𑁭. 𑀯𑀻𑀫𑀁𑀲𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁮𑁭. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀯𑀻𑀫𑀁𑀲𑀓𑀲𑀼𑀢𑁆𑀢𑀁. 𑀢𑀢𑁆𑀣 𑀯𑀻𑀫𑀁𑀲𑀓𑁂𑀦𑀸𑀢𑀺 𑀢𑀬𑁄 𑀯𑀻𑀫𑀁𑀲𑀓𑀸 𑁋 𑀅𑀢𑁆𑀣𑀯𑀻𑀫𑀁𑀲𑀓𑁄 𑀲𑀗𑁆𑀔𑀸𑀭𑀯𑀻𑀫𑀁𑀲𑀓𑁄 𑀲𑀢𑁆𑀣𑀼𑀯𑀻𑀫𑀁𑀲𑀓𑁄𑀢𑀺. 𑀢𑁂𑀲𑀼, ‘‘𑀧𑀡𑁆𑀟𑀺𑀢𑀸 𑀳𑀸𑀯𑀼𑀲𑁄, 𑀫𑀦𑀼𑀲𑁆𑀲𑀸 𑀯𑀻𑀫𑀁𑀲𑀓𑀸’’𑀢𑀺 (𑀲𑀁. 𑀦𑀺. 𑁩.𑁨) 𑀏𑀢𑁆𑀣 𑀅𑀢𑁆𑀣𑀯𑀻𑀫𑀁𑀲𑀓𑁄 𑀆𑀕𑀢𑁄. ‘‘𑀬𑀢𑁄 𑀔𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀥𑀸𑀢𑀼𑀓𑀼𑀲𑀮𑁄 𑀘 𑀳𑁄𑀢𑀺, 𑀆𑀬𑀢𑀦𑀓𑀼𑀲𑀮𑁄 𑀘 𑀳𑁄𑀢𑀺, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀼𑀲𑀮𑁄 𑀘 𑀳𑁄𑀢𑀺, 𑀞𑀸𑀦𑀸𑀝𑁆𑀞𑀸𑀦𑀓𑀼𑀲𑀮𑁄 𑀘 𑀳𑁄𑀢𑀺, 𑀏𑀢𑁆𑀢𑀸𑀯𑀢𑀸 𑀔𑁄, 𑀆𑀦𑀦𑁆𑀤, 𑀧𑀡𑁆𑀟𑀺𑀢𑁄 𑀪𑀺𑀓𑁆𑀔𑀼 𑀯𑀻𑀫𑀁𑀲𑀓𑁄𑀢𑀺 𑀅𑀮𑀁 𑀯𑀘𑀦𑀸𑀬𑀸’’𑀢𑀺 (𑀫. 𑀦𑀺. 𑁩.𑁧𑁨𑁪) 𑀏𑀢𑁆𑀣 𑀲𑀗𑁆𑀔𑀸𑀭𑀯𑀻𑀫𑀁𑀲𑀓𑁄 𑀆𑀕𑀢𑁄. 𑀇𑀫𑀲𑁆𑀫𑀺𑀁 𑀧𑀦 𑀲𑀼𑀢𑁆𑀢𑁂 𑀲𑀢𑁆𑀣𑀼𑀯𑀻𑀫𑀁𑀲𑀓𑁄 𑀅𑀥𑀺𑀧𑁆𑀧𑁂𑀢𑁄. 𑀘𑁂𑀢𑁄𑀧𑀭𑀺𑀬𑀸𑀬𑀦𑁆𑀢𑀺 𑀘𑀺𑀢𑁆𑀢𑀯𑀸𑀭𑀁 𑀘𑀺𑀢𑁆𑀢𑀧𑀭𑀺𑀘𑁆𑀙𑁂𑀤𑀁. 𑀲𑀫𑀦𑁆𑀦𑁂𑀲𑀦𑀸𑀢𑀺 𑀏𑀲𑀦𑀸 𑀧𑀭𑀺𑀬𑁂𑀲𑀦𑀸 𑀉𑀧𑀧𑀭𑀺𑀓𑁆𑀔𑀸. 𑀇𑀢𑀺 𑀯𑀺𑀜𑁆𑀜𑀸𑀡𑀸𑀬𑀸𑀢𑀺 𑀏𑀯𑀁 𑀯𑀺𑀚𑀸𑀦𑀦𑀢𑁆𑀣𑀸𑀬.

𑁪𑁮𑁮. 𑀤𑁆𑀯𑀻𑀲𑀼 𑀥𑀫𑁆𑀫𑁂𑀲𑀼 𑀢𑀣𑀸𑀕𑀢𑁄 𑀲𑀫𑀦𑁆𑀦𑁂𑀲𑀺𑀢𑀩𑁆𑀩𑁄𑀢𑀺 𑀇𑀥 𑀓𑀮𑁆𑀬𑀸𑀡𑀫𑀺𑀢𑁆𑀢𑀽𑀧𑀦𑀺𑀲𑁆𑀲𑀬𑀁 𑀤𑀲𑁆𑀲𑁂𑀢𑀺. 𑀫𑀳𑀸 𑀳𑀺 𑀏𑀲 𑀓𑀮𑁆𑀬𑀸𑀡𑀫𑀺𑀢𑁆𑀢𑀽𑀧𑀦𑀺𑀲𑁆𑀲𑀬𑁄 𑀦𑀸𑀫. 𑀢𑀲𑁆𑀲 𑀫𑀳𑀦𑁆𑀢𑀪𑀸𑀯𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄 𑁋 𑀏𑀓𑀲𑁆𑀫𑀺𑀁 𑀳𑀺 𑀲𑀫𑀬𑁂 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀉𑀧𑀟𑁆𑀠𑀁 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀳𑁄𑀢𑀺, 𑀉𑀧𑀟𑁆𑀠𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀸𑀦𑀼𑀪𑀸𑀯𑁂𑀦𑀸𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀦𑀺𑀘𑁆𑀙𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀺, 𑁋 ‘‘𑀉𑀧𑀟𑁆𑀠𑀫𑀺𑀤𑀁, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲, 𑀬𑀤𑀺𑀤𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸 𑀓𑀮𑁆𑀬𑀸𑀡𑀲𑀳𑀸𑀬𑀢𑀸 𑀓𑀮𑁆𑀬𑀸𑀡𑀲𑀫𑁆𑀧𑀯𑀗𑁆𑀓𑀢𑀸’’𑀢𑀺. 𑀪𑀕𑀯𑀸 𑀆𑀳 𑁋 ‘‘𑀫𑀸 𑀳𑁂𑀯𑀁, 𑀆𑀦𑀦𑁆𑀤, 𑀫𑀸 𑀳𑁂𑀯𑀁, 𑀆𑀦𑀦𑁆𑀤, 𑀲𑀓𑀮𑀫𑁂𑀯𑀺𑀤𑀁, 𑀆𑀦𑀦𑁆𑀤, 𑀩𑁆𑀭𑀳𑁆𑀫𑀘𑀭𑀺𑀬𑀁 𑀬𑀤𑀺𑀤𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸 𑀓𑀮𑁆𑀬𑀸𑀡𑀲𑀳𑀸𑀬𑀢𑀸, 𑀓𑀮𑁆𑀬𑀸𑀡𑀲𑀫𑁆𑀧𑀯𑀗𑁆𑀓𑀢𑀸. 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁆𑀲𑁂𑀢𑀁, 𑀆𑀦𑀦𑁆𑀤, 𑀪𑀺𑀓𑁆𑀔𑀼𑀦𑁄 𑀧𑀸𑀝𑀺𑀓𑀗𑁆𑀔𑀁 𑀓𑀮𑁆𑀬𑀸𑀡𑀲𑀳𑀸𑀬𑀲𑁆𑀲 𑀓𑀮𑁆𑀬𑀸𑀡𑀲𑀫𑁆𑀧𑀯𑀗𑁆𑀓𑀲𑁆𑀲, 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀪𑀸𑀯𑁂𑀲𑁆𑀲𑀢𑀺, 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀩𑀳𑀼𑀮𑀻𑀓𑀭𑀺𑀲𑁆𑀲𑀢𑀺. 𑀓𑀣𑀜𑁆𑀘𑀸𑀦𑀦𑁆𑀤, 𑀪𑀺𑀓𑁆𑀔𑀼 𑀓𑀮𑁆𑀬𑀸𑀡𑀫𑀺𑀢𑁆𑀢𑁄…𑀧𑁂… 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀪𑀸𑀯𑁂𑀢𑀺, 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀩𑀳𑀼𑀮𑀻𑀓𑀭𑁄𑀢𑀺. 𑀇𑀥𑀸𑀦𑀦𑁆𑀤, 𑀪𑀺𑀓𑁆𑀔𑀼 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀪𑀸𑀯𑁂𑀢𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀏𑀯𑀁 𑀔𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀓𑀮𑁆𑀬𑀸𑀡𑀫𑀺𑀢𑁆𑀢𑁄…𑀧𑁂… 𑀩𑀳𑀼𑀮𑀻𑀓𑀭𑁄𑀢𑀺, 𑀢𑀤𑀫𑀺𑀦𑀸𑀧𑁂𑀢𑀁, 𑀆𑀦𑀦𑁆𑀤, 𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸 𑀲𑀓𑀮𑀫𑁂𑀯𑀺𑀤𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀬𑀤𑀺𑀤𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸 𑀓𑀮𑁆𑀬𑀸𑀡𑀲𑀳𑀸𑀬𑀢𑀸 𑀓𑀮𑁆𑀬𑀸𑀡𑀲𑀫𑁆𑀧𑀯𑀗𑁆𑀓𑀢𑀸. 𑀫𑀫𑀜𑁆𑀳𑀺, 𑀆𑀦𑀦𑁆𑀤, 𑀓𑀮𑁆𑀬𑀸𑀡𑀫𑀺𑀢𑁆𑀢𑀁 𑀆𑀕𑀫𑁆𑀫 𑀚𑀸𑀢𑀺𑀥𑀫𑁆𑀫𑀸 𑀲𑀢𑁆𑀢𑀸 𑀚𑀸𑀢𑀺𑀬𑀸 𑀧𑀭𑀺𑀫𑀼𑀘𑁆𑀘𑀦𑁆𑀢𑀺. 𑀚𑀭𑀸𑀥𑀫𑁆𑀫𑀸…𑀧𑁂… 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀥𑀫𑁆𑀫𑀸 𑀲𑀢𑁆𑀢𑀸 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑁂𑀳𑀺 𑀧𑀭𑀺𑀫𑀼𑀘𑁆𑀘𑀦𑁆𑀢𑀻’’𑀢𑀺 (𑀲𑀁. 𑀦𑀺. 𑁫.𑁨).

𑀪𑀺𑀓𑁆𑀔𑀽𑀦𑀁 𑀩𑀸𑀳𑀺𑀭𑀗𑁆𑀕𑀲𑀫𑁆𑀧𑀢𑁆𑀢𑀺𑀁 𑀓𑀣𑁂𑀦𑁆𑀢𑁄𑀧𑀺 𑀆𑀳 𑁋 ‘‘𑀩𑀸𑀳𑀺𑀭𑀁, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑀦𑁆𑀢𑀺 𑀓𑀭𑀺𑀢𑁆𑀯𑀸 𑀦𑀸𑀜𑁆𑀜𑀁 𑀏𑀓𑀗𑁆𑀕𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀬𑀁 𑀏𑀯𑀁 𑀫𑀳𑀢𑁄 𑀅𑀢𑁆𑀣𑀸𑀬 𑀲𑀁𑀯𑀢𑁆𑀢𑀢𑀺, 𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸. 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸, 𑀪𑀺𑀓𑁆𑀔𑀯𑁂, 𑀫𑀳𑀢𑁄 𑀅𑀢𑁆𑀣𑀸𑀬 𑀲𑀁𑀯𑀢𑁆𑀢𑀢𑀻’’𑀢𑀺 (𑀅. 𑀦𑀺. 𑁧.𑁧𑁧𑁩). 𑀫𑀳𑀸𑀘𑀼𑀦𑁆𑀤𑀲𑁆𑀲 𑀓𑀺𑀮𑁂𑀲𑀲𑀮𑁆𑀮𑁂𑀔𑀧𑀝𑀺𑀧𑀤𑀁 𑀓𑀣𑁂𑀦𑁆𑀢𑁄𑀧𑀺, ‘‘𑀧𑀭𑁂 𑀧𑀸𑀧𑀫𑀺𑀢𑁆𑀢𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀫𑀬𑀫𑁂𑀢𑁆𑀣 𑀓𑀮𑁆𑀬𑀸𑀡𑀫𑀺𑀢𑁆𑀢𑀸 𑀪𑀯𑀺𑀲𑁆𑀲𑀸𑀫𑀸𑀢𑀺 𑀲𑀮𑁆𑀮𑁂𑀔𑁄 𑀓𑀭𑀡𑀻𑀬𑁄’’𑀢𑀺 (𑀫. 𑀦𑀺. 𑁧.𑁮𑁩) 𑀆𑀳. 𑀫𑁂𑀖𑀺𑀬𑀢𑁆𑀣𑁂𑀭𑀲𑁆𑀲 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀺𑀬𑀥𑀫𑁆𑀫𑁂 𑀓𑀣𑁂𑀦𑁆𑀢𑁄𑀧𑀺, ‘‘𑀅𑀧𑀭𑀺𑀧𑀓𑁆𑀓𑀸𑀬, 𑀫𑁂𑀖𑀺𑀬, 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀧𑀜𑁆𑀘 𑀥𑀫𑁆𑀫𑀸 𑀧𑀭𑀺𑀧𑀸𑀓𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂 𑀧𑀜𑁆𑀘? 𑀇𑀥, 𑀫𑁂𑀖𑀺𑀬, 𑀪𑀺𑀓𑁆𑀔𑀼 𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀳𑁄𑀢𑀺’’𑀢𑀺 (𑀉𑀤𑀸. 𑁩𑁧) 𑀓𑀮𑁆𑀬𑀸𑀡𑀫𑀺𑀢𑁆𑀢𑀽𑀧𑀦𑀺𑀲𑁆𑀲𑀬𑀫𑁂𑀯 𑀯𑀺𑀲𑁂𑀲𑁂𑀲𑀺. 𑀧𑀺𑀬𑀧𑀼𑀢𑁆𑀢𑀲𑁆𑀲 𑀭𑀸𑀳𑀼𑀮𑀢𑁆𑀣𑁂𑀭𑀲𑁆𑀲 𑀅𑀪𑀺𑀡𑁆𑀳𑁄𑀯𑀸𑀤𑀁 𑀤𑁂𑀦𑁆𑀢𑁄𑀧𑀺 𑁋

‘‘𑀫𑀺𑀢𑁆𑀢𑁂 𑀪𑀚𑀲𑁆𑀲𑀼 𑀓𑀮𑁆𑀬𑀸𑀡𑁂, 𑀧𑀦𑁆𑀢𑀜𑁆𑀘 𑀲𑀬𑀦𑀸𑀲𑀦𑀁;

𑀯𑀺𑀯𑀺𑀢𑁆𑀢𑀁 𑀅𑀧𑁆𑀧𑀦𑀺𑀕𑁆𑀖𑁄𑀲𑀁, 𑀫𑀢𑁆𑀢𑀜𑁆𑀜𑀽 𑀳𑁄𑀳𑀺 𑀪𑁄𑀚𑀦𑁂.

