𑁧𑁨. 𑀭𑀚𑁆𑀚𑀼𑀫𑀸𑀮𑀸𑀯𑀺𑀫𑀸𑀦𑀯𑀡𑁆𑀡𑀦𑀸

𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦𑀸𑀢𑀺 𑀭𑀚𑁆𑀚𑀼𑀫𑀸𑀮𑀸𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂. 𑀢𑁂𑀦 𑀲𑀫𑀬𑁂𑀦 𑀕𑀬𑀸𑀕𑀸𑀫𑀓𑁂 𑀅𑀜𑁆𑀜𑀢𑀭𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀥𑀻𑀢𑀸 𑀢𑀲𑁆𑀫𑀺𑀁𑀬𑁂𑀯 𑀕𑀸𑀫𑁂 𑀏𑀓𑀲𑁆𑀲 𑀩𑁆𑀭𑀸𑀳𑁆𑀫𑀡𑀓𑀼𑀫𑀸𑀭𑀲𑁆𑀲 𑀤𑀺𑀦𑁆𑀦𑀸 𑀧𑀢𑀺𑀓𑀼𑀮𑀁 𑀕𑀢𑀸, 𑀢𑀲𑁆𑀫𑀺𑀁 𑀕𑁂𑀳𑁂 𑀇𑀲𑁆𑀲𑀭𑀺𑀬𑀁 𑀯𑀢𑁆𑀢𑁂𑀦𑁆𑀢𑀻 𑀢𑀺𑀝𑁆𑀞𑀢𑀺. 𑀲𑀸 𑀢𑀲𑁆𑀫𑀺𑀁 𑀕𑁂𑀳𑁂 𑀤𑀸𑀲𑀺𑀬𑀸 𑀥𑀻𑀢𑀭𑀁 𑀤𑀺𑀲𑁆𑀯𑀸 𑀦 𑀲𑀳𑀢𑀺. 𑀤𑀺𑀝𑁆𑀞𑀓𑀸𑀮𑀢𑁄 𑀧𑀝𑁆𑀞𑀸𑀬 𑀓𑁄𑀥𑁂𑀦 𑀢𑀝𑀢𑀝𑀸𑀬𑀫𑀸𑀦𑀸 𑀅𑀓𑁆𑀓𑁄𑀲𑀢𑀺 𑀧𑀭𑀺𑀪𑀸𑀲𑀢𑀺, 𑀔𑀝𑀓𑀜𑁆𑀘𑀲𑁆𑀲𑀸 𑀤𑁂𑀢𑀺. 𑀬𑀤𑀸 𑀧𑀦 𑀲𑀸 𑀯𑀬𑀧𑁆𑀧𑀢𑁆𑀢𑀺𑀬𑀸 𑀓𑀺𑀘𑁆𑀘𑀲𑀫𑀢𑁆𑀣𑀸 𑀚𑀸𑀢𑀸, 𑀢𑀤𑀸 𑀦𑀁 𑀚𑀡𑁆𑀡𑀼𑀓𑀧𑁆𑀧𑀭𑀫𑀼𑀝𑁆𑀞𑀻𑀳𑀺 𑀧𑀳𑀭𑀢𑁂𑀯 𑀬𑀣𑀸 𑀢𑀁 𑀧𑀼𑀭𑀺𑀫𑀚𑀸𑀢𑀻𑀲𑀼 𑀩𑀤𑁆𑀥𑀸𑀖𑀸𑀢𑀸.

𑀲𑀸 𑀓𑀺𑀭 𑀤𑀸𑀲𑀻 𑀓𑀲𑁆𑀲𑀧𑀤𑀲𑀩𑀮𑀲𑁆𑀲 𑀓𑀸𑀮𑁂 𑀢𑀲𑁆𑀲𑀸 𑀲𑀸𑀫𑀺𑀦𑀻 𑀅𑀳𑁄𑀲𑀺, 𑀇𑀢𑀭𑀸 𑀤𑀸𑀲𑀻. 𑀲𑀸 𑀢𑀁 𑀮𑁂𑀟𑁆𑀟𑀼𑀤𑀡𑁆𑀟𑀸𑀤𑀻𑀳𑀺 𑀫𑀼𑀝𑁆𑀞𑀺𑀆𑀤𑀻𑀳𑀺 𑀘 𑀅𑀪𑀺𑀡𑁆𑀳𑀁 𑀅𑀪𑀺𑀳𑀦𑀢𑀺. 𑀲𑀸 𑀢𑁂𑀦 𑀦𑀺𑀩𑁆𑀩𑀺𑀦𑁆𑀦𑀸 𑀬𑀣𑀸𑀩𑀮𑀁 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 ‘‘𑀅𑀦𑀸𑀕𑀢𑁂 𑀅𑀳𑀁 𑀲𑀸𑀫𑀺𑀦𑀻 𑀳𑀼𑀢𑁆𑀯𑀸 𑀇𑀫𑀺𑀲𑁆𑀲𑀸 𑀉𑀧𑀭𑀺 𑀇𑀲𑁆𑀲𑀭𑀺𑀬𑀁 𑀯𑀢𑁆𑀢𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀦𑀁 𑀞𑀧𑁂𑀲𑀺. 𑀅𑀣 𑀲𑀸 𑀤𑀸𑀲𑀻 𑀢𑀢𑁄 𑀘𑀼𑀢𑀸 𑀅𑀧𑀭𑀸𑀧𑀭𑀁 𑀲𑀁𑀲𑀭𑀦𑁆𑀢𑀻 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀯𑀼𑀢𑁆𑀢𑀦𑀬𑁂𑀦 𑀕𑀬𑀸𑀕𑀸𑀫𑀓𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀧𑀢𑀺𑀓𑀼𑀮𑀁 𑀕𑀢𑀸, 𑀇𑀢𑀭𑀸𑀧𑀺 𑀢𑀲𑁆𑀲𑀸 𑀤𑀸𑀲𑀻 𑀅𑀳𑁄𑀲𑀺. 𑀏𑀯𑀁 𑀩𑀤𑁆𑀥𑀸𑀖𑀸𑀢𑀢𑀸𑀬 𑀲𑀸 𑀢𑀁 𑀯𑀺𑀳𑁂𑀞𑁂𑀢𑀺.

𑀏𑀯𑀁 𑀯𑀺𑀳𑁂𑀞𑁂𑀦𑁆𑀢𑀻 𑀅𑀓𑀸𑀭𑀡𑁂𑀦𑁂𑀯 𑀓𑁂𑀲𑁂𑀲𑀼 𑀕𑀳𑁂𑀢𑁆𑀯𑀸 𑀳𑀢𑁆𑀣𑁂𑀳𑀺 𑀘 𑀧𑀸𑀤𑁂𑀳𑀺 𑀘 𑀲𑀼𑀳𑀢𑀁 𑀳𑀦𑀺. 𑀲𑀸 𑀦𑁆𑀳𑀸𑀧𑀺𑀢𑀲𑀸𑀮𑀁 𑀕𑀦𑁆𑀢𑁆𑀯𑀸 𑀔𑀼𑀭𑀫𑀼𑀡𑁆𑀟𑀁 𑀓𑀸𑀭𑁂𑀢𑁆𑀯𑀸 𑀅𑀕𑀫𑀸𑀲𑀺. 𑀲𑀸𑀫𑀺𑀦𑀻 ‘‘𑀓𑀺𑀁 𑀚𑁂 𑀤𑀼𑀝𑁆𑀞𑀤𑀸𑀲𑀺 𑀫𑀼𑀡𑁆𑀟𑀦𑀫𑀢𑁆𑀢𑁂𑀦 𑀢𑀯 𑀯𑀺𑀧𑁆𑀧𑀫𑁄𑀓𑁆𑀔𑁄’’𑀢𑀺 𑀭𑀚𑁆𑀚𑀼𑀁 𑀲𑀻𑀲𑁂 𑀩𑀦𑁆𑀥𑀺𑀢𑁆𑀯𑀸 𑀢𑀢𑁆𑀣 𑀦𑀁 𑀕𑀳𑁂𑀢𑁆𑀯𑀸 𑀑𑀡𑀫𑁂𑀢𑁆𑀯𑀸 𑀖𑀸𑀢𑁂𑀢𑀺, 𑀢𑀲𑁆𑀲𑀸 𑀢𑀜𑁆𑀘 𑀭𑀚𑁆𑀚𑀼𑀁 𑀅𑀧𑀦𑁂𑀢𑀼𑀁 𑀦 𑀤𑁂𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀤𑀸𑀲𑀺𑀬𑀸 ‘‘𑀭𑀚𑁆𑀚𑀼𑀫𑀸𑀮𑀸’’𑀢𑀺 𑀦𑀸𑀫𑀁 𑀅𑀳𑁄𑀲𑀺.

𑀅𑀣𑁂𑀓𑀤𑀺𑀯𑀲𑀁 𑀲𑀢𑁆𑀣𑀸 𑀧𑀘𑁆𑀘𑀽𑀲𑀲𑀫𑀬𑁂 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀭𑀚𑁆𑀚𑀼𑀫𑀸𑀮𑀸𑀬 𑀲𑁄𑀢𑀸𑀧𑀢𑁆𑀢𑀺𑀨𑀮𑀽𑀧𑀦𑀺𑀲𑁆𑀲𑀬𑀁, 𑀢𑀲𑁆𑀲𑀸 𑀘 𑀩𑁆𑀭𑀸𑀳𑁆𑀫𑀡𑀺𑀬𑀸 𑀲𑀭𑀡𑁂𑀲𑀼 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀸𑀦𑀁 𑀤𑀺𑀲𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺 𑀙𑀩𑁆𑀩𑀡𑁆𑀡𑀸 𑀩𑀼𑀤𑁆𑀥𑀭𑀲𑁆𑀫𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄. 𑀭𑀚𑁆𑀚𑀼𑀫𑀸𑀮𑀸𑀧𑀺 𑀔𑁄 𑀤𑀺𑀯𑀲𑁂 𑀤𑀺𑀯𑀲𑁂 𑀢𑀸𑀬 𑀢𑀣𑀸 𑀯𑀺𑀳𑁂𑀞𑀺𑀬𑀫𑀸𑀦𑀸 ‘‘𑀓𑀺𑀁 𑀫𑁂 𑀇𑀫𑀺𑀦𑀸 𑀤𑀼𑀚𑁆𑀚𑀻𑀯𑀺𑀢𑁂𑀦𑀸’’𑀢𑀺 𑀦𑀺𑀩𑁆𑀩𑀺𑀦𑁆𑀦𑀭𑀽𑀧𑀸 𑀚𑀻𑀯𑀺𑀢𑁂 𑀫𑀭𑀺𑀢𑀼𑀓𑀸𑀫𑀸 𑀖𑀝𑀁 𑀕𑀳𑁂𑀢𑁆𑀯𑀸 𑀉𑀤𑀓𑀢𑀺𑀢𑁆𑀣𑀁 𑀕𑀘𑁆𑀙𑀦𑁆𑀢𑀻 𑀯𑀺𑀬 𑀕𑁂𑀳𑀢𑁄 𑀦𑀺𑀓𑁆𑀔𑀦𑁆𑀢𑀸 𑀅𑀦𑀼𑀓𑁆𑀓𑀫𑁂𑀦 𑀯𑀦𑀁 𑀧𑀯𑀺𑀲𑀺𑀢𑁆𑀯𑀸 𑀪𑀕𑀯𑀢𑁄 𑀦𑀺𑀲𑀺𑀦𑁆𑀦𑀭𑀼𑀓𑁆𑀔𑀲𑁆𑀲 𑀅𑀯𑀺𑀤𑀽𑀭𑁂 𑀅𑀜𑁆𑀜𑀢𑀭𑀲𑁆𑀲 𑀭𑀼𑀓𑁆𑀔𑀲𑁆𑀲 𑀲𑀸𑀔𑀸𑀬 𑀭𑀚𑁆𑀚𑀼𑀁 𑀩𑀦𑁆𑀥𑀺𑀢𑁆𑀯𑀸 𑀧𑀸𑀲𑀁 𑀓𑀢𑁆𑀯𑀸 𑀉𑀩𑁆𑀩𑀦𑁆𑀥𑀺𑀢𑀼𑀓𑀸𑀫𑀸 𑀇𑀢𑁄 𑀘𑀺𑀢𑁄 𑀘 𑀑𑀮𑁄𑀓𑁂𑀦𑁆𑀢𑀻 𑀅𑀤𑁆𑀤𑀲 𑀪𑀕𑀯𑀦𑁆𑀢𑀁 𑀢𑀢𑁆𑀣 𑀦𑀺𑀲𑀺𑀦𑁆𑀦𑀁 𑀧𑀸𑀲𑀸𑀤𑀺𑀓𑀁 𑀧𑀲𑀸𑀤𑀦𑀻𑀬𑀁 𑀉𑀢𑁆𑀢𑀫𑀤𑀫𑀣𑀲𑀫𑀣𑀫𑀦𑀼𑀧𑁆𑀧𑀢𑁆𑀢𑀁 𑀙𑀩𑁆𑀩𑀡𑁆𑀡𑀩𑀼𑀤𑁆𑀥𑀭𑀲𑁆𑀫𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀁. 𑀤𑀺𑀲𑁆𑀯𑀸 𑀩𑀼𑀤𑁆𑀥𑀕𑀸𑀭𑀯𑁂𑀦 𑀆𑀓𑀟𑁆𑀠𑀺𑀬𑀫𑀸𑀦𑀳𑀤𑀬𑀸 ‘‘𑀓𑀺𑀁 𑀦𑀼 𑀔𑁄 𑀪𑀕𑀯𑀸 𑀫𑀸𑀤𑀺𑀲𑀸𑀦𑀫𑁆𑀧𑀺 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀬𑀫𑀳𑀁 𑀲𑀼𑀢𑁆𑀯𑀸 𑀇𑀢𑁄 𑀤𑀼𑀚𑁆𑀚𑀻𑀯𑀺𑀢𑀢𑁄 𑀫𑀼𑀘𑁆𑀘𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀲𑀺.

