𑁫. 𑀘𑀽𑀴𑀲𑀘𑁆𑀘𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁫𑁩. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀘𑀽𑀴𑀲𑀘𑁆𑀘𑀓𑀲𑀼𑀢𑁆𑀢𑀁. 𑀢𑀢𑁆𑀣 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀦𑁆𑀢𑀺 𑀫𑀳𑀸𑀯𑀦𑀁 𑀦𑀸𑀫 𑀲𑀬𑀁𑀚𑀸𑀢𑀁 𑀅𑀭𑁄𑀧𑀺𑀫𑀁 𑀲𑀧𑀭𑀺𑀘𑁆𑀙𑁂𑀤𑀁 𑀫𑀳𑀦𑁆𑀢𑀁 𑀯𑀦𑀁. 𑀓𑀧𑀺𑀮𑀯𑀢𑁆𑀣𑀼𑀲𑀸𑀫𑀦𑁆𑀢𑀸 𑀧𑀦 𑀫𑀳𑀸𑀯𑀦𑀁 𑀳𑀺𑀫𑀯𑀦𑁆𑀢𑁂𑀦 𑀲𑀳 𑀏𑀓𑀸𑀩𑀤𑁆𑀥𑀁 𑀅𑀧𑀭𑀺𑀘𑁆𑀙𑁂𑀤𑀁 𑀳𑀼𑀢𑁆𑀯𑀸 𑀫𑀳𑀸𑀲𑀫𑀼𑀤𑁆𑀤𑀁 𑀆𑀳𑀘𑁆𑀘 𑀞𑀺𑀢𑀁. 𑀇𑀤𑀁 𑀢𑀸𑀤𑀺𑀲𑀁 𑀦 𑀳𑁄𑀢𑀺. 𑀲𑀧𑀭𑀺𑀘𑁆𑀙𑁂𑀤𑀁 𑀫𑀳𑀦𑁆𑀢𑀁 𑀯𑀦𑀦𑁆𑀢𑀺 𑀫𑀳𑀸𑀯𑀦𑀁. 𑀓𑀽𑀝𑀸𑀕𑀸𑀭𑀲𑀸𑀮𑀸 𑀧𑀦 𑀫𑀳𑀸𑀯𑀦𑀁 𑀦𑀺𑀲𑁆𑀲𑀸𑀬 𑀓𑀢𑁂 𑀆𑀭𑀸𑀫𑁂 𑀓𑀽𑀝𑀸𑀕𑀸𑀭𑀁 𑀅𑀦𑁆𑀢𑁄𑀓𑀢𑁆𑀯𑀸 𑀳𑀁𑀲𑀯𑀝𑁆𑀝𑀓𑀘𑁆𑀙𑀦𑁆𑀦𑁂𑀦 𑀓𑀢𑀸 𑀲𑀩𑁆𑀩𑀸𑀓𑀸𑀭𑀲𑀫𑁆𑀧𑀦𑁆𑀦𑀸 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀕𑀦𑁆𑀥𑀓𑀼𑀝𑀺 𑀯𑁂𑀤𑀺𑀢𑀩𑁆𑀩𑀸.

𑀲𑀘𑁆𑀘𑀓𑁄 𑀦𑀺𑀕𑀡𑁆𑀞𑀧𑀼𑀢𑁆𑀢𑁄𑀢𑀺 𑀧𑀼𑀩𑁆𑀩𑁂 𑀓𑀺𑀭 𑀏𑀓𑁄 𑀦𑀺𑀕𑀡𑁆𑀞𑁄 𑀘 𑀦𑀺𑀕𑀡𑁆𑀞𑀻 𑀘 𑀧𑀜𑁆𑀘 𑀧𑀜𑁆𑀘 𑀯𑀸𑀤𑀲𑀢𑀸𑀦𑀺 𑀉𑀕𑁆𑀕𑀳𑁂𑀢𑁆𑀯𑀸, 𑀯𑀸𑀤𑀁 𑀆𑀭𑁄𑀧𑁂𑀲𑁆𑀲𑀸𑀫𑀸𑀢𑀺 𑀚𑀫𑁆𑀩𑀼𑀤𑀻𑀧𑁂 𑀯𑀺𑀘𑀭𑀦𑁆𑀢𑀸 𑀯𑁂𑀲𑀸𑀮𑀺𑀬𑀁 𑀲𑀫𑀸𑀕𑀢𑀸. 𑀮𑀺𑀘𑁆𑀙𑀯𑀺𑀭𑀸𑀚𑀸𑀦𑁄 𑀤𑀺𑀲𑁆𑀯𑀸, 𑁋 ‘‘𑀢𑁆𑀯𑀁 𑀓𑁄, 𑀢𑁆𑀯𑀁 𑀓𑀸’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀦𑀺𑀕𑀡𑁆𑀞𑁄 𑁋 ‘‘𑀅𑀳𑀁 𑀯𑀸𑀤𑀁 𑀆𑀭𑁄𑀧𑁂𑀲𑁆𑀲𑀸𑀫𑀻𑀢𑀺 𑀚𑀫𑁆𑀩𑀼𑀤𑀻𑀧𑁂 𑀯𑀺𑀘𑀭𑀸𑀫𑀻’’𑀢𑀺 𑀆𑀳. 𑀦𑀺𑀕𑀡𑁆𑀞𑀻𑀧𑀺 𑀢𑀣𑀸 𑀆𑀳. 𑀮𑀺𑀘𑁆𑀙𑀯𑀺𑀦𑁄, ‘‘𑀇𑀥𑁂𑀯 𑀅𑀜𑁆𑀜𑀫𑀜𑁆𑀜𑀁 𑀯𑀸𑀤𑀁 𑀆𑀭𑁄𑀧𑁂𑀣𑀸’’𑀢𑀺 𑀆𑀳𑀁𑀲𑀼. 𑀦𑀺𑀕𑀡𑁆𑀞𑀻 𑀅𑀢𑁆𑀢𑀦𑀸 𑀉𑀕𑁆𑀕𑀳𑀺𑀢𑀸𑀦𑀺 𑀧𑀜𑁆𑀘𑀯𑀸𑀤𑀲𑀢𑀸𑀦𑀺 𑀧𑀼𑀘𑁆𑀙𑀺, 𑀦𑀺𑀕𑀡𑁆𑀞𑁄 𑀓𑀣𑁂𑀲𑀺. 𑀦𑀺𑀕𑀡𑁆𑀞𑁂𑀦 𑀧𑀼𑀘𑁆𑀙𑀺𑀢𑁂𑀧𑀺 𑀦𑀺𑀕𑀡𑁆𑀞𑀻 𑀓𑀣𑁂𑀲𑀺𑀬𑁂𑀯. 𑀏𑀓𑀲𑁆𑀲𑀧𑀺 𑀦 𑀚𑀬𑁄, 𑀦 𑀧𑀭𑀸𑀚𑀬𑁄, 𑀉𑀪𑁄 𑀲𑀫𑀲𑀫𑀸𑀯 𑀅𑀳𑁂𑀲𑀼𑀁. 𑀮𑀺𑀘𑁆𑀙𑀯𑀺𑀦𑁄, 𑁋 ‘‘𑀢𑀼𑀫𑁆𑀳𑁂 𑀉𑀪𑁄𑀧𑀺 𑀲𑀫𑀲𑀫𑀸 𑀆𑀳𑀺𑀡𑁆𑀟𑀺𑀢𑁆𑀯𑀸 𑀓𑀺𑀁 𑀓𑀭𑀺𑀲𑁆𑀲𑀣, 𑀇𑀥𑁂𑀯 𑀯𑀲𑀣𑀸’’𑀢𑀺 𑀕𑁂𑀳𑀁 𑀤𑀢𑁆𑀯𑀸 𑀩𑀮𑀺𑀁 𑀧𑀝𑁆𑀞𑀧𑁂𑀲𑀼𑀁. 𑀢𑁂𑀲𑀁 𑀲𑀁𑀯𑀸𑀲𑀫𑀦𑁆𑀯𑀸𑀬 𑀘𑀢𑀲𑁆𑀲𑁄 𑀥𑀻𑀢𑀭𑁄 𑀚𑀸𑀢𑀸, 𑁋 𑀏𑀓𑀸 𑀲𑀘𑁆𑀘𑀸 𑀦𑀸𑀫, 𑀏𑀓𑀸 𑀮𑁄𑀮𑀸 𑀦𑀸𑀫, 𑀏𑀓𑀸 𑀧𑀝𑀸𑀘𑀸𑀭𑀸 𑀦𑀸𑀫, 𑀏𑀓𑀸 𑀆𑀘𑀸𑀭𑀯𑀢𑀻 𑀦𑀸𑀫. 𑀢𑀸𑀧𑀺 𑀧𑀡𑁆𑀟𑀺𑀢𑀸𑀯 𑀅𑀳𑁂𑀲𑀼𑀁, 𑀫𑀸𑀢𑀸𑀧𑀺𑀢𑀽𑀳𑀺 𑀉𑀕𑁆𑀕𑀳𑀺𑀢𑀸𑀦𑀺 𑀧𑀜𑁆𑀘 𑀧𑀜𑁆𑀘 𑀯𑀸𑀤𑀲𑀢𑀸𑀦𑀺 𑀉𑀕𑁆𑀕𑀳𑁂𑀲𑀼𑀁. 𑀢𑀸 𑀯𑀬𑀧𑀢𑁆𑀢𑀸 𑀫𑀸𑀢𑀸𑀧𑀺𑀢𑀭𑁄 𑀅𑀯𑁄𑀘𑀼𑀁 𑁋 ‘‘𑀅𑀫𑁆𑀳𑀸𑀓𑀁 𑀅𑀫𑁆𑀫𑀸 𑀓𑀼𑀮𑁂 𑀤𑀸𑀭𑀺𑀓𑀸 𑀦𑀸𑀫 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀻𑀦𑀺 𑀤𑀢𑁆𑀯𑀸 𑀓𑀼𑀮𑀖𑀭𑀁 𑀧𑁂𑀲𑀺𑀢𑀧𑀼𑀩𑁆𑀩𑀸 𑀦𑀸𑀫 𑀦𑀢𑁆𑀣𑀺. 𑀬𑁄 𑀧𑀦 𑀅𑀕𑀸𑀭𑀺𑀓𑁄 𑀢𑀸𑀲𑀁 𑀯𑀸𑀤𑀁 𑀫𑀤𑁆𑀤𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀲𑁆𑀲 𑀧𑀸𑀤𑀧𑀭𑀺𑀘𑀸𑀭𑀺𑀓𑀸 𑀳𑁄𑀦𑁆𑀢𑀺. 𑀬𑁄 𑀧𑀩𑁆𑀩𑀚𑀺𑀢𑁄 𑀢𑀸𑀲𑀁 𑀫𑀤𑁆𑀤𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀦𑁆𑀢𑀺. 𑀢𑀼𑀫𑁆𑀳𑁂 𑀓𑀺𑀁 𑀓𑀭𑀺𑀲𑁆𑀲𑀣𑀸’’𑀢𑀺? 𑀫𑀬𑀫𑁆𑀧𑀺 𑀏𑀯𑀫𑁂𑀯 𑀓𑀭𑀺𑀲𑁆𑀲𑀸𑀫𑀸𑀢𑀺. 𑀘𑀢𑀲𑁆𑀲𑁄𑀧𑀺 𑀧𑀭𑀺𑀩𑁆𑀩𑀸𑀚𑀺𑀓𑀯𑁂𑀲𑀁 𑀕𑀳𑁂𑀢𑁆𑀯𑀸, ‘‘𑀅𑀬𑀁 𑀚𑀫𑁆𑀩𑀼𑀤𑀻𑀧𑁄 𑀦𑀸𑀫 𑀚𑀫𑁆𑀩𑀼𑀬𑀸 𑀧𑀜𑁆𑀜𑀸𑀬𑀢𑀻’’𑀢𑀺 𑀚𑀫𑁆𑀩𑀼𑀲𑀸𑀔𑀁 𑀕𑀳𑁂𑀢𑁆𑀯𑀸 𑀘𑀸𑀭𑀺𑀓𑀁 𑀧𑀓𑁆𑀓𑀫𑀺𑀁𑀲𑀼. 𑀬𑀁 𑀕𑀸𑀫𑀁 𑀧𑀸𑀧𑀼𑀡𑀦𑁆𑀢𑀺, 𑀢𑀲𑁆𑀲 𑀤𑁆𑀯𑀸𑀭𑁂 𑀧𑀁𑀲𑀼𑀧𑀼𑀜𑁆𑀚𑁂 𑀯𑀸 𑀯𑀸𑀮𑀺𑀓𑀧𑀼𑀜𑁆𑀚𑁂 𑀯𑀸 𑀚𑀫𑁆𑀩𑀼𑀥𑀚𑀁 𑀞𑀧𑁂𑀢𑁆𑀯𑀸, 𑁋 ‘‘𑀬𑁄 𑀯𑀸𑀤𑀁 𑀆𑀭𑁄𑀧𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀲𑁄 𑀇𑀫𑀁 𑀫𑀤𑁆𑀤𑀢𑀽’’𑀢𑀺 𑀯𑀢𑁆𑀯𑀸 𑀕𑀸𑀫𑀁 𑀧𑀯𑀺𑀲𑀦𑁆𑀢𑀺. 𑀏𑀯𑀁 𑀕𑀸𑀫𑁂𑀦 𑀕𑀸𑀫𑀁 𑀯𑀺𑀘𑀭𑀦𑁆𑀢𑀺𑀬𑁄 𑀲𑀸𑀯𑀢𑁆𑀣𑀺𑀁 𑀧𑀸𑀧𑀼𑀡𑀺𑀢𑁆𑀯𑀸 𑀢𑀣𑁂𑀯 𑀕𑀸𑀫𑀤𑁆𑀯𑀸𑀭𑁂 𑀚𑀫𑁆𑀩𑀼𑀥𑀚𑀁 𑀞𑀧𑁂𑀢𑁆𑀯𑀸 𑀲𑀫𑁆𑀧𑀢𑁆𑀢𑀫𑀦𑀼𑀲𑁆𑀲𑀸𑀦𑀁 𑀆𑀭𑁄𑀘𑁂𑀢𑁆𑀯𑀸 𑀅𑀦𑁆𑀢𑁄𑀦𑀕𑀭𑀁 𑀧𑀯𑀺𑀝𑁆𑀞𑀸.

𑀢𑁂𑀦 𑀲𑀫𑀬𑁂𑀦 𑀪𑀕𑀯𑀸 𑀲𑀸𑀯𑀢𑁆𑀣𑀺𑀁 𑀦𑀺𑀲𑁆𑀲𑀸𑀬 𑀚𑁂𑀢𑀯𑀦𑁂 𑀯𑀺𑀳𑀭𑀢𑀺. 𑀅𑀣𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀕𑀺𑀮𑀸𑀦𑁂 𑀧𑀼𑀘𑁆𑀙𑀦𑁆𑀢𑁄 𑀅𑀚𑀕𑁆𑀕𑀺𑀢𑀝𑁆𑀞𑀸𑀦𑀁 𑀚𑀕𑁆𑀕𑀦𑁆𑀢𑁄 𑀅𑀢𑁆𑀢𑀦𑁄 𑀓𑀺𑀘𑁆𑀘𑀫𑀳𑀦𑁆𑀢𑀢𑀸𑀬 𑀅𑀜𑁆𑀜𑁂𑀳𑀺 𑀪𑀺𑀓𑁆𑀔𑀽𑀳𑀺 𑀤𑀺𑀯𑀸𑀢𑀭𑀁 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀦𑁆𑀢𑁄 𑀕𑀸𑀫𑀤𑁆𑀯𑀸𑀭𑁂 𑀚𑀫𑁆𑀩𑀼𑀥𑀚𑀁 𑀤𑀺𑀲𑁆𑀯𑀸, 𑁋 ‘‘𑀓𑀺𑀫𑀺𑀤’’𑀦𑁆𑀢𑀺 𑀤𑀸𑀭𑀓𑁂 𑀧𑀼𑀘𑁆𑀙𑀺. 𑀢𑁂 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀢𑁂𑀦 𑀳𑀺 𑀫𑀤𑁆𑀤𑀣𑀸𑀢𑀺. 𑀦 𑀲𑀓𑁆𑀓𑁄𑀫, 𑀪𑀦𑁆𑀢𑁂, 𑀪𑀸𑀬𑀸𑀫𑀸𑀢𑀺. ‘‘𑀓𑀼𑀫𑀸𑀭𑀸 𑀫𑀸 𑀪𑀸𑀬𑀣, ‘𑀓𑁂𑀦 𑀅𑀫𑁆𑀳𑀸𑀓𑀁 𑀚𑀫𑁆𑀩𑀼𑀥𑀚𑁄 𑀫𑀤𑁆𑀤𑀸𑀧𑀺𑀢𑁄’𑀢𑀺 𑀯𑀼𑀢𑁆𑀢𑁂, 𑀩𑀼𑀤𑁆𑀥𑀲𑀸𑀯𑀓𑁂𑀦 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 𑀫𑀤𑁆𑀤𑀸𑀧𑀺𑀢𑁄, 𑀯𑀸𑀤𑀁 𑀆𑀭𑁄𑀧𑁂𑀢𑀼𑀓𑀸𑀫𑀸 𑀚𑁂𑀢𑀯𑀦𑁂 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀘𑁆𑀙𑀣𑀸𑀢𑀺 𑀯𑀤𑁂𑀬𑁆𑀬𑀸𑀣𑀸’’𑀢𑀺 𑀆𑀳. 𑀢𑁂 𑀣𑁂𑀭𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀚𑀫𑁆𑀩𑀼𑀥𑀚𑀁 𑀫𑀤𑁆𑀤𑀺𑀢𑁆𑀯𑀸 𑀙𑀟𑁆𑀟𑁂𑀲𑀼𑀁. 𑀣𑁂𑀭𑁄 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀯𑀺𑀳𑀸𑀭𑀁 𑀕𑀢𑁄. 𑀧𑀭𑀺𑀩𑁆𑀩𑀸𑀚𑀺𑀓𑀸𑀧𑀺 𑀕𑀸𑀫𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸, ‘‘𑀅𑀫𑁆𑀳𑀸𑀓𑀁 𑀥𑀚𑁄 𑀓𑁂𑀦 𑀫𑀤𑁆𑀤𑀸𑀧𑀺𑀢𑁄’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀤𑀸𑀭𑀓𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀧𑀭𑀺𑀩𑁆𑀩𑀸𑀚𑀺𑀓𑀸 𑀧𑀼𑀦 𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀏𑀓𑁂𑀓𑀁 𑀯𑀻𑀣𑀺𑀁 𑀕𑀳𑁂𑀢𑁆𑀯𑀸, 𑁋 ‘‘𑀩𑀼𑀤𑁆𑀥𑀲𑀸𑀯𑀓𑁄 𑀓𑀺𑀭 𑀲𑀸𑀭𑀺𑀧𑀼𑀢𑁆𑀢𑁄 𑀦𑀸𑀫 𑀅𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀯𑀸𑀤𑀁 𑀓𑀭𑀺𑀲𑁆𑀲𑀢𑀺, 𑀲𑁄𑀢𑀼𑀓𑀸𑀫𑀸 𑀦𑀺𑀓𑁆𑀔𑀫𑀣𑀸’’𑀢𑀺 𑀆𑀭𑁄𑀘𑁂𑀲𑀼𑀁. 𑀫𑀳𑀸𑀚𑀦𑁄 𑀦𑀺𑀓𑁆𑀔𑀫𑀺, 𑀢𑁂𑀦 𑀲𑀤𑁆𑀥𑀺𑀁 𑀧𑀭𑀺𑀩𑁆𑀩𑀸𑀚𑀺𑀓𑀸 𑀚𑁂𑀢𑀯𑀦𑀁 𑀅𑀕𑀫𑀺𑀁𑀲𑀼.

𑀣𑁂𑀭𑁄 𑁋 ‘‘𑀅𑀫𑁆𑀳𑀸𑀓𑀁 𑀯𑀲𑀦𑀝𑁆𑀞𑀸𑀦𑁂 𑀫𑀸𑀢𑀼𑀕𑀸𑀫𑀲𑁆𑀲 𑀆𑀕𑀫𑀦𑀁 𑀦𑀸𑀫 𑀅𑀨𑀸𑀲𑀼𑀓’’𑀦𑁆𑀢𑀺 𑀯𑀺𑀳𑀸𑀭𑀫𑀚𑁆𑀛𑁂 𑀦𑀺𑀲𑀻𑀤𑀺. 𑀧𑀭𑀺𑀩𑁆𑀩𑀸𑀚𑀺𑀓𑀸𑀬𑁄 𑀕𑀦𑁆𑀢𑁆𑀯𑀸 𑀣𑁂𑀭𑀁 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀢𑀼𑀫𑁆𑀳𑁂𑀳𑀺 𑀅𑀫𑁆𑀳𑀸𑀓𑀁 𑀥𑀚𑁄 𑀫𑀤𑁆𑀤𑀸𑀧𑀺𑀢𑁄’’𑀢𑀺? 𑀆𑀫, 𑀫𑀬𑀸 𑀫𑀤𑁆𑀤𑀸𑀧𑀺𑀢𑁄𑀢𑀺. 𑀫𑀬𑀁 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀯𑀸𑀤𑀁 𑀓𑀭𑀺𑀲𑁆𑀲𑀸𑀫𑀸𑀢𑀺. 𑀲𑀸𑀥𑀼 𑀓𑀭𑁄𑀣, 𑀓𑀲𑁆𑀲 𑀧𑀼𑀘𑁆𑀙𑀸 𑀓𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑀁 𑀳𑁄𑀢𑀽𑀢𑀺? 𑀧𑀼𑀘𑁆𑀙𑀸 𑀦𑀸𑀫 𑀅𑀫𑁆𑀳𑀸𑀓𑀁 𑀧𑀢𑁆𑀢𑀸, 𑀢𑀼𑀫𑁆𑀳𑁂 𑀧𑀦 𑀫𑀸𑀢𑀼𑀕𑀸𑀫𑀸 𑀦𑀸𑀫 𑀧𑀞𑀫𑀁 𑀧𑀼𑀘𑁆𑀙𑀣𑀸𑀢𑀺 𑀆𑀳. 𑀢𑀸 𑀘𑀢𑀲𑁆𑀲𑁄𑀧𑀺 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀞𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀦𑀁 𑀲𑀦𑁆𑀢𑀺𑀓𑁂 𑀉𑀕𑁆𑀕𑀳𑀺𑀢𑀁 𑀯𑀸𑀤𑀲𑀳𑀲𑁆𑀲𑀁 𑀧𑀼𑀘𑁆𑀙𑀺𑀁𑀲𑀼. 𑀣𑁂𑀭𑁄 𑀔𑀕𑁆𑀕𑁂𑀦 𑀓𑀼𑀫𑀼𑀤𑀦𑀸𑀴𑀁 𑀙𑀺𑀦𑁆𑀤𑀦𑁆𑀢𑁄 𑀯𑀺𑀬 𑀧𑀼𑀘𑁆𑀙𑀺𑀢𑀁 𑀧𑀼𑀘𑁆𑀙𑀺𑀢𑀁 𑀦𑀺𑀚𑁆𑀚𑀝𑀁 𑀦𑀺𑀕𑁆𑀕𑀡𑁆𑀞𑀺𑀁 𑀓𑀢𑁆𑀯𑀸 𑀓𑀣𑁂𑀲𑀺, 𑀓𑀣𑁂𑀢𑁆𑀯𑀸 𑀧𑀼𑀦 𑀧𑀼𑀘𑁆𑀙𑀣𑀸𑀢𑀺 𑀆𑀳. 𑀏𑀢𑁆𑀢𑀓𑀫𑁂𑀯, 𑀪𑀦𑁆𑀢𑁂, 𑀫𑀬𑀁 𑀚𑀸𑀦𑀸𑀫𑀸𑀢𑀺. 𑀣𑁂𑀭𑁄 𑀆𑀳 𑁋 ‘‘𑀢𑀼𑀫𑁆𑀳𑁂𑀳𑀺 𑀯𑀸𑀤𑀲𑀳𑀲𑁆𑀲𑀁 𑀧𑀼𑀘𑁆𑀙𑀺𑀢𑀁 𑀫𑀬𑀸 𑀓𑀣𑀺𑀢𑀁, 𑀅𑀳𑀁 𑀧𑀦 𑀏𑀓𑀁 𑀬𑁂𑀯 𑀧𑀜𑁆𑀳𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀺, 𑀢𑀁 𑀢𑀼𑀫𑁆𑀳𑁂 𑀓𑀣𑁂𑀣𑀸’’𑀢𑀺. 𑀢𑀸 𑀣𑁂𑀭𑀲𑁆𑀲 𑀯𑀺𑀲𑀬𑀁 𑀤𑀺𑀲𑁆𑀯𑀸, ‘‘𑀧𑀼𑀘𑁆𑀙𑀣, 𑀪𑀦𑁆𑀢𑁂, 𑀩𑁆𑀬𑀸𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. ‘‘𑀯𑀤, 𑀪𑀦𑁆𑀢𑁂, 𑀚𑀸𑀦𑀫𑀸𑀦𑀸 𑀩𑁆𑀬𑀸𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀧𑀼𑀦 𑀆𑀳𑀁𑀲𑀼.