𑀘𑀻𑀯𑀭𑁂 𑀧𑀺𑀡𑁆𑀟𑀧𑀸𑀢𑁂 𑀘, 𑀧𑀘𑁆𑀘𑀬𑁂 𑀲𑀬𑀦𑀸𑀲𑀦𑁂;

𑀏𑀢𑁂𑀲𑀼 𑀢𑀡𑁆𑀳𑀁 𑀫𑀸𑀓𑀸𑀲𑀺, 𑀫𑀸 𑀮𑁄𑀓𑀁 𑀧𑀼𑀦𑀭𑀸𑀕𑀫𑀻’’𑀢𑀺. (𑀲𑀼. 𑀦𑀺. 𑁩𑁪𑁦, 𑁩𑁪𑁧) 𑁋

𑀓𑀮𑁆𑀬𑀸𑀡𑀫𑀺𑀢𑁆𑀢𑀽𑀧𑀦𑀺𑀲𑁆𑀲𑀬𑀫𑁂𑀯 𑀲𑀩𑁆𑀩𑀧𑀞𑀫𑀁 𑀓𑀣𑁂𑀲𑀺. 𑀏𑀯𑀁 𑀫𑀳𑀸 𑀏𑀲 𑀓𑀮𑁆𑀬𑀸𑀡𑀫𑀺𑀢𑁆𑀢𑀽𑀧𑀦𑀺𑀲𑁆𑀲𑀬𑁄 𑀦𑀸𑀫. 𑀇𑀥𑀸𑀧𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀪𑀕𑀯𑀸 𑀤𑁆𑀯𑀻𑀲𑀼 𑀥𑀫𑁆𑀫𑁂𑀲𑀼 𑀢𑀣𑀸𑀕𑀢𑁄 𑀲𑀫𑀦𑁆𑀦𑁂𑀲𑀺𑀢𑀩𑁆𑀩𑁄𑀢𑀺 𑀤𑁂𑀲𑀦𑀁 𑀆𑀭𑀪𑀺. 𑀧𑀡𑁆𑀟𑀺𑀢𑁄 𑀪𑀺𑀓𑁆𑀔𑀼 𑀤𑁆𑀯𑀻𑀲𑀼 𑀥𑀫𑁆𑀫𑁂𑀲𑀼 𑀢𑀣𑀸𑀕𑀢𑀁 𑀏𑀲𑀢𑀼 𑀕𑀯𑁂𑀲𑀢𑀽𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀪𑀕𑀯𑀸 𑀅𑀬𑀁 𑀫𑀳𑀸𑀚𑀘𑁆𑀘𑁄𑀢𑀺 𑀯𑀸, 𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑁄𑀢𑀺 𑀯𑀸, 𑀅𑀪𑀺𑀭𑀽𑀧𑁄 𑀤𑀲𑁆𑀲𑀦𑀻𑀬𑁄𑀢𑀺 𑀯𑀸, 𑀅𑀪𑀺𑀜𑁆𑀜𑀸𑀢𑁄 𑀅𑀪𑀺𑀮𑀓𑁆𑀔𑀺𑀢𑁄𑀢𑀺 𑀯𑀸, 𑀇𑀫𑀁 𑀦𑀺𑀲𑁆𑀲𑀸𑀬𑀸𑀳𑀁 𑀘𑀻𑀯𑀭𑀸𑀤𑀬𑁄 𑀧𑀘𑁆𑀘𑀬𑁂 𑀮𑀪𑀺𑀲𑁆𑀲𑀸𑀫𑀻𑀢𑀺 𑀯𑀸, 𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 𑀫𑀁 𑀦𑀺𑀲𑁆𑀲𑀸𑀬 𑀯𑀲𑀦𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀬𑁄 𑀧𑀦 𑀏𑀯𑀁 𑀲𑀮𑁆𑀮𑀓𑁆𑀔𑁂𑀢𑀺, ‘‘𑀧𑀳𑁄𑀢𑀺 𑀫𑁂 𑀏𑀲 𑀲𑀢𑁆𑀣𑀸 𑀳𑀼𑀢𑁆𑀯𑀸 𑀲𑀢𑁆𑀣𑀼𑀓𑀺𑀘𑁆𑀘𑀁 𑀲𑀸𑀥𑁂𑀢𑀼’’𑀦𑁆𑀢𑀺, 𑀲𑁄 𑀫𑀁 𑀪𑀚𑀢𑀽𑀢𑀺 𑀲𑀻𑀳𑀦𑀸𑀤𑀁 𑀦𑀤𑀢𑀺. 𑀩𑀼𑀤𑁆𑀥𑀲𑀻𑀳𑀦𑀸𑀤𑁄 𑀓𑀺𑀭 𑀦𑀸𑀫𑁂𑀲 𑀲𑀼𑀢𑁆𑀢𑀦𑁆𑀢𑁄𑀢𑀺.

𑀇𑀤𑀸𑀦𑀺 𑀢𑁂 𑀤𑁆𑀯𑁂 𑀥𑀫𑁆𑀫𑁂 𑀤𑀲𑁆𑀲𑁂𑀦𑁆𑀢𑁄 𑀘𑀓𑁆𑀔𑀼𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑁂𑀲𑀽𑀢𑀺 𑀆𑀳. 𑀢𑀢𑁆𑀣 𑀲𑀢𑁆𑀣𑀼 𑀓𑀸𑀬𑀺𑀓𑁄 𑀲𑀫𑀸𑀘𑀸𑀭𑁄 𑀯𑀻𑀫𑀁𑀲𑀓𑀲𑁆𑀲 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑁄 𑀥𑀫𑁆𑀫𑁄 𑀦𑀸𑀫. 𑀯𑀸𑀘𑀲𑀺𑀓𑁄 𑀲𑀫𑀸𑀘𑀸𑀭𑁄 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑁄 𑀥𑀫𑁆𑀫𑁄 𑀦𑀸𑀫. 𑀇𑀤𑀸𑀦𑀺 𑀢𑁂𑀲𑀼 𑀲𑀫𑀦𑁆𑀦𑁂𑀲𑀺𑀢𑀩𑁆𑀩𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀬𑁂 𑀲𑀁𑀓𑀺𑀮𑀺𑀝𑁆𑀞𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀁𑀓𑀺𑀮𑀺𑀝𑁆𑀞𑀸𑀢𑀺 𑀓𑀺𑀮𑁂𑀲𑀲𑀫𑁆𑀧𑀬𑀼𑀢𑁆𑀢𑀸. 𑀢𑁂 𑀘 𑀦 𑀘𑀓𑁆𑀔𑀼𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸. 𑀬𑀣𑀸 𑀧𑀦 𑀉𑀤𑀓𑁂 𑀘𑀮𑀦𑁆𑀢𑁂 𑀯𑀸 𑀧𑀼𑀧𑁆𑀨𑀼𑀴𑀓𑁂 𑀯𑀸 𑀫𑀼𑀜𑁆𑀘𑀦𑁆𑀢𑁂 𑀅𑀦𑁆𑀢𑁄 𑀫𑀘𑁆𑀙𑁄 𑀅𑀢𑁆𑀣𑀻𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀏𑀯𑀁 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀯𑀸 𑀓𑀭𑁄𑀦𑁆𑀢𑀲𑁆𑀲, 𑀫𑀼𑀲𑀸𑀯𑀸𑀤𑀸𑀤𑀻𑀦𑀺 𑀯𑀸 𑀪𑀡𑀦𑁆𑀢𑀲𑁆𑀲 𑀓𑀸𑀬𑀯𑀘𑀻𑀲𑀫𑀸𑀘𑀸𑀭𑁂 𑀤𑀺𑀲𑁆𑀯𑀸 𑀘 𑀲𑀼𑀢𑁆𑀯𑀸 𑀘 𑀢𑀁𑀲𑀫𑀼𑀝𑁆𑀞𑀸𑀧𑀓𑀘𑀺𑀢𑁆𑀢𑀁 𑀲𑀁𑀓𑀺𑀮𑀺𑀝𑁆𑀞𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀢𑀲𑁆𑀫𑀸 𑀏𑀯𑀫𑀸𑀳. 𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑀲𑁆𑀲 𑀳𑀺 𑀓𑀸𑀬𑀯𑀘𑀻𑀲𑀫𑀸𑀘𑀸𑀭𑀸𑀧𑀺 𑀲𑀁𑀓𑀺𑀮𑀺𑀝𑁆𑀞𑀸𑀬𑁂𑀯 𑀦𑀸𑀫. 𑀦 𑀢𑁂 𑀢𑀣𑀸𑀕𑀢𑀲𑁆𑀲 𑀲𑀁𑀯𑀺𑀚𑁆𑀚𑀦𑁆𑀢𑀻𑀢𑀺 𑀦 𑀢𑁂 𑀢𑀣𑀸𑀕𑀢𑀲𑁆𑀲 𑀅𑀢𑁆𑀣𑀺. 𑀦 𑀉𑀧𑀮𑀩𑁆𑀪𑀦𑁆𑀢𑀻𑀢𑀺 𑀏𑀯𑀁 𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀦𑀢𑁆𑀣𑀺𑀢𑀸𑀬𑁂𑀯 𑀳𑀺 𑀢𑁂 𑀦 𑀉𑀧𑀮𑀩𑁆𑀪𑀦𑁆𑀢𑀺 𑀦 𑀧𑀝𑀺𑀘𑁆𑀙𑀦𑁆𑀦𑀢𑀸𑀬. 𑀢𑀣𑀸 𑀳𑀺 𑀪𑀕𑀯𑀸 𑀏𑀓𑀤𑀺𑀯𑀲𑀁 𑀇𑀫𑁂𑀲𑀼 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀯𑀸𑀭𑁂𑀦𑁆𑀢𑁄 𑀆𑀳 𑁋 ‘‘𑀳𑀦𑁆𑀤 𑀤𑀸𑀦𑀺, 𑀪𑀺𑀓𑁆𑀔𑀯𑁂, 𑀧𑀯𑀸𑀭𑁂𑀫𑀺 𑀯𑁄, 𑀦 𑀘 𑀫𑁂 𑀓𑀺𑀜𑁆𑀘𑀺 𑀕𑀭𑀳𑀣 𑀓𑀸𑀬𑀺𑀓𑀁 𑀯𑀸 𑀯𑀸𑀘𑀲𑀺𑀓𑀁 𑀯𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀉𑀝𑁆𑀞𑀸𑀬𑀸𑀲𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀦 𑀔𑁄 𑀫𑀬𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀓𑀺𑀜𑁆𑀘𑀺 𑀕𑀭𑀳𑀸𑀫 𑀓𑀸𑀬𑀺𑀓𑀁 𑀯𑀸 𑀯𑀸𑀘𑀲𑀺𑀓𑀁 𑀯𑀸. 𑀪𑀕𑀯𑀸 𑀳𑀺, 𑀪𑀦𑁆𑀢𑁂, 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀫𑀕𑁆𑀕𑀲𑁆𑀲 𑀉𑀧𑁆𑀧𑀸𑀤𑁂𑀢𑀸, 𑀅𑀲𑀜𑁆𑀚𑀸𑀢𑀲𑁆𑀲 𑀫𑀕𑁆𑀕𑀲𑁆𑀲 𑀲𑀜𑁆𑀚𑀸𑀦𑁂𑀢𑀸, 𑀅𑀦𑀓𑁆𑀔𑀸𑀢𑀲𑁆𑀲 𑀫𑀕𑁆𑀕𑀲𑁆𑀲 𑀅𑀓𑁆𑀔𑀸𑀢𑀸, 𑀫𑀕𑁆𑀕𑀜𑁆𑀜𑀽 𑀫𑀕𑁆𑀕𑀯𑀺𑀤𑀽 𑀫𑀕𑁆𑀕𑀓𑁄𑀯𑀺𑀤𑁄. 𑀫𑀕𑁆𑀕𑀸𑀦𑀼𑀕𑀸 𑀘, 𑀪𑀦𑁆𑀢𑁂, 𑀏𑀢𑀭𑀳𑀺 𑀲𑀸𑀯𑀓𑀸 𑀯𑀺𑀳𑀭𑀦𑁆𑀢𑀺 𑀧𑀘𑁆𑀙𑀸𑀲𑀫𑀦𑁆𑀦𑀸𑀕𑀢𑀸’’𑀢𑀺 (𑀲𑀁. 𑀦𑀺. 𑁧.𑁨𑁧𑁫). 𑀏𑀯𑀁 𑀧𑀭𑀺𑀲𑀼𑀤𑁆𑀥𑀸 𑀢𑀣𑀸𑀕𑀢𑀲𑁆𑀲 𑀓𑀸𑀬𑀯𑀘𑀻𑀲𑀫𑀸𑀘𑀸𑀭𑀸. 𑀉𑀢𑁆𑀢𑀭𑁄𑀧𑀺 𑀲𑀼𑀤𑀁 𑀫𑀸𑀡𑀯𑁄 𑀢𑀣𑀸𑀕𑀢𑀲𑁆𑀲 𑀓𑀸𑀬𑀯𑀘𑀻𑀤𑁆𑀯𑀸𑀭𑁂 𑀅𑀦𑀸𑀭𑀸𑀥𑀦𑀻𑀬𑀁 𑀓𑀺𑀜𑁆𑀘𑀺 𑀧𑀲𑁆𑀲𑀺𑀲𑁆𑀲𑀸𑀫𑀻𑀢𑀺 𑀲𑀢𑁆𑀢 𑀫𑀸𑀲𑁂 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀮𑀺𑀓𑁆𑀔𑀸𑀫𑀢𑁆𑀢𑀫𑁆𑀧𑀺 𑀦 𑀅𑀤𑁆𑀤𑀲. 𑀫𑀦𑀼𑀲𑁆𑀲𑀪𑀽𑀢𑁄 𑀯𑀸 𑀏𑀲 𑀩𑀼𑀤𑁆𑀥𑀪𑀽𑀢𑀲𑁆𑀲 𑀓𑀸𑀬𑀯𑀘𑀻𑀤𑁆𑀯𑀸𑀭𑁂 𑀓𑀺𑀁 𑀅𑀦𑀸𑀭𑀸𑀥𑀦𑀻𑀬𑀁 𑀧𑀲𑁆𑀲𑀺𑀲𑁆𑀲𑀢𑀺? 𑀫𑀸𑀭𑁄𑀧𑀺 𑀤𑁂𑀯𑀧𑀼𑀢𑁆𑀢𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀢𑁄 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀢𑁄 𑀧𑀝𑁆𑀞𑀸𑀬 𑀙𑀩𑁆𑀩𑀲𑁆𑀲𑀸𑀦𑀺 𑀕𑀯𑁂𑀲𑀫𑀸𑀦𑁄 𑀓𑀺𑀜𑁆𑀘𑀺 𑀅𑀦𑀸𑀭𑀸𑀥𑀦𑀻𑀬𑀁 𑀦𑀸𑀤𑁆𑀤𑀲, 𑀅𑀦𑁆𑀢𑀫𑀲𑁄 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀢𑁆𑀢𑀫𑁆𑀧𑀺. 𑀫𑀸𑀭𑁄 𑀓𑀺𑀭 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑀲𑁆𑀲 𑀯𑀺𑀢𑀓𑁆𑀓𑀺𑀢𑀫𑀢𑁆𑀢𑀫𑁆𑀧𑀺 𑀅𑀓𑀼𑀲𑀮𑀁 𑀧𑀲𑁆𑀲𑀺𑀲𑁆𑀲𑀸𑀫𑀺, 𑀢𑀢𑁆𑀣𑁂𑀯 𑀦𑀁 𑀫𑀼𑀤𑁆𑀥𑀦𑀺 𑀧𑀳𑀭𑀺𑀢𑁆𑀯𑀸 𑀧𑀓𑁆𑀓𑀫𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀙𑀩𑁆𑀩𑀲𑁆𑀲𑀸𑀦𑀺 𑀅𑀤𑀺𑀲𑁆𑀯𑀸 𑀩𑀼𑀤𑁆𑀥𑀪𑀽𑀢𑀫𑁆𑀧𑀺 𑀏𑀓𑀁 𑀯𑀲𑁆𑀲𑀁 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀓𑀺𑀜𑁆𑀘𑀺 𑀯𑀚𑁆𑀚𑀁 𑀅𑀧𑀲𑁆𑀲𑀦𑁆𑀢𑁄 𑀕𑀫𑀦𑀲𑀫𑀬𑁂 𑀯𑀦𑁆𑀤𑀺𑀢𑁆𑀯𑀸 𑁋