𑀅𑀣 𑀪𑀕𑀯𑀸 𑀢𑀲𑁆𑀲𑀸 𑀘𑀺𑀢𑁆𑀢𑀸𑀘𑀸𑀭𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀭𑀚𑁆𑀚𑀼𑀫𑀸𑀮𑁂’’𑀢𑀺 𑀆𑀳. 𑀲𑀸 𑀢𑀁 𑀲𑀼𑀢𑁆𑀯𑀸 𑀅𑀫𑀢𑁂𑀦 𑀯𑀺𑀬 𑀅𑀪𑀺𑀲𑀺𑀢𑁆𑀢𑀸 𑀧𑀻𑀢𑀺𑀬𑀸 𑀦𑀺𑀭𑀦𑁆𑀢𑀭𑀁 𑀨𑀼𑀝𑁆𑀞𑀸 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀢𑀲𑁆𑀲𑀸 𑀪𑀕𑀯𑀸 𑀅𑀦𑀼𑀧𑀼𑀩𑁆𑀩𑀺𑀓𑀣𑀸𑀦𑀼𑀧𑀼𑀩𑁆𑀩𑀓𑀁 𑀘𑀢𑀼𑀲𑀘𑁆𑀘𑀓𑀣𑀁 𑀓𑀣𑁂𑀲𑀺, 𑀲𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀲𑀢𑁆𑀣𑀸 ‘‘𑀯𑀝𑁆𑀝𑀢𑀺 𑀏𑀢𑁆𑀢𑀓𑁄 𑀭𑀚𑁆𑀚𑀼𑀫𑀸𑀮𑀸𑀬 𑀅𑀦𑀼𑀕𑁆𑀕𑀳𑁄, 𑀇𑀤𑀸𑀦𑁂𑀲𑀸 𑀓𑁂𑀦𑀘𑀺 𑀅𑀧𑁆𑀧𑀥𑀁𑀲𑀺𑀬𑀸 𑀚𑀸𑀢𑀸’’𑀢𑀺 𑀅𑀭𑀜𑁆𑀜𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀸𑀫𑀲𑁆𑀲 𑀅𑀯𑀺𑀤𑀽𑀭𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺. 𑀭𑀚𑁆𑀚𑀼𑀫𑀸𑀮𑀸𑀧𑀺 𑀅𑀢𑁆𑀢𑀸𑀦𑀁 𑀯𑀺𑀦𑀺𑀧𑀸𑀢𑁂𑀢𑀼𑀁 𑀅𑀪𑀩𑁆𑀩𑀢𑀸𑀬 𑀔𑀦𑁆𑀢𑀺𑀫𑁂𑀢𑁆𑀢𑀸𑀦𑀼𑀤𑁆𑀤𑀬𑀲𑀫𑁆𑀧𑀦𑁆𑀦𑀢𑀸𑀬 𑀘 ‘‘𑀩𑁆𑀭𑀸𑀳𑁆𑀫𑀡𑀻 𑀫𑀁 𑀳𑀦𑀢𑀼 𑀯𑀸 𑀯𑀺𑀳𑁂𑀞𑁂𑀢𑀼 𑀯𑀸 𑀬𑀁 𑀯𑀸 𑀢𑀁 𑀯𑀸 𑀓𑀭𑁄𑀢𑀽’’𑀢𑀺 𑀖𑀝𑁂𑀦 𑀉𑀤𑀓𑀁 𑀕𑀳𑁂𑀢𑁆𑀯𑀸 𑀕𑁂𑀳𑀁 𑀅𑀕𑀫𑀸𑀲𑀺. 𑀲𑀸𑀫𑀺𑀓𑁄 𑀕𑁂𑀳𑀤𑁆𑀯𑀸𑀭𑁂 𑀞𑀺𑀢𑁄 𑀢𑀁 𑀤𑀺𑀲𑁆𑀯𑀸 ‘‘𑀢𑁆𑀯𑀁 𑀅𑀚𑁆𑀚 𑀉𑀤𑀓𑀢𑀺𑀢𑁆𑀣𑀁 𑀕𑀢𑀸 𑀘𑀺𑀭𑀸𑀬𑀺𑀢𑁆𑀯𑀸 𑀆𑀕𑀢𑀸, 𑀫𑀼𑀔𑀯𑀡𑁆𑀡𑁄 𑀘 𑀢𑁂 𑀅𑀢𑀺𑀯𑀺𑀬 𑀯𑀺𑀧𑁆𑀧𑀲𑀦𑁆𑀦𑁄, 𑀢𑁆𑀯𑀜𑁆𑀘 𑀅𑀜𑁆𑀜𑁂𑀦 𑀆𑀓𑀸𑀭𑁂𑀦 𑀉𑀧𑀝𑁆𑀞𑀸𑀲𑀺, 𑀓𑀺𑀁 𑀏𑀢’’𑀦𑁆𑀢𑀺 𑀧𑀼𑀘𑁆𑀙𑀺. 𑀲𑀸 𑀢𑀲𑁆𑀲 𑀢𑀁 𑀧𑀯𑀢𑁆𑀢𑀺𑀁 𑀆𑀘𑀺𑀓𑁆𑀔𑀺.

𑀩𑁆𑀭𑀸𑀳𑁆𑀫𑀡𑁄 𑀢𑀲𑁆𑀲𑀸 𑀯𑀘𑀦𑀁 𑀲𑀼𑀢𑁆𑀯𑀸 𑀢𑀼𑀲𑁆𑀲𑀺𑀢𑁆𑀯𑀸 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀭𑀚𑁆𑀚𑀼𑀫𑀸𑀮𑀸𑀬 𑀉𑀧𑀭𑀺 ‘‘𑀢𑀬𑀸 𑀦 𑀓𑀺𑀜𑁆𑀘𑀺 𑀓𑀸𑀢𑀩𑁆𑀩’’𑀦𑁆𑀢𑀺 𑀲𑀼𑀡𑀺𑀲𑀸𑀬 𑀯𑀢𑁆𑀯𑀸 𑀢𑀼𑀝𑁆𑀞𑀫𑀸𑀦𑀲𑁄 𑀲𑀻𑀖𑀢𑀭𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀲𑀸𑀤𑀭𑁂𑀦 𑀓𑀢𑀧𑀝𑀺𑀲𑀦𑁆𑀣𑀸𑀭𑁄 𑀲𑀢𑁆𑀣𑀸𑀭𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀅𑀢𑁆𑀢𑀦𑁄 𑀕𑁂𑀳𑀁 𑀆𑀦𑁂𑀢𑁆𑀯𑀸 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀧𑀭𑀺𑀯𑀺𑀲𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀪𑀼𑀢𑁆𑀢𑀸𑀯𑀺𑀁 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺, 𑀲𑀼𑀡𑀺𑀲𑀸𑀧𑀺𑀲𑁆𑀲 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀕𑀬𑀸𑀕𑀸𑀫𑀯𑀸𑀲𑀺𑀦𑁄𑀧𑀺 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀧𑁆𑀧𑁂𑀓𑀘𑁆𑀘𑁂 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼, 𑀅𑀧𑁆𑀧𑁂𑀓𑀘𑁆𑀘𑁂 𑀲𑀫𑁆𑀫𑁄𑀤𑀦𑀻𑀬𑀁 𑀓𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼.

𑀲𑀢𑁆𑀣𑀸 𑀭𑀚𑁆𑀚𑀼𑀫𑀸𑀮𑀸𑀬 𑀢𑀲𑁆𑀲𑀸 𑀘 𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀼𑀭𑀺𑀫𑀚𑀸𑀢𑀻𑀲𑀼 𑀓𑀢𑀓𑀫𑁆𑀫𑀁 𑀯𑀺𑀢𑁆𑀣𑀸𑀭𑀢𑁄 𑀓𑀣𑁂𑀢𑁆𑀯𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀅𑀦𑀼𑀭𑀽𑀧𑀁 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀻 𑀘 𑀫𑀳𑀸𑀚𑀦𑁄 𑀘 𑀢𑀢𑁆𑀣 𑀲𑀦𑁆𑀦𑀺𑀧𑀢𑀺𑀢𑁄 𑀲𑀭𑀡𑁂𑀲𑀼 𑀘 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀳𑀺. 𑀲𑀢𑁆𑀣𑀸 𑀆𑀲𑀦𑀸 𑀉𑀝𑁆𑀞𑀳𑀺𑀢𑁆𑀯𑀸 𑀲𑀸𑀯𑀢𑁆𑀣𑀺𑀫𑁂𑀯 𑀅𑀕𑀫𑀸𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀭𑀚𑁆𑀚𑀼𑀫𑀸𑀮𑀁 𑀥𑀻𑀢𑀼𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀢𑀲𑁆𑀲 𑀲𑀼𑀡𑀺𑀲𑀸 𑀭𑀚𑁆𑀚𑀼𑀫𑀸𑀮𑀁 𑀧𑀺𑀬𑀘𑀓𑁆𑀔𑀽𑀳𑀺 𑀑𑀮𑁄𑀓𑁂𑀦𑁆𑀢𑀻 𑀬𑀸𑀯𑀚𑀻𑀯𑀁 𑀫𑀦𑀸𑀧𑁂𑀦𑁂𑀯 𑀲𑀺𑀦𑁂𑀳𑁂𑀦 𑀧𑀭𑀺𑀳𑀭𑀺. 𑀭𑀚𑁆𑀚𑀼𑀫𑀸𑀮𑀸 𑀅𑀧𑀭𑀪𑀸𑀕𑁂 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑁂𑀲𑀼 𑀦𑀺𑀩𑁆𑀩𑀢𑁆𑀢𑀺, 𑀅𑀘𑁆𑀙𑀭𑀸𑀲𑀳𑀲𑁆𑀲𑀜𑁆𑀘𑀲𑁆𑀲𑀸 𑀧𑀭𑀺𑀯𑀸𑀭𑁄 𑀅𑀳𑁄𑀲𑀺. 𑀲𑀸 𑀲𑀝𑁆𑀞𑀺𑀲𑀓𑀝𑀪𑀸𑀭𑀧𑁆𑀧𑀫𑀸𑀡𑁂𑀳𑀺 𑀤𑀺𑀩𑁆𑀩𑀸𑀪𑀭𑀡𑁂𑀳𑀺 𑀧𑀝𑀺𑀫𑀡𑁆𑀟𑀺𑀢𑀢𑁆𑀢𑀪𑀸𑀯𑀸 𑀅𑀘𑁆𑀙𑀭𑀸𑀲𑀳𑀲𑁆𑀲𑀧𑀭𑀺𑀯𑀼𑀢𑁆𑀢𑀸 𑀦𑀦𑁆𑀤𑀦𑀯𑀦𑀸𑀤𑀻𑀲𑀼 𑀫𑀳𑀢𑀺𑀁 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀫𑀸𑀦𑀸 𑀧𑀫𑀼𑀤𑀺𑀢𑀫𑀦𑀸 𑀯𑀺𑀘𑀭𑀢𑀺. 𑀅𑀣𑀸𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀤𑁂𑀯𑀘𑀸𑀭𑀺𑀓𑀁 𑀕𑀢𑁄 𑀢𑀁 𑀫𑀳𑀦𑁆𑀢𑁂𑀦 𑀤𑀺𑀩𑁆𑀩𑀸𑀦𑀼𑀪𑀸𑀯𑁂𑀦 𑀫𑀳𑀢𑀺𑀬𑀸 𑀤𑁂𑀯𑀺𑀤𑁆𑀥𑀺𑀬𑀸 𑀯𑀺𑀚𑁆𑀚𑁄𑀢𑀫𑀸𑀦𑀁 𑀤𑀺𑀲𑁆𑀯𑀸 𑀢𑀸𑀬 𑀓𑀢𑀓𑀫𑁆𑀫𑀁 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀧𑀼𑀘𑁆𑀙𑀺.

