𑁪. 𑀅𑀕𑁆𑀕𑀜𑁆𑀜𑀲𑀼𑀢𑁆𑀢𑀁

𑀯𑀸𑀲𑁂𑀝𑁆𑀞𑀪𑀸𑀭𑀤𑁆𑀯𑀸𑀚𑀸

𑁧𑁧𑁧. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀧𑀼𑀩𑁆𑀩𑀸𑀭𑀸𑀫𑁂 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑀸𑀲𑁂𑀝𑁆𑀞𑀪𑀸𑀭𑀤𑁆𑀯𑀸𑀚𑀸 𑀪𑀺𑀓𑁆𑀔𑀽𑀲𑀼 𑀧𑀭𑀺𑀯𑀲𑀦𑁆𑀢𑀺 𑀪𑀺𑀓𑁆𑀔𑀼𑀪𑀸𑀯𑀁 𑀆𑀓𑀗𑁆𑀔𑀫𑀸𑀦𑀸. 𑀅𑀣 𑀔𑁄 𑀪𑀕𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀧𑀸𑀲𑀸𑀤𑀸 𑀑𑀭𑁄𑀳𑀺𑀢𑁆𑀯𑀸 𑀧𑀸𑀲𑀸𑀤𑀧𑀘𑁆𑀙𑀸𑀬𑀸𑀬𑀁 [𑀧𑀸𑀲𑀸𑀤𑀘𑁆𑀙𑀸𑀬𑀸𑀬𑀁 (𑀓.)] 𑀅𑀩𑁆𑀪𑁄𑀓𑀸𑀲𑁂 𑀘𑀗𑁆𑀓𑀫𑀢𑀺.

𑁧𑁧𑁨. 𑀅𑀤𑁆𑀤𑀲𑀸 𑀔𑁄 𑀯𑀸𑀲𑁂𑀝𑁆𑀞𑁄 𑀪𑀕𑀯𑀦𑁆𑀢𑀁 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑀁 𑀧𑀸𑀲𑀸𑀤𑀸 𑀑𑀭𑁄𑀳𑀺𑀢𑁆𑀯𑀸 𑀧𑀸𑀲𑀸𑀤𑀧𑀘𑁆𑀙𑀸𑀬𑀸𑀬𑀁 𑀅𑀩𑁆𑀪𑁄𑀓𑀸𑀲𑁂 𑀘𑀗𑁆𑀓𑀫𑀦𑁆𑀢𑀁. 𑀤𑀺𑀲𑁆𑀯𑀸𑀦 𑀪𑀸𑀭𑀤𑁆𑀯𑀸𑀚𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀬𑀁, 𑀆𑀯𑀼𑀲𑁄 𑀪𑀸𑀭𑀤𑁆𑀯𑀸𑀚, 𑀪𑀕𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀧𑀸𑀲𑀸𑀤𑀸 𑀑𑀭𑁄𑀳𑀺𑀢𑁆𑀯𑀸 𑀧𑀸𑀲𑀸𑀤𑀧𑀘𑁆𑀙𑀸𑀬𑀸𑀬𑀁 𑀅𑀩𑁆𑀪𑁄𑀓𑀸𑀲𑁂 𑀘𑀗𑁆𑀓𑀫𑀢𑀺. 𑀆𑀬𑀸𑀫𑀸𑀯𑀼𑀲𑁄 𑀪𑀸𑀭𑀤𑁆𑀯𑀸𑀚, 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀲𑁆𑀲𑀸𑀫; 𑀅𑀧𑁆𑀧𑁂𑀯 𑀦𑀸𑀫 𑀮𑀪𑁂𑀬𑁆𑀬𑀸𑀫 𑀪𑀕𑀯𑀢𑁄 𑀲𑀦𑁆𑀢𑀺𑀓𑀸 [𑀲𑀫𑁆𑀫𑀼𑀔𑀸 (𑀲𑁆𑀬𑀸. 𑀓.)] 𑀥𑀫𑁆𑀫𑀺𑀁 𑀓𑀣𑀁 𑀲𑀯𑀦𑀸𑀬𑀸’’𑀢𑀺. ‘‘𑀏𑀯𑀫𑀸𑀯𑀼𑀲𑁄’’𑀢𑀺 𑀔𑁄 𑀪𑀸𑀭𑀤𑁆𑀯𑀸𑀚𑁄 𑀯𑀸𑀲𑁂𑀝𑁆𑀞𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀺.

𑁧𑁧𑁩. 𑀅𑀣 𑀔𑁄 𑀯𑀸𑀲𑁂𑀝𑁆𑀞𑀪𑀸𑀭𑀤𑁆𑀯𑀸𑀚𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀘𑀗𑁆𑀓𑀫𑀦𑁆𑀢𑀁 𑀅𑀦𑀼𑀘𑀗𑁆𑀓𑀫𑀺𑀁𑀲𑀼. 𑀅𑀣 𑀔𑁄 𑀪𑀕𑀯𑀸 𑀯𑀸𑀲𑁂𑀝𑁆𑀞𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑀼𑀫𑁆𑀳𑁂 𑀔𑁆𑀯𑀢𑁆𑀣, 𑀯𑀸𑀲𑁂𑀝𑁆𑀞, 𑀩𑁆𑀭𑀸𑀳𑁆𑀫𑀡𑀚𑀘𑁆𑀘𑀸 𑀩𑁆𑀭𑀸𑀳𑁆𑀫𑀡𑀓𑀼𑀮𑀻𑀦𑀸 𑀩𑁆𑀭𑀸𑀳𑁆𑀫𑀡𑀓𑀼𑀮𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀸, 𑀓𑀘𑁆𑀘𑀺 𑀯𑁄, 𑀯𑀸𑀲𑁂𑀝𑁆𑀞, 𑀩𑁆𑀭𑀸𑀳𑁆𑀫𑀡𑀸 𑀦 𑀅𑀓𑁆𑀓𑁄𑀲𑀦𑁆𑀢𑀺 𑀦 𑀧𑀭𑀺𑀪𑀸𑀲𑀦𑁆𑀢𑀻’’𑀢𑀺? ‘‘𑀢𑀕𑁆𑀖 𑀦𑁄, 𑀪𑀦𑁆𑀢𑁂, 𑀩𑁆𑀭𑀸𑀳𑁆𑀫𑀡𑀸 𑀅𑀓𑁆𑀓𑁄𑀲𑀦𑁆𑀢𑀺 𑀧𑀭𑀺𑀪𑀸𑀲𑀦𑁆𑀢𑀺 𑀅𑀢𑁆𑀢𑀭𑀽𑀧𑀸𑀬 𑀧𑀭𑀺𑀪𑀸𑀲𑀸𑀬 𑀧𑀭𑀺𑀧𑀼𑀡𑁆𑀡𑀸𑀬, 𑀦𑁄 𑀅𑀧𑀭𑀺𑀧𑀼𑀡𑁆𑀡𑀸𑀬𑀸’’𑀢𑀺. ‘‘𑀬𑀣𑀸 𑀓𑀣𑀁 𑀧𑀦 𑀯𑁄, 𑀯𑀸𑀲𑁂𑀝𑁆𑀞, 𑀩𑁆𑀭𑀸𑀳𑁆𑀫𑀡𑀸 𑀅𑀓𑁆𑀓𑁄𑀲𑀦𑁆𑀢𑀺 𑀧𑀭𑀺𑀪𑀸𑀲𑀦𑁆𑀢𑀺 𑀅𑀢𑁆𑀢𑀭𑀽𑀧𑀸𑀬 𑀧𑀭𑀺𑀪𑀸𑀲𑀸𑀬 𑀧𑀭𑀺𑀧𑀼𑀡𑁆𑀡𑀸𑀬, 𑀦𑁄 𑀅𑀧𑀭𑀺𑀧𑀼𑀡𑁆𑀡𑀸𑀬𑀸’’𑀢𑀺? ‘‘𑀩𑁆𑀭𑀸𑀳𑁆𑀫𑀡𑀸, 𑀪𑀦𑁆𑀢𑁂, 𑀏𑀯𑀫𑀸𑀳𑀁𑀲𑀼 𑁋 ‘𑀩𑁆𑀭𑀸𑀳𑁆𑀫𑀡𑁄𑀯 𑀲𑁂𑀝𑁆𑀞𑁄 𑀯𑀡𑁆𑀡𑁄, 𑀳𑀻𑀦𑀸 𑀅𑀜𑁆𑀜𑁂 𑀯𑀡𑁆𑀡𑀸 [𑀳𑀻𑀦𑁄 𑀅𑀜𑁆𑀜𑁄 𑀯𑀡𑁆𑀡𑁄 (𑀲𑀻. 𑀧𑀻. 𑀫. 𑀦𑀺. 𑁨 𑀫𑀥𑀼𑀭𑀲𑀼𑀢𑁆𑀢)]. 𑀩𑁆𑀭𑀸𑀳𑁆𑀫𑀡𑁄𑀯 𑀲𑀼𑀓𑁆𑀓𑁄 𑀯𑀡𑁆𑀡𑁄, 𑀓𑀡𑁆𑀳𑀸 𑀅𑀜𑁆𑀜𑁂 𑀯𑀡𑁆𑀡𑀸 [𑀓𑀡𑁆𑀳𑁄 𑀅𑀜𑁆𑀜𑁄 𑀯𑀡𑁆𑀡𑁄 (𑀲𑀻. 𑀧𑀻. 𑀫. 𑀦𑀺. 𑁨 𑀫𑀥𑀼𑀭𑀲𑀼𑀢𑁆𑀢)]. 𑀩𑁆𑀭𑀸𑀳𑁆𑀫𑀡𑀸𑀯 𑀲𑀼𑀚𑁆𑀛𑀦𑁆𑀢𑀺, 𑀦𑁄 𑀅𑀩𑁆𑀭𑀸𑀳𑁆𑀫𑀡𑀸. 𑀩𑁆𑀭𑀸𑀳𑁆𑀫𑀡𑀸𑀯 [𑀩𑁆𑀭𑀸𑀳𑁆𑀫𑀡𑀸 (𑀲𑁆𑀬𑀸.)] 𑀩𑁆𑀭𑀳𑁆𑀫𑀼𑀦𑁄 𑀧𑀼𑀢𑁆𑀢𑀸 𑀑𑀭𑀲𑀸 𑀫𑀼𑀔𑀢𑁄 𑀚𑀸𑀢𑀸 𑀩𑁆𑀭𑀳𑁆𑀫𑀚𑀸 𑀩𑁆𑀭𑀳𑁆𑀫𑀦𑀺𑀫𑁆𑀫𑀺𑀢𑀸 𑀩𑁆𑀭𑀳𑁆𑀫𑀤𑀸𑀬𑀸𑀤𑀸. 𑀢𑁂 𑀢𑀼𑀫𑁆𑀳𑁂 𑀲𑁂𑀝𑁆𑀞𑀁 𑀯𑀡𑁆𑀡𑀁 𑀳𑀺𑀢𑁆𑀯𑀸 𑀳𑀻𑀦𑀫𑀢𑁆𑀣 𑀯𑀡𑁆𑀡𑀁 𑀅𑀚𑁆𑀛𑀼𑀧𑀕𑀢𑀸, 𑀬𑀤𑀺𑀤𑀁 𑀫𑀼𑀡𑁆𑀟𑀓𑁂 𑀲𑀫𑀡𑀓𑁂 𑀇𑀩𑁆𑀪𑁂 𑀓𑀡𑁆𑀳𑁂 𑀩𑀦𑁆𑀥𑀼𑀧𑀸𑀤𑀸𑀧𑀘𑁆𑀘𑁂. 𑀢𑀬𑀺𑀤𑀁 𑀦 𑀲𑀸𑀥𑀼, 𑀢𑀬𑀺𑀤𑀁 𑀦𑀧𑁆𑀧𑀢𑀺𑀭𑀽𑀧𑀁, 𑀬𑀁 𑀢𑀼𑀫𑁆𑀳𑁂 𑀲𑁂𑀝𑁆𑀞𑀁 𑀯𑀡𑁆𑀡𑀁 𑀳𑀺𑀢𑁆𑀯𑀸 𑀳𑀻𑀦𑀫𑀢𑁆𑀣 𑀯𑀡𑁆𑀡𑀁 𑀅𑀚𑁆𑀛𑀼𑀧𑀕𑀢𑀸 𑀬𑀤𑀺𑀤𑀁 𑀫𑀼𑀡𑁆𑀟𑀓𑁂 𑀲𑀫𑀡𑀓𑁂 𑀇𑀩𑁆𑀪𑁂 𑀓𑀡𑁆𑀳𑁂 𑀩𑀦𑁆𑀥𑀼𑀧𑀸𑀤𑀸𑀧𑀘𑁆𑀘𑁂’𑀢𑀺. 𑀏𑀯𑀁 𑀔𑁄 𑀦𑁄, 𑀪𑀦𑁆𑀢𑁂, 𑀩𑁆𑀭𑀸𑀳𑁆𑀫𑀡𑀸 𑀅𑀓𑁆𑀓𑁄𑀲𑀦𑁆𑀢𑀺 𑀧𑀭𑀺𑀪𑀸𑀲𑀦𑁆𑀢𑀺 𑀅𑀢𑁆𑀢𑀭𑀽𑀧𑀸𑀬 𑀧𑀭𑀺𑀪𑀸𑀲𑀸𑀬 𑀧𑀭𑀺𑀧𑀼𑀡𑁆𑀡𑀸𑀬, 𑀦𑁄 𑀅𑀧𑀭𑀺𑀧𑀼𑀡𑁆𑀡𑀸𑀬𑀸’’𑀢𑀺.

𑁧𑁧𑁪. ‘‘𑀢𑀕𑁆𑀖 𑀯𑁄, 𑀯𑀸𑀲𑁂𑀝𑁆𑀞, 𑀩𑁆𑀭𑀸𑀳𑁆𑀫𑀡𑀸 𑀧𑁄𑀭𑀸𑀡𑀁 𑀅𑀲𑁆𑀲𑀭𑀦𑁆𑀢𑀸 𑀏𑀯𑀫𑀸𑀳𑀁𑀲𑀼 𑁋 ‘𑀩𑁆𑀭𑀸𑀳𑁆𑀫𑀡𑁄𑀯 𑀲𑁂𑀝𑁆𑀞𑁄 𑀯𑀡𑁆𑀡𑁄, 𑀳𑀻𑀦𑀸 𑀅𑀜𑁆𑀜𑁂 𑀯𑀡𑁆𑀡𑀸; 𑀩𑁆𑀭𑀸𑀳𑁆𑀫𑀡𑁄𑀯 𑀲𑀼𑀓𑁆𑀓𑁄 𑀯𑀡𑁆𑀡𑁄, 𑀓𑀡𑁆𑀳𑀸 𑀅𑀜𑁆𑀜𑁂 𑀯𑀡𑁆𑀡𑀸; 𑀩𑁆𑀭𑀸𑀳𑁆𑀫𑀡𑀸𑀯 𑀲𑀼𑀚𑁆𑀛𑀦𑁆𑀢𑀺, 𑀦𑁄 𑀅𑀩𑁆𑀭𑀸𑀳𑁆𑀫𑀡𑀸; 𑀩𑁆𑀭𑀸𑀳𑁆𑀫𑀡𑀸𑀯 𑀩𑁆𑀭𑀳𑁆𑀫𑀼𑀦𑁄 𑀧𑀼𑀢𑁆𑀢𑀸 𑀑𑀭𑀲𑀸 𑀫𑀼𑀔𑀢𑁄 𑀚𑀸𑀢𑀸 𑀩𑁆𑀭𑀳𑁆𑀫𑀚𑀸 𑀩𑁆𑀭𑀳𑁆𑀫𑀦𑀺𑀫𑁆𑀫𑀺𑀢𑀸 𑀩𑁆𑀭𑀳𑁆𑀫𑀤𑀸𑀬𑀸𑀤𑀸’𑀢𑀺. 𑀤𑀺𑀲𑁆𑀲𑀦𑁆𑀢𑀺 𑀔𑁄 𑀧𑀦, 𑀯𑀸𑀲𑁂𑀝𑁆𑀞, 𑀩𑁆𑀭𑀸𑀳𑁆𑀫𑀡𑀸𑀦𑀁 𑀩𑁆𑀭𑀸𑀳𑁆𑀫𑀡𑀺𑀬𑁄 𑀉𑀢𑀼𑀦𑀺𑀬𑁄𑀧𑀺 𑀕𑀩𑁆𑀪𑀺𑀦𑀺𑀬𑁄𑀧𑀺 𑀯𑀺𑀚𑀸𑀬𑀫𑀸𑀦𑀸𑀧𑀺 𑀧𑀸𑀬𑀫𑀸𑀦𑀸𑀧𑀺. 𑀢𑁂 𑀘 𑀩𑁆𑀭𑀸𑀳𑁆𑀫𑀡𑀸 𑀬𑁄𑀦𑀺𑀚𑀸𑀯 𑀲𑀫𑀸𑀦𑀸 𑀏𑀯𑀫𑀸𑀳𑀁𑀲𑀼 𑁋 ‘𑀩𑁆𑀭𑀸𑀳𑁆𑀫𑀡𑁄𑀯 𑀲𑁂𑀝𑁆𑀞𑁄 𑀯𑀡𑁆𑀡𑁄, 𑀳𑀻𑀦𑀸 𑀅𑀜𑁆𑀜𑁂 𑀯𑀡𑁆𑀡𑀸; 𑀩𑁆𑀭𑀸𑀳𑁆𑀫𑀡𑁄𑀯 𑀲𑀼𑀓𑁆𑀓𑁄 𑀯𑀡𑁆𑀡𑁄, 𑀓𑀡𑁆𑀳𑀸 𑀅𑀜𑁆𑀜𑁂 𑀯𑀡𑁆𑀡𑀸; 𑀩𑁆𑀭𑀸𑀳𑁆𑀫𑀡𑀸𑀯 𑀲𑀼𑀚𑁆𑀛𑀦𑁆𑀢𑀺, 𑀦𑁄 𑀅𑀩𑁆𑀭𑀸𑀳𑁆𑀫𑀡𑀸; 𑀩𑁆𑀭𑀸𑀳𑁆𑀫𑀡𑀸𑀯 𑀩𑁆𑀭𑀳𑁆𑀫𑀼𑀦𑁄 𑀧𑀼𑀢𑁆𑀢𑀸 𑀑𑀭𑀲𑀸 𑀫𑀼𑀔𑀢𑁄 𑀚𑀸𑀢𑀸 𑀩𑁆𑀭𑀳𑁆𑀫𑀚𑀸 𑀩𑁆𑀭𑀳𑁆𑀫𑀦𑀺𑀫𑁆𑀫𑀺𑀢𑀸 𑀩𑁆𑀭𑀳𑁆𑀫𑀤𑀸𑀬𑀸𑀤𑀸’𑀢𑀺. 𑀢𑁂 [𑀢𑁂 𑀘 (𑀲𑁆𑀬𑀸. 𑀓.)] 𑀩𑁆𑀭𑀳𑁆𑀫𑀸𑀦𑀜𑁆𑀘𑁂𑀯 𑀅𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑀺, 𑀫𑀼𑀲𑀸 𑀘 𑀪𑀸𑀲𑀦𑁆𑀢𑀺, 𑀩𑀳𑀼𑀜𑁆𑀘 𑀅𑀧𑀼𑀜𑁆𑀜𑀁 𑀧𑀲𑀯𑀦𑁆𑀢𑀺.

𑀘𑀢𑀼𑀯𑀡𑁆𑀡𑀲𑀼𑀤𑁆𑀥𑀺

𑁧𑁧𑁫. ‘‘𑀘𑀢𑁆𑀢𑀸𑀭𑁄𑀫𑁂, 𑀯𑀸𑀲𑁂𑀝𑁆𑀞, 𑀯𑀡𑁆𑀡𑀸 𑁋 𑀔𑀢𑁆𑀢𑀺𑀬𑀸, 𑀩𑁆𑀭𑀸𑀳𑁆𑀫𑀡𑀸, 𑀯𑁂𑀲𑁆𑀲𑀸, 𑀲𑀼𑀤𑁆𑀤𑀸. 𑀔𑀢𑁆𑀢𑀺𑀬𑁄𑀧𑀺 𑀔𑁄, 𑀯𑀸𑀲𑁂𑀝𑁆𑀞, 𑀇𑀥𑁂𑀓𑀘𑁆𑀘𑁄 𑀧𑀸𑀡𑀸𑀢𑀺𑀧𑀸𑀢𑀻 𑀳𑁄𑀢𑀺 𑀅𑀤𑀺𑀦𑁆𑀦𑀸𑀤𑀸𑀬𑀻 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀻 𑀫𑀼𑀲𑀸𑀯𑀸𑀤𑀻 𑀧𑀺𑀲𑀼𑀡𑀯𑀸𑀘𑁄 𑀨𑀭𑀼𑀲𑀯𑀸𑀘𑁄 𑀲𑀫𑁆𑀨𑀧𑁆𑀧𑀮𑀸𑀧𑀻 𑀅𑀪𑀺𑀚𑁆𑀛𑀸𑀮𑀼 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀻. 𑀇𑀢𑀺 𑀔𑁄, 𑀯𑀸𑀲𑁂𑀝𑁆𑀞, 𑀬𑁂𑀫𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸 𑀅𑀓𑀼𑀲𑀮𑀲𑀗𑁆𑀔𑀸𑀢𑀸 𑀲𑀸𑀯𑀚𑁆𑀚𑀸 𑀲𑀸𑀯𑀚𑁆𑀚𑀲𑀗𑁆𑀔𑀸𑀢𑀸 𑀅𑀲𑁂𑀯𑀺𑀢𑀩𑁆𑀩𑀸 𑀅𑀲𑁂𑀯𑀺𑀢𑀩𑁆𑀩𑀲𑀗𑁆𑀔𑀸𑀢𑀸 𑀦𑀅𑀮𑀫𑀭𑀺𑀬𑀸 𑀦𑀅𑀮𑀫𑀭𑀺𑀬𑀲𑀗𑁆𑀔𑀸𑀢𑀸 𑀓𑀡𑁆𑀳𑀸 𑀓𑀡𑁆𑀳𑀯𑀺𑀧𑀸𑀓𑀸 𑀯𑀺𑀜𑁆𑀜𑀼𑀕𑀭𑀳𑀺𑀢𑀸, 𑀔𑀢𑁆𑀢𑀺𑀬𑁂𑀧𑀺 𑀢𑁂 [𑀔𑁄 𑀯𑀸𑀲𑁂𑀝𑁆𑀞 (𑀓.)] 𑀇𑀥𑁂𑀓𑀘𑁆𑀘𑁂 𑀲𑀦𑁆𑀤𑀺𑀲𑁆𑀲𑀦𑁆𑀢𑀺. 𑀩𑁆𑀭𑀸𑀳𑁆𑀫𑀡𑁄𑀧𑀺 𑀔𑁄, 𑀯𑀸𑀲𑁂𑀝𑁆𑀞…𑀧𑁂… 𑀯𑁂𑀲𑁆𑀲𑁄𑀧𑀺 𑀔𑁄, 𑀯𑀸𑀲𑁂𑀝𑁆𑀞…𑀧𑁂… 𑀲𑀼𑀤𑁆𑀤𑁄𑀧𑀺 𑀔𑁄, 𑀯𑀸𑀲𑁂𑀝𑁆𑀞, 𑀇𑀥𑁂𑀓𑀘𑁆𑀘𑁄 𑀧𑀸𑀡𑀸𑀢𑀺𑀧𑀸𑀢𑀻 𑀳𑁄𑀢𑀺 𑀅𑀤𑀺𑀦𑁆𑀦𑀸𑀤𑀸𑀬𑀻 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀻 𑀫𑀼𑀲𑀸𑀯𑀸𑀤𑀻 𑀧𑀺𑀲𑀼𑀡𑀯𑀸𑀘𑁄 𑀨𑀭𑀼𑀲𑀯𑀸𑀘𑁄 𑀲𑀫𑁆𑀨𑀧𑁆𑀧𑀮𑀸𑀧𑀻 𑀅𑀪𑀺𑀚𑁆𑀛𑀸𑀮𑀼 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀻. 𑀇𑀢𑀺 𑀔𑁄, 𑀯𑀸𑀲𑁂𑀝𑁆𑀞, 𑀬𑁂𑀫𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸 𑀅𑀓𑀼𑀲𑀮𑀲𑀗𑁆𑀔𑀸𑀢𑀸…𑀧𑁂… 𑀓𑀡𑁆𑀳𑀸 𑀓𑀡𑁆𑀳𑀯𑀺𑀧𑀸𑀓𑀸 𑀯𑀺𑀜𑁆𑀜𑀼𑀕𑀭𑀳𑀺𑀢𑀸; 𑀲𑀼𑀤𑁆𑀤𑁂𑀧𑀺 𑀢𑁂 𑀇𑀥𑁂𑀓𑀘𑁆𑀘𑁂 𑀲𑀦𑁆𑀤𑀺𑀲𑁆𑀲𑀦𑁆𑀢𑀺.

