𑁪. 𑀧𑁄𑀢𑀮𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁧. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀧𑁄𑀢𑀮𑀺𑀬𑀲𑀼𑀢𑁆𑀢𑀁. 𑀢𑀢𑁆𑀣 𑀅𑀗𑁆𑀕𑀼𑀢𑁆𑀢𑀭𑀸𑀧𑁂𑀲𑀽𑀢𑀺 𑀅𑀗𑁆𑀕𑀸𑀬𑁂𑀯 𑀲𑁄 𑀚𑀦𑀧𑀤𑁄, 𑀫𑀳𑀺𑀬𑀸 𑀧𑀦𑀲𑁆𑀲 𑀉𑀢𑁆𑀢𑀭𑁂𑀦 𑀬𑀸 𑀆𑀧𑁄, 𑀢𑀸𑀲𑀁 𑀅𑀯𑀺𑀤𑀽𑀭𑀢𑁆𑀢𑀸 𑀉𑀢𑁆𑀢𑀭𑀸𑀧𑁄𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀓𑀢𑀭𑀫𑀳𑀺𑀬𑀸 𑀉𑀢𑁆𑀢𑀭𑁂𑀦 𑀬𑀸 𑀆𑀧𑁄𑀢𑀺, 𑀫𑀳𑀸𑀫𑀳𑀺𑀬𑀸. 𑀢𑀢𑁆𑀣𑀸𑀬𑀁 𑀆𑀯𑀺𑀪𑀸𑀯𑀓𑀣𑀸 𑁋 𑀅𑀬𑀁 𑀓𑀺𑀭 𑀚𑀫𑁆𑀩𑀼𑀤𑀻𑀧𑁄 𑀤𑀲𑀲𑀳𑀲𑁆𑀲𑀬𑁄𑀚𑀦𑀧𑀭𑀺𑀫𑀸𑀡𑁄. 𑀢𑀢𑁆𑀣 𑀘 𑀘𑀢𑀼𑀲𑀳𑀲𑁆𑀲𑀬𑁄𑀚𑀦𑀧𑁆𑀧𑀫𑀸𑀡𑁄 𑀧𑀤𑁂𑀲𑁄 𑀉𑀤𑀓𑁂𑀦 𑀅𑀚𑁆𑀛𑁄𑀢𑁆𑀣𑀝𑁄 𑀲𑀫𑀼𑀤𑁆𑀤𑁄𑀢𑀺 𑀲𑀗𑁆𑀔𑀁 𑀕𑀢𑁄. 𑀢𑀺𑀲𑀳𑀲𑁆𑀲𑀬𑁄𑀚𑀦𑀧𑁆𑀧𑀫𑀸𑀡𑁂 𑀫𑀦𑀼𑀲𑁆𑀲𑀸 𑀯𑀲𑀦𑁆𑀢𑀺. 𑀢𑀺𑀲𑀳𑀲𑁆𑀲𑀬𑁄𑀚𑀦𑀧𑁆𑀧𑀫𑀸𑀡𑁂 𑀳𑀺𑀫𑀯𑀸 𑀧𑀢𑀺𑀝𑁆𑀞𑀺𑀢𑁄 𑀉𑀩𑁆𑀩𑁂𑀥𑁂𑀦 𑀧𑀜𑁆𑀘𑀬𑁄𑀚𑀦𑀲𑀢𑀺𑀓𑁄 𑀘𑀢𑀼𑀭𑀸𑀲𑀻𑀢𑀺𑀓𑀽𑀝𑀲𑀳𑀲𑁆𑀲𑀧𑀝𑀺𑀫𑀡𑁆𑀟𑀺𑀢𑁄 𑀲𑀫𑀦𑁆𑀢𑀢𑁄 𑀲𑀦𑁆𑀤𑀫𑀸𑀦𑀧𑀜𑁆𑀘𑀲𑀢𑀦𑀤𑀻𑀯𑀺𑀘𑀺𑀢𑁆𑀢𑁄, 𑀬𑀢𑁆𑀣 𑀆𑀬𑀸𑀫𑀯𑀺𑀢𑁆𑀣𑀸𑀭𑁂𑀦 𑀘𑁂𑀯 𑀕𑀫𑁆𑀪𑀻𑀭𑀢𑀸𑀬 𑀘 𑀧𑀡𑁆𑀡𑀸𑀲𑀧𑀡𑁆𑀡𑀸𑀲𑀬𑁄𑀚𑀦𑀸 𑀤𑀺𑀬𑀟𑁆𑀠𑀬𑁄𑀚𑀦𑀲𑀢𑀧𑀭𑀺𑀫𑀡𑁆𑀟𑀮𑀸 𑀅𑀦𑁄𑀢𑀢𑁆𑀢𑀤𑀳𑁄 𑀓𑀡𑁆𑀡𑀫𑀼𑀡𑁆𑀟𑀤𑀳𑁄 𑀭𑀣𑀓𑀸𑀭𑀤𑀳𑁄 𑀙𑀤𑁆𑀤𑀦𑁆𑀢𑀤𑀳𑁄 𑀓𑀼𑀡𑀸𑀮𑀤𑀳𑁄 𑀫𑀦𑁆𑀤𑀸𑀓𑀺𑀦𑀻𑀤𑀳𑁄 𑀲𑀻𑀳𑀧𑀧𑀸𑀢𑀤𑀳𑁄𑀢𑀺 𑀲𑀢𑁆𑀢 𑀫𑀳𑀸𑀲𑀭𑀸 𑀧𑀢𑀺𑀝𑁆𑀞𑀺𑀢𑀸. 𑀢𑁂𑀲𑀼 𑀅𑀦𑁄𑀢𑀢𑁆𑀢𑀤𑀳𑁄 𑀲𑀼𑀤𑀲𑁆𑀲𑀦𑀓𑀽𑀝𑀁 𑀘𑀺𑀢𑁆𑀭𑀓𑀽𑀝𑀁 𑀓𑀸𑀴𑀓𑀽𑀝𑀁 𑀕𑀦𑁆𑀥𑀫𑀸𑀤𑀦𑀓𑀽𑀝𑀁 𑀓𑁂𑀮𑀸𑀲𑀓𑀽𑀝𑀦𑁆𑀢𑀺 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀧𑀩𑁆𑀩𑀢𑁂𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑁄.

𑀢𑀢𑁆𑀣 𑀲𑀼𑀤𑀲𑁆𑀲𑀦𑀓𑀽𑀝𑀁 𑀲𑁄𑀯𑀡𑁆𑀡𑀫𑀬𑀁 𑀤𑁆𑀯𑀺𑀬𑁄𑀚𑀦𑀲𑀢𑀼𑀩𑁆𑀩𑁂𑀥𑀁 𑀅𑀦𑁆𑀢𑁄𑀯𑀗𑁆𑀓𑀁 𑀓𑀸𑀓𑀫𑀼𑀔𑀲𑀡𑁆𑀞𑀸𑀦𑀁 𑀢𑀫𑁂𑀯 𑀲𑀭𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀞𑀺𑀢𑀁. 𑀘𑀺𑀢𑁆𑀭𑀓𑀽𑀝𑀁 𑀲𑀩𑁆𑀩𑀭𑀢𑀦𑀫𑀬𑀁. 𑀓𑀸𑀴𑀓𑀽𑀝𑀁 𑀅𑀜𑁆𑀚𑀦𑀫𑀬𑀁. 𑀕𑀦𑁆𑀥𑀫𑀸𑀤𑀦𑀓𑀽𑀝𑀁 𑀲𑀸𑀦𑀼𑀫𑀬𑀁 𑀅𑀩𑁆𑀪𑀦𑁆𑀢𑀭𑁂 𑀫𑀼𑀕𑁆𑀕𑀯𑀡𑁆𑀡𑀁, 𑀫𑀽𑀮𑀕𑀦𑁆𑀥𑁄 𑀲𑀸𑀭𑀕𑀦𑁆𑀥𑁄 𑀨𑁂𑀕𑁆𑀕𑀼𑀕𑀦𑁆𑀥𑁄 𑀢𑀘𑀕𑀦𑁆𑀥𑁄 𑀧𑀧𑀝𑀺𑀓𑀕𑀦𑁆𑀥𑁄 𑀭𑀲𑀕𑀦𑁆𑀥𑁄 𑀧𑀢𑁆𑀢𑀕𑀦𑁆𑀥𑁄 𑀧𑀼𑀧𑁆𑀨𑀕𑀦𑁆𑀥𑁄 𑀨𑀮𑀕𑀦𑁆𑀥𑁄 𑀕𑀦𑁆𑀥𑀕𑀦𑁆𑀥𑁄𑀢𑀺 𑀇𑀫𑁂𑀳𑀺 𑀤𑀲𑀳𑀺 𑀕𑀦𑁆𑀥𑁂𑀳𑀺 𑀉𑀲𑁆𑀲𑀦𑁆𑀦𑀁 𑀦𑀸𑀦𑀧𑁆𑀧𑀓𑀸𑀭𑀑𑀲𑀥𑀲𑀜𑁆𑀙𑀦𑁆𑀦𑀁, 𑀓𑀸𑀴𑀧𑀓𑁆𑀔𑀉𑀧𑁄𑀲𑀣𑀤𑀺𑀯𑀲𑁂 𑀆𑀤𑀺𑀢𑁆𑀢𑀫𑀺𑀯 𑀅𑀗𑁆𑀕𑀸𑀭𑀁 𑀚𑀮𑀦𑁆𑀢𑀁 𑀢𑀺𑀝𑁆𑀞𑀢𑀺. 𑀓𑁂𑀮𑀸𑀲𑀓𑀽𑀝𑀁 𑀭𑀚𑀢𑀫𑀬𑀁. 𑀲𑀩𑁆𑀩𑀸𑀦𑀺 𑀲𑀼𑀤𑀲𑁆𑀲𑀦𑁂𑀦 𑀲𑀫𑀸𑀦𑀼𑀩𑁆𑀩𑁂𑀥𑀲𑀡𑁆𑀞𑀸𑀦𑀸𑀦𑀺, 𑀢𑀫𑁂𑀯 𑀲𑀭𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀞𑀺𑀢𑀸𑀦𑀺. 𑀢𑀸𑀦𑀺 𑀲𑀩𑁆𑀩𑀸𑀦𑀺 𑀤𑁂𑀯𑀸𑀦𑀼𑀪𑀸𑀯𑁂𑀦 𑀦𑀸𑀕𑀸𑀦𑀼𑀪𑀸𑀯𑁂𑀦 𑀘 𑀯𑀲𑁆𑀲𑀦𑁆𑀢𑀺, 𑀦𑀤𑀺𑀬𑁄 𑀘 𑀢𑁂𑀲𑀼 𑀲𑀦𑁆𑀤𑀦𑁆𑀢𑀺. 𑀢𑀁 𑀲𑀩𑁆𑀩𑀫𑁆𑀧𑀺 𑀉𑀤𑀓𑀁 𑀅𑀦𑁄𑀢𑀢𑁆𑀢𑀫𑁂𑀯 𑀧𑀯𑀺𑀲𑀢𑀺. 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀤𑀓𑁆𑀔𑀺𑀡𑁂𑀦 𑀯𑀸 𑀉𑀢𑁆𑀢𑀭𑁂𑀦 𑀯𑀸 𑀕𑀘𑁆𑀙𑀦𑁆𑀢𑀸 𑀧𑀩𑁆𑀩𑀢𑀦𑁆𑀢𑀭𑁂𑀦 𑀢𑀢𑁆𑀣 𑀑𑀪𑀸𑀲𑀁 𑀓𑀭𑁄𑀦𑁆𑀢𑀺, 𑀉𑀚𑀼𑀁 𑀕𑀘𑁆𑀙𑀦𑁆𑀢𑀸 𑀦 𑀓𑀭𑁄𑀦𑁆𑀢𑀺, 𑀢𑁂𑀦𑁂𑀯𑀲𑁆𑀲 𑀅𑀦𑁄𑀢𑀢𑁆𑀢𑀦𑁆𑀢𑀺 𑀲𑀗𑁆𑀔𑀸 𑀉𑀤𑀧𑀸𑀤𑀺.