𑁮𑁨𑁬. ‘‘𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦, 𑀬𑀸 𑀢𑁆𑀯𑀁 𑀢𑀺𑀝𑁆𑀞𑀲𑀺 𑀤𑁂𑀯𑀢𑁂;

𑀳𑀢𑁆𑀣𑁂 𑀧𑀸𑀤𑁂 𑀘 𑀯𑀺𑀕𑁆𑀕𑀬𑁆𑀳, 𑀦𑀘𑁆𑀘𑀲𑀺 𑀲𑀼𑀧𑁆𑀧𑀯𑀸𑀤𑀺𑀢𑁂.

𑁮𑁨𑁭. ‘‘𑀢𑀲𑁆𑀲𑀸 𑀢𑁂 𑀦𑀘𑁆𑀘𑀫𑀸𑀦𑀸𑀬, 𑀅𑀗𑁆𑀕𑀫𑀗𑁆𑀕𑁂𑀳𑀺 𑀲𑀩𑁆𑀩𑀲𑁄;

𑀤𑀺𑀩𑁆𑀩𑀸 𑀲𑀤𑁆𑀤𑀸 𑀦𑀺𑀘𑁆𑀙𑀭𑀦𑁆𑀢𑀺, 𑀲𑀯𑀦𑀻𑀬𑀸 𑀫𑀦𑁄𑀭𑀫𑀸.

𑁮𑁨𑁮. ‘‘𑀢𑀲𑁆𑀲𑀸 𑀢𑁂 𑀦𑀘𑁆𑀘𑀫𑀸𑀦𑀸𑀬, 𑀅𑀗𑁆𑀕𑀫𑀗𑁆𑀕𑁂𑀳𑀺 𑀲𑀩𑁆𑀩𑀲𑁄;

𑀤𑀺𑀩𑁆𑀩𑀸 𑀕𑀦𑁆𑀥𑀸 𑀧𑀯𑀸𑀬𑀦𑁆𑀢𑀺, 𑀲𑀼𑀘𑀺𑀕𑀦𑁆𑀥𑀸 𑀫𑀦𑁄𑀭𑀫𑀸.

𑁮𑁨𑁯. ‘‘𑀯𑀺𑀯𑀢𑁆𑀢𑀫𑀸𑀦𑀸 𑀓𑀸𑀬𑁂𑀦, 𑀬𑀸 𑀯𑁂𑀡𑀻𑀲𑀼 𑀧𑀺𑀴𑀦𑁆𑀥𑀦𑀸;

𑀢𑁂𑀲𑀁 𑀲𑀼𑀬𑁆𑀬𑀢𑀺 𑀦𑀺𑀕𑁆𑀖𑁄𑀲𑁄, 𑀢𑀽𑀭𑀺𑀬𑁂 𑀧𑀜𑁆𑀘𑀗𑁆𑀕𑀺𑀓𑁂 𑀬𑀣𑀸.

𑁮𑁩𑁦. ‘‘𑀯𑀝𑀁𑀲𑀓𑀸 𑀯𑀸𑀢𑀥𑀼𑀢𑀸, 𑀯𑀸𑀢𑁂𑀦 𑀲𑀫𑁆𑀧𑀓𑀫𑁆𑀧𑀺𑀢𑀸;

𑀢𑁂𑀲𑀁 𑀲𑀼𑀬𑁆𑀬𑀢𑀺 𑀦𑀺𑀕𑁆𑀖𑁄𑀲𑁄, 𑀢𑀽𑀭𑀺𑀬𑁂 𑀧𑀜𑁆𑀘𑀗𑁆𑀕𑀺𑀓𑁂 𑀬𑀣𑀸.

𑁮𑁩𑁧. ‘‘𑀬𑀸𑀧𑀺 𑀢𑁂 𑀲𑀺𑀭𑀲𑁆𑀫𑀺𑀁 𑀫𑀸𑀮𑀸, 𑀲𑀼𑀘𑀺𑀕𑀦𑁆𑀥𑀸 𑀫𑀦𑁄𑀭𑀫𑀸;

𑀯𑀸𑀢𑀺 𑀕𑀦𑁆𑀥𑁄 𑀤𑀺𑀲𑀸 𑀲𑀩𑁆𑀩𑀸, 𑀭𑀼𑀓𑁆𑀔𑁄 𑀫𑀜𑁆𑀚𑀽𑀲𑀓𑁄 𑀬𑀣𑀸.

𑁮𑁩𑁨. ‘‘𑀖𑀸𑀬𑀲𑁂 𑀢𑀁 𑀲𑀼𑀘𑀺𑀕𑀦𑁆𑀥𑀁, 𑀭𑀽𑀧𑀁 𑀧𑀲𑁆𑀲𑀲𑀺 𑀅𑀫𑀸𑀦𑀼𑀲𑀁;

𑀤𑁂𑀯𑀢𑁂 𑀧𑀼𑀘𑁆𑀙𑀺𑀢𑀸𑀘𑀺𑀓𑁆𑀔, 𑀓𑀺𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮’’𑀦𑁆𑀢𑀺.

𑁮𑁨𑁬. 𑀢𑀢𑁆𑀣 𑀳𑀢𑁆𑀣𑁂 𑀧𑀸𑀤𑁂 𑀘 𑀯𑀺𑀕𑁆𑀕𑀬𑁆𑀳𑀸𑀢𑀺 𑀳𑀢𑁆𑀣𑁂 𑀘 𑀧𑀸𑀤𑁂 𑀘 𑀯𑀺𑀯𑀺𑀥𑁂𑀳𑀺 𑀆𑀓𑀸𑀭𑁂𑀳𑀺 𑀕𑀳𑁂𑀢𑁆𑀯𑀸, 𑀧𑀼𑀧𑁆𑀨𑀫𑀼𑀝𑁆𑀞𑀺𑀧𑀼𑀧𑁆𑀨𑀜𑁆𑀚𑀮𑀺𑀆𑀤𑀺𑀪𑁂𑀤𑀲𑁆𑀲 𑀲𑀸𑀔𑀸𑀪𑀺𑀦𑀬𑀲𑁆𑀲 𑀤𑀲𑁆𑀲𑀦𑀯𑀲𑁂𑀦 𑀯𑀺𑀯𑀺𑀥𑁂𑀳𑀺 𑀆𑀓𑀸𑀭𑁂𑀳𑀺 𑀳𑀢𑁆𑀣𑁂, 𑀘, 𑀲𑀫𑀧𑀸𑀤𑀸𑀤𑀻𑀦𑀫𑁆𑀧𑀺 𑀞𑀸𑀦𑀯𑀺𑀲𑁂𑀲𑀸𑀦𑀁 𑀤𑀲𑁆𑀲𑀦𑀯𑀲𑁂𑀦 𑀯𑀺𑀯𑀺𑀥𑁂𑀳𑀺 𑀆𑀓𑀸𑀭𑁂𑀳𑀺 𑀧𑀸𑀤𑁂 𑀘 𑀉𑀧𑀸𑀤𑀺𑀬𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀘-𑀲𑀤𑁆𑀤𑁂𑀦 𑀲𑀸𑀔𑀸𑀪𑀺𑀦𑀬𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀦𑀘𑁆𑀘𑀲𑀻𑀢𑀺 𑀦𑀝𑀲𑀺. 𑀬𑀸 𑀢𑁆𑀯𑀦𑁆𑀢𑀺 𑀬𑀸 𑀯𑀼𑀢𑁆𑀢𑀦𑀬𑀯𑀲𑁂𑀦 𑀦𑀘𑁆𑀘𑀁 𑀓𑀭𑁄𑀲𑀻𑀢𑀺 𑀅𑀢𑁆𑀣𑁄. 𑀲𑀼𑀧𑁆𑀧𑀯𑀸𑀤𑀺𑀢𑁂𑀢𑀺 𑀲𑀼𑀦𑁆𑀤𑀭𑁂 𑀧𑀯𑀚𑁆𑀚𑀦𑁂 𑀲𑀢𑀺 𑀢𑀯 𑀦𑀘𑁆𑀘𑀲𑁆𑀲 𑀅𑀦𑀼𑀭𑀽𑀧𑀯𑀲𑁂𑀦 𑀯𑀻𑀡𑀸𑀯𑀁𑀲𑀫𑀼𑀤𑀺𑀗𑁆𑀕𑀢𑀸𑀴𑀸𑀤𑀺𑀓𑁂 𑀯𑀸𑀤𑀺𑀬𑀫𑀸𑀦𑁂, 𑀧𑀜𑁆𑀘𑀗𑁆𑀕𑀺𑀓𑁂 𑀢𑀽𑀭𑀺𑀬𑁂 𑀧𑀕𑁆𑀕𑀬𑁆𑀳𑀫𑀸𑀦𑁂𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀳𑁂𑀝𑁆𑀞𑀸𑀯𑀺𑀫𑀸𑀦𑁂 𑀯𑀼𑀢𑁆𑀢𑀦𑀬𑀫𑁂𑀯.

𑀏𑀯𑀁 𑀣𑁂𑀭𑁂𑀦 𑀧𑀼𑀘𑁆𑀙𑀺𑀢𑀸 𑀲𑀸 𑀤𑁂𑀯𑀢𑀸 𑀅𑀢𑁆𑀢𑀦𑁄 𑀧𑀼𑀭𑀺𑀫𑀚𑀸𑀢𑀺𑀆𑀤𑀺𑀁 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀩𑁆𑀬𑀸𑀓𑀸𑀲𑀺 𑁋

𑁮𑁩𑁩. ‘‘𑀤𑀸𑀲𑀻 𑀅𑀳𑀁 𑀧𑀼𑀭𑁂 𑀆𑀲𑀺𑀁, 𑀕𑀬𑀸𑀬𑀁 𑀩𑁆𑀭𑀸𑀳𑁆𑀫𑀡𑀲𑁆𑀲𑀳𑀁;

𑀅𑀧𑁆𑀧𑀧𑀼𑀜𑁆𑀜𑀸 𑀅𑀮𑀓𑁆𑀔𑀺𑀓𑀸, 𑀭𑀚𑁆𑀚𑀼𑀫𑀸𑀮𑀸𑀢𑀺 𑀫𑀁 𑀯𑀺𑀤𑀼𑀁.