𑀣𑁂𑀭𑁄 𑀅𑀬𑀁 𑀧𑀦 𑀓𑀼𑀮𑀧𑀼𑀢𑁆𑀢𑁂 𑀧𑀩𑁆𑀩𑀸𑀚𑁂𑀢𑁆𑀯𑀸 𑀧𑀞𑀫𑀁 𑀲𑀺𑀓𑁆𑀔𑀸𑀧𑁂𑀢𑀩𑁆𑀩𑀧𑀜𑁆𑀳𑁄𑀢𑀺 𑀯𑀢𑁆𑀯𑀸, 𑁋 ‘‘𑀏𑀓𑀁 𑀦𑀸𑀫 𑀓𑀺’’𑀦𑁆𑀢𑀺 𑀧𑀼𑀘𑁆𑀙𑀺. 𑀢𑀸 𑀦𑁂𑀯 𑀅𑀦𑁆𑀢𑀁, 𑀦 𑀓𑁄𑀝𑀺𑀁 𑀅𑀤𑁆𑀤𑀲𑀁𑀲𑀼. 𑀣𑁂𑀭𑁄 𑀓𑀣𑁂𑀣𑀸𑀢𑀺 𑀆𑀳. 𑀦 𑀧𑀲𑁆𑀲𑀸𑀫, 𑀪𑀦𑁆𑀢𑁂𑀢𑀺. 𑀢𑀼𑀫𑁆𑀳𑁂𑀳𑀺 𑀯𑀸𑀤𑀲𑀳𑀲𑁆𑀲𑀁 𑀧𑀼𑀘𑁆𑀙𑀺𑀢𑀁 𑀫𑀬𑀸 𑀓𑀣𑀺𑀢𑀁, 𑀫𑀬𑁆𑀳𑀁 𑀢𑀼𑀫𑁆𑀳𑁂 𑀏𑀓𑀁 𑀧𑀜𑁆𑀳𑀫𑁆𑀧𑀺 𑀓𑀣𑁂𑀢𑀼𑀁 𑀦 𑀲𑀓𑁆𑀓𑁄𑀣, 𑀏𑀯𑀁 𑀲𑀦𑁆𑀢𑁂 𑀓𑀲𑁆𑀲 𑀚𑀬𑁄 𑀓𑀲𑁆𑀲 𑀧𑀭𑀸𑀚𑀬𑁄𑀢𑀺? 𑀢𑀼𑀫𑁆𑀳𑀸𑀓𑀁, 𑀪𑀦𑁆𑀢𑁂, 𑀚𑀬𑁄, 𑀅𑀫𑁆𑀳𑀸𑀓𑀁 𑀧𑀭𑀸𑀚𑀬𑁄𑀢𑀺. 𑀇𑀤𑀸𑀦𑀺 𑀓𑀺𑀁 𑀓𑀭𑀺𑀲𑁆𑀲𑀣𑀸𑀢𑀺? 𑀢𑀸 𑀫𑀸𑀢𑀸𑀧𑀺𑀢𑀽𑀳𑀺 𑀯𑀼𑀢𑁆𑀢𑀯𑀘𑀦𑀁 𑀆𑀭𑁄𑀘𑁂𑀢𑁆𑀯𑀸, ‘‘𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀲𑁆𑀲𑀸𑀫𑀸’’𑀢𑀺 𑀆𑀳𑀁𑀲𑀼. 𑀢𑀼𑀫𑁆𑀳𑁂 𑀫𑀸𑀢𑀼𑀕𑀸𑀫𑀸 𑀦𑀸𑀫 𑀅𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀅𑀫𑁆𑀳𑀸𑀓𑀁 𑀧𑀦 𑀲𑀸𑀲𑀦𑀁 𑀕𑀳𑁂𑀢𑁆𑀯𑀸 𑀪𑀺𑀓𑁆𑀔𑀼𑀦𑀺𑀉𑀧𑀲𑁆𑀲𑀬𑀁 𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑀣𑀸𑀢𑀺. 𑀢𑀸 𑀲𑀸𑀥𑀽𑀢𑀺 𑀣𑁂𑀭𑀲𑁆𑀲 𑀲𑀸𑀲𑀦𑀁 𑀕𑀳𑁂𑀢𑁆𑀯𑀸 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑀺𑀁𑀲𑀼. 𑀧𑀩𑁆𑀩𑀚𑀺𑀢𑀸 𑀘 𑀧𑀦 𑀅𑀧𑁆𑀧𑀫𑀢𑁆𑀢𑀸 𑀆𑀢𑀸𑀧𑀺𑀦𑀺𑀬𑁄 𑀳𑀼𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼.

𑀅𑀬𑀁 𑀲𑀘𑁆𑀘𑀓𑁄 𑀢𑀸𑀲𑀁 𑀘𑀢𑀼𑀦𑁆𑀦𑀫𑁆𑀧𑀺 𑀓𑀦𑀺𑀝𑁆𑀞𑀪𑀸𑀢𑀺𑀓𑁄. 𑀢𑀸𑀳𑀺 𑀘𑀢𑀽𑀳𑀺𑀧𑀺 𑀉𑀢𑁆𑀢𑀭𑀺𑀢𑀭𑀧𑀜𑁆𑀜𑁄, 𑀫𑀸𑀢𑀸𑀧𑀺𑀢𑀽𑀦𑀫𑁆𑀧𑀺 𑀲𑀦𑁆𑀢𑀺𑀓𑀸 𑀯𑀸𑀤𑀲𑀳𑀲𑁆𑀲𑀁, 𑀢𑀢𑁄 𑀩𑀳𑀼𑀢𑀭𑀜𑁆𑀘 𑀩𑀸𑀳𑀺𑀭𑀲𑀫𑀬𑀁 𑀉𑀕𑁆𑀕𑀳𑁂𑀢𑁆𑀯𑀸 𑀓𑀢𑁆𑀣𑀘𑀺 𑀅𑀕𑀦𑁆𑀢𑁆𑀯𑀸 𑀭𑀸𑀚𑀤𑀸𑀭𑀓𑁂 𑀲𑀺𑀧𑁆𑀧𑀁 𑀲𑀺𑀓𑁆𑀔𑀸𑀧𑁂𑀦𑁆𑀢𑁄 𑀢𑀢𑁆𑀣𑁂𑀯 𑀯𑁂𑀲𑀸𑀮𑀺𑀬𑀁 𑀯𑀲𑀢𑀺, 𑀧𑀜𑁆𑀜𑀸𑀬 𑀅𑀢𑀺𑀧𑀽𑀭𑀺𑀢𑀢𑁆𑀢𑀸 𑀓𑀼𑀘𑁆𑀙𑀺 𑀫𑁂 𑀪𑀺𑀚𑁆𑀚𑁂𑀬𑁆𑀬𑀸𑀢𑀺 𑀪𑀻𑀢𑁄 𑀅𑀬𑀧𑀝𑁆𑀝𑁂𑀦 𑀓𑀼𑀘𑁆𑀙𑀺𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀘𑀭𑀢𑀺, 𑀇𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀲𑀘𑁆𑀘𑀓𑁄 𑀦𑀺𑀕𑀡𑁆𑀞𑀧𑀼𑀢𑁆𑀢𑁄’’𑀢𑀺.

𑀪𑀲𑁆𑀲𑀧𑁆𑀧𑀯𑀸𑀤𑀓𑁄𑀢𑀺 𑀪𑀲𑁆𑀲𑀁 𑀯𑀼𑀘𑁆𑀘𑀢𑀺 𑀓𑀣𑀸𑀫𑀕𑁆𑀕𑁄, 𑀢𑀁 𑀧𑀯𑀤𑀢𑀺 𑀓𑀣𑁂𑀢𑀻𑀢𑀺 𑀪𑀲𑁆𑀲𑀧𑁆𑀧𑀯𑀸𑀤𑀓𑁄. 𑀧𑀡𑁆𑀟𑀺𑀢𑀯𑀸𑀤𑁄𑀢𑀺 𑀅𑀳𑀁 𑀧𑀡𑁆𑀟𑀺𑀢𑁄𑀢𑀺 𑀏𑀯𑀁 𑀯𑀸𑀤𑁄. 𑀲𑀸𑀥𑀼𑀲𑀫𑁆𑀫𑀢𑁄 𑀩𑀳𑀼𑀚𑀦𑀲𑁆𑀲𑀸𑀢𑀺 𑀬𑀁 𑀬𑀁 𑀦𑀓𑁆𑀔𑀢𑁆𑀢𑀘𑀸𑀭𑁂𑀦 𑀆𑀤𑀺𑀲𑀢𑀺, 𑀢𑀁 𑀢𑀁 𑀬𑁂𑀪𑀼𑀬𑁆𑀬𑁂𑀦 𑀢𑀣𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀅𑀬𑀁 𑀲𑀸𑀥𑀼𑀮𑀤𑁆𑀥𑀺𑀓𑁄 𑀪𑀤𑁆𑀤𑀓𑁄𑀢𑀺 𑀏𑀯𑀁 𑀲𑀫𑁆𑀫𑀢𑁄 𑀫𑀳𑀸𑀚𑀦𑀲𑁆𑀲. 𑀯𑀸𑀤𑁂𑀦 𑀯𑀸𑀤𑀁 𑀲𑀫𑀸𑀭𑀤𑁆𑀥𑁄𑀢𑀺 𑀓𑀣𑀸𑀫𑀕𑁆𑀕𑁂𑀦 𑀤𑁄𑀲𑀁 𑀆𑀭𑁄𑀧𑀺𑀢𑁄. 𑀆𑀬𑀲𑁆𑀫𑀸 𑀅𑀲𑁆𑀲𑀚𑀻𑀢𑀺 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀆𑀘𑀭𑀺𑀬𑁄 𑀅𑀲𑁆𑀲𑀚𑀺𑀢𑁆𑀣𑁂𑀭𑁄. 𑀚𑀗𑁆𑀖𑀸𑀯𑀺𑀳𑀸𑀭𑀁 𑀅𑀦𑀼𑀘𑀗𑁆𑀓𑀫𑀫𑀸𑀦𑁄𑀢𑀺 𑀢𑀢𑁄 𑀢𑀢𑁄 𑀮𑀺𑀘𑁆𑀙𑀯𑀺𑀭𑀸𑀚𑀕𑁂𑀳𑀢𑁄 𑀢𑀁 𑀢𑀁 𑀕𑁂𑀳𑀁 𑀕𑀫𑀦𑀢𑁆𑀣𑀸𑀬 𑀅𑀦𑀼𑀘𑀗𑁆𑀓𑀫𑀫𑀸𑀦𑁄. 𑀬𑁂𑀦𑀸𑀬𑀲𑁆𑀫𑀸 𑀅𑀲𑁆𑀲𑀚𑀺 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀓𑀲𑁆𑀫𑀸 𑀉𑀧𑀲𑀗𑁆𑀓𑀫𑀺? 𑀲𑀫𑀬𑀚𑀸𑀦𑀦𑀢𑁆𑀣𑀁.

𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀅𑀳𑀁 ‘𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀯𑀸𑀤𑀁 𑀆𑀭𑁄𑀧𑁂𑀲𑁆𑀲𑀸𑀫𑀻’𑀢𑀺 𑀆𑀳𑀺𑀡𑁆𑀟𑀸𑀫𑀺, ‘𑀲𑀫𑀬𑀁 𑀧𑀦𑀲𑁆𑀲 𑀦 𑀚𑀸𑀦𑀸𑀫𑀻’𑀢𑀺 𑀦 𑀆𑀭𑁄𑀧𑁂𑀲𑀺𑀁. 𑀧𑀭𑀲𑁆𑀲 𑀳𑀺 𑀲𑀫𑀬𑀁 𑀜𑀢𑁆𑀯𑀸 𑀆𑀭𑁄𑀧𑀺𑀢𑁄 𑀯𑀸𑀤𑁄 𑀲𑁆𑀯𑀸𑀭𑁄𑀧𑀺𑀢𑁄 𑀦𑀸𑀫 𑀳𑁄𑀢𑀺. 𑀅𑀬𑀁 𑀧𑀦 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀸𑀯𑀓𑁄 𑀧𑀜𑁆𑀜𑀸𑀬𑀢𑀺 𑀅𑀲𑁆𑀲𑀚𑀺𑀢𑁆𑀣𑁂𑀭𑁄; 𑀲𑁄 𑀅𑀢𑁆𑀢𑀦𑁄 𑀲𑀢𑁆𑀣𑀼 𑀲𑀫𑀬𑁂 𑀓𑁄𑀯𑀺𑀤𑁄, 𑀏𑀢𑀸𑀳𑀁 𑀧𑀼𑀘𑁆𑀙𑀺𑀢𑁆𑀯𑀸 𑀓𑀣𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀯𑀸𑀤𑀁 𑀆𑀭𑁄𑀧𑁂𑀲𑁆𑀲𑀸𑀫𑀻’’𑀢𑀺. 𑀢𑀲𑁆𑀫𑀸 𑀉𑀧𑀲𑀗𑁆𑀓𑀫𑀺. 𑀯𑀺𑀦𑁂𑀢𑀻𑀢𑀺 𑀓𑀣𑀁 𑀯𑀺𑀦𑁂𑀢𑀺, 𑀓𑀣𑀁 𑀲𑀺𑀓𑁆𑀔𑀸𑀧𑁂𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀣𑁂𑀭𑁄 𑀧𑀦 𑀬𑀲𑁆𑀫𑀸 𑀤𑀼𑀓𑁆𑀔𑀦𑁆𑀢𑀺 𑀯𑀼𑀢𑁆𑀢𑁂 𑀉𑀧𑀸𑀭𑀫𑁆𑀪𑀲𑁆𑀲 𑀑𑀓𑀸𑀲𑁄 𑀳𑁄𑀢𑀺, 𑀫𑀕𑁆𑀕𑀨𑀮𑀸𑀦𑀺𑀧𑀺 𑀧𑀭𑀺𑀬𑀸𑀬𑁂𑀦 𑀤𑀼𑀓𑁆𑀔𑀦𑁆𑀢𑀺 𑀆𑀕𑀢𑀸𑀦𑀺, 𑀅𑀬𑀜𑁆𑀘 𑀤𑀼𑀓𑁆𑀔𑀦𑁆𑀢𑀺 𑀯𑀼𑀢𑁆𑀢𑁂 𑀣𑁂𑀭𑀁 𑀧𑀼𑀘𑁆𑀙𑁂𑀬𑁆𑀬 𑁋 ‘‘𑀪𑁄 𑀅𑀲𑁆𑀲𑀚𑀺, 𑀓𑀺𑀫𑀢𑁆𑀣𑀁 𑀢𑀼𑀫𑁆𑀳𑁂 𑀧𑀩𑁆𑀩𑀚𑀺𑀢𑀸’’𑀢𑀺. 𑀢𑀢𑁄 ‘‘𑀫𑀕𑁆𑀕𑀨𑀮𑀢𑁆𑀣𑀸𑀬𑀸’’𑀢𑀺 𑀯𑀼𑀢𑁆𑀢𑁂, 𑁋 ‘‘𑀦𑀬𑀺𑀤𑀁, 𑀪𑁄 𑀅𑀲𑁆𑀲𑀚𑀺, 𑀢𑀼𑀫𑁆𑀳𑀸𑀓𑀁 𑀲𑀸𑀲𑀦𑀁 𑀦𑀸𑀫, 𑀫𑀳𑀸𑀆𑀖𑀸𑀢𑀦𑀁 𑀦𑀸𑀫𑁂𑀢𑀁, 𑀦𑀺𑀭𑀬𑀼𑀲𑁆𑀲𑀤𑁄 𑀦𑀸𑀫𑁂𑀲, 𑀦𑀢𑁆𑀣𑀺 𑀢𑀼𑀫𑁆𑀳𑀸𑀓𑀁 𑀲𑀼𑀔𑀸𑀲𑀸, 𑀉𑀝𑁆𑀞𑀸𑀬𑀼𑀝𑁆𑀞𑀸𑀬 𑀤𑀼𑀓𑁆𑀔𑀫𑁂𑀯 𑀚𑀺𑀭𑀸𑀧𑁂𑀦𑁆𑀢𑀸 𑀆𑀳𑀺𑀡𑁆𑀟𑀣𑀸’’𑀢𑀺 𑀤𑁄𑀲𑀁 𑀆𑀭𑁄𑀧𑁂𑀬𑁆𑀬, 𑀢𑀲𑁆𑀫𑀸 𑀧𑀭𑀯𑀸𑀤𑀺𑀲𑁆𑀲 𑀧𑀭𑀺𑀬𑀸𑀬𑀓𑀣𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀬𑀣𑀸 𑀏𑀲 𑀅𑀧𑁆𑀧𑀢𑀺𑀝𑁆𑀞𑁄 𑀳𑁄𑀢𑀺, 𑀏𑀯𑀫𑀲𑁆𑀲 𑀦𑀺𑀧𑁆𑀧𑀭𑀺𑀬𑀸𑀬𑀓𑀣𑀁 𑀓𑀣𑁂𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, ‘‘𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀅𑀦𑀺𑀘𑁆𑀘’’𑀦𑁆𑀢𑀺 𑀇𑀫𑀁 𑀅𑀦𑀺𑀘𑁆𑀘𑀸𑀦𑀢𑁆𑀢𑀯𑀲𑁂𑀦𑁂𑀯 𑀓𑀣𑀁 𑀓𑀣𑁂𑀢𑀺. 𑀤𑀼𑀲𑁆𑀲𑀼𑀢𑀦𑁆𑀢𑀺 𑀲𑁄𑀢𑀼𑀁 𑀅𑀬𑀼𑀢𑁆𑀢𑀁.

