𑁪. 𑀮𑀢𑀸𑀯𑀺𑀫𑀸𑀦𑀯𑀡𑁆𑀡𑀦𑀸

𑀮𑀢𑀸 𑀘 𑀲𑀚𑁆𑀚𑀸 𑀧𑀯𑀭𑀸 𑀘 𑀤𑁂𑀯𑀢𑀸𑀢𑀺 𑀮𑀢𑀸𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂. 𑀢𑁂𑀦 𑀘 𑀲𑀫𑀬𑁂𑀦 𑀲𑀸𑀯𑀢𑁆𑀣𑀺𑀯𑀸𑀲𑀺𑀦𑁄 𑀅𑀜𑁆𑀜𑀢𑀭𑀲𑁆𑀲 𑀉𑀧𑀸𑀲𑀓𑀲𑁆𑀲 𑀥𑀻𑀢𑀸 𑀮𑀢𑀸 𑀦𑀸𑀫 𑀧𑀡𑁆𑀟𑀺𑀢𑀸 𑀩𑁆𑀬𑀢𑁆𑀢𑀸 𑀫𑁂𑀥𑀸𑀯𑀺𑀦𑀻 𑀧𑀢𑀺𑀓𑀼𑀮𑀁 𑀕𑀢𑀸 𑀪𑀢𑁆𑀢𑀼 𑀲𑀲𑁆𑀲𑀼𑀲𑀲𑀼𑀭𑀸𑀦𑀜𑁆𑀘 𑀫𑀦𑀸𑀧𑀘𑀸𑀭𑀺𑀦𑀻 𑀧𑀺𑀬𑀯𑀸𑀤𑀺𑀦𑀻 𑀧𑀭𑀺𑀚𑀦𑀲𑁆𑀲 𑀲𑀗𑁆𑀕𑀳𑀓𑀼𑀲𑀮𑀸 𑀕𑁂𑀳𑁂 𑀓𑀼𑀝𑀼𑀫𑁆𑀩𑀪𑀸𑀭𑀲𑁆𑀲 𑀦𑀺𑀢𑁆𑀣𑀭𑀡𑀲𑀫𑀢𑁆𑀣𑀸 𑀅𑀓𑁆𑀓𑁄𑀥𑀦𑀸 𑀲𑀻𑀮𑀸𑀘𑀸𑀭𑀲𑀫𑁆𑀧𑀦𑁆𑀦𑀸 𑀤𑀸𑀦𑀲𑀁𑀯𑀺𑀪𑀸𑀕𑀭𑀢𑀸 𑀅𑀔𑀡𑁆𑀟𑀧𑀜𑁆𑀘𑀲𑀻𑀮𑀸 𑀉𑀧𑁄𑀲𑀣𑀭𑀓𑁆𑀔𑀡𑁂 𑀘 𑀅𑀧𑁆𑀧𑀫𑀢𑁆𑀢𑀸 𑀅𑀳𑁄𑀲𑀺. 𑀲𑀸 𑀅𑀧𑀭𑀪𑀸𑀕𑁂 𑀓𑀸𑀮𑀁 𑀓𑀢𑁆𑀯𑀸 𑀯𑁂𑀲𑁆𑀲𑀯𑀡𑀲𑁆𑀲 𑀫𑀳𑀸𑀭𑀸𑀚𑀲𑁆𑀲 𑀥𑀻𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺 𑀮𑀢𑀸𑀢𑁆𑀯𑁂𑀯 𑀦𑀸𑀫𑁂𑀦. 𑀅𑀜𑁆𑀜𑀸𑀧𑀺 𑀢𑀲𑁆𑀲𑀸 𑀲𑀚𑁆𑀚𑀸, 𑀧𑀯𑀭𑀸, 𑀅𑀘𑁆𑀘𑀺𑀫𑀢𑀻, 𑀲𑀼𑀢𑀸𑀢𑀺 𑀘𑀢𑀲𑁆𑀲𑁄 𑀪𑀕𑀺𑀦𑀺𑀬𑁄 𑀅𑀳𑁂𑀲𑀼𑀁. 𑀢𑀸 𑀧𑀜𑁆𑀘𑀧𑀺 𑀲𑀓𑁆𑀓𑁂𑀦 𑀤𑁂𑀯𑀭𑀸𑀚𑁂𑀦 𑀆𑀦𑁂𑀢𑁆𑀯𑀸 𑀦𑀸𑀝𑀓𑀺𑀢𑁆𑀣𑀺𑀪𑀸𑀯𑁂𑀦 𑀧𑀭𑀺𑀘𑀸𑀭𑀺𑀓𑀝𑁆𑀞𑀸𑀦𑁂 𑀞𑀧𑀺𑀢𑀸. 𑀮𑀢𑀸 𑀧𑀦𑀲𑁆𑀲 𑀦𑀘𑁆𑀘𑀕𑀻𑀢𑀸𑀤𑀻𑀲𑀼 𑀙𑁂𑀓𑀢𑀸𑀬 𑀇𑀝𑁆𑀞𑀢𑀭𑀸 𑀅𑀳𑁄𑀲𑀺.

