𑁧𑁦. 𑀲𑀫𑀺𑀤𑁆𑀥𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦. 𑀤𑀲𑀫𑁂 𑀢𑀧𑁄𑀤𑀸𑀭𑀸𑀫𑁂𑀢𑀺 𑀢𑀧𑁄𑀤𑀲𑁆𑀲 𑀢𑀢𑁆𑀢𑁄𑀤𑀓𑀲𑁆𑀲 𑀭𑀳𑀤𑀲𑁆𑀲 𑀯𑀲𑁂𑀦 𑀏𑀯𑀁 𑀮𑀤𑁆𑀥𑀦𑀸𑀫𑁂 𑀆𑀭𑀸𑀫𑁂. 𑀯𑁂𑀪𑀸𑀭𑀧𑀩𑁆𑀩𑀢𑀲𑁆𑀲 𑀓𑀺𑀭 𑀳𑁂𑀝𑁆𑀞𑀸 𑀪𑀼𑀫𑁆𑀫𑀝𑁆𑀞𑀓𑀦𑀸𑀕𑀸𑀦𑀁 𑀧𑀜𑁆𑀘𑀬𑁄𑀚𑀦𑀲𑀢𑀺𑀓𑀁 𑀦𑀸𑀕𑀪𑀯𑀦𑀁 𑀤𑁂𑀯𑀮𑁄𑀓𑀲𑀤𑀺𑀲𑀁 𑀫𑀡𑀺𑀫𑀬𑁂𑀦 𑀢𑀮𑁂𑀦 𑀆𑀭𑀸𑀫𑀼𑀬𑁆𑀬𑀸𑀦𑁂𑀳𑀺 𑀘 𑀲𑀫𑀦𑁆𑀦𑀸𑀕𑀢𑀁. 𑀢𑀢𑁆𑀣 𑀦𑀸𑀕𑀸𑀦𑀁 𑀓𑀻𑀴𑀦𑀝𑁆𑀞𑀸𑀦𑁂 𑀫𑀳𑀸𑀉𑀤𑀓𑀭𑀳𑀤𑁄, 𑀢𑀢𑁄 𑀢𑀧𑁄𑀤𑀸 𑀦𑀸𑀫 𑀦𑀤𑀻 𑀲𑀦𑁆𑀤𑀢𑀺 𑀓𑀼𑀣𑀺𑀢𑀸 𑀉𑀡𑁆𑀳𑁄𑀤𑀓𑀸. 𑀓𑀲𑁆𑀫𑀸 𑀧𑀦𑁂𑀲𑀸 𑀏𑀤𑀺𑀲𑀸? 𑀭𑀸𑀚𑀕𑀳𑀁 𑀓𑀺𑀭 𑀧𑀭𑀺𑀯𑀸𑀭𑁂𑀢𑁆𑀯𑀸 𑀫𑀳𑀸𑀧𑁂𑀢𑀮𑁄𑀓𑁄 𑀢𑀺𑀝𑁆𑀞𑀢𑀺, 𑀢𑀢𑁆𑀣 𑀤𑁆𑀯𑀺𑀦𑁆𑀦𑀁 𑀫𑀳𑀸𑀮𑁄𑀳𑀓𑀼𑀫𑁆𑀪𑀺𑀦𑀺𑀭𑀬𑀸𑀦𑀁 𑀅𑀦𑁆𑀢𑀭𑁂𑀦 𑀅𑀬𑀁 𑀢𑀧𑁄𑀤𑀸 𑀆𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀓𑀼𑀣𑀺𑀢𑀸 𑀲𑀦𑁆𑀤𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀬𑀢𑀸𑀬𑀁, 𑀪𑀺𑀓𑁆𑀔𑀯𑁂, 𑀢𑀧𑁄𑀤𑀸 𑀲𑀦𑁆𑀤𑀢𑀺, 𑀲𑁄 𑀤𑀳𑁄 𑀅𑀘𑁆𑀙𑁄𑀤𑀓𑁄 𑀲𑀻𑀢𑁄𑀤𑀓𑁄 𑀲𑀸𑀢𑁄𑀤𑀓𑁄 𑀲𑁂𑀢𑁄𑀤𑀓𑁄 𑀲𑀼𑀧𑁆𑀧𑀢𑀺𑀢𑁆𑀣𑁄 𑀭𑀫𑀡𑀻𑀬𑁄 𑀧𑀳𑀽𑀢𑀫𑀘𑁆𑀙𑀓𑀘𑁆𑀙𑀧𑁄, 𑀘𑀓𑁆𑀓𑀫𑀢𑁆𑀢𑀸𑀦𑀺 𑀘 𑀧𑀤𑀼𑀫𑀸𑀦𑀺 𑀧𑀼𑀧𑁆𑀨𑀦𑁆𑀢𑀺. 𑀅𑀧𑀺𑀘𑀸𑀬𑀁, 𑀪𑀺𑀓𑁆𑀔𑀯𑁂, 𑀢𑀧𑁄𑀤𑀸 𑀤𑁆𑀯𑀺𑀦𑁆𑀦𑀁 𑀫𑀳𑀸𑀦𑀺𑀭𑀬𑀸𑀦𑀁 𑀅𑀦𑁆𑀢𑀭𑀺𑀓𑀸𑀬 𑀆𑀕𑀘𑁆𑀙𑀢𑀺, 𑀢𑁂𑀦𑀸𑀬𑀁 𑀢𑀧𑁄𑀤𑀸 𑀓𑀼𑀣𑀺𑀢𑀸 𑀲𑀦𑁆𑀤𑀢𑀻’’𑀢𑀺 (𑀧𑀸𑀭𑀸. 𑁨𑁩𑁧).

𑀇𑀫𑀲𑁆𑀲 𑀧𑀦 𑀆𑀭𑀸𑀫𑀲𑁆𑀲 𑀅𑀪𑀺𑀫𑀼𑀔𑀝𑁆𑀞𑀸𑀦𑁂 𑀢𑀢𑁄 𑀫𑀳𑀸𑀉𑀤𑀓𑀭𑀳𑀤𑁄 𑀚𑀸𑀢𑁄, 𑀢𑀲𑁆𑀲 𑀯𑀲𑁂𑀦𑀸𑀬𑀁 𑀯𑀺𑀳𑀸𑀭𑁄 ‘‘𑀢𑀧𑁄𑀤𑀸𑀭𑀸𑀫𑁄’’𑀢𑀺 𑀯𑀼𑀘𑁆𑀘𑀢𑀺.

𑀲𑀫𑀺𑀤𑁆𑀥𑀻𑀢𑀺 𑀢𑀲𑁆𑀲 𑀓𑀺𑀭 𑀣𑁂𑀭𑀲𑁆𑀲 𑀅𑀢𑁆𑀢𑀪𑀸𑀯𑁄 𑀲𑀫𑀺𑀤𑁆𑀥𑁄 𑀅𑀪𑀺𑀭𑀽𑀧𑁄 𑀧𑀸𑀲𑀸𑀤𑀺𑀓𑁄, 𑀢𑀲𑁆𑀫𑀸 ‘‘𑀲𑀫𑀺𑀤𑁆𑀥𑀻’’𑀢𑁆𑀯𑁂𑀯 𑀲𑀗𑁆𑀔𑀁 𑀕𑀢𑁄. 𑀕𑀢𑁆𑀢𑀸𑀦𑀺 𑀧𑀭𑀺𑀲𑀺𑀜𑁆𑀘𑀺𑀢𑀼𑀦𑁆𑀢𑀺 𑀧𑀥𑀸𑀦𑀺𑀓𑀢𑁆𑀣𑁂𑀭𑁄 𑀏𑀲, 𑀩𑀮𑀯𑀧𑀘𑁆𑀘𑀽𑀲𑁂 𑀉𑀝𑁆𑀞𑀸𑀬𑀸𑀲𑀦𑀸 𑀲𑀭𑀻𑀭𑀁 𑀉𑀢𑀼𑀁 𑀕𑀸𑀳𑀸𑀧𑁂𑀢𑁆𑀯𑀸 𑀩𑀳𑀺 𑀲𑀝𑁆𑀞𑀺𑀳𑀢𑁆𑀣𑀫𑀢𑁆𑀢𑁂 𑀫𑀳𑀸𑀘𑀗𑁆𑀓𑀫𑁂 𑀅𑀧𑀭𑀸𑀧𑀭𑀁 𑀘𑀗𑁆𑀓𑀫𑀺𑀢𑁆𑀯𑀸 ‘‘𑀲𑁂𑀤𑀕𑀳𑀺𑀢𑁂𑀳𑀺 𑀕𑀢𑁆𑀢𑁂𑀳𑀺 𑀧𑀭𑀺𑀪𑀼𑀜𑁆𑀚𑀫𑀸𑀦𑀁 𑀲𑁂𑀦𑀸𑀲𑀦𑀁 𑀓𑀺𑀮𑀺𑀲𑁆𑀲𑀢𑀻’’𑀢𑀺 𑀫𑀜𑁆𑀜𑀫𑀸𑀦𑁄 𑀕𑀢𑁆𑀢𑀸𑀦𑀺 𑀧𑀭𑀺𑀲𑀺𑀜𑁆𑀘𑀦𑀢𑁆𑀣𑀁 𑀲𑀭𑀻𑀭𑀥𑁄𑀯𑀦𑀢𑁆𑀣𑀁 𑀉𑀧𑀲𑀗𑁆𑀓𑀫𑀺. 𑀏𑀓𑀘𑀻𑀯𑀭𑁄 𑀅𑀝𑁆𑀞𑀸𑀲𑀻𑀢𑀺 𑀦𑀺𑀯𑀸𑀲𑀦𑀁 𑀦𑀺𑀯𑀸𑀲𑁂𑀢𑁆𑀯𑀸 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀘𑀻𑀯𑀭𑀁 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀅𑀝𑁆𑀞𑀸𑀲𑀺.

