𑁧𑁭. 𑀓𑁂𑀲𑀓𑀸𑀭𑀻𑀯𑀺𑀫𑀸𑀦𑀯𑀡𑁆𑀡𑀦𑀸

𑀇𑀤𑀁 𑀯𑀺𑀫𑀸𑀦𑀁 𑀭𑀼𑀘𑀺𑀭𑀁 𑀧𑀪𑀲𑁆𑀲𑀭𑀦𑁆𑀢𑀺 𑀓𑁂𑀲𑀓𑀸𑀭𑀻𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀩𑀸𑀭𑀸𑀡𑀲𑀺𑀬𑀁 𑀯𑀺𑀳𑀭𑀢𑀺 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀩𑀸𑀭𑀸𑀡𑀲𑀺𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀁𑀲𑀼. 𑀢𑁂 𑀅𑀜𑁆𑀜𑀢𑀭𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀕𑁂𑀳𑀤𑁆𑀯𑀸𑀭𑀲𑀫𑀻𑀧𑁂𑀦 𑀕𑀘𑁆𑀙𑀦𑁆𑀢𑀺. 𑀢𑀲𑁆𑀫𑀺𑀜𑁆𑀘 𑀕𑁂𑀳𑁂 𑀩𑁆𑀭𑀸𑀳𑁆𑀫𑀡𑀲𑁆𑀲 𑀥𑀻𑀢𑀸 𑀓𑁂𑀲𑀓𑀸𑀭𑀻 𑀦𑀸𑀫 𑀕𑁂𑀳𑀤𑁆𑀯𑀸𑀭𑀲𑀫𑀻𑀧𑁂 𑀫𑀸𑀢𑀼 𑀲𑀻𑀲𑀢𑁄 𑀊𑀓𑀸 𑀕𑀡𑁆𑀳𑀦𑁆𑀢𑀻 𑀢𑁂 𑀪𑀺𑀓𑁆𑀔𑀽 𑀕𑀘𑁆𑀙𑀦𑁆𑀢𑁂 𑀤𑀺𑀲𑁆𑀯𑀸 𑀫𑀸𑀢𑀭𑀁 𑀆𑀳 ‘‘𑀅𑀫𑁆𑀫, 𑀇𑀫𑁂 𑀧𑀩𑁆𑀩𑀚𑀺𑀢𑀸 𑀧𑀞𑀫𑁂𑀦 𑀬𑁄𑀩𑁆𑀩𑀦𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀪𑀺𑀭𑀽𑀧𑀸 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸 𑀲𑀼𑀔𑀼𑀫𑀸𑀮𑀸 𑀓𑁂𑀦𑀘𑀺 𑀧𑀸𑀭𑀺𑀚𑀼𑀜𑁆𑀜𑁂𑀦 𑀅𑀦𑀪𑀺𑀪𑀽𑀢𑀸 𑀫𑀜𑁆𑀜𑁂, 𑀓𑀲𑁆𑀫𑀸 𑀦𑀼 𑀔𑁄 𑀇𑀫𑁂 𑀇𑀫𑀲𑁆𑀫𑀺𑀁𑀬𑁂𑀯 𑀯𑀬𑁂 𑀧𑀩𑁆𑀩𑀚𑀦𑁆𑀢𑀻’’𑀢𑀺? 𑀢𑀁 𑀫𑀸𑀢𑀸 𑀆𑀳 ‘‘𑀅𑀢𑁆𑀣𑀺, 𑀅𑀫𑁆𑀫, 𑀲𑀓𑁆𑀬𑀧𑀼𑀢𑁆𑀢𑁄 𑀲𑀓𑁆𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑁄 𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄, 𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁, 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀺, 𑀢𑀲𑁆𑀲 𑀇𑀫𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀩𑁆𑀩𑀚𑀦𑁆𑀢𑀻’’𑀢𑀺.

