𑁧. 𑀮𑁄𑀓𑀘𑀺𑀦𑁆𑀢𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁧𑁧. 𑀧𑀜𑁆𑀘𑀫𑀲𑁆𑀲 𑀧𑀞𑀫𑁂 𑀲𑀼𑀫𑀸𑀕𑀥𑀸𑀬 𑀧𑁄𑀓𑁆𑀔𑀭𑀡𑀺𑀬𑀸𑀢𑀺 𑀏𑀯𑀁𑀦𑀸𑀫𑀺𑀓𑀸𑀬 𑀧𑁄𑀓𑁆𑀔𑀭𑀡𑀺𑀬𑀸. 𑀮𑁄𑀓𑀘𑀺𑀦𑁆𑀢𑀁 𑀘𑀺𑀦𑁆𑀢𑁂𑀦𑁆𑀢𑁄𑀢𑀺, ‘‘𑀓𑁂𑀦 𑀦𑀼 𑀔𑁄 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀓𑀢𑀸, 𑀓𑁂𑀦 𑀫𑀳𑀸𑀧𑀣𑀯𑀻, 𑀓𑁂𑀦 𑀫𑀳𑀸𑀲𑀫𑀼𑀤𑁆𑀤𑁄, 𑀓𑁂𑀦 𑀲𑀢𑁆𑀢𑀸 𑀉𑀧𑁆𑀧𑀸𑀤𑀺𑀢𑀸, 𑀓𑁂𑀦 𑀧𑀩𑁆𑀩𑀢𑀸, 𑀓𑁂𑀦 𑀅𑀫𑁆𑀩𑀢𑀸𑀮𑀦𑀸𑀴𑀺𑀓𑁂𑀭𑀸𑀤𑀬𑁄’’𑀢𑀺 𑀏𑀯𑀭𑀽𑀧𑀁 𑀮𑁄𑀓𑀘𑀺𑀦𑁆𑀢𑀁 𑀘𑀺𑀦𑁆𑀢𑁂𑀦𑁆𑀢𑁄 𑀦𑀺𑀲𑀻𑀤𑀺.

𑀯𑀺𑀘𑁂𑀢𑁄𑀢𑀺 𑀯𑀺𑀕𑀢𑀘𑀺𑀢𑁆𑀢𑁄 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀯𑀸. 𑀪𑀽𑀢𑀁𑀬𑁂𑀯 𑀅𑀤𑁆𑀤𑀲𑀸𑀢𑀺 𑀢𑁂 𑀓𑀺𑀭 𑀅𑀲𑀼𑀭𑀸 𑀲𑀫𑁆𑀩𑀭𑀺𑀫𑀸𑀬𑀁 𑀲𑀫𑁆𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀬𑀣𑀸 𑀦𑁂 𑀲𑁄 𑀧𑀼𑀭𑀺𑀲𑁄 𑀳𑀢𑁆𑀣𑀺𑀅𑀲𑁆𑀲𑀸𑀤𑀻𑀲𑀼 𑀆𑀭𑀼𑀳𑀦𑁆𑀢𑁂 𑀉𑀓𑁆𑀔𑀺𑀧𑀺𑀢𑁆𑀯𑀸, 𑀪𑀺𑀲𑀫𑀼𑀴𑀸𑀮𑀘𑁆𑀙𑀺𑀤𑁆𑀤𑁂𑀳𑀺 𑀧𑀯𑀺𑀲𑀦𑁆𑀢𑁂 𑀧𑀲𑁆𑀲𑀢𑀺, 𑀏𑀯𑀁 𑀅𑀥𑀺𑀝𑁆𑀞𑀳𑀺𑀁𑀲𑀼. 𑀢𑀁 𑀲𑀦𑁆𑀥𑀸𑀬 𑀲𑀢𑁆𑀣𑀸 ‘‘𑀪𑀽𑀢𑀁𑀬𑁂𑀯 𑀅𑀤𑁆𑀤𑀲𑀸’’𑀢𑀺 𑀆𑀳. 𑀤𑁂𑀯𑀸𑀦𑀁𑀬𑁂𑀯 𑀫𑁄𑀳𑀬𑀫𑀸𑀦𑀸𑀢𑀺 𑀤𑁂𑀯𑀸𑀦𑀁 𑀘𑀺𑀢𑁆𑀢𑀁 𑀫𑁄𑀳𑀬𑀦𑁆𑀢𑀸. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀮𑁄𑀓𑀘𑀺𑀦𑁆𑀢𑀁 𑀘𑀺𑀦𑁆𑀢𑁂𑀦𑁆𑀢𑁄 𑀉𑀫𑁆𑀫𑀢𑁆𑀢𑀓𑁄𑀧𑀺 𑀳𑁄𑀢𑀺, 𑀢𑀲𑁆𑀫𑀸.