𑁧. 𑀧𑀺𑀬𑀢𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁧. 𑀫𑀳𑀸𑀯𑀕𑁆𑀕𑀲𑁆𑀲 𑀧𑀞𑀫𑁂 𑀫𑀮𑁆𑀮𑀺𑀓𑀸𑀬 𑀤𑁂𑀯𑀺𑀬𑀸 𑀲𑀤𑁆𑀥𑀺𑀦𑁆𑀢𑀺 𑀫𑀮𑁆𑀮𑀺𑀓𑀸𑀬 𑀦𑀸𑀫 𑀅𑀢𑁆𑀢𑀦𑁄 𑀫𑀳𑁂𑀲𑀺𑀬𑀸 𑀲𑀳. 𑀉𑀧𑀭𑀺𑀧𑀸𑀲𑀸𑀤𑀯𑀭𑀕𑀢𑁄𑀢𑀺 𑀧𑀸𑀲𑀸𑀤𑀯𑀭𑀲𑁆𑀲 𑀉𑀧𑀭𑀺 𑀕𑀢𑁄. 𑀓𑁄𑀘𑀜𑁆𑀜𑁄 𑀅𑀢𑁆𑀢𑀦𑀸 𑀧𑀺𑀬𑀢𑀭𑁄𑀢𑀺 𑀓𑁄𑀘𑀺 𑀅𑀜𑁆𑀜𑁄 𑀅𑀢𑁆𑀢𑀦𑀸 𑀧𑀺𑀬𑀸𑀬𑀺𑀢𑀩𑁆𑀩𑀢𑀭𑁄. 𑀅𑀢𑁆𑀣𑀺 𑀦𑀼 𑀔𑁄 𑀢𑁂𑀢𑀺 ‘‘𑀓𑀺𑀁 𑀢𑁂 𑀅𑀢𑁆𑀣𑀻’’𑀢𑀺 𑀤𑁂𑀯𑀺𑀁 𑀧𑀼𑀘𑁆𑀙𑀢𑀺.

𑀓𑀲𑁆𑀫𑀸 𑀧𑀼𑀘𑁆𑀙𑀢𑀺? 𑀅𑀬𑀜𑁆𑀳𑀺 𑀲𑀸𑀯𑀢𑁆𑀣𑀺𑀬𑀁 𑀤𑀼𑀕𑁆𑀕𑀢𑀫𑀸𑀮𑀸𑀓𑀸𑀭𑀲𑁆𑀲 𑀥𑀻𑀢𑀸. 𑀏𑀓𑀤𑀺𑀯𑀲𑀁 𑀆𑀧𑀡𑀢𑁄 𑀧𑀽𑀯𑀁 𑀕𑀳𑁂𑀢𑁆𑀯𑀸 𑀫𑀸𑀮𑀸𑀭𑀸𑀫𑀁 𑀕𑀦𑁆𑀢𑁆𑀯𑀸 ‘‘𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀕𑀘𑁆𑀙𑀦𑁆𑀢𑀻 𑀧𑀝𑀺𑀧𑀣𑁂 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑀁 𑀪𑀕𑀯𑀦𑁆𑀢𑀁 𑀪𑀺𑀓𑁆𑀔𑀸𑀘𑀸𑀭𑀁 𑀧𑀯𑀺𑀲𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑀸 𑀢𑀁 𑀪𑀕𑀯𑀢𑁄 𑀅𑀤𑀸𑀲𑀺. 