‘‘𑀫𑀳𑀸𑀯𑀻𑀭 𑀫𑀳𑀸𑀧𑀼𑀜𑁆𑀜𑀁, 𑀇𑀤𑁆𑀥𑀺𑀬𑀸 𑀬𑀲𑀲𑀸 𑀚𑀮𑀁;

𑀲𑀩𑁆𑀩𑀯𑁂𑀭𑀪𑀬𑀸𑀢𑀻𑀢𑀁, 𑀧𑀸𑀤𑁂 𑀯𑀦𑁆𑀤𑀸𑀫𑀺 𑀕𑁄𑀢𑀫’’𑀦𑁆𑀢𑀺. (𑀲𑀁. 𑀦𑀺. 𑁧.𑁧𑁫𑁯) 𑁋

𑀕𑀸𑀣𑀁 𑀯𑀢𑁆𑀯𑀸 𑀕𑀢𑁄.

𑀯𑀻𑀢𑀺𑀫𑀺𑀲𑁆𑀲𑀸𑀢𑀺 𑀓𑀸𑀮𑁂 𑀓𑀡𑁆𑀳𑀸, 𑀓𑀸𑀮𑁂 𑀲𑀼𑀓𑁆𑀓𑀸𑀢𑀺 𑀏𑀯𑀁 𑀯𑁄𑀫𑀺𑀲𑁆𑀲𑀓𑀸. 𑀯𑁄𑀤𑀸𑀢𑀸𑀢𑀺 𑀧𑀭𑀺𑀲𑀼𑀤𑁆𑀥𑀸 𑀦𑀺𑀓𑁆𑀓𑀺𑀮𑁂𑀲𑀸. 𑀲𑀁𑀯𑀺𑀚𑁆𑀚𑀦𑁆𑀢𑀻𑀢𑀺 𑀯𑁄𑀤𑀸𑀢𑀸 𑀥𑀫𑁆𑀫𑀸 𑀅𑀢𑁆𑀣𑀺 𑀉𑀧𑀮𑀩𑁆𑀪𑀦𑁆𑀢𑀺. 𑀢𑀣𑀸𑀕𑀢𑀲𑁆𑀲 𑀳𑀺 𑀧𑀭𑀺𑀲𑀼𑀤𑁆𑀥𑀸 𑀓𑀸𑀬𑀲𑀫𑀸𑀘𑀸𑀭𑀸𑀤𑀬𑁄. 𑀢𑁂𑀦𑀸𑀳 𑁋 ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲 𑀅𑀭𑀓𑁆𑀔𑁂𑀬𑁆𑀬𑀸𑀦𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀧𑀭𑀺𑀲𑀼𑀤𑁆𑀥𑀓𑀸𑀬𑀲𑀫𑀸𑀘𑀸𑀭𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄, 𑀦𑀢𑁆𑀣𑀺 𑀢𑀣𑀸𑀕𑀢𑀲𑁆𑀲 𑀓𑀸𑀬𑀤𑀼𑀘𑁆𑀘𑀭𑀺𑀢𑀁, 𑀬𑀁 𑀢𑀣𑀸𑀕𑀢𑁄 𑀭𑀓𑁆𑀔𑁂𑀬𑁆𑀬, ‘𑀫𑀸 𑀫𑁂 𑀇𑀤𑀁 𑀧𑀭𑁄 𑀅𑀜𑁆𑀜𑀸𑀲𑀻’𑀢𑀺. 𑀧𑀭𑀺𑀲𑀼𑀤𑁆𑀥𑀯𑀘𑀻𑀲𑀫𑀸𑀘𑀸𑀭𑁄… 𑀧𑀭𑀺𑀲𑀼𑀤𑁆𑀥𑀫𑀦𑁄𑀲𑀫𑀸𑀘𑀸𑀭𑁄… 𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄, 𑀦𑀢𑁆𑀣𑀺 𑀢𑀣𑀸𑀕𑀢𑀲𑁆𑀲 𑀫𑀺𑀘𑁆𑀙𑀸𑀚𑀻𑀯𑁄, 𑀬𑀁 𑀢𑀣𑀸𑀕𑀢𑁄 𑀭𑀓𑁆𑀔𑁂𑀬𑁆𑀬, 𑀫𑀸 𑀫𑁂 𑀇𑀤𑀁 𑀧𑀭𑁄 𑀅𑀜𑁆𑀜𑀸𑀲𑀻’’𑀢𑀺 (𑀅. 𑀦𑀺. 𑁭.𑁫𑁮).

𑀇𑀫𑀁 𑀓𑀼𑀲𑀮𑀁 𑀥𑀫𑁆𑀫𑀦𑁆𑀢𑀺 𑀇𑀫𑀁 𑀅𑀦𑀯𑀚𑁆𑀚𑀁 𑀆𑀚𑀻𑀯𑀝𑁆𑀞𑀫𑀓𑀲𑀻𑀮𑀁. ‘‘𑀅𑀬𑀫𑀸𑀬𑀲𑁆𑀫𑀸 𑀲𑀢𑁆𑀣𑀸 𑀓𑀺𑀁 𑀦𑀼 𑀔𑁄 𑀤𑀻𑀖𑀭𑀢𑁆𑀢𑀁 𑀲𑀫𑀸𑀧𑀦𑁆𑀦𑁄 𑀅𑀢𑀺𑀘𑀺𑀭𑀓𑀸𑀮𑀢𑁄 𑀧𑀝𑁆𑀞𑀸𑀬 𑀇𑀫𑀺𑀦𑀸 𑀲𑀫𑀦𑁆𑀦𑀸𑀕𑀢𑁄, 𑀉𑀤𑀸𑀳𑀼 𑀇𑀢𑁆𑀢𑀭𑀲𑀫𑀸𑀧𑀦𑁆𑀦𑁄 𑀳𑀺𑀬𑁆𑀬𑁄 𑀯𑀸 𑀧𑀭𑁂 𑀯𑀸 𑀧𑀭𑀲𑀼𑀯𑁂 𑀯𑀸 𑀤𑀺𑀯𑀲𑁂 𑀲𑀫𑀸𑀧𑀦𑁆𑀦𑁄’’𑀢𑀺 𑀏𑀯𑀁 𑀕𑀯𑁂𑀲𑀢𑀽𑀢𑀺 𑀅𑀢𑁆𑀣𑁄. 𑀏𑀓𑀘𑁆𑀘𑁂𑀦 𑀳𑀺 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀯𑀲𑀦𑁆𑀢𑁂𑀦 𑀩𑀳𑀼 𑀫𑀺𑀘𑁆𑀙𑀸𑀚𑀻𑀯𑀓𑀫𑁆𑀫𑀁 𑀓𑀢𑀁, 𑀢𑀁 𑀢𑀢𑁆𑀣 𑀓𑀸𑀮𑀸𑀢𑀺𑀓𑁆𑀓𑀫𑁂 𑀧𑀜𑁆𑀜𑀸𑀬𑀢𑀺, 𑀧𑀸𑀓𑀝𑀁 𑀳𑁄𑀢𑀺. 𑀲𑁄 𑀅𑀜𑁆𑀜𑀢𑀭𑀁 𑀧𑀘𑁆𑀘𑀦𑁆𑀢𑀕𑀸𑀫𑀁 𑀯𑀸 𑀲𑀫𑀼𑀤𑁆𑀤𑀢𑀻𑀭𑀁 𑀯𑀸 𑀕𑀦𑁆𑀢𑁆𑀯𑀸 𑀧𑀡𑁆𑀡𑀲𑀸𑀮𑀁 𑀓𑀸𑀭𑁂𑀢𑁆𑀯𑀸 𑀆𑀭𑀜𑁆𑀜𑀓𑁄 𑀯𑀺𑀬 𑀳𑀼𑀢𑁆𑀯𑀸 𑀯𑀺𑀳𑀭𑀢𑀺. 𑀫𑀦𑀼𑀲𑁆𑀲𑀸 𑀲𑀫𑁆𑀪𑀸𑀯𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀲𑁆𑀲 𑀧𑀡𑀻𑀢𑁂 𑀧𑀘𑁆𑀘𑀬𑁂 𑀤𑁂𑀦𑁆𑀢𑀺. 𑀚𑀦𑀧𑀤𑀯𑀸𑀲𑀺𑀦𑁄 𑀪𑀺𑀓𑁆𑀔𑀽 𑀢𑀲𑁆𑀲 𑀧𑀭𑀺𑀳𑀸𑀭𑀁 𑀤𑀺𑀲𑁆𑀯𑀸, ‘‘𑀅𑀢𑀺𑀤𑀧𑁆𑀧𑀺𑀢𑁄 𑀯𑀢𑀸𑀬𑀁 𑀆𑀬𑀲𑁆𑀫𑀸, 𑀓𑁄 𑀦𑀼 𑀔𑁄 𑀏𑀲𑁄’’𑀢𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀸, ‘‘𑀅𑀲𑀼𑀓𑀝𑁆𑀞𑀸𑀦𑁂 𑀅𑀲𑀼𑀓𑀁 𑀦𑀸𑀫 𑀫𑀺𑀘𑁆𑀙𑀸𑀚𑀻𑀯𑀁 𑀓𑀢𑁆𑀯𑀸 𑀧𑀓𑁆𑀓𑀦𑁆𑀢𑀪𑀺𑀓𑁆𑀔𑀽’’𑀢𑀺 𑀜𑀢𑁆𑀯𑀸 𑀦 𑀲𑀓𑁆𑀓𑀸 𑀇𑀫𑀺𑀦𑀸 𑀲𑀤𑁆𑀥𑀺𑀁 𑀉𑀧𑁄𑀲𑀣𑁄 𑀯𑀸 𑀧𑀯𑀸𑀭𑀡𑀸 𑀯𑀸 𑀓𑀸𑀢𑀼𑀦𑁆𑀢𑀺 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀥𑀫𑁆𑀫𑁂𑀦 𑀲𑀫𑁂𑀦 𑀉𑀓𑁆𑀔𑁂𑀧𑀦𑀻𑀬𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀓𑀫𑁆𑀫𑀁 𑀓𑀭𑁄𑀦𑁆𑀢𑀺. 𑀏𑀯𑀭𑀽𑀧𑀸𑀬 𑀧𑀝𑀺𑀘𑁆𑀙𑀦𑁆𑀦𑀧𑀝𑀺𑀧𑀢𑁆𑀢𑀺𑀬𑀸 𑀅𑀢𑁆𑀣𑀺𑀪𑀸𑀯𑀁 𑀯𑀸 𑀦𑀢𑁆𑀣𑀺𑀪𑀸𑀯𑀁 𑀯𑀸 𑀯𑀻𑀫𑀁𑀲𑀸𑀧𑁂𑀢𑀼𑀁 𑀏𑀯𑀫𑀸𑀳.

𑀏𑀯𑀁 𑀚𑀸𑀦𑀸𑀢𑀻𑀢𑀺 𑀤𑀻𑀖𑀭𑀢𑁆𑀢𑀁 𑀲𑀫𑀸𑀧𑀦𑁆𑀦𑁄, 𑀦 𑀇𑀢𑁆𑀢𑀭𑀲𑀫𑀸𑀧𑀦𑁆𑀦𑁄𑀢𑀺 𑀚𑀸𑀦𑀸𑀢𑀺. 𑀅𑀦𑀘𑁆𑀙𑀭𑀺𑀬𑀁 𑀘𑁂𑀢𑀁. 𑀬𑀁 𑀢𑀣𑀸𑀕𑀢𑀲𑁆𑀲 𑀏𑀢𑀭𑀳𑀺 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑀲𑁆𑀲 𑀤𑀻𑀖𑀭𑀢𑁆𑀢𑀁 𑀆𑀚𑀻𑀯𑀝𑁆𑀞𑀫𑀓𑀲𑀻𑀮𑀁 𑀧𑀭𑀺𑀲𑀼𑀤𑁆𑀥𑀁 𑀪𑀯𑁂𑀬𑁆𑀬. 𑀬𑀲𑁆𑀲 𑀩𑁄𑀥𑀺𑀲𑀢𑁆𑀢𑀓𑀸𑀮𑁂𑀧𑀺 𑀏𑀯𑀁 𑀅𑀳𑁄𑀲𑀺.

