𑁪. 𑀘𑀽𑀴𑀯𑁂𑀤𑀮𑁆𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁬𑁦. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀘𑀽𑀴𑀯𑁂𑀤𑀮𑁆𑀮𑀲𑀼𑀢𑁆𑀢𑀁. 𑀢𑀢𑁆𑀣 𑀯𑀺𑀲𑀸𑀔𑁄 𑀉𑀧𑀸𑀲𑀓𑁄𑀢𑀺 𑀯𑀺𑀲𑀸𑀔𑁄𑀢𑀺 𑀏𑀯𑀁𑀦𑀸𑀫𑀓𑁄 𑀉𑀧𑀸𑀲𑀓𑁄. 𑀬𑁂𑀦 𑀥𑀫𑁆𑀫𑀤𑀺𑀦𑁆𑀦𑀸𑀢𑀺 𑀬𑁂𑀦 𑀥𑀫𑁆𑀫𑀤𑀺𑀦𑁆𑀦𑀸 𑀦𑀸𑀫 𑀪𑀺𑀓𑁆𑀔𑀼𑀦𑀻 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀓𑁄 𑀧𑀦𑀸𑀬𑀁 𑀯𑀺𑀲𑀸𑀔𑁄? 𑀓𑀸 𑀥𑀫𑁆𑀫𑀤𑀺𑀦𑁆𑀦𑀸? 𑀓𑀲𑁆𑀫𑀸 𑀉𑀧𑀲𑀗𑁆𑀓𑀫𑀻𑀢𑀺? 𑀯𑀺𑀲𑀸𑀔𑁄 𑀦𑀸𑀫 𑀥𑀫𑁆𑀫𑀤𑀺𑀦𑁆𑀦𑀸𑀬 𑀕𑀺𑀳𑀺𑀓𑀸𑀮𑁂 𑀖𑀭𑀲𑀸𑀫𑀺𑀓𑁄. 𑀲𑁄 𑀬𑀤𑀸 𑀪𑀕𑀯𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀺𑀢𑁆𑀯𑀸 𑀧𑀯𑀢𑁆𑀢𑀯𑀭𑀥𑀫𑁆𑀫𑀘𑀓𑁆𑀓𑁄 𑀬𑀲𑀸𑀤𑀬𑁄 𑀓𑀼𑀮𑀧𑀼𑀢𑁆𑀢𑁂 𑀯𑀺𑀦𑁂𑀢𑁆𑀯𑀸 𑀉𑀭𑀼𑀯𑁂𑀮𑀁 𑀧𑀢𑁆𑀯𑀸 𑀢𑀢𑁆𑀣 𑀚𑀝𑀺𑀮𑀲𑀳𑀲𑁆𑀲𑀁 𑀯𑀺𑀦𑁂𑀢𑁆𑀯𑀸 𑀧𑀼𑀭𑀸𑀡𑀚𑀝𑀺𑀮𑁂𑀳𑀺 𑀔𑀻𑀡𑀸𑀲𑀯𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀭𑀸𑀚𑀕𑀳𑀁 𑀕𑀦𑁆𑀢𑁆𑀯𑀸 𑀩𑀼𑀤𑁆𑀥𑀤𑀲𑁆𑀲𑀦𑀢𑁆𑀣𑀁 𑀤𑁆𑀯𑀸𑀤𑀲𑀦𑀳𑀼𑀢𑀸𑀬 𑀧𑀭𑀺𑀲𑀸𑀬 𑀲𑀤𑁆𑀥𑀺𑀁 𑀆𑀕𑀢𑀲𑁆𑀲 𑀩𑀺𑀫𑁆𑀩𑀺𑀲𑀸𑀭𑀫𑀳𑀸𑀭𑀸𑀚𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀢𑀤𑀸 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀆𑀕𑀢𑁂𑀲𑀼 𑀤𑁆𑀯𑀸𑀤𑀲𑀦𑀳𑀼𑀢𑁂𑀲𑀼 𑀏𑀓𑀁 𑀦𑀳𑀼𑀢𑀁 𑀉𑀧𑀸𑀲𑀓𑀢𑁆𑀢𑀁 𑀧𑀝𑀺𑀯𑁂𑀤𑁂𑀲𑀺, 𑀏𑀓𑀸𑀤𑀲 𑀦𑀳𑀼𑀢𑀸𑀦𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼 𑀲𑀤𑁆𑀥𑀺𑀁 𑀭𑀜𑁆𑀜𑀸 𑀩𑀺𑀫𑁆𑀩𑀺𑀲𑀸𑀭𑁂𑀦. 𑀅𑀬𑀁 𑀉𑀧𑀸𑀲𑀓𑁄 𑀢𑁂𑀲𑀁 𑀅𑀜𑁆𑀜𑀢𑀭𑁄, 𑀢𑁂𑀳𑀺 𑀲𑀤𑁆𑀥𑀺𑀁 𑀧𑀞𑀫𑀤𑀲𑁆𑀲𑀦𑁂𑀯 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀬, 𑀧𑀼𑀦 𑀏𑀓𑀤𑀺𑀯𑀲𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑀓𑀤𑀸𑀕𑀸𑀫𑀺𑀨𑀮𑀁 𑀧𑀢𑁆𑀯𑀸, 𑀢𑀢𑁄 𑀅𑀧𑀭𑀪𑀸𑀕𑁂𑀧𑀺 𑀏𑀓𑀤𑀺𑀯𑀲𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀅𑀦𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀺𑀢𑁄. 𑀲𑁄 𑀅𑀦𑀸𑀕𑀸𑀫𑀻 𑀳𑀼𑀢𑁆𑀯𑀸 𑀕𑁂𑀳𑀁 𑀆𑀕𑀘𑁆𑀙𑀦𑁆𑀢𑁄 𑀬𑀣𑀸 𑀅𑀜𑁆𑀜𑁂𑀲𑀼 𑀤𑀺𑀯𑀲𑁂𑀲𑀼 𑀇𑀢𑁄 𑀘𑀺𑀢𑁄 𑀘 𑀑𑀮𑁄𑀓𑁂𑀦𑁆𑀢𑁄 𑀲𑀺𑀢𑀁 𑀓𑀼𑀭𑀼𑀫𑀸𑀦𑁄 𑀆𑀕𑀘𑁆𑀙𑀢𑀺, 𑀏𑀯𑀁 𑀅𑀦𑀸𑀕𑀦𑁆𑀢𑁆𑀯𑀸 𑀲𑀦𑁆𑀢𑀺𑀦𑁆𑀤𑁆𑀭𑀺𑀬𑁄 𑀲𑀦𑁆𑀢𑀫𑀸𑀦𑀲𑁄 𑀳𑀼𑀢𑁆𑀯𑀸 𑀅𑀕𑀫𑀸𑀲𑀺.

𑀥𑀫𑁆𑀫𑀤𑀺𑀦𑁆𑀦𑀸 𑀲𑀻𑀳𑀧𑀜𑁆𑀚𑀭𑀁 𑀉𑀕𑁆𑀖𑀸𑀝𑁂𑀢𑁆𑀯𑀸 𑀯𑀻𑀣𑀺𑀁 𑀑𑀮𑁄𑀓𑀬𑀫𑀸𑀦𑀸 𑀢𑀲𑁆𑀲 𑀆𑀕𑀫𑀦𑀸𑀓𑀸𑀭𑀁 𑀤𑀺𑀲𑁆𑀯𑀸, ‘‘𑀓𑀺𑀁 𑀦𑀼 𑀔𑁄 𑀏𑀢’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀲𑁆𑀲 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀼𑀭𑀼𑀫𑀸𑀦𑀸 𑀲𑁄𑀧𑀸𑀦𑀲𑀻𑀲𑁂 𑀞𑀢𑁆𑀯𑀸 𑀑𑀮𑀫𑁆𑀩𑀦𑀢𑁆𑀣𑀁 𑀳𑀢𑁆𑀣𑀁 𑀧𑀲𑀸𑀭𑁂𑀲𑀺. 𑀉𑀧𑀸𑀲𑀓𑁄 𑀅𑀢𑁆𑀢𑀦𑁄 𑀳𑀢𑁆𑀣𑀁 𑀲𑀫𑀺𑀜𑁆𑀚𑁂𑀲𑀺. 𑀲𑀸 ‘‘𑀧𑀸𑀢𑀭𑀸𑀲𑀪𑁄𑀚𑀦𑀓𑀸𑀮𑁂 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀉𑀧𑀸𑀲𑀓𑁄 𑀧𑀼𑀩𑁆𑀩𑁂 𑀢𑀸𑀬 𑀲𑀤𑁆𑀥𑀺𑀁 𑀏𑀓𑀢𑁄 𑀪𑀼𑀜𑁆𑀚𑀢𑀺. 𑀢𑀁 𑀤𑀺𑀯𑀲𑀁 𑀧𑀦 𑀢𑀁 𑀅𑀦𑀧𑀮𑁄𑀓𑁂𑀢𑁆𑀯𑀸 𑀬𑁄𑀕𑀸𑀯𑀘𑀭𑀪𑀺𑀓𑁆𑀔𑀼 𑀯𑀺𑀬 𑀏𑀓𑀓𑁄𑀯 𑀪𑀼𑀜𑁆𑀚𑀺. 𑀲𑀸, ‘‘𑀲𑀸𑀬𑀦𑁆𑀳𑀓𑀸𑀮𑁂 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀉𑀧𑀸𑀲𑀓𑁄 𑀢𑀁𑀤𑀺𑀯𑀲𑀁 𑀲𑀺𑀭𑀺𑀕𑀩𑁆𑀪𑀁 𑀦 𑀧𑀸𑀯𑀺𑀲𑀺, 𑀅𑀜𑁆𑀜𑀁 𑀕𑀩𑁆𑀪𑀁 𑀧𑀝𑀺𑀚𑀕𑁆𑀕𑀸𑀧𑁂𑀢𑁆𑀯𑀸 𑀓𑀧𑁆𑀧𑀺𑀬𑀫𑀜𑁆𑀘𑀓𑀁 𑀧𑀜𑁆𑀜𑀧𑀸𑀧𑁂𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀉𑀧𑀸𑀲𑀺𑀓𑀸, ‘‘𑀓𑀺𑀁 𑀦𑀼 𑀔𑁆𑀯𑀲𑁆𑀲 𑀩𑀳𑀺𑀤𑁆𑀥𑀸 𑀧𑀢𑁆𑀣𑀦𑀸 𑀅𑀢𑁆𑀣𑀺, 𑀉𑀤𑀸𑀳𑀼 𑀓𑁂𑀦𑀘𑀺𑀤𑁂𑀯 𑀧𑀭𑀺𑀪𑁂𑀤𑀓𑁂𑀦 𑀪𑀺𑀦𑁆𑀦𑁄, 𑀉𑀤𑀸𑀳𑀼 𑀫𑀬𑁆𑀳𑁂𑀯 𑀓𑁄𑀘𑀺 𑀤𑁄𑀲𑁄 𑀅𑀢𑁆𑀣𑀻’’𑀢𑀺 𑀩𑀮𑀯𑀤𑁄𑀫𑀦𑀲𑁆𑀲𑀸 𑀳𑀼𑀢𑁆𑀯𑀸, ‘‘𑀏𑀓𑀁 𑀤𑁆𑀯𑁂 𑀤𑀺𑀯𑀲𑁂 𑀯𑀲𑀺𑀢𑀓𑀸𑀮𑁂 𑀲𑀓𑁆𑀓𑀸 𑀜𑀸𑀢𑀼’’𑀦𑁆𑀢𑀺 𑀢𑀲𑁆𑀲 𑀉𑀧𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺.

𑀉𑀧𑀸𑀲𑀓𑁄, ‘‘𑀓𑀺𑀁 𑀥𑀫𑁆𑀫𑀤𑀺𑀦𑁆𑀦𑁂 𑀅𑀓𑀸𑀮𑁂 𑀆𑀕𑀢𑀸𑀲𑀻’’𑀢𑀺 𑀧𑀼𑀘𑁆𑀙𑀺. 𑀆𑀫 𑀅𑀬𑁆𑀬𑀧𑀼𑀢𑁆𑀢, 𑀆𑀕𑀢𑀸𑀫𑁆𑀳𑀺, 𑀦 𑀢𑁆𑀯𑀁 𑀬𑀣𑀸 𑀧𑀼𑀭𑀸𑀡𑁄, 𑀓𑀺𑀁 𑀦𑀼 𑀢𑁂 𑀩𑀳𑀺𑀤𑁆𑀥𑀸 𑀧𑀢𑁆𑀣𑀦𑀸 𑀅𑀢𑁆𑀣𑀻𑀢𑀺? 𑀦𑀢𑁆𑀣𑀺 𑀥𑀫𑁆𑀫𑀤𑀺𑀦𑁆𑀦𑁂𑀢𑀺. 𑀅𑀜𑁆𑀜𑁄 𑀓𑁄𑀘𑀺 𑀧𑀭𑀺𑀪𑁂𑀤𑀓𑁄 𑀅𑀢𑁆𑀣𑀻𑀢𑀺? 𑀅𑀬𑀫𑁆𑀧𑀺 𑀦𑀢𑁆𑀣𑀻𑀢𑀺. 𑀏𑀯𑀁 𑀲𑀦𑁆𑀢𑁂 𑀫𑀬𑁆𑀳𑁂𑀯 𑀓𑁄𑀘𑀺 𑀤𑁄𑀲𑁄 𑀪𑀯𑀺𑀲𑁆𑀲𑀢𑀻𑀢𑀺. 𑀢𑀼𑀬𑁆𑀳𑀫𑁆𑀧𑀺 𑀤𑁄𑀲𑁄 𑀦𑀢𑁆𑀣𑀻𑀢𑀺. 𑀅𑀣 𑀓𑀲𑁆𑀫𑀸 𑀫𑀬𑀸 𑀲𑀤𑁆𑀥𑀺𑀁 𑀬𑀣𑀸 𑀧𑀓𑀢𑀺𑀬𑀸 𑀆𑀮𑀸𑀧𑀲𑀮𑁆𑀮𑀸𑀧𑀫𑀢𑁆𑀢𑀫𑁆𑀧𑀺 𑀦 𑀓𑀭𑁄𑀣𑀸𑀢𑀺? 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀦𑀸𑀫 𑀕𑀭𑀼 𑀪𑀸𑀭𑀺𑀬𑁄 𑀦 𑀧𑀓𑀸𑀲𑁂𑀢𑀢𑀩𑁆𑀩𑁄, 𑀲𑀘𑁂 𑀔𑁄 𑀧𑀦𑀸𑀳𑀁 𑀦 𑀓𑀣𑁂𑀲𑁆𑀲𑀸𑀫𑀺, 𑀅𑀬𑀁 𑀳𑀤𑀬𑀁 𑀨𑀸𑀮𑁂𑀢𑁆𑀯𑀸 𑀏𑀢𑁆𑀣𑁂𑀯 𑀓𑀸𑀮𑀁 𑀓𑀭𑁂𑀬𑁆𑀬𑀸’’𑀢𑀺 𑀢𑀲𑁆𑀲𑀸𑀦𑀼𑀕𑁆𑀕𑀳𑀢𑁆𑀣𑀸𑀬 𑀓𑀣𑁂𑀲𑀺 𑁋 ‘‘𑀥𑀫𑁆𑀫𑀤𑀺𑀦𑁆𑀦𑁂 𑀅𑀳𑀁 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀦𑀸𑀫 𑀅𑀥𑀺𑀕𑀢𑁄, 𑀢𑀁 𑀅𑀥𑀺𑀕𑀢𑀲𑁆𑀲 𑀏𑀯𑀭𑀽𑀧𑀸 𑀮𑁄𑀓𑀺𑀬𑀓𑀺𑀭𑀺𑀬𑀸 𑀦 𑀯𑀝𑁆𑀝𑀢𑀺. 𑀬𑀤𑀺 𑀢𑁆𑀯𑀁 𑀇𑀘𑁆𑀙𑀲𑀺, 𑀢𑀯 𑀘𑀢𑁆𑀢𑀸𑀮𑀻𑀲 𑀓𑁄𑀝𑀺𑀬𑁄 𑀫𑀫 𑀘𑀢𑁆𑀢𑀸𑀮𑀻𑀲 𑀓𑁄𑀝𑀺𑀬𑁄𑀢𑀺 𑀅𑀲𑀻𑀢𑀺𑀓𑁄𑀝𑀺𑀥𑀦𑀁 𑀅𑀢𑁆𑀣𑀺, 𑀏𑀢𑁆𑀣 𑀇𑀲𑁆𑀲𑀭𑀸 𑀳𑀼𑀢𑁆𑀯𑀸 𑀫𑀫 𑀫𑀸𑀢𑀺𑀝𑁆𑀞𑀸𑀦𑁂 𑀯𑀸 𑀪𑀕𑀺𑀦𑀺𑀝𑁆𑀞𑀸𑀦𑁂 𑀯𑀸 𑀞𑀢𑁆𑀯𑀸 𑀯𑀲. 𑀢𑀬𑀸 𑀤𑀺𑀦𑁆𑀦𑁂𑀦 𑀪𑀢𑁆𑀢𑀧𑀺𑀡𑁆𑀟𑀫𑀢𑁆𑀢𑀓𑁂𑀦 𑀅𑀳𑀁 𑀬𑀸𑀧𑁂𑀲𑁆𑀲𑀸𑀫𑀺. 𑀅𑀣𑁂𑀯𑀁 𑀦 𑀓𑀭𑁄𑀲𑀺, 𑀇𑀫𑁂 𑀪𑁄𑀕𑁂 𑀕𑀳𑁂𑀢𑁆𑀯𑀸 𑀓𑀼𑀮𑀕𑁂𑀳𑀁 𑀕𑀘𑁆𑀙, 𑀅𑀣𑀸𑀧𑀺 𑀢𑁂 𑀩𑀳𑀺𑀤𑁆𑀥𑀸 𑀧𑀢𑁆𑀣𑀦𑀸 𑀦𑀢𑁆𑀣𑀺, 𑀅𑀳𑀁 𑀢𑀁 𑀪𑀕𑀺𑀦𑀺𑀝𑁆𑀞𑀸𑀦𑁂 𑀯𑀸 𑀥𑀺𑀢𑀼𑀝𑁆𑀞𑀸𑀦𑁂 𑀯𑀸 𑀞𑀧𑁂𑀢𑁆𑀯𑀸 𑀧𑁄𑀲𑁂𑀲𑁆𑀲𑀸𑀫𑀻’’𑀢𑀺.

𑀲𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀧𑀓𑀢𑀺𑀧𑀼𑀭𑀺𑀲𑁄 𑀏𑀯𑀁 𑀯𑀢𑁆𑀢𑀸 𑀦𑀸𑀫 𑀦𑀢𑁆𑀣𑀺. 𑀅𑀤𑁆𑀥𑀸 𑀏𑀢𑁂𑀦 𑀮𑁄𑀓𑀼𑀢𑁆𑀢𑀭𑀯𑀭𑀥𑀫𑁆𑀫𑁄 𑀧𑀝𑀺𑀯𑀺𑀤𑁆𑀥𑁄. 𑀲𑁄 𑀧𑀦 𑀥𑀫𑁆𑀫𑁄 𑀓𑀺𑀁 𑀧𑀼𑀭𑀺𑀲𑁂𑀳𑁂𑀯 𑀧𑀝𑀺𑀩𑀼𑀚𑁆𑀛𑀺𑀢𑀩𑁆𑀩𑁄, 𑀉𑀤𑀸𑀳𑀼 𑀫𑀸𑀢𑀼𑀕𑀸𑀫𑁄𑀧𑀺 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀲𑀓𑁆𑀓𑁄𑀢𑀻’’𑀢𑀺 𑀯𑀺𑀲𑀸𑀔𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀁 𑀦𑀼 𑀔𑁄 𑀏𑀲𑁄 𑀥𑀫𑁆𑀫𑁄 𑀧𑀼𑀭𑀺𑀲𑁂𑀳𑁂𑀯 𑀮𑀪𑀺𑀢𑀩𑁆𑀩𑁄, 𑀫𑀸𑀢𑀼𑀕𑀸𑀫𑁂𑀦𑀧𑀺 𑀲𑀓𑁆𑀓𑀸 𑀮𑀤𑁆𑀥𑀼’’𑀦𑁆𑀢𑀺? 𑀓𑀺𑀁 𑀯𑀤𑁂𑀲𑀺 𑀥𑀫𑁆𑀫𑀤𑀺𑀦𑁆𑀦𑁂, 𑀬𑁂 𑀧𑀝𑀺𑀧𑀦𑁆𑀦𑀓𑀸, 𑀢𑁂 𑀏𑀢𑀲𑁆𑀲 𑀤𑀸𑀬𑀸𑀤𑀸, 𑀬𑀲𑁆𑀲 𑀬𑀲𑁆𑀲 𑀉𑀧𑀦𑀺𑀲𑁆𑀲𑀬𑁄 𑀅𑀢𑁆𑀣𑀺, 𑀲𑁄 𑀲𑁄 𑀏𑀢𑀁 𑀧𑀝𑀺𑀮𑀪𑀢𑀻𑀢𑀺. 𑀏𑀯𑀁 𑀲𑀦𑁆𑀢𑁂 𑀫𑀬𑁆𑀳𑀁 𑀧𑀩𑁆𑀩𑀚𑁆𑀚𑀁 𑀅𑀦𑀼𑀚𑀸𑀦𑀸𑀣𑀸𑀢𑀺. 𑀲𑀸𑀥𑀼 𑀪𑀤𑁆𑀤𑁂, 𑀅𑀳𑀫𑁆𑀧𑀺 𑀢𑀁 𑀏𑀢𑀲𑁆𑀫𑀺𑀁𑀬𑁂𑀯 𑀫𑀕𑁆𑀕𑁂 𑀬𑁄𑀚𑁂𑀢𑀼𑀓𑀸𑀫𑁄, 𑀫𑀦𑀁 𑀧𑀦 𑀢𑁂 𑀅𑀚𑀸𑀦𑀫𑀸𑀦𑁄 𑀦 𑀓𑀣𑁂𑀫𑀻𑀢𑀺 𑀢𑀸𑀯𑀤𑁂𑀯 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺.