𑀲𑀢𑁆𑀣𑀸 𑀢𑀣𑀸𑀭𑀽𑀧𑁂 𑀞𑀸𑀦𑁂 𑀦𑀺𑀲𑀻𑀤𑀦𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀆𑀦𑀦𑁆𑀤𑀢𑁆𑀣𑁂𑀭𑁄 𑀘𑀻𑀯𑀭𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀅𑀤𑀸𑀲𑀺. 𑀪𑀕𑀯𑀸 𑀢𑀢𑁆𑀣 𑀦𑀺𑀲𑀻𑀤𑀺𑀢𑁆𑀯𑀸 𑀢𑀁 𑀧𑀽𑀯𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀫𑀼𑀔𑀁 𑀯𑀺𑀓𑁆𑀔𑀸𑀮𑁂𑀢𑁆𑀯𑀸 𑀲𑀺𑀢𑀁 𑀧𑀸𑀢𑁆𑀯𑀸𑀓𑀸𑀲𑀺. 𑀣𑁂𑀭𑁄 ‘‘𑀓𑁄 𑀇𑀫𑀺𑀲𑁆𑀲𑀸, 𑀪𑀦𑁆𑀢𑁂, 𑀤𑀸𑀦𑀲𑁆𑀲 𑀯𑀺𑀧𑀸𑀓𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀼𑀘𑁆𑀙𑀺. ‘‘𑀅𑀚𑁆𑀚𑁂𑀲𑀸, 𑀆𑀦𑀦𑁆𑀤, 𑀢𑀣𑀸𑀕𑀢𑀲𑁆𑀲 𑀧𑀞𑀫𑀁 𑀪𑁄𑀚𑀦𑀁 𑀅𑀤𑀸𑀲𑀺, 𑀅𑀚𑁆𑀚𑁂𑀯 𑀓𑁄𑀲𑀮𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀻 𑀪𑀯𑀺𑀲𑁆𑀲𑀢𑀺 𑀧𑀺𑀬𑀸 𑀫𑀦𑀸𑀧𑀸’’𑀢𑀺. 𑀢𑀁 𑀤𑀺𑀯𑀲𑀫𑁂𑀯 𑀘 𑀭𑀸𑀚𑀸 𑀓𑀸𑀲𑀺𑀕𑀸𑀫𑁂 𑀪𑀸𑀕𑀺𑀦𑁂𑀬𑁆𑀬𑁂𑀦 𑀲𑀤𑁆𑀥𑀺𑀁 𑀬𑀼𑀚𑁆𑀛𑀺𑀢𑁆𑀯𑀸 𑀧𑀭𑀸𑀚𑀺𑀢𑁄 𑀧𑀮𑀸𑀬𑀺𑀢𑁆𑀯𑀸 𑀆𑀕𑀢𑁄 𑀦𑀕𑀭𑀁 𑀧𑀯𑀺𑀲𑀦𑁆𑀢𑁄 ‘‘𑀩𑀮𑀓𑀸𑀬𑀲𑁆𑀲 𑀆𑀕𑀫𑀦𑀁 𑀆𑀕𑀫𑁂𑀲𑁆𑀲𑀸𑀫𑀻’’𑀢𑀺 𑀢𑀁 𑀫𑀸𑀮𑀸𑀭𑀸𑀫𑀁 𑀧𑀸𑀯𑀺𑀲𑀺. 