𑁯. 𑀚𑀝𑀺𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁯. 𑀦𑀯𑀫𑁂 𑀕𑀬𑀸𑀬𑀦𑁆𑀢𑀺 𑀏𑀢𑁆𑀣 𑀕𑀬𑀸𑀢𑀺 𑀕𑀸𑀫𑁄𑀧𑀺 𑀢𑀺𑀢𑁆𑀣𑀫𑁆𑀧𑀺 𑀯𑀼𑀘𑁆𑀘𑀢𑀺. 𑀕𑀬𑀸𑀕𑀸𑀫𑀲𑁆𑀲 𑀳𑀺 𑀅𑀯𑀺𑀤𑀽𑀭𑁂 𑀯𑀺𑀳𑀭𑀦𑁆𑀢𑁄 𑀪𑀕𑀯𑀸 ‘‘𑀕𑀬𑀸𑀬𑀁 𑀯𑀺𑀳𑀭𑀢𑀻’’𑀢𑀺 𑀯𑀼𑀘𑁆𑀘𑀢𑀺, 𑀢𑀣𑀸 𑀕𑀬𑀸𑀢𑀺𑀢𑁆𑀣𑀲𑁆𑀲. 𑀕𑀬𑀸𑀢𑀺𑀢𑁆𑀣𑀦𑁆𑀢𑀺 𑀳𑀺 𑀕𑀬𑀸𑀕𑀸𑀫𑀲𑁆𑀲 𑀅𑀯𑀺𑀤𑀽𑀭𑁂 𑀏𑀓𑀸 𑀧𑁄𑀓𑁆𑀔𑀭𑀡𑀻 𑀅𑀢𑁆𑀣𑀺 𑀦𑀤𑀻𑀧𑀺, 𑀢𑀤𑀼𑀪𑀬𑀁 ‘‘𑀧𑀸𑀧𑀧𑀯𑀸𑀳𑀦𑀢𑀺𑀢𑁆𑀣’’𑀦𑁆𑀢𑀺 𑀮𑁄𑀓𑀺𑀬𑀫𑀳𑀸𑀚𑀦𑁄 𑀲𑀫𑀼𑀤𑀸𑀘𑀭𑀢𑀺. 𑀕𑀬𑀸𑀲𑀻𑀲𑁂𑀢𑀺 𑀕𑀚𑀲𑀻𑀲𑀲𑀤𑀺𑀲𑀲𑀺𑀔𑀭𑁄 𑀢𑀢𑁆𑀣 𑀏𑀓𑁄 𑀧𑀩𑁆𑀩𑀢𑁄 𑀕𑀬𑀸𑀲𑀻𑀲𑀦𑀸𑀫𑀓𑁄, 𑀬𑀢𑁆𑀣 𑀳𑀢𑁆𑀣𑀺𑀓𑀼𑀫𑁆𑀪𑀲𑀤𑀺𑀲𑁄 𑀧𑀺𑀝𑁆𑀞𑀺𑀧𑀸𑀲𑀸𑀡𑁄 𑀪𑀺𑀓𑁆𑀔𑀼𑀲𑀳𑀲𑁆𑀲𑀲𑁆𑀲 𑀑𑀓𑀸𑀲𑁄 𑀧𑀳𑁄𑀢𑀺, 𑀢𑀢𑁆𑀭 𑀪𑀕𑀯𑀸 𑀯𑀺𑀳𑀭𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀕𑀬𑀸𑀬𑀁 𑀯𑀺𑀳𑀭𑀢𑀺 𑀕𑀬𑀸𑀲𑀻𑀲𑁂’’𑀢𑀺.