𑀭𑀸𑀚𑀸, ‘‘𑀓𑀺𑀁, 𑀕𑀳𑀧𑀢𑀺, 𑀅𑀓𑀸𑀮𑁂 𑀆𑀕𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺. 𑀥𑀫𑁆𑀫𑀤𑀺𑀦𑁆𑀦𑀸, ‘‘𑀫𑀳𑀸𑀭𑀸𑀚, 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀯𑀤𑀢𑀻𑀢𑀺. 𑀓𑀺𑀁 𑀧𑀦𑀲𑁆𑀲 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻𑀢𑀺? 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀦𑀢𑁆𑀣𑀺, 𑀲𑁄𑀯𑀡𑁆𑀡𑀲𑀺𑀯𑀺𑀓𑀁 𑀤𑁂𑀯, 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺 𑀦𑀕𑀭𑀜𑁆𑀘 𑀧𑀝𑀺𑀚𑀕𑁆𑀕𑀸𑀧𑁂𑀢𑀼𑀦𑁆𑀢𑀺. 𑀭𑀸𑀚𑀸 𑀲𑁄𑀯𑀡𑁆𑀡𑀲𑀺𑀯𑀺𑀓𑀁 𑀤𑀢𑁆𑀯𑀸 𑀦𑀕𑀭𑀁 𑀧𑀝𑀺𑀚𑀕𑁆𑀕𑀸𑀧𑁂𑀲𑀺. 𑀯𑀺𑀲𑀸𑀔𑁄 𑀥𑀫𑁆𑀫𑀤𑀺𑀦𑁆𑀦𑀁 𑀕𑀦𑁆𑀥𑁄𑀤𑀓𑁂𑀦 𑀦𑀳𑀸𑀧𑁂𑀢𑁆𑀯𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑁂𑀳𑀺 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀲𑁄𑀯𑀡𑁆𑀡𑀲𑀺𑀯𑀺𑀓𑀸𑀬 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀜𑀸𑀢𑀺𑀕𑀡𑁂𑀦 𑀧𑀭𑀺𑀯𑀸𑀭𑀸𑀧𑁂𑀢𑁆𑀯𑀸 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀳𑀺 𑀧𑀽𑀚𑀬𑀫𑀸𑀦𑁄 𑀦𑀕𑀭𑀯𑀸𑀲𑀦𑀁 𑀓𑀭𑁄𑀦𑁆𑀢𑁄 𑀯𑀺𑀬 𑀪𑀺𑀓𑁆𑀔𑀼𑀦𑀺𑀉𑀧𑀲𑁆𑀲𑀬𑀁 𑀕𑀦𑁆𑀢𑁆𑀯𑀸, ‘‘𑀥𑀫𑁆𑀫𑀤𑀺𑀦𑁆𑀦𑀁 𑀧𑀩𑁆𑀩𑀸𑀚𑁂𑀣𑀸𑀬𑁆𑀬𑁂’’𑀢𑀺 𑀆𑀳. 𑀪𑀺𑀓𑁆𑀔𑀼𑀦𑀺𑀬𑁄 ‘‘𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀤𑁄𑀲𑁂 𑀲𑀳𑀺𑀢𑀼𑀁 𑀯𑀝𑁆𑀝𑀢𑀺 𑀕𑀳𑀧𑀢𑀻’’𑀢𑀺 𑀆𑀳𑀁𑀲𑀼. 𑀦𑀢𑁆𑀣𑀬𑁆𑀬𑁂 𑀓𑁄𑀘𑀺 𑀤𑁄𑀲𑁄, 𑀲𑀤𑁆𑀥𑀸𑀬 𑀧𑀩𑁆𑀩𑀚𑀢𑀻𑀢𑀺. 𑀅𑀣𑁂𑀓𑀸 𑀩𑁆𑀬𑀢𑁆𑀢𑀸 𑀣𑁂𑀭𑀻 𑀢𑀘𑀧𑀜𑁆𑀘𑀓𑀓𑀫𑁆𑀫𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀓𑁂𑀲𑁂 𑀑𑀳𑀸𑀭𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀲𑀺. 𑀯𑀺𑀲𑀸𑀔𑁄, ‘‘𑀅𑀪𑀺𑀭𑀫𑀬𑁆𑀬𑁂, 𑀲𑁆𑀯𑀸𑀓𑁆𑀔𑀸𑀢𑁄 𑀥𑀫𑁆𑀫𑁄’’𑀢𑀺 𑀯𑀦𑁆𑀤𑀺𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀢𑀲𑁆𑀲𑀸 𑀧𑀩𑁆𑀩𑀚𑀺𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀮𑀸𑀪𑀲𑀓𑁆𑀓𑀸𑀭𑁄 𑀉𑀧𑁆𑀧𑀚𑁆𑀚𑀺. 𑀢𑁂𑀦𑁂𑀯 𑀧𑀮𑀺𑀩𑀼𑀤𑁆𑀥𑀸 𑀲𑀫𑀡𑀥𑀫𑁆𑀫𑀁 𑀓𑀸𑀢𑀼𑀁 𑀑𑀓𑀸𑀲𑀁 𑀦 𑀮𑀪𑀢𑀺. 𑀅𑀣𑀸𑀘𑀭𑀺𑀬-𑀉𑀧𑀚𑁆𑀛𑀸𑀬𑀣𑁂𑀭𑀺𑀬𑁄 𑀕𑀳𑁂𑀢𑁆𑀯𑀸 𑀚𑀦𑀧𑀤𑀁 𑀕𑀦𑁆𑀢𑁆𑀯𑀸 𑀅𑀝𑁆𑀞𑀢𑀺𑀁𑀲𑀸𑀬 𑀆𑀭𑀫𑁆𑀫𑀡𑁂𑀲𑀼 𑀘𑀺𑀢𑁆𑀢𑀭𑀼𑀘𑀺𑀢𑀁 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑀸𑀧𑁂𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀸𑀢𑀼𑀁 𑀆𑀭𑀤𑁆𑀥𑀸, 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀦𑁆𑀦𑀢𑁆𑀢𑀸 𑀧𑀦 𑀦𑀸𑀢𑀺𑀘𑀺𑀭𑀁 𑀓𑀺𑀮𑀫𑀺𑀢𑁆𑀣.

𑀇𑀢𑁄 𑀧𑀝𑁆𑀞𑀸𑀬 𑀳𑀺 𑀲𑀢𑀲𑀳𑀲𑁆𑀲𑀓𑀧𑁆𑀧𑀫𑀢𑁆𑀣𑀓𑁂 𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀲𑀢𑁆𑀣𑀸 𑀮𑁄𑀓𑁂 𑀉𑀤𑀧𑀸𑀤𑀺. 𑀢𑀤𑀸 𑀏𑀲𑀸 𑀏𑀓𑀲𑁆𑀫𑀺𑀁 𑀓𑀼𑀮𑁂 𑀤𑀸𑀲𑀻 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀓𑁂𑀲𑁂 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀲𑀼𑀚𑀸𑀢𑀢𑁆𑀣𑁂𑀭𑀲𑁆𑀲 𑀦𑀸𑀫 𑀅𑀕𑁆𑀕𑀲𑀸𑀯𑀓𑀲𑁆𑀲 𑀤𑀸𑀦𑀁 𑀤𑀢𑁆𑀯𑀸 𑀧𑀢𑁆𑀣𑀦𑀫𑀓𑀸𑀲𑀺. 𑀲𑀸 𑀢𑀸𑀬 𑀧𑀢𑁆𑀣𑀦𑀸𑀪𑀺𑀦𑀻𑀳𑀸𑀭𑀲𑀫𑁆𑀧𑀢𑁆𑀢𑀺𑀬𑀸 𑀦𑀸𑀢𑀺𑀘𑀺𑀭𑀁 𑀓𑀺𑀮𑀫𑀺𑀢𑁆𑀣, 𑀓𑀢𑀺𑀧𑀸𑀳𑁂𑀦𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀬𑁂𑀦𑀢𑁆𑀣𑁂𑀦 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑀸, 𑀲𑁄 𑀫𑀢𑁆𑀣𑀓𑀁 𑀧𑀢𑁆𑀢𑁄, 𑀓𑀺𑀁 𑀫𑁂 𑀚𑀦𑀧𑀤𑀯𑀸𑀲𑁂𑀦, 𑀫𑀬𑁆𑀳𑀁 𑀜𑀸𑀢𑀓𑀸𑀧𑀺 𑀧𑀼𑀜𑁆𑀜𑀸𑀦𑀺 𑀓𑀭𑀺𑀲𑁆𑀲𑀦𑁆𑀢𑀺, 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄𑀧𑀺 𑀧𑀘𑁆𑀘𑀬𑁂𑀳𑀺 𑀦 𑀓𑀺𑀮𑀫𑀺𑀲𑁆𑀲𑀢𑀺, 𑀭𑀸𑀚𑀕𑀳𑀁 𑀕𑀘𑁆𑀙𑀸𑀫𑀻’’𑀢𑀺 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀁 𑀕𑀳𑁂𑀢𑁆𑀯𑀸 𑀭𑀸𑀚𑀕𑀳𑀫𑁂𑀯 𑀅𑀕𑀫𑀸𑀲𑀺. 𑀯𑀺𑀲𑀸𑀔𑁄, ‘‘𑀥𑀫𑁆𑀫𑀤𑀺𑀦𑁆𑀦𑀸 𑀓𑀺𑀭 𑀆𑀕𑀢𑀸’’𑀢𑀺 𑀲𑀼𑀢𑁆𑀯𑀸, ‘‘𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀚𑀦𑀧𑀤𑀁 𑀕𑀢𑀸, 𑀕𑀦𑁆𑀢𑁆𑀯𑀸𑀧𑀺 𑀦𑀘𑀺𑀭𑀲𑁆𑀲𑁂𑀯 𑀧𑀘𑁆𑀘𑀸𑀕𑀢𑀸, 𑀓𑀺𑀁 𑀦𑀼 𑀔𑁄 𑀪𑀯𑀺𑀲𑁆𑀲𑀢𑀺, 𑀕𑀦𑁆𑀢𑁆𑀯𑀸 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀤𑀼𑀢𑀺𑀬𑀕𑀫𑀦𑁂𑀦 𑀪𑀺𑀓𑁆𑀔𑀼𑀦𑀺𑀉𑀧𑀲𑁆𑀲𑀬𑀁 𑀅𑀕𑀫𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀯𑀺𑀲𑀸𑀔𑁄 𑀉𑀧𑀸𑀲𑀓𑁄 𑀬𑁂𑀦 𑀥𑀫𑁆𑀫𑀤𑀺𑀦𑁆𑀦𑀸 𑀪𑀺𑀓𑁆𑀔𑀼𑀦𑀻 𑀢𑁂𑀦𑀼𑀧𑀲𑀗𑁆𑀓𑀫𑀻’’𑀢𑀺.

𑀏𑀢𑀤𑀯𑁄𑀘𑀸𑀢𑀺 𑀏𑀢𑀁 𑀲𑀓𑁆𑀓𑀸𑀬𑁄𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘. 𑀓𑀲𑁆𑀫𑀸 𑀅𑀯𑁄𑀘𑀸𑀢𑀺? 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀅𑀪𑀺𑀭𑀫𑀲𑀺 𑀦𑀸𑀪𑀺𑀭𑀫𑀲𑀺, 𑀅𑀬𑁆𑀬𑁂’’𑀢𑀺 𑀏𑀯𑀁 𑀧𑀼𑀘𑁆𑀙𑀦𑀁 𑀦𑀸𑀫 𑀦 𑀧𑀡𑁆𑀟𑀺𑀢𑀓𑀺𑀘𑁆𑀘𑀁, 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁂 𑀉𑀧𑀦𑁂𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀺, 𑀧𑀜𑁆𑀳𑀩𑁆𑀬𑀸𑀓𑀭𑀡𑁂𑀦 𑀢𑀲𑁆𑀲𑀸 𑀅𑀪𑀺𑀭𑀢𑀺𑀁 𑀯𑀸 𑀅𑀦𑀪𑀺𑀭𑀢𑀺𑀁 𑀯𑀸 𑀚𑀸𑀦𑀺𑀲𑁆𑀲𑀸𑀫𑀻𑀢𑀺, 𑀢𑀲𑁆𑀫𑀸 𑀅𑀯𑁄𑀘. 𑀢𑀁 𑀲𑀼𑀢𑁆𑀯𑀸𑀯 𑀥𑀫𑁆𑀫𑀤𑀺𑀦𑁆𑀦𑀸 𑀅𑀳𑀁, 𑀆𑀯𑀼𑀲𑁄 𑀯𑀺𑀲𑀸𑀔, 𑀅𑀘𑀺𑀭𑀧𑀩𑁆𑀩𑀚𑀺𑀢𑀸 𑀲𑀓𑀸𑀬𑀁 𑀯𑀸 𑀧𑀭𑀓𑀸𑀬𑀁 𑀯𑀸 𑀓𑀼𑀢𑁄 𑀚𑀸𑀦𑀺𑀲𑁆𑀲𑀸𑀫𑀻𑀢𑀺 𑀯𑀸, 𑀅𑀜𑁆𑀜𑀢𑁆𑀣𑁂𑀭𑀺𑀬𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀸𑀢𑀺 𑀯𑀸 𑀅𑀯𑀢𑁆𑀯𑀸 𑀉𑀧𑀦𑀺𑀓𑁆𑀔𑀺𑀢𑁆𑀢𑀁 𑀲𑀫𑁆𑀧𑀝𑀺𑀘𑁆𑀙𑀫𑀸𑀦𑀸 𑀯𑀺𑀬, 𑀏𑀓𑀧𑀸𑀲𑀓𑀕𑀡𑁆𑀞𑀺𑀁 𑀫𑁄𑀘𑁂𑀦𑁆𑀢𑀻 𑀯𑀺𑀬 𑀕𑀳𑀦𑀝𑁆𑀞𑀸𑀦𑁂 𑀳𑀢𑁆𑀣𑀺𑀫𑀕𑁆𑀕𑀁 𑀦𑀻𑀳𑀭𑀫𑀸𑀦𑀸 𑀯𑀺𑀬 𑀔𑀕𑁆𑀕𑀫𑀼𑀔𑁂𑀦 𑀲𑀫𑀼𑀕𑁆𑀕𑀁 𑀯𑀺𑀯𑀭𑀫𑀸𑀦𑀸 𑀯𑀺𑀬 𑀘 𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀲𑀬𑁂 𑀞𑀢𑁆𑀯𑀸 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑀫𑀸𑀦𑀸, 𑀧𑀜𑁆𑀘 𑀔𑁄 𑀇𑀫𑁂, 𑀆𑀯𑀼𑀲𑁄 𑀯𑀺𑀲𑀸𑀔, 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀜𑁆𑀘𑀸𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀢𑀺 𑀉𑀧𑀸𑀤𑀸𑀦𑀸𑀦𑀁 𑀧𑀘𑁆𑀘𑀬𑀪𑀽𑀢𑀸 𑀔𑀦𑁆𑀥𑀸𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦𑁂𑀢𑁆𑀣 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀓𑀣𑀸 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀓𑀣𑁂𑀢𑀩𑁆𑀩𑀸. 𑀲𑀸 𑀧𑀦𑁂𑀲𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀺𑀢𑁆𑀣𑀸𑀭𑀺𑀢𑀸 𑀏𑀯𑀸𑀢𑀺 𑀢𑀢𑁆𑀣 𑀯𑀺𑀢𑁆𑀢𑀸𑀭𑀺𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀲𑀓𑁆𑀓𑀸𑀬𑀲𑀫𑀼𑀤𑀬𑀸𑀤𑀻𑀲𑀼𑀧𑀺 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀫𑁂𑀯.

𑀇𑀤𑀁 𑀧𑀦 𑀘𑀢𑀼𑀲𑀘𑁆𑀘𑀩𑁆𑀬𑀸𑀓𑀭𑀡𑀁 𑀲𑀼𑀢𑁆𑀯𑀸 𑀯𑀺𑀲𑀸𑀔𑁄 𑀣𑁂𑀭𑀺𑀬𑀸 𑀅𑀪𑀺𑀭𑀢𑀪𑀸𑀯𑀁 𑀅𑀜𑁆𑀜𑀸𑀲𑀺. 𑀬𑁄 𑀳𑀺 𑀩𑀼𑀤𑁆𑀥𑀲𑀸𑀲𑀦𑁂 𑀉𑀓𑁆𑀓𑀡𑁆𑀞𑀺𑀢𑁄 𑀳𑁄𑀢𑀺 𑀅𑀦𑀪𑀺𑀭𑀢𑁄, 𑀲𑁄 𑀏𑀯𑀁 𑀧𑀼𑀘𑁆𑀙𑀺𑀢𑀧𑀼𑀘𑁆𑀙𑀺𑀢𑀧𑀜𑁆𑀳𑀁 𑀲𑀡𑁆𑀟𑀸𑀲𑁂𑀦 𑀏𑀓𑁂𑀓𑀁 𑀧𑀮𑀺𑀢𑀁 𑀕𑀡𑁆𑀳𑀦𑁆𑀢𑁄 𑀯𑀺𑀬, 𑀲𑀺𑀦𑁂𑀭𑀼𑀧𑀸𑀤𑀢𑁄 𑀯𑀸𑀮𑀼𑀓𑀁 𑀉𑀤𑁆𑀥𑀭𑀦𑁆𑀢𑁄 𑀯𑀺𑀬 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀬𑀲𑁆𑀫𑀸 𑀧𑀦 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀮𑁄𑀓𑁂 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀯𑀺𑀬 𑀩𑀼𑀤𑁆𑀥𑀲𑀸𑀲𑀦𑁂 𑀧𑀸𑀓𑀝𑀸𑀦𑀺, 𑀧𑀭𑀺𑀲𑀫𑀚𑁆𑀛𑁂 𑀕𑀢𑁄 𑀳𑀺 𑀪𑀕𑀯𑀸𑀧𑀺 𑀫𑀳𑀸𑀣𑁂𑀭𑀸𑀧𑀺 𑀲𑀘𑁆𑀘𑀸𑀦𑁂𑀯 𑀧𑀓𑀸𑀲𑁂𑀦𑁆𑀢𑀺; 𑀪𑀺𑀓𑁆𑀔𑀼𑀲𑀗𑁆𑀖𑁄𑀧𑀺 𑀧𑀩𑁆𑀩𑀚𑀺𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀓𑀼𑀮𑀧𑀼𑀢𑁆𑀢𑁂 𑀘𑀢𑁆𑀢𑀸𑀭𑀺 𑀦𑀸𑀫 𑀓𑀺𑀁, 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀻𑀢𑀺 𑀧𑀜𑁆𑀳𑀁 𑀉𑀕𑁆𑀕𑀡𑁆𑀳𑀸𑀧𑁂𑀢𑀺. 𑀅𑀬𑀜𑁆𑀘 𑀥𑀫𑁆𑀫𑀤𑀺𑀦𑁆𑀦𑀸 𑀉𑀧𑀸𑀬𑀓𑁄𑀲𑀮𑁆𑀮𑁂 𑀞𑀺𑀢𑀸 𑀧𑀡𑁆𑀟𑀺𑀢𑀸 𑀩𑁆𑀬𑀢𑁆𑀢𑀸 𑀦𑀬𑀁 𑀕𑀳𑁂𑀢𑁆𑀯𑀸 𑀲𑀼𑀢𑁂𑀦𑀧𑀺 𑀓𑀣𑁂𑀢𑀼𑀁 𑀲𑀫𑀢𑁆𑀣𑀸, 𑀢𑀲𑁆𑀫𑀸 ‘‘𑀦 𑀲𑀓𑁆𑀓𑀸 𑀏𑀢𑀺𑀲𑁆𑀲𑀸 𑀏𑀢𑁆𑀢𑀸𑀯𑀢𑀸 𑀲𑀘𑁆𑀘𑀸𑀦𑀁 𑀧𑀝𑀺𑀯𑀺𑀤𑁆𑀥𑀪𑀸𑀯𑁄 𑀜𑀸𑀢𑀼𑀁, 𑀲𑀘𑁆𑀘𑀯𑀺𑀦𑀺𑀩𑁆𑀪𑁄𑀕𑀧𑀜𑁆𑀳𑀩𑁆𑀬𑀸𑀓𑀭𑀡𑁂𑀦 𑀲𑀓𑁆𑀓𑀸 𑀜𑀸𑀢𑀼’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀳𑁂𑀝𑁆𑀞𑀸 𑀓𑀣𑀺𑀢𑀸𑀦𑀺 𑀤𑁆𑀯𑁂 𑀲𑀘𑁆𑀘𑀸𑀦𑀺 𑀧𑀝𑀺𑀦𑀺𑀯𑀢𑁆𑀢𑁂𑀢𑁆𑀯𑀸 𑀕𑀼𑀴𑁆𑀳𑀁 𑀓𑀢𑁆𑀯𑀸 𑀕𑀡𑁆𑀞𑀺𑀧𑀜𑁆𑀳𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻𑀢𑀺 𑀧𑀼𑀘𑁆𑀙𑀦𑁆𑀢𑁄 𑀢𑀜𑁆𑀜𑁂𑀯 𑀦𑀼 𑀔𑁄, 𑀅𑀬𑁆𑀬𑁂𑀢𑀺𑀆𑀤𑀺𑀫𑀸𑀳.