𑀲𑀸 𑀭𑀸𑀚𑀸𑀦𑀁 𑀆𑀕𑀢𑀁 𑀧𑀲𑁆𑀲𑀺𑀢𑁆𑀯𑀸 𑀢𑀲𑁆𑀲 𑀯𑀢𑁆𑀢𑀫𑀓𑀸𑀲𑀺. 𑀭𑀸𑀚𑀸 𑀢𑀲𑁆𑀲𑀸 𑀯𑀢𑁆𑀢𑁂 𑀧𑀲𑀻𑀤𑀺𑀢𑁆𑀯𑀸 𑀧𑀺𑀢𑀭𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀫𑀳𑀦𑁆𑀢𑀁 𑀇𑀲𑁆𑀲𑀭𑀺𑀬𑀁 𑀤𑀢𑁆𑀯𑀸 𑀢𑀁 𑀅𑀦𑁆𑀢𑁂𑀧𑀼𑀭𑀁 𑀧𑀝𑀺𑀳𑀭𑀸𑀧𑁂𑀢𑁆𑀯𑀸 𑀅𑀕𑁆𑀕𑀫𑀳𑁂𑀲𑀺𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀭𑀸𑀚𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀬𑀸 𑀇𑀫𑀺𑀲𑁆𑀲𑀸 𑀫𑀳𑀦𑁆𑀢𑀁 𑀇𑀲𑁆𑀲𑀭𑀺𑀬𑀁 𑀤𑀺𑀦𑁆𑀦𑀁, 𑀬𑀁𑀦𑀽𑀦𑀸𑀳𑀁 𑀇𑀫𑀁 𑀧𑀼𑀘𑁆𑀙𑁂𑀬𑁆𑀬𑀁 ‘𑀓𑁄 𑀢𑁂 𑀧𑀺𑀬𑁄’𑀢𑀺? 𑀲𑀸 ‘𑀢𑁆𑀯𑀁 𑀫𑁂, 𑀫𑀳𑀸𑀭𑀸𑀚, 𑀧𑀺𑀬𑁄’𑀢𑀺 𑀯𑀢𑁆𑀯𑀸, 𑀧𑀼𑀦 𑀫𑀁 𑀧𑀼𑀘𑁆𑀙𑀺𑀲𑁆𑀲𑀢𑀺, 𑀅𑀣𑀲𑁆𑀲𑀸𑀳𑀁 ‘𑀫𑀬𑁆𑀳𑀫𑁆𑀧𑀺 𑀢𑁆𑀯𑀁𑀬𑁂𑀯 𑀧𑀺𑀬𑀸’𑀢𑀺 𑀯𑀓𑁆𑀔𑀸𑀫𑀻’’𑀢𑀺. 𑀇𑀢𑀺 𑀲𑁄 𑀅𑀜𑁆𑀜𑀫𑀜𑁆𑀜𑀁 𑀯𑀺𑀲𑁆𑀲𑀸𑀲𑀚𑀦𑀦𑀢𑁆𑀣𑀁 𑀲𑀫𑁆𑀫𑁄𑀤𑀦𑀻𑀬𑀁 𑀓𑀭𑁄𑀦𑁆𑀢𑁄 𑀧𑀼𑀘𑁆𑀙𑀺.