𑀢𑀢𑁆𑀣 𑀫𑀦𑁄𑀳𑀭𑀲𑀺𑀮𑀸𑀢𑀮𑀸𑀦𑀺 𑀦𑀺𑀫𑁆𑀫𑀘𑁆𑀙𑀓𑀘𑁆𑀙𑀧𑀸𑀦𑀺 𑀨𑀮𑀺𑀓𑀲𑀤𑀺𑀲𑀦𑀺𑀫𑁆𑀫𑀮𑀼𑀤𑀓𑀸𑀦𑀺 𑀦𑁆𑀳𑀸𑀦𑀢𑀺𑀢𑁆𑀣𑀸𑀦𑀺 𑀲𑀼𑀧𑀝𑀺𑀬𑀢𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀬𑁂𑀲𑀼 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀔𑀻𑀡𑀸𑀲𑀯𑀸 𑀘 𑀇𑀤𑁆𑀥𑀺𑀫𑀦𑁆𑀢𑁄 𑀘 𑀇𑀲𑀬𑁄 𑀦𑁆𑀳𑀸𑀬𑀦𑁆𑀢𑀺, 𑀤𑁂𑀯𑀬𑀓𑁆𑀔𑀸𑀤𑀬𑁄 𑀉𑀬𑁆𑀬𑀸𑀦𑀓𑀻𑀴𑀓𑀁 𑀓𑀻𑀴𑀦𑁆𑀢𑀺.

𑀢𑀲𑁆𑀲 𑀘𑀢𑀽𑀲𑀼 𑀧𑀲𑁆𑀲𑁂𑀲𑀼 𑀲𑀻𑀳𑀫𑀼𑀔𑀁 𑀳𑀢𑁆𑀣𑀺𑀫𑀼𑀔𑀁 𑀅𑀲𑁆𑀲𑀫𑀼𑀔𑀁 𑀉𑀲𑀪𑀫𑀼𑀔𑀦𑁆𑀢𑀺 𑀘𑀢𑁆𑀢𑀸𑀭𑀺 𑀫𑀼𑀔𑀸𑀦𑀺 𑀳𑁄𑀦𑁆𑀢𑀺, 𑀬𑁂𑀳𑀺 𑀘𑀢𑀲𑁆𑀲𑁄 𑀦𑀤𑀺𑀬𑁄 𑀲𑀦𑁆𑀤𑀦𑁆𑀢𑀺. 𑀲𑀻𑀳𑀫𑀼𑀔𑁂𑀦 𑀦𑀺𑀓𑁆𑀔𑀦𑁆𑀢𑀦𑀤𑀻𑀢𑀻𑀭𑁂 𑀲𑀻𑀳𑀸 𑀩𑀳𑀼𑀢𑀭𑀸 𑀳𑁄𑀦𑁆𑀢𑀺. 𑀳𑀢𑁆𑀣𑀺𑀫𑀼𑀔𑀸𑀤𑀻𑀳𑀺 𑀳𑀢𑁆𑀣𑀺𑀅𑀲𑁆𑀲𑀉𑀲𑀪𑀸. 𑀧𑀼𑀭𑀢𑁆𑀣𑀺𑀫𑀤𑀺𑀲𑀢𑁄 𑀦𑀺𑀓𑁆𑀔𑀦𑁆𑀢𑀦𑀤𑀻 𑀅𑀦𑁄𑀢𑀢𑁆𑀢𑀁 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀇𑀢𑀭𑀸 𑀢𑀺𑀲𑁆𑀲𑁄 𑀦𑀤𑀺𑀬𑁄 𑀅𑀦𑀼𑀧𑀕𑀫𑁆𑀫 𑀧𑀸𑀘𑀻𑀦𑀳𑀺𑀫𑀯𑀦𑁆𑀢𑁂𑀦𑁂𑀯 𑀅𑀫𑀦𑀼𑀲𑁆𑀲𑀧𑀣𑀁 𑀕𑀦𑁆𑀢𑁆𑀯𑀸 𑀫𑀳𑀸𑀲𑀫𑀼𑀤𑁆𑀤𑀁 𑀧𑀯𑀺𑀲𑀢𑀺. 𑀧𑀘𑁆𑀙𑀺𑀫𑀤𑀺𑀲𑀢𑁄 𑀘 𑀉𑀢𑁆𑀢𑀭𑀤𑀺𑀲𑀢𑁄 𑀘 𑀦𑀺𑀓𑁆𑀔𑀦𑁆𑀢𑀦𑀤𑀺𑀬𑁄𑀧𑀺 𑀢𑀣𑁂𑀯 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀘𑁆𑀙𑀺𑀫𑀳𑀺𑀫𑀯𑀦𑁆𑀢𑁂𑀦𑁂𑀯 𑀉𑀢𑁆𑀢𑀭𑀳𑀺𑀫𑀯𑀦𑁆𑀢𑁂𑀦𑁂𑀯 𑀘 𑀅𑀫𑀦𑀼𑀲𑁆𑀲𑀧𑀣𑀁 𑀕𑀦𑁆𑀢𑁆𑀯𑀸 𑀫𑀳𑀸𑀲𑀫𑀼𑀤𑁆𑀤𑀁 𑀧𑀯𑀺𑀲𑀦𑁆𑀢𑀺. 𑀤𑀓𑁆𑀔𑀺𑀡𑀤𑀺𑀲𑀢𑁄 𑀦𑀺𑀓𑁆𑀔𑀦𑁆𑀢𑀦𑀤𑀻 𑀧𑀦 𑀢𑀁 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀉𑀚𑀼𑀓𑀁 𑀧𑀸𑀲𑀸𑀡𑀧𑀺𑀝𑁆𑀞𑁂𑀦𑁂𑀯 𑀲𑀝𑁆𑀞𑀺𑀬𑁄𑀚𑀦𑀸𑀦𑀺 𑀕𑀦𑁆𑀢𑁆𑀯𑀸 𑀧𑀩𑁆𑀩𑀢𑀁 𑀧𑀳𑀭𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀧𑀭𑀺𑀓𑁆𑀔𑁂𑀧𑁂𑀦 𑀢𑀺𑀕𑀸𑀯𑀼𑀢𑀧𑁆𑀧𑀫𑀸𑀡𑀸 𑀉𑀤𑀓𑀥𑀸𑀭𑀸 𑀘 𑀳𑀼𑀢𑁆𑀯𑀸 𑀆𑀓𑀸𑀲𑁂𑀦 𑀲𑀝𑁆𑀞𑀺𑀬𑁄𑀚𑀦𑀸𑀦𑀺 𑀕𑀦𑁆𑀢𑁆𑀯𑀸 𑀢𑀺𑀬𑀕𑁆𑀕𑀴𑁂 𑀦𑀸𑀫 𑀧𑀸𑀲𑀸𑀡𑁂 𑀧𑀢𑀺𑀢𑀸, 𑀧𑀸𑀲𑀸𑀡𑁄 𑀉𑀤𑀓𑀥𑀸𑀭𑀸𑀯𑁂𑀕𑁂𑀦 𑀪𑀺𑀦𑁆𑀦𑁄. 𑀢𑀢𑁆𑀣 𑀧𑀜𑁆𑀜𑀸𑀲𑀬𑁄𑀚𑀦𑀧𑁆𑀧𑀫𑀸𑀡𑀸 𑀢𑀺𑀬𑀕𑁆𑀕𑀴𑀸 𑀦𑀸𑀫 𑀧𑁄𑀓𑁆𑀔𑀭𑀡𑀻 𑀚𑀸𑀢𑀸, 𑀧𑁄𑀓𑁆𑀔𑀭𑀡𑀺𑀬𑀸 𑀓𑀽𑀮𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀸𑀲𑀸𑀡𑀁 𑀧𑀯𑀺𑀲𑀺𑀢𑁆𑀯𑀸 𑀲𑀝𑁆𑀞𑀺𑀬𑁄𑀚𑀦𑀸𑀦𑀺 𑀕𑀢𑀸. 𑀢𑀢𑁄 𑀖𑀦𑀧𑀣𑀯𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀉𑀫𑀗𑁆𑀕𑁂𑀦 𑀲𑀝𑁆𑀞𑀺𑀬𑁄𑀚𑀦𑀸𑀦𑀺 𑀕𑀦𑁆𑀢𑁆𑀯𑀸 𑀯𑀺𑀜𑁆𑀛𑀼𑀁 𑀦𑀸𑀫 𑀢𑀺𑀭𑀘𑁆𑀙𑀸𑀦𑀧𑀩𑁆𑀩𑀢𑀁 𑀧𑀳𑀭𑀺𑀢𑁆𑀯𑀸 𑀳𑀢𑁆𑀣𑀢𑀮𑁂 𑀧𑀜𑁆𑀘𑀗𑁆𑀕𑀼𑀮𑀺𑀲𑀤𑀺𑀲𑀸 𑀧𑀜𑁆𑀘𑀥𑀸𑀭𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀺. 𑀲𑀸 𑀢𑀺𑀓𑁆𑀔𑀢𑁆𑀢𑀼𑀁 𑀅𑀦𑁄𑀢𑀢𑁆𑀢𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀕𑀢𑀝𑁆𑀞𑀸𑀦𑁂 𑀆𑀯𑀝𑁆𑀝𑀕𑀗𑁆𑀕𑀸𑀢𑀺 𑀯𑀼𑀘𑁆𑀘𑀢𑀺. 𑀉𑀚𑀼𑀓𑀁 𑀧𑀸𑀲𑀸𑀡𑀧𑀺𑀝𑁆𑀞𑁂𑀦 𑀲𑀝𑁆𑀞𑀺𑀬𑁄𑀚𑀦𑀸𑀦𑀺 𑀕𑀢𑀝𑁆𑀞𑀸𑀦𑁂 𑀓𑀡𑁆𑀳𑀕𑀗𑁆𑀕𑀸𑀢𑀺, 𑀆𑀓𑀸𑀲𑁂𑀦 𑀲𑀝𑁆𑀞𑀺𑀬𑁄𑀚𑀦𑀸𑀦𑀺 𑀕𑀢𑀝𑁆𑀞𑀸𑀦𑁂 𑀆𑀓𑀸𑀲𑀕𑀗𑁆𑀕𑀸𑀢𑀺, 𑀢𑀺𑀬𑀕𑁆𑀕𑀴𑀧𑀸𑀲𑀸𑀡𑁂 𑀧𑀜𑁆𑀜𑀸𑀲𑀬𑁄𑀚𑀦𑁄𑀓𑀸𑀲𑁂 𑀞𑀺𑀢𑀸 𑀢𑀺𑀬𑀕𑁆𑀕𑀴𑀧𑁄𑀓𑁆𑀔𑀭𑀡𑀻𑀢𑀺, 𑀓𑀽𑀮𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀸𑀲𑀸𑀡𑀁 𑀧𑀯𑀺𑀲𑀺𑀢𑁆𑀯𑀸 𑀲𑀝𑁆𑀞𑀺𑀬𑁄𑀚𑀦𑀸𑀦𑀺 𑀕𑀢𑀝𑁆𑀞𑀸𑀦𑁂 𑀩𑀳𑀮𑀕𑀗𑁆𑀕𑀸𑀢𑀺, 𑀉𑀫𑀗𑁆𑀕𑁂𑀦 𑀲𑀝𑁆𑀞𑀺𑀬𑁄𑀚𑀦𑀸𑀦𑀺 𑀕𑀢𑀝𑁆𑀞𑀸𑀦𑁂 𑀉𑀫𑀗𑁆𑀕𑀕𑀗𑁆𑀕𑀸𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀜𑁆𑀛𑀼𑀁 𑀦𑀸𑀫 𑀢𑀺𑀭𑀘𑁆𑀙𑀸𑀦𑀧𑀩𑁆𑀩𑀢𑀁 𑀧𑀳𑀭𑀺𑀢𑁆𑀯𑀸 𑀧𑀜𑁆𑀘𑀥𑀸𑀭𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀝𑁆𑀞𑀸𑀦𑁂 𑀧𑀦 𑀕𑀗𑁆𑀕𑀸 𑀬𑀫𑀼𑀦𑀸 𑀅𑀘𑀺𑀭𑀯𑀢𑀻 𑀲𑀭𑀪𑀽 𑀫𑀳𑀻𑀢𑀺 𑀧𑀜𑁆𑀘𑀥𑀸 𑀲𑀗𑁆𑀔𑀁 𑀕𑀢𑀸. 𑀏𑀯𑀫𑁂𑀢𑀸 𑀧𑀜𑁆𑀘 𑀫𑀳𑀸𑀦𑀤𑀺𑀬𑁄 𑀳𑀺𑀫𑀯𑀦𑁆𑀢𑀢𑁄 𑀧𑀪𑀯𑀦𑁆𑀢𑀺. 𑀢𑀸𑀲𑀼 𑀬𑀸 𑀅𑀬𑀁 𑀧𑀜𑁆𑀘𑀫𑀻 𑀫𑀳𑀻 𑀦𑀸𑀫, 𑀲𑀸 𑀇𑀥 𑀫𑀳𑀸𑀫𑀳𑀻𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀢𑀲𑁆𑀲𑀸 𑀉𑀢𑁆𑀢𑀭𑁂𑀦 𑀬𑀸 𑀆𑀧𑁄, 𑀢𑀸𑀲𑀁 𑀅𑀯𑀺𑀤𑀽𑀭𑀢𑁆𑀢𑀸 𑀲𑁄 𑀚𑀦𑀧𑀤𑁄 𑀅𑀗𑁆𑀕𑀼𑀢𑁆𑀢𑀭𑀸𑀧𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀲𑁆𑀫𑀺𑀁 𑀅𑀗𑁆𑀕𑀼𑀢𑁆𑀢𑀭𑀸𑀧𑁂𑀲𑀼 𑀚𑀦𑀧𑀤𑁂.