𑀢𑀸𑀲𑀁 𑀏𑀓𑀢𑁄 𑀲𑀫𑀸𑀕𑀦𑁆𑀢𑁆𑀯𑀸 𑀲𑀼𑀔𑀦𑀺𑀲𑀚𑁆𑀚𑀸𑀬 𑀦𑀺𑀲𑀺𑀦𑁆𑀦𑀸𑀦𑀁 𑀲𑀗𑁆𑀕𑀻𑀢𑀦𑁂𑀧𑀼𑀜𑁆𑀜𑀁 𑀧𑀝𑀺𑀘𑁆𑀘 𑀯𑀺𑀯𑀸𑀤𑁄 𑀉𑀧𑁆𑀧𑀦𑁆𑀦𑁄. 𑀢𑀸 𑀲𑀩𑁆𑀩𑀸𑀧𑀺 𑀯𑁂𑀲𑁆𑀲𑀯𑀡𑀲𑁆𑀲 𑀫𑀳𑀸𑀭𑀸𑀚𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀺𑀁𑀲𑀼 ‘‘𑀢𑀸𑀢, 𑀓𑀢𑀫𑀸 𑀅𑀫𑁆𑀳𑀸𑀓𑀁 𑀦𑀘𑁆𑀘𑀸𑀤𑀻𑀲𑀼 𑀓𑀼𑀲𑀮𑀸’’𑀢𑀺? 𑀲𑁄 𑀏𑀯𑀫𑀸𑀳 ‘‘𑀕𑀘𑁆𑀙𑀣 𑀥𑀻𑀢𑀭𑁄 𑀅𑀦𑁄𑀢𑀢𑁆𑀢𑀤𑀳𑀢𑀻𑀭𑁂 𑀤𑁂𑀯𑀲𑀫𑀸𑀕𑀫𑁂 𑀲𑀗𑁆𑀕𑀻𑀢𑀁 𑀧𑀯𑀢𑁆𑀢𑁂𑀣, 𑀢𑀢𑁆𑀣 𑀯𑁄 𑀯𑀺𑀲𑁂𑀲𑁄 𑀧𑀸𑀓𑀝𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀢𑀸 𑀢𑀣𑀸 𑀅𑀓𑀁𑀲𑀼. 𑀢𑀢𑁆𑀣 𑀤𑁂𑀯𑀧𑀼𑀢𑁆𑀢𑀸 𑀮𑀢𑀸𑀬 𑀦𑀘𑁆𑀘𑀫𑀸𑀦𑀸𑀬 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦 𑀞𑀸𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼, 𑀲𑀜𑁆𑀚𑀸𑀢𑀧𑀳𑀸𑀲𑀸 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀘𑀺𑀢𑁆𑀢𑀚𑀸𑀢𑀸 𑀦𑀺𑀭𑀦𑁆𑀢𑀭𑀁 𑀲𑀸𑀥𑀼𑀓𑀸𑀭𑀁 𑀤𑁂𑀦𑁆𑀢𑀸 𑀉𑀓𑁆𑀓𑀼𑀝𑁆𑀞𑀺𑀲𑀤𑁆𑀤𑁂 𑀘𑁂𑀮𑀼𑀓𑁆𑀔𑁂𑀧𑁂 𑀘 𑀧𑀯𑀢𑁆𑀢𑁂𑀦𑁆𑀢𑀸 𑀳𑀺𑀫𑀯𑀦𑁆𑀢𑀁 𑀓𑀫𑁆𑀧𑀬𑀫𑀸𑀦𑀸 𑀯𑀺𑀬 𑀫𑀳𑀦𑁆𑀢𑀁 𑀓𑁄𑀮𑀸𑀳𑀮𑀫𑀓𑀁𑀲𑀼. 𑀇𑀢𑀭𑀸𑀲𑀼 𑀧𑀦 𑀦𑀘𑁆𑀘𑀦𑁆𑀢𑀻𑀲𑀼 𑀲𑀺𑀲𑀺𑀭𑀓𑀸𑀮𑁂 𑀓𑁄𑀓𑀺𑀮𑀸 𑀯𑀺𑀬 𑀢𑀼𑀡𑁆𑀳𑀻𑀪𑀽𑀢𑀸 𑀦𑀺𑀲𑀻𑀤𑀺𑀁𑀲𑀼. 𑀏𑀯𑀁 𑀢𑀢𑁆𑀣 𑀲𑀗𑁆𑀕𑀻𑀢𑁂 𑀮𑀢𑀸𑀬 𑀯𑀺𑀲𑁂𑀲𑁄 𑀧𑀸𑀓𑀝𑁄 𑀅𑀳𑁄𑀲𑀺.

𑀅𑀣 𑀢𑀸𑀲𑀁 𑀤𑁂𑀯𑀥𑀻𑀢𑀸𑀦𑀁 𑀲𑀼𑀢𑀸𑀬 𑀤𑁂𑀯𑀥𑀻𑀢𑀸𑀬 𑀏𑀢𑀤𑀳𑁄𑀲𑀺 ‘‘𑀓𑀺𑀁 𑀦𑀼 𑀔𑁄 𑀓𑀫𑁆𑀫𑀁 𑀓𑀢𑁆𑀯𑀸 𑀅𑀬𑀁 𑀮𑀢𑀸 𑀅𑀫𑁆𑀳𑁂 𑀅𑀪𑀺𑀪𑀼𑀬𑁆𑀬 𑀢𑀺𑀝𑁆𑀞𑀢𑀺 𑀯𑀡𑁆𑀡𑁂𑀦 𑀘𑁂𑀯 𑀬𑀲𑀲𑀸 𑀘, 𑀬𑀁𑀦𑀽𑀦𑀸𑀳𑀁 𑀮𑀢𑀸𑀬 𑀓𑀢𑀓𑀫𑁆𑀫𑀁 𑀧𑀼𑀘𑁆𑀙𑁂𑀬𑁆𑀬’’𑀦𑁆𑀢𑀺. 𑀲𑀸 𑀢𑀁 𑀧𑀼𑀘𑁆𑀙𑀺. 𑀇𑀢𑀭𑀸𑀧𑀺 𑀢𑀲𑁆𑀲𑀸 𑀏𑀢𑀫𑀢𑁆𑀣𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀢𑀬𑀺𑀤𑀁 𑀲𑀩𑁆𑀩𑀁 𑀯𑁂𑀲𑁆𑀲𑀯𑀡𑀫𑀳𑀸𑀭𑀸𑀚𑀸 𑀤𑁂𑀯𑀘𑀸𑀭𑀺𑀓𑀯𑀲𑁂𑀦 𑀉𑀧𑀕𑀢𑀲𑁆𑀲 𑀆𑀬𑀲𑁆𑀫𑀢𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀆𑀘𑀺𑀓𑁆𑀔𑀺. 𑀣𑁂𑀭𑁄 𑀢𑀫𑀢𑁆𑀣𑀁 𑀧𑀼𑀘𑁆𑀙𑀸𑀬 𑀫𑀽𑀮𑀓𑀸𑀭𑀡𑀢𑁄 𑀧𑀝𑁆𑀞𑀸𑀬 𑀪𑀕𑀯𑀢𑁄 𑀆𑀭𑁄𑀘𑁂𑀦𑁆𑀢𑁄 𑁋

𑁩𑁧𑁬. ‘‘𑀮𑀢𑀸 𑀘 𑀲𑀚𑁆𑀚𑀸 𑀧𑀯𑀭𑀸 𑀘 𑀤𑁂𑀯𑀢𑀸, 𑀅𑀘𑁆𑀘𑀺𑀫𑀢𑀻 𑀭𑀸𑀚𑀯𑀭𑀲𑁆𑀲 𑀲𑀺𑀭𑀻𑀫𑀢𑁄;

𑀲𑀼𑀢𑀸 𑀘 𑀭𑀜𑁆𑀜𑁄 𑀯𑁂𑀲𑁆𑀲𑀯𑀡𑀲𑁆𑀲 𑀥𑀻𑀢𑀸, 𑀭𑀸𑀚𑀻𑀫𑀢𑀻 𑀥𑀫𑁆𑀫𑀕𑀼𑀡𑁂𑀳𑀺 𑀲𑁄𑀪𑀣.

𑁩𑁧𑁭. ‘‘𑀧𑀜𑁆𑀘𑁂𑀢𑁆𑀣 𑀦𑀸𑀭𑀺𑀬𑁄 𑀆𑀕𑀫𑀁𑀲𑀼 𑀦𑁆𑀳𑀸𑀬𑀺𑀢𑀼𑀁, 𑀲𑀻𑀢𑁄𑀤𑀓𑀁 𑀉𑀧𑁆𑀧𑀮𑀺𑀦𑀺𑀁 𑀲𑀺𑀯𑀁 𑀦𑀤𑀺𑀁;

𑀢𑀸 𑀢𑀢𑁆𑀣 𑀦𑁆𑀳𑀸𑀬𑀺𑀢𑁆𑀯𑀸 𑀭𑀫𑁂𑀢𑁆𑀯𑀸 𑀤𑁂𑀯𑀢𑀸, 𑀦𑀘𑁆𑀘𑀺𑀢𑁆𑀯𑀸 𑀕𑀸𑀬𑀺𑀢𑁆𑀯𑀸 𑀲𑀼𑀢𑀸 𑀮𑀢𑀁 𑀩𑁆𑀭𑀯𑀺.