𑀅𑀢𑀻𑀢𑁂 𑀓𑀺𑀭 𑀕𑀦𑁆𑀥𑀸𑀭𑀭𑀸𑀚𑀸 𑀘 𑀯𑁂𑀤𑁂𑀳𑀭𑀸𑀚𑀸 𑀘 𑀤𑁆𑀯𑁂𑀧𑀺 𑀲𑀳𑀸𑀬𑀓𑀸 𑀳𑀼𑀢𑁆𑀯𑀸 𑀓𑀸𑀫𑁂𑀲𑀼 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀭𑀚𑁆𑀚𑀸𑀦𑀺 𑀧𑀼𑀢𑁆𑀢𑀸𑀦𑀁 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀅𑀭𑀜𑁆𑀜𑀕𑀸𑀫𑀓𑁂 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀺. 𑀧𑀘𑁆𑀘𑀦𑁆𑀢𑁄 𑀦𑀸𑀫 𑀤𑀼𑀮𑁆𑀮𑀪𑀮𑁄𑀡𑁄 𑀳𑁄𑀢𑀺. 𑀢𑀢𑁄 𑀅𑀮𑁄𑀡𑀁 𑀬𑀸𑀕𑀼𑀁 𑀮𑀪𑀺𑀢𑁆𑀯𑀸 𑀏𑀓𑀺𑀲𑁆𑀲𑀸𑀬 𑀲𑀸𑀮𑀸𑀬 𑀦𑀺𑀲𑀻𑀤𑀺𑀢𑁆𑀯𑀸 𑀧𑀺𑀯𑀦𑁆𑀢𑀺. 𑀅𑀦𑁆𑀢𑀭𑀦𑁆𑀢𑀭𑁂 𑀫𑀦𑀼𑀲𑁆𑀲𑀸 𑀮𑁄𑀡𑀘𑀼𑀡𑁆𑀡𑀁 𑀆𑀳𑀭𑀺𑀢𑁆𑀯𑀸 𑀤𑁂𑀦𑁆𑀢𑀺. 𑀏𑀓𑀤𑀺𑀯𑀲𑀁 𑀏𑀓𑁄 𑀯𑁂𑀤𑁂𑀳𑀺𑀲𑀺𑀲𑁆𑀲 𑀧𑀡𑁆𑀡𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀮𑁄𑀡𑀘𑀼𑀡𑁆𑀡𑀁 𑀅𑀤𑀸𑀲𑀺. 𑀯𑁂𑀤𑁂𑀳𑀺𑀲𑀺 𑀕𑀳𑁂𑀢𑁆𑀯𑀸 𑀉𑀧𑀟𑁆𑀠𑀁 𑀕𑀦𑁆𑀥𑀸𑀭𑀺𑀲𑀺𑀲𑁆𑀲-𑀲𑀦𑁆𑀢𑀺𑀓𑁂 𑀞𑀧𑁂𑀢𑁆𑀯𑀸 𑀉𑀧𑀟𑁆𑀠𑀁 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑁂 𑀞𑀧𑁂𑀲𑀺. 𑀢𑀢𑁄 𑀣𑁄𑀓𑀁 𑀧𑀭𑀺𑀪𑀼𑀢𑁆𑀢𑀸𑀯𑀲𑁂𑀲𑀁 𑀤𑀺𑀲𑁆𑀯𑀸, ‘‘𑀫𑀸 𑀇𑀤𑀁 𑀦𑀲𑁆𑀲𑀻’’𑀢𑀺 𑀧𑀡𑁆𑀡𑁂𑀦 𑀯𑁂𑀞𑁂𑀢𑁆𑀯𑀸 𑀢𑀺𑀡𑀕𑀳𑀦𑁂 𑀞𑀧𑁂𑀲𑀺. 𑀧𑀼𑀦 𑀏𑀓𑀲𑁆𑀫𑀺𑀁 𑀤𑀺𑀯𑀲𑁂 𑀬𑀸𑀕𑀼𑀧𑀸𑀦𑀓𑀸𑀮𑁂 𑀲𑀢𑀺𑀁 𑀓𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀢𑀁 𑀤𑀺𑀲𑁆𑀯𑀸 𑀕𑀦𑁆𑀥𑀸𑀭𑀺𑀲𑀺𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, ‘‘𑀇𑀢𑁄 𑀣𑁄𑀓𑀁 𑀕𑀡𑁆𑀳𑀣 𑀆𑀘𑀭𑀺𑀬𑀸’’𑀢𑀺 𑀆𑀳. 𑀓𑀼𑀢𑁄 𑀢𑁂 𑀮𑀤𑁆𑀥𑀁 𑀯𑁂𑀤𑁂𑀳𑀺𑀲𑀻𑀢𑀺? 𑀢𑀲𑁆𑀫𑀺𑀁 𑀤𑀺𑀯𑀲𑁂 𑀧𑀭𑀺𑀪𑀼𑀢𑁆𑀢𑀸𑀯𑀲𑁂𑀲𑀁 ‘‘𑀫𑀸 𑀦𑀲𑁆𑀲𑀻’’𑀢𑀺 𑀫𑀬𑀸 𑀞𑀧𑀺𑀢𑀦𑁆𑀢𑀺. 𑀕𑀦𑁆𑀥𑀸𑀭𑀺𑀲𑀺 𑀕𑀳𑁂𑀢𑀼𑀁 𑀦 𑀇𑀘𑁆𑀙𑀢𑀺, 𑀅𑀮𑁄𑀡𑀓𑀁𑀬𑁂𑀯 𑀬𑀸𑀕𑀼𑀁 𑀧𑀺𑀯𑀺𑀢𑁆𑀯𑀸 𑀯𑁂𑀤𑁂𑀳𑀁 𑀇𑀲𑀺𑀁 𑀅𑀯𑁄𑀘 𑁋

‘‘𑀳𑀺𑀢𑁆𑀯𑀸 𑀕𑀸𑀫𑀲𑀳𑀲𑁆𑀲𑀸𑀦𑀺, 𑀧𑀭𑀺𑀧𑀼𑀡𑁆𑀡𑀸𑀦𑀺 𑀲𑁄𑀴𑀲;

𑀓𑁄𑀝𑁆𑀞𑀸𑀕𑀸𑀭𑀸𑀦𑀺 𑀨𑀻𑀢𑀸𑀦𑀺, 𑀲𑀦𑁆𑀦𑀺𑀥𑀺𑀁 𑀤𑀸𑀦𑀺 𑀓𑀼𑀩𑁆𑀩𑀲𑀻’’𑀢𑀺. (𑀚𑀸. 𑁧.𑁭.𑁭𑁬);

𑀯𑁂𑀤𑁂𑀳𑀺𑀲𑀺 𑀅𑀯𑁄𑀘 𑁋 ‘‘𑀢𑀼𑀫𑁆𑀳𑁂 𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑀸, 𑀇𑀤𑀸𑀦𑀺 𑀓𑀲𑁆𑀫𑀸 𑀮𑁄𑀡𑀘𑀼𑀡𑁆𑀡𑀫𑀢𑁆𑀢𑀲𑀦𑁆𑀦𑀺𑀥𑀺𑀓𑀸𑀭𑀡𑀸 𑀧𑀩𑁆𑀩𑀚𑁆𑀚𑀸𑀬 𑀅𑀦𑀼𑀘𑁆𑀙𑀯𑀺𑀓𑀁 𑀦 𑀓𑀭𑁄𑀣𑀸’’𑀢𑀺? 𑀓𑀺𑀁 𑀫𑀬𑀸 𑀓𑀢𑀁 𑀯𑁂𑀤𑁂𑀳𑀺𑀲𑀻𑀢𑀺? 𑀅𑀣 𑀦𑀁 𑀆𑀳 𑁋

‘‘𑀳𑀺𑀢𑁆𑀯𑀸 𑀕𑀦𑁆𑀥𑀸𑀭𑀯𑀺𑀲𑀬𑀁, 𑀧𑀳𑀽𑀢𑀥𑀦𑀥𑀸𑀭𑀺𑀬𑀁;

𑀧𑀲𑀸𑀲𑀦𑀢𑁄 𑀦𑀺𑀓𑁆𑀔𑀦𑁆𑀢𑁄, 𑀇𑀥 𑀤𑀸𑀦𑀺 𑀧𑀲𑀸𑀲𑀲𑀻’’𑀢𑀺. (𑀚𑀸. 𑁧.𑁭.𑁭𑁭);

𑀕𑀦𑁆𑀥𑀸𑀭𑁄 𑀆𑀳 𑁋

‘‘𑀥𑀫𑁆𑀫𑀁 𑀪𑀡𑀸𑀫𑀺 𑀯𑁂𑀤𑁂𑀳, 𑀅𑀥𑀫𑁆𑀫𑁄 𑀫𑁂 𑀦 𑀭𑀼𑀘𑁆𑀘𑀢𑀺;

𑀥𑀫𑁆𑀫𑀁 𑀫𑁂 𑀪𑀡𑀫𑀸𑀦𑀲𑁆𑀲, 𑀦 𑀧𑀸𑀧𑀫𑀼𑀧𑀮𑀺𑀫𑁆𑀧𑀢𑀻’’𑀢𑀺. (𑀚𑀸. 𑁧.𑁭.𑁭𑁮);

𑀯𑁂𑀤𑁂𑀳𑁄 𑀆𑀳 𑁋

‘‘𑀬𑁂𑀦 𑀓𑁂𑀦𑀘𑀺 𑀯𑀡𑁆𑀡𑁂𑀦, 𑀧𑀭𑁄 𑀮𑀪𑀢𑀺 𑀭𑀼𑀧𑁆𑀧𑀦𑀁;

𑀫𑀳𑀢𑁆𑀣𑀺𑀬𑀫𑁆𑀧𑀺 𑀘𑁂 𑀯𑀸𑀘𑀁, 𑀦 𑀢𑀁 𑀪𑀸𑀲𑁂𑀬𑁆𑀬 𑀧𑀡𑁆𑀟𑀺𑀢𑁄’’𑀢𑀺. (𑀚𑀸. 𑁧.𑁭.𑁭𑁯);

𑀕𑀦𑁆𑀥𑀸𑀭𑁄 𑀆𑀳 𑁋

‘‘𑀓𑀸𑀫𑀁 𑀭𑀼𑀧𑁆𑀧𑀢𑀼 𑀯𑀸 𑀫𑀸 𑀯𑀸, 𑀪𑀼𑀲𑀁𑀯 𑀯𑀺𑀓𑀺𑀭𑀻𑀬𑀢𑀼;

𑀥𑀫𑁆𑀫𑀁 𑀫𑁂 𑀪𑀡𑀫𑀸𑀦𑀲𑁆𑀲, 𑀦 𑀧𑀸𑀧𑀫𑀼𑀧𑀮𑀺𑀫𑁆𑀧𑀢𑀻’’𑀢𑀺. (𑀚𑀸. 𑁧.𑁭.𑁮𑁦);

𑀢𑀢𑁄 𑀯𑁂𑀤𑁂𑀳𑀺𑀲𑀺 𑀬𑀲𑁆𑀲 𑀲𑀓𑀸𑀧𑀺 𑀩𑀼𑀤𑁆𑀥𑀺 𑀦𑀢𑁆𑀣𑀺, 𑀆𑀘𑀭𑀺𑀬𑀲𑀦𑁆𑀢𑀺𑀓𑁂 𑀯𑀺𑀦𑀬𑀁 𑀦 𑀲𑀺𑀓𑁆𑀔𑀢𑀺, 𑀲𑁄 𑀅𑀦𑁆𑀥𑀫𑀳𑀺𑀁𑀲𑁄 𑀯𑀺𑀬 𑀯𑀦𑁂 𑀘𑀭𑀢𑀻𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀆𑀳 𑁋

‘‘𑀦𑁄 𑀘𑁂 𑀅𑀲𑁆𑀲 𑀲𑀓𑀸 𑀩𑀼𑀤𑁆𑀥𑀺, 𑀯𑀺𑀦𑀬𑁄 𑀯𑀸 𑀲𑀼𑀲𑀺𑀓𑁆𑀔𑀺𑀢𑁄;

𑀯𑀦𑁂 𑀅𑀦𑁆𑀥𑀫𑀳𑀺𑀁𑀲𑁄𑀯, 𑀘𑀭𑁂𑀬𑁆𑀬 𑀩𑀳𑀼𑀓𑁄 𑀚𑀦𑁄.

𑀬𑀲𑁆𑀫𑀸 𑀘 𑀧𑀦𑀺𑀥𑁂𑀓𑀘𑁆𑀘𑁂, 𑀆𑀘𑁂𑀭𑀫𑁆𑀳𑀺 𑀲𑀼𑀲𑀺𑀓𑁆𑀔𑀺𑀢𑀸;

𑀢𑀲𑁆𑀫𑀸 𑀯𑀺𑀦𑀻𑀢𑀯𑀺𑀦𑀬𑀸, 𑀘𑀭𑀦𑁆𑀢𑀺 𑀲𑀼𑀲𑀫𑀸𑀳𑀺𑀢𑀸’’𑀢𑀺. (𑀚𑀸. 𑁧.𑁭.𑁮𑁧-𑁮𑁨);

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀯𑁂𑀤𑁂𑀳𑀺𑀲𑀺 𑀅𑀚𑀸𑀦𑀺𑀢𑁆𑀯𑀸 𑀫𑀬𑀸 𑀓𑀢𑀦𑁆𑀢𑀺 𑀕𑀦𑁆𑀥𑀸𑀭𑀺𑀲𑀺𑀁 𑀔𑀫𑀸𑀧𑁂𑀲𑀺. 𑀢𑁂 𑀉𑀪𑁄𑀧𑀺 𑀢𑀧𑀁 𑀘𑀭𑀺𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀁 𑀅𑀕𑀫𑀁𑀲𑀼. 𑀏𑀯𑀁 𑀢𑀣𑀸𑀕𑀢𑀲𑁆𑀲 𑀩𑁄𑀥𑀺𑀲𑀢𑁆𑀢𑀓𑀸𑀮𑁂𑀧𑀺 𑀤𑀻𑀖𑀭𑀢𑁆𑀢𑀁 𑀆𑀚𑀻𑀯𑀝𑁆𑀞𑀫𑀓𑀲𑀻𑀮𑀁 𑀧𑀭𑀺𑀲𑀼𑀤𑁆𑀥𑀁 𑀅𑀳𑁄𑀲𑀺.