𑁩𑁫𑁪. 𑀲𑀦𑁆𑀣𑀸𑀕𑀸𑀭𑁂𑀢𑀺 𑀭𑀸𑀚𑀓𑀼𑀮𑀸𑀦𑀁 𑀅𑀢𑁆𑀣𑀸𑀦𑀼𑀲𑀸𑀲𑀦𑀲𑀦𑁆𑀣𑀸𑀕𑀸𑀭𑀲𑀸𑀮𑀸𑀬𑀁. 𑀬𑁂𑀦 𑀢𑁂 𑀮𑀺𑀘𑁆𑀙𑀯𑀻 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀅𑀳𑀁 𑀧𑀼𑀩𑁆𑀩𑁂 𑀲𑀫𑀬𑀁 𑀅𑀚𑀸𑀦𑀦𑀪𑀸𑀯𑁂𑀦 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀯𑀸𑀤𑀁 𑀦 𑀆𑀭𑁄𑀧𑁂𑀲𑀺𑀁, 𑀇𑀤𑀸𑀦𑀺 𑀧𑀦𑀲𑁆𑀲 𑀫𑀳𑀸𑀲𑀸𑀯𑀓𑁂𑀦 𑀓𑀣𑀺𑀢𑀁 𑀲𑀫𑀬𑀁 𑀚𑀸𑀦𑀸𑀫𑀺, 𑀇𑀫𑁂 𑀘 𑀫𑀫 𑀅𑀦𑁆𑀢𑁂𑀯𑀸𑀲𑀺𑀓𑀸 𑀧𑀜𑁆𑀘𑀲𑀢𑀸 𑀮𑀺𑀘𑁆𑀙𑀯𑀻 𑀲𑀦𑁆𑀦𑀺𑀧𑀢𑀺𑀢𑀸. 𑀏𑀢𑁂𑀳𑀺 𑀲𑀤𑁆𑀥𑀺𑀁 𑀕𑀦𑁆𑀢𑁆𑀯𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀯𑀸𑀤𑀁 𑀆𑀭𑁄𑀧𑁂𑀲𑁆𑀲𑀸𑀫𑀻’’𑀢𑀺 𑀢𑀲𑁆𑀫𑀸 𑀉𑀧𑀲𑀗𑁆𑀓𑀫𑀺. 𑀜𑀸𑀢𑀜𑁆𑀜𑀢𑀭𑁂𑀦𑀸𑀢𑀺 𑀜𑀸𑀢𑁂𑀲𑀼 𑀅𑀪𑀺𑀜𑁆𑀜𑀸𑀢𑁂𑀲𑀼 𑀧𑀜𑁆𑀘𑀯𑀕𑁆𑀕𑀺𑀬𑀢𑁆𑀣𑁂𑀭𑁂𑀲𑀼 𑀅𑀜𑁆𑀜𑀢𑀭𑁂𑀦. 𑀧𑀢𑀺𑀝𑁆𑀞𑀺𑀢𑀦𑁆𑀢𑀺 𑀬𑀣𑀸 𑀢𑁂𑀦 𑀧𑀢𑀺𑀝𑁆𑀞𑀺𑀢𑀁. 𑀲𑀘𑁂 𑀏𑀯𑀁 𑀧𑀢𑀺𑀝𑁆𑀞𑀺𑀲𑁆𑀲𑀢𑀺, 𑀅𑀣 𑀧𑀦 𑀅𑀜𑁆𑀜𑀤𑁂𑀯 𑀯𑀓𑁆𑀔𑀢𑀺, 𑀢𑀢𑁆𑀭 𑀫𑀬𑀸 𑀓𑀺𑀁 𑀲𑀓𑁆𑀓𑀸 𑀓𑀸𑀢𑀼𑀦𑁆𑀢𑀺 𑀇𑀤𑀸𑀦𑁂𑀯 𑀧𑀺𑀝𑁆𑀞𑀺𑀁 𑀧𑀭𑀺𑀯𑀢𑁆𑀢𑁂𑀦𑁆𑀢𑁄 𑀆𑀳. 𑀆𑀓𑀟𑁆𑀠𑁂𑀬𑁆𑀬𑀸𑀢𑀺 𑀅𑀢𑁆𑀢𑀦𑁄 𑀅𑀪𑀺𑀫𑀼𑀔𑀁 𑀓𑀟𑁆𑀠𑁂𑀬𑁆𑀬. 𑀧𑀭𑀺𑀓𑀟𑁆𑀠𑁂𑀬𑁆𑀬𑀸𑀢𑀺 𑀧𑀼𑀭𑀢𑁄 𑀧𑀝𑀺𑀧𑀡𑀸𑀫𑁂𑀬𑁆𑀬. 𑀲𑀫𑁆𑀧𑀭𑀺𑀓𑀟𑁆𑀠𑁂𑀬𑁆𑀬𑀸𑀢𑀺 𑀓𑀸𑀮𑁂𑀦 𑀆𑀓𑀟𑁆𑀠𑁂𑀬𑁆𑀬, 𑀓𑀸𑀮𑁂𑀦 𑀧𑀭𑀺𑀓𑀟𑁆𑀠𑁂𑀬𑁆𑀬. 𑀲𑁄𑀡𑁆𑀟𑀺𑀓𑀸𑀓𑀺𑀮𑀜𑁆𑀚𑀦𑁆𑀢𑀺 𑀲𑀼𑀭𑀸𑀖𑀭𑁂 𑀧𑀺𑀝𑁆𑀞𑀓𑀺𑀮𑀜𑁆𑀚𑀁. 𑀲𑁄𑀡𑁆𑀟𑀺𑀓𑀸𑀥𑀼𑀢𑁆𑀢𑁄𑀢𑀺 𑀲𑀼𑀭𑀸𑀥𑀼𑀢𑁆𑀢𑁄. 𑀯𑀸𑀮𑀁 𑀓𑀡𑁆𑀡𑁂 𑀕𑀳𑁂𑀢𑁆𑀯𑀸𑀢𑀺 𑀲𑀼𑀭𑀸𑀧𑀭𑀺𑀲𑁆𑀲𑀸𑀯𑀦𑀢𑁆𑀣𑀯𑀺𑀓𑀁 𑀥𑁄𑀯𑀺𑀢𑀼𑀓𑀸𑀫𑁄 𑀓𑀲𑀝𑀦𑀺𑀥𑀼𑀦𑀦𑀢𑁆𑀣𑀁 𑀉𑀪𑁄𑀲𑀼 𑀓𑀡𑁆𑀡𑁂𑀲𑀼 𑀕𑀳𑁂𑀢𑁆𑀯𑀸. 𑀑𑀥𑀼𑀦𑁂𑀬𑁆𑀬𑀸𑀢𑀺 𑀅𑀥𑁄𑀫𑀼𑀔𑀁 𑀓𑀢𑁆𑀯𑀸 𑀥𑀼𑀦𑁂𑀬𑁆𑀬. 𑀦𑀺𑀤𑁆𑀥𑀼𑀦𑁂𑀬𑁆𑀬𑀸𑀢𑀺 𑀉𑀤𑁆𑀥𑀁𑀫𑀼𑀔𑀁 𑀓𑀢𑁆𑀯𑀸 𑀥𑀼𑀦𑁂𑀬𑁆𑀬. 𑀦𑀺𑀧𑁆𑀨𑁄𑀝𑁂𑀬𑁆𑀬𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀧𑀧𑁆𑀨𑁄𑀝𑁂𑀬𑁆𑀬. 𑀲𑀸𑀡𑀥𑁄𑀯𑀺𑀓𑀁 𑀦𑀸𑀫𑀸𑀢𑀺 𑀏𑀢𑁆𑀣 𑀫𑀦𑀼𑀲𑁆𑀲𑀸 𑀲𑀸𑀡𑀲𑀸𑀝𑀓𑀓𑀭𑀡𑀢𑁆𑀣𑀁 𑀲𑀸𑀡𑀯𑀸𑀓𑁂 𑀕𑀳𑁂𑀢𑁆𑀯𑀸 𑀫𑀼𑀝𑁆𑀞𑀺𑀁 𑀫𑀼𑀝𑁆𑀞𑀺𑀁 𑀩𑀦𑁆𑀥𑀺𑀢𑁆𑀯𑀸 𑀉𑀤𑀓𑁂 𑀧𑀓𑁆𑀔𑀺𑀧𑀦𑁆𑀢𑀺. 𑀢𑁂 𑀢𑀢𑀺𑀬𑀤𑀺𑀯𑀲𑁂 𑀲𑀼𑀝𑁆𑀞𑀼 𑀓𑀺𑀮𑀺𑀦𑁆𑀦𑀸 𑀳𑁄𑀦𑁆𑀢𑀺. 𑀅𑀣 𑀫𑀦𑀼𑀲𑁆𑀲𑀸 𑀅𑀫𑁆𑀩𑀺𑀮𑀬𑀸𑀕𑀼𑀲𑀼𑀭𑀸𑀤𑀻𑀦𑀺 𑀆𑀤𑀸𑀬 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀲𑀸𑀡𑀫𑀼𑀝𑁆𑀞𑀺𑀁 𑀕𑀳𑁂𑀢𑁆𑀯𑀸, 𑀤𑀓𑁆𑀔𑀺𑀡𑀢𑁄 𑀯𑀸𑀫𑀢𑁄 𑀲𑀫𑁆𑀫𑀼𑀔𑀸 𑀘𑀸𑀢𑀺 𑀢𑀻𑀲𑀼 𑀨𑀮𑀓𑁂𑀲𑀼 𑀲𑀓𑀺𑀁 𑀤𑀓𑁆𑀔𑀺𑀡𑀨𑀮𑀓𑁂, 𑀲𑀓𑀺𑀁 𑀯𑀸𑀫𑀨𑀮𑀓𑁂, 𑀲𑀓𑀺𑀁 𑀲𑀫𑁆𑀫𑀼𑀔𑀨𑀮𑀓𑁂 𑀧𑀳𑀭𑀦𑁆𑀢𑀸 𑀅𑀫𑁆𑀩𑀺𑀮𑀬𑀸𑀕𑀼𑀲𑀼𑀭𑀸𑀤𑀻𑀦𑀺 𑀪𑀼𑀜𑁆𑀚𑀦𑁆𑀢𑀸 𑀧𑀺𑀯𑀦𑁆𑀢𑀸 𑀔𑀸𑀤𑀦𑁆𑀢𑀸 𑀥𑁄𑀯𑀦𑁆𑀢𑀺. 𑀫𑀳𑀦𑁆𑀢𑀸 𑀓𑀻𑀴𑀸 𑀳𑁄𑀢𑀺. 𑀭𑀜𑁆𑀜𑁄 𑀦𑀸𑀕𑁄 𑀢𑀁 𑀓𑀻𑀴𑀁 𑀤𑀺𑀲𑁆𑀯𑀸 𑀕𑀫𑁆𑀪𑀻𑀭𑀁 𑀉𑀤𑀓𑀁 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀲𑁄𑀡𑁆𑀟𑀸𑀬 𑀉𑀤𑀓𑀁 𑀕𑀳𑁂𑀢𑁆𑀯𑀸 𑀲𑀓𑀺𑀁 𑀓𑀼𑀫𑁆𑀪𑁂 𑀲𑀓𑀺𑀁 𑀧𑀺𑀝𑁆𑀞𑀺𑀬𑀁 𑀲𑀓𑀺𑀁 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀲𑀓𑀺𑀁 𑀅𑀦𑁆𑀢𑀭𑀲𑀢𑁆𑀣𑀺𑀬𑀁 𑀧𑀓𑁆𑀔𑀺𑀧𑀦𑁆𑀢𑁄 𑀓𑀻𑀴𑀺𑀢𑁆𑀣. 𑀢𑀤𑀼𑀧𑀸𑀤𑀸𑀬 𑀢𑀁 𑀓𑀻𑀴𑀺𑀢𑀚𑀸𑀢𑀁 𑀲𑀸𑀡𑀥𑁄𑀯𑀺𑀓𑀁 𑀦𑀸𑀫 𑀯𑀼𑀘𑁆𑀘𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀲𑀸𑀡𑀥𑁄𑀯𑀺𑀓𑀁 𑀦𑀸𑀫 𑀓𑀻𑀴𑀺𑀢𑀚𑀸𑀢𑀁 𑀓𑀻𑀴𑀢𑀻’’𑀢𑀺. 𑀓𑀺𑀁 𑀲𑁄 𑀪𑀯𑀫𑀸𑀦𑁄 𑀲𑀘𑁆𑀘𑀓𑁄 𑀦𑀺𑀕𑀡𑁆𑀞𑀧𑀼𑀢𑁆𑀢𑁄, 𑀬𑁄 𑀪𑀕𑀯𑀢𑁄 𑀯𑀸𑀤𑀁 𑀆𑀭𑁄𑀧𑁂𑀲𑁆𑀲𑀢𑀻𑀢𑀺 𑀬𑁄 𑀲𑀘𑁆𑀘𑀓𑁄 𑀦𑀺𑀕𑀡𑁆𑀞𑀧𑀼𑀢𑁆𑀢𑁄 𑀪𑀕𑀯𑀢𑁄 𑀯𑀸𑀤𑀁 𑀆𑀭𑁄𑀧𑁂𑀲𑁆𑀲𑀢𑀺, 𑀲𑁄 𑀓𑀺𑀁 𑀪𑀯𑀫𑀸𑀦𑁄 𑀓𑀺𑀁 𑀬𑀓𑁆𑀔𑁄 𑀪𑀯𑀫𑀸𑀦𑁄 𑀉𑀤𑀸𑀳𑀼 𑀇𑀦𑁆𑀤𑁄, 𑀉𑀤𑀸𑀳𑀼 𑀩𑁆𑀭𑀳𑁆𑀫𑀸 𑀪𑀯𑀫𑀸𑀦𑁄 𑀪𑀕𑀯𑀢𑁄 𑀯𑀸𑀤𑀁 𑀆𑀭𑁄𑀧𑁂𑀲𑁆𑀲𑀢𑀺? 𑀦 𑀳𑀺 𑀲𑀓𑁆𑀓𑀸 𑀧𑀓𑀢𑀺𑀫𑀦𑀼𑀲𑁆𑀲𑁂𑀦 𑀪𑀕𑀯𑀢𑁄 𑀯𑀸𑀤𑀁 𑀆𑀭𑁄𑀧𑁂𑀢𑀼𑀦𑁆𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄.

𑁩𑁫𑁫. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦𑀸𑀢𑀺 𑀬𑀲𑁆𑀫𑀺𑀁 𑀲𑀫𑀬𑁂 𑀲𑀘𑁆𑀘𑀓𑁄 𑀆𑀭𑀸𑀫𑀁 𑀧𑀸𑀯𑀺𑀲𑀺, 𑀢𑀲𑁆𑀫𑀺𑀁. 𑀓𑀺𑀲𑁆𑀫𑀺𑀁 𑀧𑀦 𑀲𑀫𑀬𑁂 𑀧𑀸𑀯𑀺𑀲𑀻𑀢𑀺? 𑀫𑀳𑀸𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑁂. 𑀓𑀲𑁆𑀫𑀸 𑀧𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀗𑁆𑀓𑀫𑀦𑁆𑀢𑀻𑀢𑀺? 𑀧𑀡𑀻𑀢𑀪𑁄𑀚𑀦𑀧𑀘𑁆𑀘𑀬𑀲𑁆𑀲 𑀣𑀺𑀦𑀫𑀺𑀤𑁆𑀥𑀲𑁆𑀲 𑀯𑀺𑀦𑁄𑀤𑀦𑀢𑁆𑀣𑀁. 𑀤𑀺𑀯𑀸𑀧𑀥𑀸𑀦𑀺𑀓𑀸 𑀯𑀸 𑀢𑁂. 𑀢𑀸𑀤𑀺𑀲𑀸𑀦𑀜𑁆𑀳𑀺 𑀧𑀘𑁆𑀙𑀸𑀪𑀢𑁆𑀢𑀁 𑀘𑀗𑁆𑀓𑀫𑀺𑀢𑁆𑀯𑀸 𑀦𑁆𑀳𑀢𑁆𑀯𑀸 𑀲𑀭𑀻𑀭𑀁 𑀉𑀢𑀼𑀁 𑀕𑀡𑁆𑀳𑀸𑀧𑁂𑀢𑁆𑀯𑀸 𑀦𑀺𑀲𑀚𑁆𑀚 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑀸𑀦𑀁 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀳𑁄𑀢𑀺. 𑀬𑁂𑀦 𑀢𑁂 𑀪𑀺𑀓𑁆𑀔𑀽𑀢𑀺 𑀲𑁄 𑀓𑀺𑀭 𑀓𑀼𑀳𑀺𑀁 𑀲𑀫𑀡𑁄 𑀕𑁄𑀢𑀫𑁄𑀢𑀺 𑀧𑀭𑀺𑀯𑁂𑀡𑀢𑁄 𑀧𑀭𑀺𑀯𑁂𑀡𑀁 𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀺𑀢𑁆𑀯𑀸 𑀧𑀯𑀺𑀲𑀺𑀲𑁆𑀲𑀸𑀫𑀻𑀢𑀺 𑀯𑀺𑀮𑁄𑀓𑁂𑀦𑁆𑀢𑁄 𑀅𑀭𑀜𑁆𑀜𑁂 𑀳𑀢𑁆𑀣𑀻 𑀯𑀺𑀬 𑀘𑀗𑁆𑀓𑀫𑁂 𑀘𑀗𑁆𑀓𑀫𑀫𑀸𑀦𑁂 𑀧𑀁𑀲𑀼𑀓𑀽𑀮𑀺𑀓𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀢𑁂𑀲𑀁 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀢𑀁 𑀲𑀦𑁆𑀥𑀸𑀬, ‘‘𑀬𑁂𑀦 𑀢𑁂 𑀪𑀺𑀓𑁆𑀔𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀳𑀁 𑀦𑀼 𑀔𑁄, 𑀪𑁄𑀢𑀺 𑀓𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀯𑀸 𑀫𑀡𑁆𑀟𑀧𑁂 𑀯𑀸𑀢𑀺 𑀅𑀢𑁆𑀣𑁄. 𑀏𑀲, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀪𑀕𑀯𑀸𑀢𑀺 𑀢𑀤𑀸 𑀓𑀺𑀭 𑀪𑀕𑀯𑀸 𑀧𑀘𑁆𑀘𑀽𑀲𑀓𑀸𑀮𑁂 𑀫𑀳𑀸𑀓𑀭𑀼𑀡𑀸 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀚𑀸𑀮𑀁 𑀧𑀢𑁆𑀣𑀭𑀺𑀢𑁆𑀯𑀸 𑀩𑁄𑀥𑀦𑁂𑀬𑁆𑀬𑀲𑀢𑁆𑀢𑀁 𑀑𑀮𑁄𑀓𑁂𑀦𑁆𑀢𑁄 𑀅𑀤𑁆𑀤𑀲 𑁋 ‘‘𑀲𑁆𑀯𑁂 𑀲𑀘𑁆𑀘𑀓𑁄 𑀦𑀺𑀕𑀡𑁆𑀞𑀧𑀼𑀢𑁆𑀢𑁄 𑀫𑀳𑀢𑀺𑀁 𑀮𑀺𑀘𑁆𑀙𑀯𑀺𑀧𑀭𑀺𑀲𑀁 𑀕𑀳𑁂𑀢𑁆𑀯𑀸 𑀫𑀫 𑀯𑀸𑀤𑀁 𑀆𑀭𑁄𑀧𑁂𑀢𑀼𑀓𑀸𑀫𑁄 𑀆𑀕𑀫𑀺𑀲𑁆𑀲𑀢𑀻’’𑀢𑀺. 𑀢𑀲𑁆𑀫𑀸 𑀧𑀸𑀢𑁄𑀯 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁 𑀓𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀸𑀭𑁄 𑀯𑁂𑀲𑀸𑀮𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀫𑀳𑀸𑀧𑀭𑀺𑀲𑀸𑀬 𑀦𑀺𑀲𑀻𑀤𑀺𑀢𑀼𑀁 𑀲𑀼𑀔𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀲𑁆𑀲𑀸𑀫𑀻𑀢𑀺 𑀕𑀦𑁆𑀥𑀓𑀼𑀝𑀺𑀁 𑀅𑀧𑀯𑀺𑀲𑀺𑀢𑁆𑀯𑀸 𑀫𑀳𑀸𑀯𑀦𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀻𑀤𑀺. 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀯𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀆𑀕𑀢𑀸, 𑀲𑀘𑁆𑀘𑀓𑁂𑀦 𑀧𑀼𑀝𑁆𑀞𑀸 𑀤𑀽𑀭𑁂 𑀦𑀺𑀲𑀺𑀦𑁆𑀦𑀁 𑀪𑀕𑀯𑀦𑁆𑀢𑀁 𑀤𑀲𑁆𑀲𑁂𑀦𑁆𑀢𑀸, ‘‘𑀏𑀲 𑀅𑀕𑁆𑀕𑀺𑀯𑁂𑀲𑁆𑀲𑀦 𑀪𑀕𑀯𑀸’’𑀢𑀺 𑀆𑀳𑀁𑀲𑀼.

𑀫𑀳𑀢𑀺𑀬𑀸 𑀮𑀺𑀘𑁆𑀙𑀯𑀺𑀧𑀭𑀺𑀲𑀸𑀬 𑀲𑀤𑁆𑀥𑀺𑀦𑁆𑀢𑀺 𑀳𑁂𑀝𑁆𑀞𑀸 𑀧𑀜𑁆𑀘𑀫𑀢𑁆𑀢𑁂𑀳𑀺 𑀮𑀺𑀘𑁆𑀙𑀯𑀺𑀲𑀢𑁂𑀳𑀺 𑀧𑀭𑀺𑀯𑀼𑀢𑁄𑀢𑀺 𑀯𑀼𑀢𑁆𑀢𑀁. 𑀢𑁂 𑀏𑀢𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑀸𑀬𑁂𑀯, 𑀅𑀦𑁆𑀢𑁄𑀯𑁂𑀲𑀸𑀮𑀺𑀬𑀁 𑀧𑀦 𑀲𑀘𑁆𑀘𑀓𑁄 𑀧𑀜𑁆𑀘𑀫𑀢𑁆𑀢𑀸𑀦𑀺 𑀮𑀺𑀘𑁆𑀙𑀯𑀺𑀭𑀸𑀚𑀲𑀢𑀸𑀦𑀺 𑀕𑀳𑁂𑀢𑁆𑀯𑀸, ‘‘𑀯𑀸𑀤𑀢𑁆𑀣𑀺𑀓𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀦𑁆𑀢𑁄’’𑀢𑀺 𑀲𑀼𑀢𑁆𑀯𑀸 𑀤𑁆𑀯𑀺𑀦𑁆𑀦𑀁 𑀧𑀡𑁆𑀟𑀺𑀢𑀸𑀦𑀁 𑀓𑀣𑀸𑀲𑀮𑁆𑀮𑀸𑀧𑀁 𑀲𑁄𑀲𑁆𑀲𑀸𑀫𑀸𑀢𑀺 𑀬𑁂𑀪𑀼𑀬𑁆𑀬𑁂𑀦 𑀫𑀦𑀼𑀲𑁆𑀲𑀸 𑀦𑀺𑀓𑁆𑀔𑀦𑁆𑀢𑀸, 𑀏𑀯𑀁 𑀲𑀸 𑀧𑀭𑀺𑀲𑀸 𑀫𑀳𑀢𑀻 𑀅𑀧𑀭𑀺𑀘𑁆𑀙𑀺𑀦𑁆𑀦𑀕𑀡𑀦𑀸 𑀅𑀳𑁄𑀲𑀺. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀅𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸𑀢𑀺 𑀏𑀢𑁂 𑀉𑀪𑀢𑁄𑀧𑀓𑁆𑀔𑀺𑀓𑀸, 𑀢𑁂 𑀏𑀯𑀁 𑀘𑀺𑀦𑁆𑀢𑁂𑀲𑀼𑀁 𑁋 ‘‘𑀲𑀘𑁂 𑀦𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀘𑁄𑀤𑁂𑀲𑁆𑀲𑀦𑁆𑀢𑀺, ‘𑀓𑀲𑁆𑀫𑀸 𑀢𑀼𑀫𑁆𑀳𑁂 𑀲𑀫𑀡𑀁 𑀕𑁄𑀢𑀫𑀁 𑀯𑀦𑁆𑀤𑀺𑀢𑁆𑀣𑀸’𑀢𑀺, 𑀢𑁂𑀲𑀁, ‘𑀓𑀺𑀁 𑀅𑀜𑁆𑀚𑀮𑀺𑀫𑀢𑁆𑀢𑀓𑀭𑀡𑁂𑀦𑀧𑀺 𑀯𑀦𑁆𑀤𑀺𑀢𑀁 𑀳𑁄𑀢𑀻’𑀢𑀺 𑀯𑀓𑁆𑀔𑀸𑀫. 𑀲𑀘𑁂 𑀦𑁄 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸 𑀘𑁄𑀤𑁂𑀲𑁆𑀲𑀦𑁆𑀢𑀺, ‘𑀓𑀲𑁆𑀫𑀸 𑀪𑀕𑀯𑀦𑁆𑀢𑀁 𑀦 𑀯𑀦𑁆𑀤𑀺𑀢𑁆𑀣𑀸’𑀢𑀺, ‘𑀓𑀺𑀁 𑀲𑀻𑀲𑁂𑀦 𑀪𑀽𑀫𑀺𑀁 𑀧𑀳𑀭𑀦𑁆𑀢𑁂𑀦𑁂𑀯 𑀯𑀦𑁆𑀤𑀺𑀢𑀁 𑀳𑁄𑀢𑀺, 𑀦𑀦𑀼 𑀅𑀜𑁆𑀚𑀮𑀺𑀓𑀫𑁆𑀫𑀫𑁆𑀧𑀺 𑀯𑀦𑁆𑀤𑀦𑀸 𑀏𑀯𑀸’𑀢𑀺 𑀯𑀓𑁆𑀔𑀸𑀫𑀸’’𑀢𑀺. 𑀦𑀸𑀫 𑀕𑁄𑀢𑁆𑀢𑀦𑁆𑀢𑀺, 𑀪𑁄 𑀕𑁄𑀢𑀫, 𑀅𑀳𑀁 𑀅𑀲𑀼𑀓𑀲𑁆𑀲 𑀧𑀼𑀢𑁆𑀢𑁄 𑀤𑀢𑁆𑀢𑁄 𑀦𑀸𑀫 𑀫𑀺𑀢𑁆𑀢𑁄 𑀦𑀸𑀫 𑀇𑀥 𑀆𑀕𑀢𑁄𑀢𑀺 𑀯𑀤𑀦𑁆𑀢𑀸 𑀦𑀸𑀫𑀁 𑀲𑀸𑀯𑁂𑀦𑁆𑀢𑀺 𑀦𑀸𑀫. 𑀪𑁄 𑀕𑁄𑀢𑀫, 𑀅𑀳𑀁 𑀯𑀸𑀲𑀺𑀝𑁆𑀞𑁄 𑀦𑀸𑀫 𑀓𑀘𑁆𑀘𑀸𑀦𑁄 𑀦𑀸𑀫 𑀇𑀥 𑀆𑀕𑀢𑁄𑀢𑀺 𑀯𑀤𑀦𑁆𑀢𑀸 𑀕𑁄𑀢𑁆𑀢𑀁 𑀲𑀸𑀯𑁂𑀦𑁆𑀢𑀺 𑀦𑀸𑀫. 𑀏𑀢𑁂 𑀓𑀺𑀭 𑀤𑀮𑀺𑀤𑁆𑀤𑀸 𑀚𑀺𑀡𑁆𑀡𑀓𑀼𑀮𑀧𑀼𑀢𑁆𑀢𑀸 𑀧𑀭𑀺𑀲𑀫𑀚𑁆𑀛𑁂 𑀦𑀸𑀫𑀕𑁄𑀢𑁆𑀢𑀯𑀲𑁂𑀦 𑀧𑀸𑀓𑀝𑀸 𑀪𑀯𑀺𑀲𑁆𑀲𑀸𑀫𑀸𑀢𑀺 𑀏𑀯𑀁 𑀅𑀓𑀁𑀲𑀼. 𑀬𑁂 𑀧𑀦 𑀢𑀼𑀡𑁆𑀳𑀻𑀪𑀽𑀢𑀸 𑀦𑀺𑀲𑀻𑀤𑀺𑀁𑀲𑀼, 𑀢𑁂 𑀓𑁂𑀭𑀸𑀝𑀺𑀓𑀸 𑀘𑁂𑀯 𑀅𑀦𑁆𑀥𑀩𑀸𑀮𑀸 𑀘. 𑀢𑀢𑁆𑀣 𑀓𑁂𑀭𑀸𑀝𑀺𑀓𑀸, ‘‘𑀏𑀓𑀁 𑀤𑁆𑀯𑁂 𑀓𑀣𑀸𑀲𑀮𑁆𑀮𑀸𑀧𑁂 𑀓𑀭𑁄𑀦𑁆𑀢𑁄 𑀯𑀺𑀲𑁆𑀲𑀸𑀲𑀺𑀓𑁄 𑀳𑁄𑀢𑀺, 𑀅𑀣 𑀯𑀺𑀲𑁆𑀲𑀸𑀲𑁂 𑀲𑀢𑀺 𑀏𑀓𑀁 𑀤𑁆𑀯𑁂 𑀪𑀺𑀓𑁆𑀔𑀸 𑀅𑀤𑀸𑀢𑀼𑀁 𑀦 𑀬𑀼𑀢𑁆𑀢’’𑀦𑁆𑀢𑀺 𑀢𑀢𑁄 𑀅𑀢𑁆𑀢𑀸𑀦𑀁 𑀫𑁄𑀘𑁂𑀦𑁆𑀢𑀸 𑀢𑀼𑀡𑁆𑀳𑀻 𑀦𑀺𑀲𑀻𑀤𑀦𑁆𑀢𑀺. 𑀅𑀦𑁆𑀥𑀩𑀸𑀮𑀸 𑀅𑀜𑁆𑀜𑀸𑀡𑀢𑀸𑀬𑁂𑀯 𑀅𑀯𑀓𑁆𑀔𑀺𑀢𑁆𑀢𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑁄 𑀯𑀺𑀬 𑀬𑀢𑁆𑀣 𑀓𑀢𑁆𑀣𑀘𑀺 𑀢𑀼𑀡𑁆𑀳𑀻𑀪𑀽𑀢𑀸 𑀦𑀺𑀲𑀻𑀤𑀦𑁆𑀢𑀺.