𑀢𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑁂 𑀦 𑀔𑁄, 𑀆𑀯𑀼𑀲𑁄 𑀯𑀺𑀲𑀸𑀔, 𑀢𑀜𑁆𑀜𑁂𑀯 𑀉𑀧𑀸𑀤𑀸𑀦𑀦𑁆𑀢𑀺 𑀉𑀧𑀸𑀤𑀸𑀦𑀲𑁆𑀲 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂𑀓𑀤𑁂𑀲𑀪𑀸𑀯𑀢𑁄 𑀦 𑀢𑀁𑀬𑁂𑀯 𑀉𑀧𑀸𑀤𑀸𑀦𑀁 𑀢𑁂 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸, 𑀦𑀸𑀧𑀺 𑀅𑀜𑁆𑀜𑀢𑁆𑀭 𑀧𑀜𑁆𑀘𑀳𑀺 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀳𑀺 𑀉𑀧𑀸𑀤𑀸𑀦𑀁. 𑀬𑀤𑀺 𑀳𑀺 𑀢𑀜𑁆𑀜𑁂𑀯 𑀲𑀺𑀬𑀸, 𑀭𑀽𑀧𑀸𑀤𑀺𑀲𑀪𑀸𑀯𑀫𑁆𑀧𑀺 𑀉𑀧𑀸𑀤𑀸𑀦𑀁 𑀲𑀺𑀬𑀸. 𑀬𑀤𑀺 𑀅𑀜𑁆𑀜𑀢𑁆𑀭 𑀲𑀺𑀬𑀸, 𑀧𑀭𑀲𑀫𑀬𑁂 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑁄 𑀅𑀦𑀼𑀲𑀬𑁄 𑀯𑀺𑀬 𑀧𑀡𑁆𑀡𑀢𑁆𑀢𑀺 𑀯𑀺𑀬 𑀦𑀺𑀩𑁆𑀩𑀸𑀦𑀁 𑀯𑀺𑀬 𑀘 𑀔𑀦𑁆𑀥𑀯𑀺𑀦𑀺𑀫𑀼𑀢𑁆𑀢𑀁 𑀯𑀸 𑀲𑀺𑀬𑀸, 𑀙𑀝𑁆𑀞𑁄 𑀯𑀸 𑀔𑀦𑁆𑀥𑁄 𑀧𑀜𑁆𑀜𑀧𑁂𑀢𑀩𑁆𑀩𑁄 𑀪𑀯𑁂𑀬𑁆𑀬, 𑀢𑀲𑁆𑀫𑀸 𑀏𑀯𑀁 𑀩𑁆𑀬𑀸𑀓𑀸𑀲𑀺. 𑀢𑀲𑁆𑀲𑀸 𑀩𑁆𑀬𑀸𑀓𑀭𑀡𑀁 𑀲𑀼𑀢𑁆𑀯𑀸 ‘‘𑀅𑀥𑀺𑀕𑀢𑀧𑀢𑀺𑀝𑁆𑀞𑀸 𑀅𑀬’’𑀦𑁆𑀢𑀺 𑀯𑀺𑀲𑀸𑀔𑁄 𑀦𑀺𑀝𑁆𑀞𑀫𑀕𑀫𑀸𑀲𑀺. 𑀦 𑀳𑀺 𑀲𑀓𑁆𑀓𑀸 𑀅𑀔𑀻𑀡𑀸𑀲𑀯𑁂𑀦 𑀅𑀲𑀫𑁆𑀩𑀤𑁆𑀥𑁂𑀦 𑀅𑀯𑀺𑀢𑁆𑀣𑀸𑀬𑀦𑁆𑀢𑁂𑀦 𑀧𑀤𑀻𑀧𑀲𑀳𑀲𑁆𑀲𑀁 𑀚𑀸𑀮𑁂𑀦𑁆𑀢𑁂𑀦 𑀯𑀺𑀬 𑀏𑀯𑀭𑀽𑀧𑁄 𑀕𑀼𑀴𑁆𑀳𑁄 𑀧𑀝𑀺𑀘𑁆𑀙𑀦𑁆𑀦𑁄 𑀢𑀺𑀮𑀓𑁆𑀔𑀡𑀸𑀳𑀢𑁄 𑀕𑀫𑁆𑀪𑀻𑀭𑁄 𑀧𑀜𑁆𑀳𑁄 𑀯𑀺𑀲𑁆𑀲𑀚𑁆𑀚𑁂𑀢𑀼𑀁. 𑀦𑀺𑀝𑁆𑀞𑀁 𑀕𑀦𑁆𑀢𑁆𑀯𑀸 𑀧𑀦, ‘‘𑀅𑀬𑀁 𑀥𑀫𑁆𑀫𑀤𑀺𑀦𑁆𑀦𑀸 𑀲𑀸𑀲𑀦𑁂 𑀮𑀤𑁆𑀥𑀧𑀢𑀺𑀝𑁆𑀞𑀸 𑀅𑀥𑀺𑀕𑀢𑀧𑀝𑀺𑀲𑀫𑁆𑀪𑀺𑀤𑀸 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑀸 𑀪𑀯𑀫𑀢𑁆𑀣𑀓𑁂 𑀞𑀺𑀢𑀸 𑀫𑀳𑀸𑀔𑀻𑀡𑀸𑀲𑀯𑀸, 𑀲𑀫𑀢𑁆𑀣𑀸 𑀫𑀬𑁆𑀳𑀁 𑀧𑀼𑀘𑁆𑀙𑀺𑀢𑀧𑀜𑁆𑀳𑀁 𑀓𑀣𑁂𑀢𑀼𑀁, 𑀇𑀤𑀸𑀦𑀺 𑀧𑀦 𑀦𑀁 𑀑𑀯𑀢𑁆𑀢𑀺𑀓𑀲𑀸𑀭𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀁 𑀧𑀼𑀘𑁆𑀙𑀦𑁆𑀢𑁄, 𑀓𑀣𑀁 𑀧𑀦𑀸𑀬𑁆𑀬𑁂𑀢𑀺𑀆𑀤𑀺𑀫𑀸𑀳.

𑁪𑁬𑁧. 𑀢𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑁂 𑀅𑀲𑁆𑀲𑀼𑀢𑀯𑀸𑀢𑀺𑀆𑀤𑀺 𑀫𑀽𑀮𑀧𑀭𑀺𑀬𑀸𑀬𑁂 𑀯𑀺𑀢𑁆𑀣𑀸𑀭𑀺𑀢𑀫𑁂𑀯. 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻𑀢𑀺, ‘‘𑀇𑀥𑁂𑀓𑀘𑁆𑀘𑁄 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. 𑀬𑀁 𑀭𑀽𑀧𑀁 𑀲𑁄 𑀅𑀳𑀁, 𑀬𑁄 𑀅𑀳𑀁 𑀢𑀁 𑀭𑀽𑀧𑀦𑁆𑀢𑀺 𑀭𑀽𑀧𑀜𑁆𑀘 𑀅𑀢𑁆𑀢𑀜𑁆𑀘 𑀅𑀤𑁆𑀯𑀬𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀢𑁂𑀮𑀧𑁆𑀧𑀤𑀻𑀧𑀲𑁆𑀲 𑀛𑀸𑀬𑀢𑁄 𑀬𑀸 𑀅𑀘𑁆𑀘𑀺 𑀲𑁄 𑀯𑀡𑁆𑀡𑁄, 𑀬𑁄 𑀯𑀡𑁆𑀡𑁄 𑀲𑀸 𑀅𑀘𑁆𑀘𑀻𑀢𑀺 𑀅𑀘𑁆𑀘𑀺𑀜𑁆𑀘 𑀯𑀡𑁆𑀡𑀜𑁆𑀘 𑀅𑀤𑁆𑀯𑀬𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀏𑀯𑀫𑁂𑀯 𑀇𑀥𑁂𑀓𑀘𑁆𑀘𑁄 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺…𑀧𑁂… 𑀅𑀤𑁆𑀯𑀬𑀁 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺 (𑀧𑀝𑀺. 𑀫. 𑁧.𑁧𑁩𑁧) 𑀏𑀯𑀁 𑀭𑀽𑀧𑀁 𑀅𑀢𑁆𑀢𑀸𑀢𑀺 𑀤𑀺𑀝𑁆𑀞𑀺𑀧𑀲𑁆𑀲𑀦𑀸𑀬 𑀧𑀲𑁆𑀲𑀢𑀺. 𑀭𑀽𑀧𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀦𑁆𑀢𑀺 𑀅𑀭𑀽𑀧𑀁 𑀅𑀢𑁆𑀢𑀸𑀢𑀺 𑀕𑀳𑁂𑀢𑁆𑀯𑀸 𑀙𑀸𑀬𑀸𑀯𑀦𑁆𑀢𑀁 𑀭𑀼𑀓𑁆𑀔𑀁 𑀯𑀺𑀬 𑀢𑀁 𑀅𑀢𑁆𑀢𑀸𑀦𑀁 𑀭𑀽𑀧𑀯𑀦𑁆𑀢𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀅𑀢𑁆𑀢𑀦𑀺 𑀯𑀸 𑀭𑀽𑀧𑀦𑁆𑀢𑀺 𑀅𑀭𑀽𑀧𑀫𑁂𑀯 𑀅𑀢𑁆𑀢𑀸𑀢𑀺 𑀕𑀳𑁂𑀢𑁆𑀯𑀸 𑀧𑀼𑀧𑁆𑀨𑀲𑁆𑀫𑀺𑀁 𑀕𑀦𑁆𑀥𑀁 𑀯𑀺𑀬 𑀅𑀢𑁆𑀢𑀦𑀺 𑀭𑀽𑀧𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀭𑀽𑀧𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀦𑁆𑀢𑀺 𑀅𑀭𑀽𑀧𑀫𑁂𑀯 𑀅𑀢𑁆𑀢𑀸𑀢𑀺 𑀕𑀳𑁂𑀢𑁆𑀯𑀸 𑀓𑀭𑀡𑁆𑀟𑀸𑀬 𑀫𑀡𑀺𑀁 𑀯𑀺𑀬 𑀅𑀢𑁆𑀢𑀸𑀦𑀁 𑀭𑀽𑀧𑀲𑁆𑀫𑀺𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀯𑁂𑀤𑀦𑀁 𑀅𑀢𑁆𑀢𑀢𑁄𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀢𑀢𑁆𑀣, 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻𑀢𑀺 𑀲𑀼𑀤𑁆𑀥𑀭𑀽𑀧𑀫𑁂𑀯 𑀅𑀢𑁆𑀢𑀸𑀢𑀺 𑀓𑀣𑀺𑀢𑀁. 𑀭𑀽𑀧𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁, 𑀅𑀢𑁆𑀢𑀦𑀺 𑀯𑀸 𑀭𑀽𑀧𑀁, 𑀭𑀽𑀧𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁. 𑀯𑁂𑀤𑀦𑀁 𑀅𑀢𑁆𑀢𑀢𑁄… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻𑀢𑀺 𑀇𑀫𑁂𑀲𑀼 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀅𑀭𑀽𑀧𑀁 𑀅𑀢𑁆𑀢𑀸𑀢𑀺 𑀓𑀣𑀺𑀢𑀁. 𑀯𑁂𑀤𑀦𑀸𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁, 𑀅𑀢𑁆𑀢𑀦𑀺 𑀯𑀸 𑀯𑁂𑀤𑀦𑀁, 𑀯𑁂𑀤𑀦𑀸𑀬 𑀯𑀸 𑀅𑀢𑁆𑀢𑀸𑀦𑀦𑁆𑀢𑀺 𑀏𑀯𑀁 𑀘𑀢𑀽𑀲𑀼 𑀔𑀦𑁆𑀥𑁂𑀲𑀼 𑀢𑀺𑀡𑁆𑀡𑀁 𑀢𑀺𑀡𑁆𑀡𑀁 𑀯𑀲𑁂𑀦 𑀤𑁆𑀯𑀸𑀤𑀲𑀲𑀼 𑀞𑀸𑀦𑁂𑀲𑀼 𑀭𑀽𑀧𑀸𑀭𑀽𑀧𑀫𑀺𑀲𑁆𑀲𑀓𑁄 𑀅𑀢𑁆𑀢𑀸 𑀓𑀣𑀺𑀢𑁄. 𑀢𑀢𑁆𑀣 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺… 𑀯𑁂𑀤𑀦𑀁… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻𑀢𑀺 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀉𑀘𑁆𑀙𑁂𑀤𑀤𑀺𑀝𑁆𑀞𑀺 𑀓𑀣𑀺𑀢𑀸, 𑀅𑀯𑀲𑁂𑀲𑁂𑀲𑀼 𑀲𑀲𑁆𑀲𑀢𑀤𑀺𑀝𑁆𑀞𑀻𑀢𑀺. 𑀏𑀯𑀫𑁂𑀢𑁆𑀣 𑀧𑀦𑁆𑀦𑀭𑀲 𑀪𑀯𑀤𑀺𑀝𑁆𑀞𑀺𑀬𑁄, 𑀧𑀜𑁆𑀘 𑀯𑀺𑀪𑀯𑀤𑀺𑀝𑁆𑀞𑀺𑀬𑁄 𑀳𑁄𑀦𑁆𑀢𑀺. 𑀦 𑀭𑀽𑀧𑀁 𑀅𑀢𑁆𑀢𑀢𑁄𑀢𑀺 𑀏𑀢𑁆𑀣 𑀭𑀽𑀧𑀁 𑀅𑀢𑁆𑀢𑀸𑀢𑀺 𑀦 𑀲𑀫𑀦𑀼𑀧𑀲𑁆𑀲𑀢𑀺. 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸𑀢𑀺 𑀧𑀦 𑀲𑀫𑀦𑀼𑀧𑀲𑁆𑀲𑀢𑀺. 𑀦 𑀭𑀽𑀧𑀯𑀦𑁆𑀢𑀁 𑀅𑀢𑁆𑀢𑀸𑀦𑀁…𑀧𑁂… 𑀦 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀅𑀢𑁆𑀢𑀸𑀦𑀦𑁆𑀢𑀺 𑀇𑀫𑁂 𑀧𑀜𑁆𑀘𑀓𑁆𑀔𑀦𑁆𑀥𑁂 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀅𑀢𑁆𑀢𑀢𑁄 𑀦 𑀲𑀫𑀦𑀼𑀧𑀲𑁆𑀲𑀢𑀺, 𑀲𑀩𑁆𑀩𑀸𑀓𑀸𑀭𑁂𑀦 𑀧𑀦 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀅𑀦𑀢𑁆𑀢𑀸𑀢𑀺 𑀲𑀫𑀦𑀼𑀧𑀲𑁆𑀲𑀢𑀺.

𑀏𑀢𑁆𑀢𑀸𑀯𑀢𑀸 𑀣𑁂𑀭𑀺𑀬𑀸, ‘‘𑀏𑀯𑀁 𑀔𑁄, 𑀆𑀯𑀼𑀲𑁄 𑀯𑀺𑀲𑀸𑀔, 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀳𑁄𑀢𑀻’’𑀢𑀺 𑀏𑀯𑀁 𑀧𑀼𑀭𑀺𑀫𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺𑀬𑀸 𑀏𑀢𑁆𑀢𑀓𑁂𑀦 𑀕𑀫𑀦𑀁 𑀳𑁄𑀢𑀺, 𑀆𑀕𑀫𑀦𑀁 𑀳𑁄𑀢𑀺, 𑀕𑀫𑀦𑀸𑀕𑀫𑀦𑀁 𑀳𑁄𑀢𑀺, 𑀯𑀝𑁆𑀝𑀁 𑀯𑀢𑁆𑀢𑀢𑀻𑀢𑀺 𑀯𑀝𑁆𑀝𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀤𑀲𑁆𑀲𑀺𑀢𑀁. 𑀏𑀯𑀁 𑀔𑁄, 𑀆𑀯𑀼𑀲𑁄 𑀯𑀺𑀲𑀸𑀔, 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀦 𑀳𑁄𑀢𑀻𑀢𑀺 𑀧𑀘𑁆𑀙𑀺𑀫𑀁 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺𑀬𑀸 𑀏𑀢𑁆𑀢𑀓𑁂𑀦 𑀕𑀫𑀦𑀁 𑀦 𑀳𑁄𑀢𑀺, 𑀆𑀕𑀫𑀦𑀁 𑀦 𑀳𑁄𑀢𑀺, 𑀕𑀫𑀦𑀸𑀕𑀫𑀦𑀁 𑀦 𑀳𑁄𑀢𑀺, 𑀯𑀝𑁆𑀝𑀁 𑀦𑀸𑀫 𑀦 𑀯𑀢𑁆𑀢𑀢𑀻𑀢𑀺 𑀯𑀺𑀯𑀝𑁆𑀝𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀤𑀲𑁆𑀲𑀺𑀢𑀁.