‘‘𑀔𑀢𑁆𑀢𑀺𑀬𑁄𑀧𑀺 𑀔𑁄, 𑀯𑀸𑀲𑁂𑀝𑁆𑀞, 𑀇𑀥𑁂𑀓𑀘𑁆𑀘𑁄 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑁄, 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑁄, 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑁄, 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑁄, 𑀲𑀫𑁆𑀨𑀧𑁆𑀧𑀮𑀸𑀧𑀸 𑀧𑀝𑀺𑀯𑀺𑀭𑀢𑁄, 𑀅𑀦𑀪𑀺𑀚𑁆𑀛𑀸𑀮𑀼 𑀅𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄, 𑀲𑀫𑁆𑀫𑀸𑀤𑀺𑀝𑁆𑀞𑀻. 𑀇𑀢𑀺 𑀔𑁄, 𑀯𑀸𑀲𑁂𑀝𑁆𑀞, 𑀬𑁂𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸 𑀓𑀼𑀲𑀮𑀲𑀗𑁆𑀔𑀸𑀢𑀸 𑀅𑀦𑀯𑀚𑁆𑀚𑀸 𑀅𑀦𑀯𑀚𑁆𑀚𑀲𑀗𑁆𑀔𑀸𑀢𑀸 𑀲𑁂𑀯𑀺𑀢𑀩𑁆𑀩𑀸 𑀲𑁂𑀯𑀺𑀢𑀩𑁆𑀩𑀲𑀗𑁆𑀔𑀸𑀢𑀸 𑀅𑀮𑀫𑀭𑀺𑀬𑀸 𑀅𑀮𑀫𑀭𑀺𑀬𑀲𑀗𑁆𑀔𑀸𑀢𑀸 𑀲𑀼𑀓𑁆𑀓𑀸 𑀲𑀼𑀓𑁆𑀓𑀯𑀺𑀧𑀸𑀓𑀸 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸, 𑀔𑀢𑁆𑀢𑀺𑀬𑁂𑀧𑀺 𑀢𑁂 𑀇𑀥𑁂𑀓𑀘𑁆𑀘𑁂 𑀲𑀦𑁆𑀤𑀺𑀲𑁆𑀲𑀦𑁆𑀢𑀺. 𑀩𑁆𑀭𑀸𑀳𑁆𑀫𑀡𑁄𑀧𑀺 𑀔𑁄, 𑀯𑀸𑀲𑁂𑀝𑁆𑀞…𑀧𑁂… 𑀯𑁂𑀲𑁆𑀲𑁄𑀧𑀺 𑀔𑁄, 𑀯𑀸𑀲𑁂𑀝𑁆𑀞…𑀧𑁂… 𑀲𑀼𑀤𑁆𑀤𑁄𑀧𑀺 𑀔𑁄, 𑀯𑀸𑀲𑁂𑀝𑁆𑀞, 𑀇𑀥𑁂𑀓𑀘𑁆𑀘𑁄 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺…𑀧𑁂… 𑀅𑀦𑀪𑀺𑀚𑁆𑀛𑀸𑀮𑀼, 𑀅𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄, 𑀲𑀫𑁆𑀫𑀸𑀤𑀺𑀝𑁆𑀞𑀻. 𑀇𑀢𑀺 𑀔𑁄, 𑀯𑀸𑀲𑁂𑀝𑁆𑀞, 𑀬𑁂𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸 𑀓𑀼𑀲𑀮𑀲𑀗𑁆𑀔𑀸𑀢𑀸 𑀅𑀦𑀯𑀚𑁆𑀚𑀸 𑀅𑀦𑀯𑀚𑁆𑀚𑀲𑀗𑁆𑀔𑀸𑀢𑀸 𑀲𑁂𑀯𑀺𑀢𑀩𑁆𑀩𑀸 𑀲𑁂𑀯𑀺𑀢𑀩𑁆𑀩𑀲𑀗𑁆𑀔𑀸𑀢𑀸 𑀅𑀮𑀫𑀭𑀺𑀬𑀸 𑀅𑀮𑀫𑀭𑀺𑀬𑀲𑀗𑁆𑀔𑀸𑀢𑀸 𑀲𑀼𑀓𑁆𑀓𑀸 𑀲𑀼𑀓𑁆𑀓𑀯𑀺𑀧𑀸𑀓𑀸 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸; 𑀲𑀼𑀤𑁆𑀤𑁂𑀧𑀺 𑀢𑁂 𑀇𑀥𑁂𑀓𑀘𑁆𑀘𑁂 𑀲𑀦𑁆𑀤𑀺𑀲𑁆𑀲𑀦𑁆𑀢𑀺.

𑁧𑁧𑁬. ‘‘𑀇𑀫𑁂𑀲𑀼 𑀔𑁄, 𑀯𑀸𑀲𑁂𑀝𑁆𑀞, 𑀘𑀢𑀽𑀲𑀼 𑀯𑀡𑁆𑀡𑁂𑀲𑀼 𑀏𑀯𑀁 𑀉𑀪𑀬𑀯𑁄𑀓𑀺𑀡𑁆𑀡𑁂𑀲𑀼 𑀯𑀢𑁆𑀢𑀫𑀸𑀦𑁂𑀲𑀼 𑀓𑀡𑁆𑀳𑀲𑀼𑀓𑁆𑀓𑁂𑀲𑀼 𑀥𑀫𑁆𑀫𑁂𑀲𑀼 𑀯𑀺𑀜𑁆𑀜𑀼𑀕𑀭𑀳𑀺𑀢𑁂𑀲𑀼 𑀘𑁂𑀯 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑁂𑀲𑀼 𑀘 𑀬𑀤𑁂𑀢𑁆𑀣 𑀩𑁆𑀭𑀸𑀳𑁆𑀫𑀡𑀸 𑀏𑀯𑀫𑀸𑀳𑀁𑀲𑀼 𑁋 ‘𑀩𑁆𑀭𑀸𑀳𑁆𑀫𑀡𑁄𑀯 𑀲𑁂𑀝𑁆𑀞𑁄 𑀯𑀡𑁆𑀡𑁄, 𑀳𑀻𑀦𑀸 𑀅𑀜𑁆𑀜𑁂 𑀯𑀡𑁆𑀡𑀸; 𑀩𑁆𑀭𑀸𑀳𑁆𑀫𑀡𑁄𑀯 𑀲𑀼𑀓𑁆𑀓𑁄 𑀯𑀡𑁆𑀡𑁄, 𑀓𑀡𑁆𑀳𑀸 𑀅𑀜𑁆𑀜𑁂 𑀯𑀡𑁆𑀡𑀸; 𑀩𑁆𑀭𑀸𑀳𑁆𑀫𑀡𑀸𑀯 𑀲𑀼𑀚𑁆𑀛𑀦𑁆𑀢𑀺, 𑀦𑁄 𑀅𑀩𑁆𑀭𑀸𑀳𑁆𑀫𑀡𑀸; 𑀩𑁆𑀭𑀸𑀳𑁆𑀫𑀡𑀸𑀯 𑀩𑁆𑀭𑀳𑁆𑀫𑀼𑀦𑁄 𑀧𑀼𑀢𑁆𑀢𑀸 𑀑𑀭𑀲𑀸 𑀫𑀼𑀔𑀢𑁄 𑀚𑀸𑀢𑀸 𑀩𑁆𑀭𑀳𑁆𑀫𑀚𑀸 𑀩𑁆𑀭𑀳𑁆𑀫𑀦𑀺𑀫𑁆𑀫𑀺𑀢𑀸 𑀩𑁆𑀭𑀳𑁆𑀫𑀤𑀸𑀬𑀸𑀤𑀸’𑀢𑀺. 𑀢𑀁 𑀢𑁂𑀲𑀁 𑀯𑀺𑀜𑁆𑀜𑀽 𑀦𑀸𑀦𑀼𑀚𑀸𑀦𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀇𑀫𑁂𑀲𑀜𑁆𑀳𑀺, 𑀯𑀸𑀲𑁂𑀝𑁆𑀞, 𑀘𑀢𑀼𑀦𑁆𑀦𑀁 𑀯𑀡𑁆𑀡𑀸𑀦𑀁 𑀬𑁄 𑀳𑁄𑀢𑀺 𑀪𑀺𑀓𑁆𑀔𑀼 𑀅𑀭𑀳𑀁 𑀔𑀻𑀡𑀸𑀲𑀯𑁄 𑀯𑀼𑀲𑀺𑀢𑀯𑀸 𑀓𑀢𑀓𑀭𑀡𑀻𑀬𑁄 𑀑𑀳𑀺𑀢𑀪𑀸𑀭𑁄 𑀅𑀦𑀼𑀧𑁆𑀧𑀢𑁆𑀢𑀲𑀤𑀢𑁆𑀣𑁄 𑀧𑀭𑀺𑀓𑁆𑀔𑀻𑀡𑀪𑀯𑀲𑀁𑀬𑁄𑀚𑀦𑁄 𑀲𑀫𑁆𑀫𑀤𑀜𑁆𑀜𑀸𑀯𑀺𑀫𑀼𑀢𑁆𑀢𑁄, 𑀲𑁄 𑀦𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺 𑀥𑀫𑁆𑀫𑁂𑀦𑁂𑀯, 𑀦𑁄 𑀅𑀥𑀫𑁆𑀫𑁂𑀦. 𑀥𑀫𑁆𑀫𑁄 𑀳𑀺, 𑀯𑀸𑀲𑁂𑀝𑁆𑀞, 𑀲𑁂𑀝𑁆𑀞𑁄 𑀚𑀦𑁂𑀢𑀲𑁆𑀫𑀺𑀁, 𑀤𑀺𑀝𑁆𑀞𑁂 𑀘𑁂𑀯 𑀥𑀫𑁆𑀫𑁂 𑀅𑀪𑀺𑀲𑀫𑁆𑀧𑀭𑀸𑀬𑀜𑁆𑀘.

𑁧𑁧𑁭. ‘‘𑀢𑀤𑀫𑀺𑀦𑀸𑀧𑁂𑀢𑀁, 𑀯𑀸𑀲𑁂𑀝𑁆𑀞, 𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀬𑀣𑀸 𑀥𑀫𑁆𑀫𑁄𑀯 𑀲𑁂𑀝𑁆𑀞𑁄 𑀚𑀦𑁂𑀢𑀲𑁆𑀫𑀺𑀁, 𑀤𑀺𑀝𑁆𑀞𑁂 𑀘𑁂𑀯 𑀥𑀫𑁆𑀫𑁂 𑀅𑀪𑀺𑀲𑀫𑁆𑀧𑀭𑀸𑀬𑀜𑁆𑀘.

‘‘𑀚𑀸𑀦𑀸𑀢𑀺 𑀔𑁄 [𑀔𑁄 𑀧𑀦 (𑀓.)], 𑀯𑀸𑀲𑁂𑀝𑁆𑀞, 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑁋 ‘𑀲𑀫𑀡𑁄 𑀕𑁄𑀢𑀫𑁄 𑀅𑀦𑀦𑁆𑀢𑀭𑀸 [𑀅𑀦𑀼𑀢𑁆𑀢𑀭𑁄 (𑀩𑀳𑀽𑀲𑀼)] 𑀲𑀓𑁆𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑁄’𑀢𑀺. 𑀲𑀓𑁆𑀬𑀸 𑀔𑁄 𑀧𑀦, 𑀯𑀸𑀲𑁂𑀝𑁆𑀞, 𑀭𑀜𑁆𑀜𑁄 𑀧𑀲𑁂𑀦𑀤𑀺𑀲𑁆𑀲 𑀓𑁄𑀲𑀮𑀲𑁆𑀲 𑀅𑀦𑀼𑀬𑀼𑀢𑁆𑀢𑀸 [𑀅𑀦𑀦𑁆𑀢𑀭𑀸 𑀅𑀦𑀼𑀬𑀦𑁆𑀢𑀸 (𑀲𑁆𑀬𑀸.), 𑀅𑀦𑀦𑁆𑀢𑀭𑀸 𑀅𑀦𑀼𑀬𑀼𑀢𑁆𑀢𑀸 (𑀓.)] 𑀪𑀯𑀦𑁆𑀢𑀺. 𑀓𑀭𑁄𑀦𑁆𑀢𑀺 𑀔𑁄, 𑀯𑀸𑀲𑁂𑀝𑁆𑀞, 𑀲𑀓𑁆𑀬𑀸 𑀭𑀜𑁆𑀜𑁂 𑀧𑀲𑁂𑀦𑀤𑀺𑀫𑁆𑀳𑀺 𑀓𑁄𑀲𑀮𑁂 𑀦𑀺𑀧𑀘𑁆𑀘𑀓𑀸𑀭𑀁 𑀅𑀪𑀺𑀯𑀸𑀤𑀦𑀁 𑀧𑀘𑁆𑀘𑀼𑀝𑁆𑀞𑀸𑀦𑀁 𑀅𑀜𑁆𑀚𑀮𑀺𑀓𑀫𑁆𑀫𑀁 𑀲𑀸𑀫𑀻𑀘𑀺𑀓𑀫𑁆𑀫𑀁. 𑀇𑀢𑀺 𑀔𑁄, 𑀯𑀸𑀲𑁂𑀝𑁆𑀞, 𑀬𑀁 𑀓𑀭𑁄𑀦𑁆𑀢𑀺 𑀲𑀓𑁆𑀬𑀸 𑀭𑀜𑁆𑀜𑁂 𑀧𑀲𑁂𑀦𑀤𑀺𑀫𑁆𑀳𑀺 𑀓𑁄𑀲𑀮𑁂 𑀦𑀺𑀧𑀘𑁆𑀘𑀓𑀸𑀭𑀁 𑀅𑀪𑀺𑀯𑀸𑀤𑀦𑀁 𑀧𑀘𑁆𑀘𑀼𑀝𑁆𑀞𑀸𑀦𑀁 𑀅𑀜𑁆𑀚𑀮𑀺𑀓𑀫𑁆𑀫𑀁 𑀲𑀸𑀫𑀻𑀘𑀺𑀓𑀫𑁆𑀫𑀁, 𑀓𑀭𑁄𑀢𑀺 𑀢𑀁 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀢𑀣𑀸𑀕𑀢𑁂 𑀦𑀺𑀧𑀘𑁆𑀘𑀓𑀸𑀭𑀁 𑀅𑀪𑀺𑀯𑀸𑀤𑀦𑀁 𑀧𑀘𑁆𑀘𑀼𑀝𑁆𑀞𑀸𑀦𑀁 𑀅𑀜𑁆𑀚𑀮𑀺𑀓𑀫𑁆𑀫𑀁 𑀲𑀸𑀫𑀻𑀘𑀺𑀓𑀫𑁆𑀫𑀁, 𑀦 𑀦𑀁 [𑀦𑀦𑀼 (𑀩𑀳𑀽𑀲𑀼)] ‘𑀲𑀼𑀚𑀸𑀢𑁄 𑀲𑀫𑀡𑁄 𑀕𑁄𑀢𑀫𑁄, 𑀤𑀼𑀚𑁆𑀚𑀸𑀢𑁄𑀳𑀫𑀲𑁆𑀫𑀺. 𑀩𑀮𑀯𑀸 𑀲𑀫𑀡𑁄 𑀕𑁄𑀢𑀫𑁄, 𑀤𑀼𑀩𑁆𑀩𑀮𑁄𑀳𑀫𑀲𑁆𑀫𑀺. 𑀧𑀸𑀲𑀸𑀤𑀺𑀓𑁄 𑀲𑀫𑀡𑁄 𑀕𑁄𑀢𑀫𑁄, 𑀤𑀼𑀩𑁆𑀩𑀡𑁆𑀡𑁄𑀳𑀫𑀲𑁆𑀫𑀺. 𑀫𑀳𑁂𑀲𑀓𑁆𑀔𑁄 𑀲𑀫𑀡𑁄 𑀕𑁄𑀢𑀫𑁄, 𑀅𑀧𑁆𑀧𑁂𑀲𑀓𑁆𑀔𑁄𑀳𑀫𑀲𑁆𑀫𑀻’𑀢𑀺. 𑀅𑀣 𑀔𑁄 𑀦𑀁 𑀥𑀫𑁆𑀫𑀁𑀬𑁂𑀯 𑀲𑀓𑁆𑀓𑀭𑁄𑀦𑁆𑀢𑁄 𑀥𑀫𑁆𑀫𑀁 𑀕𑀭𑀼𑀁 𑀓𑀭𑁄𑀦𑁆𑀢𑁄 𑀥𑀫𑁆𑀫𑀁 𑀫𑀸𑀦𑁂𑀦𑁆𑀢𑁄 𑀥𑀫𑁆𑀫𑀁 𑀧𑀽𑀚𑁂𑀦𑁆𑀢𑁄 𑀥𑀫𑁆𑀫𑀁 𑀅𑀧𑀘𑀸𑀬𑀫𑀸𑀦𑁄 𑀏𑀯𑀁 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀢𑀣𑀸𑀕𑀢𑁂 𑀦𑀺𑀧𑀘𑁆𑀘𑀓𑀸𑀭𑀁 𑀓𑀭𑁄𑀢𑀺, 𑀅𑀪𑀺𑀯𑀸𑀤𑀦𑀁 𑀧𑀘𑁆𑀘𑀼𑀝𑁆𑀞𑀸𑀦𑀁 𑀅𑀜𑁆𑀚𑀮𑀺𑀓𑀫𑁆𑀫𑀁 𑀲𑀸𑀫𑀻𑀘𑀺𑀓𑀫𑁆𑀫𑀁. 𑀇𑀫𑀺𑀦𑀸𑀧𑀺 𑀔𑁄 𑀏𑀢𑀁, 𑀯𑀸𑀲𑁂𑀝𑁆𑀞, 𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀬𑀣𑀸 𑀥𑀫𑁆𑀫𑁄𑀯 𑀲𑁂𑀝𑁆𑀞𑁄 𑀚𑀦𑁂𑀢𑀲𑁆𑀫𑀺𑀁, 𑀤𑀺𑀝𑁆𑀞𑁂 𑀘𑁂𑀯 𑀥𑀫𑁆𑀫𑁂 𑀅𑀪𑀺𑀲𑀫𑁆𑀧𑀭𑀸𑀬𑀜𑁆𑀘.