𑀢𑁂𑀦 𑀘 𑀲𑀫𑀬𑁂𑀦 𑀆𑀕𑀢𑀨𑀮𑁄 𑀯𑀺𑀜𑁆𑀜𑀸𑀢𑀲𑀸𑀲𑀦𑁄 𑀅𑀜𑁆𑀜𑀢𑀭𑁄 𑀉𑀧𑀸𑀲𑀓𑁄 𑀢𑀸𑀬 𑀯𑀻𑀣𑀺𑀬𑀸 𑀕𑀘𑁆𑀙𑀦𑁆𑀢𑁄 𑀢𑀁 𑀓𑀣𑀁 𑀲𑀼𑀢𑁆𑀯𑀸 𑀢𑀸𑀲𑀁 𑀲𑀦𑁆𑀢𑀺𑀓𑀁 𑀉𑀧𑀲𑀗𑁆𑀓𑀫𑀺. 𑀅𑀣 𑀦𑀁 𑀩𑁆𑀭𑀸𑀳𑁆𑀫𑀡𑀻 𑀆𑀳 ‘‘𑀏𑀢𑀭𑀳𑀺 𑀔𑁄 𑀉𑀧𑀸𑀲𑀓 𑀩𑀳𑀽 𑀓𑀼𑀮𑀧𑀼𑀢𑁆𑀢𑀸 𑀫𑀳𑀦𑁆𑀢𑀁 𑀪𑁄𑀕𑀓𑁆𑀔𑀦𑁆𑀥𑀁 𑀫𑀳𑀦𑁆𑀢𑀁 𑀜𑀸𑀢𑀺𑀧𑀭𑀺𑀯𑀝𑁆𑀝𑀁 𑀧𑀳𑀸𑀬 𑀲𑀓𑁆𑀬𑀲𑀫𑀬𑁂 𑀧𑀩𑁆𑀩𑀚𑀦𑁆𑀢𑀺, 𑀢𑁂 𑀓𑀺𑀁 𑀦𑀼 𑀔𑁄 𑀅𑀢𑁆𑀣𑀯𑀲𑀁 𑀲𑀫𑁆𑀧𑀲𑁆𑀲𑀦𑁆𑀢𑀸 𑀧𑀩𑁆𑀩𑀚𑀦𑁆𑀢𑀻’’𑀢𑀺? 𑀢𑀁 𑀲𑀼𑀢𑁆𑀯𑀸 𑀉𑀧𑀸𑀲𑀓𑁄 ‘‘𑀓𑀸𑀫𑁂𑀲𑀼 𑀆𑀤𑀻𑀦𑀯𑀁, 𑀦𑁂𑀓𑁆𑀔𑀫𑁆𑀫𑁂 𑀘 𑀆𑀦𑀺𑀲𑀁𑀲𑀁 𑀲𑀫𑁆𑀧𑀲𑁆𑀲𑀦𑁆𑀢𑀸’’𑀢𑀺 𑀯𑀢𑁆𑀯𑀸 𑀅𑀢𑁆𑀢𑀦𑁄 𑀜𑀸𑀡𑀩𑀮𑀸𑀦𑀼𑀭𑀽𑀧𑀁 𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀓𑀣𑁂𑀲𑀺, 𑀢𑀺𑀡𑁆𑀡𑀜𑁆𑀘 𑀭𑀢𑀦𑀸𑀦𑀁 𑀕𑀼𑀡𑁂 𑀧𑀓𑀸𑀲𑁂𑀲𑀺, 𑀧𑀜𑁆𑀘𑀦𑁆𑀦𑀁 𑀲𑀻𑀮𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀁 𑀲𑀫𑁆𑀧𑀭𑀸𑀬𑀺𑀓𑀜𑁆𑀘 𑀕𑀼𑀡𑀸𑀦𑀺𑀲𑀁𑀲𑀁 𑀧𑀯𑁂𑀤𑁂𑀲𑀺. 𑀅𑀣 𑀩𑁆𑀭𑀸𑀳𑁆𑀫𑀡𑀥𑀻𑀢𑀸 𑀢𑀁 ‘‘𑀓𑀺𑀁 𑀅𑀫𑁆𑀳𑁂𑀳𑀺𑀧𑀺 𑀲𑀭𑀡𑁂𑀲𑀼 𑀘 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀸𑀬 𑀢𑀬𑀸 𑀯𑀼𑀢𑁆𑀢𑁂 𑀕𑀼𑀡𑀸𑀦𑀺𑀲𑀁𑀲𑁂 𑀅𑀥𑀺𑀕𑀦𑁆𑀢𑀼𑀁 𑀲𑀓𑁆𑀓𑀸’’𑀢𑀺 𑀧𑀼𑀘𑁆𑀙𑀺. 𑀲𑁄 ‘‘𑀲𑀩𑁆𑀩𑀲𑀸𑀥𑀸𑀭𑀡𑀸 𑀇𑀫𑁂 𑀥𑀫𑁆𑀫𑀸 𑀪𑀕𑀯𑀢𑀸 𑀪𑀸𑀲𑀺𑀢𑀸, 𑀓𑀲𑁆𑀫𑀸 𑀦 𑀲𑀓𑁆𑀓𑀸’’𑀢𑀺 𑀯𑀢𑁆𑀯𑀸 𑀢𑀲𑁆𑀲𑀸 𑀲𑀭𑀡𑀸𑀦𑀺 𑀘 𑀲𑀻𑀮𑀸𑀦𑀺 𑀘 𑀅𑀤𑀸𑀲𑀺. 𑀲𑀸 𑀕𑀳𑀺𑀢𑀲𑀭𑀡𑀸 𑀲𑀫𑀸𑀤𑀺𑀦𑁆𑀦𑀲𑀻𑀮𑀸 𑀘 𑀳𑀼𑀢𑁆𑀯𑀸 𑀧𑀼𑀦 𑀆𑀳 ‘‘𑀓𑀺𑀁 𑀇𑀢𑁄 𑀉𑀢𑁆𑀢𑀭𑀺 𑀅𑀜𑁆𑀜𑀫𑁆𑀧𑀺 𑀓𑀭𑀡𑀻𑀬𑀁 𑀅𑀢𑁆𑀣𑀻’’𑀢𑀺. 𑀲𑁄 𑀢𑀲𑁆𑀲𑀸 𑀯𑀺𑀜𑁆𑀜𑀼𑀪𑀸𑀯𑀁 𑀲𑀮𑁆𑀮𑀓𑁆𑀔𑁂𑀦𑁆𑀢𑁄 ‘‘𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀲𑀭𑀻𑀭𑀲𑀪𑀸𑀯𑀁 𑀯𑀺𑀪𑀸𑀯𑁂𑀦𑁆𑀢𑁄 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀢𑁆𑀯𑀸 𑀓𑀸𑀬𑁂 𑀯𑀺𑀭𑀸𑀕𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀉𑀧𑀭𑀺 𑀅𑀦𑀺𑀘𑁆𑀘𑀢𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑀸𑀬 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀁𑀯𑁂𑀚𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀕𑀢𑁄. 𑀲𑀸 𑀢𑁂𑀦 𑀯𑀼𑀢𑁆𑀢𑀦𑀬𑀁 𑀲𑀩𑁆𑀩𑀁 𑀫𑀦𑀲𑀺 𑀓𑀢𑁆𑀯𑀸 𑀧𑀝𑀺𑀓𑀽𑀮𑀫𑀦𑀲𑀺𑀓𑀸𑀭𑁂 𑀲𑀫𑀸𑀳𑀺𑀢𑀘𑀺𑀢𑁆𑀢𑀸 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀬𑀸 𑀦 𑀘𑀺𑀭𑀲𑁆𑀲𑁂𑀯 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀅𑀣𑀸𑀧𑀭𑁂𑀦 𑀲𑀫𑀬𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀲𑀓𑁆𑀓𑀲𑁆𑀲 𑀤𑁂𑀯𑀭𑀜𑁆𑀜𑁄 𑀧𑀭𑀺𑀘𑀸𑀭𑀺𑀓𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀲𑀢𑀲𑀳𑀲𑁆𑀲𑀜𑁆𑀘𑀲𑁆𑀲𑀸 𑀅𑀘𑁆𑀙𑀭𑀸𑀧𑀭𑀺𑀯𑀸𑀭𑁄 𑀅𑀳𑁄𑀲𑀺. 𑀢𑀁 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀤𑀺𑀲𑁆𑀯𑀸 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀘𑀺𑀢𑁆𑀢𑀚𑀸𑀢𑁄 𑀧𑀫𑀼𑀤𑀺𑀢𑀳𑀤𑀬𑁄 𑁋