𑁪𑁬𑁨. 𑀓𑀢𑀫𑁄 𑀧𑀦𑀸𑀬𑁆𑀬𑁂, 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄𑀢𑀺 𑀅𑀬𑀁 𑀧𑀜𑁆𑀳𑁄 𑀣𑁂𑀭𑀺𑀬𑀸 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑁄 𑀪𑀯𑁂𑀬𑁆𑀬 𑁋 ‘‘𑀉𑀧𑀸𑀲𑀓, 𑀢𑀬𑀸 𑀳𑁂𑀝𑁆𑀞𑀸 𑀫𑀕𑁆𑀕𑁄 𑀧𑀼𑀘𑁆𑀙𑀺𑀢𑁄, 𑀇𑀥 𑀓𑀲𑁆𑀫𑀸 𑀫𑀕𑁆𑀕𑀫𑁂𑀯 𑀧𑀼𑀘𑁆𑀙𑀲𑀻’’𑀢𑀺. 𑀲𑀸 𑀧𑀦 𑀅𑀢𑁆𑀢𑀦𑁄 𑀩𑁆𑀬𑀢𑁆𑀢𑀢𑀸𑀬 𑀧𑀡𑁆𑀟𑀺𑀘𑁆𑀘𑁂𑀦 𑀢𑀲𑁆𑀲 𑀅𑀥𑀺𑀧𑁆𑀧𑀸𑀬𑀁 𑀲𑀮𑁆𑀮𑀓𑁆𑀔𑁂𑀲𑀺 𑁋 ‘‘𑀇𑀫𑀺𑀦𑀸 𑀉𑀧𑀸𑀲𑀓𑁂𑀦 𑀳𑁂𑀝𑁆𑀞𑀸 𑀧𑀝𑀺𑀧𑀢𑁆𑀢𑀺𑀯𑀲𑁂𑀦 𑀫𑀕𑁆𑀕𑁄 𑀧𑀼𑀘𑁆𑀙𑀺𑀢𑁄 𑀪𑀯𑀺𑀲𑁆𑀲𑀢𑀺, 𑀇𑀥 𑀧𑀦 𑀢𑀁 𑀲𑀗𑁆𑀔𑀢𑀸𑀲𑀗𑁆𑀔𑀢𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀗𑁆𑀕𑀳𑀺𑀢𑀸𑀲𑀗𑁆𑀕𑀳𑀺𑀢𑀯𑀲𑁂𑀦 𑀧𑀼𑀘𑁆𑀙𑀺𑀢𑀼𑀓𑀸𑀫𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀢𑀲𑁆𑀫𑀸 𑀅𑀧𑁆𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸𑀯 𑀬𑀁 𑀬𑀁 𑀧𑀼𑀘𑁆𑀙𑀺, 𑀢𑀁 𑀢𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀢𑀢𑁆𑀣 𑀲𑀗𑁆𑀔𑀢𑁄𑀢𑀺 𑀘𑁂𑀢𑀺𑀢𑁄 𑀓𑀧𑁆𑀧𑀺𑀢𑁄 𑀧𑀓𑀧𑁆𑀧𑀺𑀢𑁄 𑀆𑀬𑀽𑀳𑀺𑀢𑁄 𑀓𑀢𑁄 𑀦𑀺𑀩𑁆𑀩𑀢𑁆𑀢𑀺𑀢𑁄 𑀲𑀫𑀸𑀧𑀚𑁆𑀚𑀦𑁆𑀢𑁂𑀦 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑁄. 𑀢𑀻𑀳𑀺 𑀘 𑀔𑁄, 𑀆𑀯𑀼𑀲𑁄 𑀯𑀺𑀲𑀸𑀔, 𑀔𑀦𑁆𑀥𑁂𑀳𑀺 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀲𑀗𑁆𑀕𑀳𑀺𑀢𑁄𑀢𑀺 𑀏𑀢𑁆𑀣 𑀬𑀲𑁆𑀫𑀸 𑀫𑀕𑁆𑀕𑁄 𑀲𑀧𑁆𑀧𑀤𑁂𑀲𑁄, 𑀢𑀬𑁄 𑀔𑀦𑁆𑀥𑀸 𑀦𑀺𑀧𑁆𑀧𑀤𑁂𑀲𑀸, 𑀢𑀲𑁆𑀫𑀸 𑀅𑀬𑀁 𑀲𑀧𑁆𑀧𑀤𑁂𑀲𑀢𑁆𑀢𑀸 𑀦𑀕𑀭𑀁 𑀯𑀺𑀬 𑀭𑀚𑁆𑀚𑁂𑀦 𑀦𑀺𑀧𑁆𑀧𑀤𑁂𑀲𑁂𑀳𑀺 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢𑁄. 𑀢𑀢𑁆𑀣 𑀲𑀫𑁆𑀫𑀸𑀯𑀸𑀘𑀸𑀤𑀬𑁄 𑀢𑀬𑁄 𑀲𑀻𑀮𑀫𑁂𑀯, 𑀢𑀲𑁆𑀫𑀸 𑀢𑁂 𑀲𑀚𑀸𑀢𑀺𑀢𑁄 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀗𑁆𑀕𑀳𑀺𑀢𑀸𑀢𑀺. 𑀓𑀺𑀜𑁆𑀘𑀸𑀧𑀺 𑀳𑀺 𑀧𑀸𑀴𑀺𑀬𑀁 𑀲𑀻𑀮𑀓𑁆𑀔𑀦𑁆𑀥𑁂𑀢𑀺 𑀪𑀼𑀫𑁆𑀫𑁂𑀦 𑀯𑀺𑀬 𑀦𑀺𑀤𑁆𑀤𑁂𑀲𑁄 𑀓𑀢𑁄, 𑀅𑀢𑁆𑀣𑁄 𑀧𑀦 𑀓𑀭𑀡𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀲𑀫𑁆𑀫𑀸𑀯𑀸𑀬𑀸𑀫𑀸𑀤𑀻𑀲𑀼 𑀧𑀦 𑀢𑀻𑀲𑀼 𑀲𑀫𑀸𑀥𑀺 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀆𑀭𑀫𑁆𑀫𑀡𑁂 𑀏𑀓𑀕𑁆𑀕𑀪𑀸𑀯𑁂𑀦 𑀅𑀧𑁆𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀯𑀻𑀭𑀺𑀬𑁂 𑀧𑀦 𑀧𑀕𑁆𑀕𑀳𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑁂 𑀲𑀢𑀺𑀬𑀸 𑀘 𑀅𑀧𑀺𑀮𑀸𑀧𑀦𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑀺𑀬𑀸 𑀮𑀤𑁆𑀥𑀽𑀧𑀓𑀸𑀭𑁄 𑀳𑀼𑀢𑁆𑀯𑀸 𑀲𑀓𑁆𑀓𑁄𑀢𑀺.

𑀢𑀢𑁆𑀭𑀸𑀬𑀁 𑀉𑀧𑀫𑀸 𑁋 𑀬𑀣𑀸 𑀳𑀺 ‘‘𑀦𑀓𑁆𑀔𑀢𑁆𑀢𑀁 𑀓𑀻𑀴𑀺𑀲𑁆𑀲𑀸𑀫𑀸’’𑀢𑀺 𑀉𑀬𑁆𑀬𑀸𑀦𑀁 𑀧𑀯𑀺𑀝𑁆𑀞𑁂𑀲𑀼 𑀢𑀻𑀲𑀼 𑀲𑀳𑀸𑀬𑁂𑀲𑀼 𑀏𑀓𑁄 𑀲𑀼𑀧𑀼𑀧𑁆𑀨𑀺𑀢𑀁 𑀘𑀫𑁆𑀧𑀓𑀭𑀼𑀓𑁆𑀔𑀁 𑀤𑀺𑀲𑁆𑀯𑀸 𑀳𑀢𑁆𑀣𑀁 𑀉𑀓𑁆𑀔𑀺𑀧𑀺𑀢𑁆𑀯𑀸𑀧𑀺 𑀕𑀳𑁂𑀢𑀼𑀁 𑀦 𑀲𑀓𑁆𑀓𑀼𑀡𑁂𑀬𑁆𑀬. 𑀅𑀣𑀲𑁆𑀲 𑀤𑀼𑀢𑀺𑀬𑁄 𑀑𑀦𑀫𑀺𑀢𑁆𑀯𑀸 𑀧𑀺𑀝𑁆𑀞𑀺𑀁 𑀤𑀤𑁂𑀬𑁆𑀬, 𑀲𑁄 𑀢𑀲𑁆𑀲 𑀧𑀺𑀝𑁆𑀞𑀺𑀬𑀁 𑀞𑀢𑁆𑀯𑀸𑀧𑀺 𑀓𑀫𑁆𑀧𑀫𑀸𑀦𑁄 𑀕𑀳𑁂𑀢𑀼𑀁 𑀦 𑀲𑀓𑁆𑀓𑀼𑀡𑁂𑀬𑁆𑀬. 𑀅𑀣𑀲𑁆𑀲 𑀇𑀢𑀭𑁄 𑀅𑀁𑀲𑀓𑀽𑀝𑀁 𑀉𑀧𑀦𑀸𑀫𑁂𑀬𑁆𑀬, 𑀲𑁄 𑀏𑀓𑀲𑁆𑀲 𑀧𑀺𑀝𑁆𑀞𑀺𑀬𑀁 𑀞𑀢𑁆𑀯𑀸 𑀏𑀓𑀲𑁆𑀲 𑀅𑀁𑀲𑀓𑀽𑀝𑀁 𑀑𑀮𑀼𑀩𑁆𑀪 𑀬𑀣𑀸𑀭𑀼𑀘𑀺 𑀧𑀼𑀧𑁆𑀨𑀸𑀦𑀺 𑀑𑀘𑀺𑀦𑀺𑀢𑁆𑀯𑀸 𑀧𑀺𑀴𑀦𑁆𑀥𑀺𑀢𑁆𑀯𑀸 𑀦𑀓𑁆𑀔𑀢𑁆𑀢𑀁 𑀓𑀻𑀴𑁂𑀬𑁆𑀬. 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁. 𑀏𑀓𑀢𑁄 𑀉𑀬𑁆𑀬𑀸𑀦𑀁 𑀧𑀯𑀺𑀝𑁆𑀞𑀸 𑀢𑀬𑁄 𑀲𑀳𑀸𑀬𑀓𑀸 𑀯𑀺𑀬 𑀳𑀺 𑀏𑀓𑀢𑁄 𑀚𑀸𑀢𑀸 𑀲𑀫𑁆𑀫𑀸𑀯𑀸𑀬𑀸𑀫𑀸𑀤𑀬𑁄 𑀢𑀬𑁄 𑀥𑀫𑁆𑀫𑀸. 𑀲𑀼𑀧𑀼𑀧𑁆𑀨𑀺𑀢𑀘𑀫𑁆𑀧𑀓𑁄 𑀯𑀺𑀬 𑀆𑀭𑀫𑁆𑀫𑀡𑀁. 𑀳𑀢𑁆𑀣𑀁 𑀉𑀓𑁆𑀔𑀺𑀧𑀺𑀢𑁆𑀯𑀸𑀧𑀺 𑀕𑀳𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀯𑀺𑀬 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀆𑀭𑀫𑁆𑀫𑀡𑁂 𑀏𑀓𑀕𑁆𑀕𑀪𑀸𑀯𑁂𑀦 𑀅𑀧𑁆𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀲𑀫𑀸𑀥𑀺. 𑀧𑀺𑀝𑁆𑀞𑀺𑀁 𑀤𑀢𑁆𑀯𑀸 𑀑𑀦𑀢𑀲𑀳𑀸𑀬𑁄 𑀯𑀺𑀬 𑀯𑀸𑀬𑀸𑀫𑁄. 𑀅𑀁𑀲𑀓𑀽𑀝𑀁 𑀤𑀢𑁆𑀯𑀸 𑀞𑀺𑀢𑀲𑀳𑀸𑀬𑁄 𑀯𑀺𑀬 𑀲𑀢𑀺. 𑀬𑀣𑀸 𑀢𑁂𑀲𑀼 𑀏𑀓𑀲𑁆𑀲 𑀧𑀺𑀝𑁆𑀞𑀺𑀬𑀁 𑀞𑀢𑁆𑀯𑀸 𑀏𑀓𑀲𑁆𑀲 𑀅𑀁𑀲𑀓𑀽𑀝𑀁 𑀑𑀮𑀼𑀩𑁆𑀪 𑀇𑀢𑀭𑁄 𑀬𑀣𑀸𑀭𑀼𑀘𑀺 𑀧𑀼𑀧𑁆𑀨𑀁 𑀕𑀳𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀏𑀯𑀫𑁂𑀯𑀁 𑀯𑀻𑀭𑀺𑀬𑁂 𑀧𑀕𑁆𑀕𑀳𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑁂, 𑀲𑀢𑀺𑀬𑀸 𑀘 𑀅𑀧𑀺𑀮𑀸𑀧𑀦𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑀺𑀬𑀸 𑀮𑀤𑁆𑀥𑀼𑀧𑀓𑀸𑀭𑁄 𑀲𑀫𑀸𑀥𑀺 𑀲𑀓𑁆𑀓𑁄𑀢𑀺 𑀆𑀭𑀫𑁆𑀫𑀡𑁂 𑀏𑀓𑀕𑁆𑀕𑀪𑀸𑀯𑁂𑀦 𑀅𑀧𑁆𑀧𑁂𑀢𑀼𑀁. 𑀢𑀲𑁆𑀫𑀸 𑀲𑀫𑀸𑀥𑀺𑀬𑁂𑀯𑁂𑀢𑁆𑀣 𑀲𑀚𑀸𑀢𑀺𑀢𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑁂𑀦 𑀲𑀗𑁆𑀕𑀳𑀺𑀢𑁄. 𑀯𑀸𑀬𑀸𑀫𑀲𑀢𑀺𑀬𑁄 𑀧𑀦 𑀓𑀺𑀭𑀺𑀬𑀢𑁄 𑀲𑀗𑁆𑀕𑀳𑀺𑀢𑀸 𑀳𑁄𑀦𑁆𑀢𑀺.

𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁂𑀲𑀼𑀧𑀺 𑀧𑀜𑁆𑀜𑀸 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸𑀢𑀺 𑀆𑀭𑀫𑁆𑀫𑀡𑀁 𑀦𑀺𑀘𑁆𑀙𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀯𑀺𑀢𑀓𑁆𑀓𑁂 𑀧𑀦 𑀆𑀓𑁄𑀝𑁂𑀢𑁆𑀯𑀸 𑀆𑀓𑁄𑀝𑁂𑀢𑁆𑀯𑀸 𑀤𑁂𑀦𑁆𑀢𑁂 𑀲𑀓𑁆𑀓𑁄𑀢𑀺. 𑀓𑀣𑀁? 𑀬𑀣𑀸 𑀳𑀺 𑀳𑁂𑀭𑀜𑁆𑀜𑀺𑀓𑁄 𑀓𑀳𑀸𑀧𑀡𑀁 𑀳𑀢𑁆𑀣𑁂 𑀞𑀧𑁂𑀢𑁆𑀯𑀸 𑀲𑀩𑁆𑀩𑀪𑀸𑀕𑁂𑀲𑀼 𑀑𑀮𑁄𑀓𑁂𑀢𑀼𑀓𑀸𑀫𑁄 𑀲𑀫𑀸𑀦𑁄𑀧𑀺 𑀦 𑀘𑀓𑁆𑀔𑀼𑀤𑀮𑁂𑀦𑁂𑀯 𑀧𑀭𑀺𑀯𑀢𑁆𑀢𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀅𑀗𑁆𑀕𑀼𑀮𑀺𑀧𑀩𑁆𑀩𑁂𑀳𑀺 𑀧𑀦 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀑𑀮𑁄𑀓𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀏𑀯𑀫𑁂𑀯 𑀦 𑀧𑀜𑁆𑀜𑀸 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀆𑀭𑀫𑁆𑀫𑀡𑀁 𑀦𑀺𑀘𑁆𑀙𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀅𑀪𑀺𑀦𑀺𑀭𑁄𑀧𑀦𑀮𑀓𑁆𑀔𑀡𑁂𑀦 𑀧𑀦 𑀆𑀳𑀦𑀦𑀧𑀭𑀺𑀬𑀸𑀳𑀦𑀦𑀭𑀲𑁂𑀦 𑀯𑀺𑀢𑀓𑁆𑀓𑁂𑀦 𑀆𑀓𑁄𑀝𑁂𑀦𑁆𑀢𑁂𑀦 𑀯𑀺𑀬 𑀧𑀭𑀺𑀯𑀢𑁆𑀢𑁂𑀦𑁆𑀢𑁂𑀦 𑀯𑀺𑀬 𑀘 𑀆𑀤𑀸𑀬𑀸 𑀤𑀺𑀦𑁆𑀦𑀫𑁂𑀯 𑀯𑀺𑀦𑀺𑀘𑁆𑀙𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀢𑀲𑁆𑀫𑀸 𑀇𑀥𑀸𑀧𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑁂𑀯 𑀲𑀚𑀸𑀢𑀺𑀢𑁄 𑀧𑀜𑁆𑀜𑀸𑀓𑁆𑀔𑀦𑁆𑀥𑁂𑀦 𑀲𑀗𑁆𑀕𑀳𑀺𑀢𑀸. 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀧𑀦 𑀓𑀺𑀭𑀺𑀬𑀢𑁄 𑀲𑀗𑁆𑀕𑀳𑀺𑀢𑁄 𑀳𑁄𑀢𑀺. 𑀇𑀢𑀺 𑀇𑀫𑁂𑀳𑀺 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀫𑀕𑁆𑀕𑁄 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀢𑀻𑀳𑀺 𑀘 𑀔𑁄, 𑀆𑀯𑀼𑀲𑁄 𑀯𑀺𑀲𑀸𑀔, 𑀔𑀦𑁆𑀥𑁂𑀳𑀺 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀲𑀗𑁆𑀕𑀳𑀺𑀢𑁄’’𑀢𑀺.

𑀇𑀤𑀸𑀦𑀺 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀁 𑀫𑀕𑁆𑀕𑀲𑀫𑀸𑀥𑀺𑀁 𑀲𑀦𑀺𑀫𑀺𑀢𑁆𑀢𑀁 𑀲𑀧𑀭𑀺𑀓𑁆𑀔𑀸𑀭𑀁 𑀧𑀼𑀘𑁆𑀙𑀦𑁆𑀢𑁄, 𑀓𑀢𑀫𑁄 𑀧𑀦𑀸𑀬𑁆𑀬𑁂𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑁂 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀫𑀕𑁆𑀕𑀓𑁆𑀔𑀡𑁂 𑀘𑀢𑀼𑀓𑀺𑀘𑁆𑀘𑀲𑀸𑀥𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑀸 𑀲𑀢𑀺, 𑀲𑀸 𑀲𑀫𑀸𑀥𑀺𑀲𑁆𑀲 𑀧𑀘𑁆𑀘𑀬𑀢𑁆𑀣𑁂𑀦 𑀦𑀺𑀫𑀺𑀢𑁆𑀢𑀁. 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸 𑀘𑀢𑀼𑀓𑀺𑀘𑁆𑀘𑀲𑀸𑀥𑀦𑀯𑀲𑁂𑀦𑁂𑀯 𑀉𑀧𑁆𑀧𑀦𑁆𑀦𑀁 𑀯𑀻𑀭𑀺𑀬𑀁, 𑀢𑀁 𑀧𑀭𑀺𑀯𑀸𑀭𑀝𑁆𑀞𑁂𑀦 𑀧𑀭𑀺𑀓𑁆𑀔𑀸𑀭𑁄 𑀳𑁄𑀢𑀺. 𑀢𑁂𑀲𑀁𑀬𑁂𑀯 𑀥𑀫𑁆𑀫𑀸𑀦𑀦𑁆𑀢𑀺 𑀢𑁂𑀲𑀁 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁. 𑀆𑀲𑁂𑀯𑀦𑀸𑀢𑀺𑀆𑀤𑀻𑀲𑀼 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀸𑀬𑁂𑀯 𑀆𑀲𑁂𑀯𑀦𑀸𑀤𑀬𑁄 𑀯𑀼𑀢𑁆𑀢𑀸𑀢𑀺.

