𑁭. 𑀲𑀴𑀸𑀬𑀢𑀦𑀯𑀺𑀪𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁦𑁪. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀲𑀴𑀸𑀬𑀢𑀦𑀯𑀺𑀪𑀗𑁆𑀕𑀲𑀼𑀢𑁆𑀢𑀁. 𑀢𑀢𑁆𑀣 𑀯𑁂𑀤𑀺𑀢𑀩𑁆𑀩𑀸𑀦𑀻𑀢𑀺 𑀲𑀳𑀯𑀺𑀧𑀲𑁆𑀲𑀦𑁂𑀦 𑀫𑀕𑁆𑀕𑁂𑀦 𑀚𑀸𑀦𑀺𑀢𑀩𑁆𑀩𑀸𑀦𑀺. 𑀫𑀦𑁄𑀧𑀯𑀺𑀘𑀸𑀭𑀸𑀢𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀸. 𑀯𑀺𑀢𑀓𑁆𑀓𑀼𑀧𑁆𑀧𑀸𑀤𑀓𑀜𑁆𑀳𑀺 𑀫𑀦𑁄 𑀇𑀥 𑀫𑀦𑁄𑀢𑀺 𑀅𑀥𑀺𑀧𑁆𑀧𑁂𑀢𑀁, 𑀫𑀦𑀲𑁆𑀲 𑀉𑀧𑀯𑀺𑀘𑀸𑀭𑀸𑀢𑀺 𑀫𑀦𑁄𑀧𑀯𑀺𑀘𑀸𑀭𑀸. 𑀲𑀢𑁆𑀢𑀧𑀤𑀸𑀢𑀺 𑀯𑀝𑁆𑀝𑀯𑀺𑀯𑀝𑁆𑀝𑀦𑀺𑀲𑁆𑀲𑀺𑀢𑀸𑀦𑀁 𑀲𑀢𑁆𑀢𑀸𑀦𑀁 𑀧𑀤𑀸. 𑀏𑀢𑁆𑀣 𑀳𑀺 𑀅𑀝𑁆𑀞𑀸𑀭𑀲 𑀯𑀝𑁆𑀝𑀧𑀤𑀸 𑀦𑀸𑀫, 𑀅𑀝𑁆𑀞𑀸𑀭𑀲 𑀯𑀺𑀯𑀝𑁆𑀝𑀧𑀤𑀸 𑀦𑀸𑀫, 𑀢𑁂𑀧𑀺 𑀲𑀳𑀯𑀺𑀧𑀲𑁆𑀲𑀦𑁂𑀦 𑀫𑀕𑁆𑀕𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀬𑁄𑀕𑁆𑀕𑀸𑀘𑀭𑀺𑀬𑀸𑀦𑀦𑁆𑀢𑀺 𑀳𑀢𑁆𑀣𑀺𑀬𑁄𑀕𑁆𑀕𑀸𑀤𑀺𑀆𑀘𑀸𑀭𑀲𑀺𑀓𑁆𑀔𑀸𑀧𑀓𑀸𑀦𑀁, 𑀤𑀫𑁂𑀢𑀩𑁆𑀩𑀤𑀫𑀓𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀯𑀺𑀪𑀗𑁆𑀕𑁂𑀬𑁂𑀯 𑀆𑀯𑀺𑀪𑀯𑀺𑀲𑁆𑀲𑀢𑀺. 𑀅𑀬𑀫𑀼𑀤𑁆𑀤𑁂𑀲𑁄𑀢𑀺 𑀇𑀤𑀁 𑀫𑀸𑀢𑀺𑀓𑀸𑀝𑁆𑀞𑀧𑀦𑀁.

𑁩𑁦𑁫. 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀺𑀢𑁆𑀣𑀸𑀭𑀺𑀢𑀸𑀦𑀺. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀦𑁆𑀢𑀺 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀢𑁄 𑀤𑁆𑀯𑁂 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀦𑀺. 𑀲𑁂𑀲𑀧𑀲𑀸𑀤𑀯𑀺𑀜𑁆𑀜𑀸𑀡𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀫𑀸𑀦𑀺 𑀧𑀦 𑀤𑀲 𑀞𑀧𑁂𑀢𑁆𑀯𑀸 𑀲𑁂𑀲𑀁 𑀇𑀥 𑀫𑀦𑁄𑀯𑀺𑀜𑁆𑀜𑀸𑀡𑀁 𑀦𑀸𑀫.

𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄𑀢𑀺 𑀘𑀓𑁆𑀔𑀼𑀫𑁆𑀳𑀺 𑀲𑀫𑁆𑀨𑀲𑁆𑀲𑁄. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀲𑀫𑁆𑀨𑀲𑁆𑀲𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀭𑀽𑀧𑀁 𑀤𑀺𑀲𑁆𑀯𑀸. 𑀏𑀲𑁂𑀯 𑀦𑀬𑁄 𑀲𑀩𑁆𑀩𑀢𑁆𑀣. 𑀲𑁄𑀫𑀦𑀲𑁆𑀲𑀝𑁆𑀞𑀸𑀦𑀺𑀬𑀦𑁆𑀢𑀺 𑀲𑁄𑀫𑀦𑀲𑁆𑀲𑀲𑁆𑀲 𑀆𑀭𑀫𑁆𑀫𑀡𑀯𑀲𑁂𑀦 𑀓𑀸𑀭𑀡𑀪𑀽𑀢𑀁. 𑀉𑀧𑀯𑀺𑀘𑀭𑀢𑀻𑀢𑀺 𑀢𑀢𑁆𑀣 𑀯𑀺𑀘𑀸𑀭𑀧𑀯𑀢𑁆𑀢𑀦𑁂𑀦 𑀉𑀧𑀯𑀺𑀘𑀭𑀢𑀺, 𑀯𑀺𑀢𑀓𑁆𑀓𑁄 𑀢𑀁𑀲𑀫𑁆𑀧𑀬𑀼𑀢𑁆𑀢𑁄 𑀘𑀸𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀅𑀝𑁆𑀞𑀸𑀭𑀲 𑀯𑀺𑀢𑀓𑁆𑀓𑀯𑀺𑀘𑀸𑀭𑀲𑀗𑁆𑀔𑀸𑀢𑀸 𑀫𑀦𑁄𑀧𑀯𑀺𑀘𑀸𑀭𑀸 𑀯𑁂𑀤𑀺𑀢𑀩𑁆𑀩𑀸. 𑀙 𑀲𑁄𑀫𑀦𑀲𑁆𑀲𑀽𑀧𑀯𑀺𑀘𑀸𑀭𑀸𑀢𑀺 𑀏𑀢𑁆𑀣 𑀧𑀦 𑀲𑁄𑀫𑀦𑀲𑁆𑀲𑁂𑀦 𑀲𑀤𑁆𑀥𑀺𑀁 𑀉𑀧𑀯𑀺𑀘𑀭𑀦𑁆𑀢𑀻𑀢𑀺 𑀲𑁄𑀫𑀦𑀲𑁆𑀲𑀽𑀧𑀯𑀺𑀘𑀸𑀭𑀸. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄.