𑁩𑁫𑁬. 𑀓𑀺𑀜𑁆𑀘𑀺𑀤𑁂𑀯 𑀤𑁂𑀲𑀦𑁆𑀢𑀺 𑀓𑀜𑁆𑀘𑀺 𑀑𑀓𑀸𑀲𑀁 𑀓𑀺𑀜𑁆𑀘𑀺 𑀓𑀸𑀭𑀡𑀁, 𑀅𑀣𑀲𑁆𑀲 𑀪𑀕𑀯𑀸 𑀧𑀜𑁆𑀳𑀧𑀼𑀘𑁆𑀙𑀦𑁂 𑀉𑀲𑁆𑀲𑀸𑀳𑀁 𑀚𑀦𑁂𑀦𑁆𑀢𑁄 𑀆𑀳 𑁋 𑀧𑀼𑀘𑁆𑀙, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀬𑀤𑀸𑀓𑀗𑁆𑀔𑀲𑀻𑀢𑀺. 𑀢𑀲𑁆𑀲𑀢𑁆𑀣𑁄 𑁋 ‘‘𑀧𑀼𑀘𑁆𑀙 𑀬𑀤𑀺 𑀆𑀓𑀗𑁆𑀔𑀲𑀺, 𑀦 𑀫𑁂 𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑁂 𑀪𑀸𑀭𑁄 𑀅𑀢𑁆𑀣𑀺’’. 𑀅𑀣 𑀯𑀸 ‘‘𑀧𑀼𑀘𑁆𑀙 𑀬𑀁 𑀆𑀓𑀗𑁆𑀔𑀲𑀺, 𑀲𑀩𑁆𑀩𑀁 𑀢𑁂 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀸𑀫𑀻’’𑀢𑀺 𑀲𑀩𑁆𑀩𑀜𑁆𑀜𑀼𑀧𑀯𑀸𑀭𑀡𑀁 𑀧𑀯𑀸𑀭𑁂𑀲𑀺 𑀅𑀲𑀸𑀥𑀸𑀭𑀡𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀅𑀕𑁆𑀕𑀲𑀸𑀯𑀫𑀳𑀸𑀲𑀸𑀯𑀓𑁂𑀳𑀺. 𑀢𑁂 𑀳𑀺 𑀬𑀤𑀸𑀓𑀗𑁆𑀔𑀲𑀻𑀢𑀺 𑀦 𑀯𑀤𑀦𑁆𑀢𑀺, 𑀲𑀼𑀢𑁆𑀯𑀸 𑀯𑁂𑀤𑀺𑀲𑁆𑀲𑀸𑀫𑀸𑀢𑀺 𑀯𑀤𑀦𑁆𑀢𑀺. 𑀩𑀼𑀤𑁆𑀥𑀸 𑀧𑀦 ‘‘𑀧𑀼𑀘𑁆𑀙𑀸𑀯𑀼𑀲𑁄, 𑀬𑀤𑀸𑀓𑀗𑁆𑀔𑀲𑀻’’𑀢𑀺 (𑀲𑀁. 𑀦𑀺. 𑁧.𑁨𑁩𑁭) 𑀯𑀸, ‘‘𑀧𑀼𑀘𑁆𑀙, 𑀫𑀳𑀸𑀭𑀸𑀚, 𑀬𑀤𑀸𑀓𑀗𑁆𑀔𑀲𑀻’’𑀢𑀺 (𑀤𑀻. 𑀦𑀺. 𑁧.𑁧𑁬𑁨) 𑀯𑀸,

‘‘𑀧𑀼𑀘𑁆𑀙 𑀯𑀸𑀲𑀯 𑀫𑀁 𑀧𑀜𑁆𑀳𑀁, 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀺𑀘𑁆𑀙𑀲𑀺;

𑀢𑀲𑁆𑀲 𑀢𑀲𑁆𑀲𑁂𑀯 𑀧𑀜𑁆𑀳𑀲𑁆𑀲, 𑀅𑀳𑀁 𑀅𑀦𑁆𑀢𑀁 𑀓𑀭𑁄𑀫𑀺 𑀢𑁂’’ 𑀇𑀢𑀺. (𑀤𑀻. 𑀦𑀺. 𑁨.𑁩𑁫𑁬) 𑀯𑀸,

‘‘𑀢𑁂𑀦 𑀳𑀺 𑀢𑁆𑀯𑀁, 𑀪𑀺𑀓𑁆𑀔𑀼, 𑀲𑀓𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀧𑀼𑀘𑁆𑀙 𑀬𑀤𑀸𑀓𑀗𑁆𑀔𑀲𑀻’’𑀢𑀺 (𑀫. 𑀦𑀺. 𑁩.𑁮𑁫) 𑀯𑀸,

‘‘𑀩𑀸𑀯𑀭𑀺𑀲𑁆𑀲 𑀘 𑀢𑀼𑀬𑁆𑀳𑀁 𑀯𑀸, 𑀲𑀩𑁆𑀩𑁂𑀲𑀁 𑀲𑀩𑁆𑀩𑀲𑀁𑀲𑀬𑀁;

𑀓𑀢𑀸𑀯𑀓𑀸𑀲𑀸 𑀧𑀼𑀘𑁆𑀙𑀯𑁆𑀳𑁄, 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀺𑀘𑁆𑀙𑀣𑀸’’𑀢𑀺. (𑀲𑀼. 𑀦𑀺. 𑁧𑁦𑁩𑁬) 𑀯𑀸,

‘‘𑀧𑀼𑀘𑁆𑀙 𑀫𑀁 𑀲𑀪𑀺𑀬 𑀧𑀜𑁆𑀳𑀁, 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀺𑀘𑁆𑀙𑀲𑀺;

𑀢𑀲𑁆𑀲 𑀢𑀲𑁆𑀲𑁂𑀯 𑀧𑀜𑁆𑀳𑀲𑁆𑀲, 𑀅𑀳𑀁 𑀅𑀦𑁆𑀢𑀁 𑀓𑀭𑁄𑀫𑀺 𑀢𑁂’’ 𑀇𑀢𑀺. (𑀲𑀼. 𑀦𑀺. 𑁫𑁧𑁭) 𑀯𑀸 𑁋

𑀢𑁂𑀲𑀁 𑀢𑁂𑀲𑀁 𑀬𑀓𑁆𑀔𑀦𑀭𑀺𑀦𑁆𑀤𑀤𑁂𑀯𑀲𑀫𑀡𑀩𑁆𑀭𑀸𑀳𑁆𑀫𑀡𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀲𑀩𑁆𑀩𑀜𑁆𑀜𑀼𑀧𑀯𑀸𑀭𑀡𑀁 𑀧𑀯𑀸𑀭𑁂𑀦𑁆𑀢𑀺. 𑀅𑀦𑀘𑁆𑀙𑀭𑀺𑀬𑀜𑁆𑀘𑁂𑀢𑀁, 𑀬𑀁 𑀪𑀕𑀯𑀸 𑀩𑀼𑀤𑁆𑀥𑀪𑀽𑀫𑀺𑀁 𑀧𑀢𑁆𑀯𑀸 𑀏𑀢𑀁 𑀧𑀯𑀸𑀭𑀡𑀁 𑀧𑀯𑀸𑀭𑁂𑀬𑁆𑀬. 𑀬𑁄 𑀩𑁄𑀥𑀺𑀲𑀢𑁆𑀢𑀪𑀽𑀫𑀺𑀬𑀁 𑀧𑀤𑁂𑀲𑀜𑀸𑀡𑁂𑀧𑀺 𑀞𑀺𑀢𑁄

‘‘𑀓𑁄𑀡𑁆𑀟𑀜𑁆𑀜 𑀧𑀜𑁆𑀳𑀸𑀦𑀺 𑀯𑀺𑀬𑀸𑀓𑀭𑁄𑀳𑀺,

𑀬𑀸𑀘𑀦𑁆𑀢𑀺 𑀢𑀁 𑀇𑀲𑀬𑁄 𑀲𑀸𑀥𑀼𑀭𑀽𑀧𑀸;

𑀓𑁄𑀡𑁆𑀟𑀜𑁆𑀜 𑀏𑀲𑁄 𑀫𑀦𑀼𑀚𑁂𑀲𑀼 𑀥𑀫𑁆𑀫𑁄,

𑀬𑀁 𑀯𑀼𑀤𑁆𑀥𑀫𑀸𑀕𑀘𑁆𑀙𑀢𑀺 𑀏𑀲 𑀪𑀸𑀭𑁄’’𑀢𑀺. (𑀚𑀸. 𑁨.𑁧𑁭.𑁬𑁦) 𑁋

𑀏𑀯𑀁 𑀲𑀓𑁆𑀓𑀸𑀤𑀻𑀦𑀁 𑀅𑀢𑁆𑀣𑀸𑀬 𑀇𑀲𑀻𑀳𑀺 𑀬𑀸𑀘𑀺𑀢𑁄

‘‘𑀓𑀢𑀸𑀯𑀓𑀸𑀲𑀸 𑀧𑀼𑀘𑁆𑀙𑀦𑁆𑀢𑀼 𑀪𑁄𑀦𑁆𑀢𑁄,

𑀬𑀁 𑀓𑀺𑀜𑁆𑀘𑀺 𑀧𑀜𑁆𑀳𑀁 𑀫𑀦𑀲𑀸𑀪𑀺𑀧𑀢𑁆𑀣𑀺𑀢𑀁;

𑀅𑀳𑀜𑁆𑀳𑀺 𑀢𑀁 𑀢𑀁 𑀯𑁄 𑀯𑀺𑀬𑀸𑀓𑀭𑀺𑀲𑁆𑀲𑀁,

𑀜𑀢𑁆𑀯𑀸 𑀲𑀬𑀁 𑀮𑁄𑀓𑀫𑀺𑀫𑀁 𑀧𑀭𑀜𑁆𑀘𑀸’’𑀢𑀺. (𑀚𑀸. 𑁨.𑁧𑁭.𑁬𑁧);

𑀏𑀯𑀁 𑀲𑀭𑀪𑀗𑁆𑀕𑀓𑀸𑀮𑁂, 𑀲𑀫𑁆𑀪𑀯𑀚𑀸𑀢𑀓𑁂 𑀘 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀢𑀺𑀓𑁆𑀔𑀢𑁆𑀢𑀼𑀁 𑀯𑀺𑀘𑀭𑀺𑀢𑁆𑀯𑀸 𑀧𑀜𑁆𑀳𑀸𑀦𑀁 𑀅𑀦𑁆𑀢𑀓𑀭𑀁 𑀅𑀤𑀺𑀲𑁆𑀯𑀸 𑀲𑀼𑀘𑀺𑀭𑀢𑁂𑀦 𑀩𑁆𑀭𑀸𑀳𑁆𑀫𑀡𑁂𑀦 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀑𑀓𑀸𑀲𑁂 𑀓𑀸𑀭𑀺𑀢𑁂, 𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑁄 𑀭𑀣𑀺𑀓𑀸𑀬𑀁 𑀧𑀁𑀲𑀼𑀁 𑀓𑀻𑀴𑀦𑁆𑀢𑁄 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀅𑀦𑁆𑀢𑀭𑀯𑀻𑀣𑀺𑀬𑀁 𑀦𑀺𑀲𑀺𑀦𑁆𑀦𑁄𑀯 𑁋

‘‘𑀢𑀕𑁆𑀖 𑀢𑁂 𑀅𑀳𑀫𑀓𑁆𑀔𑀺𑀲𑁆𑀲𑀁, 𑀬𑀣𑀸𑀧𑀺 𑀓𑀼𑀲𑀮𑁄 𑀢𑀣𑀸;

𑀭𑀸𑀚𑀸 𑀘 𑀔𑁄 𑀢𑀁 𑀚𑀸𑀦𑀸𑀢𑀺, 𑀬𑀤𑀺 𑀓𑀸𑀳𑀢𑀺 𑀯𑀸 𑀦 𑀯𑀸’’𑀢𑀺. (𑀚𑀸. 𑁧.𑁧𑁬.𑁧𑁭𑁨) 𑁋

𑀲𑀩𑁆𑀩𑀜𑁆𑀜𑀼𑀧𑀯𑀸𑀭𑀡𑀁 𑀧𑀯𑀸𑀭𑁂𑀲𑀺.

𑀏𑀯𑀁 𑀪𑀕𑀯𑀢𑀸 𑀲𑀩𑁆𑀩𑀜𑁆𑀜𑀼𑀧𑀯𑀸𑀭𑀡𑀸𑀬 𑀧𑀯𑀸𑀭𑀺𑀢𑀸𑀬 𑀅𑀢𑁆𑀢𑀫𑀦𑁄 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑁄, ‘‘𑀓𑀣𑀁 𑀧𑀦, 𑀪𑁄 𑀕𑁄𑀢𑀫𑀸’’𑀢𑀺𑀆𑀤𑀺𑀫𑀸𑀳.

𑀅𑀣𑀲𑁆𑀲 𑀪𑀕𑀯𑀸, ‘‘𑀧𑀲𑁆𑀲𑀣, 𑀪𑁄, 𑀅𑀜𑁆𑀜𑀁 𑀲𑀸𑀯𑀓𑁂𑀦 𑀓𑀣𑀺𑀢𑀁, 𑀅𑀜𑁆𑀜𑀁 𑀲𑀢𑁆𑀣𑀸 𑀓𑀣𑁂𑀢𑀺, 𑀦𑀦𑀼 𑀫𑀬𑀸 𑀧𑀝𑀺𑀓𑀘𑁆𑀘𑁂𑀯 𑀯𑀼𑀢𑁆𑀢𑀁, ‘𑀲𑀘𑁂 𑀢𑀣𑀸 𑀧𑀢𑀺𑀝𑁆𑀞𑀺𑀲𑁆𑀲𑀢𑀺, 𑀬𑀣𑀸𑀲𑁆𑀲 𑀲𑀸𑀯𑀓𑁂𑀦 𑀧𑀢𑀺𑀝𑁆𑀞𑀺𑀢𑀁, 𑀏𑀯𑀸𑀳𑀁 𑀯𑀸𑀤𑀁 𑀆𑀭𑁄𑀧𑁂𑀲𑁆𑀲𑀸𑀫𑀻’𑀢𑀺. 𑀅𑀬𑀁 𑀧𑀦 𑀅𑀜𑁆𑀜𑀫𑁂𑀯 𑀓𑀣𑁂𑀢𑀺, 𑀢𑀢𑁆𑀣 𑀓𑀺𑀁 𑀫𑀬𑀸 𑀲𑀓𑁆𑀓𑀸 𑀓𑀸𑀢𑀼’’𑀦𑁆𑀢𑀺 𑀏𑀯𑀁 𑀦𑀺𑀕𑀡𑁆𑀞𑀲𑁆𑀲 𑀯𑀘𑀦𑁄𑀓𑀸𑀲𑁄 𑀫𑀸 𑀳𑁄𑀢𑀽𑀢𑀺 𑀳𑁂𑀝𑁆𑀞𑀸 𑀅𑀲𑁆𑀲𑀚𑀺𑀢𑁆𑀣𑁂𑀭𑁂𑀦 𑀓𑀣𑀺𑀢𑀦𑀺𑀬𑀸𑀫𑁂𑀦𑁂𑀯 𑀓𑀣𑁂𑀦𑁆𑀢𑁄, 𑀏𑀯𑀁 𑀔𑁄 𑀅𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦𑀸𑀢𑀺𑀆𑀤𑀺𑀫𑀸𑀳. 𑀉𑀧𑀫𑀸 𑀫𑀁, 𑀪𑁄 𑀕𑁄𑀢𑀫, 𑀧𑀝𑀺𑀪𑀸𑀢𑀻𑀢𑀺, 𑀪𑁄 𑀕𑁄𑀢𑀫, 𑀫𑀬𑁆𑀳𑀁 𑀏𑀓𑀸 𑀉𑀧𑀫𑀸 𑀉𑀧𑀝𑁆𑀞𑀸𑀢𑀺, 𑀆𑀳𑀭𑀸𑀫𑀺 𑀢𑀁 𑀉𑀧𑀫𑀦𑁆𑀢𑀺 𑀯𑀤𑀢𑀺. 𑀧𑀝𑀺𑀪𑀸𑀢𑀼 𑀢𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦𑀸𑀢𑀺 𑀉𑀧𑀝𑁆𑀞𑀸𑀢𑀼 𑀢𑁂, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀆𑀳𑀭 𑀢𑀁 𑀉𑀧𑀫𑀁 𑀯𑀺𑀲𑀢𑁆𑀣𑁄𑀢𑀺 𑀪𑀕𑀯𑀸 𑀅𑀯𑁄𑀘. 𑀩𑀮𑀓𑀭𑀡𑀻𑀬𑀸𑀢𑀺 𑀩𑀸𑀳𑀼𑀩𑀮𑁂𑀦 𑀓𑀢𑁆𑀢𑀩𑁆𑀩𑀸 𑀓𑀲𑀺𑀯𑀸𑀡𑀺𑀚𑁆𑀚𑀸𑀤𑀺𑀓𑀸 𑀓𑀫𑁆𑀫𑀦𑁆𑀢𑀸. 𑀭𑀽𑀧𑀢𑁆𑀢𑀸𑀬𑀁 𑀧𑀼𑀭𑀺𑀲𑀧𑀼𑀕𑁆𑀕𑀮𑁄𑀢𑀺 𑀭𑀽𑀧𑀁 𑀅𑀢𑁆𑀢𑀸 𑀅𑀲𑁆𑀲𑀸𑀢𑀺 𑀭𑀽𑀧𑀢𑁆𑀢𑀸, 𑀭𑀽𑀧𑀁 𑀅𑀢𑁆𑀢𑀸𑀢𑀺 𑀕𑀳𑁂𑀢𑁆𑀯𑀸 𑀞𑀺𑀢𑀧𑀼𑀕𑁆𑀕𑀮𑀁 𑀤𑀻𑀧𑁂𑀢𑀺. 𑀭𑀽𑀧𑁂 𑀧𑀢𑀺𑀝𑁆𑀞𑀸𑀬𑀸𑀢𑀺 𑀢𑀲𑁆𑀫𑀺𑀁 𑀅𑀢𑁆𑀢𑀸𑀢𑀺 𑀕𑀳𑀺𑀢𑀭𑀽𑀧𑁂 𑀧𑀢𑀺𑀝𑁆𑀞𑀳𑀺𑀢𑁆𑀯𑀸. 𑀧𑀼𑀜𑁆𑀜𑀁 𑀯𑀸 𑀅𑀧𑀼𑀜𑁆𑀜𑀁 𑀯𑀸 𑀧𑀲𑀯𑀢𑀻𑀢𑀺 𑀓𑀼𑀲𑀮𑀁 𑀯𑀸 𑀅𑀓𑀼𑀲𑀮𑀁 𑀯𑀸 𑀧𑀝𑀺𑀮𑀪𑀢𑀺. 𑀯𑁂𑀤𑀦𑀢𑁆𑀢𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀫𑀺𑀦𑀸 𑀓𑀺𑀁 𑀤𑀻𑀧𑁂𑀢𑀺? 𑀇𑀫𑁂 𑀧𑀜𑁆𑀘𑀓𑁆𑀔𑀦𑁆𑀥𑀸 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀧𑀣𑀯𑀻 𑀯𑀺𑀬 𑀧𑀢𑀺𑀝𑁆𑀞𑀸, 𑀢𑁂 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀧𑀢𑀺𑀝𑁆𑀞𑀸𑀬 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀁 𑀦𑀸𑀫 𑀆𑀬𑀽𑀳𑀦𑁆𑀢𑀺. 𑀢𑀼𑀫𑁆𑀳𑁂 𑀏𑀯𑀭𑀽𑀧𑀁 𑀯𑀺𑀚𑁆𑀚𑀫𑀸𑀦𑀫𑁂𑀯 𑀅𑀢𑁆𑀢𑀸𑀦𑀁 𑀧𑀝𑀺𑀲𑁂𑀥𑁂𑀦𑁆𑀢𑁄 𑀧𑀜𑁆𑀘𑀓𑁆𑀔𑀦𑁆𑀥𑀸 𑀅𑀦𑀢𑁆𑀢𑀸𑀢𑀺 𑀤𑀻𑀧𑁂𑀣𑀸𑀢𑀺 𑀅𑀢𑀺𑀯𑀺𑀬 𑀲𑀓𑀸𑀭𑀡𑀁 𑀓𑀢𑁆𑀯𑀸 𑀉𑀧𑀫𑀁 𑀆𑀳𑀭𑀺. 𑀇𑀫𑀺𑀦𑀸 𑀘 𑀦𑀺𑀕𑀡𑁆𑀞𑁂𑀦 𑀆𑀳𑀝𑀑𑀧𑀫𑁆𑀫𑀁 𑀦𑀺𑀬𑀢𑀫𑁂𑀯, 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀢𑁄 𑀅𑀜𑁆𑀜𑁄 𑀢𑀲𑁆𑀲 𑀓𑀣𑀁 𑀙𑀺𑀦𑁆𑀤𑀺𑀢𑁆𑀯𑀸 𑀯𑀸𑀤𑁂 𑀤𑁄𑀲𑀁 𑀤𑀸𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺. 𑀤𑀼𑀯𑀺𑀥𑀸 𑀳𑀺 𑀧𑀼𑀕𑁆𑀕𑀮𑀸 𑀩𑀼𑀤𑁆𑀥𑀯𑁂𑀦𑁂𑀬𑁆𑀬𑀸 𑀘 𑀲𑀸𑀯𑀓𑀯𑁂𑀦𑁂𑀬𑁆𑀬𑀸 𑀘. 𑀲𑀸𑀯𑀓𑀯𑁂𑀦𑁂𑀬𑁆𑀬𑁂 𑀲𑀸𑀯𑀓𑀸𑀧𑀺 𑀯𑀺𑀦𑁂𑀦𑁆𑀢𑀺 𑀩𑀼𑀤𑁆𑀥𑀸𑀧𑀺. 𑀩𑀼𑀤𑁆𑀥𑀯𑁂𑀦𑁂𑀬𑁆𑀬𑁂 𑀧𑀦 𑀲𑀸𑀯𑀓𑀸 𑀯𑀺𑀦𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀩𑀼𑀤𑁆𑀥𑀸𑀯 𑀯𑀺𑀦𑁂𑀦𑁆𑀢𑀺. 𑀅𑀬𑀫𑁆𑀧𑀺 𑀦𑀺𑀕𑀡𑁆𑀞𑁄 𑀩𑀼𑀤𑁆𑀥𑀯𑁂𑀦𑁂𑀬𑁆𑀬𑁄, 𑀢𑀲𑁆𑀫𑀸 𑀏𑀢𑀲𑁆𑀲 𑀯𑀸𑀤𑀁 𑀙𑀺𑀦𑁆𑀤𑀺𑀢𑁆𑀯𑀸 𑀅𑀜𑁆𑀜𑁄 𑀤𑁄𑀲𑀁 𑀤𑀸𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺. 𑀢𑁂𑀦𑀲𑁆𑀲 𑀪𑀕𑀯𑀸 𑀲𑀬𑀫𑁂𑀯 𑀯𑀸𑀤𑁂 𑀤𑁄𑀲𑀤𑀲𑁆𑀲𑀦𑀢𑁆𑀣𑀁 𑀦𑀦𑀼 𑀢𑁆𑀯𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦𑀸𑀢𑀺𑀆𑀤𑀺𑀫𑀸𑀳.

