𑁪-𑁧𑁦. 𑀧𑀞𑀫𑀕𑀺𑀮𑀸𑀦𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁯𑁫-𑁨𑁦𑁧. 𑀘𑀢𑀼𑀢𑁆𑀣𑁂 𑀢𑀣𑀸 𑀧𑀳𑀻𑀦𑁄 𑀘𑀸𑀬𑀲𑁆𑀫𑀢𑁄 𑀫𑀳𑀸𑀓𑀲𑁆𑀲𑀧𑀲𑁆𑀲 𑀲𑁄 𑀆𑀩𑀸𑀥𑁄 𑀅𑀳𑁄𑀲𑀻𑀢𑀺 𑀣𑁂𑀭𑀲𑁆𑀲 𑀓𑀺𑀭 𑀇𑀫𑀁 𑀩𑁄𑀚𑁆𑀛𑀗𑁆𑀕𑀪𑀸𑀯𑀦𑀁 𑀲𑀸𑀥𑀼𑀓𑀁 𑀲𑀼𑀡𑀦𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 ‘‘𑀫𑀬𑁆𑀳𑀁 𑀧𑀩𑁆𑀩𑀚𑀺𑀢𑀤𑀺𑀯𑀲𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀦𑁆𑀢𑀲𑁆𑀲 𑀇𑀫𑁂 𑀩𑁄𑀚𑁆𑀛𑀗𑁆𑀕𑀸 𑀧𑀸𑀢𑀼𑀪𑀽𑀢𑀸’’𑀢𑀺. 𑀅𑀣𑀲𑁆𑀲 ‘‘𑀦𑀺𑀬𑁆𑀬𑀸𑀦𑀺𑀓𑀁 𑀯𑀢 𑀲𑀢𑁆𑀣𑀼𑀲𑀸𑀲𑀦’’𑀦𑁆𑀢𑀺 𑀘𑀺𑀦𑁆𑀢𑀬𑀢𑁄 𑀮𑁄𑀳𑀺𑀢𑀁 𑀧𑀲𑀻𑀤𑀺, 𑀉𑀧𑀸𑀤𑀸𑀭𑀽𑀧𑀁 𑀯𑀺𑀲𑀼𑀤𑁆𑀥𑀁 𑀅𑀳𑁄𑀲𑀺, 𑀧𑁄𑀓𑁆𑀔𑀭𑀧𑀢𑁆𑀢𑁂 𑀧𑀢𑀺𑀢𑀉𑀤𑀓𑀩𑀺𑀦𑁆𑀤𑀼 𑀯𑀺𑀬 𑀲𑀭𑀻𑀭𑀢𑁄 𑀭𑁄𑀕𑁄 𑀯𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀕𑀢𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀣𑀸 𑀧𑀳𑀻𑀦𑁄 𑀘𑀸𑀬𑀲𑁆𑀫𑀢𑁄 𑀫𑀳𑀸𑀓𑀲𑁆𑀲𑀧𑀲𑁆𑀲 𑀲𑁄 𑀆𑀩𑀸𑀥𑁄 𑀅𑀳𑁄𑀲𑀻’’𑀢𑀺. 𑀧𑀜𑁆𑀘𑀫𑀙𑀝𑁆𑀞𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀫𑁂𑀲𑀁 𑀧𑀦 𑀢𑀺𑀡𑁆𑀡𑀫𑁆𑀧𑀺 𑀚𑀦𑀸𑀦𑀁 𑀧𑀩𑁆𑀩𑀢𑀧𑀸𑀤𑁂 𑀧𑀼𑀧𑁆𑀨𑀺𑀢𑀯𑀺𑀲𑀭𑀼𑀓𑁆𑀔𑀯𑀸𑀢𑀲𑀫𑁆𑀨𑀲𑁆𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀦𑁆𑀤𑀲𑀻𑀢𑀚𑀭𑁄 𑀆𑀩𑀸𑀥𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀕𑀺𑀮𑀸𑀦𑀯𑀕𑁆𑀕𑁄.