𑀉𑀢𑁆𑀢𑀚𑁆𑀛𑀸𑀧𑀦𑁆𑀦𑁄 𑀅𑀬𑀫𑀸𑀬𑀲𑁆𑀫𑀸 𑀪𑀺𑀓𑁆𑀔𑀼 𑀬𑀲𑀧𑀢𑁆𑀢𑁄𑀢𑀺 𑀅𑀬𑀫𑀸𑀬𑀲𑁆𑀫𑀸 𑀅𑀫𑁆𑀳𑀸𑀓𑀁 𑀲𑀢𑁆𑀣𑀸 𑀪𑀺𑀓𑁆𑀔𑀼 𑀜𑀢𑁆𑀢𑀁 𑀧𑀜𑁆𑀜𑀸𑀢𑀪𑀸𑀯𑀁 𑀧𑀸𑀓𑀝𑀪𑀸𑀯𑀁 𑀅𑀚𑁆𑀛𑀸𑀧𑀦𑁆𑀦𑁄 𑀦𑀼 𑀔𑁄, 𑀲𑀬𑀜𑁆𑀘 𑀧𑀭𑀺𑀯𑀸𑀭𑀲𑀫𑁆𑀧𑀢𑁆𑀢𑀺𑀁 𑀧𑀢𑁆𑀢𑁄 𑀦𑀼 𑀔𑁄 𑀦𑁄𑀢𑀺. 𑀢𑁂𑀦 𑀘𑀲𑁆𑀲 𑀧𑀜𑁆𑀜𑀸𑀢𑀚𑁆𑀛𑀸𑀧𑀦𑁆𑀦𑀪𑀸𑀯𑁂𑀦 𑀬𑀲𑀲𑀦𑁆𑀦𑀺𑀲𑁆𑀲𑀺𑀢𑀪𑀸𑀯𑁂𑀦 𑀘 𑀓𑀺𑀁 𑀏𑀓𑀘𑁆𑀘𑁂 𑀆𑀤𑀻𑀦𑀯𑀸 𑀲𑀦𑁆𑀤𑀺𑀲𑁆𑀲𑀦𑁆𑀢𑀺 𑀉𑀤𑀸𑀳𑀼 𑀦𑁄𑀢𑀺 𑀏𑀯𑀁 𑀲𑀫𑀦𑁆𑀦𑁂𑀲𑀦𑁆𑀢𑀽𑀢𑀺 𑀤𑀲𑁆𑀲𑁂𑀢𑀺. 𑀦 𑀢𑀸𑀯, 𑀪𑀺𑀓𑁆𑀔𑀯𑁂𑀢𑀺, 𑀪𑀺𑀓𑁆𑀔𑀯𑁂, 𑀬𑀸𑀯 𑀪𑀺𑀓𑁆𑀔𑀼 𑀦 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀻𑀲𑀼 𑀅𑀪𑀺𑀜𑁆𑀜𑀸𑀢𑀪𑀸𑀯𑀁 𑀯𑀸 𑀧𑀭𑀺𑀯𑀸𑀭𑀲𑀫𑁆𑀧𑀢𑁆𑀢𑀺𑀁 𑀯𑀸 𑀆𑀧𑀦𑁆𑀦𑁄 𑀳𑁄𑀢𑀺, 𑀢𑀸𑀯 𑀏𑀓𑀘𑁆𑀘𑁂 𑀫𑀸𑀦𑀸𑀢𑀺𑀫𑀸𑀦𑀸𑀤𑀬𑁄 𑀆𑀤𑀻𑀦𑀯𑀸 𑀦 𑀲𑀁𑀯𑀺𑀚𑁆𑀚𑀦𑁆𑀢𑀺 𑀉𑀧𑀲𑀦𑁆𑀢𑀽𑀧𑀲𑀦𑁆𑀢𑁄 𑀯𑀺𑀬 𑀲𑁄𑀢𑀸𑀧𑀦𑁆𑀦𑁄 𑀯𑀺𑀬 𑀲𑀓𑀤𑀸𑀕𑀸𑀫𑀻 𑀯𑀺𑀬 𑀘 𑀯𑀺𑀳𑀭𑀢𑀺. 𑀅𑀭𑀺𑀬𑁄 𑀦𑀼 𑀔𑁄 𑀧𑀼𑀣𑀼𑀚𑁆𑀚𑀦𑁄 𑀦𑀼 𑀔𑁄𑀢𑀺𑀧𑀺 𑀜𑀸𑀢𑀼𑀁 𑀦 𑀲𑀓𑁆𑀓𑀸 𑀳𑁄𑀢𑀺.

𑀬𑀢𑁄 𑀘 𑀔𑁄, 𑀪𑀺𑀓𑁆𑀔𑀯𑁂𑀢𑀺 𑀬𑀤𑀸 𑀧𑀦 𑀇𑀥𑁂𑀓𑀘𑁆𑀘𑁄 𑀪𑀺𑀓𑁆𑀔𑀼 𑀜𑀸𑀢𑁄 𑀳𑁄𑀢𑀺 𑀧𑀭𑀺𑀯𑀸𑀭𑀲𑀫𑁆𑀧𑀦𑁆𑀦𑁄 𑀯𑀸, 𑀢𑀤𑀸 𑀢𑀺𑀡𑁆𑀳𑁂𑀦 𑀲𑀺𑀗𑁆𑀕𑁂𑀦 𑀕𑁄𑀕𑀡𑀁 𑀯𑀺𑀚𑁆𑀛𑀦𑁆𑀢𑁄 𑀤𑀼𑀝𑁆𑀞𑀕𑁄𑀡𑁄 𑀯𑀺𑀬, 𑀫𑀺𑀕𑀲𑀗𑁆𑀖𑀁 𑀅𑀪𑀺𑀫𑀤𑁆𑀤𑀫𑀸𑀦𑁄 𑀤𑀻𑀧𑀺 𑀯𑀺𑀬 𑀘 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀢𑀢𑁆𑀣 𑀢𑀢𑁆𑀣 𑀯𑀺𑀚𑁆𑀛𑀦𑁆𑀢𑁄 𑀅𑀕𑀸𑀭𑀯𑁄 𑀅𑀲𑀪𑀸𑀕𑀯𑀼𑀢𑁆𑀢𑀺 𑀅𑀕𑁆𑀕𑀧𑀸𑀤𑁂𑀦 𑀪𑀽𑀫𑀺𑀁 𑀨𑀼𑀲𑀦𑁆𑀢𑁄 𑀯𑀺𑀬 𑀘𑀭𑀢𑀺. 𑀏𑀓𑀘𑁆𑀘𑁄 𑀧𑀦 𑀓𑀼𑀮𑀧𑀼𑀢𑁆𑀢𑁄 𑀬𑀣𑀸 𑀬𑀣𑀸 𑀜𑀸𑀢𑁄 𑀳𑁄𑀢𑀺 𑀬𑀲𑀲𑁆𑀲𑀻, 𑀢𑀣𑀸 𑀢𑀣𑀸 𑀨𑀮𑀪𑀸𑀭𑀪𑀭𑀺𑀢𑁄 𑀯𑀺𑀬 𑀲𑀸𑀮𑀺 𑀲𑀼𑀝𑁆𑀞𑀼𑀢𑀭𑀁 𑀑𑀦𑀫𑀢𑀺, 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀻𑀲𑀼 𑀉𑀧𑀲𑀗𑁆𑀓𑀫𑀦𑁆𑀢𑁂𑀲𑀼 𑀅𑀓𑀺𑀜𑁆𑀘𑀦𑀪𑀸𑀯𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀲𑀫𑀡𑀲𑀜𑁆𑀜𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀙𑀺𑀦𑁆𑀦𑀯𑀺𑀲𑀸𑀡𑀉𑀲𑀪𑁄 𑀯𑀺𑀬, 𑀘𑀡𑁆𑀟𑀸𑀮𑀤𑀸𑀭𑀓𑁄 𑀯𑀺𑀬 𑀘 𑀲𑁄𑀭𑀢𑁄 𑀦𑀺𑀯𑀸𑀢𑁄 𑀦𑀻𑀘𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘𑁂𑀯 𑀲𑀤𑁂𑀯𑀓𑀲𑁆𑀲 𑀘 𑀮𑁄𑀓𑀲𑁆𑀲, 𑀳𑀺𑀢𑀸𑀬 𑀲𑀼𑀔𑀸𑀬 𑀧𑀝𑀺𑀧𑀚𑁆𑀚𑀢𑀺. 𑀏𑀯𑀭𑀽𑀧𑀁 𑀧𑀝𑀺𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 ‘‘𑀦𑀸𑀲𑁆𑀲 𑀇𑀥𑁂𑀓𑀘𑁆𑀘𑁂 𑀆𑀤𑀻𑀦𑀯𑀸’’𑀢𑀺 𑀆𑀳.

𑀢𑀣𑀸𑀕𑀢𑁄 𑀧𑀦 𑀅𑀝𑁆𑀞𑀲𑀼 𑀮𑁄𑀓𑀥𑀫𑁆𑀫𑁂𑀲𑀼 𑀢𑀸𑀤𑀻, 𑀲𑁄 𑀳𑀺 𑀮𑀸𑀪𑁂𑀧𑀺 𑀢𑀸𑀤𑀻, 𑀅𑀮𑀸𑀪𑁂𑀧𑀺 𑀢𑀸𑀤𑀻, 𑀬𑀲𑁂𑀧𑀺 𑀢𑀸𑀤𑀻, 𑀅𑀬𑀲𑁂𑀧𑀺 𑀢𑀸𑀤𑀻, 𑀧𑀲𑀁𑀲𑀸𑀬𑀧𑀺 𑀢𑀸𑀤𑀻, 𑀦𑀺𑀦𑁆𑀤𑀸𑀬𑀧𑀺 𑀢𑀸𑀤𑀻, 𑀲𑀼𑀔𑁂𑀧𑀺 𑀢𑀸𑀤𑀻, 𑀤𑀼𑀓𑁆𑀔𑁂𑀧𑀺 𑀢𑀸𑀤𑀻, 𑀢𑀲𑁆𑀫𑀸 𑀲𑀩𑁆𑀩𑀸𑀓𑀸𑀭𑁂𑀦 𑀦𑀸𑀲𑁆𑀲 𑀇𑀥𑁂𑀓𑀘𑁆𑀘𑁂 𑀆𑀤𑀻𑀦𑀯𑀸 𑀲𑀁𑀯𑀺𑀚𑁆𑀚𑀦𑁆𑀢𑀺. 𑀅𑀪𑀬𑀽𑀧𑀭𑀢𑁄𑀢𑀺 𑀅𑀪𑀬𑁄 𑀳𑀼𑀢𑁆𑀯𑀸 𑀉𑀧𑀭𑀢𑁄, 𑀅𑀘𑁆𑀘𑀦𑁆𑀢𑀽𑀧𑀭𑀢𑁄 𑀲𑀢𑀢𑀽𑀧𑀭𑀢𑁄𑀢𑀺 𑀅𑀢𑁆𑀣𑁄. 𑀦 𑀯𑀸 𑀪𑀬𑁂𑀦 𑀉𑀧𑀭𑀢𑁄𑀢𑀺𑀧𑀺 𑀅𑀪𑀬𑀽𑀧𑀭𑀢𑁄. 𑀘𑀢𑁆𑀢𑀸𑀭𑀺 𑀳𑀺 𑀪𑀬𑀸𑀦𑀺 𑀓𑀺𑀮𑁂𑀲𑀪𑀬𑀁 𑀯𑀝𑁆𑀝𑀪𑀬𑀁 𑀤𑀼𑀕𑁆𑀕𑀢𑀺𑀪𑀬𑀁 𑀉𑀧𑀯𑀸𑀤𑀪𑀬𑀦𑁆𑀢𑀺. 𑀧𑀼𑀣𑀼𑀚𑁆𑀚𑀦𑁄 𑀘𑀢𑀽𑀳𑀺𑀧𑀺 𑀪𑀬𑁂𑀳𑀺 𑀪𑀸𑀬𑀢𑀺. 𑀲𑁂𑀓𑁆𑀔𑀸 𑀢𑀻𑀳𑀺, 𑀢𑁂𑀲𑀜𑁆𑀳𑀺 𑀤𑀼𑀕𑁆𑀕𑀢𑀺𑀪𑀬𑀁 𑀧𑀳𑀻𑀦𑀁, 𑀇𑀢𑀺 𑀲𑀢𑁆𑀢 𑀲𑁂𑀓𑁆𑀔𑀸 𑀪𑀬𑀽𑀧𑀭𑀢𑀸, 𑀔𑀻𑀡𑀸𑀲𑀯𑁄 𑀅𑀪𑀬𑀽𑀧𑀭𑀢𑁄 𑀦𑀸𑀫, 𑀢𑀲𑁆𑀲 𑀳𑀺 𑀏𑀓𑀫𑁆𑀧𑀺 𑀪𑀬𑀁 𑀦𑀢𑁆𑀣𑀺. 𑀓𑀺𑀁 𑀧𑀭𑀯𑀸𑀤𑀪𑀬𑀁 𑀦𑀢𑁆𑀣𑀻𑀢𑀺? 𑀦𑀢𑁆𑀣𑀺. 𑀧𑀭𑀸𑀦𑀼𑀤𑁆𑀤𑀬𑀁 𑀧𑀦 𑀧𑀝𑀺𑀘𑁆𑀘, ‘‘𑀫𑀸𑀤𑀺𑀲𑀁 𑀔𑀻𑀡𑀸𑀲𑀯𑀁 𑀧𑀝𑀺𑀘𑁆𑀘 𑀲𑀢𑁆𑀢𑀸 𑀫𑀸 𑀦𑀲𑁆𑀲𑀦𑁆𑀢𑀽’’𑀢𑀺 𑀉𑀧𑀯𑀸𑀤𑀁 𑀭𑀓𑁆𑀔𑀢𑀺. 𑀫𑀽𑀮𑀼𑀧𑁆𑀧𑀮𑀯𑀸𑀧𑀺𑀯𑀺𑀳𑀸𑀭𑀯𑀸𑀲𑀻 𑀬𑀲𑀢𑁆𑀣𑁂𑀭𑁄 𑀯𑀺𑀬.