𑀯𑀺𑀢𑀡𑁆𑀟𑀯𑀸𑀤𑀻 𑀧𑀦, ‘‘𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑁄 𑀦𑀸𑀫 𑀫𑀕𑁆𑀕𑁄 𑀦𑀢𑁆𑀣𑀺, ‘𑀏𑀯𑀁 𑀪𑀸𑀯𑁂𑀬𑁆𑀬 𑀲𑀢𑁆𑀢 𑀯𑀲𑁆𑀲𑀸𑀦𑀻’𑀢𑀺 𑀳𑀺 𑀯𑀘𑀦𑀢𑁄 𑀲𑀢𑁆𑀢𑀧𑀺 𑀯𑀲𑁆𑀲𑀸𑀦𑀺 𑀫𑀕𑁆𑀕𑀪𑀸𑀯𑀦𑀸 𑀳𑁄𑀢𑀺, 𑀓𑀺𑀮𑁂𑀲𑀸 𑀧𑀦 𑀮𑀳𑀼 𑀙𑀺𑀚𑁆𑀚𑀦𑁆𑀢𑀸 𑀲𑀢𑁆𑀢𑀳𑀺 𑀜𑀸𑀡𑁂𑀳𑀺 𑀙𑀺𑀚𑁆𑀚𑀦𑁆𑀢𑀻’’𑀢𑀺 𑀯𑀤𑀢𑀺. 𑀲𑁄 ‘‘𑀲𑀼𑀢𑁆𑀢𑀁 𑀆𑀳𑀭𑀸’’𑀢𑀺 𑀯𑀢𑁆𑀢𑀩𑁆𑀩𑁄. 𑀅𑀤𑁆𑀥𑀸 𑀅𑀜𑁆𑀜𑀁 𑀅𑀧𑀲𑁆𑀲𑀦𑁆𑀢𑁄, ‘‘𑀬𑀸 𑀢𑁂𑀲𑀁𑀬𑁂𑀯 𑀥𑀫𑁆𑀫𑀸𑀦𑀁 𑀆𑀲𑁂𑀯𑀦𑀸 𑀪𑀸𑀯𑀦𑀸 𑀩𑀳𑀼𑀮𑀻𑀓𑀫𑁆𑀫’’𑀦𑁆𑀢𑀺 𑀇𑀤𑀫𑁂𑀯 𑀲𑀼𑀢𑁆𑀢𑀁 𑀆𑀳𑀭𑀺𑀢𑁆𑀯𑀸, ‘‘𑀅𑀜𑁆𑀜𑁂𑀦 𑀘𑀺𑀢𑁆𑀢𑁂𑀦 𑀆𑀲𑁂𑀯𑀢𑀺, 𑀅𑀜𑁆𑀜𑁂𑀦 𑀪𑀸𑀯𑁂𑀢𑀺, 𑀅𑀜𑁆𑀜𑁂𑀦 𑀩𑀳𑀼𑀮𑀻𑀓𑀭𑁄𑀢𑀻’’𑀢𑀺 𑀯𑀓𑁆𑀔𑀢𑀺. 𑀢𑀢𑁄 𑀯𑀢𑁆𑀢𑀩𑁆𑀩𑁄 𑁋 ‘‘𑀓𑀺𑀁 𑀧𑀦𑀺𑀤𑀁, 𑀲𑀼𑀢𑁆𑀢𑀁 𑀦𑁂𑀬𑁆𑀬𑀢𑁆𑀣𑀁 𑀦𑀻𑀢𑀢𑁆𑀣’’𑀦𑁆𑀢𑀺. 𑀢𑀢𑁄 𑀯𑀓𑁆𑀔𑀢𑀺 𑁋 ‘‘𑀦𑀻𑀢𑀢𑁆𑀣𑀁 𑀬𑀣𑀸 𑀲𑀼𑀢𑁆𑀢𑀁 𑀢𑀣𑁂𑀯 𑀅𑀢𑁆𑀣𑁄’’𑀢𑀺. 𑀢𑀲𑁆𑀲 𑀇𑀤𑀁 𑀉𑀢𑁆𑀢𑀭𑀁 𑁋 𑀏𑀯𑀁 𑀲𑀦𑁆𑀢𑁂 𑀏𑀓𑀁 𑀘𑀺𑀢𑁆𑀢𑀁 𑀆𑀲𑁂𑀯𑀫𑀸𑀦𑀁 𑀉𑀧𑁆𑀧𑀦𑁆𑀦𑀁, 𑀅𑀧𑀭𑀫𑁆𑀧𑀺 𑀆𑀲𑁂𑀯𑀫𑀸𑀦𑀁, 𑀅𑀧𑀭𑀫𑁆𑀧𑀺 𑀆𑀲𑁂𑀯𑀫𑀸𑀦𑀦𑁆𑀢𑀺 𑀏𑀯𑀁 𑀤𑀺𑀯𑀲𑀫𑁆𑀧𑀺 𑀆𑀲𑁂𑀯𑀦𑀸𑀯 𑀪𑀯𑀺𑀲𑁆𑀲𑀢𑀺, 𑀓𑀼𑀢𑁄 𑀪𑀸𑀯𑀦𑀸, 𑀓𑀼𑀢𑁄 𑀩𑀳𑀼𑀮𑀻𑀓𑀫𑁆𑀫𑀁? 𑀏𑀓𑀁 𑀯𑀸 𑀪𑀸𑀯𑀬𑀫𑀸𑀦𑀁 𑀉𑀧𑁆𑀧𑀦𑁆𑀦𑀁 𑀅𑀧𑀭𑀫𑁆𑀧𑀺 𑀪𑀸𑀯𑀬𑀫𑀸𑀦𑀁 𑀅𑀧𑀭𑀫𑁆𑀧𑀺 𑀪𑀸𑀯𑀬𑀫𑀸𑀦𑀦𑁆𑀢𑀺 𑀏𑀯𑀁 𑀤𑀺𑀯𑀲𑀫𑁆𑀧𑀺 𑀪𑀸𑀯𑀦𑀸𑀯 𑀪𑀯𑀺𑀲𑁆𑀲𑀢𑀺, 𑀓𑀼𑀢𑁄 𑀆𑀲𑁂𑀯𑀦𑀸 𑀓𑀼𑀢𑁄 𑀩𑀳𑀼𑀮𑀻𑀓𑀫𑁆𑀫𑀁? 𑀏𑀓𑀁 𑀯𑀸 𑀩𑀳𑀼𑀮𑀻𑀓𑀭𑁄𑀦𑁆𑀢𑀁 𑀉𑀧𑁆𑀧𑀦𑁆𑀦𑀁, 𑀅𑀧𑀭𑀫𑁆𑀧𑀺 𑀩𑀳𑀼𑀮𑀻𑀓𑀭𑁄𑀦𑁆𑀢𑀁, 𑀅𑀧𑀭𑀫𑁆𑀧𑀺 𑀩𑀳𑀼𑀮𑀻𑀓𑀭𑁄𑀦𑁆𑀢𑀦𑁆𑀢𑀺 𑀏𑀯𑀁 𑀤𑀺𑀯𑀲𑀫𑁆𑀧𑀺 𑀩𑀳𑀼𑀮𑀻𑀓𑀫𑁆𑀫𑀫𑁂𑀯 𑀪𑀯𑀺𑀲𑁆𑀲𑀢𑀺 𑀓𑀼𑀢𑁄 𑀆𑀲𑁂𑀯𑀦𑀸, 𑀓𑀼𑀢𑁄 𑀪𑀸𑀯𑀦𑀸𑀢𑀺.

𑀅𑀣 𑀯𑀸 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀏𑀓𑁂𑀦 𑀘𑀺𑀢𑁆𑀢𑁂𑀦 𑀆𑀲𑁂𑀯𑀢𑀺, 𑀤𑁆𑀯𑀻𑀳𑀺 𑀪𑀸𑀯𑁂𑀢𑀺, 𑀢𑀻𑀳𑀺 𑀩𑀳𑀼𑀮𑀻𑀓𑀭𑁄𑀢𑀺. 𑀤𑁆𑀯𑀻𑀳𑀺 𑀯𑀸 𑀆𑀲𑁂𑀯𑀢𑀺, 𑀢𑀻𑀳𑀺 𑀪𑀸𑀯𑁂𑀢𑀺, 𑀏𑀓𑁂𑀦 𑀩𑀳𑀼𑀮𑀻𑀓𑀭𑁄𑀢𑀺. 𑀢𑀻𑀳𑀺 𑀯𑀸 𑀆𑀲𑁂𑀯𑀢𑀺, 𑀏𑀓𑁂𑀦 𑀪𑀸𑀯𑁂𑀢𑀺, 𑀤𑁆𑀯𑀻𑀳𑀺 𑀩𑀳𑀼𑀮𑀻𑀓𑀭𑁄𑀢𑀻’’𑀢𑀺. 𑀲𑁄 𑀯𑀢𑁆𑀢𑀩𑁆𑀩𑁄 𑁋 ‘‘𑀫𑀸 𑀲𑀼𑀢𑁆𑀢𑀁 𑀫𑁂 𑀮𑀤𑁆𑀥𑀦𑁆𑀢𑀺 𑀬𑀁 𑀯𑀸 𑀢𑀁 𑀯𑀸 𑀅𑀯𑀘. 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁂𑀦 𑀦𑀸𑀫 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀯𑀲𑀺𑀢𑁆𑀯𑀸 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀅𑀢𑁆𑀣𑀭𑀲𑀁 𑀯𑀺𑀤𑀺𑀢𑁆𑀯𑀸 𑀯𑀢𑁆𑀢𑀩𑁆𑀩𑀁 𑀳𑁄𑀢𑀺. 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀸𑀯 𑀅𑀬𑀁 𑀆𑀲𑁂𑀯𑀦𑀸, 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀸 𑀪𑀸𑀯𑀦𑀸, 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀁 𑀩𑀳𑀼𑀮𑀻𑀓𑀫𑁆𑀫𑀁. 𑀔𑀬𑀕𑀸𑀫𑀺𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄 𑀩𑀳𑀼𑀮𑀘𑀺𑀢𑁆𑀢𑀓𑁆𑀔𑀡𑀺𑀓𑁄 𑀦𑀸𑀫 𑀦𑀢𑁆𑀣𑀺, ‘𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑁄𑀬𑁂𑀯𑀸’𑀢𑀺 𑀲𑀜𑁆𑀜𑀸𑀧𑁂𑀢𑀩𑁆𑀩𑁄. 𑀲𑀘𑁂 𑀲𑀜𑁆𑀚𑀸𑀦𑀸𑀢𑀺, 𑀲𑀜𑁆𑀚𑀸𑀦𑀸𑀢𑀼, 𑀦𑁄 𑀘𑁂 𑀲𑀜𑁆𑀚𑀸𑀦𑀸𑀢𑀺, 𑀕𑀘𑁆𑀙 𑀧𑀸𑀢𑁄𑀯 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀬𑀸𑀕𑀼𑀁 𑀧𑀺𑀯𑀸𑀳𑀻’’𑀢𑀺 𑀉𑀬𑁆𑀬𑁄𑀚𑁂𑀢𑀩𑁆𑀩𑁄.

𑁪𑁬𑁩. 𑀓𑀢𑀺 𑀧𑀦𑀸𑀬𑁆𑀬𑁂 𑀲𑀗𑁆𑀔𑀸𑀭𑀸𑀢𑀺 𑀇𑀥 𑀓𑀺𑀁 𑀧𑀼𑀘𑁆𑀙𑀢𑀺? 𑀬𑁂 𑀲𑀗𑁆𑀔𑀸𑀭𑁂 𑀦𑀺𑀭𑁄𑀥𑁂𑀢𑁆𑀯𑀸 𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀢𑀺, 𑀢𑁂 𑀧𑀼𑀘𑁆𑀙𑀺𑀲𑁆𑀲𑀸𑀫𑀻𑀢𑀺 𑀧𑀼𑀘𑁆𑀙𑀢𑀺. 𑀢𑁂𑀦𑁂𑀯𑀲𑁆𑀲 𑀅𑀥𑀺𑀧𑁆𑀧𑀸𑀬𑀁 𑀜𑀢𑁆𑀯𑀸 𑀣𑁂𑀭𑀻, 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀻𑀲𑀼 𑀅𑀦𑁂𑀓𑁂𑀲𑀼 𑀲𑀗𑁆𑀔𑀸𑀭𑁂𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼𑀧𑀺, 𑀓𑀸𑀬𑀲𑀗𑁆𑀔𑀸𑀭𑀸𑀤𑀬𑁄𑀯 𑀆𑀘𑀺𑀓𑁆𑀔𑀦𑁆𑀢𑀻, 𑀢𑀬𑁄𑀫𑁂, 𑀆𑀯𑀼𑀲𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀸𑀬𑀧𑀝𑀺𑀩𑀤𑁆𑀥𑀢𑁆𑀢𑀸 𑀓𑀸𑀬𑁂𑀦 𑀲𑀗𑁆𑀔𑀭𑀻𑀬𑀢𑀺 𑀓𑀭𑀻𑀬𑀢𑀺 𑀦𑀺𑀩𑁆𑀩𑀢𑁆𑀢𑀻𑀬𑀢𑀻𑀢𑀺 𑀓𑀸𑀬𑀲𑀗𑁆𑀔𑀸𑀭𑁄. 𑀯𑀸𑀘𑀁 𑀲𑀗𑁆𑀔𑀭𑁄𑀢𑀺 𑀓𑀭𑁄𑀢𑀺 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀯𑀘𑀻𑀲𑀗𑁆𑀔𑀸𑀭𑁄. 𑀘𑀺𑀢𑁆𑀢𑀧𑀝𑀺𑀩𑀤𑁆𑀥𑀢𑁆𑀢𑀸 𑀘𑀺𑀢𑁆𑀢𑁂𑀦 𑀲𑀗𑁆𑀔𑀭𑀻𑀬𑀢𑀺 𑀓𑀭𑀻𑀬𑀢𑀺 𑀦𑀺𑀩𑁆𑀩𑀢𑁆𑀢𑀻𑀬𑀢𑀻𑀢𑀺 𑀘𑀺𑀢𑁆𑀢𑀲𑀗𑁆𑀔𑀸𑀭𑁄. 𑀓𑀢𑀫𑁄 𑀧𑀦𑀸𑀬𑁆𑀬𑁂𑀢𑀺 𑀇𑀥 𑀓𑀺𑀁 𑀧𑀼𑀘𑁆𑀙𑀢𑀺? 𑀇𑀫𑁂 𑀲𑀗𑁆𑀔𑀸𑀭𑀸 𑀅𑀜𑁆𑀜𑀫𑀜𑁆𑀜𑀫𑀺𑀲𑁆𑀲𑀸 𑀆𑀮𑀼𑀴𑀺𑀢𑀸 𑀅𑀯𑀺𑀪𑀽𑀢𑀸 𑀤𑀼𑀤𑁆𑀤𑀻𑀧𑀦𑀸. 𑀢𑀣𑀸 𑀳𑀺, 𑀓𑀸𑀬𑀤𑁆𑀯𑀸𑀭𑁂 𑀆𑀤𑀸𑀦𑀕𑀳𑀡𑀫𑀼𑀜𑁆𑀘𑀦𑀘𑁄𑀧𑀦𑀸𑀦𑀺 𑀧𑀸𑀧𑁂𑀢𑁆𑀯𑀸 𑀉𑀧𑁆𑀧𑀦𑁆𑀦𑀸 𑀅𑀝𑁆𑀞 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑁂𑀢𑀦𑀸 𑀤𑁆𑀯𑀸𑀤𑀲 𑀅𑀓𑀼𑀲𑀮𑀘𑁂𑀢𑀦𑀸𑀢𑀺 𑀏𑀯𑀁 𑀓𑀼𑀲𑀮𑀸𑀓𑀼𑀲𑀮𑀸 𑀯𑀻𑀲𑀢𑀺 𑀘𑁂𑀢𑀦𑀸𑀧𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀧𑀺 𑀓𑀸𑀬𑀲𑀗𑁆𑀔𑀸𑀭𑀸𑀢𑁆𑀯𑁂𑀯 𑀯𑀼𑀘𑁆𑀘𑀦𑁆𑀢𑀺. 𑀯𑀘𑀻𑀤𑁆𑀯𑀸𑀭𑁂 𑀳𑀦𑀼𑀲𑀁𑀘𑁄𑀧𑀦𑀁 𑀯𑀘𑀻𑀪𑁂𑀤𑀁 𑀧𑀸𑀧𑁂𑀢𑁆𑀯𑀸 𑀉𑀧𑁆𑀧𑀦𑁆𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀯 𑀯𑀻𑀲𑀢𑀺 𑀘𑁂𑀢𑀦𑀸𑀧𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀧𑀺 𑀯𑀘𑀻𑀲𑀗𑁆𑀔𑀸𑀭𑁄𑀢𑁆𑀯𑁂𑀯 𑀯𑀼𑀘𑁆𑀘𑀦𑁆𑀢𑀺. 𑀓𑀸𑀬𑀯𑀘𑀻𑀤𑁆𑀯𑀸𑀭𑁂𑀲𑀼 𑀘𑁄𑀧𑀦𑀁 𑀅𑀧𑀢𑁆𑀢𑀸 𑀭𑀳𑁄 𑀦𑀺𑀲𑀺𑀦𑁆𑀦𑀲𑁆𑀲 𑀘𑀺𑀦𑁆𑀢𑀬𑀢𑁄 𑀉𑀧𑁆𑀧𑀦𑁆𑀦𑀸 𑀓𑀼𑀲𑀮𑀸𑀓𑀼𑀲𑀮𑀸 𑀏𑀓𑀽𑀦𑀢𑀺𑀁𑀲 𑀘𑁂𑀢𑀦𑀸𑀧𑀺 𑀲𑀜𑁆𑀜𑀸 𑀘 𑀯𑁂𑀤𑀦𑀸 𑀘𑀸𑀢𑀺 𑀇𑀫𑁂 𑀤𑁆𑀯𑁂 𑀥𑀫𑁆𑀫𑀸𑀧𑀺 𑀘𑀺𑀢𑁆𑀢𑀲𑀗𑁆𑀔𑀸𑀭𑁄𑀢𑁆𑀯𑁂𑀯 𑀯𑀼𑀘𑁆𑀘𑀦𑁆𑀢𑀺. 𑀏𑀯𑀁 𑀇𑀫𑁂 𑀲𑀗𑁆𑀔𑀸𑀭𑀸 𑀅𑀜𑁆𑀜𑀫𑀜𑁆𑀜𑀫𑀺𑀲𑁆𑀲𑀸 𑀆𑀮𑀼𑀴𑀺𑀢𑀸 𑀅𑀯𑀺𑀪𑀽𑀢𑀸 𑀤𑀼𑀤𑁆𑀤𑀻𑀧𑀦𑀸. 𑀢𑁂 𑀧𑀸𑀓𑀝𑁂 𑀯𑀺𑀪𑀽𑀢𑁂 𑀓𑀢𑁆𑀯𑀸 𑀓𑀣𑀸𑀧𑁂𑀲𑁆𑀲𑀸𑀫𑀻𑀢𑀺 𑀧𑀼𑀘𑁆𑀙𑀢𑀺.

𑀓𑀲𑁆𑀫𑀸 𑀧𑀦𑀸𑀬𑁆𑀬𑁂𑀢𑀺 𑀇𑀥 𑀓𑀸𑀬𑀲𑀗𑁆𑀔𑀸𑀭𑀸𑀤𑀺𑀦𑀸𑀫𑀲𑁆𑀲 𑀧𑀤𑀢𑁆𑀣𑀁 𑀧𑀼𑀘𑁆𑀙𑀢𑀺. 𑀢𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑁂 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀸𑀢𑀺 𑀓𑀸𑀬𑀦𑀺𑀲𑁆𑀲𑀺𑀢𑀸, 𑀓𑀸𑀬𑁂 𑀲𑀢𑀺 𑀳𑁄𑀦𑁆𑀢𑀺, 𑀅𑀲𑀢𑀺 𑀦 𑀳𑁄𑀦𑁆𑀢𑀺. 𑀘𑀺𑀢𑁆𑀢𑀧𑁆𑀧𑀝𑀺𑀩𑀤𑁆𑀥𑀸𑀢𑀺 𑀘𑀺𑀢𑁆𑀢𑀦𑀺𑀲𑁆𑀲𑀺𑀢𑀸, 𑀘𑀺𑀢𑁆𑀢𑁂 𑀲𑀢𑀺 𑀳𑁄𑀦𑁆𑀢𑀺, 𑀅𑀲𑀢𑀺 𑀦 𑀳𑁄𑀦𑁆𑀢𑀺.

𑁪𑁬𑁪. 𑀇𑀤𑀸𑀦𑀺 𑀓𑀺𑀁 𑀦𑀼 𑀔𑁄 𑀏𑀲𑀸 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀯𑀮𑀜𑁆𑀚𑁂𑀢𑀺, 𑀦 𑀯𑀮𑀜𑁆𑀚𑁂𑀢𑀺. 𑀘𑀺𑀡𑁆𑀡𑀯𑀲𑀻 𑀯𑀸 𑀢𑀢𑁆𑀣 𑀦𑁄 𑀘𑀺𑀡𑁆𑀡𑀯𑀲𑀻𑀢𑀺 𑀚𑀸𑀦𑀦𑀢𑁆𑀣𑀁 𑀧𑀼𑀘𑁆𑀙𑀦𑁆𑀢𑁄, 𑀓𑀣𑀁 𑀧𑀦𑀸𑀬𑁆𑀬𑁂, 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀳𑁄𑀢𑀻𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑁂 𑀲𑀫𑀸𑀧𑀚𑁆𑀚𑀺𑀲𑁆𑀲𑀦𑁆𑀢𑀺 𑀯𑀸 𑀲𑀫𑀸𑀧𑀚𑁆𑀚𑀸𑀫𑀻𑀢𑀺 𑀯𑀸 𑀧𑀤𑀤𑁆𑀯𑀬𑁂𑀦 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀓𑀸𑀮𑁄 𑀓𑀣𑀺𑀢𑁄. 𑀲𑀫𑀸𑀧𑀦𑁆𑀦𑁄𑀢𑀺 𑀧𑀤𑁂𑀦 𑀅𑀦𑁆𑀢𑁄𑀦𑀺𑀭𑁄𑀥𑁄. 𑀢𑀣𑀸 𑀧𑀼𑀭𑀺𑀫𑁂𑀳𑀺 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀲𑀘𑀺𑀢𑁆𑀢𑀓𑀓𑀸𑀮𑁄 𑀓𑀣𑀺𑀢𑁄, 𑀧𑀘𑁆𑀙𑀺𑀫𑁂𑀦 𑀅𑀘𑀺𑀢𑁆𑀢𑀓𑀓𑀸𑀮𑁄. 𑀧𑀼𑀩𑁆𑀩𑁂𑀯 𑀢𑀣𑀸 𑀘𑀺𑀢𑁆𑀢𑀁 𑀪𑀸𑀯𑀺𑀢𑀁 𑀳𑁄𑀢𑀻𑀢𑀺 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀢𑁄 𑀧𑀼𑀩𑁆𑀩𑁂 𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑀓𑀸𑀮𑁂𑀬𑁂𑀯, 𑀏𑀢𑁆𑀢𑀓𑀁 𑀓𑀸𑀮𑀁 𑀅𑀘𑀺𑀢𑁆𑀢𑀓𑁄 𑀪𑀯𑀺𑀲𑁆𑀲𑀸𑀫𑀻𑀢𑀺 𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑀘𑀺𑀢𑁆𑀢𑀁 𑀪𑀸𑀯𑀺𑀢𑀁 𑀳𑁄𑀢𑀺. 𑀬𑀁 𑀢𑀁 𑀢𑀣𑀢𑁆𑀢𑀸𑀬 𑀉𑀧𑀦𑁂𑀢𑀻𑀢𑀺 𑀬𑀁 𑀏𑀯𑀁 𑀪𑀸𑀯𑀺𑀢𑀁 𑀘𑀺𑀢𑁆𑀢𑀁, 𑀢𑀁 𑀧𑀼𑀕𑁆𑀕𑀮𑀁 𑀢𑀣𑀢𑁆𑀢𑀸𑀬 𑀅𑀘𑀺𑀢𑁆𑀢𑀓𑀪𑀸𑀯𑀸𑀬 𑀉𑀧𑀦𑁂𑀢𑀺.