𑀆𑀧𑀡𑀁 𑀦𑀸𑀫𑀸𑀢𑀺 𑀢𑀲𑁆𑀫𑀺𑀁 𑀓𑀺𑀭 𑀦𑀺𑀕𑀫𑁂 𑀯𑀻𑀲𑀢𑀺 𑀆𑀧𑀡𑀫𑀼𑀔𑀲𑀳𑀲𑁆𑀲𑀸𑀦𑀺 𑀯𑀺𑀪𑀢𑁆𑀢𑀸𑀦𑀺 𑀅𑀳𑁂𑀲𑀼𑀁. 𑀇𑀢𑀺 𑀲𑁄 𑀆𑀧𑀡𑀸𑀦𑀁 𑀉𑀲𑁆𑀲𑀦𑁆𑀦𑀢𑁆𑀢𑀸 𑀆𑀧𑀡𑀦𑁆𑀢𑁆𑀯𑁂𑀯 𑀲𑀗𑁆𑀔𑀁 𑀕𑀢𑁄. 𑀢𑀲𑁆𑀲 𑀘 𑀦𑀺𑀕𑀫𑀲𑁆𑀲 𑀅𑀯𑀺𑀤𑀽𑀭𑁂 𑀦𑀤𑀻𑀢𑀻𑀭𑁂 𑀖𑀦𑀘𑁆𑀙𑀸𑀬𑁄 𑀭𑀫𑀡𑀻𑀬𑁄 𑀪𑀽𑀫𑀺𑀪𑀸𑀕𑁄 𑀫𑀳𑀸𑀯𑀦𑀲𑀡𑁆𑀟𑁄, 𑀢𑀲𑁆𑀫𑀺𑀁 𑀪𑀕𑀯𑀸 𑀯𑀺𑀳𑀭𑀢𑀺. 𑀢𑁂𑀦𑁂𑀯𑁂𑀢𑁆𑀣 𑀯𑀲𑀦𑀝𑁆𑀞𑀸𑀦𑀁 𑀦 𑀦𑀺𑀬𑀸𑀫𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑁂𑀦𑀜𑁆𑀜𑀢𑀭𑁄 𑀯𑀦𑀲𑀡𑁆𑀟𑁄 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀁 𑀯𑀲𑀦𑀝𑁆𑀞𑀸𑀦𑀁 𑀧𑁂𑀲𑁂𑀢𑁆𑀯𑀸 𑀏𑀓𑀓𑁄𑀯 𑀉𑀧𑀲𑀗𑁆𑀓𑀫𑀺 𑀧𑁄𑀢𑀮𑀺𑀬𑀁 𑀕𑀳𑀧𑀢𑀺𑀁 𑀲𑀦𑁆𑀥𑀸𑀬. 𑀧𑁄𑀢𑀮𑀺𑀬𑁄𑀧𑀺 𑀔𑁄 𑀕𑀳𑀧𑀢𑀻𑀢𑀺 𑀧𑁄𑀢𑀮𑀺𑀬𑁄𑀢𑀺 𑀏𑀯𑀁𑀦𑀸𑀫𑀓𑁄 𑀕𑀳𑀧𑀢𑀺. 𑀲𑀫𑁆𑀧𑀦𑁆𑀦𑀦𑀺𑀯𑀸𑀲𑀦𑀧𑀸𑀯𑀼𑀭𑀡𑁄𑀢𑀺 𑀧𑀭𑀺𑀧𑀼𑀡𑁆𑀡𑀦𑀺𑀯𑀸𑀲𑀦𑀧𑀸𑀯𑀼𑀭𑀡𑁄, 𑀏𑀓𑀁 𑀤𑀻𑀖𑀤𑀲𑀁 𑀲𑀸𑀝𑀓𑀁 𑀦𑀺𑀯𑀢𑁆𑀣𑁄 𑀏𑀓𑀁 𑀧𑀸𑀭𑀼𑀢𑁄𑀢𑀺 𑀅𑀢𑁆𑀣𑁄. 𑀙𑀢𑁆𑀢𑀼𑀧𑀸𑀳𑀦𑀸𑀳𑀻𑀢𑀺 𑀙𑀢𑁆𑀢𑀁 𑀕𑀳𑁂𑀢𑁆𑀯𑀸 𑀉𑀧𑀸𑀳𑀦𑀸 𑀆𑀭𑀼𑀬𑁆𑀳𑀸𑀢𑀺 𑀅𑀢𑁆𑀣𑁄. 𑀆𑀲𑀦𑀸𑀦𑀻𑀢𑀺 𑀧𑀮𑁆𑀮𑀗𑁆𑀓𑀧𑀻𑀞𑀧𑀮𑀸𑀮𑀧𑀻𑀞𑀓𑀸𑀤𑀻𑀦𑀺. 𑀅𑀦𑁆𑀢𑀫𑀲𑁄 𑀲𑀸𑀔𑀸𑀪𑀗𑁆𑀕𑀫𑁆𑀧𑀺 𑀳𑀺 𑀆𑀲𑀦𑀦𑁆𑀢𑁂𑀯 𑀯𑀼𑀘𑁆𑀘𑀢𑀺. 𑀕𑀳𑀧𑀢𑀺𑀯𑀸𑀤𑁂𑀦𑀸𑀢𑀺 𑀕𑀳𑀧𑀢𑀻𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦. 𑀲𑀫𑀼𑀤𑀸𑀘𑀭𑀢𑀻𑀢𑀺 𑀯𑁄𑀳𑀭𑀢𑀺.

𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀸𑀢𑀺 𑀢𑀢𑀺𑀬𑀁 𑀕𑀳𑀧𑀢𑀻𑀢𑀺 𑀯𑀘𑀦𑀁 𑀅𑀥𑀺𑀯𑀸𑀲𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀪𑀕𑀯𑀦𑁆𑀢𑀫𑁂𑀢𑀁 ‘‘𑀢𑀬𑀺𑀤𑀁, 𑀪𑁄, 𑀕𑁄𑀢𑀫𑀸’’𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘. 𑀢𑀢𑁆𑀣 𑀦𑀘𑁆𑀙𑀦𑁆𑀦𑀦𑁆𑀢𑀺 𑀦 𑀅𑀦𑀼𑀘𑁆𑀙𑀯𑀺𑀓𑀁. 𑀦𑀧𑁆𑀧𑀢𑀺𑀭𑀽𑀧𑀦𑁆𑀢𑀺 𑀦 𑀲𑀸𑀭𑀼𑀧𑁆𑀧𑀁. 𑀆𑀓𑀸𑀭𑀸𑀢𑀺𑀆𑀤𑀻𑀦𑀺 𑀲𑀩𑁆𑀩𑀸𑀦𑁂𑀯 𑀓𑀸𑀭𑀡𑀯𑁂𑀯𑀘𑀦𑀸𑀦𑀺. 𑀤𑀻𑀖𑀤𑀲𑀯𑀢𑁆𑀣𑀥𑀸𑀭𑀡-𑀓𑁂𑀲𑀫𑀲𑁆𑀲𑀼𑀦𑀔𑀞𑀧𑀦𑀸𑀤𑀻𑀦𑀺 𑀳𑀺 𑀲𑀩𑁆𑀩𑀸𑀦𑁂𑀯 𑀕𑀺𑀳𑀺𑀩𑁆𑀬𑀜𑁆𑀚𑀦𑀸𑀦𑀺 𑀢𑀲𑁆𑀲 𑀕𑀺𑀳𑀺𑀪𑀸𑀯𑀁 𑀧𑀸𑀓𑀝𑀁 𑀓𑀭𑁄𑀦𑁆𑀢𑀻𑀢𑀺 𑀆𑀓𑀸𑀭𑀸, 𑀕𑀺𑀳𑀺𑀲𑀡𑁆𑀞𑀸𑀦𑁂𑀦 𑀲𑀡𑁆𑀞𑀺𑀢𑀢𑁆𑀢𑀸 𑀮𑀺𑀗𑁆𑀕𑀸, 𑀕𑀺𑀳𑀺𑀪𑀸𑀯𑀲𑁆𑀲 𑀲𑀜𑁆𑀚𑀸𑀦𑀦𑀦𑀺𑀫𑀺𑀢𑁆𑀢𑀢𑀸𑀬 𑀦𑀺𑀫𑀺𑀢𑁆𑀢𑀸𑀢𑀺 𑀯𑀼𑀢𑁆𑀢𑀸. 𑀬𑀣𑀸 𑀢𑀁 𑀕𑀳𑀧𑀢𑀺𑀲𑁆𑀲𑀸𑀢𑀺 𑀬𑀣𑀸 𑀕𑀳𑀧𑀢𑀺𑀲𑁆𑀲 𑀆𑀓𑀸𑀭𑀮𑀺𑀗𑁆𑀕𑀦𑀺𑀫𑀺𑀢𑁆𑀢𑀸 𑀪𑀯𑁂𑀬𑁆𑀬𑀼𑀁, 𑀢𑀣𑁂𑀯 𑀢𑀼𑀬𑁆𑀳𑀁. 𑀢𑁂𑀦 𑀢𑀸𑀳𑀁 𑀏𑀯𑀁 𑀲𑀫𑀼𑀤𑀸𑀘𑀭𑀸𑀫𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀣 𑀲𑁄 𑀬𑁂𑀦 𑀓𑀸𑀭𑀡𑁂𑀦 𑀕𑀳𑀧𑀢𑀺𑀯𑀸𑀤𑀁 𑀦𑀸𑀥𑀺𑀯𑀸𑀲𑁂𑀢𑀺, 𑀢𑀁 𑀧𑀓𑀸𑀲𑁂𑀦𑁆𑀢𑁄 ‘‘𑀢𑀣𑀸 𑀳𑀺 𑀧𑀦 𑀫𑁂’’𑀢𑀺𑀆𑀤𑀺𑀫𑀸𑀳.

𑀦𑀺𑀬𑁆𑀬𑀸𑀢𑀦𑁆𑀢𑀺 𑀦𑀺𑀬𑁆𑀬𑀸𑀢𑀺𑀢𑀁. 𑀅𑀦𑁄𑀯𑀸𑀤𑀻 𑀅𑀦𑀼𑀧𑀯𑀸𑀤𑀻𑀢𑀺 ‘‘𑀢𑀸𑀢𑀸, 𑀓𑀲𑀣, 𑀯𑀧𑀣, 𑀯𑀡𑀺𑀧𑁆𑀧𑀣𑀁 𑀧𑀬𑁄𑀚𑁂𑀣𑀸’’𑀢𑀺𑀆𑀤𑀺𑀦𑀸 𑀳𑀺 𑀦𑀬𑁂𑀦 𑀑𑀯𑀤𑀦𑁆𑀢𑁄 𑀑𑀯𑀸𑀤𑀻 𑀦𑀸𑀫 𑀳𑁄𑀢𑀺. ‘‘𑀢𑀼𑀫𑁆𑀳𑁂 𑀦 𑀓𑀲𑀣, 𑀦 𑀯𑀧𑀣, 𑀦 𑀯𑀡𑀺𑀧𑁆𑀧𑀣𑀁 𑀧𑀬𑁄𑀚𑁂𑀣, 𑀓𑀣𑀁 𑀚𑀻𑀯𑀺𑀲𑁆𑀲𑀣, 𑀧𑀼𑀢𑁆𑀢𑀤𑀸𑀭𑀁 𑀯𑀸 𑀪𑀭𑀺𑀲𑁆𑀲𑀣𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀦 𑀉𑀧𑀯𑀤𑀦𑁆𑀢𑁄 𑀉𑀧𑀯𑀸𑀤𑀻 𑀦𑀸𑀫 𑀳𑁄𑀢𑀺. 𑀅𑀳𑀁 𑀧𑀦 𑀉𑀪𑀬𑀫𑁆𑀧𑀺 𑀢𑀁 𑀦 𑀓𑀭𑁄𑀫𑀺. 𑀢𑁂𑀦𑀸𑀳𑀁 𑀢𑀢𑁆𑀣 𑀅𑀦𑁄𑀯𑀸𑀤𑀻 𑀅𑀦𑀼𑀧𑀯𑀸𑀤𑀻𑀢𑀺 𑀤𑀲𑁆𑀲𑁂𑀢𑀺. 𑀖𑀸𑀲𑀘𑁆𑀙𑀸𑀤𑀦𑀧𑀭𑀫𑁄 𑀯𑀺𑀳𑀭𑀸𑀫𑀻𑀢𑀺 𑀖𑀸𑀲𑀫𑀢𑁆𑀢𑀜𑁆𑀘𑁂𑀯 𑀅𑀘𑁆𑀙𑀸𑀤𑀦𑀫𑀢𑁆𑀢𑀜𑁆𑀘 𑀧𑀭𑀫𑀁 𑀓𑀢𑁆𑀯𑀸 𑀯𑀺𑀳𑀭𑀸𑀫𑀺, 𑀢𑀢𑁄 𑀧𑀭𑀁 𑀦𑀢𑁆𑀣𑀺, 𑀦 𑀘 𑀧𑀢𑁆𑀣𑁂𑀫𑀻𑀢𑀺 𑀤𑀻𑀧𑁂𑀢𑀺.

𑁩𑁨. 𑀕𑀺𑀤𑁆𑀥𑀺𑀮𑁄𑀪𑁄 𑀧𑀳𑀸𑀢𑀩𑁆𑀩𑁄𑀢𑀺 𑀕𑁂𑀥𑀪𑀽𑀢𑁄 𑀮𑁄𑀪𑁄 𑀧𑀳𑀸𑀢𑀩𑁆𑀩𑁄. 𑀅𑀦𑀺𑀦𑁆𑀤𑀸𑀭𑁄𑀲𑀦𑁆𑀢𑀺 𑀅𑀦𑀺𑀦𑁆𑀤𑀸𑀪𑀽𑀢𑀁 𑀅𑀖𑀝𑁆𑀝𑀦𑀁. 𑀦𑀺𑀦𑁆𑀤𑀸𑀭𑁄𑀲𑁄𑀢𑀺 𑀦𑀺𑀦𑁆𑀤𑀸𑀖𑀝𑁆𑀝𑀦𑀸. 𑀯𑁄𑀳𑀸𑀭𑀲𑀫𑀼𑀘𑁆𑀙𑁂𑀤𑀸𑀬𑀸𑀢𑀺 𑀏𑀢𑁆𑀣 𑀯𑁄𑀳𑀸𑀭𑁄𑀢𑀺 𑀩𑁆𑀬𑀯𑀳𑀸𑀭𑀯𑁄𑀳𑀸𑀭𑁄𑀧𑀺 𑀧𑀡𑁆𑀡𑀢𑁆𑀢𑀺𑀧𑀺 𑀯𑀘𑀦𑀫𑁆𑀧𑀺 𑀘𑁂𑀢𑀦𑀸𑀧𑀺. 𑀢𑀢𑁆𑀣 𑁋

‘‘𑀬𑁄 𑀳𑀺 𑀓𑁄𑀘𑀺 𑀫𑀦𑀼𑀲𑁆𑀲𑁂𑀲𑀼, 𑀯𑁄𑀳𑀸𑀭𑀁 𑀉𑀧𑀚𑀻𑀯𑀢𑀺;

