𑁪. 𑀫𑀡𑀺𑀪𑀤𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁮. 𑀘𑀢𑀼𑀢𑁆𑀣𑁂 𑀲𑀼𑀔𑀫𑁂𑀥𑀢𑀻𑀢𑀺, 𑀲𑀼𑀔𑀁 𑀧𑀝𑀺𑀮𑀪𑀢𑀺. 𑀲𑀼𑀯𑁂 𑀲𑁂𑀬𑁆𑀬𑁄𑀢𑀺 𑀲𑀼𑀯𑁂 𑀲𑀼𑀯𑁂 𑀲𑁂𑀬𑁆𑀬𑁄, 𑀦𑀺𑀘𑁆𑀘𑀫𑁂𑀯 𑀲𑁂𑀬𑁆𑀬𑁄𑀢𑀺 𑀅𑀢𑁆𑀣𑁄. 𑀯𑁂𑀭𑀸 𑀦 𑀧𑀭𑀺𑀫𑀼𑀘𑁆𑀘𑀢𑀻𑀢𑀺 𑀅𑀳𑀁 𑀲𑀢𑀺𑀫𑀸𑀢𑀺 𑀏𑀢𑁆𑀢𑀓𑁂𑀦 𑀯𑁂𑀭𑀢𑁄 𑀦 𑀫𑀼𑀘𑁆𑀘𑀢𑀺. 𑀬𑀲𑁆𑀲𑀸𑀢𑀺 𑀬𑀲𑁆𑀲 𑀅𑀭𑀳𑀢𑁄. 𑀅𑀳𑀺𑀁𑀲𑀸𑀬𑀸𑀢𑀺 𑀓𑀭𑀼𑀡𑀸𑀬 𑀘𑁂𑀯 𑀓𑀭𑀼𑀡𑀸𑀧𑀼𑀩𑁆𑀩𑀪𑀸𑀕𑁂 𑀘. 𑀫𑁂𑀢𑁆𑀢𑀁𑀲𑁄𑀢𑀺 𑀲𑁄 𑀫𑁂𑀢𑁆𑀢𑀜𑁆𑀘𑁂𑀯 𑀫𑁂𑀢𑁆𑀢𑀸𑀧𑀼𑀩𑁆𑀩𑀪𑀸𑀕𑀜𑁆𑀘 𑀪𑀸𑀯𑁂𑀢𑀺. 𑀅𑀣 𑀯𑀸 𑀅𑀁𑀲𑁄𑀢𑀺 𑀓𑁄𑀝𑁆𑀞𑀸𑀲𑁄 𑀯𑀼𑀘𑁆𑀘𑀢𑀺. 𑀫𑁂𑀢𑁆𑀢𑀸 𑀅𑀁𑀲𑁄 𑀏𑀢𑀲𑁆𑀲𑀸𑀢𑀺 𑀫𑁂𑀢𑁆𑀢𑀁𑀲𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀲𑁆𑀲 𑀅𑀭𑀳𑀢𑁄 𑀲𑀩𑁆𑀩𑀓𑀸𑀮𑀁 𑀅𑀳𑀺𑀁𑀲𑀸𑀬 𑀭𑀢𑁄 𑀫𑀦𑁄, 𑀬𑀲𑁆𑀲 𑀘 𑀲𑀩𑁆𑀩𑀪𑀽𑀢𑁂𑀲𑀼 𑀫𑁂𑀢𑁆𑀢𑀸𑀓𑁄𑀝𑁆𑀞𑀸𑀲𑁄 𑀅𑀢𑁆𑀣𑀺, 𑀢𑀲𑁆𑀲 𑀓𑁂𑀦𑀘𑀺 𑀧𑀼𑀕𑁆𑀕𑀮𑁂𑀦 𑀲𑀤𑁆𑀥𑀺𑀁 𑀯𑁂𑀭𑀁 𑀦𑀸𑀫 𑀦𑀢𑁆𑀣𑀺 𑀬𑀓𑁆𑀔𑀸𑀢𑀺. 𑀘𑀢𑀼𑀢𑁆𑀣𑀁.