 𑀪𑁄𑀚𑁆𑀚𑀁 𑀲𑀸𑀬𑀦𑀻𑀬𑀁, 𑀲𑀫𑁆𑀧𑀦𑁆𑀦𑀁 𑀧𑀸𑀦𑀪𑁄𑀚𑀦𑀁;

𑀫𑀡𑀺𑀫𑀬𑁂 𑀲𑀼𑀪𑁂 𑀧𑀢𑁆𑀢𑁂, 𑀲𑀁𑀧𑀽𑀭𑁂𑀢𑁆𑀯𑀸 𑀅𑀤𑀸𑀲𑀳𑀁.

𑁨𑁮. ‘‘𑀤𑀺𑀩𑁆𑀩𑀯𑀢𑁆𑀣𑀲𑀫𑀸 𑀳𑀼𑀢𑁆𑀯𑀸, 𑀫𑀝𑁆𑀞𑀸 [𑀫𑀝𑁆𑀝𑀸 (𑀲𑀻.)] 𑀘𑀻𑀯𑀭𑀲𑀁𑀬𑀼𑀢𑀸;

𑀫𑀥𑀼𑀭𑀸 𑀲𑀓𑁆𑀔𑀭𑀸 𑀘𑁂𑀯, 𑀢𑁂𑀮𑀸 𑀘 𑀫𑀥𑀼𑀨𑀸𑀡𑀺𑀢𑀸.

𑁨𑁯. ‘‘𑀢𑀧𑁆𑀧𑀺𑀢𑀸 𑀧𑀭𑀫𑀦𑁆𑀦𑁂𑀦, 𑀲𑀩𑁆𑀩𑁂 𑀢𑁂 𑀅𑀭𑀺𑀬𑀫𑀡𑁆𑀟𑀮𑀸;

𑀭𑀢𑀦𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸, 𑀓𑁂𑀲𑀭𑀻𑀯 𑀕𑀼𑀳𑀸𑀲𑀬𑀸.

𑁩𑁦. ‘‘𑀫𑀳𑀸𑀭𑀳𑀫𑁆𑀳𑀺 𑀲𑀬𑀦𑁂, 𑀲𑀻𑀳𑀲𑁂𑀬𑁆𑀬𑀫𑀓𑀧𑁆𑀧𑀬𑀼𑀁;

𑀲𑀫𑁆𑀧𑀚𑀸𑀦𑀸 𑀲𑀫𑀼𑀝𑁆𑀞𑀸𑀬, 𑀲𑀬𑀦𑁂 [𑀲𑁂𑀬𑁆𑀬𑁂 (𑀲𑁆𑀬𑀸.)] 𑀧𑀮𑁆𑀮𑀗𑁆𑀓𑀫𑀸𑀪𑀼𑀚𑀼𑀁.

𑁩𑁧. ‘‘𑀕𑁄𑀘𑀭𑀁 𑀲𑀩𑁆𑀩𑀩𑀼𑀤𑁆𑀥𑀸𑀦𑀁, 𑀛𑀸𑀦𑀭𑀢𑀺𑀲𑀫𑀧𑁆𑀧𑀺𑀢𑀸;

𑀅𑀜𑁆𑀜𑁂 𑀥𑀫𑁆𑀫𑀸𑀦𑀺 𑀤𑁂𑀲𑁂𑀦𑁆𑀢𑀺, 𑀅𑀜𑁆𑀜𑁂 𑀓𑀻𑀴𑀦𑁆𑀢𑀺 𑀇𑀤𑁆𑀥𑀺𑀬𑀸.

𑁩𑁨. ‘‘𑀅𑀜𑁆𑀜𑁂 𑀅𑀪𑀺𑀜𑁆𑀜𑀸 𑀅𑀧𑁆𑀧𑁂𑀦𑁆𑀢𑀺, 𑀅𑀪𑀺𑀜𑁆𑀜𑀸 𑀯𑀲𑀺𑀪𑀸𑀯𑀺𑀢𑀸;

𑀯𑀺𑀓𑀼𑀩𑁆𑀩𑀦𑀸 𑀯𑀺𑀓𑀼𑀩𑁆𑀩𑀦𑁆𑀢𑀺, 𑀅𑀜𑁆𑀜𑁂𑀦𑁂𑀓𑀲𑀳𑀲𑁆𑀲𑀺𑀬𑁄.

