𑁨-𑁫𑁦. 𑀧𑀡𑀻𑀢𑀢𑀭𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁩𑁪𑁩-𑁩𑁯𑁧. 𑀤𑀼𑀢𑀺𑀬𑀸𑀤𑀻𑀲𑀼 𑀯𑁄𑀲𑁆𑀲𑀝𑁆𑀞𑀓𑀸𑀬𑀸𑀢𑀺 𑀅𑀳𑀺𑀢𑀼𑀡𑁆𑀟𑀺𑀓𑀧𑀭𑀺𑀩𑀼𑀤𑁆𑀥𑀁 𑀅𑀕𑀡𑁂𑀢𑁆𑀯𑀸 𑀯𑀺𑀲𑁆𑀲𑀝𑁆𑀞𑀓𑀸𑀬𑀸. 𑀤𑁆𑀯𑀬𑀓𑀸𑀭𑀺𑀦𑁄𑀢𑀺 𑀤𑀼𑀯𑀺𑀥𑀓𑀸𑀭𑀺𑀦𑁄, 𑀓𑀼𑀲𑀮𑀸𑀓𑀼𑀲𑀮𑀓𑀸𑀭𑀺𑀦𑁄𑀢𑀺 𑀅𑀢𑁆𑀣𑁄. 𑀲𑀘𑀚𑁆𑀚 𑀫𑀬𑀦𑁆𑀢𑀺 𑀲𑀘𑁂 𑀅𑀚𑁆𑀚 𑀫𑀬𑀁. 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀻𑀢𑀺 𑀲𑀳𑀪𑀸𑀯𑀁 𑀆𑀧𑀚𑁆𑀚𑀢𑀺. 𑀢𑀢𑁆𑀭𑀲𑁆𑀲 𑀅𑀓𑀼𑀲𑀮𑀁 𑀉𑀧𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑁄 𑀳𑁄𑀢𑀺, 𑀓𑀼𑀲𑀮𑀁 𑀉𑀧𑀧𑀦𑁆𑀦𑀸𑀦𑀁 𑀲𑀫𑁆𑀧𑀢𑁆𑀢𑀺𑀬𑀸. 𑀅𑀦𑁆𑀦𑀦𑁆𑀢𑀺 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁. 𑀧𑀸𑀦𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀧𑀸𑀦𑀓𑀁. 𑀯𑀢𑁆𑀣𑀦𑁆𑀢𑀺 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀁. 𑀬𑀸𑀦𑀦𑁆𑀢𑀺 𑀙𑀢𑁆𑀢𑀼𑀧𑀸𑀳𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀬𑀁𑀓𑀺𑀜𑁆𑀘𑀺 𑀕𑀫𑀦𑀧𑀘𑁆𑀘𑀬𑀁. 𑀫𑀸𑀮𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀲𑀼𑀫𑀦𑀫𑀸𑀮𑀸𑀤𑀺𑀧𑀼𑀧𑁆𑀨𑀁. 𑀕𑀦𑁆𑀥𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀘𑀦𑁆𑀤𑀦𑀸𑀤𑀺𑀕𑀦𑁆𑀥𑀁. 𑀯𑀺𑀮𑁂𑀧𑀦𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀙𑀯𑀺𑀭𑀸𑀕𑀓𑀭𑀡𑀁. 𑀲𑁂𑀬𑁆𑀬𑀸𑀯𑀲𑀣𑀧𑀤𑀻𑀧𑁂𑀬𑁆𑀬𑀦𑁆𑀢𑀺 𑀫𑀜𑁆𑀘𑀧𑀻𑀞𑀸𑀤𑀺𑀲𑁂𑀬𑁆𑀬𑀁 𑀏𑀓𑀪𑀽𑀫𑀺𑀓𑀸𑀤𑀺𑀆𑀯𑀲𑀣𑀁 𑀯𑀝𑁆𑀝𑀺𑀢𑁂𑀮𑀸𑀤𑀺𑀧𑀤𑀻𑀧𑀽𑀧𑀓𑀭𑀡𑀜𑁆𑀘 𑀤𑁂𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀲𑀜𑁆𑀳𑀺 𑀤𑀻𑀖𑀸𑀬𑀼𑀓𑀢𑀸𑀬 𑀘 𑀯𑀡𑁆𑀡𑀯𑀦𑁆𑀢𑀢𑀸𑀬 𑀘 𑀲𑀼𑀔𑀩𑀳𑀼𑀮𑀢𑀸𑀬 𑀘 𑀧𑀢𑁆𑀣𑀦𑀁 𑀓𑀢𑁆𑀯𑀸 𑀇𑀫𑀁 𑀤𑀲𑀯𑀺𑀥𑀁 𑀤𑀸𑀦𑀯𑀢𑁆𑀣𑀼𑀁 𑀤𑀢𑁆𑀯𑀸 𑀢𑀁 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑀼𑀁 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀦𑀸𑀕𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.