𑁩. 𑀕𑁄𑀥𑀲𑀓𑁆𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁧𑁯. 𑀢𑀢𑀺𑀬𑁂 𑀪𑀕𑀯𑀸𑀯 𑀏𑀢𑀁 𑀚𑀸𑀦𑁂𑀬𑁆𑀬 𑀏𑀢𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀯𑀸 𑀅𑀲𑀫𑀦𑁆𑀦𑀸𑀕𑀢𑀁 𑀯𑀸𑀢𑀺 𑀇𑀤𑀁 𑀲𑁄 𑀲𑀓𑁆𑀓𑁄 𑀢𑀻𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑁄𑀢𑀸𑀧𑀦𑁆𑀦𑀪𑀸𑀯𑀁, 𑀘𑀢𑀽𑀳𑀺 𑀯𑀸 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀲𑁄𑀢𑀸𑀧𑀦𑁆𑀦𑀪𑀸𑀯𑀁 𑀪𑀕𑀯𑀸𑀯 𑀚𑀸𑀦𑀸𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀆𑀳.

𑀓𑁄𑀘𑀺𑀤𑁂𑀯 𑀥𑀫𑁆𑀫𑀲𑀫𑀼𑀧𑁆𑀧𑀸𑀤𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀸𑀢𑀺 𑀓𑀺𑀜𑁆𑀘𑀺𑀤𑁂𑀯 𑀓𑀸𑀭𑀡𑀁 𑀉𑀧𑁆𑀧𑀚𑁆𑀚𑁂𑀬𑁆𑀬. 𑀏𑀓𑀢𑁄 𑀅𑀲𑁆𑀲 𑀪𑀕𑀯𑀸, 𑀏𑀓𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑁄𑀢𑀺 𑀬𑀲𑁆𑀫𑀺𑀁 𑀓𑀸𑀭𑀡𑁂 𑀉𑀧𑁆𑀧𑀦𑁆𑀦𑁂 𑀪𑀕𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀦𑀸𑀦𑀸𑀮𑀤𑁆𑀥𑀺𑀓𑁄 𑀳𑀼𑀢𑁆𑀯𑀸 𑀏𑀓𑀁 𑀯𑀸𑀤𑀁 𑀯𑀤𑀦𑁆𑀢𑁄 𑀏𑀓𑀢𑁄 𑀅𑀲𑁆𑀲, 𑀪𑀺𑀓𑁆𑀔𑀼𑀲𑀗𑁆𑀖𑁄𑀧𑀺 𑀏𑀓𑀁 𑀯𑀤𑀦𑁆𑀢𑁄 𑀏𑀓𑀢𑁄𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯𑀸𑀳𑀦𑁆𑀢𑀺 𑀬𑀁 𑀯𑀸𑀤𑀁 𑀢𑀼𑀫𑁆𑀳𑁂 𑀯𑀤𑁂𑀣, 𑀢𑀫𑁂𑀯𑀸𑀳𑀁 𑀕𑀡𑁆𑀳𑁂𑀬𑁆𑀬𑀦𑁆𑀢𑀺. 𑀦𑀦𑀼 𑀘 𑀅𑀭𑀺𑀬𑀲𑀸𑀯𑀓𑀲𑁆𑀲 𑀭𑀢𑀦𑀢𑁆𑀢𑀬𑁂 𑀧𑀲𑀸𑀤𑀦𑀸𑀦𑀢𑁆𑀢𑀁 𑀦𑀢𑁆𑀣𑀺, 𑀅𑀣 𑀓𑀲𑁆𑀫𑀸 𑀏𑀲 𑀏𑀯𑀫𑀸𑀳𑀸𑀢𑀺? 𑀪𑀕𑀯𑀢𑁄 𑀲𑀩𑁆𑀩𑀜𑁆𑀜𑀼𑀢𑀸𑀬. 𑀏𑀯𑀜𑁆𑀳𑀺𑀲𑁆𑀲 𑀳𑁄𑀢𑀺 ‘‘𑀪𑀺𑀓𑁆𑀔𑀼𑀲𑀗𑁆𑀖𑁄 𑀅𑀢𑁆𑀢𑀦𑁄 𑀅𑀲𑀩𑁆𑀩𑀜𑁆𑀜𑀼𑀢𑀸𑀬 𑀅𑀚𑀸𑀦𑀺𑀢𑁆𑀯𑀸𑀧𑀺 𑀓𑀣𑁂𑀬𑁆𑀬, 𑀲𑀢𑁆𑀣𑀼 𑀧𑀦 𑀅𑀜𑁆𑀜𑀸𑀡𑀁 𑀦𑀸𑀫 𑀦𑀢𑁆𑀣𑀻’’𑀢𑀺. 𑀢𑀲𑁆𑀫𑀸 𑀏𑀯𑀫𑀸𑀳. 𑀅𑀜𑁆𑀜𑀢𑁆𑀭 𑀓𑀮𑁆𑀬𑀸𑀡𑀸 𑀅𑀜𑁆𑀜𑀢𑁆𑀭 𑀓𑀼𑀲𑀮𑀸𑀢𑀺 𑀓𑀮𑁆𑀬𑀸𑀡𑀫𑁂𑀯 𑀓𑀼𑀲𑀮𑀫𑁂𑀯 𑀯𑀤𑀸𑀫𑀺, 𑀦 𑀓𑀮𑁆𑀬𑀸𑀡𑀓𑀼𑀲𑀮𑀯𑀺𑀫𑀼𑀢𑁆𑀢𑀦𑁆𑀢𑀺. 𑀅𑀧𑀺𑀘𑀲𑁆𑀲 𑀅𑀦𑀯𑀚𑁆𑀚𑀦𑀤𑁄𑀲𑁄 𑀏𑀲𑁄𑀢𑀺.