𑀕𑀢𑁆𑀢𑀸𑀦𑀺 𑀧𑀼𑀩𑁆𑀩𑀸𑀧𑀬𑀫𑀸𑀦𑁄𑀢𑀺 𑀕𑀢𑁆𑀢𑀸𑀦𑀺 𑀧𑀼𑀩𑁆𑀩𑀲𑀤𑀺𑀲𑀸𑀦𑀺 𑀯𑁄𑀤𑀓𑀸𑀦𑀺 𑀓𑀼𑀭𑀼𑀫𑀸𑀦𑁄. 𑀅𑀮𑁆𑀮𑀲𑀭𑀻𑀭𑁂 𑀧𑀸𑀭𑀼𑀢𑀁 𑀳𑀺 𑀘𑀻𑀯𑀭𑀁 𑀓𑀺𑀮𑀺𑀲𑁆𑀲𑀢𑀺 𑀤𑀼𑀕𑁆𑀕𑀦𑁆𑀥𑀁 𑀳𑁄𑀢𑀺, 𑀦 𑀘𑁂𑀢𑀁 𑀯𑀢𑁆𑀢𑀁. 𑀣𑁂𑀭𑁄 𑀧𑀦 𑀯𑀢𑁆𑀢𑀲𑀫𑁆𑀧𑀦𑁆𑀦𑁄, 𑀢𑀲𑁆𑀫𑀸 𑀯𑀢𑁆𑀢𑁂 𑀞𑀺𑀢𑁄𑀯 𑀦𑁆𑀳𑀸𑀬𑀺𑀢𑁆𑀯𑀸 𑀧𑀘𑁆𑀘𑀼𑀢𑁆𑀢𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀢𑀢𑁆𑀣 𑀇𑀤𑀁 𑀦𑁆𑀳𑀸𑀦𑀯𑀢𑁆𑀢𑀁 𑁋 𑀉𑀤𑀓𑀢𑀺𑀢𑁆𑀣𑀁 𑀕𑀦𑁆𑀢𑁆𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀘𑀻𑀯𑀭𑀸𑀦𑀺 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀯𑁂𑀕𑁂𑀦 𑀞𑀺𑀢𑀓𑁂𑀦𑁂𑀯 𑀦 𑀑𑀢𑀭𑀺𑀢𑀩𑁆𑀩𑀁, 𑀲𑀩𑁆𑀩𑀤𑀺𑀲𑀸 𑀧𑀦 𑀑𑀮𑁄𑀓𑁂𑀢𑁆𑀯𑀸 𑀯𑀺𑀯𑀺𑀢𑁆𑀢𑀪𑀸𑀯𑀁 𑀜𑀢𑁆𑀯𑀸 𑀔𑀸𑀡𑀼𑀕𑀼𑀫𑁆𑀩𑀮𑀢𑀸𑀤𑀻𑀦𑀺 𑀯𑀯𑀢𑁆𑀣𑀧𑁂𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀉𑀓𑁆𑀓𑀸𑀲𑀺𑀢𑁆𑀯𑀸 𑀅𑀯𑀓𑀼𑀚𑁆𑀚 𑀞𑀺𑀢𑁂𑀦 𑀉𑀢𑁆𑀢𑀭𑀸𑀲𑀗𑁆𑀕𑀘𑀻𑀯𑀭𑀁 𑀅𑀧𑀦𑁂𑀢𑁆𑀯𑀸 𑀧𑀲𑀸𑀭𑁂𑀢𑀩𑁆𑀩𑀁, 𑀓𑀸𑀬𑀩𑀦𑁆𑀥𑀦𑀁 𑀫𑁄𑀘𑁂𑀢𑁆𑀯𑀸 𑀘𑀻𑀯𑀭𑀧𑀺𑀝𑁆𑀞𑁂𑀬𑁂𑀯 𑀞𑀧𑁂𑀢𑀩𑁆𑀩𑀁. 𑀲𑀘𑁂 𑀉𑀤𑀓𑀲𑀸𑀝𑀺𑀓𑀸 𑀦𑀢𑁆𑀣𑀺, 𑀉𑀤𑀓𑀦𑁆𑀢𑁂 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀦𑀺𑀯𑀸𑀲𑀦𑀁 𑀫𑁄𑀘𑁂𑀢𑁆𑀯𑀸 𑀲𑀘𑁂 𑀲𑀺𑀦𑁆𑀦𑀝𑁆𑀞𑀸𑀦𑀁 𑀅𑀢𑁆𑀣𑀺, 𑀧𑀲𑀸𑀭𑁂𑀢𑀩𑁆𑀩𑀁. 𑀦𑁄 𑀘𑁂 𑀅𑀢𑁆𑀣𑀺, 𑀲𑀁𑀳𑀭𑀺𑀢𑁆𑀯𑀸 𑀞𑀧𑁂𑀢𑀩𑁆𑀩𑀁. 𑀉𑀤𑀓𑀁 𑀑𑀢𑀭𑀦𑁆𑀢𑁂𑀦 𑀲𑀡𑀺𑀓𑀁 𑀦𑀸𑀪𑀺𑀧𑁆𑀧𑀫𑀸𑀡𑀫𑀢𑁆𑀢𑀁 𑀑𑀢𑀭𑀺𑀢𑁆𑀯𑀸 𑀯𑀻𑀘𑀺𑀁 𑀅𑀦𑀼𑀝𑁆𑀞𑀸𑀧𑁂𑀦𑁆𑀢𑁂𑀦 𑀲𑀤𑁆𑀤𑀁 𑀅𑀓𑀭𑁄𑀦𑁆𑀢𑁂𑀦 𑀦𑀺𑀯𑀢𑁆𑀢𑀺𑀢𑁆𑀯𑀸 𑀆𑀕𑀢𑀤𑀺𑀲𑀸𑀪𑀺𑀫𑀼𑀔𑁂𑀦 𑀦𑀺𑀫𑀼𑀚𑁆𑀚𑀺𑀢𑀩𑁆𑀩𑀁, 𑀏𑀯𑀁 𑀘𑀻𑀯𑀭𑀁 𑀭𑀓𑁆𑀔𑀺𑀢𑀁 𑀳𑁄𑀢𑀺. 𑀉𑀫𑁆𑀫𑀼𑀚𑁆𑀚𑀦𑁆𑀢𑁂𑀦𑀧𑀺 𑀲𑀤𑁆𑀤𑀁 𑀅𑀓𑀭𑁄𑀦𑁆𑀢𑁂𑀦 𑀲𑀡𑀺𑀓𑀁 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀦𑁆𑀳𑀸𑀦𑀧𑀭𑀺𑀬𑁄𑀲𑀸𑀦𑁂 𑀉𑀤𑀓𑀦𑁆𑀢𑁂 𑀉𑀓𑁆𑀓𑀼𑀝𑀺𑀓𑁂𑀦 𑀦𑀺𑀲𑀻𑀤𑀺𑀢𑁆𑀯𑀸 𑀦𑀺𑀯𑀸𑀲𑀦𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀉𑀝𑁆𑀞𑀸𑀬 𑀲𑀼𑀧𑀭𑀺𑀫𑀡𑁆𑀟𑀮𑀁 𑀦𑀺𑀯𑀸𑀲𑁂𑀢𑁆𑀯𑀸 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀘𑀻𑀯𑀭𑀁 𑀅𑀧𑀸𑀭𑀼𑀧𑀺𑀢𑁆𑀯𑀸𑀯 𑀞𑀸𑀢𑀩𑁆𑀩𑀦𑁆𑀢𑀺.

𑀣𑁂𑀭𑁄𑀧𑀺 𑀢𑀣𑀸 𑀦𑁆𑀳𑀸𑀬𑀺𑀢𑁆𑀯𑀸 𑀧𑀘𑁆𑀘𑀼𑀢𑁆𑀢𑀭𑀺𑀢𑁆𑀯𑀸 𑀯𑀺𑀕𑀘𑁆𑀙𑀫𑀸𑀦𑀉𑀤𑀓𑀁 𑀓𑀸𑀬𑀁 𑀑𑀮𑁄𑀓𑀬𑀫𑀸𑀦𑁄 𑀅𑀝𑁆𑀞𑀸𑀲𑀺. 𑀢𑀲𑁆𑀲 𑀧𑀓𑀢𑀺𑀬𑀸𑀧𑀺 𑀧𑀸𑀲𑀸𑀤𑀺𑀓𑀲𑁆𑀲 𑀧𑀘𑁆𑀘𑀽𑀲𑀲𑀫𑀬𑁂 𑀲𑀫𑁆𑀫𑀸 𑀧𑀭𑀺𑀡𑀢𑀸𑀳𑀸𑀭𑀲𑁆𑀲 𑀉𑀡𑁆𑀳𑁄𑀤𑀓𑁂𑀦 𑀦𑁆𑀳𑀸𑀢𑀲𑁆𑀲 𑀅𑀢𑀺𑀯𑀺𑀬 𑀫𑀼𑀔𑀯𑀡𑁆𑀡𑁄 𑀯𑀺𑀭𑁄𑀘𑀺, 𑀩𑀦𑁆𑀥𑀦𑀸 𑀧𑀯𑀼𑀢𑁆𑀢𑀢𑀸𑀮𑀨𑀮𑀁 𑀯𑀺𑀬 𑀧𑀪𑀸𑀲𑀫𑁆𑀧𑀦𑁆𑀦𑁄 𑀧𑀼𑀡𑁆𑀡𑀘𑀦𑁆𑀤𑁄 𑀯𑀺𑀬 𑀢𑀗𑁆𑀔𑀡𑀯𑀺𑀓𑀲𑀺𑀢𑀧𑀤𑀼𑀫𑀁 𑀯𑀺𑀬 𑀫𑀼𑀔𑀁 𑀲𑀲𑁆𑀲𑀺𑀭𑀺𑀓𑀁 𑀅𑀳𑁄𑀲𑀺, 𑀲𑀭𑀻𑀭𑀯𑀡𑁆𑀡𑁄𑀧𑀺 𑀯𑀺𑀧𑁆𑀧𑀲𑀻𑀤𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀯𑀦𑀲𑀡𑁆𑀟𑁂 𑀅𑀥𑀺𑀯𑀢𑁆𑀣𑀸 𑀪𑀼𑀫𑁆𑀫𑀤𑁂𑀯𑀢𑀸 𑀧𑀸𑀲𑀸𑀤𑀺𑀓𑀁 𑀪𑀺𑀓𑁆𑀔𑀼𑀁 𑀑𑀮𑁄𑀓𑀬𑀫𑀸𑀦𑀸 𑀲𑀫𑀦𑀁 𑀦𑀺𑀕𑁆𑀕𑀳𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀓𑀸𑀫𑀧𑀭𑀺𑀴𑀸𑀳𑀸𑀪𑀺𑀪𑀽𑀢𑀸 𑀳𑀼𑀢𑁆𑀯𑀸, ‘‘𑀣𑁂𑀭𑀁 𑀧𑀮𑁄𑀪𑁂𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀪𑀸𑀯𑀁 𑀉𑀴𑀸𑀭𑁂𑀦 𑀅𑀮𑀗𑁆𑀓𑀸𑀭𑁂𑀦 𑀅𑀮𑀗𑁆𑀓𑀭𑀺𑀢𑁆𑀯𑀸 𑀲𑀳𑀲𑁆𑀲𑀯𑀝𑁆𑀝𑀺𑀧𑀤𑀻𑀧𑀁 𑀧𑀚𑁆𑀚𑀮𑀫𑀸𑀦𑀸 𑀯𑀺𑀬 𑀘𑀦𑁆𑀤𑀁 𑀉𑀝𑁆𑀞𑀸𑀧𑀬𑀫𑀸𑀦𑀸 𑀯𑀺𑀬 𑀲𑀓𑀮𑀸𑀭𑀸𑀫𑀁 𑀏𑀓𑁄𑀪𑀸𑀲𑀁 𑀓𑀢𑁆𑀯𑀸 𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀯𑀦𑁆𑀤𑀺𑀢𑁆𑀯𑀸𑀯 𑀯𑁂𑀳𑀸𑀲𑁂 𑀞𑀺𑀢𑀸 𑀕𑀸𑀣𑀁 𑀅𑀪𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀅𑀜𑁆𑀜𑀢𑀭𑀸 𑀤𑁂𑀯𑀢𑀸…𑀧𑁂… 𑀅𑀚𑁆𑀛𑀪𑀸𑀲𑀻’’𑀢𑀺.

𑀅𑀪𑀼𑀢𑁆𑀯𑀸𑀢𑀺 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀅𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸. 𑀪𑀺𑀓𑁆𑀔𑀲𑀻𑀢𑀺 𑀧𑀺𑀡𑁆𑀟𑀸𑀬 𑀘𑀭𑀲𑀺. 𑀫𑀸 𑀢𑀁 𑀓𑀸𑀮𑁄 𑀉𑀧𑀘𑁆𑀘𑀕𑀸𑀢𑀺 𑀏𑀢𑁆𑀣 𑀓𑀸𑀮𑁄 𑀦𑀸𑀫 𑀧𑀜𑁆𑀘𑀓𑀸𑀫𑀕𑀼𑀡𑀧𑀝𑀺𑀲𑁂𑀯𑀦𑀓𑁆𑀔𑀫𑁄 𑀤𑀳𑀭𑀬𑁄𑀩𑁆𑀩𑀦𑀓𑀸𑀮𑁄. 𑀚𑀭𑀸𑀚𑀺𑀡𑁆𑀡𑁂𑀦 𑀳𑀺 𑀑𑀪𑀕𑁆𑀕𑁂𑀦 𑀤𑀡𑁆𑀟𑀧𑀭𑀸𑀬𑀡𑁂𑀦 𑀧𑀯𑁂𑀥𑀫𑀸𑀦𑁂𑀦 𑀓𑀸𑀲𑀲𑀸𑀲𑀸𑀪𑀺𑀪𑀽𑀢𑁂𑀦 𑀦 𑀲𑀓𑁆𑀓𑀸 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀺𑀢𑀼𑀁. 𑀇𑀢𑀺 𑀇𑀫𑀁 𑀓𑀸𑀮𑀁 𑀲𑀦𑁆𑀥𑀸𑀬 𑀤𑁂𑀯𑀢𑀸 ‘‘𑀫𑀸 𑀢𑀁 𑀓𑀸𑀮𑁄 𑀉𑀧𑀘𑁆𑀘𑀕𑀸’’𑀢𑀺 𑀆𑀳. 𑀢𑀢𑁆𑀣 𑀫𑀸 𑀉𑀧𑀘𑁆𑀘𑀕𑀸𑀢𑀺 𑀫𑀸 𑀅𑀢𑀺𑀓𑁆𑀓𑀫𑀺.

𑀓𑀸𑀮𑀁 𑀯𑁄𑀳𑀁 𑀦 𑀚𑀸𑀦𑀸𑀫𑀻𑀢𑀺 𑀏𑀢𑁆𑀣 𑀯𑁄𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀓𑀸𑀮𑀁 𑀦 𑀚𑀸𑀦𑀸𑀫𑀻𑀢𑀺 𑀫𑀭𑀡𑀓𑀸𑀮𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀲𑀢𑁆𑀢𑀸𑀦𑀜𑁆𑀳𑀺 𑁋

‘‘𑀚𑀻𑀯𑀺𑀢𑀁 𑀩𑁆𑀬𑀸𑀥𑀺 𑀓𑀸𑀮𑁄 𑀘, 𑀤𑁂𑀳𑀦𑀺𑀓𑁆𑀔𑁂𑀧𑀦𑀁 𑀕𑀢𑀺;

𑀧𑀜𑁆𑀘𑁂𑀢𑁂 𑀚𑀻𑀯𑀮𑁄𑀓𑀲𑁆𑀫𑀺𑀁, 𑀅𑀦𑀺𑀫𑀺𑀢𑁆𑀢𑀸 𑀦 𑀦𑀸𑀬𑀭𑁂’’.

