𑁪. 𑀦𑀦𑁆𑀤𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁫. 𑀘𑀢𑀼𑀢𑁆𑀣𑁂 𑀕𑁄𑀢𑀫𑀸𑀢𑀺 𑀪𑀕𑀯𑀦𑁆𑀢𑀁 𑀕𑁄𑀢𑁆𑀢𑁂𑀦 𑀆𑀮𑀧𑀢𑀺. 𑀅𑀦𑀸𑀯𑀝𑀦𑁆𑀢𑀺 𑀢𑀣𑀸𑀕𑀢𑀲𑁆𑀲 𑀳𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑁂𑀲𑁂𑀦𑁆𑀢𑀲𑁆𑀲 𑀭𑀼𑀓𑁆𑀔𑁄 𑀯𑀸 𑀧𑀩𑁆𑀩𑀢𑁄 𑀯𑀸 𑀆𑀯𑀭𑀺𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺. 𑀢𑁂𑀦𑀸𑀳 ‘‘𑀅𑀦𑀸𑀯𑀝’’𑀦𑁆𑀢𑀺. 𑀇𑀢𑀺 𑀢𑀣𑀸𑀕𑀢𑀁 𑀣𑁄𑀫𑁂𑀢𑁆𑀯𑀸 𑀤𑁂𑀯𑀮𑁄𑀓𑁂 𑀅𑀪𑀺𑀲𑀗𑁆𑀔𑀢𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑁄 𑀓𑀣𑀁𑀯𑀺𑀥𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀤𑀼𑀓𑁆𑀔𑀫𑀢𑀺𑀘𑁆𑀘 𑀇𑀭𑀺𑀬𑀢𑀻𑀢𑀺 𑀤𑀼𑀓𑁆𑀔𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀲𑀻𑀮𑀯𑀸𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑁂𑀦 𑀲𑀻𑀮𑁂𑀦 𑀲𑀫𑀦𑁆𑀦𑀸𑀕𑀢𑁄 𑀔𑀻𑀡𑀸𑀲𑀯𑁄. 𑀧𑀜𑁆𑀜𑀸𑀤𑀬𑁄𑀧𑀺 𑀫𑀺𑀲𑁆𑀲𑀓𑀸𑀬𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀧𑀽𑀚𑀬𑀦𑁆𑀢𑀻𑀢𑀺 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀳𑀺 𑀧𑀽𑀚𑁂𑀦𑁆𑀢𑀺. 𑀘𑀢𑀼𑀢𑁆𑀣𑀁.