𑁩. 𑀯𑀫𑁆𑀫𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪𑁯. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀯𑀫𑁆𑀫𑀺𑀓𑀲𑀼𑀢𑁆𑀢𑀁. 𑀢𑀢𑁆𑀣 𑀆𑀬𑀲𑁆𑀫𑀸𑀢𑀺 𑀧𑀺𑀬𑀯𑀘𑀦𑀫𑁂𑀢𑀁. 𑀓𑀼𑀫𑀸𑀭𑀓𑀲𑁆𑀲𑀧𑁄𑀢𑀺 𑀢𑀲𑁆𑀲 𑀦𑀸𑀫𑀁. 𑀓𑀼𑀫𑀸𑀭𑀓𑀸𑀮𑁂 𑀧𑀩𑁆𑀩𑀚𑀺𑀢𑀢𑁆𑀢𑀸 𑀧𑀦 𑀪𑀕𑀯𑀢𑀸, ‘‘𑀓𑀲𑁆𑀲𑀧𑀁 𑀧𑀓𑁆𑀓𑁄𑀲𑀣, 𑀇𑀤𑀁 𑀨𑀮𑀁 𑀯𑀸 𑀔𑀸𑀤𑀦𑀻𑀬𑀁 𑀯𑀸 𑀓𑀲𑁆𑀲𑀧𑀲𑁆𑀲 𑀤𑁂𑀣𑀸’’𑀢𑀺 𑀯𑀼𑀢𑁆𑀢𑁂, 𑀓𑀢𑀭𑀲𑁆𑀲 𑀓𑀲𑁆𑀲𑀧𑀲𑁆𑀲𑀸𑀢𑀺 𑀓𑀼𑀫𑀸𑀭𑀓𑀲𑁆𑀲𑀧𑀲𑁆𑀲𑀸𑀢𑀺 𑀏𑀯𑀁 𑀕𑀳𑀺𑀢𑀦𑀸𑀫𑀢𑁆𑀢𑀸 𑀢𑀢𑁄 𑀧𑀝𑁆𑀞𑀸𑀬 𑀯𑀼𑀟𑁆𑀠𑀓𑀸𑀮𑁂𑀧𑀺 ‘‘𑀓𑀼𑀫𑀸𑀭𑀓𑀲𑁆𑀲𑀧𑁄’’ 𑀢𑁆𑀯𑁂𑀯 𑀯𑀼𑀘𑁆𑀘𑀢𑀺. 𑀅𑀧𑀺𑀘 𑀭𑀜𑁆𑀜𑀸 𑀧𑁄𑀲𑀸𑀯𑀦𑀺𑀓𑀧𑀼𑀢𑁆𑀢𑀢𑁆𑀢𑀸𑀧𑀺 𑀢𑀁 ‘‘𑀓𑀼𑀫𑀸𑀭𑀓𑀲𑁆𑀲𑀧𑁄’’𑀢𑀺 𑀲𑀜𑁆𑀚𑀸𑀦𑀺𑀁𑀲𑀼. 𑀅𑀬𑀁 𑀧𑀦𑀲𑁆𑀲 𑀧𑀼𑀩𑁆𑀩𑀬𑁄𑀕𑀢𑁄 𑀧𑀝𑁆𑀞𑀸𑀬 𑀆𑀯𑀺𑀪𑀸𑀯𑀓𑀣𑀸 𑁋

𑀣𑁂𑀭𑁄 𑀓𑀺𑀭 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀅𑀳𑁄𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀪𑀕𑀯𑀦𑁆𑀢𑀁 𑀘𑀺𑀢𑁆𑀭𑀓𑀣𑀺𑀁 𑀏𑀓𑀁 𑀅𑀢𑁆𑀢𑀦𑁄 𑀲𑀸𑀯𑀓𑀁 𑀞𑀸𑀦𑀦𑁆𑀢𑀭𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀪𑀕𑀯𑀢𑁄 𑀲𑀢𑁆𑀢𑀸𑀳𑀁 𑀤𑀸𑀦𑀁 𑀤𑀢𑁆𑀯𑀸, ‘‘𑀅𑀳𑀫𑁆𑀧𑀺 𑀪𑀕𑀯𑀸 𑀅𑀦𑀸𑀕𑀢𑁂 𑀏𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀅𑀬𑀁 𑀣𑁂𑀭𑁄 𑀯𑀺𑀬 𑀘𑀺𑀢𑁆𑀭𑀓𑀣𑀻 𑀲𑀸𑀯𑀓𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀦𑀁 𑀓𑀢𑁆𑀯𑀸 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑁄 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀦𑀸𑀲𑀓𑁆𑀔𑀺.

𑀢𑀤𑀸 𑀓𑀺𑀭 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀑𑀲𑀓𑁆𑀓𑀦𑁆𑀢𑁂 𑀧𑀜𑁆𑀘 𑀪𑀺𑀓𑁆𑀔𑀽 𑀦𑀺𑀲𑁆𑀲𑁂𑀡𑀺𑀁 𑀩𑀦𑁆𑀥𑀺𑀢𑁆𑀯𑀸 𑀧𑀩𑁆𑀩𑀢𑀁 𑀅𑀪𑀺𑀭𑀼𑀬𑁆𑀳 𑀲𑀫𑀡𑀥𑀫𑁆𑀫𑀁 𑀅𑀓𑀁𑀲𑀼. 𑀲𑀗𑁆𑀖𑀢𑁆𑀣𑁂𑀭𑁄 𑀢𑀢𑀺𑀬𑀤𑀺𑀯𑀲𑁂 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄. 𑀅𑀦𑀼𑀣𑁂𑀭𑁄 𑀘𑀢𑀼𑀢𑁆𑀣𑀤𑀺𑀯𑀲𑁂 𑀅𑀦𑀸𑀕𑀸𑀫𑀻 𑀅𑀳𑁄𑀲𑀺. 𑀇𑀢𑀭𑁂 𑀢𑀬𑁄 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀢𑁂𑀲𑀁 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀤𑁂𑀯𑁂𑀲𑀼 𑀘 𑀫𑀦𑀼𑀲𑁆𑀲𑁂𑀲𑀼 𑀘 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑁄𑀦𑁆𑀢𑀸𑀦𑀁 𑀏𑀓𑁄 𑀢𑀓𑁆𑀓𑀲𑀺𑀮𑀸𑀬𑀁 𑀭𑀸𑀚𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀧𑀼𑀓𑁆𑀓𑀼𑀲𑀸𑀢𑀺 𑀦𑀸𑀫 𑀭𑀸𑀚𑀸 𑀳𑀼𑀢𑁆𑀯𑀸 𑀪𑀕𑀯𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀧𑀩𑁆𑀩𑀚𑀺𑀢𑁆𑀯𑀸 𑀭𑀸𑀚𑀕𑀳𑀁 𑀕𑀘𑁆𑀙𑀦𑁆𑀢𑁄 𑀓𑀼𑀫𑁆𑀪𑀓𑀸𑀭𑀲𑀸𑀮𑀸𑀬𑀁 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀅𑀦𑀸𑀕𑀸𑀫𑀺𑀨𑀮𑀁 𑀧𑀢𑁆𑀢𑁄. 𑀏𑀓𑁄 𑀏𑀓𑀲𑁆𑀫𑀺𑀁 𑀲𑀫𑀼𑀤𑁆𑀤𑀧𑀝𑁆𑀝𑀦𑁂 𑀓𑀼𑀮𑀖𑀭𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀦𑀸𑀯𑀁 𑀆𑀭𑀼𑀬𑁆𑀳 𑀪𑀺𑀦𑁆𑀦𑀦𑀸𑀯𑁄 𑀤𑀸𑀭𑀼𑀘𑀻𑀭𑀸𑀦𑀺 𑀦𑀺𑀯𑀸𑀲𑁂𑀢𑁆𑀯𑀸 𑀮𑀸𑀪𑀲𑀫𑁆𑀧𑀢𑁆𑀢𑀺𑀁 𑀧𑀢𑁆𑀢𑁄, ‘‘𑀅𑀳𑀁 𑀅𑀭𑀳𑀸’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸, ‘‘𑀦 𑀢𑁆𑀯𑀁 𑀅𑀭𑀳𑀸, 𑀕𑀘𑁆𑀙 𑀲𑀢𑁆𑀣𑀸𑀭𑀁 𑀧𑀜𑁆𑀳𑀁 𑀧𑀼𑀘𑁆𑀙𑀸’’𑀢𑀺 𑀅𑀢𑁆𑀣𑀓𑀸𑀫𑀸𑀬 𑀤𑁂𑀯𑀢𑀸𑀬 𑀘𑁄𑀤𑀺𑀢𑁄 𑀢𑀣𑀸 𑀓𑀢𑁆𑀯𑀸 𑀅𑀭𑀳𑀢𑁆𑀢𑀨𑀮𑀁 𑀧𑀢𑁆𑀢𑁄.

𑀏𑀓𑁄 𑀭𑀸𑀚𑀕𑀳𑁂 𑀏𑀓𑀺𑀲𑁆𑀲𑀸 𑀓𑀼𑀮𑀤𑀸𑀭𑀺𑀓𑀸𑀬 𑀓𑀼𑀘𑁆𑀙𑀺𑀫𑁆𑀳𑀺 𑀉𑀧𑁆𑀧𑀦𑁆𑀦𑁄. 𑀲𑀸 𑀘 𑀧𑀞𑀫𑀁 𑀫𑀸𑀢𑀸𑀧𑀺𑀢𑀭𑁄 𑀬𑀸𑀘𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀅𑀮𑀪𑀫𑀸𑀦𑀸 𑀓𑀼𑀮𑀖𑀭𑀁 𑀕𑀢𑀸 𑀕𑀩𑁆𑀪𑀲𑀡𑁆𑀞𑀺𑀢𑀫𑁆𑀧𑀺 𑀅𑀚𑀸𑀦𑀦𑁆𑀢𑀻 𑀲𑀸𑀫𑀺𑀓𑀁 𑀆𑀭𑀸𑀥𑁂𑀢𑁆𑀯𑀸 𑀢𑁂𑀦 𑀅𑀦𑀼𑀜𑁆𑀜𑀸𑀢𑀸 𑀪𑀺𑀓𑁆𑀔𑀼𑀦𑀻𑀲𑀼 𑀧𑀩𑁆𑀩𑀚𑀺𑀢𑀸. 𑀢𑀲𑁆𑀲𑀸 𑀕𑀩𑁆𑀪𑀺𑀦𑀺𑀦𑀺𑀫𑀺𑀢𑁆𑀢𑀁 𑀤𑀺𑀲𑁆𑀯𑀸 𑀪𑀺𑀓𑁆𑀔𑀼𑀦𑀺𑀬𑁄 𑀤𑁂𑀯𑀤𑀢𑁆𑀢𑀁 𑀧𑀼𑀘𑁆𑀙𑀺𑀁𑀲𑀼, 𑀲𑁄 ‘‘𑀅𑀲𑁆𑀲𑀫𑀡𑀻’’𑀢𑀺 𑀆𑀳. 𑀤𑀲𑀩𑀮𑀁 𑀧𑀼𑀘𑁆𑀙𑀺𑀁𑀲𑀼, 𑀲𑀢𑁆𑀣𑀸 𑀉𑀧𑀸𑀮𑀺𑀢𑁆𑀣𑁂𑀭𑀁 𑀧𑀝𑀺𑀘𑁆𑀙𑀸𑀧𑁂𑀲𑀺. 𑀣𑁂𑀭𑁄 𑀲𑀸𑀯𑀢𑁆𑀣𑀺𑀦𑀕𑀭𑀯𑀸𑀲𑀻𑀦𑀺 𑀓𑀼𑀮𑀸𑀦𑀺 𑀯𑀺𑀲𑀸𑀔𑀜𑁆𑀘 𑀉𑀧𑀸𑀲𑀺𑀓𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀲𑁄𑀥𑁂𑀦𑁆𑀢𑁄, 𑁋 ‘‘𑀧𑀼𑀭𑁂 𑀮𑀤𑁆𑀥𑁄 𑀕𑀩𑁆𑀪𑁄, 𑀧𑀩𑁆𑀩𑀚𑁆𑀚𑀸 𑀅𑀭𑁄𑀕𑀸’’𑀢𑀺 𑀆𑀳. 𑀲𑀢𑁆𑀣𑀸 ‘‘𑀲𑀼𑀯𑀺𑀦𑀺𑀘𑁆𑀙𑀺𑀢𑀁 𑀅𑀥𑀺𑀓𑀭𑀡’’𑀦𑁆𑀢𑀺 𑀣𑁂𑀭𑀲𑁆𑀲 𑀲𑀸𑀥𑀼𑀓𑀸𑀭𑀁 𑀅𑀤𑀸𑀲𑀺. 𑀲𑀸 𑀪𑀺𑀓𑁆𑀔𑀼𑀦𑀻 𑀲𑀼𑀯𑀡𑁆𑀡𑀩𑀺𑀫𑁆𑀩𑀲𑀤𑀺𑀲𑀁 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺, 𑀢𑀁 𑀕𑀳𑁂𑀢𑁆𑀯𑀸 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀧𑁄𑀲𑀸𑀧𑁂𑀲𑀺. ‘‘𑀓𑀲𑁆𑀲𑀧𑁄’’𑀢𑀺 𑀘𑀲𑁆𑀲 𑀦𑀸𑀫𑀁 𑀓𑀢𑁆𑀯𑀸 𑀅𑀧𑀭𑀪𑀸𑀕𑁂 𑀅𑀮𑀗𑁆𑀓𑀭𑀺𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀦𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀲𑀺. 𑀇𑀢𑀺 𑀭𑀜𑁆𑀜𑁄 𑀧𑁄𑀲𑀸𑀯𑀦𑀺𑀓𑀧𑀼𑀢𑁆𑀢𑀢𑁆𑀢𑀸𑀧𑀺 𑀢𑀁 ‘‘𑀓𑀼𑀫𑀸𑀭𑀓𑀲𑁆𑀲𑀧𑁄’’𑀢𑀺 𑀲𑀜𑁆𑀚𑀸𑀦𑀺𑀁𑀲𑀽𑀢𑀺.

𑀅𑀦𑁆𑀥𑀯𑀦𑁂𑀢𑀺 𑀏𑀯𑀁𑀦𑀸𑀫𑀓𑁂 𑀯𑀦𑁂. 𑀢𑀁 𑀓𑀺𑀭 𑀯𑀦𑀁 𑀤𑁆𑀯𑀺𑀦𑁆𑀦𑀁 𑀩𑀼𑀤𑁆𑀥𑀸𑀦𑀁 𑀓𑀸𑀮𑁂 𑀅𑀯𑀺𑀚𑀳𑀺𑀢𑀦𑀸𑀫𑀁 𑀅𑀦𑁆𑀥𑀯𑀦𑀁𑀢𑁆𑀯𑁂𑀯 𑀧𑀜𑁆𑀜𑀸𑀬𑀢𑀺. 𑀢𑀢𑁆𑀭𑀸𑀬𑀁 𑀧𑀜𑁆𑀜𑀢𑁆𑀢𑀺𑀯𑀺𑀪𑀸𑀯𑀦𑀸 𑁋 𑀅𑀧𑁆𑀧𑀸𑀬𑀼𑀓𑀩𑀼𑀤𑁆𑀥𑀸𑀦𑀜𑁆𑀳𑀺 𑀲𑀭𑀻𑀭𑀥𑀸𑀢𑀼 𑀦 𑀏𑀓𑀕𑁆𑀖𑀦𑀸 𑀳𑁄𑀢𑀺. 𑀅𑀥𑀺𑀝𑁆𑀞𑀸𑀦𑀸𑀦𑀼𑀪𑀸𑀯𑁂𑀦 𑀯𑀺𑀧𑁆𑀧𑀓𑀺𑀭𑀺𑀬𑀢𑀺. 𑀢𑁂𑀦𑁂𑀯 𑀅𑀫𑁆𑀳𑀸𑀓𑀫𑁆𑀧𑀺 𑀪𑀕𑀯𑀸, 𑁋 ‘‘𑀅𑀳𑀁 𑀦 𑀘𑀺𑀭𑀝𑁆𑀞𑀺𑀢𑀺𑀓𑁄, 𑀅𑀧𑁆𑀧𑀓𑁂𑀳𑀺 𑀲𑀢𑁆𑀢𑁂𑀳𑀺 𑀅𑀳𑀁 𑀤𑀺𑀝𑁆𑀞𑁄, 𑀬𑁂𑀳𑀺 𑀦 𑀤𑀺𑀝𑁆𑀞𑁄, 𑀢𑁂𑀯 𑀩𑀳𑀼𑀢𑀭𑀸, 𑀢𑁂 𑀫𑁂 𑀥𑀸𑀢𑀼𑀬𑁄 𑀆𑀤𑀸𑀬 𑀢𑀢𑁆𑀣 𑀢𑀢𑁆𑀣 𑀧𑀽𑀚𑁂𑀦𑁆𑀢𑀸 𑀲𑀕𑁆𑀕𑀧𑀭𑀸𑀬𑀡𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁂, ‘‘𑀅𑀢𑁆𑀢𑀦𑁄 𑀲𑀭𑀻𑀭𑀁 𑀯𑀺𑀧𑁆𑀧𑀓𑀺𑀭𑀺𑀬𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀲𑀺. 𑀤𑀻𑀖𑀸𑀬𑀼𑀓𑀩𑀼𑀤𑁆𑀥𑀸𑀦𑀁 𑀧𑀦 𑀲𑀼𑀯𑀡𑁆𑀡𑀓𑁆𑀔𑀦𑁆𑀥𑁄 𑀯𑀺𑀬 𑀏𑀓𑀕𑁆𑀖𑀦𑀁 𑀥𑀸𑀢𑀼𑀲𑀭𑀻𑀭𑀁 𑀢𑀺𑀝𑁆𑀞𑀢𑀺.

