𑁧. 𑀭𑀳𑁄𑀕𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫𑁯. 𑀭𑀳𑁄𑀕𑀢𑀯𑀕𑁆𑀕𑀲𑁆𑀲 𑀧𑀞𑀫𑁂 𑀬𑀁 𑀓𑀺𑀜𑁆𑀘𑀺 𑀯𑁂𑀤𑀬𑀺𑀢𑀁, 𑀢𑀁 𑀤𑀼𑀓𑁆𑀔𑀲𑁆𑀫𑀺𑀦𑁆𑀢𑀺 𑀬𑀁 𑀓𑀺𑀜𑁆𑀘𑀺 𑀯𑁂𑀤𑀬𑀺𑀢𑀁, 𑀢𑀁 𑀲𑀩𑁆𑀩𑀁 𑀤𑀼𑀓𑁆𑀔𑀦𑁆𑀢𑀺 𑀅𑀢𑁆𑀣𑁄. 𑀲𑀗𑁆𑀔𑀸𑀭𑀸𑀦𑀁𑀬𑁂𑀯 𑀅𑀦𑀺𑀘𑁆𑀘𑀢𑀦𑁆𑀢𑀺𑀆𑀤𑀻𑀲𑀼 𑀬𑀸 𑀏𑀲𑀸 𑀲𑀗𑁆𑀔𑀸𑀭𑀸𑀦𑀁 𑀅𑀦𑀺𑀘𑁆𑀘𑀢𑀸 𑀔𑀬𑀥𑀫𑁆𑀫𑀢𑀸 𑀯𑀬𑀥𑀫𑁆𑀫𑀢𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀢𑀸, 𑀏𑀢𑀁 𑀲𑀦𑁆𑀥𑀸𑀬 𑀬𑀁 𑀓𑀺𑀜𑁆𑀘𑀺 𑀯𑁂𑀤𑀬𑀺𑀢𑀁, 𑀢𑀁 𑀤𑀼𑀓𑁆𑀔𑀦𑁆𑀢𑀺 𑀫𑀬𑀸 𑀪𑀸𑀲𑀺𑀢𑀦𑁆𑀢𑀺 𑀤𑀻𑀧𑁂𑀢𑀺. 𑀬𑀸 𑀳𑀺 𑀲𑀗𑁆𑀔𑀸𑀭𑀸𑀦𑀁 𑀅𑀦𑀺𑀘𑁆𑀘𑀢𑀸, 𑀯𑁂𑀤𑀦𑀸𑀦𑀫𑁆𑀧𑀺 𑀲𑀸 𑀅𑀦𑀺𑀘𑁆𑀘𑀢𑀸 𑀏𑀯. 𑀅𑀦𑀺𑀘𑁆𑀘𑀢𑀸 𑀘 𑀦𑀸𑀫𑁂𑀲𑀸 𑀫𑀭𑀡𑀁, 𑀫𑀭𑀡𑀢𑁄 𑀉𑀢𑁆𑀢𑀭𑀺 𑀤𑀼𑀓𑁆𑀔𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀲𑀩𑁆𑀩𑀸 𑀯𑁂𑀤𑀦𑀸 𑀤𑀼𑀓𑁆𑀔𑀸𑀢𑀺 𑀯𑀼𑀢𑁆𑀢𑀸. 𑀅𑀣 𑀔𑁄 𑀧𑀦 𑀪𑀺𑀓𑁆𑀔𑀼 𑀫𑀬𑀸𑀢𑀺 𑀇𑀤𑀁 𑀦 𑀓𑁂𑀯𑀮𑀁 𑀅𑀳𑀁 𑀯𑁂𑀤𑀦𑀸𑀦𑀁𑀬𑁂𑀯 𑀦𑀺𑀭𑁄𑀥𑀁 𑀧𑀜𑁆𑀜𑀸𑀧𑁂𑀫𑀺, 𑀇𑀫𑁂𑀲𑀫𑁆𑀧𑀺 𑀥𑀫𑁆𑀫𑀸𑀦𑀁 𑀦𑀺𑀭𑁄𑀥𑀁 𑀧𑀜𑁆𑀜𑀸𑀧𑁂𑀫𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀆𑀭𑀤𑁆𑀥𑀁. 𑀯𑀽𑀧𑀲𑀫𑁄 𑀘 𑀧𑀲𑁆𑀲𑀤𑁆𑀥𑀺𑀬𑁄 𑀘 𑀏𑀯𑀭𑀽𑀧𑀸𑀬 𑀤𑁂𑀲𑀦𑀸𑀬 𑀩𑀼𑀚𑁆𑀛𑀦𑀓𑀸𑀦𑀁 𑀅𑀚𑁆𑀛𑀸𑀲𑀬𑁂𑀦 𑀯𑀼𑀢𑁆𑀢𑀸. 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀘𑀢𑁆𑀢𑀸𑀭𑁄 𑀆𑀭𑀼𑀧𑁆𑀧𑀸 𑀕𑀳𑀺𑀢𑀸𑀯 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.