𑁧𑁫𑁦. ‘‘𑀇𑀤𑀁 𑀯𑀺𑀫𑀸𑀦𑀁 𑀭𑀼𑀘𑀺𑀭𑀁 𑀧𑀪𑀲𑁆𑀲𑀭𑀁, 𑀯𑁂𑀴𑀼𑀭𑀺𑀬𑀣𑀫𑁆𑀪𑀁 𑀲𑀢𑀢𑀁 𑀲𑀼𑀦𑀺𑀫𑁆𑀫𑀺𑀢𑀁;

𑀲𑀼𑀯𑀡𑁆𑀡𑀭𑀼𑀓𑁆𑀔𑁂𑀳𑀺 𑀲𑀫𑀦𑁆𑀢𑀫𑁄𑀢𑁆𑀣𑀢𑀁, 𑀞𑀸𑀦𑀁 𑀫𑀫𑀁 𑀓𑀫𑁆𑀫𑀯𑀺𑀧𑀸𑀓𑀲𑀫𑁆𑀪𑀯𑀁.

𑁧𑁫𑁧. ‘‘𑀢𑀢𑁆𑀭𑀽𑀧𑀧𑀦𑁆𑀦𑀸 𑀧𑀼𑀭𑀺𑀫𑀘𑁆𑀙𑀭𑀸 𑀇𑀫𑀸, 𑀲𑀢𑀁 𑀲𑀳𑀲𑁆𑀲𑀸𑀦𑀺 𑀲𑀓𑁂𑀦 𑀓𑀫𑁆𑀫𑀼𑀦𑀸;

𑀢𑀼𑀯𑀁𑀲𑀺 𑀅𑀚𑁆𑀛𑀼𑀧𑀕𑀢𑀸 𑀬𑀲𑀲𑁆𑀲𑀺𑀦𑀻, 𑀑𑀪𑀸𑀲𑀬𑀁 𑀢𑀺𑀝𑁆𑀞𑀲𑀺 𑀧𑀼𑀩𑁆𑀩𑀤𑁂𑀯𑀢𑀸.