𑁧𑁧𑁮. ‘‘𑀢𑀼𑀫𑁆𑀳𑁂 𑀔𑁆𑀯𑀢𑁆𑀣, 𑀯𑀸𑀲𑁂𑀝𑁆𑀞, 𑀦𑀸𑀦𑀸𑀚𑀘𑁆𑀘𑀸 𑀦𑀸𑀦𑀸𑀦𑀸𑀫𑀸 𑀦𑀸𑀦𑀸𑀕𑁄𑀢𑁆𑀢𑀸 𑀦𑀸𑀦𑀸𑀓𑀼𑀮𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀸. ‘𑀓𑁂 𑀢𑀼𑀫𑁆𑀳𑁂’𑀢𑀺 𑁋 𑀧𑀼𑀝𑁆𑀞𑀸 𑀲𑀫𑀸𑀦𑀸 ‘𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸𑀫𑁆𑀳𑀸’𑀢𑀺 𑁋 𑀧𑀝𑀺𑀚𑀸𑀦𑀸𑀣. 𑀬𑀲𑁆𑀲 𑀔𑁄 𑀧𑀦𑀲𑁆𑀲, 𑀯𑀸𑀲𑁂𑀝𑁆𑀞, 𑀢𑀣𑀸𑀕𑀢𑁂 𑀲𑀤𑁆𑀥𑀸 𑀦𑀺𑀯𑀺𑀝𑁆𑀞𑀸 𑀫𑀽𑀮𑀚𑀸𑀢𑀸 𑀧𑀢𑀺𑀝𑁆𑀞𑀺𑀢𑀸 𑀤𑀴𑁆𑀳𑀸 𑀅𑀲𑀁𑀳𑀸𑀭𑀺𑀬𑀸 𑀲𑀫𑀡𑁂𑀦 𑀯𑀸 𑀩𑁆𑀭𑀸𑀳𑁆𑀫𑀡𑁂𑀦 𑀯𑀸 𑀤𑁂𑀯𑁂𑀦 𑀯𑀸 𑀫𑀸𑀭𑁂𑀦 𑀯𑀸 𑀩𑁆𑀭𑀳𑁆𑀫𑀼𑀦𑀸 𑀯𑀸 𑀓𑁂𑀦𑀘𑀺 𑀯𑀸 𑀮𑁄𑀓𑀲𑁆𑀫𑀺𑀁, 𑀢𑀲𑁆𑀲𑁂𑀢𑀁 𑀓𑀮𑁆𑀮𑀁 𑀯𑀘𑀦𑀸𑀬 𑁋 ‘𑀪𑀕𑀯𑀢𑁄𑀫𑁆𑀳𑀺 𑀧𑀼𑀢𑁆𑀢𑁄 𑀑𑀭𑀲𑁄 𑀫𑀼𑀔𑀢𑁄 𑀚𑀸𑀢𑁄 𑀥𑀫𑁆𑀫𑀚𑁄 𑀥𑀫𑁆𑀫𑀦𑀺𑀫𑁆𑀫𑀺𑀢𑁄 𑀥𑀫𑁆𑀫𑀤𑀸𑀬𑀸𑀤𑁄’𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀣𑀸𑀕𑀢𑀲𑁆𑀲 𑀳𑁂𑀢𑀁, 𑀯𑀸𑀲𑁂𑀝𑁆𑀞, 𑀅𑀥𑀺𑀯𑀘𑀦𑀁 ‘𑀥𑀫𑁆𑀫𑀓𑀸𑀬𑁄’ 𑀇𑀢𑀺𑀧𑀺, ‘𑀩𑁆𑀭𑀳𑁆𑀫𑀓𑀸𑀬𑁄’ 𑀇𑀢𑀺𑀧𑀺, ‘𑀥𑀫𑁆𑀫𑀪𑀽𑀢𑁄’ 𑀇𑀢𑀺𑀧𑀺, ‘𑀩𑁆𑀭𑀳𑁆𑀫𑀪𑀽𑀢𑁄’ 𑀇𑀢𑀺𑀧𑀺.

𑁧𑁧𑁯. ‘‘𑀳𑁄𑀢𑀺 𑀔𑁄 𑀲𑁄, 𑀯𑀸𑀲𑁂𑀝𑁆𑀞, 𑀲𑀫𑀬𑁄 𑀬𑀁 𑀓𑀤𑀸𑀘𑀺 𑀓𑀭𑀳𑀘𑀺 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀅𑀬𑀁 𑀮𑁄𑀓𑁄 𑀲𑀁𑀯𑀝𑁆𑀝𑀢𑀺. 𑀲𑀁𑀯𑀝𑁆𑀝𑀫𑀸𑀦𑁂 𑀮𑁄𑀓𑁂 𑀬𑁂𑀪𑀼𑀬𑁆𑀬𑁂𑀦 𑀲𑀢𑁆𑀢𑀸 𑀆𑀪𑀲𑁆𑀲𑀭𑀲𑀁𑀯𑀢𑁆𑀢𑀦𑀺𑀓𑀸 𑀳𑁄𑀦𑁆𑀢𑀺. 𑀢𑁂 𑀢𑀢𑁆𑀣 𑀳𑁄𑀦𑁆𑀢𑀺 𑀫𑀦𑁄𑀫𑀬𑀸 𑀧𑀻𑀢𑀺𑀪𑀓𑁆𑀔𑀸 𑀲𑀬𑀁𑀧𑀪𑀸 𑀅𑀦𑁆𑀢𑀮𑀺𑀓𑁆𑀔𑀘𑀭𑀸 𑀲𑀼𑀪𑀝𑁆𑀞𑀸𑀬𑀺𑀦𑁄 𑀘𑀺𑀭𑀁 𑀤𑀻𑀖𑀫𑀤𑁆𑀥𑀸𑀦𑀁 𑀢𑀺𑀝𑁆𑀞𑀦𑁆𑀢𑀺.

‘‘𑀳𑁄𑀢𑀺 𑀔𑁄 𑀲𑁄, 𑀯𑀸𑀲𑁂𑀝𑁆𑀞, 𑀲𑀫𑀬𑁄 𑀬𑀁 𑀓𑀤𑀸𑀘𑀺 𑀓𑀭𑀳𑀘𑀺 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀅𑀬𑀁 𑀮𑁄𑀓𑁄 𑀯𑀺𑀯𑀝𑁆𑀝𑀢𑀺. 𑀯𑀺𑀯𑀝𑁆𑀝𑀫𑀸𑀦𑁂 𑀮𑁄𑀓𑁂 𑀬𑁂𑀪𑀼𑀬𑁆𑀬𑁂𑀦 𑀲𑀢𑁆𑀢𑀸 𑀆𑀪𑀲𑁆𑀲𑀭𑀓𑀸𑀬𑀸 𑀘𑀯𑀺𑀢𑁆𑀯𑀸 𑀇𑀢𑁆𑀣𑀢𑁆𑀢𑀁 𑀆𑀕𑀘𑁆𑀙𑀦𑁆𑀢𑀺. 𑀢𑁂𑀥 𑀳𑁄𑀦𑁆𑀢𑀺 𑀫𑀦𑁄𑀫𑀬𑀸 𑀧𑀻𑀢𑀺𑀪𑀓𑁆𑀔𑀸 𑀲𑀬𑀁𑀧𑀪𑀸 𑀅𑀦𑁆𑀢𑀮𑀺𑀓𑁆𑀔𑀘𑀭𑀸 𑀲𑀼𑀪𑀝𑁆𑀞𑀸𑀬𑀺𑀦𑁄 𑀘𑀺𑀭𑀁 𑀤𑀻𑀖𑀫𑀤𑁆𑀥𑀸𑀦𑀁 𑀢𑀺𑀝𑁆𑀞𑀦𑁆𑀢𑀺.

𑀭𑀲𑀧𑀣𑀯𑀺𑀧𑀸𑀢𑀼𑀪𑀸𑀯𑁄

𑁧𑁨𑁦. ‘‘𑀏𑀓𑁄𑀤𑀓𑀻𑀪𑀽𑀢𑀁 𑀔𑁄 𑀧𑀦, 𑀯𑀸𑀲𑁂𑀝𑁆𑀞, 𑀢𑁂𑀦 𑀲𑀫𑀬𑁂𑀦 𑀳𑁄𑀢𑀺 𑀅𑀦𑁆𑀥𑀓𑀸𑀭𑁄 𑀅𑀦𑁆𑀥𑀓𑀸𑀭𑀢𑀺𑀫𑀺𑀲𑀸. 𑀦 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀧𑀜𑁆𑀜𑀸𑀬𑀦𑁆𑀢𑀺, 𑀦 𑀦𑀓𑁆𑀔𑀢𑁆𑀢𑀸𑀦𑀺 𑀢𑀸𑀭𑀓𑀭𑀽𑀧𑀸𑀦𑀺 𑀧𑀜𑁆𑀜𑀸𑀬𑀦𑁆𑀢𑀺, 𑀦 𑀭𑀢𑁆𑀢𑀺𑀦𑁆𑀤𑀺𑀯𑀸 𑀧𑀜𑁆𑀜𑀸𑀬𑀦𑁆𑀢𑀺, 𑀦 𑀫𑀸𑀲𑀟𑁆𑀠𑀫𑀸𑀲𑀸 𑀧𑀜𑁆𑀜𑀸𑀬𑀦𑁆𑀢𑀺, 𑀦 𑀉𑀢𑀼𑀲𑀁𑀯𑀘𑁆𑀙𑀭𑀸 𑀧𑀜𑁆𑀜𑀸𑀬𑀦𑁆𑀢𑀺, 𑀦 𑀇𑀢𑁆𑀣𑀺𑀧𑀼𑀫𑀸 𑀧𑀜𑁆𑀜𑀸𑀬𑀦𑁆𑀢𑀺, 𑀲𑀢𑁆𑀢𑀸 𑀲𑀢𑁆𑀢𑀸𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀦𑁆𑀢𑀺. 𑀅𑀣 𑀔𑁄 𑀢𑁂𑀲𑀁, 𑀯𑀸𑀲𑁂𑀝𑁆𑀞, 𑀲𑀢𑁆𑀢𑀸𑀦𑀁 𑀓𑀤𑀸𑀘𑀺 𑀓𑀭𑀳𑀘𑀺 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀭𑀲𑀧𑀣𑀯𑀻 𑀉𑀤𑀓𑀲𑁆𑀫𑀺𑀁 𑀲𑀫𑀢𑀦𑀺 [𑀲𑀫𑀢𑀸𑀦𑀺 (𑀩𑀳𑀽𑀲𑀼)]; 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀧𑀬𑀲𑁄 𑀢𑀢𑁆𑀢𑀲𑁆𑀲 [𑀧𑀬𑀢𑀢𑁆𑀢𑀲𑁆𑀲 (𑀲𑁆𑀬𑀸.)] 𑀦𑀺𑀩𑁆𑀩𑀸𑀬𑀫𑀸𑀦𑀲𑁆𑀲 𑀉𑀧𑀭𑀺 𑀲𑀦𑁆𑀢𑀸𑀦𑀓𑀁 𑀳𑁄𑀢𑀺, 𑀏𑀯𑀫𑁂𑀯 𑀧𑀸𑀢𑀼𑀭𑀳𑁄𑀲𑀺. 𑀲𑀸 𑀅𑀳𑁄𑀲𑀺 𑀯𑀡𑁆𑀡𑀲𑀫𑁆𑀧𑀦𑁆𑀦𑀸 𑀕𑀦𑁆𑀥𑀲𑀫𑁆𑀧𑀦𑁆𑀦𑀸 𑀭𑀲𑀲𑀫𑁆𑀧𑀦𑁆𑀦𑀸, 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀲𑀫𑁆𑀧𑀦𑁆𑀦𑀁 𑀯𑀸 𑀲𑀧𑁆𑀧𑀺 𑀲𑀫𑁆𑀧𑀦𑁆𑀦𑀁 𑀯𑀸 𑀦𑀯𑀦𑀻𑀢𑀁 𑀏𑀯𑀁𑀯𑀡𑁆𑀡𑀸 𑀅𑀳𑁄𑀲𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀔𑀼𑀤𑁆𑀤𑀫𑀥𑀼𑀁 [𑀔𑀼𑀤𑁆𑀤𑀁 𑀫𑀥𑀼𑀁 (𑀓. 𑀲𑀻.)] 𑀅𑀦𑁂𑀴𑀓𑀁 [𑀅𑀦𑁂𑀮𑀓𑀁 (𑀲𑀻. 𑀧𑀻.)], 𑀏𑀯𑀫𑀲𑁆𑀲𑀸𑀤𑀸 𑀅𑀳𑁄𑀲𑀺. 𑀅𑀣 𑀔𑁄, 𑀯𑀸𑀲𑁂𑀝𑁆𑀞, 𑀅𑀜𑁆𑀜𑀢𑀭𑁄 𑀲𑀢𑁆𑀢𑁄 𑀮𑁄𑀮𑀚𑀸𑀢𑀺𑀓𑁄 𑁋 ‘𑀅𑀫𑁆𑀪𑁄, 𑀓𑀺𑀫𑁂𑀯𑀺𑀤𑀁 𑀪𑀯𑀺𑀲𑁆𑀲𑀢𑀻’𑀢𑀺 𑀭𑀲𑀧𑀣𑀯𑀺𑀁 𑀅𑀗𑁆𑀕𑀼𑀮𑀺𑀬𑀸 𑀲𑀸𑀬𑀺. 𑀢𑀲𑁆𑀲 𑀭𑀲𑀧𑀣𑀯𑀺𑀁 𑀅𑀗𑁆𑀕𑀼𑀮𑀺𑀬𑀸 𑀲𑀸𑀬𑀢𑁄 𑀅𑀘𑁆𑀙𑀸𑀤𑁂𑀲𑀺, 𑀢𑀡𑁆𑀳𑀸 𑀘𑀲𑁆𑀲 𑀑𑀓𑁆𑀓𑀫𑀺. 𑀅𑀜𑁆𑀜𑁂𑀧𑀺 𑀔𑁄, 𑀯𑀸𑀲𑁂𑀝𑁆𑀞, 𑀲𑀢𑁆𑀢𑀸 𑀢𑀲𑁆𑀲 𑀲𑀢𑁆𑀢𑀲𑁆𑀲 𑀤𑀺𑀝𑁆𑀞𑀸𑀦𑀼𑀕𑀢𑀺𑀁 𑀆𑀧𑀚𑁆𑀚𑀫𑀸𑀦𑀸 𑀭𑀲𑀧𑀣𑀯𑀺𑀁 𑀅𑀗𑁆𑀕𑀼𑀮𑀺𑀬𑀸 𑀲𑀸𑀬𑀺𑀁𑀲𑀼. 𑀢𑁂𑀲𑀁 𑀭𑀲𑀧𑀣𑀯𑀺𑀁 𑀅𑀗𑁆𑀕𑀼𑀮𑀺𑀬𑀸 𑀲𑀸𑀬𑀢𑀁 𑀅𑀘𑁆𑀙𑀸𑀤𑁂𑀲𑀺, 𑀢𑀡𑁆𑀳𑀸 𑀘 𑀢𑁂𑀲𑀁 𑀑𑀓𑁆𑀓𑀫𑀺.

𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀤𑀺𑀧𑀸𑀢𑀼𑀪𑀸𑀯𑁄

𑁧𑁨𑁧. ‘‘𑀅𑀣 𑀔𑁄 𑀢𑁂, 𑀯𑀸𑀲𑁂𑀝𑁆𑀞, 𑀲𑀢𑁆𑀢𑀸 𑀭𑀲𑀧𑀣𑀯𑀺𑀁 𑀳𑀢𑁆𑀣𑁂𑀳𑀺 𑀆𑀮𑀼𑀧𑁆𑀧𑀓𑀸𑀭𑀓𑀁 𑀉𑀧𑀓𑁆𑀓𑀫𑀺𑀁𑀲𑀼 𑀧𑀭𑀺𑀪𑀼𑀜𑁆𑀚𑀺𑀢𑀼𑀁. 𑀬𑀢𑁄 𑀔𑁄 𑀢𑁂 [𑀬𑀢𑁄 𑀔𑁄 (𑀲𑀻. 𑀲𑁆𑀬𑀸. 𑀧𑀻.)], 𑀯𑀸𑀲𑁂𑀝𑁆𑀞, 𑀲𑀢𑁆𑀢𑀸 𑀭𑀲𑀧𑀣𑀯𑀺𑀁 𑀳𑀢𑁆𑀣𑁂𑀳𑀺 𑀆𑀮𑀼𑀧𑁆𑀧𑀓𑀸𑀭𑀓𑀁 𑀉𑀧𑀓𑁆𑀓𑀫𑀺𑀁𑀲𑀼 𑀧𑀭𑀺𑀪𑀼𑀜𑁆𑀚𑀺𑀢𑀼𑀁. 𑀅𑀣 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀲𑀬𑀁𑀧𑀪𑀸 𑀅𑀦𑁆𑀢𑀭𑀥𑀸𑀬𑀺. 𑀲𑀬𑀁𑀧𑀪𑀸𑀬 𑀅𑀦𑁆𑀢𑀭𑀳𑀺𑀢𑀸𑀬 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀧𑀸𑀢𑀼𑀭𑀳𑁂𑀲𑀼𑀁. 𑀘𑀦𑁆𑀤𑀺𑀫𑀲𑀽𑀭𑀺𑀬𑁂𑀲𑀼 𑀧𑀸𑀢𑀼𑀪𑀽𑀢𑁂𑀲𑀼 𑀦𑀓𑁆𑀔𑀢𑁆𑀢𑀸𑀦𑀺 𑀢𑀸𑀭𑀓𑀭𑀽𑀧𑀸𑀦𑀺 𑀧𑀸𑀢𑀼𑀭𑀳𑁂𑀲𑀼𑀁. 𑀦𑀓𑁆𑀔𑀢𑁆𑀢𑁂𑀲𑀼 𑀢𑀸𑀭𑀓𑀭𑀽𑀧𑁂𑀲𑀼 𑀧𑀸𑀢𑀼𑀪𑀽𑀢𑁂𑀲𑀼 𑀭𑀢𑁆𑀢𑀺𑀦𑁆𑀤𑀺𑀯𑀸 𑀧𑀜𑁆𑀜𑀸𑀬𑀺𑀁𑀲𑀼. 𑀭𑀢𑁆𑀢𑀺𑀦𑁆𑀤𑀺𑀯𑁂𑀲𑀼 𑀧𑀜𑁆𑀜𑀸𑀬𑀫𑀸𑀦𑁂𑀲𑀼 𑀫𑀸𑀲𑀟𑁆𑀠𑀫𑀸𑀲𑀸 𑀧𑀜𑁆𑀜𑀸𑀬𑀺𑀁𑀲𑀼. 𑀫𑀸𑀲𑀟𑁆𑀠𑀫𑀸𑀲𑁂𑀲𑀼 𑀧𑀜𑁆𑀜𑀸𑀬𑀫𑀸𑀦𑁂𑀲𑀼 𑀉𑀢𑀼𑀲𑀁𑀯𑀘𑁆𑀙𑀭𑀸 𑀧𑀜𑁆𑀜𑀸𑀬𑀺𑀁𑀲𑀼. 𑀏𑀢𑁆𑀢𑀸𑀯𑀢𑀸 𑀔𑁄, 𑀯𑀸𑀲𑁂𑀝𑁆𑀞, 𑀅𑀬𑀁 𑀮𑁄𑀓𑁄 𑀧𑀼𑀦 𑀯𑀺𑀯𑀝𑁆𑀝𑁄 𑀳𑁄𑀢𑀺.

𑁧𑁨𑁨. ‘‘𑀅𑀣 𑀔𑁄 𑀢𑁂, 𑀯𑀸𑀲𑁂𑀝𑁆𑀞, 𑀲𑀢𑁆𑀢𑀸 𑀭𑀲𑀧𑀣𑀯𑀺𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀸 𑀢𑀁𑀪𑀓𑁆𑀔𑀸 [𑀢𑀩𑁆𑀪𑀓𑁆𑀔𑀸 (𑀲𑁆𑀬𑀸.)] 𑀢𑀤𑀸𑀳𑀸𑀭𑀸 𑀘𑀺𑀭𑀁 𑀤𑀻𑀖𑀫𑀤𑁆𑀥𑀸𑀦𑀁 𑀅𑀝𑁆𑀞𑀁𑀲𑀼. 𑀬𑀣𑀸 𑀬𑀣𑀸 𑀔𑁄 𑀢𑁂, 𑀯𑀸𑀲𑁂𑀝𑁆𑀞, 𑀲𑀢𑁆𑀢𑀸 𑀭𑀲𑀧𑀣𑀯𑀺𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀸 𑀢𑀁𑀪𑀓𑁆𑀔𑀸 𑀢𑀤𑀸𑀳𑀸𑀭𑀸 𑀘𑀺𑀭𑀁 𑀤𑀻𑀖𑀫𑀤𑁆𑀥𑀸𑀦𑀁 𑀅𑀝𑁆𑀞𑀁𑀲𑀼, 𑀢𑀣𑀸 𑀢𑀣𑀸 𑀢𑁂𑀲𑀁 𑀲𑀢𑁆𑀢𑀸𑀦𑀁 (𑀭𑀲𑀧𑀣𑀯𑀺𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀸𑀦𑀁) [( ) 𑀲𑀻. 𑀲𑁆𑀬𑀸. 𑀧𑀻. 𑀧𑁄𑀢𑁆𑀣𑀓𑁂𑀲𑀼 𑀦𑀢𑁆𑀣𑀺] 𑀔𑀭𑀢𑁆𑀢𑀜𑁆𑀘𑁂𑀯 𑀓𑀸𑀬𑀲𑁆𑀫𑀺𑀁 𑀑𑀓𑁆𑀓𑀫𑀺, 𑀯𑀡𑁆𑀡𑀯𑁂𑀯𑀡𑁆𑀡𑀢𑀸 [𑀯𑀡𑁆𑀡𑀯𑁂𑀯𑀚𑁆𑀚𑀢𑀸 (𑀝𑀻𑀓𑀸)] 𑀘 𑀧𑀜𑁆𑀜𑀸𑀬𑀺𑀢𑁆𑀣. 𑀏𑀓𑀺𑀤𑀁 𑀲𑀢𑁆𑀢𑀸 𑀯𑀡𑁆𑀡𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀏𑀓𑀺𑀤𑀁 𑀲𑀢𑁆𑀢𑀸 𑀤𑀼𑀩𑁆𑀩𑀡𑁆𑀡𑀸. 𑀢𑀢𑁆𑀣 𑀬𑁂 𑀢𑁂 𑀲𑀢𑁆𑀢𑀸 𑀯𑀡𑁆𑀡𑀯𑀦𑁆𑀢𑁄, 𑀢𑁂 𑀤𑀼𑀩𑁆𑀩𑀡𑁆𑀡𑁂 𑀲𑀢𑁆𑀢𑁂 𑀅𑀢𑀺𑀫𑀜𑁆𑀜𑀦𑁆𑀢𑀺 𑁋 ‘𑀫𑀬𑀫𑁂𑀢𑁂𑀳𑀺 𑀯𑀡𑁆𑀡𑀯𑀦𑁆𑀢𑀢𑀭𑀸, 𑀅𑀫𑁆𑀳𑁂𑀳𑁂𑀢𑁂 𑀤𑀼𑀩𑁆𑀩𑀡𑁆𑀡𑀢𑀭𑀸’𑀢𑀺. 𑀢𑁂𑀲𑀁 𑀯𑀡𑁆𑀡𑀸𑀢𑀺𑀫𑀸𑀦𑀧𑀘𑁆𑀘𑀬𑀸 𑀫𑀸𑀦𑀸𑀢𑀺𑀫𑀸𑀦𑀚𑀸𑀢𑀺𑀓𑀸𑀦𑀁 𑀭𑀲𑀧𑀣𑀯𑀻 𑀅𑀦𑁆𑀢𑀭𑀥𑀸𑀬𑀺. 𑀭𑀲𑀸𑀬 𑀧𑀣𑀯𑀺𑀬𑀸 𑀅𑀦𑁆𑀢𑀭𑀳𑀺𑀢𑀸𑀬 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀅𑀦𑀼𑀢𑁆𑀣𑀼𑀦𑀺𑀁𑀲𑀼 𑁋 ‘𑀅𑀳𑁄 𑀭𑀲𑀁, 𑀅𑀳𑁄 𑀭𑀲’𑀦𑁆𑀢𑀺! 𑀢𑀤𑁂𑀢𑀭𑀳𑀺𑀧𑀺 𑀫𑀦𑀼𑀲𑁆𑀲𑀸 𑀓𑀜𑁆𑀘𑀺𑀤𑁂𑀯 𑀲𑀼𑀭𑀲𑀁 [𑀲𑀸𑀥𑀼𑀭𑀲𑀁 (𑀲𑀻. 𑀲𑁆𑀬𑀸. 𑀧𑀻.)] 𑀮𑀪𑀺𑀢𑁆𑀯𑀸 𑀏𑀯𑀫𑀸𑀳𑀁𑀲𑀼 𑁋 ‘𑀅𑀳𑁄 𑀭𑀲𑀁, 𑀅𑀳𑁄 𑀭𑀲’𑀦𑁆𑀢𑀺! 𑀢𑀤𑁂𑀯 𑀧𑁄𑀭𑀸𑀡𑀁 𑀅𑀕𑁆𑀕𑀜𑁆𑀜𑀁 𑀅𑀓𑁆𑀔𑀭𑀁 𑀅𑀦𑀼𑀲𑀭𑀦𑁆𑀢𑀺, 𑀦 𑀢𑁆𑀯𑁂𑀯𑀲𑁆𑀲 𑀅𑀢𑁆𑀣𑀁 𑀆𑀚𑀸𑀦𑀦𑁆𑀢𑀺.