𑀢𑀢𑁆𑀣 𑀚𑀻𑀯𑀺𑀢𑀁 𑀢𑀸𑀯 ‘‘𑀏𑀢𑁆𑀢𑀓𑀫𑁂𑀯, 𑀦 𑀇𑀢𑁄 𑀧𑀭’’𑀦𑁆𑀢𑀺 𑀯𑀯𑀢𑁆𑀣𑀸𑀦𑀸𑀪𑀸𑀯𑀢𑁄 𑀅𑀦𑀺𑀫𑀺𑀢𑁆𑀢𑀁. 𑀓𑀮𑀮𑀓𑀸𑀮𑁂𑀧𑀺 𑀳𑀺 𑀲𑀢𑁆𑀢𑀸 𑀫𑀭𑀦𑁆𑀢𑀺, 𑀅𑀩𑁆𑀩𑀼𑀤-𑀧𑁂𑀲𑀺-𑀖𑀦-𑀅𑀟𑁆𑀠𑀫𑀸𑀲-𑀏𑀓𑀫𑀸𑀲-𑀤𑁆𑀯𑁂𑀫𑀸𑀲-𑀢𑁂𑀫𑀸𑀲-𑀘𑀢𑀼𑀫𑀸𑀲𑀧𑀜𑁆𑀘𑀫𑀸𑀲…𑀧𑁂… 𑀤𑀲𑀫𑀸𑀲𑀓𑀸𑀮𑁂𑀧𑀺, 𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀦𑁆𑀢𑀲𑀫𑀬𑁂𑀧𑀺, 𑀢𑀢𑁄 𑀧𑀭𑀁 𑀯𑀲𑁆𑀲𑀲𑀢𑀲𑁆𑀲 𑀅𑀦𑁆𑀢𑁄𑀧𑀺 𑀩𑀳𑀺𑀧𑀺 𑀫𑀭𑀦𑁆𑀢𑀺𑀬𑁂𑀯. 𑀩𑁆𑀬𑀸𑀥𑀺𑀧𑀺 ‘‘𑀇𑀫𑀺𑀦𑀸𑀯 𑀩𑁆𑀬𑀸𑀥𑀺𑀦𑀸 𑀲𑀢𑁆𑀢𑀸 𑀫𑀭𑀦𑁆𑀢𑀺, 𑀦 𑀅𑀜𑁆𑀜𑁂𑀦𑀸’’𑀢𑀺 𑀯𑀯𑀢𑁆𑀣𑀸𑀦𑀸𑀪𑀸𑀯𑀢𑁄 𑀅𑀦𑀺𑀫𑀺𑀢𑁆𑀢𑁄. 𑀘𑀓𑁆𑀔𑀼𑀭𑁄𑀕𑁂𑀦𑀧𑀺 𑀳𑀺 𑀲𑀢𑁆𑀢𑀸 𑀫𑀭𑀦𑁆𑀢𑀺 𑀲𑁄𑀢𑀭𑁄𑀕𑀸𑀤𑀻𑀦𑀁 𑀅𑀜𑁆𑀜𑀢𑀭𑁂𑀦𑀧𑀺. 𑀓𑀸𑀮𑁄𑀧𑀺, ‘‘𑀇𑀫𑀲𑁆𑀫𑀺𑀁 𑀬𑁂𑀯 𑀓𑀸𑀮𑁂 𑀫𑀭𑀺𑀢𑀩𑁆𑀩𑀁, 𑀦 𑀅𑀜𑁆𑀜𑀲𑁆𑀫𑀺’’𑀦𑁆𑀢𑀺 𑀏𑀯𑀁 𑀯𑀯𑀢𑁆𑀣𑀸𑀦𑀸𑀪𑀸𑀯𑀢𑁄 𑀅𑀦𑀺𑀫𑀺𑀢𑁆𑀢𑁄. 𑀧𑀼𑀩𑁆𑀩𑀡𑁆𑀳𑁂𑀧𑀺 𑀳𑀺 𑀲𑀢𑁆𑀢𑀸 𑀫𑀭𑀦𑁆𑀢𑀺 𑀫𑀚𑁆𑀛𑀦𑁆𑀳𑀺𑀓𑀸𑀤𑀻𑀦𑀁 𑀅𑀜𑁆𑀜𑀢𑀭𑀲𑁆𑀫𑀺𑀫𑁆𑀧𑀺. 𑀤𑁂𑀳𑀦𑀺𑀓𑁆𑀔𑁂𑀧𑀦𑀫𑁆𑀧𑀺, ‘‘𑀇𑀥𑁂𑀯 𑀫𑀻𑀬𑀫𑀸𑀦𑀸𑀦𑀁 𑀤𑁂𑀳𑁂𑀦 𑀧𑀢𑀺𑀢𑀩𑁆𑀩𑀁, 𑀦 𑀅𑀜𑁆𑀜𑀢𑁆𑀣𑀸’’𑀢𑀺 𑀏𑀯𑀁 𑀯𑀯𑀢𑁆𑀣𑀸𑀦𑀸𑀪𑀸𑀯𑀢𑁄 𑀅𑀦𑀺𑀫𑀺𑀢𑁆𑀢𑀁. 𑀅𑀦𑁆𑀢𑁄𑀕𑀸𑀫𑁂 𑀚𑀸𑀢𑀸𑀦𑀜𑁆𑀳𑀺 𑀩𑀳𑀺𑀕𑀸𑀫𑁂𑀧𑀺 𑀅𑀢𑁆𑀢𑀪𑀸𑀯𑁄 𑀧𑀢𑀢𑀺, 𑀩𑀳𑀺𑀕𑀸𑀫𑁂𑀧𑀺 𑀚𑀸𑀢𑀸𑀦𑀁 𑀅𑀦𑁆𑀢𑁄𑀕𑀸𑀫𑁂𑀧𑀺. 𑀢𑀣𑀸 𑀣𑀮𑀚𑀸𑀦𑀁 𑀚𑀮𑁂, 𑀚𑀮𑀚𑀸𑀦𑀁 𑀣𑀮𑁂𑀢𑀺 𑀅𑀦𑁂𑀓𑀧𑁆𑀧𑀓𑀸𑀭𑀢𑁄 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀕𑀢𑀺𑀧𑀺, ‘‘𑀇𑀢𑁄 𑀘𑀼𑀢𑁂𑀦 𑀇𑀥 𑀦𑀺𑀩𑁆𑀩𑀢𑁆𑀢𑀺𑀢𑀩𑁆𑀩’’𑀦𑁆𑀢𑀺 𑀏𑀯𑀁 𑀯𑀯𑀢𑁆𑀣𑀸𑀦𑀸𑀪𑀸𑀯𑀢𑁄 𑀅𑀦𑀺𑀫𑀺𑀢𑁆𑀢𑀸. 𑀤𑁂𑀯𑀮𑁄𑀓𑀢𑁄 𑀳𑀺 𑀘𑀼𑀢𑀸 𑀫𑀦𑀼𑀲𑁆𑀲𑁂𑀲𑀼𑀧𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀫𑀦𑀼𑀲𑁆𑀲𑀮𑁄𑀓𑀢𑁄 𑀘𑀼𑀢𑀸 𑀤𑁂𑀯𑀮𑁄𑀓𑀸𑀤𑀻𑀦𑀁 𑀬𑀢𑁆𑀣 𑀓𑀢𑁆𑀣𑀘𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀻𑀢𑀺 𑀏𑀯𑀁 𑀬𑀦𑁆𑀢𑁂 𑀬𑀼𑀢𑁆𑀢𑀕𑁄𑀡𑁄 𑀯𑀺𑀬 𑀕𑀢𑀺𑀧𑀜𑁆𑀘𑀓𑁂 𑀮𑁄𑀓𑁄 𑀲𑀫𑁆𑀧𑀭𑀺𑀯𑀢𑁆𑀢𑀢𑀺. 𑀢𑀲𑁆𑀲𑁂𑀯𑀁 𑀲𑀫𑁆𑀧𑀭𑀺𑀯𑀢𑁆𑀢𑀢𑁄 ‘‘𑀇𑀫𑀲𑁆𑀫𑀺𑀁 𑀦𑀸𑀫 𑀓𑀸𑀮𑁂 𑀫𑀭𑀡𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀇𑀫𑀁 𑀫𑀭𑀡𑀲𑁆𑀲 𑀓𑀸𑀮𑀁 𑀯𑁄𑀳𑀁 𑀦 𑀚𑀸𑀦𑀸𑀫𑀺.

𑀙𑀦𑁆𑀦𑁄 𑀓𑀸𑀮𑁄 𑀦 𑀤𑀺𑀲𑁆𑀲𑀢𑀻𑀢𑀺 𑀅𑀬𑀁 𑀓𑀸𑀮𑁄 𑀫𑀬𑁆𑀳𑀁 𑀧𑀝𑀺𑀘𑁆𑀙𑀦𑁆𑀦𑁄 𑀅𑀯𑀺𑀪𑀽𑀢𑁄 𑀦 𑀧𑀜𑁆𑀜𑀸𑀬𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀅𑀬𑀁 𑀓𑀸𑀮𑁄 𑀧𑀝𑀺𑀘𑁆𑀙𑀦𑁆𑀦𑁄 𑀦 𑀧𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀅𑀪𑀼𑀢𑁆𑀯𑀸𑀯 𑀪𑀺𑀓𑁆𑀔𑀸𑀫𑀺. 𑀫𑀸 𑀫𑀁 𑀓𑀸𑀮𑁄 𑀉𑀧𑀘𑁆𑀘𑀕𑀸𑀢𑀺 𑀏𑀢𑁆𑀣 𑀲𑀫𑀡𑀥𑀫𑁆𑀫𑀓𑀭𑀡𑀓𑀸𑀮𑀁 𑀲𑀦𑁆𑀥𑀸𑀬 ‘‘𑀓𑀸𑀮𑁄’’𑀢𑀺 𑀆𑀳. 𑀅𑀬𑀜𑁆𑀳𑀺 𑀲𑀫𑀡𑀥𑀫𑁆𑀫𑁄 𑀦𑀸𑀫 𑀧𑀘𑁆𑀙𑀺𑀫𑁂 𑀓𑀸𑀮𑁂 𑀢𑀺𑀲𑁆𑀲𑁄 𑀯𑀬𑁄𑀲𑀻𑀫𑀸 𑀅𑀢𑀺𑀓𑁆𑀓𑀦𑁆𑀢𑁂𑀦 𑀑𑀪𑀕𑁆𑀕𑁂𑀦 𑀤𑀡𑁆𑀟𑀧𑀭𑀸𑀬𑀡𑁂𑀦 𑀧𑀯𑁂𑀥𑀫𑀸𑀦𑁂𑀦 𑀓𑀸𑀲𑀲𑀸𑀲𑀸𑀪𑀺𑀪𑀽𑀢𑁂𑀦 𑀦 𑀲𑀓𑁆𑀓𑀸 𑀓𑀸𑀢𑀼𑀁. 𑀢𑀤𑀸 𑀳𑀺 𑀦 𑀲𑀓𑁆𑀓𑀸 𑀳𑁄𑀢𑀺 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀁 𑀩𑀼𑀤𑁆𑀥𑀯𑀘𑀦𑀁 𑀯𑀸 𑀕𑀡𑁆𑀳𑀺𑀢𑀼𑀁, 𑀥𑀼𑀢𑀗𑁆𑀕𑀁 𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁, 𑀅𑀭𑀜𑁆𑀜𑀯𑀸𑀲𑀁 𑀯𑀸 𑀯𑀲𑀺𑀢𑀼𑀁, 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂 𑀲𑀫𑀸𑀧𑀢𑁆𑀢𑀺𑀁 𑀯𑀸 𑀲𑀫𑀸𑀧𑀚𑁆𑀚𑀺𑀢𑀼𑀁, 𑀧𑀤𑀪𑀸𑀡-𑀲𑀭𑀪𑀜𑁆𑀜𑀥𑀫𑁆𑀫𑀓𑀣𑀸-𑀅𑀦𑀼𑀫𑁄𑀤𑀦𑀸𑀤𑀻𑀦𑀺 𑀯𑀸 𑀓𑀸𑀢𑀼𑀁, 𑀢𑀭𑀼𑀡𑀬𑁄𑀩𑁆𑀩𑀦𑀓𑀸𑀮𑁂 𑀧𑀦𑁂𑀢𑀁 𑀲𑀩𑁆𑀩𑀁 𑀲𑀓𑁆𑀓𑀸 𑀓𑀸𑀢𑀼𑀦𑁆𑀢𑀺 𑀅𑀬𑀁 𑀲𑀫𑀡𑀥𑀫𑁆𑀫𑀓𑀭𑀡𑀲𑁆𑀲 𑀓𑀸𑀮𑁄 𑀫𑀸 𑀫𑀁 𑀉𑀧𑀘𑁆𑀘𑀕𑀸, 𑀬𑀸𑀯 𑀫𑀁 𑀦𑀸𑀢𑀺𑀓𑁆𑀓𑀫𑀢𑀺, 𑀢𑀸𑀯 𑀓𑀸𑀫𑁂 𑀅𑀪𑀼𑀢𑁆𑀯𑀸𑀯 𑀲𑀫𑀡𑀥𑀫𑁆𑀫𑀁 𑀓𑀭𑁄𑀫𑀻𑀢𑀺 𑀆𑀳.

𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀳𑀺𑀢𑁆𑀯𑀸𑀢𑀺 𑀲𑀸 𑀓𑀺𑀭 𑀤𑁂𑀯𑀢𑀸 𑁋 ‘‘𑀅𑀬𑀁 𑀪𑀺𑀓𑁆𑀔𑀼 𑀲𑀫𑀡𑀥𑀫𑁆𑀫𑀓𑀭𑀡𑀲𑁆𑀲 𑀓𑀸𑀮𑀁 𑀦𑀸𑀫 𑀓𑀣𑁂𑀢𑀺, 𑀅𑀓𑀸𑀮𑀁 𑀦𑀸𑀫 𑀓𑀣𑁂𑀢𑀺, 𑀲𑀳𑁂𑀢𑀼𑀓𑀁 𑀓𑀣𑁂𑀢𑀺 𑀲𑀸𑀦𑀺𑀲𑀁𑀲’’𑀦𑁆𑀢𑀺 𑀏𑀢𑁆𑀢𑀸𑀯𑀢𑀸𑀯 𑀣𑁂𑀭𑁂 𑀮𑀚𑁆𑀚𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑁆𑀯𑀸 𑀫𑀳𑀸𑀩𑁆𑀭𑀳𑁆𑀫𑀁 𑀯𑀺𑀬 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀯𑀺𑀬 𑀘 𑀦𑀁 𑀫𑀜𑁆𑀜𑀫𑀸𑀦𑀸 𑀕𑀸𑀭𑀯𑀚𑀸𑀢𑀸 𑀆𑀓𑀸𑀲𑀸 𑀑𑀭𑀼𑀬𑁆𑀳 𑀧𑀣𑀯𑀺𑀬𑀁 𑀅𑀝𑁆𑀞𑀸𑀲𑀺, 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑀸𑀧𑀺 𑀧𑀣𑀯𑀺𑀬𑀁 𑀞𑀺𑀢𑀸, 𑀬𑁂𑀦 𑀧𑀦𑀢𑁆𑀣𑁂𑀦 𑀆𑀕𑀢𑀸, 𑀧𑀼𑀦𑀧𑀺 𑀢𑀫𑁂𑀯 𑀕𑀳𑁂𑀢𑁆𑀯𑀸 𑀤𑀳𑀭𑁄 𑀢𑁆𑀯𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀼𑀲𑀽𑀢𑀺 𑀢𑀭𑀼𑀡𑁄. 𑀓𑀸𑀴𑀓𑁂𑀲𑁄𑀢𑀺 𑀲𑀼𑀝𑁆𑀞𑀼 𑀓𑀸𑀴𑀓𑁂𑀲𑁄. 𑀪𑀤𑁆𑀭𑁂𑀦𑀸𑀢𑀺 𑀪𑀤𑁆𑀤𑀓𑁂𑀦. 𑀏𑀓𑀘𑁆𑀘𑁄 𑀳𑀺 𑀤𑀳𑀭𑁄𑀧𑀺 𑀲𑀫𑀸𑀦𑁄 𑀓𑀸𑀡𑁄 𑀯𑀸 𑀳𑁄𑀢𑀺 𑀓𑀼𑀡𑀺𑀆𑀤𑀻𑀦𑀁 𑀯𑀸 𑀅𑀜𑁆𑀜𑀢𑀭𑁄, 𑀲𑁄 𑀪𑀤𑁆𑀭𑁂𑀦 𑀬𑁄𑀩𑁆𑀩𑀦𑁂𑀦 𑀲𑀫𑀦𑁆𑀦𑀸𑀕𑀢𑁄 𑀦𑀸𑀫 𑀦 𑀳𑁄𑀢𑀺. 𑀬𑁄 𑀧𑀦 𑀅𑀪𑀺𑀭𑀽𑀧𑁄 𑀳𑁄𑀢𑀺 𑀤𑀲𑁆𑀲𑀦𑀻𑀬𑁄 𑀧𑀸𑀲𑀸𑀤𑀺𑀓𑁄 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀲𑀫𑁆𑀧𑀦𑁆𑀦𑁄, 𑀬𑀁 𑀬𑀤𑁂𑀯 𑀅𑀮𑀗𑁆𑀓𑀸𑀭𑀧𑀭𑀺𑀳𑀸𑀭𑀁 𑀇𑀘𑁆𑀙𑀢𑀺, 𑀢𑁂𑀦 𑀢𑁂𑀦 𑀅𑀮𑀗𑁆𑀓𑀢𑁄 𑀤𑁂𑀯𑀧𑀼𑀢𑁆𑀢𑁄 𑀯𑀺𑀬 𑀘𑀭𑀢𑀺, 𑀅𑀬𑀁 𑀪𑀤𑁆𑀭𑁂𑀦 𑀬𑁄𑀩𑁆𑀩𑀦𑁂𑀦 𑀲𑀫𑀦𑁆𑀦𑀸𑀕𑀢𑁄 𑀦𑀸𑀫 𑀳𑁄𑀢𑀺. 𑀣𑁂𑀭𑁄 𑀘 𑀉𑀢𑁆𑀢𑀫𑀭𑀽𑀧𑀲𑀫𑁆𑀧𑀦𑁆𑀦𑁄, 𑀢𑁂𑀦 𑀦𑀁 𑀏𑀯𑀫𑀸𑀳.

𑀅𑀦𑀺𑀓𑁆𑀓𑀻𑀴𑀺𑀢𑀸𑀯𑀻 𑀓𑀸𑀫𑁂𑀲𑀽𑀢𑀺 𑀓𑀸𑀫𑁂𑀲𑀼 𑀅𑀓𑀻𑀴𑀺𑀢𑀓𑀻𑀴𑁄 𑀅𑀪𑀼𑀢𑁆𑀢𑀸𑀯𑀻, 𑀅𑀓𑀢𑀓𑀸𑀫𑀓𑀻𑀴𑁄𑀢𑀺 𑀅𑀢𑁆𑀣𑁄. 𑀫𑀸 𑀲𑀦𑁆𑀤𑀺𑀝𑁆𑀞𑀺𑀓𑀁 𑀳𑀺𑀢𑁆𑀯𑀸𑀢𑀺 𑀬𑁂𑀪𑀼𑀬𑁆𑀬𑁂𑀦 𑀳𑀺 𑀢𑀸 𑀅𑀤𑀺𑀝𑁆𑀞𑀲𑀘𑁆𑀘𑀸 𑀅𑀯𑀻𑀢𑀭𑀸𑀕𑀸 𑀅𑀧𑀭𑀘𑀺𑀢𑁆𑀢𑀯𑀺𑀤𑀽𑀦𑀺𑀬𑁄 𑀤𑁂𑀯𑀢𑀸 𑀪𑀺𑀓𑁆𑀔𑀽 𑀤𑀲𑀧𑀺 𑀯𑀲𑁆𑀲𑀸𑀦𑀺 𑀯𑀻𑀲𑀢𑀺𑀫𑁆𑀧𑀺…𑀧𑁂… 𑀲𑀝𑁆𑀞𑀺𑀫𑁆𑀧𑀺 𑀯𑀲𑁆𑀲𑀸𑀦𑀺 𑀧𑀭𑀺𑀲𑀼𑀤𑁆𑀥𑀁 𑀅𑀔𑀡𑁆𑀟𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀫𑀸𑀦𑁂 𑀤𑀺𑀲𑁆𑀯𑀸 𑁋 ‘‘𑀇𑀫𑁂 𑀪𑀺𑀓𑁆𑀔𑀽 𑀫𑀸𑀦𑀼𑀲𑀓𑁂 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀧𑀳𑀸𑀬 𑀤𑀺𑀩𑁆𑀩𑁂 𑀓𑀸𑀫𑁂 𑀧𑀢𑁆𑀣𑀬𑀦𑁆𑀢𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑀻’’𑀢𑀺 𑀲𑀜𑁆𑀜𑀁 𑀉𑀧𑁆𑀧𑀸𑀤𑁂𑀦𑁆𑀢𑀺, 𑀅𑀬𑀫𑁆𑀧𑀺 𑀢𑀢𑁆𑀣𑁂𑀯 𑀉𑀧𑁆𑀧𑀸𑀤𑁂𑀲𑀺. 𑀢𑀲𑁆𑀫𑀸 𑀫𑀸𑀦𑀼𑀲𑀓𑁂 𑀓𑀸𑀫𑁂 𑀲𑀦𑁆𑀤𑀺𑀝𑁆𑀞𑀺𑀓𑁂, 𑀤𑀺𑀩𑁆𑀩𑁂 𑀘 𑀓𑀸𑀮𑀺𑀓𑁂 𑀓𑀢𑁆𑀯𑀸 𑀏𑀯𑀫𑀸𑀳.

𑀦 𑀔𑁄 𑀅𑀳𑀁, 𑀆𑀯𑀼𑀲𑁄𑀢𑀺, 𑀆𑀯𑀼𑀲𑁄, 𑀅𑀳𑀁 𑀲𑀦𑁆𑀤𑀺𑀝𑁆𑀞𑀺𑀓𑁂 𑀓𑀸𑀫𑁂 𑀳𑀺𑀢𑁆𑀯𑀸 𑀓𑀸𑀮𑀺𑀓𑁂 𑀓𑀸𑀫𑁂 𑀦 𑀅𑀦𑀼𑀥𑀸𑀯𑀸𑀫𑀺 𑀦 𑀧𑀢𑁆𑀣𑁂𑀫𑀺 𑀦 𑀧𑀺𑀳𑁂𑀫𑀺. 𑀓𑀮𑀺𑀓𑀜𑁆𑀘 𑀔𑁄 𑀅𑀳𑀁, 𑀆𑀯𑀼𑀲𑁄𑀢𑀺 𑀅𑀳𑀁 𑀔𑁄, 𑀆𑀯𑀼𑀲𑁄, 𑀓𑀸𑀮𑀺𑀓𑀁 𑀓𑀸𑀫𑀁 𑀳𑀺𑀢𑁆𑀯𑀸 𑀲𑀦𑁆𑀤𑀺𑀝𑁆𑀞𑀺𑀓𑀁 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀅𑀦𑀼𑀥𑀸𑀯𑀸𑀫𑀺. 𑀇𑀢𑀺 𑀣𑁂𑀭𑁄 𑀘𑀺𑀢𑁆𑀢𑀸𑀦𑀦𑁆𑀢𑀭𑀁 𑀅𑀮𑀤𑁆𑀥𑀩𑁆𑀩𑀢𑀸𑀬 𑀤𑀺𑀩𑁆𑀩𑁂𑀧𑀺 𑀫𑀸𑀦𑀼𑀲𑀓𑁂𑀧𑀺 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀓𑀸𑀮𑀺𑀓𑀸𑀢𑀺 𑀅𑀓𑀸𑀲𑀺, 𑀘𑀺𑀢𑁆𑀢𑀸𑀦𑀦𑁆𑀢𑀭𑀁 𑀮𑀤𑁆𑀥𑀩𑁆𑀩𑀢𑀸𑀬 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀲𑀦𑁆𑀤𑀺𑀝𑁆𑀞𑀺𑀓𑀦𑁆𑀢𑀺. 𑀧𑀜𑁆𑀘𑀓𑀸𑀫𑀕𑀼𑀡𑁂𑀲𑀼 𑀲𑀫𑁄𑀳𑀺𑀢𑁂𑀲𑀼𑀧𑀺 𑀲𑀫𑁆𑀧𑀦𑁆𑀦𑀓𑀸𑀫𑀲𑁆𑀲𑀸𑀧𑀺 𑀓𑀸𑀫𑀺𑀦𑁄 𑀘𑀺𑀢𑁆𑀢𑀸𑀦𑀦𑁆𑀢𑀭𑀁 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀸𑀭𑀫𑁆𑀫𑀡𑀸𑀦𑀼𑀪𑀯𑀦𑀁 𑀦 𑀲𑀫𑁆𑀧𑀚𑁆𑀚𑀢𑀺. 𑀘𑀓𑁆𑀔𑀼𑀤𑁆𑀯𑀸𑀭𑁂 𑀇𑀝𑁆𑀞𑀸𑀭𑀫𑁆𑀫𑀡𑀁 𑀅𑀦𑀼𑀪𑀯𑀺𑀢𑀼𑀓𑀸𑀫𑁂𑀦 𑀳𑀺 𑀘𑀺𑀢𑁆𑀢𑀓𑀸𑀭𑀧𑁄𑀢𑁆𑀣𑀓𑀸𑀭𑀭𑀽𑀧𑀓𑀸𑀭𑀸𑀤𑀬𑁄 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸, ‘‘𑀇𑀤𑀁 𑀦𑀸𑀫 𑀲𑀚𑁆𑀚𑁂𑀣𑀸’’𑀢𑀺 𑀯𑀢𑁆𑀢𑀩𑁆𑀩𑀁 𑀳𑁄𑀢𑀺. 𑀏𑀢𑁆𑀣𑀦𑁆𑀢𑀭𑁂 𑀅𑀦𑁂𑀓𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀺 𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀅𑀣 𑀧𑀘𑁆𑀙𑀸 𑀢𑀁 𑀆𑀭𑀫𑁆𑀫𑀡𑀁 𑀲𑀫𑁆𑀧𑀸𑀧𑀼𑀡𑀸𑀢𑀺. 𑀲𑁂𑀲𑀤𑁆𑀯𑀸𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀸𑀦𑀦𑁆𑀢𑀭𑀁 𑀧𑀦 𑀲𑁄𑀢𑀸𑀧𑀢𑁆𑀢𑀺𑀨𑀮𑀫𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀅𑀦𑁆𑀢𑀭𑀸 𑀅𑀜𑁆𑀜𑀲𑁆𑀲 𑀘𑀺𑀢𑁆𑀢𑀲𑁆𑀲 𑀯𑀸𑀭𑁄 𑀦𑀢𑁆𑀣𑀺. 𑀲𑁂𑀲𑀨𑀮𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄𑀢𑀺.