𑀓𑀲𑁆𑀲𑀧𑀲𑁆𑀲𑀸𑀧𑀺 𑀪𑀕𑀯𑀢𑁄 𑀢𑀣𑁂𑀯 𑀅𑀝𑁆𑀞𑀸𑀲𑀺. 𑀢𑀢𑁄 𑀫𑀳𑀸𑀚𑀦𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸, ‘‘𑀥𑀸𑀢𑀼𑀬𑁄 𑀏𑀓𑀕𑁆𑀖𑀦𑀸 𑀦 𑀲𑀓𑁆𑀓𑀸 𑀯𑀺𑀬𑁄𑀚𑁂𑀢𑀼𑀁, 𑀓𑀺𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀲𑀫𑁆𑀫𑀦𑁆𑀢𑀬𑀺𑀢𑁆𑀯𑀸 𑀏𑀓𑀕𑁆𑀖𑀦𑀫𑁂𑀯 𑀘𑁂𑀢𑀺𑀬𑀁 𑀓𑀭𑀺𑀲𑁆𑀲𑀸𑀫, 𑀓𑀺𑀢𑁆𑀢𑀓𑀁 𑀧𑀦 𑀳𑁄𑀢𑀼 𑀢𑀦𑁆𑀢𑀺 𑀆𑀳𑀁𑀲𑀼. 𑀏𑀓𑁂 𑀲𑀢𑁆𑀢𑀬𑁄𑀚𑀦𑀺𑀬𑀦𑁆𑀢𑀺 𑀆𑀳𑀁𑀲𑀼. 𑀏𑀢𑀁 𑀅𑀢𑀺𑀫𑀳𑀦𑁆𑀢𑀁, 𑀅𑀦𑀸𑀕𑀢𑁂 𑀚𑀕𑁆𑀕𑀺𑀢𑀼𑀁 𑀦 𑀲𑀓𑁆𑀓𑀸, 𑀙𑀬𑁄𑀚𑀦𑀁 𑀳𑁄𑀢𑀼, 𑀧𑀜𑁆𑀘𑀬𑁄𑀚𑀦𑀁… 𑀘𑀢𑀼𑀬𑁄𑀚𑀦𑀁… 𑀢𑀺𑀬𑁄𑀚𑀦𑀁… 𑀤𑁆𑀯𑀺𑀬𑁄𑀚𑀦𑀁… 𑀏𑀓𑀬𑁄𑀚𑀦𑀁 𑀳𑁄𑀢𑀽𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀇𑀝𑁆𑀞𑀓𑀸 𑀓𑀻𑀤𑀺𑀲𑀸 𑀳𑁄𑀦𑁆𑀢𑀽𑀢𑀺 𑀩𑀸𑀳𑀺𑀭𑀦𑁆𑀢𑁂 𑀇𑀝𑁆𑀞𑀓𑀸 𑀭𑀢𑁆𑀢𑀲𑀼𑀯𑀡𑁆𑀡𑀫𑀬𑀸 𑀏𑀓𑀕𑁆𑀖𑀦𑀸 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀸 𑀳𑁄𑀦𑁆𑀢𑀼, 𑀅𑀩𑁆𑀪𑀦𑁆𑀢𑀭𑀺𑀫𑀦𑁆𑀢𑁂 𑀧𑀜𑁆𑀜𑀸𑀲𑀲𑀳𑀲𑁆𑀲𑀕𑁆𑀖𑀦𑀺𑀓𑀸. 𑀳𑀭𑀺𑀢𑀸𑀮𑀫𑀦𑁄𑀲𑀺𑀮𑀸𑀳𑀺 𑀫𑀢𑁆𑀢𑀺𑀓𑀸𑀓𑀺𑀘𑁆𑀘𑀁 𑀓𑀬𑀺𑀭𑀢𑀼, 𑀢𑁂𑀮𑁂𑀦 𑀉𑀤𑀓𑀓𑀺𑀘𑁆𑀘𑀦𑁆𑀢𑀺 𑀦𑀺𑀝𑁆𑀞𑀁 𑀕𑀦𑁆𑀢𑁆𑀯𑀸 𑀘𑀢𑁆𑀢𑀸𑀭𑀺 𑀫𑀼𑀔𑀸𑀦𑀺 𑀘𑀢𑀼𑀥𑀸 𑀯𑀺𑀪𑀚𑀺𑀁𑀲𑀼. 𑀭𑀸𑀚𑀸 𑀏𑀓𑀁 𑀫𑀼𑀔𑀁 𑀕𑀡𑁆𑀳𑀺, 𑀭𑀸𑀚𑀧𑀼𑀢𑁆𑀢𑁄 𑀧𑀣𑀯𑀺𑀦𑁆𑀤𑀭𑀓𑀼𑀫𑀸𑀭𑁄 𑀏𑀓𑀁, 𑀅𑀫𑀘𑁆𑀘𑀸𑀦𑀁 𑀚𑁂𑀝𑁆𑀞𑀓𑁄 𑀳𑀼𑀢𑁆𑀯𑀸 𑀲𑁂𑀦𑀸𑀧𑀢𑀺 𑀏𑀓𑀁, 𑀚𑀦𑀧𑀤𑀸𑀦𑀁 𑀚𑁂𑀝𑁆𑀞𑀓𑁄 𑀳𑀼𑀢𑁆𑀯𑀸 𑀲𑁂𑀝𑁆𑀞𑀺 𑀏𑀓𑀁.

𑀢𑀢𑁆𑀣 𑀥𑀦𑀲𑀫𑁆𑀧𑀦𑁆𑀦𑀢𑀸𑀬 𑀭𑀸𑀚𑀸𑀧𑀺 𑀲𑀼𑀯𑀡𑁆𑀡𑀁 𑀦𑀻𑀳𑀭𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑀸 𑀕𑀳𑀺𑀢𑀫𑀼𑀔𑁂 𑀓𑀫𑁆𑀫𑀁 𑀆𑀭𑀪𑀺, 𑀉𑀧𑀭𑀸𑀚𑀸𑀧𑀺, 𑀲𑁂𑀦𑀸𑀧𑀢𑀺𑀧𑀺. 𑀲𑁂𑀝𑁆𑀞𑀺𑀦𑀸 𑀕𑀳𑀺𑀢𑀫𑀼𑀔𑁂 𑀧𑀦 𑀓𑀫𑁆𑀫𑀁 𑀑𑀮𑀻𑀬𑀢𑀺. 𑀢𑀢𑁄 𑀬𑀲𑁄𑀭𑀢𑁄 𑀦𑀸𑀫 𑀏𑀓𑁄 𑀉𑀧𑀸𑀲𑀓𑁄 𑀢𑁂𑀧𑀺𑀝𑀓𑁄 𑀪𑀸𑀡𑀓𑁄 𑀅𑀦𑀸𑀕𑀸𑀫𑀻 𑀅𑀭𑀺𑀬𑀲𑀸𑀯𑀓𑁄, 𑀲𑁄 𑀓𑀫𑁆𑀫𑀁 𑀑𑀮𑀻𑀬𑀢𑀻𑀢𑀺 𑀜𑀢𑁆𑀯𑀸 𑀧𑀜𑁆𑀘 𑀲𑀓𑀝𑀲𑀢𑀸𑀦𑀺 𑀬𑁄𑀚𑀸𑀧𑁂𑀢𑁆𑀯𑀸 𑀚𑀦𑀧𑀤𑀁 𑀕𑀦𑁆𑀢𑁆𑀯𑀸 ‘‘𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀻𑀲𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀞𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁄. 𑀢𑀲𑁆𑀲 𑀬𑁄𑀚𑀦𑀺𑀓𑀁 𑀭𑀢𑀦𑀘𑁂𑀢𑀺𑀬𑀁 𑀓𑀬𑀺𑀭𑀢𑀺, 𑀬𑁄 𑀬𑀁 𑀤𑀸𑀢𑀼𑀁 𑀉𑀲𑁆𑀲𑀳𑀢𑀺 𑀲𑀼𑀯𑀡𑁆𑀡𑀁 𑀯𑀸 𑀳𑀺𑀭𑀜𑁆𑀜𑀁 𑀯𑀸 𑀲𑀢𑁆𑀢𑀭𑀢𑀦𑀁 𑀯𑀸 𑀳𑀭𑀺𑀢𑀸𑀮𑀁 𑀯𑀸 𑀫𑀦𑁄𑀲𑀺𑀮𑀁 𑀯𑀸, 𑀲𑁄 𑀢𑀁 𑀤𑁂𑀢𑀽’’𑀢𑀺 𑀲𑀫𑀸𑀤𑀧𑁂𑀲𑀺. 𑀫𑀦𑀼𑀲𑁆𑀲𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀣𑀸𑀫𑁂𑀦 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀻𑀦𑀺 𑀅𑀤𑀁𑀲𑀼. 𑀅𑀲𑀓𑁆𑀓𑁄𑀦𑁆𑀢𑀸 𑀢𑁂𑀮𑀢𑀡𑁆𑀟𑀼𑀮𑀸𑀤𑀻𑀦𑀺 𑀤𑁂𑀦𑁆𑀢𑀺𑀬𑁂𑀯. 𑀉𑀧𑀸𑀲𑀓𑁄 𑀢𑁂𑀮𑀢𑀡𑁆𑀟𑀼𑀮𑀸𑀤𑀻𑀦𑀺 𑀓𑀫𑁆𑀫𑀓𑀸𑀭𑀸𑀦𑀁 𑀪𑀢𑁆𑀢𑀯𑁂𑀢𑀦𑀢𑁆𑀣𑀁 𑀧𑀳𑀺𑀡𑀸𑀢𑀺, 𑀅𑀯𑀲𑁂𑀲𑁂𑀳𑀺 𑀲𑀼𑀯𑀡𑁆𑀡𑀁 𑀘𑁂𑀢𑀸𑀧𑁂𑀢𑁆𑀯𑀸 𑀧𑀳𑀺𑀡𑀸𑀢𑀺, 𑀏𑀯𑀁 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀅𑀘𑀭𑀺.

𑀘𑁂𑀢𑀺𑀬𑁂 𑀓𑀫𑁆𑀫𑀁 𑀦𑀺𑀝𑁆𑀞𑀺𑀢𑀦𑁆𑀢𑀺 𑀘𑁂𑀢𑀺𑀬𑀝𑁆𑀞𑀸𑀦𑀢𑁄 𑀧𑀡𑁆𑀡𑀁 𑀧𑀳𑀺𑀡𑀺𑀁𑀲𑀼 𑁋 ‘‘𑀦𑀺𑀝𑁆𑀞𑀺𑀢𑀁 𑀓𑀫𑁆𑀫𑀁 𑀆𑀘𑀭𑀺𑀬𑁄 𑀆𑀕𑀦𑁆𑀢𑁆𑀯𑀸 𑀘𑁂𑀢𑀺𑀬𑀁 𑀯𑀦𑁆𑀤𑀢𑀽’’𑀢𑀺. 𑀲𑁄𑀧𑀺 𑀧𑀡𑁆𑀡𑀁 𑀧𑀳𑀺𑀡𑀺 𑁋 ‘‘𑀫𑀬𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑁄 𑀲𑀫𑀸𑀤𑀧𑀺𑀢𑁄, 𑀬𑀁 𑀅𑀢𑁆𑀣𑀺, 𑀢𑀁 𑀕𑀳𑁂𑀢𑁆𑀯𑀸 𑀓𑀫𑁆𑀫𑀁 𑀦𑀺𑀝𑁆𑀞𑀸𑀧𑁂𑀦𑁆𑀢𑀽’’𑀢𑀺. 𑀤𑁆𑀯𑁂𑀧𑀺 𑀧𑀡𑁆𑀡𑀸𑀦𑀺 𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑀫𑀸𑀕𑀫𑀺𑀁𑀲𑀼. 𑀆𑀘𑀭𑀺𑀬𑀲𑁆𑀲 𑀧𑀡𑁆𑀡𑀢𑁄 𑀧𑀦 𑀘𑁂𑀢𑀺𑀬𑀝𑁆𑀞𑀸𑀦𑀢𑁄 𑀧𑀡𑁆𑀡𑀁 𑀧𑀞𑀫𑀢𑀭𑀁 𑀆𑀘𑀭𑀺𑀬𑀲𑁆𑀲 𑀳𑀢𑁆𑀣𑀁 𑀅𑀕𑀫𑀸𑀲𑀺. 𑀲𑁄 𑀧𑀡𑁆𑀡𑀁 𑀯𑀸𑀘𑁂𑀢𑁆𑀯𑀸 𑀘𑁂𑀢𑀺𑀬𑀁 𑀯𑀦𑁆𑀤𑀺𑀲𑁆𑀲𑀸𑀫𑀻𑀢𑀺 𑀏𑀓𑀓𑁄𑀯 𑀦𑀺𑀓𑁆𑀔𑀫𑀺. 𑀅𑀦𑁆𑀢𑀭𑀸𑀫𑀕𑁆𑀕𑁂 𑀅𑀝𑀯𑀺𑀬𑀁 𑀧𑀜𑁆𑀘 𑀘𑁄𑀭𑀲𑀢𑀸𑀦𑀺 𑀉𑀝𑁆𑀞𑀳𑀺𑀁𑀲𑀼. 𑀢𑀢𑁆𑀭𑁂𑀓𑀘𑁆𑀘𑁂 𑀢𑀁 𑀤𑀺𑀲𑁆𑀯𑀸 𑀇𑀫𑀺𑀦𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑀢𑁄 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁 𑀲𑀫𑁆𑀧𑀺𑀡𑁆𑀟𑀺𑀢𑀁, 𑀦𑀺𑀥𑀺𑀓𑀼𑀫𑁆𑀪𑀻 𑀦𑁄 𑀧𑀯𑀝𑁆𑀝𑀫𑀸𑀦𑀸 𑀆𑀕𑀢𑀸𑀢𑀺 𑀅𑀯𑀲𑁂𑀲𑀸𑀦𑀁 𑀆𑀭𑁄𑀘𑁂𑀢𑁆𑀯𑀸 𑀢𑀁 𑀅𑀕𑁆𑀕𑀳𑁂𑀲𑀼𑀁. 𑀓𑀲𑁆𑀫𑀸 𑀢𑀸𑀢𑀸, 𑀫𑀁 𑀕𑀡𑁆𑀳𑀣𑀸𑀢𑀺? 𑀢𑀬𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑀢𑁄 𑀲𑀩𑁆𑀩𑀁 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁 𑀲𑀫𑁆𑀧𑀺𑀡𑁆𑀟𑀺𑀢𑀁, 𑀅𑀫𑁆𑀳𑀸𑀓𑀫𑁆𑀧𑀺 𑀣𑁄𑀓𑀁 𑀣𑁄𑀓𑀁 𑀤𑁂𑀳𑀻𑀢𑀺. 𑀓𑀺𑀁 𑀢𑀼𑀫𑁆𑀳𑁂 𑀦 𑀚𑀸𑀦𑀸𑀣, 𑀓𑀲𑁆𑀲𑀧𑁄 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀢𑀲𑁆𑀲 𑀬𑁄𑀚𑀦𑀺𑀓𑀁 𑀭𑀢𑀦𑀘𑁂𑀢𑀺𑀬𑀁 𑀓𑀬𑀺𑀭𑀢𑀺, 𑀢𑀤𑀢𑁆𑀣𑀸𑀬 𑀫𑀬𑀸 𑀲𑀫𑀸𑀤𑀧𑀺𑀢𑀁, 𑀦𑁄 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬. 𑀢𑀁 𑀢𑀁 𑀮𑀤𑁆𑀥𑀮𑀤𑁆𑀥𑀝𑁆𑀞𑀸𑀦𑀢𑁄 𑀢𑀢𑁆𑀣𑁂𑀯 𑀧𑁂𑀲𑀺𑀢𑀁, 𑀫𑀬𑁆𑀳𑀁 𑀧𑀦 𑀦𑀺𑀯𑀢𑁆𑀣𑀲𑀸𑀝𑀓𑀫𑀢𑁆𑀢𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀯𑀺𑀢𑁆𑀢𑀁 𑀓𑀸𑀓𑀡𑀺𑀓𑀫𑁆𑀧𑀺 𑀦𑀢𑁆𑀣𑀻𑀢𑀺.

𑀏𑀓𑁂, ‘‘𑀏𑀯𑀫𑁂𑀢𑀁 𑀯𑀺𑀲𑁆𑀲𑀚𑁂𑀣 𑀆𑀘𑀭𑀺𑀬’’𑀦𑁆𑀢𑀺 𑀆𑀳𑀁𑀲𑀼. 𑀏𑀓𑁂, ‘‘𑀅𑀬𑀁 𑀭𑀸𑀚𑀧𑀽𑀚𑀺𑀢𑁄 𑀅𑀫𑀘𑁆𑀘𑀧𑀽𑀚𑀺𑀢𑁄, 𑀅𑀫𑁆𑀳𑁂𑀲𑀼 𑀓𑀜𑁆𑀘𑀺𑀤𑁂𑀯 𑀦𑀕𑀭𑀯𑀻𑀣𑀺𑀬𑀁 𑀤𑀺𑀲𑁆𑀯𑀸 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀻𑀦𑀁 𑀆𑀭𑁄𑀘𑁂𑀢𑁆𑀯𑀸 𑀅𑀦𑀬𑀯𑁆𑀬𑀲𑀦𑀁 𑀧𑀸𑀧𑀼𑀡𑀸𑀧𑁂𑀬𑁆𑀬𑀸’’𑀢𑀺 𑀆𑀳𑀁𑀲𑀼. 𑀉𑀧𑀸𑀲𑀓𑁄, ‘‘𑀢𑀸𑀢𑀸, 𑀦𑀸𑀳𑀁 𑀏𑀯𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀢𑀜𑁆𑀘 𑀔𑁄 𑀢𑁂𑀲𑀼 𑀓𑀸𑀭𑀼𑀜𑁆𑀜𑁂𑀦, 𑀦 𑀅𑀢𑁆𑀢𑀦𑁄 𑀚𑀻𑀯𑀺𑀢𑀦𑀺𑀓𑀦𑁆𑀢𑀺𑀬𑀸. 𑀅𑀣 𑀢𑁂𑀲𑀼 𑀕𑀳𑁂𑀢𑀩𑁆𑀩𑁄 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑁄𑀢𑀺 𑀯𑀺𑀯𑀤𑀦𑁆𑀢𑁂𑀲𑀼 𑀕𑀳𑁂𑀢𑀩𑁆𑀩𑁄𑀢𑀺 𑀮𑀤𑁆𑀥𑀺𑀓𑀸 𑀏𑀯 𑀩𑀳𑀼𑀢𑀭𑀸 𑀳𑀼𑀢𑁆𑀯𑀸 𑀚𑀻𑀯𑀺𑀢𑀸 𑀯𑁄𑀭𑁄𑀧𑀬𑀺𑀁𑀲𑀼.

𑀢𑁂𑀲𑀁 𑀩𑀮𑀯𑀕𑀼𑀡𑁂 𑀅𑀭𑀺𑀬𑀲𑀸𑀯𑀓𑁂 𑀅𑀧𑀭𑀸𑀥𑁂𑀦 𑀦𑀺𑀩𑁆𑀩𑀼𑀢𑀤𑀻𑀧𑀲𑀺𑀔𑀸 𑀯𑀺𑀬 𑀅𑀓𑁆𑀔𑀻𑀦𑀺 𑀅𑀦𑁆𑀢𑀭𑀥𑀸𑀬𑀺𑀁𑀲𑀼. 𑀢𑁂, ‘‘𑀓𑀳𑀁 𑀪𑁄 𑀘𑀓𑁆𑀔𑀼, 𑀓𑀳𑀁 𑀪𑁄 𑀘𑀓𑁆𑀔𑀽’’𑀢𑀺 𑀯𑀺𑀧𑁆𑀧𑀮𑀧𑀦𑁆𑀢𑀸 𑀏𑀓𑀘𑁆𑀘𑁂 𑀜𑀸𑀢𑀓𑁂𑀳𑀺 𑀕𑁂𑀳𑀁 𑀦𑀻𑀢𑀸. 𑀏𑀓𑀘𑁆𑀘𑁂 𑀦𑁄𑀜𑀸𑀢𑀓𑀸 𑀅𑀦𑀸𑀣𑀸𑀢𑀺 𑀢𑀢𑁆𑀣𑁂𑀯 𑀅𑀝𑀯𑀺𑀬𑀁 𑀭𑀼𑀓𑁆𑀔𑀫𑀽𑀮𑁂 𑀧𑀡𑁆𑀡𑀲𑀸𑀮𑀸𑀬𑀁 𑀯𑀲𑀺𑀁𑀲𑀼. 𑀅𑀝𑀯𑀺𑀁 𑀆𑀕𑀢𑀫𑀦𑀼𑀲𑁆𑀲𑀸 𑀓𑀸𑀭𑀼𑀜𑁆𑀜𑁂𑀦 𑀢𑁂𑀲𑀁 𑀢𑀡𑁆𑀟𑀼𑀮𑀁 𑀯𑀸 𑀧𑀼𑀝𑀪𑀢𑁆𑀢𑀁 𑀯𑀸 𑀧𑀭𑀺𑀩𑁆𑀩𑀬𑀁 𑀯𑀸 𑀤𑁂𑀦𑁆𑀢𑀺. 𑀤𑀸𑀭𑀼𑀧𑀡𑁆𑀡𑀸𑀤𑀻𑀦𑀁 𑀅𑀢𑁆𑀣𑀸𑀬 𑀕𑀦𑁆𑀢𑁆𑀯𑀸 𑀆𑀕𑀢𑀸 𑀫𑀦𑀼𑀲𑁆𑀲𑀸 𑀓𑀼𑀳𑀺𑀁 𑀕𑀢𑀢𑁆𑀣𑀸𑀢𑀺 𑀯𑀼𑀢𑁆𑀢𑁂 𑀅𑀦𑁆𑀥𑀯𑀦𑀁 𑀕𑀢𑀫𑁆𑀳𑀸𑀢𑀺 𑀯𑀤𑀦𑁆𑀢𑀺. 𑀏𑀯𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀩𑀼𑀤𑁆𑀥𑀸𑀦𑀁 𑀓𑀸𑀮𑁂 𑀢𑀁 𑀯𑀦𑀁 𑀅𑀦𑁆𑀥𑀯𑀦𑀁𑀢𑁆𑀯𑁂𑀯 𑀧𑀜𑁆𑀜𑀸𑀬𑀢𑀺. 𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑁂 𑀧𑀦𑁂𑀢𑀁 𑀙𑀟𑁆𑀟𑀺𑀢𑀚𑀦𑀧𑀤𑁂 𑀅𑀝𑀯𑀺 𑀅𑀳𑁄𑀲𑀺. 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀓𑀸𑀮𑁂 𑀲𑀸𑀯𑀢𑁆𑀣𑀺𑀬𑀸 𑀅𑀯𑀺𑀤𑀽𑀭𑁂 𑀚𑁂𑀢𑀯𑀦𑀲𑁆𑀲 𑀧𑀺𑀝𑁆𑀞𑀺𑀪𑀸𑀕𑁂 𑀧𑀯𑀺𑀯𑁂𑀓𑀓𑀸𑀫𑀸𑀦𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀯𑀲𑀦𑀝𑁆𑀞𑀸𑀦𑀁 𑀧𑀥𑀸𑀦𑀖𑀭𑀁 𑀅𑀳𑁄𑀲𑀺, 𑀢𑀢𑁆𑀣 𑀆𑀬𑀲𑁆𑀫𑀸 𑀓𑀼𑀫𑀸𑀭𑀓𑀲𑁆𑀲𑀧𑁄 𑀢𑁂𑀦 𑀲𑀫𑀬𑁂𑀦 𑀲𑁂𑀔𑀧𑀝𑀺𑀧𑀤𑀁 𑀧𑀽𑀭𑀬𑀫𑀸𑀦𑁄 𑀯𑀺𑀳𑀭𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀦𑁆𑀥𑀯𑀦𑁂 𑀯𑀺𑀳𑀭𑀢𑀻’’𑀢𑀺.

