𑁭. 𑀤𑀼𑀢𑀺𑀬𑀲𑀫𑀡𑀩𑁆𑀭𑀸𑀳𑁆𑀫𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁭𑁭. 𑀲𑀢𑁆𑀢𑀫𑁂 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀦𑀧𑁆𑀧𑀚𑀸𑀦𑀦𑁆𑀢𑀻𑀢𑀺 𑀤𑀼𑀓𑁆𑀔𑀲𑀘𑁆𑀘𑀯𑀲𑁂𑀦 𑀦 𑀧𑀚𑀸𑀦𑀦𑁆𑀢𑀺. 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑀫𑀼𑀤𑀬𑀁 𑀦𑀧𑁆𑀧𑀚𑀸𑀦𑀦𑁆𑀢𑀻𑀢𑀺 𑀲𑀫𑀼𑀤𑀬𑀲𑀘𑁆𑀘𑀯𑀲𑁂𑀦 𑀦 𑀧𑀚𑀸𑀦𑀦𑁆𑀢𑀺. 𑀏𑀯𑀁 𑀦𑀺𑀭𑁄𑀥𑀁 𑀦𑀺𑀭𑁄𑀥𑀲𑀘𑁆𑀘𑀯𑀲𑁂𑀦, 𑀧𑀝𑀺𑀧𑀤𑀁 𑀫𑀕𑁆𑀕𑀲𑀘𑁆𑀘𑀯𑀲𑁂𑀦𑀸𑀢𑀺. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀲𑀼𑀓𑁆𑀓𑀧𑀓𑁆𑀔𑁂 𑀧𑀦 𑀅𑀥𑀺𑀫𑁄𑀓𑁆𑀔𑀯𑀲𑁂𑀦 𑀆𑀯𑀚𑁆𑀚𑀦𑀲𑀫𑀼𑀤𑀬𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑀫𑀼𑀤𑀬𑁄 𑀳𑁄𑀢𑀺, 𑀧𑀕𑁆𑀕𑀳𑀯𑀲𑁂𑀦 𑀆𑀯𑀚𑁆𑀚𑀦𑀲𑀫𑀼𑀤𑀬𑀸 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀲𑀫𑀼𑀤𑀬𑁄, 𑀉𑀧𑀝𑁆𑀞𑀸𑀦𑀯𑀲𑁂𑀦 𑀆𑀯𑀚𑁆𑀚𑀦𑀲𑀫𑀼𑀤𑀬𑀸 𑀲𑀢𑀺𑀦𑁆𑀤𑁆𑀭𑀺𑀬𑀲𑀫𑀼𑀤𑀬𑁄, 𑀅𑀯𑀺𑀓𑁆𑀔𑁂𑀧𑀯𑀲𑁂𑀦 𑀆𑀯𑀚𑁆𑀚𑀦𑀲𑀫𑀼𑀤𑀬𑀸 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀲𑀫𑀼𑀤𑀬𑁄, 𑀤𑀲𑁆𑀲𑀦𑀯𑀲𑁂𑀦 𑀆𑀯𑀚𑁆𑀚𑀦𑀲𑀫𑀼𑀤𑀬𑀸 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑀫𑀼𑀤𑀬𑁄 𑀳𑁄𑀢𑀺. 𑀢𑀣𑀸 𑀙𑀦𑁆𑀤𑀯𑀲𑁂𑀦 𑀆𑀯𑀚𑁆𑀚𑀦𑀲𑀫𑀼𑀤𑀬𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑀫𑀼𑀤𑀬𑁄 𑀳𑁄𑀢𑀺, 𑀙𑀦𑁆𑀤𑀯𑀲𑁂𑀦 𑀆𑀯𑀚𑁆𑀚𑀦𑀲𑀫𑀼𑀤𑀬𑀸 𑀯𑀻𑀭𑀺𑀬𑀲𑀢𑀺𑀲𑀫𑀸𑀥𑀺𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑀫𑀼𑀤𑀬𑁄 𑀳𑁄𑀢𑀺. 𑀫𑀦𑀲𑀺𑀓𑀸𑀭𑀯𑀲𑁂𑀦 𑀆𑀯𑀚𑁆𑀚𑀦𑀲𑀫𑀼𑀤𑀬𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑀫𑀼𑀤𑀬𑁄 𑀳𑁄𑀢𑀺. 𑀫𑀦𑀲𑀺𑀓𑀸𑀭𑀯𑀲𑁂𑀦 𑀆𑀯𑀚𑁆𑀚𑀦𑀲𑀫𑀼𑀤𑀬𑀸 𑀯𑀻𑀭𑀺𑀬𑀲𑀢𑀺𑀲𑀫𑀸𑀥𑀺𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑀫𑀼𑀤𑀬𑁄 𑀳𑁄𑀢𑀻𑀢𑀺 𑀏𑀯𑀫𑁆𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀫𑁂𑀲𑀼 𑀧𑀝𑀺𑀧𑀸𑀝𑀺𑀬𑀸 𑀙𑀲𑀼 𑀲𑀼𑀢𑁆𑀢𑁂𑀲𑀼 𑀘𑀢𑀼𑀲𑀘𑁆𑀘𑀫𑁂𑀯 𑀓𑀣𑀺𑀢𑀁.