𑀅𑀣 𑀦𑀺𑀕𑀡𑁆𑀞𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀢𑀺𑀯𑀺𑀬 𑀲𑀫𑀡𑁄 𑀕𑁄𑀢𑀫𑁄 𑀫𑀫 𑀯𑀸𑀤𑀁 𑀧𑀢𑀺𑀝𑁆𑀞𑀧𑁂𑀢𑀺, 𑀲𑀘𑁂 𑀉𑀧𑀭𑀺 𑀓𑁄𑀘𑀺 𑀤𑁄𑀲𑁄 𑀪𑀯𑀺𑀲𑁆𑀲𑀢𑀺, 𑀫𑀫𑀁 𑀏𑀓𑀓𑀁𑀬𑁂𑀯 𑀦𑀺𑀕𑁆𑀕𑀡𑁆𑀳𑀺𑀲𑁆𑀲𑀢𑀺. 𑀳𑀦𑁆𑀤𑀸𑀳𑀁 𑀇𑀫𑀁 𑀯𑀸𑀤𑀁 𑀫𑀳𑀸𑀚𑀦𑀲𑁆𑀲𑀸𑀧𑀺 𑀫𑀢𑁆𑀣𑀓𑁂 𑀧𑀓𑁆𑀔𑀺𑀧𑀸𑀫𑀻’’𑀢𑀺, 𑀢𑀲𑁆𑀫𑀸 𑀏𑀯𑀫𑀸𑀳 𑁋 𑀅𑀳𑀫𑁆𑀧𑀺, 𑀪𑁄 𑀕𑁄𑀢𑀫, 𑀏𑀯𑀁 𑀯𑀤𑀸𑀫𑀺 𑀭𑀽𑀧𑀁 𑀫𑁂 𑀅𑀢𑁆𑀢𑀸…𑀧𑁂… 𑀯𑀺𑀜𑁆𑀜𑀸𑀡𑀁 𑀫𑁂 𑀅𑀢𑁆𑀢𑀸𑀢𑀺, 𑀅𑀬𑀜𑁆𑀘 𑀫𑀳𑀢𑀻 𑀚𑀦𑀢𑀸𑀢𑀺. 𑀪𑀕𑀯𑀸 𑀧𑀦 𑀦𑀺𑀕𑀡𑁆𑀞𑀢𑁄 𑀲𑀢𑀕𑀼𑀡𑁂𑀦𑀧𑀺 𑀲𑀳𑀲𑁆𑀲𑀕𑀼𑀡𑁂𑀦𑀧𑀺 𑀲𑀢𑀲𑀳𑀲𑁆𑀲𑀕𑀼𑀡𑁂𑀦𑀧𑀺 𑀯𑀸𑀤𑀻𑀯𑀭𑀢𑀭𑁄, 𑀢𑀲𑁆𑀫𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀦𑀺𑀕𑀡𑁆𑀞𑁄 𑀅𑀢𑁆𑀢𑀸𑀦𑀁 𑀫𑁄𑀘𑁂𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀫𑀢𑁆𑀣𑀓𑁂 𑀯𑀸𑀤𑀁 𑀧𑀓𑁆𑀔𑀺𑀧𑀢𑀺, 𑀦𑀸𑀲𑁆𑀲 𑀅𑀢𑁆𑀢𑀸𑀦𑀁 𑀫𑁄𑀘𑁂𑀢𑀼𑀁 𑀤𑀲𑁆𑀲𑀸𑀫𑀺, 𑀫𑀳𑀸𑀚𑀦𑀢𑁄 𑀦𑀺𑀯𑀢𑁆𑀢𑁂𑀢𑁆𑀯𑀸 𑀏𑀓𑀓𑀁𑀬𑁂𑀯 𑀦𑀁 𑀦𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺. 𑀅𑀣 𑀦𑀁 𑀓𑀺𑀜𑁆𑀳𑀺 𑀢𑁂, 𑀅𑀕𑁆𑀕𑀺𑀯𑁂𑀲𑁆𑀲𑀦𑀸𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀦𑀸𑀬𑀁 𑀚𑀦𑀢𑀸 𑀫𑀫 𑀯𑀸𑀤𑀁 𑀆𑀭𑁄𑀧𑁂𑀢𑀼𑀁 𑀆𑀕𑀢𑀸, 𑀢𑁆𑀯𑀁𑀬𑁂𑀯 𑀲𑀓𑀮𑀁 𑀯𑁂𑀲𑀸𑀮𑀺𑀁 𑀲𑀁𑀯𑀝𑁆𑀝𑀺𑀢𑁆𑀯𑀸 𑀫𑀫 𑀯𑀸𑀤𑀁 𑀆𑀭𑁄𑀧𑁂𑀢𑀼𑀁 𑀆𑀕𑀢𑁄, 𑀢𑀲𑁆𑀫𑀸 𑀢𑁆𑀯𑀁 𑀲𑀓𑀫𑁂𑀯 𑀯𑀸𑀤𑀁 𑀦𑀺𑀯𑁂𑀞𑁂𑀳𑀺, 𑀫𑀸 𑀫𑀳𑀸𑀚𑀦𑀲𑁆𑀲 𑀫𑀢𑁆𑀣𑀓𑁂 𑀧𑀓𑁆𑀔𑀺𑀧𑀲𑀻𑀢𑀺. 𑀲𑁄 𑀧𑀝𑀺𑀚𑀸𑀦𑀦𑁆𑀢𑁄 𑀅𑀳𑀜𑁆𑀳𑀺, 𑀪𑁄 𑀕𑁄𑀢𑀫𑀸𑀢𑀺𑀆𑀤𑀺𑀫𑀸𑀳.

𑁩𑁫𑁭. 𑀇𑀢𑀺 𑀪𑀕𑀯𑀸 𑀦𑀺𑀕𑀡𑁆𑀞𑀲𑁆𑀲 𑀯𑀸𑀤𑀁 𑀧𑀢𑀺𑀝𑁆𑀞𑀧𑁂𑀢𑁆𑀯𑀸, 𑀢𑁂𑀦 𑀳𑀺, 𑀅𑀕𑁆𑀕𑀺𑀯𑁂𑀲𑁆𑀲𑀦𑀸𑀢𑀺 𑀧𑀼𑀘𑁆𑀙𑀁 𑀆𑀭𑀪𑀺. 𑀢𑀢𑁆𑀣 𑀢𑁂𑀦 𑀳𑀻𑀢𑀺 𑀓𑀸𑀭𑀡𑀢𑁆𑀣𑁂 𑀦𑀺𑀧𑀸𑀢𑁄. 𑀬𑀲𑁆𑀫𑀸 𑀢𑁆𑀯𑀁 𑀧𑀜𑁆𑀘𑀓𑁆𑀔𑀦𑁆𑀥𑁂 𑀅𑀢𑁆𑀢𑀢𑁄 𑀧𑀝𑀺𑀚𑀸𑀦𑀸𑀲𑀺, 𑀢𑀲𑁆𑀫𑀸𑀢𑀺 𑀅𑀢𑁆𑀣𑁄. 𑀲𑀓𑀲𑁆𑀫𑀺𑀁 𑀯𑀺𑀚𑀺𑀢𑁂𑀢𑀺 𑀅𑀢𑁆𑀢𑀦𑁄 𑀭𑀝𑁆𑀞𑁂. 𑀖𑀸𑀢𑁂𑀢𑀸𑀬𑀁 𑀯𑀸 𑀖𑀸𑀢𑁂𑀢𑀼𑀦𑁆𑀢𑀺 𑀖𑀸𑀢𑀸𑀭𑀳𑀁 𑀖𑀸𑀢𑁂𑀢𑀩𑁆𑀩𑀬𑀼𑀢𑁆𑀢𑀓𑀁 𑀖𑀸𑀢𑁂𑀢𑀼𑀁. 𑀚𑀸𑀧𑁂𑀢𑀸𑀬𑀁 𑀯𑀸 𑀚𑀸𑀧𑁂𑀢𑀼𑀦𑁆𑀢𑀺 𑀥𑀦𑀚𑀸𑀦𑀺𑀭𑀳𑀁 𑀚𑀸𑀧𑁂𑀢𑀩𑁆𑀩𑀬𑀼𑀢𑁆𑀢𑀁 𑀚𑀸𑀧𑁂𑀢𑀼𑀁 𑀚𑀺𑀡𑁆𑀡𑀥𑀦𑀁 𑀓𑀸𑀢𑀼𑀁. 𑀧𑀩𑁆𑀩𑀸𑀚𑁂𑀢𑀸𑀬𑀁 𑀯𑀸 𑀧𑀩𑁆𑀩𑀸𑀚𑁂𑀢𑀼𑀦𑁆𑀢𑀺 𑀲𑀓𑀭𑀝𑁆𑀞𑀢𑁄 𑀧𑀩𑁆𑀩𑀸𑀚𑀦𑀸𑀭𑀳𑀁 𑀧𑀩𑁆𑀩𑀸𑀚𑁂𑀢𑀼𑀁, 𑀦𑀻𑀳𑀭𑀺𑀢𑀼𑀁. 𑀯𑀢𑁆𑀢𑀺𑀢𑀼𑀜𑁆𑀘 𑀅𑀭𑀳𑀢𑀻𑀢𑀺 𑀯𑀢𑁆𑀢𑀢𑀺 𑀘𑁂𑀯 𑀯𑀢𑁆𑀢𑀺𑀢𑀼𑀜𑁆𑀘 𑀅𑀭𑀳𑀢𑀺. 𑀯𑀢𑁆𑀢𑀺𑀢𑀼𑀁 𑀬𑀼𑀢𑁆𑀢𑁄𑀢𑀺 𑀤𑀻𑀧𑁂𑀢𑀺. 𑀇𑀢𑀺 𑀦𑀺𑀕𑀡𑁆𑀞𑁄 𑀅𑀢𑁆𑀢𑀦𑁄 𑀯𑀸𑀤𑀪𑁂𑀤𑀦𑀢𑁆𑀣𑀁 𑀆𑀳𑀝𑀓𑀸𑀭𑀡𑀫𑁂𑀯 𑀅𑀢𑁆𑀢𑀦𑁄 𑀫𑀸𑀭𑀡𑀢𑁆𑀣𑀸𑀬 𑀆𑀯𑀼𑀥𑀁 𑀢𑀺𑀔𑀺𑀡𑀁 𑀓𑀭𑁄𑀦𑁆𑀢𑁄 𑀯𑀺𑀬 𑀯𑀺𑀲𑁂𑀲𑁂𑀢𑁆𑀯𑀸 𑀤𑀻𑀧𑁂𑀢𑀺, 𑀬𑀣𑀸 𑀢𑀁 𑀩𑀸𑀮𑁄. 𑀏𑀯𑀁 𑀫𑁂 𑀭𑀽𑀧𑀁 𑀳𑁄𑀢𑀽𑀢𑀺 𑀫𑀫 𑀭𑀽𑀧𑀁 𑀏𑀯𑀁𑀯𑀺𑀥𑀁 𑀳𑁄𑀢𑀼, 𑀧𑀸𑀲𑀸𑀤𑀺𑀓𑀁 𑀅𑀪𑀺𑀭𑀽𑀧𑀁 𑀅𑀮𑀗𑁆𑀓𑀢𑀧𑁆𑀧𑀝𑀺𑀬𑀢𑁆𑀢𑀁 𑀲𑀼𑀯𑀡𑁆𑀡𑀢𑁄𑀭𑀡𑀁 𑀯𑀺𑀬 𑀲𑀼𑀲𑀚𑁆𑀚𑀺𑀢𑀘𑀺𑀢𑁆𑀢𑀧𑀝𑁄 𑀯𑀺𑀬 𑀘 𑀫𑀦𑀸𑀧𑀤𑀲𑁆𑀲𑀦𑀦𑁆𑀢𑀺. 𑀏𑀯𑀁 𑀫𑁂 𑀭𑀽𑀧𑀁 𑀫𑀸 𑀅𑀳𑁄𑀲𑀻𑀢𑀺 𑀫𑀫 𑀭𑀽𑀧𑀁 𑀏𑀯𑀁𑀯𑀺𑀥𑀁 𑀫𑀸 𑀳𑁄𑀢𑀼, 𑀤𑀼𑀩𑁆𑀩𑀡𑁆𑀡𑀁 𑀤𑀼𑀲𑁆𑀲𑀡𑁆𑀞𑀺𑀢𑀁 𑀯𑀮𑀺𑀢𑀧𑀮𑀺𑀢𑀁 𑀢𑀺𑀮𑀓𑀲𑀫𑀸𑀓𑀺𑀡𑁆𑀡𑀦𑁆𑀢𑀺.

𑀢𑀼𑀡𑁆𑀳𑀻 𑀅𑀳𑁄𑀲𑀻𑀢𑀺 𑀦𑀺𑀕𑀡𑁆𑀞𑁄 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀯𑀺𑀭𑀤𑁆𑀥𑀪𑀸𑀯𑀁 𑀜𑀢𑁆𑀯𑀸, ‘‘𑀲𑀫𑀡𑁄 𑀕𑁄𑀢𑀫𑁄 𑀫𑀫 𑀯𑀸𑀤𑀁 𑀪𑀺𑀦𑁆𑀤𑀦𑀢𑁆𑀣𑀸𑀬 𑀓𑀸𑀭𑀡𑀁 𑀆𑀳𑀭𑀺, 𑀅𑀳𑀁 𑀩𑀸𑀮𑀢𑀸𑀬 𑀢𑀫𑁂𑀯 𑀯𑀺𑀲𑁂𑀲𑁂𑀢𑁆𑀯𑀸 𑀤𑀻𑀧𑁂𑀲𑀺𑀁, 𑀇𑀤𑀸𑀦𑀺 𑀦𑀝𑁆𑀞𑁄𑀫𑁆𑀳𑀺, 𑀲𑀘𑁂 𑀯𑀢𑁆𑀢𑀢𑀻𑀢𑀺 𑀯𑀓𑁆𑀔𑀸𑀫𑀺, 𑀇𑀫𑁂 𑀭𑀸𑀚𑀸𑀦𑁄 𑀉𑀝𑁆𑀞𑀳𑀺𑀢𑁆𑀯𑀸, ‘𑀅𑀕𑁆𑀕𑀺𑀯𑁂𑀲𑁆𑀲𑀦, 𑀢𑁆𑀯𑀁 𑀫𑀫 𑀭𑀽𑀧𑁂 𑀯𑀲𑁄 𑀯𑀢𑁆𑀢𑀢𑀻𑀢𑀺 𑀯𑀤𑀲𑀺, 𑀬𑀤𑀺 𑀢𑁂 𑀭𑀽𑀧𑁂 𑀯𑀲𑁄 𑀯𑀢𑁆𑀢𑀢𑀺, 𑀓𑀲𑁆𑀫𑀸 𑀢𑁆𑀯𑀁 𑀬𑀣𑀸 𑀇𑀫𑁂 𑀮𑀺𑀘𑁆𑀙𑀯𑀺𑀭𑀸𑀚𑀸𑀦𑁄 𑀢𑀸𑀯𑀢𑀺𑀁𑀲𑀤𑁂𑀯𑀲𑀤𑀺𑀲𑁂𑀳𑀺 𑀅𑀢𑁆𑀢𑀪𑀸𑀯𑁂𑀳𑀺 𑀯𑀺𑀭𑁄𑀘𑀦𑁆𑀢𑀺 𑀅𑀪𑀺𑀭𑀽𑀧𑀸 𑀧𑀸𑀲𑀸𑀤𑀺𑀓𑀸, 𑀏𑀯𑀁 𑀦 𑀯𑀺𑀭𑁄𑀘𑀲𑀻’𑀢𑀺. 𑀲𑀘𑁂 𑀦 𑀯𑀢𑁆𑀢𑀢𑀻𑀢𑀺 𑀯𑀓𑁆𑀔𑀸𑀫𑀺, 𑀲𑀫𑀡𑁄 𑀕𑁄𑀢𑀫𑁄 𑀉𑀝𑁆𑀞𑀳𑀺𑀢𑁆𑀯𑀸, ‘𑀅𑀕𑁆𑀕𑀺𑀯𑁂𑀲𑁆𑀲𑀦, 𑀢𑁆𑀯𑀁 𑀧𑀼𑀩𑁆𑀩𑁂 𑀯𑀢𑁆𑀢𑀢𑀺 𑀫𑁂 𑀭𑀽𑀧𑀲𑁆𑀫𑀺𑀁 𑀯𑀲𑁄𑀢𑀺 𑀯𑀢𑁆𑀯𑀸 𑀇𑀤𑀸𑀦𑀺 𑀧𑀝𑀺𑀓𑁆𑀔𑀺𑀧𑀲𑀻’𑀢𑀺 𑀯𑀸𑀤𑀁 𑀆𑀭𑁄𑀧𑁂𑀲𑁆𑀲𑀢𑀺. 𑀇𑀢𑀺 𑀯𑀢𑁆𑀢𑀢𑀻𑀢𑀺 𑀯𑀼𑀢𑁆𑀢𑁂𑀧𑀺 𑀏𑀓𑁄 𑀤𑁄𑀲𑁄, 𑀦 𑀯𑀢𑁆𑀢𑀢𑀻𑀢𑀺 𑀯𑀼𑀢𑁆𑀢𑁂𑀧𑀺 𑀏𑀓𑁄 𑀤𑁄𑀲𑁄’’𑀢𑀺 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀤𑀼𑀢𑀺𑀬𑀫𑁆𑀧𑀺 𑀪𑀕𑀯𑀸 𑀧𑀼𑀘𑁆𑀙𑀺, 𑀤𑀼𑀢𑀺𑀬𑀫𑁆𑀧𑀺 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀬𑀲𑁆𑀫𑀸 𑀧𑀦 𑀬𑀸𑀯𑀢𑀢𑀺𑀬𑀁 𑀪𑀕𑀯𑀢𑀸 𑀧𑀼𑀘𑁆𑀙𑀺𑀢𑁂 𑀅𑀩𑁆𑀬𑀸𑀓𑀭𑁄𑀦𑁆𑀢𑀲𑁆𑀲 𑀲𑀢𑁆𑀢𑀥𑀸 𑀫𑀼𑀤𑁆𑀥𑀸 𑀨𑀮𑀢𑀺, 𑀩𑀼𑀤𑁆𑀥𑀸 𑀘 𑀦𑀸𑀫 𑀲𑀢𑁆𑀢𑀸𑀦𑀁𑀬𑁂𑀯 𑀅𑀢𑁆𑀣𑀸𑀬 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀧𑀸𑀭𑀫𑀻𑀦𑀁 𑀧𑀽𑀭𑀺𑀢𑀢𑁆𑀢𑀸 𑀲𑀢𑁆𑀢𑁂𑀲𑀼 𑀩𑀮𑀯𑀅𑀦𑀼𑀤𑁆𑀤𑀬𑀸 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀬𑀸𑀯𑀢𑀢𑀺𑀬𑀁 𑀅𑀧𑀼𑀘𑁆𑀙𑀺𑀢𑁆𑀯𑀸 𑀅𑀣 𑀔𑁄 𑀪𑀕𑀯𑀸 𑀲𑀘𑁆𑀘𑀓𑀁 𑀦𑀺𑀕𑀡𑁆𑀞𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 𑀏𑀢𑀁 ‘‘𑀩𑁆𑀬𑀸𑀓𑀭𑁄𑀳𑀻 𑀤𑀸𑀦𑀻’’𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘.

