𑁬. 𑀅𑀲𑀺𑀩𑀦𑁆𑀥𑀓𑀧𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁫𑁮. 𑀙𑀝𑁆𑀞𑁂 𑀧𑀘𑁆𑀙𑀸𑀪𑀽𑀫𑀓𑀸𑀢𑀺 𑀧𑀘𑁆𑀙𑀸𑀪𑀽𑀫𑀺𑀯𑀸𑀲𑀺𑀦𑁄. 𑀓𑀸𑀫𑀡𑁆𑀟𑀮𑀼𑀓𑀸𑀢𑀺 𑀲𑀓𑀫𑀡𑁆𑀟𑀮𑀼𑀦𑁄. 𑀲𑁂𑀯𑀸𑀮𑀫𑀸𑀮𑀺𑀓𑀸𑀢𑀺 𑀧𑀸𑀢𑁄𑀯 𑀉𑀤𑀓𑀢𑁄 𑀲𑁂𑀯𑀸𑀮𑀜𑁆𑀘𑁂𑀯 𑀉𑀧𑁆𑀧𑀮𑀸𑀤𑀻𑀦𑀺 𑀘 𑀕𑀳𑁂𑀢𑁆𑀯𑀸 𑀉𑀤𑀓𑀲𑀼𑀤𑁆𑀥𑀺𑀓𑀪𑀸𑀯𑀚𑀸𑀦𑀦𑀢𑁆𑀣𑀸𑀬 𑀫𑀸𑀮𑀁 𑀓𑀢𑁆𑀯𑀸 𑀧𑀺𑀴𑀦𑁆𑀥𑀦𑀓𑀸. 𑀉𑀤𑀓𑁄𑀭𑁄𑀳𑀓𑀸𑀢𑀺 𑀲𑀸𑀬𑀁𑀧𑀸𑀢𑀁 𑀉𑀤𑀓𑀁 𑀑𑀭𑁄𑀳𑀦𑀓𑀸. 𑀉𑀬𑁆𑀬𑀸𑀧𑁂𑀦𑁆𑀢𑀻𑀢𑀺 𑀉𑀧𑀭𑀺 𑀬𑀸𑀧𑁂𑀦𑁆𑀢𑀺. 𑀲𑀜𑁆𑀜𑀸𑀧𑁂𑀦𑁆𑀢𑀻𑀢𑀺 𑀲𑀫𑁆𑀫𑀸 𑀜𑀸𑀧𑁂𑀦𑁆𑀢𑀺. 𑀲𑀕𑁆𑀕𑀁 𑀦𑀸𑀫 𑀑𑀓𑁆𑀓𑀸𑀫𑁂𑀦𑁆𑀢𑀻𑀢𑀺 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑀸 ‘‘𑀕𑀘𑁆𑀙, 𑀪𑁄, 𑀩𑁆𑀭𑀳𑁆𑀫𑀮𑁄𑀓𑀁, 𑀕𑀘𑁆𑀙, 𑀪𑁄, 𑀩𑁆𑀭𑀳𑁆𑀫𑀮𑁄𑀓’’𑀦𑁆𑀢𑀺 𑀯𑀤𑀦𑁆𑀢𑀸 𑀲𑀕𑁆𑀕𑀁 𑀧𑀯𑁂𑀲𑁂𑀦𑁆𑀢𑀺. 𑀅𑀦𑀼𑀧𑀭𑀺𑀲𑀓𑁆𑀓𑁂𑀬𑁆𑀬𑀸𑀢𑀺 𑀅𑀦𑀼𑀧𑀭𑀺𑀕𑀘𑁆𑀙𑁂𑀬𑁆𑀬. 𑀉𑀫𑁆𑀫𑀼𑀚𑁆𑀚𑀸𑀢𑀺 𑀉𑀫𑁆𑀫𑀼𑀚𑁆𑀚 𑀉𑀝𑁆𑀞𑀳. 𑀣𑀮𑀫𑀼𑀧𑁆𑀮𑀯𑀸𑀢𑀺 𑀣𑀮𑀫𑀪𑀺𑀭𑀼𑀳. 𑀢𑀢𑁆𑀭 𑀬𑀸𑀲𑁆𑀲𑀸𑀢𑀺 𑀢𑀢𑁆𑀭 𑀬𑀸 𑀪𑀯𑁂𑀬𑁆𑀬. 𑀲𑀓𑁆𑀔𑀭𑀸 𑀯𑀸 𑀓𑀞𑀮𑀸 𑀯𑀸𑀢𑀺 𑀲𑀓𑁆𑀔𑀭𑀸 𑀘 𑀓𑀞𑀮𑀸 𑀘. 𑀲𑀸 𑀅𑀥𑁄𑀕𑀸𑀫𑀻 𑀅𑀲𑁆𑀲𑀸𑀢𑀺 𑀲𑀸 𑀅𑀥𑁄 𑀕𑀘𑁆𑀙𑁂𑀬𑁆𑀬, 𑀳𑁂𑀝𑁆𑀞𑀸𑀕𑀸𑀫𑀻 𑀪𑀯𑁂𑀬𑁆𑀬. 𑀅𑀥𑁄𑀕𑀘𑁆𑀙𑀸𑀢𑀺 𑀳𑁂𑀝𑁆𑀞𑀸 𑀕𑀘𑁆𑀙.