𑁧𑁫𑁨. ‘‘𑀲𑀲𑀻 𑀅𑀥𑀺𑀕𑁆𑀕𑀬𑁆𑀳 𑀬𑀣𑀸 𑀯𑀺𑀭𑁄𑀘𑀢𑀺, 𑀦𑀓𑁆𑀔𑀢𑁆𑀢𑀭𑀸𑀚𑀸𑀭𑀺𑀯 𑀢𑀸𑀭𑀓𑀸𑀕𑀡𑀁;

𑀢𑀣𑁂𑀯 𑀢𑁆𑀯𑀁 𑀅𑀘𑁆𑀙𑀭𑀸𑀲𑀗𑁆𑀕𑀡𑀁 𑀇𑀫𑀁, 𑀤𑀤𑁆𑀤𑀮𑁆𑀮𑀫𑀸𑀦𑀸 𑀬𑀲𑀲𑀸 𑀯𑀺𑀭𑁄𑀘𑀲𑀺.

𑁧𑁫𑁩. ‘‘𑀓𑀼𑀢𑁄 𑀦𑀼 𑀆𑀕𑀫𑁆𑀫 𑀅𑀦𑁄𑀫𑀤𑀲𑁆𑀲𑀦𑁂, 𑀉𑀧𑀧𑀦𑁆𑀦𑀸 𑀢𑁆𑀯𑀁 𑀪𑀯𑀦𑀁 𑀫𑀫𑀁 𑀇𑀤𑀁;

𑀩𑁆𑀭𑀳𑁆𑀫𑀁𑀯 𑀤𑁂𑀯𑀸 𑀢𑀺𑀤𑀲𑀸 𑀲𑀳𑀺𑀦𑁆𑀤𑀓𑀸, 𑀲𑀩𑁆𑀩𑁂 𑀦 𑀢𑀧𑁆𑀧𑀸𑀫𑀲𑁂 𑀤𑀲𑁆𑀲𑀦𑁂𑀦 𑀢’’𑀦𑁆𑀢𑀺. 𑁋

𑀘𑀢𑀽𑀳𑀺 𑀕𑀸𑀣𑀸𑀳𑀺 𑀢𑀸𑀬 𑀓𑀢𑀓𑀫𑁆𑀫𑀁 𑀧𑀼𑀘𑁆𑀙𑀺.

𑁧𑁫𑁦. 𑀢𑀢𑁆𑀣 𑀇𑀤𑀁 𑀯𑀺𑀫𑀸𑀦𑀦𑁆𑀢𑀺 𑀬𑀲𑁆𑀫𑀺𑀁 𑀯𑀺𑀫𑀸𑀦𑁂 𑀲𑀸 𑀤𑁂𑀯𑀢𑀸 𑀉𑀧𑁆𑀧𑀦𑁆𑀦𑀸, 𑀢𑀁 𑀅𑀢𑁆𑀢𑀦𑁄 𑀯𑀺𑀫𑀸𑀦𑀁 𑀲𑀦𑁆𑀥𑀸𑀬𑀸𑀳. 𑀲𑀢𑀢𑀦𑁆𑀢𑀺 𑀲𑀩𑁆𑀩𑀓𑀸𑀮𑀁 𑀭𑀼𑀘𑀺𑀭𑀁 𑀧𑀪𑀲𑁆𑀲𑀭𑀦𑁆𑀢𑀺 𑀬𑁄𑀚𑀦𑀸. 𑀲𑀢𑀢𑀦𑁆𑀢𑀺 𑀯𑀸 𑀲𑀫𑁆𑀫𑀸𑀢𑀢𑀁, 𑀅𑀢𑀺𑀯𑀺𑀬 𑀯𑀺𑀢𑁆𑀣𑀺𑀡𑁆𑀡𑀦𑁆𑀢𑀺 𑀅𑀢𑁆𑀣𑁄. 𑀲𑀫𑀦𑁆𑀢𑀫𑁄𑀢𑁆𑀣𑀢𑀦𑁆𑀢𑀺 𑀲𑀫𑀦𑁆𑀢𑀢𑁄 𑀅𑀯𑀢𑁆𑀣𑀢𑀁 𑀙𑀸𑀤𑀺𑀢𑀁. 𑀞𑀸𑀦𑀦𑁆𑀢𑀺 𑀯𑀺𑀫𑀸𑀦𑀫𑁂𑀯 𑀲𑀦𑁆𑀥𑀸𑀬 𑀯𑀤𑀢𑀺. 𑀢𑀜𑁆𑀳𑀺 𑀢𑀺𑀝𑁆𑀞𑀦𑁆𑀢𑀺 𑀏𑀢𑁆𑀣 𑀓𑀢𑀧𑀼𑀜𑁆𑀜𑀸𑀢𑀺 𑀞𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑀫𑁆𑀫𑀯𑀺𑀧𑀸𑀓𑀲𑀫𑁆𑀪𑀯𑀦𑁆𑀢𑀺 𑀓𑀫𑁆𑀫𑀯𑀺𑀧𑀸𑀓𑀪𑀸𑀯𑁂𑀦 𑀲𑀫𑁆𑀪𑀽𑀢𑀁, 𑀓𑀫𑁆𑀫𑀯𑀺𑀧𑀸𑀓𑁂𑀦 𑀯𑀸 𑀲𑀳 𑀲𑀫𑁆𑀪𑀽𑀢𑀁. 𑀫𑀫𑀦𑁆𑀢𑀺 𑀇𑀤𑀁 𑀫𑀫 𑀞𑀸𑀦𑀁 𑀫𑀫 𑀓𑀫𑁆𑀫𑀯𑀺𑀧𑀸𑀓𑀲𑀫𑁆𑀪𑀯𑀦𑁆𑀢𑀺 𑀤𑁆𑀯𑀻𑀳𑀺𑀧𑀺 𑀧𑀤𑁂𑀳𑀺 𑀬𑁄𑀚𑁂𑀢𑀩𑁆𑀩𑀁.