𑀚𑀝𑀺𑀮𑀸𑀢𑀺 𑀢𑀸𑀧𑀲𑀸. 𑀢𑁂 𑀳𑀺 𑀚𑀝𑀸𑀥𑀸𑀭𑀺𑀢𑀸𑀬 𑀇𑀥 ‘‘𑀚𑀝𑀺𑀮𑀸’’𑀢𑀺 𑀯𑀼𑀢𑁆𑀢𑀸. 𑀅𑀦𑁆𑀢𑀭𑀝𑁆𑀞𑀓𑁂 𑀳𑀺𑀫𑀧𑀸𑀢𑀲𑀫𑀬𑁂𑀢𑀺 𑀳𑁂𑀫𑀦𑁆𑀢𑀲𑁆𑀲 𑀉𑀢𑀼𑀦𑁄 𑀅𑀩𑁆𑀪𑀦𑁆𑀢𑀭𑀪𑀽𑀢𑁂 𑀫𑀸𑀖𑀫𑀸𑀲𑀲𑁆𑀲 𑀅𑀯𑀲𑀸𑀦𑁂 𑀘𑀢𑁆𑀢𑀸𑀭𑁄 𑀨𑀕𑁆𑀕𑀼𑀡𑀫𑀸𑀲𑀲𑁆𑀲 𑀆𑀤𑀺𑀫𑁆𑀳𑀺 𑀘𑀢𑁆𑀢𑀸𑀭𑁄𑀢𑀺 𑀅𑀝𑁆𑀞𑀤𑀺𑀯𑀲𑀧𑀭𑀺𑀫𑀸𑀡𑁂 𑀳𑀺𑀫𑀲𑁆𑀲 𑀧𑀢𑀦𑀓𑀸𑀮𑁂. 𑀕𑀬𑀸𑀬𑀁 𑀉𑀫𑁆𑀫𑀼𑀚𑁆𑀚𑀦𑁆𑀢𑀻𑀢𑀺 𑀓𑁂𑀘𑀺 𑀢𑀲𑁆𑀫𑀺𑀁 𑀢𑀺𑀢𑁆𑀣𑀲𑀫𑁆𑀫𑀢𑁂 𑀉𑀤𑀓𑁂 𑀧𑀞𑀫𑀁 𑀦𑀺𑀫𑀼𑀕𑁆𑀕𑀲𑀓𑀮𑀲𑀭𑀻𑀭𑀸 𑀢𑀢𑁄 𑀉𑀫𑁆𑀫𑀼𑀚𑁆𑀚𑀦𑁆𑀢𑀺 𑀯𑀼𑀝𑁆𑀞𑀳𑀦𑁆𑀢𑀺 𑀉𑀧𑁆𑀧𑀺𑀮𑀯𑀦𑁆𑀢𑀺. 𑀦𑀺𑀫𑀼𑀚𑁆𑀚𑀦𑁆𑀢𑀻𑀢𑀺 𑀲𑀲𑀻𑀲𑀁 𑀉𑀤𑀓𑁂 𑀑𑀲𑀻𑀤𑀦𑁆𑀢𑀺. 𑀉𑀫𑁆𑀫𑀼𑀚𑁆𑀚𑀦𑀺𑀫𑀼𑀚𑁆𑀚𑀫𑁆𑀧𑀺 𑀓𑀭𑁄𑀦𑁆𑀢𑀻𑀢𑀺 𑀧𑀼𑀦𑀧𑁆𑀧𑀼𑀦𑀁 𑀉𑀫𑁆𑀫𑀼𑀚𑁆𑀚𑀦𑀦𑀺𑀫𑀼𑀚𑁆𑀚𑀦𑀸𑀦𑀺𑀧𑀺 𑀓𑀭𑁄𑀦𑁆𑀢𑀺.

𑀢𑀢𑁆𑀣 𑀳𑀺 𑀓𑁂𑀘𑀺 ‘‘𑀏𑀓𑀼𑀫𑁆𑀫𑀼𑀚𑁆𑀚𑀦𑁂𑀦𑁂𑀯 𑀧𑀸𑀧𑀲𑀼𑀤𑁆𑀥𑀺 𑀳𑁄𑀢𑀻’’𑀢𑀺 𑀏𑀯𑀁𑀤𑀺𑀝𑁆𑀞𑀺𑀓𑀸, 𑀢𑁂 𑀉𑀫𑁆𑀫𑀼𑀚𑁆𑀚𑀦𑀫𑁂𑀯 𑀓𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀉𑀫𑁆𑀫𑀼𑀚𑁆𑀚𑀦𑀁 𑀧𑀦 𑀦𑀺𑀫𑀼𑀚𑁆𑀚𑀦𑀫𑀦𑁆𑀢𑀭𑁂𑀦 𑀦𑀢𑁆𑀣𑀻𑀢𑀺 𑀅𑀯𑀺𑀦𑀸𑀪𑀸𑀯𑀢𑁄 𑀦𑀺𑀫𑀼𑀚𑁆𑀚𑀦𑀫𑁆𑀧𑀺 𑀢𑁂 𑀓𑀭𑁄𑀦𑁆𑀢𑀺𑀬𑁂𑀯. 𑀬𑁂𑀧𑀺 ‘‘𑀏𑀓𑀦𑀺𑀫𑀼𑀚𑁆𑀚𑀦𑁂𑀦𑁂𑀯 𑀧𑀸𑀧𑀲𑀼𑀤𑁆𑀥𑀺 𑀳𑁄𑀢𑀻’’𑀢𑀺 𑀏𑀯𑀁𑀤𑀺𑀝𑁆𑀞𑀺𑀓𑀸, 𑀢𑁂𑀧𑀺 𑀏𑀓𑀯𑀸𑀭𑀫𑁂𑀯 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦 𑀅𑀯𑀺𑀦𑀸𑀪𑀸𑀯𑀢𑁄 𑀉𑀫𑁆𑀫𑀼𑀚𑁆𑀚𑀦𑀫𑁆𑀧𑀺 𑀓𑀢𑁆𑀯𑀸 𑀧𑀓𑁆𑀓𑀫𑀦𑁆𑀢𑀺. 