𑀣𑁂𑀭𑁄 𑀓𑀺𑀭 𑀫𑀽𑀮𑀼𑀧𑁆𑀧𑀮𑀯𑀸𑀧𑀺𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀅𑀣𑀲𑁆𑀲 𑀉𑀧𑀝𑁆𑀞𑀸𑀓𑀓𑀼𑀮𑀤𑁆𑀯𑀸𑀭𑀁 𑀧𑀢𑁆𑀢𑀲𑁆𑀲 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀣𑀡𑁆𑀟𑀺𑀮𑀧𑀻𑀞𑀓𑀁 𑀦𑀺𑀲𑁆𑀲𑀸𑀬 𑀆𑀲𑀦𑀁 𑀧𑀜𑁆𑀜𑀧𑁂𑀲𑀼𑀁. 𑀅𑀫𑀘𑁆𑀘𑀥𑀻𑀢𑀸𑀧𑀺 𑀢𑀁𑀬𑁂𑀯 𑀧𑀻𑀞𑀓𑀁 𑀦𑀺𑀲𑁆𑀲𑀸𑀬 𑀧𑀭𑀢𑁄𑀪𑀸𑀕𑁂 𑀦𑀻𑀘𑀢𑀭𑀁 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀦𑀺𑀲𑀻𑀤𑀺. 𑀏𑀓𑁄 𑀦𑁂𑀯𑀸𑀲𑀺𑀓𑁄 𑀪𑀺𑀓𑁆𑀔𑀼 𑀧𑀘𑁆𑀙𑀸 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑁄 𑀤𑁆𑀯𑀸𑀭𑁂 𑀞𑀢𑁆𑀯𑀸𑀯 𑀑𑀮𑁄𑀓𑁂𑀦𑁆𑀢𑁄 𑀣𑁂𑀭𑁄 𑀅𑀫𑀘𑁆𑀘𑀥𑀻𑀢𑀭𑀸 𑀲𑀤𑁆𑀥𑀺𑀁 𑀏𑀓𑀫𑀜𑁆𑀘𑁂 𑀦𑀺𑀲𑀺𑀦𑁆𑀦𑁄𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸, ‘‘𑀅𑀬𑀁 𑀧𑀁𑀲𑀼𑀓𑀽𑀮𑀺𑀓𑁄 𑀯𑀺𑀳𑀸𑀭𑁂𑀯 𑀉𑀧𑀲𑀦𑁆𑀢𑀽𑀧𑀲𑀦𑁆𑀢𑁄 𑀯𑀺𑀬 𑀯𑀺𑀳𑀭𑀢𑀺, 𑀅𑀦𑁆𑀢𑁄𑀕𑀸𑀫𑁂 𑀧𑀦 𑀉𑀧𑀝𑁆𑀞𑀸𑀬𑀺𑀓𑀸𑀳𑀺 𑀲𑀤𑁆𑀥𑀺𑀁 𑀏𑀓𑀫𑀜𑁆𑀘𑁂 𑀦𑀺𑀲𑀻𑀤𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, ‘‘𑀓𑀺𑀁 𑀦𑀼 𑀔𑁄 𑀫𑀬𑀸 𑀤𑀼𑀤𑁆𑀤𑀺𑀝𑁆𑀞’’𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁 𑀑𑀮𑁄𑀓𑁂𑀢𑁆𑀯𑀸 𑀢𑀣𑀸𑀲𑀜𑁆𑀜𑀻𑀯 𑀳𑀼𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀣𑁂𑀭𑁄𑀧𑀺 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀯𑀲𑀦𑀝𑁆𑀞𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀤𑁆𑀯𑀸𑀭𑀁 𑀧𑀺𑀥𑀸𑀬 𑀦𑀺𑀲𑀻𑀤𑀺. 𑀦𑁂𑀯𑀸𑀲𑀺𑀓𑁄𑀧𑀺 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸, ‘‘𑀢𑀁 𑀧𑀁𑀲𑀼𑀓𑀽𑀮𑀺𑀓𑀁 𑀦𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀯𑀺𑀳𑀸𑀭𑀸 𑀦𑀺𑀓𑁆𑀓𑀟𑁆𑀠𑀺𑀲𑁆𑀲𑀸𑀫𑀻’’𑀢𑀺 𑀅𑀲𑀜𑁆𑀜𑀢𑀦𑀻𑀳𑀸𑀭𑁂𑀦 𑀣𑁂𑀭𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀧𑀭𑀺𑀪𑁄𑀕𑀖𑀝𑀢𑁄 𑀉𑀮𑀼𑀗𑁆𑀓𑁂𑀦 𑀉𑀤𑀓𑀁 𑀕𑀳𑁂𑀢𑁆𑀯𑀸 𑀫𑀳𑀸𑀲𑀤𑁆𑀤𑀁 𑀓𑀭𑁄𑀦𑁆𑀢𑁄 𑀧𑀸𑀤𑁂 𑀥𑁄𑀯𑀺. 𑀣𑁂𑀭𑁄, ‘‘𑀓𑁄 𑀦𑀼 𑀔𑁄 𑀅𑀬𑀁 𑀅𑀲𑀜𑁆𑀜𑀢𑀘𑀸𑀭𑀺𑀓𑁄’’𑀢𑀺 𑀆𑀯𑀚𑁆𑀚𑀦𑁆𑀢𑁄 𑀲𑀩𑁆𑀩𑀁 𑀜𑀢𑁆𑀯𑀸, ‘‘𑀅𑀬𑀁 𑀫𑀬𑀺 𑀫𑀦𑀁 𑀧𑀤𑁄𑀲𑁂𑀢𑁆𑀯𑀸 𑀅𑀧𑀸𑀬𑀽𑀧𑀕𑁄 𑀫𑀸 𑀅𑀳𑁄𑀲𑀻’’𑀢𑀺 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀓𑀡𑁆𑀡𑀺𑀓𑀸𑀫𑀡𑁆𑀟𑀮𑀲𑀫𑀻𑀧𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺. 𑀦𑁂𑀯𑀸𑀲𑀺𑀓𑁄 𑀤𑀼𑀝𑁆𑀞𑀸𑀓𑀸𑀭𑁂𑀦 𑀖𑀝𑀺𑀓𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀅𑀦𑁆𑀢𑁄 𑀧𑀯𑀺𑀝𑁆𑀞𑁄 𑀣𑁂𑀭𑀁 𑀅𑀧𑀲𑁆𑀲𑀦𑁆𑀢𑁄, ‘‘𑀳𑁂𑀝𑁆𑀞𑀸𑀫𑀜𑁆𑀘𑀁 𑀧𑀯𑀺𑀝𑁆𑀞𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀑𑀮𑁄𑀓𑁂𑀢𑁆𑀯𑀸 𑀢𑀢𑁆𑀣𑀸𑀧𑀺 𑀅𑀧𑀲𑁆𑀲𑀦𑁆𑀢𑁄 𑀦𑀺𑀓𑁆𑀔𑀫𑀺𑀢𑀼𑀁 𑀆𑀭𑀪𑀺. 𑀣𑁂𑀭𑁄 𑀉𑀓𑁆𑀓𑀸𑀲𑀺. 𑀇𑀢𑀭𑁄 𑀉𑀤𑁆𑀥𑀁 𑀑𑀮𑁄𑀓𑁂𑀦𑁆𑀢𑁄 𑀤𑀺𑀲𑁆𑀯𑀸 𑀅𑀥𑀺𑀯𑀸𑀲𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀏𑀯𑀫𑀸𑀳 𑁋 ‘‘𑀧𑀢𑀺𑀭𑀽𑀧𑀁 𑀢𑁂, 𑀆𑀯𑀼𑀲𑁄, 𑀧𑀁𑀲𑀼𑀓𑀽𑀮𑀺𑀓 𑀏𑀯𑀁 𑀆𑀦𑀼𑀪𑀸𑀯𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀝𑁆𑀞𑀸𑀬𑀺𑀓𑀸𑀬 𑀲𑀤𑁆𑀥𑀺𑀁 𑀏𑀓𑀫𑀜𑁆𑀘𑁂 𑀦𑀺𑀲𑀻𑀤𑀺𑀢𑀼’’𑀦𑁆𑀢𑀺. 𑀧𑀩𑁆𑀩𑀚𑀺𑀢𑀸 𑀦𑀸𑀫, 𑀪𑀦𑁆𑀢𑁂, 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀦 𑀏𑀓𑀫𑀜𑁆𑀘𑁂 𑀦𑀺𑀲𑀻𑀤𑀦𑁆𑀢𑀺, 𑀢𑀼𑀫𑁆𑀳𑁂𑀳𑀺 𑀧𑀦 𑀤𑀼𑀤𑁆𑀤𑀺𑀝𑁆𑀞𑀫𑁂𑀢𑀦𑁆𑀢𑀺. 𑀏𑀯𑀁 𑀔𑀻𑀡𑀸𑀲𑀯𑀸 𑀧𑀭𑀸𑀦𑀼𑀤𑁆𑀤𑀬𑀸𑀬 𑀉𑀧𑀯𑀸𑀤𑀁 𑀭𑀓𑁆𑀔𑀦𑁆𑀢𑀺.

𑀔𑀬𑀸 𑀭𑀸𑀕𑀲𑁆𑀲𑀸𑀢𑀺 𑀭𑀸𑀕𑀲𑁆𑀲 𑀔𑀬𑁂𑀦𑁂𑀯. 𑀯𑀻𑀢𑀭𑀸𑀕𑀢𑁆𑀢𑀸 𑀓𑀸𑀫𑁂 𑀦 𑀧𑀝𑀺𑀲𑁂𑀯𑀢𑀺, 𑀦 𑀧𑀝𑀺𑀲𑀗𑁆𑀔𑀸𑀬 𑀯𑀸𑀭𑁂𑀢𑁆𑀯𑀸𑀢𑀺. 𑀢𑀜𑁆𑀘𑁂𑀢𑀺 𑀏𑀯𑀁 𑀢𑀣𑀸𑀕𑀢𑀲𑁆𑀲 𑀓𑀺𑀮𑁂𑀲𑀧𑁆𑀧𑀳𑀸𑀦𑀁 𑀜𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀞𑀺𑀢𑀦𑀺𑀲𑀺𑀦𑁆𑀦𑀓𑀸𑀮𑀸𑀤𑀻𑀲𑀼𑀧𑀺 𑀘𑀢𑀼𑀧𑀭𑀺𑀲𑀫𑀚𑁆𑀛𑁂 𑀅𑀮𑀗𑁆𑀓𑀢𑀥𑀫𑁆𑀫𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸𑀧𑀺 𑀇𑀢𑀺𑀧𑀺 𑀲𑀢𑁆𑀣𑀸 𑀯𑀻𑀢𑀭𑀸𑀕𑁄 𑀯𑀻𑀢𑀤𑁄𑀲𑁄 𑀯𑀻𑀢𑀫𑁄𑀳𑁄 𑀯𑀦𑁆𑀢𑀓𑀺𑀮𑁂𑀲𑁄 𑀧𑀳𑀻𑀦𑀫𑀮𑁄 𑀅𑀩𑁆𑀪𑀸 𑀫𑀼𑀢𑁆𑀢𑀧𑀼𑀡𑁆𑀡𑀘𑀦𑁆𑀤𑁄 𑀯𑀺𑀬 𑀲𑀼𑀧𑀭𑀺𑀲𑀼𑀤𑁆𑀥𑁄𑀢𑀺 𑀏𑀯𑀁 𑀢𑀣𑀸𑀕𑀢𑀲𑁆𑀲 𑀓𑀺𑀮𑁂𑀲𑀧𑁆𑀧𑀳𑀸𑀦𑁂 𑀯𑀡𑁆𑀡𑀁 𑀓𑀣𑀬𑀫𑀸𑀦𑀁 𑀢𑀁 𑀯𑀻𑀫𑀁𑀲𑀓𑀁 𑀪𑀺𑀓𑁆𑀔𑀼𑀁 𑀧𑀭𑁂 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬𑀼𑀁 𑀘𑁂𑀢𑀺 𑀅𑀢𑁆𑀣𑁄.

𑀆𑀓𑀸𑀭𑀸𑀢𑀺 𑀓𑀸𑀭𑀡𑀸𑀦𑀺. 𑀅𑀦𑁆𑀯𑀬𑀸𑀢𑀺 𑀅𑀦𑀼𑀩𑀼𑀤𑁆𑀥𑀺𑀬𑁄. 𑀲𑀗𑁆𑀖𑁂 𑀯𑀸 𑀯𑀺𑀳𑀭𑀦𑁆𑀢𑁄𑀢𑀺 𑀅𑀧𑁆𑀧𑁂𑀓𑀤𑀸 𑀅𑀧𑀭𑀺𑀘𑁆𑀙𑀺𑀦𑁆𑀦𑀕𑀡𑀦𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀚𑁆𑀛𑁂 𑀯𑀺𑀳𑀭𑀦𑁆𑀢𑁄. 𑀏𑀓𑁄 𑀯𑀸 𑀯𑀺𑀳𑀭𑀦𑁆𑀢𑁄𑀢𑀺 𑀇𑀘𑁆𑀙𑀸𑀫𑀳𑀁, 𑀪𑀺𑀓𑁆𑀔𑀯𑁂, 𑀅𑀟𑁆𑀠𑀫𑀸𑀲𑀁 𑀧𑀝𑀺𑀲𑀮𑁆𑀮𑀻𑀬𑀺𑀢𑀼𑀦𑁆𑀢𑀺, 𑀢𑁂𑀫𑀸𑀲𑀁 𑀧𑀝𑀺𑀲𑀮𑁆𑀮𑀻𑀬𑀺𑀢𑀼𑀦𑁆𑀢𑀺 𑀏𑀯𑀁 𑀧𑀝𑀺𑀲𑀮𑁆𑀮𑀸𑀦𑁂 𑀘𑁂𑀯 𑀧𑀸𑀮𑀺𑀮𑁂𑀬𑁆𑀬𑀓𑀯𑀦𑀲𑀡𑁆𑀟𑁂 𑀘 𑀏𑀓𑀓𑁄 𑀯𑀺𑀳𑀭𑀦𑁆𑀢𑁄. 𑀲𑀼𑀕𑀢𑀸𑀢𑀺 𑀲𑀼𑀝𑁆𑀞𑀼𑀕𑀢𑀸 𑀲𑀼𑀧𑁆𑀧𑀝𑀺𑀧𑀦𑁆𑀦𑀸 𑀓𑀸𑀭𑀓𑀸 𑀬𑀼𑀢𑁆𑀢𑀧𑀬𑀼𑀢𑁆𑀢𑀸. 𑀏𑀯𑀭𑀽𑀧𑀸𑀧𑀺 𑀳𑀺 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀅𑀢𑁆𑀣𑀺. 𑀤𑀼𑀕𑁆𑀕𑀢𑀸𑀢𑀺 𑀤𑀼𑀝𑁆𑀞𑀼𑀕𑀢𑀸 𑀤𑀼𑀧𑁆𑀧𑀝𑀺𑀧𑀦𑁆𑀦𑀸 𑀓𑀸𑀬𑀤𑀴𑁆𑀳𑀺𑀩𑀳𑀼𑀮𑀸 𑀯𑀺𑀲𑁆𑀲𑀝𑁆𑀞𑀓𑀫𑁆𑀫𑀝𑁆𑀞𑀸𑀦𑀸. 𑀏𑀯𑀭𑀽𑀧𑀸𑀧𑀺 𑀏𑀓𑀘𑁆𑀘𑁂 𑀅𑀢𑁆𑀣𑀺. 𑀕𑀡𑀫𑀦𑀼𑀲𑀸𑀲𑀦𑁆𑀢𑀻𑀢𑀺 𑀕𑀡𑀩𑀦𑁆𑀥𑀦𑁂𑀦 𑀩𑀤𑁆𑀥𑀸 𑀕𑀡𑀸𑀭𑀸𑀫𑀸 𑀕𑀡𑀩𑀳𑀼𑀮𑀺𑀓𑀸 𑀳𑀼𑀢𑁆𑀯𑀸 𑀕𑀡𑀁 𑀧𑀭𑀺𑀳𑀭𑀦𑁆𑀢𑀺. 𑀏𑀯𑀭𑀽𑀧𑀸𑀧𑀺 𑀏𑀓𑀘𑁆𑀘𑁂 𑀅𑀢𑁆𑀣𑀺. 𑀢𑁂𑀲𑀁 𑀧𑀝𑀺𑀧𑀓𑁆𑀔𑀪𑀽𑀢𑀸 𑀕𑀡𑀢𑁄 𑀦𑀺𑀲𑁆𑀲𑀝𑀸 𑀯𑀺𑀲𑀁𑀲𑀝𑁆𑀞𑀸 𑀯𑀺𑀧𑁆𑀧𑀫𑀼𑀢𑁆𑀢𑀯𑀺𑀳𑀸𑀭𑀺𑀦𑁄𑀧𑀺 𑀅𑀢𑁆𑀣𑀺.

