𑁧𑁫. 𑀉𑀢𑁆𑀢𑀭𑀸𑀯𑀺𑀫𑀸𑀦𑀯𑀡𑁆𑀡𑀦𑀸

𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦𑀸𑀢𑀺 𑀉𑀢𑁆𑀢𑀭𑀸𑀯𑀺𑀫𑀸𑀦𑀁. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀢𑁂𑀦 𑀘 𑀲𑀫𑀬𑁂𑀦 𑀧𑀼𑀡𑁆𑀡𑁄 𑀦𑀸𑀫 𑀤𑀼𑀕𑁆𑀕𑀢𑀧𑀼𑀭𑀺𑀲𑁄 𑀭𑀸𑀚𑀕𑀳𑀲𑁂𑀝𑁆𑀞𑀺𑀁 𑀉𑀧𑀦𑀺𑀲𑁆𑀲𑀸𑀬 𑀚𑀻𑀯𑀢𑀺, 𑀢𑀲𑁆𑀲 𑀪𑀭𑀺𑀬𑀸 𑀉𑀢𑁆𑀢𑀭𑀸, 𑀉𑀢𑁆𑀢𑀭𑀸 𑀘 𑀦𑀸𑀫 𑀥𑀻𑀢𑀸𑀢𑀺 𑀤𑁆𑀯𑁂 𑀏𑀯 𑀕𑁂𑀳𑀫𑀸𑀦𑀼𑀲𑀓𑀸. 𑀅𑀣𑁂𑀓𑀤𑀺𑀯𑀲𑀁 𑀭𑀸𑀚𑀕𑀳𑁂 ‘‘𑀫𑀳𑀸𑀚𑀦𑁂𑀦 𑀲𑀢𑁆𑀢𑀸𑀳𑀁 𑀦𑀓𑁆𑀔𑀢𑁆𑀢𑀁 𑀓𑀻𑀴𑀺𑀢𑀩𑁆𑀩’’𑀦𑁆𑀢𑀺 𑀖𑁄𑀲𑀦𑀁 𑀓𑀭𑀺𑀁𑀲𑀼. 𑀢𑀁 𑀲𑀼𑀢𑁆𑀯𑀸 𑀲𑁂𑀝𑁆𑀞𑀺 𑀧𑀸𑀢𑁄𑀯 𑀆𑀕𑀢𑀁 𑀧𑀼𑀡𑁆𑀡𑀁 ‘‘𑀢𑀸𑀢, 𑀅𑀫𑁆𑀳𑀸𑀓𑀁 𑀧𑀭𑀺𑀚𑀦𑁄 𑀦𑀓𑁆𑀔𑀢𑁆𑀢𑀁 𑀓𑀻𑀴𑀺𑀢𑀼𑀓𑀸𑀫𑁄, 𑀢𑁆𑀯𑀁 𑀓𑀺𑀁 𑀦𑀓𑁆𑀔𑀢𑁆𑀢𑀁 𑀓𑀻𑀴𑀺𑀲𑁆𑀲𑀲𑀺, 𑀉𑀤𑀸𑀳𑀼 𑀪𑀢𑀺𑀁 𑀓𑀭𑀺𑀲𑁆𑀲𑀲𑀻’’𑀢𑀺 𑀆𑀳. ‘‘𑀲𑀸𑀫𑀺, 𑀦𑀓𑁆𑀔𑀢𑁆𑀢𑀁 𑀦𑀸𑀫 𑀲𑀥𑀦𑀸𑀦𑀁 𑀳𑁄𑀢𑀺, 𑀫𑀫 𑀧𑀦 𑀕𑁂𑀳𑁂 𑀲𑁆𑀯𑀸𑀢𑀦𑀸𑀬 𑀬𑀸𑀕𑀼𑀢𑀡𑁆𑀟𑀼𑀮𑀸𑀦𑀺𑀧𑀺 𑀦𑀢𑁆𑀣𑀺, 𑀓𑀺𑀁 𑀫𑁂 𑀦𑀓𑁆𑀔𑀢𑁆𑀢𑁂𑀦? 𑀕𑁄𑀡𑁂 𑀮𑀪𑀦𑁆𑀢𑁄 𑀓𑀲𑀺𑀢𑀼𑀁 𑀕𑀫𑀺𑀲𑁆𑀲𑀸𑀫𑀻’𑀢𑀺. ‘‘𑀢𑁂𑀦 𑀳𑀺 𑀕𑁄𑀡𑁂 𑀕𑀡𑁆𑀳𑀲𑁆𑀲𑀽’’𑀢𑀺. 𑀲𑁄 𑀩𑀮𑀯𑀕𑁄𑀡𑁂 𑀘 𑀪𑀤𑁆𑀤𑀦𑀗𑁆𑀕𑀮𑀜𑁆𑀘 𑀕𑀳𑁂𑀢𑁆𑀯𑀸 ‘‘𑀪𑀤𑁆𑀤𑁂, 𑀦𑀸𑀕𑀭𑀸 𑀦𑀓𑁆𑀔𑀢𑁆𑀢𑀁 𑀓𑀻𑀴𑀦𑁆𑀢𑀺, 𑀅𑀳𑀁 𑀤𑀮𑀺𑀤𑁆𑀤𑀢𑀸𑀬 𑀪𑀢𑀺𑀁 𑀓𑀸𑀢𑀼𑀁 𑀕𑀫𑀺𑀲𑁆𑀲𑀸𑀫𑀺, 𑀫𑀬𑁆𑀳𑀫𑁆𑀧𑀺 𑀢𑀸𑀯 𑀅𑀚𑁆𑀚 𑀤𑀺𑀕𑀼𑀡𑀁 𑀦𑀺𑀯𑀸𑀧𑀁 𑀧𑀘𑀺𑀢𑁆𑀯𑀸 𑀪𑀢𑁆𑀢𑀁 𑀆𑀳𑀭𑁂𑀬𑁆𑀬𑀸𑀲𑀻’’𑀢𑀺 𑀪𑀭𑀺𑀬𑀁 𑀯𑀢𑁆𑀯𑀸 𑀔𑁂𑀢𑁆𑀢𑀁 𑀅𑀕𑀫𑀸𑀲𑀺.

𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄𑀧𑀺 𑀲𑀢𑁆𑀢𑀸𑀳𑀁 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑁄 𑀢𑀢𑁄 𑀯𑀼𑀝𑁆𑀞𑀸𑀬 ‘‘𑀓𑀲𑁆𑀲 𑀦𑀼 𑀔𑁄 𑀅𑀚𑁆𑀚 𑀫𑀬𑀸 𑀲𑀗𑁆𑀕𑀳𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀑𑀮𑁄𑀓𑁂𑀦𑁆𑀢𑁄 𑀧𑀼𑀡𑁆𑀡𑀁 𑀅𑀢𑁆𑀢𑀦𑁄 𑀜𑀸𑀡𑀚𑀸𑀮𑀲𑁆𑀲 𑀅𑀦𑁆𑀢𑁄 𑀧𑀯𑀺𑀝𑁆𑀞𑀁 𑀤𑀺𑀲𑁆𑀯𑀸 ‘‘𑀲𑀤𑁆𑀥𑁄 𑀦𑀼 𑀔𑁄 𑀏𑀲, 𑀲𑀓𑁆𑀔𑀺𑀲𑁆𑀲𑀢𑀺 𑀯𑀸 𑀫𑁂 𑀲𑀗𑁆𑀕𑀳𑀁 𑀓𑀸𑀢𑀼’’𑀦𑁆𑀢𑀺 𑀑𑀮𑁄𑀓𑁂𑀦𑁆𑀢𑁄 𑀢𑀲𑁆𑀲 𑀲𑀤𑁆𑀥𑀪𑀸𑀯𑀜𑁆𑀘 𑀲𑀗𑁆𑀕𑀳𑀁 𑀓𑀸𑀢𑀼𑀁 𑀲𑀫𑀢𑁆𑀣𑀪𑀸𑀯𑀜𑁆𑀘 𑀢𑀧𑁆𑀧𑀘𑁆𑀘𑀬𑀸 𑀘 𑀢𑀲𑁆𑀲 𑀫𑀳𑀸𑀲𑀫𑁆𑀧𑀢𑁆𑀢𑀺𑀧𑀝𑀺𑀮𑀸𑀪𑀁 𑀜𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀆𑀤𑀸𑀬 𑀢𑀲𑁆𑀲 𑀓𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀆𑀯𑀸𑀝𑀢𑀻𑀭𑁂 𑀏𑀓𑀁 𑀕𑀼𑀫𑁆𑀩𑀁 𑀑𑀮𑁄𑀓𑁂𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀧𑀼𑀡𑁆𑀡𑁄 𑀣𑁂𑀭𑀁 𑀤𑀺𑀲𑁆𑀯𑀸𑀯 𑀓𑀲𑀺𑀁 𑀞𑀧𑁂𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀤𑀦𑁆𑀢𑀓𑀝𑁆𑀞𑁂𑀦 𑀅𑀢𑁆𑀣𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀤𑀦𑁆𑀢𑀓𑀝𑁆𑀞𑀁 𑀓𑀧𑁆𑀧𑀺𑀬𑀁 𑀓𑀢𑁆𑀯𑀸 𑀅𑀤𑀸𑀲𑀺. 𑀅𑀣𑀲𑁆𑀲 𑀣𑁂𑀭𑁄 𑀧𑀢𑁆𑀢𑀜𑁆𑀘 𑀧𑀭𑀺𑀲𑁆𑀲𑀸𑀯𑀦𑀜𑁆𑀘 𑀦𑀻𑀳𑀭𑀺𑀢𑁆𑀯𑀸 𑀅𑀤𑀸𑀲𑀺. 𑀲𑁄 ‘‘𑀧𑀸𑀦𑀻𑀬𑁂𑀦 𑀅𑀢𑁆𑀣𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑀁 𑀆𑀤𑀸𑀬 𑀧𑀸𑀦𑀻𑀬𑀁 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀅𑀤𑀸𑀲𑀺.

𑀣𑁂𑀭𑁄 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀧𑀭𑁂𑀲𑀁 𑀧𑀘𑁆𑀙𑀺𑀫𑀕𑁂𑀳𑁂 𑀯𑀲𑀢𑀺, 𑀲𑀘𑀲𑁆𑀲 𑀕𑁂𑀳𑀤𑁆𑀯𑀸𑀭𑀁 𑀕𑀫𑀺𑀲𑁆𑀲𑀸𑀫𑀺, 𑀇𑀫𑀲𑁆𑀲 𑀪𑀭𑀺𑀬𑀸 𑀫𑀁 𑀤𑀝𑁆𑀞𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀺, 𑀬𑀸𑀯𑀲𑁆𑀲 𑀪𑀭𑀺𑀬𑀸 𑀪𑀢𑁆𑀢𑀁 𑀆𑀤𑀸𑀬 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀢𑀺, 𑀢𑀸𑀯 𑀇𑀥𑁂𑀯 𑀪𑀯𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑀢𑁆𑀣𑁂𑀯 𑀣𑁄𑀓𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀢𑀲𑁆𑀲𑀸 𑀫𑀕𑁆𑀕𑀸𑀭𑀼𑀴𑁆𑀳𑀪𑀸𑀯𑀁 𑀜𑀢𑁆𑀯𑀸 𑀅𑀦𑁆𑀢𑁄𑀦𑀕𑀭𑀸𑀪𑀺𑀫𑀼𑀔𑁄 𑀧𑀸𑀬𑀸𑀲𑀺. 𑀲𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀣𑁂𑀭𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀅𑀧𑁆𑀧𑁂𑀓𑀤𑀸𑀳𑀁 𑀤𑁂𑀬𑁆𑀬𑀥𑀫𑁆𑀫𑁂 𑀲𑀢𑀺 𑀅𑀬𑁆𑀬𑀁 𑀦 𑀧𑀲𑁆𑀲𑀸𑀫𑀺, 𑀅𑀧𑁆𑀧𑁂𑀓𑀤𑀸 𑀫𑁂 𑀅𑀬𑁆𑀬𑀁 𑀧𑀲𑁆𑀲𑀦𑁆𑀢𑀺𑀬𑀸 𑀤𑁂𑀬𑁆𑀬𑀥𑀫𑁆𑀫𑁄 𑀦 𑀳𑁄𑀢𑀺, 𑀅𑀚𑁆𑀚 𑀧𑀦 𑀫𑁂 𑀅𑀬𑁆𑀬𑁄 𑀘 𑀤𑀺𑀝𑁆𑀞𑁄, 𑀤𑁂𑀬𑁆𑀬𑀥𑀫𑁆𑀫𑁄 𑀘𑀸𑀬𑀁 𑀅𑀢𑁆𑀣𑀺, 𑀓𑀭𑀺𑀲𑁆𑀲𑀢𑀺 𑀦𑀼 𑀔𑁄 𑀫𑁂 𑀲𑀗𑁆𑀕𑀳’’𑀦𑁆𑀢𑀺. 𑀲𑀸 𑀪𑀢𑁆𑀢𑀪𑀸𑀚𑀦𑀁 𑀑𑀢𑀸𑀭𑁂𑀢𑁆𑀯𑀸 𑀣𑁂𑀭𑀁 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀇𑀤𑀁 𑀮𑀽𑀔𑀁 𑀯𑀸 𑀧𑀡𑀻𑀢𑀁 𑀯𑀸𑀢𑀺 𑀅𑀘𑀺𑀦𑁆𑀢𑁂𑀢𑁆𑀯𑀸 𑀤𑀸𑀲𑀲𑁆𑀲 𑀯𑁄 𑀲𑀗𑁆𑀕𑀳𑀁 𑀓𑀭𑁄𑀣𑀸’’𑀢𑀺 𑀆𑀳. 𑀅𑀣 𑀣𑁂𑀭𑁄 𑀧𑀢𑁆𑀢𑀁 𑀉𑀧𑀦𑀸𑀫𑁂𑀢𑁆𑀯𑀸 𑀢𑀸𑀬 𑀏𑀓𑁂𑀦 𑀳𑀢𑁆𑀣𑁂𑀦 𑀪𑀸𑀚𑀦𑀁 𑀥𑀸𑀭𑁂𑀢𑁆𑀯𑀸 𑀏𑀓𑁂𑀦 𑀳𑀢𑁆𑀣𑁂𑀦 𑀢𑀢𑁄 𑀪𑀢𑁆𑀢𑀁 𑀤𑀤𑀫𑀸𑀦𑀸𑀬 𑀉𑀧𑀟𑁆𑀠𑀪𑀢𑁆𑀢𑁂 𑀤𑀺𑀦𑁆𑀦𑁂 ‘‘𑀅𑀮’’𑀦𑁆𑀢𑀺 𑀳𑀢𑁆𑀣𑁂𑀦 𑀧𑀢𑁆𑀢𑀁 𑀧𑀺𑀤𑀳𑀺. 𑀲𑀸 ‘‘𑀪𑀦𑁆𑀢𑁂, 𑀏𑀓𑁄𑀯 𑀧𑀝𑀺𑀯𑀻𑀲𑁄, 𑀦 𑀲𑀓𑁆𑀓𑀸 𑀤𑁆𑀯𑀺𑀥𑀸 𑀓𑀸𑀢𑀼𑀁, 𑀢𑀼𑀫𑁆𑀳𑀸𑀓𑀁 𑀤𑀸𑀲𑀲𑁆𑀲 𑀇𑀥𑀮𑁄𑀓𑀲𑀗𑁆𑀕𑀳𑀁 𑀅𑀓𑀢𑁆𑀯𑀸 𑀧𑀭𑀮𑁄𑀓𑀲𑀗𑁆𑀕𑀳𑀁 𑀓𑀭𑁄𑀣, 𑀦𑀺𑀭𑀯𑀲𑁂𑀲𑀫𑁂𑀯 𑀤𑀸𑀢𑀼𑀓𑀸𑀫𑀸𑀫𑁆𑀳𑀻’’𑀢𑀺 𑀯𑀢𑁆𑀯𑀸 𑀲𑀩𑁆𑀩𑀫𑁂𑀯𑀲𑁆𑀲 𑀧𑀢𑁆𑀢𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 ‘‘𑀢𑀼𑀫𑁆𑀳𑁂𑀳𑀺 𑀤𑀺𑀝𑁆𑀞𑀥𑀫𑁆𑀫𑀲𑁆𑀲 𑀪𑀸𑀕𑀺𑀦𑀻 𑀅𑀲𑁆𑀲’’𑀦𑁆𑀢𑀺 𑀧𑀢𑁆𑀣𑀦𑀁 𑀅𑀓𑀸𑀲𑀺. 𑀣𑁂𑀭𑁄 ‘‘𑀏𑀯𑀁 𑀳𑁄𑀢𑀽’’𑀢𑀺 𑀯𑀢𑁆𑀯𑀸 𑀞𑀺𑀢𑀓𑁄𑀯 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀏𑀓𑀲𑁆𑀫𑀺𑀁 𑀉𑀤𑀓𑀨𑀸𑀲𑀼𑀓𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀁 𑀅𑀓𑀸𑀲𑀺. 𑀲𑀸𑀧𑀺 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀢𑀡𑁆𑀟𑀼𑀮𑁂 𑀧𑀭𑀺𑀬𑁂𑀲𑀺𑀢𑁆𑀯𑀸 𑀪𑀢𑁆𑀢𑀁 𑀧𑀘𑀺.