𑀧𑀞𑀫𑀁 𑀦𑀺𑀭𑀼𑀚𑁆𑀛𑀢𑀺 𑀯𑀘𑀻𑀲𑀗𑁆𑀔𑀸𑀭𑁄𑀢𑀺 𑀲𑁂𑀲𑀲𑀗𑁆𑀔𑀸𑀭𑁂𑀳𑀺 𑀧𑀞𑀫𑀁 𑀤𑀼𑀢𑀺𑀬𑀚𑁆𑀛𑀸𑀦𑁂𑀬𑁂𑀯 𑀦𑀺𑀭𑀼𑀚𑁆𑀛𑀢𑀺. 𑀢𑀢𑁄 𑀓𑀸𑀬𑀲𑀗𑁆𑀔𑀸𑀭𑁄𑀢𑀺 𑀢𑀢𑁄 𑀧𑀭𑀁 𑀓𑀸𑀬𑀲𑀗𑁆𑀔𑀸𑀭𑁄 𑀘𑀢𑀼𑀢𑁆𑀣𑀚𑁆𑀛𑀸𑀦𑁂 𑀦𑀺𑀭𑀼𑀚𑁆𑀛𑀢𑀺. 𑀢𑀢𑁄 𑀘𑀺𑀢𑁆𑀢𑀲𑀗𑁆𑀔𑀸𑀭𑁄𑀢𑀺 𑀢𑀢𑁄 𑀧𑀭𑀁 𑀘𑀺𑀢𑁆𑀢𑀲𑀗𑁆𑀔𑀸𑀭𑁄 𑀅𑀦𑁆𑀢𑁄𑀦𑀺𑀭𑁄𑀥𑁂 𑀦𑀺𑀭𑀼𑀚𑁆𑀛𑀢𑀺. 𑀯𑀼𑀝𑁆𑀞𑀳𑀺𑀲𑁆𑀲𑀦𑁆𑀢𑀺 𑀯𑀸 𑀯𑀼𑀝𑁆𑀞𑀳𑀸𑀫𑀻𑀢𑀺 𑀯𑀸 𑀧𑀤𑀤𑁆𑀯𑀬𑁂𑀦 𑀅𑀦𑁆𑀢𑁄𑀦𑀺𑀭𑁄𑀥𑀓𑀸𑀮𑁄 𑀓𑀣𑀺𑀢𑁄. 𑀯𑀼𑀝𑁆𑀞𑀺𑀢𑁄𑀢𑀺 𑀧𑀤𑁂𑀦 𑀨𑀮𑀲𑀫𑀸𑀧𑀢𑁆𑀢𑀺𑀓𑀸𑀮𑁄. 𑀢𑀣𑀸 𑀧𑀼𑀭𑀺𑀫𑁂𑀳𑀺 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀅𑀘𑀺𑀢𑁆𑀢𑀓𑀓𑀸𑀮𑁄 𑀓𑀣𑀺𑀢𑁄, 𑀧𑀘𑁆𑀙𑀺𑀫𑁂𑀦 𑀲𑀘𑀺𑀢𑁆𑀢𑀓𑀓𑀸𑀮𑁄. 𑀧𑀼𑀩𑁆𑀩𑁂𑀯 𑀢𑀣𑀸 𑀘𑀺𑀢𑁆𑀢𑀁 𑀪𑀸𑀯𑀺𑀢𑀁 𑀳𑁄𑀢𑀻𑀢𑀺 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀢𑁄 𑀧𑀼𑀩𑁆𑀩𑁂 𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑀓𑀸𑀮𑁂𑀬𑁂𑀯 𑀏𑀢𑁆𑀢𑀓𑀁 𑀓𑀸𑀮𑀁 𑀅𑀘𑀺𑀢𑁆𑀢𑀓𑁄 𑀳𑀼𑀢𑁆𑀯𑀸 𑀢𑀢𑁄 𑀧𑀭𑀁 𑀲𑀘𑀺𑀢𑁆𑀢𑀓𑁄 𑀪𑀯𑀺𑀲𑁆𑀲𑀸𑀫𑀻𑀢𑀺 𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑀘𑀺𑀢𑁆𑀢𑀁 𑀪𑀸𑀯𑀺𑀢𑀁 𑀳𑁄𑀢𑀺. 𑀬𑀁 𑀢𑀁 𑀢𑀣𑀢𑁆𑀢𑀸𑀬 𑀉𑀧𑀦𑁂𑀢𑀻𑀢𑀺 𑀬𑀁 𑀏𑀯𑀁 𑀪𑀸𑀯𑀺𑀢𑀁 𑀘𑀺𑀢𑁆𑀢𑀁, 𑀢𑀁 𑀧𑀼𑀕𑁆𑀕𑀮𑀁 𑀢𑀣𑀢𑁆𑀢𑀸𑀬 𑀲𑀘𑀺𑀢𑁆𑀢𑀓𑀪𑀸𑀯𑀸𑀬 𑀉𑀧𑀦𑁂𑀢𑀺. 𑀇𑀢𑀺 𑀳𑁂𑀝𑁆𑀞𑀸 𑀦𑀺𑀭𑁄𑀥𑀲𑀫𑀸𑀧𑀚𑁆𑀚𑀦𑀓𑀸𑀮𑁄 𑀕𑀳𑀺𑀢𑁄, 𑀇𑀥 𑀦𑀺𑀭𑁄𑀥𑀢𑁄 𑀯𑀼𑀝𑁆𑀞𑀸𑀦𑀓𑀸𑀮𑁄.

𑀇𑀤𑀸𑀦𑀺 𑀦𑀺𑀭𑁄𑀥𑀓𑀣𑀁 𑀓𑀣𑁂𑀢𑀼𑀁 𑀯𑀸𑀭𑁄𑀢𑀺 𑀦𑀺𑀭𑁄𑀥𑀓𑀣𑀸 𑀓𑀣𑁂𑀢𑀩𑁆𑀩𑀸 𑀲𑀺𑀬𑀸, 𑀲𑀸 𑀧𑀦𑁂𑀲𑀸, ‘‘𑀤𑁆𑀯𑀻𑀳𑀺 𑀩𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀢𑀬𑁄 𑀘 𑀲𑀗𑁆𑀔𑀸𑀭𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀲𑁄𑀴𑀲𑀳𑀺 𑀜𑀸𑀡𑀘𑀭𑀺𑀬𑀸𑀳𑀺 𑀦𑀯𑀳𑀺 𑀲𑀫𑀸𑀥𑀺𑀘𑀭𑀺𑀬𑀸𑀳𑀺 𑀯𑀲𑀻𑀪𑀸𑀯𑀢𑀸𑀧𑀜𑁆𑀜𑀸 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀜𑀸𑀡’’𑀦𑁆𑀢𑀺 𑀫𑀸𑀢𑀺𑀓𑀁 𑀞𑀧𑁂𑀢𑁆𑀯𑀸 𑀲𑀩𑁆𑀩𑀸𑀓𑀸𑀭𑁂𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀓𑀣𑀺𑀢𑀸. 𑀢𑀲𑁆𑀫𑀸 𑀢𑀢𑁆𑀣 𑀓𑀣𑀺𑀢𑀦𑀬𑁂𑀦𑁂𑀯 𑀕𑀳𑁂𑀢𑀩𑁆𑀩𑀸. 𑀓𑁄 𑀧𑀦𑀸𑀬𑀁 𑀦𑀺𑀭𑁄𑀥𑁄 𑀦𑀸𑀫? 𑀘𑀢𑀼𑀦𑁆𑀦𑀁 𑀔𑀦𑁆𑀥𑀸𑀦𑀁 𑀧𑀝𑀺𑀲𑀗𑁆𑀔𑀸 𑀅𑀧𑁆𑀧𑀯𑀢𑁆𑀢𑀺. 𑀅𑀣 𑀓𑀺𑀫𑀢𑁆𑀣𑀫𑁂𑀢𑀁 𑀲𑀫𑀸𑀧𑀚𑁆𑀚𑀦𑁆𑀢𑀻𑀢𑀺. 𑀲𑀗𑁆𑀔𑀸𑀭𑀸𑀦𑀁 𑀧𑀯𑀢𑁆𑀢𑁂 𑀉𑀓𑁆𑀓𑀡𑁆𑀞𑀺𑀢𑀸 𑀲𑀢𑁆𑀢𑀸𑀳𑀁 𑀅𑀘𑀺𑀢𑁆𑀢𑀓𑀸 𑀳𑀼𑀢𑁆𑀯𑀸 𑀲𑀼𑀔𑀁 𑀯𑀺𑀳𑀭𑀺𑀲𑁆𑀲𑀸𑀫, 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀁 𑀦𑀸𑀫𑁂𑀢𑀁, 𑀬𑀤𑀺𑀤𑀁 𑀦𑀺𑀭𑁄𑀥𑁄𑀢𑀺 𑀏𑀢𑀤𑀢𑁆𑀣𑀁 𑀲𑀫𑀸𑀧𑀚𑁆𑀚𑀦𑁆𑀢𑀺.

𑀧𑀞𑀫𑀁 𑀉𑀧𑁆𑀧𑀚𑁆𑀚𑀢𑀺 𑀘𑀺𑀢𑁆𑀢𑀲𑀗𑁆𑀔𑀸𑀭𑁄𑀢𑀺 𑀦𑀺𑀭𑁄𑀥𑀸 𑀯𑀼𑀝𑁆𑀞𑀳𑀦𑁆𑀢𑀲𑁆𑀲 𑀳𑀺 𑀨𑀮𑀲𑀫𑀸𑀧𑀢𑁆𑀢𑀺𑀘𑀺𑀢𑁆𑀢𑀁 𑀧𑀞𑀫𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀁𑀲𑀫𑁆𑀧𑀬𑀼𑀢𑁆𑀢𑀁 𑀲𑀜𑁆𑀜𑀜𑁆𑀘 𑀯𑁂𑀤𑀦𑀜𑁆𑀘 𑀲𑀦𑁆𑀥𑀸𑀬, ‘‘𑀧𑀞𑀫𑀁 𑀉𑀧𑁆𑀧𑀚𑁆𑀚𑀢𑀺 𑀘𑀺𑀢𑁆𑀢𑀲𑀗𑁆𑀔𑀸𑀭𑁄’’𑀢𑀺 𑀆𑀳. 𑀢𑀢𑁄 𑀓𑀸𑀬𑀲𑀗𑁆𑀔𑀸𑀭𑁄𑀢𑀺 𑀢𑀢𑁄 𑀧𑀭𑀁 𑀪𑀯𑀗𑁆𑀕𑀲𑀫𑀬𑁂 𑀓𑀸𑀬𑀲𑀗𑁆𑀔𑀸𑀭𑁄 𑀉𑀧𑁆𑀧𑀚𑁆𑀚𑀢𑀺. 𑀓𑀺𑀁 𑀧𑀦 𑀨𑀮𑀲𑀫𑀸𑀧𑀢𑁆𑀢𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀦 𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺? 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀇𑀫𑀲𑁆𑀲 𑀧𑀦 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀸 𑀨𑀮𑀲𑀫𑀸𑀧𑀢𑁆𑀢𑀺, 𑀲𑀸 𑀦 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀓𑀺𑀁 𑀯𑀸 𑀏𑀢𑁂𑀦 𑀨𑀮𑀲𑀫𑀸𑀧𑀢𑁆𑀢𑀺 𑀧𑀞𑀫𑀚𑁆𑀛𑀸𑀦𑀺𑀓𑀸 𑀯𑀸 𑀳𑁄𑀢𑀼, 𑀤𑀼𑀢𑀺𑀬𑀢𑀢𑀺𑀬𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀸 𑀯𑀸, 𑀲𑀦𑁆𑀢𑀸𑀬 𑀲𑀫𑀸𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀺𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀅𑀩𑁆𑀩𑁄𑀳𑀸𑀭𑀺𑀓𑀸 𑀳𑁄𑀦𑁆𑀢𑀺. 𑀢𑁂𑀲𑀁 𑀅𑀩𑁆𑀩𑁄𑀳𑀸𑀭𑀺𑀓𑀪𑀸𑀯𑁄 𑀲𑀜𑁆𑀚𑀻𑀯𑀢𑁆𑀣𑁂𑀭𑀯𑀢𑁆𑀣𑀼𑀦𑀸 𑀯𑁂𑀤𑀺𑀢𑀩𑁆𑀩𑁄. 𑀲𑀜𑁆𑀚𑀻𑀯𑀢𑁆𑀣𑁂𑀭𑀲𑁆𑀲 𑀳𑀺 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀓𑀺𑀁𑀲𑀼𑀓𑀧𑀼𑀧𑁆𑀨𑀲𑀤𑀺𑀲𑁂 𑀯𑀻𑀢𑀘𑁆𑀘𑀺𑀢𑀗𑁆𑀕𑀸𑀭𑁂 𑀫𑀤𑁆𑀤𑀫𑀸𑀦𑀲𑁆𑀲 𑀕𑀘𑁆𑀙𑀢𑁄 𑀘𑀻𑀯𑀭𑁂 𑀅𑀁𑀲𑀼𑀫𑀢𑁆𑀢𑀫𑁆𑀧𑀺 𑀦 𑀛𑀸𑀬𑀺, 𑀉𑀲𑀼𑀫𑀸𑀓𑀸𑀭𑀫𑀢𑁆𑀢𑀫𑁆𑀧𑀺 𑀦𑀸𑀳𑁄𑀲𑀺, 𑀲𑀫𑀸𑀧𑀢𑁆𑀢𑀺𑀨𑀮𑀁 𑀦𑀸𑀫𑁂𑀢𑀦𑁆𑀢𑀺 𑀯𑀤𑀦𑁆𑀢𑀺. 𑀏𑀯𑀫𑁂𑀯𑀁 𑀲𑀦𑁆𑀢𑀸𑀬 𑀲𑀫𑀸𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀺𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀅𑀩𑁆𑀩𑁄𑀳𑀸𑀭𑀺𑀓𑀸 𑀳𑁄𑀦𑁆𑀢𑀻𑀢𑀺 𑀪𑀯𑀗𑁆𑀕𑀲𑀫𑀬𑁂𑀦𑁂𑀯𑁂𑀢𑀁 𑀓𑀣𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁄 𑀯𑀘𑀻𑀲𑀗𑁆𑀔𑀸𑀭𑁄𑀢𑀺 𑀢𑀢𑁄 𑀧𑀭𑀁 𑀓𑀺𑀭𑀺𑀬𑀫𑀬𑀧𑀯𑀢𑁆𑀢𑀯𑀴𑀜𑁆𑀚𑀦𑀓𑀸𑀮𑁂 𑀯𑀘𑀻𑀲𑀗𑁆𑀔𑀸𑀭𑁄 𑀉𑀧𑁆𑀧𑀚𑁆𑀚𑀢𑀺. 𑀓𑀺𑀁 𑀪𑀯𑀗𑁆𑀕𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑁂 𑀦 𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺? 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀢𑀁𑀲𑀫𑀼𑀝𑁆𑀞𑀸𑀦𑀸 𑀧𑀦 𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀯𑀸𑀘𑀁 𑀅𑀪𑀺𑀲𑀗𑁆𑀔𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻𑀢𑀺 𑀓𑀺𑀭𑀺𑀬𑀫𑀬𑀧𑀯𑀢𑁆𑀢𑀯𑀴𑀜𑁆𑀚𑀦𑀓𑀸𑀮𑁂𑀦𑁂𑀯𑀢𑀁 𑀓𑀣𑀺𑀢𑀁. 𑀲𑀼𑀜𑁆𑀜𑀢𑁄 𑀨𑀲𑁆𑀲𑁄𑀢𑀺𑀆𑀤𑀬𑁄 𑀲𑀕𑀼𑀡𑁂𑀦𑀸𑀧𑀺 𑀆𑀭𑀫𑁆𑀫𑀡𑁂𑀦𑀸𑀧𑀺 𑀓𑀣𑁂𑀢𑀩𑁆𑀩𑀸. 𑀲𑀕𑀼𑀡𑁂𑀦 𑀢𑀸𑀯 𑀲𑀼𑀜𑁆𑀜𑀢𑀸 𑀦𑀸𑀫 𑀨𑀮𑀲𑀫𑀸𑀧𑀢𑁆𑀢𑀺, 𑀢𑀸𑀬 𑀲𑀳𑀚𑀸𑀢𑀁 𑀨𑀲𑁆𑀲𑀁 𑀲𑀦𑁆𑀥𑀸𑀬 𑀲𑀼𑀜𑁆𑀜𑀢𑁄 𑀨𑀲𑁆𑀲𑁄𑀢𑀺 𑀯𑀼𑀢𑁆𑀢𑀁. 𑀅𑀦𑀺𑀫𑀺𑀢𑁆𑀢𑀸𑀧𑀡𑀺𑀳𑀺𑀢𑁂𑀲𑀼𑀧𑀺𑀏𑀲𑁂𑀯 𑀦𑀬𑁄. 𑀆𑀭𑀫𑁆𑀫𑀡𑁂𑀦 𑀧𑀦 𑀦𑀺𑀩𑁆𑀩𑀸𑀦𑀁 𑀭𑀸𑀕𑀸𑀤𑀻𑀳𑀺 𑀲𑀼𑀜𑁆𑀜𑀢𑁆𑀢𑀸 𑀲𑀼𑀜𑁆𑀜𑀁 𑀦𑀸𑀫, 𑀭𑀸𑀕𑀦𑀺𑀫𑀺𑀢𑁆𑀢𑀸𑀤𑀻𑀦𑀁 𑀅𑀪𑀸𑀯𑀸 𑀅𑀦𑀺𑀫𑀺𑀢𑁆𑀢𑀁, 𑀭𑀸𑀕𑀤𑁄𑀲𑀫𑁄𑀳𑀧𑁆𑀧𑀡𑀺𑀥𑀻𑀦𑀁 𑀅𑀪𑀸𑀯𑀸 𑀅𑀧𑁆𑀧𑀡𑀺𑀳𑀺𑀢𑀁. 𑀲𑀼𑀜𑁆𑀜𑀢𑀁 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀦𑁆𑀦𑀨𑀮𑀲𑀫𑀸𑀧𑀢𑁆𑀢𑀺𑀬𑀁 𑀨𑀲𑁆𑀲𑁄 𑀲𑀼𑀜𑁆𑀜𑀢𑁄 𑀦𑀸𑀫. 𑀅𑀦𑀺𑀫𑀺𑀢𑁆𑀢𑀸𑀧𑀡𑀺𑀳𑀺𑀢𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀅𑀧𑀭𑀸 𑀆𑀕𑀫𑀦𑀺𑀬𑀓𑀣𑀸 𑀦𑀸𑀫 𑀳𑁄𑀢𑀺, 𑀲𑀼𑀜𑁆𑀜𑀢𑀸, 𑀅𑀦𑀺𑀫𑀺𑀢𑁆𑀢𑀸, 𑀅𑀧𑁆𑀧𑀡𑀺𑀳𑀺𑀢𑀸𑀢𑀺 𑀳𑀺 𑀯𑀺𑀧𑀲𑁆𑀲𑀦𑀸𑀧𑀺 𑀯𑀼𑀘𑁆𑀘𑀢𑀺. 𑀢𑀢𑁆𑀣 𑀬𑁄 𑀪𑀺𑀓𑁆𑀔𑀼 𑀲𑀗𑁆𑀔𑀸𑀭𑁂 𑀅𑀦𑀺𑀘𑁆𑀘𑀢𑁄 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀅𑀦𑀺𑀘𑁆𑀘𑀢𑁄 𑀤𑀺𑀲𑁆𑀯𑀸 𑀅𑀦𑀺𑀘𑁆𑀘𑀢𑁄 𑀯𑀼𑀝𑁆𑀞𑀸𑀢𑀺, 𑀢𑀲𑁆𑀲 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸 𑀅𑀦𑀺𑀫𑀺𑀢𑁆𑀢𑀸 𑀦𑀸𑀫 𑀳𑁄𑀢𑀺. 𑀬𑁄 𑀤𑀼𑀓𑁆𑀔𑀢𑁄 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀤𑀼𑀓𑁆𑀔𑀢𑁄 𑀤𑀺𑀲𑁆𑀯𑀸 𑀤𑀼𑀓𑁆𑀔𑀢𑁄 𑀯𑀼𑀝𑁆𑀞𑀸𑀢𑀺, 𑀢𑀲𑁆𑀲 𑀅𑀧𑁆𑀧𑀡𑀺𑀳𑀺𑀢𑀸 𑀦𑀸𑀫. 𑀬𑁄 𑀅𑀦𑀢𑁆𑀢𑀢𑁄 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀅𑀦𑀢𑁆𑀢𑀢𑁄 𑀤𑀺𑀲𑁆𑀯𑀸 𑀅𑀦𑀢𑁆𑀢𑀢𑁄 𑀯𑀼𑀝𑁆𑀞𑀸𑀢𑀺, 𑀢𑀲𑁆𑀲 𑀲𑀼𑀜𑁆𑀜𑀢𑀸 𑀦𑀸𑀫. 𑀢𑀢𑁆𑀣 𑀅𑀦𑀺𑀫𑀺𑀢𑁆𑀢𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑁄 𑀅𑀦𑀺𑀫𑀺𑀢𑁆𑀢𑁄 𑀦𑀸𑀫, 𑀅𑀦𑀺𑀫𑀺𑀢𑁆𑀢𑀫𑀕𑁆𑀕𑀲𑁆𑀲 𑀨𑀮𑀁 𑀅𑀦𑀺𑀫𑀺𑀢𑁆𑀢𑀁 𑀦𑀸𑀫. 𑀅𑀦𑀺𑀫𑀺𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀺𑀲𑀳𑀚𑀸𑀢𑁂 𑀨𑀲𑁆𑀲𑁂 𑀨𑀼𑀲𑀦𑁆𑀢𑁂 𑀅𑀦𑀺𑀫𑀺𑀢𑁆𑀢𑁄 𑀨𑀲𑁆𑀲𑁄 𑀨𑀼𑀲𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀅𑀧𑁆𑀧𑀡𑀺𑀳𑀺𑀢𑀲𑀼𑀜𑁆𑀜𑀢𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀆𑀕𑀫𑀦𑀺𑀬𑁂𑀦 𑀓𑀣𑀺𑀢𑁂 𑀧𑀦 𑀲𑀼𑀜𑁆𑀜𑀢𑁄 𑀯𑀸 𑀨𑀲𑁆𑀲𑁄 𑀅𑀦𑀺𑀫𑀺𑀢𑁆𑀢𑁄 𑀯𑀸 𑀨𑀲𑁆𑀲𑁄 𑀅𑀧𑁆𑀧𑀡𑀺𑀳𑀺𑀢𑁄 𑀯𑀸 𑀨𑀲𑁆𑀲𑁄𑀢𑀺 𑀯𑀺𑀓𑀧𑁆𑀧𑁄 𑀆𑀧𑀚𑁆𑀚𑁂𑀬𑁆𑀬, 𑀢𑀲𑁆𑀫𑀸 𑀲𑀕𑀼𑀡𑁂𑀦 𑀘𑁂𑀯 𑀆𑀭𑀫𑁆𑀫𑀡𑁂𑀦 𑀘 𑀓𑀣𑁂𑀢𑀩𑁆𑀩𑀁. 𑀏𑀯𑀜𑁆𑀳𑀺 𑀢𑀬𑁄 𑀨𑀲𑁆𑀲𑀸 𑀨𑀼𑀲𑀦𑁆𑀢𑀻𑀢𑀺 𑀲𑀫𑁂𑀢𑀺.