𑀆𑀫𑀺𑀲𑁂𑀲𑀼 𑀲𑀦𑁆𑀤𑀺𑀲𑁆𑀲𑀦𑁆𑀢𑀻𑀢𑀺 𑀆𑀫𑀺𑀲𑀕𑀺𑀤𑁆𑀥𑀸 𑀆𑀫𑀺𑀲𑀘𑀓𑁆𑀔𑀼𑀓𑀸 𑀘𑀢𑀼𑀧𑀘𑁆𑀘𑀬𑀆𑀫𑀺𑀲𑀢𑁆𑀣𑀫𑁂𑀯 𑀆𑀳𑀺𑀡𑁆𑀟𑀫𑀸𑀦𑀸 𑀆𑀫𑀺𑀲𑁂𑀲𑀼 𑀲𑀦𑁆𑀤𑀺𑀲𑁆𑀲𑀫𑀸𑀦𑀓𑀪𑀺𑀓𑁆𑀔𑀽𑀧𑀺 𑀅𑀢𑁆𑀣𑀺. 𑀆𑀫𑀺𑀲𑁂𑀦 𑀅𑀦𑀼𑀧𑀮𑀺𑀢𑁆𑀢𑀸 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀯𑀺𑀦𑀺𑀯𑀢𑁆𑀢𑀫𑀸𑀦𑀲𑀸 𑀅𑀩𑁆𑀪𑀸 𑀫𑀼𑀢𑁆𑀢𑀘𑀦𑁆𑀤𑀲𑀤𑀺𑀲𑀸 𑀳𑀼𑀢𑁆𑀯𑀸 𑀯𑀺𑀳𑀭𑀫𑀸𑀦𑀸𑀧𑀺 𑀅𑀢𑁆𑀣𑀺. 𑀦𑀸𑀬𑀫𑀸𑀬𑀲𑁆𑀫𑀸 𑀢𑀁 𑀢𑁂𑀦 𑀅𑀯𑀚𑀸𑀦𑀸𑀢𑀻𑀢𑀺 𑀅𑀬𑀁 𑀆𑀬𑀲𑁆𑀫𑀸 𑀲𑀢𑁆𑀣𑀸 𑀢𑀸𑀬 𑀢𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀢𑀁 𑀢𑀁 𑀧𑀼𑀕𑁆𑀕𑀮𑀁 𑀦𑀸𑀯𑀚𑀸𑀦𑀸𑀢𑀺, 𑀅𑀬𑀁 𑀧𑀝𑀺𑀧𑀦𑁆𑀦𑁄 𑀓𑀸𑀭𑀓𑁄, 𑀅𑀬𑀁 𑀕𑀡𑀢𑁄 𑀦𑀺𑀲𑁆𑀲𑀝𑁄 𑀯𑀺𑀲𑀁𑀲𑀝𑁆𑀞𑁄. 𑀅𑀬𑀁 𑀆𑀫𑀺𑀲𑁂𑀦 𑀅𑀦𑀼𑀧𑀮𑀺𑀢𑁆𑀢𑁄 𑀧𑀘𑁆𑀘𑀬𑁂𑀳𑀺 𑀯𑀺𑀦𑀺𑀯𑀢𑁆𑀢𑀫𑀸𑀦𑀲𑁄 𑀅𑀩𑁆𑀪𑀸 𑀫𑀼𑀢𑁆𑀢𑁄 𑀘𑀦𑁆𑀤𑀺𑀫𑀸 𑀯𑀺𑀬𑀸𑀢𑀺 𑀏𑀯𑀫𑀲𑁆𑀲 𑀕𑁂𑀳𑀲𑀺𑀢𑀯𑀲𑁂𑀦 𑀉𑀲𑁆𑀲𑀸𑀤𑀦𑀸𑀧𑀺 𑀦𑀢𑁆𑀣𑀺. 𑀅𑀬𑀁 𑀤𑀼𑀧𑁆𑀧𑀝𑀺𑀧𑀦𑁆𑀦𑁄 𑀅𑀓𑀸𑀭𑀓𑁄 𑀓𑀸𑀬𑀤𑀴𑁆𑀳𑀺𑀩𑀳𑀼𑀮𑁄 𑀯𑀺𑀲𑁆𑀲𑀝𑁆𑀞𑀓𑀫𑁆𑀫𑀝𑁆𑀞𑀸𑀦𑁄, 𑀅𑀬𑀁 𑀕𑀡𑀩𑀦𑁆𑀥𑀦𑀩𑀤𑁆𑀥𑁄, 𑀅𑀬𑀁 𑀆𑀫𑀺𑀲𑀕𑀺𑀤𑁆𑀥𑁄 𑀮𑁄𑀮𑁄 𑀆𑀫𑀺𑀲𑀘𑀓𑁆𑀔𑀼𑀓𑁄𑀢𑀺 𑀏𑀯𑀫𑀲𑁆𑀲 𑀕𑁂𑀳𑀲𑀺𑀢𑀯𑀲𑁂𑀦 𑀅𑀧𑀲𑀸𑀤𑀦𑀸𑀧𑀺 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀓𑀺𑀁 𑀓𑀣𑀺𑀢𑀁 𑀳𑁄𑀢𑀺? 𑀢𑀣𑀸𑀕𑀢𑀲𑁆𑀲 𑀲𑀢𑁆𑀢𑁂𑀲𑀼 𑀢𑀸𑀤𑀺𑀪𑀸𑀯𑁄 𑀓𑀣𑀺𑀢𑁄 𑀳𑁄𑀢𑀺. 𑀅𑀬𑀜𑁆𑀳𑀺 𑁋

‘‘𑀯𑀥𑀓𑀲𑁆𑀲 𑀤𑁂𑀯𑀤𑀢𑁆𑀢𑀲𑁆𑀲, 𑀘𑁄𑀭𑀲𑁆𑀲𑀗𑁆𑀕𑀼𑀮𑀺𑀫𑀸𑀮𑀺𑀦𑁄;

𑀥𑀦𑀧𑀸𑀮𑁂 𑀭𑀸𑀳𑀼𑀮𑁂 𑀘, 𑀲𑀩𑁆𑀩𑁂𑀲𑀁 𑀲𑀫𑀓𑁄 𑀫𑀼𑀦𑀻’’𑀢𑀺. (𑀫𑀺. 𑀧. 𑁬.𑁬.𑁫);

𑁪𑁮𑁯. 𑀢𑀢𑁆𑀭, 𑀪𑀺𑀓𑁆𑀔𑀯𑁂𑀢𑀺 𑀢𑁂𑀲𑀼 𑀤𑁆𑀯𑀻𑀲𑀼 𑀯𑀻𑀫𑀁𑀲𑀓𑁂𑀲𑀼. 𑀬𑁄, ‘‘𑀓𑁂 𑀧𑀦𑀸𑀬𑀲𑁆𑀫𑀢𑁄 𑀆𑀓𑀸𑀭𑀸’’𑀢𑀺 𑀧𑀼𑀘𑁆𑀙𑀸𑀬𑀁 𑀆𑀕𑀢𑁄 𑀕𑀡𑁆𑀞𑀺𑀯𑀻𑀫𑀁𑀲𑀓𑁄 𑀘, 𑀬𑁄 ‘‘𑀅𑀪𑀬𑀽𑀧𑀭𑀢𑁄 𑀅𑀬𑀫𑀸𑀬𑀲𑁆𑀫𑀸’’𑀢𑀺 𑀆𑀕𑀢𑁄 𑀫𑀽𑀮𑀯𑀻𑀫𑀁𑀲𑀓𑁄 𑀘. 𑀢𑁂𑀲𑀼 𑀫𑀽𑀮𑀯𑀻𑀫𑀁𑀲𑀓𑁂𑀦 𑀢𑀣𑀸𑀕𑀢𑁄𑀯 𑀉𑀢𑁆𑀢𑀭𑀺 𑀧𑀝𑀺𑀧𑀼𑀘𑁆𑀙𑀺𑀢𑀩𑁆𑀩𑁄. 𑀲𑁄 𑀳𑀺 𑀧𑀼𑀩𑁆𑀩𑁂 𑀧𑀭𑀲𑁆𑀲𑁂𑀯 𑀓𑀣𑀸𑀬 𑀦𑀺𑀝𑁆𑀞𑀗𑁆𑀕𑀢𑁄. 𑀧𑀭𑁄 𑀘 𑀦𑀸𑀫 𑀚𑀸𑀦𑀺𑀢𑁆𑀯𑀸𑀧𑀺 𑀓𑀣𑁂𑀬𑁆𑀬 𑀅𑀚𑀸𑀦𑀺𑀢𑁆𑀯𑀸𑀧𑀺. 𑀏𑀯𑀫𑀲𑁆𑀲 𑀓𑀣𑀸 𑀪𑀽𑀢𑀸𑀧𑀺 𑀳𑁄𑀢𑀺 𑀅𑀪𑀽𑀢𑀸𑀧𑀺, 𑀢𑀲𑁆𑀫𑀸 𑀧𑀭𑀲𑁆𑀲𑁂𑀯 𑀓𑀣𑀸𑀬 𑀦𑀺𑀝𑁆𑀞𑀁 𑀅𑀕𑀦𑁆𑀢𑁆𑀯𑀸 𑀢𑀢𑁄 𑀉𑀢𑁆𑀢𑀭𑀺 𑀢𑀣𑀸𑀕𑀢𑁄𑀯 𑀧𑀝𑀺𑀧𑀼𑀘𑁆𑀙𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄.

𑀩𑁆𑀬𑀸𑀓𑀭𑀫𑀸𑀦𑁄𑀢𑀺 𑀏𑀢𑁆𑀣 𑀬𑀲𑁆𑀫𑀸 𑀢𑀣𑀸𑀕𑀢𑀲𑁆𑀲 𑀫𑀺𑀘𑁆𑀙𑀸𑀩𑁆𑀬𑀸𑀓𑀭𑀡𑀁 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀲𑀫𑁆𑀫𑀸 𑀫𑀺𑀘𑁆𑀙𑀸𑀢𑀺 𑀅𑀯𑀢𑁆𑀯𑀸 𑀩𑁆𑀬𑀸𑀓𑀭𑀫𑀸𑀦𑁄𑀢𑁆𑀯𑁂𑀯 𑀯𑀼𑀢𑁆𑀢𑀁. 𑀏𑀢𑀁 𑀧𑀣𑁄𑀳𑀫𑀲𑁆𑀫𑀺 𑀏𑀢𑀁 𑀕𑁄𑀘𑀭𑁄𑀢𑀺 𑀏𑀲 𑀫𑀬𑁆𑀳𑀁 𑀧𑀣𑁄 𑀏𑀲 𑀕𑁄𑀘𑀭𑁄𑀢𑀺 𑀅𑀢𑁆𑀣𑁄. ‘‘𑀏𑀢𑀸𑀧𑀸𑀣𑁄’’𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲𑀢𑁆𑀣𑁄 𑀫𑀬𑁆𑀳𑀁 𑀆𑀚𑀻𑀯𑀝𑁆𑀞𑀫𑀓𑀲𑀻𑀮𑀁 𑀧𑀭𑀺𑀲𑀼𑀤𑁆𑀥𑀁, 𑀲𑁆𑀯𑀸𑀳𑀁 𑀢𑀲𑁆𑀲 𑀧𑀭𑀺𑀲𑀼𑀤𑁆𑀥𑀪𑀸𑀯𑁂𑀦 𑀯𑀻𑀫𑀁𑀲𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀜𑀸𑀡𑀫𑀼𑀔𑁂 𑀏𑀢𑀸𑀧𑀸𑀣𑁄, 𑀏𑀯𑀁 𑀆𑀧𑀸𑀣𑀁 𑀕𑀘𑁆𑀙𑀸𑀫𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑁄 𑀘 𑀢𑁂𑀦 𑀢𑀫𑁆𑀫𑀬𑁄𑀢𑀺 𑀢𑁂𑀦𑀧𑀺 𑀘𑀸𑀳𑀁 𑀧𑀭𑀺𑀲𑀼𑀤𑁆𑀥𑁂𑀦 𑀲𑀻𑀮𑁂𑀦 𑀦 𑀢𑀫𑁆𑀫𑀬𑁄, 𑀦 𑀲𑀢𑀡𑁆𑀳𑁄, 𑀧𑀭𑀺𑀲𑀼𑀤𑁆𑀥𑀲𑀻𑀮𑀢𑁆𑀢𑀸𑀯 𑀦𑀺𑀢𑁆𑀢𑀡𑁆𑀳𑁄𑀳𑀫𑀲𑁆𑀫𑀻𑀢𑀺 𑀤𑀻𑀧𑁂𑀢𑀺.

𑀉𑀢𑁆𑀢𑀭𑀼𑀢𑁆𑀢𑀭𑀺𑀁 𑀧𑀡𑀻𑀢𑀧𑀡𑀻𑀢𑀦𑁆𑀢𑀺 𑀉𑀢𑁆𑀢𑀭𑀼𑀢𑁆𑀢𑀭𑀺𑀁 𑀘𑁂𑀯 𑀧𑀡𑀻𑀢𑀢𑀭𑀜𑁆𑀘 𑀓𑀢𑁆𑀯𑀸 𑀤𑁂𑀲𑁂𑀢𑀺. 𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕𑀦𑁆𑀢𑀺 𑀓𑀡𑁆𑀳𑀁 𑀘𑁂𑀯 𑀲𑀼𑀓𑁆𑀓𑀜𑁆𑀘, 𑀢𑀜𑁆𑀘 𑀔𑁄 𑀲𑀧𑁆𑀧𑀝𑀺𑀪𑀸𑀕𑀁 𑀲𑀯𑀺𑀧𑀓𑁆𑀔𑀁 𑀓𑀢𑁆𑀯𑀸, 𑀓𑀡𑁆𑀳𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀲𑀼𑀓𑁆𑀓𑀦𑁆𑀢𑀺 𑀲𑀼𑀓𑁆𑀓𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀓𑀡𑁆𑀳𑀦𑁆𑀢𑀺 𑀏𑀯𑀁 𑀲𑀧𑁆𑀧𑀝𑀺𑀪𑀸𑀕𑀁 𑀓𑀢𑁆𑀯𑀸 𑀓𑀡𑁆𑀳𑀲𑀼𑀓𑁆𑀓𑀁 𑀤𑁂𑀲𑁂𑀢𑀺. 𑀓𑀡𑁆𑀳𑀁 𑀤𑁂𑀲𑁂𑀦𑁆𑀢𑁄𑀧𑀺 𑀲𑀉𑀲𑁆𑀲𑀸𑀳𑀁 𑀲𑀯𑀺𑀧𑀸𑀓𑀁 𑀤𑁂𑀲𑁂𑀢𑀺, 𑀲𑀼𑀓𑁆𑀓𑀁 𑀤𑁂𑀲𑁂𑀦𑁆𑀢𑁄𑀧𑀺 𑀲𑀉𑀲𑁆𑀲𑀸𑀳𑀁 𑀲𑀯𑀺𑀧𑀸𑀓𑀁 𑀤𑁂𑀲𑁂𑀢𑀺. 𑀅𑀪𑀺𑀜𑁆𑀜𑀸𑀬 𑀇𑀥𑁂𑀓𑀘𑁆𑀘𑀁 𑀥𑀫𑁆𑀫𑀁 𑀥𑀫𑁆𑀫𑁂𑀲𑀼 𑀦𑀺𑀝𑁆𑀞𑀁 𑀕𑀘𑁆𑀙𑀢𑀻𑀢𑀺 𑀢𑀲𑁆𑀫𑀺𑀁 𑀤𑁂𑀲𑀺𑀢𑁂 𑀥𑀫𑁆𑀫𑁂 𑀏𑀓𑀘𑁆𑀘𑀁 𑀧𑀝𑀺𑀯𑁂𑀥𑀥𑀫𑁆𑀫𑀁 𑀅𑀪𑀺𑀜𑁆𑀜𑀸𑀬 𑀢𑁂𑀦 𑀧𑀝𑀺𑀯𑁂𑀥𑀥𑀫𑁆𑀫𑁂𑀦 𑀤𑁂𑀲𑀦𑀸𑀥𑀫𑁆𑀫𑁂 𑀦𑀺𑀝𑁆𑀞𑀁 𑀕𑀘𑁆𑀙𑀢𑀺. 𑀲𑀢𑁆𑀣𑀭𑀺 𑀧𑀲𑀻𑀤𑀢𑀻𑀢𑀺 𑀏𑀯𑀁 𑀥𑀫𑁆𑀫𑁂 𑀦𑀺𑀝𑁆𑀞𑀁 𑀕𑀦𑁆𑀢𑁆𑀯𑀸 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀲𑁄 𑀪𑀕𑀯𑀸𑀢𑀺 𑀲𑀢𑁆𑀣𑀭𑀺 𑀧𑀲𑀻𑀤𑀢𑀺. 𑀢𑁂𑀦 𑀧𑀦 𑀪𑀕𑀯𑀢𑀸 𑀬𑁄 𑀥𑀫𑁆𑀫𑁄 𑀅𑀓𑁆𑀔𑀸𑀢𑁄, 𑀲𑁄𑀧𑀺 𑀲𑁆𑀯𑀸𑀓𑁆𑀔𑀸𑀢𑁄 𑀪𑀕𑀯𑀢𑀸 𑀥𑀫𑁆𑀫𑁄 𑀦𑀺𑀬𑁆𑀬𑀸𑀦𑀺𑀓𑀢𑁆𑀢𑀸. 𑀬𑁆𑀯𑀸𑀲𑁆𑀲 𑀢𑀁 𑀥𑀫𑁆𑀫𑀁 𑀧𑀝𑀺𑀧𑀦𑁆𑀦𑁄 𑀲𑀗𑁆𑀖𑁄, 𑀲𑁄𑀧𑀺 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀯𑀗𑁆𑀓𑀸𑀤𑀺𑀤𑁄𑀲𑀭𑀳𑀺𑀢𑀁 𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑀢𑁆𑀢𑀸𑀢𑀺 𑀏𑀯𑀁 𑀥𑀫𑁆𑀫𑁂 𑀲𑀗𑁆𑀖𑁂𑀧𑀺 𑀧𑀲𑀻𑀤𑀢𑀺. 𑀢𑀜𑁆𑀘𑁂𑀢𑀺 𑀢𑀁 𑀏𑀯𑀁 𑀧𑀲𑀦𑁆𑀦𑀁 𑀢𑀢𑁆𑀣 𑀢𑀢𑁆𑀣 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀯𑀡𑁆𑀡𑀁 𑀓𑀣𑁂𑀦𑁆𑀢𑀁 𑀪𑀺𑀓𑁆𑀔𑀼𑀁.