𑁩𑁧𑁮. ‘‘𑀧𑀼𑀘𑁆𑀙𑀸𑀫𑀺 𑀢𑀁 𑀉𑀧𑁆𑀧𑀮𑀫𑀸𑀮𑀥𑀸𑀭𑀺𑀦𑀺, 𑀆𑀯𑁂𑀴𑀺𑀦𑀺 𑀓𑀜𑁆𑀘𑀦𑀲𑀦𑁆𑀦𑀺𑀪𑀢𑁆𑀢𑀘𑁂;

𑀢𑀺𑀫𑀺𑀭𑀢𑀫𑁆𑀩𑀓𑁆𑀔𑀺 𑀦𑀪𑁂𑀯 𑀲𑁄𑀪𑀦𑁂, 𑀤𑀻𑀖𑀸𑀬𑀼𑀓𑀻 𑀓𑁂𑀦 𑀓𑀢𑁄 𑀬𑀲𑁄 𑀢𑀯.

𑁩𑁧𑁯. ‘‘𑀓𑁂𑀦𑀸𑀲𑀺 𑀪𑀤𑁆𑀤𑁂 𑀧𑀢𑀺𑀦𑁄 𑀧𑀺𑀬𑀢𑀭𑀸, 𑀯𑀺𑀲𑀺𑀝𑁆𑀞𑀓𑀮𑁆𑀬𑀸𑀡𑀺𑀢𑀭𑀲𑁆𑀲𑀼 𑀭𑀽𑀧𑀢𑁄;

𑀧𑀤𑀓𑁆𑀔𑀺𑀡𑀸 𑀦𑀘𑁆𑀘𑀦𑀕𑀻𑀢𑀯𑀸𑀤𑀺𑀢𑁂, 𑀆𑀘𑀺𑀓𑁆𑀔 𑀦𑁄 𑀢𑁆𑀯𑀁 𑀦𑀭𑀦𑀸𑀭𑀺𑀧𑀼𑀘𑁆𑀙𑀺𑀢𑀸’’𑀢𑀺. 𑁋

𑀲𑀼𑀢𑀸𑀬 𑀧𑀼𑀘𑁆𑀙𑀸.

𑁩𑁨𑁦. ‘‘𑀅𑀳𑀁 𑀫𑀦𑀼𑀲𑁆𑀲𑁂𑀲𑀼 𑀫𑀦𑀼𑀲𑁆𑀲𑀪𑀽𑀢𑀸, 𑀉𑀴𑀸𑀭𑀪𑁄𑀕𑁂 𑀓𑀼𑀮𑁂 𑀲𑀼𑀡𑀺𑀲𑀸 𑀅𑀳𑁄𑀲𑀺𑀁;

𑀅𑀓𑁆𑀓𑁄𑀥𑀦𑀸 𑀪𑀢𑁆𑀢𑀼 𑀯𑀲𑀸𑀦𑀼𑀯𑀢𑁆𑀢𑀺𑀦𑀻, 𑀉𑀧𑁄𑀲𑀣𑁂 𑀅𑀧𑁆𑀧𑀫𑀢𑁆𑀢𑀸 𑀅𑀳𑁄𑀲𑀺𑀁.

𑁩𑁨𑁧. ‘‘𑀫𑀦𑀼𑀲𑁆𑀲𑀪𑀽𑀢𑀸 𑀤𑀳𑀭𑀸 𑀅𑀧𑀸𑀧𑀺𑀓𑀸, 𑀧𑀲𑀦𑁆𑀦𑀘𑀺𑀢𑁆𑀢𑀸 𑀧𑀢𑀺𑀫𑀸𑀪𑀺𑀭𑀸𑀥𑀬𑀺𑀁;

𑀲𑀤𑁂𑀯𑀭𑀁 𑀲𑀲𑁆𑀲𑀲𑀼𑀭𑀁 𑀲𑀤𑀸𑀲𑀓𑀁, 𑀅𑀪𑀺𑀭𑀸𑀥𑀬𑀺𑀁 𑀢𑀫𑁆𑀳𑀺 𑀓𑀢𑁄 𑀬𑀲𑁄 𑀫𑀫.

𑁩𑁨𑁨. ‘‘𑀲𑀸𑀳𑀁 𑀢𑁂𑀦 𑀓𑀼𑀲𑀮𑁂𑀦 𑀓𑀫𑁆𑀫𑀼𑀦𑀸, 𑀘𑀢𑀼𑀩𑁆𑀪𑀺 𑀞𑀸𑀦𑁂𑀳𑀺 𑀯𑀺𑀲𑁂𑀲𑀫𑀚𑁆𑀛𑀕𑀸;

𑀆𑀬𑀼𑀜𑁆𑀘 𑀯𑀡𑁆𑀡𑀜𑁆𑀘 𑀲𑀼𑀔𑀁 𑀩𑀮𑀜𑁆𑀘, 𑀔𑀺𑀟𑁆𑀟𑀸𑀭𑀢𑀺𑀁 𑀧𑀘𑁆𑀘𑀦𑀼𑀪𑁄𑀫𑀦𑀧𑁆𑀧𑀓𑀁.

𑁩𑁨𑁩. ‘‘𑀲𑀼𑀢𑀁 𑀦𑀼 𑀢𑀁 𑀪𑀸𑀲𑀢𑀺 𑀬𑀁 𑀅𑀬𑀁 𑀮𑀢𑀸, 𑀬𑀁 𑀦𑁄 𑀅𑀧𑀼𑀘𑁆𑀙𑀺𑀫𑁆𑀳 𑀅𑀓𑀺𑀢𑁆𑀢𑀬𑀻 𑀦𑁄;

𑀧𑀢𑀺𑀦𑁄 𑀓𑀺𑀭𑀫𑁆𑀳𑀸𑀓𑀁 𑀯𑀺𑀲𑀺𑀝𑁆𑀞 𑀦𑀸𑀭𑀻𑀦𑀁, 𑀕𑀢𑀻 𑀘 𑀢𑀸𑀲𑀁 𑀧𑀯𑀭𑀸 𑀘 𑀤𑁂𑀯𑀢𑀸.

𑁩𑁨𑁪. ‘‘𑀧𑀢𑀻𑀲𑀼 𑀥𑀫𑁆𑀫𑀁 𑀧𑀘𑀭𑀸𑀫 𑀲𑀩𑁆𑀩𑀸, 𑀧𑀢𑀺𑀩𑁆𑀩𑀢𑀸 𑀬𑀢𑁆𑀣 𑀪𑀯𑀦𑁆𑀢𑀺 𑀇𑀢𑁆𑀣𑀺𑀬𑁄;

𑀧𑀢𑀻𑀲𑀼 𑀥𑀫𑁆𑀫𑀁 𑀧𑀘𑀭𑀺𑀢𑁆𑀯𑀸 𑀲𑀩𑁆𑀩𑀸, 𑀮𑀘𑁆𑀙𑀸𑀫𑀲𑁂 𑀪𑀸𑀲𑀢𑀺 𑀬𑀁 𑀅𑀬𑀁 𑀮𑀢𑀸.