𑀪𑀽𑀫𑀺𑀧𑀧𑁆𑀧𑀝𑀓𑀧𑀸𑀢𑀼𑀪𑀸𑀯𑁄

𑁧𑁨𑁩. ‘‘𑀅𑀣 𑀔𑁄 𑀢𑁂𑀲𑀁, 𑀯𑀸𑀲𑁂𑀝𑁆𑀞, 𑀲𑀢𑁆𑀢𑀸𑀦𑀁 𑀭𑀲𑀸𑀬 𑀧𑀣𑀯𑀺𑀬𑀸 𑀅𑀦𑁆𑀢𑀭𑀳𑀺𑀢𑀸𑀬 𑀪𑀽𑀫𑀺𑀧𑀧𑁆𑀧𑀝𑀓𑁄 𑀧𑀸𑀢𑀼𑀭𑀳𑁄𑀲𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀅𑀳𑀺𑀘𑁆𑀙𑀢𑁆𑀢𑀓𑁄, 𑀏𑀯𑀫𑁂𑀯 𑀧𑀸𑀢𑀼𑀭𑀳𑁄𑀲𑀺. 𑀲𑁄 𑀅𑀳𑁄𑀲𑀺 𑀯𑀡𑁆𑀡𑀲𑀫𑁆𑀧𑀦𑁆𑀦𑁄 𑀕𑀦𑁆𑀥𑀲𑀫𑁆𑀧𑀦𑁆𑀦𑁄 𑀭𑀲𑀲𑀫𑁆𑀧𑀦𑁆𑀦𑁄, 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀲𑀫𑁆𑀧𑀦𑁆𑀦𑀁 𑀯𑀸 𑀲𑀧𑁆𑀧𑀺 𑀲𑀫𑁆𑀧𑀦𑁆𑀦𑀁 𑀯𑀸 𑀦𑀯𑀦𑀻𑀢𑀁 𑀏𑀯𑀁𑀯𑀡𑁆𑀡𑁄 𑀅𑀳𑁄𑀲𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀔𑀼𑀤𑁆𑀤𑀫𑀥𑀼𑀁 𑀅𑀦𑁂𑀴𑀓𑀁, 𑀏𑀯𑀫𑀲𑁆𑀲𑀸𑀤𑁄 𑀅𑀳𑁄𑀲𑀺.

‘‘𑀅𑀣 𑀔𑁄 𑀢𑁂, 𑀯𑀸𑀲𑁂𑀝𑁆𑀞, 𑀲𑀢𑁆𑀢𑀸 𑀪𑀽𑀫𑀺𑀧𑀧𑁆𑀧𑀝𑀓𑀁 𑀉𑀧𑀓𑁆𑀓𑀫𑀺𑀁𑀲𑀼 𑀧𑀭𑀺𑀪𑀼𑀜𑁆𑀚𑀺𑀢𑀼𑀁. 𑀢𑁂 𑀢𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀸 𑀢𑀁𑀪𑀓𑁆𑀔𑀸 𑀢𑀤𑀸𑀳𑀸𑀭𑀸 𑀘𑀺𑀭𑀁 𑀤𑀻𑀖𑀫𑀤𑁆𑀥𑀸𑀦𑀁 𑀅𑀝𑁆𑀞𑀁𑀲𑀼. 𑀬𑀣𑀸 𑀬𑀣𑀸 𑀔𑁄 𑀢𑁂, 𑀯𑀸𑀲𑁂𑀝𑁆𑀞, 𑀲𑀢𑁆𑀢𑀸 𑀪𑀽𑀫𑀺𑀧𑀧𑁆𑀧𑀝𑀓𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀸 𑀢𑀁𑀪𑀓𑁆𑀔𑀸 𑀢𑀤𑀸𑀳𑀸𑀭𑀸 𑀘𑀺𑀭𑀁 𑀤𑀻𑀖𑀫𑀤𑁆𑀥𑀸𑀦𑀁 𑀅𑀝𑁆𑀞𑀁𑀲𑀼, 𑀢𑀣𑀸 𑀢𑀣𑀸 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀪𑀺𑀬𑁆𑀬𑁄𑀲𑁄 𑀫𑀢𑁆𑀢𑀸𑀬 𑀔𑀭𑀢𑁆𑀢𑀜𑁆𑀘𑁂𑀯 𑀓𑀸𑀬𑀲𑁆𑀫𑀺𑀁 𑀑𑀓𑁆𑀓𑀫𑀺, 𑀯𑀡𑁆𑀡𑀯𑁂𑀯𑀡𑁆𑀡𑀢𑀸 𑀘 𑀧𑀜𑁆𑀜𑀸𑀬𑀺𑀢𑁆𑀣. 𑀏𑀓𑀺𑀤𑀁 𑀲𑀢𑁆𑀢𑀸 𑀯𑀡𑁆𑀡𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀏𑀓𑀺𑀤𑀁 𑀲𑀢𑁆𑀢𑀸 𑀤𑀼𑀩𑁆𑀩𑀡𑁆𑀡𑀸. 𑀢𑀢𑁆𑀣 𑀬𑁂 𑀢𑁂 𑀲𑀢𑁆𑀢𑀸 𑀯𑀡𑁆𑀡𑀯𑀦𑁆𑀢𑁄, 𑀢𑁂 𑀤𑀼𑀩𑁆𑀩𑀡𑁆𑀡𑁂 𑀲𑀢𑁆𑀢𑁂 𑀅𑀢𑀺𑀫𑀜𑁆𑀜𑀦𑁆𑀢𑀺 𑁋 ‘𑀫𑀬𑀫𑁂𑀢𑁂𑀳𑀺 𑀯𑀡𑁆𑀡𑀯𑀦𑁆𑀢𑀢𑀭𑀸, 𑀅𑀫𑁆𑀳𑁂𑀳𑁂𑀢𑁂 𑀤𑀼𑀩𑁆𑀩𑀡𑁆𑀡𑀢𑀭𑀸’𑀢𑀺. 𑀢𑁂𑀲𑀁 𑀯𑀡𑁆𑀡𑀸𑀢𑀺𑀫𑀸𑀦𑀧𑀘𑁆𑀘𑀬𑀸 𑀫𑀸𑀦𑀸𑀢𑀺𑀫𑀸𑀦𑀚𑀸𑀢𑀺𑀓𑀸𑀦𑀁 𑀪𑀽𑀫𑀺𑀧𑀧𑁆𑀧𑀝𑀓𑁄 𑀅𑀦𑁆𑀢𑀭𑀥𑀸𑀬𑀺.

𑀧𑀤𑀸𑀮𑀢𑀸𑀧𑀸𑀢𑀼𑀪𑀸𑀯𑁄

𑁧𑁨𑁪. ‘‘𑀪𑀽𑀫𑀺𑀧𑀧𑁆𑀧𑀝𑀓𑁂 𑀅𑀦𑁆𑀢𑀭𑀳𑀺𑀢𑁂 𑀧𑀤𑀸𑀮𑀢𑀸 [𑀲𑀤𑁆𑀤𑀸𑀮𑀢𑀸 (𑀲𑀻.)] 𑀧𑀸𑀢𑀼𑀭𑀳𑁄𑀲𑀺, 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀓𑀮𑀫𑁆𑀩𑀼𑀓𑀸 [𑀓𑀮𑀫𑁆𑀩𑀓𑀸 (𑀲𑁆𑀬𑀸.)], 𑀏𑀯𑀫𑁂𑀯 𑀧𑀸𑀢𑀼𑀭𑀳𑁄𑀲𑀺. 𑀲𑀸 𑀅𑀳𑁄𑀲𑀺 𑀯𑀡𑁆𑀡𑀲𑀫𑁆𑀧𑀦𑁆𑀦𑀸 𑀕𑀦𑁆𑀥𑀲𑀫𑁆𑀧𑀦𑁆𑀦𑀸 𑀭𑀲𑀲𑀫𑁆𑀧𑀦𑁆𑀦𑀸, 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀲𑀫𑁆𑀧𑀦𑁆𑀦𑀁 𑀯𑀸 𑀲𑀧𑁆𑀧𑀺 𑀲𑀫𑁆𑀧𑀦𑁆𑀦𑀁 𑀯𑀸 𑀦𑀯𑀦𑀻𑀢𑀁 𑀏𑀯𑀁𑀯𑀡𑁆𑀡𑀸 𑀅𑀳𑁄𑀲𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀔𑀼𑀤𑁆𑀤𑀫𑀥𑀼𑀁 𑀅𑀦𑁂𑀴𑀓𑀁, 𑀏𑀯𑀫𑀲𑁆𑀲𑀸𑀤𑀸 𑀅𑀳𑁄𑀲𑀺.

‘‘𑀅𑀣 𑀔𑁄 𑀢𑁂, 𑀯𑀸𑀲𑁂𑀝𑁆𑀞, 𑀲𑀢𑁆𑀢𑀸 𑀧𑀤𑀸𑀮𑀢𑀁 𑀉𑀧𑀓𑁆𑀓𑀫𑀺𑀁𑀲𑀼 𑀧𑀭𑀺𑀪𑀼𑀜𑁆𑀚𑀺𑀢𑀼𑀁. 𑀢𑁂 𑀢𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀸 𑀢𑀁𑀪𑀓𑁆𑀔𑀸 𑀢𑀤𑀸𑀳𑀸𑀭𑀸 𑀘𑀺𑀭𑀁 𑀤𑀻𑀖𑀫𑀤𑁆𑀥𑀸𑀦𑀁 𑀅𑀝𑁆𑀞𑀁𑀲𑀼. 𑀬𑀣𑀸 𑀬𑀣𑀸 𑀔𑁄 𑀢𑁂, 𑀯𑀸𑀲𑁂𑀝𑁆𑀞, 𑀲𑀢𑁆𑀢𑀸 𑀧𑀤𑀸𑀮𑀢𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀸 𑀢𑀁𑀪𑀓𑁆𑀔𑀸 𑀢𑀤𑀸𑀳𑀸𑀭𑀸 𑀘𑀺𑀭𑀁 𑀤𑀻𑀖𑀫𑀤𑁆𑀥𑀸𑀦𑀁 𑀅𑀝𑁆𑀞𑀁𑀲𑀼, 𑀢𑀣𑀸 𑀢𑀣𑀸 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀔𑀭𑀢𑁆𑀢𑀜𑁆𑀘𑁂𑀯 𑀓𑀸𑀬𑀲𑁆𑀫𑀺𑀁 𑀑𑀓𑁆𑀓𑀫𑀺, 𑀯𑀡𑁆𑀡𑀯𑁂𑀯𑀡𑁆𑀡𑀢𑀸 𑀘 𑀧𑀜𑁆𑀜𑀸𑀬𑀺𑀢𑁆𑀣. 𑀏𑀓𑀺𑀤𑀁 𑀲𑀢𑁆𑀢𑀸 𑀯𑀡𑁆𑀡𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀏𑀓𑀺𑀤𑀁 𑀲𑀢𑁆𑀢𑀸 𑀤𑀼𑀩𑁆𑀩𑀡𑁆𑀡𑀸. 𑀢𑀢𑁆𑀣 𑀬𑁂 𑀢𑁂 𑀲𑀢𑁆𑀢𑀸 𑀯𑀡𑁆𑀡𑀯𑀦𑁆𑀢𑁄, 𑀢𑁂 𑀤𑀼𑀩𑁆𑀩𑀡𑁆𑀡𑁂 𑀲𑀢𑁆𑀢𑁂 𑀅𑀢𑀺𑀫𑀜𑁆𑀜𑀦𑁆𑀢𑀺 𑁋 ‘𑀫𑀬𑀫𑁂𑀢𑁂𑀳𑀺 𑀯𑀡𑁆𑀡𑀯𑀦𑁆𑀢𑀢𑀭𑀸, 𑀅𑀫𑁆𑀳𑁂𑀳𑁂𑀢𑁂 𑀤𑀼𑀩𑁆𑀩𑀡𑁆𑀡𑀢𑀭𑀸’𑀢𑀺. 𑀢𑁂𑀲𑀁 𑀯𑀡𑁆𑀡𑀸𑀢𑀺𑀫𑀸𑀦𑀧𑀘𑁆𑀘𑀬𑀸 𑀫𑀸𑀦𑀸𑀢𑀺𑀫𑀸𑀦𑀚𑀸𑀢𑀺𑀓𑀸𑀦𑀁 𑀧𑀤𑀸𑀮𑀢𑀸 𑀅𑀦𑁆𑀢𑀭𑀥𑀸𑀬𑀺.

‘‘𑀧𑀤𑀸𑀮𑀢𑀸𑀬 𑀅𑀦𑁆𑀢𑀭𑀳𑀺𑀢𑀸𑀬 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀅𑀦𑀼𑀢𑁆𑀣𑀼𑀦𑀺𑀁𑀲𑀼 𑁋 ‘𑀅𑀳𑀼 𑀯𑀢 𑀦𑁄, 𑀅𑀳𑀸𑀬𑀺 𑀯𑀢 𑀦𑁄 𑀧𑀤𑀸𑀮𑀢𑀸’𑀢𑀺! 𑀢𑀤𑁂𑀢𑀭𑀳𑀺𑀧𑀺 𑀫𑀦𑀼𑀲𑁆𑀲𑀸 𑀓𑁂𑀦𑀘𑀺 [𑀓𑁂𑀦𑀘𑀺𑀤𑁂𑀯 (𑀲𑀻. 𑀲𑁆𑀬𑀸. 𑀧𑀻.)] 𑀤𑀼𑀓𑁆𑀔𑀥𑀫𑁆𑀫𑁂𑀦 𑀨𑀼𑀝𑁆𑀞𑀸 𑀏𑀯𑀫𑀸𑀳𑀁𑀲𑀼 𑁋 ‘𑀅𑀳𑀼 𑀯𑀢 𑀦𑁄, 𑀅𑀳𑀸𑀬𑀺 𑀯𑀢 𑀦𑁄’𑀢𑀺! 𑀢𑀤𑁂𑀯 𑀧𑁄𑀭𑀸𑀡𑀁 𑀅𑀕𑁆𑀕𑀜𑁆𑀜𑀁 𑀅𑀓𑁆𑀔𑀭𑀁 𑀅𑀦𑀼𑀲𑀭𑀦𑁆𑀢𑀺, 𑀦 𑀢𑁆𑀯𑁂𑀯𑀲𑁆𑀲 𑀅𑀢𑁆𑀣𑀁 𑀆𑀚𑀸𑀦𑀦𑁆𑀢𑀺.

𑀅𑀓𑀝𑁆𑀞𑀧𑀸𑀓𑀲𑀸𑀮𑀺𑀧𑀸𑀢𑀼𑀪𑀸𑀯𑁄

𑁧𑁨𑁫. ‘‘𑀅𑀣 𑀔𑁄 𑀢𑁂𑀲𑀁, 𑀯𑀸𑀲𑁂𑀝𑁆𑀞, 𑀲𑀢𑁆𑀢𑀸𑀦𑀁 𑀧𑀤𑀸𑀮𑀢𑀸𑀬 𑀅𑀦𑁆𑀢𑀭𑀳𑀺𑀢𑀸𑀬 𑀅𑀓𑀝𑁆𑀞𑀧𑀸𑀓𑁄 𑀲𑀸𑀮𑀺 𑀧𑀸𑀢𑀼𑀭𑀳𑁄𑀲𑀺 𑀅𑀓𑀡𑁄 𑀅𑀣𑀼𑀲𑁄 𑀲𑀼𑀤𑁆𑀥𑁄 𑀲𑀼𑀕𑀦𑁆𑀥𑁄 𑀢𑀡𑁆𑀟𑀼𑀮𑀧𑁆𑀨𑀮𑁄. 𑀬𑀁 𑀢𑀁 𑀲𑀸𑀬𑀁 𑀲𑀸𑀬𑀫𑀸𑀲𑀸𑀬 𑀆𑀳𑀭𑀦𑁆𑀢𑀺, 𑀧𑀸𑀢𑁄 𑀢𑀁 𑀳𑁄𑀢𑀺 𑀧𑀓𑁆𑀓𑀁 𑀧𑀝𑀺𑀯𑀺𑀭𑀽𑀴𑁆𑀳𑀁. 𑀬𑀁 𑀢𑀁 𑀧𑀸𑀢𑁄 𑀧𑀸𑀢𑀭𑀸𑀲𑀸𑀬 𑀆𑀳𑀭𑀦𑁆𑀢𑀺, 𑀲𑀸𑀬𑀁 𑀢𑀁 𑀳𑁄𑀢𑀺 𑀧𑀓𑁆𑀓𑀁 𑀧𑀝𑀺𑀯𑀺𑀭𑀽𑀴𑁆𑀳𑀁; 𑀦𑀸𑀧𑀤𑀸𑀦𑀁 𑀧𑀜𑁆𑀜𑀸𑀬𑀢𑀺. 𑀅𑀣 𑀔𑁄 𑀢𑁂, 𑀯𑀸𑀲𑁂𑀝𑁆𑀞, 𑀲𑀢𑁆𑀢𑀸 𑀅𑀓𑀝𑁆𑀞𑀧𑀸𑀓𑀁 𑀲𑀸𑀮𑀺𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀸 𑀢𑀁𑀪𑀓𑁆𑀔𑀸 𑀢𑀤𑀸𑀳𑀸𑀭𑀸 𑀘𑀺𑀭𑀁 𑀤𑀻𑀖𑀫𑀤𑁆𑀥𑀸𑀦𑀁 𑀅𑀝𑁆𑀞𑀁𑀲𑀼.

𑀇𑀢𑁆𑀣𑀺𑀧𑀼𑀭𑀺𑀲𑀮𑀺𑀗𑁆𑀕𑀧𑀸𑀢𑀼𑀪𑀸𑀯𑁄

𑁧𑁨𑁬. ‘‘𑀬𑀣𑀸 𑀬𑀣𑀸 𑀔𑁄 𑀢𑁂, 𑀯𑀸𑀲𑁂𑀝𑁆𑀞, 𑀲𑀢𑁆𑀢𑀸 𑀅𑀓𑀝𑁆𑀞𑀧𑀸𑀓𑀁 𑀲𑀸𑀮𑀺𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀸 𑀢𑀁𑀪𑀓𑁆𑀔𑀸 𑀢𑀤𑀸𑀳𑀸𑀭𑀸 𑀘𑀺𑀭𑀁 𑀤𑀻𑀖𑀫𑀤𑁆𑀥𑀸𑀦𑀁 𑀅𑀝𑁆𑀞𑀁𑀲𑀼, 𑀢𑀣𑀸 𑀢𑀣𑀸 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀔𑀭𑀢𑁆𑀢𑀜𑁆𑀘𑁂𑀯 𑀓𑀸𑀬𑀲𑁆𑀫𑀺𑀁 𑀑𑀓𑁆𑀓𑀫𑀺, 𑀯𑀡𑁆𑀡𑀯𑁂𑀯𑀡𑁆𑀡𑀢𑀸 𑀘 𑀧𑀜𑁆𑀜𑀸𑀬𑀺𑀢𑁆𑀣, 𑀇𑀢𑁆𑀣𑀺𑀬𑀸 𑀘 𑀇𑀢𑁆𑀣𑀺𑀮𑀺𑀗𑁆𑀕𑀁 𑀧𑀸𑀢𑀼𑀭𑀳𑁄𑀲𑀺 𑀧𑀼𑀭𑀺𑀲𑀲𑁆𑀲 𑀘 𑀧𑀼𑀭𑀺𑀲𑀮𑀺𑀗𑁆𑀕𑀁. 𑀇𑀢𑁆𑀣𑀻 𑀘 𑀧𑀼𑀭𑀺𑀲𑀁 𑀅𑀢𑀺𑀯𑁂𑀮𑀁 𑀉𑀧𑀦𑀺𑀚𑁆𑀛𑀸𑀬𑀢𑀺 𑀧𑀼𑀭𑀺𑀲𑁄 𑀘 𑀇𑀢𑁆𑀣𑀺𑀁. 𑀢𑁂𑀲𑀁 𑀅𑀢𑀺𑀯𑁂𑀮𑀁 𑀅𑀜𑁆𑀜𑀫𑀜𑁆𑀜𑀁 𑀉𑀧𑀦𑀺𑀚𑁆𑀛𑀸𑀬𑀢𑀁 𑀲𑀸𑀭𑀸𑀕𑁄 𑀉𑀤𑀧𑀸𑀤𑀺, 𑀧𑀭𑀺𑀴𑀸𑀳𑁄 𑀓𑀸𑀬𑀲𑁆𑀫𑀺𑀁 𑀑𑀓𑁆𑀓𑀫𑀺. 𑀢𑁂 𑀧𑀭𑀺𑀴𑀸𑀳𑀧𑀘𑁆𑀘𑀬𑀸 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺𑀁𑀲𑀼.