𑁩𑁩. ‘‘𑀩𑀼𑀤𑁆𑀥𑀸𑀧𑀺 𑀩𑀼𑀤𑁆𑀥𑁂 𑀧𑀼𑀘𑁆𑀙𑀦𑁆𑀢𑀺, 𑀯𑀺𑀲𑀬𑀁 𑀲𑀩𑁆𑀩𑀜𑁆𑀜𑀼𑀫𑀸𑀮𑀬𑀁;

𑀕𑀫𑁆𑀪𑀻𑀭𑀁 𑀦𑀺𑀧𑀼𑀡𑀁 𑀞𑀸𑀦𑀁, 𑀧𑀜𑁆𑀜𑀸𑀬 𑀯𑀺𑀦𑀺𑀩𑀼𑀚𑁆𑀛𑀭𑁂.

𑁩𑁪. ‘‘𑀲𑀸𑀯𑀓𑀸 𑀩𑀼𑀤𑁆𑀥𑁂 𑀧𑀼𑀘𑁆𑀙𑀦𑁆𑀢𑀺, 𑀩𑀼𑀤𑁆𑀥𑀸 𑀧𑀼𑀘𑁆𑀙𑀦𑁆𑀢𑀺 𑀲𑀸𑀯𑀓𑁂;

𑀅𑀜𑁆𑀜𑀫𑀜𑁆𑀜𑀜𑁆𑀘 𑀧𑀼𑀘𑁆𑀙𑀺𑀢𑁆𑀯𑀸 [𑀧𑀼𑀘𑁆𑀙𑀦𑁆𑀢𑀺 (𑀲𑀻. 𑀲𑁆𑀬𑀸.)], 𑀅𑀜𑁆𑀜𑁄𑀜𑁆𑀜𑀁 𑀩𑁆𑀬𑀸𑀓𑀭𑁄𑀦𑁆𑀢𑀺 𑀢𑁂.

𑁩𑁫. ‘‘𑀩𑀼𑀤𑁆𑀥𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀘, 𑀲𑀸𑀯𑀓𑀸 𑀧𑀭𑀺𑀘𑀸𑀭𑀓𑀸;

𑀏𑀯𑀁 𑀲𑀓𑀸𑀬 𑀭𑀢𑀺𑀬𑀸, 𑀧𑀸𑀲𑀸𑀤𑁂𑀪𑀺𑀭𑀫𑀦𑁆𑀢𑀺 𑀢𑁂.

𑁩𑁬. ‘‘𑀙𑀢𑁆𑀢𑀸 𑀢𑀺𑀝𑁆𑀞𑀦𑁆𑀢𑀼 𑀭𑀢𑀦𑀸, 𑀓𑀜𑁆𑀘𑀦𑀸𑀯𑁂𑀴𑀧𑀦𑁆𑀢𑀺𑀓𑀸;

𑀫𑀼𑀢𑁆𑀢𑀸𑀚𑀸𑀮𑀧𑀭𑀺𑀓𑁆𑀔𑀺𑀢𑁆𑀢𑀸, 𑀲𑀩𑁆𑀩𑁂 𑀥𑀸𑀭𑁂𑀦𑁆𑀢𑀼 [𑀥𑀸𑀭𑁂𑀦𑁆𑀢𑀺 (𑀓.)] 𑀫𑀢𑁆𑀣𑀓𑁂.

𑁩𑁭. ‘‘𑀪𑀯𑀦𑁆𑀢𑀼 𑀘𑁂𑀴𑀯𑀺𑀢𑀸𑀦𑀸, 𑀲𑁄𑀡𑁆𑀡𑀢𑀸𑀭𑀓𑀘𑀺𑀢𑁆𑀢𑀺𑀢𑀸;

𑀯𑀺𑀘𑀺𑀢𑁆𑀢𑀫𑀮𑁆𑀬𑀯𑀺𑀢𑀢𑀸, 𑀲𑀩𑁆𑀩𑁂 𑀥𑀸𑀭𑁂𑀦𑁆𑀢𑀼 𑀫𑀢𑁆𑀣𑀓𑁂.

𑁩𑁮. ‘‘𑀯𑀺𑀢𑀢𑀸 𑀫𑀮𑁆𑀬𑀤𑀸𑀫𑁂𑀳𑀺, 𑀕𑀦𑁆𑀥𑀤𑀸𑀫𑁂𑀳𑀺 𑀲𑁄𑀪𑀺𑀢𑀸;

𑀤𑀼𑀲𑁆𑀲𑀤𑀸𑀫𑀧𑀭𑀺𑀓𑀺𑀡𑁆𑀡𑀸, 𑀭𑀢𑀦𑀤𑀸𑀫𑀪𑀽𑀲𑀺𑀢𑀸.