𑁩𑁨𑁫. ‘‘𑀲𑀻𑀳𑁄 𑀬𑀣𑀸 𑀧𑀩𑁆𑀩𑀢𑀲𑀸𑀦𑀼𑀕𑁄𑀘𑀭𑁄, 𑀫𑀳𑀺𑀦𑁆𑀥𑀭𑀁 𑀧𑀩𑁆𑀩𑀢𑀫𑀸𑀯𑀲𑀺𑀢𑁆𑀯𑀸;

𑀧𑀲𑀬𑁆𑀳 𑀳𑀦𑁆𑀢𑁆𑀯𑀸 𑀇𑀢𑀭𑁂 𑀘𑀢𑀼𑀧𑁆𑀧𑀤𑁂, 𑀔𑀼𑀤𑁆𑀤𑁂 𑀫𑀺𑀕𑁂 𑀔𑀸𑀤𑀢𑀺 𑀫𑀁𑀲𑀪𑁄𑀚𑀦𑁄.

𑁩𑁨𑁬. ‘‘𑀢𑀣𑁂𑀯 𑀲𑀤𑁆𑀥𑀸 𑀇𑀥 𑀅𑀭𑀺𑀬𑀲𑀸𑀯𑀺𑀓𑀸, 𑀪𑀢𑁆𑀢𑀸𑀭𑀁 𑀦𑀺𑀲𑁆𑀲𑀸𑀬 𑀧𑀢𑀺𑀁 𑀅𑀦𑀼𑀩𑁆𑀩𑀢𑀸;

𑀓𑁄𑀥𑀁 𑀯𑀥𑀺𑀢𑁆𑀯𑀸 𑀅𑀪𑀺𑀪𑀼𑀬𑁆𑀬 𑀫𑀘𑁆𑀙𑀭𑀁, 𑀲𑀕𑁆𑀕𑀫𑁆𑀳𑀺 𑀲𑀸 𑀫𑁄𑀤𑀢𑀺 𑀥𑀫𑁆𑀫𑀘𑀸𑀭𑀺𑀦𑀻’’𑀢𑀺. 𑁋

𑀮𑀢𑀸𑀬 𑀯𑀺𑀲𑁆𑀲𑀚𑁆𑀚𑀦𑀦𑁆𑀢𑀺 𑀆𑀳.

𑁩𑁧𑁬. 𑀢𑀢𑁆𑀣 𑀮𑀢𑀸 𑀘 𑀲𑀚𑁆𑀚𑀸 𑀧𑀯𑀭𑀸 𑀅𑀘𑁆𑀘𑀺𑀫𑀢𑀻 𑀲𑀼𑀢𑀸𑀢𑀺 𑀢𑀸𑀲𑀁 𑀦𑀸𑀫𑀁. 𑀘-𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑀢𑁆𑀣𑁄. 𑀭𑀸𑀚𑀯𑀭𑀲𑁆𑀲𑀸𑀢𑀺 𑀘𑀢𑀼𑀦𑁆𑀦𑀁 𑀫𑀳𑀸𑀭𑀸𑀚𑀸𑀦𑀁 𑀯𑀭𑀲𑁆𑀲 𑀲𑁂𑀝𑁆𑀞𑀲𑁆𑀲 𑀤𑁂𑀯𑀭𑀸𑀚𑀲𑁆𑀲. 𑀲𑀓𑁆𑀓𑀲𑁆𑀲 𑀧𑀭𑀺𑀘𑀸𑀭𑀺𑀓𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀭𑀜𑁆𑀜𑁄𑀢𑀺 𑀫𑀳𑀸𑀭𑀸𑀚𑀲𑁆𑀲. 𑀢𑁂𑀦𑀸𑀳 ‘‘𑀯𑁂𑀲𑁆𑀲𑀯𑀡𑀲𑁆𑀲 𑀥𑀻𑀢𑀸’’𑀢𑀺, 𑀇𑀤𑀁 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑀁, 𑀯𑀘𑀦𑀯𑀺𑀧𑀮𑁆𑀮𑀸𑀲𑁄 𑀯𑀸, 𑀥𑀻𑀢𑀭𑁄𑀢𑀺 𑀅𑀢𑁆𑀣𑁄. 𑀭𑀸𑀚𑀢𑀺 𑀯𑀺𑀚𑁆𑀚𑁄𑀢𑀢𑀻𑀢𑀺 𑀭𑀸𑀚𑀻, 𑀭𑀸𑀚𑀻𑀢𑀺 𑀫𑀢𑀸 𑀧𑀜𑁆𑀜𑀸𑀢𑀸 𑀭𑀸𑀚𑀻𑀫𑀢𑀻, 𑀇𑀤𑀁 𑀢𑀸𑀲𑀁 𑀲𑀩𑁆𑀩𑀸𑀲𑀁 𑀯𑀺𑀲𑁂𑀲𑀦𑀁. 𑀦𑀸𑀫𑀫𑁂𑀯 𑀏𑀢𑀁 𑀏𑀓𑀺𑀲𑁆𑀲𑀸 𑀤𑁂𑀯𑀢𑀸𑀬𑀸𑀢𑀺 𑀓𑁂𑀘𑀺, 𑀢𑁂𑀲𑀁 𑀫𑀢𑁂𑀦 ‘‘𑀧𑀯𑀭𑀸’’𑀢𑀺 𑀲𑀩𑁆𑀩𑀸𑀲𑀁 𑀯𑀺𑀲𑁂𑀲𑀦𑀫𑁂𑀯. 𑀥𑀫𑁆𑀫𑀕𑀼𑀡𑁂𑀳𑀻𑀢𑀺 𑀥𑀫𑁆𑀫𑀺𑀬𑁂𑀳𑀺 𑀥𑀫𑁆𑀫𑀢𑁄 𑀅𑀦𑀧𑁂𑀢𑁂𑀳𑀺 𑀕𑀼𑀡𑁂𑀳𑀺, 𑀬𑀣𑀸𑀪𑀼𑀘𑁆𑀘𑀕𑀼𑀡𑁂𑀳𑀻𑀢𑀺 𑀅𑀢𑁆𑀣𑁄. 𑀲𑁄𑀪𑀣𑀸𑀢𑀺 𑀯𑀺𑀭𑁄𑀘𑀣.