𑀢𑀢𑁆𑀣 𑀲𑀳𑀥𑀫𑁆𑀫𑀺𑀓𑀦𑁆𑀢𑀺 𑀲𑀳𑁂𑀢𑀼𑀓𑀁 𑀲𑀓𑀸𑀭𑀡𑀁. 𑀯𑀚𑀺𑀭𑀁 𑀧𑀸𑀡𑀺𑀫𑁆𑀳𑀺 𑀅𑀲𑁆𑀲𑀸𑀢𑀺 𑀯𑀚𑀺𑀭𑀧𑀸𑀡𑀺. 𑀬𑀓𑁆𑀔𑁄𑀢𑀺 𑀦 𑀬𑁄 𑀯𑀸 𑀲𑁄 𑀯𑀸 𑀬𑀓𑁆𑀔𑁄, 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀆𑀤𑀺𑀢𑁆𑀢𑀦𑁆𑀢𑀺 𑀅𑀕𑁆𑀕𑀺𑀯𑀡𑁆𑀡𑀁. 𑀲𑀫𑁆𑀧𑀚𑁆𑀚𑀮𑀺𑀢𑀦𑁆𑀢𑀺 𑀲𑀼𑀝𑁆𑀞𑀼 𑀧𑀚𑁆𑀚𑀮𑀺𑀢𑀁. 𑀲𑀚𑁄𑀢𑀺𑀪𑀽𑀢𑀦𑁆𑀢𑀺 𑀲𑀫𑀦𑁆𑀢𑀢𑁄 𑀚𑁄𑀢𑀺𑀪𑀽𑀢𑀁, 𑀏𑀓𑀕𑁆𑀕𑀺𑀚𑀸𑀮𑀪𑀽𑀢𑀦𑁆𑀢𑀺 𑀅𑀢𑁆𑀣𑁄. 𑀞𑀺𑀢𑁄 𑀳𑁄𑀢𑀻𑀢𑀺 𑀫𑀳𑀦𑁆𑀢𑀁 𑀲𑀻𑀲𑀁, 𑀓𑀦𑁆𑀤𑀮𑀫𑀓𑀼𑀮𑀲𑀤𑀺𑀲𑀸 𑀤𑀸𑀞𑀸, 𑀪𑀬𑀸𑀦𑀓𑀸𑀦𑀺 𑀅𑀓𑁆𑀔𑀺𑀦𑀸𑀲𑀸𑀤𑀻𑀦𑀻𑀢𑀺 𑀏𑀯𑀁 𑀯𑀺𑀭𑀽𑀧𑀭𑀽𑀧𑀁 𑀫𑀸𑀧𑁂𑀢𑁆𑀯𑀸 𑀞𑀺𑀢𑁄. 𑀓𑀲𑁆𑀫𑀸 𑀧𑀦𑁂𑀲 𑀆𑀕𑀢𑁄𑀢𑀺? 𑀤𑀺𑀝𑁆𑀞𑀺𑀯𑀺𑀲𑁆𑀲𑀚𑁆𑀚𑀸𑀧𑀦𑀢𑁆𑀣𑀁. 𑀅𑀧𑀺𑀘, ‘‘𑀅𑀳𑀜𑁆𑀘𑁂𑀯 𑀔𑁄 𑀧𑀦 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀁, 𑀧𑀭𑁂 𑀘 𑀫𑁂 𑀦 𑀆𑀚𑀸𑀦𑁂𑀬𑁆𑀬𑀼’’𑀦𑁆𑀢𑀺 𑀏𑀯𑀁 𑀥𑀫𑁆𑀫𑀤𑁂𑀲𑀦𑀸𑀬 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀪𑀸𑀯𑀁 𑀆𑀧𑀦𑁆𑀦𑁂 𑀪𑀕𑀯𑀢𑀺 𑀲𑀓𑁆𑀓𑁄 𑀫𑀳𑀸𑀩𑁆𑀭𑀳𑁆𑀫𑀼𑀦𑀸 𑀲𑀤𑁆𑀥𑀺𑀁 𑀆𑀕𑀦𑁆𑀢𑁆𑀯𑀸, ‘‘𑀪𑀕𑀯𑀸 𑀥𑀫𑁆𑀫𑀁 𑀤𑁂𑀲𑁂𑀣, 𑀢𑀼𑀫𑁆𑀳𑀸𑀓𑀁 𑀆𑀡𑀸𑀬 𑀅𑀯𑀢𑁆𑀢𑀫𑀸𑀦𑁂 𑀫𑀬𑀁 𑀯𑀢𑁆𑀢𑀸𑀧𑁂𑀲𑁆𑀲𑀸𑀫, 𑀢𑀼𑀫𑁆𑀳𑀸𑀓𑀁 𑀥𑀫𑁆𑀫𑀘𑀓𑁆𑀓𑀁 𑀳𑁄𑀢𑀼, 𑀅𑀫𑁆𑀳𑀸𑀓𑀁 𑀆𑀡𑀸𑀘𑀓𑁆𑀓’’𑀦𑁆𑀢𑀺 𑀧𑀝𑀺𑀜𑁆𑀜𑀫𑀓𑀸𑀲𑀺. 𑀢𑀲𑁆𑀫𑀸 ‘‘𑀅𑀚𑁆𑀚 𑀲𑀘𑁆𑀘𑀓𑀁 𑀢𑀸𑀲𑁂𑀢𑁆𑀯𑀸 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀆𑀕𑀢𑁄.

𑀪𑀕𑀯𑀸 𑀘𑁂𑀯 𑀧𑀲𑁆𑀲𑀢𑀺, 𑀲𑀘𑁆𑀘𑀓𑁄 𑀘 𑀦𑀺𑀕𑀡𑁆𑀞𑀧𑀼𑀢𑁆𑀢𑁄𑀢𑀺 𑀬𑀤𑀺 𑀳𑀺 𑀢𑀁 𑀅𑀜𑁆𑀜𑁂𑀧𑀺 𑀧𑀲𑁆𑀲𑁂𑀬𑁆𑀬𑀼𑀁. 𑀢𑀁 𑀓𑀸𑀭𑀡𑀁 𑀅𑀕𑀭𑀼 𑀅𑀲𑁆𑀲, ‘‘𑀲𑀫𑀡𑁄 𑀕𑁄𑀢𑀫𑁄 𑀲𑀘𑁆𑀘𑀓𑀁 𑀅𑀢𑁆𑀢𑀦𑁄 𑀯𑀸𑀤𑁂 𑀅𑀦𑁄𑀢𑀭𑀦𑁆𑀢𑀁 𑀜𑀢𑁆𑀯𑀸 𑀬𑀓𑁆𑀔𑀁 𑀆𑀯𑀸𑀳𑁂𑀢𑁆𑀯𑀸 𑀤𑀲𑁆𑀲𑁂𑀲𑀺, 𑀢𑀢𑁄 𑀲𑀘𑁆𑀘𑀓𑁄 𑀪𑀬𑁂𑀦 𑀓𑀣𑁂𑀲𑀻’’𑀢𑀺 𑀯𑀤𑁂𑀬𑁆𑀬𑀼𑀁. 𑀢𑀲𑁆𑀫𑀸 𑀪𑀕𑀯𑀸 𑀘𑁂𑀯 𑀧𑀲𑁆𑀲𑀢𑀺 𑀲𑀘𑁆𑀘𑀓𑁄 𑀘. 𑀢𑀲𑁆𑀲 𑀢𑀁 𑀤𑀺𑀲𑁆𑀯𑀸𑀯 𑀲𑀓𑀮𑀲𑀭𑀻𑀭𑀢𑁄 𑀲𑁂𑀤𑀸 𑀫𑀼𑀘𑁆𑀘𑀺𑀁𑀲𑀼, 𑀅𑀦𑁆𑀢𑁄𑀓𑀼𑀘𑁆𑀙𑀺 𑀯𑀺𑀧𑀭𑀺𑀯𑀢𑁆𑀢𑀫𑀸𑀦𑀸 𑀫𑀳𑀸𑀭𑀯𑀁 𑀭𑀯𑀺. 𑀲𑁄 ‘‘𑀅𑀜𑁆𑀜𑁂𑀧𑀺 𑀦𑀼 𑀔𑁄 𑀧𑀲𑁆𑀲𑀦𑁆𑀢𑀻’’𑀢𑀺 𑀑𑀮𑁄𑀓𑁂𑀦𑁆𑀢𑁄 𑀓𑀲𑁆𑀲𑀘𑀺 𑀮𑁄𑀫𑀳𑀁𑀲𑀫𑀢𑁆𑀢𑀫𑁆𑀧𑀺 𑀦 𑀅𑀤𑁆𑀤𑀲. 𑀢𑀢𑁄 𑁋 ‘‘𑀇𑀤𑀁 𑀪𑀬𑀁 𑀫𑀫𑁂𑀯 𑀉𑀧𑁆𑀧𑀦𑁆𑀦𑀁. 𑀲𑀘𑀸𑀳𑀁 𑀬𑀓𑁆𑀔𑁄𑀢𑀺 𑀯𑀓𑁆𑀔𑀸𑀫𑀺, ‘𑀓𑀺𑀁 𑀢𑀼𑀬𑁆𑀳𑀫𑁂𑀯 𑀅𑀓𑁆𑀔𑀻𑀦𑀺 𑀅𑀢𑁆𑀣𑀺, 𑀢𑁆𑀯𑀫𑁂𑀯 𑀬𑀓𑁆𑀔𑀁 𑀧𑀲𑁆𑀲𑀲𑀺, 𑀧𑀞𑀫𑀁 𑀬𑀓𑁆𑀔𑀁 𑀅𑀤𑀺𑀲𑁆𑀯𑀸 𑀲𑀫𑀡𑁂𑀦 𑀕𑁄𑀢𑀫𑁂𑀦 𑀯𑀸𑀤𑀲𑀗𑁆𑀖𑀸𑀝𑁂 𑀔𑀺𑀢𑁆𑀢𑁄𑀯 𑀬𑀓𑁆𑀔𑀁 𑀧𑀲𑁆𑀲𑀲𑀻’𑀢𑀺 𑀯𑀤𑁂𑀬𑁆𑀬𑀼’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑁋 ‘‘𑀦 𑀤𑀸𑀦𑀺 𑀫𑁂 𑀇𑀥 𑀅𑀜𑁆𑀜𑀁 𑀧𑀝𑀺𑀲𑀭𑀡𑀁 𑀅𑀢𑁆𑀣𑀺, 𑀅𑀜𑁆𑀜𑀢𑁆𑀭 𑀲𑀫𑀡𑀸 𑀕𑁄𑀢𑀫𑀸’’𑀢𑀺 𑀫𑀜𑁆𑀜𑀫𑀸𑀦𑁄, 𑀅𑀣 𑀔𑁄 𑀲𑀘𑁆𑀘𑀓𑁄 𑀦𑀺𑀕𑀡𑁆𑀞𑀧𑀼𑀢𑁆𑀢𑁄…𑀧𑁂… 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘. 𑀢𑀸𑀡𑀁 𑀕𑀯𑁂𑀲𑀻𑀢𑀺 𑀢𑀸𑀡𑀦𑁆𑀢𑀺 𑀕𑀯𑁂𑀲𑀫𑀸𑀦𑁄. 𑀮𑁂𑀡𑀁 𑀕𑀯𑁂𑀲𑀻𑀢𑀺 𑀮𑁂𑀡𑀦𑁆𑀢𑀺 𑀕𑀯𑁂𑀲𑀫𑀸𑀦𑁄. 𑀲𑀭𑀡𑀁 𑀕𑀯𑁂𑀲𑀻𑀢𑀺 𑀲𑀭𑀡𑀦𑁆𑀢𑀺 𑀕𑀯𑁂𑀲𑀫𑀸𑀦𑁄. 𑀏𑀢𑁆𑀣 𑀘 𑀢𑀸𑀬𑀢𑀺 𑀭𑀓𑁆𑀔𑀢𑀻𑀢𑀺 𑀢𑀸𑀡𑀁. 𑀦𑀺𑀮𑀻𑀬𑀦𑁆𑀢𑀺 𑀏𑀢𑁆𑀣𑀸𑀢𑀺 𑀮𑁂𑀡𑀁. 𑀲𑀭𑀢𑀻𑀢𑀺 𑀲𑀭𑀡𑀁, 𑀪𑀬𑀁 𑀳𑀺𑀁𑀲𑀢𑀺 𑀯𑀺𑀤𑁆𑀥𑀁𑀲𑁂𑀢𑀻𑀢𑀺 𑀅𑀢𑁆𑀣𑁄.

𑁩𑁫𑁮. 𑀫𑀦𑀲𑀺 𑀓𑀭𑀺𑀢𑁆𑀯𑀸𑀢𑀺 𑀫𑀦𑀫𑁆𑀳𑀺 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀉𑀧𑀥𑀸𑀭𑁂𑀢𑁆𑀯𑀸. 𑀏𑀯𑀁 𑀫𑁂 𑀯𑁂𑀤𑀦𑀸 𑀳𑁄𑀢𑀽𑀢𑀺 𑀓𑀼𑀲𑀮𑀸𑀯 𑀳𑁄𑀢𑀼, 𑀲𑀼𑀔𑀸𑀯 𑀳𑁄𑀢𑀼. 𑀏𑀯𑀁 𑀫𑁂 𑀲𑀜𑁆𑀜𑀸 𑀳𑁄𑀢𑀽𑀢𑀺 𑀓𑀼𑀲𑀮𑀸𑀯 𑀳𑁄𑀢𑀼, 𑀲𑀼𑀔𑀸𑀯 𑀳𑁄𑀢𑀼, 𑀲𑁄𑀫𑀦𑀲𑁆𑀲𑀲𑀫𑁆𑀧𑀬𑀼𑀢𑁆𑀢𑀸𑀯 𑀳𑁄𑀢𑀽𑀢𑀺. 𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀫𑀸 𑀅𑀳𑁄𑀲𑀻𑀢𑀺 𑀏𑀢𑁆𑀣 𑀧𑀦 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀮𑁆𑀮𑀁 𑀦𑀽𑀢𑀺 𑀬𑀼𑀢𑁆𑀢𑀁 𑀦𑀼. 𑀲𑀫𑀦𑀼𑀧𑀲𑁆𑀲𑀺𑀢𑀼𑀦𑁆𑀢𑀺 ‘‘𑀏𑀢𑀁 𑀫𑀫 𑀏𑀲𑁄𑀳𑀫𑀲𑁆𑀫𑀺 𑀏𑀲𑁄 𑀫𑁂 𑀅𑀢𑁆𑀢𑀸’’𑀢𑀺 𑀏𑀯𑀁 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀯𑀲𑁂𑀦 𑀧𑀲𑁆𑀲𑀺𑀢𑀼𑀁. 𑀦𑁄 𑀳𑀺𑀤𑀁, 𑀪𑁄 𑀕𑁄𑀢𑀫𑀸𑀢𑀺 𑀦 𑀬𑀼𑀢𑁆𑀢𑀫𑁂𑀢𑀁, 𑀪𑁄 𑀕𑁄𑀢𑀫. 𑀇𑀢𑀺 𑀪𑀕𑀯𑀸 𑀬𑀣𑀸 𑀦𑀸𑀫 𑀙𑁂𑀓𑁄 𑀅𑀳𑀺𑀢𑀼𑀡𑁆𑀟𑀺𑀓𑁄 𑀲𑀧𑁆𑀧𑀤𑀝𑁆𑀞𑀯𑀺𑀲𑀁 𑀢𑁂𑀦𑁂𑀯 𑀲𑀧𑁆𑀧𑁂𑀦 𑀧𑀼𑀦 𑀟𑀁𑀲𑀸𑀧𑁂𑀢𑁆𑀯𑀸 𑀉𑀩𑁆𑀩𑀸𑀳𑁂𑀬𑁆𑀬, 𑀏𑀯𑀁 𑀢𑀲𑁆𑀲𑀁𑀬𑁂𑀯 𑀧𑀭𑀺𑀲𑀢𑀺 𑀲𑀘𑁆𑀘𑀓𑀁 𑀦𑀺𑀕𑀡𑁆𑀞𑀧𑀼𑀢𑁆𑀢𑀁 𑀢𑁂𑀦𑁂𑀯 𑀫𑀼𑀔𑁂𑀦 𑀧𑀜𑁆𑀘𑀓𑁆𑀔𑀦𑁆𑀥𑀸 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀅𑀦𑀢𑁆𑀢𑀸𑀢𑀺 𑀯𑀤𑀸𑀧𑁂𑀲𑀺. 𑀤𑀼𑀓𑁆𑀔𑀁 𑀅𑀮𑁆𑀮𑀻𑀦𑁄𑀢𑀺 𑀇𑀫𑀁 𑀧𑀜𑁆𑀘𑀓𑁆𑀔𑀦𑁆𑀥𑀤𑀼𑀓𑁆𑀔𑀁 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀅𑀮𑁆𑀮𑀻𑀦𑁄. 𑀉𑀧𑀕𑀢𑁄 𑀅𑀚𑁆𑀛𑁄𑀲𑀺𑀢𑁄𑀢𑀺𑀧𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀤𑀼𑀓𑁆𑀔𑀁 𑀏𑀢𑀁 𑀫𑀫𑀸𑀢𑀺𑀆𑀤𑀻𑀲𑀼 𑀧𑀜𑁆𑀘𑀓𑁆𑀔𑀦𑁆𑀥𑀤𑀼𑀓𑁆𑀔𑀁 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀯𑀲𑁂𑀦 𑀲𑀫𑀦𑀼𑀧𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀧𑀭𑀺𑀚𑀸𑀦𑁂𑀬𑁆𑀬𑀸𑀢𑀺 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸𑀢𑀺 𑀢𑀻𑀭𑀡𑀧𑀭𑀺𑀜𑁆𑀜𑀸𑀬 𑀧𑀭𑀺𑀢𑁄 𑀚𑀸𑀦𑁂𑀬𑁆𑀬. 𑀧𑀭𑀺𑀓𑁆𑀔𑁂𑀧𑁂𑀢𑁆𑀯𑀸𑀢𑀺 𑀔𑀬𑀁 𑀯𑀬𑀁 𑀅𑀦𑀼𑀧𑁆𑀧𑀸𑀤𑀁 𑀉𑀧𑀦𑁂𑀢𑁆𑀯𑀸.

𑁩𑁫𑁯. 𑀦𑀯𑀦𑁆𑀢𑀺 𑀢𑀭𑀼𑀡𑀁. 𑀅𑀓𑀼𑀓𑁆𑀓𑀼𑀓𑀚𑀸𑀢𑀦𑁆𑀢𑀺 𑀧𑀼𑀧𑁆𑀨𑀕𑁆𑀕𑀳𑀡𑀓𑀸𑀮𑁂 𑀅𑀦𑁆𑀢𑁄 𑀅𑀗𑁆𑀕𑀼𑀝𑁆𑀞𑀧𑁆𑀧𑀫𑀸𑀡𑁄 𑀏𑀓𑁄 𑀖𑀦𑀤𑀡𑁆𑀟𑀓𑁄 𑀦𑀺𑀩𑁆𑀩𑀢𑁆𑀢𑀢𑀺, 𑀢𑁂𑀦 𑀯𑀺𑀭𑀳𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀭𑀺𑀢𑁆𑀢𑁄𑀢𑀺 𑀲𑀼𑀜𑁆𑀜𑁄 𑀅𑀦𑁆𑀢𑁄𑀲𑀸𑀭𑀯𑀺𑀭𑀳𑀺𑀢𑁄. 𑀭𑀺𑀢𑁆𑀢𑀢𑁆𑀢𑀸𑀯 𑀢𑀼𑀘𑁆𑀙𑁄. 𑀅𑀧𑀭𑀤𑁆𑀥𑁄𑀢𑀺 𑀧𑀭𑀸𑀚𑀺𑀢𑁄. 𑀪𑀸𑀲𑀺𑀢𑀸 𑀔𑁄 𑀧𑀦 𑀢𑁂𑀢𑀺 𑀇𑀤𑀁 𑀪𑀕𑀯𑀸 𑀢𑀲𑁆𑀲 𑀫𑀼𑀔𑀭𑀪𑀸𑀯𑀁 𑀧𑀓𑀸𑀲𑁂𑀢𑁆𑀯𑀸 𑀦𑀺𑀕𑁆𑀕𑀡𑁆𑀳𑀦𑁆𑀢𑁄 𑀆𑀳. 𑀲𑁄 𑀓𑀺𑀭 𑀧𑀼𑀩𑁆𑀩𑁂 𑀧𑀽𑀭𑀡𑀸𑀤𑀬𑁄 𑀙 𑀲𑀢𑁆𑀣𑀸𑀭𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺. 𑀢𑁂 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀅𑀣 𑀦𑁂𑀲𑀁 𑀧𑀭𑀺𑀲𑀫𑀚𑁆𑀛𑁂 𑀫𑀳𑀦𑁆𑀢𑀁 𑀯𑀺𑀧𑁆𑀧𑀓𑀸𑀭𑀁 𑀆𑀭𑁄𑀧𑁂𑀢𑁆𑀯𑀸 𑀉𑀝𑁆𑀞𑀸𑀬 𑀚𑀬𑀁 𑀧𑀯𑁂𑀤𑁂𑀦𑁆𑀢𑁄 𑀕𑀘𑁆𑀙𑀢𑀺. 𑀲𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀫𑁆𑀧𑀺 𑀢𑀣𑁂𑀯 𑀯𑀺𑀳𑁂𑀞𑁂𑀲𑁆𑀲𑀸𑀫𑀻𑀢𑀺 𑀲𑀜𑁆𑀜𑀸𑀬 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑁋

‘‘𑀅𑀫𑁆𑀪𑁄 𑀓𑁄 𑀦𑀸𑀫 𑀬𑀁 𑀭𑀼𑀓𑁆𑀔𑁄, 𑀲𑀺𑀦𑁆𑀦𑀧𑀢𑁆𑀢𑁄 𑀲𑀓𑀡𑁆𑀝𑀓𑁄;

𑀬𑀢𑁆𑀣 𑀏𑀓𑀧𑁆𑀧𑀳𑀸𑀭𑁂𑀦, 𑀉𑀢𑁆𑀢𑀫𑀗𑁆𑀕𑀁 𑀯𑀺𑀪𑀺𑀚𑁆𑀚𑀺𑀢’’𑀦𑁆𑀢𑀺.