𑁮𑁩𑁪. ‘‘𑀅𑀓𑁆𑀓𑁄𑀲𑀸𑀦𑀁 𑀯𑀥𑀸𑀦𑀜𑁆𑀘, 𑀢𑀚𑁆𑀚𑀦𑀸𑀬 𑀘 𑀉𑀕𑁆𑀕𑀢𑀸;

𑀓𑀼𑀝𑀁 𑀕𑀳𑁂𑀢𑁆𑀯𑀸 𑀦𑀺𑀓𑁆𑀔𑀫𑁆𑀫, 𑀅𑀕𑀜𑁆𑀙𑀺𑀁 𑀉𑀤𑀳𑀸𑀭𑀺𑀬𑀸.

𑁮𑁩𑁫. ‘‘𑀯𑀺𑀧𑀣𑁂 𑀓𑀼𑀝𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸, 𑀯𑀦𑀲𑀡𑁆𑀟𑀁 𑀉𑀧𑀸𑀕𑀫𑀺𑀁;

‘𑀇𑀥𑁂𑀯𑀸𑀳𑀁 𑀫𑀭𑀺𑀲𑁆𑀲𑀸𑀫𑀺, 𑀓𑁄 𑀅𑀢𑁆𑀣𑁄 𑀚𑀻𑀯𑀺𑀢𑁂𑀦 𑀫𑁂’.

𑁮𑁩𑁬. ‘‘𑀤𑀴𑁆𑀳𑀁 𑀧𑀸𑀲𑀁 𑀓𑀭𑀺𑀢𑁆𑀯𑀸𑀦, 𑀆𑀲𑀼𑀫𑁆𑀪𑀺𑀢𑁆𑀯𑀸𑀦 𑀧𑀸𑀤𑀧𑁂;

𑀢𑀢𑁄 𑀤𑀺𑀲𑀸 𑀯𑀺𑀮𑁄𑀓𑁂𑀲𑀺𑀁, ‘𑀓𑁄 𑀦𑀼 𑀔𑁄 𑀯𑀦𑀫𑀲𑁆𑀲𑀺𑀢𑁄’.

𑁮𑁩𑁭. ‘‘𑀢𑀢𑁆𑀣𑀤𑁆𑀤𑀲𑀸𑀲𑀺𑀁 𑀲𑀫𑁆𑀩𑀼𑀤𑁆𑀥𑀁, 𑀲𑀩𑁆𑀩𑀮𑁄𑀓𑀳𑀺𑀢𑀁 𑀫𑀼𑀦𑀺𑀁;

𑀦𑀺𑀲𑀺𑀦𑁆𑀦𑀁 𑀭𑀼𑀓𑁆𑀔𑀫𑀽𑀮𑀲𑁆𑀫𑀺𑀁, 𑀛𑀸𑀬𑀦𑁆𑀢𑀁 𑀅𑀓𑀼𑀢𑁄𑀪𑀬𑀁.

𑁮𑁩𑁮. ‘‘𑀢𑀲𑁆𑀲𑀸 𑀫𑁂 𑀅𑀳𑀼 𑀲𑀁𑀯𑁂𑀕𑁄, 𑀅𑀩𑁆𑀪𑀼𑀢𑁄 𑀮𑁄𑀫𑀳𑀁𑀲𑀦𑁄;

‘𑀓𑁄 𑀦𑀼 𑀔𑁄 𑀯𑀦𑀫𑀲𑁆𑀲𑀺𑀢𑁄, 𑀫𑀦𑀼𑀲𑁆𑀲𑁄 𑀉𑀤𑀸𑀳𑀼 𑀤𑁂𑀯𑀢𑀸’.

𑁮𑁩𑁯. ‘‘𑀧𑀸𑀲𑀸𑀤𑀺𑀓𑀁 𑀧𑀲𑀸𑀤𑀦𑀻𑀬𑀁, 𑀯𑀦𑀸 𑀦𑀺𑀩𑁆𑀩𑀦𑀫𑀸𑀕𑀢𑀁;

𑀤𑀺𑀲𑁆𑀯𑀸 𑀫𑀦𑁄 𑀫𑁂 𑀧𑀲𑀻𑀤𑀺, 𑀦𑀸𑀬𑀁 𑀬𑀸𑀤𑀺𑀲𑀓𑀻𑀤𑀺𑀲𑁄.

𑁮𑁪𑁦. ‘‘𑀕𑀼𑀢𑁆𑀢𑀺𑀦𑁆𑀤𑁆𑀭𑀺𑀬𑁄 𑀛𑀸𑀦𑀭𑀢𑁄, 𑀅𑀩𑀳𑀺𑀕𑁆𑀕𑀢𑀫𑀸𑀦𑀲𑁄;

𑀳𑀺𑀢𑁄 𑀲𑀩𑁆𑀩𑀲𑁆𑀲 𑀮𑁄𑀓𑀲𑁆𑀲, 𑀩𑀼𑀤𑁆𑀥𑁄 𑀅𑀬𑀁 𑀪𑀯𑀺𑀲𑁆𑀲𑀢𑀺.

𑁮𑁪𑁧. ‘‘𑀪𑀬𑀪𑁂𑀭𑀯𑁄 𑀤𑀼𑀭𑀸𑀲𑀤𑁄, 𑀲𑀻𑀳𑁄𑀯 𑀕𑀼𑀳𑀫𑀲𑁆𑀲𑀺𑀢𑁄;

𑀤𑀼𑀮𑁆𑀮𑀪𑀸𑀬𑀁 𑀤𑀲𑁆𑀲𑀦𑀸𑀬, 𑀧𑀼𑀧𑁆𑀨𑀁 𑀑𑀤𑀼𑀫𑁆𑀩𑀭𑀁 𑀬𑀣𑀸.

𑁮𑁪𑁨. ‘‘𑀲𑁄 𑀫𑀁 𑀫𑀼𑀤𑀽𑀳𑀺 𑀯𑀸𑀘𑀸𑀳𑀺, 𑀆𑀮𑀧𑀺𑀢𑁆𑀯𑀸 𑀢𑀣𑀸𑀕𑀢𑁄;

𑀭𑀚𑁆𑀚𑀼𑀫𑀸𑀮𑁂𑀢𑀺 𑀫𑀁𑀯𑁄𑀘, 𑀲𑀭𑀡𑀁 𑀕𑀘𑁆𑀙 𑀢𑀣𑀸𑀕𑀢𑀁.

𑁮𑁪𑁩. ‘‘𑀢𑀸𑀳𑀁 𑀕𑀺𑀭𑀁 𑀲𑀼𑀡𑀺𑀢𑁆𑀯𑀸𑀦, 𑀦𑁂𑀮𑀁 𑀅𑀢𑁆𑀣𑀯𑀢𑀺𑀁 𑀲𑀼𑀘𑀺𑀁;

𑀲𑀡𑁆𑀳𑀁 𑀫𑀼𑀤𑀼𑀜𑁆𑀘 𑀯𑀕𑁆𑀕𑀼𑀜𑁆𑀘, 𑀲𑀩𑁆𑀩𑀲𑁄𑀓𑀸𑀧𑀦𑀽𑀤𑀦𑀁.

𑁮𑁪𑁪. ‘‘𑀓𑀮𑁆𑀮𑀘𑀺𑀢𑁆𑀢𑀜𑁆𑀘 𑀫𑀁 𑀜𑀢𑁆𑀯𑀸, 𑀧𑀲𑀦𑁆𑀦𑀁 𑀲𑀼𑀤𑁆𑀥𑀫𑀸𑀦𑀲𑀁;

𑀳𑀺𑀢𑁄 𑀲𑀩𑁆𑀩𑀲𑁆𑀲 𑀮𑁄𑀓𑀲𑁆𑀲, 𑀅𑀦𑀼𑀲𑀸𑀲𑀺 𑀢𑀣𑀸𑀕𑀢𑁄.

𑁮𑁪𑁫. ‘‘𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀫𑀁𑀯𑁄𑀘, 𑀅𑀬𑀁 𑀤𑀼𑀓𑁆𑀔𑀲𑁆𑀲 𑀲𑀫𑁆𑀪𑀯𑁄;

𑀤𑀼𑀓𑁆𑀔𑀦𑀺𑀭𑁄𑀥𑁄 𑀫𑀕𑁆𑀕𑁄 𑀘, 𑀅𑀜𑁆𑀚𑀲𑁄 𑀅𑀫𑀢𑁄𑀕𑀥𑁄.

𑁮𑁪𑁬. ‘‘𑀅𑀦𑀼𑀓𑀫𑁆𑀧𑀓𑀲𑁆𑀲 𑀓𑀼𑀲𑀮𑀲𑁆𑀲, 𑀑𑀯𑀸𑀤𑀫𑁆𑀳𑀺 𑀅𑀳𑀁 𑀞𑀺𑀢𑀸;

𑀅𑀚𑁆𑀛𑀕𑀸 𑀅𑀫𑀢𑀁 𑀲𑀦𑁆𑀢𑀺𑀁, 𑀦𑀺𑀩𑁆𑀩𑀸𑀦𑀁 𑀧𑀤𑀫𑀘𑁆𑀘𑀼𑀢𑀁.

𑁮𑁪𑁭. ‘‘𑀲𑀸𑀳𑀁 𑀅𑀯𑀝𑁆𑀞𑀺𑀢𑀸𑀧𑁂𑀫𑀸, 𑀤𑀲𑁆𑀲𑀦𑁂 𑀅𑀯𑀺𑀓𑀫𑁆𑀧𑀺𑀦𑀻;

𑀫𑀽𑀮𑀚𑀸𑀢𑀸𑀬 𑀲𑀤𑁆𑀥𑀸𑀬, 𑀥𑀻𑀢𑀸 𑀩𑀼𑀤𑁆𑀥𑀲𑁆𑀲 𑀑𑀭𑀲𑀸.

𑁮𑁪𑁮. ‘‘𑀲𑀸𑀳𑀁 𑀭𑀫𑀸𑀫𑀺 𑀓𑀻𑀴𑀸𑀫𑀺, 𑀫𑁄𑀤𑀸𑀫𑀺 𑀅𑀓𑀼𑀢𑁄𑀪𑀬𑀸;

𑀤𑀺𑀩𑁆𑀩𑀫𑀸𑀮𑀁 𑀥𑀸𑀭𑀬𑀸𑀫𑀺, 𑀧𑀺𑀯𑀸𑀫𑀺 𑀫𑀥𑀼𑀫𑀤𑁆𑀤𑀯𑀁.

𑁮𑁪𑁯. ‘‘𑀲𑀝𑁆𑀞𑀺𑀢𑀽𑀭𑀺𑀬𑀲𑀳𑀲𑁆𑀲𑀸𑀦𑀺, 𑀧𑀝𑀺𑀩𑁄𑀥𑀁 𑀓𑀭𑁄𑀦𑁆𑀢𑀺 𑀫𑁂;

𑀆𑀴𑀫𑁆𑀩𑁄 𑀕𑀕𑁆𑀕𑀭𑁄 𑀪𑀻𑀫𑁄, 𑀲𑀸𑀥𑀼𑀯𑀸𑀤𑀻 𑀘 𑀲𑀁𑀲𑀬𑁄.

𑁮𑁫𑁦. ‘‘𑀧𑁄𑀓𑁆𑀔𑀭𑁄 𑀘 𑀲𑀼𑀨𑀲𑁆𑀲𑁄 𑀘, 𑀯𑀺𑀡𑀸𑀫𑁄𑀓𑁆𑀔𑀸 𑀘 𑀦𑀸𑀭𑀺𑀬𑁄;

𑀦𑀦𑁆𑀤𑀸 𑀘𑁂𑀯 𑀲𑀼𑀦𑀦𑁆𑀤𑀸 𑀘, 𑀲𑁄𑀡𑀤𑀺𑀦𑁆𑀦𑀸 𑀲𑀼𑀘𑀺𑀫𑁆𑀳𑀺𑀢𑀸.