‘‘𑀬𑁂 𑀔𑁄 𑀧𑀦 𑀢𑁂, 𑀯𑀸𑀲𑁂𑀝𑁆𑀞, 𑀢𑁂𑀦 𑀲𑀫𑀬𑁂𑀦 𑀲𑀢𑁆𑀢𑀸 𑀧𑀲𑁆𑀲𑀦𑁆𑀢𑀺 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑁂, 𑀅𑀜𑁆𑀜𑁂 𑀧𑀁𑀲𑀼𑀁 𑀔𑀺𑀧𑀦𑁆𑀢𑀺, 𑀅𑀜𑁆𑀜𑁂 𑀲𑁂𑀝𑁆𑀞𑀺𑀁 𑀔𑀺𑀧𑀦𑁆𑀢𑀺, 𑀅𑀜𑁆𑀜𑁂 𑀕𑁄𑀫𑀬𑀁 𑀔𑀺𑀧𑀦𑁆𑀢𑀺 𑁋 ‘𑀦𑀲𑁆𑀲 𑀅𑀲𑀼𑀘𑀺 [𑀯𑀲𑀮𑀺 (𑀲𑁆𑀬𑀸.), 𑀯𑀲𑀮𑀻 (𑀓.)], 𑀦𑀲𑁆𑀲 𑀅𑀲𑀼𑀘𑀻’𑀢𑀺. ‘𑀓𑀣𑀜𑁆𑀳𑀺 𑀦𑀸𑀫 𑀲𑀢𑁆𑀢𑁄 𑀲𑀢𑁆𑀢𑀲𑁆𑀲 𑀏𑀯𑀭𑀽𑀧𑀁 𑀓𑀭𑀺𑀲𑁆𑀲𑀢𑀻’𑀢𑀺! 𑀢𑀤𑁂𑀢𑀭𑀳𑀺𑀧𑀺 𑀫𑀦𑀼𑀲𑁆𑀲𑀸 𑀏𑀓𑀘𑁆𑀘𑁂𑀲𑀼 𑀚𑀦𑀧𑀤𑁂𑀲𑀼 𑀯𑀥𑀼𑀬𑀸 𑀦𑀺𑀩𑁆𑀩𑀼𑀬𑁆𑀳𑀫𑀸𑀦𑀸𑀬 [𑀦𑀺𑀯𑀬𑁆𑀳𑀫𑀸𑀦𑀸𑀬, 𑀦𑀺𑀕𑁆𑀕𑀬𑁆𑀳𑀫𑀸𑀦𑀸𑀬 (𑀓.)] 𑀅𑀜𑁆𑀜𑁂 𑀧𑀁𑀲𑀼𑀁 𑀔𑀺𑀧𑀦𑁆𑀢𑀺, 𑀅𑀜𑁆𑀜𑁂 𑀲𑁂𑀝𑁆𑀞𑀺𑀁 𑀔𑀺𑀧𑀦𑁆𑀢𑀺, 𑀅𑀜𑁆𑀜𑁂 𑀕𑁄𑀫𑀬𑀁 𑀔𑀺𑀧𑀦𑁆𑀢𑀺. 𑀢𑀤𑁂𑀯 𑀧𑁄𑀭𑀸𑀡𑀁 𑀅𑀕𑁆𑀕𑀜𑁆𑀜𑀁 𑀅𑀓𑁆𑀔𑀭𑀁 𑀅𑀦𑀼𑀲𑀭𑀦𑁆𑀢𑀺, 𑀦 𑀢𑁆𑀯𑁂𑀯𑀲𑁆𑀲 𑀅𑀢𑁆𑀣𑀁 𑀆𑀚𑀸𑀦𑀦𑁆𑀢𑀺.

𑀫𑁂𑀣𑀼𑀦𑀥𑀫𑁆𑀫𑀲𑀫𑀸𑀘𑀸𑀭𑁄

𑁧𑁨𑁭. ‘‘𑀅𑀥𑀫𑁆𑀫𑀲𑀫𑁆𑀫𑀢𑀁 𑀔𑁄 𑀧𑀦 [𑀅𑀥𑀫𑁆𑀫𑀲𑀫𑁆𑀫𑀢𑀁 𑀢𑀁 𑀔𑁄 𑀧𑀦 (𑀲𑁆𑀬𑀸.), 𑀅𑀥𑀫𑁆𑀫𑀲𑀫𑁆𑀫𑀢𑀁 𑀔𑁄 𑀧𑀦 𑀢𑀁 (?)], 𑀯𑀸𑀲𑁂𑀝𑁆𑀞, 𑀢𑁂𑀦 𑀲𑀫𑀬𑁂𑀦 𑀳𑁄𑀢𑀺, 𑀢𑀤𑁂𑀢𑀭𑀳𑀺 𑀥𑀫𑁆𑀫𑀲𑀫𑁆𑀫𑀢𑀁. 𑀬𑁂 𑀔𑁄 𑀧𑀦, 𑀯𑀸𑀲𑁂𑀝𑁆𑀞, 𑀢𑁂𑀦 𑀲𑀫𑀬𑁂𑀦 𑀲𑀢𑁆𑀢𑀸 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑀺, 𑀢𑁂 𑀫𑀸𑀲𑀫𑁆𑀧𑀺 𑀤𑁆𑀯𑁂𑀫𑀸𑀲𑀫𑁆𑀧𑀺 𑀦 𑀮𑀪𑀦𑁆𑀢𑀺 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀧𑀯𑀺𑀲𑀺𑀢𑀼𑀁. 𑀬𑀢𑁄 𑀔𑁄 𑀢𑁂, 𑀯𑀸𑀲𑁂𑀝𑁆𑀞, 𑀲𑀢𑁆𑀢𑀸 𑀢𑀲𑁆𑀫𑀺𑀁 𑀅𑀲𑀤𑁆𑀥𑀫𑁆𑀫𑁂 𑀅𑀢𑀺𑀯𑁂𑀮𑀁 𑀧𑀸𑀢𑀩𑁆𑀬𑀢𑀁 𑀆𑀧𑀚𑁆𑀚𑀺𑀁𑀲𑀼. 𑀅𑀣 𑀅𑀕𑀸𑀭𑀸𑀦𑀺 𑀉𑀧𑀓𑁆𑀓𑀫𑀺𑀁𑀲𑀼 𑀓𑀸𑀢𑀼𑀁 𑀢𑀲𑁆𑀲𑁂𑀯 𑀅𑀲𑀤𑁆𑀥𑀫𑁆𑀫𑀲𑁆𑀲 𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑀁. 𑀅𑀣 𑀔𑁄, 𑀯𑀸𑀲𑁂𑀝𑁆𑀞, 𑀅𑀜𑁆𑀜𑀢𑀭𑀲𑁆𑀲 𑀲𑀢𑁆𑀢𑀲𑁆𑀲 𑀅𑀮𑀲𑀚𑀸𑀢𑀺𑀓𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀅𑀫𑁆𑀪𑁄, 𑀓𑀺𑀫𑁂𑀯𑀸𑀳𑀁 𑀯𑀺𑀳𑀜𑁆𑀜𑀸𑀫𑀺 𑀲𑀸𑀮𑀺𑀁 𑀆𑀳𑀭𑀦𑁆𑀢𑁄 𑀲𑀸𑀬𑀁 𑀲𑀸𑀬𑀫𑀸𑀲𑀸𑀬 𑀧𑀸𑀢𑁄 𑀧𑀸𑀢𑀭𑀸𑀲𑀸𑀬! 𑀬𑀁𑀦𑀽𑀦𑀸𑀳𑀁 𑀲𑀸𑀮𑀺𑀁 𑀆𑀳𑀭𑁂𑀬𑁆𑀬𑀁 𑀲𑀓𑀺𑀁𑀤𑁂𑀯 [𑀲𑀓𑀺𑀁𑀤𑁂𑀯 (𑀓.)] 𑀲𑀸𑀬𑀧𑀸𑀢𑀭𑀸𑀲𑀸𑀬𑀸’𑀢𑀺!

‘‘𑀅𑀣 𑀔𑁄 𑀲𑁄, 𑀯𑀸𑀲𑁂𑀝𑁆𑀞, 𑀲𑀢𑁆𑀢𑁄 𑀲𑀸𑀮𑀺𑀁 𑀆𑀳𑀸𑀲𑀺 𑀲𑀓𑀺𑀁𑀤𑁂𑀯 𑀲𑀸𑀬𑀧𑀸𑀢𑀭𑀸𑀲𑀸𑀬. 𑀅𑀣 𑀔𑁄, 𑀯𑀸𑀲𑁂𑀝𑁆𑀞, 𑀅𑀜𑁆𑀜𑀢𑀭𑁄 𑀲𑀢𑁆𑀢𑁄 𑀬𑁂𑀦 𑀲𑁄 𑀲𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀲𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘𑀏𑀳𑀺, 𑀪𑁄 𑀲𑀢𑁆𑀢, 𑀲𑀸𑀮𑀸𑀳𑀸𑀭𑀁 𑀕𑀫𑀺𑀲𑁆𑀲𑀸𑀫𑀸’𑀢𑀺. ‘𑀅𑀮𑀁, 𑀪𑁄 𑀲𑀢𑁆𑀢, 𑀆𑀳𑀢𑁄 [𑀆𑀳𑀝𑁄 (𑀲𑁆𑀬𑀸.)] 𑀫𑁂 𑀲𑀸𑀮𑀺 𑀲𑀓𑀺𑀁𑀤𑁂𑀯 𑀲𑀸𑀬𑀧𑀸𑀢𑀭𑀸𑀲𑀸𑀬𑀸’𑀢𑀺. 𑀅𑀣 𑀔𑁄 𑀲𑁄, 𑀯𑀸𑀲𑁂𑀝𑁆𑀞, 𑀲𑀢𑁆𑀢𑁄 𑀢𑀲𑁆𑀲 𑀲𑀢𑁆𑀢𑀲𑁆𑀲 𑀤𑀺𑀝𑁆𑀞𑀸𑀦𑀼𑀕𑀢𑀺𑀁 𑀆𑀧𑀚𑁆𑀚𑀫𑀸𑀦𑁄 𑀲𑀸𑀮𑀺𑀁 𑀆𑀳𑀸𑀲𑀺 𑀲𑀓𑀺𑀁𑀤𑁂𑀯 𑀤𑁆𑀯𑀻𑀳𑀸𑀬. ‘𑀏𑀯𑀫𑁆𑀧𑀺 𑀓𑀺𑀭, 𑀪𑁄, 𑀲𑀸𑀥𑀽’𑀢𑀺.

‘‘𑀅𑀣 𑀔𑁄, 𑀯𑀸𑀲𑁂𑀝𑁆𑀞, 𑀅𑀜𑁆𑀜𑀢𑀭𑁄 𑀲𑀢𑁆𑀢𑁄 𑀬𑁂𑀦 𑀲𑁄 𑀲𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀲𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘𑀏𑀳𑀺, 𑀪𑁄 𑀲𑀢𑁆𑀢, 𑀲𑀸𑀮𑀸𑀳𑀸𑀭𑀁 𑀕𑀫𑀺𑀲𑁆𑀲𑀸𑀫𑀸’𑀢𑀺. ‘𑀅𑀮𑀁, 𑀪𑁄 𑀲𑀢𑁆𑀢, 𑀆𑀳𑀢𑁄 𑀫𑁂 𑀲𑀸𑀮𑀺 𑀲𑀓𑀺𑀁𑀤𑁂𑀯 𑀤𑁆𑀯𑀻𑀳𑀸𑀬𑀸’𑀢𑀺. 𑀅𑀣 𑀔𑁄 𑀲𑁄, 𑀯𑀸𑀲𑁂𑀝𑁆𑀞, 𑀲𑀢𑁆𑀢𑁄 𑀢𑀲𑁆𑀲 𑀲𑀢𑁆𑀢𑀲𑁆𑀲 𑀤𑀺𑀝𑁆𑀞𑀸𑀦𑀼𑀕𑀢𑀺𑀁 𑀆𑀧𑀚𑁆𑀚𑀫𑀸𑀦𑁄 𑀲𑀸𑀮𑀺𑀁 𑀆𑀳𑀸𑀲𑀺 𑀲𑀓𑀺𑀁𑀤𑁂𑀯 𑀘𑀢𑀽𑀳𑀸𑀬, ‘𑀏𑀯𑀫𑁆𑀧𑀺 𑀓𑀺𑀭, 𑀪𑁄, 𑀲𑀸𑀥𑀽’𑀢𑀺.

‘‘𑀅𑀣 𑀔𑁄, 𑀯𑀸𑀲𑁂𑀝𑁆𑀞, 𑀅𑀜𑁆𑀜𑀢𑀭𑁄 𑀲𑀢𑁆𑀢𑁄 𑀬𑁂𑀦 𑀲𑁄 𑀲𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀲𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘𑀏𑀳𑀺, 𑀪𑁄 𑀲𑀢𑁆𑀢, 𑀲𑀸𑀮𑀸𑀳𑀸𑀭𑀁 𑀕𑀫𑀺𑀲𑁆𑀲𑀸𑀫𑀸’𑀢𑀺. ‘𑀅𑀮𑀁, 𑀪𑁄 𑀲𑀢𑁆𑀢, 𑀆𑀳𑀢𑁄 𑀫𑁂 𑀲𑀸𑀮𑀺 𑀲𑀓𑀺𑀤𑁂𑀯 𑀘𑀢𑀽𑀳𑀸𑀬𑀸’𑀢𑀺. 𑀅𑀣 𑀔𑁄 𑀲𑁄, 𑀯𑀸𑀲𑁂𑀝𑁆𑀞, 𑀲𑀢𑁆𑀢𑁄 𑀢𑀲𑁆𑀲 𑀲𑀢𑁆𑀢𑀲𑁆𑀲 𑀤𑀺𑀝𑁆𑀞𑀸𑀦𑀼𑀕𑀢𑀺𑀁 𑀆𑀧𑀚𑁆𑀚𑀫𑀸𑀦𑁄 𑀲𑀸𑀮𑀺𑀁 𑀆𑀳𑀸𑀲𑀺 𑀲𑀓𑀺𑀤𑁂𑀯 𑀅𑀝𑁆𑀞𑀸𑀳𑀸𑀬, ‘𑀏𑀯𑀫𑁆𑀧𑀺 𑀓𑀺𑀭, 𑀪𑁄, 𑀲𑀸𑀥𑀽’𑀢𑀺.

‘‘𑀬𑀢𑁄 𑀔𑁄 𑀢𑁂, 𑀯𑀸𑀲𑁂𑀝𑁆𑀞, 𑀲𑀢𑁆𑀢𑀸 𑀲𑀦𑁆𑀦𑀺𑀥𑀺𑀓𑀸𑀭𑀓𑀁 𑀲𑀸𑀮𑀺𑀁 𑀉𑀧𑀓𑁆𑀓𑀫𑀺𑀁𑀲𑀼 𑀧𑀭𑀺𑀪𑀼𑀜𑁆𑀚𑀺𑀢𑀼𑀁. 𑀅𑀣 𑀓𑀡𑁄𑀧𑀺 𑀢𑀡𑁆𑀟𑀼𑀮𑀁 𑀧𑀭𑀺𑀬𑁄𑀦𑀦𑁆𑀥𑀺, 𑀣𑀼𑀲𑁄𑀧𑀺 𑀢𑀡𑁆𑀟𑀼𑀮𑀁 𑀧𑀭𑀺𑀬𑁄𑀦𑀦𑁆𑀥𑀺; 𑀮𑀽𑀦𑀫𑁆𑀧𑀺 𑀦𑀧𑁆𑀧𑀝𑀺𑀯𑀺𑀭𑀽𑀴𑁆𑀳𑀁, 𑀅𑀧𑀤𑀸𑀦𑀁 𑀧𑀜𑁆𑀜𑀸𑀬𑀺𑀢𑁆𑀣, 𑀲𑀡𑁆𑀟𑀲𑀡𑁆𑀟𑀸 𑀲𑀸𑀮𑀬𑁄 𑀅𑀝𑁆𑀞𑀁𑀲𑀼.