𑀅𑀜𑁆𑀜𑀢𑀭𑀸 𑀤𑁂𑀯𑀢𑀸𑀢𑀺 𑀦𑀸𑀫𑀕𑁄𑀢𑁆𑀢𑀯𑀲𑁂𑀦 𑀅𑀧𑀸𑀓𑀝𑀸 𑀏𑀓𑀸 𑀤𑁂𑀯𑀢𑀸𑀢𑀺 𑀅𑀢𑁆𑀣𑁄. ‘‘𑀅𑀪𑀺𑀚𑀸𑀦𑀸𑀢𑀺 𑀦𑁄, 𑀪𑀦𑁆𑀢𑁂, 𑀪𑀕𑀯𑀸 𑀅𑀳𑀼𑀜𑀸𑀢𑀜𑁆𑀜𑀢𑀭𑀲𑁆𑀲 𑀫𑀳𑁂𑀲𑀓𑁆𑀔𑀲𑁆𑀲 𑀲𑀁𑀔𑀺𑀢𑁆𑀢𑁂𑀦 𑀢𑀡𑁆𑀳𑀸𑀲𑀗𑁆𑀔𑀬𑀯𑀺𑀫𑀼𑀢𑁆𑀢𑀺𑀁 𑀪𑀸𑀲𑀺𑀢𑀸’’𑀢𑀺 (𑀫. 𑀦𑀺. 𑁧.𑁩𑁬𑁫) 𑀏𑀢𑁆𑀣 𑀧𑀦 𑀅𑀪𑀺𑀜𑁆𑀜𑀸𑀢𑁄 𑀲𑀓𑁆𑀓𑁄𑀧𑀺 𑀤𑁂𑀯𑀭𑀸𑀚𑀸 𑀅𑀜𑁆𑀜𑀢𑀭𑁄𑀢𑀺 𑀯𑀼𑀢𑁆𑀢𑁄. 𑀤𑁂𑀯𑀢𑀸𑀢𑀺 𑀘 𑀇𑀤𑀁 𑀤𑁂𑀯𑀸𑀦𑀫𑁆𑀧𑀺 𑀤𑁂𑀯𑀥𑀻𑀢𑀸𑀦𑀫𑁆𑀧𑀺 𑀲𑀸𑀥𑀸𑀭𑀡𑀯𑀘𑀦𑀁. 𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂 𑀤𑁂𑀯𑁄 𑀅𑀥𑀺𑀧𑁆𑀧𑁂𑀢𑁄. 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸𑀢𑀺 𑀏𑀢𑁆𑀣 𑀅𑀪𑀺𑀓𑁆𑀓𑀦𑁆𑀢𑀲𑀤𑁆𑀤𑁄 𑀔𑀬𑀲𑀼𑀦𑁆𑀤𑀭𑀸𑀪𑀺𑀭𑀽𑀧𑀅𑀩𑁆𑀪𑀦𑀼𑀫𑁄𑀤𑀦𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀢𑀢𑁆𑀣 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀸, 𑀪𑀦𑁆𑀢𑁂, 𑀭𑀢𑁆𑀢𑀺, 𑀦𑀺𑀓𑁆𑀔𑀦𑁆𑀢𑁄 𑀧𑀞𑀫𑁄 𑀬𑀸𑀫𑁄, 𑀘𑀺𑀭𑀦𑀺𑀲𑀺𑀦𑁆𑀦𑁄 𑀪𑀺𑀓𑁆𑀔𑀼𑀲𑀗𑁆𑀖𑁄, 𑀉𑀤𑁆𑀤𑀺𑀲𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀪𑀺𑀓𑁆𑀔𑀽𑀦𑀁 𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 (𑀅. 𑀦𑀺. 𑁮.𑁨𑁦) 𑀔𑀬𑁂 𑀤𑀺𑀲𑁆𑀲𑀢𑀺. ‘‘𑀅𑀬𑀁 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀅𑀪𑀺𑀓𑁆𑀓𑀦𑁆𑀢𑀢𑀭𑁄 𑀘 𑀧𑀡𑀻𑀢𑀢𑀭𑁄 𑀘𑀸’’𑀢𑀺 (𑀅. 𑀦𑀺. 𑁪.𑁧𑁦𑁦) 𑀏𑀯𑀫𑀸𑀤𑀻𑀲𑀼 𑀲𑀼𑀦𑁆𑀤𑀭𑁂.

‘‘𑀓𑁄 𑀫𑁂 𑀯𑀦𑁆𑀤𑀢𑀺 𑀧𑀸𑀤𑀸𑀦𑀺, 𑀇𑀤𑁆𑀥𑀺𑀬𑀸 𑀬𑀲𑀲𑀸 𑀚𑀮𑀁;

𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦, 𑀲𑀩𑁆𑀩𑀸 𑀑𑀪𑀸𑀲𑀬𑀁 𑀤𑀺𑀲𑀸’’𑀢𑀺. (𑀯𑀺. 𑀯. 𑁮𑁫𑁭) 𑁋

𑀏𑀯𑀫𑀸𑀤𑀻𑀲𑀼 𑀅𑀪𑀺𑀭𑀽𑀧𑁂. ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀧𑀸𑀭𑀸. 𑁧𑁫) 𑀅𑀩𑁆𑀪𑀦𑀼𑀫𑁄𑀤𑀦𑁂. 𑀇𑀥 𑀧𑀦 𑀔𑀬𑁂. 𑀢𑁂𑀦 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸𑀢𑀺 𑀧𑀭𑀺𑀓𑁆𑀔𑀻𑀡𑀸𑀬 𑀭𑀢𑁆𑀢𑀺𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣𑀸𑀬𑀁 𑀤𑁂𑀯𑀧𑀼𑀢𑁆𑀢𑁄 𑀫𑀚𑁆𑀛𑀺𑀫𑀬𑀸𑀫𑀲𑀫𑀦𑀦𑁆𑀢𑀭𑁂 𑀆𑀕𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸𑀢𑀺 𑀇𑀥 𑀅𑀪𑀺𑀓𑁆𑀓𑀦𑁆𑀢𑀲𑀤𑁆𑀤𑁄 𑀅𑀪𑀺𑀭𑀽𑀧𑁂. 𑀯𑀡𑁆𑀡𑀲𑀤𑁆𑀤𑁄 𑀧𑀦 𑀙𑀯𑀺-𑀣𑀼𑀢𑀺-𑀓𑀼𑀮𑀯𑀕𑁆𑀕𑀓𑀸𑀭𑀡-𑀲𑀡𑁆𑀞𑀸𑀦𑀧𑀫𑀸𑀡𑀭𑀽𑀧𑀸𑀬𑀢𑀦𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀢𑀢𑁆𑀣, ‘‘𑀲𑀼𑀯𑀡𑁆𑀡𑀯𑀡𑁆𑀡𑁄𑀲𑀺 𑀪𑀕𑀯𑀸’’𑀢𑀺 𑀏𑀯𑀫𑀸𑀤𑀻𑀲𑀼 𑀙𑀯𑀺𑀬𑀸. ‘‘𑀓𑀤𑀸 𑀲𑀜𑁆𑀜𑀽𑀴𑁆𑀳𑀸 𑀧𑀦 𑀢𑁂 𑀕𑀳𑀧𑀢𑀺 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀯𑀡𑁆𑀡𑀸’’𑀢𑀺 (𑀫. 𑀦𑀺. 𑁨.𑁭𑁭) 𑀏𑀯𑀫𑀸𑀤𑀻𑀲𑀼 𑀣𑀼𑀢𑀺𑀬𑀁. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑁄 𑀕𑁄𑀢𑀫, 𑀯𑀡𑁆𑀡𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀤𑀻. 𑀦𑀺. 𑁩.𑁧𑁧𑁫) 𑀓𑀼𑀮𑀯𑀕𑁆𑀕𑁂. ‘‘𑀅𑀣 𑀓𑁂𑀦 𑀦𑀼 𑀯𑀡𑁆𑀡𑁂𑀦, 𑀕𑀦𑁆𑀥𑀣𑁂𑀦𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑀏𑀯𑀫𑀸𑀤𑀻𑀲𑀼 (𑀲𑀁. 𑀦𑀺. 𑁧.𑁨𑁩𑁪) 𑀓𑀸𑀭𑀡𑁂. ‘‘𑀫𑀳𑀦𑁆𑀢𑀁 𑀳𑀢𑁆𑀣𑀺𑀭𑀸𑀚𑀯𑀡𑁆𑀡𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀲𑀁. 𑀦𑀺. 𑁧.𑁧𑁩𑁮) 𑀲𑀡𑁆𑀞𑀸𑀦𑁂. ‘‘𑀢𑀬𑁄 𑀧𑀢𑁆𑀢𑀲𑁆𑀲 𑀯𑀡𑁆𑀡𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀧𑀸𑀭𑀸. 𑁬𑁦𑁨) 𑀧𑀫𑀸𑀡𑁂. ‘‘𑀯𑀡𑁆𑀡𑁄 𑀕𑀦𑁆𑀥𑁄 𑀭𑀲𑁄 𑀑𑀚𑀸’’𑀢𑀺 𑀏𑀯𑀫𑀸𑀤𑀻𑀲𑀼 𑀭𑀽𑀧𑀸𑀬𑀢𑀦𑁂. 𑀲𑁄 𑀇𑀥 𑀙𑀯𑀺𑀬𑀁 𑀤𑀝𑁆𑀞𑀩𑁆𑀩𑁄. 𑀢𑁂𑀦 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸𑀢𑀺 𑀅𑀪𑀺𑀭𑀽𑀧𑀙𑀯𑀺𑀇𑀝𑁆𑀞𑀯𑀡𑁆𑀡𑀸, 𑀫𑀦𑀸𑀧𑀯𑀡𑁆𑀡𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑁂𑀯𑀢𑀸 𑀳𑀺 𑀫𑀦𑀼𑀲𑁆𑀲𑀮𑁄𑀓𑀁 𑀆𑀕𑀘𑁆𑀙𑀫𑀸𑀦𑀸 𑀧𑀓𑀢𑀺𑀯𑀡𑁆𑀡𑀁 𑀧𑀓𑀢𑀺𑀇𑀤𑁆𑀥𑀺𑀁 𑀧𑀚𑀳𑀺𑀢𑁆𑀯𑀸 𑀑𑀴𑀸𑀭𑀺𑀓𑀁 𑀅𑀢𑁆𑀢𑀪𑀸𑀯𑀁 𑀓𑀢𑁆𑀯𑀸 𑀅𑀢𑀺𑀭𑁂𑀓𑀯𑀡𑁆𑀡𑀁 𑀅𑀢𑀺𑀭𑁂𑀓𑀇𑀤𑁆𑀥𑀺𑀁 𑀫𑀸𑀧𑁂𑀢𑁆𑀯𑀸 𑀦𑀝𑀲𑀫𑀚𑁆𑀚𑀸𑀤𑀻𑀦𑀺 𑀕𑀘𑁆𑀙𑀦𑁆𑀢𑀸 𑀫𑀦𑀼𑀲𑁆𑀲𑀸 𑀯𑀺𑀬 𑀅𑀪𑀺𑀲𑀗𑁆𑀔𑀢𑁂𑀦 𑀓𑀸𑀬𑁂𑀦 𑀆𑀕𑀘𑁆𑀙𑀦𑁆𑀢𑀺. 𑀅𑀬𑀫𑁆𑀧𑀺 𑀤𑁂𑀯𑀧𑀼𑀢𑁆𑀢𑁄 𑀢𑀣𑁂𑀯 𑀆𑀕𑀢𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸’’𑀢𑀺.

𑀓𑁂𑀯𑀮𑀓𑀧𑁆𑀧𑀦𑁆𑀢𑀺 𑀏𑀢𑁆𑀣 𑀓𑁂𑀯𑀮𑀲𑀤𑁆𑀤𑁄 𑀅𑀦𑀯𑀲𑁂𑀲-𑀬𑁂𑀪𑀽𑀬𑁆𑀬-𑀅𑀩𑁆𑀬𑀸𑀫𑀺𑀲𑁆𑀲𑀸𑀦𑀢𑀺𑀭𑁂𑀓𑀤𑀴𑁆𑀳𑀢𑁆𑀣-𑀯𑀺𑀲𑀁𑀬𑁄𑀕𑀸𑀤𑀺𑀅𑀦𑁂𑀓𑀢𑁆𑀣𑁄. 𑀢𑀣𑀸 𑀳𑀺𑀲𑁆𑀲, ‘‘𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 (𑀧𑀸𑀭𑀸. 𑁧) 𑀏𑀯𑀫𑀸𑀤𑀻𑀲𑀼 𑀅𑀦𑀯𑀲𑁂𑀲𑀢𑁆𑀢𑀫𑀢𑁆𑀣𑁄. ‘‘𑀓𑁂𑀯𑀮𑀓𑀧𑁆𑀧𑀸 𑀘 𑀅𑀗𑁆𑀕𑀫𑀕𑀥𑀸 𑀧𑀳𑀽𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀆𑀤𑀸𑀬 𑀉𑀧𑀲𑀗𑁆𑀓𑀫𑀺𑀲𑁆𑀲𑀦𑁆𑀢𑀻’’𑀢𑀺 𑀏𑀯𑀫𑀸𑀤𑀻𑀲𑀼 𑀬𑁂𑀪𑀼𑀬𑁆𑀬𑀢𑀸. ‘‘𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀻’’𑀢𑀺 (𑀯𑀺𑀪. 𑁨𑁨𑁫) 𑀏𑀯𑀫𑀸𑀤𑀻𑀲𑀼 𑀅𑀩𑁆𑀬𑀸𑀫𑀺𑀲𑁆𑀲𑀢𑀸. ‘‘𑀓𑁂𑀯𑀮𑀁 𑀲𑀤𑁆𑀥𑀸𑀫𑀢𑁆𑀢𑀓𑀁 𑀦𑀽𑀦 𑀅𑀬𑀫𑀸𑀬𑀲𑁆𑀫𑀸’’𑀢𑀺 (𑀫𑀳𑀸𑀯. 𑁨𑁪𑁪) 𑀏𑀯𑀫𑀸𑀤𑀻𑀲𑀼 𑀅𑀦𑀢𑀺𑀭𑁂𑀓𑀢𑀸. ‘‘𑀆𑀬𑀲𑁆𑀫𑀢𑁄 𑀅𑀦𑀼𑀭𑀼𑀤𑁆𑀥𑀲𑁆𑀲 𑀩𑀸𑀳𑀺𑀬𑁄 𑀦𑀸𑀫 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀓𑁂𑀯𑀮𑀓𑀧𑁆𑀧𑀁 𑀲𑀗𑁆𑀖𑀪𑁂𑀤𑀸𑀬 𑀞𑀺𑀢𑁄’’𑀢𑀺 (𑀅. 𑀦𑀺. 𑁪.𑁨𑁪𑁩) 𑀏𑀯𑀫𑀸𑀤𑀻𑀲𑀼 𑀤𑀴𑁆𑀳𑀢𑁆𑀣𑀢𑀸. ‘‘𑀓𑁂𑀯𑀮𑀻 𑀯𑀼𑀲𑀺𑀢𑀯𑀸 𑀉𑀢𑁆𑀢𑀫𑀧𑀼𑀭𑀺𑀲𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺 (𑀲𑀁. 𑀦𑀺. 𑁩.𑁫𑁭) 𑀏𑀯𑀫𑀸𑀤𑀻𑀲𑀼 𑀯𑀺𑀲𑀁𑀬𑁄𑀕𑁄. 𑀇𑀥 𑀧𑀦𑀲𑁆𑀲 𑀅𑀦𑀯𑀲𑁂𑀲𑀢𑁆𑀢𑀫𑀢𑁆𑀣𑁄𑀢𑀺 𑀅𑀥𑀺𑀧𑁆𑀧𑁂𑀢𑁄.