𑁮𑁫𑁧. ‘‘𑀅𑀮𑀫𑁆𑀩𑀼𑀲𑀸 𑀫𑀺𑀲𑁆𑀲𑀓𑁂𑀲𑀻 𑀘, 𑀧𑀼𑀡𑁆𑀟𑀭𑀻𑀓𑀸𑀢𑀺𑀤𑀸𑀭𑀼𑀡𑀻;

𑀏𑀡𑀻𑀨𑀲𑁆𑀲𑀸 𑀲𑀼𑀨𑀲𑁆𑀲𑀸 𑀘, 𑀲𑀼𑀪𑀤𑁆𑀤𑀸 𑀫𑀼𑀤𑀼𑀯𑀸𑀤𑀺𑀦𑀻.

𑁮𑁫𑁨. ‘‘𑀏𑀢𑀸 𑀘𑀜𑁆𑀜𑀸 𑀘 𑀲𑁂𑀬𑁆𑀬𑀸𑀲𑁂, 𑀅𑀘𑁆𑀙𑀭𑀸𑀦𑀁 𑀧𑀩𑁄𑀥𑀺𑀓𑀸;

𑀢𑀸 𑀫𑀁 𑀓𑀸𑀮𑁂𑀦𑀼𑀧𑀸𑀕𑀦𑁆𑀢𑁆𑀯𑀸, 𑀅𑀪𑀺𑀪𑀸𑀲𑀦𑁆𑀢𑀺 𑀤𑁂𑀯𑀢𑀸.

𑁮𑁫𑁩. ‘‘𑀳𑀦𑁆𑀤 𑀦𑀘𑁆𑀘𑀸𑀫 𑀕𑀸𑀬𑀸𑀫, 𑀳𑀦𑁆𑀤 𑀢𑀁 𑀭𑀫𑀬𑀸𑀫𑀲𑁂;

𑀦𑀬𑀺𑀤𑀁 𑀅𑀓𑀢𑀧𑀼𑀜𑁆𑀜𑀸𑀦𑀁, 𑀓𑀢𑀧𑀼𑀜𑁆𑀜𑀸𑀦𑀫𑁂𑀯𑀺𑀤𑀁.

𑁮𑁫𑁪. ‘‘𑀅𑀲𑁄𑀓𑀁 𑀦𑀦𑁆𑀤𑀦𑀁 𑀭𑀫𑁆𑀫𑀁, 𑀢𑀺𑀤𑀲𑀸𑀦𑀁 𑀫𑀳𑀸𑀯𑀦𑀁;

𑀲𑀼𑀔𑀁 𑀅𑀓𑀢𑀧𑀼𑀜𑁆𑀜𑀸𑀦𑀁, 𑀇𑀥 𑀦𑀢𑁆𑀣𑀺 𑀧𑀭𑀢𑁆𑀣 𑀘.

𑁮𑁫𑁫. ‘‘𑀲𑀼𑀔𑀜𑁆𑀘 𑀓𑀢𑀧𑀼𑀜𑁆𑀜𑀸𑀦𑀁, 𑀇𑀥 𑀘𑁂𑀯 𑀧𑀭𑀢𑁆𑀣 𑀘;

𑀢𑁂𑀲𑀁 𑀲𑀳𑀩𑁆𑀬𑀓𑀸𑀫𑀸𑀦𑀁, 𑀓𑀢𑁆𑀢𑀩𑁆𑀩𑀁 𑀓𑀼𑀲𑀮𑀁 𑀩𑀳𑀼𑀁;

𑀓𑀢𑀧𑀼𑀜𑁆𑀜𑀸 𑀳𑀺 𑀫𑁄𑀤𑀦𑁆𑀢𑀺, 𑀲𑀕𑁆𑀕𑁂 𑀪𑁄𑀕𑀲𑀫𑀗𑁆𑀕𑀺𑀦𑁄.

𑁮𑁫𑁬. ‘‘𑀩𑀳𑀽𑀦𑀁 𑀯𑀢 𑀅𑀢𑁆𑀣𑀸𑀬, 𑀉𑀧𑁆𑀧𑀚𑁆𑀚𑀦𑁆𑀢𑀺 𑀢𑀣𑀸𑀕𑀢𑀸;

𑀤𑀓𑁆𑀔𑀺𑀡𑁂𑀬𑁆𑀬𑀸 𑀫𑀦𑀼𑀲𑁆𑀲𑀸𑀦𑀁, 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀸𑀦𑀫𑀸𑀓𑀭𑀸;

𑀬𑀢𑁆𑀣 𑀓𑀸𑀭𑀁 𑀓𑀭𑀺𑀢𑁆𑀯𑀸𑀦, 𑀲𑀕𑁆𑀕𑁂 𑀫𑁄𑀤𑀦𑁆𑀢𑀺 𑀤𑀸𑀬𑀓𑀸’’𑀢𑀺.

𑁮𑁩𑁩. 𑀢𑀢𑁆𑀣 𑀤𑀸𑀲𑀻 𑀅𑀳𑀁 𑀧𑀼𑀭𑁂 𑀆𑀲𑀺𑀦𑁆𑀢𑀺 𑀧𑀼𑀭𑁂 𑀧𑀼𑀭𑀺𑀫𑀚𑀸𑀢𑀺𑀬𑀁 𑀅𑀳𑀁 𑀅𑀦𑁆𑀢𑁄𑀚𑀸𑀢𑀸 𑀤𑀸𑀲𑀻 𑀅𑀳𑁄𑀲𑀺𑀁. 𑀢𑀢𑁆𑀣 𑀓𑀲𑁆𑀲𑀸𑀢𑀺 𑀆𑀳 ‘‘𑀕𑀬𑀸𑀬𑀁 𑀩𑁆𑀭𑀸𑀳𑁆𑀫𑀡𑀲𑁆𑀲𑀳’’𑀦𑁆𑀢𑀺, 𑀕𑀬𑀸𑀦𑀸𑀫𑀓𑁂 𑀕𑀸𑀫𑁂 𑀅𑀜𑁆𑀜𑀢𑀭𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲. 𑀳𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀅𑀧𑁆𑀧𑀧𑀼𑀜𑁆𑀜𑀸𑀢𑀺 𑀫𑀦𑁆𑀤𑀪𑀸𑀕𑁆𑀬𑀸 𑀅𑀧𑀼𑀜𑁆𑀜𑀸. 𑀅𑀮𑀓𑁆𑀔𑀺𑀓𑀸𑀢𑀺 𑀦𑀺𑀲𑁆𑀲𑀺𑀭𑀺𑀓𑀸 𑀓𑀸𑀮𑀓𑀡𑁆𑀡𑀻. 𑀭𑀚𑁆𑀚𑀼𑀫𑀸𑀮𑀸𑀢𑀺 𑀫𑀁 𑀯𑀺𑀤𑀼𑀦𑁆𑀢𑀺, 𑀓𑁂𑀲𑁂 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑀦𑀧𑀭𑀺𑀓𑀟𑁆𑀠𑀦𑀤𑀼𑀓𑁆𑀔𑁂𑀦 𑀫𑀼𑀡𑁆𑀟𑀓𑁂 𑀓𑀢𑁂 𑀧𑀼𑀦𑀧𑀺 𑀢𑀤𑀢𑁆𑀣𑀫𑁂𑀯 𑀲𑀻𑀲𑁂 𑀤𑀴𑁆𑀳𑀁 𑀩𑀦𑁆𑀥𑀺𑀢𑁆𑀯𑀸 𑀞𑀧𑀺𑀢𑀭𑀚𑁆𑀚𑀼𑀓𑀼𑀡𑁆𑀟𑀮𑀓𑀯𑀲𑁂𑀦 ‘‘𑀭𑀚𑁆𑀚𑀼𑀫𑀸𑀮𑀸’’𑀢𑀺 𑀫𑀁 𑀫𑀦𑀼𑀲𑁆𑀲𑀸 𑀚𑀸𑀦𑀺𑀁𑀲𑀼.

𑁮𑁩𑁪. 𑀯𑀥𑀸𑀦𑀦𑁆𑀢𑀺 𑀢𑀸𑀴𑀦𑀸𑀦𑀁. 𑀢𑀚𑁆𑀚𑀦𑀸𑀬𑀸𑀢𑀺 𑀪𑀬𑀲𑀁𑀢𑀚𑁆𑀚𑀦𑁂𑀦. 𑀉𑀕𑁆𑀕𑀢𑀸𑀢𑀺 𑀉𑀕𑁆𑀕𑀢𑀸𑀬 𑀤𑁄𑀫𑀦𑀲𑁆𑀲𑀼𑀧𑁆𑀧𑀢𑁆𑀢𑀺𑀬𑀸. 𑀉𑀤𑀳𑀸𑀭𑀺𑀬𑀸𑀢𑀺 𑀉𑀤𑀓𑀳𑀸𑀭𑀺𑀓𑀸, 𑀉𑀤𑀓𑀁 𑀆𑀳𑀭𑀦𑁆𑀢𑀻 𑀯𑀺𑀬 𑀳𑀼𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁮𑁩𑁫. 𑀯𑀺𑀧𑀣𑁂𑀢𑀺 𑀅𑀧𑀣𑁂, 𑀫𑀕𑁆𑀕𑀢𑁄 𑀅𑀧𑀓𑁆𑀓𑀫𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀓𑁆𑀯𑀢𑁆𑀣𑁄𑀢𑀺 𑀓𑁄 𑀅𑀢𑁆𑀣𑁄. 𑀲𑁄𑀬𑁂𑀯 𑀯𑀸 𑀧𑀸𑀞𑁄.

