𑁩. 𑀯𑀺𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁩. 𑀢𑀢𑀺𑀬𑁂 𑀲𑀤𑁆𑀥𑀻𑀥 𑀯𑀺𑀢𑁆𑀢𑀦𑁆𑀢𑀺 𑀬𑀲𑁆𑀫𑀸 𑀲𑀤𑁆𑀥𑁄 𑀲𑀤𑁆𑀥𑀸𑀬 𑀫𑀼𑀢𑁆𑀢𑀫𑀡𑀺𑀆𑀤𑀻𑀦𑀺𑀧𑀺 𑀯𑀺𑀢𑁆𑀢𑀸𑀦𑀺 𑀮𑀪𑀢𑀺, 𑀢𑀺𑀲𑁆𑀲𑁄𑀧𑀺 𑀓𑀼𑀮𑀲𑀫𑁆𑀧𑀤𑀸, 𑀙 𑀓𑀸𑀫𑀲𑀕𑁆𑀕𑀸𑀦𑀺, 𑀦𑀯 𑀩𑁆𑀭𑀳𑁆𑀫𑀮𑁄𑀓𑁂 𑀧𑀢𑁆𑀯𑀸 𑀧𑀭𑀺𑀬𑁄𑀲𑀸𑀦𑁂 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑀤𑀲𑁆𑀲𑀦𑀫𑁆𑀧𑀺 𑀮𑀪𑀢𑀺, 𑀢𑀲𑁆𑀫𑀸 𑀫𑀡𑀺𑀫𑀼𑀢𑁆𑀢𑀸𑀤𑀻𑀳𑀺 𑀯𑀺𑀢𑁆𑀢𑁂𑀳𑀺 𑀲𑀤𑁆𑀥𑀸𑀯𑀺𑀢𑁆𑀢𑀫𑁂𑀯 𑀲𑁂𑀝𑁆𑀞𑀁. 𑀥𑀫𑁆𑀫𑁄𑀢𑀺 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑁄. 𑀲𑀼𑀔𑀫𑀸𑀯𑀳𑀢𑀻𑀢𑀺 𑀲𑀩𑁆𑀩𑀫𑁆𑀧𑀺 𑀲𑀸𑀲𑀯𑀸𑀦𑀸𑀲𑀯𑀁 𑀅𑀲𑀁𑀓𑀺𑀮𑀺𑀝𑁆𑀞𑀲𑀼𑀔𑀁 𑀆𑀯𑀳𑀢𑀺. 𑀲𑀸𑀤𑀼𑀢𑀭𑀦𑁆𑀢𑀺 𑀮𑁄𑀓𑀲𑁆𑀫𑀺𑀁 𑀮𑁄𑀡𑀫𑁆𑀩𑀺𑀮𑀸𑀤𑀻𑀦𑀁 𑀲𑀩𑁆𑀩𑀭𑀲𑀸𑀦𑀁 𑀲𑀘𑁆𑀘𑀫𑁂𑀯 𑀫𑀥𑀼𑀭𑀢𑀭𑀁. 𑀲𑀘𑁆𑀘𑀲𑁆𑀫𑀺𑀁 𑀳𑀺 𑀞𑀺𑀢𑀸 𑀲𑀻𑀖𑀯𑁂𑀕𑀁 𑀦𑀤𑀺𑀫𑁆𑀧𑀺 𑀦𑀺𑀯𑀢𑁆𑀢𑁂𑀦𑁆𑀢𑀺, 𑀯𑀺𑀲𑀫𑁆𑀧𑀺 𑀦𑀺𑀫𑁆𑀫𑀤𑁆𑀤𑁂𑀦𑁆𑀢𑀺, 𑀅𑀕𑁆𑀕𑀺𑀫𑁆𑀧𑀺 𑀧𑀝𑀺𑀩𑀸𑀳𑀦𑁆𑀢𑀺, 𑀤𑁂𑀯𑀫𑁆𑀧𑀺 𑀯𑀲𑁆𑀲𑀸𑀧𑁂𑀦𑁆𑀢𑀺, 𑀢𑀲𑁆𑀫𑀸 𑀢𑀁 𑀲𑀩𑁆𑀩𑀭𑀲𑀸𑀦𑀁 𑀫𑀥𑀼𑀭𑀢𑀭𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀜𑁆𑀜𑀸𑀚𑀻𑀯𑀺𑀁 𑀚𑀻𑀯𑀺𑀢𑀫𑀸𑀳𑀼 𑀲𑁂𑀝𑁆𑀞𑀦𑁆𑀢𑀺 𑀬𑁄 𑀧𑀜𑁆𑀜𑀸𑀚𑀻𑀯𑀻 𑀕𑀳𑀝𑁆𑀞𑁄 𑀲𑀫𑀸𑀦𑁄 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀬 𑀲𑀮𑀸𑀓𑀪𑀢𑁆𑀢𑀸𑀤𑀻𑀦𑀺 𑀧𑀝𑁆𑀞𑀧𑁂𑀢𑁆𑀯𑀸 𑀧𑀜𑁆𑀜𑀸𑀬 𑀚𑀻𑀯𑀢𑀺, 𑀧𑀩𑁆𑀩𑀚𑀺𑀢𑁄 𑀯𑀸 𑀧𑀦 𑀥𑀫𑁆𑀫𑁂𑀦 𑀉𑀧𑁆𑀧𑀦𑁆𑀦𑁂 𑀧𑀘𑁆𑀘𑀬𑁂 ‘‘𑀇𑀤𑀫𑀢𑁆𑀣’’𑀦𑁆𑀢𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀆𑀤𑀸𑀬 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀭𑀺𑀬𑀨𑀮𑀸𑀥𑀺𑀕𑀫𑀯𑀲𑁂𑀦 𑀧𑀜𑁆𑀜𑀸𑀬 𑀚𑀻𑀯𑀢𑀺, 𑀢𑀁 𑀧𑀜𑁆𑀜𑀸𑀚𑀻𑀯𑀺𑀁 𑀧𑀼𑀕𑁆𑀕𑀮𑀁 𑀲𑁂𑀝𑁆𑀞𑀁 𑀚𑀻𑀯𑀺𑀢𑀁 𑀚𑀻𑀯𑀢𑀻𑀢𑀺 𑀆𑀳𑀼. 𑀢𑀢𑀺𑀬𑀁.