𑁭. 𑀧𑀞𑀫𑀆𑀫𑀓𑀥𑀜𑁆𑀜𑀧𑁂𑀬𑁆𑀬𑀸𑀮𑀯𑀕𑁆𑀕𑁄

𑁩. 𑀧𑀜𑁆𑀜𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁩𑁩. 𑀆𑀫𑀓𑀥𑀜𑁆𑀜𑀧𑁂𑀬𑁆𑀬𑀸𑀮𑁂 𑀅𑀭𑀺𑀬𑁂𑀦 𑀧𑀜𑁆𑀜𑀸𑀘𑀓𑁆𑀔𑀼𑀦𑀸𑀢𑀺 𑀯𑀺𑀧𑀲𑁆𑀲𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑁂𑀦 𑀜𑀸𑀡𑀘𑀓𑁆𑀔𑀼𑀦𑀸.

𑁪. 𑀲𑀼𑀭𑀸𑀫𑁂𑀭𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁩𑁪. 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑁆𑀧𑀫𑀸𑀤𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑀸𑀢𑀺 𑀏𑀢𑁆𑀣 𑀲𑀼𑀭𑀸 𑀦𑀸𑀫 𑀧𑀺𑀝𑁆𑀞𑀲𑀼𑀭𑀸, 𑀑𑀤𑀦𑀲𑀼𑀭𑀸, 𑀧𑀽𑀯𑀲𑀼𑀭𑀸, 𑀓𑀺𑀡𑁆𑀡𑀧𑀓𑁆𑀔𑀺𑀢𑁆𑀢𑀸, 𑀲𑀫𑁆𑀪𑀸𑀭𑀲𑀁𑀬𑀼𑀢𑁆𑀢𑀸𑀢𑀺 𑀧𑀜𑁆𑀘𑀯𑀺𑀥𑀸. 𑀫𑁂𑀭𑀬𑀁 𑀦𑀸𑀫 𑀧𑀼𑀧𑁆𑀨𑀸𑀲𑀯𑁄, 𑀨𑀮𑀸𑀲𑀯𑁄𑀢𑀺, 𑀏𑀯𑀁 𑀯𑀼𑀢𑁆𑀢𑁄 𑀬𑁄 𑀓𑁄𑀘𑀺 𑀆𑀲𑀯𑁄. 𑀫𑀚𑁆𑀚𑀦𑁆𑀢𑀺 𑀢𑀤𑁂𑀯 𑀉𑀪𑀬𑀁, 𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀺 𑀲𑀼𑀭𑀸𑀲𑀯𑀯𑀺𑀦𑀺𑀫𑀼𑀢𑁆𑀢𑀁 𑀫𑀤𑀦𑀻𑀬𑀁. 𑀬𑀸𑀬 𑀘𑁂𑀢𑀦𑀸𑀬 𑀢𑀁 𑀧𑀺𑀯𑀦𑁆𑀢𑀺, 𑀲𑀸 𑀧𑀫𑀸𑀤𑀲𑁆𑀲 𑀓𑀸𑀭𑀡𑀢𑁆𑀢𑀸 𑀧𑀫𑀸𑀤𑀝𑁆𑀞𑀸𑀦𑀁 𑀦𑀸𑀫, 𑀢𑀢𑁄 𑀧𑀝𑀺𑀯𑀺𑀭𑀢𑀸𑀢𑀺 𑀅𑀢𑁆𑀣𑁄.

𑁬-𑁭. 𑀫𑀢𑁆𑀢𑁂𑀬𑁆𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁧𑁩𑁬-𑁩𑁭. 𑀫𑀢𑁆𑀢𑁂𑀬𑁆𑀬𑀸𑀢𑀺 𑀫𑀸𑀢𑀼𑀳𑀺𑀢𑀸, 𑀫𑀸𑀢𑀭𑀺 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀸𑀢𑀺 𑀅𑀢𑁆𑀣𑁄. 𑀧𑁂𑀢𑁆𑀢𑁂𑀬𑁆𑀬𑀸𑀤𑀻𑀲𑀼 𑀧𑀺𑀢𑀼𑀳𑀺𑀢𑀸 𑀧𑁂𑀢𑁆𑀢𑁂𑀬𑁆𑀬𑀸.

𑁮-𑁯. 𑀲𑀸𑀫𑀜𑁆𑀜𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁧𑁩𑁮-𑁩𑁯. 𑀲𑀫𑀡𑀸𑀦𑀁 𑀳𑀺𑀢𑀸 𑀲𑀸𑀫𑀜𑁆𑀜𑀸. 𑀩𑁆𑀭𑀸𑀳𑁆𑀫𑀡𑀸𑀦𑀁 𑀳𑀺𑀢𑀸 𑀩𑁆𑀭𑀳𑁆𑀫𑀜𑁆𑀜𑀸. 𑀢𑁂𑀲𑀼 𑀢𑁂𑀲𑀼 𑀲𑀫𑁆𑀫𑀸 𑀧𑀝𑀺𑀧𑀦𑁆𑀦𑀸𑀦𑀁𑀬𑁂𑀯𑁂𑀢𑀁 𑀅𑀥𑀺𑀯𑀘𑀦𑀁.

𑁧𑁦. 𑀧𑀘𑀸𑀬𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁪𑁦. 𑀓𑀼𑀮𑁂 𑀚𑁂𑀝𑁆𑀞𑀸𑀧𑀘𑀸𑀬𑀺𑀦𑁄𑀢𑀺 𑀓𑀼𑀮𑁂 𑀚𑁂𑀝𑁆𑀞𑀸𑀦𑀁 𑀅𑀧𑀘𑀸𑀬𑀺𑀦𑁄, 𑀦𑀻𑀘𑀯𑀼𑀢𑁆𑀢𑀺𑀦𑁄𑀢𑀺 𑀅𑀢𑁆𑀣𑁄.