𑀓𑀧𑁆𑀧𑀲𑀤𑁆𑀤𑁄 𑀧𑀦𑀸𑀬𑀁 𑀅𑀪𑀺𑀲𑀤𑁆𑀤𑀳𑀦-𑀯𑁄𑀳𑀸𑀭-𑀓𑀸𑀮-𑀧𑀜𑁆𑀜𑀢𑁆𑀢𑀺- 𑀙𑁂𑀤𑀦-𑀯𑀺𑀓𑀧𑁆𑀧-𑀮𑁂𑀲-𑀲𑀫𑀦𑁆𑀢𑀪𑀸𑀯𑀸𑀤𑀺-𑀅𑀦𑁂𑀓𑀢𑁆𑀣𑁄. 𑀢𑀣𑀸 𑀳𑀺𑀲𑁆𑀲, ‘‘𑀑𑀓𑀧𑁆𑀧𑀦𑀺𑀬𑀫𑁂𑀢𑀁 𑀪𑁄𑀢𑁄 𑀕𑁄𑀢𑀫𑀲𑁆𑀲, 𑀬𑀣𑀸 𑀢𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲𑀸’’𑀢𑀺 (𑀫. 𑀦𑀺. 𑁧.𑁩𑁮𑁭) 𑀏𑀯𑀫𑀸𑀤𑀻𑀲𑀼 𑀅𑀪𑀺𑀲𑀤𑁆𑀤𑀳𑀦𑀫𑀢𑁆𑀣𑁄. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀲𑀫𑀡𑀓𑀧𑁆𑀧𑁂𑀳𑀺 𑀨𑀮𑀁 𑀧𑀭𑀺𑀪𑀼𑀜𑁆𑀚𑀺𑀢𑀼’’𑀦𑁆𑀢𑀺 (𑀘𑀽𑀴𑀯. 𑁨𑁫𑁦) 𑀏𑀯𑀫𑀸𑀤𑀻𑀲𑀼 𑀯𑁄𑀳𑀸𑀭𑁄. ‘‘𑀬𑁂𑀦 𑀲𑀼𑀤𑀁 𑀦𑀺𑀘𑁆𑀘𑀓𑀧𑁆𑀧𑀁 𑀯𑀺𑀳𑀭𑀸𑀫𑀻’’𑀢𑀺 𑀏𑀯𑀫𑀸𑀤𑀻𑀲𑀼 (𑀫. 𑀦𑀺. 𑁧.𑁩𑁮𑁭) 𑀓𑀸𑀮𑁄. ‘‘𑀇𑀘𑁆𑀘𑀸𑀬𑀲𑁆𑀫𑀸 𑀓𑀧𑁆𑀧𑁄’’𑀢𑀺 (𑀲𑀁. 𑀦𑀺. 𑁩.𑁧𑁨𑁪) 𑀏𑀯𑀫𑀸𑀤𑀻𑀲𑀼 𑀧𑀜𑁆𑀜𑀢𑁆𑀢𑀺. ‘‘𑀅𑀮𑀗𑁆𑀓𑀢𑀸 𑀓𑀧𑁆𑀧𑀺𑀢𑀓𑁂𑀲𑀫𑀲𑁆𑀲𑀽’’𑀢𑀺 (𑀲𑀁. 𑀦𑀺. 𑁪.𑁩𑁬𑁫) 𑀏𑀯𑀫𑀸𑀤𑀻𑀲𑀼 𑀙𑁂𑀤𑀦𑀁. ‘‘𑀓𑀧𑁆𑀧𑀢𑀺 𑀤𑁆𑀯𑀗𑁆𑀕𑀼𑀮𑀓𑀧𑁆𑀧𑁄’’𑀢𑀺 (𑀘𑀽𑀴𑀯. 𑁪𑁪𑁬) 𑀏𑀯𑀫𑀸𑀤𑀻𑀲𑀼 𑀯𑀺𑀓𑀧𑁆𑀧𑁄. ‘‘𑀅𑀢𑁆𑀣𑀺 𑀓𑀧𑁆𑀧𑁄 𑀦𑀺𑀧𑀚𑁆𑀚𑀺𑀢𑀼’’𑀦𑁆𑀢𑀺 (𑀅. 𑀦𑀺. 𑁮.𑁮𑁦) 𑀏𑀯𑀫𑀸𑀤𑀻𑀲𑀼 𑀮𑁂𑀲𑁄. ‘‘𑀓𑁂𑀯𑀮𑀓𑀧𑁆𑀧𑀁 𑀯𑁂𑀴𑀼𑀯𑀦𑀁 𑀑𑀪𑀸𑀲𑁂𑀢𑁆𑀯𑀸’’𑀢𑀺 (𑀲𑀁. 𑀦𑀺. 𑁧.𑁯𑁪) 𑀏𑀯𑀫𑀸𑀤𑀻𑀲𑀼 𑀲𑀫𑀦𑁆𑀢𑀪𑀸𑀯𑁄. 𑀇𑀥 𑀧𑀦𑀲𑁆𑀲 𑀲𑀫𑀦𑁆𑀢𑀪𑀸𑀯𑁄 𑀅𑀢𑁆𑀣𑁄 𑀅𑀥𑀺𑀧𑁆𑀧𑁂𑀢𑁄. 𑀢𑀲𑁆𑀫𑀸 𑀓𑁂𑀯𑀮𑀓𑀧𑁆𑀧𑀁 𑀅𑀦𑁆𑀥𑀯𑀦𑀦𑁆𑀢𑀺 𑀏𑀢𑁆𑀣 𑀅𑀦𑀯𑀲𑁂𑀲𑀁 𑀲𑀫𑀦𑁆𑀢𑀢𑁄 𑀅𑀦𑁆𑀥𑀯𑀦𑀦𑁆𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀑𑀪𑀸𑀲𑁂𑀢𑁆𑀯𑀸𑀢𑀺 𑀯𑀢𑁆𑀣𑀸𑀮𑀗𑁆𑀓𑀸𑀭𑀲𑀭𑀻𑀭𑀲𑀫𑀼𑀝𑁆𑀞𑀺𑀢𑀸𑀬 𑀆𑀪𑀸𑀬 𑀨𑀭𑀺𑀢𑁆𑀯𑀸, 𑀘𑀦𑁆𑀤𑀺𑀫𑀸 𑀯𑀺𑀬 𑀘 𑀲𑀽𑀭𑀺𑀬𑁄 𑀯𑀺𑀬 𑀘 𑀏𑀓𑁄𑀪𑀸𑀲𑀁 𑀏𑀓𑀧𑀚𑁆𑀚𑁄𑀢𑀁 𑀓𑀭𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀻𑀢𑀺 𑀏𑀓𑀲𑁆𑀫𑀺𑀁 𑀅𑀦𑁆𑀢𑁂, 𑀏𑀓𑀲𑁆𑀫𑀺𑀁 𑀑𑀓𑀸𑀲𑁂 𑀅𑀝𑁆𑀞𑀸𑀲𑀺. 𑀏𑀢𑀤𑀯𑁄𑀘𑀸𑀢𑀺 𑀏𑀢𑀁 ‘‘𑀪𑀺𑀓𑁆𑀔𑀼 𑀪𑀺𑀓𑁆𑀔𑀽’’𑀢𑀺𑀆𑀤𑀺𑀯𑀘𑀦𑀫𑀯𑁄𑀘. 𑀓𑀲𑁆𑀫𑀸 𑀧𑀦𑀸𑀬𑀁 𑀅𑀯𑀦𑁆𑀤𑀺𑀢𑁆𑀯𑀸 𑀲𑀫𑀡𑀯𑁄𑀳𑀸𑀭𑁂𑀦𑁂𑀯 𑀓𑀣𑁂𑀢𑀻𑀢𑀺? 𑀲𑀫𑀡𑀲𑀜𑁆𑀜𑀸𑀲𑀫𑀼𑀤𑀸𑀘𑀸𑀭𑁂𑀦𑁂𑀯. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀅𑀬𑀁 𑀅𑀦𑁆𑀢𑀭𑀸 𑀓𑀸𑀫𑀸𑀯𑀘𑀭𑁂 𑀯𑀲𑀺. 𑀅𑀳𑀁 𑀧𑀦 𑀅𑀲𑁆𑀫𑀺 𑀢𑀢𑁄 𑀓𑀸𑀮𑀢𑁄 𑀧𑀝𑁆𑀞𑀸𑀬 𑀩𑁆𑀭𑀳𑁆𑀫𑀘𑀸𑀭𑀻’’𑀢𑀺 𑀲𑀫𑀡𑀲𑀜𑁆𑀜𑀸𑀯𑀲𑁆𑀲 𑀲𑀫𑀼𑀤𑀸𑀘𑀭𑀢𑀺, 𑀢𑀲𑁆𑀫𑀸 𑀅𑀯𑀦𑁆𑀤𑀺𑀢𑁆𑀯𑀸 𑀲𑀫𑀡𑀯𑁄𑀳𑀸𑀭𑁂𑀦𑁂𑀯 𑀓𑀣𑁂𑀢𑀺. 𑀧𑀼𑀩𑁆𑀩𑀲𑀳𑀸𑀬𑁄 𑀓𑀺𑀭𑁂𑀲𑁄 𑀤𑁂𑀯𑀧𑀼𑀢𑁆𑀢𑁄 𑀣𑁂𑀭𑀲𑁆𑀲. 𑀓𑀼𑀢𑁄 𑀧𑀝𑁆𑀞𑀸𑀬𑀸𑀢𑀺? 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑀢𑁄 𑀧𑀝𑁆𑀞𑀸𑀬. 𑀬𑁄 𑀳𑀺 𑀧𑀼𑀩𑁆𑀩𑀬𑁄𑀕𑁂 𑀆𑀕𑀢𑁂𑀲𑀼 𑀧𑀜𑁆𑀘𑀲𑀼 𑀲𑀳𑀸𑀬𑁂𑀲𑀼 𑀅𑀦𑀼𑀣𑁂𑀭𑁄 𑀘𑀢𑀼𑀢𑁆𑀣𑀤𑀺𑀯𑀲𑁂 𑀅𑀦𑀸𑀕𑀸𑀫𑀻 𑀅𑀳𑁄𑀲𑀻𑀢𑀺 𑀯𑀼𑀢𑁆𑀢𑁄, 𑀅𑀬𑀁 𑀲𑁄. 𑀢𑀤𑀸 𑀓𑀺𑀭 𑀢𑁂𑀲𑀼 𑀲𑀗𑁆𑀖𑀢𑁆𑀣𑁂𑀭𑀲𑁆𑀲 𑀅𑀭𑀳𑀢𑁆𑀢𑁂𑀦𑁂𑀯 𑀲𑀤𑁆𑀥𑀺𑀁 𑀅𑀪𑀺𑀜𑁆𑀜𑀸 𑀆𑀕𑀫𑀺𑀁𑀲𑀼. 𑀲𑁄, ‘‘𑀫𑀬𑁆𑀳𑀁 𑀓𑀺𑀘𑁆𑀘𑀁 𑀫𑀢𑁆𑀣𑀓𑀁 𑀧𑀢𑁆𑀢’’𑀦𑁆𑀢𑀺 𑀯𑁂𑀳𑀸𑀲𑀁 𑀉𑀧𑁆𑀧𑀢𑀺𑀢𑁆𑀯𑀸 𑀅𑀦𑁄𑀢𑀢𑁆𑀢𑀤𑀳𑁂 𑀫𑀼𑀔𑀁 𑀥𑁄𑀯𑀺𑀢𑁆𑀯𑀸 𑀉𑀢𑁆𑀢𑀭𑀓𑀼𑀭𑀼𑀢𑁄 𑀧𑀺𑀡𑁆𑀟𑀧𑀸𑀢𑀁 𑀆𑀤𑀸𑀬 𑀆𑀕𑀦𑁆𑀢𑁆𑀯𑀸, ‘‘𑀇𑀫𑀁, 𑀆𑀯𑀼𑀲𑁄, 𑀧𑀺𑀡𑁆𑀟𑀧𑀸𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀅𑀧𑁆𑀧𑀫𑀢𑁆𑀢𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀣𑀸’’𑀢𑀺 𑀆𑀳. 𑀇𑀢𑀭𑁂 𑀆𑀳𑀁𑀲𑀼 𑁋 ‘‘𑀦, 𑀆𑀯𑀼𑀲𑁄, 𑀅𑀫𑁆𑀳𑀸𑀓𑀁 𑀏𑀯𑀁 𑀓𑀢𑀺𑀓𑀸 𑀅𑀢𑁆𑀣𑀺 𑁋 ‘𑀬𑁄 𑀧𑀞𑀫𑀁 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀁 𑀆𑀳𑀭𑀢𑀺, 𑀢𑁂𑀦𑀸𑀪𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑁂𑀲𑁂𑀳𑀺 𑀲𑀫𑀡𑀥𑀫𑁆𑀫𑁄 𑀓𑀸𑀢𑀩𑁆𑀩𑁄’𑀢𑀺. 𑀢𑀼𑀫𑁆𑀳𑁂 𑀅𑀢𑁆𑀢𑀦𑁄 𑀉𑀧𑀦𑀺𑀲𑁆𑀲𑀬𑁂𑀦 𑀓𑀺𑀘𑁆𑀘𑀁 𑀫𑀢𑁆𑀣𑀓𑀁 𑀧𑀸𑀧𑀬𑀺𑀢𑁆𑀣. 𑀫𑀬𑀫𑁆𑀧𑀺 𑀲𑀘𑁂 𑀦𑁄 𑀉𑀧𑀦𑀺𑀲𑁆𑀲𑀬𑁄 𑀪𑀯𑀺𑀲𑁆𑀲𑀢𑀺, 𑀓𑀺𑀘𑁆𑀘𑀁 𑀫𑀢𑁆𑀣𑀓𑀁 𑀧𑀸𑀧𑁂𑀲𑁆𑀲𑀸𑀫. 𑀧𑀧𑀜𑁆𑀘𑁄 𑀏𑀲 𑀅𑀫𑁆𑀳𑀸𑀓𑀁, 𑀕𑀘𑁆𑀙𑀣 𑀢𑀼𑀫𑁆𑀳𑁂’’𑀢𑀺. 𑀲𑁄 𑀬𑀣𑀸𑀨𑀸𑀲𑀼𑀓𑀁 𑀕𑀦𑁆𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀧𑀭𑀺𑀦𑀺𑀩𑁆𑀩𑀸𑀬𑀺.

𑀧𑀼𑀦𑀤𑀺𑀯𑀲𑁂 𑀅𑀦𑀼𑀣𑁂𑀭𑁄 𑀅𑀦𑀸𑀕𑀸𑀫𑀺𑀨𑀮𑀁 𑀲𑀘𑁆𑀙𑀓𑀸𑀲𑀺, 𑀢𑀲𑁆𑀲 𑀅𑀪𑀺𑀜𑁆𑀜𑀸𑀬𑁄 𑀆𑀕𑀫𑀺𑀁𑀲𑀼. 𑀲𑁄𑀧𑀺 𑀢𑀣𑁂𑀯 𑀧𑀺𑀡𑁆𑀟𑀧𑀸𑀢𑀁 𑀆𑀳𑀭𑀺𑀢𑁆𑀯𑀸 𑀢𑁂𑀳𑀺 𑀧𑀝𑀺𑀓𑁆𑀔𑀺𑀢𑁆𑀢𑁄 𑀬𑀣𑀸𑀨𑀸𑀲𑀼𑀓𑀁 𑀕𑀦𑁆𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀲𑀼𑀤𑁆𑀥𑀸𑀯𑀸𑀲𑁂 𑀦𑀺𑀩𑁆𑀩𑀢𑁆𑀢𑀺. 𑀲𑁄 𑀲𑀼𑀤𑁆𑀥𑀸𑀯𑀸𑀲𑁂 𑀞𑀢𑁆𑀯𑀸 𑀢𑁂 𑀲𑀳𑀸𑀬𑁂 𑀑𑀮𑁄𑀓𑁂𑀦𑁆𑀢𑁄, 𑀏𑀓𑁄 𑀢𑀤𑀸𑀯 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀏𑀓𑁄 𑀅𑀥𑀼𑀦𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀅𑀭𑀺𑀬𑀪𑀽𑀫𑀺𑀁 𑀧𑀢𑁆𑀢𑁄, 𑀏𑀓𑁄 𑀮𑀸𑀪𑀲𑀓𑁆𑀓𑀸𑀭𑀁 𑀦𑀺𑀲𑁆𑀲𑀸𑀬, ‘‘𑀅𑀳𑀁 𑀅𑀭𑀳𑀸’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀲𑀼𑀧𑁆𑀧𑀸𑀭𑀓𑀧𑀝𑁆𑀝𑀦𑁂 𑀯𑀲𑀢𑀻𑀢𑀺 𑀤𑀺𑀲𑁆𑀯𑀸 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, ‘‘𑀦 𑀢𑁆𑀯𑀁 𑀅𑀭𑀳𑀸, 𑀦 𑀅𑀭𑀳𑀢𑁆𑀢𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑁄, 𑀕𑀘𑁆𑀙 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀸𑀳𑀻’’𑀢𑀺 𑀉𑀬𑁆𑀬𑁄𑀚𑁂𑀲𑀺. 𑀲𑁄𑀧𑀺 𑀅𑀦𑁆𑀢𑀭𑀖𑀭𑁂 𑀪𑀕𑀯𑀦𑁆𑀢𑀁 𑀑𑀯𑀸𑀤𑀁 𑀬𑀸𑀘𑀺𑀢𑁆𑀯𑀸, ‘‘𑀢𑀲𑁆𑀫𑀸 𑀢𑀺𑀳 𑀢𑁂 𑀩𑀸𑀳𑀺𑀬 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑀤𑀺𑀝𑁆𑀞𑁂 𑀤𑀺𑀝𑁆𑀞𑀫𑀢𑁆𑀢𑀁 𑀳𑁄𑀢𑀽’’𑀢𑀺 (𑀉𑀤𑀸. 𑁧𑁦) 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀑𑀯𑀤𑀺𑀢𑁄 𑀅𑀭𑀺𑀬𑀪𑀽𑀫𑀺𑀁 𑀲𑀫𑁆𑀧𑀸𑀧𑀼𑀡𑀺.