𑀬𑁂 𑀧𑀦 ‘‘𑀢𑀲𑁆𑀫𑀺𑀁 𑀢𑀺𑀢𑁆𑀣𑁂 𑀦𑀺𑀫𑀼𑀚𑁆𑀚𑀦𑁂𑀦𑁂𑀯 𑀧𑀸𑀧𑀲𑀼𑀤𑁆𑀥𑀺 𑀳𑁄𑀢𑀻’’𑀢𑀺 𑀏𑀯𑀁𑀤𑀺𑀝𑁆𑀞𑀺𑀓𑀸, 𑀢𑁂 𑀢𑀢𑁆𑀣 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀅𑀲𑁆𑀲𑀸𑀲𑁂 𑀲𑀦𑁆𑀦𑀺𑀭𑀼𑀫𑁆𑀪𑀺𑀢𑁆𑀯𑀸 𑀫𑀭𑀼𑀧𑁆𑀧𑀧𑀸𑀢𑀧𑀢𑀺𑀢𑀸 𑀯𑀺𑀬 𑀢𑀢𑁆𑀣𑁂𑀯 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑀦𑁆𑀢𑀺. 𑀅𑀧𑀭𑁂 ‘‘𑀧𑀼𑀦𑀧𑁆𑀧𑀼𑀦𑀁 𑀉𑀫𑁆𑀫𑀼𑀚𑁆𑀚𑀦𑀦𑀺𑀫𑀼𑀚𑁆𑀚𑀦𑀸𑀦𑀺 𑀓𑀢𑁆𑀯𑀸 𑀦𑁆𑀳𑀸𑀢𑁂 𑀧𑀸𑀧𑀲𑀼𑀤𑁆𑀥𑀺 𑀳𑁄𑀢𑀻’’𑀢𑀺 𑀏𑀯𑀁𑀤𑀺𑀝𑁆𑀞𑀺𑀓𑀸, 𑀢𑁂 𑀓𑀸𑀮𑁂𑀦 𑀓𑀸𑀮𑀁 𑀉𑀫𑁆𑀫𑀼𑀚𑁆𑀚𑀦𑀦𑀺𑀫𑀼𑀚𑁆𑀚𑀦𑀸𑀦𑀺 𑀓𑀭𑁄𑀦𑁆𑀢𑀺. 𑀢𑁂 𑀲𑀩𑁆𑀩𑁂𑀧𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀉𑀫𑁆𑀫𑀼𑀚𑁆𑀚𑀦𑁆𑀢𑀺𑀧𑀺 𑀦𑀺𑀫𑀼𑀚𑁆𑀚𑀦𑁆𑀢𑀺𑀧𑀺 𑀉𑀫𑁆𑀫𑀼𑀚𑁆𑀚𑀦𑀺𑀫𑀼𑀚𑁆𑀚𑀫𑁆𑀧𑀺 𑀓𑀭𑁄𑀦𑁆𑀢𑀻’’𑀢𑀺. 𑀏𑀢𑁆𑀣 𑀘 𑀓𑀺𑀜𑁆𑀘𑀸𑀧𑀺 𑀦𑀺𑀫𑀼𑀚𑁆𑀚𑀦𑀧𑀼𑀩𑁆𑀩𑀓𑀁 𑀉𑀫𑁆𑀫𑀼𑀚𑁆𑀚𑀦𑀁, 𑀦𑀺𑀫𑀼𑀚𑁆𑀚𑀦𑀫𑁂𑀯 𑀧𑀦 𑀓𑀭𑁄𑀦𑁆𑀢𑀸 𑀓𑀢𑀺𑀧𑀬𑀸, 𑀉𑀫𑁆𑀫𑀼𑀚𑁆𑀚𑀦𑀁 𑀢𑀤𑀼𑀪𑀬𑀜𑁆𑀘 𑀓𑀭𑁄𑀦𑁆𑀢𑀸 𑀩𑀳𑀽𑀢𑀺 𑀢𑁂𑀲𑀁 𑀬𑁂𑀪𑀼𑀬𑁆𑀬𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀉𑀫𑁆𑀫𑀼𑀚𑁆𑀚𑀦𑀁 𑀧𑀞𑀫𑀁 𑀯𑀼𑀢𑁆𑀢𑀁. 𑀢𑀣𑀸 𑀲𑀫𑁆𑀩𑀳𑀼𑀮𑀸 𑀚𑀝𑀺𑀮𑀸𑀢𑀺 𑀚𑀝𑀺𑀮𑀸𑀦𑀁 𑀬𑁂𑀪𑀼𑀬𑁆𑀬𑀢𑀸𑀬 𑀯𑀼𑀢𑁆𑀢𑀁, 𑀫𑀼𑀡𑁆𑀟𑀲𑀺𑀔𑀡𑁆𑀟𑀺𑀦𑁄𑀧𑀺 𑀘 𑀩𑁆𑀭𑀸𑀳𑁆𑀫𑀡𑀸 𑀉𑀤𑀓𑀲𑀼𑀤𑁆𑀥𑀺𑀓𑀸 𑀢𑀲𑁆𑀫𑀺𑀁 𑀓𑀸𑀮𑁂 𑀢𑀢𑁆𑀣 𑀢𑀣𑀸 𑀓𑀭𑁄𑀦𑁆𑀢𑀺.