𑀧𑀼𑀡𑁆𑀡𑁄𑀧𑀺 𑀅𑀟𑁆𑀠𑀓𑀭𑀻𑀲𑀫𑀢𑁆𑀢𑀁 𑀞𑀸𑀦𑀁 𑀓𑀲𑀺𑀢𑁆𑀯𑀸 𑀚𑀺𑀖𑀘𑁆𑀙𑀁 𑀲𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀕𑁄𑀡𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀏𑀓𑀁 𑀭𑀼𑀓𑁆𑀔𑀙𑀸𑀬𑀁 𑀧𑀯𑀺𑀲𑀺𑀢𑁆𑀯𑀸 𑀫𑀕𑁆𑀕𑀁 𑀑𑀮𑁄𑀓𑁂𑀦𑁆𑀢𑁄 𑀦𑀺𑀲𑀻𑀤𑀺. 𑀅𑀣𑀲𑁆𑀲 𑀪𑀭𑀺𑀬𑀸 𑀪𑀢𑁆𑀢𑀫𑀸𑀤𑀸𑀬 𑀕𑀘𑁆𑀙𑀫𑀸𑀦𑀸 𑀢𑀁 𑀤𑀺𑀲𑁆𑀯𑀸𑀯 ‘‘𑀏𑀲 𑀚𑀺𑀖𑀘𑁆𑀙𑀸𑀧𑀻𑀴𑀺𑀢𑁄 𑀫𑀁 𑀑𑀮𑁄𑀓𑁂𑀦𑁆𑀢𑁄 𑀦𑀺𑀲𑀺𑀦𑁆𑀦𑁄, 𑀲𑀘𑁂 𑀫𑀁 ‘𑀅𑀢𑀺𑀯𑀺𑀬 𑀘𑀺𑀭𑀸𑀬𑀻’𑀢𑀺 𑀢𑀚𑁆𑀚𑁂𑀢𑁆𑀯𑀸 𑀧𑀢𑁄𑀤𑀮𑀝𑁆𑀞𑀺𑀬𑀸 𑀧𑀳𑀭𑀺𑀲𑁆𑀲𑀢𑀺, 𑀫𑀬𑀸 𑀓𑀢𑀓𑀫𑁆𑀫𑀁 𑀦𑀺𑀭𑀢𑁆𑀣𑀓𑀁 𑀪𑀯𑀺𑀲𑁆𑀲𑀢𑀺, 𑀧𑀝𑀺𑀓𑀘𑁆𑀘𑁂𑀯𑀲𑁆𑀲 𑀆𑀭𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀯𑀫𑀸𑀳 ‘‘𑀲𑀸𑀫𑀺, 𑀅𑀚𑁆𑀚𑁂𑀓𑀤𑀺𑀯𑀲𑀁 𑀘𑀺𑀢𑁆𑀢𑀁 𑀧𑀲𑀸𑀤𑁂𑀳𑀺, 𑀫𑀸 𑀫𑀬𑀸 𑀓𑀢𑀓𑀫𑁆𑀫𑀁 𑀦𑀺𑀭𑀢𑁆𑀣𑀓𑀁 𑀓𑀭𑀺, 𑀅𑀳𑀁 𑀧𑀸𑀢𑁄𑀯 𑀢𑁂 𑀪𑀢𑁆𑀢𑀁 𑀆𑀳𑀭𑀦𑁆𑀢𑀻 𑀅𑀦𑁆𑀢𑀭𑀸𑀫𑀕𑁆𑀕𑁂 𑀥𑀫𑁆𑀫𑀲𑁂𑀦𑀸𑀧𑀢𑀺𑀁 𑀤𑀺𑀲𑁆𑀯𑀸 𑀢𑀯 𑀪𑀢𑁆𑀢𑀁 𑀢𑀲𑁆𑀲 𑀤𑀢𑁆𑀯𑀸 𑀧𑀼𑀦 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀪𑀢𑁆𑀢𑀁 𑀧𑀘𑀺𑀢𑁆𑀯𑀸 𑀆𑀕𑀢𑀸, 𑀧𑀲𑀸𑀤𑁂𑀳𑀺, 𑀲𑀸𑀫𑀺, 𑀘𑀺𑀢𑁆𑀢’’𑀦𑁆𑀢𑀺. 𑀲𑁄 ‘‘𑀓𑀺𑀁 𑀯𑀤𑁂𑀲𑀺, 𑀪𑀤𑁆𑀤𑁂’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀧𑀼𑀦 𑀢𑀫𑀢𑁆𑀣𑀁 𑀲𑀼𑀢𑁆𑀯𑀸 ‘‘𑀪𑀤𑁆𑀤𑁂, 𑀲𑀸𑀥𑀼 𑀯𑀢 𑀢𑁂 𑀓𑀢𑀁 𑀫𑀫 𑀪𑀢𑁆𑀢𑀁 𑀅𑀬𑁆𑀬𑀲𑁆𑀲 𑀤𑀤𑀫𑀸𑀦𑀸𑀬, 𑀫𑀬𑀸𑀧𑀺𑀲𑁆𑀲 𑀅𑀚𑁆𑀚 𑀧𑀸𑀢𑁄𑀯 𑀤𑀦𑁆𑀢𑀓𑀝𑁆𑀞𑀜𑁆𑀘 𑀫𑀼𑀔𑁄𑀤𑀓𑀜𑁆𑀘 𑀤𑀺𑀦𑁆𑀦’’𑀦𑁆𑀢𑀺 𑀧𑀲𑀦𑁆𑀦𑀫𑀸𑀦𑀲𑁄 𑀢𑀁 𑀯𑀘𑀦𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀉𑀲𑁆𑀲𑀽𑀭𑁂 𑀮𑀤𑁆𑀥𑀪𑀢𑁆𑀢𑀢𑀸𑀬 𑀓𑀺𑀮𑀦𑁆𑀢𑀓𑀸𑀬𑁄 𑀢𑀲𑁆𑀲𑀸 𑀅𑀗𑁆𑀓𑁂 𑀲𑀻𑀲𑀁 𑀓𑀢𑁆𑀯𑀸 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺.

𑀅𑀣𑀲𑁆𑀲 𑀧𑀸𑀢𑁄𑀯 𑀓𑀲𑀺𑀢𑀝𑁆𑀞𑀸𑀦𑀁 𑀧𑀁𑀲𑀼𑀘𑀼𑀡𑁆𑀡𑀁 𑀉𑀧𑀸𑀤𑀸𑀬 𑀲𑀩𑁆𑀩𑀁 𑀭𑀢𑁆𑀢𑀲𑀼𑀯𑀡𑁆𑀡𑀁 𑀳𑀼𑀢𑁆𑀯𑀸 𑀓𑀡𑀺𑀓𑀸𑀭𑀧𑀼𑀧𑁆𑀨𑀭𑀸𑀲𑀺 𑀯𑀺𑀬 𑀲𑁄𑀪𑀫𑀸𑀦𑀁 𑀅𑀝𑁆𑀞𑀸𑀲𑀺. 𑀲𑁄 𑀧𑀩𑀼𑀤𑁆𑀥𑁄 𑀑𑀮𑁄𑀓𑁂𑀢𑁆𑀯𑀸 𑀪𑀭𑀺𑀬𑀁 𑀆𑀳 ‘‘𑀪𑀤𑁆𑀤𑁂, 𑀏𑀢𑀁 𑀫𑀬𑀸 𑀓𑀲𑀺𑀢𑀝𑁆𑀞𑀸𑀦𑀁 𑀲𑀩𑁆𑀩𑀁 𑀫𑀫 𑀲𑀼𑀯𑀡𑁆𑀡𑀁 𑀳𑀼𑀢𑁆𑀯𑀸 𑀧𑀜𑁆𑀜𑀸𑀬𑀢𑀺, 𑀓𑀺𑀁 𑀦𑀼 𑀔𑁄 𑀫𑁂 𑀅𑀢𑀺𑀉𑀲𑁆𑀲𑀽𑀭𑁂 𑀮𑀤𑁆𑀥𑀪𑀢𑁆𑀢𑀢𑀸𑀬 𑀅𑀓𑁆𑀔𑀻𑀦𑀺 𑀪𑀫𑀦𑁆𑀢𑀻’’𑀢𑀺. ‘‘𑀲𑀸𑀫𑀺, 𑀫𑀬𑁆𑀳𑀫𑁆𑀧𑀺 𑀏𑀯𑀫𑁂𑀯 𑀧𑀜𑁆𑀜𑀸𑀬𑀢𑀻’’𑀢𑀺. 𑀲𑁄 𑀉𑀝𑁆𑀞𑀸𑀬 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀏𑀓𑀁 𑀧𑀺𑀡𑁆𑀟𑀁 𑀕𑀳𑁂𑀢𑁆𑀯𑀸 𑀦𑀗𑁆𑀕𑀮𑀲𑀻𑀲𑁂 𑀧𑀳𑀭𑀺𑀢𑁆𑀯𑀸 𑀲𑀼𑀯𑀡𑁆𑀡𑀪𑀸𑀯𑀁 𑀜𑀢𑁆𑀯𑀸 ‘‘𑀅𑀳𑁄 𑀅𑀬𑁆𑀬𑀲𑁆𑀲 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑁆𑀲 𑀤𑀺𑀦𑁆𑀦𑀤𑀸𑀦𑁂 𑀅𑀚𑁆𑀚𑁂𑀯 𑀯𑀺𑀧𑀸𑀓𑁄 𑀤𑀲𑁆𑀲𑀺𑀢𑁄, 𑀦 𑀔𑁄 𑀧𑀦 𑀲𑀓𑁆𑀓𑀸 𑀏𑀢𑁆𑀢𑀓𑀁 𑀥𑀦𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼’’𑀦𑁆𑀢𑀺 𑀪𑀭𑀺𑀬𑀸𑀬 𑀆𑀪𑀢𑀁 𑀪𑀢𑁆𑀢𑀧𑀸𑀢𑀺𑀁 𑀲𑀼𑀯𑀡𑁆𑀡𑀲𑁆𑀲 𑀧𑀽𑀭𑁂𑀢𑁆𑀯𑀸 𑀭𑀸𑀚𑀓𑀼𑀮𑀁 𑀕𑀦𑁆𑀢𑁆𑀯𑀸 𑀭𑀜𑁆𑀜𑀸 𑀓𑀢𑁄𑀓𑀸𑀲𑁄 𑀧𑀯𑀺𑀲𑀺𑀢𑁆𑀯𑀸 𑀭𑀸𑀚𑀸𑀦𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 ‘‘𑀓𑀺𑀁 𑀢𑀸𑀢𑀸’’𑀢𑀺 𑀯𑀼𑀢𑁆𑀢𑁂 ‘‘𑀤𑁂𑀯, 𑀅𑀚𑁆𑀚 𑀫𑀬𑀸 𑀓𑀲𑀺𑀢𑀝𑁆𑀞𑀸𑀦𑀁 𑀲𑀩𑁆𑀩𑀁 𑀲𑀼𑀯𑀡𑁆𑀡𑀭𑀸𑀲𑀺𑀫𑁂𑀯 𑀳𑀼𑀢𑁆𑀯𑀸 𑀞𑀺𑀢𑀁, 𑀲𑀼𑀯𑀡𑁆𑀡𑀁 𑀆𑀳𑀭𑀸𑀧𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀆𑀳. ‘‘𑀓𑁄𑀲𑀺 𑀢𑁆𑀯’’𑀦𑁆𑀢𑀺? ‘‘𑀧𑀼𑀡𑁆𑀡𑁄 𑀦𑀸𑀫𑀸𑀳’’𑀦𑁆𑀢𑀺. ‘‘𑀓𑀺𑀁 𑀧𑀦 𑀢𑁂 𑀅𑀚𑁆𑀚 𑀓𑀢’’𑀦𑁆𑀢𑀺? ‘‘𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑁆𑀲 𑀫𑁂 𑀧𑀸𑀢𑁄𑀯 𑀤𑀦𑁆𑀢𑀓𑀝𑁆𑀞𑀜𑁆𑀘 𑀫𑀼𑀔𑁄𑀤𑀓𑀜𑁆𑀘 𑀤𑀺𑀦𑁆𑀦𑀁, 𑀪𑀭𑀺𑀬𑀸𑀬𑀧𑀺 𑀫𑁂 𑀫𑀬𑁆𑀳𑀁 𑀆𑀳𑀝𑀪𑀢𑁆𑀢𑀁 𑀢𑀲𑁆𑀲𑁂𑀯 𑀤𑀺𑀦𑁆𑀦’’𑀦𑁆𑀢𑀺.

𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 ‘‘𑀅𑀚𑁆𑀚𑁂𑀯 𑀓𑀺𑀭 𑀪𑁄 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑁆𑀲 𑀤𑀺𑀦𑁆𑀦𑀤𑀸𑀦𑁂 𑀯𑀺𑀧𑀸𑀓𑁄 𑀤𑀲𑁆𑀲𑀺𑀢𑁄’’𑀢𑀺 𑀯𑀢𑁆𑀯𑀸 ‘‘𑀢𑀸𑀢, 𑀓𑀺𑀁 𑀓𑀭𑁄𑀫𑀻’’𑀢𑀺 𑀧𑀼𑀘𑁆𑀙𑀺. ‘‘𑀩𑀳𑀽𑀦𑀺 𑀲𑀓𑀝𑀲𑀳𑀲𑁆𑀲𑀸𑀦𑀺 𑀧𑀳𑀺𑀡𑀺𑀢𑁆𑀯𑀸 𑀲𑀼𑀯𑀡𑁆𑀡𑀁 𑀆𑀳𑀭𑀸𑀧𑁂𑀣𑀸’’𑀢𑀺. 𑀭𑀸𑀚𑀸 𑀲𑀓𑀝𑀸𑀦𑀺 𑀧𑀳𑀺𑀡𑀺. 𑀭𑀸𑀚𑀧𑀼𑀭𑀺𑀲𑁂𑀲𑀼 ‘‘𑀭𑀜𑁆𑀜𑁄 𑀲𑀦𑁆𑀢𑀓’’𑀦𑁆𑀢𑀺 𑀕𑀡𑁆𑀳𑀦𑁆𑀢𑁂𑀲𑀼 𑀕𑀳𑀺𑀢𑀁 𑀕𑀳𑀺𑀢𑀁 𑀫𑀢𑁆𑀢𑀺𑀓𑀸𑀯 𑀳𑁄𑀢𑀺. 𑀢𑁂𑀳𑀺 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑀺𑀢𑁂 ‘‘𑀢𑀸𑀢𑀸, 𑀢𑀼𑀫𑁆𑀳𑁂𑀳𑀺 𑀓𑀺𑀦𑁆𑀢𑀺 𑀯𑀢𑁆𑀯𑀸 𑀕𑀳𑀺𑀢’’𑀦𑁆𑀢𑀺 𑀧𑀼𑀝𑁆𑀞𑀸 ‘‘𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀓’’𑀦𑁆𑀢𑀺 𑀆𑀳𑀁𑀲𑀼. 𑀢𑁂𑀦 𑀳𑀺, 𑀢𑀸𑀢𑀸, 𑀧𑀼𑀦 𑀕𑀘𑁆𑀙𑀣, ‘‘𑀧𑀼𑀡𑁆𑀡𑀲𑁆𑀲 𑀲𑀦𑁆𑀢𑀓’’𑀦𑁆𑀢𑀺 𑀯𑀢𑁆𑀯𑀸 𑀕𑀡𑁆𑀳𑀣𑀸𑀢𑀺. 𑀢𑁂 𑀢𑀣𑀸 𑀓𑀭𑀺𑀁𑀲𑀼 𑀕𑀳𑀺𑀢𑀁 𑀕𑀳𑀺𑀢𑀁 𑀲𑀼𑀯𑀡𑁆𑀡𑀫𑁂𑀯 𑀅𑀳𑁄𑀲𑀺. 𑀢𑀁 𑀲𑀩𑁆𑀩𑀁 𑀆𑀳𑀭𑀺𑀢𑁆𑀯𑀸 𑀭𑀸𑀚𑀗𑁆𑀕𑀡𑁂 𑀭𑀸𑀲𑀺𑀁 𑀅𑀓𑀁𑀲𑀼, 𑀅𑀲𑀻𑀢𑀺𑀳𑀢𑁆𑀣𑀼𑀩𑁆𑀩𑁂𑀥𑁄 𑀭𑀸𑀲𑀺 𑀅𑀳𑁄𑀲𑀺. 𑀭𑀸𑀚𑀸 𑀦𑀸𑀕𑀭𑁂 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀆𑀳 ‘‘𑀇𑀫𑀲𑁆𑀫𑀺𑀁 𑀦𑀕𑀭𑁂 𑀅𑀢𑁆𑀣𑀺 𑀓𑀲𑁆𑀲𑀘𑀺 𑀏𑀢𑁆𑀢𑀓𑀁 𑀲𑀼𑀯𑀡𑁆𑀡’’𑀦𑁆𑀢𑀺? ‘‘𑀦𑀢𑁆𑀣𑀺, 𑀤𑁂𑀯𑀸’’𑀢𑀺. ‘‘𑀓𑀺𑀁 𑀧𑀦𑀲𑁆𑀲 𑀤𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺? ‘‘𑀲𑁂𑀝𑁆𑀞𑀺𑀘𑁆𑀙𑀢𑁆𑀢𑀁, 𑀤𑁂𑀯𑀸’’𑀢𑀺. 𑀭𑀸𑀚𑀸 ‘‘𑀩𑀳𑀼𑀥𑀦𑀲𑁂𑀝𑁆𑀞𑀺 𑀦𑀸𑀫 𑀳𑁄𑀢𑀽’’𑀢𑀺 𑀫𑀳𑀦𑁆𑀢𑁂𑀦 𑀪𑁄𑀕𑁂𑀦 𑀲𑀤𑁆𑀥𑀺𑀁 𑀢𑀲𑁆𑀲 𑀲𑁂𑀝𑁆𑀞𑀺𑀘𑁆𑀙𑀢𑁆𑀢𑀁 𑀅𑀤𑀸𑀲𑀺.

𑀅𑀣 𑀦𑀁 𑀲𑁄 𑀆𑀳 ‘‘𑀫𑀬𑀁, 𑀤𑁂𑀯, 𑀏𑀢𑁆𑀢𑀓𑀁 𑀓𑀸𑀮𑀁 𑀧𑀭𑀓𑀼𑀮𑁂 𑀯𑀲𑀺𑀫𑁆𑀳𑀸, 𑀯𑀲𑀦𑀝𑁆𑀞𑀸𑀦𑀁 𑀦𑁄 𑀤𑁂𑀣𑀸’’𑀢𑀺. 𑀢𑁂𑀦 𑀳𑀺 𑀧𑀲𑁆𑀲, 𑀏𑀲 𑀕𑀼𑀫𑁆𑀩𑁄 𑀧𑀜𑁆𑀜𑀸𑀬𑀢𑀺, 𑀏𑀢𑀁 𑀳𑀭𑀸𑀧𑁂𑀢𑁆𑀯𑀸 𑀕𑁂𑀳𑀁 𑀓𑀸𑀭𑁂𑀳𑀻𑀢𑀺 𑀧𑀼𑀭𑀸𑀡𑀲𑁂𑀝𑁆𑀞𑀺𑀲𑁆𑀲 𑀕𑁂𑀳𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀺. 𑀲𑁄 𑀢𑀲𑁆𑀫𑀺𑀁 𑀞𑀸𑀦𑁂 𑀓𑀢𑀺𑀧𑀸𑀳𑁂𑀦𑁂𑀯 𑀕𑁂𑀳𑀁 𑀓𑀸𑀭𑀸𑀧𑁂𑀢𑁆𑀯𑀸 𑀕𑁂𑀳𑀧𑀯𑁂𑀲𑀦𑀫𑀗𑁆𑀕𑀮𑀜𑁆𑀘 𑀙𑀢𑁆𑀢𑀫𑀗𑁆𑀕𑀮𑀜𑁆𑀘 𑀏𑀓𑀢𑁄𑀯 𑀓𑀭𑁄𑀦𑁆𑀢𑁄 𑀲𑀢𑁆𑀢𑀸𑀳𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀸𑀦𑀁 𑀅𑀤𑀸𑀲𑀺. 𑀅𑀣𑀲𑁆𑀲 𑀲𑀢𑁆𑀣𑀸 𑀤𑀸𑀦𑀸𑀦𑀼𑀫𑁄𑀤𑀦𑀁 𑀓𑀭𑁄𑀦𑁆𑀢𑁄 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 𑀓𑀣𑁂𑀲𑀺. 𑀥𑀫𑁆𑀫𑀓𑀣𑀸𑀯𑀲𑀸𑀦𑁂 𑀧𑀼𑀡𑁆𑀡𑀲𑁂𑀝𑁆𑀞𑀺 𑀘 𑀪𑀭𑀺𑀬𑀸 𑀘𑀲𑁆𑀲 𑀥𑀻𑀢𑀸 𑀘 𑀉𑀢𑁆𑀢𑀭𑀸𑀢𑀺 𑀢𑀬𑁄𑀧𑀺 𑀚𑀦𑀸 𑀲𑁄𑀢𑀸𑀧𑀦𑁆𑀦𑀸 𑀅𑀳𑁂𑀲𑀼𑀁.

𑀅𑀧𑀭𑀪𑀸𑀕𑁂 𑀭𑀸𑀚𑀕𑀳𑀲𑁂𑀝𑁆𑀞𑀺 𑀧𑀼𑀡𑁆𑀡𑀲𑁂𑀝𑁆𑀞𑀺𑀦𑁄 𑀥𑀻𑀢𑀭𑀁 𑀅𑀢𑁆𑀢𑀦𑁄 𑀧𑀼𑀢𑁆𑀢𑀲𑁆𑀲 𑀯𑀸𑀭𑁂𑀲𑀺. 𑀲𑁄 ‘‘𑀦𑀸𑀳𑀁 𑀤𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁄 ‘‘𑀫𑀸 𑀏𑀯𑀁 𑀓𑀭𑁄𑀢𑀼, 𑀏𑀢𑁆𑀢𑀓𑀁 𑀓𑀸𑀮𑀁 𑀅𑀫𑁆𑀳𑁂 𑀦𑀺𑀲𑁆𑀲𑀸𑀬 𑀯𑀲𑀦𑁆𑀢𑁂𑀦𑁂𑀯 𑀢𑁂 𑀲𑀫𑁆𑀧𑀢𑁆𑀢𑀺 𑀮𑀤𑁆𑀥𑀸, 𑀤𑁂𑀢𑀼 𑀫𑁂 𑀧𑀼𑀢𑁆𑀢𑀲𑁆𑀲 𑀢𑁂 𑀥𑀻𑀢𑀭’’𑀦𑁆𑀢𑀺 𑀆𑀳. 𑀲𑁄 ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀢𑀼𑀫𑁆𑀳𑁂, 𑀫𑀫 𑀥𑀻𑀢𑀸 𑀢𑀻𑀳𑀺 𑀭𑀢𑀦𑁂𑀳𑀺 𑀯𑀺𑀦𑀸 𑀯𑀲𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀦𑁂𑀯𑀲𑁆𑀲 𑀥𑀻𑀢𑀭𑀁 𑀤𑀲𑁆𑀲𑀸𑀫𑀻’’𑀢𑀺 𑀆𑀳. 𑀅𑀣 𑀦𑀁 𑀩𑀳𑀽 𑀲𑁂𑀝𑁆𑀞𑀺𑀕𑀳𑀧𑀢𑀺𑀓𑀸𑀤𑀬𑁄 𑀓𑀼𑀮𑀧𑀼𑀢𑁆𑀢𑀸 ‘‘𑀫𑀸 𑀢𑁂𑀦 𑀲𑀤𑁆𑀥𑀺𑀁 𑀯𑀺𑀲𑁆𑀲𑀸𑀲𑀁 𑀪𑀺𑀦𑁆𑀤𑀺, 𑀤𑁂𑀳𑀺𑀲𑁆𑀲 𑀥𑀻𑀢𑀭’’𑀦𑁆𑀢𑀺 𑀬𑀸𑀘𑀺𑀁𑀲𑀼. 𑀲𑁄 𑀢𑁂𑀲𑀁 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀆𑀲𑀸𑀴𑁆𑀳𑀺𑀧𑀼𑀡𑁆𑀡𑀫𑀸𑀬 𑀥𑀻𑀢𑀭𑀁 𑀅𑀤𑀸𑀲𑀺. 𑀲𑀸 𑀧𑀢𑀺𑀓𑀼𑀮𑀁 𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀪𑀺𑀓𑁆𑀔𑀼𑀁 𑀯𑀸 𑀪𑀺𑀓𑁆𑀔𑀼𑀦𑀺𑀁 𑀯𑀸 𑀉𑀧𑀲𑀗𑁆𑀓𑀫𑀺𑀢𑀼𑀁 𑀤𑀸𑀦𑀁 𑀯𑀸 𑀤𑀸𑀢𑀼𑀁 𑀥𑀫𑁆𑀫𑀁 𑀯𑀸 𑀲𑁄𑀢𑀼𑀁 𑀦𑀸𑀮𑀢𑁆𑀣, 𑀏𑀯𑀁 𑀅𑀟𑁆𑀠𑀢𑀺𑀬𑁂𑀲𑀼 𑀫𑀸𑀲𑁂𑀲𑀼 𑀯𑀻𑀢𑀺𑀯𑀢𑁆𑀢𑁂𑀲𑀼 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑁂 𑀞𑀺𑀢𑁂 𑀧𑀭𑀺𑀘𑀸𑀭𑀺𑀓𑁂 𑀧𑀼𑀘𑁆𑀙𑀺 ‘‘𑀇𑀤𑀸𑀦𑀺 𑀓𑀺𑀢𑁆𑀢𑀓𑀁 𑀅𑀦𑁆𑀢𑁄𑀯𑀲𑁆𑀲𑀁 𑀅𑀯𑀲𑀺𑀝𑁆𑀞’’𑀦𑁆𑀢𑀺? ‘‘𑀅𑀟𑁆𑀠𑀫𑀸𑀲𑁄, 𑀅𑀬𑁆𑀬𑁂’’𑀢𑀺. 𑀲𑀸 𑀫𑀸𑀢𑀸𑀧𑀺𑀢𑀽𑀦𑀁 𑀲𑀸𑀲𑀦𑀁 𑀧𑀳𑀺𑀡𑀺 ‘‘𑀓𑀲𑁆𑀫𑀸 𑀫𑀁 𑀏𑀯𑀭𑀽𑀧𑁂 𑀩𑀦𑁆𑀥𑀦𑀸𑀕𑀸𑀭𑁂 𑀧𑀓𑁆𑀔𑀺𑀧𑀺𑀁𑀲𑀼, 𑀯𑀭𑀁 𑀢𑀼𑀫𑁆𑀳𑁂𑀳𑀺 𑀫𑀁 𑀮𑀓𑁆𑀔𑀡𑀸𑀳𑀢𑀁 𑀓𑀢𑁆𑀯𑀸 𑀧𑀭𑁂𑀲𑀁 𑀤𑀸𑀲𑀺𑀁 𑀲𑀸𑀯𑁂𑀢𑀼𑀁, 𑀦 𑀏𑀯𑀭𑀽𑀧𑀲𑁆𑀲 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲 𑀓𑀼𑀮𑀲𑁆𑀲 𑀤𑀸𑀢𑀼𑀁, 𑀆𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀪𑀺𑀓𑁆𑀔𑀼𑀤𑀲𑁆𑀲𑀦𑀸𑀤𑀻𑀲𑀼 𑀏𑀓𑀫𑁆𑀧𑀺 𑀧𑀼𑀜𑁆𑀜𑀁 𑀓𑀸𑀢𑀼𑀁 𑀦 𑀮𑀪𑀸𑀫𑀻’’𑀢𑀺. 𑀅𑀣𑀲𑁆𑀲𑀸 𑀧𑀺𑀢𑀸 ‘‘𑀤𑀼𑀓𑁆𑀔𑀺𑀢𑀸 𑀯𑀢 𑀫𑁂 𑀥𑀻𑀢𑀸’’𑀢𑀺 𑀅𑀦𑀢𑁆𑀢𑀫𑀦𑀢𑀁 𑀧𑀯𑁂𑀤𑁂𑀢𑁆𑀯𑀸 𑀧𑀜𑁆𑀘𑀤𑀲 𑀓𑀳𑀸𑀧𑀡𑀲𑀳𑀲𑁆𑀲𑀸𑀦𑀺 𑀧𑁂𑀲𑁂𑀲𑀺, ‘‘𑀇𑀫𑀲𑁆𑀫𑀺𑀁 𑀦𑀕𑀭𑁂 𑀲𑀺𑀭𑀺𑀫𑀸 𑀦𑀸𑀫 𑀕𑀡𑀺𑀓𑀸 𑀅𑀢𑁆𑀣𑀺, 𑀤𑁂𑀯𑀲𑀺𑀓𑀁 𑀲𑀳𑀲𑁆𑀲𑀁 𑀕𑀡𑁆𑀳𑀸𑀢𑀺, 𑀇𑀫𑁂𑀳𑀺 𑀓𑀳𑀸𑀧𑀡𑁂𑀳𑀺 𑀢𑀁 𑀆𑀦𑁂𑀢𑁆𑀯𑀸 𑀲𑀸𑀫𑀺𑀓𑀲𑁆𑀲 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀲𑀬𑀁 𑀬𑀣𑀸𑀭𑀼𑀘𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀢𑀽’’𑀢𑀺 𑀲𑀸𑀲𑀦𑀜𑁆𑀘 𑀧𑀳𑀺𑀡𑀺. 𑀉𑀢𑁆𑀢𑀭𑀸 𑀢𑀣𑀸 𑀓𑀢𑁆𑀯𑀸 𑀲𑀸𑀫𑀺𑀓𑁂𑀦 𑀲𑀺𑀭𑀺𑀫𑀁 𑀤𑀺𑀲𑁆𑀯𑀸 ‘‘𑀓𑀺𑀫𑀺𑀤’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀲𑀸𑀫𑀺, 𑀇𑀫𑀁 𑀅𑀟𑁆𑀠𑀫𑀸𑀲𑀁 𑀫𑀫 𑀲𑀳𑀸𑀬𑀺𑀓𑀸 𑀢𑀼𑀫𑁆𑀳𑁂 𑀧𑀭𑀺𑀘𑀭𑀢𑀼, 𑀅𑀳𑀁 𑀧𑀦 𑀇𑀫𑀁 𑀅𑀟𑁆𑀠𑀫𑀸𑀲𑀁 𑀤𑀸𑀦𑀜𑁆𑀘𑁂𑀯 𑀤𑀸𑀢𑀼𑀓𑀸𑀫𑀸 𑀥𑀫𑁆𑀫𑀜𑁆𑀘 𑀲𑁄𑀢𑀼𑀓𑀸𑀫𑀸’’𑀢𑀺 𑀆𑀳. 𑀲𑁄 𑀢𑀁 𑀅𑀪𑀺𑀭𑀽𑀧𑀁 𑀇𑀢𑁆𑀣𑀺𑀁 𑀤𑀺𑀲𑁆𑀯𑀸 𑀉𑀧𑁆𑀧𑀦𑁆𑀦𑀲𑀺𑀦𑁂𑀳𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺.