𑀯𑀺𑀯𑁂𑀓𑀦𑀺𑀦𑁆𑀦𑀦𑁆𑀢𑀺𑀆𑀤𑀻𑀲𑀼 𑀦𑀺𑀩𑁆𑀩𑀸𑀦𑀁 𑀯𑀺𑀯𑁂𑀓𑁄 𑀦𑀸𑀫, 𑀢𑀲𑁆𑀫𑀺𑀁 𑀯𑀺𑀯𑁂𑀓𑁂 𑀦𑀺𑀦𑁆𑀦𑀁 𑀑𑀦𑀢𑀦𑁆𑀢𑀺 𑀯𑀺𑀯𑁂𑀓𑀦𑀺𑀦𑁆𑀦𑀁. 𑀅𑀜𑁆𑀜𑀢𑁄 𑀆𑀕𑀦𑁆𑀢𑁆𑀯𑀸 𑀬𑁂𑀦 𑀯𑀺𑀯𑁂𑀓𑁄, 𑀢𑁂𑀦 𑀯𑀗𑁆𑀓𑀁 𑀯𑀺𑀬 𑀳𑀼𑀢𑁆𑀯𑀸 𑀞𑀺𑀢𑀦𑁆𑀢𑀺 𑀯𑀺𑀯𑁂𑀓𑀧𑁄𑀡𑀁. 𑀬𑁂𑀦 𑀯𑀺𑀯𑁂𑀓𑁄, 𑀢𑁂𑀦 𑀧𑀢𑀫𑀸𑀦𑀁 𑀯𑀺𑀬 𑀞𑀺𑀢𑀦𑁆𑀢𑀺 𑀯𑀺𑀯𑁂𑀓𑀧𑀩𑁆𑀪𑀸𑀭𑀁.

𑁪𑁬𑁫. 𑀇𑀤𑀸𑀦𑀺 𑀬𑀸 𑀯𑁂𑀤𑀦𑀸 𑀦𑀺𑀭𑁄𑀥𑁂𑀢𑁆𑀯𑀸 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀢𑀺, 𑀢𑀸 𑀧𑀼𑀘𑁆𑀙𑀺𑀲𑁆𑀲𑀸𑀫𑀻𑀢𑀺 𑀧𑀼𑀘𑁆𑀙𑀦𑁆𑀢𑁄 𑀓𑀢𑀺 𑀧𑀦𑀸𑀬𑁆𑀬𑁂, 𑀯𑁂𑀤𑀦𑀸𑀢𑀺 𑀆𑀳. 𑀓𑀸𑀬𑀺𑀓𑀁 𑀯𑀸𑀢𑀺𑀆𑀤𑀻𑀲𑀼 𑀧𑀜𑁆𑀘𑀤𑁆𑀯𑀸𑀭𑀺𑀓𑀁 𑀲𑀼𑀔𑀁 𑀓𑀸𑀬𑀺𑀓𑀁 𑀦𑀸𑀫, 𑀫𑀦𑁄𑀤𑁆𑀯𑀸𑀭𑀺𑀓𑀁 𑀘𑁂𑀢𑀲𑀺𑀓𑀁 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀲𑀼𑀔𑀦𑁆𑀢𑀺 𑀲𑀪𑀸𑀯𑀦𑀺𑀤𑁆𑀤𑁂𑀲𑁄. 𑀲𑀸𑀢𑀦𑁆𑀢𑀺 𑀢𑀲𑁆𑀲𑁂𑀯 𑀫𑀥𑀼𑀭𑀪𑀸𑀯𑀤𑀻𑀧𑀓𑀁 𑀯𑁂𑀯𑀘𑀦𑀁. 𑀯𑁂𑀤𑀬𑀺𑀢𑀦𑁆𑀢𑀺 𑀯𑁂𑀤𑀬𑀺𑀢𑀪𑀸𑀯𑀤𑀻𑀧𑀓𑀁, 𑀲𑀩𑁆𑀩𑀯𑁂𑀤𑀦𑀸𑀦𑀁 𑀲𑀸𑀥𑀸𑀭𑀡𑀯𑀘𑀦𑀁. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀞𑀺𑀢𑀺𑀲𑀼𑀔𑀸 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀸𑀢𑀺𑀆𑀤𑀻𑀲𑀼 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀅𑀢𑁆𑀣𑀺𑀪𑀸𑀯𑁄 𑀲𑀼𑀔𑀁, 𑀦𑀢𑁆𑀣𑀺𑀪𑀸𑀯𑁄 𑀤𑀼𑀓𑁆𑀔𑀁. 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀅𑀢𑁆𑀣𑀺𑀪𑀸𑀯𑁄 𑀤𑀼𑀓𑁆𑀔𑀁, 𑀦𑀢𑁆𑀣𑀺𑀪𑀸𑀯𑁄 𑀲𑀼𑀔𑀁. 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀚𑀸𑀦𑀦𑀪𑀸𑀯𑁄 𑀲𑀼𑀔𑀁, 𑀅𑀚𑀸𑀦𑀦𑀪𑀸𑀯𑁄 𑀤𑀼𑀓𑁆𑀔𑀦𑁆𑀢𑀺 𑀅𑀢𑁆𑀣𑁄.

𑀓𑀺𑀁 𑀅𑀦𑀼𑀲𑀬𑁄 𑀅𑀦𑀼𑀲𑁂𑀢𑀻𑀢𑀺 𑀓𑀢𑀫𑁄 𑀅𑀦𑀼𑀲𑀬𑁄 𑀅𑀦𑀼𑀲𑁂𑀢𑀺. 𑀅𑀧𑁆𑀧𑀳𑀻𑀦𑀝𑁆𑀞𑁂𑀦 𑀲𑀬𑀺𑀢𑁄 𑀯𑀺𑀬 𑀳𑁄𑀢𑀻𑀢𑀺 𑀅𑀦𑀼𑀲𑀬𑀧𑀼𑀘𑁆𑀙𑀁 𑀧𑀼𑀘𑁆𑀙𑀢𑀺. 𑀦 𑀔𑁄, 𑀆𑀯𑀼𑀲𑁄 𑀯𑀺𑀲𑀸𑀔, 𑀲𑀩𑁆𑀩𑀸𑀬 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀭𑀸𑀕𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻𑀢𑀺 𑀦 𑀲𑀩𑁆𑀩𑀸𑀬 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀭𑀸𑀕𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀺. 𑀦 𑀲𑀩𑁆𑀩𑀸𑀬 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑁄 𑀅𑀧𑁆𑀧𑀳𑀻𑀦𑁄, 𑀦 𑀲𑀩𑁆𑀩𑀁 𑀲𑀼𑀔𑀁 𑀯𑁂𑀤𑀦𑀁 𑀆𑀭𑀩𑁆𑀪 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀓𑀺𑀁 𑀧𑀳𑀸𑀢𑀩𑁆𑀩𑀦𑁆𑀢𑀺 𑀅𑀬𑀁 𑀧𑀳𑀸𑀦𑀧𑀼𑀘𑁆𑀙𑀸 𑀦𑀸𑀫.

𑀭𑀸𑀕𑀁 𑀢𑁂𑀦 𑀧𑀚𑀳𑀢𑀻𑀢𑀺 𑀏𑀢𑁆𑀣 𑀏𑀓𑁂𑀦𑁂𑀯 𑀩𑁆𑀬𑀸𑀓𑀭𑀡𑁂𑀦 𑀤𑁆𑀯𑁂 𑀧𑀼𑀘𑁆𑀙𑀸 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀇𑀥 𑀪𑀺𑀓𑁆𑀔𑀼 𑀭𑀸𑀕𑀸𑀦𑀼𑀲𑀬𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀧𑀞𑀫𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀢𑀺, 𑀛𑀸𑀦𑀯𑀺𑀓𑁆𑀔𑀫𑁆𑀪𑀺𑀢𑀁 𑀭𑀸𑀕𑀸𑀦𑀼𑀲𑀬𑀁 𑀢𑀣𑀸 𑀯𑀺𑀓𑁆𑀔𑀫𑁆𑀪𑀺𑀢𑀫𑁂𑀯 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀲𑀫𑀼𑀕𑁆𑀖𑀸𑀢𑁂𑀢𑀺. 𑀲𑁄 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀧𑀳𑀻𑀦𑁄𑀧𑀺 𑀢𑀣𑀸 𑀯𑀺𑀓𑁆𑀔𑀫𑁆𑀪𑀺𑀢𑀢𑁆𑀢𑀸𑀯 𑀧𑀞𑀫𑀚𑁆𑀛𑀸𑀦𑁂 𑀦𑀸𑀦𑀼𑀲𑁂𑀢𑀺 𑀦𑀸𑀫. 𑀢𑁂𑀦𑀸𑀳 𑁋 ‘‘𑀦 𑀢𑀢𑁆𑀣 𑀭𑀸𑀕𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻’’𑀢𑀺. 𑀢𑀤𑀸𑀬𑀢𑀦𑀦𑁆𑀢𑀺 𑀢𑀁 𑀆𑀬𑀢𑀦𑀁, 𑀧𑀭𑀫𑀲𑁆𑀲𑀸𑀲𑀪𑀸𑀯𑁂𑀦 𑀧𑀢𑀺𑀝𑁆𑀞𑀸𑀦𑀪𑀽𑀢𑀁 𑀅𑀭𑀳𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀇𑀢𑀺 𑀅𑀦𑀼𑀢𑁆𑀢𑀭𑁂𑀲𑀽𑀢𑀺 𑀏𑀯𑀁 𑀅𑀦𑀼𑀢𑁆𑀢𑀭𑀸 𑀯𑀺𑀫𑁄𑀓𑁆𑀔𑀸𑀢𑀺 𑀮𑀤𑁆𑀥𑀦𑀸𑀫𑁂 𑀅𑀭𑀳𑀢𑁆𑀢𑁂. 𑀧𑀺𑀳𑀁 𑀉𑀧𑀝𑁆𑀞𑀸𑀧𑀬𑀢𑁄𑀢𑀺 𑀧𑀢𑁆𑀣𑀦𑀁 𑀧𑀝𑁆𑀞𑀧𑁂𑀦𑁆𑀢𑀲𑁆𑀲. 𑀉𑀧𑁆𑀧𑀚𑁆𑀚𑀢𑀺 𑀧𑀺𑀳𑀸𑀧𑀘𑁆𑀘𑀬𑀸 𑀤𑁄𑀫𑀦𑀲𑁆𑀲𑀦𑁆𑀢𑀺 𑀧𑀢𑁆𑀣𑀦𑀸𑀬 𑀧𑀝𑁆𑀞𑀧𑀦𑀫𑀽𑀮𑀓𑀁 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀁 𑀧𑀦𑁂𑀢𑀁 𑀦 𑀧𑀢𑁆𑀣𑀦𑀸𑀬 𑀧𑀝𑁆𑀞𑀧𑀦𑀫𑀽𑀮𑀓𑀁 𑀉𑀧𑁆𑀧𑀚𑁆𑀚𑀢𑀺, 𑀧𑀢𑁆𑀣𑁂𑀢𑁆𑀯𑀸 𑀅𑀮𑀪𑀦𑁆𑀢𑀲𑁆𑀲 𑀧𑀦 𑀅𑀮𑀸𑀪𑀫𑀽𑀮𑀓𑀁 𑀉𑀧𑁆𑀧𑀚𑁆𑀚𑀫𑀸𑀦𑀁, ‘‘𑀉𑀧𑁆𑀧𑀚𑁆𑀚𑀢𑀺 𑀧𑀺𑀳𑀸𑀧𑀘𑁆𑀘𑀬𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀤𑁄𑀫𑀦𑀲𑁆𑀲𑀁 𑀦𑀸𑀫 𑀏𑀓𑀦𑁆𑀢𑁂𑀦 𑀅𑀓𑀼𑀲𑀮𑀁, 𑀇𑀤𑀁 𑀧𑀦 𑀲𑁂𑀯𑀺𑀢𑀩𑁆𑀩𑀁 𑀤𑁄𑀫𑀦𑀲𑁆𑀲𑀁 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀺. 𑀬𑁄𑀕𑀺𑀦𑁄 𑀳𑀺 𑀢𑁂𑀫𑀸𑀲𑀺𑀓𑀁 𑀙𑀫𑀸𑀲𑀺𑀓𑀁 𑀯𑀸 𑀦𑀯𑀫𑀸𑀲𑀺𑀓𑀁 𑀯𑀸 𑀧𑀝𑀺𑀧𑀤𑀁 𑀕𑀡𑁆𑀳𑀦𑁆𑀢𑀺. 𑀢𑁂𑀲𑀼 𑀬𑁄 𑀢𑀁 𑀢𑀁 𑀧𑀝𑀺𑀧𑀤𑀁 𑀕𑀳𑁂𑀢𑁆𑀯𑀸 𑀅𑀦𑁆𑀢𑁄𑀓𑀸𑀮𑀧𑀭𑀺𑀘𑁆𑀙𑁂𑀤𑁂𑀬𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀸𑀫𑀻𑀢𑀺 𑀖𑀝𑁂𑀦𑁆𑀢𑁄 𑀯𑀸𑀬𑀫𑀦𑁆𑀢𑁄 𑀦 𑀲𑀓𑁆𑀓𑁄𑀢𑀺 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑁂𑀦 𑀧𑀸𑀧𑀼𑀡𑀺𑀢𑀼𑀁, 𑀢𑀲𑁆𑀲 𑀩𑀮𑀯𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺, 𑀆𑀴𑀺𑀦𑁆𑀤𑀺𑀓𑀯𑀸𑀲𑀺𑀫𑀳𑀸𑀨𑀼𑀲𑁆𑀲𑀤𑁂𑀯𑀢𑁆𑀣𑁂𑀭𑀲𑁆𑀲 𑀯𑀺𑀬 𑀅𑀲𑁆𑀲𑀼𑀥𑀸𑀭𑀸 𑀧𑀯𑀢𑁆𑀢𑀦𑁆𑀢𑀺. 𑀣𑁂𑀭𑁄 𑀓𑀺𑀭 𑀏𑀓𑀽𑀦𑀯𑀻𑀲𑀢𑀺𑀯𑀲𑁆𑀲𑀸𑀦𑀺 𑀕𑀢𑀧𑀘𑁆𑀘𑀸𑀕𑀢𑀯𑀢𑁆𑀢𑀁 𑀧𑀽𑀭𑁂𑀲𑀺. 𑀢𑀲𑁆𑀲, ‘‘𑀇𑀫𑀲𑁆𑀫𑀺𑀁 𑀯𑀸𑀭𑁂 𑀅𑀭𑀳𑀢𑁆𑀢𑀁 𑀕𑀡𑁆𑀳𑀺𑀲𑁆𑀲𑀸𑀫𑀺, 𑀇𑀫𑀲𑁆𑀫𑀺𑀁 𑀯𑀸𑀭𑁂 𑀯𑀺𑀲𑀼𑀤𑁆𑀥𑀺𑀧𑀯𑀸𑀭𑀡𑀁 𑀧𑀯𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀫𑀸𑀦𑀲𑀁 𑀩𑀦𑁆𑀥𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲𑁂𑀯 𑀏𑀓𑀽𑀦𑀯𑀻𑀲𑀢𑀺𑀯𑀲𑁆𑀲𑀸𑀦𑀺 𑀅𑀢𑀺𑀓𑁆𑀓𑀦𑁆𑀢𑀸𑀦𑀺. 𑀧𑀯𑀸𑀭𑀡𑀸𑀤𑀺𑀯𑀲𑁂 𑀆𑀕𑀢𑁂 𑀣𑁂𑀭𑀲𑁆𑀲 𑀅𑀲𑁆𑀲𑀼𑀧𑀸𑀢𑁂𑀦 𑀫𑀼𑀢𑁆𑀢𑀤𑀺𑀯𑀲𑁄 𑀦𑀸𑀫 𑀦𑀸𑀳𑁄𑀲𑀺. 𑀯𑀻𑀲𑀢𑀺𑀫𑁂 𑀧𑀦 𑀯𑀲𑁆𑀲𑁂 𑀅𑀭𑀳𑀢𑁆𑀢𑀁 𑀧𑀸𑀡𑀼𑀡𑀺.