𑀑𑀲𑀺𑀜𑁆𑀘𑀦𑁆𑀢𑀻𑀢𑀺 𑀓𑁂𑀘𑀺 𑀕𑀬𑀸𑀬 𑀉𑀤𑀓𑀁 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀲𑀻𑀲𑁂 𑀘 𑀲𑀭𑀻𑀭𑁂 𑀘 𑀑𑀲𑀺𑀜𑁆𑀘𑀦𑁆𑀢𑀺, 𑀅𑀧𑀭𑁂 𑀖𑀝𑁂𑀳𑀺 𑀉𑀤𑀓𑀁 𑀕𑀳𑁂𑀢𑁆𑀯𑀸 𑀢𑀻𑀭𑁂 𑀞𑀢𑁆𑀯𑀸 𑀢𑀣𑀸 𑀓𑀭𑁄𑀦𑁆𑀢𑀺. 𑀅𑀕𑁆𑀕𑀺𑀁 𑀚𑀼𑀳𑀦𑁆𑀢𑀻𑀢𑀺 𑀓𑁂𑀘𑀺 𑀕𑀬𑀸𑀢𑀻𑀭𑁂 𑀯𑁂𑀤𑀺𑀁 𑀲𑀚𑁆𑀚𑁂𑀢𑁆𑀯𑀸 𑀥𑀽𑀫𑀤𑀩𑁆𑀪𑀺𑀧𑀽𑀚𑀸𑀤𑀺𑀓𑁂 𑀉𑀧𑀓𑀭𑀡𑁂 𑀉𑀧𑀦𑁂𑀢𑁆𑀯𑀸 𑀅𑀕𑁆𑀕𑀺𑀳𑀼𑀢𑀁 𑀚𑀼𑀳𑀦𑁆𑀢𑀺 𑀅𑀕𑁆𑀕𑀺𑀳𑀼𑀢𑀁 𑀧𑀭𑀺𑀘𑀭𑀦𑁆𑀢𑀺. 𑀇𑀫𑀺𑀦𑀸 𑀲𑀼𑀤𑁆𑀥𑀻𑀢𑀺 𑀇𑀫𑀺𑀦𑀸 𑀕𑀬𑀸𑀬𑀁 𑀉𑀫𑁆𑀫𑀼𑀚𑁆𑀚𑀦𑀸𑀤𑀺𑀦𑀸 𑀅𑀕𑁆𑀕𑀺𑀧𑀭𑀺𑀘𑀭𑀡𑁂𑀦 𑀘 𑀧𑀸𑀧𑀫𑀮𑀢𑁄 𑀲𑀼𑀤𑁆𑀥𑀺 𑀧𑀸𑀧𑀧𑀯𑀸𑀳𑀦𑀸 𑀲𑀁𑀲𑀸𑀭𑀲𑀼𑀤𑁆𑀥𑀺 𑀏𑀯 𑀯𑀸 𑀳𑁄𑀢𑀻𑀢𑀺 𑀏𑀯𑀁𑀤𑀺𑀝𑁆𑀞𑀺𑀓𑀸 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀉𑀫𑁆𑀫𑀼𑀚𑁆𑀚𑀦𑀸𑀤𑀺 𑀘𑁂𑀢𑁆𑀣 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀲𑀼 𑀳𑀺 𑀓𑁂𑀘𑀺 𑀉𑀤𑀓𑀯𑀸𑀲𑀁 𑀯𑀲𑀦𑁆𑀢𑀺, 𑀓𑁂𑀘𑀺 𑀉𑀤𑀓𑀲𑁆𑀲𑀜𑁆𑀚𑀮𑀺𑀁 𑀤𑁂𑀦𑁆𑀢𑀺, 𑀓𑁂𑀘𑀺 𑀢𑀲𑁆𑀫𑀺𑀁 𑀉𑀤𑀓𑁂 𑀞𑀢𑁆𑀯𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑁂 𑀅𑀦𑀼𑀧𑀭𑀺𑀯𑀢𑁆𑀢𑀦𑁆𑀢𑀺, 𑀓𑁂𑀘𑀺 𑀅𑀦𑁂𑀓𑀲𑀳𑀲𑁆𑀲𑀯𑀸𑀭𑀁 