𑁩𑁯. ‘‘𑀧𑀼𑀧𑁆𑀨𑀸𑀪𑀺𑀓𑀺𑀡𑁆𑀡𑀸 𑀲𑀼𑀘𑀺𑀢𑁆𑀢𑀸, 𑀲𑀼𑀭𑀪𑀺𑀕𑀦𑁆𑀥𑀪𑀽𑀲𑀺𑀢𑀸;

𑀕𑀦𑁆𑀥𑀧𑀜𑁆𑀘𑀗𑁆𑀕𑀼𑀮𑀺𑀓𑀢𑀸 [𑀕𑀦𑁆𑀥𑀧𑀜𑁆𑀘𑀗𑁆𑀕𑀼𑀮𑀁 𑀓𑀢𑀸 (𑀅𑀝𑁆𑀞.)], 𑀳𑁂𑀫𑀘𑁆𑀙𑀤𑀦𑀙𑀸𑀤𑀺𑀢𑀸.

𑁪𑁦. ‘‘𑀘𑀢𑀼𑀤𑁆𑀤𑀺𑀲𑀸 𑀧𑁄𑀓𑁆𑀔𑀭𑀜𑁆𑀜𑁄, 𑀧𑀤𑀼𑀫𑀼𑀧𑁆𑀧𑀮𑀲𑀦𑁆𑀣𑀢𑀸;

𑀲𑁄𑀯𑀡𑁆𑀡𑀭𑀽𑀧𑀸 𑀔𑀸𑀬𑀦𑁆𑀢𑀼, 𑀧𑀤𑁆𑀫𑀁𑀭𑁂𑀡𑀼𑀭𑀚𑀼𑀕𑁆𑀕𑀢𑀸.

𑁪𑁧. ‘‘𑀧𑀼𑀧𑁆𑀨𑀦𑁆𑀢𑀼 𑀧𑀸𑀤𑀧𑀸 𑀲𑀩𑁆𑀩𑁂, 𑀧𑀸𑀲𑀸𑀤𑀲𑁆𑀲 𑀲𑀫𑀦𑁆𑀢𑀢𑁄;

𑀲𑀬𑀜𑁆𑀘 𑀧𑀼𑀧𑁆𑀨𑀸 𑀫𑀼𑀜𑁆𑀘𑀺𑀢𑁆𑀯𑀸, 𑀕𑀦𑁆𑀢𑁆𑀯𑀸 𑀪𑀯𑀦𑀫𑁄𑀓𑀺𑀭𑀼𑀁.

𑁪𑁨. ‘‘𑀲𑀺𑀔𑀺𑀦𑁄 𑀢𑀢𑁆𑀣 𑀦𑀘𑁆𑀘𑀦𑁆𑀢𑀼, 𑀤𑀺𑀩𑁆𑀩𑀳𑀁𑀲𑀸 𑀧𑀓𑀽𑀚𑀭𑁂;

𑀓𑀭𑀯𑀻𑀓𑀸 𑀘 𑀕𑀸𑀬𑀦𑁆𑀢𑀼, 𑀤𑀺𑀚𑀲𑀗𑁆𑀖𑀸 𑀲𑀫𑀦𑁆𑀢𑀢𑁄.

𑁪𑁩. ‘‘𑀪𑁂𑀭𑀺𑀬𑁄 𑀲𑀩𑁆𑀩𑀸 𑀯𑀚𑁆𑀚𑀦𑁆𑀢𑀼, 𑀯𑀻𑀡𑀸 𑀲𑀩𑁆𑀩𑀸 𑀭𑀲𑀦𑁆𑀢𑀼 [𑀭𑀯𑀦𑁆𑀢𑀼 (𑀲𑀻. 𑀲𑁆𑀬𑀸.)] 𑀢𑀸;

𑀲𑀩𑁆𑀩𑀸 𑀲𑀗𑁆𑀕𑀻𑀢𑀺 𑀯𑀢𑁆𑀢𑀦𑁆𑀢𑀼, 𑀧𑀸𑀲𑀸𑀤𑀲𑁆𑀲 𑀲𑀫𑀦𑁆𑀢𑀢𑁄.