𑁩𑁦𑁬. 𑀕𑁂𑀳𑀲𑀺𑀢𑀸𑀦𑀻𑀢𑀺 𑀓𑀸𑀫𑀕𑀼𑀡𑀦𑀺𑀲𑁆𑀲𑀺𑀢𑀸𑀦𑀺. 𑀦𑁂𑀓𑁆𑀔𑀫𑁆𑀫𑀲𑀺𑀢𑀸𑀦𑀻𑀢𑀺 𑀯𑀺𑀧𑀲𑁆𑀲𑀦𑀸𑀦𑀺𑀲𑁆𑀲𑀺𑀢𑀸𑀦𑀺. 𑀇𑀝𑁆𑀞𑀸𑀦𑀦𑁆𑀢𑀺 𑀧𑀭𑀺𑀬𑁂𑀲𑀺𑀢𑀸𑀦𑀁. 𑀓𑀦𑁆𑀢𑀸𑀦𑀦𑁆𑀢𑀺 𑀓𑀸𑀫𑀺𑀢𑀸𑀦𑀁. 𑀫𑀦𑁄𑀭𑀫𑀸𑀦𑀦𑁆𑀢𑀺 𑀫𑀦𑁄 𑀏𑀢𑁂𑀲𑀼 𑀭𑀫𑀢𑀻𑀢𑀺 𑀫𑀦𑁄𑀭𑀫𑀸𑀦𑀺, 𑀢𑁂𑀲𑀁 𑀫𑀦𑁄𑀭𑀫𑀸𑀦𑀁. 𑀮𑁄𑀓𑀸𑀫𑀺𑀲𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀦𑁆𑀢𑀺 𑀢𑀡𑁆𑀳𑀸𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀁. 𑀅𑀢𑀻𑀢𑀦𑁆𑀢𑀺 𑀧𑀝𑀺𑀮𑀤𑁆𑀥𑀁. 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀢𑀸𑀯 𑀆𑀭𑀩𑁆𑀪 𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀼, 𑀅𑀢𑀻𑀢𑁂 𑀓𑀣𑀁 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀅𑀢𑀻𑀢𑁂𑀧𑀺 𑁋 ‘‘𑀬𑀣𑀸𑀳𑀁 𑀏𑀢𑀭𑀳𑀺 𑀇𑀝𑁆𑀞𑀸𑀭𑀫𑁆𑀫𑀡𑀁 𑀅𑀦𑀼𑀪𑀯𑀸𑀫𑀺, 𑀏𑀯𑀁 𑀧𑀼𑀩𑁆𑀩𑁂𑀧𑀺 𑀅𑀦𑀼𑀪𑀯𑀺’’𑀦𑁆𑀢𑀺 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲 𑀩𑀮𑀯𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺.

𑀅𑀦𑀺𑀘𑁆𑀘𑀢𑀦𑁆𑀢𑀺 𑀅𑀦𑀺𑀘𑁆𑀘𑀸𑀓𑀸𑀭𑀁. 𑀯𑀺𑀧𑀭𑀺𑀡𑀸𑀫𑀯𑀺𑀭𑀸𑀕𑀦𑀺𑀭𑁄𑀥𑀦𑁆𑀢𑀺 𑀧𑀓𑀢𑀺𑀯𑀺𑀚𑀳𑀦𑁂𑀦 𑀯𑀺𑀧𑀭𑀺𑀡𑀸𑀫𑀁, 𑀯𑀺𑀕𑀘𑁆𑀙𑀦𑁂𑀦 𑀯𑀺𑀭𑀸𑀕𑀁, 𑀦𑀺𑀭𑀼𑀚𑁆𑀛𑀦𑁂𑀦 𑀦𑀺𑀭𑁄𑀥𑀁. 𑀲𑀫𑁆𑀫𑀧𑀜𑁆𑀜𑀸𑀬𑀸𑀢𑀺 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬. 𑀇𑀤𑀁 𑀯𑀼𑀘𑁆𑀘𑀢𑀺 𑀦𑁂𑀓𑁆𑀔𑀫𑁆𑀫𑀲𑀺𑀢𑀁 𑀲𑁄𑀫𑀦𑀲𑁆𑀲𑀦𑁆𑀢𑀺 𑀇𑀤𑀁 𑀭𑀜𑁆𑀜𑁄 𑀯𑀺𑀬 𑀅𑀢𑁆𑀢𑀦𑁄 𑀲𑀺𑀭𑀺𑀲𑀫𑁆𑀧𑀢𑁆𑀢𑀺𑀁 𑀑𑀮𑁄𑀓𑁂𑀦𑁆𑀢𑀲𑁆𑀲 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀲𑀗𑁆𑀔𑀸𑀭𑀸𑀦𑀁 𑀪𑁂𑀤𑀁 𑀧𑀲𑁆𑀲𑀢𑁄 𑀲𑀗𑁆𑀔𑀸𑀭𑀕𑀢𑀫𑁆𑀳𑀺 𑀢𑀺𑀓𑁆𑀔𑁂 𑀲𑀽𑀭𑁂 𑀯𑀺𑀧𑀲𑁆𑀲𑀦𑀸𑀜𑀸𑀡𑁂 𑀯𑀳𑀦𑁆𑀢𑁂 𑀉𑀧𑁆𑀧𑀦𑁆𑀦𑀲𑁄𑀫𑀦𑀲𑁆𑀲𑀁 ‘‘𑀦𑁂𑀓𑁆𑀔𑀫𑁆𑀫𑀲𑀺𑀢𑀁 𑀲𑁄𑀫𑀦𑀲𑁆𑀲’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀲𑀼𑀜𑁆𑀜𑀸𑀕𑀸𑀭𑀁 𑀧𑀯𑀺𑀝𑁆𑀞𑀲𑁆𑀲, 𑀲𑀦𑁆𑀢𑀘𑀺𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀅𑀫𑀸𑀦𑀼𑀲𑀻 𑀭𑀢𑀻 𑀳𑁄𑀢𑀺, 𑀲𑀫𑁆𑀫𑀸 𑀥𑀫𑁆𑀫𑀁 𑀯𑀺𑀧𑀲𑁆𑀲𑀢𑁄.