𑁧𑁫𑁧. 𑀢𑀢𑁆𑀭𑀽𑀧𑀧𑀦𑁆𑀦𑀸𑀢𑀺 𑀕𑀸𑀣𑀸𑀬 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀢𑀢𑁆𑀭 𑀢𑀲𑁆𑀫𑀺𑀁 𑀬𑀣𑀸𑀯𑀼𑀢𑁆𑀢𑁂 𑀯𑀺𑀫𑀸𑀦𑁂 𑀉𑀧𑀧𑀦𑁆𑀦𑀸𑀢𑀺 𑀦𑀺𑀩𑁆𑀩𑀢𑁆𑀢𑀸 𑀧𑀕𑁂𑀯 𑀉𑀧𑁆𑀧𑀦𑁆𑀦𑀢𑁆𑀢𑀸 𑀧𑀼𑀩𑁆𑀩𑀤𑁂𑀯𑀢𑀸 𑀇𑀫𑀸 𑀧𑀼𑀭𑀺𑀫𑀸 𑀅𑀘𑁆𑀙𑀭𑀸𑀬𑁄 𑀧𑀭𑀺𑀫𑀸𑀡𑀢𑁄 𑀲𑀢𑀁 𑀲𑀳𑀲𑁆𑀲𑀸𑀦𑀺. 𑀢𑀼𑀯𑀁𑀲𑀻𑀢𑀺 𑀢𑁆𑀯𑀁 𑀅𑀲𑀺 𑀲𑀓𑁂𑀦 𑀓𑀫𑁆𑀫𑀼𑀦𑀸 𑀅𑀚𑁆𑀛𑀼𑀧𑀕𑀢𑀸 𑀉𑀧𑀧𑀦𑁆𑀦𑀸. 𑀬𑀲𑀲𑁆𑀲𑀺𑀦𑀻𑀢𑀺 𑀧𑀭𑀺𑀯𑀸𑀭𑀲𑀫𑁆𑀧𑀦𑁆𑀦𑀸, 𑀢𑁂𑀦𑁂𑀯 𑀲𑀓𑁂𑀦 𑀓𑀫𑁆𑀫𑀼𑀦𑀸 𑀓𑀫𑁆𑀫𑀸𑀦𑀼𑀪𑀸𑀯𑁂𑀦 𑀑𑀪𑀸𑀲𑀬𑀦𑁆𑀢𑀻 𑀯𑀺𑀭𑁄𑀘𑀫𑀸𑀦𑀸 𑀢𑀺𑀝𑁆𑀞𑀲𑀻𑀢𑀺.

𑁧𑁫𑁨. 𑀇𑀤𑀸𑀦𑀺 𑀢𑀫𑁂𑀯 𑀑𑀪𑀸𑀲𑀦𑀁 𑀉𑀧𑀫𑀸𑀬 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀲𑀲𑀻’’𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀬𑀣𑀸 𑀲𑀲𑀮𑀜𑁆𑀙𑀦𑀬𑁄𑀕𑁂𑀦 ‘‘𑀲𑀲𑀻’’𑀢𑀺, 𑀦𑀓𑁆𑀔𑀢𑁆𑀢𑁂𑀳𑀺 𑀅𑀥𑀺𑀓𑀕𑀼𑀡𑀢𑀸𑀬 ‘‘𑀦𑀓𑁆𑀔𑀢𑁆𑀢𑀭𑀸𑀚𑀸’’𑀢𑀺 𑀘 𑀮𑀤𑁆𑀥𑀦𑀸𑀫𑁄 𑀘𑀦𑁆𑀤𑁄 𑀲𑀩𑁆𑀩𑀁 𑀢𑀸𑀭𑀓𑀸𑀕𑀡𑀁 𑀅𑀥𑀺𑀕𑁆𑀕𑀬𑁆𑀳 𑀅𑀪𑀺𑀪𑀯𑀺𑀢𑁆𑀯𑀸 𑀯𑀺𑀭𑁄𑀘𑀢𑀺 𑀯𑀺𑀭𑀸𑀚𑀢𑀺, 𑀢𑀣𑁂𑀯 𑀢𑁆𑀯𑀁 𑀇𑀫𑀁 𑀅𑀘𑁆𑀙𑀭𑀸𑀦𑀁 𑀤𑁂𑀯𑀓𑀜𑁆𑀜𑀸𑀦𑀁 𑀕𑀡𑀁 𑀲𑀫𑀽𑀳𑀁 𑀅𑀢𑁆𑀢𑀦𑁄 𑀬𑀲𑀲𑀸 𑀤𑀤𑁆𑀤𑀮𑁆𑀮𑀫𑀸𑀦𑀸 𑀅𑀢𑀺𑀯𑀺𑀬 𑀯𑀺𑀚𑁆𑀚𑁄𑀢𑀫𑀸𑀦𑀸 𑀯𑀺𑀭𑁄𑀘𑀲𑀻𑀢𑀺. 𑀏𑀢𑁆𑀣 𑀘 ‘‘𑀇𑀫𑀸’’𑀢𑀺 ‘‘𑀇𑀫’’𑀦𑁆𑀢𑀺 𑀘 𑀦𑀺𑀧𑀸𑀢𑀫𑀢𑁆𑀢𑀁. 𑀓𑁂𑀘𑀺 𑀧𑀦 ‘‘𑀦𑀓𑁆𑀔𑀢𑁆𑀢𑀭𑀸𑀚𑀸𑀭𑀺𑀯 𑀢𑀸𑀭𑀸𑀕𑀡𑀁 𑀢𑀣𑁂𑀯 𑀢𑁆𑀯’’𑀦𑁆𑀢𑀺 𑀧𑀞𑀦𑁆𑀢𑀺.