𑀉𑀢𑁆𑀢𑀭𑀸𑀧𑀺 𑀔𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 ‘‘𑀪𑀦𑁆𑀢𑁂, 𑀇𑀫𑀁 𑀅𑀟𑁆𑀠𑀫𑀸𑀲𑀁 𑀅𑀜𑁆𑀜𑀢𑁆𑀣 𑀅𑀕𑀦𑁆𑀢𑁆𑀯𑀸 𑀇𑀥𑁂𑀯 𑀪𑀺𑀓𑁆𑀔𑀸 𑀕𑀳𑁂𑀢𑀩𑁆𑀩𑀸’’𑀢𑀺 𑀲𑀢𑁆𑀣𑀼 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 ‘‘𑀇𑀢𑁄 𑀤𑀸𑀦𑀺 𑀧𑀝𑁆𑀞𑀸𑀬 𑀬𑀸𑀯 𑀫𑀳𑀸𑀧𑀯𑀸𑀭𑀡𑀸, 𑀢𑀸𑀯 𑀲𑀢𑁆𑀣𑀸𑀭𑀁 𑀉𑀧𑀝𑁆𑀞𑀸𑀢𑀼𑀁 𑀥𑀫𑁆𑀫𑀜𑁆𑀘 𑀲𑁄𑀢𑀼𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀢𑀼𑀝𑁆𑀞𑀫𑀸𑀦𑀲𑀸 ‘‘𑀏𑀯𑀁 𑀬𑀸𑀕𑀼𑀁 𑀧𑀘𑀣, 𑀏𑀯𑀁 𑀪𑀢𑁆𑀢𑀁 𑀧𑀘𑀣, 𑀏𑀯𑀁 𑀧𑀽𑀯𑀁 𑀧𑀘𑀣𑀸’’𑀢𑀺 𑀫𑀳𑀸𑀦𑀲𑁂 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀲𑀁𑀯𑀺𑀤𑀳𑀦𑁆𑀢𑀻 𑀯𑀺𑀘𑀭𑀢𑀺. 𑀅𑀣𑀲𑁆𑀲𑀸 𑀲𑀸𑀫𑀺𑀓𑁄 ‘‘𑀲𑁆𑀯𑁂 𑀫𑀳𑀸𑀧𑀯𑀸𑀭𑀡𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀫𑀳𑀸𑀦𑀲𑀸𑀪𑀺𑀫𑀼𑀔𑁄 𑀯𑀸𑀢𑀧𑀸𑀦𑁂 𑀞𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀓𑀭𑁄𑀦𑁆𑀢𑀻 𑀲𑀸 𑀅𑀦𑁆𑀥𑀩𑀸𑀮𑀸 𑀯𑀺𑀘𑀭𑀢𑀻’’𑀢𑀺 𑀑𑀮𑁄𑀓𑁂𑀢𑁆𑀯𑀸 𑀢𑀁 𑀲𑁂𑀤𑀓𑀺𑀮𑀺𑀦𑁆𑀦𑀁 𑀙𑀸𑀭𑀺𑀓𑀸𑀬 𑀑𑀓𑀺𑀡𑁆𑀡𑀁 𑀅𑀗𑁆𑀕𑀸𑀭𑀫𑀲𑀺𑀫𑀓𑁆𑀔𑀺𑀢𑀁 𑀢𑀣𑀸 𑀲𑀁𑀯𑀺𑀤𑀳𑀺𑀢𑁆𑀯𑀸 𑀯𑀺𑀘𑀭𑀫𑀸𑀦𑀁 𑀤𑀺𑀲𑁆𑀯𑀸 ‘‘𑀅𑀳𑁄 𑀅𑀦𑁆𑀥𑀩𑀸𑀮𑀸 𑀏𑀯𑀭𑀽𑀧𑁂 𑀞𑀸𑀦𑁂 𑀇𑀫𑀁 𑀲𑀺𑀭𑀺𑀲𑀫𑁆𑀧𑀢𑁆𑀢𑀺𑀁 𑀦𑀸𑀦𑀼𑀪𑀯𑀢𑀺, ‘‘𑀫𑀼𑀡𑁆𑀟𑀓𑀲𑀫𑀡𑁂 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀻’𑀢𑀺 𑀢𑀼𑀝𑁆𑀞𑀘𑀺𑀢𑁆𑀢𑀸 𑀯𑀺𑀘𑀭𑀢𑀻’’𑀢𑀺 𑀳𑀲𑀺𑀢𑁆𑀯𑀸 𑀅𑀧𑀕𑀜𑁆𑀙𑀺.

𑀢𑀲𑁆𑀫𑀺𑀁 𑀅𑀧𑀕𑀢𑁂 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀞𑀺𑀢𑀸 𑀲𑀺𑀭𑀺𑀫𑀸 ‘‘𑀓𑀺𑀁 𑀦𑀼 𑀔𑁄 𑀑𑀮𑁄𑀓𑁂𑀢𑁆𑀯𑀸 𑀏𑀲 𑀳𑀲𑀢𑀻’’𑀢𑀺 𑀢𑁂𑀦𑁂𑀯 𑀯𑀸𑀢𑀧𑀸𑀦𑁂𑀦 𑀑𑀮𑁄𑀓𑁂𑀦𑁆𑀢𑀻 𑀉𑀢𑁆𑀢𑀭𑀁 𑀤𑀺𑀲𑁆𑀯𑀸 ‘‘𑀇𑀫𑀁 𑀑𑀮𑁄𑀓𑁂𑀢𑁆𑀯𑀸 𑀇𑀫𑀺𑀦𑀸 𑀳𑀲𑀺𑀢𑀁, 𑀅𑀤𑁆𑀥𑀸 𑀇𑀫𑀲𑁆𑀲 𑀏𑀢𑀸𑀬 𑀲𑀤𑁆𑀥𑀺𑀁 𑀲𑀦𑁆𑀣𑀯𑁄 𑀅𑀢𑁆𑀣𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀲𑀸 𑀓𑀺𑀭 𑀅𑀟𑁆𑀠𑀫𑀸𑀲𑀁 𑀢𑀲𑁆𑀫𑀺𑀁 𑀕𑁂𑀳𑁂 𑀩𑀸𑀳𑀺𑀭𑀓𑀇𑀢𑁆𑀣𑀻 𑀳𑀼𑀢𑁆𑀯𑀸 𑀯𑀲𑀫𑀸𑀦𑀸𑀧𑀺 𑀢𑀁 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀫𑀸𑀦𑀸 𑀅𑀢𑁆𑀢𑀦𑁄 𑀩𑀸𑀳𑀺𑀭𑀓𑀇𑀢𑁆𑀣𑀺𑀪𑀸𑀯𑀁 𑀅𑀚𑀸𑀦𑀺𑀢𑁆𑀯𑀸 ‘‘𑀅𑀳𑀁 𑀖𑀭𑀲𑀸𑀫𑀺𑀦𑀻’’𑀢𑀺 𑀲𑀜𑁆𑀜𑀫𑀓𑀸𑀲𑀺. 𑀲𑀸 𑀉𑀢𑁆𑀢𑀭𑀸𑀬 𑀆𑀖𑀸𑀢𑀁 𑀩𑀦𑁆𑀥𑀺𑀢𑁆𑀯𑀸 ‘‘𑀤𑀼𑀓𑁆𑀔𑀫𑀲𑁆𑀲𑀸 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀻’’𑀢𑀺 𑀧𑀸𑀲𑀸𑀤𑀸 𑀑𑀭𑀼𑀬𑁆𑀳 𑀫𑀳𑀸𑀦𑀲𑀁 𑀧𑀯𑀺𑀲𑀺𑀢𑁆𑀯𑀸 𑀧𑀽𑀯𑀧𑀘𑀦𑀝𑁆𑀞𑀸𑀦𑁂 𑀧𑀓𑁆𑀓𑀼𑀣𑀺𑀢𑀁 𑀲𑀧𑁆𑀧𑀺𑀁 𑀓𑀝𑀘𑁆𑀙𑀼𑀦𑀸 𑀆𑀤𑀸𑀬 𑀉𑀢𑁆𑀢𑀭𑀸𑀪𑀺𑀫𑀼𑀔𑀁 𑀧𑀸𑀬𑀸𑀲𑀺. 𑀉𑀢𑁆𑀢𑀭𑀸 𑀢𑀁 𑀆𑀕𑀘𑁆𑀙𑀦𑁆𑀢𑀺𑀁 𑀤𑀺𑀲𑁆𑀯𑀸 ‘‘𑀫𑀫 𑀲𑀳𑀸𑀬𑀺𑀓𑀸𑀬 𑀫𑀬𑁆𑀳𑀁 𑀉𑀧𑀓𑀸𑀭𑁄 𑀓𑀢𑁄, 𑀘𑀓𑁆𑀓𑀯𑀸𑀴𑀁 𑀅𑀢𑀺𑀲𑀫𑁆𑀩𑀸𑀥𑀁, 𑀩𑁆𑀭𑀳𑁆𑀫𑀮𑁄𑀓𑁄 𑀅𑀢𑀺𑀦𑀻𑀘𑀓𑁄, 𑀫𑀫 𑀧𑀦 𑀲𑀳𑀸𑀬𑀺𑀓𑀸𑀬 𑀕𑀼𑀡𑁄𑀯 𑀫𑀳𑀦𑁆𑀢𑁄, 𑀅𑀳𑀫𑁆𑀧𑀺 𑀏𑀢𑀁 𑀦𑀺𑀲𑁆𑀲𑀸𑀬 𑀤𑀸𑀦𑀜𑁆𑀘 𑀤𑀸𑀢𑀼𑀁 𑀥𑀫𑁆𑀫𑀜𑁆𑀘 𑀲𑁄𑀢𑀼𑀁 𑀮𑀪𑀺𑀁, 𑀲𑀘𑁂 𑀫𑀫 𑀏𑀢𑀺𑀲𑁆𑀲𑀸𑀬 𑀉𑀧𑀭𑀺 𑀓𑁄𑀥𑁄 𑀅𑀢𑁆𑀣𑀺, 𑀇𑀤𑀁 𑀲𑀧𑁆𑀧𑀺 𑀫𑀁 𑀤𑀳𑀢𑀼, 𑀲𑀘𑁂 𑀦𑀢𑁆𑀣𑀺, 𑀫𑀸 𑀫𑀁 𑀤𑀳𑀢𑀽’’𑀢𑀺 𑀢𑀁 𑀫𑁂𑀢𑁆𑀢𑀸𑀬 𑀨𑀭𑀺. 𑀢𑀸𑀬 𑀢𑀲𑁆𑀲𑀸 𑀫𑀢𑁆𑀣𑀓𑁂 𑀆𑀲𑀺𑀜𑁆𑀘𑀺𑀢𑀫𑁆𑀧𑀺 𑀧𑀓𑁆𑀓𑀼𑀣𑀺𑀢𑀲𑀧𑁆𑀧𑀺 𑀲𑀻𑀢𑁄𑀤𑀓𑀁 𑀯𑀺𑀬 𑀅𑀳𑁄𑀲𑀺. 𑀅𑀣 𑀦𑀁 ‘‘𑀇𑀤𑀁 𑀲𑀻𑀢𑀮𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀼𑀦 𑀓𑀝𑀘𑁆𑀙𑀼𑀓𑀁 𑀧𑀽𑀭𑁂𑀢𑁆𑀯𑀸 𑀆𑀤𑀸𑀬 𑀆𑀕𑀘𑁆𑀙𑀦𑁆𑀢𑀺𑀁 𑀉𑀢𑁆𑀢𑀭𑀸𑀬 𑀤𑀸𑀲𑀺𑀬𑁄 𑀤𑀺𑀲𑁆𑀯𑀸 ‘‘𑀅𑀭𑁂 𑀤𑀼𑀩𑁆𑀩𑀺𑀦𑀻𑀢𑁂 𑀦 𑀢𑁆𑀯𑀁 𑀅𑀫𑁆𑀳𑀸𑀓𑀁 𑀅𑀬𑁆𑀬𑀸𑀬 𑀉𑀧𑀭𑀺 𑀧𑀓𑁆𑀓𑀲𑀧𑁆𑀧𑀺𑀁 𑀆𑀲𑀺𑀜𑁆𑀘𑀺𑀢𑀼𑀁 𑀅𑀦𑀼𑀘𑁆𑀙𑀯𑀺𑀓𑀸’’𑀢𑀺 𑀲𑀦𑁆𑀢𑀚𑁆𑀚𑁂𑀦𑁆𑀢𑀺𑀬𑁄 𑀇𑀢𑁄 𑀘𑀺𑀢𑁄 𑀘 𑀉𑀝𑁆𑀞𑀸𑀬 𑀳𑀢𑁆𑀣𑁂𑀳𑀺 𑀘 𑀧𑀸𑀤𑁂𑀳𑀺 𑀘 𑀧𑁄𑀣𑁂𑀢𑁆𑀯𑀸 𑀪𑀽𑀫𑀺𑀬𑀁 𑀧𑀸𑀢𑁂𑀲𑀼𑀁, 𑀉𑀢𑁆𑀢𑀭𑀸 𑀯𑀸𑀭𑁂𑀦𑁆𑀢𑀻𑀧𑀺 𑀯𑀸𑀭𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀅𑀣 𑀲𑀸 𑀉𑀧𑀭𑀺 𑀞𑀢𑁆𑀯𑀸 𑀲𑀩𑁆𑀩𑀸 𑀤𑀸𑀲𑀺𑀬𑁄 𑀧𑀝𑀺𑀩𑀸𑀳𑀺𑀢𑁆𑀯𑀸 ‘‘𑀓𑀺𑀲𑁆𑀲 𑀢𑁂 𑀏𑀯𑀭𑀽𑀧𑀁 𑀪𑀸𑀭𑀺𑀬𑀁 𑀓𑀫𑁆𑀫𑀁 𑀓𑀢’’𑀦𑁆𑀢𑀺 𑀲𑀺𑀭𑀺𑀫𑀁 𑀑𑀯𑀤𑀺𑀢𑁆𑀯𑀸 𑀉𑀡𑁆𑀳𑁄𑀤𑀓𑁂𑀦 𑀦𑁆𑀳𑀸𑀧𑁂𑀢𑁆𑀯𑀸 𑀲𑀢𑀧𑀸𑀓𑀢𑁂𑀮𑁂𑀦 𑀅𑀩𑁆𑀪𑀜𑁆𑀚𑀺.