𑀅𑀬𑀁 𑀔𑀤𑀺𑀭𑀁 𑀆𑀳𑀘𑁆𑀘 𑀅𑀲𑀸𑀭𑀓𑀭𑀼𑀓𑁆𑀔𑀧𑀭𑀺𑀘𑀺𑀢𑁄 𑀫𑀼𑀤𑀼𑀢𑀼𑀡𑁆𑀟𑀲𑀓𑀼𑀡𑁄 𑀯𑀺𑀬 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑀸𑀭𑀁 𑀆𑀳𑀘𑁆𑀘 𑀜𑀸𑀡𑀢𑀼𑀡𑁆𑀟𑀪𑁂𑀤𑀁 𑀧𑀢𑁆𑀢𑁄 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀣𑀤𑁆𑀥𑀪𑀸𑀯𑀁 𑀅𑀜𑁆𑀜𑀸𑀲𑀺. 𑀢𑀤𑀲𑁆𑀲 𑀧𑀭𑀺𑀲𑀫𑀚𑁆𑀛𑁂 𑀧𑀓𑀸𑀲𑁂𑀦𑁆𑀢𑁄 𑀪𑀸𑀲𑀺𑀢𑀸 𑀔𑁄 𑀧𑀦 𑀢𑁂𑀢𑀺𑀆𑀤𑀺𑀫𑀸𑀳. 𑀦𑀢𑁆𑀣𑀺 𑀏𑀢𑀭𑀳𑀻𑀢𑀺 𑀉𑀧𑀸𑀤𑀺𑀦𑁆𑀦𑀓𑀲𑀭𑀻𑀭𑁂 𑀲𑁂𑀤𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀦 𑀯𑀢𑁆𑀢𑀩𑁆𑀩𑀁, 𑀏𑀢𑀭𑀳𑀺 𑀧𑀦 𑀦𑀢𑁆𑀣𑀻𑀢𑀺 𑀯𑀤𑀢𑀺. 𑀲𑀼𑀯𑀡𑁆𑀡𑀯𑀡𑁆𑀡𑀁 𑀓𑀸𑀬𑀁 𑀯𑀺𑀯𑀭𑀻𑀢𑀺 𑀦 𑀲𑀩𑁆𑀩𑀁 𑀓𑀸𑀬𑀁 𑀯𑀺𑀯𑀭𑀺. 𑀩𑀼𑀤𑁆𑀥𑀸 𑀦𑀸𑀫 𑀕𑀡𑁆𑀞𑀺𑀓𑀁 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸 𑀧𑀝𑀺𑀘𑁆𑀙𑀦𑁆𑀦𑀲𑀭𑀻𑀭𑀸 𑀧𑀭𑀺𑀲𑀢𑀺 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺. 𑀅𑀣 𑀪𑀕𑀯𑀸 𑀕𑀮𑀯𑀸𑀝𑀓𑀲𑀫𑁆𑀫𑀼𑀔𑀝𑁆𑀞𑀸𑀦𑁂 𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀘𑀢𑀼𑀭𑀗𑁆𑀕𑀼𑀮𑀫𑀢𑁆𑀢𑀁 𑀑𑀢𑀸𑀭𑁂𑀲𑀺. 𑀑𑀢𑀸𑀭𑀺𑀢𑀫𑀢𑁆𑀢𑁂 𑀧𑀦 𑀢𑀲𑁆𑀫𑀺𑀁 𑀲𑀼𑀯𑀡𑁆𑀡𑀯𑀡𑁆𑀡𑀸 𑀭𑀲𑁆𑀫𑀺𑀬𑁄 𑀧𑀼𑀜𑁆𑀚𑀧𑀼𑀜𑁆𑀚𑀸 𑀳𑀼𑀢𑁆𑀯𑀸 𑀲𑀼𑀯𑀡𑁆𑀡𑀖𑀝𑀢𑁄 𑀭𑀢𑁆𑀢𑀲𑀼𑀯𑀡𑁆𑀡𑀭𑀲𑀥𑀸𑀭𑀸 𑀯𑀺𑀬, 𑀭𑀢𑁆𑀢𑀯𑀡𑁆𑀡𑀯𑀮𑀸𑀳𑀓𑀢𑁄 𑀯𑀺𑀚𑁆𑀚𑀼𑀮𑀢𑀸 𑀯𑀺𑀬 𑀘 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀼𑀯𑀡𑁆𑀡𑀫𑀼𑀭𑀚𑀲𑀤𑀺𑀲𑀁 𑀫𑀳𑀸𑀔𑀦𑁆𑀥𑀁 𑀉𑀢𑁆𑀢𑀫𑀲𑀺𑀭𑀁 𑀧𑀤𑀓𑁆𑀔𑀺𑀡𑀁 𑀓𑀼𑀭𑀼𑀫𑀸𑀦𑀸 𑀆𑀓𑀸𑀲𑁂 𑀧𑀓𑁆𑀔𑀦𑁆𑀤𑀺𑀁𑀲𑀼. 𑀓𑀲𑁆𑀫𑀸 𑀧𑀦 𑀪𑀕𑀯𑀸 𑀏𑀯𑀫𑀓𑀸𑀲𑀻𑀢𑀺? 𑀫𑀳𑀸𑀚𑀦𑀲𑁆𑀲 𑀓𑀗𑁆𑀔𑀸𑀯𑀺𑀦𑁄𑀤𑀦𑀢𑁆𑀣𑀁. 𑀫𑀳𑀸𑀚𑀦𑁄 𑀳𑀺 𑀲𑀫𑀡𑁄 𑀕𑁄𑀢𑀫𑁄 𑀫𑀬𑁆𑀳𑀁 𑀲𑁂𑀤𑁄 𑀦𑀢𑁆𑀣𑀻𑀢𑀺 𑀯𑀤𑀢𑀺, 𑀲𑀘𑁆𑀘𑀓𑀲𑁆𑀲 𑀢𑀸𑀯 𑀦𑀺𑀕𑀡𑁆𑀞𑀧𑀼𑀢𑁆𑀢𑀲𑁆𑀲 𑀬𑀦𑁆𑀢𑀸𑀭𑀼𑀴𑁆𑀳𑀲𑁆𑀲 𑀯𑀺𑀬 𑀲𑁂𑀤𑀸 𑀧𑀕𑁆𑀖𑀭𑀦𑁆𑀢𑀺. 𑀲𑀫𑀡𑁄 𑀧𑀦 𑀕𑁄𑀢𑀫𑁄 𑀖𑀦𑀤𑀼𑀧𑀝𑁆𑀝𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄, 𑀅𑀦𑁆𑀢𑁄 𑀲𑁂𑀤𑀲𑁆𑀲 𑀅𑀢𑁆𑀣𑀺𑀢𑀸 𑀯𑀸 𑀦𑀢𑁆𑀣𑀺𑀢𑀸 𑀯𑀸 𑀓𑀣𑀁 𑀲𑀓𑁆𑀓𑀸 𑀜𑀸𑀢𑀼𑀦𑁆𑀢𑀺 𑀓𑀗𑁆𑀔𑀁 𑀓𑀭𑁂𑀬𑁆𑀬, 𑀢𑀲𑁆𑀲 𑀓𑀗𑁆𑀔𑀸𑀯𑀺𑀦𑁄𑀤𑀦𑀢𑁆𑀣𑀁 𑀏𑀯𑀫𑀓𑀸𑀲𑀺. 𑀫𑀗𑁆𑀓𑀼𑀪𑀽𑀢𑁄𑀢𑀺 𑀦𑀺𑀢𑁆𑀢𑁂𑀚𑀪𑀽𑀢𑁄. 𑀧𑀢𑁆𑀢𑀓𑁆𑀔𑀦𑁆𑀥𑁄𑀢𑀺 𑀧𑀢𑀺𑀢𑀓𑁆𑀔𑀦𑁆𑀥𑁄. 𑀅𑀧𑁆𑀧𑀝𑀺𑀪𑀸𑀦𑁄𑀢𑀺 𑀉𑀢𑁆𑀢𑀭𑀺 𑀅𑀧𑁆𑀧𑀲𑁆𑀲𑀦𑁆𑀢𑁄. 𑀦𑀺𑀲𑀻𑀤𑀻𑀢𑀺 𑀧𑀸𑀤𑀗𑁆𑀕𑀼𑀝𑁆𑀞𑀓𑁂𑀦 𑀪𑀽𑀫𑀺𑀁 𑀓𑀲𑀫𑀸𑀦𑁄 𑀦𑀺𑀲𑀻𑀤𑀺.

𑁩𑁬𑁦. 𑀤𑀼𑀫𑁆𑀫𑀼𑀔𑁄𑀢𑀺 𑀦 𑀯𑀺𑀭𑀽𑀧𑀫𑀼𑀔𑁄, 𑀅𑀪𑀺𑀭𑀽𑀧𑁄 𑀳𑀺 𑀲𑁄 𑀧𑀸𑀲𑀸𑀤𑀺𑀓𑁄. 𑀦𑀸𑀫𑀁 𑀧𑀦𑀲𑁆𑀲 𑀏𑀢𑀁. 𑀅𑀪𑀩𑁆𑀩𑁄 𑀢𑀁 𑀧𑁄𑀓𑁆𑀔𑀭𑀡𑀺𑀁 𑀧𑀼𑀦 𑀑𑀢𑀭𑀺𑀢𑀼𑀦𑁆𑀢𑀺 𑀲𑀩𑁆𑀩𑁂𑀲𑀁 𑀅𑀴𑀸𑀦𑀁 𑀪𑀕𑁆𑀕𑀢𑁆𑀢𑀸 𑀧𑀘𑁆𑀙𑀺𑀦𑁆𑀦𑀕𑀫𑀦𑁄 𑀑𑀢𑀭𑀺𑀢𑀼𑀁 𑀅𑀪𑀩𑁆𑀩𑁄, 𑀢𑀢𑁆𑀣𑁂𑀯 𑀓𑀸𑀓𑀓𑀼𑀮𑀮𑀸𑀤𑀻𑀦𑀁 𑀪𑀢𑁆𑀢𑀁 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀯𑀺𑀲𑀽𑀓𑀸𑀬𑀺𑀓𑀸𑀦𑀻𑀢𑀺 𑀤𑀺𑀝𑁆𑀞𑀺𑀯𑀺𑀲𑀽𑀓𑀸𑀦𑀺. 𑀯𑀺𑀲𑁂𑀯𑀺𑀢𑀸𑀦𑀻𑀢𑀺 𑀤𑀺𑀝𑁆𑀞𑀺𑀲𑀜𑁆𑀘𑀭𑀺𑀢𑀸𑀦𑀺. 𑀯𑀺𑀧𑁆𑀨𑀦𑁆𑀤𑀺𑀢𑀸𑀦𑀻𑀢𑀺 𑀤𑀺𑀝𑁆𑀞𑀺𑀯𑀺𑀧𑁆𑀨𑀦𑁆𑀤𑀺𑀢𑀸𑀦𑀺. 𑀬𑀤𑀺𑀤𑀁 𑀯𑀸𑀤𑀸𑀥𑀺𑀧𑁆𑀧𑀸𑀬𑁄𑀢𑀺 𑀏𑀢𑁆𑀣 𑀬𑀤𑀺𑀤𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁; 𑀯𑀸𑀤𑀸𑀥𑀺𑀧𑁆𑀧𑀸𑀬𑁄 𑀳𑀼𑀢𑁆𑀯𑀸 𑀯𑀸𑀤𑀁 𑀆𑀭𑁄𑀧𑁂𑀲𑁆𑀲𑀸𑀫𑀻𑀢𑀺 𑀅𑀚𑁆𑀛𑀸𑀲𑀬𑁂𑀦 𑀉𑀧𑀲𑀗𑁆𑀓𑀫𑀺𑀢𑀼𑀁 𑀅𑀪𑀩𑁆𑀩𑁄; 𑀥𑀫𑁆𑀫𑀲𑁆𑀲𑀯𑀦𑀸𑀬 𑀧𑀦 𑀉𑀧𑀲𑀗𑁆𑀓𑀫𑁂𑀬𑁆𑀬𑀸𑀢𑀺 𑀤𑀲𑁆𑀲𑁂𑀢𑀺. 𑀤𑀼𑀫𑁆𑀫𑀼𑀔𑀁 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘𑀸𑀢𑀺 𑀓𑀲𑁆𑀫𑀸 𑀅𑀯𑁄𑀘? 𑀤𑀼𑀫𑁆𑀫𑀼𑀔𑀲𑁆𑀲 𑀓𑀺𑀭𑀲𑁆𑀲 𑀉𑀧𑀫𑀸𑀳𑀭𑀡𑀓𑀸𑀮𑁂 𑀲𑁂𑀲 𑀮𑀺𑀘𑁆𑀙𑀯𑀺𑀓𑀼𑀫𑀸𑀭𑀸𑀧𑀺 𑀘𑀺𑀦𑁆𑀢𑁂𑀲𑀼𑀁 𑁋 ‘‘𑀇𑀫𑀺𑀦𑀸 𑀦𑀺𑀕𑀡𑁆𑀞𑁂𑀦 𑀅𑀫𑁆𑀳𑀸𑀓𑀁 𑀲𑀺𑀧𑁆𑀧𑀼𑀕𑁆𑀕𑀳𑀡𑀝𑁆𑀞𑀸𑀦𑁂 𑀘𑀺𑀭𑀁 𑀅𑀯𑀫𑀸𑀦𑁄 𑀓𑀢𑁄, 𑀅𑀬𑀁 𑀤𑀸𑀦𑀺 𑀅𑀫𑀺𑀢𑁆𑀢𑀲𑁆𑀲 𑀧𑀺𑀝𑁆𑀞𑀺𑀁 𑀧𑀲𑁆𑀲𑀺𑀢𑀼𑀁 𑀓𑀸𑀮𑁄. 𑀫𑀬𑀫𑁆𑀧𑀺 𑀏𑀓𑁂𑀓𑀁 𑀉𑀧𑀫𑀁 𑀆𑀳𑀭𑀺𑀢𑁆𑀯𑀸 𑀧𑀸𑀡𑀺𑀧𑁆𑀧𑀳𑀸𑀭𑁂𑀦 𑀧𑀢𑀺𑀢𑀁 𑀫𑀼𑀕𑁆𑀕𑀭𑁂𑀦 𑀧𑁄𑀣𑁂𑀦𑁆𑀢𑁄 𑀯𑀺𑀬 𑀢𑀣𑀸 𑀦𑀁 𑀓𑀭𑀺𑀲𑁆𑀲𑀸𑀫, 𑀬𑀣𑀸 𑀦 𑀧𑀼𑀦 𑀧𑀭𑀺𑀲𑀫𑀚𑁆𑀛𑁂 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺, 𑀢𑁂 𑀑𑀧𑀫𑁆𑀫𑀸𑀦𑀺 𑀓𑀭𑀺𑀢𑁆𑀯𑀸 𑀤𑀼𑀫𑁆𑀫𑀼𑀔𑀲𑁆𑀲 𑀓𑀣𑀸𑀧𑀭𑀺𑀬𑁄𑀲𑀸𑀦𑀁 𑀆𑀕𑀫𑀬𑀫𑀸𑀦𑀸 𑀦𑀺𑀲𑀻𑀤𑀺𑀁𑀲𑀼. 𑀲𑀘𑁆𑀘𑀓𑁄 𑀢𑁂𑀲𑀁 𑀅𑀥𑀺𑀧𑁆𑀧𑀸𑀬𑀁 𑀜𑀢𑁆𑀯𑀸, 𑀇𑀫𑁂 𑀲𑀩𑁆𑀩𑁂𑀯 𑀕𑀻𑀯𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀑𑀝𑁆𑀞𑁂𑀳𑀺 𑀘𑀮𑀫𑀸𑀦𑁂𑀳𑀺 𑀞𑀺𑀢𑀸; 𑀲𑀘𑁂 𑀧𑀘𑁆𑀘𑁂𑀓𑀸 𑀉𑀧𑀫𑀸 𑀳𑀭𑀺𑀢𑀼𑀁 𑀮𑀪𑀺𑀲𑁆𑀲𑀦𑁆𑀢𑀺, 𑀧𑀼𑀦 𑀫𑀬𑀸 𑀧𑀭𑀺𑀲𑀫𑀚𑁆𑀛𑁂 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑀼𑀁 𑀦 𑀲𑀓𑁆𑀓𑀸 𑀪𑀯𑀺𑀲𑁆𑀲𑀢𑀺, 𑀳𑀦𑁆𑀤𑀸𑀳𑀁 𑀤𑀼𑀫𑁆𑀫𑀼𑀔𑀁 𑀅𑀧𑀲𑀸𑀤𑁂𑀢𑁆𑀯𑀸 𑀬𑀣𑀸 𑀅𑀜𑁆𑀜𑀲𑁆𑀲 𑀑𑀓𑀸𑀲𑁄 𑀦 𑀳𑁄𑀢𑀺, 𑀏𑀯𑀁 𑀓𑀣𑀸𑀯𑀸𑀭𑀁 𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀲𑀫𑀡𑀁 𑀕𑁄𑀢𑀫𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻𑀢𑀺 𑀢𑀲𑁆𑀫𑀸 𑀏𑀢𑀤𑀯𑁄𑀘. 𑀢𑀢𑁆𑀣 𑀆𑀕𑀫𑁂𑀳𑀻𑀢𑀺 𑀢𑀺𑀝𑁆𑀞, 𑀫𑀸 𑀧𑀼𑀦 𑀪𑀡𑀸𑀳𑀻𑀢𑀺 𑀅𑀢𑁆𑀣𑁄.

𑁩𑁬𑁧. 𑀢𑀺𑀝𑁆𑀞𑀢𑁂𑀲𑀸, 𑀪𑁄 𑀕𑁄𑀢𑀫𑀸𑀢𑀺, 𑀪𑁄 𑀕𑁄𑀢𑀫, 𑀏𑀲𑀸 𑀅𑀫𑁆𑀳𑀸𑀓𑀜𑁆𑀘𑁂𑀯 𑀅𑀜𑁆𑀜𑁂𑀲𑀜𑁆𑀘 𑀧𑀼𑀣𑀼𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀸𑀘𑀸 𑀢𑀺𑀝𑁆𑀞𑀢𑀼. 𑀯𑀺𑀮𑀸𑀧𑀁 𑀯𑀺𑀮𑀧𑀺𑀢𑀁 𑀫𑀜𑁆𑀜𑁂𑀢𑀺 𑀏𑀢𑀜𑁆𑀳𑀺 𑀯𑀘𑀦𑀁 𑀯𑀺𑀮𑀧𑀺𑀢𑀁 𑀯𑀺𑀬 𑀳𑁄𑀢𑀺, 𑀯𑀺𑀧𑁆𑀧𑀮𑀧𑀺𑀢𑀫𑀢𑁆𑀢𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀢𑀺𑀝𑁆𑀞𑀢𑁂𑀲𑀸𑀢𑀺 𑀏𑀢𑁆𑀣 𑀓𑀣𑀸𑀢𑀺 𑀆𑀳𑀭𑀺𑀢𑁆𑀯𑀸 𑀯𑀢𑁆𑀢𑀩𑁆𑀩𑀸. 𑀯𑀸𑀘𑀸𑀯𑀺𑀮𑀸𑀧𑀁 𑀯𑀺𑀮𑀧𑀺𑀢𑀁 𑀫𑀜𑁆𑀜𑁂𑀢𑀺 𑀏𑀢𑁆𑀣 𑀧𑀦𑀺𑀤𑀁 𑀯𑀸𑀘𑀸𑀦𑀺𑀘𑁆𑀙𑀸𑀭𑀡𑀁 𑀯𑀺𑀮𑀧𑀺𑀢𑀫𑀢𑁆𑀢𑀁 𑀫𑀜𑁆𑀜𑁂 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑁄 𑀓𑀺𑀢𑁆𑀢𑀸𑀯𑀢𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑁂𑀲𑀸𑀭𑀚𑁆𑀚𑀧𑀢𑁆𑀢𑁄𑀢𑀺 𑀜𑀸𑀡𑀧𑀢𑁆𑀢𑁄. 𑀅𑀧𑀭𑀧𑁆𑀧𑀘𑁆𑀘𑀬𑁄𑀢𑀺 𑀅𑀧𑀭𑀧𑁆𑀧𑀢𑁆𑀢𑀺𑀬𑁄. 𑀅𑀣𑀲𑁆𑀲 𑀪𑀕𑀯𑀸 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀇𑀥, 𑀅𑀕𑁆𑀕𑀺𑀯𑁂𑀲𑁆𑀲𑀦𑀸𑀢𑀺𑀆𑀤𑀺𑀫𑀸𑀳, 𑀢𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀬𑀲𑁆𑀫𑀸 𑀧𑀦𑁂𑀢𑁆𑀣 𑀧𑀲𑁆𑀲𑀢𑀻𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑁂𑀓𑁆𑀔𑀪𑀽𑀫𑀺 𑀤𑀲𑁆𑀲𑀺𑀢𑀸. 𑀢𑀲𑁆𑀫𑀸 𑀉𑀢𑁆𑀢𑀭𑀺 𑀅𑀲𑁂𑀓𑁆𑀔𑀪𑀽𑀫𑀺𑀁 𑀧𑀼𑀘𑁆𑀙𑀦𑁆𑀢𑁄 𑀤𑀼𑀢𑀺𑀬𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺, 𑀢𑀫𑁆𑀧𑀺𑀲𑁆𑀲 𑀪𑀕𑀯𑀸 𑀩𑁆𑀬𑀸𑀓𑀸𑀲𑀺. 𑀢𑀢𑁆𑀣 𑀤𑀲𑁆𑀲𑀦𑀸𑀦𑀼𑀢𑁆𑀢𑀭𑀺𑀬𑁂𑀦𑀸𑀢𑀺𑀆𑀤𑀻𑀲𑀼 𑀤𑀲𑁆𑀲𑀦𑀸𑀦𑀼𑀢𑁆𑀢𑀭𑀺𑀬𑀦𑁆𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸 𑀧𑀜𑁆𑀜𑀸. 𑀧𑀝𑀺𑀧𑀤𑀸𑀦𑀼𑀢𑁆𑀢𑀭𑀺𑀬𑀦𑁆𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸 𑀧𑀝𑀺𑀧𑀤𑀸. 𑀯𑀺𑀫𑀼𑀢𑁆𑀢𑀸𑀦𑀼𑀢𑁆𑀢𑀭𑀺𑀬𑀦𑁆𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸 𑀯𑀺𑀫𑀼𑀢𑁆𑀢𑀺. 𑀲𑀼𑀤𑁆𑀥𑀮𑁄𑀓𑀼𑀢𑁆𑀢𑀭𑀫𑁂𑀯 𑀯𑀸 𑀕𑀳𑁂𑀢𑁆𑀯𑀸 𑀤𑀲𑁆𑀲𑀦𑀸𑀦𑀼𑀢𑁆𑀢𑀭𑀺𑀬𑀦𑁆𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺. 𑀧𑀝𑀺𑀧𑀤𑀸𑀦𑀼𑀢𑁆𑀢𑀭𑀺𑀬𑀦𑁆𑀢𑀺 𑀲𑁂𑀲𑀸𑀦𑀺 𑀫𑀕𑁆𑀕𑀗𑁆𑀕𑀸𑀦𑀺. 𑀯𑀺𑀫𑀼𑀢𑁆𑀢𑀸𑀦𑀼𑀢𑁆𑀢𑀭𑀺𑀬𑀦𑁆𑀢𑀺 𑀅𑀕𑁆𑀕𑀨𑀮𑀯𑀺𑀫𑀼𑀢𑁆𑀢𑀺. 𑀔𑀻𑀡𑀸𑀲𑀯𑀲𑁆𑀲 𑀯𑀸 𑀦𑀺𑀩𑁆𑀩𑀸𑀦𑀤𑀲𑁆𑀲𑀦𑀁 𑀤𑀲𑁆𑀲𑀦𑀸𑀦𑀼𑀢𑁆𑀢𑀭𑀺𑀬𑀁 𑀦𑀸𑀫. 𑀫𑀕𑁆𑀕𑀗𑁆𑀕𑀸𑀦𑀺 𑀧𑀝𑀺𑀧𑀤𑀸𑀦𑀼𑀢𑁆𑀢𑀭𑀺𑀬𑀁. 𑀅𑀕𑁆𑀕𑀨𑀮𑀁 𑀯𑀺𑀫𑀼𑀢𑁆𑀢𑀸𑀦𑀼𑀢𑁆𑀢𑀭𑀺𑀬𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀩𑀼𑀤𑁆𑀥𑁄 𑀲𑁄 𑀪𑀕𑀯𑀸𑀢𑀺 𑀲𑁄 𑀪𑀕𑀯𑀸 𑀲𑀬𑀫𑁆𑀧𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀩𑀼𑀤𑁆𑀥𑁄. 𑀩𑁄𑀥𑀸𑀬𑀸𑀢𑀺 𑀧𑀭𑁂𑀲𑀫𑁆𑀧𑀺 𑀘𑀢𑀼𑀲𑀘𑁆𑀘𑀩𑁄𑀥𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀤𑀦𑁆𑀢𑁄𑀢𑀺𑀆𑀤𑀻𑀲𑀼 𑀤𑀦𑁆𑀢𑁄𑀢𑀺 𑀦𑀺𑀩𑁆𑀩𑀺𑀲𑁂𑀯𑀦𑁄. 𑀤𑀫𑀣𑀸𑀬𑀸𑀢𑀺 𑀦𑀺𑀩𑁆𑀩𑀺𑀲𑁂𑀯𑀦𑀢𑁆𑀣𑀸𑀬. 𑀲𑀦𑁆𑀢𑁄𑀢𑀺 𑀲𑀩𑁆𑀩𑀓𑀺𑀮𑁂𑀲𑀯𑀽𑀧𑀲𑀫𑁂𑀦 𑀲𑀦𑁆𑀢𑁄. 𑀲𑀫𑀣𑀸𑀬𑀸𑀢𑀺 𑀓𑀺𑀮𑁂𑀲𑀯𑀽𑀧𑀲𑀫𑀸𑀬. 𑀢𑀺𑀡𑁆𑀡𑁄𑀢𑀺 𑀘𑀢𑀼𑀭𑁄𑀖𑀢𑀺𑀡𑁆𑀡𑁄. 𑀢𑀭𑀡𑀸𑀬𑀸𑀢𑀺 𑀘𑀢𑀼𑀭𑁄𑀖𑀢𑀭𑀡𑀸𑀬. 𑀧𑀭𑀺𑀦𑀺𑀩𑁆𑀩𑀼𑀢𑁄𑀢𑀺 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀼𑀢𑁄. 𑀧𑀭𑀺𑀦𑀺𑀩𑁆𑀩𑀸𑀦𑀸𑀬𑀸𑀢𑀺 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑀢𑁆𑀣𑀸𑀬.