𑁮𑁩𑁬. 𑀤𑀴𑁆𑀳𑀁 𑀧𑀸𑀲𑀁 𑀓𑀭𑀺𑀢𑁆𑀯𑀸𑀦𑀸𑀢𑀺 𑀩𑀦𑁆𑀥𑀦𑀧𑀸𑀲𑀁 𑀣𑀺𑀭𑀁 𑀅𑀘𑁆𑀙𑀺𑀚𑁆𑀚𑀦𑀓𑀁 𑀓𑀢𑁆𑀯𑀸. 𑀆𑀲𑀼𑀫𑁆𑀪𑀺𑀢𑁆𑀯𑀸𑀦 𑀧𑀸𑀤𑀧𑁂𑀢𑀺 𑀯𑀺𑀝𑀧𑁂 𑀮𑀕𑁆𑀕𑀦𑀯𑀲𑁂𑀦 𑀧𑀸𑀤𑀧𑁂 𑀭𑀼𑀓𑁆𑀔𑁂 𑀔𑀺𑀧𑀺𑀢𑁆𑀯𑀸. 𑀢𑀢𑁄 𑀤𑀺𑀲𑀸 𑀯𑀺𑀮𑁄𑀓𑁂𑀲𑀺𑀁, 𑀓𑁄 𑀦𑀼 𑀔𑁄 𑀯𑀦𑀫𑀲𑁆𑀲𑀺𑀢𑁄𑀢𑀺 𑀇𑀫𑀁 𑀯𑀦𑀁 𑀧𑀯𑀺𑀲𑀦𑀯𑀲𑁂𑀦 𑀅𑀲𑁆𑀲𑀺𑀢𑁄 𑀦𑀼 𑀔𑁄 𑀓𑁄𑀘𑀺 𑀅𑀢𑁆𑀣𑀺, 𑀬𑀢𑁄 𑀫𑁂 𑀫𑀭𑀡𑀦𑁆𑀢𑀭𑀸𑀬𑁄 𑀲𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁮𑁩𑁭. 𑀲𑀫𑁆𑀩𑀼𑀤𑁆𑀥𑀦𑁆𑀢𑀺𑀆𑀤𑀺 𑀢𑀤𑀸 𑀢𑀲𑁆𑀲𑀸 𑀢𑀸𑀤𑀺𑀲𑁂 𑀦𑀺𑀘𑁆𑀙𑀬𑁂 𑀅𑀲𑀢𑀺𑀧𑀺 𑀲𑀪𑀸𑀯𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀲𑁆𑀲𑀢𑁆𑀣𑁄 𑁋 𑀲𑀬𑀫𑁂𑀯 𑀲𑀫𑁆𑀫𑀤𑁂𑀯 𑀘 𑀲𑀩𑁆𑀩𑀲𑁆𑀲𑀸𑀧𑀺 𑀩𑀼𑀚𑁆𑀛𑀺𑀢𑀩𑁆𑀩𑀲𑁆𑀲 𑀩𑀼𑀤𑁆𑀥𑀢𑁆𑀢𑀸 𑀲𑀫𑁆𑀩𑀼𑀤𑁆𑀥𑀁, 𑀫𑀳𑀸𑀓𑀭𑀼𑀡𑀸𑀬𑁄𑀕𑁂𑀦 𑀳𑀻𑀦𑀸𑀤𑀺𑀪𑁂𑀤𑀪𑀺𑀦𑁆𑀦𑀲𑁆𑀲 𑀲𑀩𑁆𑀩𑀲𑁆𑀲𑀸𑀧𑀺 𑀮𑁄𑀓𑀲𑁆𑀲 𑀏𑀓𑀦𑁆𑀢𑀳𑀺𑀢𑀢𑁆𑀢𑀸 𑀲𑀩𑁆𑀩𑀮𑁄𑀓𑀳𑀺𑀢𑀁, 𑀉𑀪𑀬𑀮𑁄𑀓𑀁 𑀫𑀼𑀦𑀦𑀢𑁄 𑀫𑀼𑀦𑀺𑀁, 𑀦𑀺𑀲𑀚𑁆𑀚𑀸𑀯𑀲𑁂𑀦 𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑁂𑀳𑀺 𑀞𑀸𑀦𑀸 𑀘𑀸𑀯𑀦𑀸𑀪𑀸𑀯𑁂𑀦 𑀘 𑀦𑀺𑀲𑀺𑀦𑁆𑀦𑀁, 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑁂𑀦 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑁂𑀦 𑀘 𑀛𑀸𑀬𑀦𑁆𑀢𑀁, 𑀩𑁄𑀥𑀺𑀫𑀽𑀮𑁂𑀬𑁂𑀯 𑀪𑀬𑀳𑁂𑀢𑀽𑀦𑀁 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸 𑀓𑀼𑀢𑁄𑀘𑀺𑀧𑀺 𑀪𑀬𑀸𑀪𑀸𑀯𑀢𑁄 𑀅𑀓𑀼𑀢𑁄𑀪𑀬𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁮𑁩𑁮. 𑀲𑀁𑀯𑁂𑀕𑁄 𑀦𑀸𑀫 𑀲𑀳𑁄𑀢𑁆𑀢𑀧𑁆𑀧𑀁 𑀜𑀸𑀡𑀁, 𑀲𑁄 𑀢𑀲𑁆𑀲𑀸 𑀪𑀕𑀯𑀢𑁄 𑀤𑀲𑁆𑀲𑀦𑁂𑀦 𑀉𑀧𑁆𑀧𑀚𑁆𑀚𑀺. 𑀢𑁂𑀦𑀸𑀳 ‘‘𑀢𑀲𑁆𑀲𑀸 𑀫𑁂 𑀅𑀳𑀼 𑀲𑀁𑀯𑁂𑀕𑁄’’𑀢𑀺.

𑁮𑁩𑁯. 𑀧𑀸𑀲𑀸𑀤𑀺𑀓𑀦𑁆𑀢𑀺 𑀧𑀲𑀸𑀤𑀸𑀯𑀳𑀁, 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀅𑀲𑀻𑀢𑀺𑀅𑀦𑀼𑀩𑁆𑀬𑀜𑁆𑀚𑀦𑀩𑁆𑀬𑀸𑀫𑀧𑁆𑀧𑀪𑀸𑀓𑁂𑀢𑀼𑀫𑀸𑀮𑀸𑀮𑀗𑁆𑀓𑀢𑀸𑀬 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀅𑀢𑁆𑀢𑀦𑁄 𑀲𑀭𑀻𑀭𑀲𑁄𑀪𑀸𑀲𑀫𑁆𑀧𑀢𑁆𑀢𑀺𑀬𑀸 𑀭𑀽𑀧𑀓𑀸𑀬𑀤𑀲𑁆𑀲𑀦𑀩𑁆𑀬𑀸𑀯𑀝𑀲𑁆𑀲 𑀚𑀦𑀲𑁆𑀲 𑀲𑀸𑀥𑀼𑀪𑀸𑀯𑀢𑁄 𑀧𑀲𑀸𑀤𑀲𑀁𑀯𑀟𑁆𑀠𑀦𑀦𑁆𑀢𑀺 𑀅𑀢𑁆𑀣𑁄. 𑀧𑀲𑀸𑀤𑀦𑀻𑀬𑀦𑁆𑀢𑀺 𑀤𑀲𑀩𑀮-𑀘𑀢𑀼𑀯𑁂𑀲𑀸𑀭𑀚𑁆𑀚𑀙𑀅𑀲𑀸𑀥𑀸𑀭𑀡𑀜𑀸𑀡-𑀅𑀝𑁆𑀞𑀸𑀭𑀲𑀸𑀯𑁂𑀡𑀺𑀓-𑀩𑀼𑀤𑁆𑀥𑀥𑀫𑁆𑀫𑀧𑀪𑀼𑀢𑀺𑀅𑀧𑀭𑀺𑀫𑀸𑀡𑀕𑀼𑀡𑀲𑀫𑀦𑁆𑀦𑀸𑀕𑀢𑀸𑀬 𑀥𑀫𑁆𑀫𑀓𑀸𑀬𑀲𑀫𑁆𑀧𑀢𑁆𑀢𑀺𑀬𑀸 𑀲𑀭𑀺𑀓𑁆𑀔𑀓𑀚𑀦𑀲𑁆𑀲 𑀧𑀲𑀻𑀤𑀺𑀢𑀩𑁆𑀩𑀬𑀼𑀢𑁆𑀢𑀁, 𑀧𑀸𑀲𑀸𑀤𑀺𑀓𑀦𑁆𑀢𑀺 𑀅𑀢𑁆𑀣𑁄. 𑀯𑀦𑀸𑀢𑀺 𑀓𑀺𑀮𑁂𑀲𑀯𑀦𑀢𑁄 𑀅𑀧𑀓𑁆𑀓𑀫𑀺𑀢𑁆𑀯𑀸. 𑀦𑀺𑀩𑁆𑀩𑀦𑀫𑀸𑀕𑀢𑀦𑁆𑀢𑀺 𑀦𑀺𑀢𑁆𑀢𑀡𑁆𑀳𑀪𑀸𑀯𑀁 𑀦𑀺𑀩𑁆𑀩𑀸𑀦𑀫𑁂𑀯 𑀉𑀧𑀕𑀢𑀁 𑀅𑀥𑀺𑀕𑀢𑀁. 𑀬𑀸𑀤𑀺𑀲𑀓𑀻𑀤𑀺𑀲𑁄𑀢𑀺 𑀬𑁄 𑀯𑀸 𑀲𑁄 𑀯𑀸, 𑀧𑀘𑀼𑀭𑀚𑀦𑁄𑀢𑀺 𑀅𑀢𑁆𑀣𑁄.

𑁮𑁪𑁦-𑁪𑁧. 𑀫𑀦𑀘𑁆𑀙𑀝𑁆𑀞𑀸𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀅𑀕𑁆𑀕𑀫𑀕𑁆𑀕𑀕𑁄𑀧𑀦𑀸𑀬 𑀕𑁄𑀧𑀺𑀢𑀢𑁆𑀢𑀸 𑀕𑀼𑀢𑁆𑀢𑀺𑀦𑁆𑀤𑁆𑀭𑀺𑀬𑁄. 𑀅𑀕𑁆𑀕𑀨𑀮𑀚𑁆𑀛𑀸𑀦𑀸𑀪𑀺𑀭𑀢𑀺𑀬𑀸 𑀛𑀸𑀦𑀭𑀢𑁄. 𑀢𑀢𑁄 𑀏𑀯 𑀩𑀳𑀺𑀪𑀽𑀢𑁂𑀳𑀺 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑁂𑀳𑀺 𑀅𑀧𑀓𑁆𑀓𑀫𑀺𑀢𑁆𑀯𑀸 𑀯𑀺𑀲𑀬𑀚𑁆𑀛𑀢𑁆𑀢𑁂 𑀦𑀺𑀩𑁆𑀩𑀸𑀦𑁂 𑀘 𑀑𑀕𑀸𑀴𑁆𑀳𑀘𑀺𑀢𑁆𑀢𑀢𑀸𑀬 𑀅𑀩𑀳𑀺𑀕𑁆𑀕𑀢𑀫𑀸𑀦𑀲𑁄. 𑀫𑀺𑀘𑁆𑀙𑀸𑀕𑀸𑀳𑀫𑁄𑀘𑀦𑀪𑀬𑁂𑀦 𑀯𑀺𑀧𑀮𑁆𑀮𑀸𑀲𑀯𑀦𑁆𑀢𑁂𑀳𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁂𑀳𑀺 𑀪𑀸𑀬𑀺𑀢𑀩𑁆𑀩𑀢𑁄 𑀢𑁂𑀲𑀜𑁆𑀘 𑀪𑀬𑀚𑀦𑀦𑀢𑁄 𑀪𑀬𑀪𑁂𑀭𑀯𑁄. 𑀧𑀬𑁄𑀕𑀸𑀲𑀬𑀯𑀺𑀧𑀦𑁆𑀦𑁂𑀳𑀺 𑀅𑀦𑀼𑀧𑀕𑀫𑀦𑀻𑀬𑀢𑁄 𑀘 𑀓𑁂𑀦𑀘𑀺𑀧𑀺 𑀅𑀦𑀸𑀲𑀸𑀤𑀦𑀻𑀬𑀢𑁄 𑀘 𑀤𑀼𑀭𑀸𑀲𑀤𑁄. 𑀤𑀼𑀮𑁆𑀮𑀪𑀸𑀬𑀦𑁆𑀢𑀺 𑀤𑀼𑀮𑁆𑀮𑀪𑁄 𑀅𑀬𑀁. 𑀤𑀲𑁆𑀲𑀦𑀸𑀬𑀸𑀢𑀺 𑀤𑀝𑁆𑀞𑀼𑀫𑁆𑀧𑀺. 𑀧𑀼𑀧𑁆𑀨𑀁 𑀑𑀤𑀼𑀫𑁆𑀩𑀭𑀁 𑀬𑀣𑀸𑀢𑀺 𑀬𑀣𑀸 𑀦𑀸𑀫 𑀉𑀤𑀼𑀫𑁆𑀩𑀭𑁂 𑀪𑀯𑀁 𑀧𑀼𑀧𑁆𑀨𑀁 𑀤𑀼𑀮𑁆𑀮𑀪𑀤𑀲𑁆𑀲𑀦𑀁, 𑀓𑀤𑀸𑀘𑀺𑀤𑁂𑀯 𑀪𑀯𑁂𑀬𑁆𑀬, 𑀦 𑀯𑀸 𑀪𑀯𑁂𑀬𑁆𑀬, 𑀏𑀯𑀁 𑀈𑀤𑀺𑀲𑀲𑁆𑀲 𑀉𑀢𑁆𑀢𑀫𑀧𑀼𑀕𑁆𑀕𑀮𑀲𑁆𑀲𑀸𑀢𑀺 𑀅𑀢𑁆𑀣𑁄.

