𑁬-𑁭. 𑀢𑀡𑁆𑀳𑀓𑁆𑀔𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁦𑁭-𑁨𑁦𑁮. 𑀙𑀝𑁆𑀞𑁂 𑀏𑀢𑀤𑀯𑁄𑀘𑀸𑀢𑀺 ‘‘𑀇𑀫𑀺𑀲𑁆𑀲𑀁 𑀧𑀭𑀺𑀲𑀢𑀺 𑀦𑀺𑀲𑀺𑀦𑁆𑀦𑁄 𑀉𑀤𑀸𑀬𑀺𑀢𑁆𑀣𑁂𑀭𑁄 𑀦𑀸𑀫 𑀅𑀦𑀼𑀲𑀦𑁆𑀥𑀺𑀓𑀼𑀲𑀮𑁄 𑀪𑀺𑀓𑁆𑀔𑀼 𑀅𑀢𑁆𑀣𑀺, 𑀲𑁄 𑀫𑀁 𑀧𑀼𑀘𑁆𑀙𑀺𑀲𑁆𑀲𑀢𑀻𑀢𑀺 𑀪𑀕𑀯𑀢𑀸 𑀑𑀲𑀸𑀧𑀺𑀢𑀤𑁂𑀲𑀦𑀁 𑀜𑀢𑁆𑀯𑀸 𑀤𑁂𑀲𑀦𑀸𑀦𑀼𑀲𑀦𑁆𑀥𑀺𑀁 𑀖𑀝𑁂𑀲𑁆𑀲𑀸𑀫𑀻’’𑀢𑀺 𑀧𑀼𑀘𑁆𑀙𑀦𑁆𑀢𑁄 𑀏𑀢𑀁 𑀅𑀯𑁄𑀘. 𑀯𑀺𑀧𑀼𑀮𑀦𑁆𑀢𑀺𑀆𑀤𑀺 𑀲𑀩𑁆𑀩𑀁 𑀲𑀼𑀪𑀸𑀯𑀺𑀢𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀼𑀪𑀸𑀯𑀺𑀢𑁄 𑀳𑀺 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀯𑀺𑀧𑀼𑀮𑁄 𑀘 𑀫𑀳𑀕𑁆𑀕𑀢𑁄 𑀘 𑀅𑀧𑁆𑀧𑀫𑀸𑀡𑁄 𑀘 𑀅𑀩𑁆𑀬𑀸𑀧𑀚𑁆𑀚𑁄 𑀘 𑀦𑀸𑀫 𑀳𑁄𑀢𑀺. 𑀲𑁄 𑀳𑀺 𑀧𑀢𑁆𑀣𑀝𑀢𑁆𑀢𑀸 𑀯𑀺𑀧𑀼𑀮𑁄, 𑀫𑀳𑀦𑁆𑀢𑀪𑀸𑀯𑀁 𑀕𑀢𑀢𑁆𑀢𑀸 𑀫𑀳𑀕𑁆𑀕𑀢𑁄, 𑀯𑀟𑁆𑀠𑀺𑀧𑀫𑀸𑀡𑀢𑁆𑀢𑀸 𑀅𑀧𑁆𑀧𑀫𑀸𑀡𑁄, 𑀦𑀻𑀯𑀭𑀡𑀸𑀦𑀁 𑀤𑀽𑀭𑀻𑀪𑀸𑀯𑁂𑀦 𑀩𑁆𑀬𑀸𑀧𑀸𑀤𑀭𑀳𑀺𑀢𑀢𑁆𑀢𑀸 𑀅𑀩𑁆𑀬𑀸𑀧𑀚𑁆𑀛𑁄 𑀦𑀸𑀫 𑀳𑁄𑀢𑀺. 𑀢𑀡𑁆𑀳𑀸𑀬 𑀧𑀳𑀸𑀦𑀸 𑀓𑀫𑁆𑀫𑀁 𑀧𑀳𑀻𑀬𑀢𑀻𑀢𑀺 𑀬𑀁 𑀢𑀡𑁆𑀳𑀸𑀫𑀽𑀮𑀓𑀁 𑀓𑀫𑁆𑀫𑀁 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀢𑀁 𑀢𑀡𑁆𑀳𑀸𑀧𑀳𑀸𑀦𑁂𑀦 𑀧𑀳𑀻𑀬𑀢𑀺. 𑀓𑀫𑁆𑀫𑀲𑁆𑀲 𑀧𑀳𑀸𑀦𑀸 𑀤𑀼𑀓𑁆𑀔𑀦𑁆𑀢𑀺 𑀬𑀫𑁆𑀧𑀺 𑀓𑀫𑁆𑀫𑀫𑀽𑀮𑀓𑀁 𑀯𑀝𑁆𑀝𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀢𑀁 𑀓𑀫𑁆𑀫𑀧𑀳𑀸𑀦𑁂𑀦 𑀧𑀳𑀻𑀬𑀢𑀺. 𑀢𑀡𑁆𑀳𑀓𑁆𑀔𑀬𑀸𑀤𑀬𑁄 𑀢𑀡𑁆𑀳𑀸𑀤𑀻𑀦𑀁𑀬𑁂𑀯 𑀔𑀬𑀸, 𑀅𑀢𑁆𑀣𑀢𑁄 𑀧𑀦𑁂𑀢𑁂𑀳𑀺 𑀦𑀺𑀩𑁆𑀩𑀸𑀦𑀁 𑀓𑀣𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀢𑁆𑀢𑀫𑀁 𑀉𑀢𑁆𑀢𑀸𑀦𑀫𑁂𑀯.