𑀏𑀯𑀁 𑀯𑀸𑀲𑁂𑀝𑁆𑀞 𑀚𑀸𑀦𑀸𑀳𑀺, 𑀯𑀸𑀡𑀺𑀚𑁄 𑀲𑁄 𑀦 𑀩𑁆𑀭𑀸𑀳𑁆𑀫𑀡𑁄’’𑀢𑀺. (𑀫. 𑀦𑀺. 𑁨.𑁪𑁫𑁭) 𑁋

𑀅𑀬𑀁 𑀩𑁆𑀬𑀯𑀳𑀸𑀭𑀯𑁄𑀳𑀸𑀭𑁄 𑀦𑀸𑀫. ‘‘𑀲𑀗𑁆𑀔𑀸 𑀲𑀫𑀜𑁆𑀜𑀸 𑀧𑀜𑁆𑀜𑀢𑁆𑀢𑀺 𑀯𑁄𑀳𑀸𑀭𑁄’’𑀢𑀺 (𑀥. 𑀲. 𑁧𑁩𑁧𑁩-𑁧𑁩𑁧𑁫) 𑀅𑀬𑀁 𑀧𑀡𑁆𑀡𑀢𑁆𑀢𑀺𑀯𑁄𑀳𑀸𑀭𑁄 𑀦𑀸𑀫. ‘‘𑀢𑀣𑀸 𑀢𑀣𑀸 𑀯𑁄𑀳𑀭𑀢𑀺 𑀅𑀧𑀭𑀸𑀫𑀲’’𑀦𑁆𑀢𑀺 (𑀫. 𑀦𑀺. 𑁩.𑁩𑁩𑁨) 𑀅𑀬𑀁 𑀯𑀘𑀦𑀯𑁄𑀳𑀸𑀭𑁄 𑀦𑀸𑀫. ‘‘𑀅𑀝𑁆𑀞 𑀅𑀭𑀺𑀬𑀯𑁄𑀳𑀸𑀭𑀸 𑀅𑀝𑁆𑀞 𑀅𑀦𑀭𑀺𑀬𑀯𑁄𑀳𑀭𑀸’’𑀢𑀺 (𑀅. 𑀦𑀺. 𑁮.𑁬𑁭) 𑀅𑀬𑀁 𑀘𑁂𑀢𑀦𑀸𑀯𑁄𑀳𑀸𑀭𑁄 𑀦𑀸𑀫, 𑀅𑀬𑀫𑀺𑀥𑀸𑀥𑀺𑀧𑁆𑀧𑁂𑀢𑁄. 𑀬𑀲𑁆𑀫𑀸 𑀯𑀸 𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀕𑀺𑀳𑀻𑀢𑀺 𑀘𑁂𑀢𑀦𑀸 𑀦𑀢𑁆𑀣𑀺, 𑀲𑀫𑀡𑁄𑀢𑀺 𑀘𑁂𑀢𑀦𑀸 𑀳𑁄𑀢𑀺. 𑀕𑀺𑀳𑀻𑀢𑀺 𑀯𑀘𑀦𑀁 𑀦𑀢𑁆𑀣𑀺, 𑀲𑀫𑀡𑁄𑀢𑀺 𑀯𑀘𑀦𑀁 𑀳𑁄𑀢𑀺. 𑀕𑀺𑀳𑀻𑀢𑀺 𑀧𑀡𑁆𑀡𑀢𑁆𑀢𑀺 𑀦𑀢𑁆𑀣𑀺, 𑀲𑀫𑀡𑁄𑀢𑀺 𑀧𑀡𑁆𑀡𑀢𑁆𑀢𑀺 𑀳𑁄𑀢𑀺. 𑀕𑀺𑀳𑀻𑀢𑀺 𑀩𑁆𑀬𑀯𑀳𑀸𑀭𑁄 𑀦𑀢𑁆𑀣𑀺, 𑀲𑀫𑀡𑁄𑀢𑀺 𑀯𑀸 𑀧𑀩𑁆𑀩𑀚𑀺𑀢𑁄𑀢𑀺 𑀯𑀸 𑀩𑁆𑀬𑀯𑀳𑀸𑀭𑁄 𑀳𑁄𑀢𑀺. 𑀢𑀲𑁆𑀫𑀸 𑀲𑀩𑁆𑀩𑁂𑀧𑁂𑀢𑁂 𑀮𑀩𑁆𑀪𑀦𑁆𑀢𑀺.

𑁩𑁩. 𑀬𑁂𑀲𑀁 𑀔𑁄 𑀅𑀳𑀁 𑀲𑀁𑀬𑁄𑀚𑀦𑀸𑀦𑀁 𑀳𑁂𑀢𑀼 𑀧𑀸𑀡𑀸𑀢𑀺𑀧𑀸𑀢𑀻𑀢𑀺 𑀏𑀢𑁆𑀣 𑀧𑀸𑀡𑀸𑀢𑀺𑀧𑀸𑀢𑁄𑀯 𑀲𑀁𑀬𑁄𑀚𑀦𑀁. 𑀧𑀸𑀡𑀸𑀢𑀺𑀧𑀸𑀢𑀲𑁆𑀲𑁂𑀯 𑀳𑀺 𑀳𑁂𑀢𑀼 𑀧𑀸𑀡𑀸𑀢𑀺𑀧𑀸𑀢𑀧𑀘𑁆𑀘𑀬𑀸 𑀧𑀸𑀡𑀸𑀢𑀺𑀧𑀸𑀢𑀻 𑀦𑀸𑀫 𑀳𑁄𑀢𑀺. 𑀧𑀸𑀡𑀸𑀢𑀺𑀧𑀸𑀢𑀸𑀦𑀁 𑀧𑀦 𑀩𑀳𑀼𑀢𑀸𑀬 ‘‘𑀬𑁂𑀲𑀁 𑀔𑁄 𑀅𑀳’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀲𑀸𑀳𑀁 𑀲𑀁𑀬𑁄𑀚𑀦𑀸𑀦𑀦𑁆𑀢𑀺 𑀢𑁂𑀲𑀁 𑀅𑀳𑀁 𑀧𑀸𑀡𑀸𑀢𑀺𑀧𑀸𑀢𑀩𑀦𑁆𑀥𑀦𑀸𑀦𑀁. 𑀧𑀳𑀸𑀦𑀸𑀬 𑀲𑀫𑀼𑀘𑁆𑀙𑁂𑀤𑀸𑀬 𑀧𑀝𑀺𑀧𑀦𑁆𑀦𑁄𑀢𑀺 𑀇𑀫𑀺𑀦𑀸 𑀅𑀧𑀸𑀡𑀸𑀢𑀺𑀧𑀸𑀢𑀲𑀗𑁆𑀔𑀸𑀢𑁂𑀦 𑀓𑀸𑀬𑀺𑀓𑀲𑀻𑀮𑀲𑀁𑀯𑀭𑁂𑀦 𑀧𑀳𑀸𑀦𑀢𑁆𑀣𑀸𑀬 𑀲𑀫𑀼𑀘𑁆𑀙𑁂𑀤𑀦𑀢𑁆𑀣𑀸𑀬 𑀧𑀝𑀺𑀧𑀦𑁆𑀦𑁄. 𑀅𑀢𑁆𑀢𑀸𑀧𑀺 𑀫𑀁 𑀉𑀧𑀯𑀤𑁂𑀬𑁆𑀬𑀸𑀢𑀺 𑀓𑀼𑀦𑁆𑀣𑀓𑀺𑀧𑀺𑀮𑁆𑀮𑀺𑀓𑀫𑁆𑀧𑀺 𑀦𑀸𑀫 𑀚𑀻𑀯𑀺𑀢𑀸 𑀅𑀯𑁄𑀭𑁄𑀧𑀦𑀓𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀧𑀸𑀡𑀸𑀢𑀺𑀧𑀸𑀢𑀫𑀢𑁆𑀢𑀢𑁄𑀧𑀺 𑀑𑀭𑀫𑀺𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀓𑀺𑀁 𑀫𑀬𑁆𑀳𑀁 𑀧𑀩𑁆𑀩𑀚𑁆𑀚𑀸𑀬𑀸𑀢𑀺 𑀏𑀯𑀁 𑀅𑀢𑁆𑀢𑀸𑀧𑀺 𑀫𑀁 𑀉𑀧𑀯𑀤𑁂𑀬𑁆𑀬. 𑀅𑀦𑀼𑀯𑀺𑀘𑁆𑀘𑀸𑀧𑀺 𑀫𑀁 𑀯𑀺𑀜𑁆𑀜𑀽 𑀕𑀭𑀳𑁂𑀬𑁆𑀬𑀼𑀦𑁆𑀢𑀺 𑀏𑀯𑀭𑀽𑀧𑁂 𑀦𑀸𑀫 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀧𑀸𑀡𑀸𑀢𑀺𑀧𑀸𑀢𑀫𑀢𑁆𑀢𑀢𑁄𑀧𑀺 𑀑𑀭𑀫𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀓𑀺𑀁 𑀏𑀢𑀲𑁆𑀲 𑀧𑀩𑁆𑀩𑀚𑁆𑀚𑀸𑀬𑀸𑀢𑀺 𑀏𑀯𑀁 𑀅𑀦𑀼𑀯𑀺𑀘𑁆𑀘 𑀢𑀼𑀮𑀬𑀺𑀢𑁆𑀯𑀸 𑀧𑀭𑀺𑀬𑁄𑀕𑀸𑀳𑁂𑀢𑁆𑀯𑀸 𑀅𑀜𑁆𑀜𑁂𑀧𑀺 𑀯𑀺𑀜𑁆𑀜𑀽 𑀧𑀡𑁆𑀟𑀺𑀢𑀸 𑀕𑀭𑀳𑁂𑀬𑁆𑀬𑀼𑀁. 𑀏𑀢𑀤𑁂𑀯 𑀔𑁄 𑀧𑀦 𑀲𑀁𑀬𑁄𑀚𑀦𑀫𑁂𑀢𑀁 𑀦𑀻𑀯𑀭𑀡𑀦𑁆𑀢𑀺 𑀤𑀲𑀲𑀼 𑀲𑀁𑀬𑁄𑀚𑀦𑁂𑀲𑀼 𑀧𑀜𑁆𑀘𑀲𑀼 𑀘 𑀦𑀻𑀯𑀭𑀡𑁂𑀲𑀼 𑀅𑀧𑀭𑀺𑀬𑀸𑀧𑀦𑁆𑀦𑀫𑁆𑀧𑀺 ‘‘𑀅𑀝𑁆𑀞 𑀦𑀻𑀯𑀭𑀡𑀸’’𑀢𑀺 𑀤𑁂𑀲𑀦𑀸𑀯𑀲𑁂𑀦𑁂𑀢𑀁 𑀯𑀼𑀢𑁆𑀢𑀁. 𑀯𑀝𑁆𑀝𑀩𑀦𑁆𑀥𑀦𑀝𑁆𑀞𑁂𑀦 𑀳𑀺 𑀳𑀺𑀢𑀧𑀝𑀺𑀘𑁆𑀙𑀸𑀤𑀦𑀝𑁆𑀞𑁂𑀦 𑀘 𑀲𑀁𑀬𑁄𑀚𑀦𑀦𑁆𑀢𑀺𑀧𑀺 𑀦𑀻𑀯𑀭𑀡𑀦𑁆𑀢𑀺𑀧𑀺 𑀯𑀼𑀢𑁆𑀢𑀁. 𑀆𑀲𑀯𑀸𑀢𑀺 𑀧𑀸𑀡𑀸𑀢𑀺𑀧𑀸𑀢𑀓𑀸𑀭𑀡𑀸 𑀏𑀓𑁄 𑀅𑀯𑀺𑀚𑁆𑀚𑀸𑀲𑀯𑁄 𑀉𑀧𑁆𑀧𑀚𑁆𑀚𑀢𑀺. 𑀯𑀺𑀖𑀸𑀢𑀧𑀭𑀺𑀴𑀸𑀳𑀸𑀢𑀺 𑀯𑀺𑀖𑀸𑀢𑀸 𑀘 𑀧𑀭𑀺𑀴𑀸𑀳𑀸 𑀘. 𑀢𑀢𑁆𑀣 𑀯𑀺𑀖𑀸𑀢𑀕𑁆𑀕𑀳𑀡𑁂𑀦 𑀓𑀺𑀮𑁂𑀲𑀤𑀼𑀓𑁆𑀔𑀜𑁆𑀘 𑀯𑀺𑀧𑀸𑀓𑀤𑀼𑀓𑁆𑀔𑀜𑁆𑀘 𑀕𑀳𑀺𑀢𑀁, 𑀧𑀭𑀺𑀴𑀸𑀳𑀕𑁆𑀕𑀳𑀡𑁂𑀦𑀧𑀺 𑀓𑀺𑀮𑁂𑀲𑀧𑀭𑀺𑀴𑀸𑀳𑁄 𑀘 𑀯𑀺𑀧𑀸𑀓𑀧𑀭𑀺𑀴𑀸𑀳𑁄 𑀘 𑀕𑀳𑀺𑀢𑁄. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁩𑁪-𑁪𑁦. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀢𑁂𑀲𑀸𑀳𑀁 𑀲𑀁𑀬𑁄𑀚𑀦𑀸𑀦𑀁 𑀧𑀳𑀸𑀦𑀸𑀬𑀸𑀢𑀺 𑀇𑀫𑀲𑁆𑀫𑀺𑀁 𑀧𑀤𑁂 𑀇𑀫𑀺𑀦𑀸 𑀤𑀺𑀦𑁆𑀦𑀸𑀤𑀸𑀦𑀲𑀗𑁆𑀔𑀸𑀢𑁂𑀦 𑀓𑀸𑀬𑀺𑀓𑀲𑀻𑀮𑀲𑀁𑀯𑀭𑁂𑀦, 𑀲𑀘𑁆𑀘𑀯𑀸𑀘𑀸𑀲𑀗𑁆𑀔𑀸𑀢𑁂𑀦 𑀯𑀸𑀘𑀲𑀺𑀓𑀲𑀻𑀮𑀲𑀁𑀯𑀭𑁂𑀦, 𑀅𑀧𑀺𑀲𑀼𑀡𑀸𑀯𑀸𑀘𑀸𑀲𑀗𑁆𑀔𑀸𑀢𑁂𑀦 𑀯𑀸𑀘𑀲𑀺𑀓𑀲𑀻𑀮𑀲𑀁𑀯𑀭𑁂𑀦, 𑀅𑀕𑀺𑀤𑁆𑀥𑀺𑀮𑁄𑀪𑀲𑀗𑁆𑀔𑀸𑀢𑁂𑀦 𑀫𑀸𑀦𑀲𑀺𑀓𑀲𑀻𑀮𑀲𑀁𑀯𑀭𑁂𑀦, 𑀅𑀦𑀺𑀦𑁆𑀤𑀸𑀭𑁄𑀲𑀲𑀗𑁆𑀔𑀸𑀢𑁂𑀦 𑀓𑀸𑀬𑀺𑀓𑀯𑀸𑀘𑀲𑀺𑀓𑀲𑀻𑀮𑀲𑀁𑀯𑀭𑁂𑀦, 𑀅𑀓𑁄𑀥𑀼𑀧𑀸𑀬𑀸𑀲𑀲𑀗𑁆𑀔𑀸𑀢𑁂𑀦 𑀫𑀸𑀦𑀲𑀺𑀓𑀲𑀻𑀮𑀲𑀁𑀯𑀭𑁂𑀦, 𑀅𑀦𑀢𑀺𑀫𑀸𑀦𑀲𑀗𑁆𑀔𑀸𑀢𑁂𑀦 𑀫𑀸𑀦𑀲𑀺𑀓𑀲𑀻𑀮𑀲𑀁𑀯𑀭𑁂𑀦 𑀧𑀳𑀸𑀦𑀢𑁆𑀣𑀸𑀬 𑀲𑀫𑀼𑀘𑁆𑀙𑁂𑀤𑀦𑀢𑁆𑀣𑀸𑀬 𑀧𑀝𑀺𑀧𑀦𑁆𑀦𑁄𑀢𑀺 𑀏𑀯𑀁 𑀲𑀩𑁆𑀩𑀯𑀸𑀭𑁂𑀲𑀼 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