𑁩𑁧𑁭. 𑀧𑀜𑁆𑀘𑁂𑀢𑁆𑀣 𑀦𑀸𑀭𑀺𑀬𑁄𑀢𑀺 𑀧𑀜𑁆𑀘 𑀬𑀣𑀸𑀯𑀼𑀢𑁆𑀢𑀦𑀸𑀫𑀸 𑀤𑁂𑀯𑀥𑀻𑀢𑀭𑁄 𑀏𑀢𑁆𑀣 𑀇𑀫𑀲𑁆𑀫𑀺𑀁 𑀳𑀺𑀫𑀯𑀦𑁆𑀢𑀧𑀤𑁂𑀲𑁂. 𑀲𑀻𑀢𑁄𑀤𑀓𑀁 𑀉𑀧𑁆𑀧𑀮𑀺𑀦𑀺𑀁 𑀲𑀺𑀯𑀁 𑀦𑀤𑀺𑀦𑁆𑀢𑀺 𑀅𑀦𑁄𑀢𑀢𑁆𑀢𑀤𑀳𑀢𑁄 𑀦𑀺𑀓𑁆𑀔𑀦𑁆𑀢𑀦𑀤𑀺𑀫𑀼𑀔𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀦𑀘𑁆𑀘𑀺𑀢𑁆𑀯𑀸 𑀕𑀸𑀬𑀺𑀢𑁆𑀯𑀸𑀢𑀺 𑀧𑀺𑀢𑀼 𑀯𑁂𑀲𑁆𑀲𑀯𑀡𑀲𑁆𑀲 𑀆𑀡𑀸𑀬 𑀤𑁂𑀯𑀲𑀫𑀸𑀕𑀫𑁂 𑀢𑀸𑀳𑀺 𑀓𑀢𑀲𑁆𑀲 𑀦𑀘𑁆𑀘𑀕𑀻𑀢𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀼𑀢𑀸 𑀮𑀢𑀁 𑀩𑁆𑀭𑀯𑀻𑀢𑀺 𑀲𑀼𑀢𑀸 𑀤𑁂𑀯𑀥𑀻𑀢𑀸 𑀮𑀢𑀁 𑀅𑀢𑁆𑀢𑀦𑁄 𑀪𑀕𑀺𑀦𑀺𑀁 𑀓𑀣𑁂𑀲𑀺. ‘‘𑀲𑀼𑀢𑀸 𑀮𑀢𑀁 𑀩𑁆𑀭𑀯𑀼’’𑀦𑁆𑀢𑀺𑀧𑀺 𑀧𑀞𑀦𑁆𑀢𑀺, 𑀲𑀼𑀢𑀸 𑀥𑀻𑀢𑀭𑁄 𑀯𑁂𑀲𑁆𑀲𑀯𑀡𑀲𑁆𑀲 𑀫𑀳𑀸𑀭𑀸𑀚𑀲𑁆𑀲 𑀮𑀢𑀁 𑀓𑀣𑁂𑀲𑀼𑀦𑁆𑀢𑀺 𑀅𑀢𑁆𑀣𑁄.

𑁩𑁧𑁮. 𑀢𑀺𑀫𑀺𑀭𑀢𑀫𑁆𑀩𑀓𑁆𑀔𑀻𑀢𑀺 𑀦𑀺𑀘𑀼𑀮𑀓𑁂𑀲𑀭𑀪𑀸𑀲𑀲𑀤𑀺𑀲𑁂𑀳𑀺 𑀢𑀫𑁆𑀩𑀭𑀸𑀚𑀻𑀳𑀺 𑀲𑀫𑀦𑁆𑀦𑀸𑀕𑀢𑀓𑁆𑀔𑀺. 𑀦𑀪𑁂𑀯 𑀲𑁄𑀪𑀦𑁂𑀢𑀺 𑀦𑀪𑀁 𑀯𑀺𑀬 𑀲𑁄𑀪𑀫𑀸𑀦𑁂, 𑀲𑀭𑀤𑀲𑀫𑀬𑁂 𑀅𑀩𑁆𑀪𑀫𑀳𑀺𑀓𑀸𑀤𑀺𑀉𑀧𑀓𑁆𑀓𑀺𑀮𑁂𑀲𑀯𑀺𑀫𑀼𑀢𑁆𑀢𑀁 𑀦𑀪𑀁 𑀯𑀺𑀬 𑀲𑀼𑀯𑀺𑀲𑀼𑀤𑁆𑀥𑀗𑁆𑀕𑀧𑀘𑁆𑀘𑀗𑁆𑀕𑀢𑀸𑀬 𑀯𑀺𑀭𑀸𑀚𑀫𑀸𑀦𑁂𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀦𑀪𑁂𑀯𑀸𑀢𑀺 𑀦𑀪𑁂 𑀏𑀯, 𑀲𑀫𑀼𑀘𑁆𑀘𑀬𑀢𑁆𑀣𑁄 𑀏𑀯-𑀲𑀤𑁆𑀤𑁄, 𑀆𑀓𑀸𑀲𑀝𑁆𑀞𑀯𑀺𑀫𑀸𑀦𑁂𑀲𑀼 𑀳𑀺𑀫𑀯𑀦𑁆𑀢𑀬𑀼𑀕𑀦𑁆𑀥𑀭𑀸𑀤𑀺𑀪𑀽𑀫𑀺𑀧𑀝𑀺𑀩𑀤𑁆𑀥𑀝𑁆𑀞𑀸𑀦𑁂𑀲𑀼 𑀘𑀸𑀢𑀺 𑀲𑀩𑁆𑀩𑀢𑁆𑀣𑁂𑀯 𑀲𑁄𑀪𑀫𑀸𑀦𑁂𑀢𑀺 𑀅𑀢𑁆𑀣𑁄. 𑀓𑁂𑀦 𑀓𑀢𑁄𑀢𑀺 𑀓𑁂𑀦 𑀓𑀻𑀤𑀺𑀲𑁂𑀦 𑀧𑀼𑀜𑁆𑀜𑁂𑀦 𑀦𑀺𑀩𑁆𑀩𑀢𑁆𑀢𑀺𑀢𑁄. 𑀬𑀲𑁄𑀢𑀺 𑀧𑀭𑀺𑀯𑀸𑀭𑀲𑀫𑁆𑀧𑀢𑁆𑀢𑀺 𑀓𑀺𑀢𑁆𑀢𑀺𑀲𑀤𑁆𑀤𑁄 𑀘. 𑀓𑀺𑀢𑁆𑀢𑀺𑀲𑀤𑁆𑀤𑀕𑁆𑀕𑀳𑀡𑁂𑀦 𑀘 𑀓𑀺𑀢𑁆𑀢𑀺𑀲𑀤𑁆𑀤𑀳𑁂𑀢𑀼𑀪𑀽𑀢𑀸 𑀕𑀼𑀡𑀸 𑀕𑀬𑁆𑀳𑀦𑁆𑀢𑀺.