𑀲𑀸𑀯𑀺𑀢𑁆𑀢𑀺𑀆𑀤𑀺𑀓𑁂 𑀚𑀧𑀦𑁆𑀢𑀺, 𑀓𑁂𑀘𑀺 ‘‘𑀇𑀦𑁆𑀤 𑀆𑀕𑀘𑁆𑀙𑀸’’𑀢𑀺𑀆𑀤𑀺𑀦𑀸 𑀯𑀺𑀚𑁆𑀚𑀸𑀚𑀧𑀁 𑀅𑀯𑁆𑀳𑀸𑀬𑀦𑁆𑀢𑀺, 𑀓𑁂𑀘𑀺 𑀫𑀳𑀢𑀼𑀧𑀝𑁆𑀞𑀸𑀦𑀁 𑀓𑀭𑁄𑀦𑁆𑀢𑀺, 𑀏𑀯𑀜𑁆𑀘 𑀓𑀭𑁄𑀦𑁆𑀢𑀸 𑀓𑁂𑀘𑀺 𑀑𑀢𑀭𑀦𑁆𑀢𑀺, 𑀓𑁂𑀘𑀺 𑀉𑀢𑁆𑀢𑀭𑀦𑁆𑀢𑀺 𑀓𑁂𑀘𑀺 𑀉𑀢𑁆𑀢𑀭𑀺𑀢𑁆𑀯𑀸 𑀲𑀼𑀤𑁆𑀥𑀺𑀓𑀆𑀘𑀫𑀦𑀁 𑀓𑀭𑁄𑀦𑁆𑀢𑀺, 𑀓𑁂𑀘𑀺 𑀅𑀦𑁆𑀢𑁄𑀉𑀤𑀓𑁂 𑀞𑀺𑀢𑀸 𑀢𑀦𑁆𑀢𑀻 𑀯𑀸𑀤𑁂𑀦𑁆𑀢𑀺, 𑀯𑀻𑀡𑀁 𑀯𑀸𑀤𑁂𑀦𑁆𑀢𑀻𑀢𑀺 𑀏𑀯𑀫𑀸𑀤𑀺𑀓𑀸 𑀦𑀸𑀦𑀧𑁆𑀧𑀓𑀸𑀭𑀓𑀺𑀭𑀺𑀬𑀸 𑀤𑀲𑁆𑀲𑁂𑀦𑁆𑀢𑀺. 𑀬𑀲𑁆𑀫𑀸 𑀯𑀸 𑀢𑁂 𑀏𑀯𑀭𑀽𑀧𑀸 𑀯𑀺𑀓𑀸𑀭𑀓𑀺𑀭𑀺𑀬𑀸 𑀓𑀭𑁄𑀦𑁆𑀢𑀸𑀧𑀺 𑀢𑀲𑁆𑀫𑀺𑀁 𑀉𑀤𑀓𑁂 𑀦𑀺𑀫𑀼𑀚𑁆𑀚𑀦𑀉𑀫𑁆𑀫𑀼𑀚𑁆𑀚𑀦𑀧𑀼𑀩𑁆𑀩𑀓𑀫𑁂𑀯 𑀓𑀭𑁄𑀦𑁆𑀢𑀺, 𑀢𑀲𑁆𑀫𑀸 𑀢𑀁 𑀲𑀩𑁆𑀩𑀁 𑀦𑀺𑀫𑀼𑀚𑁆𑀚𑀦𑀼𑀫𑁆𑀫𑀼𑀚𑁆𑀚𑀦𑀦𑁆𑀢𑁄𑀕𑀥𑀫𑁂𑀯 𑀓𑀢𑁆𑀯𑀸 ‘‘𑀉𑀫𑁆𑀫𑀼𑀚𑁆𑀚𑀦𑁆𑀢𑀻’’𑀢𑀺𑀧𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀯𑀁 𑀢𑀢𑁆𑀣 𑀆𑀓𑀼𑀮𑀩𑁆𑀬𑀸𑀓𑀼𑀮𑁂 𑀯𑀢𑁆𑀢𑀫𑀸𑀦𑁂 𑀉𑀧𑀭𑀺𑀧𑀩𑁆𑀩𑀢𑁂 𑀞𑀺𑀢𑁄 𑀪𑀕𑀯𑀸 𑀢𑁂𑀲𑀁 𑀢𑀁 𑀓𑁄𑀮𑀸𑀳𑀮𑀁 𑀲𑀼𑀢𑁆𑀯𑀸 ‘‘𑀓𑀺𑀦𑁆𑀦𑀼 𑀔𑁄 𑀏𑀢’’𑀦𑁆𑀢𑀺 𑀑𑀮𑁄𑀓𑁂𑀦𑁆𑀢𑁄 𑀢𑀁 𑀓𑀺𑀭𑀺𑀬𑀯𑀺𑀓𑀸𑀭𑀁 𑀅𑀤𑁆𑀤𑀲, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸…𑀧𑁂… 𑀇𑀫𑀺𑀦𑀸 𑀲𑀼𑀤𑁆𑀥𑀻’’𑀢𑀺, 𑀢𑀁 𑀯𑀼𑀢𑁆𑀢𑀢𑁆𑀣𑀫𑁂𑀯.

