𑁧𑁬. 𑀦𑀦𑁆𑀤𑀺𑀓𑁆𑀔𑀬𑀯𑀕𑁆𑀕𑁄

𑁧-𑁪. 𑀅𑀚𑁆𑀛𑀢𑁆𑀢𑀦𑀦𑁆𑀤𑀺𑀓𑁆𑀔𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁫𑁬-𑁧𑁫𑁯. 𑀦𑀦𑁆𑀤𑀺𑀓𑁆𑀔𑀬𑀯𑀕𑁆𑀕𑀲𑁆𑀲 𑀧𑀞𑀫𑁂 𑀦𑀦𑁆𑀤𑀺𑀓𑁆𑀔𑀬𑀸 𑀭𑀸𑀕𑀓𑁆𑀔𑀬𑁄, 𑀭𑀸𑀕𑀓𑁆𑀔𑀬𑀸 𑀦𑀦𑁆𑀤𑀺𑀓𑁆𑀔𑀬𑁄𑀢𑀺 𑀦𑀦𑁆𑀤𑀺𑀬𑀸 𑀘 𑀭𑀸𑀕𑀲𑁆𑀲 𑀘 𑀅𑀢𑁆𑀣𑀢𑁄 𑀏𑀓𑀢𑁆𑀢𑀸 𑀯𑀼𑀢𑁆𑀢𑀁. 𑀲𑀼𑀯𑀺𑀫𑀼𑀢𑁆𑀢𑀦𑁆𑀢𑀺 𑀅𑀭𑀳𑀢𑁆𑀢𑀨𑀮𑀯𑀺𑀫𑀼𑀢𑁆𑀢𑀺𑀯𑀲𑁂𑀦 𑀲𑀼𑀝𑁆𑀞𑀼 𑀯𑀺𑀫𑀼𑀢𑁆𑀢𑀁. 𑀲𑁂𑀲𑀫𑁂𑀢𑁆𑀣 𑀤𑀼𑀢𑀺𑀬𑀸𑀤𑀻𑀲𑀼 𑀘 𑀉𑀢𑁆𑀢𑀸𑀦𑀫𑁂𑀯.

𑁫-𑁬. 𑀚𑀻𑀯𑀓𑀫𑁆𑀩𑀯𑀦𑀲𑀫𑀸𑀥𑀺𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁬𑁦-𑁧𑁬𑁧. 𑀧𑀜𑁆𑀘𑀫𑀁 𑀲𑀫𑀸𑀥𑀺𑀯𑀺𑀓𑀮𑀸𑀦𑀁, 𑀙𑀝𑁆𑀞𑀁 𑀧𑀝𑀺𑀲𑀮𑁆𑀮𑀸𑀦𑀯𑀺𑀓𑀮𑀸𑀦𑀁 𑀘𑀺𑀢𑁆𑀢𑁂𑀓𑀕𑁆𑀕𑀢𑀜𑁆𑀘 𑀓𑀸𑀬𑀯𑀺𑀯𑁂𑀓𑀜𑁆𑀘 𑀮𑀪𑀦𑁆𑀢𑀸𑀦𑀁 𑀏𑀢𑁂𑀲𑀁 𑀓𑀫𑁆𑀫𑀝𑁆𑀞𑀸𑀦𑀁 𑀨𑀸𑀢𑀺𑀁 𑀕𑀫𑀺𑀲𑁆𑀲𑀢𑀻𑀢𑀺 𑀜𑀢𑁆𑀯𑀸 𑀓𑀣𑀺𑀢𑀁. 𑀢𑀢𑁆𑀣 𑀑𑀓𑁆𑀔𑀸𑀬𑀢𑀻𑀢𑀺 (𑀧𑀘𑁆𑀘𑀓𑁆𑀔𑀸𑀬𑀢𑀺) 𑀧𑀜𑁆𑀜𑀸𑀬𑀢𑀺 𑀧𑀸𑀓𑀝𑀁 𑀳𑁄𑀢𑀺. 𑀇𑀢𑀺 𑀤𑁆𑀯𑀻𑀲𑀼𑀧𑀺 𑀏𑀢𑁂𑀲𑀼 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸 𑀓𑀣𑀺𑀢𑀸.

𑁭-𑁯. 𑀓𑁄𑀝𑁆𑀞𑀺𑀓𑀅𑀦𑀺𑀘𑁆𑀘𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁬𑁨-𑁧𑁬𑁪. 𑀲𑀢𑁆𑀢𑀫𑀸𑀤𑀻𑀲𑀼 𑀢𑀻𑀲𑀼 𑀣𑁂𑀭𑀲𑁆𑀲 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀺𑀬𑀸 𑀥𑀫𑁆𑀫𑀸𑀯 𑀓𑀣𑀺𑀢𑀸.

𑁧𑁦-𑁧𑁨. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀧𑀳𑀸𑀦𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁬𑁫-𑁧𑁬𑁭. 𑀤𑀲𑀫𑀸𑀤𑀻𑀦𑀺 𑀢𑀻𑀡𑀺 𑀧𑀸𑀝𑀺𑀬𑁂𑀓𑁆𑀓𑁂𑀦 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀢𑁂𑀲𑀁 𑀅𑀢𑁆𑀣𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀦𑀦𑁆𑀤𑀺𑀓𑁆𑀔𑀬𑀯𑀕𑁆𑀕𑁄 𑀲𑁄𑀮𑀲𑀫𑁄.