𑀲𑀸𑀮𑀺𑀯𑀺𑀪𑀸𑀕𑁄

𑁧𑁨𑁮. ‘‘𑀅𑀣 𑀔𑁄 𑀢𑁂, 𑀯𑀸𑀲𑁂𑀝𑁆𑀞, 𑀲𑀢𑁆𑀢𑀸 𑀲𑀦𑁆𑀦𑀺𑀧𑀢𑀺𑀁𑀲𑀼, 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀅𑀦𑀼𑀢𑁆𑀣𑀼𑀦𑀺𑀁𑀲𑀼 𑁋 ‘𑀧𑀸𑀧𑀓𑀸 𑀯𑀢, 𑀪𑁄, 𑀥𑀫𑁆𑀫𑀸 𑀲𑀢𑁆𑀢𑁂𑀲𑀼 𑀧𑀸𑀢𑀼𑀪𑀽𑀢𑀸. 𑀫𑀬𑀜𑁆𑀳𑀺 𑀧𑀼𑀩𑁆𑀩𑁂 𑀫𑀦𑁄𑀫𑀬𑀸 𑀅𑀳𑀼𑀫𑁆𑀳𑀸 𑀧𑀻𑀢𑀺𑀪𑀓𑁆𑀔𑀸 𑀲𑀬𑀁𑀧𑀪𑀸 𑀅𑀦𑁆𑀢𑀮𑀺𑀓𑁆𑀔𑀘𑀭𑀸 𑀲𑀼𑀪𑀝𑁆𑀞𑀸𑀬𑀺𑀦𑁄, 𑀘𑀺𑀭𑀁 𑀤𑀻𑀖𑀫𑀤𑁆𑀥𑀸𑀦𑀁 𑀅𑀝𑁆𑀞𑀫𑁆𑀳𑀸. 𑀢𑁂𑀲𑀁 𑀦𑁄 𑀅𑀫𑁆𑀳𑀸𑀓𑀁 𑀓𑀤𑀸𑀘𑀺 𑀓𑀭𑀳𑀘𑀺 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀭𑀲𑀧𑀣𑀯𑀻 𑀉𑀤𑀓𑀲𑁆𑀫𑀺𑀁 𑀲𑀫𑀢𑀦𑀺. 𑀲𑀸 𑀅𑀳𑁄𑀲𑀺 𑀯𑀡𑁆𑀡𑀲𑀫𑁆𑀧𑀦𑁆𑀦𑀸 𑀕𑀦𑁆𑀥𑀲𑀫𑁆𑀧𑀦𑁆𑀦𑀸 𑀭𑀲𑀲𑀫𑁆𑀧𑀦𑁆𑀦𑀸. 𑀢𑁂 𑀫𑀬𑀁 𑀭𑀲𑀧𑀣𑀯𑀺𑀁 𑀳𑀢𑁆𑀣𑁂𑀳𑀺 𑀆𑀮𑀼𑀧𑁆𑀧𑀓𑀸𑀭𑀓𑀁 𑀉𑀧𑀓𑁆𑀓𑀫𑀺𑀫𑁆𑀳 𑀧𑀭𑀺𑀪𑀼𑀜𑁆𑀚𑀺𑀢𑀼𑀁, 𑀢𑁂𑀲𑀁 𑀦𑁄 𑀭𑀲𑀧𑀣𑀯𑀺𑀁 𑀳𑀢𑁆𑀣𑁂𑀳𑀺 𑀆𑀮𑀼𑀧𑁆𑀧𑀓𑀸𑀭𑀓𑀁 𑀉𑀧𑀓𑁆𑀓𑀫𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀲𑀬𑀁𑀧𑀪𑀸 𑀅𑀦𑁆𑀢𑀭𑀥𑀸𑀬𑀺. 𑀲𑀬𑀁𑀧𑀪𑀸𑀬 𑀅𑀦𑁆𑀢𑀭𑀳𑀺𑀢𑀸𑀬 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀧𑀸𑀢𑀼𑀭𑀳𑁂𑀲𑀼𑀁, 𑀘𑀦𑁆𑀤𑀺𑀫𑀲𑀽𑀭𑀺𑀬𑁂𑀲𑀼 𑀧𑀸𑀢𑀼𑀪𑀽𑀢𑁂𑀲𑀼 𑀦𑀓𑁆𑀔𑀢𑁆𑀢𑀸𑀦𑀺 𑀢𑀸𑀭𑀓𑀭𑀽𑀧𑀸𑀦𑀺 𑀧𑀸𑀢𑀼𑀭𑀳𑁂𑀲𑀼𑀁, 𑀦𑀓𑁆𑀔𑀢𑁆𑀢𑁂𑀲𑀼 𑀢𑀸𑀭𑀓𑀭𑀽𑀧𑁂𑀲𑀼 𑀧𑀸𑀢𑀼𑀪𑀽𑀢𑁂𑀲𑀼 𑀭𑀢𑁆𑀢𑀺𑀦𑁆𑀤𑀺𑀯𑀸 𑀧𑀜𑁆𑀜𑀸𑀬𑀺𑀁𑀲𑀼, 𑀭𑀢𑁆𑀢𑀺𑀦𑁆𑀤𑀺𑀯𑁂𑀲𑀼 𑀧𑀜𑁆𑀜𑀸𑀬𑀫𑀸𑀦𑁂𑀲𑀼 𑀫𑀸𑀲𑀟𑁆𑀠𑀫𑀸𑀲𑀸 𑀧𑀜𑁆𑀜𑀸𑀬𑀺𑀁𑀲𑀼. 𑀫𑀸𑀲𑀟𑁆𑀠𑀫𑀸𑀲𑁂𑀲𑀼 𑀧𑀜𑁆𑀜𑀸𑀬𑀫𑀸𑀦𑁂𑀲𑀼 𑀉𑀢𑀼𑀲𑀁𑀯𑀘𑁆𑀙𑀭𑀸 𑀧𑀜𑁆𑀜𑀸𑀬𑀺𑀁𑀲𑀼. 𑀢𑁂 𑀫𑀬𑀁 𑀭𑀲𑀧𑀣𑀯𑀺𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀸 𑀢𑀁𑀪𑀓𑁆𑀔𑀸 𑀢𑀤𑀸𑀳𑀸𑀭𑀸 𑀘𑀺𑀭𑀁 𑀤𑀻𑀖𑀫𑀤𑁆𑀥𑀸𑀦𑀁 𑀅𑀝𑁆𑀞𑀫𑁆𑀳𑀸. 𑀢𑁂𑀲𑀁 𑀦𑁄 𑀧𑀸𑀧𑀓𑀸𑀦𑀁𑀬𑁂𑀯 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀸𑀢𑀼𑀪𑀸𑀯𑀸 𑀭𑀲𑀧𑀣𑀯𑀻 𑀅𑀦𑁆𑀢𑀭𑀥𑀸𑀬𑀺. 𑀭𑀲𑀧𑀣𑀯𑀺𑀬𑀸 𑀅𑀦𑁆𑀢𑀭𑀳𑀺𑀢𑀸𑀬 𑀪𑀽𑀫𑀺𑀧𑀧𑁆𑀧𑀝𑀓𑁄 𑀧𑀸𑀢𑀼𑀭𑀳𑁄𑀲𑀺. 𑀲𑁄 𑀅𑀳𑁄𑀲𑀺 𑀯𑀡𑁆𑀡𑀲𑀫𑁆𑀧𑀦𑁆𑀦𑁄 𑀕𑀦𑁆𑀥𑀲𑀫𑁆𑀧𑀦𑁆𑀦𑁄 𑀭𑀲𑀲𑀫𑁆𑀧𑀦𑁆𑀦𑁄. 𑀢𑁂 𑀫𑀬𑀁 𑀪𑀽𑀫𑀺𑀧𑀧𑁆𑀧𑀝𑀓𑀁 𑀉𑀧𑀓𑁆𑀓𑀫𑀺𑀫𑁆𑀳 𑀧𑀭𑀺𑀪𑀼𑀜𑁆𑀚𑀺𑀢𑀼𑀁. 𑀢𑁂 𑀫𑀬𑀁 𑀢𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀸 𑀢𑀁𑀪𑀓𑁆𑀔𑀸 𑀢𑀤𑀸𑀳𑀸𑀭𑀸 𑀘𑀺𑀭𑀁 𑀤𑀻𑀖𑀫𑀤𑁆𑀥𑀸𑀦𑀁 𑀅𑀝𑁆𑀞𑀫𑁆𑀳𑀸. 𑀢𑁂𑀲𑀁 𑀦𑁄 𑀧𑀸𑀧𑀓𑀸𑀦𑀁𑀬𑁂𑀯 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀸𑀢𑀼𑀪𑀸𑀯𑀸 𑀪𑀽𑀫𑀺𑀧𑀧𑁆𑀧𑀝𑀓𑁄 𑀅𑀦𑁆𑀢𑀭𑀥𑀸𑀬𑀺. 𑀪𑀽𑀫𑀺𑀧𑀧𑁆𑀧𑀝𑀓𑁂 𑀅𑀦𑁆𑀢𑀭𑀳𑀺𑀢𑁂 𑀧𑀤𑀸𑀮𑀢𑀸 𑀧𑀸𑀢𑀼𑀭𑀳𑁄𑀲𑀺. 𑀲𑀸 𑀅𑀳𑁄𑀲𑀺 𑀯𑀡𑁆𑀡𑀲𑀫𑁆𑀧𑀦𑁆𑀦𑀸 𑀕𑀦𑁆𑀥𑀲𑀫𑁆𑀧𑀦𑁆𑀦𑀸 𑀭𑀲𑀲𑀫𑁆𑀧𑀦𑁆𑀦𑀸. 𑀢𑁂 𑀫𑀬𑀁 𑀧𑀤𑀸𑀮𑀢𑀁 𑀉𑀧𑀓𑁆𑀓𑀫𑀺𑀫𑁆𑀳 𑀧𑀭𑀺𑀪𑀼𑀜𑁆𑀚𑀺𑀢𑀼𑀁. 𑀢𑁂 𑀫𑀬𑀁 𑀢𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀸 𑀢𑀁𑀪𑀓𑁆𑀔𑀸 𑀢𑀤𑀸𑀳𑀸𑀭𑀸 𑀘𑀺𑀭𑀁 𑀤𑀻𑀖𑀫𑀤𑁆𑀥𑀸𑀦𑀁 𑀅𑀝𑁆𑀞𑀫𑁆𑀳𑀸. 𑀢𑁂𑀲𑀁 𑀦𑁄 𑀧𑀸𑀧𑀓𑀸𑀦𑀁𑀬𑁂𑀯 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀸𑀢𑀼𑀪𑀸𑀯𑀸 𑀧𑀤𑀸𑀮𑀢𑀸 𑀅𑀦𑁆𑀢𑀭𑀥𑀸𑀬𑀺. 𑀧𑀤𑀸𑀮𑀢𑀸𑀬 𑀅𑀦𑁆𑀢𑀭𑀳𑀺𑀢𑀸𑀬 𑀅𑀓𑀝𑁆𑀞𑀧𑀸𑀓𑁄 𑀲𑀸𑀮𑀺 𑀧𑀸𑀢𑀼𑀭𑀳𑁄𑀲𑀺 𑀅𑀓𑀡𑁄 𑀅𑀣𑀼𑀲𑁄 𑀲𑀼𑀤𑁆𑀥𑁄 𑀲𑀼𑀕𑀦𑁆𑀥𑁄 𑀢𑀡𑁆𑀟𑀼𑀮𑀧𑁆𑀨𑀮𑁄. 𑀬𑀁 𑀢𑀁 𑀲𑀸𑀬𑀁 𑀲𑀸𑀬𑀫𑀸𑀲𑀸𑀬 𑀆𑀳𑀭𑀸𑀫, 𑀧𑀸𑀢𑁄 𑀢𑀁 𑀳𑁄𑀢𑀺 𑀧𑀓𑁆𑀓𑀁 𑀧𑀝𑀺𑀯𑀺𑀭𑀽𑀴𑁆𑀳𑀁. 𑀬𑀁 𑀢𑀁 𑀧𑀸𑀢𑁄 𑀧𑀸𑀢𑀭𑀸𑀲𑀸𑀬 𑀆𑀳𑀭𑀸𑀫, 𑀲𑀸𑀬𑀁 𑀢𑀁 𑀳𑁄𑀢𑀺 𑀧𑀓𑁆𑀓𑀁 𑀧𑀝𑀺𑀯𑀺𑀭𑀽𑀴𑁆𑀳𑀁. 𑀦𑀸𑀧𑀤𑀸𑀦𑀁 𑀧𑀜𑁆𑀜𑀸𑀬𑀺𑀢𑁆𑀣. 𑀢𑁂 𑀫𑀬𑀁 𑀅𑀓𑀝𑁆𑀞𑀧𑀸𑀓𑀁 𑀲𑀸𑀮𑀺𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀸 𑀢𑀁𑀪𑀓𑁆𑀔𑀸 𑀢𑀤𑀸𑀳𑀸𑀭𑀸 𑀘𑀺𑀭𑀁 𑀤𑀻𑀖𑀫𑀤𑁆𑀥𑀸𑀦𑀁 𑀅𑀝𑁆𑀞𑀫𑁆𑀳𑀸. 𑀢𑁂𑀲𑀁 𑀦𑁄 𑀧𑀸𑀧𑀓𑀸𑀦𑀁𑀬𑁂𑀯 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀸𑀢𑀼𑀪𑀸𑀯𑀸 𑀓𑀡𑁄𑀧𑀺 𑀢𑀡𑁆𑀟𑀼𑀮𑀁 𑀧𑀭𑀺𑀬𑁄𑀦𑀦𑁆𑀥𑀺, 𑀣𑀼𑀲𑁄𑀧𑀺 𑀢𑀡𑁆𑀟𑀼𑀮𑀁 𑀧𑀭𑀺𑀬𑁄𑀦𑀦𑁆𑀥𑀺, 𑀮𑀽𑀦𑀫𑁆𑀧𑀺 𑀦𑀧𑁆𑀧𑀝𑀺𑀯𑀺𑀭𑀽𑀴𑁆𑀳𑀁, 𑀅𑀧𑀤𑀸𑀦𑀁 𑀧𑀜𑁆𑀜𑀸𑀬𑀺𑀢𑁆𑀣, 𑀲𑀡𑁆𑀟𑀲𑀡𑁆𑀟𑀸 𑀲𑀸𑀮𑀬𑁄 𑀞𑀺𑀢𑀸. 𑀬𑀁𑀦𑀽𑀦 𑀫𑀬𑀁 𑀲𑀸𑀮𑀺𑀁 𑀯𑀺𑀪𑀚𑁂𑀬𑁆𑀬𑀸𑀫, 𑀫𑀭𑀺𑀬𑀸𑀤𑀁 𑀞𑀧𑁂𑀬𑁆𑀬𑀸𑀫𑀸’𑀢𑀺! 𑀅𑀣 𑀔𑁄 𑀢𑁂, 𑀯𑀸𑀲𑁂𑀝𑁆𑀞, 𑀲𑀢𑁆𑀢𑀸 𑀲𑀸𑀮𑀺𑀁 𑀯𑀺𑀪𑀚𑀺𑀁𑀲𑀼, 𑀫𑀭𑀺𑀬𑀸𑀤𑀁 𑀞𑀧𑁂𑀲𑀼𑀁.

𑁧𑁨𑁯. ‘‘𑀅𑀣 𑀔𑁄, 𑀯𑀸𑀲𑁂𑀝𑁆𑀞, 𑀅𑀜𑁆𑀜𑀢𑀭𑁄 𑀲𑀢𑁆𑀢𑁄 𑀮𑁄𑀮𑀚𑀸𑀢𑀺𑀓𑁄 𑀲𑀓𑀁 𑀪𑀸𑀕𑀁 𑀧𑀭𑀺𑀭𑀓𑁆𑀔𑀦𑁆𑀢𑁄 𑀅𑀜𑁆𑀜𑀢𑀭𑀁 [𑀅𑀜𑁆𑀜𑀲𑁆𑀲 (?)] 𑀪𑀸𑀕𑀁 𑀅𑀤𑀺𑀦𑁆𑀦𑀁 𑀆𑀤𑀺𑀬𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺. 𑀢𑀫𑁂𑀦𑀁 𑀅𑀕𑁆𑀕𑀳𑁂𑀲𑀼𑀁, 𑀕𑀳𑁂𑀢𑁆𑀯𑀸 𑀏𑀢𑀤𑀯𑁄𑀘𑀼𑀁 𑁋 ‘𑀧𑀸𑀧𑀓𑀁 𑀯𑀢, 𑀪𑁄 𑀲𑀢𑁆𑀢, 𑀓𑀭𑁄𑀲𑀺, 𑀬𑀢𑁆𑀭 𑀳𑀺 𑀦𑀸𑀫 𑀲𑀓𑀁 𑀪𑀸𑀕𑀁 𑀧𑀭𑀺𑀭𑀓𑁆𑀔𑀦𑁆𑀢𑁄 𑀅𑀜𑁆𑀜𑀢𑀭𑀁 𑀪𑀸𑀕𑀁 𑀅𑀤𑀺𑀦𑁆𑀦𑀁 𑀆𑀤𑀺𑀬𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀲𑀺. 𑀫𑀸𑀲𑁆𑀲𑀼, 𑀪𑁄 𑀲𑀢𑁆𑀢, 𑀧𑀼𑀦𑀧𑀺 𑀏𑀯𑀭𑀽𑀧𑀫𑀓𑀸𑀲𑀻’𑀢𑀺. ‘𑀏𑀯𑀁, 𑀪𑁄’𑀢𑀺 𑀔𑁄, 𑀯𑀸𑀲𑁂𑀝𑁆𑀞, 𑀲𑁄 𑀲𑀢𑁆𑀢𑁄 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀧𑀘𑁆𑀘𑀲𑁆𑀲𑁄𑀲𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄, 𑀯𑀸𑀲𑁂𑀝𑁆𑀞, 𑀲𑁄 𑀲𑀢𑁆𑀢𑁄…𑀧𑁂… 𑀢𑀢𑀺𑀬𑀫𑁆𑀧𑀺 𑀔𑁄, 𑀯𑀸𑀲𑁂𑀝𑁆𑀞, 𑀲𑁄 𑀲𑀢𑁆𑀢𑁄 𑀲𑀓𑀁 𑀪𑀸𑀕𑀁 𑀧𑀭𑀺𑀭𑀓𑁆𑀔𑀦𑁆𑀢𑁄 𑀅𑀜𑁆𑀜𑀢𑀭𑀁 𑀪𑀸𑀕𑀁 𑀅𑀤𑀺𑀦𑁆𑀦𑀁 𑀆𑀤𑀺𑀬𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺. 𑀢𑀫𑁂𑀦𑀁 𑀅𑀕𑁆𑀕𑀳𑁂𑀲𑀼𑀁, 𑀕𑀳𑁂𑀢𑁆𑀯𑀸 𑀏𑀢𑀤𑀯𑁄𑀘𑀼𑀁 𑁋 ‘𑀧𑀸𑀧𑀓𑀁 𑀯𑀢, 𑀪𑁄 𑀲𑀢𑁆𑀢, 𑀓𑀭𑁄𑀲𑀺, 𑀬𑀢𑁆𑀭 𑀳𑀺 𑀦𑀸𑀫 𑀲𑀓𑀁 𑀪𑀸𑀕𑀁 𑀧𑀭𑀺𑀭𑀓𑁆𑀔𑀦𑁆𑀢𑁄 𑀅𑀜𑁆𑀜𑀢𑀭𑀁 𑀪𑀸𑀕𑀁 𑀅𑀤𑀺𑀦𑁆𑀦𑀁 𑀆𑀤𑀺𑀬𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀲𑀺. 𑀫𑀸𑀲𑁆𑀲𑀼, 𑀪𑁄 𑀲𑀢𑁆𑀢, 𑀧𑀼𑀦𑀧𑀺 𑀏𑀯𑀭𑀽𑀧𑀫𑀓𑀸𑀲𑀻’𑀢𑀺. 𑀅𑀜𑁆𑀜𑁂 𑀧𑀸𑀡𑀺𑀦𑀸 𑀧𑀳𑀭𑀺𑀁𑀲𑀼, 𑀅𑀜𑁆𑀜𑁂 𑀮𑁂𑀟𑁆𑀟𑀼𑀦𑀸 𑀧𑀳𑀭𑀺𑀁𑀲𑀼, 𑀅𑀜𑁆𑀜𑁂 𑀤𑀡𑁆𑀟𑁂𑀦 𑀧𑀳𑀭𑀺𑀁𑀲𑀼. 𑀢𑀤𑀕𑁆𑀕𑁂 𑀔𑁄, 𑀯𑀸𑀲𑁂𑀝𑁆𑀞, 𑀅𑀤𑀺𑀦𑁆𑀦𑀸𑀤𑀸𑀦𑀁 𑀧𑀜𑁆𑀜𑀸𑀬𑀢𑀺, 𑀕𑀭𑀳𑀸 𑀧𑀜𑁆𑀜𑀸𑀬𑀢𑀺, 𑀫𑀼𑀲𑀸𑀯𑀸𑀤𑁄 𑀧𑀜𑁆𑀜𑀸𑀬𑀢𑀺, 𑀤𑀡𑁆𑀟𑀸𑀤𑀸𑀦𑀁 𑀧𑀜𑁆𑀜𑀸𑀬𑀢𑀺.

𑀫𑀳𑀸𑀲𑀫𑁆𑀫𑀢𑀭𑀸𑀚𑀸

𑁧𑁩𑁦. ‘‘𑀅𑀣 𑀔𑁄 𑀢𑁂, 𑀯𑀸𑀲𑁂𑀝𑁆𑀞, 𑀲𑀢𑁆𑀢𑀸 𑀲𑀦𑁆𑀦𑀺𑀧𑀢𑀺𑀁𑀲𑀼, 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀅𑀦𑀼𑀢𑁆𑀣𑀼𑀦𑀺𑀁𑀲𑀼 𑁋 ‘𑀧𑀸𑀧𑀓𑀸 𑀯𑀢 𑀪𑁄 𑀥𑀫𑁆𑀫𑀸 𑀲𑀢𑁆𑀢𑁂𑀲𑀼 𑀧𑀸𑀢𑀼𑀪𑀽𑀢𑀸, 𑀬𑀢𑁆𑀭 𑀳𑀺 𑀦𑀸𑀫 𑀅𑀤𑀺𑀦𑁆𑀦𑀸𑀤𑀸𑀦𑀁 𑀧𑀜𑁆𑀜𑀸𑀬𑀺𑀲𑁆𑀲𑀢𑀺, 𑀕𑀭𑀳𑀸 𑀧𑀜𑁆𑀜𑀸𑀬𑀺𑀲𑁆𑀲𑀢𑀺, 𑀫𑀼𑀲𑀸𑀯𑀸𑀤𑁄 𑀧𑀜𑁆𑀜𑀸𑀬𑀺𑀲𑁆𑀲𑀢𑀺, 𑀤𑀡𑁆𑀟𑀸𑀤𑀸𑀦𑀁 𑀧𑀜𑁆𑀜𑀸𑀬𑀺𑀲𑁆𑀲𑀢𑀺. 𑀬𑀁𑀦𑀽𑀦 𑀫𑀬𑀁 𑀏𑀓𑀁 𑀲𑀢𑁆𑀢𑀁 𑀲𑀫𑁆𑀫𑀦𑁆𑀦𑁂𑀬𑁆𑀬𑀸𑀫, 𑀬𑁄 𑀦𑁄 𑀲𑀫𑁆𑀫𑀸 𑀔𑀻𑀬𑀺𑀢𑀩𑁆𑀩𑀁 𑀔𑀻𑀬𑁂𑀬𑁆𑀬, 𑀲𑀫𑁆𑀫𑀸 𑀕𑀭𑀳𑀺𑀢𑀩𑁆𑀩𑀁 𑀕𑀭𑀳𑁂𑀬𑁆𑀬, 𑀲𑀫𑁆𑀫𑀸 𑀧𑀩𑁆𑀩𑀸𑀚𑁂𑀢𑀩𑁆𑀩𑀁 𑀧𑀩𑁆𑀩𑀸𑀚𑁂𑀬𑁆𑀬. 𑀫𑀬𑀁 𑀧𑀦𑀲𑁆𑀲 𑀲𑀸𑀮𑀻𑀦𑀁 𑀪𑀸𑀕𑀁 𑀅𑀦𑀼𑀧𑁆𑀧𑀤𑀲𑁆𑀲𑀸𑀫𑀸’𑀢𑀺.

‘‘𑀅𑀣 𑀔𑁄 𑀢𑁂, 𑀯𑀸𑀲𑁂𑀝𑁆𑀞, 𑀲𑀢𑁆𑀢𑀸 𑀬𑁄 𑀦𑁂𑀲𑀁 𑀲𑀢𑁆𑀢𑁄 𑀅𑀪𑀺𑀭𑀽𑀧𑀢𑀭𑁄 𑀘 𑀤𑀲𑁆𑀲𑀦𑀻𑀬𑀢𑀭𑁄 𑀘 𑀧𑀸𑀲𑀸𑀤𑀺𑀓𑀢𑀭𑁄 𑀘 𑀫𑀳𑁂𑀲𑀓𑁆𑀔𑀢𑀭𑁄 𑀘 𑀢𑀁 𑀲𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀤𑀯𑁄𑀘𑀼𑀁 𑁋 ‘𑀏𑀳𑀺, 𑀪𑁄 𑀲𑀢𑁆𑀢, 𑀲𑀫𑁆𑀫𑀸 𑀔𑀻𑀬𑀺𑀢𑀩𑁆𑀩𑀁 𑀔𑀻𑀬, 𑀲𑀫𑁆𑀫𑀸 𑀕𑀭𑀳𑀺𑀢𑀩𑁆𑀩𑀁 𑀕𑀭𑀳, 𑀲𑀫𑁆𑀫𑀸 𑀧𑀩𑁆𑀩𑀸𑀚𑁂𑀢𑀩𑁆𑀩𑀁 𑀧𑀩𑁆𑀩𑀸𑀚𑁂𑀳𑀺. 𑀫𑀬𑀁 𑀧𑀦 𑀢𑁂 𑀲𑀸𑀮𑀻𑀦𑀁 𑀪𑀸𑀕𑀁 𑀅𑀦𑀼𑀧𑁆𑀧𑀤𑀲𑁆𑀲𑀸𑀫𑀸’𑀢𑀺. ‘𑀏𑀯𑀁, 𑀪𑁄’𑀢𑀺 𑀔𑁄, 𑀯𑀸𑀲𑁂𑀝𑁆𑀞, 𑀲𑁄 𑀲𑀢𑁆𑀢𑁄 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀲𑀫𑁆𑀫𑀸 𑀔𑀻𑀬𑀺𑀢𑀩𑁆𑀩𑀁 𑀔𑀻𑀬𑀺, 𑀲𑀫𑁆𑀫𑀸 𑀕𑀭𑀳𑀺𑀢𑀩𑁆𑀩𑀁 𑀕𑀭𑀳𑀺, 𑀲𑀫𑁆𑀫𑀸 𑀧𑀩𑁆𑀩𑀸𑀚𑁂𑀢𑀩𑁆𑀩𑀁 𑀧𑀩𑁆𑀩𑀸𑀚𑁂𑀲𑀺. 𑀢𑁂 𑀧𑀦𑀲𑁆𑀲 𑀲𑀸𑀮𑀻𑀦𑀁 𑀪𑀸𑀕𑀁 𑀅𑀦𑀼𑀧𑁆𑀧𑀤𑀁𑀲𑀼.