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀏𑀢𑀁 𑀅𑀢𑁆𑀣𑀁 𑀉𑀤𑀓𑁄𑀭𑁄𑀳𑀦𑀸𑀤𑀺𑀅𑀲𑀼𑀤𑁆𑀥𑀺𑀫𑀕𑁆𑀕𑁂 𑀢𑁂𑀲𑀁 𑀲𑀼𑀤𑁆𑀥𑀺𑀫𑀕𑁆𑀕𑀧𑀭𑀸𑀫𑀲𑀦𑀁 𑀲𑀘𑁆𑀘𑀸𑀤𑀺𑀓𑁂 𑀘 𑀲𑀼𑀤𑁆𑀥𑀺𑀫𑀕𑁆𑀕𑁂 𑀅𑀢𑁆𑀢𑀦𑁄 𑀅𑀯𑀺𑀧𑀭𑀻𑀢𑀸𑀯𑀩𑁄𑀥𑀁 𑀲𑀩𑁆𑀩𑀸𑀓𑀸𑀭𑀢𑁄 𑀯𑀺𑀤𑀺𑀢𑁆𑀯𑀸. 𑀇𑀫𑀁 𑀉𑀤𑀸𑀦𑀦𑁆𑀢𑀺 𑀇𑀫𑀁 𑀉𑀤𑀓𑀲𑀼𑀤𑁆𑀥𑀺𑀬𑀸 𑀅𑀲𑀼𑀤𑁆𑀥𑀺𑀫𑀕𑁆𑀕𑀪𑀸𑀯𑀤𑀻𑀧𑀓𑀁 𑀲𑀘𑁆𑀘𑀸𑀤𑀺𑀥𑀫𑁆𑀫𑀸𑀦𑀜𑁆𑀘 𑀬𑀸𑀣𑀸𑀯𑀢𑁄 𑀲𑀼𑀤𑁆𑀥𑀺𑀫𑀕𑁆𑀕𑀪𑀸𑀯𑀤𑀻𑀧𑀓𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀦 𑀉𑀤𑀓𑁂𑀦 𑀲𑀼𑀘𑀻 𑀳𑁄𑀢𑀻𑀢𑀺 𑀏𑀢𑁆𑀣 𑀉𑀤𑀓𑁂𑀦𑀸𑀢𑀺 𑀉𑀤𑀓𑀼𑀫𑁆𑀫𑀼𑀚𑁆𑀚𑀦𑀸𑀤𑀺𑀦𑀸. 𑀉𑀤𑀓𑀼𑀫𑁆𑀫𑀼𑀚𑁆𑀚𑀦𑀸𑀤𑀺 𑀳𑀺 𑀇𑀥 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 ‘‘𑀉𑀤𑀓’’𑀦𑁆𑀢𑀺 𑀯𑀼𑀢𑁆𑀢𑀁 𑀬𑀣𑀸 𑀭𑀽𑀧𑀪𑀯𑁄 𑀭𑀽𑀧𑀦𑁆𑀢𑀺. 𑀅𑀣 𑀯𑀸 𑀉𑀤𑀓𑁂𑀦𑀸𑀢𑀺 𑀉𑀫𑁆𑀫𑀼𑀚𑁆𑀚𑀦𑀸𑀤𑀺𑀓𑀺𑀭𑀺𑀬𑀸𑀬 𑀲𑀸𑀥𑀦𑀪𑀽𑀢𑁂𑀦 𑀉𑀤𑀓𑁂𑀦 𑀲𑀼𑀘𑀺 𑀲𑀢𑁆𑀢𑀲𑁆𑀲 𑀲𑀼𑀤𑁆𑀥𑀺 𑀦𑀸𑀫 𑀦 𑀳𑁄𑀢𑀺, 