𑀢𑀢𑁄 𑀅𑀜𑁆𑀜𑁄 𑀏𑀓𑁄 𑀅𑀢𑁆𑀣𑀺, 𑀲𑁄 𑀓𑀼𑀳𑀺𑀦𑁆𑀢𑀺 𑀑𑀮𑁄𑀓𑁂𑀦𑁆𑀢𑁄 𑀅𑀦𑁆𑀥𑀯𑀦𑁂 𑀲𑁂𑀓𑁆𑀔𑀧𑀝𑀺𑀧𑀤𑀁 𑀧𑀽𑀭𑀬𑀫𑀸𑀦𑁄 𑀯𑀺𑀳𑀭𑀢𑀻𑀢𑀺 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀳𑀸𑀬𑀓𑀲𑁆𑀲 𑀲𑀦𑁆𑀢𑀺𑀓𑁂 𑀕𑀫𑀺𑀲𑁆𑀲𑀸𑀫𑀻𑀢𑀺, 𑀕𑀘𑁆𑀙𑀦𑁆𑀢𑁂𑀦 𑀧𑀦 𑀢𑀼𑀘𑁆𑀙𑀳𑀢𑁆𑀣𑁂𑀦 𑀅𑀕𑀦𑁆𑀢𑁆𑀯𑀸 𑀓𑀺𑀜𑁆𑀘𑀺 𑀧𑀡𑁆𑀡𑀸𑀓𑀸𑀭𑀁 𑀕𑀳𑁂𑀢𑁆𑀯𑀸 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺, 𑀲𑀳𑀸𑀬𑁄 𑀔𑁄 𑀧𑀦 𑀫𑁂 𑀦𑀺𑀭𑀸𑀫𑀺𑀲𑁄 𑀧𑀩𑁆𑀩𑀢𑀫𑀢𑁆𑀣𑀓𑁂 𑀯𑀲𑀦𑁆𑀢𑁄 𑀫𑀬𑀸 𑀆𑀓𑀸𑀲𑁂 𑀞𑀢𑁆𑀯𑀸 𑀤𑀺𑀦𑁆𑀦𑀁 𑀧𑀺𑀡𑁆𑀟𑀧𑀸𑀢𑀫𑁆𑀧𑀺 𑀅𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀅𑀓𑀸𑀲𑀺, 𑀇𑀤𑀸𑀦𑀺 𑀆𑀫𑀺𑀲𑀧𑀡𑁆𑀡𑀸𑀓𑀸𑀭𑀁 𑀓𑀺𑀁 𑀕𑀡𑁆𑀳𑀺𑀲𑁆𑀲𑀢𑀺? 𑀥𑀫𑁆𑀫𑀧𑀡𑁆𑀡𑀸𑀓𑀸𑀭𑀁 𑀕𑀳𑁂𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀩𑁆𑀭𑀳𑁆𑀫𑀮𑁄𑀓𑁂 𑀞𑀺𑀢𑁄𑀯 𑀭𑀢𑀦𑀸𑀯𑀴𑀺𑀁 𑀕𑀦𑁆𑀣𑁂𑀦𑁆𑀢𑁄 𑀯𑀺𑀬 𑀧𑀦𑁆𑀦𑀭𑀲 𑀧𑀜𑁆𑀳𑁂 𑀯𑀺𑀪𑀚𑀺𑀢𑁆𑀯𑀸 𑀢𑀁 𑀥𑀫𑁆𑀫𑀧𑀡𑁆𑀡𑀸𑀓𑀸𑀭𑀁 𑀆𑀤𑀸𑀬 𑀆𑀕𑀦𑁆𑀢𑁆𑀯𑀸 𑀲𑀳𑀸𑀬𑀲𑁆𑀲 𑀅𑀯𑀺𑀤𑀽𑀭𑁂 𑀞𑀢𑁆𑀯𑀸 𑀅𑀢𑁆𑀢𑀦𑁄 𑀲𑀫𑀡𑀲𑀜𑁆𑀜𑀸𑀲𑀫𑀼𑀤𑀸𑀘𑀸𑀭𑀯𑀲𑁂𑀦 𑀢𑀁 𑀅𑀦𑀪𑀺𑀯𑀸𑀤𑁂𑀢𑁆𑀯𑀸𑀯, ‘‘𑀪𑀺𑀓𑁆𑀔𑀼 𑀪𑀺𑀓𑁆𑀔𑀽’’𑀢𑀺 𑀆𑀮𑀧𑀺𑀢𑁆𑀯𑀸 𑀅𑀬𑀁 𑀯𑀫𑁆𑀫𑀺𑀓𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀼𑀭𑀺𑀢𑀸𑀮𑀧𑀦𑀯𑀲𑁂𑀦 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀢𑀺 𑀆𑀫𑁂𑀟𑀺𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸 𑀯𑀸 𑀏𑀓𑀦𑁂𑀯 𑀢𑀺𑀮𑀓𑁂𑀦 𑀦𑀮𑀸𑀝𑀁 𑀦 𑀲𑁄𑀪𑀢𑀺, 𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀅𑀜𑁆𑀜𑁂𑀲𑀼𑀧𑀺 𑀤𑀺𑀦𑁆𑀦𑁂𑀲𑀼 𑀨𑀼𑀮𑁆𑀮𑀺𑀢𑀫𑀡𑁆𑀟𑀺𑀢𑀁 𑀯𑀺𑀬 𑀲𑁄𑀪𑀢𑀺, 𑀏𑀯𑀁 𑀏𑀓𑁂𑀦𑁂𑀯 𑀧𑀤𑁂𑀦 𑀯𑀘𑀦𑀁 𑀦 𑀲𑁄𑀪𑀢𑀺, 𑀧𑀭𑀺𑀯𑀸𑀭𑀺𑀓𑀧𑀤𑁂𑀦 𑀲𑀤𑁆𑀥𑀺𑀁 𑀨𑀼𑀮𑁆𑀮𑀺𑀢𑀫𑀡𑁆𑀟𑀺𑀢𑀁 𑀯𑀺𑀬 𑀲𑁄𑀪𑀢𑀻𑀢𑀺 𑀢𑀁 𑀧𑀭𑀺𑀯𑀸𑀭𑀺𑀓𑀧𑀤𑀯𑀲𑁂𑀦 𑀯𑀘𑀦𑀁 𑀨𑀼𑀮𑁆𑀮𑀺𑀢𑀫𑀡𑁆𑀟𑀺𑀢𑀁 𑀯𑀺𑀬 𑀓𑀭𑁄𑀦𑁆𑀢𑁄𑀧𑀺 𑀏𑀯𑀫𑀸𑀳.

𑀅𑀬𑀁 𑀯𑀫𑁆𑀫𑀺𑀓𑁄𑀢𑀺 𑀧𑀼𑀭𑀢𑁄 𑀞𑀺𑀢𑁄 𑀯𑀫𑁆𑀫𑀺𑀓𑁄 𑀦𑀸𑀫 𑀦𑀢𑁆𑀣𑀺, 𑀤𑁂𑀲𑀦𑀸𑀯𑀲𑁂𑀦 𑀧𑀦 𑀧𑀼𑀭𑀢𑁄 𑀞𑀺𑀢𑀁 𑀤𑀲𑁆𑀲𑁂𑀦𑁆𑀢𑁄 𑀯𑀺𑀬 𑀅𑀬𑀦𑁆𑀢𑀺 𑀆𑀳. 𑀮𑀗𑁆𑀕𑀺𑀦𑁆𑀢𑀺 𑀲𑀢𑁆𑀣𑀁 𑀆𑀤𑀸𑀬 𑀔𑀡𑀦𑁆𑀢𑁄 𑀧𑀮𑀺𑀖𑀁 𑀅𑀤𑁆𑀤𑀲. 𑀉𑀓𑁆𑀔𑀺𑀧 𑀮𑀗𑁆𑀕𑀺𑀁 𑀅𑀪𑀺𑀓𑁆𑀔𑀡 𑀲𑀼𑀫𑁂𑀥𑀸𑀢𑀺 𑀢𑀸𑀢, 𑀧𑀡𑁆𑀟𑀺𑀢, 𑀮𑀗𑁆𑀕𑀻 𑀦𑀸𑀫 𑀭𑀢𑁆𑀢𑀺𑀁 𑀥𑀽𑀫𑀸𑀬𑀢𑀺 𑀤𑀺𑀯𑀸 𑀧𑀚𑁆𑀚𑀮𑀢𑀺. 𑀉𑀓𑁆𑀔𑀺𑀧𑁂𑀢 𑀧𑀭𑀁 𑀧𑀭𑀢𑁄 𑀔𑀡𑀸𑀢𑀺. 𑀏𑀯𑀁 𑀲𑀩𑁆𑀩𑀧𑀤𑁂𑀲𑀼 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀉𑀤𑁆𑀥𑀼𑀫𑀸𑀬𑀺𑀓𑀦𑁆𑀢𑀺 𑀫𑀡𑁆𑀟𑀽𑀓𑀁. 𑀘𑀗𑁆𑀓𑀯𑀸𑀭𑀦𑁆𑀢𑀺 𑀔𑀸𑀭𑀧𑀭𑀺𑀲𑁆𑀲𑀸𑀯𑀦𑀁. 𑀓𑀼𑀫𑁆𑀫𑀦𑁆𑀢𑀺 𑀓𑀘𑁆𑀙𑀧𑀁. 𑀅𑀲𑀺𑀲𑀽𑀦𑀦𑁆𑀢𑀺 𑀫𑀁𑀲𑀘𑁆𑀙𑁂𑀤𑀓𑀁 𑀅𑀲𑀺𑀜𑁆𑀘𑁂𑀯 𑀅𑀥𑀺𑀓𑀼𑀝𑁆𑀝𑀦𑀜𑁆𑀘. 𑀫𑀁𑀲𑀧𑁂𑀲𑀺𑀦𑁆𑀢𑀺 𑀦𑀺𑀲𑀤𑀧𑁄𑀢𑀧𑁆𑀧𑀫𑀸𑀡𑀁 𑀅𑀮𑁆𑀮𑀫𑀁𑀲𑀧𑀺𑀡𑁆𑀟𑀁. 𑀦𑀸𑀕𑀦𑁆𑀢𑀺 𑀲𑀼𑀫𑀦𑀧𑀼𑀧𑁆𑀨𑀓𑀮𑀸𑀧𑀲𑀤𑀺𑀲𑀁 𑀫𑀳𑀸𑀨𑀡𑀁 𑀢𑀺𑀯𑀺𑀥𑀲𑁄𑀯𑀢𑁆𑀣𑀺𑀓𑀧𑀭𑀺𑀓𑁆𑀔𑀺𑀢𑁆𑀢𑀁 𑀅𑀳𑀺𑀦𑀸𑀕𑀁 𑀅𑀤𑁆𑀤𑀲. 𑀫𑀸 𑀦𑀸𑀕𑀁 𑀖𑀝𑁆𑀝𑁂𑀲𑀻𑀢𑀺 𑀤𑀡𑁆𑀟𑀓𑀓𑁄𑀝𑀺𑀬𑀸 𑀯𑀸 𑀯𑀮𑁆𑀮𑀺𑀓𑁄𑀝𑀺𑀬𑀸 𑀯𑀸 𑀧𑀁𑀲𑀼𑀘𑀼𑀡𑁆𑀡𑀁 𑀯𑀸 𑀧𑀦 𑀔𑀺𑀧𑀫𑀸𑀦𑁄 𑀫𑀸 𑀦𑀸𑀕𑀁 𑀖𑀝𑁆𑀝𑀬𑀺. 𑀦𑀫𑁄 𑀓𑀭𑁄𑀳𑀺 𑀦𑀸𑀕𑀲𑁆𑀲𑀸𑀢𑀺 𑀉𑀧𑀭𑀺𑀯𑀸𑀢𑀢𑁄 𑀅𑀧𑀕𑀫𑁆𑀫 𑀲𑀼𑀤𑁆𑀥𑀯𑀢𑁆𑀣𑀁 𑀦𑀺𑀯𑀸𑀲𑁂𑀢𑁆𑀯𑀸 𑀦𑀸𑀕𑀲𑁆𑀲 𑀦𑀫𑀓𑁆𑀓𑀸𑀭𑀁 𑀓𑀭𑁄𑀳𑀺. 𑀦𑀸𑀕𑁂𑀦 𑀅𑀥𑀺𑀲𑀬𑀺𑀢𑀁 𑀥𑀦𑀁 𑀦𑀸𑀫 𑀬𑀸𑀯 𑀲𑀢𑁆𑀢𑀫𑀸 𑀓𑀼𑀮𑀧𑀭𑀺𑀯𑀝𑁆𑀝𑀸 𑀔𑀸𑀤𑀢𑁄 𑀦 𑀔𑀻𑀬𑀢𑀺, 𑀦𑀸𑀕𑁄 𑀢𑁂 𑀅𑀥𑀺𑀲𑀬𑀺𑀢𑀁 𑀥𑀦𑀁 𑀤𑀲𑁆𑀲𑀢𑀺, 𑀢𑀲𑁆𑀫𑀸 𑀦𑀫𑁄 𑀓𑀭𑁄𑀳𑀺 𑀦𑀸𑀕𑀲𑁆𑀲𑀸𑀢𑀺. 𑀇𑀢𑁄 𑀯𑀸 𑀧𑀦 𑀲𑀼𑀢𑁆𑀯𑀸𑀢𑀺 𑀬𑀣𑀸 𑀤𑀼𑀓𑁆𑀔𑀓𑁆𑀔𑀦𑁆𑀥𑁂 𑀇𑀢𑁄𑀢𑀺 𑀲𑀸𑀲𑀦𑁂 𑀦𑀺𑀲𑁆𑀲𑀓𑀁, 𑀦 𑀢𑀣𑀸 𑀇𑀥. 𑀇𑀥 𑀧𑀦 𑀤𑁂𑀯𑀧𑀼𑀢𑁆𑀢𑁂 𑀦𑀺𑀲𑁆𑀲𑀓𑁆𑀓𑀁, 𑀢𑀲𑁆𑀫𑀸 𑀇𑀢𑁄 𑀯𑀸 𑀧𑀦𑀸𑀢𑀺 𑀫𑀫 𑀯𑀸 𑀧𑀦 𑀲𑀦𑁆𑀢𑀺𑀓𑀸 𑀲𑀼𑀢𑁆𑀯𑀸𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄.

𑁨𑁫𑁧. 𑀘𑀸𑀢𑀼𑀫𑁆𑀫𑀳𑀸𑀪𑀽𑀢𑀺𑀓𑀲𑁆𑀲𑀸𑀢𑀺 𑀘𑀢𑀼𑀫𑀳𑀸𑀪𑀽𑀢𑀫𑀬𑀲𑁆𑀲. 𑀓𑀸𑀬𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀦𑁆𑀢𑀺 𑀲𑀭𑀻𑀭𑀲𑁆𑀲 𑀦𑀸𑀫𑀁. 𑀬𑀣𑁂𑀯 𑀳𑀺 𑀩𑀸𑀳𑀺𑀭𑀓𑁄 𑀯𑀫𑁆𑀫𑀺𑀓𑁄, 𑀯𑀫𑀢𑀻𑀢𑀺 𑀯𑀦𑁆𑀢𑀓𑁄𑀢𑀺 𑀯𑀦𑁆𑀢𑀼𑀲𑁆𑀲𑀬𑁄𑀢𑀺 𑀯𑀦𑁆𑀢𑀲𑀺𑀦𑁂𑀳𑀲𑀫𑁆𑀩𑀦𑁆𑀥𑁄𑀢𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀯𑀫𑁆𑀫𑀺𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀲𑁄 𑀳𑀺 𑀅𑀳𑀺𑀫𑀗𑁆𑀕𑀼𑀲𑀉𑀦𑁆𑀤𑀽𑀭𑀖𑀭𑀕𑁄𑀴𑀺𑀓𑀸𑀤𑀬𑁄 𑀦𑀸𑀦𑀧𑁆𑀧𑀓𑀸𑀭𑁂 𑀧𑀸𑀡𑀓𑁂 𑀯𑀫𑀢𑀻𑀢𑀺 𑀯𑀫𑁆𑀫𑀺𑀓𑁄. 𑀉𑀧𑀘𑀺𑀓𑀸𑀳𑀺 𑀯𑀦𑁆𑀢𑀓𑁄𑀢𑀺 𑀯𑀫𑁆𑀫𑀺𑀓𑁄. 𑀉𑀧𑀘𑀺𑀓𑀸𑀳𑀺 𑀯𑀫𑀺𑀢𑁆𑀯𑀸 𑀫𑀼𑀔𑀢𑀼𑀡𑁆𑀟𑀓𑁂𑀦 𑀉𑀓𑁆𑀔𑀺𑀢𑁆𑀢𑀧𑀁𑀲𑀼𑀘𑀼𑀡𑁆𑀡𑁂𑀦 𑀓𑀝𑀺𑀧𑁆𑀧𑀫𑀸𑀡𑁂𑀦𑀧𑀺 𑀧𑁄𑀭𑀺𑀲𑀧𑁆𑀧𑀫𑀸𑀡𑁂𑀦𑀧𑀺 𑀉𑀲𑁆𑀲𑀺𑀢𑁄𑀢𑀺 𑀯𑀫𑁆𑀫𑀺𑀓𑁄. 𑀉𑀧𑀘𑀺𑀓𑀸𑀳𑀺 𑀯𑀦𑁆𑀢𑀔𑁂𑀴𑀲𑀺𑀦𑁂𑀳𑁂𑀦 𑀆𑀩𑀤𑁆𑀥𑀢𑀸𑀬 𑀲𑀢𑁆𑀢𑀲𑀢𑁆𑀢𑀸𑀳𑀁 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂𑀧𑀺 𑀦 𑀯𑀺𑀧𑁆𑀧𑀓𑀺𑀭𑀺𑀬𑀢𑀺, 𑀦𑀺𑀤𑀸𑀖𑁂𑀧𑀺 𑀢𑀢𑁄 𑀧𑀁𑀲𑀼𑀫𑀼𑀝𑁆𑀞𑀺𑀁 𑀕𑀳𑁂𑀢𑁆𑀯𑀸 𑀢𑀲𑁆𑀫𑀺𑀁 𑀫𑀼𑀝𑁆𑀞𑀺𑀦𑀸 𑀧𑀻𑀴𑀺𑀬𑀫𑀸𑀦𑁂 𑀲𑀺𑀦𑁂𑀳𑁄 𑀦𑀺𑀓𑁆𑀔𑀫𑀢𑀺, 𑀏𑀯𑀁 𑀯𑀦𑁆𑀢𑀲𑀺𑀦𑁂𑀳𑁂𑀦 𑀲𑀫𑁆𑀩𑀤𑁆𑀥𑁄𑀢𑀺 𑀯𑀫𑁆𑀫𑀺𑀓𑁄. 𑀏𑀯𑀫𑀬𑀁 𑀓𑀸𑀬𑁄𑀧𑀺, ‘‘𑀅𑀓𑁆𑀔𑀺𑀫𑁆𑀳𑀸 𑀅𑀓𑁆𑀔𑀺𑀕𑀽𑀣𑀓𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀦𑀸𑀦𑀧𑁆𑀧𑀓𑀸𑀭𑀓𑀁 𑀅𑀲𑀼𑀘𑀺𑀓𑀮𑀺𑀫𑀮𑀁 𑀯𑀫𑀢𑀻𑀢𑀺 𑀯𑀫𑁆𑀫𑀺𑀓𑁄. 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀔𑀻𑀡𑀸𑀲𑀯𑀸 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀦𑀺𑀓𑀦𑁆𑀢𑀺𑀧𑀭𑀺𑀬𑀸𑀤𑀸𑀦𑁂𑀦 𑀅𑀢𑁆𑀢𑀪𑀸𑀯𑀁 𑀙𑀟𑁆𑀟𑁂𑀢𑁆𑀯𑀸 𑀕𑀢𑀸𑀢𑀺 𑀅𑀭𑀺𑀬𑁂𑀳𑀺 𑀯𑀦𑁆𑀢𑀓𑁄𑀢𑀺𑀧𑀺 𑀯𑀫𑁆𑀫𑀺𑀓𑁄. 𑀬𑁂𑀳𑀺 𑀘𑀸𑀬𑀁 𑀢𑀻𑀳𑀺 𑀅𑀝𑁆𑀞𑀺𑀲𑀢𑁂𑀳𑀺 𑀉𑀲𑁆𑀲𑀺𑀢𑁄 𑀦𑁆𑀳𑀸𑀭𑀼𑀲𑀫𑁆𑀩𑀤𑁆𑀥𑁄 𑀫𑀁𑀲𑀸𑀯𑀮𑁂𑀧𑀦𑁄 𑀅𑀮𑁆𑀮𑀘𑀫𑁆𑀫𑀧𑀭𑀺𑀬𑁄𑀦𑀤𑁆𑀥𑁄 𑀙𑀯𑀺𑀭𑀜𑁆𑀚𑀺𑀢𑁄 𑀲𑀢𑁆𑀢𑁂 𑀯𑀜𑁆𑀘𑁂𑀢𑀺, 𑀢𑀁 𑀲𑀩𑁆𑀩𑀁 𑀅𑀭𑀺𑀬𑁂𑀳𑀺 𑀯𑀦𑁆𑀢𑀫𑁂𑀯𑀸𑀢𑀺 𑀯𑀦𑁆𑀢𑀼𑀲𑁆𑀲𑀬𑁄𑀢𑀺𑀧𑀺 𑀯𑀫𑁆𑀫𑀺𑀓𑁄. ‘‘𑀢𑀡𑁆𑀳𑀸 𑀚𑀦𑁂𑀢𑀺 𑀧𑀼𑀭𑀺𑀲𑀁, 𑀘𑀺𑀢𑁆𑀢𑀫𑀲𑁆𑀲 𑀯𑀺𑀥𑀸𑀯𑀢𑀻’’𑀢𑀺 (𑀲𑀁. 𑀦𑀺. 𑁧.𑁫𑁫) 𑀏𑀯𑀁 𑀢𑀡𑁆𑀳𑀸𑀬 𑀚𑀦𑀺𑀢𑀢𑁆𑀢𑀸 𑀅𑀭𑀺𑀬𑁂𑀳𑀺 𑀯𑀦𑁆𑀢𑁂𑀦𑁂𑀯 𑀢𑀡𑁆𑀳𑀸𑀲𑀺𑀦𑁂𑀳𑁂𑀦 𑀲𑀫𑁆𑀩𑀤𑁆𑀥𑁄 𑀅𑀬𑀦𑁆𑀢𑀺 𑀯𑀦𑁆𑀢𑀲𑀺𑀦𑁂𑀳𑁂𑀦 𑀲𑀫𑁆𑀩𑀤𑁆𑀥𑁄𑀢𑀺𑀧𑀺 𑀯𑀫𑁆𑀫𑀺𑀓𑁄. 𑀬𑀣𑀸 𑀘 𑀯𑀫𑁆𑀫𑀺𑀓𑀲𑁆𑀲 𑀅𑀦𑁆𑀢𑁄 𑀦𑀸𑀦𑀧𑁆𑀧𑀓𑀸𑀭𑀸 𑀧𑀸𑀡𑀓𑀸 𑀢𑀢𑁆𑀣𑁂𑀯 𑀚𑀸𑀬𑀦𑁆𑀢𑀺, 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀁 𑀓𑀭𑁄𑀦𑁆𑀢𑀺, 𑀕𑀺𑀮𑀸𑀦𑀸 𑀲𑀬𑀦𑁆𑀢𑀺, 𑀫𑀢𑀸 𑀧𑀢𑀦𑁆𑀢𑀺. 𑀇𑀢𑀺 𑀲𑁄 𑀢𑁂𑀲𑀁 𑀲𑀽𑀢𑀺𑀖𑀭𑀁 𑀯𑀘𑁆𑀘𑀓𑀼𑀝𑀺 𑀕𑀺𑀮𑀸𑀦𑀲𑀸𑀮𑀸 𑀲𑀼𑀲𑀸𑀦𑀜𑁆𑀘 𑀳𑁄𑀢𑀺. 𑀏𑀯𑀁 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸𑀤𑀻𑀦𑀫𑁆𑀧𑀺 𑀓𑀸𑀬𑁄 𑀅𑀬𑀁 𑀕𑁄𑀧𑀺𑀢𑀭𑀓𑁆𑀔𑀺𑀢𑁄 𑀫𑀡𑁆𑀟𑀺𑀢𑀧𑁆𑀧𑀲𑀸𑀥𑀺𑀢𑁄 𑀫𑀳𑀸𑀦𑀼𑀪𑀸𑀯𑀸𑀦𑀁 𑀓𑀸𑀬𑁄𑀢𑀺 𑀅𑀘𑀺𑀦𑁆𑀢𑁂𑀢𑁆𑀯𑀸 𑀙𑀯𑀺𑀦𑀺𑀲𑁆𑀲𑀺𑀢𑀸 𑀧𑀸𑀡𑀸 𑀘𑀫𑁆𑀫𑀦𑀺𑀲𑁆𑀲𑀺𑀢𑀸 𑀧𑀸𑀡𑀸 𑀫𑀁𑀲𑀦𑀺𑀲𑁆𑀲𑀺𑀢𑀸 𑀧𑀸𑀡𑀸 𑀦𑁆𑀳𑀸𑀭𑀼𑀦𑀺𑀲𑁆𑀲𑀺𑀢𑀸 𑀧𑀸𑀡𑀸 𑀅𑀝𑁆𑀞𑀺𑀦𑀺𑀲𑁆𑀲𑀺𑀢𑀸 𑀧𑀸𑀡𑀸 𑀅𑀝𑁆𑀞𑀺𑀫𑀺𑀜𑁆𑀚𑀦𑀺𑀲𑁆𑀲𑀺𑀢𑀸 𑀧𑀸𑀡𑀸𑀢𑀺 𑀏𑀯𑀁 𑀓𑀼𑀮𑀕𑀡𑀦𑀸𑀬 𑀅𑀲𑀻𑀢𑀺𑀫𑀢𑁆𑀢𑀸𑀦𑀺 𑀓𑀺𑀫𑀺𑀓𑀼𑀮𑀲𑀳𑀲𑁆𑀲𑀸𑀦𑀺 𑀅𑀦𑁆𑀢𑁄𑀓𑀸𑀬𑀲𑁆𑀫𑀺𑀁𑀬𑁂𑀯 𑀚𑀸𑀬𑀦𑁆𑀢𑀺, 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀁 𑀓𑀭𑁄𑀦𑁆𑀢𑀺, 𑀕𑁂𑀮𑀜𑁆𑀜𑁂𑀦 𑀆𑀢𑀼𑀭𑀺𑀢𑀸𑀦𑀺 𑀲𑀬𑀦𑁆𑀢𑀺, 𑀫𑀢𑀸𑀦𑀺 𑀧𑀢𑀦𑁆𑀢𑀺, 𑀇𑀢𑀺 𑀅𑀬𑀫𑁆𑀧𑀺 𑀢𑁂𑀲𑀁 𑀧𑀸𑀡𑀸𑀦𑀁 𑀲𑀽𑀢𑀺𑀖𑀭𑀁 𑀯𑀘𑁆𑀘𑀓𑀼𑀝𑀺 𑀕𑀺𑀮𑀸𑀦𑀲𑀸𑀮𑀸 𑀲𑀼𑀲𑀸𑀦𑀜𑁆𑀘 𑀳𑁄𑀢𑀻𑀢𑀺 ‘‘𑀯𑀫𑁆𑀫𑀺𑀓𑁄’’ 𑀢𑁆𑀯𑁂𑀯 𑀲𑀗𑁆𑀔𑀁 𑀕𑀢𑁄. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀯𑀫𑁆𑀫𑀺𑀓𑁄𑀢𑀺 𑀔𑁄, 𑀪𑀺𑀓𑁆𑀔𑀼, 𑀇𑀫𑀲𑁆𑀲 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑀲𑁆𑀲 𑀓𑀸𑀬𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺.