𑀤𑁂𑀯𑀻 𑀧𑀦 𑀧𑀡𑁆𑀟𑀺𑀢𑀸 𑀩𑀼𑀤𑁆𑀥𑀼𑀧𑀝𑁆𑀞𑀸𑀬𑀺𑀓𑀸 𑀲𑀗𑁆𑀖𑀼𑀧𑀝𑁆𑀞𑀸𑀬𑀺𑀓𑀸 ‘‘𑀦𑀸𑀬𑀁 𑀧𑀜𑁆𑀳𑁄 𑀭𑀜𑁆𑀜𑁄 𑀫𑀼𑀔𑀁 𑀉𑀮𑁆𑀮𑁄𑀓𑁂𑀢𑁆𑀯𑀸 𑀓𑀣𑁂𑀢𑀩𑁆𑀩𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀬𑀣𑀸𑀪𑀽𑀢𑀫𑁂𑀯 𑀯𑀤𑀦𑁆𑀢𑀻 ‘‘𑀦𑀢𑁆𑀣𑀺 𑀔𑁄 𑀫𑁂, 𑀫𑀳𑀸𑀭𑀸𑀚, 𑀓𑁄𑀘𑀜𑁆𑀜𑁄 𑀅𑀢𑁆𑀢𑀦𑀸 𑀧𑀺𑀬𑀢𑀭𑁄’’𑀢𑀺 𑀆𑀳. 𑀯𑀢𑁆𑀯𑀸𑀧𑀺 𑀅𑀢𑁆𑀢𑀦𑀸 𑀩𑁆𑀬𑀸𑀓𑀢𑀫𑀢𑁆𑀣𑀁 𑀉𑀧𑀸𑀬𑁂𑀦 𑀭𑀜𑁆𑀜𑁄 𑀧𑀘𑁆𑀘𑀓𑁆𑀔𑀁 𑀓𑀸𑀢𑀼𑀓𑀸𑀫𑀸 ‘‘𑀢𑀼𑀬𑁆𑀳𑀁 𑀧𑀦, 𑀫𑀳𑀸𑀭𑀸𑀚, 𑀅𑀢𑁆𑀣𑀜𑁆𑀜𑁄 𑀓𑁄𑀘𑀺 𑀅𑀢𑁆𑀢𑀦𑀸 𑀧𑀺𑀬𑀢𑀭𑁄’’𑀢𑀺 𑀢𑀣𑁂𑀯 𑀭𑀸𑀚𑀸𑀦𑀁 𑀧𑀼𑀘𑁆𑀙𑀺 𑀬𑀣𑀸 𑀭𑀜𑁆𑀜𑀸 𑀲𑀬𑀁 𑀧𑀼𑀝𑁆𑀞𑀸. 𑀭𑀸𑀚𑀸𑀧𑀺 𑀢𑀸𑀬 𑀲𑀭𑀲𑀮𑀓𑁆𑀔𑀡𑁂𑀦 𑀓𑀣𑀺𑀢𑀢𑁆𑀢𑀸 𑀦𑀺𑀯𑀢𑁆𑀢𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀲𑀬𑀫𑁆𑀧𑀺 𑀲𑀭𑀲𑀮𑀓𑁆𑀔𑀡𑁂𑀦𑁂𑀯 𑀓𑀣𑁂𑀦𑁆𑀢𑁄 𑀢𑀣𑁂𑀯 𑀩𑁆𑀬𑀸𑀓𑀸𑀲𑀺 𑀬𑀣𑀸 𑀤𑁂𑀯𑀺𑀬𑀸 𑀩𑁆𑀬𑀸𑀓𑀢𑀁.

𑀩𑁆𑀬𑀸𑀓𑀭𑀺𑀢𑁆𑀯𑀸 𑀘 𑀫𑀦𑁆𑀤𑀥𑀸𑀢𑀼𑀓𑀢𑀸𑀬 𑀏𑀯𑀁 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀭𑀸𑀚𑀸 𑀧𑀣𑀯𑀺𑀲𑁆𑀲𑀭𑁄 𑀫𑀳𑀦𑁆𑀢𑀁 𑀧𑀣𑀯𑀺𑀫𑀡𑁆𑀟𑀮𑀁 𑀅𑀪𑀺𑀯𑀺𑀚𑀺𑀬 𑀅𑀚𑁆𑀛𑀸𑀯𑀲𑀸𑀫𑀺, 𑀫𑀬𑁆𑀳𑀁 𑀢𑀸𑀯 