𑀅𑀢𑁆𑀢𑀸𑀧𑀺 𑀫𑀁 𑀉𑀧𑀯𑀤𑁂𑀬𑁆𑀬 𑀅𑀦𑀼𑀯𑀺𑀘𑁆𑀘𑀸𑀧𑀺 𑀫𑀁 𑀯𑀺𑀜𑁆𑀜𑀽 𑀕𑀭𑀳𑁂𑀬𑁆𑀬𑀼𑀦𑁆𑀢𑀺 𑀇𑀫𑁂𑀲𑀼 𑀧𑀦 𑀧𑀤𑁂𑀲𑀼 𑀢𑀺𑀡𑀲𑀮𑀸𑀓𑀫𑁆𑀧𑀺 𑀦𑀸𑀫 𑀉𑀧𑀸𑀤𑀸𑀬 𑀅𑀤𑀺𑀦𑁆𑀦𑀁 𑀅𑀕𑁆𑀕𑀳𑀡𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀤𑀺𑀦𑁆𑀦𑀸𑀤𑀸𑀦𑀫𑀢𑁆𑀢𑀢𑁄𑀧𑀺 𑀯𑀺𑀭𑀫𑀺𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀓𑀺𑀁 𑀫𑀬𑁆𑀳𑀁 𑀧𑀩𑁆𑀩𑀚𑁆𑀚𑀸𑀬𑀸𑀢𑀺 𑀏𑀯𑀁 𑀅𑀢𑁆𑀢𑀸𑀧𑀺 𑀫𑀁 𑀉𑀧𑀯𑀤𑁂𑀬𑁆𑀬. 𑀏𑀯𑀭𑀽𑀧𑁂 𑀦𑀸𑀫 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀤𑀺𑀦𑁆𑀦𑀸𑀤𑀸𑀦𑀫𑀢𑁆𑀢𑀢𑁄𑀧𑀺 𑀑𑀭𑀫𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀓𑀺𑀁 𑀇𑀫𑀲𑁆𑀲 𑀧𑀩𑁆𑀩𑀚𑁆𑀚𑀸𑀬𑀸𑀢𑀺 𑀏𑀯𑀁 𑀅𑀦𑀼𑀯𑀺𑀘𑁆𑀘𑀸𑀧𑀺 𑀫𑀁 𑀯𑀺𑀜𑁆𑀜𑀽 𑀕𑀭𑀳𑁂𑀬𑁆𑀬𑀼𑀁? 𑀳𑀲𑀸𑀧𑁂𑀓𑁆𑀔𑀢𑀸𑀬𑀧𑀺 𑀦𑀸𑀫 𑀤𑀯𑀓𑀫𑁆𑀬𑀢𑀸𑀬 𑀯𑀸 𑀫𑀼𑀲𑀸𑀯𑀸𑀤𑀁 𑀅𑀓𑀭𑀡𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸. 𑀲𑀩𑁆𑀩𑀸𑀓𑀸𑀭𑁂𑀦 𑀧𑀺𑀲𑀼𑀡𑀁 𑀅𑀓𑀭𑀡𑀲𑀸𑀲𑀦𑁂 𑀦𑀸𑀫 𑀧𑀩𑁆𑀩𑀚𑀺𑀢𑁆𑀯𑀸. 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀕𑀺𑀤𑁆𑀥𑀺𑀮𑁄𑀪𑀁 𑀅𑀓𑀭𑀡𑀲𑀸𑀲𑀦𑁂 𑀦𑀸𑀫 𑀧𑀩𑁆𑀩𑀚𑀺𑀢𑁆𑀯𑀸𑀧𑀺. 𑀓𑀓𑀘𑁂𑀦 𑀅𑀗𑁆𑀕𑁂𑀲𑀼 𑀑𑀓𑁆𑀓𑀦𑁆𑀢𑀺𑀬𑀫𑀸𑀦𑁂𑀲𑀼𑀧𑀺 𑀦𑀸𑀫 𑀧𑀭𑁂𑀲𑀁 𑀦𑀺𑀦𑁆𑀤𑀸𑀭𑁄𑀲𑀁 𑀅𑀓𑀭𑀡𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸. 𑀙𑀺𑀦𑁆𑀦𑀔𑀸𑀡𑀼𑀓𑀡𑁆𑀝𑀓𑀸𑀤𑀻𑀲𑀼𑀧𑀺 𑀦𑀸𑀫 𑀓𑁄𑀥𑀼𑀧𑀸𑀬𑀸𑀲𑀁 𑀅𑀓𑀭𑀡𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸. 𑀅𑀥𑀺𑀫𑀸𑀦𑀫𑀢𑁆𑀢𑀫𑁆𑀧𑀺 𑀦𑀸𑀫 𑀫𑀸𑀦𑀁 𑀅𑀓𑀭𑀡𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀢𑀺𑀫𑀸𑀦𑀫𑀢𑁆𑀢𑀫𑁆𑀧𑀺 𑀧𑀚𑀳𑀺𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀓𑀺𑀁 𑀫𑀬𑁆𑀳𑀁 𑀧𑀩𑁆𑀩𑀚𑁆𑀚𑀸𑀬𑀸𑀢𑀺 𑀏𑀯𑀁 𑀅𑀢𑁆𑀢𑀸𑀧𑀺 𑀫𑀁 𑀉𑀧𑀯𑀤𑁂𑀬𑁆𑀬. 𑀏𑀯𑀭𑀽𑀧𑁂 𑀦𑀸𑀫 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀢𑀺𑀫𑀸𑀦𑀫𑀢𑁆𑀢𑀫𑁆𑀧𑀺 𑀧𑀚𑀳𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀓𑀺𑀁 𑀇𑀫𑀲𑁆𑀲 𑀧𑀩𑁆𑀩𑀚𑁆𑀚𑀸𑀬𑀸𑀢𑀺 𑀏𑀯𑀁 𑀅𑀦𑀼𑀯𑀺𑀘𑁆𑀘𑀸𑀧𑀺 𑀫𑀁 𑀯𑀺𑀜𑁆𑀜𑀽 𑀕𑀭𑀳𑁂𑀬𑁆𑀬𑀼𑀦𑁆𑀢𑀺 𑀏𑀯𑀁 𑀲𑀩𑁆𑀩𑀯𑀸𑀭𑁂𑀲𑀼 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