𑀲𑁄 𑀢𑀫𑁂𑀯𑀢𑁆𑀣𑀁 𑀕𑀳𑁂𑀢𑁆𑀯𑀸 𑀓𑀸𑀮𑀺𑀓𑀸 𑀳𑀺, 𑀆𑀯𑀼𑀲𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀸𑀮𑀺𑀓𑀸𑀢𑀺 𑀯𑀼𑀢𑁆𑀢𑀦𑀬𑁂𑀦 𑀲𑀫𑁄𑀳𑀺𑀢𑀲𑀫𑁆𑀧𑀢𑁆𑀢𑀺𑀦𑀸𑀧𑀺 𑀓𑀸𑀮𑀦𑁆𑀢𑀭𑁂 𑀧𑀢𑁆𑀢𑀩𑁆𑀩𑀸. 𑀩𑀳𑀼𑀤𑀼𑀓𑁆𑀔𑀸𑀢𑀺 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀦𑀺𑀲𑁆𑀲𑀸𑀬 𑀧𑀢𑁆𑀢𑀩𑁆𑀩𑀤𑀼𑀓𑁆𑀔𑀲𑁆𑀲 𑀩𑀳𑀼𑀢𑀸𑀬 𑀩𑀳𑀼𑀤𑀼𑀓𑁆𑀔𑀸. 𑀢𑀁𑀯𑀢𑁆𑀣𑀼𑀓𑀲𑁆𑀲𑁂𑀯 𑀉𑀧𑀸𑀬𑀸𑀲𑀲𑁆𑀲 𑀩𑀳𑀼𑀢𑀸𑀬 𑀩𑀳𑀼𑀧𑀸𑀬𑀸𑀲𑀸. 𑀆𑀤𑀻𑀦𑀯𑁄 𑀏𑀢𑁆𑀣 𑀪𑀺𑀬𑁆𑀬𑁄𑀢𑀺 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀦𑀺𑀲𑁆𑀲𑀸𑀬 𑀮𑀤𑁆𑀥𑀩𑁆𑀩𑀲𑀼𑀔𑀢𑁄 𑀆𑀤𑀻𑀦𑀯𑁄 𑀪𑀺𑀬𑁆𑀬𑁄, 𑀤𑀼𑀓𑁆𑀔𑀫𑁂𑀯 𑀩𑀳𑀼𑀢𑀭𑀦𑁆𑀢𑀺 𑀅𑀢𑁆𑀣𑁄. 𑀲𑀦𑁆𑀤𑀺𑀝𑁆𑀞𑀺𑀓𑁄 𑀅𑀬𑀁 𑀥𑀫𑁆𑀫𑁄𑀢𑀺 𑀅𑀬𑀁 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀬𑁂𑀦 𑀬𑁂𑀦 𑀅𑀥𑀺𑀕𑀢𑁄 𑀳𑁄𑀢𑀺, 𑀢𑁂𑀦 𑀢𑁂𑀦 𑀧𑀭𑀲𑀤𑁆𑀥𑀸𑀬 𑀕𑀦𑁆𑀢𑀩𑁆𑀩𑀢𑀁 𑀳𑀺𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑁂𑀦 𑀲𑀬𑀁 𑀤𑀝𑁆𑀞𑀩𑁆𑀩𑁄𑀢𑀺 𑀲𑀦𑁆𑀤𑀺𑀝𑁆𑀞𑀺𑀓𑁄. 𑀅𑀢𑁆𑀢𑀦𑁄 𑀨𑀮𑀤𑀸𑀦𑀁 𑀲𑀦𑁆𑀥𑀸𑀬 𑀦𑀸𑀲𑁆𑀲 𑀓𑀸𑀮𑁄𑀢𑀺 𑀅𑀓𑀸𑀮𑁄, 𑀅𑀓𑀸𑀮𑁄𑀬𑁂𑀯 𑀅𑀓𑀸𑀮𑀺𑀓𑁄. 𑀬𑁄 𑀏𑀢𑁆𑀣 𑀅𑀭𑀺𑀬𑀫𑀕𑁆𑀕𑀥𑀫𑁆𑀫𑁄, 𑀲𑁄 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀲𑀫𑀦𑀦𑁆𑀢𑀭𑀫𑁂𑀯 𑀨𑀮𑀁 𑀤𑁂𑀢𑀻𑀢𑀺 𑀅𑀢𑁆𑀣𑁄. ‘‘𑀏𑀳𑀺 𑀧𑀲𑁆𑀲 𑀇𑀫𑀁 𑀥𑀫𑁆𑀫’’𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑀁 𑀏𑀳𑀺𑀧𑀲𑁆𑀲𑀯𑀺𑀥𑀺𑀁 𑀅𑀭𑀳𑀢𑀻𑀢𑀺 𑀏𑀳𑀺𑀧𑀲𑁆𑀲𑀺𑀓𑁄. 𑀆𑀤𑀺𑀢𑁆𑀢𑀁 𑀘𑁂𑀮𑀁 𑀯𑀸 𑀲𑀻𑀲𑀁 𑀯𑀸 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑁆𑀯𑀸𑀧𑀺 𑀪𑀸𑀯𑀦𑀸𑀯𑀲𑁂𑀦 𑀅𑀢𑁆𑀢𑀦𑁄 𑀘𑀺𑀢𑁆𑀢𑁂 𑀉𑀧𑀦𑀬𑀁 𑀅𑀭𑀳𑀢𑀻𑀢𑀺 𑀑𑀧𑀦𑁂𑀬𑁆𑀬𑀺𑀓𑁄. 𑀲𑀩𑁆𑀩𑁂𑀳𑀺 𑀉𑀕𑁆𑀖𑀝𑀺𑀢𑀜𑁆𑀜𑀽𑀆𑀤𑀻𑀳𑀺 𑀯𑀺𑀜𑁆𑀜𑀽𑀳𑀺 ‘‘𑀪𑀸𑀯𑀺𑀢𑁄 𑀫𑁂 𑀫𑀕𑁆𑀕𑁄, 𑀅𑀥𑀺𑀕𑀢𑀁 𑀨𑀮𑀁, 𑀲𑀘𑁆𑀙𑀺𑀓𑀢𑁄 𑀦𑀺𑀭𑁄𑀥𑁄’’𑀢𑀺 𑀅𑀢𑁆𑀢𑀦𑀺 𑀅𑀢𑁆𑀢𑀦𑀺 𑀯𑁂𑀤𑀺𑀢𑀩𑁆𑀩𑁄𑀢𑀺 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑁄 𑀯𑀺𑀜𑁆𑀜𑀽𑀳𑀻𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁧𑁪𑁬 𑀆𑀤𑀬𑁄) 𑀥𑀫𑁆𑀫𑀸𑀦𑀼𑀲𑁆𑀲𑀢𑀺𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑁄.

𑀇𑀤𑀸𑀦𑀺 𑀲𑀸 𑀤𑁂𑀯𑀢𑀸 𑀅𑀦𑁆𑀥𑁄 𑀯𑀺𑀬 𑀭𑀽𑀧𑀯𑀺𑀲𑁂𑀲𑀁 𑀣𑁂𑀭𑁂𑀦 𑀓𑀣𑀺𑀢𑀲𑁆𑀲 𑀅𑀢𑁆𑀣𑁂 𑀅𑀚𑀸𑀦𑀦𑁆𑀢𑀻 𑀓𑀣𑀜𑁆𑀘 𑀪𑀺𑀓𑁆𑀔𑀽𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀣𑀜𑁆𑀘𑀸𑀢𑀺𑀧𑀤𑀲𑁆𑀲 ‘‘𑀓𑀣𑀜𑁆𑀘 𑀪𑀺𑀓𑁆𑀔𑀼 𑀓𑀸𑀮𑀺𑀓𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸, 𑀓𑀣𑀁 𑀩𑀳𑀼𑀤𑀼𑀓𑁆𑀔𑀸, 𑀓𑀣𑀁 𑀩𑀳𑀼𑀧𑀸𑀬𑀸𑀲𑀸’’𑀢𑀺? 𑀏𑀯𑀁 𑀲𑀩𑁆𑀩𑀧𑀤𑁂𑀳𑀺 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄.

𑀦𑀯𑁄𑀢𑀺 𑀅𑀧𑀭𑀺𑀧𑀼𑀡𑁆𑀡𑀧𑀜𑁆𑀘𑀯𑀲𑁆𑀲𑁄 𑀳𑀺 𑀪𑀺𑀓𑁆𑀔𑀼 𑀦𑀯𑁄 𑀦𑀸𑀫 𑀳𑁄𑀢𑀺, 𑀧𑀜𑁆𑀘𑀯𑀲𑁆𑀲𑀢𑁄 𑀧𑀝𑁆𑀞𑀸𑀬 𑀫𑀚𑁆𑀛𑀺𑀫𑁄, 𑀤𑀲𑀯𑀲𑁆𑀲𑀢𑁄 𑀧𑀝𑁆𑀞𑀸𑀬 𑀣𑁂𑀭𑁄. 𑀅𑀧𑀭𑁄 𑀦𑀬𑁄 𑁋 𑀅𑀧𑀭𑀺𑀧𑀼𑀡𑁆𑀡𑀤𑀲𑀯𑀲𑁆𑀲𑁄 𑀦𑀯𑁄, 𑀤𑀲𑀯𑀲𑁆𑀲𑀢𑁄 𑀧𑀝𑁆𑀞𑀸𑀬 𑀫𑀚𑁆𑀛𑀺𑀫𑁄, 𑀯𑀻𑀲𑀢𑀺𑀯𑀲𑁆𑀲𑀢𑁄 𑀧𑀝𑁆𑀞𑀸𑀬 𑀣𑁂𑀭𑁄. 𑀢𑁂𑀲𑀁 𑀅𑀳𑀁 𑀦𑀯𑁄𑀢𑀺 𑀯𑀤𑀢𑀺.

𑀦𑀯𑁄𑀧𑀺 𑀏𑀓𑀘𑁆𑀘𑁄 𑀲𑀢𑁆𑀢𑀝𑁆𑀞𑀯𑀲𑁆𑀲𑀓𑀸𑀮𑁂 𑀧𑀩𑁆𑀩𑀚𑀺𑀢𑁆𑀯𑀸 𑀤𑁆𑀯𑀸𑀤𑀲𑀢𑁂𑀭𑀲𑀯𑀲𑁆𑀲𑀸𑀦𑀺 𑀲𑀸𑀫𑀡𑁂𑀭𑀪𑀸𑀯𑁂𑀦𑁂𑀯 𑀅𑀢𑀺𑀓𑁆𑀓𑀦𑁆𑀢𑁄 𑀘𑀺𑀭𑀧𑀩𑁆𑀩𑀚𑀺𑀢𑁄 𑀳𑁄𑀢𑀺, 𑀅𑀳𑀁 𑀧𑀦 𑀅𑀘𑀺𑀭𑀧𑀩𑁆𑀩𑀚𑀺𑀢𑁄𑀢𑀺 𑀯𑀤𑀢𑀺. 𑀇𑀫𑀁 𑀥𑀫𑁆𑀫𑀯𑀺𑀦𑀬𑀦𑁆𑀢𑀺 𑀇𑀫𑀁 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘. 𑀉𑀪𑀬𑀫𑁆𑀧𑁂𑀢𑀁 𑀲𑀸𑀲𑀦𑀲𑁆𑀲𑁂𑀯 𑀦𑀸𑀫𑀁. 𑀥𑀫𑁆𑀫𑁂𑀦 𑀳𑁂𑀢𑁆𑀣 𑀤𑁆𑀯𑁂 𑀧𑀺𑀝𑀓𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀯𑀺𑀦𑀬𑁂𑀦 𑀯𑀺𑀦𑀬𑀧𑀺𑀝𑀓𑀁, 𑀇𑀢𑀺 𑀢𑀻𑀳𑀺 𑀧𑀺𑀝𑀓𑁂𑀳𑀺 𑀧𑀓𑀸𑀲𑀺𑀢𑀁 𑀧𑀝𑀺𑀧𑀢𑁆𑀢𑀺𑀁 𑀅𑀥𑀼𑀦𑀸 𑀆𑀕𑀢𑁄𑀫𑁆𑀳𑀻𑀢𑀺 𑀯𑀤𑀢𑀺.

𑀫𑀳𑁂𑀲𑀓𑁆𑀔𑀸𑀳𑀻𑀢𑀺 𑀫𑀳𑀸𑀧𑀭𑀺𑀯𑀸𑀭𑀸𑀳𑀺. 𑀏𑀓𑁂𑀓𑀲𑁆𑀲 𑀳𑀺 𑀤𑁂𑀯𑀭𑀜𑁆𑀜𑁄 𑀓𑁄𑀝𑀺𑀲𑀢𑀫𑁆𑀧𑀺 𑀓𑁄𑀝𑀺𑀲𑀳𑀲𑁆𑀲𑀫𑁆𑀧𑀺 𑀧𑀭𑀺𑀯𑀸𑀭𑁄 𑀳𑁄𑀢𑀺, 𑀢𑁂 𑀅𑀢𑁆𑀢𑀸𑀦𑀁 𑀫𑀳𑀦𑁆𑀢𑁂 𑀞𑀸𑀦𑁂 𑀞𑀧𑁂𑀢𑁆𑀯𑀸 𑀢𑀣𑀸𑀕𑀢𑀁 𑀧𑀲𑁆𑀲𑀦𑁆𑀢𑀺. 𑀢𑀢𑁆𑀣 𑀅𑀫𑁆𑀳𑀸𑀤𑀺𑀲𑀸𑀦𑀁 𑀅𑀧𑁆𑀧𑁂𑀲𑀓𑁆𑀔𑀸𑀦𑀁 𑀫𑀸𑀢𑀼𑀕𑀸𑀫𑀚𑀸𑀢𑀺𑀓𑀸𑀦𑀁 𑀓𑀼𑀢𑁄 𑀑𑀓𑀸𑀲𑁄𑀢𑀺 𑀤𑀲𑁆𑀲𑁂𑀢𑀺.