𑀬𑀢𑁄 𑀬𑀢𑁄 𑀲𑀫𑁆𑀫𑀲𑀢𑀺, 𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀁;

𑀮𑀪𑀢𑀻 𑀧𑀻𑀢𑀺𑀧𑀸𑀫𑁄𑀚𑁆𑀚𑀁, 𑀅𑀫𑀢𑀦𑁆𑀢𑀁 𑀯𑀺𑀚𑀸𑀦𑀢’’𑀦𑁆𑀢𑀺. (𑀥. 𑀧. 𑁩𑁭𑁩-𑁩𑁭𑁪);

𑀇𑀫𑀸𑀦𑀻𑀢𑀺 𑀇𑀫𑀸𑀦𑀺 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀇𑀝𑁆𑀞𑀸𑀭𑀫𑁆𑀫𑀡𑁂 𑀆𑀧𑀸𑀣𑀕𑀢𑁂 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀉𑀧𑁆𑀧𑀦𑁆𑀦𑀸𑀦𑀺 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀸𑀦𑀺 𑀲𑁄𑀫𑀦𑀲𑁆𑀲𑀸𑀦𑀺.

𑁩𑁦𑁭. 𑀅𑀢𑀻𑀢𑀦𑁆𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀢𑀸𑀯 𑀧𑀢𑁆𑀣𑁂𑀢𑁆𑀯𑀸 𑀅𑀮𑀪𑀦𑁆𑀢𑀲𑁆𑀲 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀼, 𑀅𑀢𑀻𑀢𑁂 𑀓𑀣𑀁 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀅𑀢𑀻𑀢𑁂𑀧𑀺 ‘‘𑀬𑀣𑀸𑀳𑀁 𑀏𑀢𑀭𑀳𑀺 𑀇𑀝𑁆𑀞𑀸𑀭𑀫𑁆𑀫𑀡𑀁 𑀧𑀢𑁆𑀣𑁂𑀢𑁆𑀯𑀸 𑀦 𑀮𑀪𑀸𑀫𑀺, 𑀏𑀯𑀁 𑀧𑀼𑀩𑁆𑀩𑁂𑀧𑀺 𑀧𑀢𑁆𑀣𑁂𑀢𑁆𑀯𑀸 𑀦 𑀮𑀪𑀺’’𑀦𑁆𑀢𑀺 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲 𑀩𑀮𑀯𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺.

𑀅𑀦𑀼𑀢𑁆𑀢𑀭𑁂𑀲𑀼 𑀯𑀺𑀫𑁄𑀓𑁆𑀔𑁂𑀲𑀽𑀢𑀺 𑀅𑀦𑀼𑀢𑁆𑀢𑀭𑀯𑀺𑀫𑁄𑀓𑁆𑀔𑁄 𑀦𑀸𑀫 𑀅𑀭𑀳𑀢𑁆𑀢𑀁, 𑀅𑀭𑀳𑀢𑁆𑀢𑁂 𑀧𑀢𑁆𑀣𑀦𑀁 𑀧𑀝𑁆𑀞𑀧𑁂𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀆𑀬𑀢𑀦𑀦𑁆𑀢𑀺 𑀅𑀭𑀳𑀢𑁆𑀢𑀸𑀬𑀢𑀦𑀁. 𑀧𑀺𑀳𑀁 𑀉𑀧𑀝𑁆𑀞𑀸𑀧𑀬𑀢𑁄𑀢𑀺 𑀧𑀢𑁆𑀣𑀦𑀁 𑀧𑀝𑁆𑀞𑀧𑁂𑀦𑁆𑀢𑀲𑁆𑀲. 𑀢𑀁 𑀧𑀦𑁂𑀢𑀁 𑀧𑀢𑁆𑀣𑀦𑀁 𑀧𑀝𑁆𑀞𑀧𑁂𑀦𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑀺, 𑀇𑀢𑀺 𑀧𑀢𑁆𑀣𑀦𑀸𑀫𑀽𑀮𑀓𑀢𑁆𑀢𑀸 ‘‘𑀧𑀺𑀳𑀁 𑀉𑀧𑀝𑁆𑀞𑀸𑀧𑀬𑀢𑁄’’𑀢𑀺 𑀯𑀼𑀢𑁆𑀢𑀁. 𑀇𑀫𑀸𑀦𑀺 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀸𑀦𑀺 𑀤𑁄𑀫𑀦𑀲𑁆𑀲𑀸𑀦𑀻𑀢𑀺 𑀇𑀫𑀸𑀦𑀺 𑀏𑀯𑀁 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀇𑀝𑁆𑀞𑀸𑀭𑀫𑁆𑀫𑀡𑁂 𑀆𑀧𑀸𑀣𑀕𑀢𑁂 𑀅𑀭𑀳𑀢𑁆𑀢𑁂 𑀧𑀺𑀳𑀁 𑀧𑀝𑁆𑀞𑀧𑁂𑀢𑁆𑀯𑀸 𑀢𑀤𑀥𑀺𑀕𑀫𑀸𑀬 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀯𑀺𑀧𑀲𑁆𑀲𑀦𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀲𑁆𑀲 𑁋 ‘‘𑀇𑀫𑀫𑁆𑀧𑀺 𑀧𑀓𑁆𑀔𑀁 𑀇𑀫𑀫𑁆𑀧𑀺 𑀫𑀸𑀲𑀁 𑀇𑀫𑀫𑁆𑀧𑀺 𑀲𑀁𑀯𑀘𑁆𑀙𑀭𑀁 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑀼𑀁 𑀦𑀸𑀲𑀓𑁆𑀔𑀺’’𑀦𑁆𑀢𑀺 𑀅𑀦𑀼𑀲𑁄𑀘𑀢𑁄 𑀕𑀸𑀫𑀦𑁆𑀢𑀧𑀩𑁆𑀪𑀸𑀭𑀯𑀸𑀲𑀺𑀫𑀳𑀸𑀲𑀻𑀯𑀢𑁆𑀣𑁂𑀭𑀲𑁆𑀲 𑀯𑀺𑀬 𑀅𑀲𑁆𑀲𑀼𑀥𑀸𑀭𑀸𑀧𑀯𑀢𑁆𑀢𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑀤𑁄𑀫𑀦𑀲𑁆𑀲𑀸𑀦𑀺 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀤𑁄𑀫𑀦𑀲𑁆𑀲𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀯𑀢𑁆𑀣𑀼 𑀧𑀦 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬 𑀲𑀓𑁆𑀓𑀧𑀜𑁆𑀳𑀯𑀡𑁆𑀡𑀦𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁬𑁧) 𑀯𑀺𑀢𑁆𑀣𑀸𑀭𑀺𑀢𑀁, 𑀇𑀘𑁆𑀙𑀦𑁆𑀢𑁂𑀦 𑀢𑀢𑁄 𑀕𑀳𑁂𑀢𑀩𑁆𑀩𑀁.