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀲𑀼𑀘𑀻𑀢𑀺 𑀢𑁂𑀦 𑀬𑀣𑀸𑀯𑀼𑀢𑁆𑀢𑁂𑀦 𑀉𑀤𑀓𑁂𑀦 𑀲𑀼𑀘𑀺 𑀧𑀸𑀧𑀫𑀮𑀢𑁄 𑀲𑀼𑀤𑁆𑀥𑁄 𑀦𑀸𑀫 𑀲𑀢𑁆𑀢𑁄 𑀦 𑀳𑁄𑀢𑀺. 𑀓𑀲𑁆𑀫𑀸? 𑀩𑀳𑁆𑀯𑁂𑀢𑁆𑀣 𑀦𑁆𑀳𑀸𑀬𑀢𑀻 𑀚𑀦𑁄. 𑀬𑀤𑀺 𑀳𑀺 𑀉𑀤𑀓𑁄𑀭𑁄𑀳𑀦𑀸𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑁂𑀦 𑀧𑀸𑀧𑀲𑀼𑀤𑁆𑀥𑀺 𑀦𑀸𑀫 𑀲𑀺𑀬𑀸, 𑀩𑀳𑀼 𑀏𑀢𑁆𑀣 𑀉𑀤𑀓𑁂 𑀚𑀦𑁄 𑀦𑁆𑀳𑀸𑀬𑀢𑀺, 𑀫𑀸𑀢𑀼𑀖𑀸𑀢𑀸𑀤𑀺𑀧𑀸𑀧𑀓𑀫𑁆𑀫𑀓𑀸𑀭𑀻 𑀅𑀜𑁆𑀜𑁄 𑀘 𑀕𑁄𑀫𑀳𑀺𑀁𑀲𑀸𑀤𑀺𑀓𑁄 𑀅𑀦𑁆𑀢𑀫𑀲𑁄 𑀫𑀘𑁆𑀙𑀓𑀘𑁆𑀙𑀧𑁂 𑀉𑀧𑀸𑀤𑀸𑀬, 𑀢𑀲𑁆𑀲 𑀲𑀩𑁆𑀩𑀲𑁆𑀲𑀸𑀧𑀺 𑀧𑀸𑀧𑀲𑀼𑀤𑁆𑀥𑀺 𑀲𑀺𑀬𑀸, 𑀦 𑀧𑀦𑁂𑀯𑀁 𑀳𑁄𑀢𑀺. 𑀓𑀲𑁆𑀫𑀸? 𑀦𑁆𑀳𑀸𑀦𑀲𑁆𑀲 𑀧𑀸𑀧𑀳𑁂𑀢𑀽𑀦𑀁 𑀅𑀧𑁆𑀧𑀝𑀺𑀧𑀓𑁆𑀔𑀪𑀸𑀯𑀢𑁄. 𑀬𑀜𑁆𑀳𑀺 𑀬𑀁 𑀯𑀺𑀦𑀸𑀲𑁂𑀢𑀺, 𑀲𑁄 𑀢𑀲𑁆𑀲 𑀧𑀝𑀺𑀧𑀓𑁆𑀔𑁄 𑀬𑀣𑀸 𑀆𑀮𑁄𑀓𑁄 𑀅𑀦𑁆𑀥𑀓𑀸𑀭𑀲𑁆𑀲, 𑀯𑀺𑀚𑁆𑀚𑀸 𑀘 𑀅𑀯𑀺𑀚𑁆𑀚𑀸𑀬, 𑀦 𑀏𑀯𑀁 𑀦𑁆𑀳𑀸𑀦𑀁 𑀧𑀸𑀧𑀲𑁆𑀲. 𑀢𑀲𑁆𑀫𑀸 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁 ‘‘𑀦 𑀉𑀤𑀓𑁂𑀦 𑀲𑀼𑀘𑀺 𑀳𑁄𑀢𑀻’’𑀢𑀺.