𑁪𑁪. ‘‘𑀬𑀸𑀯𑀢𑀸 𑀩𑀼𑀤𑁆𑀥𑀔𑁂𑀢𑁆𑀢𑀫𑁆𑀳𑀺, 𑀘𑀓𑁆𑀓𑀯𑀸𑀴𑁂 𑀢𑀢𑁄 𑀧𑀭𑁂;

𑀫𑀳𑀦𑁆𑀢𑀸 𑀚𑁄𑀢𑀺𑀲𑀫𑁆𑀧𑀦𑁆𑀦𑀸, 𑀅𑀘𑁆𑀙𑀺𑀦𑁆𑀦𑀸 𑀭𑀢𑀦𑀸𑀫𑀬𑀸.

𑁪𑁫. ‘‘𑀢𑀺𑀝𑁆𑀞𑀦𑁆𑀢𑀼 𑀲𑁄𑀡𑁆𑀡𑀧𑀮𑁆𑀮𑀗𑁆𑀓𑀸, 𑀤𑀻𑀧𑀭𑀼𑀓𑁆𑀔𑀸 𑀚𑀮𑀦𑁆𑀢𑀼 𑀢𑁂;

𑀪𑀯𑀦𑁆𑀢𑀼 𑀏𑀓𑀧𑀚𑁆𑀚𑁄𑀢𑀸, 𑀤𑀲𑀲𑀳𑀲𑁆𑀲𑀺𑀧𑀭𑀫𑁆𑀧𑀭𑀸.

𑁪𑁬. ‘‘𑀕𑀡𑀺𑀓𑀸 𑀮𑀸𑀲𑀺𑀓𑀸 𑀘𑁂𑀯, 𑀦𑀘𑁆𑀘𑀦𑁆𑀢𑀼 𑀅𑀘𑁆𑀙𑀭𑀸𑀕𑀡𑀸;

𑀦𑀸𑀦𑀸𑀭𑀗𑁆𑀕𑀸 𑀧𑀤𑀺𑀲𑁆𑀲𑀦𑁆𑀢𑀼, 𑀧𑀸𑀲𑀸𑀤𑀲𑁆𑀲 𑀲𑀫𑀦𑁆𑀢𑀢𑁄.

𑁪𑁭. ‘‘𑀤𑀼𑀫𑀕𑁆𑀕𑁂 𑀧𑀩𑁆𑀩𑀢𑀕𑁆𑀕𑁂 𑀯𑀸, 𑀲𑀺𑀦𑁂𑀭𑀼𑀕𑀺𑀭𑀺𑀫𑀼𑀤𑁆𑀥𑀦𑀺;

𑀉𑀲𑁆𑀲𑀸𑀧𑁂𑀫𑀺 𑀥𑀚𑀁 𑀲𑀩𑁆𑀩𑀁, 𑀯𑀺𑀘𑀺𑀢𑁆𑀢𑀁 𑀧𑀜𑁆𑀘𑀯𑀡𑁆𑀡𑀺𑀓𑀁.

𑁪𑁮. ‘‘𑀦𑀭𑀸 𑀦𑀸𑀕𑀸 𑀘 𑀕𑀦𑁆𑀥𑀩𑁆𑀩𑀸, 𑀲𑀩𑁆𑀩𑁂 𑀤𑁂𑀯𑀸 𑀉𑀧𑁂𑀦𑁆𑀢𑀼 𑀢𑁂;

𑀦𑀫𑀲𑁆𑀲𑀦𑁆𑀢𑀸 𑀧𑀜𑁆𑀚𑀮𑀺𑀓𑀸, 𑀧𑀸𑀲𑀸𑀤𑀁 𑀧𑀭𑀺𑀯𑀸𑀭𑀬𑀼𑀁.

𑁪𑁯. ‘‘𑀬𑀁 𑀓𑀺𑀜𑁆𑀘𑀺 𑀓𑀼𑀲𑀮𑀁 𑀓𑀫𑁆𑀫𑀁, 𑀓𑀢𑁆𑀢𑀩𑁆𑀩𑀁 𑀓𑀺𑀭𑀺𑀬𑀁 𑀫𑀫;

𑀓𑀸𑀬𑁂𑀦 𑀯𑀸𑀘𑀸 𑀫𑀦𑀲𑀸, 𑀢𑀺𑀤𑀲𑁂 𑀲𑀼𑀓𑀢𑀁 𑀓𑀢𑀁.