𑀫𑀸𑀢𑀸𑀧𑁂𑀢𑁆𑀢𑀺𑀓𑀲𑀫𑁆𑀪𑀯𑀲𑁆𑀲𑀸𑀢𑀺 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘 𑀦𑀺𑀩𑁆𑀩𑀢𑁆𑀢𑁂𑀦 𑀫𑀸𑀢𑀸𑀧𑁂𑀢𑁆𑀢𑀺𑀓𑁂𑀦 𑀲𑀼𑀓𑁆𑀓𑀲𑁄𑀡𑀺𑀢𑁂𑀦 𑀲𑀫𑁆𑀪𑀽𑀢𑀲𑁆𑀲. 𑀑𑀤𑀦𑀓𑀼𑀫𑁆𑀫𑀸𑀲𑀽𑀧𑀘𑀬𑀲𑁆𑀲𑀸𑀢𑀺 𑀑𑀤𑀦𑁂𑀦 𑀘𑁂𑀯 𑀓𑀼𑀫𑁆𑀫𑀸𑀲𑁂𑀦 𑀘 𑀉𑀧𑀘𑀺𑀢𑀲𑁆𑀲 𑀯𑀟𑁆𑀠𑀺𑀢𑀲𑁆𑀲. 𑀅𑀦𑀺𑀘𑁆𑀘𑀼𑀘𑁆𑀙𑀸𑀤𑀦𑀧𑀭𑀺𑀫𑀤𑁆𑀤𑀦𑀪𑁂𑀤𑀦𑀯𑀺𑀤𑁆𑀥𑀁𑀲𑀦𑀥𑀫𑁆𑀫𑀲𑁆𑀲𑀸𑀢𑀺 𑀏𑀢𑁆𑀣 𑀅𑀬𑀁 𑀓𑀸𑀬𑁄 𑀳𑀼𑀢𑁆𑀯𑀸 𑀅𑀪𑀸𑀯𑀝𑁆𑀞𑁂𑀦 𑀅𑀦𑀺𑀘𑁆𑀘𑀥𑀫𑁆𑀫𑁄. 𑀤𑀼𑀕𑁆𑀕𑀦𑁆𑀥𑀯𑀺𑀖𑀸𑀢𑀢𑁆𑀣𑀸𑀬 𑀢𑀦𑀼𑀯𑀺𑀮𑁂𑀧𑀦𑁂𑀦 𑀉𑀘𑁆𑀙𑀸𑀤𑀦𑀥𑀫𑁆𑀫𑁄. 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀩𑀸𑀥𑀯𑀺𑀦𑁄𑀤𑀦𑀢𑁆𑀣𑀸𑀬 𑀔𑀼𑀤𑁆𑀤𑀓𑀲𑀫𑁆𑀩𑀸𑀳𑀦𑁂𑀦 𑀧𑀭𑀺𑀫𑀤𑁆𑀤𑀦𑀥𑀫𑁆𑀫𑁄. 𑀤𑀳𑀭𑀓𑀸𑀮𑁂 𑀯𑀸 𑀊𑀭𑀽𑀲𑀼 𑀲𑀬𑀸𑀧𑁂𑀢𑁆𑀯𑀸 𑀕𑀩𑁆𑀪𑀯𑀸𑀲𑁂𑀦 𑀤𑀼𑀲𑁆𑀲𑀡𑁆𑀞𑀺𑀢𑀸𑀦𑀁 𑀢𑁂𑀲𑀁 𑀢𑁂𑀲𑀁 𑀅𑀗𑁆𑀕𑀸𑀦𑀁 𑀲𑀡𑁆𑀞𑀸𑀦𑀲𑀫𑁆𑀧𑀸𑀤𑀦𑀢𑁆𑀣𑀁 𑀅𑀜𑁆𑀙𑀦𑀧𑀻𑀴𑀦𑀸𑀤𑀺𑀯𑀲𑁂𑀦 𑀧𑀭𑀺𑀫𑀤𑁆𑀤𑀦𑀥𑀫𑁆𑀫𑁄. 𑀏𑀯𑀁 𑀧𑀭𑀺𑀳𑀭𑀢𑁄𑀧𑀺 𑀘 𑀪𑁂𑀤𑀦𑀯𑀺𑀤𑁆𑀥𑀁𑀲𑀦𑀥𑀫𑁆𑀫𑁄 𑀪𑀺𑀚𑁆𑀚𑀢𑀺 𑀘𑁂𑀯 𑀯𑀺𑀓𑀺𑀭𑀢𑀺 𑀘, 𑀏𑀯𑀁 𑀲𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀫𑀸𑀢𑀸𑀧𑁂𑀢𑁆𑀢𑀺𑀓𑀲𑀫𑁆𑀪𑀯𑀑𑀤𑀦𑀓𑀼𑀫𑁆𑀫𑀸𑀲𑀽𑀧𑀘𑀬𑀉𑀘𑁆𑀙𑀸𑀤𑀦𑀧𑀭𑀺𑀫𑀤𑁆𑀤𑀦𑀧𑀤𑁂𑀳𑀺 𑀲𑀫𑀼𑀤𑀬𑁄 𑀓𑀣𑀺𑀢𑁄, 𑀅𑀦𑀺𑀘𑁆𑀘𑀪𑁂𑀤𑀯𑀺𑀤𑁆𑀥𑀁𑀲𑀦𑀧𑀤𑁂𑀳𑀺 𑀅𑀢𑁆𑀣𑀗𑁆𑀕𑀫𑁄. 𑀏𑀯𑀁 𑀲𑀢𑁆𑀢𑀳𑀺𑀧𑀺 𑀧𑀤𑁂𑀳𑀺 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑀲𑁆𑀲 𑀓𑀸𑀬𑀲𑁆𑀲 𑀉𑀘𑁆𑀘𑀸𑀯𑀘𑀪𑀸𑀯𑁄 𑀯𑀟𑁆𑀠𑀺𑀧𑀭𑀺𑀳𑀸𑀦𑀺 𑀲𑀫𑀼𑀤𑀬𑀢𑁆𑀣𑀗𑁆𑀕𑀫𑁄 𑀓𑀣𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀤𑀺𑀯𑀸 𑀓𑀫𑁆𑀫𑀦𑁆𑀢𑁂𑀢𑀺 𑀤𑀺𑀯𑀸 𑀓𑀢𑁆𑀢𑀩𑁆𑀩𑀓𑀫𑁆𑀫𑀦𑁆𑀢𑁂. 𑀥𑀽𑀫𑀸𑀬𑀦𑀸𑀢𑀺 𑀏𑀢𑁆𑀣 𑀅𑀬𑀁 𑀥𑀽𑀫𑀲𑀤𑁆𑀤𑁄 𑀓𑁄𑀥𑁂 𑀢𑀡𑁆𑀳𑀸𑀬 𑀯𑀺𑀢𑀓𑁆𑀓𑁂 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀥𑀫𑁆𑀫𑀤𑁂𑀲𑀦𑀸𑀬 𑀧𑀓𑀢𑀺𑀥𑀽𑀫𑁂𑀢𑀺 𑀇𑀫𑁂𑀲𑀼 𑀅𑀢𑁆𑀣𑁂𑀲𑀼 𑀯𑀢𑁆𑀢𑀢𑀺. ‘‘𑀓𑁄𑀥𑁄 𑀥𑀽𑀫𑁄 𑀪𑀲𑁆𑀫𑀦𑀺𑀫𑁄𑀲𑀯𑀚𑁆𑀚’’𑀦𑁆𑀢𑀺 (𑀲𑀁. 𑀦𑀺. 𑁧.𑁧𑁬𑁫) 𑀏𑀢𑁆𑀣 𑀳𑀺 𑀓𑁄𑀥𑁂 𑀯𑀢𑁆𑀢𑀢𑀺. ‘‘𑀇𑀘𑁆𑀙𑀸𑀥𑀽𑀫𑀸𑀬𑀺𑀢𑀸 𑀲𑀢𑁆𑀢𑀸’’𑀢𑀺 𑀏𑀢𑁆𑀣 𑀢𑀡𑁆𑀳𑀸𑀬. ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀪𑀕𑀯𑀢𑁄 𑀅𑀯𑀺𑀤𑀽𑀭𑁂 𑀥𑀽𑀫𑀸𑀬𑀦𑁆𑀢𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀻’’𑀢𑀺 𑀏𑀢𑁆𑀣 𑀯𑀺𑀢𑀓𑁆𑀓𑁂.

‘‘𑀧𑀗𑁆𑀓𑁄 𑀘 𑀓𑀸𑀫𑀸 𑀧𑀮𑀺𑀧𑁄 𑀘 𑀓𑀸𑀫𑀸,

𑀪𑀬𑀜𑁆𑀘 𑀫𑁂𑀢𑀁 𑀢𑀺𑀫𑀽𑀮𑀁 𑀧𑀯𑀼𑀢𑁆𑀢𑀁;

𑀭𑀚𑁄 𑀘 𑀥𑀽𑀫𑁄 𑀘 𑀫𑀬𑀸 𑀧𑀓𑀸𑀲𑀺𑀢𑀸;

𑀳𑀺𑀢𑁆𑀯𑀸 𑀢𑀼𑀯𑀁 𑀧𑀩𑁆𑀩𑀚 𑀩𑁆𑀭𑀳𑁆𑀫𑀤𑀢𑁆𑀢𑀸’’𑀢𑀺. (𑀚𑀸. 𑁧.𑁬.𑁧𑁪) 𑁋

𑀏𑀢𑁆𑀣 𑀧𑀜𑁆𑀘𑀓𑀸𑀫𑀕𑀼𑀡𑁂𑀲𑀼. ‘‘𑀥𑀽𑀫𑀁 𑀓𑀢𑁆𑀢𑀸 𑀳𑁄𑀢𑀻’’𑀢𑀺 (𑀫. 𑀦𑀺. 𑁧.𑁩𑁪𑁯) 𑀏𑀢𑁆𑀣 𑀥𑀫𑁆𑀫𑀤𑁂𑀲𑀦𑀸𑀬. ‘‘𑀥𑀚𑁄 𑀭𑀣𑀲𑁆𑀲 𑀧𑀜𑁆𑀜𑀸𑀡𑀁, 𑀥𑀽𑀫𑁄 𑀧𑀜𑁆𑀜𑀸𑀡𑀫𑀕𑁆𑀕𑀺𑀦𑁄’’𑀢𑀺 (𑀲𑀁. 𑀦𑀺. 𑁧.𑁭𑁨) 𑀏𑀢𑁆𑀣 𑀧𑀓𑀢𑀺𑀥𑀽𑀫𑁂. 𑀇𑀥 𑀧𑀦𑀸𑀬𑀁 𑀯𑀺𑀢𑀓𑁆𑀓𑁂 𑀅𑀥𑀺𑀧𑁆𑀧𑁂𑀢𑁄. 𑀢𑁂𑀦𑀸𑀳 ‘‘𑀅𑀬𑀁 𑀭𑀢𑁆𑀢𑀺𑀁 𑀥𑀽𑀫𑀸𑀬𑀦𑀸’’𑀢𑀺.

𑀢𑀣𑀸𑀕𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀦𑁆𑀢𑀺 𑀢𑀣𑀸𑀕𑀢𑁄 𑀳𑀺 𑀲𑀢𑁆𑀢𑀦𑁆𑀦𑀁 𑀥𑀫𑁆𑀫𑀸𑀦𑀁 𑀩𑀸𑀳𑀺𑀢𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑁄 𑀦𑀸𑀫. 𑀬𑀣𑀸𑀳 𑁋 ‘‘𑀲𑀢𑁆𑀢𑀦𑁆𑀦𑀁 𑀔𑁄, 𑀪𑀺𑀓𑁆𑀔𑀼, 𑀥𑀫𑁆𑀫𑀸𑀦𑀁 𑀩𑀸𑀳𑀺𑀢𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑁄. 𑀓𑀢𑀫𑁂𑀲𑀁 𑀲𑀢𑁆𑀢𑀦𑁆𑀦𑀁? 𑀭𑀸𑀕𑁄 𑀩𑀸𑀳𑀺𑀢𑁄 𑀳𑁄𑀢𑀺, 𑀤𑁄𑀲𑁄… 𑀫𑁄𑀳𑁄… 𑀫𑀸𑀦𑁄… 𑀲𑀓𑁆𑀓𑀸𑀬𑀤𑀺𑀝𑁆𑀞𑀺… 𑀯𑀺𑀘𑀺𑀓𑀺𑀘𑁆𑀙𑀸… 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄 𑀩𑀸𑀳𑀺𑀢𑁄 𑀳𑁄𑀢𑀺. 𑀇𑀫𑁂𑀲𑀁 𑀪𑀺𑀓𑁆𑀔𑀼 𑀲𑀢𑁆𑀢𑀦𑁆𑀦𑀁 𑀥𑀫𑁆𑀫𑀸𑀦𑀁 𑀩𑀸𑀳𑀺𑀢𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑁄’’𑀢𑀺 (𑀘𑀽𑀴𑀦𑀺. 𑀫𑁂𑀢𑁆𑀢𑀕𑀽𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁨𑁮). 𑀲𑀼𑀫𑁂𑀥𑁄𑀢𑀺 𑀲𑀼𑀦𑁆𑀤𑀭𑀧𑀜𑁆𑀜𑁄. 𑀲𑁂𑀓𑁆𑀔𑀲𑁆𑀲𑀸𑀢𑀺 𑀏𑀢𑁆𑀣 𑀲𑀺𑀓𑁆𑀔𑀢𑀻𑀢𑀺 𑀲𑁂𑀓𑁆𑀔𑁄. 𑀬𑀣𑀸𑀳 𑁋 ‘‘𑀲𑀺𑀓𑁆𑀔𑀢𑀻𑀢𑀺 𑀔𑁄, 𑀪𑀺𑀓𑁆𑀔𑀼, 𑀢𑀲𑁆𑀫𑀸 𑀲𑁂𑀓𑁆𑀔𑁄𑀢𑀺 𑀯𑀼𑀘𑁆𑀘𑀢𑀺. 𑀓𑀺𑀜𑁆𑀘 𑀲𑀺𑀓𑁆𑀔𑀢𑀺? 𑀅𑀥𑀺𑀲𑀻𑀮𑀫𑁆𑀧𑀺 𑀲𑀺𑀓𑁆𑀔𑀢𑀺, 𑀅𑀥𑀺𑀘𑀺𑀢𑁆𑀢𑀫𑁆𑀧𑀺 𑀲𑀺𑀓𑁆𑀔𑀢𑀺, 𑀅𑀥𑀺𑀧𑀜𑁆𑀜𑀫𑁆𑀧𑀺 𑀲𑀺𑀓𑁆𑀔𑀢𑀻’’𑀢𑀺 (𑀅. 𑀦𑀺. 𑁩.𑁮𑁬).