𑁩𑁬𑁨. 𑀥𑀁𑀲𑀻𑀢𑀺 𑀕𑀼𑀡𑀥𑀁𑀲𑀓𑀸. 𑀧𑀕𑀩𑁆𑀩𑀸𑀢𑀺 𑀯𑀸𑀘𑀸𑀧𑀸𑀕𑀩𑁆𑀩𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑀸. 𑀆𑀲𑀸𑀤𑁂𑀢𑀩𑁆𑀩𑀦𑁆𑀢𑀺 𑀖𑀝𑁆𑀝𑁂𑀢𑀩𑁆𑀩𑀁. 𑀆𑀲𑀚𑁆𑀚𑀸𑀢𑀺 𑀖𑀝𑁆𑀝𑁂𑀢𑁆𑀯𑀸. 𑀦𑀢𑁆𑀯𑁂𑀯 𑀪𑀯𑀦𑁆𑀢𑀁 𑀕𑁄𑀢𑀫𑀦𑁆𑀢𑀺 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀆𑀲𑀚𑁆𑀚 𑀓𑀲𑁆𑀲𑀘𑀺 𑀅𑀢𑁆𑀢𑀦𑁄 𑀯𑀸𑀤𑀁 𑀅𑀦𑀼𑀧𑀳𑀢𑀁 𑀲𑀓𑀮𑀁 𑀆𑀤𑀸𑀬 𑀧𑀓𑁆𑀓𑀫𑀺𑀢𑀼𑀁 𑀣𑀸𑀫𑁄 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀦 𑀳𑀺 𑀪𑀕𑀯𑀸 𑀳𑀢𑁆𑀣𑀺𑀆𑀤𑀬𑁄 𑀯𑀺𑀬 𑀓𑀲𑁆𑀲𑀘𑀺 𑀚𑀻𑀯𑀺𑀢𑀦𑁆𑀢𑀭𑀸𑀬𑀁 𑀓𑀭𑁄𑀢𑀺. 𑀅𑀬𑀁 𑀧𑀦 𑀦𑀺𑀕𑀡𑁆𑀞𑁄 𑀇𑀫𑀸 𑀢𑀺𑀲𑁆𑀲𑁄 𑀉𑀧𑀫𑀸 𑀦 𑀪𑀕𑀯𑀢𑁄 𑀉𑀓𑁆𑀓𑀁𑀲𑀦𑀢𑁆𑀣𑀁 𑀆𑀳𑀭𑀺, 𑀅𑀢𑁆𑀢𑀼𑀓𑁆𑀓𑀁𑀲𑀦𑀢𑁆𑀣𑀫𑁂𑀯 𑀆𑀳𑀭𑀺. 𑀬𑀣𑀸 𑀳𑀺 𑀭𑀸𑀚𑀸 𑀓𑀜𑁆𑀘𑀺 𑀧𑀘𑁆𑀘𑀢𑁆𑀣𑀺𑀓𑀁 𑀖𑀸𑀢𑁂𑀢𑁆𑀯𑀸 𑀏𑀯𑀁 𑀦𑀸𑀫 𑀲𑀽𑀭𑁄 𑀏𑀯𑀁 𑀣𑀸𑀫𑀲𑀫𑁆𑀧𑀦𑁆𑀦𑁄 𑀧𑀼𑀭𑀺𑀲𑁄 𑀪𑀯𑀺𑀲𑁆𑀲𑀢𑀻𑀢𑀺 𑀧𑀘𑁆𑀘𑀢𑁆𑀣𑀺𑀓𑀁 𑀣𑁄𑀫𑁂𑀦𑁆𑀢𑁄𑀧𑀺 𑀅𑀢𑁆𑀢𑀸𑀦𑀫𑁂𑀯 𑀣𑁄𑀫𑁂𑀢𑀺. 𑀏𑀯𑀫𑁂𑀯 𑀲𑁄𑀧𑀺 𑀲𑀺𑀬𑀸 𑀳𑀺, 𑀪𑁄 𑀕𑁄𑀢𑀫, 𑀳𑀢𑁆𑀣𑀺𑀁 𑀧𑀪𑀺𑀦𑁆𑀦𑀦𑁆𑀢𑀺𑀆𑀤𑀻𑀳𑀺 𑀪𑀕𑀯𑀦𑁆𑀢𑀁 𑀉𑀓𑁆𑀓𑀁𑀲𑁂𑀦𑁆𑀢𑁄𑀧𑀺 𑀫𑀬𑀫𑁂𑀯 𑀲𑀽𑀭𑀸 𑀫𑀬𑀁 𑀧𑀡𑁆𑀟𑀺𑀢𑀸 𑀫𑀬𑀁 𑀩𑀳𑀼𑀲𑁆𑀲𑀼𑀢𑀸𑀬𑁂𑀯 𑀏𑀯𑀁 𑀧𑀪𑀺𑀦𑁆𑀦𑀳𑀢𑁆𑀣𑀺𑀁 𑀯𑀺𑀬, 𑀚𑀮𑀺𑀢𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀯𑀺𑀬, 𑀨𑀡𑀓𑀢𑀆𑀲𑀻𑀯𑀺𑀲𑀁 𑀯𑀺𑀬 𑀘 𑀯𑀸𑀤𑀢𑁆𑀣𑀺𑀓𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀉𑀧𑀲𑀗𑁆𑀓𑀫𑀺𑀫𑁆𑀳𑀸𑀢𑀺 𑀅𑀢𑁆𑀢𑀸𑀦𑀁𑀬𑁂𑀯 𑀉𑀓𑁆𑀓𑀁𑀲𑁂𑀢𑀺. 𑀏𑀯𑀁 𑀅𑀢𑁆𑀢𑀸𑀦𑀁 𑀉𑀓𑁆𑀓𑀁𑀲𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀦𑀺𑀫𑀦𑁆𑀢𑀬𑀫𑀸𑀦𑁄 𑀅𑀥𑀺𑀯𑀸𑀲𑁂𑀢𑀼 𑀫𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀥𑀺𑀯𑀸𑀲𑁂𑀢𑀽𑀢𑀺 𑀲𑀫𑁆𑀧𑀝𑀺𑀘𑁆𑀙𑀢𑀼. 𑀲𑁆𑀯𑀸𑀢𑀦𑀸𑀬𑀸𑀢𑀺 𑀬𑀁 𑀫𑁂 𑀢𑀼𑀫𑁆𑀳𑁂𑀲𑀼 𑀓𑀸𑀭𑀁 𑀓𑀭𑁄𑀢𑁄 𑀲𑁆𑀯𑁂 𑀪𑀯𑀺𑀲𑁆𑀲𑀢𑀺 𑀧𑀼𑀜𑁆𑀜𑀜𑁆𑀘 𑀧𑀻𑀢𑀺𑀧𑀸𑀫𑁄𑀚𑁆𑀚𑀜𑁆𑀘, 𑀢𑀤𑀢𑁆𑀣𑀸𑀬. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦𑀸𑀢𑀺 𑀪𑀕𑀯𑀸 𑀓𑀸𑀬𑀗𑁆𑀕𑀁 𑀯𑀸 𑀯𑀸𑀘𑀗𑁆𑀕𑀁 𑀯𑀸 𑀅𑀘𑁄𑀧𑁂𑀢𑁆𑀯𑀸 𑀅𑀩𑁆𑀪𑀦𑁆𑀢𑀭𑁂𑀬𑁂𑀯 𑀔𑀦𑁆𑀢𑀺𑀁 𑀥𑀸𑀭𑁂𑀦𑁆𑀢𑁄 𑀢𑀼𑀡𑁆𑀳𑀻𑀪𑀸𑀯𑁂𑀦 𑀅𑀥𑀺𑀯𑀸𑀲𑁂𑀲𑀺. 𑀲𑀘𑁆𑀘𑀓𑀲𑁆𑀲 𑀅𑀦𑀼𑀕𑁆𑀕𑀳𑀓𑀭𑀡𑀢𑁆𑀣𑀁 𑀫𑀦𑀲𑀸𑀯 𑀲𑀫𑁆𑀧𑀝𑀺𑀘𑁆𑀙𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁩𑁬𑁩. 𑀬𑀫𑀲𑁆𑀲 𑀧𑀢𑀺𑀭𑀽𑀧𑀁 𑀫𑀜𑁆𑀜𑁂𑀬𑁆𑀬𑀸𑀣𑀸𑀢𑀺 𑀢𑁂 𑀓𑀺𑀭 𑀮𑀺𑀘𑁆𑀙𑀯𑀻 𑀢𑀲𑁆𑀲 𑀧𑀜𑁆𑀘𑀣𑀸𑀮𑀺𑀧𑀸𑀓𑀲𑀢𑀸𑀦𑀺 𑀦𑀺𑀘𑁆𑀘𑀪𑀢𑁆𑀢𑀁 𑀆𑀳𑀭𑀦𑁆𑀢𑀺. 𑀢𑀤𑁂𑀯 𑀲𑀦𑁆𑀥𑀸𑀬 𑀏𑀲 𑀲𑁆𑀯𑁂 𑀢𑀼𑀫𑁆𑀳𑁂 𑀬𑀁 𑀅𑀲𑁆𑀲 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀧𑀢𑀺𑀭𑀽𑀧𑀁 𑀓𑀧𑁆𑀧𑀺𑀬𑀦𑁆𑀢𑀺 𑀫𑀜𑁆𑀜𑁂𑀬𑁆𑀬𑀸𑀣, 𑀢𑀁 𑀆𑀳𑀭𑁂𑀬𑁆𑀬𑀸𑀣; 𑀲𑀫𑀡𑀲𑁆𑀲 𑀳𑀺 𑀕𑁄𑀢𑀫𑀲𑁆𑀲 𑀢𑀼𑀫𑁆𑀳𑁂 𑀧𑀭𑀺𑀘𑀸𑀭𑀓𑀸 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀁 𑀬𑀼𑀢𑁆𑀢𑀸𑀬𑀼𑀢𑁆𑀢𑀁 𑀚𑀸𑀦𑀸𑀣𑀸𑀢𑀺 𑀯𑀤𑀢𑀺. 𑀪𑀢𑁆𑀢𑀸𑀪𑀺𑀳𑀸𑀭𑀁 𑀅𑀪𑀺𑀳𑀭𑀺𑀁𑀲𑀽𑀢𑀺 𑀅𑀪𑀺𑀳𑀭𑀺𑀢𑀩𑁆𑀩𑀁 𑀪𑀢𑁆𑀢𑀁 𑀅𑀪𑀺𑀳𑀭𑀺𑀁𑀲𑀼. 𑀧𑀡𑀻𑀢𑁂𑀦𑀸𑀢𑀺 𑀉𑀢𑁆𑀢𑀫𑁂𑀦. 𑀲𑀳𑀢𑁆𑀣𑀸𑀢𑀺 𑀲𑀳𑀢𑁆𑀣𑁂𑀦. 𑀲𑀦𑁆𑀢𑀧𑁆𑀧𑁂𑀢𑁆𑀯𑀸𑀢𑀺 𑀲𑀼𑀝𑁆𑀞𑀼 𑀢𑀧𑁆𑀧𑁂𑀢𑁆𑀯𑀸, 𑀧𑀭𑀺𑀧𑀼𑀡𑁆𑀡𑀁 𑀲𑀼𑀳𑀺𑀢𑀁 𑀬𑀸𑀯𑀤𑀢𑁆𑀣𑀁 𑀓𑀢𑁆𑀯𑀸. 𑀲𑀫𑁆𑀧𑀯𑀸𑀭𑁂𑀢𑁆𑀯𑀸𑀢𑀺 𑀲𑀼𑀝𑁆𑀞𑀼 𑀧𑀯𑀸𑀭𑁂𑀢𑁆𑀯𑀸, 𑀅𑀮𑀁 𑀅𑀮𑀦𑁆𑀢𑀺 𑀳𑀢𑁆𑀣𑀲𑀜𑁆𑀜𑀸𑀬 𑀧𑀝𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸. 𑀪𑀼𑀢𑁆𑀢𑀸𑀯𑀺𑀦𑁆𑀢𑀺 𑀪𑀼𑀢𑁆𑀢𑀯𑀦𑁆𑀢𑀁. 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀦𑁆𑀢𑀺 𑀧𑀢𑁆𑀢𑀢𑁄 𑀑𑀦𑀻𑀢𑀧𑀸𑀡𑀺𑀁, 𑀅𑀧𑀦𑀻𑀢𑀳𑀢𑁆𑀣𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀑𑀦𑀺𑀢𑁆𑀢𑀧𑀢𑁆𑀢𑀧𑀸𑀡𑀺’’𑀦𑁆𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲𑀢𑁆𑀣𑁄, 𑀑𑀦𑀺𑀢𑁆𑀢𑀁 𑀦𑀸𑀦𑀸𑀪𑀽𑀢𑀁 𑀧𑀢𑁆𑀢𑀁 𑀧𑀸𑀡𑀺𑀢𑁄 𑀅𑀲𑁆𑀲𑀸𑀢𑀺 𑀑𑀦𑀺𑀢𑁆𑀢𑀧𑀢𑁆𑀢𑀧𑀸𑀡𑀻. 𑀢𑀁 𑀑𑀦𑀺𑀢𑁆𑀢𑀧𑀢𑁆𑀢𑀧𑀸𑀡𑀺𑀁, 𑀳𑀢𑁆𑀣𑁂 𑀘 𑀧𑀢𑁆𑀢𑀜𑁆𑀘 𑀥𑁄𑀯𑀺𑀢𑁆𑀯𑀸 𑀏𑀓𑀫𑀦𑁆𑀢𑁂 𑀧𑀢𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀦𑁆𑀢𑀺 𑀅𑀢𑁆𑀣𑁄. 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀻𑀢𑀺 𑀪𑀕𑀯𑀦𑁆𑀢𑀁 𑀏𑀯𑀁𑀪𑀽𑀢𑀁 𑀜𑀢𑁆𑀯𑀸 𑀏𑀓𑀲𑁆𑀫𑀺𑀁 𑀑𑀓𑀸𑀲𑁂 𑀦𑀺𑀲𑀻𑀤𑀻𑀢𑀺 𑀅𑀢𑁆𑀣𑁄. 𑀧𑀼𑀜𑁆𑀜𑀜𑁆𑀘𑀸𑀢𑀺 𑀬𑀁 𑀇𑀫𑀲𑁆𑀫𑀺𑀁 𑀤𑀸𑀦𑁂 𑀧𑀼𑀜𑁆𑀜𑀁, 𑀆𑀬𑀢𑀺𑀁 𑀯𑀺𑀧𑀸𑀓𑀓𑁆𑀔𑀦𑁆𑀥𑀸𑀢𑀺 𑀅𑀢𑁆𑀣𑁄. 𑀧𑀼𑀜𑁆𑀜𑀫𑀳𑀻𑀢𑀺 𑀯𑀺𑀧𑀸𑀓𑀓𑁆𑀔𑀦𑁆𑀥𑀸𑀦𑀁𑀬𑁂𑀯 𑀧𑀭𑀺𑀯𑀸𑀭𑁄. 𑀢𑀁 𑀤𑀸𑀬𑀓𑀸𑀦𑀁 𑀲𑀼𑀔𑀸𑀬 𑀳𑁄𑀢𑀽𑀢𑀺 𑀢𑀁 𑀇𑀫𑁂𑀲𑀁 𑀮𑀺𑀘𑁆𑀙𑀯𑀻𑀦𑀁 𑀲𑀼𑀔𑀢𑁆𑀣𑀸𑀬 𑀳𑁄𑀢𑀼. 𑀇𑀤𑀁 𑀓𑀺𑀭 𑀲𑁄 𑀅𑀳𑀁 𑀧𑀩𑁆𑀩𑀚𑀺𑀢𑁄 𑀦𑀸𑀫, 𑀧𑀩𑁆𑀩𑀚𑀺𑀢𑁂𑀦 𑀘 𑀦 𑀬𑀼𑀢𑁆𑀢𑀁 𑀅𑀢𑁆𑀢𑀦𑁄 𑀤𑀸𑀦𑀁 𑀦𑀺𑀬𑁆𑀬𑀸𑀢𑁂𑀢𑀼𑀦𑁆𑀢𑀺 𑀢𑁂𑀲𑀁 𑀦𑀺𑀬𑁆𑀬𑀸𑀢𑁂𑀦𑁆𑀢𑁄 𑀏𑀯𑀫𑀸𑀳. 𑀅𑀣 𑀪𑀕𑀯𑀸 𑀬𑀲𑁆𑀫𑀸 𑀮𑀺𑀘𑁆𑀙𑀯𑀻𑀳𑀺 𑀲𑀘𑁆𑀘𑀓𑀲𑁆𑀲 𑀤𑀺𑀦𑁆𑀦𑀁, 𑀦 𑀪𑀕𑀯𑀢𑁄. 𑀲𑀘𑁆𑀘𑀓𑁂𑀦 𑀧𑀦 𑀪𑀕𑀯𑀢𑁄 𑀤𑀺𑀦𑁆𑀦𑀁, 𑀢𑀲𑁆𑀫𑀸 𑀢𑀫𑀢𑁆𑀣𑀁 𑀤𑀻𑀧𑁂𑀦𑁆𑀢𑁄 𑀬𑀁 𑀔𑁄, 𑀅𑀕𑁆𑀕𑀺𑀯𑁂𑀲𑁆𑀲𑀦𑀸𑀢𑀺𑀆𑀤𑀺𑀫𑀸𑀳. 𑀇𑀢𑀺 𑀪𑀕𑀯𑀸 𑀦𑀺𑀕𑀡𑁆𑀞𑀲𑁆𑀲 𑀫𑀢𑁂𑀦 𑀯𑀺𑀦𑀸𑀬𑁂𑀯 𑀅𑀢𑁆𑀢𑀦𑁄 𑀤𑀺𑀦𑁆𑀦𑀁 𑀤𑀓𑁆𑀔𑀺𑀡𑀁 𑀦𑀺𑀕𑀡𑁆𑀞𑀲𑁆𑀲 𑀦𑀺𑀬𑁆𑀬𑀸𑀢𑁂𑀲𑀺, 𑀲𑀸 𑀘𑀲𑁆𑀲 𑀅𑀦𑀸𑀕𑀢𑁂 𑀯𑀸𑀲𑀦𑀸 𑀪𑀯𑀺𑀲𑁆𑀲𑀢𑀻𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀘𑀽𑀴𑀲𑀘𑁆𑀘𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.