𑀆𑀲𑀯𑀸𑀢𑀺 𑀇𑀫𑀲𑁆𑀫𑀺𑀁 𑀧𑀦 𑀧𑀤𑁂 𑀅𑀤𑀺𑀦𑁆𑀦𑀸𑀤𑀸𑀦𑀓𑀸𑀭𑀡𑀸 𑀓𑀸𑀫𑀸𑀲𑀯𑁄 𑀤𑀺𑀝𑁆𑀞𑀸𑀲𑀯𑁄 𑀅𑀯𑀺𑀚𑁆𑀚𑀸𑀲𑀯𑁄𑀢𑀺 𑀢𑀬𑁄 𑀆𑀲𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀣𑀸 𑀫𑀼𑀲𑀸𑀯𑀸𑀤𑀓𑀸𑀭𑀡𑀸 𑀧𑀺𑀲𑀼𑀡𑀸𑀯𑀸𑀘𑀸𑀓𑀸𑀭𑀡𑀸 𑀘, 𑀕𑀺𑀤𑁆𑀥𑀺𑀮𑁄𑀪𑀓𑀸𑀭𑀡𑀸 𑀤𑀺𑀝𑁆𑀞𑀸𑀲𑀯𑁄 𑀅𑀯𑀺𑀚𑁆𑀚𑀸𑀲𑀯𑁄 𑀘, 𑀦𑀺𑀦𑁆𑀤𑀸𑀭𑁄𑀲𑀓𑀸𑀭𑀡𑀸 𑀅𑀯𑀺𑀚𑁆𑀚𑀸𑀲𑀯𑁄𑀯, 𑀢𑀣𑀸 𑀓𑁄𑀥𑀼𑀧𑀸𑀬𑀸𑀲𑀓𑀸𑀭𑀡𑀸, 𑀅𑀢𑀺𑀫𑀸𑀦𑀓𑀸𑀭𑀡𑀸 𑀪𑀯𑀸𑀲𑀯𑁄 𑀅𑀯𑀺𑀚𑁆𑀚𑀸𑀲𑀯𑁄 𑀘𑀸𑀢𑀺 𑀤𑁆𑀯𑁂𑀯 𑀆𑀲𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀏𑀯𑀁 𑀆𑀲𑀯𑀼𑀧𑁆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀇𑀫𑁂𑀲𑀼 𑀧𑀦 𑀅𑀝𑁆𑀞𑀲𑀼𑀧𑀺 𑀯𑀸𑀭𑁂𑀲𑀼 𑀅𑀲𑀫𑁆𑀫𑁄𑀳𑀢𑁆𑀣𑀁 𑀧𑀼𑀦 𑀅𑀬𑀁 𑀲𑀗𑁆𑀔𑁂𑀧𑀯𑀺𑀦𑀺𑀘𑁆𑀙𑀬𑁄 𑁋 𑀧𑀼𑀭𑀺𑀫𑁂𑀲𑀼 𑀢𑀸𑀯 𑀘𑀢𑀽𑀲𑀼 𑀯𑀺𑀭𑀫𑀺𑀢𑀼𑀁 𑀦 𑀲𑀓𑁆𑀓𑁄𑀫𑀻𑀢𑀺 𑀯𑀢𑁆𑀢𑀩𑁆𑀩𑀁, 𑀧𑀘𑁆𑀙𑀺𑀫𑁂𑀲𑀼 𑀧𑀚𑀳𑀺𑀢𑀼𑀁 𑀦 𑀲𑀓𑁆𑀓𑁄𑀫𑀻𑀢𑀺. 𑀧𑀸𑀡𑀸𑀢𑀺𑀧𑀸𑀢𑀦𑀺𑀦𑁆𑀤𑀸𑀭𑁄𑀲𑀓𑁄𑀥𑀼𑀧𑀸𑀬𑀸𑀲𑁂𑀲𑀼 𑀘 𑀏𑀓𑁄 𑀅𑀯𑀺𑀚𑁆𑀚𑀸𑀲𑀯𑁄𑀯 𑀳𑁄𑀢𑀺, 𑀅𑀤𑀺𑀦𑁆𑀦𑀸𑀤𑀸𑀦𑀫𑀼𑀲𑀸𑀯𑀸𑀤𑀧𑀺𑀲𑀼𑀡𑀸𑀯𑀸𑀘𑀸𑀲𑀼 𑀓𑀸𑀫𑀸𑀲𑀯𑁄 𑀤𑀺𑀝𑁆𑀞𑀸𑀲𑀯𑁄 𑀅𑀯𑀺𑀚𑁆𑀚𑀸𑀲𑀯𑁄, 𑀕𑀺𑀤𑁆𑀥𑀺𑀮𑁄𑀪𑁂 𑀤𑀺𑀝𑁆𑀞𑀸𑀲𑀯𑁄 𑀅𑀯𑀺𑀚𑁆𑀚𑀸𑀲𑀯𑁄, 𑀅𑀢𑀺𑀫𑀸𑀦𑁂 𑀪𑀯𑀸𑀲𑀯𑁄 𑀅𑀯𑀺𑀚𑁆𑀚𑀸𑀲𑀯𑁄, 𑀅𑀧𑀸𑀡𑀸𑀢𑀺𑀧𑀸𑀢𑀁 𑀤𑀺𑀦𑁆𑀦𑀸𑀤𑀸𑀦𑀁 𑀓𑀸𑀬𑀺𑀓𑀁 𑀲𑀻𑀮𑀁, 𑀅𑀫𑀼𑀲𑀸 𑀅𑀧𑀺𑀲𑀼𑀡𑀁 𑀯𑀸𑀘𑀲𑀺𑀓𑀲𑀻𑀮𑀁, 𑀞𑀧𑁂𑀢𑁆𑀯𑀸 𑀅𑀦𑀺𑀦𑁆𑀤𑀸𑀭𑁄𑀲𑀁 𑀲𑁂𑀲𑀸𑀦𑀺 𑀢𑀻𑀡𑀺 𑀫𑀸𑀦𑀲𑀺𑀓𑀲𑀻𑀮𑀸𑀦𑀺. 𑀬𑀲𑁆𑀫𑀸 𑀧𑀦 𑀓𑀸𑀬𑁂𑀦𑀧𑀺 𑀖𑀝𑁆𑀝𑁂𑀢𑀺 𑀭𑁄𑀲𑁂𑀢𑀺 𑀯𑀸𑀘𑀸𑀬𑀧𑀺, 𑀢𑀲𑁆𑀫𑀸 𑀅𑀦𑀺𑀦𑁆𑀤𑀸𑀭𑁄𑀲𑁄 𑀤𑁆𑀯𑁂 𑀞𑀸𑀦𑀸𑀦𑀺 𑀬𑀸𑀢𑀺, 𑀓𑀸𑀬𑀺𑀓𑀲𑀻𑀮𑀫𑁆𑀧𑀺 𑀳𑁄𑀢𑀺 𑀯𑀸𑀘𑀲𑀺𑀓𑀲𑀻𑀮𑀫𑁆𑀧𑀺. 𑀏𑀢𑁆𑀢𑀸𑀯𑀢𑀸 𑀓𑀺𑀁 𑀓𑀣𑀺𑀢𑀁? 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀁. 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑁂 𑀞𑀺𑀢𑀲𑁆𑀲 𑀘 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀗𑁆𑀔𑀸𑀧𑀳𑀸𑀦𑀯𑀲𑁂𑀦 𑀕𑀺𑀳𑀺𑀯𑁄𑀳𑀸𑀭𑀲𑀫𑀼𑀘𑁆𑀙𑁂𑀤𑁄 𑀓𑀣𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀓𑀸𑀫𑀸𑀤𑀻𑀦𑀯𑀓𑀣𑀸𑀯𑀡𑁆𑀡𑀦𑀸

𑁪𑁨. 𑀯𑀺𑀢𑁆𑀣𑀸𑀭𑀤𑁂𑀲𑀦𑀸𑀬𑀁 𑀢𑀫𑁂𑀦𑀁 𑀤𑀓𑁆𑀔𑁄𑀢𑀺 𑀧𑀤𑀲𑁆𑀲 𑀉𑀧𑀲𑀼𑀫𑁆𑀪𑁂𑀬𑁆𑀬𑀸𑀢𑀺 𑀇𑀫𑀺𑀦𑀸 𑀲𑀤𑁆𑀥𑀺𑀁 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺, 𑀢𑀫𑁂𑀦𑀁 𑀓𑀼𑀓𑁆𑀓𑀼𑀭𑀁 𑀉𑀧𑀲𑀼𑀫𑁆𑀪𑁂𑀬𑁆𑀬, 𑀢𑀲𑁆𑀲 𑀲𑀫𑀻𑀧𑁂 𑀔𑀺𑀧𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀅𑀝𑁆𑀞𑀺𑀓𑀗𑁆𑀓𑀮𑀦𑁆𑀢𑀺 𑀉𑀭𑀝𑁆𑀞𑀺𑀁 𑀯𑀸 𑀧𑀺𑀝𑁆𑀞𑀺𑀓𑀡𑁆𑀝𑀓𑀁 𑀯𑀸 𑀲𑀻𑀲𑀝𑁆𑀞𑀺𑀁 𑀯𑀸. 𑀢𑀜𑁆𑀳𑀺 𑀦𑀺𑀫𑁆𑀫𑀁𑀲𑀢𑁆𑀢𑀸 𑀓𑀗𑁆𑀓𑀮𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀲𑀼𑀦𑀺𑀓𑁆𑀓𑀦𑁆𑀢𑀁 𑀦𑀺𑀓𑁆𑀓𑀦𑁆𑀢𑀦𑁆𑀢𑀺 𑀬𑀣𑀸 𑀲𑀼𑀦𑀺𑀓𑁆𑀓𑀦𑁆𑀢𑀁 𑀳𑁄𑀢𑀺, 𑀏𑀯𑀁 𑀦𑀺𑀓𑁆𑀓𑀦𑁆𑀢𑀁 𑀦𑀺𑀮𑁆𑀮𑀺𑀔𑀺𑀢𑀁, 𑀬𑀤𑁂𑀢𑁆𑀣 𑀅𑀮𑁆𑀮𑀻𑀦𑀫𑀁𑀲𑀁 𑀅𑀢𑁆𑀣𑀺, 𑀢𑀁 𑀲𑀩𑁆𑀩𑀁 𑀦𑀺𑀮𑁆𑀮𑀺𑀔𑀺𑀢𑁆𑀯𑀸 𑀅𑀝𑁆𑀞𑀺𑀫𑀢𑁆𑀢𑀫𑁂𑀯 𑀓𑀢𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯𑀸𑀳 ‘‘𑀦𑀺𑀫𑁆𑀫𑀁𑀲’’𑀦𑁆𑀢𑀺. 𑀮𑁄𑀳𑀺𑀢𑀁 𑀧𑀦 𑀫𑀓𑁆𑀔𑀺𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀢𑁂𑀦 𑀯𑀼𑀢𑁆𑀢𑀁 ‘‘𑀮𑁄𑀳𑀺𑀢𑀫𑀓𑁆𑀔𑀺𑀢’’𑀦𑁆𑀢𑀺.