𑀢𑀲𑁆𑀫𑀺𑀁 𑀔𑀡𑁂 𑀲𑀸 𑀅𑀢𑁆𑀢𑀦𑁄 𑀩𑀸𑀳𑀺𑀭𑀓𑀺𑀢𑁆𑀣𑀺𑀪𑀸𑀯𑀁 𑀜𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀫𑀬𑀸 𑀪𑀸𑀭𑀺𑀬𑀁 𑀓𑀫𑁆𑀫𑀁 𑀓𑀢𑀁 𑀲𑀸𑀫𑀺𑀓𑀲𑁆𑀲 𑀳𑀲𑀺𑀢𑀫𑀢𑁆𑀢𑀓𑀸𑀭𑀡𑀸 𑀇𑀫𑀺𑀲𑁆𑀲𑀸 𑀉𑀧𑀭𑀺 𑀧𑀓𑁆𑀓𑀲𑀧𑁆𑀧𑀺𑀁 𑀆𑀲𑀺𑀜𑁆𑀘𑀦𑁆𑀢𑀺𑀬𑀸, 𑀅𑀬𑀁 ‘𑀕𑀡𑁆𑀳𑀣 𑀦’𑀦𑁆𑀢𑀺 𑀤𑀸𑀲𑀺𑀬𑁄 𑀦 𑀆𑀡𑀸𑀧𑁂𑀢𑁆𑀯𑀸 𑀫𑀁 𑀯𑀺𑀳𑁂𑀞𑀦𑀓𑀸𑀮𑁂𑀧𑀺 𑀲𑀩𑁆𑀩𑀸 𑀤𑀸𑀲𑀺𑀬𑁄 𑀧𑀝𑀺𑀩𑀸𑀳𑀺𑀢𑁆𑀯𑀸 𑀫𑀬𑁆𑀳𑀁 𑀓𑀢𑁆𑀢𑀩𑁆𑀩𑀫𑁂𑀯 𑀅𑀓𑀸𑀲𑀺. 𑀲𑀘𑀸𑀳𑀁 𑀇𑀫𑀁 𑀦 𑀔𑀫𑀸𑀧𑁂𑀲𑁆𑀲𑀸𑀫𑀺, 𑀫𑀼𑀤𑁆𑀥𑀸 𑀫𑁂 𑀲𑀢𑁆𑀢𑀥𑀸 𑀨𑀮𑁂𑀬𑁆𑀬𑀸’’𑀢𑀺 𑀢𑀲𑁆𑀲𑀸 𑀧𑀸𑀤𑀫𑀽𑀮𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 ‘‘𑀅𑀬𑁆𑀬𑁂, 𑀔𑀫𑀸𑀳𑀺 𑀫𑁂 𑀤𑁄𑀲’’𑀦𑁆𑀢𑀺 𑀆𑀳. ‘‘𑀅𑀳𑀁 𑀲𑀧𑁆𑀧𑀺𑀢𑀺𑀓𑀸 𑀥𑀻𑀢𑀸, 𑀧𑀺𑀢𑀭𑀺 𑀫𑁂 𑀔𑀫𑀸𑀧𑀺𑀢𑁂 𑀔𑀫𑀺𑀲𑁆𑀲𑀸𑀫𑀻’’𑀢𑀺. ‘‘𑀳𑁄𑀢𑀼, 𑀅𑀬𑁆𑀬𑁂, 𑀧𑀺𑀢𑀭𑀫𑁆𑀧𑀺 𑀢𑁂 𑀧𑀼𑀡𑁆𑀡𑀲𑁂𑀝𑁆𑀞𑀺𑀁 𑀔𑀫𑀸𑀧𑁂𑀲𑁆𑀲𑀸𑀫𑀻’’𑀢𑀺. ‘‘𑀧𑀼𑀡𑁆𑀡𑁄 𑀫𑀫 𑀯𑀝𑁆𑀝𑁂 𑀚𑀦𑀓𑀧𑀺𑀢𑀸, 𑀯𑀺𑀯𑀝𑁆𑀝𑁂 𑀚𑀦𑀓𑀧𑀺𑀢𑀭𑀺 𑀔𑀫𑀸𑀧𑀺𑀢𑁂 𑀧𑀦 𑀅𑀳𑀁 𑀔𑀫𑀺𑀲𑁆𑀲𑀸𑀫𑀻’’𑀢𑀺. ‘‘𑀓𑁄 𑀧𑀦 𑀢𑁂 𑀯𑀺𑀯𑀝𑁆𑀝𑁂 𑀚𑀦𑀓𑀧𑀺𑀢𑀸’’𑀢𑀺? ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺. ‘‘𑀫𑀬𑁆𑀳𑀁 𑀢𑁂𑀦 𑀲𑀤𑁆𑀥𑀺𑀁 𑀯𑀺𑀲𑁆𑀲𑀸𑀲𑁄 𑀦𑀢𑁆𑀣𑀺, 𑀅𑀳𑀁 𑀓𑀺𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺? ‘‘𑀲𑀢𑁆𑀣𑀸 𑀲𑁆𑀯𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀆𑀤𑀸𑀬 𑀇𑀥𑀸𑀕𑀫𑀺𑀲𑁆𑀲𑀢𑀺, 𑀢𑁆𑀯𑀁 𑀬𑀣𑀸𑀮𑀤𑁆𑀥𑀁 𑀲𑀓𑁆𑀓𑀸𑀭𑀁 𑀕𑀳𑁂𑀢𑁆𑀯𑀸 𑀇𑀥𑁂𑀯 𑀆𑀕𑀦𑁆𑀢𑁆𑀯𑀸 𑀢𑀁 𑀔𑀫𑀸𑀧𑁂𑀳𑀻’’𑀢𑀺. 𑀲𑀸 ‘‘𑀲𑀸𑀥𑀼, 𑀅𑀬𑁆𑀬𑁂’’𑀢𑀺 𑀉𑀝𑁆𑀞𑀸𑀬 𑀅𑀢𑁆𑀢𑀦𑁄 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀧𑀜𑁆𑀘𑀲𑀢𑀧𑀭𑀺𑀘𑀸𑀭𑀺𑀓𑀺𑀢𑁆𑀣𑀺𑀬𑁄 𑀆𑀡𑀸𑀧𑁂𑀢𑁆𑀯𑀸 𑀦𑀸𑀦𑀸𑀯𑀺𑀥𑀸𑀦𑀺 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀸𑀦𑀺 𑀘𑁂𑀯 𑀲𑀽𑀧𑁂𑀬𑁆𑀬𑀸𑀦𑀺 𑀘 𑀲𑀫𑁆𑀧𑀸𑀤𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀢𑀁 𑀲𑀓𑁆𑀓𑀸𑀭𑀁 𑀆𑀤𑀸𑀬 𑀉𑀢𑁆𑀢𑀭𑀸𑀬 𑀕𑁂𑀳𑀁 𑀆𑀕𑀦𑁆𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀢𑁆𑀢𑁂 𑀧𑀢𑀺𑀝𑁆𑀞𑀸𑀧𑁂𑀢𑀼𑀁 𑀅𑀯𑀺𑀲𑀳𑀦𑁆𑀢𑀻 𑀅𑀝𑁆𑀞𑀸𑀲𑀺, 𑀢𑀁 𑀲𑀩𑁆𑀩𑀁 𑀕𑀳𑁂𑀢𑁆𑀯𑀸 𑀉𑀢𑁆𑀢𑀭𑀸𑀯 𑀲𑀁𑀯𑀺𑀤𑀳𑀺.

𑀲𑀺𑀭𑀺𑀫𑀸𑀧𑀺 𑀲𑀢𑁆𑀣𑀼 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀲𑀤𑁆𑀥𑀺𑀁 𑀧𑀭𑀺𑀯𑀸𑀭𑁂𑀦 𑀲𑀢𑁆𑀣𑀼 𑀧𑀸𑀤𑀫𑀽𑀮𑁂 𑀦𑀺𑀧𑀚𑁆𑀚𑀺. 𑀅𑀣 𑀦𑀁 𑀲𑀢𑁆𑀣𑀸 𑀧𑀼𑀘𑁆𑀙𑀺 ‘‘𑀓𑁄 𑀢𑁂 𑀅𑀧𑀭𑀸𑀥𑁄’’𑀢𑀺. ‘‘𑀪𑀦𑁆𑀢𑁂 𑀫𑀬𑀸 𑀳𑀺𑀬𑁆𑀬𑁄 𑀇𑀤𑀁 𑀦𑀸𑀫 𑀓𑀢𑀁, 𑀅𑀣 𑀫𑁂 𑀲𑀳𑀸𑀬𑀺𑀓𑀸 𑀫𑀁 𑀯𑀺𑀳𑁂𑀞𑀬𑀫𑀸𑀦𑀸 𑀤𑀸𑀲𑀺𑀬𑁄 𑀦𑀺𑀯𑀸𑀭𑁂𑀢𑁆𑀯𑀸 𑀫𑀬𑁆𑀳𑀁 𑀉𑀧𑀓𑀸𑀭𑀫𑁂𑀯 𑀅𑀓𑀸𑀲𑀺. 𑀲𑀸𑀳𑀁 𑀇𑀫𑀺𑀲𑁆𑀲𑀸 𑀕𑀼𑀡𑀁 𑀚𑀸𑀦𑀺𑀢𑁆𑀯𑀸 𑀇𑀫𑀁 𑀔𑀫𑀸𑀧𑁂𑀲𑀺𑀁, 𑀅𑀣 𑀫𑀁 𑀏𑀲𑀸 ‘𑀢𑀼𑀫𑁆𑀳𑁂𑀲𑀼 𑀔𑀫𑀸𑀧𑀺𑀢𑁂𑀲𑀼 𑀔𑀫𑀺𑀲𑁆𑀲𑀸𑀫𑀻’𑀢𑀺 𑀆𑀳𑀸’’𑀢𑀺. ‘‘𑀏𑀯𑀁 𑀓𑀺𑀭 𑀉𑀢𑁆𑀢𑀭𑁂’’𑀢𑀺. ‘‘𑀆𑀫, 𑀪𑀦𑁆𑀢𑁂, 𑀲𑀻𑀲𑁂 𑀫𑁂 𑀲𑀳𑀸𑀬𑀺𑀓𑀸𑀬 𑀧𑀓𑁆𑀓𑀲𑀧𑁆𑀧𑀺 𑀆𑀲𑀺𑀢𑁆𑀢’’𑀦𑁆𑀢𑀺. ‘‘𑀅𑀣 𑀢𑀬𑀸 𑀓𑀺𑀁 𑀘𑀺𑀦𑁆𑀢𑀺𑀢’’𑀦𑁆𑀢𑀺? ‘‘𑀘𑀓𑁆𑀓𑀯𑀸𑀴𑀁 𑀅𑀢𑀺𑀲𑀫𑁆𑀩𑀸𑀥𑀁, 𑀩𑁆𑀭𑀳𑁆𑀫𑀮𑁄𑀓𑁄 𑀅𑀢𑀺𑀦𑀻𑀘𑀓𑁄, 𑀫𑀫 𑀲𑀳𑀸𑀬𑀺𑀓𑀸𑀬 𑀕𑀼𑀡𑁄𑀯 𑀫𑀳𑀦𑁆𑀢𑁄, 𑀅𑀳𑀜𑁆𑀳𑀺 𑀏𑀢𑀁 𑀦𑀺𑀲𑁆𑀲𑀸𑀬 𑀤𑀸𑀦𑀜𑁆𑀘 𑀤𑀸𑀢𑀼𑀁 𑀥𑀫𑁆𑀫𑀜𑁆𑀘 𑀲𑁄𑀢𑀼𑀁 𑀅𑀮𑀢𑁆𑀣𑀁, 𑀲𑀘𑁂 𑀫𑁂 𑀇𑀫𑀺𑀲𑁆𑀲𑀸 𑀉𑀧𑀭𑀺 𑀓𑁄𑀥𑁄 𑀅𑀢𑁆𑀣𑀺, 𑀇𑀤𑀁 𑀫𑀁 𑀤𑀳𑀢𑀼, 𑀦𑁄 𑀘𑁂, 𑀫𑀸 𑀤𑀳𑀢𑀽’’𑀢𑀺 𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 𑀇𑀫𑀁 𑀫𑁂𑀢𑁆𑀢𑀸𑀬 𑀨𑀭𑀺𑀁, 𑀪𑀦𑁆𑀢𑁂𑀢𑀺. 𑀲𑀢𑁆𑀣𑀸 ‘‘𑀲𑀸𑀥𑀼 𑀲𑀸𑀥𑀼, 𑀉𑀢𑁆𑀢𑀭𑁂, 𑀏𑀯𑀁 𑀓𑁄𑀥𑀁 𑀚𑀺𑀦𑀺𑀢𑀼𑀁 𑀯𑀝𑁆𑀝𑀢𑀺. 𑀓𑁄𑀥𑀦𑁄 𑀳𑀺 𑀦𑀸𑀫 𑀅𑀓𑁆𑀓𑁄𑀥𑁂𑀦, 𑀅𑀓𑁆𑀓𑁄𑀲𑀓𑁄 𑀅𑀦𑀓𑁆𑀓𑁄𑀲𑀦𑁆𑀢𑁂𑀦, 𑀧𑀭𑀺𑀪𑀸𑀲𑀓𑁄 𑀅𑀧𑀭𑀺𑀪𑀸𑀲𑀦𑁆𑀢𑁂𑀦, 𑀣𑀤𑁆𑀥𑀫𑀘𑁆𑀙𑀭𑀻 𑀅𑀢𑁆𑀢𑀦𑁄 𑀲𑀦𑁆𑀢𑀓𑀲𑁆𑀲 𑀤𑀸𑀦𑁂𑀦, 𑀫𑀼𑀲𑀸𑀯𑀸𑀤𑀻 𑀲𑀘𑁆𑀘𑀯𑀘𑀦𑁂𑀦 𑀚𑀺𑀦𑀺𑀢𑀩𑁆𑀩𑁄’’𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑁋

‘‘𑀅𑀓𑁆𑀓𑁄𑀥𑁂𑀦 𑀚𑀺𑀦𑁂 𑀓𑁄𑀥𑀁, 𑀅𑀲𑀸𑀥𑀼𑀁 𑀲𑀸𑀥𑀼𑀦𑀸 𑀚𑀺𑀦𑁂;

𑀚𑀺𑀦𑁂 𑀓𑀤𑀭𑀺𑀬𑀁 𑀤𑀸𑀦𑁂𑀦, 𑀲𑀘𑁆𑀘𑁂𑀦𑀸𑀮𑀺𑀓𑀯𑀸𑀤𑀺𑀦’’𑀦𑁆𑀢𑀺. (𑀥. 𑀧. 𑁨𑁨𑁩) 𑁋

𑀇𑀫𑀁 𑀕𑀸𑀣𑀁 𑀯𑀢𑁆𑀯𑀸 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀘𑀢𑀼𑀲𑀘𑁆𑀘𑀓𑀣𑀁 𑀅𑀪𑀸𑀲𑀺. 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀢𑁆𑀢𑀭𑀸 𑀲𑀓𑀤𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀳𑀺, 𑀲𑀸𑀫𑀺𑀓𑁄 𑀘 𑀲𑀲𑀼𑀭𑁄 𑀘 𑀲𑀲𑁆𑀲𑀼 𑀘 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀲𑀘𑁆𑀙𑀺𑀓𑀭𑀺𑀁𑀲𑀼, 𑀲𑀺𑀭𑀺𑀫𑀸𑀧𑀺 𑀧𑀜𑁆𑀘𑀲𑀢𑀧𑀭𑀺𑀯𑀸𑀭𑀸 𑀲𑁄𑀢𑀸𑀧𑀦𑁆𑀦𑀸 𑀅𑀳𑁄𑀲𑀺. 𑀅𑀧𑀭𑀪𑀸𑀕𑁂 𑀉𑀢𑁆𑀢𑀭𑀸 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀉𑀧𑁆𑀧𑀚𑁆𑀚𑀺. 𑀅𑀣𑀸𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀤𑁂𑀯𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀉𑀢𑁆𑀢𑀭𑀁 𑀤𑁂𑀯𑀥𑀻𑀢𑀭𑀁 𑀤𑀺𑀲𑁆𑀯𑀸 𑁋

𑁧𑁨𑁪. ‘‘𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦, 𑀬𑀸 𑀢𑁆𑀯𑀁 𑀢𑀺𑀝𑁆𑀞𑀲𑀺 𑀤𑁂𑀯𑀢𑁂;

𑀑𑀪𑀸𑀲𑁂𑀦𑁆𑀢𑀻 𑀤𑀺𑀲𑀸 𑀲𑀩𑁆𑀩𑀸, 𑀑𑀲𑀥𑀻 𑀯𑀺𑀬 𑀢𑀸𑀭𑀓𑀸.