𑁩𑁦𑁮. 𑀉𑀧𑁆𑀧𑀚𑁆𑀚𑀢𑀺 𑀉𑀧𑁂𑀓𑁆𑀔𑀸𑀢𑀺 𑀏𑀢𑁆𑀣 𑀉𑀧𑁂𑀓𑁆𑀔𑀸 𑀦𑀸𑀫 𑀅𑀜𑁆𑀜𑀸𑀡𑀼𑀧𑁂𑀔𑀸. 𑀅𑀦𑁄𑀥𑀺𑀚𑀺𑀦𑀲𑁆𑀲𑀸𑀢𑀺 𑀓𑀺𑀮𑁂𑀲𑁄𑀥𑀺𑀁 𑀚𑀺𑀦𑀺𑀢𑁆𑀯𑀸 𑀞𑀺𑀢𑀢𑁆𑀢𑀸 𑀔𑀻𑀡𑀸𑀲𑀯𑁄 𑀑𑀥𑀺𑀚𑀺𑀦𑁄 𑀦𑀸𑀫, 𑀢𑀲𑁆𑀫𑀸 𑀅𑀔𑀻𑀡𑀸𑀲𑀯𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀅𑀯𑀺𑀧𑀸𑀓𑀚𑀺𑀦𑀲𑁆𑀲𑀸𑀢𑀺 𑀏𑀢𑁆𑀣𑀧𑀺 𑀆𑀬𑀢𑀺𑀁 𑀯𑀺𑀧𑀸𑀓𑀁 𑀚𑀺𑀦𑀺𑀢𑁆𑀯𑀸 𑀞𑀺𑀢𑀢𑁆𑀢𑀸 𑀔𑀻𑀡𑀸𑀲𑀯𑁄𑀯 𑀯𑀺𑀧𑀸𑀓𑀚𑀺𑀦𑁄 𑀦𑀸𑀫, 𑀢𑀲𑁆𑀫𑀸 𑀅𑀔𑀻𑀡𑀸𑀲𑀯𑀲𑁆𑀲𑁂𑀯𑀸𑀢𑀺 𑀅𑀢𑁆𑀣𑁄. 𑀅𑀦𑀸𑀤𑀻𑀦𑀯𑀤𑀲𑁆𑀲𑀸𑀯𑀺𑀦𑁄𑀢𑀺𑀆𑀤𑀻𑀦𑀯𑀢𑁄 𑀉𑀧𑀤𑁆𑀤𑀯𑀢𑁄 𑀅𑀧𑀲𑁆𑀲𑀦𑁆𑀢𑀲𑁆𑀲. 𑀇𑀫𑀸 𑀙 𑀕𑁂𑀳𑀲𑀺𑀢𑀸 𑀉𑀧𑁂𑀓𑁆𑀔𑀸𑀢𑀺 𑀇𑀫𑀸 𑀏𑀯𑀁 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀇𑀝𑁆𑀞𑀸𑀭𑀫𑁆𑀫𑀡𑁂 𑀆𑀧𑀸𑀣𑀕𑀢𑁂 𑀕𑀼𑀴𑀧𑀺𑀡𑁆𑀟𑀓𑁂 𑀦𑀺𑀮𑀻𑀦𑀫𑀓𑁆𑀔𑀺𑀓𑀸 𑀯𑀺𑀬 𑀭𑀽𑀧𑀸𑀤𑀻𑀦𑀺 𑀅𑀦𑀢𑀺𑀯𑀢𑁆𑀢𑀫𑀸𑀦𑀸 𑀢𑀢𑁆𑀣 𑀮𑀕𑁆𑀕𑀸 𑀮𑀕𑁆𑀕𑀺𑀢𑀸 𑀳𑀼𑀢𑁆𑀯𑀸 𑀉𑀧𑁆𑀧𑀦𑁆𑀦𑀸 𑀉𑀧𑁂𑀓𑁆𑀔𑀸 𑀙 𑀕𑁂𑀳𑀲𑀺𑀢𑀸 𑀉𑀧𑁂𑀓𑁆𑀔𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀭𑀽𑀧𑀁 𑀲𑀸 𑀅𑀢𑀺𑀯𑀢𑁆𑀢𑀢𑀻𑀢𑀺 𑀭𑀽𑀧𑀁 𑀲𑀸 𑀅𑀦𑀢𑀺𑀓𑁆𑀓𑀫𑀢𑀺, 𑀢𑀢𑁆𑀣 𑀦𑀺𑀓𑀦𑁆𑀢𑀺𑀯𑀲𑁂𑀦 𑀦 𑀢𑀺𑀝𑁆𑀞𑀢𑀺. 𑀇𑀫𑀸 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀸 𑀉𑀧𑁂𑀓𑁆𑀔𑀸𑀢𑀺 𑀇𑀫𑀸 𑀏𑀯𑀁 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀇𑀝𑁆𑀞𑀸𑀤𑀺𑀆𑀭𑀫𑁆𑀫𑀡𑁂 𑀆𑀧𑀸𑀣𑀕𑀢𑁂 𑀇𑀝𑁆𑀞𑁂 𑀅𑀭𑀚𑁆𑀚𑀦𑁆𑀢𑀲𑁆𑀲, 𑀅𑀦𑀺𑀝𑁆𑀞𑁂 𑀅𑀤𑀼𑀲𑁆𑀲𑀦𑁆𑀢𑀲𑁆𑀲, 𑀅𑀲𑀫𑀧𑁂𑀓𑁆𑀔𑀦𑁂 𑀅𑀲𑀫𑁆𑀫𑀼𑀬𑁆𑀳𑀦𑁆𑀢𑀲𑁆𑀲, 𑀉𑀧𑁆𑀧𑀦𑁆𑀦𑀯𑀺𑀧𑀲𑁆𑀲𑀦𑀸-𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀸 𑀉𑀧𑁂𑀓𑁆𑀔𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁩𑁦𑁯. 𑀢𑀢𑁆𑀭 𑀇𑀤𑀁 𑀦𑀺𑀲𑁆𑀲𑀸𑀬 𑀇𑀤𑀁 𑀧𑀚𑀳𑀣𑀸𑀢𑀺 𑀢𑁂𑀲𑀼 𑀙𑀢𑁆𑀢𑀺𑀁𑀲𑀲𑀢𑁆𑀢𑀧𑀤𑁂𑀲𑀼 𑀅𑀝𑁆𑀞𑀸𑀭𑀲 𑀦𑀺𑀲𑁆𑀲𑀸𑀬 𑀅𑀝𑁆𑀞𑀸𑀭𑀲 𑀧𑀚𑀳𑀣𑀸𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯 𑁋 ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑀸𑀦𑀺 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀸𑀦𑀻’’𑀢𑀺𑀆𑀤𑀺𑀫𑀸𑀳. 𑀦𑀺𑀲𑁆𑀲𑀸𑀬 𑀆𑀕𑀫𑁆𑀫𑀸𑀢𑀺 𑀧𑀯𑀢𑁆𑀢𑀦𑀯𑀲𑁂𑀦 𑀦𑀺𑀲𑁆𑀲𑀸𑀬 𑀘𑁂𑀯 𑀆𑀕𑀫𑁆𑀫 𑀘. 𑀏𑀯𑀫𑁂𑀢𑁂𑀲𑀁 𑀲𑀫𑀢𑀺𑀓𑁆𑀓𑀫𑁄 𑀳𑁄𑀢𑀻𑀢𑀺 𑀏𑀯𑀁 𑀦𑁂𑀓𑁆𑀔𑀫𑁆𑀫𑀲𑀺𑀢𑀸𑀦𑀁 𑀧𑀯𑀢𑁆𑀢𑀦𑁂𑀦 𑀕𑁂𑀳𑀲𑀺𑀢𑀸𑀦𑀺 𑀅𑀢𑀺𑀓𑁆𑀓𑀦𑁆𑀢𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺.