𑁩𑁧𑁯. 𑀧𑀢𑀺𑀦𑁄 𑀧𑀺𑀬𑀢𑀭𑀸𑀢𑀺 𑀲𑀸𑀫𑀺𑀦𑁄 𑀧𑀺𑀬𑀢𑀭𑀸 𑀲𑀸𑀫𑀺𑀯𑀮𑁆𑀮𑀪𑀸. 𑀢𑁂𑀦𑀲𑁆𑀲𑀸 𑀲𑀼𑀪𑀕𑀢𑀁 𑀤𑀲𑁆𑀲𑁂𑀢𑀺. 𑀯𑀺𑀲𑀺𑀝𑁆𑀞𑀓𑀮𑁆𑀬𑀸𑀡𑀺𑀢𑀭𑀲𑁆𑀲𑀽 𑀭𑀽𑀧𑀢𑁄𑀢𑀺 𑀭𑀽𑀧𑀲𑀫𑁆𑀧𑀢𑁆𑀢𑀺𑀬𑀸 𑀯𑀺𑀲𑀺𑀝𑁆𑀞𑀸 𑀉𑀢𑁆𑀢𑀫𑀸 𑀓𑀮𑁆𑀬𑀸𑀡𑀺𑀢𑀭𑀸 𑀲𑀼𑀦𑁆𑀤𑀭𑀢𑀭𑀸, 𑀅𑀲𑁆𑀲𑀽𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. ‘‘𑀯𑀺𑀲𑀺𑀝𑁆𑀞𑀓𑀮𑁆𑀬𑀸𑀡𑀺𑀢𑀭𑀸𑀲𑀺 𑀭𑀽𑀧𑀢𑁄’’𑀢𑀺 𑀘 𑀧𑀞𑀦𑁆𑀢𑀺. 𑀧𑀤𑀓𑁆𑀔𑀺𑀡𑀸𑀢𑀺 𑀧𑀓𑀸𑀭𑁂𑀳𑀺, 𑀯𑀺𑀲𑁂𑀲𑁂𑀦 𑀯𑀸 𑀤𑀓𑁆𑀔𑀺𑀡𑀸 𑀓𑀼𑀲𑀮𑀸. 𑀦𑀘𑁆𑀘𑀦𑀕𑀻𑀢𑀯𑀸𑀤𑀺𑀢𑁂𑀢𑀺 𑀏𑀢𑁆𑀣 𑀦𑀘𑁆𑀘𑀦𑀸𑀢𑀺 𑀯𑀺𑀪𑀢𑁆𑀢𑀺𑀮𑁄𑀧𑁄 𑀓𑀢𑁄, 𑀦𑀘𑁆𑀘𑁂 𑀘 𑀕𑀻𑀢𑁂 𑀘 𑀯𑀸𑀤𑀺𑀢𑁂 𑀘𑀸𑀢𑀺 𑀅𑀢𑁆𑀣𑁄. 𑀦𑀭𑀦𑀸𑀭𑀺𑀧𑀼𑀘𑁆𑀙𑀺𑀢𑀸𑀢𑀺 𑀤𑁂𑀯𑀧𑀼𑀢𑁆𑀢𑁂𑀳𑀺 𑀤𑁂𑀯𑀥𑀻𑀢𑀸𑀳𑀺 𑀘 ‘‘𑀓𑀳𑀁 𑀮𑀢𑀸, 𑀓𑀺𑀁 𑀓𑀭𑁄𑀢𑀺 𑀮𑀢𑀸’’𑀢𑀺 𑀭𑀽𑀧𑀤𑀲𑁆𑀲𑀦𑀢𑁆𑀣𑀜𑁆𑀘𑁂𑀯 𑀲𑀺𑀧𑁆𑀧𑀤𑀲𑁆𑀲𑀦𑀢𑁆𑀣𑀜𑁆𑀘 𑀧𑀼𑀘𑁆𑀙𑀺𑀢𑀸.

𑁩𑁨𑁧. 𑀦𑀺𑀘𑁆𑀘𑀁 𑀓𑀸𑀬𑁂𑀦 𑀅𑀲𑀁𑀲𑀝𑁆𑀞𑀢𑀸𑀬 𑀤𑁂𑀯𑁄 𑀯𑀺𑀬 𑀭𑀫𑁂𑀢𑀺, 𑀤𑀼𑀢𑀺𑀬𑁄 𑀯𑀭𑁄𑀢𑀺 𑀯𑀸 𑀤𑁂𑀯𑀭𑁄, 𑀪𑀢𑁆𑀢𑀼 𑀓𑀦𑀺𑀝𑁆𑀞𑀪𑀸𑀢𑀸, 𑀲𑀳 𑀤𑁂𑀯𑀭𑁂𑀦𑀸𑀢𑀺 𑀲𑀤𑁂𑀯𑀭𑀁. 𑀲𑀲𑁆𑀲𑀼 𑀘 𑀲𑀲𑀼𑀭𑁄 𑀘 𑀲𑀲𑀼𑀭𑀸, 𑀲𑀳 𑀲𑀲𑀼𑀭𑁂𑀳𑀻𑀢𑀺 𑀲𑀲𑁆𑀲𑀲𑀼𑀭𑀁. 𑀲𑀳 𑀤𑀸𑀲𑁂𑀳𑀺 𑀤𑀸𑀲𑀻𑀳𑀺 𑀘𑀸𑀢𑀺 𑀲𑀤𑀸𑀲𑀓𑀁 𑀧𑀢𑀺𑀫𑀸𑀪𑀺𑀭𑀸𑀥𑀬𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀫𑁆𑀳𑀺 𑀓𑀢𑁄𑀢𑀺 𑀢𑀫𑁆𑀳𑀺 𑀓𑀼𑀮𑁂, 𑀓𑀸𑀮𑁂 𑀯𑀸 𑀲𑀼𑀡𑀺𑀲𑀸𑀓𑀸𑀮𑁂 𑀓𑀢𑁄 𑀬𑀲𑁄 𑀢𑀦𑁆𑀦𑀺𑀩𑁆𑀩𑀢𑁆𑀢𑀓𑀧𑀼𑀜𑁆𑀜𑀲𑁆𑀲 𑀦𑀺𑀩𑁆𑀩𑀢𑁆𑀢𑀦𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀫𑀸𑀢𑀺 𑀇𑀤𑀁 ‘‘𑀓𑀢𑁄’’𑀢𑀺 𑀧𑀤𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 ‘‘𑀫𑀬𑀸’’𑀢𑀺 𑀧𑀭𑀺𑀡𑀸𑀫𑁂𑀢𑀩𑁆𑀩𑀁.

𑁩𑁨𑁨. 𑀘𑀢𑀼𑀩𑁆𑀪𑀺 𑀞𑀸𑀦𑁂𑀳𑀻𑀢𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺, 𑀘𑀢𑀽𑀲𑀼 𑀯𑀸 𑀞𑀸𑀦𑁂𑀲𑀼 𑀦𑀺𑀫𑀺𑀢𑁆𑀢𑀪𑀽𑀢𑁂𑀲𑀼. 𑀯𑀺𑀲𑁂𑀲𑀫𑀚𑁆𑀛𑀕𑀸𑀢𑀺 𑀅𑀜𑁆𑀜𑀸𑀳𑀺 𑀅𑀢𑀺𑀲𑀬𑀁 𑀅𑀥𑀺𑀕𑀢𑀸. 𑀆𑀬𑀼𑀜𑁆𑀘 𑀯𑀡𑁆𑀡𑀜𑁆𑀘 𑀲𑀼𑀔𑀁 𑀩𑀮𑀜𑁆𑀘𑀸𑀢𑀺 ‘‘𑀘𑀢𑀽𑀳𑀺 𑀞𑀸𑀦𑁂𑀳𑀻’’𑀢𑀺 𑀯𑀼𑀢𑁆𑀢𑀸𑀦𑀁 𑀲𑀭𑀽𑀧𑀢𑁄 𑀤𑀲𑁆𑀲𑀦𑀁. 𑀆𑀬𑀼𑀆𑀤𑀬𑁄 𑀏𑀯 𑀳𑀺𑀲𑁆𑀲𑀸 𑀅𑀜𑁆𑀜𑀸𑀳𑀺 𑀯𑀺𑀲𑀺𑀝𑁆𑀞𑀲𑀪𑀸𑀯𑀢𑀸𑀬 𑀯𑀺𑀲𑁂𑀲𑀸 𑀢𑀲𑁆𑀲𑀸 𑀢𑀣𑀸 𑀲𑀫𑁆𑀪𑀸𑀯𑀦𑀸𑀯𑀲𑁂𑀦 𑀕𑀳𑁂𑀢𑀩𑁆𑀩𑀢𑀸𑀬 𑀳𑁂𑀢𑀼𑀪𑀸𑀯𑀢𑁄 ‘‘𑀞𑀸𑀦’’𑀦𑁆𑀢𑀺 𑀘 𑀯𑀼𑀢𑁆𑀢𑀁. 𑀯𑀺𑀲𑁂𑀲𑀫𑀚𑁆𑀛𑀕𑀸. 𑀓𑀻𑀤𑀺𑀲𑀁? 𑀆𑀬𑀼𑀜𑁆𑀘 𑀯𑀡𑁆𑀡𑀜𑁆𑀘 𑀲𑀼𑀔𑀜𑁆𑀘 𑀩𑀮𑀜𑁆𑀘𑀸𑀢𑀺 𑀬𑁄𑀚𑀦𑀸.