𑁧𑁨𑁫. ‘‘𑀓𑁂𑀦 𑀢𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀓𑁂𑀦 𑀢𑁂 𑀇𑀥 𑀫𑀺𑀚𑁆𑀛𑀢𑀺;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀢𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

𑁧𑁨𑁬. ‘‘𑀧𑀼𑀘𑁆𑀙𑀸𑀫𑀺 𑀢𑀁 𑀤𑁂𑀯𑀺 𑀫𑀳𑀸𑀦𑀼𑀪𑀸𑀯𑁂,

𑀫𑀦𑀼𑀲𑁆𑀲𑀪𑀽𑀢𑀸 𑀓𑀺𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀓𑁂𑀦𑀸𑀲𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸,

𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺. 𑁋 𑀧𑀝𑀺𑀧𑀼𑀘𑁆𑀙𑀺;

𑁧𑁨𑁭. ‘‘𑀲𑀸 𑀤𑁂𑀯𑀢𑀸 𑀅𑀢𑁆𑀢𑀫𑀦𑀸, 𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀧𑀼𑀘𑁆𑀙𑀺𑀢𑀸;

𑀧𑀜𑁆𑀳𑀁 𑀧𑀼𑀝𑁆𑀞𑀸 𑀯𑀺𑀬𑀸𑀓𑀸𑀲𑀺, 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁’’.

𑁧𑁨𑁮. ‘‘𑀇𑀲𑁆𑀲𑀸 𑀘 𑀫𑀘𑁆𑀙𑁂𑀭𑀫𑀣𑁄 𑀧𑀴𑀸𑀲𑁄, 𑀦𑀸𑀳𑁄𑀲𑀺 𑀫𑀬𑁆𑀳𑀁 𑀖𑀭𑀫𑀸𑀯𑀲𑀦𑁆𑀢𑀺𑀬𑀸;

𑀅𑀓𑁆𑀓𑁄𑀥𑀦𑀸 𑀪𑀢𑁆𑀢𑀼 𑀯𑀲𑀸𑀦𑀼𑀯𑀢𑁆𑀢𑀺𑀦𑀻, 𑀉𑀧𑁄𑀲𑀣𑁂 𑀦𑀺𑀘𑁆𑀘𑀳𑀫𑀧𑁆𑀧𑀫𑀢𑁆𑀢𑀸.

𑁧𑁨𑁯. ‘‘𑀘𑀸𑀢𑀼𑀤𑁆𑀤𑀲𑀺𑀁 𑀧𑀜𑁆𑀘𑀤𑀲𑀺𑀁, 𑀬𑀸 𑀘 𑀧𑀓𑁆𑀔𑀲𑁆𑀲 𑀅𑀝𑁆𑀞𑀫𑀻;

𑀧𑀸𑀝𑀺𑀳𑀸𑀭𑀺𑀬𑀧𑀓𑁆𑀔𑀜𑁆𑀘, 𑀅𑀝𑁆𑀞𑀗𑁆𑀕𑀲𑀼𑀲𑀫𑀸𑀕𑀢𑀁.

𑁧𑁩𑁦. ‘‘𑀉𑀧𑁄𑀲𑀣𑀁 𑀉𑀧𑀯𑀲𑀺𑀲𑁆𑀲𑀁, 𑀲𑀤𑀸 𑀲𑀻𑀮𑁂𑀲𑀼 𑀲𑀁𑀯𑀼𑀢𑀸;

𑀲𑀜𑁆𑀜𑀫𑀸 𑀲𑀁𑀯𑀺𑀪𑀸𑀕𑀸 𑀘, 𑀯𑀺𑀫𑀸𑀦𑀁 𑀆𑀯𑀲𑀸𑀫𑀳𑀁.

𑁧𑁩𑁧. ‘‘𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀢𑀸, 𑀫𑀼𑀲𑀸𑀯𑀸𑀤𑀸 𑀘 𑀲𑀜𑁆𑀜𑀢𑀸;

𑀣𑁂𑀬𑁆𑀬𑀸 𑀘 𑀅𑀢𑀺𑀘𑀸𑀭𑀸 𑀘, 𑀫𑀚𑁆𑀚𑀧𑀸𑀦𑀸 𑀘 𑀆𑀭𑀓𑀸.

𑁧𑁩𑁨. ‘‘𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑁂 𑀭𑀢𑀸, 𑀅𑀭𑀺𑀬𑀲𑀘𑁆𑀘𑀸𑀦 𑀓𑁄𑀯𑀺𑀤𑀸;

𑀉𑀧𑀸𑀲𑀺𑀓𑀸 𑀘𑀓𑁆𑀔𑀼𑀫𑀢𑁄, 𑀕𑁄𑀢𑀫𑀲𑁆𑀲 𑀬𑀲𑀲𑁆𑀲𑀺𑀦𑁄.

𑁧𑁩𑁩. ‘‘𑀲𑀸𑀳𑀁 𑀲𑀓𑁂𑀦 𑀲𑀻𑀮𑁂𑀦, 𑀬𑀲𑀲𑀸 𑀘 𑀬𑀲𑀲𑁆𑀲𑀺𑀦𑀻;

𑀅𑀦𑀼𑀪𑁄𑀫𑀺 𑀲𑀓𑀁 𑀧𑀼𑀜𑁆𑀜𑀁, 𑀲𑀼𑀔𑀺𑀢𑀸 𑀘𑀫𑁆𑀳𑀺𑀦𑀸𑀫𑀬𑀸.

𑁧𑁩𑁪. ‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀢𑁂𑀦 𑀫𑁂 𑀇𑀥 𑀫𑀺𑀚𑁆𑀛𑀢𑀺;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀫𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

𑁧𑁩𑁫. ‘‘𑀅𑀓𑁆𑀔𑀸𑀫𑀺 𑀢𑁂 𑀪𑀺𑀓𑁆𑀔𑀼 𑀫𑀳𑀸𑀦𑀼𑀪𑀸𑀯, 𑀫𑀦𑀼𑀲𑁆𑀲𑀪𑀽𑀢𑀸 𑀬𑀫𑀳𑀁 𑀅𑀓𑀸𑀲𑀺𑀁;

𑀢𑁂𑀦𑀫𑁆𑀳𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸, 𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺. 𑁋

𑀤𑁂𑀯𑀢𑀸𑀧𑀺𑀲𑁆𑀲 𑀯𑀺𑀲𑁆𑀲𑀚𑁆𑀚𑁂𑀲𑀺.

𑁧𑁨𑁬. 𑀫𑀫 𑀘, 𑀪𑀦𑁆𑀢𑁂, 𑀯𑀘𑀦𑁂𑀦 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑁂𑀬𑁆𑀬𑀸𑀲𑀺 ‘‘𑀉𑀢𑁆𑀢𑀭𑀸 𑀦𑀸𑀫 𑀪𑀦𑁆𑀢𑁂, 𑀉𑀧𑀸𑀲𑀺𑀓𑀸 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀢𑀻’’𑀢𑀺. 𑀅𑀦𑀘𑁆𑀙𑀭𑀺𑀬𑀁 𑀔𑁄 𑀧𑀦𑁂𑀢𑀁, 𑀪𑀦𑁆𑀢𑁂, 𑀬𑀁 𑀫𑀁 𑀪𑀕𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀲𑀸𑀫𑀜𑁆𑀜𑀨𑀮𑁂 𑀩𑁆𑀬𑀸𑀓𑀭𑁂𑀬𑁆𑀬, 𑀢𑀁 𑀪𑀕𑀯𑀸 𑀲𑀓𑀤𑀸𑀕𑀸𑀫𑀺𑀨𑀮𑁂 𑀩𑁆𑀬𑀸𑀓𑀸𑀲𑀻𑀢𑀺.

𑁧𑁨𑁮. 𑀢𑀢𑁆𑀣 𑀇𑀲𑁆𑀲𑀸 𑀘 𑀫𑀘𑁆𑀙𑁂𑀭𑀫𑀣𑁄 𑀧𑀴𑀸𑀲𑁄, 𑀦𑀸𑀳𑁄𑀲𑀺 𑀫𑀬𑁆𑀳𑀁 𑀖𑀭𑀫𑀸𑀯𑀲𑀦𑁆𑀢𑀺𑀬𑀸𑀢𑀺 𑀬𑀸 𑀘 𑀅𑀕𑀸𑀭𑀫𑀚𑁆𑀛𑁂 𑀯𑀲𑀦𑁆𑀢𑀻𑀦𑀁 𑀅𑀜𑁆𑀜𑀸𑀲𑀁 𑀇𑀢𑁆𑀣𑀻𑀦𑀁 𑀲𑀫𑁆𑀧𑀢𑁆𑀢𑀺𑀆𑀤𑀺𑀯𑀺𑀲𑀬𑀸 𑀧𑀭𑀲𑀫𑁆𑀧𑀢𑁆𑀢𑀺𑀉𑀲𑀽𑀬𑀦𑀮𑀓𑁆𑀔𑀡𑀸 𑀇𑀲𑁆𑀲𑀸, 𑀬𑀜𑁆𑀘 𑀢𑀸𑀯𑀓𑀸𑀮𑀺𑀓𑀸𑀤𑀺𑀯𑀲𑁂𑀦𑀸𑀧𑀺 𑀓𑀺𑀜𑁆𑀘𑀺 𑀬𑀸𑀘𑀦𑁆𑀢𑀸𑀦𑀁 𑀅𑀤𑀸𑀢𑀼𑀓𑀸𑀫𑀢𑀸𑀬 𑀅𑀢𑁆𑀢𑀲𑀫𑁆𑀧𑀢𑁆𑀢𑀺𑀦𑀺𑀕𑀽𑀳𑀦𑀮𑀓𑁆𑀔𑀡𑀁 𑀫𑀘𑁆𑀙𑀭𑀺𑀬𑀁, 𑀬𑁄 𑀘 𑀓𑀼𑀮𑀧𑀤𑁂𑀲𑀸𑀤𑀺𑀦𑀸 𑀧𑀭𑁂𑀳𑀺 𑀬𑀼𑀕𑀕𑁆𑀕𑀸𑀳𑀮𑀓𑁆𑀔𑀡𑁄 𑀧𑀴𑀸𑀲𑁄 𑀉𑀧𑁆𑀧𑀚𑁆𑀚𑀢𑀺, 𑀲𑁄 𑀢𑀺𑀯𑀺𑀥𑁄𑀧𑀺 𑀧𑀸𑀧𑀥𑀫𑁆𑀫𑁄 𑀕𑁂𑀳𑁂 𑀞𑀺𑀢𑀸𑀬 𑀫𑀬𑁆𑀳𑀁 𑀲𑀢𑀺𑀧𑀺 𑀧𑀘𑁆𑀘𑀬𑀲𑀫𑀯𑀸𑀬𑁂 𑀦𑀸𑀳𑁄𑀲𑀺 𑀦 𑀉𑀧𑁆𑀧𑀚𑁆𑀚𑀺. 𑀅𑀓𑁆𑀓𑁄𑀥𑀦𑀸𑀢𑀺 𑀔𑀦𑁆𑀢𑀺𑀫𑁂𑀢𑁆𑀢𑀸𑀦𑀼𑀤𑁆𑀤𑀬𑀲𑀫𑁆𑀧𑀦𑁆𑀦𑀢𑀸𑀬 𑀅𑀓𑀼𑀚𑁆𑀛𑀦𑀲𑀪𑀸𑀯𑀸. 𑀪𑀢𑁆𑀢𑀼 𑀯𑀲𑀸𑀦𑀼𑀯𑀢𑁆𑀢𑀺𑀦𑀻𑀢𑀺 𑀧𑀼𑀩𑁆𑀩𑀼𑀝𑁆𑀞𑀸𑀦𑀧𑀘𑁆𑀙𑀸𑀦𑀺𑀧𑀸𑀢𑀦𑀸𑀤𑀺𑀦𑀸 𑀲𑀸𑀫𑀺𑀓𑀲𑁆𑀲 𑀅𑀦𑀼𑀓𑀽𑀮𑀪𑀸𑀯𑁂𑀦 𑀯𑀲𑁂 𑀯𑀢𑁆𑀢𑀦𑀲𑀻𑀮𑀸, 𑀫𑀦𑀸𑀧𑀘𑀸𑀭𑀺𑀦𑀻𑀢𑀺 𑀅𑀢𑁆𑀣𑁄. 𑀉𑀧𑁄𑀲𑀣𑁂 𑀦𑀺𑀘𑁆𑀘𑀳𑀫𑀧𑁆𑀧𑀫𑀢𑁆𑀢𑀸𑀢𑀺 𑀅𑀳𑀁 𑀉𑀧𑁄𑀲𑀣𑀲𑀻𑀮𑀭𑀓𑁆𑀔𑀡𑁂 𑀦𑀺𑀘𑁆𑀘𑀁 𑀅𑀧𑁆𑀧𑀫𑀢𑁆𑀢𑀸 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑀺𑀦𑀻.