𑁧𑁫𑁩. 𑀇𑀤𑀸𑀦𑀺 𑀢𑀲𑁆𑀲𑀸 𑀤𑁂𑀯𑀢𑀸𑀬 𑀧𑀼𑀭𑀺𑀫𑀪𑀯𑀁 𑀢𑀢𑁆𑀣 𑀓𑀢𑀧𑀼𑀜𑁆𑀜𑀜𑁆𑀘 𑀧𑀼𑀘𑁆𑀙𑀦𑁆𑀢𑁄 ‘‘𑀓𑀼𑀢𑁄 𑀦𑀼 𑀆𑀕𑀫𑁆𑀫𑀸’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀓𑀼𑀢𑁄 𑀦𑀼 𑀆𑀕𑀫𑁆𑀫𑀸𑀢𑀺 𑀓𑀼𑀢𑁄 𑀦𑀼 𑀪𑀯𑀢𑁄 𑀓𑀼𑀢𑁄 𑀦𑀼 𑀧𑀼𑀜𑁆𑀜𑀓𑀫𑁆𑀫𑀢𑁄 𑀓𑀸𑀭𑀡𑀪𑀽𑀢𑀢𑁄 𑀇𑀤𑀁 𑀫𑀫 𑀪𑀯𑀦𑀁 𑀆𑀕𑀫𑁆𑀫 𑀪𑀤𑁆𑀤𑁂 𑀅𑀦𑁄𑀫𑀤𑀲𑁆𑀲𑀦𑁂 𑀲𑀩𑁆𑀩𑀗𑁆𑀕𑀲𑁄𑀪𑀦𑁂 𑀢𑁆𑀯𑀁 𑀉𑀧𑀧𑀦𑁆𑀦𑀸 𑀉𑀧𑁆𑀧𑀢𑁆𑀢𑀺𑀕𑀳𑀡𑀯𑀲𑁂𑀦 𑀉𑀧𑀕𑀢𑀸. ‘‘𑀅𑀦𑁄𑀫𑀤𑀲𑁆𑀲𑀦𑁂’’𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀉𑀧𑀫𑀸𑀬 𑀧𑀓𑀸𑀲𑁂𑀦𑁆𑀢𑁄 ‘‘𑀩𑁆𑀭𑀳𑁆𑀫𑀁𑀯 𑀤𑁂𑀯𑀸 𑀢𑀺𑀤𑀲𑀸 𑀲𑀳𑀺𑀦𑁆𑀤𑀓𑀸, 𑀲𑀩𑁆𑀩𑁂 𑀦 𑀢𑀧𑁆𑀧𑀸𑀫𑀲𑁂 𑀤𑀲𑁆𑀲𑀦𑁂𑀦 𑀢’’𑀦𑁆𑀢𑀺 𑀆𑀳. 𑀢𑀢𑁆𑀣 𑀬𑀣𑀸 𑀩𑁆𑀭𑀳𑁆𑀫𑀸𑀦𑀁 𑀲𑀳𑀫𑁆𑀧𑀢𑀺𑀁 𑀲𑀦𑀗𑁆𑀓𑀼𑀫𑀸𑀭𑀁 𑀯𑀸 𑀉𑀧𑀕𑀢𑀁 𑀲𑀳 𑀇𑀦𑁆𑀤𑁂𑀦𑀸𑀢𑀺 𑀲𑀳𑀺𑀦𑁆𑀤𑀓𑀸 𑀢𑀸𑀯𑀢𑀺𑀁𑀲𑀸 𑀤𑁂𑀯𑀸 𑀧𑀲𑁆𑀲𑀦𑁆𑀢𑀸 𑀤𑀲𑁆𑀲𑀦𑁂𑀦 𑀦 𑀢𑀧𑁆𑀧𑀦𑁆𑀢𑀺, 𑀏𑀯𑀁 𑀢𑀯 𑀤𑀲𑁆𑀲𑀦𑁂𑀦 𑀫𑀬𑀁 𑀲𑀩𑁆𑀩𑁂 𑀤𑁂𑀯𑀸 𑀦 𑀢𑀧𑁆𑀧𑀸𑀫𑀲𑁂𑀢𑀺 𑀅𑀢𑁆𑀣𑁄.