𑁧𑁩𑁧. ‘‘𑀫𑀳𑀸𑀚𑀦𑀲𑀫𑁆𑀫𑀢𑁄𑀢𑀺 𑀔𑁄, 𑀯𑀸𑀲𑁂𑀝𑁆𑀞, ‘𑀫𑀳𑀸𑀲𑀫𑁆𑀫𑀢𑁄, 𑀫𑀳𑀸𑀲𑀫𑁆𑀫𑀢𑁄’ 𑀢𑁆𑀯𑁂𑀯 𑀧𑀞𑀫𑀁 𑀅𑀓𑁆𑀔𑀭𑀁 𑀉𑀧𑀦𑀺𑀩𑁆𑀩𑀢𑁆𑀢𑀁. 𑀔𑁂𑀢𑁆𑀢𑀸𑀦𑀁 𑀅𑀥𑀺𑀧𑀢𑀻𑀢𑀺 𑀔𑁄, 𑀯𑀸𑀲𑁂𑀝𑁆𑀞, ‘𑀔𑀢𑁆𑀢𑀺𑀬𑁄, 𑀔𑀢𑁆𑀢𑀺𑀬𑁄’ 𑀢𑁆𑀯𑁂𑀯 𑀤𑀼𑀢𑀺𑀬𑀁 𑀅𑀓𑁆𑀔𑀭𑀁 𑀉𑀧𑀦𑀺𑀩𑁆𑀩𑀢𑁆𑀢𑀁. 𑀥𑀫𑁆𑀫𑁂𑀦 𑀧𑀭𑁂 𑀭𑀜𑁆𑀚𑁂𑀢𑀻𑀢𑀺 𑀔𑁄, 𑀯𑀸𑀲𑁂𑀝𑁆𑀞, ‘𑀭𑀸𑀚𑀸, 𑀭𑀸𑀚𑀸’ 𑀢𑁆𑀯𑁂𑀯 𑀢𑀢𑀺𑀬𑀁 𑀅𑀓𑁆𑀔𑀭𑀁 𑀉𑀧𑀦𑀺𑀩𑁆𑀩𑀢𑁆𑀢𑀁. 𑀇𑀢𑀺 𑀔𑁄, 𑀯𑀸𑀲𑁂𑀝𑁆𑀞, 𑀏𑀯𑀫𑁂𑀢𑀲𑁆𑀲 𑀔𑀢𑁆𑀢𑀺𑀬𑀫𑀡𑁆𑀟𑀮𑀲𑁆𑀲 𑀧𑁄𑀭𑀸𑀡𑁂𑀦 𑀅𑀕𑁆𑀕𑀜𑁆𑀜𑁂𑀦 𑀅𑀓𑁆𑀔𑀭𑁂𑀦 𑀅𑀪𑀺𑀦𑀺𑀩𑁆𑀩𑀢𑁆𑀢𑀺 𑀅𑀳𑁄𑀲𑀺 𑀢𑁂𑀲𑀁𑀬𑁂𑀯 𑀲𑀢𑁆𑀢𑀸𑀦𑀁, 𑀅𑀦𑀜𑁆𑀜𑁂𑀲𑀁. 𑀲𑀤𑀺𑀲𑀸𑀦𑀁𑀬𑁂𑀯, 𑀦𑁄 𑀅𑀲𑀤𑀺𑀲𑀸𑀦𑀁. 𑀥𑀫𑁆𑀫𑁂𑀦𑁂𑀯, 𑀦𑁄 𑀅𑀥𑀫𑁆𑀫𑁂𑀦. 𑀥𑀫𑁆𑀫𑁄 𑀳𑀺, 𑀯𑀸𑀲𑁂𑀝𑁆𑀞, 𑀲𑁂𑀝𑁆𑀞𑁄 𑀚𑀦𑁂𑀢𑀲𑁆𑀫𑀺𑀁 𑀤𑀺𑀝𑁆𑀞𑁂 𑀘𑁂𑀯 𑀥𑀫𑁆𑀫𑁂 𑀅𑀪𑀺𑀲𑀫𑁆𑀧𑀭𑀸𑀬𑀜𑁆𑀘.

𑀩𑁆𑀭𑀸𑀳𑁆𑀫𑀡𑀫𑀡𑁆𑀟𑀮𑀁

𑁧𑁩𑁨. ‘‘𑀅𑀣 𑀔𑁄 𑀢𑁂𑀲𑀁, 𑀯𑀸𑀲𑁂𑀝𑁆𑀞, 𑀲𑀢𑁆𑀢𑀸𑀦𑀁𑀬𑁂𑀯 [𑀢𑁂𑀲𑀁 𑀬𑁂𑀯 𑀔𑁄 𑀯𑀸𑀲𑁂𑀝𑁆𑀞 𑀲𑀢𑁆𑀢𑀸𑀦𑀁 (𑀲𑀻. 𑀧𑀻.)] 𑀏𑀓𑀘𑁆𑀘𑀸𑀦𑀁 𑀏𑀢𑀤𑀳𑁄𑀲𑀺 𑁋 ‘𑀧𑀸𑀧𑀓𑀸 𑀯𑀢, 𑀪𑁄, 𑀥𑀫𑁆𑀫𑀸 𑀲𑀢𑁆𑀢𑁂𑀲𑀼 𑀧𑀸𑀢𑀼𑀪𑀽𑀢𑀸, 𑀬𑀢𑁆𑀭 𑀳𑀺 𑀦𑀸𑀫 𑀅𑀤𑀺𑀦𑁆𑀦𑀸𑀤𑀸𑀦𑀁 𑀧𑀜𑁆𑀜𑀸𑀬𑀺𑀲𑁆𑀲𑀢𑀺, 𑀕𑀭𑀳𑀸 𑀧𑀜𑁆𑀜𑀸𑀬𑀺𑀲𑁆𑀲𑀢𑀺, 𑀫𑀼𑀲𑀸𑀯𑀸𑀤𑁄 𑀧𑀜𑁆𑀜𑀸𑀬𑀺𑀲𑁆𑀲𑀢𑀺, 𑀤𑀡𑁆𑀟𑀸𑀤𑀸𑀦𑀁 𑀧𑀜𑁆𑀜𑀸𑀬𑀺𑀲𑁆𑀲𑀢𑀺, 𑀧𑀩𑁆𑀩𑀸𑀚𑀦𑀁 𑀧𑀜𑁆𑀜𑀸𑀬𑀺𑀲𑁆𑀲𑀢𑀺. 𑀬𑀁𑀦𑀽𑀦 𑀫𑀬𑀁 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀯𑀸𑀳𑁂𑀬𑁆𑀬𑀸𑀫𑀸’𑀢𑀺. 𑀢𑁂 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀯𑀸𑀳𑁂𑀲𑀼𑀁. 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀯𑀸𑀳𑁂𑀦𑁆𑀢𑀻𑀢𑀺 𑀔𑁄, 𑀯𑀸𑀲𑁂𑀝𑁆𑀞, ‘𑀩𑁆𑀭𑀸𑀳𑁆𑀫𑀡𑀸, 𑀩𑁆𑀭𑀸𑀳𑁆𑀫𑀡𑀸’ 𑀢𑁆𑀯𑁂𑀯 𑀧𑀞𑀫𑀁 𑀅𑀓𑁆𑀔𑀭𑀁 𑀉𑀧𑀦𑀺𑀩𑁆𑀩𑀢𑁆𑀢𑀁. 𑀢𑁂 𑀅𑀭𑀜𑁆𑀜𑀸𑀬𑀢𑀦𑁂 𑀧𑀡𑁆𑀡𑀓𑀼𑀝𑀺𑀬𑁄 𑀓𑀭𑀺𑀢𑁆𑀯𑀸 𑀧𑀡𑁆𑀡𑀓𑀼𑀝𑀻𑀲𑀼 𑀛𑀸𑀬𑀦𑁆𑀢𑀺 𑀯𑀻𑀢𑀗𑁆𑀕𑀸𑀭𑀸 𑀯𑀻𑀢𑀥𑀽𑀫𑀸 𑀧𑀦𑁆𑀦𑀫𑀼𑀲𑀮𑀸 𑀲𑀸𑀬𑀁 𑀲𑀸𑀬𑀫𑀸𑀲𑀸𑀬 𑀧𑀸𑀢𑁄 𑀧𑀸𑀢𑀭𑀸𑀲𑀸𑀬 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀺𑀬𑁄 𑀑𑀲𑀭𑀦𑁆𑀢𑀺 𑀖𑀸𑀲𑀫𑁂𑀲𑀫𑀸𑀦𑀸 [𑀖𑀸𑀲𑀫𑁂𑀲𑀦𑀸 (𑀲𑀻. 𑀲𑁆𑀬𑀸. 𑀧𑀻.)]. 𑀢𑁂 𑀖𑀸𑀲𑀁 𑀧𑀝𑀺𑀮𑀪𑀺𑀢𑁆𑀯𑀸 𑀧𑀼𑀦𑀤𑁂𑀯 𑀅𑀭𑀜𑁆𑀜𑀸𑀬𑀢𑀦𑁂 𑀧𑀡𑁆𑀡𑀓𑀼𑀝𑀻𑀲𑀼 𑀛𑀸𑀬𑀦𑁆𑀢𑀺. 𑀢𑀫𑁂𑀦𑀁 𑀫𑀦𑀼𑀲𑁆𑀲𑀸 𑀤𑀺𑀲𑁆𑀯𑀸 𑀏𑀯𑀫𑀸𑀳𑀁𑀲𑀼 𑁋 ‘𑀇𑀫𑁂 𑀔𑁄, 𑀪𑁄, 𑀲𑀢𑁆𑀢𑀸 𑀅𑀭𑀜𑁆𑀜𑀸𑀬𑀢𑀦𑁂 𑀧𑀡𑁆𑀡𑀓𑀼𑀝𑀺𑀬𑁄 𑀓𑀭𑀺𑀢𑁆𑀯𑀸 𑀧𑀡𑁆𑀡𑀓𑀼𑀝𑀻𑀲𑀼 𑀛𑀸𑀬𑀦𑁆𑀢𑀺, 𑀯𑀻𑀢𑀗𑁆𑀕𑀸𑀭𑀸 𑀯𑀻𑀢𑀥𑀽𑀫𑀸 𑀧𑀦𑁆𑀦𑀫𑀼𑀲𑀮𑀸 𑀲𑀸𑀬𑀁 𑀲𑀸𑀬𑀫𑀸𑀲𑀸𑀬 𑀧𑀸𑀢𑁄 𑀧𑀸𑀢𑀭𑀸𑀲𑀸𑀬 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀺𑀬𑁄 𑀑𑀲𑀭𑀦𑁆𑀢𑀺 𑀖𑀸𑀲𑀫𑁂𑀲𑀫𑀸𑀦𑀸. 𑀢𑁂 𑀖𑀸𑀲𑀁 𑀧𑀝𑀺𑀮𑀪𑀺𑀢𑁆𑀯𑀸 𑀧𑀼𑀦𑀤𑁂𑀯 𑀅𑀭𑀜𑁆𑀜𑀸𑀬𑀢𑀦𑁂 𑀧𑀡𑁆𑀡𑀓𑀼𑀝𑀻𑀲𑀼 𑀛𑀸𑀬𑀦𑁆𑀢𑀻’𑀢𑀺, 𑀛𑀸𑀬𑀦𑁆𑀢𑀻𑀢𑀺 𑀔𑁄 [𑀧𑀡𑁆𑀡𑀓𑀼𑀝𑀻𑀲𑀼 𑀛𑀸𑀬𑀦𑁆𑀢𑀺 𑀛𑀸𑀬𑀦𑁆𑀢𑀻𑀢𑀺 𑀔𑁄 (𑀲𑀻. 𑀧𑀻.), 𑀧𑀡𑁆𑀡𑀓𑀼𑀝𑀻𑀲𑀼 𑀛𑀸𑀬𑀦𑁆𑀢𑀻𑀢𑀺 𑀔𑁄 (𑀓.)], 𑀯𑀸𑀲𑁂𑀝𑁆𑀞, ‘𑀛𑀸𑀬𑀓𑀸, 𑀛𑀸𑀬𑀓𑀸’ 𑀢𑁆𑀯𑁂𑀯 𑀤𑀼𑀢𑀺𑀬𑀁 𑀅𑀓𑁆𑀔𑀭𑀁 𑀉𑀧𑀦𑀺𑀩𑁆𑀩𑀢𑁆𑀢𑀁. 𑀢𑁂𑀲𑀁𑀬𑁂𑀯 𑀔𑁄, 𑀯𑀸𑀲𑁂𑀝𑁆𑀞, 𑀲𑀢𑁆𑀢𑀸𑀦𑀁 𑀏𑀓𑀘𑁆𑀘𑁂 𑀲𑀢𑁆𑀢𑀸 𑀅𑀭𑀜𑁆𑀜𑀸𑀬𑀢𑀦𑁂 𑀧𑀡𑁆𑀡𑀓𑀼𑀝𑀻𑀲𑀼 𑀢𑀁 𑀛𑀸𑀦𑀁 𑀅𑀦𑀪𑀺𑀲𑀫𑁆𑀪𑀼𑀡𑀫𑀸𑀦𑀸 [𑀅𑀦𑀪𑀺𑀲𑀁𑀪𑀽𑀦𑀫𑀸𑀦𑀸 (𑀓𑀢𑁆𑀣𑀘𑀺)] 𑀕𑀸𑀫𑀲𑀸𑀫𑀦𑁆𑀢𑀁 𑀦𑀺𑀕𑀫𑀲𑀸𑀫𑀦𑁆𑀢𑀁 𑀑𑀲𑀭𑀺𑀢𑁆𑀯𑀸 𑀕𑀦𑁆𑀣𑁂 𑀓𑀭𑁄𑀦𑁆𑀢𑀸 𑀅𑀘𑁆𑀙𑀦𑁆𑀢𑀺. 𑀢𑀫𑁂𑀦𑀁 𑀫𑀦𑀼𑀲𑁆𑀲𑀸 𑀤𑀺𑀲𑁆𑀯𑀸 𑀏𑀯𑀫𑀸𑀳𑀁𑀲𑀼 𑁋 ‘𑀇𑀫𑁂 𑀔𑁄, 𑀪𑁄, 𑀲𑀢𑁆𑀢𑀸 𑀅𑀭𑀜𑁆𑀜𑀸𑀬𑀢𑀦𑁂 𑀧𑀡𑁆𑀡𑀓𑀼𑀝𑀻𑀲𑀼 𑀢𑀁 𑀛𑀸𑀦𑀁 𑀅𑀦𑀪𑀺𑀲𑀫𑁆𑀪𑀼𑀡𑀫𑀸𑀦𑀸 𑀕𑀸𑀫𑀲𑀸𑀫𑀦𑁆𑀢𑀁 𑀦𑀺𑀕𑀫𑀲𑀸𑀫𑀦𑁆𑀢𑀁 𑀑𑀲𑀭𑀺𑀢𑁆𑀯𑀸 𑀕𑀦𑁆𑀣𑁂 𑀓𑀭𑁄𑀦𑁆𑀢𑀸 𑀅𑀘𑁆𑀙𑀦𑁆𑀢𑀺, 𑀦 𑀤𑀸𑀦𑀺𑀫𑁂 𑀛𑀸𑀬𑀦𑁆𑀢𑀻’𑀢𑀺. 𑀦 𑀤𑀸𑀦𑀺𑀫𑁂 [𑀦 𑀤𑀸𑀦𑀺𑀫𑁂 𑀛𑀸𑀬𑀦𑁆𑀢𑀻 𑀦 𑀤𑀸𑀦𑀺𑀫𑁂 (𑀲𑀻. 𑀧𑀻. 𑀓.)] 𑀛𑀸𑀬𑀦𑁆𑀢𑀻𑀢𑀺 𑀔𑁄, 𑀯𑀸𑀲𑁂𑀝𑁆𑀞, ‘𑀅𑀚𑁆𑀛𑀸𑀬𑀓𑀸 𑀅𑀚𑁆𑀛𑀸𑀬𑀓𑀸’ 𑀢𑁆𑀯𑁂𑀯 𑀢𑀢𑀺𑀬𑀁 𑀅𑀓𑁆𑀔𑀭𑀁 𑀉𑀧𑀦𑀺𑀩𑁆𑀩𑀢𑁆𑀢𑀁. 𑀳𑀻𑀦𑀲𑀫𑁆𑀫𑀢𑀁 𑀔𑁄 𑀧𑀦, 𑀯𑀸𑀲𑁂𑀝𑁆𑀞, 𑀢𑁂𑀦 𑀲𑀫𑀬𑁂𑀦 𑀳𑁄𑀢𑀺, 𑀢𑀤𑁂𑀢𑀭𑀳𑀺 𑀲𑁂𑀝𑁆𑀞𑀲𑀫𑁆𑀫𑀢𑀁. 𑀇𑀢𑀺 𑀔𑁄, 𑀯𑀸𑀲𑁂𑀝𑁆𑀞, 𑀏𑀯𑀫𑁂𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀫𑀡𑁆𑀟𑀮𑀲𑁆𑀲 𑀧𑁄𑀭𑀸𑀡𑁂𑀦 𑀅𑀕𑁆𑀕𑀜𑁆𑀜𑁂𑀦 𑀅𑀓𑁆𑀔𑀭𑁂𑀦 𑀅𑀪𑀺𑀦𑀺𑀩𑁆𑀩𑀢𑁆𑀢𑀺 𑀅𑀳𑁄𑀲𑀺 𑀢𑁂𑀲𑀁𑀬𑁂𑀯 𑀲𑀢𑁆𑀢𑀸𑀦𑀁, 𑀅𑀦𑀜𑁆𑀜𑁂𑀲𑀁 𑀲𑀤𑀺𑀲𑀸𑀦𑀁𑀬𑁂𑀯 𑀦𑁄 𑀅𑀲𑀤𑀺𑀲𑀸𑀦𑀁 𑀥𑀫𑁆𑀫𑁂𑀦𑁂𑀯, 𑀦𑁄 𑀅𑀥𑀫𑁆𑀫𑁂𑀦. 𑀥𑀫𑁆𑀫𑁄 𑀳𑀺, 𑀯𑀸𑀲𑁂𑀝𑁆𑀞, 𑀲𑁂𑀝𑁆𑀞𑁄 𑀚𑀦𑁂𑀢𑀲𑁆𑀫𑀺𑀁 𑀤𑀺𑀝𑁆𑀞𑁂 𑀘𑁂𑀯 𑀥𑀫𑁆𑀫𑁂 𑀅𑀪𑀺𑀲𑀫𑁆𑀧𑀭𑀸𑀬𑀜𑁆𑀘.

𑀯𑁂𑀲𑁆𑀲𑀫𑀡𑁆𑀟𑀮𑀁

𑁧𑁩𑁩. ‘‘𑀢𑁂𑀲𑀁𑀬𑁂𑀯 𑀔𑁄, 𑀯𑀸𑀲𑁂𑀝𑁆𑀞, 𑀲𑀢𑁆𑀢𑀸𑀦𑀁 𑀏𑀓𑀘𑁆𑀘𑁂 𑀲𑀢𑁆𑀢𑀸 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀲𑀫𑀸𑀤𑀸𑀬 𑀯𑀺𑀲𑀼𑀓𑀫𑁆𑀫𑀦𑁆𑀢𑁂 [𑀯𑀺𑀲𑁆𑀲𑀼𑀢𑀓𑀫𑁆𑀫𑀦𑁆𑀢𑁂 (𑀲𑀻. 𑀧𑀻.), 𑀯𑀺𑀲𑁆𑀲𑀼𑀓𑀫𑁆𑀫𑀦𑁆𑀢𑁂 (𑀓. 𑀲𑀻.), 𑀯𑀺𑀲𑀼𑀁 𑀓𑀫𑁆𑀫𑀦𑁆𑀢𑁂 (𑀲𑁆𑀬𑀸. 𑀓.)] 𑀧𑀬𑁄𑀚𑁂𑀲𑀼𑀁. 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀲𑀫𑀸𑀤𑀸𑀬 𑀯𑀺𑀲𑀼𑀓𑀫𑁆𑀫𑀦𑁆𑀢𑁂 𑀧𑀬𑁄𑀚𑁂𑀦𑁆𑀢𑀻𑀢𑀺 𑀔𑁄, 𑀯𑀸𑀲𑁂𑀝𑁆𑀞, ‘𑀯𑁂𑀲𑁆𑀲𑀸, 𑀯𑁂𑀲𑁆𑀲𑀸’ 𑀢𑁆𑀯𑁂𑀯 𑀅𑀓𑁆𑀔𑀭𑀁 𑀉𑀧𑀦𑀺𑀩𑁆𑀩𑀢𑁆𑀢𑀁. 𑀇𑀢𑀺 𑀔𑁄, 𑀯𑀸𑀲𑁂𑀝𑁆𑀞, 𑀏𑀯𑀫𑁂𑀢𑀲𑁆𑀲 𑀯𑁂𑀲𑁆𑀲𑀫𑀡𑁆𑀟𑀮𑀲𑁆𑀲 𑀧𑁄𑀭𑀸𑀡𑁂𑀦 𑀅𑀕𑁆𑀕𑀜𑁆𑀜𑁂𑀦 𑀅𑀓𑁆𑀔𑀭𑁂𑀦 𑀅𑀪𑀺𑀦𑀺𑀩𑁆𑀩𑀢𑁆𑀢𑀺 𑀅𑀳𑁄𑀲𑀺 𑀢𑁂𑀲𑀜𑁆𑀜𑁂𑀯 𑀲𑀢𑁆𑀢𑀸𑀦𑀁 𑀅𑀦𑀜𑁆𑀜𑁂𑀲𑀁 𑀲𑀤𑀺𑀲𑀸𑀦𑀁𑀬𑁂𑀯, 𑀦𑁄 𑀅𑀲𑀤𑀺𑀲𑀸𑀦𑀁, 𑀥𑀫𑁆𑀫𑁂𑀦𑁂𑀯 𑀦𑁄 𑀅𑀥𑀫𑁆𑀫𑁂𑀦. 𑀥𑀫𑁆𑀫𑁄 𑀳𑀺, 𑀯𑀸𑀲𑁂𑀝𑁆𑀞, 𑀲𑁂𑀝𑁆𑀞𑁄 𑀚𑀦𑁂𑀢𑀲𑁆𑀫𑀺𑀁 𑀤𑀺𑀝𑁆𑀞𑁂 𑀘𑁂𑀯 𑀥𑀫𑁆𑀫𑁂 𑀅𑀪𑀺𑀲𑀫𑁆𑀧𑀭𑀸𑀬𑀜𑁆𑀘.