𑀏𑀯𑀁 𑀲𑀭𑀺𑀓𑁆𑀔𑀓𑁂𑀦𑁂𑀯 𑀲𑀭𑀺𑀓𑁆𑀔𑀓𑀁 𑀚𑀳𑀸𑀧𑁂𑀢𑁆𑀯𑀸 𑀇𑀤𑀸𑀦𑀺 𑀩𑀮𑀯𑀢𑀸 𑀤𑀼𑀩𑁆𑀩𑀮𑀁 𑀚𑀳𑀸𑀧𑁂𑀦𑁆𑀢𑁄 𑁋 ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑀸𑀦𑀺 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀸𑀦𑀺 𑀲𑁄𑀫𑀦𑀲𑁆𑀲𑀸𑀦𑀻’’𑀢𑀺𑀆𑀤𑀺𑀫𑀸𑀳. 𑀏𑀯𑀁 𑀦𑁂𑀓𑁆𑀔𑀫𑁆𑀫𑀲𑀺𑀢𑀲𑁄𑀫𑀦𑀲𑁆𑀲𑁂𑀳𑀺 𑀦𑁂𑀓𑁆𑀔𑀫𑁆𑀫𑀲𑀺𑀢𑀤𑁄𑀫𑀦𑀲𑁆𑀲𑀸𑀦𑀺, 𑀦𑁂𑀓𑁆𑀔𑀫𑁆𑀫𑀲𑀺𑀢𑀉𑀧𑁂𑀓𑁆𑀔𑀸𑀳𑀺 𑀘 𑀦𑁂𑀓𑁆𑀔𑀫𑁆𑀫𑀲𑀺𑀢𑀲𑁄𑀫𑀦𑀲𑁆𑀲𑀸𑀦𑀺 𑀚𑀳𑀸𑀧𑁂𑀦𑁆𑀢𑁂𑀦 𑀩𑀮𑀯𑀢𑀸 𑀤𑀼𑀩𑁆𑀩𑀮𑀧𑁆𑀧𑀳𑀸𑀦𑀁 𑀓𑀣𑀺𑀢𑀁.

𑀏𑀢𑁆𑀣 𑀧𑀦 𑀞𑀢𑁆𑀯𑀸 𑀉𑀧𑁂𑀓𑁆𑀔𑀸𑀓𑀣𑀸 𑀯𑁂𑀤𑀺𑀢𑀩𑁆𑀩𑀸 𑁋 𑀅𑀝𑁆𑀞𑀲𑀼 𑀳𑀺 𑀲𑀫𑀸𑀧𑀢𑁆𑀢𑀻𑀲𑀼 𑀧𑀞𑀫𑀸𑀤𑀻𑀦𑀺 𑀘 𑀢𑀻𑀡𑀺 𑀛𑀸𑀦𑀸𑀦𑀺, 𑀲𑀼𑀤𑁆𑀥𑀲𑀗𑁆𑀔𑀸𑀭𑁂 𑀘 𑀧𑀸𑀤𑀓𑁂 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀆𑀭𑀤𑁆𑀥𑀸𑀦𑀁 𑀘𑀢𑀼𑀦𑁆𑀦𑀁 𑀪𑀺𑀓𑁆𑀔𑀽𑀦𑀁 𑀧𑀼𑀩𑁆𑀩𑀪𑀸𑀕𑀯𑀺𑀧𑀲𑁆𑀲𑀦𑀸 𑀲𑁄𑀫𑀦𑀲𑁆𑀲𑀲𑀳𑀕𑀢𑀸 𑀯𑀸 𑀳𑁄𑀢𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀯𑀸, 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻 𑀧𑀦 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀯. 𑀘𑀢𑀼𑀢𑁆𑀣𑀚𑁆𑀛𑀸𑀦𑀸𑀤𑀻𑀦𑀺 𑀧𑀸𑀤𑀓𑀸𑀦𑀺 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀆𑀭𑀤𑁆𑀥𑀸𑀦𑀁 𑀧𑀜𑁆𑀘𑀦𑁆𑀦𑀁 𑀧𑀼𑀩𑁆𑀩𑀪𑀸𑀕𑀯𑀺𑀧𑀲𑁆𑀲𑀦𑀸 𑀧𑀼𑀭𑀺𑀫𑀲𑀤𑀺𑀲𑀸𑀯. 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻 𑀧𑀦 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀳𑁄𑀢𑀺. 𑀇𑀤𑀁 𑀲𑀦𑁆𑀥𑀸𑀬 𑁋 ‘‘𑀬𑀸 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀸 𑀉𑀧𑁂𑀓𑁆𑀔𑀸, 𑀢𑀸 𑀦𑀺𑀲𑁆𑀲𑀸𑀬 𑀢𑀸 𑀆𑀕𑀫𑁆𑀫, 𑀬𑀸𑀦𑀺 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀸𑀦𑀺 𑀲𑁄𑀫𑀦𑀲𑁆𑀲𑀸𑀦𑀺, 𑀢𑀸𑀦𑀺 𑀧𑀚𑀳𑀣𑀸’’𑀢𑀺 𑀯𑀼𑀢𑁆𑀢𑀁. 𑀦 𑀓𑁂𑀯𑀮𑀜𑁆𑀘 𑀏𑀯𑀁𑀧𑀝𑀺𑀧𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀬𑀁 𑀯𑀺𑀧𑀲𑁆𑀲𑀦𑀸𑀬 𑀯𑁂𑀤𑀦𑀸𑀯𑀺𑀲𑁂𑀲𑁄𑀯 𑀳𑁄𑀢𑀺, 𑀅𑀭𑀺𑀬𑀫𑀕𑁆𑀕𑁂𑀧𑀺 𑀧𑀦 𑀛𑀸𑀦𑀗𑁆𑀕𑀩𑁄𑀚𑁆𑀛𑀗𑁆𑀕𑀫𑀕𑁆𑀕𑀗𑁆𑀕𑀸𑀦𑀫𑁆𑀧𑀺 𑀯𑀺𑀲𑁂𑀲𑁄 𑀳𑁄𑀢𑀺.