𑁧𑁨𑁯. 𑀢𑀫𑁂𑀯 𑀉𑀧𑁄𑀲𑀣𑁂 𑀅𑀧𑁆𑀧𑀫𑀸𑀤𑀁 𑀤𑀲𑁆𑀲𑁂𑀦𑁆𑀢𑀻 𑀬𑁂𑀲𑀼 𑀤𑀺𑀯𑀲𑁂𑀲𑀼 𑀢𑀁 𑀭𑀓𑁆𑀔𑀺𑀢𑀩𑁆𑀩𑀁, 𑀬𑀸𑀤𑀺𑀲𑀁 𑀬𑀣𑀸 𑀘 𑀭𑀓𑁆𑀔𑀺𑀢𑀩𑁆𑀩𑀁, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀘𑀸𑀢𑀼𑀤𑁆𑀤𑀲𑀺’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀘𑀸𑀢𑀼𑀤𑁆𑀤𑀲𑀺𑀁 𑀧𑀜𑁆𑀘𑀤𑀲𑀺𑀦𑁆𑀢𑀺 𑀧𑀓𑁆𑀔𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑁄, 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀘𑁂𑀢𑀁 𑀉𑀧𑀬𑁄𑀕𑀯𑀘𑀦𑀁. 𑀬𑀸 𑀘 𑀧𑀓𑁆𑀔𑀲𑁆𑀲 𑀅𑀝𑁆𑀞𑀫𑀻𑀢𑀺 𑀏𑀢𑁆𑀣 𑀘𑀸𑀢𑀺 𑀯𑀘𑀦𑀲𑁂𑀲𑁄. 𑀧𑀸𑀝𑀺𑀳𑀸𑀭𑀺𑀬𑀧𑀓𑁆𑀔𑀜𑁆𑀘𑀸𑀢𑀺 𑀧𑀝𑀺𑀳𑀭𑀡𑀓𑀧𑀓𑁆𑀔𑀜𑁆𑀘, 𑀘𑀸𑀢𑀼𑀤𑁆𑀤𑀲𑀻𑀧𑀜𑁆𑀘𑀤𑀲𑀻𑀅𑀝𑁆𑀞𑀫𑀻𑀦𑀁 𑀬𑀣𑀸𑀓𑁆𑀓𑀫𑀁 𑀆𑀤𑀺𑀢𑁄 𑀅𑀦𑁆𑀢𑀢𑁄 𑀘𑀸𑀢𑀺 𑀧𑀯𑁂𑀲𑀦𑀦𑀺𑀓𑁆𑀔𑀫𑀦𑀯𑀲𑁂𑀦 𑀉𑀧𑁄𑀲𑀣𑀲𑀻𑀮𑀲𑁆𑀲 𑀧𑀝𑀺𑀳𑀭𑀺𑀢𑀩𑁆𑀩𑀁 𑀧𑀓𑁆𑀔𑀜𑁆𑀘, 𑀢𑁂𑀭𑀲𑀻 𑀧𑀸𑀝𑀺𑀧𑀤𑀸 𑀲𑀢𑁆𑀢𑀫𑀻 𑀦𑀯𑀫𑀻 𑀘𑀸𑀢𑀺 𑀅𑀢𑁆𑀣𑁄. 𑀅𑀝𑁆𑀞𑀗𑁆𑀕𑀲𑀼𑀲𑀫𑀸𑀕𑀢𑀦𑁆𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀯𑁂𑀭𑀫𑀡𑀻𑀆𑀤𑀻𑀳𑀺 𑀅𑀝𑁆𑀞𑀳𑀗𑁆𑀕𑁂𑀳𑀺 𑀏𑀯 𑀲𑀼𑀝𑁆𑀞𑀼 𑀲𑀫𑀸𑀕𑀢𑀁 𑀲𑀫𑀦𑁆𑀦𑀸𑀕𑀢𑀁.

𑁧𑁩𑁦. 𑀉𑀧𑀯𑀲𑀺𑀲𑁆𑀲𑀦𑁆𑀢𑀺 𑀉𑀧𑀯𑀲𑀺𑀁. 𑀅𑀢𑀻𑀢𑀢𑁆𑀣𑁂 𑀳𑀺 𑀇𑀤𑀁 𑀅𑀦𑀸𑀕𑀢𑀯𑀘𑀦𑀁. 𑀓𑁂𑀘𑀺 𑀧𑀦 ‘‘𑀉𑀧𑀯𑀲𑀺𑀁’’𑀇𑀘𑁆𑀘𑁂𑀯 𑀧𑀞𑀦𑁆𑀢𑀺. 𑀲𑀤𑀸𑀢𑀺 𑀲𑀧𑁆𑀧𑀝𑀺𑀳𑀸𑀭𑀺𑀓𑁂𑀲𑀼 𑀲𑀩𑁆𑀩𑁂𑀲𑀼 𑀉𑀧𑁄𑀲𑀣𑀤𑀺𑀯𑀲𑁂𑀲𑀼. 𑀲𑀻𑀮𑁂𑀲𑀽𑀢𑀺 𑀉𑀧𑁄𑀲𑀣𑀲𑀻𑀮𑁂𑀲𑀼 𑀲𑀸𑀥𑁂𑀢𑀩𑁆𑀩𑁂𑀲𑀼. 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑁂 𑀳𑀺 𑀇𑀤𑀁 𑀪𑀼𑀫𑁆𑀫𑀁. 𑀲𑀁𑀯𑀼𑀢𑀸𑀢𑀺 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑁂𑀳𑀺 𑀲𑀁𑀯𑀼𑀢𑀸. 𑀲𑀤𑀸𑀢𑀺 𑀯𑀸 𑀲𑀩𑁆𑀩𑀓𑀸𑀮𑀁. 𑀲𑀻𑀮𑁂𑀲𑀽𑀢𑀺 𑀦𑀺𑀘𑁆𑀘𑀲𑀻𑀮𑁂𑀲𑀼. 𑀲𑀁𑀯𑀼𑀢𑀸𑀢𑀺 𑀓𑀸𑀬𑀯𑀸𑀘𑀸𑀳𑀺 𑀲𑀁𑀯𑀼𑀢𑀸.

𑁧𑁩𑁧. 𑀇𑀤𑀸𑀦𑀺 𑀢𑀁 𑀦𑀺𑀘𑁆𑀘𑀲𑀻𑀮𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀸𑀡𑁄𑀢𑀺 𑀯𑁄𑀳𑀸𑀭𑀢𑁄 𑀲𑀢𑁆𑀢𑁄, 𑀧𑀭𑀫𑀢𑁆𑀣𑀢𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀧𑀸𑀡𑀲𑁆𑀲 𑀅𑀢𑀺𑀧𑀸𑀢𑁄 𑀧𑀸𑀡𑀯𑀥𑁄 𑀧𑀸𑀡𑀖𑀸𑀢𑁄 𑀧𑀸𑀡𑀸𑀢𑀺𑀧𑀸𑀢𑁄, 𑀅𑀢𑁆𑀣𑀢𑁄 𑀧𑀸𑀡𑁂 𑀧𑀸𑀡𑀲𑀜𑁆𑀜𑀺𑀦𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀓𑀉𑀧𑀓𑁆𑀓𑀫𑀲𑀫𑀼𑀝𑁆𑀞𑀸𑀧𑀺𑀓𑀸 𑀓𑀸𑀬𑀯𑀘𑀻𑀤𑁆𑀯𑀸𑀭𑀸𑀦𑀁 𑀅𑀜𑁆𑀜𑀢𑀭𑀤𑁆𑀯𑀸𑀭𑀧𑀯𑀢𑁆𑀢𑀸 𑀯𑀥𑀓𑀘𑁂𑀢𑀦𑀸. 𑀢𑀢𑁄 𑀧𑀸𑀡𑀸𑀢𑀺𑀧𑀸𑀢𑀸. 𑀯𑀺𑀭𑀢𑀸𑀢𑀺 𑀑𑀭𑀢𑀸, 𑀦𑀺𑀯𑀢𑁆𑀢𑀸𑀢𑀺 𑀅𑀢𑁆𑀣𑁄.

𑀫𑀼𑀲𑀸𑀯𑀸𑀤𑀸𑀢𑀺 𑀫𑀼𑀲𑀸 𑀦𑀸𑀫 𑀯𑀺𑀲𑀁𑀯𑀸𑀤𑀦𑀧𑀼𑀭𑁂𑀓𑁆𑀔𑀸𑀭𑀲𑁆𑀲 𑀅𑀢𑁆𑀣𑀪𑀜𑁆𑀚𑀦𑀓𑁄 𑀯𑀘𑀻𑀧𑀬𑁄𑀕𑁄 𑀯𑀸 𑀓𑀸𑀬𑀧𑀬𑁄𑀕𑁄 𑀯𑀸, 𑀯𑀺𑀲𑀁𑀯𑀸𑀤𑀦𑀸𑀥𑀺𑀧𑁆𑀧𑀸𑀬𑁂𑀦 𑀧𑀭𑀲𑁆𑀲 𑀯𑀺𑀲𑀁𑀯𑀸𑀤𑀓𑀓𑀸𑀬𑀯𑀘𑀻𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸 𑀫𑀼𑀲𑀸𑀯𑀸𑀤𑁄. 𑀅𑀣 𑀯𑀸 𑀫𑀼𑀲𑀸𑀢𑀺 𑀅𑀪𑀽𑀢𑀁 𑀅𑀢𑀘𑁆𑀙𑀁 𑀯𑀢𑁆𑀣𑀼, 𑀯𑀸𑀤𑁄𑀢𑀺 𑀢𑀲𑁆𑀲 𑀪𑀽𑀢𑀢𑁄 𑀢𑀘𑁆𑀙𑀢𑁄 𑀯𑀺𑀜𑁆𑀜𑀸𑀧𑁂𑀢𑀼𑀓𑀸𑀫𑀲𑁆𑀲 𑀢𑀣𑀸 𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸. 𑀢𑀢𑁄 𑀫𑀼𑀲𑀸𑀯𑀸𑀤𑀸 𑀲𑀜𑁆𑀜𑀢𑀸 𑀑𑀭𑀢𑀸, 𑀯𑀺𑀭𑀢𑀸𑀢𑀺 𑀅𑀢𑁆𑀣𑁄. 𑀘-𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄.

𑀣𑁂𑀬𑁆𑀬𑀸𑀢𑀺 𑀣𑁂𑀬𑁆𑀬𑀁 𑀯𑀼𑀘𑁆𑀘𑀢𑀺 𑀣𑁂𑀦𑀪𑀸𑀯𑁄, 𑀘𑁄𑀭𑀺𑀓𑀸𑀬 𑀧𑀭𑀲𑁆𑀲𑀳𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀅𑀢𑁆𑀣𑀢𑁄 𑀧𑀭𑀧𑀭𑀺𑀕𑁆𑀕𑀳𑀺𑀢𑁂 𑀧𑀭𑀧𑀭𑀺𑀕𑁆𑀕𑀳𑀺𑀢𑀲𑀜𑁆𑀜𑀺𑀦𑁄 𑀢𑀤𑀸𑀤𑀸𑀬𑀓𑀉𑀧𑀓𑁆𑀓𑀫𑀲𑀫𑀼𑀝𑁆𑀞𑀸𑀧𑀺𑀓𑀸 𑀣𑁂𑀬𑁆𑀬𑀘𑁂𑀢𑀦𑀸 𑀣𑁂𑀬𑁆𑀬𑀁. 𑀢𑀢𑁄 𑀣𑁂𑀬𑁆𑀬𑀸 𑀲𑀜𑁆𑀜𑀢𑀸, 𑀆𑀭𑀓𑀸𑀢𑀺 𑀯𑀸 𑀲𑀫𑁆𑀩𑀦𑁆𑀥𑁄.

𑀅𑀢𑀺𑀘𑀸𑀭𑀸𑀢𑀺 𑀅𑀢𑀺𑀘𑁆𑀘 𑀘𑀸𑀭𑁄 𑀅𑀢𑀺𑀘𑀸𑀭𑁄, 𑀮𑁄𑀓𑀫𑀭𑀺𑀬𑀸𑀤𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀕𑀫𑀦𑀻𑀬𑀝𑁆𑀞𑀸𑀦𑁂 𑀓𑀸𑀫𑀯𑀲𑁂𑀦 𑀘𑀸𑀭𑁄 𑀫𑀺𑀘𑁆𑀙𑀸𑀘𑀸𑀭𑁄𑀢𑀺 𑀅𑀢𑁆𑀣𑁄. 𑀅𑀕𑀫𑀦𑀻𑀬𑀝𑁆𑀞𑀸𑀦𑀁 𑀦𑀸𑀫 𑁋 𑀧𑀼𑀭𑀺𑀲𑀸𑀦𑀁 𑀫𑀸𑀢𑀼𑀭𑀓𑁆𑀔𑀺𑀢𑀸 𑀧𑀺𑀢𑀼𑀭𑀓𑁆𑀔𑀺𑀢𑀸 𑀫𑀸𑀢𑀸𑀧𑀺𑀢𑀼𑀭𑀓𑁆𑀔𑀺𑀢𑀸 𑀪𑀸𑀢𑀼𑀭𑀓𑁆𑀔𑀺𑀢𑀸 𑀪𑀕𑀺𑀦𑀺𑀭𑀓𑁆𑀔𑀺𑀢𑀸 𑀜𑀸𑀢𑀺𑀭𑀓𑁆𑀔𑀺𑀢𑀸 𑀕𑁄𑀢𑁆𑀢𑀭𑀓𑁆𑀔𑀺𑀢𑀸 𑀥𑀫𑁆𑀫𑀭𑀓𑁆𑀔𑀺𑀢𑀸 𑀲𑀸𑀭𑀓𑁆𑀔𑀸 𑀲𑀧𑀭𑀺𑀤𑀡𑁆𑀟𑀸𑀢𑀺 𑀤𑀲, 𑀥𑀦𑀓𑁆𑀓𑀻𑀢𑀸 𑀙𑀦𑁆𑀤𑀯𑀸𑀲𑀺𑀦𑀻 𑀪𑁄𑀕𑀯𑀸𑀲𑀺𑀦𑀻 𑀧𑀝𑀯𑀸𑀲𑀺𑀦𑀻 𑀑𑀤𑀧𑀢𑁆𑀢𑀓𑀺𑀦𑀻 𑀑𑀪𑀝𑀘𑀼𑀫𑁆𑀩𑀝𑀸 𑀤𑀸𑀲𑀻 𑀘 𑀪𑀭𑀺𑀬𑀸 𑀓𑀫𑁆𑀫𑀓𑀸𑀭𑀻 𑀘 𑀪𑀭𑀺𑀬𑀸 𑀥𑀚𑀸𑀳𑀝𑀸 𑀫𑀼𑀳𑀼𑀢𑁆𑀢𑀺𑀓𑀸𑀢𑀺 𑀤𑀲𑀸𑀢𑀺 𑀯𑀻𑀲𑀢𑀺 𑀇𑀢𑁆𑀣𑀺𑀬𑁄. 𑀇𑀢𑁆𑀣𑀻𑀲𑀼 𑀧𑀦 𑀤𑁆𑀯𑀺𑀦𑁆𑀦𑀁 𑀲𑀸𑀭𑀓𑁆𑀔𑀲𑀧𑀭𑀺𑀤𑀡𑁆𑀟𑀸𑀦𑀁 𑀤𑀲𑀦𑁆𑀦𑀜𑁆𑀘 𑀥𑀦𑀓𑁆𑀓𑀻𑀢𑀸𑀤𑀻𑀦𑀦𑁆𑀢𑀺 𑀤𑁆𑀯𑀸𑀤𑀲𑀦𑁆𑀦𑀁 𑀅𑀜𑁆𑀜𑀧𑀼𑀭𑀺𑀲𑀸 𑀅𑀕𑀫𑀦𑀻𑀬𑀝𑁆𑀞𑀸𑀦𑀁, 𑀇𑀤𑀫𑁂𑀯 𑀇𑀥 𑀅𑀥𑀺𑀧𑁆𑀧𑁂𑀢𑀁. 𑀮𑀓𑁆𑀔𑀡𑀢𑁄 𑀧𑀦 𑀅𑀲𑀤𑁆𑀥𑀫𑁆𑀫𑀸𑀥𑀺𑀧𑁆𑀧𑀸𑀬𑁂𑀦 𑀓𑀸𑀬𑀤𑁆𑀯𑀸𑀭𑀧𑀯𑀢𑁆𑀢𑀸 𑀅𑀕𑀫𑀦𑀻𑀬𑀝𑁆𑀞𑀸𑀦𑀯𑀻𑀢𑀺𑀓𑁆𑀓𑀫𑀘𑁂𑀢𑀦𑀸 𑀅𑀢𑀺𑀘𑀸𑀭𑁄. 𑀢𑀲𑁆𑀫𑀸 𑀅𑀢𑀺𑀘𑀸𑀭𑀸.