𑀩𑀳𑀼𑀤𑀼𑀓𑁆𑀔𑀸 𑀩𑀳𑀼𑀧𑀸𑀬𑀸𑀲𑀸𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑁂𑀳𑀺 𑀤𑀼𑀓𑁆𑀔𑁂𑀳𑀺 𑀩𑀳𑀼𑀤𑀼𑀓𑁆𑀔𑀸, 𑀉𑀧𑀸𑀬𑀸𑀲𑀲𑀁𑀓𑀺𑀮𑁂𑀲𑁂𑀳𑀺 𑀩𑀳𑀼𑀧𑀸𑀬𑀸𑀲𑀸. 𑀬𑀸𑀬𑀁 𑀉𑀧𑁂𑀓𑁆𑀔𑀸 𑀦𑀸𑀦𑀢𑁆𑀢𑀸 𑀦𑀸𑀦𑀢𑁆𑀢𑀲𑀺𑀢𑀸𑀢𑀺 𑀬𑀸 𑀅𑀬𑀁 𑀧𑀜𑁆𑀘𑀓𑀸𑀫𑀕𑀼𑀡𑀸𑀭𑀫𑁆𑀫𑀡𑀯𑀲𑁂𑀦 𑀦𑀸𑀦𑀸𑀲𑀪𑀸𑀯𑀸, 𑀢𑀸𑀦𑁂𑀯 𑀘 𑀆𑀭𑀫𑁆𑀫𑀡𑀸𑀦𑀺 𑀦𑀺𑀲𑁆𑀲𑀺𑀢𑀢𑁆𑀢𑀸 ‘‘𑀦𑀸𑀦𑀢𑁆𑀢𑀲𑀺𑀢𑀸’’𑀢𑀺 𑀯𑀼𑀘𑁆𑀘𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀽𑀧𑁂𑀓𑁆𑀔𑀸, 𑀢𑀁 𑀅𑀪𑀺𑀦𑀺𑀯𑀚𑁆𑀚𑁂𑀢𑁆𑀯𑀸. 𑀏𑀓𑀢𑁆𑀢𑀸 𑀏𑀓𑀢𑁆𑀢𑀲𑀺𑀢𑀸𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀼𑀧𑁂𑀓𑁆𑀔𑀸, 𑀲𑀸 𑀳𑀺 𑀤𑀺𑀯𑀲𑀫𑁆𑀧𑀺 𑀏𑀓𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀉𑀧𑁆𑀧𑀚𑁆𑀚𑀦𑀢𑁄 𑀏𑀓𑀲𑀪𑀸𑀯𑀸, 𑀢𑀤𑁂𑀯 𑀏𑀓𑀁 𑀆𑀭𑀫𑁆𑀫𑀡𑀁 𑀦𑀺𑀲𑁆𑀲𑀺𑀢𑀢𑁆𑀢𑀸 𑀏𑀓𑀢𑁆𑀢𑀲𑀺𑀢𑀸 𑀦𑀸𑀫. 𑀬𑀢𑁆𑀣 𑀲𑀩𑁆𑀩𑀲𑁄 𑀮𑁄𑀓𑀸𑀫𑀺𑀲𑀽𑀧𑀸𑀤𑀸𑀦𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀻𑀢𑀺 𑀬𑀢𑁆𑀣 𑀘𑀢𑀼𑀢𑁆𑀣𑀚𑁆𑀛𑀸𑀦𑀼𑀧𑁂𑀓𑁆𑀔𑀸𑀬𑀁 𑀬𑀁 𑀉𑀧𑁂𑀓𑁆𑀔𑀁 𑀆𑀕𑀫𑁆𑀫 𑀬𑀁 𑀧𑀝𑀺𑀘𑁆𑀘 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀧𑀭𑀺𑀲𑁂𑀲𑀸 𑀮𑁄𑀓𑀸𑀫𑀺𑀲𑀲𑀗𑁆𑀔𑀸𑀢𑀸 𑀧𑀜𑁆𑀘𑀓𑀸𑀫𑀕𑀼𑀡𑀸𑀫𑀺𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀧𑀜𑁆𑀘𑀓𑀸𑀫𑀕𑀼𑀡𑀸𑀫𑀺𑀲𑀸𑀢𑀺 𑀘 𑀓𑀸𑀫𑀕𑀼𑀡𑀸𑀭𑀫𑁆𑀫𑀡𑀙𑀦𑁆𑀤𑀭𑀸𑀕𑀸, 𑀕𑀳𑀡𑀝𑁆𑀞𑁂𑀦 𑀢𑁂𑀬𑁂𑀯 𑀘 𑀉𑀧𑀸𑀤𑀸𑀦𑀸𑀢𑀺𑀧𑀺 𑀯𑀼𑀢𑁆𑀢𑀸. 𑀢𑀫𑁂𑀯𑀽𑀧𑁂𑀓𑁆𑀔𑀁 𑀪𑀸𑀯𑁂𑀢𑀻𑀢𑀺 𑀢𑀁 𑀮𑁄𑀓𑀸𑀫𑀺𑀲𑀽𑀧𑀸𑀤𑀸𑀦𑀸𑀦𑀁 𑀧𑀝𑀺𑀧𑀓𑁆𑀔𑀪𑀽𑀢𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀼𑀧𑁂𑀓𑁆𑀔𑀫𑁂𑀯 𑀯𑀟𑁆𑀠𑁂𑀢𑀺.

𑁪𑁩. 𑀉𑀟𑁆𑀟𑀻𑀬𑁂𑀬𑁆𑀬𑀸𑀢𑀺 𑀉𑀧𑁆𑀧𑀢𑀺𑀢𑁆𑀯𑀸 𑀕𑀘𑁆𑀙𑁂𑀬𑁆𑀬. 𑀅𑀦𑀼𑀧𑀢𑀺𑀢𑁆𑀯𑀸𑀢𑀺 𑀅𑀦𑀼𑀩𑀦𑁆𑀥𑀺𑀢𑁆𑀯𑀸. 𑀯𑀺𑀢𑀘𑁆𑀙𑁂𑀬𑁆𑀬𑀼𑀦𑁆𑀢𑀺 𑀫𑀼𑀔𑀢𑀼𑀡𑁆𑀟𑀓𑁂𑀦 𑀟𑀁𑀲𑀦𑁆𑀢𑀸 𑀢𑀘𑁆𑀙𑁂𑀬𑁆𑀬𑀼𑀁. 𑀯𑀺𑀲𑁆𑀲𑀚𑁆𑀚𑁂𑀬𑁆𑀬𑀼𑀦𑁆𑀢𑀺 𑀫𑀁𑀲𑀧𑁂𑀲𑀺𑀁 𑀦𑀔𑁂𑀳𑀺 𑀓𑀟𑁆𑀠𑀺𑀢𑁆𑀯𑀸 𑀧𑀸𑀢𑁂𑀬𑁆𑀬𑀼𑀁.

𑁪𑁭. 𑀬𑀸𑀦𑀁 𑀯𑀸 𑀧𑁄𑀭𑀺𑀲𑁂𑀬𑁆𑀬𑀦𑁆𑀢𑀺 𑀧𑀼𑀭𑀺𑀲𑀸𑀦𑀼𑀘𑁆𑀙𑀯𑀺𑀓𑀁 𑀬𑀸𑀦𑀁. 𑀧𑀯𑀭𑀫𑀡𑀺𑀓𑀼𑀡𑁆𑀟𑀮𑀦𑁆𑀢𑀺 𑀦𑀸𑀦𑀧𑁆𑀧𑀓𑀸𑀭𑀁 𑀉𑀢𑁆𑀢𑀫𑀫𑀡𑀺𑀜𑁆𑀘 𑀓𑀼𑀡𑁆𑀟𑀮𑀜𑁆𑀘. 𑀲𑀸𑀦𑀺 𑀳𑀭𑀦𑁆𑀢𑀻𑀢𑀺 𑀅𑀢𑁆𑀢𑀦𑁄 𑀪𑀡𑁆𑀟𑀓𑀸𑀦𑀺 𑀕𑀡𑁆𑀳𑀦𑁆𑀢𑀺.

𑁪𑁮. 𑀲𑀫𑁆𑀧𑀦𑁆𑀦𑀨𑀮𑀦𑁆𑀢𑀺 𑀫𑀥𑀼𑀭𑀨𑀮𑀁. 𑀉𑀧𑀧𑀦𑁆𑀦𑀨𑀮𑀦𑁆𑀢𑀺 𑀨𑀮𑀽𑀧𑀧𑀦𑁆𑀦𑀁 𑀩𑀳𑀼𑀨𑀮𑀁.

𑁪𑁯. 𑀅𑀦𑀼𑀢𑁆𑀢𑀭𑀦𑁆𑀢𑀺 𑀉𑀢𑁆𑀢𑀫𑀁 𑀧𑀪𑀲𑁆𑀲𑀭𑀁 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀁.

𑁫𑁦. 𑀆𑀭𑀓𑀸 𑀅𑀳𑀁, 𑀪𑀦𑁆𑀢𑁂𑀢𑀺 𑀧𑀣𑀯𑀺𑀢𑁄 𑀦𑀪𑀁 𑀯𑀺𑀬 𑀲𑀫𑀼𑀤𑁆𑀤𑀲𑁆𑀲 𑀑𑀭𑀺𑀫𑀢𑀻𑀭𑀢𑁄 𑀧𑀭𑀢𑀻𑀭𑀁 𑀯𑀺𑀬 𑀘 𑀲𑀼𑀯𑀺𑀤𑀽𑀭𑀯𑀺𑀤𑀽𑀭𑁂 𑀅𑀳𑀁. 𑀅𑀦𑀸𑀚𑀸𑀦𑀻𑀬𑁂𑀢𑀺 𑀕𑀺𑀳𑀺𑀯𑁄𑀳𑀸𑀭𑀲𑀫𑀼𑀘𑁆𑀙𑁂𑀤𑀦𑀲𑁆𑀲 𑀓𑀸𑀭𑀡𑀁 𑀅𑀚𑀸𑀦𑀦𑀓𑁂. 𑀆𑀚𑀸𑀦𑀻𑀬𑀪𑁄𑀚𑀦𑀦𑁆𑀢𑀺 𑀓𑀸𑀭𑀡𑀁 𑀚𑀸𑀦𑀦𑁆𑀢𑁂𑀳𑀺 𑀪𑀼𑀜𑁆𑀚𑀺𑀢𑀩𑁆𑀩𑀁 𑀪𑁄𑀚𑀦𑀁. 𑀅𑀦𑀸𑀚𑀸𑀦𑀻𑀬𑀪𑁄𑀚𑀦𑀦𑁆𑀢𑀺 𑀓𑀸𑀭𑀡𑀁 𑀅𑀚𑀸𑀦𑀦𑁆𑀢𑁂𑀳𑀺 𑀪𑀼𑀜𑁆𑀚𑀺𑀢𑀩𑁆𑀩𑀁 𑀪𑁄𑀚𑀦𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀧𑁄𑀢𑀮𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.