𑀓𑁄 𑀧𑀦𑁂𑀢𑀁 𑀯𑀺𑀲𑁂𑀲𑀁 𑀦𑀺𑀬𑀫𑁂𑀢𑀺? 𑀓𑁂𑀘𑀺 𑀢𑀸𑀯 𑀣𑁂𑀭𑀸 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀚𑁆𑀛𑀸𑀦𑀁 𑀦𑀺𑀬𑀫𑁂𑀢𑀻𑀢𑀺 𑀯𑀤𑀦𑁆𑀢𑀺, 𑀓𑁂𑀘𑀺 𑀯𑀺𑀧𑀲𑁆𑀲𑀦𑀸𑀬 𑀆𑀭𑀫𑁆𑀫𑀡𑀪𑀽𑀢𑀸 𑀔𑀦𑁆𑀥𑀸 𑀦𑀺𑀬𑀫𑁂𑀦𑁆𑀢𑀻𑀢𑀺 𑀯𑀤𑀦𑁆𑀢𑀺, 𑀓𑁂𑀘𑀺 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑁄 𑀦𑀺𑀬𑀫𑁂𑀢𑀻𑀢𑀺 𑀯𑀤𑀦𑁆𑀢𑀺. 𑀢𑁂𑀲𑀫𑁆𑀧𑀺 𑀯𑀸𑀤𑁂 𑀅𑀬𑀫𑁂𑀯 𑀧𑀼𑀩𑁆𑀩𑀪𑀸𑀕𑁂 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻𑀯𑀺𑀧𑀲𑁆𑀲𑀦𑀸 𑀦𑀺𑀬𑀫𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀯𑀺𑀦𑀺𑀘𑁆𑀙𑀬𑀓𑀣𑀸 𑀧𑀦𑁂𑀢𑁆𑀣 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀸𑀯.

𑁩𑁧𑁦. 𑀦𑀸𑀦𑀢𑁆𑀢𑀸𑀢𑀺 𑀦𑀸𑀦𑀸 𑀩𑀳𑀽 𑀅𑀦𑁂𑀓𑀧𑁆𑀧𑀓𑀸𑀭𑀸. 𑀦𑀸𑀦𑀢𑁆𑀢𑀲𑀺𑀢𑀸𑀢𑀺 𑀦𑀸𑀦𑀸𑀭𑀫𑁆𑀫𑀡𑀦𑀺𑀲𑁆𑀲𑀺𑀢𑀸. 𑀏𑀓𑀢𑁆𑀢𑀸𑀢𑀺 𑀏𑀓𑀸. 𑀏𑀓𑀢𑁆𑀢𑀲𑀺𑀢𑀸𑀢𑀺 𑀏𑀓𑀸𑀭𑀫𑁆𑀫𑀡𑀦𑀺𑀲𑁆𑀲𑀺𑀢𑀸. 𑀓𑀢𑀫𑀸 𑀧𑀦𑀸𑀬𑀁 𑀉𑀧𑁂𑀓𑁆𑀔𑀸𑀢𑀺? 𑀳𑁂𑀝𑁆𑀞𑀸 𑀢𑀸𑀯 𑀅𑀜𑁆𑀜𑀸𑀡𑀼𑀧𑁂𑀓𑁆𑀔𑀸 𑀯𑀼𑀢𑁆𑀢𑀸, 𑀉𑀧𑀭𑀺 𑀙𑀴𑀗𑁆𑀕𑀼𑀧𑁂𑀓𑁆𑀔𑀸 𑀯𑀓𑁆𑀔𑀢𑀺, 𑀇𑀥 𑀲𑀫𑀣𑀉𑀧𑁂𑀓𑁆𑀔𑀸, 𑀯𑀺𑀧𑀲𑁆𑀲𑀦𑀼𑀧𑁂𑀓𑁆𑀔𑀸𑀢𑀺 𑀤𑁆𑀯𑁂 𑀉𑀧𑁂𑀓𑁆𑀔𑀸 𑀕𑀳𑀺𑀢𑀸.

