𑁨. 𑀧𑀳𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪. 𑀤𑀼𑀢𑀺𑀬𑁂 𑀲𑀩𑁆𑀩𑀧𑁆𑀧𑀳𑀸𑀦𑀸𑀬𑀸𑀢𑀺 𑀲𑀩𑁆𑀩𑀲𑁆𑀲 𑀧𑀳𑀸𑀦𑀸𑀬. 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀦𑁆𑀢𑀺 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀁 𑀫𑀽𑀮𑀧𑀘𑁆𑀘𑀬𑀁 𑀓𑀢𑁆𑀯𑀸 𑀉𑀧𑁆𑀧𑀦𑁆𑀦𑀸 𑀲𑀫𑁆𑀧𑀝𑀺𑀘𑁆𑀙𑀦𑀲𑀦𑁆𑀢𑀻𑀭𑀡𑀯𑁄𑀝𑁆𑀞𑀩𑁆𑀩𑀦𑀚𑀯𑀦𑀯𑁂𑀤𑀦𑀸. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸𑀬 𑀧𑀦 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀲𑁄𑀢𑀤𑁆𑀯𑀸𑀭𑀸𑀤𑀺𑀯𑁂𑀤𑀦𑀸𑀧𑀘𑁆𑀘𑀬𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀧𑀦 𑀫𑀦𑁄𑀢𑀺 𑀪𑀯𑀗𑁆𑀕𑀘𑀺𑀢𑁆𑀢𑀁. 𑀥𑀫𑁆𑀫𑀸𑀢𑀺 𑀆𑀭𑀫𑁆𑀫𑀡𑀁. 𑀫𑀦𑁄𑀯𑀺𑀜𑁆𑀜𑀸𑀡𑀦𑁆𑀢𑀺 𑀲𑀳𑀸𑀯𑀚𑁆𑀚𑀦𑀓𑀚𑀯𑀦𑀁. 𑀫𑀦𑁄𑀲𑀫𑁆𑀨𑀲𑁆𑀲𑁄𑀢𑀺 𑀪𑀯𑀗𑁆𑀕𑀲𑀳𑀚𑀸𑀢𑁄 𑀲𑀫𑁆𑀨𑀲𑁆𑀲𑁄. 𑀯𑁂𑀤𑀬𑀺𑀢𑀦𑁆𑀢𑀺 𑀲𑀳𑀸𑀯𑀚𑁆𑀚𑀦𑀯𑁂𑀤𑀦𑀸𑀬 𑀚𑀯𑀦𑀯𑁂𑀤𑀦𑀸. 𑀪𑀯𑀗𑁆𑀕𑀲𑀫𑁆𑀧𑀬𑀼𑀢𑁆𑀢𑀸𑀬 𑀧𑀦 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀆𑀯𑀚𑁆𑀚𑀦𑀁 𑀪𑀯𑀗𑁆𑀕𑀢𑁄 𑀅𑀫𑁄𑀘𑁂𑀢𑁆𑀯𑀸 𑀫𑀦𑁄𑀢𑀺 𑀲𑀳𑀸𑀯𑀚𑁆𑀚𑀦𑁂𑀦 𑀪𑀯𑀗𑁆𑀕𑀁 𑀤𑀝𑁆𑀞𑀩𑁆𑀩𑀁. 𑀥𑀫𑁆𑀫𑀸𑀢𑀺 𑀆𑀭𑀫𑁆𑀫𑀡𑀁. 𑀫𑀦𑁄𑀯𑀺𑀜𑁆𑀜𑀸𑀡𑀦𑁆𑀢𑀺 𑀚𑀯𑀦𑀯𑀺𑀜𑁆𑀜𑀸𑀡𑀁. 𑀫𑀦𑁄𑀲𑀫𑁆𑀨𑀲𑁆𑀲𑁄𑀢𑀺 𑀪𑀯𑀗𑁆𑀕𑀲𑀳𑀚𑀸𑀢𑁄 𑀲𑀫𑁆𑀨𑀲𑁆𑀲𑁄. 𑀯𑁂𑀤𑀬𑀺𑀢𑀦𑁆𑀢𑀺 𑀚𑀯𑀦𑀲𑀳𑀚𑀸𑀢𑀸 𑀯𑁂𑀤𑀦𑀸. 𑀲𑀳𑀸𑀯𑀚𑁆𑀚𑀦𑁂𑀦 𑀪𑀯𑀗𑁆𑀕𑀲𑀳𑀚𑀸𑀢𑀸𑀧𑀺 𑀯𑀝𑁆𑀝𑀢𑀺𑀬𑁂𑀯. 𑀬𑀸 𑀧𑀦𑁂𑀢𑁆𑀣 𑀤𑁂𑀲𑀦𑀸 𑀅𑀦𑀼𑀲𑀺𑀝𑁆𑀞𑀺𑀆𑀡𑀸, 𑀅𑀬𑀁 𑀧𑀡𑁆𑀡𑀢𑁆𑀢𑀺 𑀦𑀸𑀫𑀸𑀢𑀺.