𑀫𑀚𑁆𑀚𑀧𑀸𑀦𑀸𑀢𑀺 𑀫𑀚𑁆𑀚𑀁 𑀯𑀼𑀘𑁆𑀘𑀢𑀺𑀫𑀤𑀦𑀻𑀬𑀝𑁆𑀞𑁂𑀦 𑀲𑀼𑀭𑀸 𑀘 𑀫𑁂𑀭𑀬𑀜𑁆𑀘, 𑀧𑀺𑀯𑀦𑁆𑀢𑀺 𑀢𑁂𑀦𑀸𑀢𑀺 𑀧𑀸𑀦𑀁, 𑀫𑀚𑁆𑀚𑀲𑁆𑀲 𑀧𑀸𑀦𑀁 𑀫𑀚𑁆𑀚𑀧𑀸𑀦𑀁. 𑀬𑀸𑀬 𑀤𑀼𑀲𑁆𑀲𑀻𑀮𑁆𑀬𑀘𑁂𑀢𑀦𑀸𑀬 𑀫𑀚𑁆𑀚𑀲𑀗𑁆𑀔𑀸𑀢𑀁 𑀧𑀺𑀝𑁆𑀞𑀲𑀼𑀭𑀸, 𑀧𑀽𑀯𑀲𑀼𑀭𑀸, 𑀑𑀤𑀦𑀺𑀬𑀲𑀼𑀭𑀸, 𑀓𑀺𑀡𑁆𑀡𑀧𑀓𑁆𑀔𑀺𑀢𑁆𑀢𑀸, 𑀲𑀫𑁆𑀪𑀸𑀭𑀲𑀁𑀬𑀼𑀢𑁆𑀢𑀸𑀢𑀺 𑀧𑀜𑁆𑀘𑀪𑁂𑀤𑀁 𑀲𑀼𑀭𑀁 𑀯𑀸, 𑀧𑀼𑀧𑁆𑀨𑀸𑀲𑀯𑁄, 𑀨𑀮𑀸𑀲𑀯𑁄, 𑀫𑀥𑁆𑀯𑀸𑀲𑀯𑁄, 𑀕𑀼𑀴𑀸𑀲𑀯𑁄, 𑀲𑀫𑁆𑀪𑀸𑀭𑀲𑀁𑀬𑀼𑀢𑁆𑀢𑁄𑀢𑀺 𑀧𑀜𑁆𑀘𑀪𑁂𑀤𑀁 𑀫𑁂𑀭𑀬𑀁 𑀯𑀸 𑀩𑀻𑀚𑀢𑁄 𑀧𑀝𑁆𑀞𑀸𑀬 𑀓𑀼𑀲𑀕𑁆𑀕𑁂𑀦𑀸𑀧𑀺 𑀧𑀺𑀯𑀢𑀺, 𑀲𑀸 𑀘𑁂𑀢𑀦𑀸 𑀫𑀚𑁆𑀚𑀧𑀸𑀦𑀁. 𑀢𑀲𑁆𑀫𑀸 𑀫𑀚𑁆𑀚𑀧𑀸𑀦𑀸 𑀆𑀭𑀓𑀸 𑀯𑀺𑀭𑀢𑀸.

𑁧𑁩𑁨. 𑀏𑀯𑀁 ‘‘𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀢𑀸’’𑀢𑀺𑀆𑀤𑀺𑀦𑀸 𑀧𑀳𑀸𑀢𑀩𑁆𑀩𑀥𑀫𑁆𑀫𑀯𑀲𑁂𑀦 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑀺𑀢𑀁 𑀦𑀺𑀘𑁆𑀘𑀲𑀻𑀮𑀁 𑀧𑀼𑀦 𑀲𑀫𑀸𑀤𑀸𑀢𑀩𑁆𑀩𑀢𑀸𑀯𑀲𑁂𑀦 𑀏𑀓𑀢𑁄 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑀻 ‘‘𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑁂 𑀭𑀢𑀸’’𑀢𑀺 𑀆𑀳. 𑀢𑀢𑁆𑀣 𑀲𑀺𑀓𑁆𑀔𑀸𑀧𑀤𑀦𑁆𑀢𑀺 𑀲𑀺𑀓𑁆𑀔𑀺𑀢𑀩𑁆𑀩𑀧𑀤𑀁, 𑀲𑀺𑀓𑁆𑀔𑀸𑀓𑁄𑀝𑁆𑀞𑀸𑀲𑁂𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀛𑀸𑀦𑀸𑀤𑀬𑁄 𑀲𑀩𑁆𑀩𑁂𑀧𑀺 𑀓𑀼𑀲𑀮𑀸 𑀥𑀫𑁆𑀫𑀸 𑀲𑀺𑀓𑁆𑀔𑀺𑀢𑀩𑁆𑀩𑀢𑁄 𑀲𑀺𑀓𑁆𑀔𑀸, 𑀧𑀜𑁆𑀘𑀲𑀼 𑀧𑀦 𑀲𑀻𑀮𑀗𑁆𑀕𑁂𑀲𑀼 𑀬𑀁𑀓𑀺𑀜𑁆𑀘𑀺 𑀅𑀗𑁆𑀕𑀁 𑀢𑀸𑀲𑀁 𑀲𑀺𑀓𑁆𑀔𑀸𑀦𑀁 𑀧𑀢𑀺𑀝𑁆𑀞𑀸𑀦𑀝𑁆𑀞𑁂𑀦 𑀧𑀤𑀦𑁆𑀢𑀺 𑀲𑀺𑀓𑁆𑀔𑀸𑀦𑀁 𑀧𑀤𑀢𑁆𑀢𑀸 𑀲𑀺𑀓𑁆𑀔𑀸𑀧𑀤𑀁, 𑀧𑀜𑁆𑀘 𑀲𑀻𑀮𑀗𑁆𑀕𑀸𑀦𑀺. 𑀢𑀲𑁆𑀫𑀺𑀁 𑀧𑀜𑁆𑀘𑀯𑀺𑀥𑁂 𑀲𑀺𑀓𑁆𑀔𑀸𑀧𑀤𑁂 𑀭𑀢𑀸 𑀅𑀪𑀺𑀭𑀢𑀸𑀢𑀺 𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑁂 𑀭𑀢𑀸. 𑀅𑀭𑀺𑀬𑀲𑀘𑁆𑀘𑀸𑀦 𑀓𑁄𑀯𑀺𑀤𑀸𑀢𑀺 𑀧𑀭𑀺𑀜𑁆𑀜𑀸𑀧𑀳𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀸𑀯𑀦𑀸𑀪𑀺𑀲𑀫𑀬𑀯𑀲𑁂𑀦 𑀤𑀼𑀓𑁆𑀔𑀲𑀫𑀼𑀤𑀬𑀦𑀺𑀭𑁄𑀥𑀫𑀕𑁆𑀕𑀲𑀗𑁆𑀔𑀸𑀢𑁂𑀲𑀼 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼 𑀓𑀼𑀲𑀮𑀸 𑀦𑀺𑀧𑀼𑀡𑀸, 𑀧𑀝𑀺𑀯𑀺𑀤𑁆𑀥𑀘𑀢𑀼𑀲𑀘𑁆𑀘𑀸𑀢𑀺 𑀅𑀢𑁆𑀣𑁄. 𑀕𑁄𑀢𑀫𑀲𑁆𑀲𑀸𑀢𑀺 𑀪𑀕𑀯𑀦𑁆𑀢𑀁 𑀕𑁄𑀢𑁆𑀢𑁂𑀦 𑀓𑀺𑀢𑁆𑀢𑁂𑀢𑀺. 𑀬𑀲𑀲𑁆𑀲𑀺𑀦𑁄𑀢𑀺 𑀓𑀺𑀢𑁆𑀢𑀺𑀫𑀢𑁄, 𑀧𑀭𑀺𑀯𑀸𑀭𑀯𑀢𑁄 𑀯𑀸.

𑁧𑁩𑁩. 𑀲𑀸𑀳𑀦𑁆𑀢𑀺 𑀲𑀸 𑀬𑀣𑀸𑀯𑀼𑀢𑁆𑀢𑀕𑀼𑀡𑀸 𑀅𑀳𑀁. 𑀲𑀓𑁂𑀦 𑀲𑀻𑀮𑁂𑀦𑀸𑀢𑀺 𑀅𑀦𑀼𑀲𑁆𑀲𑀼𑀓𑀺𑀢𑀸𑀤𑀺𑀦𑀸 𑀅𑀢𑁆𑀢𑀦𑁄 𑀲𑀪𑀸𑀯𑀲𑀻𑀮𑁂𑀦 𑀘 𑀉𑀧𑁄𑀲𑀣𑀲𑀻𑀮𑀸𑀤𑀺𑀲𑀫𑀸𑀤𑀸𑀦𑀲𑀻𑀮𑁂𑀦 𑀘 𑀓𑀸𑀭𑀡𑀪𑀽𑀢𑁂𑀦. 𑀢𑀜𑁆𑀳𑀺 𑀲𑀢𑁆𑀢𑀸𑀦𑀁 𑀓𑀫𑁆𑀫𑀲𑁆𑀲𑀓𑀢𑀸𑀬 𑀳𑀺𑀢𑀲𑀼𑀔𑀸𑀯𑀳𑀢𑀸𑀬 𑀘 𑀯𑀺𑀲𑁂𑀲𑀢𑁄 ‘‘𑀲𑀓’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑁂𑀯𑀸𑀳 𑁋

‘‘𑀢𑀜𑁆𑀳𑀺 𑀢𑀲𑁆𑀲 𑀲𑀓𑀁 𑀳𑁄𑀢𑀺, 𑀢𑀜𑁆𑀘 𑀆𑀤𑀸𑀬 𑀕𑀘𑁆𑀙𑀢𑀺;

𑀢𑀜𑁆𑀘𑀲𑁆𑀲 𑀅𑀦𑀼𑀕𑀁 𑀳𑁄𑀢𑀺, 𑀙𑀸𑀬𑀸𑀯 𑀅𑀦𑀧𑀸𑀬𑀺𑀦𑀻’’𑀢𑀺. (𑀲𑀁. 𑀦𑀺. 𑁧.𑁧𑁧𑁫);

𑀬𑀲𑀲𑀸 𑀘 𑀬𑀲𑀲𑁆𑀲𑀺𑀦𑀻𑀢𑀺 ‘‘𑀉𑀢𑁆𑀢𑀭𑀸 𑀉𑀧𑀸𑀲𑀺𑀓𑀸 𑀲𑀻𑀮𑀸𑀘𑀸𑀭𑀲𑀫𑁆𑀧𑀦𑁆𑀦𑀸 𑀅𑀦𑀼𑀲𑁆𑀲𑀼𑀓𑀻 𑀅𑀫𑀘𑁆𑀙𑀭𑀻 𑀅𑀓𑁆𑀓𑁄𑀥𑀦𑀸’’𑀢𑀺𑀆𑀤𑀺𑀦𑀸 ‘‘𑀆𑀕𑀢𑀨𑀮𑀸 𑀯𑀺𑀜𑁆𑀜𑀸𑀢𑀲𑀸𑀲𑀦𑀸’’𑀢𑀺𑀆𑀤𑀺𑀦𑀸 𑀘 𑀬𑀣𑀸𑀪𑀽𑀢𑀕𑀼𑀡𑀸𑀥𑀺𑀕𑀢𑁂𑀦 𑀚𑀮𑀢𑀮𑁂 𑀢𑁂𑀮𑁂𑀦 𑀯𑀺𑀬 𑀲𑀫𑀦𑁆𑀢𑀢𑁄 𑀧𑀢𑁆𑀣𑀝𑁂𑀦 𑀓𑀺𑀢𑁆𑀢𑀺𑀲𑀤𑁆𑀤𑁂𑀦 𑀬𑀲𑀲𑁆𑀲𑀺𑀦𑀻 𑀓𑀺𑀢𑁆𑀢𑀺𑀫𑀢𑀻, 𑀢𑁂𑀦 𑀯𑀸 𑀲𑀻𑀮𑀕𑀼𑀡𑁂𑀦 𑀇𑀥 𑀅𑀥𑀺𑀕𑀢𑁂𑀦 𑀬𑀲𑀧𑀭𑀺𑀯𑀸𑀭𑁂𑀦 𑀬𑀲𑀲𑁆𑀲𑀺𑀦𑀻 𑀲𑀫𑁆𑀧𑀦𑁆𑀦𑀧𑀭𑀺𑀯𑀸𑀭𑀸. 𑀅𑀦𑀼𑀪𑁄𑀫𑀺 𑀲𑀓𑀁 𑀧𑀼𑀜𑁆𑀜𑀦𑁆𑀢𑀺 𑀬𑀣𑀽𑀧𑀘𑀺𑀢𑀁 𑀅𑀢𑁆𑀢𑀦𑁄 𑀧𑀼𑀜𑁆𑀜𑀁 𑀧𑀘𑁆𑀘𑀦𑀼𑀪𑁄𑀫𑀺. 𑀬𑀲𑁆𑀲 𑀳𑀺 𑀧𑀼𑀜𑁆𑀜𑀨𑀮𑀁 𑀅𑀦𑀼𑀪𑀽𑀬𑀢𑀺, 𑀨𑀮𑀽𑀧𑀘𑀸𑀭𑁂𑀦 𑀢𑀁 𑀧𑀼𑀜𑁆𑀜𑀫𑁆𑀧𑀺 𑀅𑀦𑀼𑀪𑀽𑀬𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀅𑀣 𑀯𑀸 𑀧𑀼𑀣𑀼𑀚𑁆𑀚𑀦𑀪𑀸𑀯𑀢𑁄 𑀲𑀼𑀘𑀭𑀺𑀢𑀨𑀮𑀫𑁆𑀧𑀺 ‘‘𑀧𑀼𑀜𑁆𑀜’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸𑀳 ‘‘𑀓𑀼𑀲𑀮𑀸𑀦𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸𑀦𑀁 𑀲𑀫𑀸𑀤𑀸𑀦𑀳𑁂𑀢𑀼 𑀏𑀯𑀫𑀺𑀤𑀁 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻’’𑀢𑀺. 𑀲𑀼𑀔𑀺𑀢𑀸 𑀘𑀫𑁆𑀳𑀺𑀦𑀸𑀫𑀬𑀸𑀢𑀺 𑀤𑀺𑀩𑁆𑀩𑀲𑀼𑀔𑁂𑀦 𑀘 𑀨𑀮𑀲𑀼𑀔𑁂𑀦 𑀘 𑀲𑀼𑀔𑀺𑀢𑀸 𑀘𑀫𑁆𑀳𑀺 𑀪𑀯𑀸𑀫𑀺, 𑀓𑀸𑀬𑀺𑀓𑀘𑁂𑀢𑀲𑀺𑀓𑀤𑀼𑀓𑁆𑀔𑀸𑀪𑀸𑀯𑀢𑁄 𑀅𑀦𑀸𑀫𑀬𑀸 𑀅𑀭𑁄𑀕𑀸.

𑁧𑁩𑁬. 𑀫𑀫 𑀘𑀸𑀢𑀺 𑀘-𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑀢𑁆𑀣𑁄. 𑀢𑁂𑀦 ‘‘𑀫𑀫 𑀯𑀘𑀦𑁂𑀦 𑀘 𑀯𑀦𑁆𑀤𑁂𑀬𑁆𑀬𑀸𑀲𑀺, 𑀦 𑀢𑀯 𑀲𑀪𑀸𑀯𑁂𑀦𑁂𑀯𑀸’’𑀢𑀺 𑀯𑀦𑁆𑀤𑀦𑀁 𑀲𑀫𑀼𑀘𑁆𑀘𑀺𑀦𑁄𑀢𑀺. 𑀅𑀦𑀘𑁆𑀙𑀭𑀺𑀬𑀦𑁆𑀢𑀺𑀆𑀤𑀺𑀦𑀸 𑀅𑀢𑁆𑀢𑀦𑁄 𑀅𑀭𑀺𑀬𑀲𑀸𑀯𑀺𑀓𑀸𑀪𑀸𑀯𑀲𑁆𑀲 𑀧𑀸𑀓𑀝𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑀁 𑀪𑀕𑀯𑀸𑀢𑀺𑀆𑀤𑀺 𑀲𑀗𑁆𑀕𑀻𑀢𑀺𑀓𑀸𑀭𑀯𑀘𑀦𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀉𑀢𑁆𑀢𑀭𑀸𑀯𑀺𑀫𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.