𑀢𑀢𑁆𑀣 𑀬𑀲𑁆𑀫𑀸 𑀅𑀜𑁆𑀜𑀸𑀯 𑀭𑀽𑀧𑁂𑀲𑀼 𑀉𑀧𑁂𑀓𑁆𑀔𑀸, 𑀅𑀜𑁆𑀜𑀸𑀯 𑀲𑀤𑁆𑀤𑀸𑀤𑀻𑀲𑀼, 𑀦 𑀳𑀺 𑀬𑀸 𑀭𑀽𑀧𑁂 𑀉𑀧𑁂𑀓𑁆𑀔𑀸, 𑀲𑀸 𑀲𑀤𑁆𑀤𑀸𑀤𑀻𑀲𑀼 𑀳𑁄𑀢𑀺. 𑀭𑀽𑀧𑁂 𑀉𑀧𑁂𑀓𑁆𑀔𑀸 𑀘 𑀭𑀽𑀧𑀫𑁂𑀯 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺, 𑀦 𑀲𑀤𑁆𑀤𑀸𑀤𑀬𑁄. 𑀭𑀽𑀧𑁂 𑀉𑀧𑁂𑀓𑁆𑀔𑀸𑀪𑀸𑀯𑀜𑁆𑀘 𑀅𑀜𑁆𑀜𑀸 𑀲𑀫𑀣𑀉𑀧𑁂𑀓𑁆𑀔𑀸 𑀧𑀣𑀯𑀻𑀓𑀲𑀺𑀡𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺, 𑀅𑀜𑁆𑀜𑀸 𑀆𑀧𑁄𑀓𑀲𑀺𑀡𑀸𑀤𑀻𑀦𑀺. 𑀢𑀲𑁆𑀫𑀸 𑀦𑀸𑀦𑀢𑁆𑀢𑀁 𑀦𑀸𑀦𑀢𑁆𑀢𑀲𑀺𑀢𑀁 𑀯𑀺𑀪𑀚𑀦𑁆𑀢𑁄 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀉𑀧𑁂𑀓𑁆𑀔𑀸 𑀭𑀽𑀧𑁂𑀲𑀽𑀢𑀺𑀆𑀤𑀺𑀫𑀸𑀳. 𑀬𑀲𑁆𑀫𑀸 𑀧𑀦 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀸𑀦𑀺 𑀯𑀸 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀸𑀤𑀻𑀦𑀺 𑀯𑀸 𑀦𑀢𑁆𑀣𑀺, 𑀢𑀲𑁆𑀫𑀸 𑀏𑀓𑀢𑁆𑀢𑀁 𑀏𑀓𑀢𑁆𑀢𑀲𑀺𑀢𑀁 𑀯𑀺𑀪𑀚𑀦𑁆𑀢𑁄 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀉𑀧𑁂𑀓𑁆𑀔𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀦𑀺𑀲𑁆𑀲𑀺𑀢𑀸𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀉𑀧𑁂𑀓𑁆𑀔𑀸 𑀲𑀫𑁆𑀧𑀬𑀼𑀢𑁆𑀢𑀯𑀲𑁂𑀦 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀦𑀺𑀲𑁆𑀲𑀺𑀢𑀸, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀔𑀦𑁆𑀥𑁂 𑀯𑀺𑀧𑀲𑁆𑀲𑀦𑁆𑀢𑀲𑁆𑀲 𑀯𑀺𑀧𑀲𑁆𑀲𑀦𑀼𑀧𑁂𑀓𑁆𑀔𑀸 𑀆𑀭𑀫𑁆𑀫𑀡𑀯𑀲𑁂𑀦 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀦𑀺𑀲𑁆𑀲𑀺𑀢𑀸. 𑀲𑁂𑀲𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀢𑀁 𑀧𑀚𑀳𑀣𑀸𑀢𑀺 𑀏𑀢𑁆𑀣 𑀅𑀭𑀽𑀧𑀸𑀯𑀘𑀭𑀲𑀫𑀸𑀧𑀢𑁆𑀢𑀺𑀉𑀧𑁂𑀓𑁆𑀔𑀸𑀬 𑀭𑀽𑀧𑀸𑀯𑀘𑀭𑀲𑀫𑀸𑀧𑀢𑁆𑀢𑀺𑀉𑀧𑁂𑀓𑁆𑀔𑀁 𑀧𑀚𑀳𑀸𑀧𑁂𑀢𑀺, 𑀅𑀭𑀽𑀧𑀸𑀯𑀘𑀭𑀯𑀺𑀧𑀲𑁆𑀲𑀦𑀼𑀧𑁂𑀓𑁆𑀔𑀸𑀬 𑀭𑀽𑀧𑀸𑀯𑀘𑀭𑀯𑀺𑀧𑀲𑁆𑀲𑀦𑀼𑀧𑁂𑀓𑁆𑀔𑀁.

𑀅𑀢𑀫𑁆𑀫𑀬𑀢𑀦𑁆𑀢𑀺 𑀏𑀢𑁆𑀣 𑀢𑀫𑁆𑀫𑀬𑀢𑀸 𑀦𑀸𑀫 𑀢𑀡𑁆𑀳𑀸, 𑀢𑀲𑁆𑀲𑀸 𑀧𑀭𑀺𑀬𑀸𑀤𑀸𑀦𑀢𑁄 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻𑀯𑀺𑀧𑀲𑁆𑀲𑀦𑀸 𑀅𑀢𑀫𑁆𑀫𑀬𑀢𑀸𑀢𑀺 𑀯𑀼𑀘𑁆𑀘𑀢𑀺. 𑀢𑀁 𑀧𑀚𑀳𑀣𑀸𑀢𑀺 𑀇𑀥 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻𑀯𑀺𑀧𑀲𑁆𑀲𑀦𑀸𑀬 𑀅𑀭𑀽𑀧𑀸𑀯𑀘𑀭𑀲𑀫𑀸𑀧𑀢𑁆𑀢𑀺𑀉𑀧𑁂𑀓𑁆𑀔𑀜𑁆𑀘 𑀯𑀺𑀧𑀲𑁆𑀲𑀦𑀼𑀧𑁂𑀓𑁆𑀔𑀜𑁆𑀘 𑀧𑀚𑀳𑀸𑀧𑁂𑀢𑀺.