𑁫𑁦. ‘‘𑀬𑁂 𑀲𑀢𑁆𑀢𑀸 𑀲𑀜𑁆𑀜𑀺𑀦𑁄 𑀅𑀢𑁆𑀣𑀺, 𑀬𑁂 𑀘 𑀲𑀢𑁆𑀢𑀸 𑀅𑀲𑀜𑁆𑀜𑀺𑀦𑁄;

𑀓𑀢𑀁 𑀧𑀼𑀜𑁆𑀜𑀨𑀮𑀁 𑀫𑀬𑁆𑀳𑀁, 𑀲𑀩𑁆𑀩𑁂 𑀪𑀸𑀕𑀻 𑀪𑀯𑀦𑁆𑀢𑀼 𑀢𑁂.

𑁫𑁧. ‘‘𑀬𑁂𑀲𑀁 𑀓𑀢𑀁 𑀲𑀼𑀯𑀺𑀤𑀺𑀢𑀁, 𑀤𑀺𑀦𑁆𑀦𑀁 𑀧𑀼𑀜𑁆𑀜𑀨𑀮𑀁 𑀫𑀬𑀸;

𑀬𑁂 𑀘 𑀢𑀢𑁆𑀣 [𑀢𑀲𑁆𑀫𑀺𑀁 (𑀲𑀻. 𑀓.)] 𑀦 𑀚𑀸𑀦𑀦𑁆𑀢𑀺, 𑀤𑁂𑀯𑀸 𑀕𑀦𑁆𑀢𑁆𑀯𑀸 𑀦𑀺𑀯𑁂𑀤𑀬𑀼𑀁.

𑁫𑁨. ‘‘𑀲𑀩𑁆𑀩𑀮𑁄𑀓𑀫𑁆𑀳𑀺 [𑀲𑀩𑁆𑀩𑁂 𑀮𑁄𑀓𑀫𑁆𑀳𑀺 (𑀲𑁆𑀬𑀸. 𑀓.)] 𑀬𑁂 𑀲𑀢𑁆𑀢𑀸, 𑀚𑀻𑀯𑀦𑁆𑀢𑀸𑀳𑀸𑀭𑀳𑁂𑀢𑀼𑀓𑀸;

𑀫𑀦𑀼𑀜𑁆𑀜𑀁 𑀪𑁄𑀚𑀦𑀁 𑀲𑀩𑁆𑀩𑀁 [𑀲𑀩𑁆𑀩𑁂 (𑀲𑁆𑀬𑀸.)], 𑀮𑀪𑀦𑁆𑀢𑀼 𑀫𑀫 𑀘𑁂𑀢𑀲𑀸.

𑁫𑁩. ‘‘𑀫𑀦𑀲𑀸 𑀤𑀸𑀦𑀁 𑀫𑀬𑀸 𑀤𑀺𑀦𑁆𑀦𑀁, 𑀫𑀦𑀲𑀸 𑀧𑀲𑀸𑀤𑀫𑀸𑀯𑀳𑀺𑀁;

𑀧𑀽𑀚𑀺𑀢𑀸 𑀲𑀩𑁆𑀩𑀲𑀫𑁆𑀩𑀼𑀤𑁆𑀥𑀸, 𑀧𑀘𑁆𑀘𑁂𑀓𑀸 𑀚𑀺𑀦𑀲𑀸𑀯𑀓𑀸.

𑁫𑁪. ‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

𑁫𑁫. ‘‘𑀤𑀼𑀯𑁂 𑀪𑀯𑁂 𑀧𑀚𑀸𑀦𑀸𑀫𑀺, 𑀤𑁂𑀯𑀢𑁆𑀢𑁂 𑀅𑀣 𑀫𑀸𑀦𑀼𑀲𑁂;

𑀅𑀜𑁆𑀜𑀁 𑀕𑀢𑀺𑀁 𑀦 𑀚𑀸𑀦𑀸𑀫𑀺, 𑀫𑀦𑀲𑀸 𑀧𑀢𑁆𑀣𑀦𑀸𑀨𑀮𑀁.

𑁫𑁬. ‘‘𑀤𑁂𑀯𑀸𑀦𑀁 𑀅𑀥𑀺𑀓𑁄 𑀳𑁄𑀫𑀺, 𑀪𑀯𑀸𑀫𑀺 𑀫𑀦𑀼𑀚𑀸𑀥𑀺𑀧𑁄;

𑀭𑀽𑀧𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑁄, 𑀧𑀜𑁆𑀜𑀸𑀬 𑀅𑀲𑀫𑁄 𑀪𑀯𑁂.