𑁪𑁯𑁦. 𑀇𑀫𑁂𑀳𑀺 𑀆𑀓𑀸𑀭𑁂𑀳𑀻𑀢𑀺 𑀇𑀫𑁂𑀳𑀺 𑀲𑀢𑁆𑀣𑀼𑀯𑀻𑀫𑀁𑀲𑀦𑀓𑀸𑀭𑀡𑁂𑀳𑀺. 𑀇𑀫𑁂𑀳𑀺 𑀧𑀤𑁂𑀳𑀻𑀢𑀺 𑀇𑀫𑁂𑀳𑀺 𑀅𑀓𑁆𑀔𑀭𑀲𑀫𑁆𑀧𑀺𑀡𑁆𑀟𑀦𑀧𑀤𑁂𑀳𑀺. 𑀇𑀫𑁂𑀳𑀺 𑀩𑁆𑀬𑀜𑁆𑀚𑀦𑁂𑀳𑀻𑀢𑀺 𑀇𑀫𑁂𑀳𑀺 𑀇𑀥 𑀯𑀼𑀢𑁆𑀢𑁂𑀳𑀺 𑀅𑀓𑁆𑀔𑀭𑁂𑀳𑀺. 𑀲𑀤𑁆𑀥𑀸 𑀦𑀺𑀯𑀺𑀝𑁆𑀞𑀸𑀢𑀺 𑀑𑀓𑀧𑁆𑀧𑀦𑀸 𑀧𑀢𑀺𑀝𑁆𑀞𑀺𑀢𑀸. 𑀫𑀽𑀮𑀚𑀸𑀢𑀸𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀯𑀲𑁂𑀦 𑀲𑀜𑁆𑀚𑀸𑀢𑀫𑀽𑀮𑀸. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀳𑀺 𑀲𑀤𑁆𑀥𑀸𑀬 𑀫𑀽𑀮𑀁 𑀦𑀸𑀫. 𑀆𑀓𑀸𑀭𑀯𑀢𑀻𑀢𑀺 𑀓𑀸𑀭𑀡𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀕𑀳𑀺𑀢𑀢𑁆𑀢𑀸 𑀲𑀓𑀸𑀭𑀡𑀸. 𑀤𑀲𑁆𑀲𑀦𑀫𑀽𑀮𑀺𑀓𑀸𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀫𑀽𑀮𑀺𑀓𑀸. 𑀲𑁄 𑀳𑀺 𑀤𑀲𑁆𑀲𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀤𑀴𑁆𑀳𑀸𑀢𑀺 𑀣𑀺𑀭𑀸. 𑀅𑀲𑀁𑀳𑀸𑀭𑀺𑀬𑀸𑀢𑀺 𑀳𑀭𑀺𑀢𑀼𑀁 𑀦 𑀲𑀓𑁆𑀓𑀸. 𑀲𑀫𑀡𑁂𑀦 𑀯𑀸𑀢𑀺 𑀲𑀫𑀺𑀢𑀧𑀸𑀧𑀲𑀫𑀡𑁂𑀦 𑀯𑀸. 𑀩𑁆𑀭𑀸𑀳𑁆𑀫𑀡𑁂𑀦 𑀯𑀸𑀢𑀺 𑀩𑀸𑀳𑀺𑀢𑀧𑀸𑀧𑀩𑁆𑀭𑀸𑀳𑁆𑀫𑀡𑁂𑀦 𑀯𑀸. 𑀤𑁂𑀯𑁂𑀦 𑀯𑀸𑀢𑀺 𑀉𑀧𑀧𑀢𑁆𑀢𑀺𑀤𑁂𑀯𑁂𑀦 𑀯𑀸. 𑀫𑀸𑀭𑁂𑀦 𑀯𑀸𑀢𑀺 𑀯𑀲𑀯𑀢𑁆𑀢𑀺𑀫𑀸𑀭𑁂𑀦 𑀯𑀸, 𑀲𑁄𑀢𑀸𑀧𑀦𑁆𑀦𑀲𑁆𑀲 𑀳𑀺 𑀯𑀲𑀯𑀢𑁆𑀢𑀺𑀫𑀸𑀭𑁂𑀦𑀸𑀧𑀺 𑀲𑀤𑁆𑀥𑀸 𑀅𑀲𑀁𑀳𑀸𑀭𑀺𑀬𑀸 𑀳𑁄𑀢𑀺 𑀲𑀽𑀭𑀫𑁆𑀩𑀝𑁆𑀞𑀲𑁆𑀲 𑀯𑀺𑀬.

𑀲𑁄 𑀓𑀺𑀭 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀲𑁄𑀢𑀸𑀧𑀦𑁆𑀦𑁄 𑀳𑀼𑀢𑁆𑀯𑀸 𑀕𑁂𑀳𑀁 𑀆𑀕𑀢𑁄. 𑀅𑀣 𑀫𑀸𑀭𑁄 𑀤𑁆𑀯𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑀧𑁆𑀧𑀝𑀺𑀫𑀡𑁆𑀟𑀺𑀢𑀁 𑀩𑀼𑀤𑁆𑀥𑀭𑀽𑀧𑀁 𑀫𑀸𑀧𑁂𑀢𑁆𑀯𑀸 𑀢𑀲𑁆𑀲 𑀖𑀭𑀤𑁆𑀯𑀸𑀭𑁂 𑀞𑀢𑁆𑀯𑀸 𑁋 ‘‘𑀲𑀢𑁆𑀣𑀸 𑀆𑀕𑀢𑁄’’𑀢𑀺 𑀲𑀸𑀲𑀦𑀁 𑀧𑀳𑀺𑀡𑀺. 𑀲𑀽𑀭𑁄 𑀘𑀺𑀦𑁆𑀢𑁂𑀲𑀺, ‘‘𑀅𑀳𑀁 𑀇𑀤𑀸𑀦𑁂𑀯 𑀲𑀢𑁆𑀣𑀼 𑀲𑀦𑁆𑀢𑀺𑀓𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀆𑀕𑀢𑁄, 𑀓𑀺𑀁 𑀦𑀼 𑀔𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀢𑁆𑀣𑀼𑀲𑀜𑁆𑀜𑀸𑀬 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀫𑀸𑀭𑁄 𑀆𑀳 𑁋 ‘‘𑀬𑀁 𑀢𑁂 𑀫𑀬𑀸, 𑀲𑀽𑀭𑀫𑁆𑀩𑀝𑁆𑀞, 𑀭𑀽𑀧𑀁 𑀅𑀦𑀺𑀘𑁆𑀘𑀁…𑀧𑁂… 𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀦𑁆𑀢𑀺 𑀓𑀣𑀺𑀢𑀁, 𑀢𑀁 𑀅𑀦𑀼𑀧𑀥𑀸𑀭𑁂𑀢𑁆𑀯𑀸𑀯 𑀲𑀳𑀲𑀸 𑀫𑀬𑀸 𑀏𑀯𑀁 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀢𑁆𑀯𑀁 𑀭𑀽𑀧𑀁 𑀦𑀺𑀘𑁆𑀘𑀁…𑀧𑁂… 𑀯𑀺𑀜𑁆𑀜𑀸𑀡𑀁 𑀦𑀺𑀘𑁆𑀘𑀦𑁆𑀢𑀺 𑀕𑀡𑁆𑀳𑀸𑀳𑀻’’𑀢𑀺. 𑀲𑀽𑀭𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀝𑁆𑀞𑀸𑀦𑀫𑁂𑀢𑀁, 𑀬𑀁 𑀩𑀼𑀤𑁆𑀥𑀸 𑀅𑀦𑀼𑀧𑀥𑀸𑀭𑁂𑀢𑁆𑀯𑀸 𑀅𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸 𑀓𑀺𑀜𑁆𑀘𑀺 𑀓𑀣𑁂𑀬𑁆𑀬𑀼𑀁, 𑀅𑀤𑁆𑀥𑀸 𑀅𑀬𑀁 𑀫𑀬𑁆𑀳𑀁 𑀯𑀺𑀩𑀸𑀥𑀦𑀢𑁆𑀣𑀁 𑀫𑀸𑀭𑁄 𑀆𑀕𑀢𑁄’’𑀢𑀺. 𑀢𑀢𑁄 𑀦𑀁 𑀢𑁆𑀯𑀁 𑀫𑀸𑀭𑁄𑀢𑀺 𑀆𑀳. 𑀲𑁄 𑀫𑀼𑀲𑀸𑀯𑀸𑀤𑀁 𑀓𑀸𑀢𑀼𑀁 𑀦𑀸𑀲𑀓𑁆𑀔𑀺, 𑀆𑀫 𑀫𑀸𑀭𑁄𑀲𑁆𑀫𑀻𑀢𑀺 𑀧𑀝𑀺𑀚𑀸𑀦𑀺. 𑀓𑀲𑁆𑀫𑀸 𑀆𑀕𑀢𑁄𑀲𑀻𑀢𑀺 𑀯𑀼𑀢𑁆𑀢𑁂 𑀢𑀯 𑀲𑀤𑁆𑀥𑀸𑀘𑀸𑀮𑀦𑀢𑁆𑀣𑀦𑁆𑀢𑀺 𑀆𑀳. 𑀓𑀡𑁆𑀳 𑀧𑀸𑀧𑀺𑀫, 𑀢𑁆𑀯𑀁 𑀢𑀸𑀯 𑀏𑀓𑀓𑁄 𑀢𑀺𑀝𑁆𑀞, 𑀢𑀸𑀤𑀺𑀲𑀸𑀦𑀁 𑀫𑀸𑀭𑀸𑀦𑀁 𑀲𑀢𑀫𑁆𑀧𑀺 𑀲𑀳𑀲𑁆𑀲𑀫𑁆𑀧𑀺 𑀫𑀫 𑀲𑀤𑁆𑀥𑀁 𑀘𑀸𑀮𑁂𑀢𑀼𑀁 𑀅𑀲𑀫𑀢𑁆𑀣𑀁, 𑀫𑀕𑁆𑀕𑁂𑀦 𑀆𑀕𑀢𑀸 𑀲𑀤𑁆𑀥𑀸 𑀦𑀸𑀫 𑀲𑀺𑀮𑀸𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀺𑀢𑀲𑀺𑀦𑁂𑀭𑀼 𑀯𑀺𑀬 𑀅𑀘𑀮𑀸 𑀳𑁄𑀢𑀺, 𑀓𑀺𑀁 𑀢𑁆𑀯𑀁 𑀏𑀢𑁆𑀣𑀸𑀢𑀺 𑀅𑀘𑁆𑀙𑀭𑀁 𑀧𑀳𑀭𑀺. 𑀲𑁄 𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀺. 𑀩𑁆𑀭𑀳𑁆𑀫𑀼𑀦𑀸 𑀯𑀸𑀢𑀺 𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀤𑀻𑀲𑀼 𑀅𑀜𑁆𑀜𑀢𑀭𑀩𑁆𑀭𑀳𑁆𑀫𑀼𑀦𑀸 𑀯𑀸. 𑀓𑁂𑀦𑀘𑀺 𑀯𑀸 𑀮𑁄𑀓𑀲𑁆𑀫𑀺𑀦𑁆𑀢𑀺 𑀏𑀢𑁂 𑀲𑀫𑀡𑀸𑀤𑀬𑁄 𑀞𑀧𑁂𑀢𑁆𑀯𑀸 𑀅𑀜𑁆𑀜𑁂𑀦𑀧𑀺 𑀓𑁂𑀦𑀘𑀺 𑀯𑀸 𑀮𑁄𑀓𑀲𑁆𑀫𑀺𑀁 𑀳𑀭𑀺𑀢𑀼𑀁 𑀦 𑀲𑀓𑁆𑀓𑀸. 𑀥𑀫𑁆𑀫𑀲𑀫𑀦𑁆𑀦𑁂𑀲𑀦𑀸𑀢𑀺 𑀲𑀪𑀸𑀯𑀲𑀫𑀦𑁆𑀦𑁂𑀲𑀦𑀸. 𑀥𑀫𑁆𑀫𑀢𑀸𑀲𑀼𑀲𑀫𑀦𑁆𑀦𑀺𑀝𑁆𑀞𑁄𑀢𑀺 𑀥𑀫𑁆𑀫𑀢𑀸𑀬 𑀲𑀼𑀲𑀫𑀦𑁆𑀦𑀺𑀝𑁆𑀞𑁄, 𑀲𑀪𑀸𑀯𑁂𑀦𑁂𑀯 𑀲𑀼𑀝𑁆𑀞𑀼 𑀲𑀫𑀦𑁆𑀦𑁂𑀲𑀺𑀢𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀯𑀻𑀫𑀁𑀲𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.