𑀬𑀼𑀢𑁆𑀢𑀁 ‘𑀅𑀢𑁆𑀢𑀦𑀸 𑀧𑀺𑀬𑀢𑀭𑀁 𑀅𑀜𑁆𑀜𑀁 𑀦 𑀧𑀲𑁆𑀲𑀸𑀫𑀻’𑀢𑀺, 𑀅𑀬𑀁 𑀧𑀦 𑀯𑀲𑀮𑀻 𑀳𑀻𑀦𑀚𑀘𑁆𑀘𑀸 𑀲𑀫𑀸𑀦𑀸 𑀫𑀬𑀸 𑀉𑀘𑁆𑀘𑁂 𑀞𑀸𑀦𑁂 𑀞𑀧𑀺𑀢𑀸 𑀲𑀸𑀫𑀺𑀪𑀽𑀢𑀁 𑀫𑀁 𑀦 𑀢𑀣𑀸 𑀧𑀺𑀬𑀸𑀬𑀢𑀺, ‘𑀅𑀢𑁆𑀢𑀸𑀯 𑀧𑀺𑀬𑀢𑀭𑁄’𑀢𑀺 𑀫𑀫 𑀲𑀫𑁆𑀫𑀼𑀔𑀸 𑀯𑀤𑀢𑀺, 𑀬𑀸𑀯 𑀓𑀓𑁆𑀔𑀴𑀸 𑀯𑀢𑀸𑀬’’𑀦𑁆𑀢𑀺 𑀅𑀦𑀢𑁆𑀢𑀫𑀦𑁄 𑀳𑀼𑀢𑁆𑀯𑀸 ‘‘𑀦𑀦𑀼 𑀢𑁂 𑀢𑀻𑀡𑀺 𑀭𑀢𑀦𑀸𑀦𑀺 𑀧𑀺𑀬𑀢𑀭𑀸𑀦𑀻’’𑀢𑀺 𑀘𑁄𑀤𑁂𑀲𑀺. 𑀤𑁂𑀯𑀻 ‘𑀭𑀢𑀦𑀢𑁆𑀢𑀬𑀁𑀧𑀸𑀳𑀁 𑀤𑁂𑀯 𑀅𑀢𑁆𑀢𑀦𑁄 𑀲𑀕𑁆𑀕𑀲𑀼𑀔𑀁 𑀫𑁄𑀓𑁆𑀔𑀲𑀼𑀔𑀜𑁆𑀘 𑀧𑀢𑁆𑀣𑀬𑀦𑁆𑀢𑀻 𑀲𑀫𑁆𑀧𑀺𑀬𑀸𑀬𑀸𑀫𑀺, 𑀢𑀲𑁆𑀫𑀸 𑀅𑀢𑁆𑀢𑀸𑀯 𑀫𑁂 𑀧𑀺𑀬𑀢𑀭𑁄’’𑀢𑀺 𑀆𑀳. 𑀲𑀩𑁆𑀩𑁄 𑀘𑀸𑀬𑀁 𑀮𑁄𑀓𑁄 𑀅𑀢𑁆𑀢𑀤𑀢𑁆𑀣𑀫𑁂𑀯 𑀧𑀭𑀁 𑀧𑀺𑀬𑀸𑀬𑀢𑀺, 𑀧𑀼𑀢𑁆𑀢𑀁 𑀧𑀢𑁆𑀣𑁂𑀦𑁆𑀢𑁄𑀧𑀺 ‘‘𑀅𑀬𑀁 𑀫𑀁 𑀚𑀺𑀡𑁆𑀡𑀓𑀸𑀮𑁂 𑀧𑁄𑀲𑁂𑀲𑁆𑀲𑀢𑀻’’𑀢𑀺 𑀧𑀢𑁆𑀣𑁂𑀢𑀺, 𑀥𑀻𑀢𑀭𑀁 ‘‘𑀫𑀫 𑀓𑀼𑀮𑀁 𑀯𑀟𑁆𑀠𑀺𑀲𑁆𑀲𑀢𑀻’’𑀢𑀺, 𑀪𑀭𑀺𑀬𑀁 ‘‘𑀫𑀬𑁆𑀳𑀁 𑀧𑀸𑀤𑁂 𑀧𑀭𑀺𑀘𑀭𑀺𑀲𑁆𑀲𑀢𑀻’’𑀢𑀺, 𑀅𑀜𑁆𑀜𑁂𑀧𑀺 𑀜𑀸𑀢𑀺𑀫𑀺𑀢𑁆𑀢𑀩𑀦𑁆𑀥𑀯𑁂 𑀢𑀁𑀢𑀁𑀓𑀺𑀘𑁆𑀘𑀯𑀲𑁂𑀦, 𑀇𑀢𑀺 𑀅𑀢𑁆𑀢𑀤𑀢𑁆𑀣𑀫𑁂𑀯 𑀲𑀫𑁆𑀧𑀲𑁆𑀲𑀦𑁆𑀢𑁄 𑀮𑁄𑀓𑁄 𑀧𑀭𑀁 𑀧𑀺𑀬𑀸𑀬𑀢𑀻𑀢𑀺. 𑀅𑀬𑀜𑁆𑀳𑀺 𑀤𑁂𑀯𑀺𑀬𑀸 𑀅𑀥𑀺𑀧𑁆𑀧𑀸𑀬𑁄.