𑀧𑀝𑀺𑀖𑀁 𑀢𑁂𑀦 𑀧𑀚𑀳𑀢𑀻𑀢𑀺 𑀏𑀢𑁆𑀣 𑀤𑁄𑀫𑀦𑀲𑁆𑀲𑁂𑀦𑁂𑀯 𑀧𑀝𑀺𑀖𑀁 𑀧𑀚𑀳𑀢𑀺. 𑀦 𑀳𑀺 𑀧𑀝𑀺𑀖𑁂𑀦𑁂𑀯 𑀧𑀝𑀺𑀖𑀧𑁆𑀧𑀳𑀸𑀦𑀁, 𑀤𑁄𑀫𑀦𑀲𑁆𑀲𑁂𑀦 𑀯𑀸 𑀤𑁄𑀫𑀦𑀲𑁆𑀲𑀧𑁆𑀧𑀳𑀸𑀦𑀁 𑀦𑀸𑀫 𑀅𑀢𑁆𑀣𑀺. 𑀅𑀬𑀁 𑀧𑀦 𑀪𑀺𑀓𑁆𑀔𑀼 𑀢𑁂𑀫𑀸𑀲𑀺𑀓𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀧𑀝𑀺𑀧𑀤𑀁 𑀕𑀳𑁂𑀢𑁆𑀯𑀸 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘‘𑀧𑀲𑁆𑀲 𑀪𑀺𑀓𑁆𑀔𑀼, 𑀓𑀺𑀁 𑀢𑀼𑀬𑁆𑀳𑀁 𑀲𑀻𑀮𑁂𑀦 𑀳𑀻𑀦𑀝𑁆𑀞𑀸𑀦𑀁 𑀅𑀢𑁆𑀣𑀺, 𑀉𑀤𑀸𑀳𑀼 𑀯𑀻𑀭𑀺𑀬𑁂𑀦, 𑀉𑀤𑀸𑀳𑀼 𑀧𑀜𑁆𑀜𑀸𑀬, 𑀦𑀦𑀼 𑀢𑁂 𑀲𑀻𑀮𑀁 𑀲𑀼𑀧𑀭𑀺𑀲𑀼𑀤𑁆𑀥𑀁 𑀯𑀻𑀭𑀺𑀬𑀁 𑀲𑀼𑀧𑀕𑁆𑀕𑀳𑀺𑀢𑀁 𑀧𑀜𑁆𑀜𑀸 𑀲𑀽𑀭𑀸 𑀳𑀼𑀢𑁆𑀯𑀸 𑀯𑀳𑀢𑀻’’𑀢𑀺. 𑀲𑁄 𑀏𑀯𑀁 𑀧𑀝𑀺𑀲𑀜𑁆𑀘𑀺𑀓𑁆𑀔𑀺𑀢𑁆𑀯𑀸, ‘‘𑀦 𑀤𑀸𑀦𑀺 𑀧𑀼𑀦 𑀇𑀫𑀲𑁆𑀲 𑀤𑁄𑀫𑀦𑀲𑁆𑀲𑀲𑁆𑀲 𑀉𑀧𑁆𑀧𑀚𑁆𑀚𑀺𑀢𑀼𑀁 𑀤𑀲𑁆𑀲𑀸𑀫𑀻’’𑀢𑀺 𑀯𑀻𑀭𑀺𑀬𑀁 𑀤𑀴𑁆𑀳𑀁 𑀓𑀢𑁆𑀯𑀸 𑀅𑀦𑁆𑀢𑁄𑀢𑁂𑀫𑀸𑀲𑁂 𑀯𑀸 𑀅𑀦𑁆𑀢𑁄𑀙𑀫𑀸𑀲𑁂 𑀯𑀸 𑀅𑀦𑁆𑀢𑁄𑀦𑀯𑀫𑀸𑀲𑁂 𑀯𑀸 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀢𑀁 𑀲𑀫𑀼𑀕𑁆𑀖𑀸𑀢𑁂𑀢𑀺. 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀧𑀝𑀺𑀖𑁂𑀦𑁂𑀯 𑀧𑀝𑀺𑀖𑀁, 𑀤𑁄𑀫𑀦𑀲𑁆𑀲𑁂𑀦𑁂𑀯 𑀤𑁄𑀫𑀦𑀲𑁆𑀲𑀁 𑀧𑀚𑀳𑀢𑀺 𑀦𑀸𑀫.

𑀦 𑀢𑀢𑁆𑀣 𑀧𑀝𑀺𑀖𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻𑀢𑀺 𑀢𑀢𑁆𑀣 𑀏𑀯𑀭𑀽𑀧𑁂 𑀤𑁄𑀫𑀦𑀲𑁆𑀲𑁂 𑀧𑀝𑀺𑀖𑀸𑀦𑀼𑀲𑀬𑁄 𑀦𑀸𑀦𑀼𑀲𑁂𑀢𑀺. 𑀦 𑀢𑀁 𑀆𑀭𑀩𑁆𑀪 𑀉𑀧𑁆𑀧𑀚𑁆𑀚𑀢𑀺, 𑀧𑀳𑀻𑀦𑁄𑀯 𑀢𑀢𑁆𑀣 𑀧𑀝𑀺𑀖𑀸𑀦𑀼𑀲𑀬𑁄𑀢𑀺 𑀅𑀢𑁆𑀣𑁄. 𑀅𑀯𑀺𑀚𑁆𑀚𑀁 𑀢𑁂𑀦 𑀧𑀚𑀳𑀢𑀻𑀢𑀺 𑀇𑀥 𑀪𑀺𑀓𑁆𑀔𑀼 𑀅𑀯𑀺𑀚𑁆𑀚𑀸𑀦𑀼𑀲𑀬𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀢𑀺, 𑀛𑀸𑀦𑀯𑀺𑀓𑁆𑀔𑀫𑁆𑀪𑀺𑀢𑀁 𑀅𑀯𑀺𑀚𑁆𑀚𑀸𑀦𑀼𑀲𑀬𑀁 𑀢𑀣𑀸 𑀯𑀺𑀓𑁆𑀔𑀫𑁆𑀪𑀺𑀢𑀫𑁂𑀯 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀫𑀼𑀕𑁆𑀖𑀸𑀢𑁂𑀢𑀺. 𑀲𑁄 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀧𑀳𑀻𑀦𑁄𑀧𑀺 𑀢𑀣𑀸 𑀯𑀺𑀓𑁆𑀔𑀫𑁆𑀪𑀺𑀢𑀢𑁆𑀢𑀸𑀯 𑀘𑀢𑀼𑀢𑁆𑀣𑀚𑁆𑀛𑀸𑀦𑁂 𑀦𑀸𑀦𑀼𑀲𑁂𑀢𑀺 𑀦𑀸𑀫. 𑀢𑁂𑀦𑀸𑀳 𑁋 ‘‘𑀦 𑀢𑀢𑁆𑀣 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻’’𑀢𑀺.

𑁪𑁬𑁬. 𑀇𑀤𑀸𑀦𑀺 𑀧𑀝𑀺𑀪𑀸𑀕𑀧𑀼𑀘𑁆𑀙𑀁 𑀧𑀼𑀘𑁆𑀙𑀦𑁆𑀢𑁄 𑀲𑀼𑀔𑀸𑀬 𑀧𑀦𑀸𑀬𑁆𑀬𑁂𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑁂 𑀬𑀲𑁆𑀫𑀸 𑀲𑀼𑀔𑀲𑁆𑀲 𑀤𑀼𑀓𑁆𑀔𑀁, 𑀤𑀼𑀓𑁆𑀔𑀲𑁆𑀲 𑀘 𑀲𑀼𑀔𑀁 𑀧𑀘𑁆𑀘𑀦𑀻𑀓𑀁, 𑀢𑀲𑁆𑀫𑀸 𑀤𑁆𑀯𑀻𑀲𑀼 𑀯𑁂𑀤𑀦𑀸𑀲𑀼 𑀯𑀺𑀲𑀪𑀸𑀕𑀧𑀝𑀺𑀪𑀸𑀕𑁄 𑀓𑀣𑀺𑀢𑁄. 𑀉𑀧𑁂𑀓𑁆𑀔𑀸 𑀧𑀦 𑀅𑀦𑁆𑀥𑀓𑀸𑀭𑀸 𑀅𑀯𑀺𑀪𑀽𑀢𑀸 𑀤𑀼𑀤𑁆𑀤𑀻𑀧𑀦𑀸, 𑀅𑀯𑀺𑀚𑁆𑀚𑀸𑀧𑀺 𑀢𑀸𑀤𑀺𑀲𑀸𑀯𑀸𑀢𑀺 𑀢𑁂𑀦𑁂𑀢𑁆𑀣 𑀲𑀪𑀸𑀕𑀧𑀝𑀺𑀪𑀸𑀕𑁄 𑀓𑀣𑀺𑀢𑁄. 𑀬𑀢𑁆𑀢𑀓𑁂𑀲𑀼 𑀧𑀦 𑀞𑀸𑀦𑁂𑀲𑀼 𑀅𑀯𑀺𑀚𑁆𑀚𑀸 𑀢𑀫𑀁 𑀓𑀭𑁄𑀢𑀺, 𑀢𑀢𑁆𑀢𑀓𑁂𑀲𑀼 𑀯𑀺𑀚𑁆𑀚𑀸 𑀢𑀫𑀁 𑀯𑀺𑀦𑁄𑀤𑁂𑀢𑀻𑀢𑀺 𑀯𑀺𑀲𑀪𑀸𑀕𑀧𑀝𑀺𑀪𑀸𑀕𑁄 𑀓𑀣𑀺𑀢𑁄. 𑀅𑀯𑀺𑀚𑁆𑀚𑀸𑀬 𑀔𑁄, 𑀆𑀯𑀼𑀲𑁄𑀢𑀺 𑀏𑀢𑁆𑀣 𑀉𑀪𑁄𑀧𑁂𑀢𑁂 𑀥𑀫𑁆𑀫𑀸 𑀅𑀦𑀸𑀲𑀯𑀸 𑀮𑁄𑀓𑀼𑀢𑁆𑀢𑀭𑀸𑀢𑀺 𑀲𑀪𑀸𑀕𑀧𑀝𑀺𑀪𑀸𑀕𑁄𑀯 𑀓𑀣𑀺𑀢𑁄. 𑀯𑀺𑀫𑀼𑀢𑁆𑀢𑀺𑀬𑀸 𑀔𑁄, 𑀆𑀯𑀼𑀲𑁄𑀢𑀺 𑀏𑀢𑁆𑀣 𑀅𑀦𑀸𑀲𑀯𑀝𑁆𑀞𑁂𑀦 𑀮𑁄𑀓𑀼𑀢𑁆𑀢𑀭𑀝𑁆𑀞𑁂𑀦 𑀅𑀩𑁆𑀬𑀸𑀓𑀢𑀝𑁆𑀞𑁂𑀦 𑀘 𑀲𑀪𑀸𑀕𑀧𑀝𑀺𑀪𑀸𑀕𑁄𑀯 𑀓𑀣𑀺𑀢𑁄. 𑀅𑀘𑁆𑀘𑀬𑀸𑀲𑀻𑀢𑀺 𑀏𑀢𑁆𑀣 𑀧𑀜𑁆𑀳𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀕𑀢𑁄𑀲𑀻𑀢𑀺 𑀅𑀢𑁆𑀣𑁄. 𑀦𑀸𑀲𑀓𑁆𑀔𑀺 𑀧𑀜𑁆𑀳𑀸𑀦𑀁 𑀧𑀭𑀺𑀬𑀦𑁆𑀢𑀁 𑀕𑀳𑁂𑀢𑀼𑀦𑁆𑀢𑀺 𑀧𑀜𑁆𑀳𑀸𑀦𑀁 𑀧𑀭𑀺𑀘𑁆𑀙𑁂𑀤𑀧𑀫𑀸𑀡𑀁 𑀕𑀳𑁂𑀢𑀼𑀁 𑀦𑀸𑀲𑀓𑁆𑀔𑀺, 𑀅𑀧𑁆𑀧𑀝𑀺𑀪𑀸𑀕𑀥𑀫𑁆𑀫𑀲𑁆𑀲 𑀧𑀝𑀺𑀪𑀸𑀕𑀁 𑀧𑀼𑀘𑁆𑀙𑀺. 𑀦𑀺𑀩𑁆𑀩𑀸𑀦𑀁 𑀦𑀸𑀫𑁂𑀢𑀁 𑀅𑀧𑁆𑀧𑀝𑀺𑀪𑀸𑀕𑀁, 𑀦 𑀲𑀓𑁆𑀓𑀸 𑀦𑀻𑀮𑀁 𑀯𑀸 𑀧𑀻𑀢𑀓𑀁 𑀯𑀸𑀢𑀺 𑀓𑁂𑀦𑀘𑀺 𑀥𑀫𑁆𑀫𑁂𑀦 𑀲𑀤𑁆𑀥𑀺𑀁 𑀧𑀝𑀺𑀪𑀸𑀕𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁. 𑀢𑀜𑁆𑀘 𑀢𑁆𑀯𑀁 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀧𑀼𑀘𑁆𑀙𑀲𑀻𑀢𑀺 𑀅𑀢𑁆𑀣𑁄.

𑀏𑀢𑁆𑀢𑀸𑀯𑀢𑀸 𑀘𑀸𑀬𑀁 𑀉𑀧𑀸𑀲𑀓𑁄 𑀬𑀣𑀸 𑀦𑀸𑀫 𑀲𑀢𑁆𑀢𑀫𑁂 𑀖𑀭𑁂 𑀲𑀮𑀸𑀓𑀪𑀢𑁆𑀢𑀁 𑀮𑀪𑀺𑀢𑁆𑀯𑀸 𑀕𑀢𑁄 𑀪𑀺𑀓𑁆𑀔𑀼 𑀲𑀢𑁆𑀢 𑀖𑀭𑀸𑀦𑀺 𑀅𑀢𑀺𑀓𑁆𑀓𑀫𑁆𑀫 𑀅𑀝𑁆𑀞𑀫𑀲𑁆𑀲 𑀤𑁆𑀯𑀸𑀭𑁂 𑀞𑀺𑀢𑁄 𑀲𑀩𑁆𑀩𑀸𑀦𑀺𑀧𑀺 𑀲𑀢𑁆𑀢 𑀕𑁂𑀳𑀸𑀦𑀺 𑀯𑀺𑀭𑀤𑁆𑀥𑁄𑀯 𑀦 𑀅𑀜𑁆𑀜𑀸𑀲𑀺, 𑀏𑀯𑀫𑁂𑀯𑀁 𑀅𑀧𑁆𑀧𑀝𑀺𑀪𑀸𑀕𑀥𑀫𑁆𑀫𑀲𑁆𑀲 𑀧𑀝𑀺𑀪𑀸𑀕𑀁 𑀧𑀼𑀘𑁆𑀙𑀦𑁆𑀢𑁄 𑀲𑀩𑁆𑀩𑀸𑀲𑀼𑀧𑀺 𑀲𑀢𑁆𑀢𑀲𑀼 𑀲𑀧𑁆𑀧𑀝𑀺𑀪𑀸𑀕𑀧𑀼𑀘𑁆𑀙𑀸𑀲𑀼 𑀯𑀺𑀭𑀤𑁆𑀥𑁄𑀯 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀦𑀺𑀩𑁆𑀩𑀸𑀦𑁄𑀕𑀥𑀦𑁆𑀢𑀺 𑀦𑀺𑀩𑁆𑀩𑀸𑀦𑀩𑁆𑀪𑀦𑁆𑀢𑀭𑀁 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑀁. 𑀦𑀺𑀩𑁆𑀩𑀸𑀦𑀧𑀭𑀸𑀬𑀦𑀦𑁆𑀢𑀺 𑀦𑀺𑀩𑁆𑀩𑀸𑀦𑀁 𑀧𑀭𑀁 𑀅𑀬𑀦𑀫𑀲𑁆𑀲 𑀧𑀭𑀸 𑀕𑀢𑀺, 𑀦 𑀢𑀢𑁄 𑀧𑀭𑀁 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀦𑀺𑀩𑁆𑀩𑀸𑀦𑀁 𑀧𑀭𑀺𑀬𑁄𑀲𑀸𑀦𑀁 𑀅𑀯𑀲𑀸𑀦𑀁 𑀅𑀲𑁆𑀲𑀸𑀢𑀺 𑀦𑀺𑀩𑁆𑀩𑀸𑀦𑀧𑀭𑀺𑀬𑁄𑀲𑀸𑀦𑀁.

𑁪𑁬𑁭. 𑀧𑀡𑁆𑀟𑀺𑀢𑀸𑀢𑀺 𑀧𑀡𑁆𑀟𑀺𑀘𑁆𑀘𑁂𑀦 𑀲𑀫𑀦𑁆𑀦𑀸𑀕𑀢𑀸, 𑀥𑀸𑀢𑀼𑀓𑀼𑀲𑀮𑀸 𑀆𑀬𑀢𑀦𑀓𑀼𑀲𑀮𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀼𑀲𑀮𑀸 𑀞𑀸𑀦𑀸𑀝𑁆𑀞𑀸𑀦𑀓𑀼𑀲𑀮𑀸𑀢𑀺 𑀅𑀢𑁆𑀣𑁄. 𑀫𑀳𑀸𑀧𑀜𑁆𑀜𑀸𑀢𑀺 𑀫𑀳𑀦𑁆𑀢𑁂 𑀅𑀢𑁆𑀣𑁂 𑀫𑀳𑀦𑁆𑀢𑁂 𑀥𑀫𑁆𑀫𑁂 𑀫𑀳𑀦𑁆𑀢𑀸 𑀦𑀺𑀭𑀼𑀢𑁆𑀢𑀺𑀬𑁄 𑀫𑀳𑀦𑁆𑀢𑀸𑀦𑀺 𑀧𑀝𑀺𑀪𑀸𑀦𑀸𑀦𑀺 𑀧𑀭𑀺𑀕𑁆𑀕𑀡𑁆𑀳𑀦𑀲𑀫𑀢𑁆𑀣𑀸𑀬 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀸. 𑀬𑀣𑀸 𑀢𑀁 𑀥𑀫𑁆𑀫𑀤𑀺𑀦𑁆𑀦𑀸𑀬𑀸𑀢𑀺 𑀬𑀣𑀸 𑀥𑀫𑁆𑀫𑀤𑀺𑀦𑁆𑀦𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀩𑁆𑀬𑀸𑀓𑀢𑀁, 𑀅𑀳𑀫𑁆𑀧𑀺 𑀢𑀁 𑀏𑀯𑀫𑁂𑀯𑀁 𑀩𑁆𑀬𑀸𑀓𑀭𑁂𑀬𑁆𑀬𑀦𑁆𑀢𑀺. 𑀏𑀢𑁆𑀢𑀸𑀯𑀢𑀸 𑀘 𑀧𑀦 𑀅𑀬𑀁 𑀲𑀼𑀢𑁆𑀢𑀦𑁆𑀢𑁄 𑀚𑀺𑀦𑀪𑀸𑀲𑀺𑀢𑁄 𑀦𑀸𑀫 𑀚𑀸𑀢𑁄, 𑀦 𑀲𑀸𑀯𑀓𑀪𑀸𑀲𑀺𑀢𑁄. 𑀬𑀣𑀸 𑀳𑀺 𑀭𑀸𑀚𑀬𑀼𑀢𑁆𑀢𑁂𑀳𑀺 𑀮𑀺𑀔𑀺𑀢𑀁 𑀧𑀡𑁆𑀡𑀁 𑀬𑀸𑀯 𑀭𑀸𑀚𑀫𑀼𑀤𑁆𑀤𑀺𑀓𑀸𑀬 𑀦 𑀮𑀜𑁆𑀙𑀺𑀢𑀁 𑀳𑁄𑀢𑀺, 𑀦 𑀢𑀸𑀯 𑀭𑀸𑀚𑀧𑀡𑁆𑀡𑀦𑁆𑀢𑀺 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺; 𑀮𑀜𑁆𑀙𑀺𑀢𑀫𑀢𑁆𑀢𑀁 𑀧𑀦 𑀭𑀸𑀚𑀧𑀡𑁆𑀡𑀁 𑀦𑀸𑀫 𑀳𑁄𑀢𑀺, 𑀢𑀣𑀸, ‘‘𑀅𑀳𑀫𑁆𑀧𑀺 𑀢𑀁 𑀏𑀯𑀫𑁂𑀯 𑀩𑁆𑀬𑀸𑀓𑀭𑁂𑀬𑁆𑀬’’𑀦𑁆𑀢𑀺 𑀇𑀫𑀸𑀬 𑀚𑀺𑀦𑀯𑀘𑀦𑀫𑀼𑀤𑁆𑀤𑀺𑀓𑀸𑀬 𑀮𑀜𑁆𑀙𑀺𑀢𑀢𑁆𑀢𑀸 𑀅𑀬𑀁 𑀲𑀼𑀢𑁆𑀢𑀦𑁆𑀢𑁄 𑀆𑀳𑀘𑁆𑀘𑀯𑀘𑀦𑁂𑀦 𑀚𑀺𑀦𑀪𑀸𑀲𑀺𑀢𑁄 𑀦𑀸𑀫 𑀚𑀸𑀢𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀘𑀽𑀴𑀯𑁂𑀤𑀮𑁆𑀮𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.