𑁩𑁧𑁧. 𑀬𑀤𑀭𑀺𑀬𑁄𑀢𑀺 𑀬𑁂 𑀲𑀢𑀺𑀧𑀝𑁆𑀞𑀸𑀦𑁂 𑀅𑀭𑀺𑀬𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀲𑁂𑀯𑀢𑀺. 𑀢𑀢𑁆𑀣 𑀢𑀻𑀲𑀼 𑀞𑀸𑀦𑁂𑀲𑀼 𑀲𑀢𑀺𑀁 𑀧𑀝𑁆𑀞𑀧𑁂𑀦𑁆𑀢𑁄 𑀲𑀢𑀺𑀧𑀝𑁆𑀞𑀸𑀦𑁂 𑀲𑁂𑀯𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀦 𑀲𑀼𑀲𑁆𑀲𑀽𑀲𑀦𑁆𑀢𑀻𑀢𑀺 𑀲𑀤𑁆𑀤𑀳𑀺𑀢𑁆𑀯𑀸 𑀲𑁄𑀢𑀼𑀁 𑀦 𑀇𑀘𑁆𑀙𑀦𑁆𑀢𑀺. 𑀦 𑀅𑀜𑁆𑀜𑀸𑀢𑀺 𑀚𑀸𑀦𑀦𑀢𑁆𑀣𑀸𑀬 𑀘𑀺𑀢𑁆𑀢𑀁 𑀦 𑀉𑀧𑀝𑁆𑀞𑀧𑁂𑀦𑁆𑀢𑀺. 𑀯𑁄𑀓𑁆𑀓𑀫𑁆𑀫𑀸𑀢𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸. 𑀲𑀢𑁆𑀣𑀼 𑀲𑀸𑀲𑀦𑀸𑀢𑀺 𑀲𑀢𑁆𑀣𑀼 𑀑𑀯𑀸𑀤𑀁 𑀕𑀳𑁂𑀢𑀩𑁆𑀩𑀁 𑀧𑀽𑀭𑁂𑀢𑀩𑁆𑀩𑀁 𑀦 𑀫𑀜𑁆𑀜𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀦 𑀘 𑀅𑀢𑁆𑀢𑀫𑀦𑁄𑀢𑀺 𑀦 𑀲𑀓𑀫𑀦𑁄. 𑀏𑀢𑁆𑀣 𑀘 𑀕𑁂𑀳𑀲𑀺𑀢𑀤𑁄𑀫𑀦𑀲𑁆𑀲𑀯𑀲𑁂𑀦 𑀅𑀧𑁆𑀧𑀢𑀻𑀢𑁄 𑀳𑁄𑀢𑀻𑀢𑀺 𑀦 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄, 𑀅𑀧𑁆𑀧𑀝𑀺𑀧𑀦𑁆𑀦𑀓𑁂𑀲𑀼 𑀧𑀦 𑀅𑀢𑁆𑀢𑀫𑀦𑀢𑀸𑀓𑀸𑀭𑀡𑀲𑁆𑀲 𑀅𑀪𑀸𑀯𑁂𑀦𑁂𑀢𑀁 𑀯𑀼𑀢𑁆𑀢𑀁. 𑀅𑀦𑀯𑀲𑁆𑀲𑀼𑀢𑁄𑀢𑀺 𑀧𑀝𑀺𑀖𑀅𑀯𑀲𑁆𑀲𑀯𑁂𑀦 𑀅𑀦𑀯𑀲𑁆𑀲𑀼𑀢𑁄. 𑀲𑀢𑁄 𑀲𑀫𑁆𑀧𑀚𑀸𑀦𑁄𑀢𑀺 𑀲𑀢𑀺𑀬𑀸 𑀘 𑀜𑀸𑀡𑁂𑀦 𑀘 𑀲𑀫𑀦𑁆𑀦𑀸𑀕𑀢𑁄. 𑀉𑀧𑁂𑀓𑁆𑀔𑀓𑁄𑀢𑀺 𑀙𑀴𑀗𑁆𑀕𑀼𑀧𑁂𑀓𑁆𑀔𑀸𑀬 𑀉𑀧𑁂𑀓𑁆𑀔𑀓𑁄. 𑀅𑀢𑁆𑀢𑀫𑀦𑁄𑀢𑀺 𑀇𑀥𑀸𑀧𑀺 𑀕𑁂𑀳𑀲𑀺𑀢𑀲𑁄𑀫𑀦𑀲𑁆𑀲𑀯𑀲𑁂𑀦 𑀉𑀧𑁆𑀧𑀺𑀮𑀸𑀯𑀺𑀢𑁄𑀢𑀺 𑀦 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄, 𑀧𑀝𑀺𑀧𑀦𑁆𑀦𑀓𑁂𑀲𑀼 𑀧𑀦 𑀅𑀦𑀢𑁆𑀢𑀫𑀦𑀢𑀸𑀓𑀸𑀭𑀡𑀲𑁆𑀲 𑀅𑀪𑀸𑀯𑁂𑀦𑁂𑀢𑀁 𑀯𑀼𑀢𑁆𑀢𑀁. 𑀅𑀦𑀯𑀲𑁆𑀲𑀼𑀢𑁄𑀢𑀺 𑀭𑀸𑀕𑀸𑀯𑀲𑁆𑀲𑀯𑁂𑀦 𑀅𑀦𑀯𑀲𑁆𑀲𑀼𑀢𑁄.

𑁩𑁧𑁨. 𑀲𑀸𑀭𑀺𑀢𑁄𑀢𑀺 𑀤𑀫𑀺𑀢𑁄. 𑀏𑀓𑀫𑁂𑀯 𑀤𑀺𑀲𑀁 𑀥𑀸𑀯𑀢𑀻𑀢𑀺 𑀅𑀦𑀺𑀯𑀢𑁆𑀢𑀺𑀢𑁆𑀯𑀸 𑀥𑀸𑀯𑀦𑁆𑀢𑁄 𑀏𑀓𑀁𑀬𑁂𑀯 𑀤𑀺𑀲𑀁 𑀥𑀸𑀯𑀢𑀺, 𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑀦 𑀅𑀧𑀭𑀁 𑀥𑀸𑀯𑀺𑀢𑀼𑀁 𑀲𑀓𑁆𑀓𑁄𑀢𑀺. 𑀅𑀝𑁆𑀞 𑀤𑀺𑀲𑀸 𑀯𑀺𑀥𑀸𑀯𑀢𑀻𑀢𑀺 𑀏𑀓𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀺𑀦𑁆𑀦𑁄 𑀓𑀸𑀬𑁂𑀦 𑀅𑀦𑀺𑀯𑀢𑁆𑀢𑀺𑀢𑁆𑀯𑀸𑀯 𑀯𑀺𑀫𑁄𑀓𑁆𑀔𑀯𑀲𑁂𑀦 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀅𑀝𑁆𑀞 𑀤𑀺𑀲𑀸 𑀯𑀺𑀥𑀸𑀯𑀢𑀺, 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑁄 𑀯𑀸 𑀤𑀓𑁆𑀔𑀺𑀡𑀸𑀤𑀻𑀲𑀼 𑀅𑀜𑁆𑀜𑀢𑀭𑀤𑀺𑀲𑀸𑀪𑀺𑀫𑀼𑀔𑁄 𑀯𑀸 𑀦𑀺𑀲𑀻𑀤𑀺𑀢𑁆𑀯𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀲𑀫𑀸𑀧𑀚𑁆𑀚𑀢𑀺𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀲𑀴𑀸𑀬𑀢𑀦𑀯𑀺𑀪𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.