𑀅𑀣 𑀭𑀸𑀚𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀫𑀮𑁆𑀮𑀺𑀓𑀸 𑀓𑀼𑀲𑀮𑀸 𑀧𑀡𑁆𑀟𑀺𑀢𑀸 𑀦𑀺𑀧𑀼𑀡𑀸 ‘𑀅𑀢𑁆𑀢𑀸𑀯 𑀫𑁂 𑀧𑀺𑀬𑀢𑀭𑁄’𑀢𑀺 𑀯𑀤𑀢𑀺, 𑀫𑀬𑁆𑀳𑀫𑁆𑀧𑀺 𑀅𑀢𑁆𑀢𑀸𑀯 𑀧𑀺𑀬𑀢𑀭𑁄 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺, 𑀳𑀦𑁆𑀤𑀸𑀳𑀁 𑀇𑀫𑀫𑀢𑁆𑀣𑀁 𑀲𑀢𑁆𑀣𑀼 𑀆𑀭𑁄𑀘𑁂𑀲𑁆𑀲𑀸𑀫𑀺, 𑀬𑀣𑀸 𑀘 𑀫𑁂 𑀲𑀢𑁆𑀣𑀸 𑀩𑁆𑀬𑀸𑀓𑀭𑀺𑀲𑁆𑀲𑀢𑀺, 𑀢𑀣𑀸 𑀦𑀁 𑀥𑀸𑀭𑁂𑀲𑁆𑀲𑀸𑀫𑀻’’𑀢𑀺. 𑀏𑀯𑀁 𑀧𑀦 𑀘𑀺𑀦𑁆𑀢𑁂𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄…𑀧𑁂… 𑀧𑀺𑀬𑀢𑀭𑁄’’𑀢𑀺.

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀏𑀢𑀁 ‘‘𑀮𑁄𑀓𑁂 𑀲𑀩𑁆𑀩𑀲𑀢𑁆𑀢𑀸𑀦𑀁 𑀅𑀢𑁆𑀢𑀸𑀯 𑀅𑀢𑁆𑀢𑀦𑁄 𑀧𑀺𑀬𑀢𑀭𑁄’’𑀢𑀺 𑀭𑀜𑁆𑀜𑀸 𑀯𑀼𑀢𑁆𑀢𑀫𑀢𑁆𑀣𑀁 𑀲𑀩𑁆𑀩𑀲𑁄 𑀚𑀸𑀦𑀺𑀢𑁆𑀯𑀸 𑀢𑀤𑀢𑁆𑀣𑀧𑀭𑀺𑀤𑀻𑀧𑀦𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀲𑀩𑁆𑀩𑀸 𑀤𑀺𑀲𑀸 𑀅𑀦𑀼𑀧𑀭𑀺𑀕𑀫𑁆𑀫 𑀘𑁂𑀢𑀲𑀸𑀢𑀺 𑀲𑀩𑁆𑀩𑀸 𑀅𑀦𑀯𑀲𑁂𑀲𑀸 𑀤𑀲𑀧𑀺 𑀤𑀺𑀲𑀸 𑀧𑀭𑀺𑀬𑁂𑀲𑀦𑀯𑀲𑁂𑀦 𑀘𑀺𑀢𑁆𑀢𑁂𑀦 𑀅𑀦𑀼𑀕𑀦𑁆𑀢𑁆𑀯𑀸. 