𑀏𑀯𑀁 𑀧𑀦 𑀲𑀓𑁆𑀓𑁂𑀦 𑀤𑁂𑀯𑀸𑀦𑀫𑀺𑀦𑁆𑀤𑁂𑀦 𑀧𑀼𑀘𑁆𑀙𑀺𑀢𑀸 𑀲𑀸 𑀤𑁂𑀯𑀢𑀸 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑀻 𑁋

𑁧𑁫𑁪. ‘‘𑀬𑀫𑁂𑀢𑀁 𑀲𑀓𑁆𑀓 𑀅𑀦𑀼𑀧𑀼𑀘𑁆𑀙𑀲𑁂 𑀫𑀫𑀁, 𑀓𑀼𑀢𑁄 𑀘𑀼𑀢𑀸 𑀢𑁆𑀯𑀁 𑀇𑀥 𑀆𑀕𑀢𑀸𑀢𑀺;

𑀩𑀸𑀭𑀸𑀡𑀲𑀻 𑀦𑀸𑀫 𑀧𑀼𑀭𑀢𑁆𑀣𑀺 𑀓𑀸𑀲𑀺𑀦𑀁, 𑀢𑀢𑁆𑀣 𑀅𑀳𑁄𑀲𑀺𑀁 𑀧𑀼𑀭𑁂 𑀓𑁂𑀲𑀓𑀸𑀭𑀺𑀓𑀸.

𑁧𑁫𑁫. ‘‘𑀩𑀼𑀤𑁆𑀥𑁂 𑀘 𑀥𑀫𑁆𑀫𑁂 𑀘 𑀧𑀲𑀦𑁆𑀦𑀫𑀸𑀦𑀲𑀸, 𑀲𑀗𑁆𑀖𑁂 𑀘 𑀏𑀓𑀦𑁆𑀢𑀕𑀢𑀸 𑀅𑀲𑀁𑀲𑀬𑀸;

𑀅𑀔𑀡𑁆𑀟𑀲𑀺𑀓𑁆𑀔𑀸𑀧𑀤𑀸 𑀆𑀕𑀢𑀧𑁆𑀨𑀮𑀸, 𑀲𑀫𑁆𑀩𑁄𑀥𑀺𑀥𑀫𑁆𑀫𑁂 𑀦𑀺𑀬𑀢𑀸 𑀅𑀦𑀸𑀫𑀬𑀸’’𑀢𑀺. 𑁋

𑀕𑀸𑀣𑀤𑁆𑀯𑀬𑀫𑀸𑀳.

𑁧𑁫𑁪-𑁫. 𑀢𑀢𑁆𑀣 𑀬𑀫𑁂𑀢𑀦𑁆𑀢𑀺 𑀬𑀁 𑀏𑀢𑀁 𑀧𑀜𑁆𑀳𑀦𑁆𑀢𑀺 𑀅𑀢𑁆𑀣𑁄. 𑀅𑀦𑀼𑀧𑀼𑀘𑁆𑀙𑀲𑁂𑀢𑀺 𑀅𑀦𑀼𑀓𑀽𑀮𑀪𑀸𑀯𑁂𑀦 𑀧𑀼𑀘𑁆𑀙𑀲𑀺. 𑀫𑀫𑀦𑁆𑀢𑀺 𑀫𑀁. 𑀧𑀼𑀭𑀢𑁆𑀣𑀻𑀢𑀺 𑀧𑀼𑀭𑀁 𑀅𑀢𑁆𑀣𑀺. 𑀓𑀸𑀲𑀺𑀦𑀦𑁆𑀢𑀺 𑀓𑀸𑀲𑀺𑀭𑀝𑁆𑀞𑀲𑁆𑀲. 𑀓𑁂𑀲𑀓𑀸𑀭𑀺𑀓𑀸𑀢𑀺 𑀧𑀼𑀭𑀺𑀫𑀢𑁆𑀢𑀪𑀸𑀯𑁂 𑀅𑀢𑁆𑀢𑀦𑁄 𑀦𑀸𑀫𑀁 𑀯𑀤𑀢𑀺. 𑀩𑀼𑀤𑁆𑀥𑁂 𑀘 𑀥𑀫𑁆𑀫𑁂 𑀘𑀸𑀢𑀺𑀆𑀤𑀺𑀦𑀸 𑀅𑀢𑁆𑀢𑀦𑁄 𑀧𑀼𑀜𑁆𑀜𑀁 𑀯𑀺𑀪𑀸𑀯𑁂𑀢𑀺.