𑀫𑀬𑀫𑁆𑀧𑀺 𑀆𑀕𑀘𑁆𑀙𑁂𑀬𑁆𑀬𑀸𑀫𑀸𑀢𑀺 𑀇𑀤𑀁 𑀲𑀸 𑀤𑁂𑀯𑀢𑀸 ‘‘𑀲𑀘𑁂𑀧𑀺 𑀘𑀓𑁆𑀓𑀯𑀸𑀴𑀁 𑀧𑀽𑀭𑁂𑀢𑁆𑀯𑀸 𑀧𑀭𑀺𑀲𑀸 𑀦𑀺𑀲𑀺𑀦𑁆𑀦𑀸 𑀳𑁄𑀢𑀺, 𑀫𑀳𑀢𑀺𑀬𑀸 𑀩𑀼𑀤𑁆𑀥𑀯𑀻𑀣𑀺𑀬𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑀼𑀁 𑀮𑀪𑀢𑀻’’𑀢𑀺 𑀜𑀢𑁆𑀯𑀸 𑀆𑀳. 𑀧𑀼𑀘𑁆𑀙 𑀪𑀺𑀓𑁆𑀔𑀼, 𑀧𑀼𑀘𑁆𑀙 𑀪𑀺𑀓𑁆𑀔𑀽𑀢𑀺 𑀣𑀺𑀭𑀓𑀭𑀡𑀯𑀲𑁂𑀦 𑀆𑀫𑁂𑀟𑀺𑀢𑀁 𑀓𑀢𑀁.

𑀅𑀓𑁆𑀔𑁂𑀬𑁆𑀬𑀲𑀜𑁆𑀜𑀺𑀦𑁄𑀢𑀺 𑀏𑀢𑁆𑀣 ‘‘𑀤𑁂𑀯𑁄, 𑀫𑀦𑀼𑀲𑁆𑀲𑁄, 𑀕𑀳𑀝𑁆𑀞𑁄, 𑀧𑀩𑁆𑀩𑀚𑀺𑀢𑁄, 𑀲𑀢𑁆𑀢𑁄, 𑀧𑀼𑀕𑁆𑀕𑀮𑁄, 𑀢𑀺𑀲𑁆𑀲𑁄, 𑀨𑀼𑀲𑁆𑀲𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀓𑁆𑀔𑁂𑀬𑁆𑀬𑀢𑁄 𑀲𑀩𑁆𑀩𑁂𑀲𑀁 𑀅𑀓𑁆𑀔𑀸𑀦𑀸𑀦𑀁 𑀲𑀩𑁆𑀩𑀸𑀲𑀁 𑀓𑀣𑀸𑀦𑀁 𑀯𑀢𑁆𑀣𑀼𑀪𑀽𑀢𑀢𑁄 𑀧𑀜𑁆𑀘𑀓𑁆𑀔𑀦𑁆𑀥𑀸 ‘‘𑀅𑀓𑁆𑀔𑁂𑀬𑁆𑀬𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. ‘‘𑀲𑀢𑁆𑀢𑁄 𑀦𑀭𑁄 𑀧𑁄𑀲𑁄 𑀧𑀼𑀕𑁆𑀕𑀮𑁄 𑀇𑀢𑁆𑀣𑀻 𑀧𑀼𑀭𑀺𑀲𑁄’’𑀢𑀺 𑀏𑀯𑀁 𑀲𑀜𑁆𑀜𑀸 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀲𑀜𑁆𑀜𑀺𑀦𑁄, 𑀅𑀓𑁆𑀔𑁂𑀬𑁆𑀬𑁂𑀲𑁆𑀯𑁂𑀯 𑀲𑀜𑁆𑀜𑀺𑀦𑁄𑀢𑀺 𑀅𑀓𑁆𑀔𑁂𑀬𑁆𑀬𑀲𑀜𑁆𑀜𑀺𑀦𑁄, 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀲𑀢𑁆𑀢𑀧𑀼𑀕𑁆𑀕𑀮𑀸𑀤𑀺𑀲𑀜𑁆𑀜𑀺𑀦𑁄𑀢𑀺 𑀅𑀢𑁆𑀣𑁄. 𑀅𑀓𑁆𑀔𑁂𑀬𑁆𑀬𑀲𑁆𑀫𑀺𑀁 𑀧𑀢𑀺𑀝𑁆𑀞𑀺𑀢𑀸𑀢𑀺 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀅𑀝𑁆𑀞𑀳𑀸𑀓𑀸𑀭𑁂𑀳𑀺 𑀧𑀢𑀺𑀝𑁆𑀞𑀺𑀢𑀸. 𑀭𑀢𑁆𑀢𑁄 𑀳𑀺 𑀭𑀸𑀕𑀯𑀲𑁂𑀦 𑀧𑀢𑀺𑀝𑁆𑀞𑀺𑀢𑁄 𑀳𑁄𑀢𑀺, 𑀤𑀼𑀝𑁆𑀞𑁄 𑀤𑁄𑀲𑀯𑀲𑁂𑀦, 𑀫𑀽𑀴𑁆𑀳𑁄 𑀫𑁄𑀳𑀯𑀲𑁂𑀦, 𑀧𑀭𑀸𑀫𑀝𑁆𑀞𑁄 𑀤𑀺𑀝𑁆𑀞𑀺𑀯𑀲𑁂𑀦, 𑀣𑀸𑀫𑀕𑀢𑁄 𑀅𑀦𑀼𑀲𑀬𑀯𑀲𑁂𑀦, 𑀯𑀺𑀦𑀺𑀩𑀤𑁆𑀥𑁄 𑀫𑀸𑀦𑀯𑀲𑁂𑀦, 𑀅𑀦𑀺𑀝𑁆𑀞𑀗𑁆𑀕𑀢𑁄 𑀯𑀺𑀘𑀺𑀓𑀺𑀘𑁆𑀙𑀸𑀯𑀲𑁂𑀦, 𑀯𑀺𑀓𑁆𑀔𑁂𑀧𑀕𑀢𑁄 𑀉𑀤𑁆𑀥𑀘𑁆𑀘𑀯𑀲𑁂𑀦 𑀧𑀢𑀺𑀝𑁆𑀞𑀺𑀢𑁄 𑀳𑁄𑀢𑀺. 𑀅𑀓𑁆𑀔𑁂𑀬𑁆𑀬𑀁 𑀅𑀧𑀭𑀺𑀜𑁆𑀜𑀸𑀬𑀸𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑁂 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺 𑀅𑀧𑀭𑀺𑀚𑀸𑀦𑀺𑀢𑁆𑀯𑀸. 𑀬𑁄𑀕𑀫𑀸𑀬𑀦𑁆𑀢𑀺 𑀫𑀘𑁆𑀘𑀼𑀦𑁄𑀢𑀺 𑀫𑀘𑁆𑀘𑀼𑀦𑁄 𑀬𑁄𑀕𑀁 𑀧𑀬𑁄𑀕𑀁 𑀧𑀓𑁆𑀔𑁂𑀧𑀁 𑀉𑀧𑀓𑁆𑀔𑁂𑀧𑀁 𑀉𑀧𑀓𑁆𑀓𑀫𑀁 𑀅𑀩𑁆𑀪𑀦𑁆𑀢𑀭𑀁 𑀆𑀕𑀘𑁆𑀙𑀦𑁆𑀢𑀺, 𑀫𑀭𑀡𑀯𑀲𑀁 𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀫𑀺𑀫𑀸𑀬 𑀕𑀸𑀣𑀸𑀬 𑀓𑀸𑀮𑀺𑀓𑀸 𑀓𑀸𑀫𑀸 𑀓𑀣𑀺𑀢𑀸.

𑀧𑀭𑀺𑀜𑁆𑀜𑀸𑀬𑀸𑀢𑀺 𑀜𑀸𑀢𑀧𑀭𑀺𑀜𑁆𑀜𑀸, 𑀢𑀻𑀭𑀡𑀧𑀭𑀺𑀜𑁆𑀜𑀸, 𑀧𑀳𑀸𑀦𑀧𑀭𑀺𑀜𑁆𑀜𑀸𑀢𑀺 𑀇𑀫𑀸𑀳𑀺 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺 𑀧𑀭𑀺𑀚𑀸𑀦𑀺𑀢𑁆𑀯𑀸. 𑀢𑀢𑁆𑀣 𑀓𑀢𑀫𑀸 𑀜𑀸𑀢𑀧𑀭𑀺𑀜𑁆𑀜𑀸? 𑀧𑀜𑁆𑀘𑀓𑁆𑀔𑀦𑁆𑀥𑁂 𑀧𑀭𑀺𑀚𑀸𑀦𑀸𑀢𑀺 𑁋 ‘‘𑀅𑀬𑀁 𑀭𑀽𑀧𑀓𑁆𑀔𑀦𑁆𑀥𑁄, 𑀅𑀬𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀅𑀬𑀁 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀅𑀬𑀁 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄, 𑀅𑀬𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄, 𑀇𑀫𑀸𑀦𑀺 𑀢𑁂𑀲𑀁 𑀮𑀓𑁆𑀔𑀡𑀭𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀸𑀦𑀻’’𑀢𑀺, 𑀅𑀬𑀁 𑀜𑀸𑀢𑀧𑀭𑀺𑀜𑁆𑀜𑀸. 𑀓𑀢𑀫𑀸 𑀢𑀻𑀭𑀡𑀧𑀭𑀺𑀜𑁆𑀜𑀸? 𑀏𑀯𑀁 𑀜𑀸𑀢𑀁 𑀓𑀢𑁆𑀯𑀸 𑀧𑀜𑁆𑀘𑀓𑁆𑀔𑀦𑁆𑀥𑁂 𑀢𑀻𑀭𑁂𑀢𑀺 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀭𑁄𑀕𑀢𑁄𑀢𑀺 𑀤𑁆𑀯𑀸𑀘𑀢𑁆𑀢𑀸𑀮𑀻𑀲𑀸𑀬 𑀆𑀓𑀸𑀭𑁂𑀳𑀺. 𑀅𑀬𑀁 𑀢𑀻𑀭𑀡𑀧𑀭𑀺𑀜𑁆𑀜𑀸. 𑀓𑀢𑀫𑀸 𑀧𑀳𑀸𑀦𑀧𑀭𑀺𑀜𑁆𑀜𑀸? 𑀏𑀯𑀁 𑀢𑀻𑀭𑀬𑀺𑀢𑁆𑀯𑀸 𑀅𑀕𑁆𑀕𑀫𑀕𑁆𑀕𑁂𑀦 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀙𑀦𑁆𑀤𑀭𑀸𑀕𑀁 𑀧𑀚𑀳𑀢𑀺. 𑀅𑀬𑀁 𑀧𑀳𑀸𑀦𑀧𑀭𑀺𑀜𑁆𑀜𑀸.

𑀅𑀓𑁆𑀔𑀸𑀢𑀸𑀭𑀁 𑀦 𑀫𑀜𑁆𑀜𑀢𑀻𑀢𑀺 𑀏𑀯𑀁 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺 𑀧𑀜𑁆𑀘𑀓𑁆𑀔𑀦𑁆𑀥𑁂 𑀧𑀭𑀺𑀚𑀸𑀦𑀺𑀢𑁆𑀯𑀸 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀅𑀓𑁆𑀔𑀸𑀢𑀸𑀭𑀁 𑀧𑀼𑀕𑁆𑀕𑀮𑀁 𑀦 𑀫𑀜𑁆𑀜𑀢𑀺. 𑀅𑀓𑁆𑀔𑀸𑀢𑀸𑀭𑀦𑁆𑀢𑀺 𑀓𑀫𑁆𑀫𑀯𑀲𑁂𑀦 𑀓𑀸𑀭𑀡𑀁 𑀯𑁂𑀤𑀺𑀢𑀩𑁆𑀩𑀁, 𑀅𑀓𑁆𑀔𑀸𑀢𑀩𑁆𑀩𑀁 𑀓𑀣𑁂𑀢𑀩𑁆𑀩𑀁 𑀧𑀼𑀕𑁆𑀕𑀮𑀁 𑀦 𑀫𑀜𑁆𑀜𑀢𑀺, 𑀦 𑀧𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀓𑀺𑀦𑁆𑀢𑀺 𑀅𑀓𑁆𑀔𑀸𑀢𑀩𑁆𑀩𑀦𑁆𑀢𑀺? ‘‘𑀢𑀺𑀲𑁆𑀲𑁄’’𑀢𑀺 𑀯𑀸 ‘‘𑀨𑀼𑀲𑁆𑀲𑁄’’𑀢𑀺 𑀯𑀸 𑀏𑀯𑀁 𑀬𑁂𑀦 𑀓𑁂𑀦𑀘𑀺 𑀦𑀸𑀫𑁂𑀦 𑀯𑀸 𑀕𑁄𑀢𑁆𑀢𑁂𑀦 𑀯𑀸 𑀧𑀓𑀸𑀲𑁂𑀢𑀩𑁆𑀩𑀁. 𑀢𑀜𑁆𑀳𑀺 𑀢𑀲𑁆𑀲 𑀦 𑀳𑁄𑀢𑀻𑀢𑀺 𑀢𑀁 𑀢𑀲𑁆𑀲 𑀔𑀻𑀡𑀸𑀲𑀯𑀲𑁆𑀲 𑀦 𑀳𑁄𑀢𑀺. 𑀬𑁂𑀦 𑀦𑀁 𑀯𑀚𑁆𑀚𑀸𑀢𑀺 𑀬𑁂𑀦 𑀦𑀁 ‘‘𑀭𑀸𑀕𑁂𑀦 𑀭𑀢𑁆𑀢𑁄’’𑀢𑀺 𑀯𑀸 ‘‘𑀤𑁄𑀲𑁂𑀦 𑀤𑀼𑀝𑁆𑀞𑁄’’𑀢𑀺 𑀯𑀸 ‘‘𑀫𑁄𑀳𑁂𑀦 𑀫𑀽𑀴𑁆𑀳𑁄’’𑀢𑀺 𑀯𑀸𑀢𑀺 𑀓𑁄𑀘𑀺 𑀯𑀤𑁂𑀬𑁆𑀬, 𑀢𑀁 𑀓𑀸𑀭𑀡𑀁 𑀢𑀲𑁆𑀲 𑀔𑀻𑀡𑀸𑀲𑀯𑀲𑁆𑀲 𑀦𑀢𑁆𑀣𑀺.