𑁩𑁨𑁩. 𑀲𑀼𑀢𑀁 𑀦𑀼 𑀢𑀁 𑀪𑀸𑀲𑀢𑀺 𑀬𑀁 𑀅𑀬𑀁 𑀮𑀢𑀸𑀢𑀺 𑀅𑀬𑀁 𑀮𑀢𑀸 𑀅𑀫𑁆𑀳𑀸𑀓𑀁 𑀚𑁂𑀝𑁆𑀞𑀪𑀕𑀺𑀦𑀻 𑀬𑀁 𑀪𑀸𑀲𑀢𑀺, 𑀢𑀁 𑀢𑀼𑀫𑁆𑀳𑁂𑀳𑀺 𑀲𑀼𑀢𑀁 𑀦𑀼 𑀓𑀺𑀁 𑀅𑀲𑀼𑀢’’𑀦𑁆𑀢𑀺 𑀇𑀢𑀭𑀸 𑀢𑀺𑀲𑁆𑀲𑁄 𑀪𑀕𑀺𑀦𑀺𑀬𑁄 𑀧𑀼𑀘𑁆𑀙𑀢𑀺. 𑀬𑀁 𑀦𑁄𑀢𑀺 𑀬𑀁 𑀅𑀫𑁆𑀳𑀸𑀓𑀁 𑀲𑀁𑀲𑀬𑀺𑀢𑀁. 𑀦𑁄𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀧𑀼𑀦 𑀦𑁄𑀢𑀺 𑀅𑀫𑁆𑀳𑀸𑀓𑀁, 𑀅𑀯𑀥𑀸𑀭𑀡𑁂 𑀯𑀸 ‘‘𑀦 𑀦𑁄 𑀲𑀫𑀁 𑀅𑀢𑁆𑀣𑀻’’𑀢𑀺𑀆𑀤𑀻𑀲𑀼 (𑀔𑀼. 𑀧𑀸. 𑁬.𑁩; 𑀲𑀼. 𑀦𑀺. 𑁨𑁨𑁬) 𑀯𑀺𑀬, 𑀢𑁂𑀦 𑀅𑀓𑀺𑀢𑁆𑀢𑀬𑀺𑀬𑁂𑀯, 𑀅𑀯𑀺𑀧𑀭𑀻𑀢𑀁 𑀩𑁆𑀬𑀸𑀓𑀸𑀲𑀺𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀧𑀢𑀺𑀦𑁄 𑀓𑀺𑀭𑀫𑁆𑀳𑀸𑀓𑀁 𑀯𑀺𑀲𑀺𑀝𑁆𑀞 𑀦𑀸𑀭𑀻𑀦𑀁, 𑀕𑀢𑀻 𑀘 𑀢𑀸𑀲𑀁 𑀧𑀯𑀭𑀸 𑀘 𑀤𑁂𑀯𑀢𑀸𑀢𑀺 𑀅𑀦𑀢𑁆𑀣𑀢𑁄 𑀧𑀸𑀮𑀦𑀢𑁄 𑀧𑀢𑀺𑀦𑁄 𑀲𑀸𑀫𑀺𑀓𑀸 𑀦𑀸 𑀅𑀫𑁆𑀳𑀸𑀓𑀁 𑀦𑀸𑀭𑀻𑀦𑀁 𑀇𑀢𑁆𑀣𑀻𑀦𑀁 𑀯𑀺𑀲𑀺𑀝𑁆𑀞𑀸 𑀕𑀢𑀺 𑀘 𑀢𑀸𑀲𑀁 𑀧𑀝𑀺𑀲𑀭𑀡𑀜𑁆𑀘, 𑀢𑀸𑀲𑀁 𑀫𑀸𑀢𑀼𑀕𑀸𑀫𑀸𑀦𑀁 𑀲𑀭𑀡𑀢𑁄 𑀧𑀯𑀭𑀸 𑀉𑀢𑁆𑀢𑀫𑀸 𑀤𑁂𑀯𑀢𑀸 𑀘 𑀲𑀫𑁆𑀫𑀤𑁂𑀯 𑀆𑀭𑀸𑀥𑀺𑀢𑀸 𑀲𑀫𑁆𑀧𑀢𑀺 𑀆𑀬𑀢𑀺𑀜𑁆𑀘 𑀳𑀺𑀢𑀲𑀼𑀔𑀸𑀯𑀳𑀸𑀢𑀺 𑀅𑀢𑁆𑀣𑁄.

𑁩𑁨𑁪. 𑀧𑀢𑀻𑀲𑀼 𑀥𑀫𑁆𑀫𑀁 𑀧𑀘𑀭𑀸𑀫 𑀲𑀩𑁆𑀩𑀸𑀢𑀺 𑀲𑀩𑁆𑀩𑀸𑀯 𑀫𑀬𑀁 𑀧𑀢𑀻𑀲𑀼 𑀅𑀢𑁆𑀢𑀦𑁄 𑀲𑀸𑀫𑀺𑀓𑁂𑀲𑀼 𑀧𑀼𑀩𑁆𑀩𑀼𑀝𑁆𑀞𑀸𑀦𑀸𑀤𑀺𑀓𑀁 𑀘𑀭𑀺𑀢𑀩𑁆𑀩𑀥𑀫𑁆𑀫𑀁 𑀧𑀘𑀭𑀸𑀫. 𑀬𑀢𑁆𑀣𑀸𑀢𑀺 𑀬𑀁 𑀦𑀺𑀫𑀺𑀢𑁆𑀢𑀁, 𑀬𑀲𑁆𑀫𑀺𑀁 𑀯𑀸 𑀧𑀢𑀻𑀲𑀼 𑀘𑀭𑀺𑀢𑀩𑁆𑀩𑀥𑀫𑁆𑀫𑁂 𑀘𑀭𑀺𑀬𑀫𑀸𑀦𑁂 𑀇𑀢𑁆𑀣𑀺𑀬𑁄 𑀧𑀢𑀺𑀩𑁆𑀩𑀢𑀸 𑀦𑀸𑀫 𑀪𑀯𑀦𑁆𑀢𑀺. 𑀮𑀘𑁆𑀙𑀸𑀫𑀲𑁂 𑀪𑀸𑀲𑀢𑀺 𑀬𑀁 𑀅𑀬𑀁 𑀮𑀢𑀸𑀢𑀺 𑀅𑀬𑀁 𑀮𑀢𑀸 𑀬𑀁 𑀲𑀫𑁆𑀧𑀢𑁆𑀢𑀺𑀁 𑀏𑀢𑀭𑀳𑀺 𑀮𑀪𑀢𑀻𑀢𑀺 𑀪𑀸𑀲𑀢𑀺, 𑀢𑀁 𑀲𑀫𑁆𑀧𑀢𑁆𑀢𑀺𑀁 𑀧𑀢𑀻𑀲𑀼 𑀥𑀫𑁆𑀫𑀁 𑀧𑀘𑀭𑀺𑀢𑁆𑀯𑀸𑀢𑀺 𑀮𑀪𑀺𑀲𑁆𑀲𑀸𑀫.