𑁫𑁭. ‘‘𑀪𑁄𑀚𑀦𑀁 𑀯𑀺𑀯𑀺𑀥𑀁 𑀲𑁂𑀝𑁆𑀞𑀁, 𑀭𑀢𑀦𑀜𑁆𑀘 𑀅𑀦𑀧𑁆𑀧𑀓𑀁;

𑀯𑀺𑀯𑀺𑀥𑀸𑀦𑀺 𑀘 𑀯𑀢𑁆𑀣𑀸𑀦𑀺, 𑀦𑀪𑀸 [𑀦𑀪𑀲𑀸 (𑀲𑁆𑀬𑀸.)] 𑀔𑀺𑀧𑁆𑀧𑀁 𑀉𑀧𑁂𑀦𑁆𑀢𑀺 𑀫𑀁.

𑁫𑁮. ‘‘𑀧𑀣𑀩𑁆𑀬𑀸 𑀧𑀩𑁆𑀩𑀢𑁂 𑀘𑁂𑀯, 𑀆𑀓𑀸𑀲𑁂 𑀉𑀤𑀓𑁂 𑀯𑀦𑁂;

𑀬𑀁 𑀬𑀁 𑀳𑀢𑁆𑀣𑀁 𑀧𑀲𑀸𑀭𑁂𑀫𑀺, 𑀤𑀺𑀩𑁆𑀩𑀸 𑀪𑀓𑁆𑀔𑀸 𑀉𑀧𑁂𑀦𑁆𑀢𑀺 𑀫𑀁.

𑁫𑁯. ‘‘𑀧𑀣𑀩𑁆𑀬𑀸 𑀧𑀩𑁆𑀩𑀢𑁂 𑀘𑁂𑀯, 𑀆𑀓𑀸𑀲𑁂 𑀉𑀤𑀓𑁂 𑀯𑀦𑁂;

𑀬𑀁 𑀬𑀁 𑀳𑀢𑁆𑀣𑀁 𑀧𑀲𑀸𑀭𑁂𑀫𑀺, 𑀭𑀢𑀦𑀸 𑀲𑀩𑁆𑀩𑁂 𑀉𑀧𑁂𑀦𑁆𑀢𑀺 𑀫𑀁.

𑁬𑁦. ‘‘𑀧𑀣𑀩𑁆𑀬𑀸 𑀧𑀩𑁆𑀩𑀢𑁂 𑀘𑁂𑀯, 𑀆𑀓𑀸𑀲𑁂 𑀉𑀤𑀓𑁂 𑀯𑀦𑁂;

𑀬𑀁 𑀬𑀁 𑀳𑀢𑁆𑀣𑀁 𑀧𑀲𑀸𑀭𑁂𑀫𑀺, 𑀲𑀩𑁆𑀩𑁂 𑀕𑀦𑁆𑀥𑀸 𑀉𑀧𑁂𑀦𑁆𑀢𑀺 𑀫𑀁.

𑁬𑁧. ‘‘𑀧𑀣𑀩𑁆𑀬𑀸 𑀧𑀩𑁆𑀩𑀢𑁂 𑀘𑁂𑀯, 𑀆𑀓𑀸𑀲𑁂 𑀉𑀤𑀓𑁂 𑀯𑀦𑁂;

𑀬𑀁 𑀬𑀁 [𑀬𑀢𑁆𑀣 (𑀲𑁆𑀬𑀸.), 𑀬𑀜𑁆𑀜𑀁 (𑀓.)] 𑀳𑀢𑁆𑀣𑀁 𑀧𑀲𑀸𑀭𑁂𑀫𑀺, 𑀲𑀩𑁆𑀩𑁂 𑀬𑀸𑀦𑀸 𑀉𑀧𑁂𑀦𑁆𑀢𑀺 𑀫𑀁.

𑁬𑁨. ‘‘𑀧𑀣𑀩𑁆𑀬𑀸 𑀧𑀩𑁆𑀩𑀢𑁂 𑀘𑁂𑀯, 𑀆𑀓𑀸𑀲𑁂 𑀉𑀤𑀓𑁂 𑀯𑀦𑁂;

𑀬𑀁 𑀬𑀁 𑀳𑀢𑁆𑀣𑀁 𑀧𑀲𑀸𑀭𑁂𑀫𑀺, 𑀲𑀩𑁆𑀩𑁂 𑀫𑀸𑀮𑀸 𑀉𑀧𑁂𑀦𑁆𑀢𑀺 𑀫𑀁.