𑀦𑁂𑀯𑀚𑁆𑀛𑀕𑀸 𑀧𑀺𑀬𑀢𑀭𑀫𑀢𑁆𑀢𑀦𑀸 𑀓𑁆𑀯𑀘𑀻𑀢𑀺 𑀅𑀢𑁆𑀢𑀦𑀸 𑀅𑀢𑀺𑀲𑀬𑁂𑀦 𑀧𑀺𑀬𑀁 𑀅𑀜𑁆𑀜𑀁 𑀓𑁄𑀘𑀺 𑀧𑀼𑀭𑀺𑀲𑁄 𑀲𑀩𑁆𑀩𑀼𑀲𑁆𑀲𑀸𑀳𑁂𑀦 𑀧𑀭𑀺𑀬𑁂𑀲𑀦𑁆𑀢𑁄 𑀓𑁆𑀯𑀘𑀺 𑀓𑀢𑁆𑀣𑀘𑀺 𑀲𑀩𑁆𑀩𑀤𑀺𑀲𑀸𑀲𑀼 𑀦𑁂𑀯 𑀅𑀥𑀺𑀕𑀘𑁆𑀙𑁂𑀬𑁆𑀬 𑀦 𑀧𑀲𑁆𑀲𑁂𑀬𑁆𑀬. 𑀏𑀯𑀁 𑀧𑀺𑀬𑁄 𑀧𑀼𑀣𑀼 𑀅𑀢𑁆𑀢𑀸 𑀧𑀭𑁂𑀲𑀦𑁆𑀢𑀺 𑀏𑀯𑀁 𑀓𑀲𑁆𑀲𑀘𑀺 𑀅𑀢𑁆𑀢𑀦𑀸 𑀧𑀺𑀬𑀢𑀭𑀲𑁆𑀲 𑀅𑀦𑀼𑀧𑀮𑀩𑁆𑀪𑀦𑀯𑀲𑁂𑀦 𑀧𑀼𑀣𑀼 𑀯𑀺𑀲𑀼𑀁 𑀯𑀺𑀲𑀼𑀁 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀅𑀢𑁆𑀢𑀸𑀯 𑀧𑀺𑀬𑁄. 𑀢𑀲𑁆𑀫𑀸 𑀦 𑀳𑀺𑀁𑀲𑁂 𑀧𑀭𑀫𑀢𑁆𑀢𑀓𑀸𑀫𑁄𑀢𑀺 𑀬𑀲𑁆𑀫𑀸 𑀏𑀯𑀁 𑀲𑀩𑁆𑀩𑁄𑀧𑀺 𑀲𑀢𑁆𑀢𑁄 𑀅𑀢𑁆𑀢𑀸𑀦𑀁 𑀧𑀺𑀬𑀸𑀬𑀢𑀺 𑀅𑀢𑁆𑀢𑀦𑁄 𑀲𑀼𑀔𑀓𑀸𑀫𑁄 𑀤𑀼𑀓𑁆𑀔𑀧𑁆𑀧𑀝𑀺𑀓𑀽𑀮𑁄, 𑀢𑀲𑁆𑀫𑀸 𑀅𑀢𑁆𑀢𑀓𑀸𑀫𑁄 𑀅𑀢𑁆𑀢𑀦𑁄 𑀳𑀺𑀢𑀲𑀼𑀔𑀁 𑀇𑀘𑁆𑀙𑀦𑁆𑀢𑁄 𑀧𑀭𑀁 𑀲𑀢𑁆𑀢𑀁 𑀅𑀦𑁆𑀢𑀫𑀲𑁄 𑀓𑀼𑀦𑁆𑀣𑀓𑀺𑀧𑀺𑀮𑁆𑀮𑀺𑀓𑀁 𑀉𑀧𑀸𑀤𑀸𑀬 𑀦 𑀳𑀺𑀁𑀲𑁂 𑀦 𑀳𑀦𑁂𑀬𑁆𑀬 𑀦 𑀧𑀸𑀡𑀺𑀮𑁂𑀟𑁆𑀟𑀼𑀤𑀡𑁆𑀟𑀸𑀤𑀻𑀳𑀺𑀧𑀺 𑀯𑀺𑀳𑁂𑀞𑁂𑀬𑁆𑀬. 𑀧𑀭𑀲𑁆𑀲 𑀳𑀺 𑀅𑀢𑁆𑀢𑀦𑀸 𑀓𑀢𑁂 𑀤𑀼𑀓𑁆𑀔𑁂 𑀢𑀁 𑀢𑀢𑁄 𑀲𑀗𑁆𑀓𑀫𑀦𑁆𑀢𑀁 𑀯𑀺𑀬 𑀓𑀸𑀮𑀦𑁆𑀢𑀭𑁂 𑀅𑀢𑁆𑀢𑀦𑀺 𑀲𑀦𑁆𑀤𑀺𑀲𑁆𑀲𑀢𑀺. 𑀅𑀬𑀜𑁆𑀳𑀺 𑀓𑀫𑁆𑀫𑀸𑀦𑀁 𑀥𑀫𑁆𑀫𑀢𑀸𑀢𑀺.

𑀧𑀞𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.