𑁩𑁨𑁫. 𑀧𑀩𑁆𑀩𑀢𑀲𑀸𑀦𑀼𑀕𑁄𑀘𑀭𑁄𑀢𑀺 𑀧𑀩𑁆𑀩𑀢𑀯𑀦𑀲𑀡𑁆𑀟𑀘𑀸𑀭𑀻. 𑀫𑀳𑀺𑀦𑁆𑀥𑀭𑀁 𑀧𑀩𑁆𑀩𑀢𑀫𑀸𑀯𑀲𑀺𑀢𑁆𑀯𑀸𑀢𑀺 𑀫𑀳𑀺𑀁 𑀥𑀸𑀭𑁂𑀢𑀻𑀢𑀺 𑀫𑀳𑀺𑀦𑁆𑀥𑀭𑀦𑀸𑀫𑀓𑀁 𑀧𑀩𑁆𑀩𑀢𑀁 𑀅𑀘𑀮𑀁 𑀆𑀯𑀲𑀺𑀢𑁆𑀯𑀸 𑀅𑀥𑀺𑀯𑀲𑀺𑀢𑁆𑀯𑀸, 𑀢𑀢𑁆𑀣 𑀯𑀲𑀦𑁆𑀢𑁄𑀢𑀺 𑀅𑀢𑁆𑀣𑁄. ‘‘𑀆𑀯𑀲𑀺𑀢𑁆𑀯𑀸’’𑀢𑀺 𑀳𑀺 𑀧𑀤𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀪𑀼𑀫𑁆𑀫𑀢𑁆𑀣𑁂 𑀘𑁂𑀢𑀁 𑀉𑀧𑀬𑁄𑀕𑀯𑀘𑀦𑀁. 𑀧𑀲𑀬𑁆𑀳𑀸𑀢𑀺 𑀅𑀪𑀺𑀪𑀯𑀺𑀢𑁆𑀯𑀸. 𑀔𑀼𑀤𑁆𑀤𑁂𑀢𑀺 𑀩𑀮𑀯𑀲𑁂𑀦𑀦𑀺𑀳𑀻𑀦𑁂 𑀧𑀫𑀸𑀡𑀢𑁄 𑀧𑀦 𑀫𑀳𑀦𑁆𑀢𑁂 𑀳𑀢𑁆𑀣𑀺𑀆𑀤𑀺𑀓𑁂𑀧𑀺 𑀫𑀺𑀕𑁂 𑀲𑁄 𑀳𑀦𑁆𑀢𑀺𑀬𑁂𑀯.

𑁩𑁨𑁬. 𑀢𑀣𑁂𑀯𑀸𑀢𑀺 𑀕𑀸𑀣𑀸𑀬 𑀅𑀬𑀁 𑀉𑀧𑀫𑀸𑀲𑀁𑀲𑀦𑁆𑀤𑀦𑁂𑀦 𑀲𑀤𑁆𑀥𑀺𑀁 𑀅𑀢𑁆𑀣𑀬𑁄𑀚𑀦𑀸 𑁋 𑀬𑀣𑀸 𑀲𑀻𑀳𑁄 𑀅𑀢𑁆𑀢𑀦𑁄 𑀦𑀺𑀯𑀸𑀲𑀕𑁄𑀘𑀭𑀝𑁆𑀞𑀸𑀦𑀪𑀽𑀢𑀁 𑀧𑀩𑁆𑀩𑀢𑀁 𑀦𑀺𑀲𑁆𑀲𑀸𑀬 𑀯𑀲𑀦𑁆𑀢𑁄 𑀅𑀢𑁆𑀢𑀦𑁄 𑀬𑀣𑀺𑀘𑁆𑀙𑀺𑀢𑀫𑀢𑁆𑀣𑀁 𑀲𑀸𑀥𑁂𑀢𑀺, 𑀏𑀯𑀫𑁂𑀯 𑀲𑀸 𑀲𑀤𑁆𑀥𑀸 𑀧𑀲𑀦𑁆𑀦𑀸 𑀅𑀭𑀺𑀬𑀲𑀸𑀯𑀺𑀓𑀸 𑀖𑀸𑀲𑀘𑁆𑀙𑀸𑀤𑀦𑀸𑀤𑀻𑀳𑀺 𑀪𑀭𑀡𑀢𑁄 𑀧𑁄𑀲𑀦𑀢𑁄 𑀪𑀢𑁆𑀢𑀸𑀭𑀁 𑀧𑀢𑀺𑀁 𑀲𑀸𑀫𑀺𑀓𑀁 𑀦𑀺𑀲𑁆𑀲𑀸𑀬 𑀯𑀲𑀦𑁆𑀢𑀻 𑀲𑀩𑁆𑀩𑀢𑁆𑀣𑀸𑀧𑀺 𑀧𑀢𑀺𑀅𑀦𑀼𑀓𑀽𑀮𑀢𑀸𑀲𑀗𑁆𑀔𑀸𑀢𑁂𑀦 𑀯𑀢𑁂𑀦 𑀢𑀁 𑀅𑀦𑀼𑀩𑁆𑀩𑀢𑀸 𑀧𑀭𑀺𑀚𑀦𑀸𑀤𑀻𑀲𑀼 𑀉𑀧𑁆𑀧𑀚𑁆𑀚𑀦𑀓𑀁 𑀓𑁄𑀥𑀁 𑀯𑀥𑀺𑀢𑁆𑀯𑀸 𑀧𑀚𑀳𑀺𑀢𑁆𑀯𑀸 𑀧𑀭𑀺𑀕𑁆𑀕𑀳𑀯𑀢𑁆𑀣𑀽𑀲𑀼 𑀉𑀧𑁆𑀧𑀚𑁆𑀚𑀦𑀓𑀁 𑀫𑀘𑁆𑀙𑁂𑀭𑀁 𑀅𑀪𑀺𑀪𑀼𑀬𑁆𑀬 𑀅𑀪𑀺𑀪𑀯𑀺𑀢𑁆𑀯𑀸 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸 𑀧𑀢𑀺𑀩𑁆𑀩𑀢𑀸𑀥𑀫𑁆𑀫𑀲𑁆𑀲 𑀘 𑀉𑀧𑀸𑀲𑀺𑀓𑀸𑀥𑀫𑁆𑀫𑀲𑁆𑀲 𑀘 𑀲𑀫𑁆𑀫𑀤𑁂𑀯 𑀘𑀭𑀡𑀢𑁄 𑀥𑀫𑁆𑀫𑀘𑀸𑀭𑀺𑀦𑀻 𑀲𑀸 𑀲𑀕𑁆𑀕𑀫𑁆𑀳𑀺 𑀤𑁂𑀯𑀮𑁄𑀓𑁂 𑀫𑁄𑀤𑀢𑀺, 𑀧𑀫𑁄𑀤𑀁 𑀆𑀧𑀚𑁆𑀚𑀢𑀻𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀮𑀢𑀸𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.