𑀲𑀘𑁂 𑀯𑀺𑀚𑀸𑀦𑀸𑀲𑀺 𑀯𑀤𑁂𑀳𑀻𑀢𑀺 𑀲𑀘𑁂 𑀏𑀯𑀭𑀽𑀧𑀁 𑀔𑀻𑀡𑀸𑀲𑀯𑀁 𑀚𑀸𑀦𑀸𑀲𑀺, ‘‘𑀚𑀸𑀦𑀸𑀫𑀻’’𑀢𑀺 𑀯𑀤𑁂𑀳𑀺. 𑀦𑁄 𑀘𑁂 𑀚𑀸𑀦𑀸𑀲𑀺, 𑀅𑀣 ‘‘𑀦 𑀚𑀸𑀦𑀸𑀫𑀻’’𑀢𑀺 𑀯𑀤𑁂𑀳𑀺. 𑀬𑀓𑁆𑀔𑀸𑀢𑀺 𑀤𑁂𑀯𑀢𑀁 𑀆𑀮𑀧𑀦𑁆𑀢𑁄 𑀆𑀳. 𑀇𑀢𑀺 𑀇𑀫𑀸𑀬 𑀕𑀸𑀣𑀸𑀬 𑀲𑀦𑁆𑀤𑀺𑀝𑁆𑀞𑀺𑀓𑁄 𑀦𑀯𑀯𑀺𑀥𑁄 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀓𑀣𑀺𑀢𑁄. 𑀲𑀸𑀥𑀽𑀢𑀺 𑀆𑀬𑀸𑀘𑀦𑀢𑁆𑀣𑁂 𑀦𑀺𑀧𑀸𑀢𑁄.

𑀬𑁄 𑀫𑀜𑁆𑀜𑀢𑀻𑀢𑀺 𑀬𑁄 𑀅𑀢𑁆𑀢𑀸𑀦𑀁 ‘‘𑀅𑀳𑀁 𑀲𑀫𑁄’’𑀢𑀺 𑀯𑀸 ‘‘𑀯𑀺𑀲𑁂𑀲𑀻’’𑀢𑀺 𑀯𑀸 ‘‘𑀦𑀺𑀳𑀻𑀦𑁄’’𑀢𑀺 𑀯𑀸 𑀫𑀜𑁆𑀜𑀢𑀺. 𑀏𑀢𑁂𑀦 ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺𑀆𑀤𑀬𑁄 𑀢𑀬𑁄 𑀫𑀸𑀦𑀸 𑀕𑀳𑀺𑀢𑀸𑀯. 𑀢𑁂𑀲𑀼 𑀕𑀳𑀺𑀢𑁂𑀲𑀼 𑀦𑀯 𑀫𑀸𑀦𑀸 𑀕𑀳𑀺𑀢𑀸𑀯 𑀳𑁄𑀦𑁆𑀢𑀺. 𑀲𑁄 𑀯𑀺𑀯𑀤𑁂𑀣 𑀢𑁂𑀦𑀸𑀢𑀺 𑀲𑁄 𑀧𑀼𑀕𑁆𑀕𑀮𑁄 𑀢𑁂𑀦𑁂𑀯 𑀫𑀸𑀦𑁂𑀦 𑀬𑁂𑀦 𑀓𑁂𑀦𑀘𑀺 𑀧𑀼𑀕𑁆𑀕𑀮𑁂𑀦 𑀲𑀤𑁆𑀥𑀺𑀁 𑁋 ‘‘𑀓𑁂𑀦 𑀫𑀁 𑀢𑁆𑀯𑀁 𑀧𑀸𑀧𑀼𑀡𑀸𑀲𑀺, 𑀓𑀺𑀁 𑀚𑀸𑀢𑀺𑀬𑀸 𑀧𑀸𑀧𑀼𑀡𑀸𑀲𑀺, 𑀉𑀤𑀸𑀳𑀼 𑀕𑁄𑀢𑁆𑀢𑁂𑀦, 𑀓𑀼𑀮𑀧𑀤𑁂𑀲𑁂𑀦, 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬, 𑀩𑀸𑀳𑀼𑀲𑀘𑁆𑀘𑁂𑀦, 𑀥𑀼𑀢𑀕𑀼𑀡𑁂𑀦𑀸’’𑀢𑀺 𑀏𑀯𑀁 𑀯𑀺𑀯𑀤𑁂𑀬𑁆𑀬. 𑀇𑀢𑀺 𑀇𑀫𑀸𑀬𑀧𑀺 𑀉𑀧𑀟𑁆𑀠𑀕𑀸𑀣𑀸𑀬 𑀓𑀸𑀮𑀺𑀓𑀸 𑀓𑀸𑀫𑀸 𑀓𑀣𑀺𑀢𑀸.

𑀢𑀻𑀲𑀼 𑀯𑀺𑀥𑀸𑀲𑀽𑀢𑀺 𑀢𑀻𑀲𑀼 𑀫𑀸𑀦𑁂𑀲𑀼. ‘‘𑀏𑀓𑀯𑀺𑀥𑁂𑀦 𑀭𑀽𑀧𑀲𑀗𑁆𑀕𑀳𑁄’’𑀢𑀺𑀆𑀤𑀻𑀲𑀼 (𑀥. 𑀲. 𑁫𑁮𑁪) 𑀳𑀺 𑀓𑁄𑀝𑁆𑀞𑀸𑀲𑁄 ‘‘𑀯𑀺𑀥𑁄’’𑀢𑀺 𑀯𑀼𑀢𑁆𑀢𑁄. ‘‘𑀓𑀣𑀁𑀯𑀺𑀥𑀁 𑀲𑀻𑀮𑀯𑀦𑁆𑀢𑀁 𑀯𑀤𑀦𑁆𑀢𑀺, 𑀓𑀣𑀁𑀯𑀺𑀥𑀁 𑀧𑀜𑁆𑀜𑀯𑀦𑁆𑀢𑀁 𑀯𑀤𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁯𑁫) 𑀆𑀓𑀸𑀭𑁄. ‘‘𑀢𑀺𑀲𑁆𑀲𑁄 𑀇𑀫𑀸, 𑀪𑀺𑀓𑁆𑀔𑀯𑁂, 𑀯𑀺𑀥𑀸. 𑀓𑀢𑀫𑀸 𑀢𑀺𑀲𑁆𑀲𑁄? 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀯𑀺𑀥𑀸, 𑀲𑀤𑀺𑀲𑁄𑀳𑀫𑀲𑁆𑀫𑀻𑀢𑀺 𑀯𑀺𑀥𑀸, 𑀳𑀻𑀦𑁄𑀳𑀫𑀲𑁆𑀫𑀻𑀢𑀺 𑀯𑀺𑀥𑀸’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁫.𑁧𑁬𑁨) 𑀫𑀸𑀦𑁄 ‘‘𑀯𑀺𑀥𑀸’’𑀢𑀺 𑀯𑀼𑀢𑁆𑀢𑁄. 𑀇𑀥𑀸𑀧𑀺 𑀫𑀸𑀦𑁄𑀯. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀻𑀲𑀼 𑀯𑀺𑀥𑀸𑀲𑀽𑀢𑀺 𑀢𑀻𑀲𑀼 𑀫𑀸𑀦𑁂𑀲𑀽’’𑀢𑀺. 𑀅𑀯𑀺𑀓𑀫𑁆𑀧𑀫𑀸𑀦𑁄𑀢𑀺 𑀲𑁄 𑀧𑀼𑀕𑁆𑀕𑀮𑁄 𑀏𑀢𑁂𑀲𑀼 𑀲𑀗𑁆𑀔𑁂𑀧𑀢𑁄 𑀢𑀻𑀲𑀼, 𑀯𑀺𑀢𑁆𑀣𑀸𑀭𑀢𑁄 𑀦𑀯𑀲𑀼 𑀫𑀸𑀦𑁂𑀲𑀼 𑀦 𑀓𑀫𑁆𑀧𑀢𑀺, 𑀦 𑀘𑀮𑀢𑀺. 𑀲𑀫𑁄 𑀯𑀺𑀲𑁂𑀲𑀻𑀢𑀺 𑀦 𑀢𑀲𑁆𑀲 𑀳𑁄𑀢𑀻𑀢𑀺 𑀢𑀲𑁆𑀲 𑀧𑀳𑀻𑀦𑀫𑀸𑀦𑀲𑁆𑀲 𑀔𑀻𑀡𑀸𑀲𑀯𑀲𑁆𑀲 ‘‘𑀅𑀳𑀁 𑀲𑀤𑀺𑀲𑁄’’𑀢𑀺 𑀯𑀸 ‘‘𑀲𑁂𑀬𑁆𑀬𑁄’’𑀢𑀺 𑀯𑀸 ‘‘𑀳𑀻𑀦𑁄’’𑀢𑀺 𑀯𑀸 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀧𑀘𑁆𑀙𑀺𑀫𑀧𑀤𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀇𑀢𑀺 𑀇𑀫𑀸𑀬𑀧𑀺 𑀉𑀧𑀟𑁆𑀠𑀕𑀸𑀣𑀸𑀬 𑀦𑀯𑀯𑀺𑀥𑁄 𑀲𑀦𑁆𑀤𑀺𑀝𑁆𑀞𑀺𑀓𑁄 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀓𑀣𑀺𑀢𑁄.

𑀧𑀳𑀸𑀲𑀺 𑀲𑀗𑁆𑀔𑀦𑁆𑀢𑀺, ‘‘𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀆𑀳𑀸𑀭𑀁 𑀆𑀳𑀸𑀭𑁂𑀢𑀻’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁪.𑁧𑁨𑁦, 𑁨𑁩𑁯) 𑀧𑀜𑁆𑀜𑀸 ‘‘𑀲𑀗𑁆𑀔𑀸’’𑀢𑀺 𑀆𑀕𑀢𑀸. ‘‘𑀅𑀢𑁆𑀣𑀺 𑀢𑁂 𑀓𑁄𑀘𑀺 𑀕𑀡𑀓𑁄 𑀯𑀸 𑀫𑀼𑀤𑁆𑀤𑀺𑀓𑁄 𑀯𑀸 𑀲𑀗𑁆𑀔𑀸𑀬𑀓𑁄 𑀯𑀸, 𑀬𑁄 𑀧𑀳𑁄𑀢𑀺 𑀕𑀗𑁆𑀕𑀸𑀬 𑀯𑀸𑀮𑀼𑀓𑀁 𑀕𑀡𑁂𑀢𑀼’’𑀦𑁆𑀢𑀺 (𑀲𑀁. 𑀦𑀺. 𑁪.𑁪𑁧𑁦) 𑀏𑀢𑁆𑀣 𑀕𑀡𑀦𑀸. ‘‘𑀲𑀜𑁆𑀜𑀸𑀦𑀺𑀤𑀸𑀦𑀸 𑀳𑀺 𑀧𑀧𑀜𑁆𑀘𑀲𑀗𑁆𑀔𑀸’’𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁮𑁮𑁦) 𑀓𑁄𑀝𑁆𑀞𑀸𑀲𑁄. ‘‘𑀬𑀸 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀲𑀗𑁆𑀔𑀸 𑀲𑀫𑀜𑁆𑀜𑀸’’𑀢𑀺 (𑀥. 𑀲. 𑁧𑁩𑁧𑁩-𑁧𑁩𑁧𑁫) 𑀏𑀢𑁆𑀣 𑀧𑀡𑁆𑀡𑀢𑁆𑀢𑀺 ‘‘𑀲𑀗𑁆𑀔𑀸’’𑀢𑀺 𑀆𑀕𑀢𑀸. 𑀇𑀥𑀸𑀧𑀺 𑀅𑀬𑀫𑁂𑀯 𑀅𑀥𑀺𑀧𑁆𑀧𑁂𑀢𑀸. 𑀧𑀳𑀸𑀲𑀺 𑀲𑀗𑁆𑀔𑀦𑁆𑀢𑀺 𑀧𑀤𑀲𑁆𑀲 𑀳𑀺 𑀅𑀬𑀫𑁂𑀯𑀢𑁆𑀣𑁄 𑁋 𑀭𑀢𑁆𑀢𑁄 𑀤𑀼𑀝𑁆𑀞𑁄 𑀫𑀽𑀴𑁆𑀳𑁄 𑀇𑀢𑀺 𑀇𑀫𑀁 𑀧𑀡𑁆𑀡𑀢𑁆𑀢𑀺𑀁 𑀔𑀻𑀡𑀸𑀲𑀯𑁄 𑀧𑀳𑀸𑀲𑀺 𑀚𑀳𑀺 𑀧𑀚𑀳𑀻𑀢𑀺.