𑁬𑁩. ‘‘𑀧𑀣𑀩𑁆𑀬𑀸 𑀧𑀩𑁆𑀩𑀢𑁂 𑀘𑁂𑀯, 𑀆𑀓𑀸𑀲𑁂 𑀉𑀤𑀓𑁂 𑀯𑀦𑁂;

𑀬𑀁 𑀬𑀁 𑀳𑀢𑁆𑀣𑀁 𑀧𑀲𑀸𑀭𑁂𑀫𑀺, 𑀅𑀮𑀗𑁆𑀓𑀸𑀭𑀸 𑀉𑀧𑁂𑀦𑁆𑀢𑀺 𑀫𑀁.

𑁬𑁪. ‘‘𑀧𑀣𑀩𑁆𑀬𑀸 𑀧𑀩𑁆𑀩𑀢𑁂 𑀘𑁂𑀯, 𑀆𑀓𑀸𑀲𑁂 𑀉𑀤𑀓𑁂 𑀯𑀦𑁂;

𑀬𑀁 𑀬𑀁 𑀳𑀢𑁆𑀣𑀁 𑀧𑀲𑀸𑀭𑁂𑀫𑀺, 𑀲𑀩𑁆𑀩𑀸 𑀓𑀜𑁆𑀜𑀸 𑀉𑀧𑁂𑀦𑁆𑀢𑀺 𑀫𑀁.

𑁬𑁫. ‘‘𑀧𑀣𑀩𑁆𑀬𑀸 𑀧𑀩𑁆𑀩𑀢𑁂 𑀘𑁂𑀯, 𑀆𑀓𑀸𑀲𑁂 𑀉𑀤𑀓𑁂 𑀯𑀦𑁂;

𑀬𑀁 𑀬𑀁 𑀳𑀢𑁆𑀣𑀁 𑀧𑀲𑀸𑀭𑁂𑀫𑀺, 𑀫𑀥𑀼𑀲𑀓𑁆𑀔𑀭𑀸 𑀉𑀧𑁂𑀦𑁆𑀢𑀺 𑀫𑀁.

𑁬𑁬. ‘‘𑀧𑀣𑀩𑁆𑀬𑀸 𑀧𑀩𑁆𑀩𑀢𑁂 𑀘𑁂𑀯, 𑀆𑀓𑀸𑀲𑁂 𑀉𑀤𑀓𑁂 𑀯𑀦𑁂;

𑀬𑀁 𑀬𑀁 𑀳𑀢𑁆𑀣𑀁 𑀧𑀲𑀸𑀭𑁂𑀫𑀺, 𑀲𑀩𑁆𑀩𑁂 𑀔𑀚𑁆𑀚𑀸 𑀉𑀧𑁂𑀦𑁆𑀢𑀺 𑀫𑀁.

𑁬𑁭. ‘‘𑀅𑀥𑀦𑁂 𑀅𑀤𑁆𑀥𑀺𑀓 [𑀅𑀤𑁆𑀥𑀺𑀓𑁂 (𑀲𑁆𑀬𑀸.)] 𑀚𑀦𑁂, 𑀬𑀸𑀘𑀓𑁂 𑀘 𑀧𑀣𑀸𑀯𑀺𑀦𑁄;

𑀤𑀤𑀸𑀫𑀺𑀳𑀁 [𑀤𑀤𑀸𑀫𑀺𑀳 (𑀲𑀻.) 𑀤𑀤𑀸𑀫𑀺 𑀢𑀁 (𑀲𑁆𑀬𑀸.)] 𑀤𑀸𑀦𑀯𑀭𑀁, 𑀲𑀫𑁆𑀩𑁄𑀥𑀺𑀯𑀭𑀧𑀢𑁆𑀢𑀺𑀬𑀸.

𑁬𑁮. ‘‘𑀦𑀸𑀤𑁂𑀦𑁆𑀢𑁄 𑀧𑀩𑁆𑀩𑀢𑀁 𑀲𑁂𑀮𑀁, 𑀕𑀚𑁆𑀚𑁂𑀦𑁆𑀢𑁄 𑀩𑀳𑀮𑀁 𑀕𑀺𑀭𑀺𑀁;

𑀲𑀤𑁂𑀯𑀓𑀁 𑀳𑀸𑀲𑀬𑀦𑁆𑀢𑁄, 𑀩𑀼𑀤𑁆𑀥𑁄 𑀮𑁄𑀓𑁂 𑀪𑀯𑀸𑀫𑀳𑀁.