𑀧𑀼𑀦 𑀲𑀓𑁆𑀓𑁄 𑀢𑀲𑁆𑀲𑀸 𑀢𑀁 𑀧𑀼𑀜𑁆𑀜𑀲𑀫𑁆𑀧𑀢𑁆𑀢𑀺𑀜𑁆𑀘 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀜𑁆𑀘 𑀅𑀦𑀼𑀫𑁄𑀤𑀫𑀸𑀦𑁄 𑁋

𑁧𑁫𑁬. ‘‘𑀢𑀦𑁆𑀢𑁆𑀬𑀸𑀪𑀺𑀦𑀦𑁆𑀤𑀸𑀫𑀲𑁂 𑀲𑁆𑀯𑀸𑀕𑀢𑀜𑁆𑀘 𑀢𑁂,

𑀥𑀫𑁆𑀫𑁂𑀦 𑀘 𑀢𑁆𑀯𑀁 𑀬𑀲𑀲𑀸 𑀯𑀺𑀭𑁄𑀘𑀲𑀺;

𑀩𑀼𑀤𑁆𑀥𑁂 𑀘 𑀥𑀫𑁆𑀫𑁂 𑀘 𑀧𑀲𑀦𑁆𑀦𑀫𑀸𑀦𑀲𑁂,

𑀲𑀗𑁆𑀖𑁂 𑀘 𑀏𑀓𑀦𑁆𑀢𑀕𑀢𑁂 𑀅𑀲𑀁𑀲𑀬𑁂;

𑀅𑀔𑀡𑁆𑀟𑀲𑀺𑀓𑁆𑀔𑀸𑀧𑀤𑁂 𑀆𑀕𑀢𑀧𑁆𑀨𑀮𑁂,

𑀲𑀫𑁆𑀩𑁄𑀥𑀺𑀥𑀫𑁆𑀫𑁂 𑀦𑀺𑀬𑀢𑁂 𑀅𑀦𑀸𑀫𑀬𑁂’’𑀢𑀺. 𑁋 𑀆𑀳;

𑁧𑁫𑁬. 𑀢𑀢𑁆𑀣 𑀢𑀦𑁆𑀢𑁆𑀬𑀸𑀪𑀺𑀦𑀦𑁆𑀤𑀸𑀫𑀲𑁂𑀢𑀺 𑀢𑀁 𑀢𑁂 𑀤𑀼𑀯𑀺𑀥𑀫𑁆𑀧𑀺 𑀲𑀫𑁆𑀧𑀢𑁆𑀢𑀺𑀁 𑀅𑀪𑀺𑀦𑀦𑁆𑀤𑀸𑀫 𑀅𑀦𑀼𑀫𑁄𑀤𑀸𑀫. 𑀲𑁆𑀯𑀸𑀕𑀢𑀜𑁆𑀘 𑀢𑁂𑀢𑀺 𑀢𑀼𑀬𑁆𑀳𑀜𑁆𑀘 𑀇𑀥𑀸𑀕𑀫𑀦𑀁 𑀲𑁆𑀯𑀸𑀕𑀢𑀁, 𑀅𑀫𑁆𑀳𑀸𑀓𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀲𑀁𑀯𑀤𑁆𑀥𑀦𑀫𑁂𑀯. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀢𑀁 𑀧𑀦 𑀧𑀯𑀢𑁆𑀢𑀺𑀁 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀆𑀬𑀲𑁆𑀫𑀢𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀲𑁆𑀲 𑀓𑀣𑁂𑀲𑀺, 𑀣𑁂𑀭𑁄 𑀪𑀕𑀯𑀢𑁄 𑀦𑀺𑀯𑁂𑀤𑁂𑀲𑀺. 𑀪𑀕𑀯𑀸 𑀢𑀫𑀢𑁆𑀣𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑀸 𑀤𑁂𑀲𑀦𑀸 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀲𑀸𑀢𑁆𑀣𑀺𑀓𑀸 𑀚𑀸𑀢𑀸𑀢𑀺.

𑀓𑁂𑀲𑀓𑀸𑀭𑀻𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀧𑀭𑀫𑀢𑁆𑀣𑀤𑀻𑀧𑀦𑀺𑀬𑀸 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬 𑀯𑀺𑀫𑀸𑀦𑀯𑀢𑁆𑀣𑀼𑀲𑁆𑀫𑀺𑀁

𑀲𑀢𑁆𑀢𑀭𑀲𑀯𑀢𑁆𑀣𑀼𑀧𑀝𑀺𑀫𑀡𑁆𑀟𑀺𑀢𑀲𑁆𑀲 𑀧𑀞𑀫𑀲𑁆𑀲 𑀧𑀻𑀞𑀯𑀕𑁆𑀕𑀲𑁆𑀲

𑀅𑀢𑁆𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.