𑁯. 𑀅𑀘𑁂𑀮𑀓𑀲𑁆𑀲𑀧𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁫𑁧. 𑀦𑀯𑀫𑁂 𑀓𑀻𑀯𑀘𑀺𑀭𑀁 𑀧𑀩𑁆𑀩𑀚𑀺𑀢𑀲𑁆𑀲𑀸𑀢𑀺 𑀓𑀻𑀯𑀘𑀺𑀭𑁄 𑀓𑀸𑀮𑁄 𑀧𑀩𑁆𑀩𑀚𑀺𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀉𑀢𑁆𑀢𑀭𑀺 𑀫𑀦𑀼𑀲𑁆𑀲𑀥𑀫𑁆𑀫𑀸𑀢𑀺 𑀫𑀦𑀼𑀲𑁆𑀲𑀥𑀫𑁆𑀫𑁄 𑀦𑀸𑀫 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀸, 𑀢𑀢𑁄 𑀫𑀦𑀼𑀲𑁆𑀲𑀥𑀫𑁆𑀫𑀢𑁄 𑀉𑀢𑁆𑀢𑀭𑀺. 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄𑀢𑀺 𑀅𑀭𑀺𑀬𑀪𑀸𑀯𑀁 𑀓𑀸𑀢𑀼𑀁 𑀲𑀫𑀢𑁆𑀣𑀢𑀸𑀬 𑀅𑀮𑀫𑀭𑀺𑀬𑁄𑀢𑀺 𑀲𑀗𑁆𑀔𑀸𑀢𑁄 𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄. 𑀦𑀕𑁆𑀕𑁂𑀬𑁆𑀬𑀸𑀢𑀺 𑀦𑀕𑁆𑀕𑀪𑀸𑀯𑀢𑁄. 𑀫𑀼𑀡𑁆𑀟𑁂𑀬𑁆𑀬𑀸𑀢𑀺 𑀫𑀼𑀡𑁆𑀟𑀪𑀸𑀯𑀢𑁄. 𑀧𑀯𑀸𑀴𑀦𑀺𑀧𑁆𑀨𑁄𑀝𑀦𑀸𑀬𑀸𑀢𑀺 𑀧𑀸𑀯𑀴𑀦𑀺𑀧𑁆𑀨𑁄𑀝𑀦𑀢𑁄, 𑀪𑀽𑀫𑀺𑀬𑀁 𑀦𑀺𑀲𑀻𑀤𑀦𑁆𑀢𑀲𑁆𑀲 𑀆𑀦𑀺𑀲𑀤𑀝𑁆𑀞𑀸𑀦𑁂 𑀮𑀕𑁆𑀕𑀸𑀦𑀁 𑀧𑀁𑀲𑀼𑀭𑀚𑀯𑀸𑀮𑀺𑀓𑀸𑀦𑀁 𑀨𑁄𑀝𑀦𑀢𑁆𑀣𑀁 𑀕𑀳𑀺𑀢𑀫𑁄𑀭𑀧𑀺𑀜𑁆𑀙𑀫𑀢𑁆𑀢𑀢𑁄𑀢𑀺 𑀅𑀢𑁆𑀣𑁄.