𑀲𑀼𑀤𑁆𑀤𑀫𑀡𑁆𑀟𑀮𑀁

𑁧𑁩𑁪. ‘‘𑀢𑁂𑀲𑀜𑁆𑀜𑁂𑀯 𑀔𑁄, 𑀯𑀸𑀲𑁂𑀝𑁆𑀞, 𑀲𑀢𑁆𑀢𑀸𑀦𑀁 𑀬𑁂 𑀢𑁂 𑀲𑀢𑁆𑀢𑀸 𑀅𑀯𑀲𑁂𑀲𑀸 𑀢𑁂 𑀮𑀼𑀤𑁆𑀤𑀸𑀘𑀸𑀭𑀸 𑀔𑀼𑀤𑁆𑀤𑀸𑀘𑀸𑀭𑀸 𑀅𑀳𑁂𑀲𑀼𑀁. 𑀮𑀼𑀤𑁆𑀤𑀸𑀘𑀸𑀭𑀸 𑀔𑀼𑀤𑁆𑀤𑀸𑀘𑀸𑀭𑀸𑀢𑀺 𑀔𑁄, 𑀯𑀸𑀲𑁂𑀝𑁆𑀞, ‘𑀲𑀼𑀤𑁆𑀤𑀸, 𑀲𑀼𑀤𑁆𑀤𑀸’ 𑀢𑁆𑀯𑁂𑀯 𑀅𑀓𑁆𑀔𑀭𑀁 𑀉𑀧𑀦𑀺𑀩𑁆𑀩𑀢𑁆𑀢𑀁. 𑀇𑀢𑀺 𑀔𑁄, 𑀯𑀸𑀲𑁂𑀝𑁆𑀞, 𑀏𑀯𑀫𑁂𑀢𑀲𑁆𑀲 𑀲𑀼𑀤𑁆𑀤𑀫𑀡𑁆𑀟𑀮𑀲𑁆𑀲 𑀧𑁄𑀭𑀸𑀡𑁂𑀦 𑀅𑀕𑁆𑀕𑀜𑁆𑀜𑁂𑀦 𑀅𑀓𑁆𑀔𑀭𑁂𑀦 𑀅𑀪𑀺𑀦𑀺𑀩𑁆𑀩𑀢𑁆𑀢𑀺 𑀅𑀳𑁄𑀲𑀺 𑀢𑁂𑀲𑀁𑀬𑁂𑀯 𑀲𑀢𑁆𑀢𑀸𑀦𑀁 𑀅𑀦𑀜𑁆𑀜𑁂𑀲𑀁, 𑀲𑀤𑀺𑀲𑀸𑀦𑀁𑀬𑁂𑀯 𑀦𑁄 𑀅𑀲𑀤𑀺𑀲𑀸𑀦𑀁, 𑀥𑀫𑁆𑀫𑁂𑀦𑁂𑀯, 𑀦𑁄 𑀅𑀥𑀫𑁆𑀫𑁂𑀦. 𑀥𑀫𑁆𑀫𑁄 𑀳𑀺, 𑀯𑀸𑀲𑁂𑀝𑁆𑀞, 𑀲𑁂𑀝𑁆𑀞𑁄 𑀚𑀦𑁂𑀢𑀲𑁆𑀫𑀺𑀁 𑀤𑀺𑀝𑁆𑀞𑁂 𑀘𑁂𑀯 𑀥𑀫𑁆𑀫𑁂 𑀅𑀪𑀺𑀲𑀫𑁆𑀧𑀭𑀸𑀬𑀜𑁆𑀘.

𑁧𑁩𑁫. ‘‘𑀅𑀳𑀼 𑀔𑁄 𑀲𑁄, 𑀯𑀸𑀲𑁂𑀝𑁆𑀞, 𑀲𑀫𑀬𑁄, 𑀬𑀁 𑀔𑀢𑁆𑀢𑀺𑀬𑁄𑀧𑀺 𑀲𑀓𑀁 𑀥𑀫𑁆𑀫𑀁 𑀕𑀭𑀳𑀫𑀸𑀦𑁄 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀢𑀺 𑁋 ‘𑀲𑀫𑀡𑁄 𑀪𑀯𑀺𑀲𑁆𑀲𑀸𑀫𑀻’𑀢𑀺. 𑀩𑁆𑀭𑀸𑀳𑁆𑀫𑀡𑁄𑀧𑀺 𑀔𑁄, 𑀯𑀸𑀲𑁂𑀝𑁆𑀞…𑀧𑁂… 𑀯𑁂𑀲𑁆𑀲𑁄𑀧𑀺 𑀔𑁄, 𑀯𑀸𑀲𑁂𑀝𑁆𑀞…𑀧𑁂… 𑀲𑀼𑀤𑁆𑀤𑁄𑀧𑀺 𑀔𑁄, 𑀯𑀸𑀲𑁂𑀝𑁆𑀞, 𑀲𑀓𑀁 𑀥𑀫𑁆𑀫𑀁 𑀕𑀭𑀳𑀫𑀸𑀦𑁄 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀢𑀺 𑁋 ‘𑀲𑀫𑀡𑁄 𑀪𑀯𑀺𑀲𑁆𑀲𑀸𑀫𑀻’𑀢𑀺. 𑀇𑀫𑁂𑀳𑀺 𑀔𑁄, 𑀯𑀸𑀲𑁂𑀝𑁆𑀞, 𑀘𑀢𑀽𑀳𑀺 𑀫𑀡𑁆𑀟𑀮𑁂𑀳𑀺 𑀲𑀫𑀡𑀫𑀡𑁆𑀟𑀮𑀲𑁆𑀲 𑀅𑀪𑀺𑀦𑀺𑀩𑁆𑀩𑀢𑁆𑀢𑀺 𑀅𑀳𑁄𑀲𑀺, 𑀢𑁂𑀲𑀁𑀬𑁂𑀯 𑀲𑀢𑁆𑀢𑀸𑀦𑀁 𑀅𑀦𑀜𑁆𑀜𑁂𑀲𑀁, 𑀲𑀤𑀺𑀲𑀸𑀦𑀁𑀬𑁂𑀯 𑀦𑁄 𑀅𑀲𑀤𑀺𑀲𑀸𑀦𑀁, 𑀥𑀫𑁆𑀫𑁂𑀦𑁂𑀯 𑀦𑁄 𑀅𑀥𑀫𑁆𑀫𑁂𑀦. 𑀥𑀫𑁆𑀫𑁄 𑀳𑀺, 𑀯𑀸𑀲𑁂𑀝𑁆𑀞, 𑀲𑁂𑀝𑁆𑀞𑁄 𑀚𑀦𑁂𑀢𑀲𑁆𑀫𑀺𑀁 𑀤𑀺𑀝𑁆𑀞𑁂 𑀘𑁂𑀯 𑀥𑀫𑁆𑀫𑁂 𑀅𑀪𑀺𑀲𑀫𑁆𑀧𑀭𑀸𑀬𑀜𑁆𑀘.

𑀤𑀼𑀘𑁆𑀘𑀭𑀺𑀢𑀸𑀤𑀺𑀓𑀣𑀸

𑁧𑁩𑁬. ‘‘𑀔𑀢𑁆𑀢𑀺𑀬𑁄𑀧𑀺 𑀔𑁄, 𑀯𑀸𑀲𑁂𑀝𑁆𑀞, 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑁄 [𑀇𑀤𑀁 𑀧𑀤𑀁 𑀲𑀻. 𑀇𑀧𑁄𑀢𑁆𑀣𑀓𑁂𑀲𑀼 𑀦𑀢𑁆𑀣𑀺] 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀳𑁂𑀢𑀼 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺. 𑀩𑁆𑀭𑀸𑀳𑁆𑀫𑀡𑁄𑀧𑀺 𑀔𑁄, 𑀯𑀸𑀲𑁂𑀝𑁆𑀞…𑀧𑁂… 𑀯𑁂𑀲𑁆𑀲𑁄𑀧𑀺 𑀔𑁄, 𑀯𑀸𑀲𑁂𑀝𑁆𑀞… 𑀲𑀼𑀤𑁆𑀤𑁄𑀧𑀺 𑀔𑁄, 𑀯𑀸𑀲𑁂𑀝𑁆𑀞… 𑀲𑀫𑀡𑁄𑀧𑀺 𑀔𑁄, 𑀯𑀸𑀲𑁂𑀝𑁆𑀞, 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀳𑁂𑀢𑀼 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺.

‘‘𑀔𑀢𑁆𑀢𑀺𑀬𑁄𑀧𑀺 𑀔𑁄, 𑀯𑀸𑀲𑁂𑀝𑁆𑀞, 𑀓𑀸𑀬𑁂𑀦 𑀲𑀼𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀯𑀸𑀘𑀸𑀬 𑀲𑀼𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀫𑀦𑀲𑀸 𑀲𑀼𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑁄 [𑀇𑀤𑀁 𑀧𑀤𑀁 𑀲𑀻. 𑀧𑀻. 𑀧𑁄𑀢𑁆𑀣𑀓𑁂𑀲𑀼 𑀦𑀢𑁆𑀣𑀺] 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀳𑁂𑀢𑀼 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺. 𑀩𑁆𑀭𑀸𑀳𑁆𑀫𑀡𑁄𑀧𑀺 𑀔𑁄, 𑀯𑀸𑀲𑁂𑀝𑁆𑀞…𑀧𑁂… 𑀯𑁂𑀲𑁆𑀲𑁄𑀧𑀺 𑀔𑁄, 𑀯𑀸𑀲𑁂𑀝𑁆𑀞… 𑀲𑀼𑀤𑁆𑀤𑁄𑀧𑀺 𑀔𑁄, 𑀯𑀸𑀲𑁂𑀝𑁆𑀞… 𑀲𑀫𑀡𑁄𑀧𑀺 𑀔𑁄, 𑀯𑀸𑀲𑁂𑀝𑁆𑀞, 𑀓𑀸𑀬𑁂𑀦 𑀲𑀼𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀯𑀸𑀘𑀸𑀬 𑀲𑀼𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀫𑀦𑀲𑀸 𑀲𑀼𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑁄 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀳𑁂𑀢𑀼 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺.

𑁧𑁩𑁭. ‘‘𑀔𑀢𑁆𑀢𑀺𑀬𑁄𑀧𑀺 𑀔𑁄, 𑀯𑀸𑀲𑁂𑀝𑁆𑀞, 𑀓𑀸𑀬𑁂𑀦 𑀤𑁆𑀯𑀬𑀓𑀸𑀭𑀻, 𑀯𑀸𑀘𑀸𑀬 𑀤𑁆𑀯𑀬𑀓𑀸𑀭𑀻, 𑀫𑀦𑀲𑀸 𑀤𑁆𑀯𑀬𑀓𑀸𑀭𑀻, 𑀯𑀺𑀫𑀺𑀲𑁆𑀲𑀤𑀺𑀝𑁆𑀞𑀺𑀓𑁄 𑀯𑀺𑀫𑀺𑀲𑁆𑀲𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑁄 𑀯𑀺𑀫𑀺𑀲𑁆𑀲𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀳𑁂𑀢𑀼 [𑀯𑀺𑀫𑀺𑀲𑁆𑀲𑀤𑀺𑀝𑁆𑀞𑀺𑀓𑁄 𑀯𑀺𑀫𑀺𑀲𑁆𑀲𑀓𑀫𑁆𑀫𑀲𑀫𑀸𑀤𑀸𑀦𑁄 𑀯𑀺𑀫𑀺𑀲𑁆𑀲𑀓𑀫𑁆𑀫𑀲𑀫𑀸𑀤𑀸𑀦𑀳𑁂𑀢𑀼 (𑀲𑁆𑀬𑀸.), 𑀯𑀻𑀢𑀺𑀫𑀺𑀲𑁆𑀲𑀤𑀺𑀝𑁆𑀞𑀺𑀓𑁄 𑀯𑀻𑀢𑀺𑀫𑀺𑀲𑁆𑀲𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀳𑁂𑀢𑀼 (𑀲𑀻. 𑀧𑀻.)] 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀳𑁄𑀢𑀺. 𑀩𑁆𑀭𑀸𑀳𑁆𑀫𑀡𑁄𑀧𑀺 𑀔𑁄, 𑀯𑀸𑀲𑁂𑀝𑁆𑀞 …𑀧𑁂… 𑀯𑁂𑀲𑁆𑀲𑁄𑀧𑀺 𑀔𑁄, 𑀯𑀸𑀲𑁂𑀝𑁆𑀞… 𑀲𑀼𑀤𑁆𑀤𑁄𑀧𑀺 𑀔𑁄, 𑀯𑀸𑀲𑁂𑀝𑁆𑀞… 𑀲𑀫𑀡𑁄𑀧𑀺 𑀔𑁄, 𑀯𑀸𑀲𑁂𑀝𑁆𑀞, 𑀓𑀸𑀬𑁂𑀦 𑀤𑁆𑀯𑀬𑀓𑀸𑀭𑀻, 𑀯𑀸𑀘𑀸𑀬 𑀤𑁆𑀯𑀬𑀓𑀸𑀭𑀻, 𑀫𑀦𑀲𑀸 𑀤𑁆𑀯𑀬𑀓𑀸𑀭𑀻, 𑀯𑀺𑀫𑀺𑀲𑁆𑀲𑀤𑀺𑀝𑁆𑀞𑀺𑀓𑁄 𑀯𑀺𑀫𑀺𑀲𑁆𑀲𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑁄 𑀯𑀺𑀫𑀺𑀲𑁆𑀲𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀳𑁂𑀢𑀼 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀳𑁄𑀢𑀺.

𑀩𑁄𑀥𑀺𑀧𑀓𑁆𑀔𑀺𑀬𑀪𑀸𑀯𑀦𑀸

𑁧𑁩𑁮. ‘‘𑀔𑀢𑁆𑀢𑀺𑀬𑁄𑀧𑀺 𑀔𑁄, 𑀯𑀸𑀲𑁂𑀝𑁆𑀞, 𑀓𑀸𑀬𑁂𑀦 𑀲𑀁𑀯𑀼𑀢𑁄 𑀯𑀸𑀘𑀸𑀬 𑀲𑀁𑀯𑀼𑀢𑁄 𑀫𑀦𑀲𑀸 𑀲𑀁𑀯𑀼𑀢𑁄 𑀲𑀢𑁆𑀢𑀦𑁆𑀦𑀁 𑀩𑁄𑀥𑀺𑀧𑀓𑁆𑀔𑀺𑀬𑀸𑀦𑀁 𑀥𑀫𑁆𑀫𑀸𑀦𑀁 𑀪𑀸𑀯𑀦𑀫𑀦𑁆𑀯𑀸𑀬 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀧𑀭𑀺𑀦𑀺𑀩𑁆𑀩𑀸𑀬𑀢𑀺 [𑀧𑀭𑀺𑀦𑀺𑀩𑁆𑀩𑀸𑀢𑀺 (𑀓.)]. 𑀩𑁆𑀭𑀸𑀳𑁆𑀫𑀡𑁄𑀧𑀺 𑀔𑁄, 𑀯𑀸𑀲𑁂𑀝𑁆𑀞…𑀧𑁂… 𑀯𑁂𑀲𑁆𑀲𑁄𑀧𑀺 𑀔𑁄 𑀯𑀸𑀲𑁂𑀝𑁆𑀞… 𑀲𑀼𑀤𑁆𑀤𑁄𑀧𑀺 𑀔𑁄, 𑀯𑀸𑀲𑁂𑀝𑁆𑀞 … 𑀲𑀫𑀡𑁄𑀧𑀺 𑀔𑁄, 𑀯𑀸𑀲𑁂𑀝𑁆𑀞, 𑀓𑀸𑀬𑁂𑀦 𑀲𑀁𑀯𑀼𑀢𑁄 𑀯𑀸𑀘𑀸𑀬 𑀲𑀁𑀯𑀼𑀢𑁄 𑀫𑀦𑀲𑀸 𑀲𑀁𑀯𑀼𑀢𑁄 𑀲𑀢𑁆𑀢𑀦𑁆𑀦𑀁 𑀩𑁄𑀥𑀺𑀧𑀓𑁆𑀔𑀺𑀬𑀸𑀦𑀁 𑀥𑀫𑁆𑀫𑀸𑀦𑀁 𑀪𑀸𑀯𑀦𑀫𑀦𑁆𑀯𑀸𑀬 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀧𑀭𑀺𑀦𑀺𑀩𑁆𑀩𑀸𑀬𑀢𑀺.

𑁧𑁩𑁯. ‘‘𑀇𑀫𑁂𑀲𑀜𑁆𑀳𑀺, 𑀯𑀸𑀲𑁂𑀝𑁆𑀞, 𑀘𑀢𑀼𑀦𑁆𑀦𑀁 𑀯𑀡𑁆𑀡𑀸𑀦𑀁 𑀬𑁄 𑀳𑁄𑀢𑀺 𑀪𑀺𑀓𑁆𑀔𑀼 𑀅𑀭𑀳𑀁 𑀔𑀻𑀡𑀸𑀲𑀯𑁄 𑀯𑀼𑀲𑀺𑀢𑀯𑀸 𑀓𑀢𑀓𑀭𑀡𑀻𑀬𑁄 𑀑𑀳𑀺𑀢𑀪𑀸𑀭𑁄 𑀅𑀦𑀼𑀧𑁆𑀧𑀢𑁆𑀢𑀲𑀤𑀢𑁆𑀣𑁄 𑀧𑀭𑀺𑀓𑁆𑀔𑀻𑀡𑀪𑀯𑀲𑀁𑀬𑁄𑀚𑀦𑁄 𑀲𑀫𑁆𑀫𑀤𑀜𑁆𑀜𑀸 𑀯𑀺𑀫𑀼𑀢𑁆𑀢𑁄 𑀲𑁄 𑀦𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺 𑀥𑀫𑁆𑀫𑁂𑀦𑁂𑀯. 𑀦𑁄 𑀅𑀥𑀫𑁆𑀫𑁂𑀦. 𑀥𑀫𑁆𑀫𑁄 𑀳𑀺, 𑀯𑀸𑀲𑁂𑀝𑁆𑀞, 𑀲𑁂𑀝𑁆𑀞𑁄 𑀚𑀦𑁂𑀢𑀲𑁆𑀫𑀺𑀁 𑀤𑀺𑀝𑁆𑀞𑁂 𑀘𑁂𑀯 𑀥𑀫𑁆𑀫𑁂 𑀅𑀪𑀺𑀲𑀫𑁆𑀧𑀭𑀸𑀬𑀜𑁆𑀘.

𑁧𑁪𑁦. ‘‘𑀩𑁆𑀭𑀳𑁆𑀫𑀼𑀦𑀸 𑀧𑁂𑀲𑀸, 𑀯𑀸𑀲𑁂𑀝𑁆𑀞, 𑀲𑀦𑀗𑁆𑀓𑀼𑀫𑀸𑀭𑁂𑀦 𑀕𑀸𑀣𑀸 𑀪𑀸𑀲𑀺𑀢𑀸 𑁋

‘𑀔𑀢𑁆𑀢𑀺𑀬𑁄 𑀲𑁂𑀝𑁆𑀞𑁄 𑀚𑀦𑁂𑀢𑀲𑁆𑀫𑀺𑀁, 𑀬𑁂 𑀕𑁄𑀢𑁆𑀢𑀧𑀝𑀺𑀲𑀸𑀭𑀺𑀦𑁄;

𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄, 𑀲𑁄 𑀲𑁂𑀝𑁆𑀞𑁄 𑀤𑁂𑀯𑀫𑀸𑀦𑀼𑀲𑁂’𑀢𑀺.

‘‘𑀲𑀸 𑀔𑁄 𑀧𑀦𑁂𑀲𑀸, 𑀯𑀸𑀲𑁂𑀝𑁆𑀞, 𑀩𑁆𑀭𑀳𑁆𑀫𑀼𑀦𑀸 𑀲𑀦𑀗𑁆𑀓𑀼𑀫𑀸𑀭𑁂𑀦 𑀕𑀸𑀣𑀸 𑀲𑀼𑀕𑀻𑀢𑀸, 𑀦𑁄 𑀤𑀼𑀕𑁆𑀕𑀻𑀢𑀸. 𑀲𑀼𑀪𑀸𑀲𑀺𑀢𑀸, 𑀦𑁄 𑀤𑀼𑀩𑁆𑀪𑀸𑀲𑀺𑀢𑀸. 𑀅𑀢𑁆𑀣𑀲𑀁𑀳𑀺𑀢𑀸, 𑀦𑁄 𑀅𑀦𑀢𑁆𑀣𑀲𑀁𑀳𑀺𑀢𑀸. 𑀅𑀦𑀼𑀫𑀢𑀸 𑀫𑀬𑀸. 𑀅𑀳𑀫𑁆𑀧𑀺, 𑀯𑀸𑀲𑁂𑀝𑁆𑀞, 𑀏𑀯𑀁 𑀯𑀤𑀸𑀫𑀺 𑁋

‘𑀔𑀢𑁆𑀢𑀺𑀬𑁄 𑀲𑁂𑀝𑁆𑀞𑁄 𑀚𑀦𑁂𑀢𑀲𑁆𑀫𑀺𑀁, 𑀬𑁂 𑀕𑁄𑀢𑁆𑀢𑀧𑀝𑀺𑀲𑀸𑀭𑀺𑀦𑁄;

𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄, 𑀲𑁄 𑀲𑁂𑀝𑁆𑀞𑁄 𑀤𑁂𑀯𑀫𑀸𑀦𑀼𑀲𑁂’𑀢𑀺.

𑀇𑀤𑀫𑀯𑁄𑀘 𑀪𑀕𑀯𑀸. 𑀅𑀢𑁆𑀢𑀫𑀦𑀸 𑀯𑀸𑀲𑁂𑀝𑁆𑀞𑀪𑀸𑀭𑀤𑁆𑀯𑀸𑀚𑀸 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀼𑀦𑁆𑀢𑀺.

𑀅𑀕𑁆𑀕𑀜𑁆𑀜𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀘𑀢𑀼𑀢𑁆𑀣𑀁.