𑀦 𑀯𑀺𑀫𑀸𑀦𑀫𑀚𑁆𑀛𑀕𑀸𑀢𑀺 𑀦𑀯𑀪𑁂𑀤𑀁 𑀢𑀺𑀯𑀺𑀥𑀫𑀸𑀦𑀁 𑀦 𑀉𑀧𑀕𑀢𑁄. 𑀦𑀺𑀯𑀸𑀲𑀝𑁆𑀞𑁂𑀦 𑀯𑀸 𑀫𑀸𑀢𑀼𑀓𑀼𑀘𑁆𑀙𑀺 ‘‘𑀯𑀺𑀫𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀆𑀬𑀢𑀺𑀁 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀦 𑀉𑀧𑀕𑀘𑁆𑀙𑀻𑀢𑀺𑀧𑀺 𑀅𑀢𑁆𑀣𑁄. 𑀅𑀦𑀸𑀕𑀢𑀢𑁆𑀣𑁂 𑀅𑀢𑀻𑀢𑀯𑀘𑀦𑀁. 𑀅𑀘𑁆𑀙𑁂𑀘𑁆𑀙𑀻𑀢𑀺 𑀙𑀺𑀦𑁆𑀤𑀺. 𑀙𑀺𑀦𑁆𑀦𑀕𑀦𑁆𑀣𑀦𑁆𑀢𑀺 𑀘𑀢𑁆𑀢𑀸𑀭𑁄 𑀕𑀦𑁆𑀣𑁂 𑀙𑀺𑀦𑁆𑀤𑀺𑀢𑁆𑀯𑀸 𑀞𑀺𑀢𑀁. 𑀅𑀦𑀻𑀖𑀦𑁆𑀢𑀺 𑀦𑀺𑀤𑁆𑀤𑀼𑀓𑁆𑀔𑀁. 𑀦𑀺𑀭𑀸𑀲𑀦𑁆𑀢𑀺 𑀦𑀺𑀢𑁆𑀢𑀡𑁆𑀳𑀁. 𑀧𑀭𑀺𑀬𑁂𑀲𑀫𑀸𑀦𑀸𑀢𑀺 𑀑𑀮𑁄𑀓𑀬𑀫𑀸𑀦𑀸. 𑀦𑀸𑀚𑁆𑀛𑀕𑀫𑀼𑀦𑁆𑀢𑀺 𑀦 𑀅𑀥𑀺𑀕𑀘𑁆𑀙𑀦𑁆𑀢𑀺 𑀦 𑀯𑀺𑀦𑁆𑀤𑀦𑁆𑀢𑀺 𑀦 𑀧𑀲𑁆𑀲𑀦𑁆𑀢𑀺. 𑀯𑀢𑁆𑀢𑀫𑀸𑀦𑀢𑁆𑀣𑁂 𑀅𑀢𑀻𑀢𑀯𑀘𑀦𑀁. 𑀇𑀥 𑀯𑀸 𑀳𑀼𑀭𑀁 𑀯𑀸𑀢𑀺 𑀇𑀥𑀮𑁄𑀓𑁂 𑀯𑀸 𑀧𑀭𑀮𑁄𑀓𑁂 𑀯𑀸. 𑀲𑀩𑁆𑀩𑀦𑀺𑀯𑁂𑀲𑀦𑁂𑀲𑀽𑀢𑀺 𑀢𑀬𑁄 𑀪𑀯𑀸, 𑀘𑀢𑀲𑁆𑀲𑁄 𑀬𑁄𑀦𑀺𑀬𑁄, 𑀧𑀜𑁆𑀘 𑀕𑀢𑀺𑀬𑁄, 𑀲𑀢𑁆𑀢 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄, 𑀦𑀯 𑀲𑀢𑁆𑀢𑀸𑀯𑀸𑀲𑀸, 𑀇𑀢𑀺 𑀇𑀫𑁂𑀲𑀼𑀧𑀺 𑀲𑀩𑁆𑀩𑁂𑀲𑀼 𑀲𑀢𑁆𑀢𑀦𑀺𑀯𑁂𑀲𑀦𑁂𑀲𑀼 𑀏𑀯𑀭𑀽𑀧𑀁 𑀔𑀻𑀡𑀸𑀲𑀯𑀁 𑀓𑀸𑀬𑀲𑁆𑀲 𑀪𑁂𑀤𑀸 𑀉𑀧𑁆𑀧𑀚𑁆𑀚𑀫𑀸𑀦𑀁 𑀯𑀸 𑀉𑀧𑁆𑀧𑀦𑁆𑀦𑀁 𑀯𑀸 𑀦 𑀧𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀇𑀫𑀸𑀬 𑀕𑀸𑀣𑀸𑀬 𑀲𑀦𑁆𑀤𑀺𑀝𑁆𑀞𑀺𑀓𑀁 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀫𑁂𑀯 𑀓𑀣𑁂𑀲𑀺.

𑀇𑀫𑀜𑁆𑀘 𑀕𑀸𑀣𑀁 𑀲𑀼𑀢𑁆𑀯𑀸 𑀲𑀸𑀧𑀺 𑀤𑁂𑀯𑀢𑀸 𑀅𑀢𑁆𑀣𑀁 𑀲𑀮𑁆𑀮𑀓𑁆𑀔𑁂𑀲𑀺, 𑀢𑁂𑀦𑁂𑀯 𑀓𑀸𑀭𑀡𑁂𑀦 𑀇𑀫𑀲𑁆𑀲 𑀔𑁆𑀯𑀸𑀳𑀁, 𑀪𑀦𑁆𑀢𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀸𑀧𑀁 𑀦 𑀓𑀬𑀺𑀭𑀸𑀢𑀺 𑀕𑀸𑀣𑀸𑀬 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀯𑀲𑁂𑀦𑀧𑀺 𑀓𑀣𑁂𑀢𑀼𑀁 𑀯𑀝𑁆𑀝𑀢𑀺 𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑀯𑀲𑁂𑀦𑀧𑀺. 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀯𑀲𑁂𑀦 𑀢𑀸𑀯 𑀯𑀘𑀲𑀸𑀢𑀺 𑀘𑀢𑀼𑀩𑁆𑀩𑀺𑀥𑀁 𑀯𑀘𑀻𑀲𑀼𑀘𑀭𑀺𑀢𑀁 𑀕𑀳𑀺𑀢𑀁. 𑀫𑀦𑀲𑀸𑀢𑀺 𑀢𑀺𑀯𑀺𑀥𑀁 𑀫𑀦𑁄𑀲𑀼𑀘𑀭𑀺𑀢𑀁 𑀕𑀳𑀺𑀢𑀁. 𑀓𑀸𑀬𑁂𑀦 𑀯𑀸 𑀓𑀺𑀜𑁆𑀘𑀦 𑀲𑀩𑁆𑀩𑀮𑁄𑀓𑁂𑀢𑀺 𑀢𑀺𑀯𑀺𑀥𑀁 𑀓𑀸𑀬𑀲𑀼𑀘𑀭𑀺𑀢𑀁 𑀕𑀳𑀺𑀢𑀁. 𑀇𑀫𑁂 𑀢𑀸𑀯 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀥𑀫𑁆𑀫𑀸 𑀳𑁄𑀦𑁆𑀢𑀺. 𑀓𑀸𑀫𑁂 𑀧𑀳𑀸𑀬𑀸𑀢𑀺 𑀇𑀫𑀺𑀦𑀸 𑀧𑀦 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑁄 𑀧𑀝𑀺𑀓𑁆𑀔𑀺𑀢𑁆𑀢𑁄. 𑀲𑀢𑀺𑀫𑀸 𑀲𑀫𑁆𑀧𑀚𑀸𑀦𑁄𑀢𑀺 𑀇𑀫𑀺𑀦𑀸 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀓𑀸𑀭𑀡𑀁 𑀲𑀢𑀺𑀲𑀫𑁆𑀧𑀚𑀜𑁆𑀜𑀁 𑀕𑀳𑀺𑀢𑀁. 𑀤𑀼𑀓𑁆𑀔𑀁 𑀦 𑀲𑁂𑀯𑁂𑀣 𑀅𑀦𑀢𑁆𑀣𑀲𑀁𑀳𑀺𑀢𑀦𑁆𑀢𑀺 𑀇𑀫𑀺𑀦𑀸 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑁄 𑀧𑀝𑀺𑀲𑀺𑀤𑁆𑀥𑁄. 𑀇𑀢𑀺 𑀤𑁂𑀯𑀢𑀸 ‘‘𑀉𑀪𑁄 𑀅𑀦𑁆𑀢𑁂 𑀯𑀺𑀯𑀚𑁆𑀚𑁂𑀢𑁆𑀯𑀸 𑀓𑀸𑀭𑀡𑁂𑀳𑀺 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀳𑀺 𑀲𑀤𑁆𑀥𑀺𑀁 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀥𑀫𑁆𑀫𑁂 𑀢𑀼𑀫𑁆𑀳𑁂𑀳𑀺 𑀓𑀣𑀺𑀢𑁂 𑀆𑀚𑀸𑀦𑀸𑀫𑀺 𑀪𑀕𑀯𑀸’’𑀢𑀺 𑀯𑀤𑀢𑀺.

𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑀯𑀲𑁂𑀦 𑀧𑀦 𑀅𑀬𑀁 𑀦𑀬𑁄 𑁋 𑀢𑀲𑁆𑀫𑀺𑀁 𑀓𑀺𑀭 𑀞𑀸𑀦𑁂 𑀫𑀳𑀢𑀻 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀤𑁂𑀯𑀢𑀸 𑀬𑀣𑀸𑀞𑀸𑀦𑁂 𑀞𑀺𑀢𑀸𑀯 𑀤𑁂𑀲𑀦𑀸𑀦𑀼𑀲𑀸𑀭𑁂𑀦 𑀜𑀸𑀡𑀁 𑀧𑁂𑀲𑁂𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀬 𑀅𑀢𑁆𑀢𑀦𑀸 𑀅𑀥𑀺𑀕𑀢𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀤𑀲𑁆𑀲𑁂𑀦𑁆𑀢𑀻 𑀏𑀯𑀫𑀸𑀳. 𑀢𑀢𑁆𑀣 𑀯𑀘𑀲𑀸𑀢𑀺 𑀲𑀫𑁆𑀫𑀸𑀯𑀸𑀘𑀸 𑀕𑀳𑀺𑀢𑀸, 𑀫𑀦𑁄 𑀧𑀦 𑀅𑀗𑁆𑀕𑀁 𑀦 𑀳𑁄𑀢𑀻𑀢𑀺 𑀫𑀦𑀲𑀸𑀢𑀺 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀓𑀁 𑀘𑀺𑀢𑁆𑀢𑀁 𑀕𑀳𑀺𑀢𑀁. 𑀓𑀸𑀬𑁂𑀦 𑀯𑀸 𑀓𑀺𑀜𑁆𑀘𑀦 𑀲𑀩𑁆𑀩𑀮𑁄𑀓𑁂𑀢𑀺 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀕𑀳𑀺𑀢𑁄, 𑀆𑀚𑀻𑀯𑁄 𑀧𑀦 𑀯𑀸𑀘𑀸𑀓𑀫𑁆𑀫𑀦𑁆𑀢𑀧𑀓𑁆𑀔𑀺𑀓𑀢𑁆𑀢𑀸 𑀕𑀳𑀺𑀢𑁄𑀯 𑀳𑁄𑀢𑀺. 𑀲𑀢𑀺𑀫𑀸𑀢𑀺 𑀇𑀫𑀺𑀦𑀸 𑀯𑀸𑀬𑀸𑀫𑀲𑀢𑀺𑀲𑀫𑀸𑀥𑀬𑁄 𑀕𑀳𑀺𑀢𑀸. 𑀲𑀫𑁆𑀧𑀚𑀸𑀦𑁄𑀢𑀺𑀧𑀤𑁂𑀦 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸. 𑀓𑀸𑀫𑁂 𑀧𑀳𑀸𑀬, 𑀤𑀼𑀓𑁆𑀔𑀁 𑀦 𑀲𑁂𑀯𑁂𑀣𑀸𑀢𑀺𑀧𑀤𑀤𑁆𑀯𑀬𑁂𑀦 𑀅𑀦𑁆𑀢𑀤𑁆𑀯𑀬𑀯𑀚𑁆𑀚𑀦𑀁. 𑀇𑀢𑀺 𑀇𑀫𑁂 𑀤𑁆𑀯𑁂 𑀅𑀦𑁆𑀢𑁂 𑀅𑀦𑀼𑀧𑀕𑀫𑁆𑀫 𑀫𑀚𑁆𑀛𑀺𑀫𑀁 𑀧𑀝𑀺𑀧𑀤𑀁 𑀢𑀼𑀫𑁆𑀳𑁂𑀳𑀺 𑀓𑀣𑀺𑀢𑀁, 𑀆𑀚𑀸𑀦𑀸𑀫𑀺 𑀪𑀕𑀯𑀸𑀢𑀺 𑀯𑀢𑁆𑀯𑀸 𑀢𑀣𑀸𑀕𑀢𑀁 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀻𑀢𑀺.

𑀲𑀫𑀺𑀤𑁆𑀥𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀦𑁆𑀤𑀦𑀯𑀕𑁆𑀕𑁄 𑀤𑀼𑀢𑀺𑀬𑁄.