𑀬𑁂𑀦 𑀧𑀦 𑀲𑀼𑀘𑀺 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀫𑁆𑀳𑀺 𑀲𑀘𑁆𑀘𑀜𑁆𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀫𑁆𑀳𑀻𑀢𑀺 𑀬𑀲𑁆𑀫𑀺𑀁 𑀧𑀼𑀕𑁆𑀕𑀮𑁂. 𑀲𑀘𑁆𑀘𑀦𑁆𑀢𑀺 𑀯𑀘𑀻𑀲𑀘𑁆𑀘𑀜𑁆𑀘𑁂𑀯 𑀯𑀺𑀭𑀢𑀺𑀲𑀘𑁆𑀘𑀜𑁆𑀘. 𑀅𑀣 𑀯𑀸 𑀲𑀘𑁆𑀘𑀦𑁆𑀢𑀺 𑀜𑀸𑀡𑀲𑀘𑁆𑀘𑀜𑁆𑀘𑁂𑀯 𑀧𑀭𑀫𑀢𑁆𑀣𑀲𑀘𑁆𑀘𑀜𑁆𑀘. 𑀥𑀫𑁆𑀫𑁄𑀢𑀺 𑀅𑀭𑀺𑀬𑀫𑀕𑁆𑀕𑀥𑀫𑁆𑀫𑁄, 𑀨𑀮𑀥𑀫𑁆𑀫𑁄 𑀘, 𑀲𑁄 𑀲𑀩𑁆𑀩𑁄𑀧𑀺 𑀬𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀉𑀧𑀮𑀩𑁆𑀪𑀢𑀺, 𑀲𑁄 𑀲𑀼𑀘𑀻 𑀲𑁄 𑀘 𑀩𑁆𑀭𑀸𑀳𑁆𑀫𑀡𑁄𑀢𑀺 𑀲𑁄 𑀅𑀭𑀺𑀬𑀧𑀼𑀕𑁆𑀕𑀮𑁄 𑀯𑀺𑀲𑁂𑀲𑀢𑁄 𑀔𑀻𑀡𑀸𑀲𑀯𑁄 𑀅𑀘𑁆𑀘𑀦𑁆𑀢𑀲𑀼𑀤𑁆𑀥𑀺𑀬𑀸 𑀲𑀼𑀘𑀺 𑀘 𑀩𑁆𑀭𑀸𑀳𑁆𑀫𑀡𑁄 𑀘𑀸𑀢𑀺. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀲𑀘𑁆𑀘𑀁 𑀥𑀫𑁆𑀫𑀢𑁄 𑀯𑀺𑀲𑀼𑀁 𑀓𑀢𑁆𑀯𑀸 𑀕𑀳𑀺𑀢𑀁? 𑀲𑀘𑁆𑀘𑀲𑁆𑀲 𑀩𑀳𑀽𑀧𑀓𑀸𑀭𑀢𑁆𑀢𑀸. 𑀢𑀣𑀸 𑀳𑀺 ‘‘𑀲𑀘𑁆𑀘𑀁 𑀯𑁂 𑀅𑀫𑀢𑀸 𑀯𑀸𑀘𑀸 (𑀲𑀼. 𑀦𑀺. 𑁪𑁫𑁫), 𑀲𑀘𑁆𑀘𑀁 𑀳𑀯𑁂 𑀲𑀸𑀤𑀼𑀢𑀭𑀁 𑀭𑀲𑀸𑀦𑀁 (𑀲𑀁. 𑀦𑀺. 𑁧.𑁨𑁪𑁬; 𑀲𑀼. 𑀦𑀺. 𑁧𑁮𑁪), 𑀲𑀘𑁆𑀘𑁂 𑀅𑀢𑁆𑀣𑁂 𑀘 𑀥𑀫𑁆𑀫𑁂 𑀘, 𑀆𑀳𑀼 𑀲𑀦𑁆𑀢𑁄 𑀧𑀢𑀺𑀝𑁆𑀞𑀺𑀢𑀸 (𑀲𑀼. 𑀦𑀺. 𑁪𑁫𑁫), 𑀲𑀘𑁆𑀘𑁂 𑀞𑀺𑀢𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀘𑀸’’𑀢𑀺𑀆𑀤𑀺𑀦𑀸 (𑀚𑀸. 𑁨.𑁨𑁧.𑁪𑁩𑁩) 𑀅𑀦𑁂𑀓𑁂𑀲𑀼 𑀲𑀼𑀢𑁆𑀢𑀧𑀤𑁂𑀲𑀼 𑀲𑀘𑁆𑀘𑀕𑀼𑀡𑀸 𑀧𑀓𑀸𑀲𑀺𑀢𑀸. 𑀲𑀘𑁆𑀘𑀯𑀺𑀧𑀭𑀺𑀬𑀲𑁆𑀲 𑀘 ‘‘𑀏𑀓𑀁 𑀥𑀫𑁆𑀫𑀁 𑀅𑀢𑀻𑀢𑀲𑁆𑀲, 𑀫𑀼𑀲𑀸𑀯𑀸𑀤𑀺𑀲𑁆𑀲 𑀚𑀦𑁆𑀢𑀼𑀦𑁄 (𑀥. 𑀧. 𑁧𑁭𑁬), 𑀅𑀪𑀽𑀢𑀯𑀸𑀤𑀻 𑀦𑀺𑀭𑀬𑀁 𑀉𑀧𑁂𑀢𑀻’’𑀢𑀺 (𑀥. 𑀧. 𑁩𑁦𑁬) 𑀘 𑀆𑀤𑀺𑀦𑀸 𑀧𑀓𑀸𑀲𑀺𑀢𑀸𑀢𑀺.

𑀦𑀯𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.