𑁧𑁦. 𑀖𑀝𑀻𑀓𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁦. 𑀤𑀲𑀫𑁂 𑀉𑀧𑀧𑀦𑁆𑀦𑀸𑀲𑁂𑀢𑀺 𑀦𑀺𑀩𑁆𑀩𑀢𑁆𑀢𑀺𑀯𑀲𑁂𑀦 𑀉𑀧𑀕𑀢𑀸. 𑀯𑀺𑀫𑀼𑀢𑁆𑀢𑀸𑀢𑀺 𑀅𑀯𑀺𑀳𑀸𑀩𑁆𑀭𑀳𑁆𑀫𑀮𑁄𑀓𑀲𑁆𑀫𑀺𑀁 𑀉𑀧𑀧𑀢𑁆𑀢𑀺𑀲𑀫𑀦𑀦𑁆𑀢𑀭𑀫𑁂𑀯 𑀅𑀭𑀳𑀢𑁆𑀢𑀨𑀮𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀢𑁆𑀢𑀸. 𑀫𑀸𑀦𑀼𑀲𑀁 𑀤𑁂𑀳𑀦𑁆𑀢𑀺 𑀇𑀥 𑀧𑀜𑁆𑀘𑁄𑀭𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀸𑀦𑀺 𑀏𑀯 𑀯𑀼𑀢𑁆𑀢𑀸𑀦𑀺. 𑀤𑀺𑀩𑁆𑀩𑀬𑁄𑀕𑀦𑁆𑀢𑀺 𑀧𑀜𑁆𑀘 𑀉𑀤𑁆𑀥𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀸𑀦𑀺. 𑀉𑀧𑀘𑁆𑀘𑀕𑀼𑀦𑁆𑀢𑀺 𑀅𑀢𑀺𑀓𑁆𑀓𑀫𑀺𑀁𑀲𑀼. 𑀉𑀧𑀓𑁄𑀢𑀺𑀆𑀤𑀻𑀦𑀺 𑀢𑁂𑀲𑀁 𑀣𑁂𑀭𑀸𑀦𑀁 𑀦𑀸𑀫𑀸𑀦𑀺. 𑀓𑀼𑀲𑀮𑀻 𑀪𑀸𑀲𑀲𑀻 𑀢𑁂𑀲𑀦𑁆𑀢𑀺, ‘‘𑀓𑀼𑀲𑀮’’𑀦𑁆𑀢𑀺 𑀇𑀤𑀁 𑀯𑀘𑀦𑀁 𑀇𑀫𑀲𑁆𑀲 𑀅𑀢𑁆𑀣𑀻𑀢𑀺 𑀓𑀼𑀲𑀮𑀻, 𑀢𑁂𑀲𑀁 𑀣𑁂𑀭𑀸𑀦𑀁 𑀢𑁆𑀯𑀁 𑀓𑀼𑀲𑀮𑀁 𑀅𑀦𑀯𑀚𑁆𑀚𑀁 𑀪𑀸𑀲𑀲𑀺, 𑀣𑁄𑀫𑁂𑀲𑀺 𑀧𑀲𑀁𑀲𑀲𑀺, 𑀧𑀡𑁆𑀟𑀺𑀢𑁄𑀲𑀺 𑀤𑁂𑀯𑀧𑀼𑀢𑁆𑀢𑀸𑀢𑀺 𑀯𑀤𑀢𑀺. 𑀢𑀁 𑀢𑁂 𑀥𑀫𑁆𑀫𑀁 𑀇𑀥𑀜𑁆𑀜𑀸𑀬𑀸𑀢𑀺 𑀢𑁂 𑀣𑁂𑀭𑀸 𑀢𑀁 𑀥𑀫𑁆𑀫𑀁 𑀇𑀥 𑀢𑀼𑀫𑁆𑀳𑀸𑀓𑀁 𑀲𑀸𑀲𑀦𑁂 𑀚𑀸𑀦𑀺𑀢𑁆𑀯𑀸. 𑀕𑀫𑁆𑀪𑀻𑀭𑀦𑁆𑀢𑀺 𑀕𑀫𑁆𑀪𑀻𑀭𑀢𑁆𑀣𑀁. 𑀩𑁆𑀭𑀳𑁆𑀫𑀘𑀸𑀭𑀻 𑀦𑀺𑀭𑀸𑀫𑀺𑀲𑁄𑀢𑀺 𑀦𑀺𑀭𑀸𑀫𑀺𑀲𑀩𑁆𑀭𑀳𑁆𑀫𑀘𑀸𑀭𑀻 𑀦𑀸𑀫 𑀅𑀦𑀸𑀕𑀸𑀫𑀻, 𑀅𑀦𑀸𑀕𑀸𑀫𑀻 𑀅𑀳𑁄𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀅𑀳𑀼𑀯𑀸𑀢𑀺 𑀅𑀳𑁄𑀲𑀺. 𑀲𑀕𑀸𑀫𑁂𑀬𑁆𑀬𑁄𑀢𑀺 𑀏𑀓𑀕𑀸𑀫𑀯𑀸𑀲𑀻. 𑀧𑀭𑀺𑀬𑁄𑀲𑀸𑀦𑀕𑀸𑀣𑀸 𑀲𑀗𑁆𑀕𑀻𑀢𑀺𑀓𑀸𑀭𑁂𑀳𑀺 𑀞𑀧𑀺𑀢𑀸𑀢𑀺. 𑀤𑀲𑀫𑀁.

𑀆𑀤𑀺𑀢𑁆𑀢𑀯𑀕𑁆𑀕𑁄 𑀧𑀜𑁆𑀘𑀫𑁄.