𑁮𑁪𑁨. 𑀲𑁄 𑀢𑀣𑀸𑀕𑀢𑁄 𑀫𑀼𑀤𑀽𑀳𑀺 𑀯𑀸𑀘𑀸𑀳𑀺 𑀲𑀡𑁆𑀳𑀸𑀬 𑀯𑀸𑀘𑀸𑀬 ‘‘𑀭𑀚𑁆𑀚𑀼𑀫𑀸𑀮𑁂’’𑀢𑀺 𑀫𑀁 𑀆𑀮𑀧𑀺𑀢𑁆𑀯𑀸 𑀆𑀫𑀦𑁆𑀢𑁂𑀢𑁆𑀯𑀸 𑀲𑀭𑀡𑀁 𑀕𑀘𑁆𑀙 𑀢𑀣𑀸𑀕𑀢𑀦𑁆𑀢𑀺 ‘‘𑀢𑀣𑀸 𑀆𑀕𑀢𑁄’’𑀢𑀺𑀆𑀤𑀺𑀦𑀸 𑀢𑀣𑀸𑀕𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀲𑀭𑀡𑀁 𑀕𑀘𑁆𑀙𑀸𑀢𑀺 𑀫𑀁 𑀅𑀯𑁄𑀘 𑀅𑀪𑀸𑀲𑀻𑀢𑀺 𑀬𑁄𑀚𑀦𑀸.

𑁮𑁪𑁩-𑁪. 𑀢𑀸𑀳𑀦𑁆𑀢𑀺 𑀢𑀁 𑀅𑀳𑀁. 𑀕𑀺𑀭𑀦𑁆𑀢𑀺 𑀯𑀸𑀘𑀁. 𑀦𑁂𑀮𑀦𑁆𑀢𑀺 𑀦𑀺𑀤𑁆𑀤𑁄𑀲𑀁. 𑀅𑀢𑁆𑀣𑀯𑀢𑀺𑀦𑁆𑀢𑀺 𑀅𑀢𑁆𑀣𑀬𑀼𑀢𑁆𑀢𑀁 𑀲𑀸𑀢𑁆𑀣𑀁, 𑀏𑀓𑀦𑁆𑀢𑀳𑀺𑀢𑀁 𑀯𑀸. 𑀯𑀘𑀻𑀲𑁄𑀘𑁂𑀬𑁆𑀬𑀢𑀸𑀬 𑀲𑀼𑀘𑀺𑀁. 𑀅𑀓𑀓𑁆𑀔𑀴𑀢𑀸𑀬 𑀲𑀡𑁆𑀳𑀁. 𑀯𑁂𑀦𑁂𑀬𑁆𑀬𑀸𑀦𑀁 𑀫𑀼𑀤𑀼𑀪𑀸𑀯𑀓𑀭𑀢𑁆𑀢𑀸 𑀫𑀼𑀤𑀼. 𑀲𑀯𑀦𑀻𑀬𑀪𑀸𑀯𑁂𑀦 𑀯𑀕𑁆𑀕𑀼𑀁. 𑀲𑀩𑁆𑀩𑀲𑁄𑀓𑀸𑀧𑀦𑀽𑀤𑀦𑀦𑁆𑀢𑀺 𑀜𑀸𑀢𑀺𑀩𑁆𑀬𑀲𑀦𑀸𑀤𑀺𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀓𑀲𑁆𑀲 𑀲𑀩𑁆𑀩𑀲𑁆𑀲𑀸𑀧𑀺 𑀲𑁄𑀓𑀲𑁆𑀲 𑀯𑀺𑀦𑁄𑀤𑀦𑀁 𑀕𑀺𑀭𑀁 𑀲𑀼𑀢𑁆𑀯𑀸𑀦 𑀧𑀲𑀦𑁆𑀦𑀘𑀺𑀢𑁆𑀢𑀸 𑀅𑀳𑁄𑀲𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀩𑁆𑀩𑀫𑁂𑀢𑀁 𑀤𑀸𑀦𑀓𑀣𑀁 𑀆𑀤𑀺𑀁 𑀓𑀢𑁆𑀯𑀸 𑀉𑀲𑁆𑀲𑀓𑁆𑀓𑀺𑀢𑁆𑀯𑀸 𑀦𑁂𑀓𑁆𑀔𑀫𑁆𑀫𑁂 𑀆𑀦𑀺𑀲𑀁𑀲𑀁 𑀯𑀺𑀪𑀸𑀯𑀦𑀯𑀲𑁂𑀦 𑀧𑀯𑀢𑁆𑀢𑀺𑀢𑀁 𑀪𑀕𑀯𑀢𑁄 𑀅𑀦𑀼𑀧𑀼𑀩𑁆𑀩𑀺𑀓𑀣𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀢𑁂𑀦𑁂𑀯𑀸𑀳 ‘‘𑀓𑀮𑁆𑀮𑀘𑀺𑀢𑁆𑀢𑀜𑁆𑀘 𑀫𑀁 𑀜𑀢𑁆𑀯𑀸’’𑀢𑀺𑀆𑀤𑀺.

𑀢𑀢𑁆𑀣 𑀓𑀮𑁆𑀮𑀘𑀺𑀢𑁆𑀢𑀦𑁆𑀢𑀺 𑀓𑀫𑁆𑀫𑀦𑀺𑀬𑀘𑀺𑀢𑁆𑀢𑀁, 𑀳𑁂𑀝𑁆𑀞𑀸 𑀧𑀯𑀢𑁆𑀢𑀺𑀢𑀤𑁂𑀲𑀦𑀸𑀬 𑀅𑀲𑁆𑀲𑀤𑁆𑀥𑀺𑀬𑀸𑀤𑀻𑀦𑀁 𑀘𑀺𑀢𑁆𑀢𑀤𑁄𑀲𑀸𑀦𑀁 𑀯𑀺𑀕𑀢𑀢𑁆𑀢𑀸 𑀉𑀧𑀭𑀺𑀤𑁂𑀲𑀦𑀸𑀬 𑀪𑀸𑀚𑀦𑀪𑀸𑀯𑀽𑀧𑀕𑀫𑀦𑁂𑀦 𑀓𑀫𑁆𑀫𑀓𑁆𑀔𑀫𑀘𑀺𑀢𑁆𑀢𑀁, 𑀪𑀸𑀯𑀦𑀸𑀓𑀫𑁆𑀫𑀲𑁆𑀲 𑀬𑁄𑀕𑁆𑀕𑀘𑀺𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯𑀸𑀳 ‘‘𑀧𑀲𑀦𑁆𑀦𑀁 𑀲𑀼𑀤𑁆𑀥𑀫𑀸𑀦𑀲’’𑀦𑁆𑀢𑀺. 𑀢𑀢𑁆𑀣 ‘‘𑀧𑀲𑀦𑁆𑀦’’𑀦𑁆𑀢𑀺 𑀇𑀫𑀺𑀦𑀸 𑀅𑀲𑁆𑀲𑀤𑁆𑀥𑀺𑀬𑀸𑀧𑀕𑀫𑀫𑀸𑀳, ‘‘𑀲𑀼𑀤𑁆𑀥𑀫𑀸𑀦𑀲’’𑀦𑁆𑀢𑀺 𑀇𑀫𑀺𑀦𑀸 𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀅𑀧𑀕𑀫𑀦𑁂𑀦 𑀫𑀼𑀤𑀼𑀘𑀺𑀢𑁆𑀢𑀢𑀁 𑀉𑀤𑀕𑁆𑀕𑀘𑀺𑀢𑁆𑀢𑀢𑀜𑁆𑀘 𑀤𑀲𑁆𑀲𑁂𑀢𑀺. 𑀅𑀦𑀼𑀲𑀸𑀲𑀻𑀢𑀺 𑀑𑀯𑀤𑀺, 𑀲𑀸𑀫𑀼𑀓𑁆𑀓𑀁𑀲𑀺𑀓𑀸𑀬 𑀥𑀫𑁆𑀫𑀤𑁂𑀲𑀦𑀸𑀬 𑀲𑀳 𑀉𑀧𑀸𑀬𑁂𑀦 𑀧𑀯𑀢𑁆𑀢𑀺𑀦𑀺𑀯𑀢𑁆𑀢𑀺𑀬𑁄 𑀉𑀧𑀤𑀺𑀲𑀻𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯𑀸𑀳 ‘‘𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺𑀆𑀤𑀺. 𑀅𑀦𑀼𑀲𑀸𑀲𑀺𑀢𑀸𑀓𑀸𑀭𑀤𑀲𑁆𑀲𑀦𑀜𑁆𑀳𑁂𑀢𑀁.

𑁮𑁪𑁫. 𑀢𑀢𑁆𑀣 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀫𑀁𑀯𑁄𑀘𑀸𑀢𑀺 𑀇𑀤𑀁 𑀢𑀡𑁆𑀳𑀸𑀯𑀚𑁆𑀚𑀁 𑀢𑁂𑀪𑀽𑀫𑀓𑀁 𑀥𑀫𑁆𑀫𑀚𑀸𑀢𑀁 𑀩𑀸𑀥𑀓𑀲𑀪𑀸𑀯𑀢𑁆𑀢𑀸 𑀓𑀼𑀘𑁆𑀙𑀺𑀓𑀁 𑀳𑀼𑀢𑁆𑀯𑀸 𑀢𑀼𑀘𑁆𑀙𑀲𑀪𑀸𑀯𑀢𑁆𑀢𑀸 𑀢𑀣𑀢𑁆𑀢𑀸 𑀘 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀦𑁆𑀢𑀺 𑀫𑀬𑁆𑀳𑀁 𑀅𑀪𑀸𑀲𑀺. 𑀅𑀬𑀁 𑀤𑀼𑀓𑁆𑀔𑀲𑁆𑀲 𑀲𑀫𑁆𑀪𑀯𑁄𑀢𑀺 𑀅𑀬𑀁 𑀆𑀫𑀢𑀡𑁆𑀳𑀸𑀤𑀺𑀪𑁂𑀤𑀸 𑀢𑀡𑁆𑀳𑀸 𑀬𑀣𑀸𑀯𑀼𑀢𑁆𑀢𑀲𑁆𑀲 𑀤𑀼𑀓𑁆𑀔𑀲𑁆𑀲 𑀲𑀫𑁆𑀪𑀯𑁄 𑀧𑀪𑀯𑁄 𑀉𑀧𑁆𑀧𑀢𑁆𑀢𑀺 𑀳𑁂𑀢𑀼 𑀲𑀫𑀼𑀤𑀬𑁄 𑀅𑀭𑀺𑀬𑀲𑀘𑁆𑀘𑀦𑁆𑀢𑀺. 𑀤𑀼𑀓𑁆𑀔𑀦𑀺𑀭𑁄𑀥𑁄𑀢𑀺 𑀤𑀼𑀓𑁆𑀔𑀲𑁆𑀲 𑀲𑀦𑁆𑀢𑀺𑀪𑀸𑀯𑁄 𑀅𑀲𑀗𑁆𑀔𑀢𑀥𑀸𑀢𑀼 𑀦𑀺𑀭𑁄𑀥𑁄 𑀅𑀭𑀺𑀬𑀲𑀘𑁆𑀘𑀦𑁆𑀢𑀺. 𑀅𑀦𑁆𑀢𑀤𑁆𑀯𑀬𑀲𑁆𑀲 𑀧𑀭𑀺𑀯𑀚𑁆𑀚𑀦𑀢𑁄 𑀅𑀜𑁆𑀚𑀲𑁄 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀧𑀝𑀺𑀧𑀤𑀸𑀪𑀸𑀯𑀢𑁄 𑀅𑀫𑀢𑁄𑀕𑀥𑁄 𑀫𑀕𑁆𑀕𑁄 𑀅𑀭𑀺𑀬𑀲𑀘𑁆𑀘𑀦𑁆𑀢𑀺 𑀫𑀁 𑀅𑀯𑁄𑀘𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁮𑁪𑁬. 𑀓𑀼𑀲𑀮𑀲𑁆𑀲𑀸𑀢𑀺 𑀑𑀯𑀸𑀤𑀤𑀸𑀦𑁂 𑀯𑁂𑀦𑁂𑀬𑁆𑀬𑀤𑀫𑀦𑁂 𑀙𑁂𑀓𑀲𑁆𑀲, 𑀅𑀧𑁆𑀧𑀫𑀸𑀤𑀧𑀝𑀺𑀧𑀢𑁆𑀢𑀺𑀬𑀸 𑀯𑀸 𑀫𑀢𑁆𑀣𑀓𑀧𑁆𑀧𑀢𑁆𑀢𑀺𑀬𑀸 𑀅𑀦𑀯𑀚𑁆𑀚𑀲𑁆𑀲. 𑀑𑀯𑀸𑀤𑀫𑁆𑀳𑀺 𑀅𑀳𑀁 𑀞𑀺𑀢𑀸𑀢𑀺 𑀬𑀣𑀸𑀯𑀼𑀢𑁆𑀢𑁂 𑀑𑀯𑀸𑀤𑁂 𑀅𑀦𑀼𑀲𑀺𑀝𑁆𑀞𑀺𑀬𑀁 𑀲𑀺𑀓𑁆𑀔𑀸𑀢𑁆𑀢𑀬𑀧𑀸𑀭𑀺𑀧𑀽𑀭𑀺𑀬𑀸 𑀲𑀘𑁆𑀘𑀧𑀝𑀺𑀯𑁂𑀥𑁂𑀦 𑀅𑀳𑀁 𑀧𑀢𑀺𑀝𑁆𑀞𑀺𑀢𑀸. 𑀢𑁂𑀦𑀸𑀳 ‘‘𑀅𑀚𑁆𑀛𑀕𑀸 𑀅𑀫𑀢𑀁 𑀲𑀦𑁆𑀢𑀺𑀁, 𑀦𑀺𑀩𑁆𑀩𑀸𑀦𑀁 𑀧𑀤𑀫𑀘𑁆𑀘𑀼𑀢’’𑀦𑁆𑀢𑀺, 𑀇𑀤𑀁 𑀑𑀯𑀸𑀤𑁂 𑀧𑀢𑀺𑀝𑁆𑀞𑀸𑀦𑀲𑁆𑀲 𑀓𑀸𑀭𑀡𑀯𑀘𑀦𑀁. 𑀬𑀸 𑀦𑀺𑀘𑁆𑀘𑀢𑀸𑀬 𑀫𑀭𑀡𑀸𑀪𑀸𑀯𑀢𑁄 𑀅𑀫𑀢𑀁, 𑀲𑀩𑁆𑀩𑀤𑀼𑀓𑁆𑀔𑀯𑀽𑀧𑀲𑀫𑀢𑀸𑀬 𑀲𑀦𑁆𑀢𑀺𑀁, 𑀅𑀥𑀺𑀕𑀢𑀸𑀦𑀁 𑀅𑀘𑀯𑀦𑀳𑁂𑀢𑀼𑀢𑀸𑀬 𑀅𑀘𑁆𑀘𑀼𑀢𑀁 𑀦𑀺𑀩𑁆𑀩𑀸𑀦𑀁 𑀧𑀤𑀁 𑀅𑀚𑁆𑀛𑀕𑀸 𑀅𑀥𑀺𑀕𑀜𑁆𑀙𑀺, 𑀲𑀸 𑀏𑀓𑀁𑀲𑁂𑀦 𑀲𑀢𑁆𑀣𑀼 𑀑𑀯𑀸𑀤𑁂 𑀧𑀢𑀺𑀝𑁆𑀞𑀺𑀢𑀸 𑀦𑀸𑀫𑀸𑀢𑀺.

