𑁫. 𑀲𑀫𑀸𑀥𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁫. 𑀧𑀜𑁆𑀘𑀫𑁂 𑀲𑀫𑀸𑀥𑀺𑀦𑁆𑀢𑀺 𑀇𑀤𑀁 𑀪𑀕𑀯𑀸 𑀢𑁂 𑀪𑀺𑀓𑁆𑀔𑀽 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀬 𑀧𑀭𑀺𑀳𑀸𑀬𑀦𑁆𑀢𑁂 𑀤𑀺𑀲𑁆𑀯𑀸, ‘‘𑀘𑀺𑀢𑁆𑀢𑁂𑀓𑀕𑁆𑀕𑀢𑀁 𑀮𑀪𑀦𑁆𑀢𑀸𑀦𑀁 𑀇𑀫𑁂𑀲𑀁 𑀓𑀫𑁆𑀫𑀝𑁆𑀞𑀸𑀦𑀁 𑀨𑀸𑀢𑀺𑀁 𑀕𑀫𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀆𑀳. 𑀅𑀪𑀺𑀦𑀦𑁆𑀤𑀢𑀻𑀢𑀺 𑀧𑀢𑁆𑀣𑁂𑀢𑀺. 𑀅𑀪𑀺𑀯𑀤𑀢𑀻𑀢𑀺 𑀢𑀸𑀬 𑀅𑀪𑀺𑀦𑀦𑁆𑀤𑀦𑀸𑀬 ‘‘𑀅𑀳𑁄 𑀧𑀺𑀬𑀁 𑀇𑀝𑁆𑀞𑀁 𑀓𑀦𑁆𑀢𑀁 𑀫𑀦𑀸𑀧’’𑀦𑁆𑀢𑀺 𑀯𑀤𑀢𑀺. 𑀯𑀸𑀘𑀁 𑀅𑀪𑀺𑀦𑀦𑁆𑀤𑀦𑁆𑀢𑁄𑀧𑀺 𑀘 𑀢𑀁 𑀆𑀭𑀫𑁆𑀫𑀡𑀁 𑀦𑀺𑀲𑁆𑀲𑀸𑀬 𑀏𑀯𑀁 𑀮𑁄𑀪𑀁 𑀉𑀧𑁆𑀧𑀸𑀤𑁂𑀦𑁆𑀢𑁄 𑀅𑀪𑀺𑀯𑀤𑀢𑀺𑀬𑁂𑀯 𑀦𑀸𑀫. 𑀅𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑀻𑀢𑀺 𑀕𑀺𑀮𑀺𑀢𑁆𑀯𑀸 𑀧𑀭𑀺𑀦𑀺𑀝𑁆𑀞𑀧𑁂𑀢𑁆𑀯𑀸 𑀕𑀡𑁆𑀳𑀸𑀢𑀺. 𑀬𑀸 𑀭𑀽𑀧𑁂 𑀦𑀦𑁆𑀤𑀻𑀢𑀺 𑀬𑀸 𑀲𑀸 𑀭𑀽𑀧𑁂 𑀩𑀮𑀯𑀧𑀢𑁆𑀣𑀦𑀸𑀲𑀗𑁆𑀔𑀸𑀢𑀸 𑀦𑀦𑁆𑀤𑀻. 𑀢𑀤𑀼𑀧𑀸𑀤𑀸𑀦𑀦𑁆𑀢𑀺 𑀢𑀁 𑀕𑀳𑀡𑀝𑁆𑀞𑁂𑀦 𑀉𑀧𑀸𑀤𑀸𑀦𑀁. 𑀦𑀸𑀪𑀺𑀦𑀦𑁆𑀤𑀢𑀻𑀢𑀺 𑀦 𑀧𑀢𑁆𑀣𑁂𑀢𑀺. 𑀦𑀸𑀪𑀺𑀯𑀤𑀢𑀻𑀢𑀺 𑀧𑀢𑁆𑀣𑀦𑀸𑀯𑀲𑁂𑀦 𑀦 ‘‘𑀇𑀝𑁆𑀞𑀁 𑀓𑀦𑁆𑀢’’𑀦𑁆𑀢𑀺 𑀯𑀤𑀢𑀺. 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑁂𑀦 𑀘𑁂𑀢𑀲𑀸 ‘‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔’’𑀦𑁆𑀢𑀺 𑀯𑀘𑀻𑀪𑁂𑀤𑀁 𑀓𑀭𑁄𑀦𑁆𑀢𑁄𑀧𑀺 𑀦𑀸𑀪𑀺𑀯𑀤𑀢𑀺𑀬𑁂𑀯. 𑀧𑀜𑁆𑀘𑀫𑀁.