𑀧𑀜𑁆𑀜𑀸𑀬 𑀅𑀥𑀺𑀯𑀘𑀦𑀦𑁆𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀬 𑀧𑀜𑁆𑀜𑀸𑀬 𑀏𑀢𑀁 𑀅𑀥𑀺𑀯𑀘𑀦𑀁, 𑀦 𑀆𑀯𑀼𑀥𑀲𑀢𑁆𑀣𑀲𑁆𑀲. 𑀯𑀻𑀭𑀺𑀬𑀸𑀭𑀫𑁆𑀪𑀲𑁆𑀲𑀸𑀢𑀺 𑀓𑀸𑀬𑀺𑀓𑀘𑁂𑀢𑀲𑀺𑀓𑀯𑀻𑀭𑀺𑀬𑀲𑁆𑀲. 𑀢𑀁 𑀧𑀜𑁆𑀜𑀸𑀕𑀢𑀺𑀓𑀫𑁂𑀯 𑀳𑁄𑀢𑀺. 𑀮𑁄𑀓𑀺𑀬𑀸𑀬 𑀧𑀜𑁆𑀜𑀸𑀬 𑀮𑁄𑀓𑀺𑀬𑀁, 𑀮𑁄𑀓𑀼𑀢𑁆𑀢𑀭𑀸𑀬 𑀧𑀜𑁆𑀜𑀸𑀬 𑀮𑁄𑀓𑀼𑀢𑁆𑀢𑀭𑀁. 𑀏𑀢𑁆𑀣 𑀧𑀦𑀸𑀬𑀁 𑀅𑀢𑁆𑀣𑀤𑀻𑀧𑀦𑀸 𑁋

𑀏𑀓𑁄 𑀓𑀺𑀭 𑀚𑀸𑀦𑀧𑀤𑁄 𑀩𑁆𑀭𑀸𑀳𑁆𑀫𑀡𑁄 𑀧𑀸𑀢𑁄𑀯 𑀫𑀸𑀡𑀯𑀓𑁂𑀳𑀺 𑀲𑀤𑁆𑀥𑀺𑀁 𑀕𑀸𑀫𑀢𑁄 𑀦𑀺𑀓𑁆𑀔𑀫𑁆𑀫 𑀤𑀺𑀯𑀲𑀁 𑀅𑀭𑀜𑁆𑀜𑁂 𑀫𑀦𑁆𑀢𑁂 𑀯𑀸𑀘𑁂𑀢𑁆𑀯𑀸 𑀲𑀸𑀬𑀁 𑀕𑀸𑀫𑀁 𑀆𑀕𑀘𑁆𑀙𑀢𑀺. 𑀅𑀦𑁆𑀢𑀭𑀸𑀫𑀕𑁆𑀕𑁂 𑀘 𑀏𑀓𑁄 𑀯𑀫𑁆𑀫𑀺𑀓𑁄 𑀅𑀢𑁆𑀣𑀺. 𑀲𑁄 𑀭𑀢𑁆𑀢𑀺𑀁 𑀥𑀽𑀫𑀸𑀬𑀢𑀺, 𑀤𑀺𑀯𑀸 𑀧𑀚𑁆𑀚𑀮𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀅𑀦𑁆𑀢𑁂𑀯𑀸𑀲𑀺𑀁 𑀲𑀼𑀫𑁂𑀥𑀁 𑀫𑀸𑀡𑀯𑀁 𑀆𑀳 𑁋 ‘‘𑀢𑀸𑀢, 𑀅𑀬𑀁 𑀯𑀫𑁆𑀫𑀺𑀓𑁄 𑀭𑀢𑁆𑀢𑀺𑀁 𑀥𑀽𑀫𑀸𑀬𑀢𑀺, 𑀤𑀺𑀯𑀸 𑀧𑀚𑁆𑀚𑀮𑀢𑀺, 𑀯𑀺𑀓𑀸𑀭𑀫𑀲𑁆𑀲 𑀧𑀲𑁆𑀲𑀺𑀲𑁆𑀲𑀸𑀫, 𑀪𑀺𑀦𑁆𑀤𑀺𑀢𑁆𑀯𑀸 𑀦𑀁 𑀘𑀢𑁆𑀢𑀸𑀭𑁄 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀔𑀺𑀧𑀸𑀳𑀻’’𑀢𑀺. 𑀲𑁄 𑀲𑀸𑀥𑀽𑀢𑀺 𑀓𑀼𑀤𑀸𑀮𑀁 𑀕𑀳𑁂𑀢𑁆𑀯𑀸 𑀲𑀫𑁂𑀳𑀺 𑀧𑀸𑀤𑁂𑀳𑀺 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀸𑀬 𑀢𑀣𑀸 𑀅𑀓𑀸𑀲𑀺. 𑀢𑀢𑁆𑀭 𑀆𑀘𑀭𑀺𑀬𑀩𑁆𑀭𑀸𑀳𑁆𑀫𑀡𑁄 𑀯𑀺𑀬 𑀪𑀕𑀯𑀸. 𑀲𑀼𑀫𑁂𑀥𑀫𑀸𑀡𑀯𑀓𑁄 𑀯𑀺𑀬 𑀲𑁂𑀓𑁆𑀔𑁄 𑀪𑀺𑀓𑁆𑀔𑀼. 𑀯𑀫𑁆𑀫𑀺𑀓𑁄 𑀯𑀺𑀬 𑀓𑀸𑀬𑁄. ‘‘𑀢𑀸𑀢, 𑀅𑀬𑀁 𑀯𑀫𑁆𑀫𑀺𑀓𑁄 𑀭𑀢𑁆𑀢𑀺𑀁 𑀥𑀽𑀫𑀸𑀬𑀢𑀺, 𑀤𑀺𑀯𑀸 𑀧𑀚𑁆𑀚𑀮𑀢𑀺, 𑀯𑀺𑀓𑀸𑀭𑀫𑀲𑁆𑀲 𑀧𑀲𑁆𑀲𑀺𑀲𑁆𑀲𑀸𑀫, 𑀪𑀺𑀦𑁆𑀤𑀺𑀢𑁆𑀯𑀸 𑀦𑀁 𑀘𑀢𑁆𑀢𑀸𑀭𑁄 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀔𑀺𑀧𑀸𑀳𑀻’’𑀢𑀺 𑀩𑁆𑀭𑀸𑀳𑁆𑀫𑀡𑁂𑀦 𑀯𑀼𑀢𑁆𑀢𑀓𑀸𑀮𑁄 𑀯𑀺𑀬, ‘‘𑀪𑀺𑀓𑁆𑀔𑀼 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑀁 𑀓𑀸𑀬𑀁 𑀘𑀢𑁆𑀢𑀸𑀭𑁄 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀧𑀭𑀺𑀕𑁆𑀕𑀡𑁆𑀳𑀸𑀳𑀻’’𑀢𑀺 𑀪𑀕𑀯𑀢𑀸 𑀯𑀼𑀢𑁆𑀢𑀓𑀸𑀮𑁄. 𑀢𑀲𑁆𑀲 𑀲𑀸𑀥𑀽𑀢𑀺 𑀓𑀼𑀤𑀸𑀮𑀁 𑀕𑀳𑁂𑀢𑁆𑀯𑀸 𑀢𑀣𑀸𑀓𑀭𑀡𑀁 𑀯𑀺𑀬 𑀲𑁂𑀓𑁆𑀔𑀲𑁆𑀲 𑀪𑀺𑀓𑁆𑀔𑀼𑀦𑁄, ‘‘𑀬𑁄 𑀯𑀻𑀲𑀢𑀺𑀬𑀸 𑀓𑁄𑀝𑁆𑀞𑀸𑀲𑁂𑀲𑀼 𑀣𑀤𑁆𑀥𑀪𑀸𑀯𑁄, 𑀅𑀬𑀁 𑀧𑀣𑀯𑀻𑀥𑀸𑀢𑀼. 𑀬𑁄 𑀤𑁆𑀯𑀸𑀤𑀲𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀆𑀩𑀦𑁆𑀥𑀦𑀪𑀸𑀯𑁄, 𑀅𑀬𑀁 𑀆𑀧𑁄𑀥𑀸𑀢𑀼. 𑀬𑁄 𑀘𑀢𑀽𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀧𑀭𑀺𑀧𑀸𑀘𑀦𑀪𑀸𑀯𑁄, 𑀅𑀬𑀁 𑀢𑁂𑀚𑁄𑀥𑀸𑀢𑀼. 𑀬𑁄 𑀙𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀯𑀺𑀢𑁆𑀣𑀫𑁆𑀪𑀦𑀪𑀸𑀯𑁄, 𑀅𑀬𑀁 𑀯𑀸𑀬𑁄𑀥𑀸𑀢𑀽’’𑀢𑀺 𑀏𑀯𑀁 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀯𑀲𑁂𑀦 𑀓𑀸𑀬𑀧𑀭𑀺𑀕𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄.

𑀮𑀗𑁆𑀕𑀻𑀢𑀺 𑀔𑁄, 𑀪𑀺𑀓𑁆𑀔𑀽𑀢𑀺 𑀓𑀲𑁆𑀫𑀸 𑀪𑀕𑀯𑀸 𑀅𑀯𑀺𑀚𑁆𑀚𑀁 𑀮𑀗𑁆𑀕𑀻𑀢𑀺 𑀓𑀢𑁆𑀯𑀸 𑀤𑀲𑁆𑀲𑁂𑀲𑀻𑀢𑀺? 𑀬𑀣𑀸 𑀳𑀺 𑀦𑀕𑀭𑀲𑁆𑀲 𑀤𑁆𑀯𑀸𑀭𑀁 𑀧𑀺𑀥𑀸𑀬 𑀧𑀮𑀺𑀖𑁂 𑀬𑁄𑀚𑀺𑀢𑁂 𑀫𑀳𑀸𑀚𑀦𑀲𑁆𑀲 𑀕𑀫𑀦𑀁 𑀧𑀘𑁆𑀙𑀺𑀚𑁆𑀚𑀢𑀺, 𑀬𑁂 𑀦𑀕𑀭𑀲𑁆𑀲 𑀅𑀦𑁆𑀢𑁄, 𑀢𑁂 𑀅𑀦𑁆𑀢𑁄𑀬𑁂𑀯 𑀳𑁄𑀦𑁆𑀢𑀺. 𑀬𑁂 𑀩𑀳𑀺, 𑀢𑁂 𑀩𑀳𑀺𑀬𑁂𑀯. 𑀏𑀯𑀫𑁂𑀯 𑀬𑀲𑁆𑀲 𑀜𑀸𑀡𑀫𑀼𑀔𑁂 𑀅𑀯𑀺𑀚𑁆𑀚𑀸𑀮𑀗𑁆𑀕𑀻 𑀧𑀢𑀢𑀺, 𑀢𑀲𑁆𑀲 𑀦𑀺𑀩𑁆𑀩𑀸𑀦𑀲𑀫𑁆𑀧𑀸𑀧𑀓𑀁 𑀜𑀸𑀡𑀕𑀫𑀦𑀁 𑀧𑀘𑁆𑀙𑀺𑀚𑁆𑀚𑀢𑀺, 𑀢𑀲𑁆𑀫𑀸 𑀅𑀯𑀺𑀚𑁆𑀚𑀁 𑀮𑀗𑁆𑀕𑀻𑀢𑀺 𑀓𑀢𑁆𑀯𑀸 𑀤𑀲𑁆𑀲𑁂𑀲𑀺. 𑀧𑀚𑀳 𑀅𑀯𑀺𑀚𑁆𑀚𑀦𑁆𑀢𑀺 𑀏𑀢𑁆𑀣 𑀓𑀫𑁆𑀫𑀝𑁆𑀞𑀸𑀦𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀯𑀲𑁂𑀦 𑀅𑀯𑀺𑀚𑁆𑀚𑀸𑀧𑀳𑀸𑀦𑀁 𑀓𑀣𑀺𑀢𑀁.

𑀉𑀤𑁆𑀥𑀼𑀫𑀸𑀬𑀺𑀓𑀸𑀢𑀺 𑀔𑁄, 𑀪𑀺𑀓𑁆𑀔𑀽𑀢𑀺 𑀏𑀢𑁆𑀣 𑀉𑀤𑁆𑀥𑀼𑀫𑀸𑀬𑀺𑀓𑀫𑀡𑁆𑀟𑀽𑀓𑁄 𑀦𑀸𑀫 𑀦𑁄 𑀫𑀳𑀦𑁆𑀢𑁄, 𑀦𑀔𑀧𑀺𑀝𑁆𑀞𑀺𑀧𑁆𑀧𑀫𑀸𑀡𑁄 𑀳𑁄𑀢𑀺, 𑀧𑀼𑀭𑀸𑀡𑀧𑀡𑁆𑀡𑀦𑁆𑀢𑀭𑁂 𑀯𑀸 𑀕𑀘𑁆𑀙𑀦𑁆𑀢𑀭𑁂 𑀯𑀸 𑀯𑀮𑁆𑀮𑀺𑀅𑀦𑁆𑀢𑀭𑁂 𑀯𑀸 𑀯𑀲𑀢𑀺. 𑀲𑁄 𑀤𑀡𑁆𑀟𑀓𑁄𑀝𑀺𑀬𑀸 𑀯𑀸 𑀯𑀮𑁆𑀮𑀺𑀓𑁄𑀝𑀺𑀬𑀸 𑀯𑀸 𑀧𑀁𑀲𑀼𑀘𑀼𑀡𑁆𑀡𑀓𑁂𑀦 𑀯𑀸 𑀖𑀝𑁆𑀝𑀺𑀢𑁄 𑀆𑀬𑀫𑀺𑀢𑁆𑀯𑀸 𑀫𑀳𑀦𑁆𑀢𑁄 𑀧𑀭𑀺𑀫𑀡𑁆𑀟𑀮𑁄 𑀩𑁂𑀮𑀼𑀯𑀧𑀓𑁆𑀓𑀧𑁆𑀧𑀫𑀸𑀡𑁄 𑀳𑀼𑀢𑁆𑀯𑀸 𑀘𑀢𑁆𑀢𑀸𑀭𑁄 𑀧𑀸𑀤𑁂 𑀆𑀓𑀸𑀲𑀕𑀢𑁂 𑀓𑀢𑁆𑀯𑀸 𑀧𑀘𑁆𑀙𑀺𑀦𑁆𑀦𑀕𑀫𑀦𑁄 𑀳𑀼𑀢𑁆𑀯𑀸 𑀅𑀫𑀺𑀢𑁆𑀢𑀯𑀲𑀁 𑀬𑀸𑀢𑀺, 𑀓𑀸𑀓𑀓𑀼𑀮𑀮𑀸𑀤𑀺𑀪𑀢𑁆𑀢𑀫𑁂𑀯 𑀳𑁄𑀢𑀺. 𑀏𑀯𑀫𑁂𑀯 𑀅𑀬𑀁 𑀓𑁄𑀥𑁄 𑀧𑀞𑀫𑀁 𑀉𑀧𑁆𑀧𑀚𑁆𑀚𑀦𑁆𑀢𑁄 𑀘𑀺𑀢𑁆𑀢𑀸𑀯𑀺𑀮𑀫𑀢𑁆𑀢𑀓𑁄𑀯 𑀳𑁄𑀢𑀺. 𑀢𑀲𑁆𑀫𑀺𑀁 𑀔𑀡𑁂 𑀅𑀦𑀺𑀕𑁆𑀕𑀳𑀺𑀢𑁄 𑀯𑀟𑁆𑀠𑀺𑀢𑁆𑀯𑀸 𑀫𑀼𑀔𑀯𑀺𑀓𑀼𑀮𑀦𑀁 𑀧𑀸𑀧𑁂𑀢𑀺. 𑀢𑀤𑀸 𑀅𑀦𑀺𑀕𑁆𑀕𑀳𑀺𑀢𑁄 𑀳𑀦𑀼𑀲𑀜𑁆𑀘𑁄𑀧𑀦𑀁 𑀧𑀸𑀧𑁂𑀢𑀺. 𑀢𑀤𑀸 𑀅𑀦𑀺𑀕𑁆𑀕𑀳𑀺𑀢𑁄 𑀨𑀭𑀼𑀲𑀯𑀸𑀘𑀸𑀦𑀺𑀘𑁆𑀙𑀸𑀭𑀡𑀁 𑀧𑀸𑀧𑁂𑀢𑀺. 𑀢𑀤𑀸 𑀅𑀦𑀺𑀕𑁆𑀕𑀳𑀺𑀢𑁄 𑀤𑀺𑀲𑀸𑀯𑀺𑀮𑁄𑀓𑀦𑀁 𑀧𑀸𑀧𑁂𑀢𑀺. 𑀢𑀤𑀸 𑀅𑀦𑀺𑀕𑁆𑀕𑀳𑀺𑀢𑁄 𑀆𑀓𑀟𑁆𑀠𑀦𑀧𑀭𑀺𑀓𑀟𑁆𑀠𑀦𑀁 𑀧𑀸𑀧𑁂𑀢𑀺. 𑀢𑀤𑀸 𑀅𑀦𑀺𑀕𑁆𑀕𑀳𑀺𑀢𑁄 𑀧𑀸𑀡𑀺𑀦𑀸 𑀮𑁂𑀟𑁆𑀟𑀼𑀤𑀡𑁆𑀟𑀲𑀢𑁆𑀣𑀧𑀭𑀸𑀫𑀲𑀦𑀁 𑀧𑀸𑀧𑁂𑀢𑀺. 𑀢𑀤𑀸 𑀅𑀦𑀺𑀕𑁆𑀕𑀳𑀺𑀢𑁄 𑀤𑀡𑁆𑀟𑀲𑀢𑁆𑀣𑀸𑀪𑀺𑀦𑀺𑀧𑀸𑀢𑀁 𑀧𑀸𑀧𑁂𑀢𑀺. 𑀢𑀤𑀸 𑀅𑀦𑀺𑀕𑁆𑀕𑀳𑀺𑀢𑁄 𑀧𑀭𑀖𑀸𑀢𑀦𑀫𑁆𑀧𑀺 𑀅𑀢𑁆𑀢𑀖𑀸𑀢𑀦𑀫𑁆𑀧𑀺 𑀧𑀸𑀧𑁂𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀳𑁂𑀢𑀁 𑁋 ‘‘𑀬𑀢𑁄 𑀅𑀬𑀁 𑀓𑁄𑀥𑁄 𑀧𑀭𑀁 𑀖𑀸𑀢𑁂𑀢𑁆𑀯𑀸 𑀅𑀢𑁆𑀢𑀸𑀦𑀁 𑀖𑀸𑀢𑁂𑀢𑀺, 𑀏𑀢𑁆𑀢𑀸𑀯𑀢𑀸𑀬𑀁 𑀓𑁄𑀥𑁄 𑀧𑀭𑀫𑀼𑀲𑁆𑀲𑀤𑀕𑀢𑁄 𑀳𑁄𑀢𑀺 𑀧𑀭𑀫𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑁄’’𑀢𑀺. 𑀢𑀢𑁆𑀣 𑀬𑀣𑀸 𑀉𑀤𑁆𑀥𑀼𑀫𑀸𑀬𑀺𑀓𑀸𑀬 𑀘𑀢𑀽𑀲𑀼 𑀧𑀸𑀤𑁂𑀲𑀼 𑀆𑀓𑀸𑀲𑀕𑀢𑁂𑀲𑀼 𑀕𑀫𑀦𑀁 𑀧𑀘𑁆𑀙𑀺𑀚𑁆𑀚𑀢𑀺, 𑀉𑀤𑁆𑀥𑀼𑀫𑀸𑀬𑀺𑀓𑀸 𑀅𑀫𑀺𑀢𑁆𑀢𑀯𑀲𑀁 𑀕𑀦𑁆𑀢𑁆𑀯𑀸 𑀓𑀸𑀓𑀸𑀤𑀺𑀪𑀢𑁆𑀢𑀁 𑀳𑁄𑀢𑀺, 𑀏𑀯𑀫𑁂𑀯 𑀓𑁄𑀥𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑁄 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀯𑀟𑁆𑀠𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀫𑀺𑀢𑁆𑀢𑀯𑀲𑀁 𑀬𑀸𑀢𑀺, 𑀲𑀩𑁆𑀩𑁂𑀲𑀁 𑀫𑀸𑀭𑀸𑀦𑀁 𑀬𑀣𑀸𑀓𑀸𑀫𑀓𑀭𑀡𑀻𑀬𑁄 𑀳𑁄𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀉𑀤𑁆𑀥𑀼𑀫𑀸𑀬𑀺𑀓𑀸𑀢𑀺 𑀔𑁄, 𑀪𑀺𑀓𑁆𑀔𑀼, 𑀓𑁄𑀥𑀽𑀧𑀸𑀬𑀸𑀲𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺. 𑀢𑀢𑁆𑀣 𑀩𑀮𑀯𑀧𑁆𑀧𑀢𑁆𑀢𑁄 𑀓𑁄𑀥𑁄𑀯 𑀓𑁄𑀥𑀽𑀧𑀸𑀬𑀸𑀲𑁄. 𑀧𑀚𑀳 𑀓𑁄𑀥𑀽𑀧𑀸𑀬𑀸𑀲𑀦𑁆𑀢𑀺 𑀏𑀢𑁆𑀣 𑀧𑀝𑀺𑀲𑀗𑁆𑀔𑀸𑀦𑀧𑁆𑀧𑀳𑀸𑀦𑀁 𑀓𑀣𑀺𑀢𑀁.

𑀤𑁆𑀯𑀺𑀥𑀸𑀧𑀣𑁄𑀢𑀺 𑀏𑀢𑁆𑀣, 𑀬𑀣𑀸 𑀧𑀼𑀭𑀺𑀲𑁄 𑀲𑀥𑀦𑁄 𑀲𑀪𑁄𑀕𑁄 𑀓𑀦𑁆𑀢𑀸𑀭𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄 𑀤𑁆𑀯𑁂𑀥𑀸𑀧𑀣𑀁 𑀧𑀢𑁆𑀯𑀸, ‘‘𑀇𑀫𑀺𑀦𑀸 𑀦𑀼 𑀔𑁄 𑀕𑀦𑁆𑀢𑀩𑁆𑀩𑀁, 𑀇𑀫𑀺𑀦𑀸 𑀕𑀦𑁆𑀢𑀩𑁆𑀩’’𑀦𑁆𑀢𑀺 𑀦𑀺𑀘𑁆𑀙𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀢𑀢𑁆𑀣𑁂𑀯 𑀢𑀺𑀝𑁆𑀞𑀢𑀺, 𑀅𑀣 𑀦𑀁 𑀘𑁄𑀭𑀸 𑀉𑀝𑁆𑀞𑀳𑀺𑀢𑁆𑀯𑀸 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑁂𑀦𑁆𑀢𑀺, 𑀏𑀯𑀫𑁂𑀯 𑀔𑁄 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀪𑀺𑀓𑁆𑀔𑀼 𑀩𑀼𑀤𑁆𑀥𑀸𑀤𑀻𑀲𑀼 𑀓𑀗𑁆𑀔𑀸𑀬 𑀉𑀧𑁆𑀧𑀦𑁆𑀦𑀸𑀬 𑀓𑀫𑁆𑀫𑀝𑁆𑀞𑀸𑀦𑀁 𑀯𑀟𑁆𑀠𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀣 𑀦𑀁 𑀓𑀺𑀮𑁂𑀲𑀫𑀸𑀭𑀸𑀤𑀬𑁄 𑀲𑀩𑁆𑀩𑁂 𑀫𑀸𑀭𑀸 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑁂𑀦𑁆𑀢𑀺, 𑀇𑀢𑀺 𑀯𑀺𑀘𑀺𑀓𑀺𑀘𑁆𑀙𑀸 𑀤𑁆𑀯𑁂𑀥𑀸𑀧𑀣𑀲𑀫𑀸 𑀳𑁄𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀤𑁆𑀯𑀺𑀥𑀸𑀧𑀣𑁄𑀢𑀺 𑀔𑁄, 𑀪𑀺𑀓𑁆𑀔𑀼, 𑀯𑀺𑀘𑀺𑀓𑀺𑀘𑁆𑀙𑀸𑀬𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺. 𑀧𑀚𑀳 𑀯𑀺𑀘𑀺𑀓𑀺𑀘𑁆𑀙𑀦𑁆𑀢𑀺 𑀏𑀢𑁆𑀣 𑀓𑀫𑁆𑀫𑀝𑁆𑀞𑀸𑀦𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀯𑀲𑁂𑀦 𑀯𑀺𑀘𑀺𑀓𑀺𑀘𑁆𑀙𑀸𑀧𑀳𑀸𑀦𑀁 𑀓𑀣𑀺𑀢𑀁.

𑀘𑀗𑁆𑀕𑀯𑀸𑀭𑀦𑁆𑀢𑀺 𑀏𑀢𑁆𑀣, 𑀬𑀣𑀸 𑀭𑀚𑀓𑁂𑀳𑀺 𑀔𑀸𑀭𑀧𑀭𑀺𑀲𑁆𑀲𑀸𑀯𑀦𑀫𑁆𑀳𑀺 𑀉𑀤𑀓𑁂 𑀧𑀓𑁆𑀔𑀺𑀢𑁆𑀢𑁂 𑀏𑀓𑁄 𑀉𑀤𑀓𑀖𑀝𑁄 𑀤𑁆𑀯𑁂𑀧𑀺 𑀤𑀲𑀧𑀺 𑀯𑀻𑀲𑀢𑀺𑀧𑀺 𑀖𑀝𑀲𑀢𑀫𑁆𑀧𑀺 𑀧𑀕𑁆𑀖𑀭𑀢𑀺𑀬𑁂𑀯, 𑀧𑀲𑀝𑀫𑀢𑁆𑀢𑀫𑁆𑀧𑀺 𑀉𑀤𑀓𑀁 𑀦 𑀢𑀺𑀝𑁆𑀞𑀢𑀺, 𑀏𑀯𑀫𑁂𑀯 𑀦𑀻𑀯𑀭𑀡𑀲𑀫𑀗𑁆𑀕𑀺𑀦𑁄 𑀧𑀼𑀕𑁆𑀕𑀮𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀓𑀼𑀲𑀮𑀥𑀫𑁆𑀫𑁄 𑀦 𑀢𑀺𑀝𑁆𑀞𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀘𑀗𑁆𑀕𑀯𑀸𑀭𑀦𑁆𑀢𑀺 𑀔𑁄, 𑀪𑀺𑀓𑁆𑀔𑀼, 𑀧𑀜𑁆𑀘𑀦𑁆𑀦𑁂𑀢𑀁 𑀦𑀻𑀯𑀭𑀡𑀸𑀦𑀁 𑀅𑀥𑀺𑀯𑀘𑀦’’𑀦𑁆𑀢𑀺. 𑀧𑀚𑀳 𑀧𑀜𑁆𑀘𑀦𑀻𑀯𑀭𑀡𑁂𑀢𑀺 𑀏𑀢𑁆𑀣 𑀯𑀺𑀓𑁆𑀔𑀫𑁆𑀪𑀦𑀢𑀤𑀗𑁆𑀕𑀯𑀲𑁂𑀦 𑀦𑀻𑀯𑀭𑀡𑀧𑁆𑀧𑀳𑀸𑀦𑀁 𑀓𑀣𑀺𑀢𑀁.

𑀓𑀼𑀫𑁆𑀫𑁄𑀢𑀺 𑀏𑀢𑁆𑀣, 𑀬𑀣𑀸 𑀓𑀘𑁆𑀙𑀧𑀲𑁆𑀲 𑀘𑀢𑁆𑀢𑀸𑀭𑁄 𑀧𑀸𑀤𑀸 𑀲𑀻𑀲𑀦𑁆𑀢𑀺 𑀧𑀜𑁆𑀘𑁂𑀯 𑀅𑀗𑁆𑀕𑀸𑀦𑀺 𑀳𑁄𑀦𑁆𑀢𑀺, 𑀏𑀯𑀫𑁂𑀯 𑀲𑀩𑁆𑀩𑁂𑀧𑀺 𑀲𑀗𑁆𑀔𑀢𑀸 𑀥𑀫𑁆𑀫𑀸 𑀕𑀬𑁆𑀳𑀫𑀸𑀦𑀸 𑀧𑀜𑁆𑀘𑁂𑀯 𑀔𑀦𑁆𑀥𑀸 𑀪𑀯𑀦𑁆𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀓𑀼𑀫𑁆𑀫𑁄𑀢𑀺 𑀔𑁄, 𑀪𑀺𑀓𑁆𑀔𑀼, 𑀧𑀜𑁆𑀘𑀦𑁆𑀦𑁂𑀢𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀅𑀥𑀺𑀯𑀘𑀦’’𑀦𑁆𑀢𑀺. 𑀧𑀚𑀳 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀢𑀺 𑀏𑀢𑁆𑀣 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀁 𑀓𑀣𑀺𑀢𑀁.

𑀅𑀲𑀺𑀲𑀽𑀦𑀸𑀢𑀺 𑀏𑀢𑁆𑀣, 𑀬𑀣𑀸 𑀲𑀽𑀦𑀸𑀬 𑀉𑀧𑀭𑀺 𑀫𑀁𑀲𑀁 𑀞𑀧𑁂𑀢𑁆𑀯𑀸 𑀅𑀲𑀺𑀦𑀸 𑀓𑁄𑀝𑁆𑀝𑁂𑀦𑁆𑀢𑀺, 𑀏𑀯𑀫𑀺𑀫𑁂 𑀲𑀢𑁆𑀢𑀸 𑀯𑀢𑁆𑀣𑀼𑀓𑀸𑀫𑀢𑁆𑀣𑀸𑀬 𑀓𑀺𑀮𑁂𑀲𑀓𑀸𑀫𑁂𑀳𑀺 𑀖𑀸𑀢𑀬𑀫𑀸𑀦𑀸 𑀯𑀢𑁆𑀣𑀼𑀓𑀸𑀫𑀸𑀦𑀁 𑀉𑀧𑀭𑀺 𑀓𑀢𑁆𑀯𑀸 𑀓𑀺𑀮𑁂𑀲𑀓𑀸𑀫𑁂𑀳𑀺 𑀓𑀦𑁆𑀢𑀺𑀢𑀸 𑀓𑁄𑀝𑁆𑀝𑀺𑀢𑀸 𑀘 𑀳𑁄𑀦𑁆𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀅𑀲𑀺𑀲𑀽𑀦𑀸𑀢𑀺 𑀔𑁄, 𑀪𑀺𑀓𑁆𑀔𑀼, 𑀧𑀜𑁆𑀘𑀦𑁆𑀦𑁂𑀢𑀁 𑀓𑀸𑀫𑀕𑀼𑀡𑀸𑀦𑀁 𑀅𑀥𑀺𑀯𑀘𑀦’’𑀦𑁆𑀢𑀺. 𑀧𑀚𑀳 𑀧𑀜𑁆𑀘 𑀓𑀸𑀫𑀕𑀼𑀡𑁂𑀢𑀺 𑀏𑀢𑁆𑀣 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀁 𑀓𑀣𑀺𑀢𑀁.

𑀫𑀁𑀲𑀧𑁂𑀲𑀻𑀢𑀺 𑀔𑁄, 𑀪𑀺𑀓𑁆𑀔𑀽𑀢𑀺 𑀏𑀢𑁆𑀣 𑀅𑀬𑀁 𑀫𑀁𑀲𑀧𑁂𑀲𑀺 𑀦𑀸𑀫 𑀩𑀳𑀼𑀚𑀦𑀧𑀢𑁆𑀣𑀺𑀢𑀸 𑀔𑀢𑁆𑀢𑀺𑀬𑀸𑀤𑀬𑁄 𑀫𑀦𑀼𑀲𑁆𑀲𑀸𑀧𑀺 𑀦𑀁 𑀧𑀢𑁆𑀣𑁂𑀦𑁆𑀢𑀺 𑀓𑀸𑀓𑀸𑀤𑀬𑁄 𑀢𑀺𑀭𑀘𑁆𑀙𑀸𑀦𑀸𑀧𑀺. 𑀇𑀫𑁂 𑀳𑀺 𑀲𑀢𑁆𑀢𑀸 𑀅𑀯𑀺𑀚𑁆𑀚𑀸𑀬 𑀲𑀫𑁆𑀫𑀢𑁆𑀢𑀸 𑀦𑀦𑁆𑀤𑀺𑀭𑀸𑀕𑀁 𑀉𑀧𑀕𑀫𑁆𑀫 𑀯𑀝𑁆𑀝𑀁 𑀯𑀟𑁆𑀠𑁂𑀦𑁆𑀢𑀺. 𑀬𑀣𑀸 𑀯𑀸 𑀫𑀁𑀲𑀧𑁂𑀲𑀺 𑀞𑀧𑀺𑀢𑀞𑀧𑀺𑀢𑀝𑁆𑀞𑀸𑀦𑁂 𑀮𑀕𑁆𑀕𑀢𑀺, 𑀏𑀯𑀫𑀺𑀫𑁂 𑀲𑀢𑁆𑀢𑀸 𑀦𑀦𑁆𑀤𑀺𑀭𑀸𑀕𑀩𑀤𑁆𑀥𑀸 𑀯𑀝𑁆𑀝𑁂 𑀮𑀕𑁆𑀕𑀦𑁆𑀢𑀺, 𑀤𑀼𑀓𑁆𑀔𑀁 𑀧𑀢𑁆𑀯𑀸𑀧𑀺 𑀦 𑀉𑀓𑁆𑀓𑀡𑁆𑀞𑀦𑁆𑀢𑀺, 𑀇𑀢𑀺 𑀦𑀦𑁆𑀤𑀺𑀭𑀸𑀕𑁄 𑀫𑀁𑀲𑀧𑁂𑀲𑀺𑀲𑀤𑀺𑀲𑁄 𑀳𑁄𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀫𑀁𑀲𑀧𑁂𑀲𑀻𑀢𑀺 𑀔𑁄, 𑀪𑀺𑀓𑁆𑀔𑀼, 𑀦𑀦𑁆𑀤𑀺𑀭𑀸𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺. 𑀧𑀚𑀳 𑀦𑀦𑁆𑀤𑀻𑀭𑀸𑀕𑀦𑁆𑀢𑀺 𑀏𑀢𑁆𑀣 𑀘𑀢𑀼𑀢𑁆𑀣𑀫𑀕𑁆𑀕𑁂𑀦 𑀦𑀦𑁆𑀤𑀻𑀭𑀸𑀕𑀧𑁆𑀧𑀳𑀸𑀦𑀁 𑀓𑀣𑀺𑀢𑀁.

𑀦𑀸𑀕𑁄𑀢𑀺 𑀔𑁄, 𑀪𑀺𑀓𑁆𑀔𑀼, 𑀔𑀻𑀡𑀸𑀲𑀯𑀲𑁆𑀲𑁂𑀢𑀁 𑀪𑀺𑀓𑁆𑀔𑀼𑀦𑁄 𑀅𑀥𑀺𑀯𑀘𑀦𑀦𑁆𑀢𑀺 𑀏𑀢𑁆𑀣 𑀬𑁂𑀦𑀢𑁆𑀣𑁂𑀦 𑀔𑀻𑀡𑀸𑀲𑀯𑁄 𑀦𑀸𑀕𑁄𑀢𑀺 𑀯𑀼𑀘𑁆𑀘𑀢𑀺, 𑀲𑁄 𑀅𑀦𑀗𑁆𑀕𑀡𑀲𑀼𑀢𑁆𑀢𑁂 (𑀫. 𑀦𑀺. 𑀅𑀝𑁆𑀞. 𑁧.𑁬𑁩) 𑀧𑀓𑀸𑀲𑀺𑀢𑁄 𑀏𑀯. 𑀦𑀫𑁄 𑀓𑀭𑁄𑀳𑀺 𑀦𑀸𑀕𑀲𑁆𑀲𑀸𑀢𑀺 𑀔𑀻𑀡𑀸𑀲𑀯𑀲𑁆𑀲 𑀩𑀼𑀤𑁆𑀥𑀦𑀸𑀕𑀲𑁆𑀲, ‘‘𑀩𑀼𑀤𑁆𑀥𑁄 𑀲𑁄 𑀪𑀕𑀯𑀸 𑀩𑁄𑀥𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀤𑀦𑁆𑀢𑁄 𑀲𑁄 𑀪𑀕𑀯𑀸 𑀤𑀫𑀣𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀲𑀦𑁆𑀢𑁄 𑀲𑁄 𑀪𑀕𑀯𑀸 𑀲𑀫𑀣𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀢𑀺𑀡𑁆𑀡𑁄 𑀲𑁄 𑀪𑀕𑀯𑀸 𑀢𑀭𑀡𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀧𑀭𑀺𑀦𑀺𑀩𑁆𑀩𑀼𑀢𑁄 𑀲𑁄 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀸𑀦𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀻’’𑀢𑀺 (𑀫. 𑀦𑀺. 𑁧.𑁩𑁬𑁧) 𑀏𑀯𑀁 𑀦𑀫𑀓𑁆𑀓𑀸𑀭𑀁 𑀓𑀭𑁄𑀳𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀇𑀢𑀺 𑀇𑀤𑀁 𑀲𑀼𑀢𑁆𑀢𑀁 𑀣𑁂𑀭𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀁 𑀅𑀳𑁄𑀲𑀺. 𑀣𑁂𑀭𑁄𑀧𑀺 𑀇𑀤𑀫𑁂𑀯 𑀲𑀼𑀢𑁆𑀢𑀁 𑀓𑀫𑁆𑀫𑀝𑁆𑀞𑀸𑀦𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄. 𑀅𑀬𑀫𑁂𑀢𑀲𑁆𑀲 𑀅𑀢𑁆𑀣𑁄𑀢𑀺 𑀅𑀬𑀁 𑀏𑀢𑀲𑁆𑀲 𑀧𑀜𑁆𑀳𑀲𑁆𑀲 𑀅𑀢𑁆𑀣𑁄. 𑀇𑀢𑀺 𑀪𑀕𑀯𑀸 𑀭𑀢𑀦𑀭𑀸𑀲𑀺𑀫𑁆𑀳𑀺 𑀫𑀡𑀺𑀓𑀽𑀝𑀁 𑀕𑀡𑁆𑀳𑀦𑁆𑀢𑁄 𑀯𑀺𑀬 𑀬𑀣𑀸𑀦𑀼𑀲𑀦𑁆𑀥𑀺𑀦𑀸𑀯 𑀤𑁂𑀲𑀦𑀁 𑀦𑀺𑀝𑁆𑀞𑀧𑁂𑀲𑀻𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀯𑀫𑁆𑀫𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.