𑁮𑁪𑁭. 𑀅𑀯𑀝𑁆𑀞𑀺𑀢𑀸𑀧𑁂𑀫𑀸𑀢𑀺 𑀤𑀴𑁆𑀳𑀪𑀢𑁆𑀢𑀻 𑀭𑀢𑀦𑀢𑁆𑀢𑀬𑁂 𑀦𑀺𑀘𑁆𑀘𑀮𑀧𑀲𑀸𑀤𑀲𑀺𑀦𑁂𑀳𑀸. 𑀓𑀲𑁆𑀫𑀸? 𑀬𑀲𑁆𑀫𑀸 𑀤𑀲𑁆𑀲𑀦𑁂 𑀅𑀯𑀺𑀓𑀫𑁆𑀧𑀺𑀦𑀻, ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀪𑀕𑀯𑀸, 𑀲𑁆𑀯𑀸𑀓𑁆𑀔𑀸𑀢𑁄 𑀥𑀫𑁆𑀫𑁄, 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀲𑀗𑁆𑀖𑁄’’𑀢𑀺 𑀏𑀢𑀲𑁆𑀫𑀺𑀁 𑀲𑀫𑁆𑀫𑀸𑀤𑀲𑁆𑀲𑀦𑁂 𑀅𑀘𑀮𑀸 𑀓𑁂𑀦𑀘𑀺 𑀅𑀘𑀸𑀮𑀦𑀻𑀬𑀸. 𑀓𑁂𑀦 𑀧𑀦𑁂𑀢𑀁 𑀅𑀯𑀺𑀓𑀫𑁆𑀧𑀦𑀦𑁆𑀢𑀺 𑀆𑀳 ‘‘𑀫𑀽𑀮𑀚𑀸𑀢𑀸𑀬 𑀲𑀤𑁆𑀥𑀸𑀬𑀸’’𑀢𑀺. 𑀅𑀬𑀁 ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳’’𑀦𑁆𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁭𑁪; 𑀲𑀁. 𑀦𑀺. 𑁫.𑁯𑁯𑁭; 𑀅. 𑀦𑀺. 𑁯.𑁨𑁭) 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂, ‘‘𑀲𑁆𑀯𑀸𑀓𑁆𑀔𑀸𑀢𑁄 𑀪𑀕𑀯𑀢𑀸 𑀥𑀫𑁆𑀫𑀸’𑀢𑀺𑀆𑀤𑀺𑀦𑀸 𑀢𑀲𑁆𑀲 𑀥𑀫𑁆𑀫𑁂, ‘‘𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄’’𑀢𑀺𑀆𑀤𑀺𑀦𑀸 𑀢𑀲𑁆𑀲 𑀲𑀗𑁆𑀖𑁂 𑀘 𑀲𑀘𑁆𑀘𑀸𑀪𑀺𑀲𑀫𑀬𑀲𑀗𑁆𑀔𑀸𑀢𑁂𑀦 𑀫𑀽𑀮𑁂𑀦 𑀚𑀸𑀢𑀫𑀽𑀮𑀸 𑀲𑀤𑁆𑀥𑀸, 𑀢𑀸𑀬 𑀅𑀳𑀁 𑀅𑀯𑀺𑀓𑀫𑁆𑀧𑀺𑀦𑀻𑀢𑀺 𑀤𑀲𑁆𑀲𑁂𑀢𑀺. 𑀢𑀢𑁄 𑀏𑀯 𑀥𑀻𑀢𑀸 𑀩𑀼𑀤𑁆𑀥𑀲𑁆𑀲 𑀑𑀭𑀲𑀸𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀉𑀭𑁂 𑀯𑀸𑀬𑀸𑀫𑀚𑀦𑀺𑀢𑀸𑀪𑀺𑀚𑀸𑀢𑀺𑀢𑀸𑀬 𑀑𑀭𑀲𑀧𑀼𑀢𑁆𑀢𑀻.

𑁮𑁪𑁮. 𑀲𑀸𑀳𑀁 𑀭𑀫𑀸𑀫𑀻𑀢𑀺 𑀲𑀸 𑀅𑀳𑀁 𑀢𑀤𑀸 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀇𑀤𑀸𑀦𑀺 𑀤𑁂𑀯𑀽𑀧𑀧𑀢𑁆𑀢𑀺𑀬𑀸 𑀆𑀕𑀢𑀸 𑀫𑀕𑁆𑀕𑀭𑀢𑀺𑀬𑀸 𑀨𑀮𑀭𑀢𑀺𑀬𑀸 𑀘 𑀭𑀫𑀸𑀫𑀺, 𑀓𑀸𑀫𑀕𑀼𑀡𑀭𑀢𑀺𑀬𑀸 𑀓𑀻𑀴𑀸𑀫𑀺, 𑀉𑀪𑀬𑁂𑀦𑀸𑀧𑀺 𑀫𑁄𑀤𑀸𑀫𑀺. 𑀅𑀢𑁆𑀢𑀸𑀦𑀼𑀯𑀸𑀤𑀪𑀬𑀸𑀤𑀻𑀦𑀁 𑀅𑀧𑀕𑀢𑀢𑁆𑀢𑀸 𑀅𑀓𑀼𑀢𑁄𑀪𑀬𑀸. 𑀫𑀥𑀼𑀫𑀤𑁆𑀤𑀯𑀦𑁆𑀢𑀺 𑀫𑀥𑀼𑀲𑀗𑁆𑀔𑀸𑀢𑀁 𑀫𑀤𑁆𑀤𑀯𑀓𑀭𑀁, 𑀦𑀘𑁆𑀘𑀦𑀕𑀸𑀬𑀦𑀓𑀸𑀮𑁂𑀲𑀼 𑀲𑀭𑀻𑀭𑀲𑁆𑀲 𑀲𑀭𑀲𑁆𑀲 𑀘 𑀫𑀼𑀤𑀼𑀪𑀸𑀯𑀸𑀯𑀳𑀁 𑀕𑀦𑁆𑀥𑀧𑀸𑀦𑀁 𑀲𑀦𑁆𑀥𑀸𑀬 𑀯𑀤𑀢𑀺.‘‘𑀫𑀥𑀼𑀫𑀸𑀤𑀯’’𑀦𑁆𑀢𑀺𑀧𑀺 𑀧𑀞𑀦𑁆𑀢𑀺, 𑀆𑀤𑀯𑀁 𑀬𑀸𑀯𑀤𑀯𑀁 𑀬𑀸𑀯𑀤𑁂𑀯 𑀤𑀯𑀢𑁆𑀣𑀁 𑀫𑀥𑀼𑀭𑀁 𑀧𑀺𑀯𑀸𑀫𑀻𑀢𑀺 𑀅𑀢𑁆𑀣𑁄.

𑁮𑁪𑁯. 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀸𑀦𑀫𑀸𑀓𑀭𑀸𑀢𑀺 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀪𑀽𑀢𑀸𑀦𑀁 𑀅𑀭𑀺𑀬𑀸𑀦𑀁 𑀫𑀕𑁆𑀕𑀨𑀮𑀝𑁆𑀞𑀸𑀦𑀁 𑀅𑀭𑀺𑀬𑀲𑀗𑁆𑀖𑀲𑁆𑀲 𑀆𑀓𑀭𑀸 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀁 𑀢𑀣𑀸𑀕𑀢𑀸. 𑀬𑀣𑀸𑀢𑀺 𑀬𑀲𑁆𑀫𑀺𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑁂. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀅𑀣𑀸𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀅𑀢𑁆𑀢𑀦𑀸 𑀘 𑀤𑁂𑀯𑀢𑀸𑀬 𑀘 𑀧𑀯𑀢𑁆𑀢𑀺𑀢𑀁 𑀇𑀫𑀁 𑀓𑀣𑀸𑀲𑀮𑁆𑀮𑀸𑀧𑀁 𑀫𑀦𑀼𑀲𑁆𑀲𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺. 𑀪𑀕𑀯𑀸 𑀢𑀫𑀢𑁆𑀣𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑀸 𑀤𑁂𑀲𑀦𑀸 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀅𑀳𑁄𑀲𑀻𑀢𑀺.

𑀭𑀚𑁆𑀚𑀼𑀫𑀸𑀮𑀸𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀧𑀭𑀫𑀢𑁆𑀣𑀤𑀻𑀧𑀦𑀺𑀬𑀸 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬 𑀯𑀺𑀫𑀸𑀦𑀯𑀢𑁆𑀣𑀼𑀲𑁆𑀫𑀺𑀁

𑀤𑁆𑀯𑀸𑀤𑀲𑀯𑀢𑁆𑀣𑀼𑀧𑀝𑀺𑀫𑀡𑁆𑀟𑀺𑀢𑀲𑁆𑀲 𑀘𑀢𑀼𑀢𑁆𑀣𑀲𑁆𑀲 𑀫𑀜𑁆𑀚𑀺𑀝𑁆𑀞𑀓𑀯𑀕𑁆𑀕𑀲𑁆𑀲

𑀅𑀢𑁆𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑀸 𑀘 𑀇𑀢𑁆𑀣𑀺𑀯𑀺𑀫𑀸𑀦𑀯𑀡𑁆𑀡𑀦𑀸.