𑁬𑁯. ‘‘𑀤𑀺𑀲𑀸 𑀤𑀲𑀯𑀺𑀥𑀸 𑀮𑁄𑀓𑁂, 𑀬𑀸𑀬𑀢𑁄 𑀦𑀢𑁆𑀣𑀺 𑀅𑀦𑁆𑀢𑀓𑀁;

𑀢𑀲𑁆𑀫𑀺𑀜𑁆𑀘 𑀤𑀺𑀲𑀸𑀪𑀸𑀕𑀫𑁆𑀳𑀺, 𑀩𑀼𑀤𑁆𑀥𑀔𑁂𑀢𑁆𑀢𑀸 𑀅𑀲𑀗𑁆𑀔𑀺𑀬𑀸.

𑁭𑁦. ‘‘𑀧𑀪𑀸 𑀧𑀓𑀺𑀢𑁆𑀢𑀺𑀢𑀸 𑀫𑀬𑁆𑀳𑀁, 𑀬𑀫𑀓𑀸 𑀭𑀁𑀲𑀺𑀯𑀸𑀳𑀦𑀸;

𑀏𑀢𑁆𑀣𑀦𑁆𑀢𑀭𑁂 𑀭𑀁𑀲𑀺𑀚𑀸𑀮𑀁, 𑀆𑀮𑁄𑀓𑁄 𑀯𑀺𑀧𑀼𑀮𑁄 𑀪𑀯𑁂.

𑁭𑁧. ‘‘𑀏𑀢𑁆𑀢𑀓𑁂 𑀮𑁄𑀓𑀥𑀸𑀢𑀼𑀫𑁆𑀳𑀺, 𑀲𑀩𑁆𑀩𑁂 𑀧𑀲𑁆𑀲𑀦𑁆𑀢𑀼 𑀫𑀁 𑀚𑀦𑀸;

𑀲𑀩𑁆𑀩𑁂 𑀫𑀁 𑀅𑀦𑀼𑀯𑀢𑁆𑀢𑀦𑁆𑀢𑀼, 𑀬𑀸𑀯 𑀩𑁆𑀭𑀳𑁆𑀫𑀦𑀺𑀯𑁂𑀲𑀦𑀁 [𑀲𑀩𑁆𑀩𑁂𑀯 𑀲𑀼𑀫𑀦𑀸 𑀳𑁄𑀦𑁆𑀢𑀼, 𑀲𑀩𑁆𑀩𑁂 𑀫𑀁 𑀅𑀦𑀼𑀯𑀢𑁆𑀢𑀭𑁂 (𑀲𑀻. 𑀲𑁆𑀬𑀸.)].

𑁭𑁨. ‘‘𑀯𑀺𑀲𑀺𑀝𑁆𑀞𑀫𑀥𑀼𑀦𑀸𑀤𑁂𑀦, 𑀅𑀫𑀢𑀪𑁂𑀭𑀺𑀫𑀸𑀳𑀦𑀺𑀁;

𑀏𑀢𑁆𑀣𑀦𑁆𑀢𑀭𑁂 𑀚𑀦𑀸 𑀲𑀩𑁆𑀩𑁂, 𑀲𑀼𑀡𑀦𑁆𑀢𑀼 𑀫𑀥𑀼𑀭𑀁 𑀕𑀺𑀭𑀁.

𑁭𑁩. ‘‘𑀥𑀫𑁆𑀫𑀫𑁂𑀖𑁂𑀦 𑀯𑀲𑁆𑀲𑀦𑁆𑀢𑁂, 𑀲𑀩𑁆𑀩𑁂 𑀳𑁄𑀦𑁆𑀢𑀼 𑀅𑀦𑀸𑀲𑀯𑀸;

𑀬𑁂𑀢𑁆𑀣 𑀧𑀘𑁆𑀙𑀺𑀫𑀓𑀸 𑀲𑀢𑁆𑀢𑀸, 𑀲𑁄𑀢𑀸𑀧𑀦𑁆𑀦𑀸 𑀪𑀯𑀦𑁆𑀢𑀼 𑀢𑁂.

𑁭𑁪. ‘‘𑀤𑀢𑁆𑀯𑀸 𑀤𑀸𑀢𑀩𑁆𑀩𑀓𑀁 𑀤𑀸𑀦𑀁, 𑀲𑀻𑀮𑀁 𑀧𑀽𑀭𑁂𑀢𑁆𑀯𑀸 𑀅𑀲𑁂𑀲𑀢𑁄;

𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀺𑀁 𑀕𑀦𑁆𑀢𑁆𑀯𑀸, 𑀧𑀢𑁆𑀢𑁄 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫𑀁.