𑁧. 𑀧𑀞𑀫𑀩𑁄𑀥𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧. 𑀬𑀁 𑀧𑀦𑁂𑀢𑁆𑀣 ‘‘𑀏𑀯𑀁 𑀫𑁂 𑀲𑀼𑀢’’𑀦𑁆𑀢𑀺𑀆𑀤𑀺𑀓𑀁 𑀦𑀺𑀤𑀸𑀦𑀁, 𑀢𑀢𑁆𑀣 𑀏𑀯𑀦𑁆𑀢𑀺 𑀦𑀺𑀧𑀸𑀢𑀧𑀤𑀁. 𑀫𑁂𑀢𑀺𑀆𑀤𑀻𑀦𑀺 𑀦𑀸𑀫𑀧𑀤𑀸𑀦𑀺. 𑀉𑀭𑀼𑀯𑁂𑀮𑀸𑀬𑀁 𑀯𑀺𑀳𑀭𑀢𑀻𑀢𑀺 𑀏𑀢𑁆𑀣 𑀯𑀻𑀢𑀺 𑀉𑀧𑀲𑀕𑁆𑀕𑀧𑀤𑀁, 𑀳𑀭𑀢𑀻𑀢𑀺 𑀆𑀔𑁆𑀬𑀸𑀢𑀧𑀤𑀦𑁆𑀢𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀲𑀩𑁆𑀩𑀢𑁆𑀣 𑀧𑀤𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀢𑁆𑀣𑀢𑁄 𑀧𑀦 𑀏𑀯𑀁𑀲𑀤𑁆𑀤𑁄 𑀢𑀸𑀯 𑀉𑀧𑀫𑀽𑀧𑀤𑁂𑀲𑀲𑀫𑁆𑀧𑀳𑀁𑀲𑀦𑀕𑀭𑀳𑀡𑀯𑀘𑀦𑀲𑀫𑁆𑀧𑀝𑀺𑀕𑁆𑀕𑀳𑀸𑀓𑀸𑀭- 𑀦𑀺𑀤𑀲𑁆𑀲𑀦𑀸𑀯𑀥𑀸𑀭𑀡𑀧𑀼𑀘𑁆𑀙𑀸𑀇𑀤𑀫𑀢𑁆𑀣𑀧𑀭𑀺𑀫𑀸𑀡𑀸𑀤𑀺 𑀅𑀦𑁂𑀓𑀢𑁆𑀣𑀧𑁆𑀧𑀪𑁂𑀤𑁄. 𑀢𑀣𑀸 𑀳𑁂𑀲 ‘‘𑀏𑀯𑀁 𑀚𑀸𑀢𑁂𑀦 𑀫𑀘𑁆𑀘𑁂𑀦, 𑀓𑀢𑁆𑀢𑀩𑁆𑀩𑀁 𑀓𑀼𑀲𑀮𑀁 𑀩𑀳𑀼’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 (𑀥. 𑀧. 𑁫𑁩) 𑀉𑀧𑀫𑀸𑀬𑀁 𑀆𑀕𑀢𑁄. ‘‘𑀏𑀯𑀁 𑀢𑁂 𑀅𑀪𑀺𑀓𑁆𑀓𑀫𑀺𑀢𑀩𑁆𑀩𑀁, 𑀏𑀯𑀁 𑀢𑁂 𑀧𑀝𑀺𑀓𑁆𑀓𑀫𑀺𑀢𑀩𑁆𑀩’’𑀦𑁆𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁧𑁨𑁨) 𑀉𑀧𑀤𑁂𑀲𑁂. ‘‘𑀏𑀯𑀫𑁂𑀢𑀁 𑀪𑀕𑀯𑀸, 𑀏𑀯𑀫𑁂𑀢𑀁 𑀲𑀼𑀕𑀢𑀸’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁩.𑁬𑁬) 𑀲𑀫𑁆𑀧𑀳𑀁𑀲𑀦𑁂. ‘‘𑀏𑀯𑀫𑁂𑀯𑀁 𑀧𑀦𑀸𑀬𑀁 𑀯𑀲𑀮𑀻 𑀬𑀲𑁆𑀫𑀺𑀁 𑀯𑀸 𑀢𑀲𑁆𑀫𑀺𑀁 𑀯𑀸 𑀢𑀲𑁆𑀲 𑀫𑀼𑀡𑁆𑀟𑀓𑀲𑁆𑀲 𑀲𑀫𑀡𑀓𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀻’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁧𑁮𑁭) 𑀕𑀭𑀳𑀡𑁂. ‘‘𑀏𑀯𑀁, 𑀪𑀦𑁆𑀢𑁂𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁩; 𑀫. 𑀦𑀺. 𑁧.𑁧) 𑀯𑀘𑀦𑀲𑀫𑁆𑀧𑀝𑀺𑀕𑁆𑀕𑀳𑁂. ‘‘𑀏𑀯𑀁 𑀩𑁆𑀬𑀸 𑀔𑁄 𑀅𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁩𑁯𑁮) 𑀆𑀓𑀸𑀭𑁂. ‘‘𑀏𑀳𑀺 𑀢𑁆𑀯𑀁, 𑀫𑀸𑀡𑀯𑀓, 𑀬𑁂𑀦 𑀲𑀫𑀡𑁄 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀫 𑀯𑀘𑀦𑁂𑀦 𑀲𑀫𑀡𑀁 𑀆𑀦𑀦𑁆𑀤𑀁 𑀅𑀧𑁆𑀧𑀸𑀩𑀸𑀥𑀁 𑀅𑀧𑁆𑀧𑀸𑀢𑀗𑁆𑀓𑀁 𑀮𑀳𑀼𑀝𑁆𑀞𑀸𑀦𑀁 𑀩𑀮𑀁 𑀨𑀸𑀲𑀼𑀯𑀺𑀳𑀸𑀭𑀁 𑀧𑀼𑀘𑁆𑀙 ‘𑀲𑀼𑀪𑁄 𑀫𑀸𑀡𑀯𑁄 𑀢𑁄𑀤𑁂𑀬𑁆𑀬𑀧𑀼𑀢𑁆𑀢𑁄 𑀪𑀯𑀦𑁆𑀢𑀁 𑀆𑀦𑀦𑁆𑀤𑀁 𑀅𑀧𑁆𑀧𑀸𑀩𑀸𑀥𑀁 𑀅𑀧𑁆𑀧𑀸𑀢𑀗𑁆𑀓𑀁 𑀮𑀳𑀼𑀝𑁆𑀞𑀸𑀦𑀁 𑀩𑀮𑀁 𑀨𑀸𑀲𑀼𑀯𑀺𑀳𑀸𑀭𑀁 𑀧𑀼𑀘𑁆𑀙𑀢𑀻’𑀢𑀺, 𑀏𑀯𑀜𑁆𑀘 𑀯𑀤𑁂𑀳𑀺 ‘𑀲𑀸𑀥𑀼 𑀓𑀺𑀭 𑀪𑀯𑀁 𑀆𑀦𑀦𑁆𑀤𑁄 𑀬𑁂𑀦 𑀲𑀼𑀪𑀲𑁆𑀲 𑀫𑀸𑀡𑀯𑀲𑁆𑀲 𑀢𑁄𑀤𑁂𑀬𑁆𑀬𑀧𑀼𑀢𑁆𑀢𑀲𑁆𑀲 𑀦𑀺𑀯𑁂𑀲𑀦𑀁, 𑀢𑁂𑀦𑀼𑀧𑀲𑀗𑁆𑀓𑀫𑀢𑀼 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸’𑀢𑀺’’𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁪𑁪𑁫) 𑀦𑀺𑀤𑀲𑁆𑀲𑀦𑁂. ‘‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀓𑀸𑀮𑀸𑀫𑀸, 𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸 𑀯𑀸 𑀅𑀓𑀼𑀲𑀮𑀸 𑀯𑀸’𑀢𑀺? ‘𑀅𑀓𑀼𑀲𑀮𑀸, 𑀪𑀦𑁆𑀢𑁂’. ‘𑀲𑀸𑀯𑀚𑁆𑀚𑀸 𑀯𑀸 𑀅𑀦𑀯𑀚𑁆𑀚𑀸 𑀯𑀸’𑀢𑀺? ‘𑀲𑀸𑀯𑀚𑁆𑀚𑀸, 𑀪𑀦𑁆𑀢𑁂’. ‘𑀯𑀺𑀜𑁆𑀜𑀽𑀕𑀭𑀳𑀺𑀢𑀸 𑀯𑀸 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸 𑀯𑀸’𑀢𑀺? ‘𑀯𑀺𑀜𑁆𑀜𑀽𑀕𑀭𑀳𑀺𑀢𑀸, 𑀪𑀦𑁆𑀢𑁂’. ‘𑀲𑀫𑀢𑁆𑀢𑀸 𑀲𑀫𑀸𑀤𑀺𑀦𑁆𑀦𑀸 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀦𑁄’𑀯𑀸? ‘𑀓𑀣𑀁 𑀯𑁄 𑀏𑀢𑁆𑀣 𑀳𑁄𑀢𑀻’𑀢𑀺? ‘𑀲𑀫𑀢𑁆𑀢𑀸, 𑀪𑀦𑁆𑀢𑁂, 𑀲𑀫𑀸𑀤𑀺𑀦𑁆𑀦𑀸 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀏𑀯𑀁 𑀦𑁄 𑀏𑀢𑁆𑀣 𑀳𑁄𑀢𑀻𑀢𑀺’’’𑀆𑀤𑀻𑀲𑀼 (𑀅. 𑀦𑀺. 𑁩.𑁬𑁬) 𑀅𑀯𑀥𑀸𑀭𑀡𑁂. ‘‘𑀏𑀯𑀫𑁂𑀢𑁂 𑀲𑀼𑀦𑁆𑀳𑀸𑀢𑀸 𑀲𑀼𑀯𑀺𑀮𑀺𑀢𑁆𑀢𑀸 𑀓𑀧𑁆𑀧𑀺𑀢𑀓𑁂𑀲𑀫𑀲𑁆𑀲𑀽 𑀆𑀫𑀼𑀢𑁆𑀢𑀫𑀸𑀮𑀸𑀪𑀭𑀡𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁮𑁬) 𑀧𑀼𑀘𑁆𑀙𑀸𑀬𑀁. ‘‘𑀏𑀯𑀁𑀕𑀢𑀸𑀦𑀺 𑀧𑀼𑀣𑀼𑀲𑀺𑀧𑁆𑀧𑀸𑀬𑀢𑀦𑀸𑀦𑀺 (𑀤𑀻. 𑀦𑀺. 𑁧.𑁧𑁮𑁨), 𑀏𑀯𑀁𑀯𑀺𑀥𑁄 𑀏𑀯𑀫𑀸𑀓𑀸𑀭𑁄’’𑀢𑀺𑀆𑀤𑀻𑀲𑀼 𑀇𑀤𑀁𑀲𑀤𑁆𑀤𑀲𑁆𑀲 𑀅𑀢𑁆𑀣𑁂. 𑀕𑀢𑀲𑀤𑁆𑀤𑁄 𑀳𑀺 𑀧𑀓𑀸𑀭𑀧𑀭𑀺𑀬𑀸𑀬𑁄, 𑀢𑀣𑀸 𑀯𑀺𑀥𑀸𑀓𑀸𑀭𑀲𑀤𑁆𑀤𑀸. 𑀢𑀣𑀸 𑀳𑀺 𑀯𑀺𑀥𑀬𑀼𑀢𑁆𑀢𑀕𑀢𑀲𑀤𑁆𑀤𑁂 𑀮𑁄𑀓𑀺𑀬𑀸 𑀧𑀓𑀸𑀭𑀢𑁆𑀣𑁂 𑀯𑀤𑀦𑁆𑀢𑀺. ‘‘𑀏𑀯𑀁 𑀮𑀳𑀼𑀧𑀭𑀺𑀯𑀢𑁆𑀢𑀁 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁧.𑁪𑁮) 𑀧𑀭𑀺𑀫𑀸𑀡𑁂.

𑀦𑀦𑀼 𑀘 ‘‘𑀏𑀯𑀁 𑀯𑀺𑀢𑀓𑁆𑀓𑀺𑀢𑀁 𑀦𑁄 𑀢𑀼𑀫𑁆𑀳𑁂𑀳𑀺, 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄’’𑀢𑀺 𑀘𑁂𑀢𑁆𑀣 𑀏𑀯𑀁𑀲𑀤𑁆𑀤𑁂𑀦 𑀧𑀼𑀘𑁆𑀙𑀦𑀸𑀓𑀸𑀭𑀧𑀭𑀺𑀫𑀸𑀡𑀸𑀓𑀸𑀭𑀸𑀦𑀁 𑀯𑀼𑀢𑁆𑀢𑀢𑁆𑀢𑀸 𑀆𑀓𑀸𑀭𑀢𑁆𑀣𑁄 𑀏𑀯 𑀏𑀯𑀁𑀲𑀤𑁆𑀤𑁄𑀢𑀺. 𑀦, 𑀯𑀺𑀲𑁂𑀲𑀲𑀩𑁆𑀪𑀸𑀯𑀢𑁄. 𑀆𑀓𑀸𑀭𑀫𑀢𑁆𑀢𑀯𑀸𑀘𑀓𑁄 𑀳𑁂𑀢𑁆𑀣 𑀏𑀯𑀁𑀲𑀤𑁆𑀤𑁄 𑀆𑀓𑀸𑀭𑀢𑁆𑀣𑁄𑀢𑀺 𑀅𑀥𑀺𑀧𑁆𑀧𑁂𑀢𑁄. ‘‘𑀏𑀯𑀁 𑀩𑁆𑀬𑀸 𑀔𑁄’’𑀢𑀺𑀆𑀤𑀻𑀲𑀼 𑀧𑀦 𑀆𑀓𑀸𑀭𑀯𑀺𑀲𑁂𑀲𑀯𑀘𑀦𑁄. 𑀆𑀓𑀸𑀭𑀯𑀺𑀲𑁂𑀲𑀯𑀸𑀘𑀺𑀦𑁄 𑀘𑁂𑀢𑁂 𑀏𑀯𑀁𑀲𑀤𑁆𑀤𑀸 𑀧𑀼𑀘𑁆𑀙𑀦𑀸𑀓𑀸𑀭𑀧𑀭𑀺𑀫𑀸𑀡𑀸𑀓𑀸𑀭𑀸𑀦𑀁 𑀯𑀸𑀘𑀓𑀢𑁆𑀢𑀸. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀏𑀯𑀁 𑀚𑀸𑀢𑁂𑀦 𑀫𑀘𑁆𑀘𑁂𑀦𑀸’’𑀢𑀺𑀆𑀤𑀻𑀦𑀺 𑀉𑀧𑀫𑀸𑀦𑀉𑀤𑀸𑀳𑀭𑀡𑀸𑀦𑀺 𑀬𑀼𑀚𑁆𑀚𑀦𑁆𑀢𑀺. 𑀢𑀢𑁆𑀣 𑀳𑀺 𑁋

‘‘𑀬𑀣𑀸𑀧𑀺 𑀧𑀼𑀧𑁆𑀨𑀭𑀸𑀲𑀺𑀫𑁆𑀳𑀸, 𑀓𑀬𑀺𑀭𑀸 𑀫𑀸𑀮𑀸𑀕𑀼𑀡𑁂 𑀩𑀳𑀽;

𑀏𑀯𑀁 𑀚𑀸𑀢𑁂𑀦 𑀫𑀘𑁆𑀘𑁂𑀦, 𑀓𑀢𑁆𑀢𑀩𑁆𑀩𑀁 𑀓𑀼𑀲𑀮𑀁 𑀩𑀳𑀼’’𑀦𑁆𑀢𑀺. 𑁋

𑀏𑀢𑁆𑀣 𑀧𑀼𑀧𑁆𑀨𑀭𑀸𑀲𑀺𑀝𑁆𑀞𑀸𑀦𑀻𑀬𑀢𑁄 𑀫𑀦𑀼𑀲𑁆𑀲𑀼𑀧𑁆𑀧𑀢𑁆𑀢𑀺 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀪𑁄𑀕𑀲𑀫𑁆𑀧𑀢𑁆𑀢𑀺𑀆𑀤𑀺𑀢𑁄 𑀤𑀸𑀦𑀸𑀤𑀺𑀧𑀼𑀜𑁆𑀜𑀓𑀺𑀭𑀺𑀬𑀸𑀳𑁂𑀢𑀼𑀲𑀫𑀼𑀤𑀸𑀬𑀢𑁄 𑀲𑁄𑀪𑀸𑀲𑀼𑀕𑀦𑁆𑀥𑀢𑀸𑀤𑀺𑀕𑀼𑀡𑀯𑀺𑀲𑁂𑀲𑀬𑁄𑀕𑀢𑁄 𑀫𑀸𑀮𑀸𑀕𑀼𑀡𑀲𑀤𑀺𑀲𑀺𑀬𑁄 𑀩𑀳𑀼𑀓𑀸 𑀧𑀼𑀜𑁆𑀜𑀓𑀺𑀭𑀺𑀬𑀸 𑀫𑀭𑀺𑀢𑀩𑁆𑀩𑀲𑀪𑀸𑀯𑀢𑀸𑀬 𑀫𑀘𑁆𑀘𑁂𑀦 𑀓𑀢𑁆𑀢𑀩𑁆𑀩𑀸𑀢𑀺 𑀅𑀪𑁂𑀤𑀢𑀸𑀬 𑀧𑀼𑀧𑁆𑀨𑀭𑀸𑀲𑀺 𑀫𑀸𑀮𑀸𑀕𑀼𑀡𑀸 𑀘 𑀉𑀧𑀫𑀸, 𑀢𑁂𑀲𑀁 𑀉𑀧𑀫𑀸𑀦𑀸𑀓𑀸𑀭𑁄 𑀬𑀣𑀸𑀲𑀤𑁆𑀤𑁂𑀦 𑀅𑀦𑀺𑀬𑀫𑀢𑁄 𑀯𑀼𑀢𑁆𑀢𑁄. 𑀧𑀼𑀦 𑀏𑀯𑀁𑀲𑀤𑁆𑀤𑁂𑀦 𑀦𑀺𑀬𑀫𑀦𑀯𑀲𑁂𑀦 𑀯𑀼𑀢𑁆𑀢𑁄. 𑀲𑁄 𑀧𑀦 𑀉𑀧𑀫𑀸𑀓𑀸𑀭𑁄 𑀦𑀺𑀬𑀫𑀺𑀬𑀫𑀸𑀦𑁄 𑀅𑀢𑁆𑀣𑀢𑁄 𑀉𑀧𑀫𑀸 𑀏𑀯 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀉𑀧𑀫𑀸𑀬𑀁 𑀆𑀕𑀢𑁄’’𑀢𑀺.

𑀢𑀣𑀸 ‘‘𑀏𑀯𑀁 𑀇𑀫𑀺𑀦𑀸 𑀆𑀓𑀸𑀭𑁂𑀦 𑀅𑀪𑀺𑀓𑁆𑀓𑀫𑀺𑀢𑀩𑁆𑀩’’𑀦𑁆𑀢𑀺𑀆𑀤𑀺𑀦𑀸 𑀉𑀧𑀤𑀺𑀲𑀺𑀬𑀫𑀸𑀦𑀸𑀬 𑀲𑀫𑀡𑀲𑀸𑀭𑀼𑀧𑁆𑀧𑀸𑀬 𑀆𑀓𑀧𑁆𑀧𑀲𑀫𑁆𑀧𑀢𑁆𑀢𑀺𑀬𑀸 𑀬𑁄 𑀢𑀢𑁆𑀣 𑀉𑀧𑀤𑁂𑀲𑀸𑀓𑀸𑀭𑁄, 𑀲𑁄 𑀅𑀢𑁆𑀣𑀢𑁄 𑀉𑀧𑀤𑁂𑀲𑁄𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 𑁋 ‘‘𑀏𑀯𑀁 𑀢𑁂 𑀅𑀪𑀺𑀓𑁆𑀓𑀫𑀺𑀢𑀩𑁆𑀩𑀁, 𑀏𑀯𑀁 𑀢𑁂 𑀧𑀝𑀺𑀓𑁆𑀓𑀫𑀺𑀢𑀩𑁆𑀩𑀦𑁆𑀢𑀺𑀆𑀤𑀻𑀲𑀼 𑀉𑀧𑀤𑁂𑀲𑁂’’𑀢𑀺.

‘‘𑀏𑀯𑀫𑁂𑀢𑀁 𑀪𑀕𑀯𑀸, 𑀏𑀯𑀫𑁂𑀢𑀁 𑀲𑀼𑀕𑀢𑀸’’𑀢𑀺 𑀏𑀢𑁆𑀣 𑀪𑀕𑀯𑀢𑀸 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀅𑀯𑀺𑀧𑀭𑀻𑀢𑀢𑁄 𑀚𑀸𑀦𑀦𑁆𑀢𑁂𑀳𑀺 𑀓𑀢𑀁 𑀬𑀁 𑀢𑀢𑁆𑀣 𑀯𑀺𑀚𑁆𑀚𑀫𑀸𑀦𑀕𑀼𑀡𑀸𑀦𑀁 𑀧𑀓𑀸𑀭𑁂𑀳𑀺 𑀳𑀁𑀲𑀦𑀁 𑀉𑀤𑀕𑁆𑀕𑀢𑀸𑀓𑀭𑀡𑀁 𑀲𑀫𑁆𑀧𑀳𑀁𑀲𑀦𑀁, 𑀲𑁄 𑀢𑀢𑁆𑀣 𑀧𑀳𑀁𑀲𑀦𑀸𑀓𑀸𑀭𑁄𑀢𑀺 𑀯𑀼𑀢𑁆𑀢𑀦𑀬𑁂𑀦 𑀬𑁄𑀚𑁂𑀢𑀩𑁆𑀩𑀁.

‘‘𑀏𑀯𑀫𑁂𑀯𑀁 𑀧𑀦𑀸𑀬’’𑀦𑁆𑀢𑀺 𑀏𑀢𑁆𑀣 𑀕𑀭𑀳𑀡𑀸𑀓𑀸𑀭𑁄𑀢𑀺 𑀯𑀼𑀢𑁆𑀢𑀦𑀬𑁂𑀦 𑀬𑁄𑀚𑁂𑀢𑀩𑁆𑀩𑀁. 𑀲𑁄 𑀘 𑀕𑀭𑀳𑀡𑀸𑀓𑀸𑀭𑁄 ‘‘𑀯𑀲𑀮𑀻’’𑀢𑀺𑀆𑀤𑀺𑀔𑀼𑀁𑀲𑀦𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑀢𑁄 𑀇𑀥 𑀏𑀯𑀁𑀲𑀤𑁆𑀤𑁂𑀦 𑀧𑀓𑀸𑀲𑀺𑀢𑁄𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀉𑀧𑀫𑀸𑀓𑀸𑀭𑀸𑀤𑀬𑁄𑀧𑀺 𑀉𑀧𑀫𑀸𑀤𑀺𑀯𑀲𑁂𑀦 𑀯𑀼𑀢𑁆𑀢𑀸𑀦𑀁 𑀧𑀼𑀧𑁆𑀨𑀭𑀸𑀲𑀺𑀆𑀤𑀺𑀲𑀤𑁆𑀤𑀸𑀦𑀁 𑀲𑀦𑁆𑀦𑀺𑀥𑀸𑀦𑀢𑁄 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

‘‘𑀏𑀯𑀁 𑀦𑁄’’𑀢𑀺 𑀏𑀢𑁆𑀣𑀸𑀧𑀺 𑀢𑁂𑀲𑀁 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀸𑀦𑀁 𑀅𑀳𑀺𑀢𑀤𑀼𑀓𑁆𑀔𑀸𑀯𑀳𑀪𑀸𑀯𑁂𑀦 𑀲𑀦𑁆𑀦𑀺𑀝𑁆𑀞𑀸𑀦𑀚𑀦𑀦𑀢𑁆𑀣𑀁 𑀅𑀦𑀼𑀫𑀢𑀺𑀕𑁆𑀕𑀳𑀡𑀯𑀲𑁂𑀦 ‘‘𑀦𑁄 𑀯𑀸 𑀓𑀣𑀁 𑀯𑁄 𑀏𑀢𑁆𑀣 𑀳𑁄𑀢𑀻’’𑀢𑀺 𑀧𑀼𑀘𑁆𑀙𑀸𑀬 𑀓𑀢𑀸𑀬 ‘‘𑀏𑀯𑀁 𑀦𑁄 𑀏𑀢𑁆𑀣 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀢𑀤𑀸𑀓𑀸𑀭𑀲𑀦𑁆𑀦𑀺𑀝𑁆𑀞𑀸𑀦𑀁 𑀏𑀯𑀁𑀲𑀤𑁆𑀤𑁂𑀦 𑀆𑀯𑀺𑀓𑀢𑀁. 𑀲𑁄 𑀧𑀦 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑀸𑀓𑀸𑀭𑁄 𑀦𑀺𑀬𑀫𑀺𑀬𑀫𑀸𑀦𑁄 𑀅𑀯𑀥𑀸𑀭𑀡𑀢𑁆𑀣𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑁋 ‘‘𑀏𑀯𑀁 𑀦𑁄 𑀏𑀢𑁆𑀣 𑀳𑁄𑀢𑀻𑀢𑀺𑀆𑀤𑀻𑀲𑀼 𑀅𑀯𑀥𑀸𑀭𑀡𑁂’’𑀢𑀺.

‘‘𑀏𑀯𑀜𑁆𑀘 𑀯𑀤𑁂𑀳𑀻’’𑀢𑀺 𑀬𑀣𑀸𑀳𑀁 𑀯𑀤𑀸𑀫𑀺 𑀏𑀯𑀁 𑀲𑀫𑀡𑀁 𑀆𑀦𑀦𑁆𑀤𑀁 𑀯𑀤𑁂𑀳𑀻𑀢𑀺 𑀯𑀤𑀦𑀸𑀓𑀸𑀭𑁄 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑁄 𑀏𑀯𑀁𑀲𑀤𑁆𑀤𑁂𑀦 𑀦𑀺𑀤𑀲𑁆𑀲𑀻𑀬𑀢𑀻𑀢𑀺 ‘‘𑀦𑀺𑀤𑀲𑁆𑀲𑀦𑀢𑁆𑀣𑁄’’𑀢𑀺 𑀯𑀼𑀢𑁆𑀢𑀁.

𑀏𑀯𑀫𑀸𑀓𑀸𑀭𑀯𑀺𑀲𑁂𑀲𑀯𑀸𑀘𑀻𑀦𑀫𑁆𑀧𑀺 𑀏𑀢𑁂𑀲𑀁 𑀏𑀯𑀁𑀲𑀤𑁆𑀤𑀸𑀦𑀁 𑀉𑀧𑀫𑀸𑀤𑀺𑀯𑀺𑀲𑁂𑀲𑀢𑁆𑀣𑀯𑀼𑀢𑁆𑀢𑀺𑀢𑀸𑀬 𑀉𑀧𑀫𑀸𑀤𑀺𑀅𑀢𑁆𑀣𑀢𑀸 𑀯𑀼𑀢𑁆𑀢𑀸. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀧𑀦 𑀥𑀫𑁆𑀫𑀲𑁆𑀲 𑀲𑀸𑀥𑀼𑀓𑀁 𑀲𑀯𑀦𑀫𑀦𑀲𑀺𑀓𑀸𑀭𑁂 𑀦𑀺𑀬𑁄𑀚𑀺𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀢𑀢𑁆𑀣 𑀧𑀢𑀺𑀝𑁆𑀞𑀺𑀢𑀪𑀸𑀯𑀲𑁆𑀲 𑀧𑀝𑀺𑀚𑀸𑀦𑀦𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀢𑀢𑁆𑀣 𑀏𑀯𑀁𑀲𑀤𑁆𑀤𑁄 𑀯𑀘𑀦𑀲𑀫𑁆𑀧𑀝𑀺𑀕𑁆𑀕𑀳𑀢𑁆𑀣𑁄. 𑀢𑁂𑀦 𑀏𑀯𑀁, 𑀪𑀦𑁆𑀢𑁂𑀢𑀺 𑀲𑀸𑀥𑀼, 𑀪𑀦𑁆𑀢𑁂, 𑀲𑀼𑀝𑁆𑀞𑀼, 𑀪𑀦𑁆𑀢𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁆𑀯𑀸𑀬𑀫𑀺𑀥 𑀆𑀓𑀸𑀭𑀦𑀺𑀤𑀲𑁆𑀲𑀦𑀸𑀯𑀥𑀸𑀭𑀡𑁂𑀲𑀼 𑀤𑀝𑁆𑀞𑀩𑁆𑀩𑁄.

𑀢𑀢𑁆𑀣 𑀆𑀓𑀸𑀭𑀢𑁆𑀣𑁂𑀦 𑀏𑀯𑀁𑀲𑀤𑁆𑀤𑁂𑀦 𑀏𑀢𑀫𑀢𑁆𑀣𑀁 𑀤𑀻𑀧𑁂𑀢𑀺 𑁋 𑀦𑀸𑀦𑀸𑀦𑀬𑀦𑀺𑀧𑀼𑀡𑀫𑀦𑁂𑀓𑀚𑁆𑀛𑀸𑀲𑀬𑀲𑀫𑀼𑀝𑁆𑀞𑀸𑀦𑀁 𑀅𑀢𑁆𑀣𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑀁 𑀯𑀺𑀯𑀺𑀥𑀧𑀸𑀝𑀺𑀳𑀸𑀭𑀺𑀬𑀁 𑀥𑀫𑁆𑀫𑀢𑁆𑀣𑀤𑁂𑀲𑀦𑀸𑀧𑀝𑀺𑀯𑁂𑀥𑀕𑀫𑁆𑀪𑀻𑀭𑀁 𑀲𑀩𑁆𑀩𑀲𑀢𑁆𑀢𑀸𑀦𑀁 𑀲𑀓𑀲𑀓𑀪𑀸𑀲𑀸𑀦𑀼𑀭𑀽𑀧𑀢𑁄 𑀲𑁄𑀢𑀧𑀣𑀫𑀸𑀕𑀘𑁆𑀙𑀦𑁆𑀢𑀁 𑀢𑀲𑁆𑀲 𑀪𑀕𑀯𑀢𑁄 𑀯𑀘𑀦𑀁 𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀓𑁄 𑀲𑀫𑀢𑁆𑀣𑁄 𑀯𑀺𑀜𑁆𑀜𑀸𑀢𑀼𑀁, 𑀲𑀩𑁆𑀩𑀣𑀸𑀫𑁂𑀦 𑀧𑀦 𑀲𑁄𑀢𑀼𑀓𑀸𑀫𑀢𑀁 𑀚𑀦𑁂𑀢𑁆𑀯𑀸𑀧𑀺 𑀏𑀯𑀁 𑀫𑁂 𑀲𑀼𑀢𑀁, 𑀫𑀬𑀸𑀧𑀺 𑀏𑀓𑁂𑀦𑀸𑀓𑀸𑀭𑁂𑀦 𑀲𑀼𑀢𑀦𑁆𑀢𑀺.

𑀏𑀢𑁆𑀣 𑀘 𑀏𑀓𑀢𑁆𑀢𑀦𑀸𑀦𑀢𑁆𑀢𑀅𑀩𑁆𑀬𑀸𑀧𑀸𑀭𑀏𑀯𑀁𑀥𑀫𑁆𑀫𑀢𑀸𑀲𑀗𑁆𑀔𑀸𑀢𑀸 𑀦𑀦𑁆𑀤𑀺𑀬𑀸𑀯𑀢𑁆𑀢𑀢𑀺𑀧𑀼𑀓𑁆𑀔𑀮𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀤𑀺𑀲𑀸𑀮𑁄𑀘𑀦𑀅𑀗𑁆𑀓𑀼𑀲𑀲𑀗𑁆𑀔𑀸𑀢𑀸 𑀘 𑀅𑀲𑁆𑀲𑀸𑀤𑀸𑀤𑀺𑀯𑀺𑀲𑀬𑀸𑀤𑀺𑀪𑁂𑀤𑁂𑀦 𑀦𑀸𑀦𑀸𑀯𑀺𑀥𑀸 𑀦𑀬𑀸 𑀦𑀸𑀦𑀸𑀦𑀬𑀸. 𑀦𑀬𑀸 𑀯𑀸 𑀧𑀸𑀴𑀺𑀕𑀢𑀺𑀬𑁄, 𑀢𑀸 𑀘 𑀧𑀜𑁆𑀜𑀢𑁆𑀢𑀺𑀅𑀦𑀼𑀧𑀜𑁆𑀜𑀢𑁆𑀢𑀸𑀤𑀺𑀯𑀲𑁂𑀦 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸𑀤𑀺𑀮𑁄𑀓𑀺𑀬𑀸𑀤𑀺𑀢𑀤𑀼𑀪𑀬𑀯𑁄𑀫𑀺𑀲𑁆𑀲𑀓𑀸𑀤𑀺𑀯𑀲𑁂𑀦 𑀓𑀼𑀲𑀮𑀸𑀤𑀺𑀯𑀲𑁂𑀦 𑀔𑀦𑁆𑀥𑀸𑀤𑀺𑀯𑀲𑁂𑀦, 𑀲𑀗𑁆𑀕𑀳𑀸𑀤𑀺𑀯𑀲𑁂𑀦, 𑀲𑀫𑀬𑀯𑀺𑀫𑀼𑀢𑁆𑀢𑀸𑀤𑀺𑀯𑀲𑁂𑀦, 𑀞𑀧𑀦𑀸𑀤𑀺𑀯𑀲𑁂𑀦, 𑀓𑀼𑀲𑀮𑀫𑀽𑀮𑀸𑀤𑀺𑀯𑀲𑁂𑀦, 𑀢𑀺𑀓𑀧𑀝𑁆𑀞𑀸𑀦𑀸𑀤𑀺𑀯𑀲𑁂𑀦 𑀘 𑀦𑀸𑀦𑀧𑁆𑀧𑀓𑀸𑀭𑀸𑀢𑀺 𑀦𑀸𑀦𑀸𑀦𑀬𑀸, 𑀢𑁂𑀳𑀺 𑀦𑀺𑀧𑀼𑀡𑀁 𑀲𑀡𑁆𑀳𑀁 𑀲𑀼𑀔𑀼𑀫𑀦𑁆𑀢𑀺 𑀦𑀸𑀦𑀸𑀦𑀬𑀦𑀺𑀧𑀼𑀡𑀁.

𑀆𑀲𑀬𑁄𑀯 𑀅𑀚𑁆𑀛𑀸𑀲𑀬𑁄, 𑀲𑁄 𑀘 𑀲𑀲𑁆𑀲𑀢𑀸𑀤𑀺𑀪𑁂𑀤𑁂𑀦 𑀅𑀧𑁆𑀧𑀭𑀚𑀓𑁆𑀔𑀢𑀸𑀤𑀺𑀪𑁂𑀤𑁂𑀦 𑀘 𑀅𑀦𑁂𑀓𑀯𑀺𑀥𑁄. 𑀅𑀢𑁆𑀢𑀚𑁆𑀛𑀸𑀲𑀬𑀸𑀤𑀺𑀓𑁄 𑀏𑀯 𑀯𑀸 𑀅𑀦𑁂𑀓𑁄 𑀅𑀚𑁆𑀛𑀸𑀲𑀬𑁄 𑀅𑀦𑁂𑀓𑀚𑁆𑀛𑀸𑀲𑀬𑁄. 𑀲𑁄 𑀲𑀫𑀼𑀝𑁆𑀞𑀸𑀦𑀁 𑀉𑀧𑁆𑀧𑀢𑁆𑀢𑀺𑀳𑁂𑀢𑀼 𑀏𑀢𑀲𑁆𑀲𑀸𑀢𑀺 𑀅𑀦𑁂𑀓𑀚𑁆𑀛𑀸𑀲𑀬𑀲𑀫𑀼𑀝𑁆𑀞𑀸𑀦𑀁.

𑀲𑀻𑀮𑀸𑀤𑀺𑀅𑀢𑁆𑀣𑀲𑀫𑁆𑀧𑀢𑁆𑀢𑀺𑀬𑀸 𑀢𑀩𑁆𑀩𑀺𑀪𑀸𑀯𑀦𑀩𑁆𑀬𑀜𑁆𑀚𑀦𑀲𑀫𑁆𑀧𑀢𑁆𑀢𑀺𑀬𑀸 𑀲𑀗𑁆𑀓𑀸𑀲𑀦𑀧𑀓𑀸𑀲𑀦𑀯𑀺𑀯𑀭𑀡𑀯𑀺𑀪𑀚𑀦𑀉𑀢𑁆𑀢𑀸𑀦𑀻𑀓𑀭𑀡𑀧𑀜𑁆𑀜𑀢𑁆𑀢𑀺𑀯𑀲𑁂𑀦 𑀙𑀳𑀺 𑀅𑀢𑁆𑀣𑀧𑀤𑁂𑀳𑀺 𑀅𑀓𑁆𑀔𑀭𑀧𑀤𑀩𑁆𑀬𑀜𑁆𑀚𑀦𑀸𑀓𑀸𑀭𑀦𑀺𑀭𑀼𑀢𑁆𑀢𑀺𑀦𑀺𑀤𑁆𑀤𑁂𑀲𑀯𑀲𑁂𑀦 𑀙𑀳𑀺 𑀩𑁆𑀬𑀜𑁆𑀚𑀦𑀧𑀤𑁂𑀳𑀺 𑀘 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀅𑀢𑁆𑀣𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑀁.

𑀇𑀤𑁆𑀥𑀺𑀆𑀤𑁂𑀲𑀦𑀸𑀦𑀼𑀲𑀸𑀲𑀦𑀻𑀪𑁂𑀤𑁂𑀦 𑀢𑁂𑀲𑀼 𑀘 𑀏𑀓𑁂𑀓𑀲𑁆𑀲 𑀯𑀺𑀲𑀬𑀸𑀤𑀺𑀪𑁂𑀤𑁂𑀦 𑀯𑀺𑀯𑀺𑀥𑀁 𑀩𑀳𑀼𑀯𑀺𑀥𑀁 𑀯𑀸 𑀧𑀸𑀝𑀺𑀳𑀸𑀭𑀺𑀬𑀁 𑀏𑀢𑀲𑁆𑀲𑀸𑀢𑀺 𑀯𑀺𑀯𑀺𑀥𑀧𑀸𑀝𑀺𑀳𑀸𑀭𑀺𑀬𑀁. 𑀢𑀢𑁆𑀣 𑀧𑀝𑀺𑀧𑀓𑁆𑀔𑀳𑀭𑀡𑀢𑁄 𑀭𑀸𑀕𑀸𑀤𑀺𑀓𑀺𑀮𑁂𑀲𑀸𑀧𑀦𑀬𑀦𑀢𑁄 𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺 𑀅𑀢𑁆𑀣𑁂 𑀲𑀢𑀺 𑀪𑀕𑀯𑀢𑁄 𑀦 𑀧𑀝𑀺𑀧𑀓𑁆𑀔𑀸 𑀭𑀸𑀕𑀸𑀤𑀬𑁄 𑀲𑀦𑁆𑀢𑀺 𑀬𑁂 𑀳𑀭𑀺𑀢𑀩𑁆𑀩𑀸, 𑀧𑀼𑀣𑀼𑀚𑁆𑀚𑀦𑀸𑀦𑀫𑁆𑀧𑀺 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀅𑀝𑁆𑀞𑀕𑀼𑀡𑀲𑀫𑀦𑁆𑀦𑀸𑀕𑀢𑁂 𑀘𑀺𑀢𑁆𑀢𑁂 𑀳𑀢𑀧𑀝𑀺𑀧𑀓𑁆𑀔𑁂 𑀇𑀤𑁆𑀥𑀺𑀯𑀺𑀥𑀁 𑀧𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀢𑀢𑁆𑀣 𑀧𑀯𑀢𑁆𑀢𑀯𑁄𑀳𑀸𑀭𑁂𑀦 𑀘 𑀦 𑀲𑀓𑁆𑀓𑀸 𑀇𑀥 𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺 𑀯𑀢𑁆𑀢𑀼𑀁. 𑀲𑀘𑁂 𑀧𑀦 𑀫𑀳𑀸𑀓𑀸𑀭𑀼𑀡𑀺𑀓𑀲𑁆𑀲 𑀪𑀕𑀯𑀢𑁄 𑀯𑁂𑀦𑁂𑀬𑁆𑀬𑀕𑀢𑀸 𑀘 𑀓𑀺𑀮𑁂𑀲𑀸 𑀧𑀝𑀺𑀧𑀓𑁆𑀔𑀸, 𑀢𑁂𑀲𑀁 𑀳𑀭𑀡𑀢𑁄 𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺 𑀯𑀼𑀢𑁆𑀢𑀁, 𑀏𑀯𑀁 𑀲𑀢𑀺 𑀬𑀼𑀢𑁆𑀢𑀫𑁂𑀢𑀁. 𑀅𑀣 𑀯𑀸 𑀪𑀕𑀯𑀢𑁄 𑀘𑁂𑀯 𑀲𑀸𑀲𑀦𑀲𑁆𑀲 𑀘 𑀧𑀝𑀺𑀧𑀓𑁆𑀔𑀸 𑀢𑀺𑀢𑁆𑀣𑀺𑀬𑀸, 𑀢𑁂𑀲𑀁 𑀳𑀭𑀡𑀢𑁄 𑀧𑀸𑀝𑀺𑀳𑀸𑀭𑀺𑀬𑀁. 𑀢𑁂 𑀳𑀺 𑀤𑀺𑀝𑁆𑀞𑀺𑀳𑀭𑀡𑀯𑀲𑁂𑀦 𑀤𑀺𑀝𑁆𑀞𑀺𑀧𑁆𑀧𑀓𑀸𑀲𑀦𑁂 𑀅𑀲𑀫𑀢𑁆𑀣𑀪𑀸𑀯𑁂𑀦 𑀘 𑀇𑀤𑁆𑀥𑀺𑀆𑀤𑁂𑀲𑀦𑀸𑀦𑀼𑀲𑀸𑀲𑀦𑀻𑀳𑀺 𑀳𑀭𑀺𑀢𑀸 𑀅𑀧𑀦𑀻𑀢𑀸 𑀳𑁄𑀦𑁆𑀢𑀺. 𑀧𑀝𑀻𑀢𑀺 𑀯𑀸 𑀅𑀬𑀁 𑀲𑀤𑁆𑀤𑁄 𑀧𑀘𑁆𑀙𑀸𑀢𑀺 𑀏𑀢𑀲𑁆𑀲 𑀅𑀢𑁆𑀣𑀁 𑀩𑁄𑀥𑁂𑀢𑀺 ‘‘𑀢𑀲𑁆𑀫𑀺𑀁 𑀧𑀝𑀺𑀧𑀯𑀺𑀝𑁆𑀞𑀫𑁆𑀳𑀺, 𑀅𑀜𑁆𑀜𑁄 𑀆𑀕𑀜𑁆𑀙𑀺 𑀩𑁆𑀭𑀸𑀳𑁆𑀫𑀡𑁄’’𑀢𑀺𑀆𑀤𑀻𑀲𑀼 (𑀘𑀽𑀴𑀦𑀺. 𑀧𑀸𑀭𑀸𑀬𑀦𑀯𑀕𑁆𑀕, 𑀯𑀢𑁆𑀣𑀼𑀕𑀸𑀣𑀸 𑁪) 𑀯𑀺𑀬. 𑀢𑀲𑁆𑀫𑀸 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀓𑀢𑀓𑀺𑀘𑁆𑀘𑁂𑀦 𑀧𑀘𑁆𑀙𑀸 𑀳𑀭𑀺𑀢𑀩𑁆𑀩𑀁 𑀧𑀯𑀢𑁆𑀢𑁂𑀢𑀩𑁆𑀩𑀦𑁆𑀢𑀺 𑀧𑀝𑀺𑀳𑀸𑀭𑀺𑀬𑀁. 𑀅𑀢𑁆𑀢𑀦𑁄 𑀯𑀸 𑀉𑀧𑀓𑁆𑀓𑀺𑀮𑁂𑀲𑁂𑀲𑀼 𑀘𑀢𑀼𑀢𑁆𑀣𑀚𑁆𑀛𑀸𑀦𑀫𑀕𑁆𑀕𑁂𑀳𑀺 𑀳𑀭𑀺𑀢𑁂𑀲𑀼 𑀧𑀘𑁆𑀙𑀸 𑀳𑀭𑀡𑀁 𑀧𑀝𑀺𑀳𑀸𑀭𑀺𑀬𑀁. 𑀇𑀤𑁆𑀥𑀺𑀆𑀤𑁂𑀲𑀦𑀸𑀦𑀼𑀲𑀸𑀲𑀦𑀺𑀬𑁄 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂𑀦 𑀓𑀢𑀓𑀺𑀘𑁆𑀘𑁂𑀦 𑀲𑀢𑁆𑀢𑀳𑀺𑀢𑀢𑁆𑀣𑀁 𑀧𑀼𑀦 𑀧𑀯𑀢𑁆𑀢𑁂𑀢𑀩𑁆𑀩𑀸, 𑀳𑀭𑀺𑀢𑁂𑀲𑀼 𑀘 𑀅𑀢𑁆𑀢𑀦𑁄 𑀉𑀧𑀓𑁆𑀓𑀺𑀮𑁂𑀲𑁂𑀲𑀼 𑀧𑀭𑀲𑀢𑁆𑀢𑀸𑀦𑀁 𑀉𑀧𑀓𑁆𑀓𑀺𑀮𑁂𑀲𑀳𑀭𑀡𑀸𑀦𑀺 𑀳𑁄𑀦𑁆𑀢𑀻𑀢𑀺 𑀧𑀝𑀺𑀳𑀸𑀭𑀺𑀬𑀸𑀦𑀺 𑀪𑀯𑀦𑁆𑀢𑀺. 𑀧𑀝𑀺𑀳𑀸𑀭𑀺𑀬𑀫𑁂𑀯 𑀧𑀸𑀝𑀺𑀳𑀸𑀭𑀺𑀬𑀁, 𑀧𑀝𑀺𑀳𑀸𑀭𑀺𑀬𑁂 𑀯𑀸 𑀇𑀤𑁆𑀥𑀺𑀆𑀤𑁂𑀲𑀦𑀸𑀦𑀼𑀲𑀸𑀲𑀦𑀻𑀲𑀫𑀼𑀤𑀸𑀬𑁂 𑀪𑀯𑀁 𑀏𑀓𑁂𑀓𑀁 𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀧𑀝𑀺𑀳𑀸𑀭𑀺𑀬𑀁 𑀯𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀫𑀕𑁆𑀕𑁄 𑀘 𑀧𑀝𑀺𑀧𑀓𑁆𑀔𑀳𑀭𑀡𑀢𑁄. 𑀢𑀢𑁆𑀣 𑀚𑀸𑀢𑀁 𑀦𑀺𑀫𑀺𑀢𑁆𑀢𑀪𑀽𑀢𑀢𑁄 𑀢𑀢𑁄 𑀯𑀸 𑀆𑀕𑀢𑀦𑁆𑀢𑀺 𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀬𑀲𑁆𑀫𑀸 𑀧𑀦 𑀢𑀦𑁆𑀢𑀺𑀅𑀢𑁆𑀣𑀤𑁂𑀲𑀦𑀸 𑀢𑀩𑁆𑀩𑁄𑀳𑀸𑀭𑀸𑀪𑀺𑀲𑀫𑀬𑀲𑀗𑁆𑀔𑀸𑀢𑀸 𑀳𑁂𑀢𑀼𑀳𑁂𑀢𑀼𑀨𑀮𑀢𑀤𑀼𑀪𑀬𑀧𑀜𑁆𑀜𑀢𑁆𑀢𑀺𑀧𑀝𑀺𑀯𑁂𑀥𑀲𑀗𑁆𑀔𑀸𑀢𑀸 𑀯𑀸 𑀥𑀫𑁆𑀫𑀢𑁆𑀣𑀤𑁂𑀲𑀦𑀸𑀧𑀝𑀺𑀯𑁂𑀥𑀸 𑀕𑀫𑁆𑀪𑀻𑀭𑀸, 𑀲𑀲𑀸𑀤𑀻𑀳𑀺 𑀯𑀺𑀬 𑀫𑀳𑀸𑀲𑀫𑀼𑀤𑁆𑀤𑁄 𑀅𑀦𑀼𑀧𑀘𑀺𑀢𑀓𑀼𑀲𑀮𑀲𑀫𑁆𑀪𑀸𑀭𑁂𑀳𑀺 𑀅𑀮𑀩𑁆𑀪𑀦𑁂𑀬𑁆𑀬𑀧𑁆𑀧𑀢𑀺𑀝𑁆𑀞𑀸 𑀤𑀼𑀧𑁆𑀧𑀭𑀺𑀬𑁄𑀕𑀸𑀳𑀸 𑀘, 𑀢𑀲𑁆𑀫𑀸 𑀢𑁂𑀳𑀺 𑀘𑀢𑀽𑀳𑀺 𑀕𑀫𑁆𑀪𑀻𑀭𑀪𑀸𑀯𑁂𑀳𑀺 𑀬𑀼𑀢𑁆𑀢𑀦𑁆𑀢𑀺 𑀪𑀕𑀯𑀢𑁄 𑀯𑀘𑀦𑀁 𑀥𑀫𑁆𑀫𑀢𑁆𑀣𑀤𑁂𑀲𑀦𑀸𑀧𑀝𑀺𑀯𑁂𑀥𑀕𑀫𑁆𑀪𑀻𑀭𑀁.

𑀏𑀓𑁄 𑀏𑀯 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀸𑀖𑁄𑀲𑁄, 𑀏𑀓𑀲𑁆𑀫𑀺𑀁 𑀔𑀡𑁂 𑀧𑀯𑀢𑁆𑀢𑀫𑀸𑀦𑁄 𑀦𑀸𑀦𑀸𑀪𑀸𑀲𑀸𑀦𑀁 𑀲𑀢𑁆𑀢𑀸𑀦𑀁 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀪𑀸𑀲𑀸𑀯𑀲𑁂𑀦 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀕𑀳𑀡𑀽𑀧𑀕𑁄 𑀳𑁄𑀢𑀺. 𑀅𑀘𑀺𑀦𑁆𑀢𑁂𑀬𑁆𑀬𑁄 𑀳𑀺 𑀩𑀼𑀤𑁆𑀥𑀸𑀦𑀁 𑀩𑀼𑀤𑁆𑀥𑀸𑀦𑀼𑀪𑀸𑀯𑁄𑀢𑀺 𑀲𑀩𑁆𑀩𑀲𑀢𑁆𑀢𑀸𑀦𑀁 𑀲𑀓𑀲𑀓𑀪𑀸𑀲𑀸𑀦𑀼𑀭𑀽𑀧𑀢𑁄 𑀲𑁄𑀢𑀧𑀣𑀁 𑀆𑀕𑀘𑁆𑀙𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀦𑀺𑀤𑀲𑁆𑀲𑀦𑀢𑁆𑀣𑁂𑀦 ‘‘𑀦𑀸𑀳𑀁 𑀲𑀬𑀫𑁆𑀪𑀽, 𑀦 𑀫𑀬𑀸 𑀇𑀤𑀁 𑀲𑀘𑁆𑀙𑀺𑀓𑀢’’𑀦𑁆𑀢𑀺 𑀅𑀢𑁆𑀢𑀸𑀦𑀁 𑀧𑀭𑀺𑀫𑁄𑀘𑁂𑀦𑁆𑀢𑁄 ‘‘𑀏𑀯𑀁 𑀫𑁂 𑀲𑀼𑀢𑀁, 𑀫𑀬𑀸𑀧𑀺 𑀏𑀯𑀁 𑀲𑀼𑀢’’𑀦𑁆𑀢𑀺 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀁 𑀲𑀓𑀮𑀁 𑀲𑀼𑀢𑁆𑀢𑀁 𑀦𑀺𑀤𑀲𑁆𑀲𑁂𑀢𑀺.

𑀅𑀯𑀥𑀸𑀭𑀡𑀢𑁆𑀣𑁂𑀦 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀩𑀳𑀼𑀲𑁆𑀲𑀼𑀢𑀸𑀦𑀁 𑀬𑀤𑀺𑀤𑀁 𑀆𑀦𑀦𑁆𑀤𑁄, 𑀕𑀢𑀺𑀫𑀦𑁆𑀢𑀸𑀦𑀁, 𑀲𑀢𑀺𑀫𑀦𑁆𑀢𑀸𑀦𑀁, 𑀥𑀺𑀢𑀺𑀫𑀦𑁆𑀢𑀸𑀦𑀁, 𑀉𑀧𑀝𑁆𑀞𑀸𑀓𑀸𑀦𑀁 𑀬𑀤𑀺𑀤𑀁 𑀆𑀦𑀦𑁆𑀤𑁄’’𑀢𑀺 (𑀅. 𑀦𑀺. 𑁧.𑁨𑁧𑁯-𑁨𑁨𑁩) 𑀏𑀯𑀁 𑀪𑀕𑀯𑀢𑀸, ‘‘𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀅𑀢𑁆𑀣𑀓𑀼𑀲𑀮𑁄, 𑀥𑀫𑁆𑀫𑀓𑀼𑀲𑀮𑁄, 𑀩𑁆𑀬𑀜𑁆𑀚𑀦𑀓𑀼𑀲𑀮𑁄, 𑀦𑀺𑀭𑀼𑀢𑁆𑀢𑀺𑀓𑀼𑀲𑀮𑁄, 𑀧𑀼𑀩𑁆𑀩𑀸𑀧𑀭𑀓𑀼𑀲𑀮𑁄’’𑀢𑀺 (𑀅. 𑀦𑀺. 𑁫.𑁧𑁬𑁯) 𑀏𑀯𑀁 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀘 𑀧𑀲𑀢𑁆𑀣𑀪𑀸𑀯𑀸𑀦𑀼𑀭𑀽𑀧𑀁 𑀅𑀢𑁆𑀢𑀦𑁄 𑀥𑀸𑀭𑀡𑀩𑀮𑀁 𑀤𑀲𑁆𑀲𑁂𑀦𑁆𑀢𑁄 𑀲𑀢𑁆𑀢𑀸𑀦𑀁 𑀲𑁄𑀢𑀼𑀓𑀸𑀫𑀢𑀁 𑀚𑀦𑁂𑀢𑀺. ‘‘𑀏𑀯𑀁 𑀫𑁂 𑀲𑀼𑀢𑀁, 𑀢𑀜𑁆𑀘 𑀔𑁄 𑀅𑀢𑁆𑀣𑀢𑁄 𑀯𑀸 𑀩𑁆𑀬𑀜𑁆𑀚𑀦𑀢𑁄 𑀯𑀸 𑀅𑀦𑀽𑀦𑀫𑀦𑀥𑀺𑀓𑀁, 𑀏𑀯𑀫𑁂𑀯 𑀦 𑀅𑀜𑁆𑀜𑀣𑀸 𑀤𑀝𑁆𑀞𑀩𑁆𑀩’’𑀦𑁆𑀢𑀺. 𑀅𑀜𑁆𑀜𑀣𑀸𑀢𑀺 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀲𑀼𑀢𑀸𑀓𑀸𑀭𑀢𑁄 𑀅𑀜𑁆𑀜𑀣𑀸 𑀦 𑀧𑀦 𑀪𑀕𑀯𑀢𑀸 𑀤𑁂𑀲𑀺𑀢𑀸𑀓𑀸𑀭𑀢𑁄. 𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀼𑀪𑀸𑀯𑀸 𑀳𑀺 𑀪𑀕𑀯𑀢𑁄 𑀤𑁂𑀲𑀦𑀸, 𑀲𑀸 𑀦𑁂𑀯 𑀲𑀩𑁆𑀩𑀸𑀓𑀸𑀭𑁂𑀦 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀦𑁆𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄. 𑀲𑀼𑀢𑀸𑀓𑀸𑀭𑀸𑀯𑀺𑀭𑀼𑀚𑁆𑀛𑀦𑀫𑁂𑀯 𑀳𑀺 𑀥𑀸𑀭𑀡𑀩𑀮𑀁.

𑀫𑁂𑀲𑀤𑁆𑀤𑁄 𑀢𑀻𑀲𑀼 𑀅𑀢𑁆𑀣𑁂𑀲𑀼 𑀤𑀺𑀲𑁆𑀲𑀢𑀺. 𑀢𑀣𑀸 𑀳𑀺𑀲𑁆𑀲 ‘‘𑀕𑀸𑀣𑀸𑀪𑀺𑀕𑀻𑀢𑀁 𑀫𑁂 𑀅𑀪𑁄𑀚𑀦𑁂𑀬𑁆𑀬’’𑀦𑁆𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁧𑁯𑁪; 𑀲𑀼. 𑀦𑀺. 𑁮𑁧) 𑀫𑀬𑀸𑀢𑀺 𑀅𑀢𑁆𑀣𑁄. ‘‘𑀲𑀸𑀥𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑀽’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁪.𑁮𑁮; 𑁫.𑁩𑁮𑁨; 𑀅. 𑀦𑀺. 𑁪.𑁨𑁫𑁭) 𑀫𑀬𑁆𑀳𑀦𑁆𑀢𑀺 𑀅𑀢𑁆𑀣𑁄. ‘‘𑀥𑀫𑁆𑀫𑀤𑀸𑀬𑀸𑀤𑀸 𑀫𑁂, 𑀪𑀺𑀓𑁆𑀔𑀯𑁂, 𑀪𑀯𑀣𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁯) 𑀫𑀫𑀸𑀢𑀺 𑀅𑀢𑁆𑀣𑁄. 𑀇𑀥 𑀧𑀦 ‘‘𑀫𑀬𑀸 𑀲𑀼𑀢𑀁, 𑀫𑀫 𑀲𑀼𑀢’’𑀦𑁆𑀢𑀺 𑀘 𑀅𑀢𑁆𑀣𑀤𑁆𑀯𑀬𑁂 𑀬𑀼𑀚𑁆𑀚𑀢𑀺.

𑀏𑀢𑁆𑀣 𑀘 𑀬𑁄 𑀧𑀭𑁄 𑀦 𑀳𑁄𑀢𑀺, 𑀲𑁄 𑀅𑀢𑁆𑀢𑀸𑀢𑀺 𑀏𑀯𑀁 𑀯𑀢𑁆𑀢𑀩𑁆𑀩𑁂 𑀦𑀺𑀬𑀓𑀚𑁆𑀛𑀢𑁆𑀢𑀲𑀗𑁆𑀔𑀸𑀢𑁂 𑀲𑀲𑀦𑁆𑀢𑀸𑀦𑁂 𑀯𑀢𑁆𑀢𑀦𑀢𑁄 𑀢𑀺𑀯𑀺𑀥𑁄𑀧𑀺 𑀫𑁂𑀲𑀤𑁆𑀤𑁄 𑀓𑀺𑀜𑁆𑀘𑀸𑀧𑀺 𑀏𑀓𑀲𑁆𑀫𑀺𑀁𑀬𑁂𑀯 𑀅𑀢𑁆𑀣𑁂 𑀤𑀺𑀲𑁆𑀲𑀢𑀺, 𑀓𑀭𑀡𑀲𑀫𑁆𑀧𑀤𑀸𑀦𑀸𑀤𑀺𑀯𑀺𑀲𑁂𑀲𑀲𑀗𑁆𑀔𑀸𑀢𑁄 𑀧𑀦 𑀯𑀺𑀜𑁆𑀜𑀸𑀬𑀢𑁂𑀯𑀸𑀬𑀁 𑀅𑀢𑁆𑀣𑀪𑁂𑀤𑁄𑀢𑀺 ‘‘𑀫𑁂-𑀲𑀤𑁆𑀤𑁄 𑀢𑀻𑀲𑀼 𑀅𑀢𑁆𑀣𑁂𑀲𑀼 𑀤𑀺𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀲𑀼𑀢𑀦𑁆𑀢𑀺 𑀅𑀬𑀁 𑀲𑀼𑀢𑀲𑀤𑁆𑀤𑁄 𑀲𑀉𑀧𑀲𑀕𑁆𑀕𑁄 𑀅𑀦𑀼𑀧𑀲𑀕𑁆𑀕𑁄 𑀘 𑀕𑀫𑀦𑀯𑀺𑀲𑁆𑀲𑀼𑀢𑀓𑀺𑀮𑀺𑀦𑁆𑀦𑀽𑀧𑀘𑀺𑀢𑀸𑀦𑀼𑀬𑁄𑀕𑀲𑁄𑀢𑀯𑀺𑀜𑁆𑀜𑁂𑀬𑁆𑀬 𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭 𑀯𑀺𑀜𑁆𑀜𑀸𑀢𑀸𑀤𑀺𑀅𑀦𑁂𑀓𑀢𑁆𑀣𑀧𑁆𑀧𑀪𑁂𑀤𑁄. 𑀓𑀺𑀜𑁆𑀘𑀸𑀧𑀺 𑀳𑀺 𑀉𑀧𑀲𑀕𑁆𑀕𑁄 𑀓𑀺𑀭𑀺𑀬𑀁 𑀯𑀺𑀲𑁂𑀲𑁂𑀢𑀺, 𑀚𑁄𑀢𑀓𑀪𑀸𑀯𑀢𑁄 𑀧𑀦 𑀲𑀢𑀺𑀧𑀺 𑀢𑀲𑁆𑀫𑀺𑀁 𑀲𑀼𑀢𑀲𑀤𑁆𑀤𑁄 𑀏𑀯 𑀢𑀁 𑀢𑀫𑀢𑁆𑀣𑀁 𑀯𑀤𑀢𑀻𑀢𑀺 𑀅𑀦𑀼𑀧𑀲𑀕𑁆𑀕𑀲𑁆𑀲 𑀲𑀼𑀢𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑁂 𑀲𑀉𑀧𑀲𑀕𑁆𑀕𑀲𑁆𑀲 𑀕𑀳𑀡𑀁 𑀦 𑀯𑀺𑀭𑀼𑀚𑁆𑀛𑀢𑀺.

𑀢𑀢𑁆𑀣 ‘‘𑀲𑁂𑀦𑀸𑀬 𑀧𑀲𑀼𑀢𑁄’’𑀢𑀺𑀆𑀤𑀻𑀲𑀼 𑀕𑀘𑁆𑀙𑀦𑁆𑀢𑁄𑀢𑀺 𑀅𑀢𑁆𑀣𑁄. ‘‘𑀲𑀼𑀢𑀥𑀫𑁆𑀫𑀲𑁆𑀲 𑀧𑀲𑁆𑀲𑀢𑁄’’𑀢𑀺𑀆𑀤𑀻𑀲𑀼 (𑀉𑀤𑀸. 𑁧𑁧) 𑀯𑀺𑀲𑁆𑀲𑀼𑀢𑀥𑀫𑁆𑀫𑀲𑁆𑀲𑀸𑀢𑀺 𑀅𑀢𑁆𑀣𑁄. ‘‘𑀅𑀯𑀲𑁆𑀲𑀼𑀢𑀸 𑀅𑀯𑀲𑁆𑀲𑀼𑀢𑀲𑁆𑀲𑀸’’𑀢𑀺𑀆𑀤𑀻𑀲𑀼 (𑀧𑀸𑀘𑀺. 𑁬𑁫𑁭) 𑀓𑀺𑀮𑁂𑀲𑁂𑀦 𑀓𑀺𑀮𑀺𑀦𑁆𑀦𑀸 𑀓𑀺𑀮𑀺𑀦𑁆𑀦𑀲𑁆𑀲𑀸𑀢𑀺 𑀅𑀢𑁆𑀣𑁄. ‘‘𑀢𑀼𑀫𑁆𑀳𑁂𑀳𑀺 𑀧𑀼𑀜𑁆𑀜𑀁 𑀧𑀲𑀼𑀢𑀁 𑀅𑀦𑀧𑁆𑀧𑀓’’𑀦𑁆𑀢𑀺𑀆𑀤𑀻𑀲𑀼 (𑀔𑀼. 𑀧𑀸. 𑁭.𑁧𑁨) 𑀉𑀧𑀘𑀺𑀢𑀦𑁆𑀢𑀺 𑀅𑀢𑁆𑀣𑁄. ‘‘𑀬𑁂 𑀛𑀸𑀦𑀧𑁆𑀧𑀲𑀼𑀢𑀸 𑀥𑀻𑀭𑀸’’𑀢𑀺𑀆𑀤𑀻𑀲𑀼 (𑀥. 𑀧. 𑁧𑁮𑁧) 𑀛𑀸𑀦𑀸𑀦𑀼𑀬𑀼𑀢𑁆𑀢𑀸𑀢𑀺 𑀅𑀢𑁆𑀣𑁄. ‘‘𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁪𑁧) 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀅𑀢𑁆𑀣𑁄. ‘‘𑀲𑀼𑀢𑀥𑀭𑁄 𑀲𑀼𑀢𑀲𑀦𑁆𑀦𑀺𑀘𑀬𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁩𑁩𑁯) 𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑀯𑀺𑀜𑁆𑀜𑀸𑀢𑀥𑀭𑁄𑀢𑀺 𑀅𑀢𑁆𑀣𑁄. 𑀇𑀥 𑀧𑀦𑀲𑁆𑀲 ‘‘𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑁂𑀦 𑀉𑀧𑀥𑀸𑀭𑀺𑀢’’𑀦𑁆𑀢𑀺 𑀯𑀸 ‘‘𑀉𑀧𑀥𑀸𑀭𑀡’’𑀦𑁆𑀢𑀺 𑀯𑀸 𑀅𑀢𑁆𑀣𑁄. 𑀫𑁂-𑀲𑀤𑁆𑀤𑀲𑁆𑀲 𑀳𑀺 𑀫𑀬𑀸𑀢𑀺 𑀅𑀢𑁆𑀣𑁂 𑀲𑀢𑀺 ‘‘𑀏𑀯𑀁 𑀫𑀬𑀸 𑀲𑀼𑀢𑀁 𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑁂𑀦 𑀉𑀧𑀥𑀸𑀭𑀺𑀢’’𑀦𑁆𑀢𑀺 𑀬𑀼𑀚𑁆𑀚𑀢𑀺. 𑀫𑀫𑀸𑀢𑀺 𑀅𑀢𑁆𑀣𑁂 𑀲𑀢𑀺 ‘‘𑀏𑀯𑀁 𑀫𑀫 𑀲𑀼𑀢𑀁 𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑁂𑀦 𑀉𑀧𑀥𑀸𑀭𑀡’’𑀦𑁆𑀢𑀺 𑀬𑀼𑀚𑁆𑀚𑀢𑀺.

𑀏𑀯𑀫𑁂𑀢𑁂𑀲𑀼 𑀢𑀻𑀲𑀼 𑀧𑀤𑁂𑀲𑀼 𑀬𑀲𑁆𑀫𑀸 𑀲𑀼𑀢𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑁂 𑀧𑀬𑀼𑀢𑁆𑀢𑁂𑀦 𑀏𑀯𑀁𑀲𑀤𑁆𑀤𑁂𑀦 𑀲𑀯𑀦𑀓𑀺𑀭𑀺𑀬𑀸𑀚𑁄𑀢𑀓𑁂𑀦 𑀪𑀯𑀺𑀢𑀩𑁆𑀩𑀁, 𑀢𑀲𑁆𑀫𑀸 𑀏𑀯𑀦𑁆𑀢𑀺 𑀲𑁄𑀢𑀯𑀺𑀜𑁆𑀜𑀸𑀡𑀲𑀫𑁆𑀧𑀝𑀺𑀘𑁆𑀙𑀦𑀸𑀤𑀺𑀲𑁄𑀢𑀤𑁆𑀯𑀸𑀭𑀺𑀓𑀯𑀺𑀜𑁆𑀜𑀸𑀡𑀸𑀦𑀦𑁆𑀢𑀭𑀁 𑀉𑀧𑁆𑀧𑀦𑁆𑀦𑀫𑀦𑁄𑀤𑁆𑀯𑀸𑀭𑀺𑀓𑀯𑀺𑀜𑁆𑀜𑀸𑀡𑀓𑀺𑀘𑁆𑀘𑀦𑀺𑀤𑀲𑁆𑀲𑀦𑀁. 𑀫𑁂𑀢𑀺 𑀯𑀼𑀢𑁆𑀢𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑀦𑀺𑀤𑀲𑁆𑀲𑀦𑀁. 𑀲𑀩𑁆𑀩𑀸𑀦𑀺 𑀳𑀺 𑀯𑀸𑀓𑁆𑀬𑀸𑀦𑀺 𑀏𑀯𑀓𑀸𑀭𑀢𑁆𑀣𑀲𑀳𑀺𑀢𑀸𑀦𑀺𑀬𑁂𑀯 𑀅𑀯𑀥𑀸𑀭𑀡𑀨𑀮𑀢𑁆𑀢𑀸 𑀢𑁂𑀲𑀁. 𑀲𑀼𑀢𑀦𑁆𑀢𑀺 𑀅𑀲𑁆𑀲𑀯𑀦𑀪𑀸𑀯𑀧𑁆𑀧𑀝𑀺𑀓𑁆𑀔𑁂𑀧𑀢𑁄 𑀅𑀦𑀽𑀦𑀸𑀦𑀥𑀺𑀓𑀸𑀯𑀺𑀧𑀭𑀻𑀢𑀕𑁆𑀕𑀳𑀡𑀦𑀺𑀤𑀲𑁆𑀲𑀦𑀁. 𑀬𑀣𑀸 𑀳𑀺 𑀲𑀼𑀢𑀁 𑀲𑀼𑀢𑀫𑁂𑀯𑀸𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀺 𑀢𑀣𑀸 𑀢𑀁 𑀲𑀫𑁆𑀫𑀸 𑀲𑀼𑀢𑀁 𑀅𑀦𑀽𑀦𑀕𑁆𑀕𑀳𑀡𑀁 𑀅𑀦𑀥𑀺𑀓𑀕𑁆𑀕𑀳𑀡𑀁 𑀅𑀯𑀺𑀧𑀭𑀻𑀢𑀕𑁆𑀕𑀳𑀡𑀜𑁆𑀘 𑀳𑁄𑀢𑀻𑀢𑀺. 𑀅𑀣 𑀯𑀸 𑀲𑀤𑁆𑀤𑀦𑁆𑀢𑀭𑀢𑁆𑀣𑀸𑀧𑁄𑀳𑀦𑀯𑀲𑁂𑀦 𑀲𑀤𑁆𑀤𑁄 𑀅𑀢𑁆𑀣𑀁 𑀯𑀤𑀢𑀻𑀢𑀺 𑀏𑀢𑀲𑁆𑀫𑀺𑀁 𑀧𑀓𑁆𑀔𑁂 𑀬𑀲𑁆𑀫𑀸 𑀲𑀼𑀢𑀦𑁆𑀢𑀺 𑀏𑀢𑀲𑁆𑀲 𑀅𑀲𑀼𑀢𑀁 𑀦 𑀳𑁄𑀢𑀻𑀢𑀺 𑀅𑀬𑀫𑀢𑁆𑀣𑁄 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀲𑀼𑀢𑀦𑁆𑀢𑀺 𑀅𑀲𑁆𑀲𑀯𑀦𑀪𑀸𑀯𑀧𑁆𑀧𑀝𑀺𑀓𑁆𑀔𑁂𑀧𑀢𑁄 𑀅𑀦𑀽𑀦𑀸𑀦𑀥𑀺𑀓𑀸𑀯𑀺𑀧𑀭𑀻𑀢𑀕𑁆𑀕𑀳𑀡𑀦𑀺𑀤𑀲𑁆𑀲𑀦𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀏𑀯𑀁 𑀫𑁂 𑀲𑀼𑀢𑀁, 𑀦 𑀫𑀬𑀸 𑀇𑀤𑀁 𑀤𑀺𑀝𑁆𑀞𑀁, 𑀦 𑀲𑀬𑀫𑁆𑀪𑀽𑀜𑀸𑀡𑁂𑀦 𑀲𑀘𑁆𑀙𑀺𑀓𑀢𑀁, 𑀦 𑀅𑀜𑁆𑀜𑀣𑀸 𑀯𑀸 𑀉𑀧𑀮𑀤𑁆𑀥𑀁. 𑀅𑀧𑀺 𑀘 𑀲𑀼𑀢𑀁𑀯, 𑀢𑀜𑁆𑀘 𑀔𑁄 𑀲𑀫𑁆𑀫𑀤𑁂𑀯𑀸𑀢𑀺. 𑀅𑀯𑀥𑀸𑀭𑀡𑀢𑁆𑀣𑁂 𑀯𑀸 𑀏𑀯𑀁𑀲𑀤𑁆𑀤𑁂 𑀅𑀬𑀫𑀢𑁆𑀣𑀬𑁄𑀚𑀦𑀸, 𑀢𑀤𑀧𑁂𑀓𑁆𑀔𑀲𑁆𑀲 𑀲𑀼𑀢𑀲𑀤𑁆𑀤𑀲𑁆𑀲 𑀦𑀺𑀬𑀫𑀢𑁆𑀣𑁄 𑀲𑀫𑁆𑀪𑀯𑀢𑀻𑀢𑀺 𑀢𑀤𑀧𑁂𑀓𑁆𑀔𑀲𑁆𑀲 𑀲𑀼𑀢𑀲𑀤𑁆𑀤𑀲𑁆𑀲 𑀅𑀲𑁆𑀲𑀯𑀦𑀪𑀸𑀯𑀧𑁆𑀧𑀝𑀺𑀓𑁆𑀔𑁂𑀧𑁄 𑀅𑀦𑀽𑀦𑀸𑀦𑀥𑀺𑀓𑀸𑀯𑀺𑀧𑀭𑀻𑀢𑀕𑁆𑀕𑀳𑀡𑀦𑀺𑀤𑀲𑁆𑀲𑀦𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀇𑀢𑀺 𑀲𑀯𑀦𑀳𑁂𑀢𑀼𑀲𑀯𑀦𑀯𑀺𑀲𑁂𑀲𑀯𑀲𑁂𑀦𑀧𑀺 𑀲𑀼𑀢𑀲𑀤𑁆𑀤𑀲𑁆𑀲 𑀅𑀢𑁆𑀣𑀬𑁄𑀚𑀦𑀸 𑀓𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀢𑀣𑀸 𑀏𑀯𑀦𑁆𑀢𑀺 𑀢𑀲𑁆𑀲𑀸 𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑁂𑀦 𑀧𑀯𑀢𑁆𑀢𑀸𑀬 𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀦𑀸𑀦𑀢𑁆𑀣𑀩𑁆𑀬𑀜𑁆𑀚𑀦𑀕𑁆𑀕𑀳𑀡𑀢𑁄 𑀦𑀸𑀦𑀧𑁆𑀧𑀓𑀸𑀭𑁂𑀦 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀺𑀪𑀸𑀯𑀧𑁆𑀧𑀓𑀸𑀲𑀦𑀁 𑀆𑀓𑀸𑀭𑀢𑁆𑀣𑁄 𑀏𑀯𑀁𑀲𑀤𑁆𑀤𑁄𑀢𑀺 𑀓𑀭𑀺𑀢𑁆𑀯𑀸. 𑀫𑁂𑀢𑀺 𑀅𑀢𑁆𑀢𑀧𑁆𑀧𑀓𑀸𑀲𑀦𑀁. 𑀲𑀼𑀢𑀦𑁆𑀢𑀺 𑀥𑀫𑁆𑀫𑀧𑁆𑀧𑀓𑀸𑀲𑀦𑀁 𑀬𑀣𑀸𑀯𑀼𑀢𑁆𑀢𑀸𑀬 𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀸𑀭𑀫𑁆𑀫𑀡𑀢𑁆𑀢𑀸. 𑀅𑀬𑀜𑁆𑀳𑁂𑀢𑁆𑀣 𑀲𑀗𑁆𑀔𑁂𑀧𑁄 𑁋 𑀦𑀸𑀦𑀧𑁆𑀧𑀓𑀸𑀭𑁂𑀦 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀸𑀬 𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀓𑀭𑀡𑀪𑀽𑀢𑀸𑀬 𑀫𑀬𑀸 𑀦 𑀅𑀜𑁆𑀜𑀁 𑀓𑀢𑀁, 𑀇𑀤𑀁 𑀧𑀦 𑀓𑀢𑀁, 𑀅𑀬𑀁 𑀥𑀫𑁆𑀫𑁄 𑀲𑀼𑀢𑁄𑀢𑀺.

𑀢𑀣𑀸 𑀏𑀯𑀦𑁆𑀢𑀺 𑀦𑀺𑀤𑀲𑁆𑀲𑀺𑀢𑀩𑁆𑀩𑀧𑁆𑀧𑀓𑀸𑀲𑀦𑀁 𑀦𑀺𑀤𑀲𑁆𑀲𑀦𑀢𑁆𑀣𑁄 𑀏𑀯𑀁𑀲𑀤𑁆𑀤𑁄𑀢𑀺 𑀓𑀢𑁆𑀯𑀸 𑀦𑀺𑀤𑀲𑁆𑀲𑁂𑀢𑀩𑁆𑀩𑀲𑁆𑀲 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀪𑀸𑀯𑀢𑁄. 𑀢𑀲𑁆𑀫𑀸 𑀏𑀯𑀁𑀲𑀤𑁆𑀤𑁂𑀦 𑀲𑀓𑀮𑀫𑁆𑀧𑀺 𑀲𑀼𑀢𑁆𑀢𑀁 𑀧𑀘𑁆𑀘𑀸𑀫𑀝𑁆𑀞𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀫𑁂𑀢𑀺 𑀧𑀼𑀕𑁆𑀕𑀮𑀧𑁆𑀧𑀓𑀸𑀲𑀦𑀁. 𑀲𑀼𑀢𑀦𑁆𑀢𑀺 𑀧𑀼𑀕𑁆𑀕𑀮𑀓𑀺𑀘𑁆𑀘𑀧𑁆𑀧𑀓𑀸𑀲𑀦𑀁. 𑀲𑀼𑀢𑀲𑀤𑁆𑀤𑁂𑀦 𑀳𑀺 𑀮𑀩𑁆𑀪𑀫𑀸𑀦𑀸 𑀲𑀯𑀦𑀓𑀺𑀭𑀺𑀬𑀸 𑀲𑀯𑀦𑀯𑀺𑀜𑁆𑀜𑀸𑀡𑀧𑁆𑀧𑀩𑀦𑁆𑀥𑀧𑁆𑀧𑀝𑀺𑀩𑀤𑁆𑀥𑀸, 𑀢𑀢𑁆𑀣 𑀘 𑀧𑀼𑀕𑁆𑀕𑀮𑀯𑁄𑀳𑀸𑀭𑁄, 𑀦 𑀘 𑀧𑀼𑀕𑁆𑀕𑀮𑀯𑁄𑀳𑀸𑀭𑀭𑀳𑀺𑀢𑁂 𑀥𑀫𑁆𑀫𑀧𑁆𑀧𑀩𑀦𑁆𑀥𑁂 𑀲𑀯𑀦𑀓𑀺𑀭𑀺𑀬𑀸 𑀮𑀩𑁆𑀪𑀢𑀺. 𑀢𑀲𑁆𑀲𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑀁 𑀲𑀼𑀢𑁆𑀢𑀁 𑀦𑀺𑀤𑁆𑀤𑀺𑀲𑀺𑀲𑁆𑀲𑀸𑀫𑀺, 𑀢𑀁 𑀫𑀬𑀸 𑀏𑀯𑀁 𑀲𑀼𑀢𑀦𑁆𑀢𑀺.

𑀢𑀣𑀸 𑀏𑀯𑀦𑁆𑀢𑀺 𑀬𑀲𑁆𑀲 𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀦𑀸𑀦𑀸𑀭𑀫𑁆𑀫𑀡𑀧𑁆𑀧𑀯𑀢𑁆𑀢𑀺𑀬𑀸 𑀦𑀸𑀦𑀢𑁆𑀣𑀩𑁆𑀬𑀜𑁆𑀚𑀦𑀕𑁆𑀕𑀳𑀡𑀁 𑀳𑁄𑀢𑀺, 𑀢𑀲𑁆𑀲 𑀦𑀸𑀦𑀸𑀓𑀸𑀭𑀦𑀺𑀤𑁆𑀤𑁂𑀲𑁄 𑀆𑀓𑀸𑀭𑀢𑁆𑀣𑁄 𑀏𑀯 𑀏𑀯𑀁𑀲𑀤𑁆𑀤𑁄𑀢𑀺 𑀓𑀢𑁆𑀯𑀸. 𑀏𑀯𑀦𑁆𑀢𑀺 𑀳𑀺 𑀅𑀬𑀫𑀸𑀓𑀸𑀭𑀧𑀜𑁆𑀜𑀢𑁆𑀢𑀺 𑀥𑀫𑁆𑀫𑀸𑀦𑀁 𑀢𑀁 𑀢𑀁 𑀧𑀯𑀢𑁆𑀢𑀺𑀆𑀓𑀸𑀭𑀁 𑀉𑀧𑀸𑀤𑀸𑀬 𑀧𑀜𑁆𑀜𑀧𑁂𑀢𑀩𑁆𑀩𑀲𑀪𑀸𑀯𑀢𑁆𑀢𑀸. 𑀫𑁂𑀢𑀺 𑀓𑀢𑁆𑀢𑀼𑀦𑀺𑀤𑁆𑀤𑁂𑀲𑁄. 𑀲𑀼𑀢𑀦𑁆𑀢𑀺 𑀯𑀺𑀲𑀬𑀦𑀺𑀤𑁆𑀤𑁂𑀲𑁄, 𑀲𑁄𑀢𑀩𑁆𑀩𑁄 𑀳𑀺 𑀥𑀫𑁆𑀫𑁄 𑀲𑀯𑀦𑀓𑀺𑀭𑀺𑀬𑀸𑀓𑀢𑁆𑀢𑀼𑀧𑀼𑀕𑁆𑀕𑀮𑀲𑁆𑀲 𑀲𑀯𑀦𑀓𑀺𑀭𑀺𑀬𑀸𑀯𑀲𑁂𑀦 𑀧𑀯𑀢𑁆𑀢𑀺𑀝𑁆𑀞𑀸𑀦𑀁 𑀳𑁄𑀢𑀺. 𑀏𑀢𑁆𑀢𑀸𑀯𑀢𑀸 𑀦𑀸𑀦𑀧𑁆𑀧𑀓𑀸𑀭𑁂𑀦 𑀧𑀯𑀢𑁆𑀢𑁂𑀦 𑀘𑀺𑀢𑁆𑀢𑀲𑀦𑁆𑀢𑀸𑀦𑁂𑀦 𑀢𑀁𑀲𑀫𑀗𑁆𑀕𑀺𑀦𑁄 𑀓𑀢𑁆𑀢𑀼 𑀯𑀺𑀲𑀬𑁂 𑀕𑀳𑀡𑀲𑀦𑁆𑀦𑀺𑀝𑁆𑀞𑀸𑀦𑀁 𑀤𑀲𑁆𑀲𑀺𑀢𑀁 𑀳𑁄𑀢𑀺.

𑀅𑀣 𑀯𑀸 𑀏𑀯𑀦𑁆𑀢𑀺 𑀧𑀼𑀕𑁆𑀕𑀮𑀓𑀺𑀘𑁆𑀘𑀦𑀺𑀤𑁆𑀤𑁂𑀲𑁄, 𑀲𑀼𑀢𑀸𑀦𑀜𑁆𑀳𑀺 𑀥𑀫𑁆𑀫𑀸𑀦𑀁 𑀕𑀳𑀺𑀢𑀸𑀓𑀸𑀭𑀲𑁆𑀲 𑀦𑀺𑀤𑀲𑁆𑀲𑀦𑀲𑁆𑀲 𑀅𑀯𑀥𑀸𑀭𑀡𑀲𑁆𑀲 𑀯𑀸 𑀧𑀓𑀸𑀲𑀦𑀲𑀪𑀸𑀯𑁂𑀦 𑀏𑀯𑀁𑀲𑀤𑁆𑀤𑁂𑀦 𑀢𑀤𑀸𑀓𑀸𑀭𑀸𑀤𑀺𑀥𑀸𑀭𑀡𑀲𑁆𑀲 𑀧𑀼𑀕𑁆𑀕𑀮𑀯𑁄𑀳𑀸𑀭𑀼𑀧𑀸𑀤𑀸𑀦𑀥𑀫𑁆𑀫𑀩𑁆𑀬𑀸𑀧𑀸𑀭𑀪𑀸𑀯𑀢𑁄 𑀧𑀼𑀕𑁆𑀕𑀮𑀓𑀺𑀘𑁆𑀘𑀁𑀦𑀸𑀫 𑀦𑀺𑀤𑁆𑀤𑀺𑀝𑁆𑀞𑀁 𑀳𑁄𑀢𑀻𑀢𑀺. 𑀲𑀼𑀢𑀦𑁆𑀢𑀺 𑀯𑀺𑀜𑁆𑀜𑀸𑀡𑀓𑀺𑀘𑁆𑀘𑀦𑀺𑀤𑁆𑀤𑁂𑀲𑁄, 𑀧𑀼𑀕𑁆𑀕𑀮𑀯𑀸𑀤𑀺𑀦𑁄𑀧𑀺 𑀳𑀺 𑀲𑀯𑀦𑀓𑀺𑀭𑀺𑀬𑀸 𑀯𑀺𑀜𑁆𑀜𑀸𑀡𑀦𑀺𑀭𑀧𑁂𑀓𑁆𑀔𑀸 𑀦 𑀳𑁄𑀢𑀻𑀢𑀺. 𑀫𑁂𑀢𑀺 𑀉𑀪𑀬𑀓𑀺𑀘𑁆𑀘𑀬𑀼𑀢𑁆𑀢𑀧𑀼𑀕𑁆𑀕𑀮𑀦𑀺𑀤𑁆𑀤𑁂𑀲𑁄. 𑀫𑁂𑀢𑀺 𑀳𑀺 𑀲𑀤𑁆𑀤𑀧𑁆𑀧𑀯𑀢𑁆𑀢𑀺 𑀏𑀓𑀦𑁆𑀢𑁂𑀦𑁂𑀯 𑀲𑀢𑁆𑀢𑀯𑀺𑀲𑁂𑀲𑀯𑀺𑀲𑀬𑀸 𑀯𑀺𑀜𑁆𑀜𑀸𑀡𑀓𑀺𑀘𑁆𑀘𑀜𑁆𑀘 𑀢𑀢𑁆𑀣𑁂𑀯 𑀲𑀫𑁄𑀤𑀳𑀺𑀢𑀩𑁆𑀩𑀦𑁆𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑁄 𑁋 𑀫𑀬𑀸 𑀲𑀯𑀦𑀓𑀺𑀘𑁆𑀘𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀺𑀦𑀸 𑀧𑀼𑀕𑁆𑀕𑀮𑁂𑀦 𑀯𑀺𑀜𑁆𑀜𑀸𑀡𑀯𑀲𑁂𑀦 𑀮𑀤𑁆𑀥𑀲𑀯𑀦𑀓𑀺𑀘𑁆𑀘𑀯𑁄𑀳𑀸𑀭𑁂𑀦 𑀲𑀼𑀢𑀦𑁆𑀢𑀺.

𑀢𑀣𑀸 𑀏𑀯𑀦𑁆𑀢𑀺 𑀘 𑀫𑁂𑀢𑀺 𑀘 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑀯𑀲𑁂𑀦 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺. 𑀲𑀩𑁆𑀩𑀲𑁆𑀲 𑀳𑀺 𑀲𑀤𑁆𑀤𑀸𑀥𑀺𑀕𑀫𑀦𑀻𑀬𑀲𑁆𑀲 𑀅𑀢𑁆𑀣𑀲𑁆𑀲 𑀧𑀜𑁆𑀜𑀢𑁆𑀢𑀺𑀫𑀼𑀔𑁂𑀦𑁂𑀯 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀢𑁆𑀢𑀸 𑀲𑀩𑁆𑀩𑀧𑀜𑁆𑀜𑀢𑁆𑀢𑀻𑀦𑀜𑁆𑀘 𑀯𑀺𑀚𑁆𑀚𑀫𑀸𑀦𑀸𑀤𑀻𑀲𑀼 𑀙𑀲𑀼 𑀧𑀜𑁆𑀜𑀢𑁆𑀢𑀻𑀲𑀼 𑀅𑀯𑀭𑁄𑀥𑁄, 𑀢𑀲𑁆𑀫𑀸 𑀬𑁄 𑀫𑀸𑀬𑀸𑀫𑀭𑀻𑀘𑀺𑀆𑀤𑀬𑁄 𑀯𑀺𑀬 𑀅𑀪𑀽𑀢𑀢𑁆𑀣𑁄 𑀅𑀦𑀼𑀲𑁆𑀲𑀯𑀸𑀤𑀻𑀳𑀺 𑀕𑀳𑁂𑀢𑀩𑁆𑀩𑁄 𑀯𑀺𑀬 𑀅𑀦𑀼𑀢𑁆𑀢𑀫𑀢𑁆𑀣𑁄𑀧𑀺 𑀦 𑀳𑁄𑀢𑀺. 𑀲𑁄 𑀭𑀽𑀧𑀲𑀤𑁆𑀤𑀸𑀤𑀺𑀓𑁄 𑀭𑀼𑀧𑁆𑀧𑀦𑀸𑀦𑀼𑀪𑀯𑀦𑀸𑀤𑀺𑀓𑁄 𑀘 𑀧𑀭𑀫𑀢𑁆𑀣𑀲𑀪𑀸𑀯𑁄 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑀯𑀲𑁂𑀦 𑀯𑀺𑀚𑁆𑀚𑀢𑀺. 𑀬𑁄 𑀧𑀦 𑀏𑀯𑀦𑁆𑀢𑀺 𑀘 𑀫𑁂𑀢𑀺 𑀘 𑀯𑀼𑀘𑁆𑀘𑀫𑀸𑀦𑁄 𑀆𑀓𑀸𑀭𑀢𑁆𑀣𑁄, 𑀲𑁄 𑀅𑀧𑀭𑀫𑀢𑁆𑀣𑀲𑀪𑀸𑀯𑁄 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑀯𑀲𑁂𑀦 𑀅𑀦𑀼𑀧𑀮𑀩𑁆𑀪𑀫𑀸𑀦𑁄 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺 𑀦𑀸𑀫. 𑀢𑀲𑁆𑀫𑀸 𑀓𑀺𑀜𑁆𑀳𑁂𑀢𑁆𑀣 𑀢𑀁 𑀧𑀭𑀫𑀢𑁆𑀣𑀢𑁄 𑀅𑀢𑁆𑀣𑀺, 𑀬𑀁 𑀏𑀯𑀦𑁆𑀢𑀺 𑀯𑀸 𑀫𑁂𑀢𑀺 𑀯𑀸 𑀦𑀺𑀤𑁆𑀤𑁂𑀲𑀁 𑀮𑀪𑁂𑀣? 𑀲𑀼𑀢𑀦𑁆𑀢𑀺 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺, 𑀬𑀜𑁆𑀳𑀺 𑀢𑀁 𑀏𑀢𑁆𑀣 𑀲𑁄𑀢𑁂𑀦 𑀉𑀧𑀮𑀤𑁆𑀥𑀁, 𑀢𑀁 𑀧𑀭𑀫𑀢𑁆𑀣𑀢𑁄 𑀯𑀺𑀚𑁆𑀚𑀫𑀸𑀦𑀦𑁆𑀢𑀺.

𑀢𑀣𑀸 𑀏𑀯𑀦𑁆𑀢𑀺 𑀲𑁄𑀢𑀧𑀣𑀫𑀸𑀕𑀢𑁂 𑀥𑀫𑁆𑀫𑁂 𑀉𑀧𑀸𑀤𑀸𑀬 𑀢𑁂𑀲𑀁 𑀉𑀧𑀥𑀸𑀭𑀺𑀢𑀸𑀓𑀸𑀭𑀸𑀤𑀻𑀦𑀁 𑀧𑀘𑁆𑀘𑀸𑀫𑀲𑀦𑀯𑀲𑁂𑀦. 𑀫𑁂𑀢𑀺 𑀲𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑁂 𑀔𑀦𑁆𑀥𑁂 𑀓𑀭𑀡𑀸𑀤𑀺𑀯𑀺𑀲𑁂𑀲𑀯𑀺𑀲𑀺𑀝𑁆𑀞𑁂 𑀉𑀧𑀸𑀤𑀸𑀬 𑀯𑀢𑁆𑀢𑀩𑁆𑀩𑀢𑁄 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺. 𑀲𑀼𑀢𑀦𑁆𑀢𑀺 𑀤𑀺𑀝𑁆𑀞𑀸𑀤𑀻𑀦𑀺 𑀉𑀧𑀦𑀺𑀥𑀸𑀬 𑀯𑀢𑁆𑀢𑀩𑁆𑀩𑀢𑁄 𑀉𑀧𑀦𑀺𑀥𑀸𑀧𑀜𑁆𑀜𑀢𑁆𑀢𑀺. 𑀤𑀺𑀝𑁆𑀞𑀸𑀤𑀺𑀲𑀪𑀸𑀯𑀭𑀳𑀺𑀢𑁂 𑀲𑀤𑁆𑀤𑀸𑀬𑀢𑀦𑁂 𑀧𑀯𑀢𑁆𑀢𑀫𑀸𑀦𑁄𑀧𑀺 𑀲𑀼𑀢𑀯𑁄𑀳𑀸𑀭𑁄 𑀤𑀼𑀢𑀺𑀬𑀁 𑀢𑀢𑀺𑀬𑀦𑁆𑀢𑀺𑀆𑀤𑀺𑀓𑁄 𑀯𑀺𑀬 𑀧𑀞𑀫𑀸𑀤𑀻𑀦𑀺, 𑀤𑀺𑀝𑁆𑀞𑀫𑀼𑀢𑀯𑀺𑀜𑁆𑀜𑀸𑀢𑁂 𑀅𑀧𑁂𑀓𑁆𑀔𑀺𑀢𑁆𑀯𑀸 𑀲𑀼𑀢𑀦𑁆𑀢𑀺 𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀤𑀺𑀝𑁆𑀞𑀸𑀤𑀻𑀦𑀺 𑀉𑀧𑀦𑀺𑀥𑀸𑀬 𑀯𑀢𑁆𑀢𑀩𑁆𑀩𑁄 𑀳𑁄𑀢𑀺. 𑀅𑀲𑀼𑀢𑀁 𑀦 𑀳𑁄𑀢𑀻𑀢𑀺 𑀳𑀺 𑀲𑀼𑀢𑀦𑁆𑀢𑀺 𑀧𑀓𑀸𑀲𑀺𑀢𑁄𑀬𑀫𑀢𑁆𑀣𑁄𑀢𑀺.

𑀏𑀢𑁆𑀣 𑀘 𑀏𑀯𑀦𑁆𑀢𑀺𑀯𑀘𑀦𑁂𑀦 𑀅𑀲𑀫𑁆𑀫𑁄𑀳𑀁 𑀤𑀻𑀧𑁂𑀢𑀺. 𑀧𑀝𑀺𑀯𑀺𑀤𑁆𑀥𑀸 𑀳𑀺 𑀅𑀢𑁆𑀢𑀦𑀸 𑀲𑀼𑀢𑀲𑁆𑀲 𑀧𑀓𑀸𑀭𑀯𑀺𑀲𑁂𑀲𑀸 𑀏𑀯𑀦𑁆𑀢𑀺 𑀇𑀥 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀧𑀘𑁆𑀘𑀸𑀫𑀝𑁆𑀞𑀸, 𑀢𑁂𑀦𑀲𑁆𑀲 𑀅𑀲𑀫𑁆𑀫𑁄𑀳𑁄 𑀤𑀻𑀧𑀺𑀢𑁄 𑀳𑁄𑀢𑀺. 𑀦 𑀳𑀺 𑀲𑀫𑁆𑀫𑀽𑀴𑁆𑀳𑁄 𑀦𑀸𑀦𑀧𑁆𑀧𑀓𑀸𑀭𑀧𑀝𑀺𑀯𑁂𑀥𑀲𑀫𑀢𑁆𑀣𑁄 𑀳𑁄𑀢𑀺, 𑀧𑀘𑁆𑀘𑀬𑀸𑀓𑀸𑀭𑀯𑀲𑁂𑀦 𑀦𑀸𑀦𑀧𑁆𑀧𑀓𑀸𑀭𑀸 𑀤𑀼𑀧𑁆𑀧𑀝𑀺𑀯𑀺𑀤𑁆𑀥𑀸 𑀘 𑀲𑀼𑀢𑁆𑀢𑀦𑁆𑀢𑀸𑀢𑀺 𑀤𑀻𑀧𑀺𑀢𑀦𑁆𑀢𑀺. 𑀲𑀼𑀢𑀦𑁆𑀢𑀺𑀯𑀘𑀦𑁂𑀦 𑀲𑀼𑀢𑀲𑁆𑀲 𑀅𑀲𑀫𑁆𑀫𑁄𑀲𑀁 𑀤𑀻𑀧𑁂𑀢𑀺, 𑀲𑀼𑀢𑀸𑀓𑀸𑀭𑀲𑁆𑀲 𑀬𑀸𑀣𑀸𑀯𑀢𑁄 𑀤𑀲𑁆𑀲𑀺𑀬𑀫𑀸𑀦𑀢𑁆𑀢𑀸. 𑀬𑀲𑁆𑀲 𑀳𑀺 𑀲𑀼𑀢𑀁 𑀲𑀫𑁆𑀫𑀼𑀝𑁆𑀞𑀁 𑀳𑁄𑀢𑀺, 𑀦 𑀲𑁄 𑀓𑀸𑀮𑀦𑁆𑀢𑀭𑁂 𑀫𑀬𑀸 𑀲𑀼𑀢𑀦𑁆𑀢𑀺 𑀧𑀝𑀺𑀚𑀸𑀦𑀸𑀢𑀺. 𑀇𑀘𑁆𑀘𑀲𑁆𑀲 𑀅𑀲𑀫𑁆𑀫𑁄𑀳𑁂𑀦 𑀧𑀜𑁆𑀜𑀸𑀲𑀺𑀤𑁆𑀥𑀺, 𑀲𑀫𑁆𑀫𑁄𑀳𑀸𑀪𑀸𑀯𑁂𑀦 𑀧𑀜𑁆𑀜𑀸𑀬 𑀏𑀯 𑀯𑀸 𑀲𑀯𑀦𑀓𑀸𑀮𑀲𑀫𑁆𑀪𑀽𑀢𑀸𑀬 𑀢𑀤𑀼𑀢𑁆𑀢𑀭𑀺𑀓𑀸𑀮𑀧𑀜𑁆𑀜𑀸𑀲𑀺𑀤𑁆𑀥𑀺, 𑀢𑀣𑀸 𑀅𑀲𑀫𑁆𑀫𑁄𑀲𑁂𑀦 𑀲𑀢𑀺𑀲𑀺𑀤𑁆𑀥𑀺. 𑀢𑀢𑁆𑀣 𑀧𑀜𑁆𑀜𑀸𑀧𑀼𑀩𑁆𑀩𑀗𑁆𑀕𑀫𑀸𑀬 𑀲𑀢𑀺𑀬𑀸 𑀩𑁆𑀬𑀜𑁆𑀚𑀦𑀸𑀯𑀥𑀸𑀭𑀡𑀲𑀫𑀢𑁆𑀣𑀢𑀸. 𑀩𑁆𑀬𑀜𑁆𑀚𑀦𑀸𑀦𑀜𑁆𑀳𑀺 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑁄 𑀆𑀓𑀸𑀭𑁄 𑀦𑀸𑀢𑀺𑀕𑀫𑁆𑀪𑀻𑀭𑁄, 𑀬𑀣𑀸𑀲𑀼𑀢𑀁 𑀥𑀸𑀭𑀡𑀫𑁂𑀯 𑀢𑀢𑁆𑀣 𑀓𑀭𑀡𑀻𑀬𑀦𑁆𑀢𑀺 𑀲𑀢𑀺𑀬𑀸 𑀩𑁆𑀬𑀸𑀧𑀸𑀭𑁄 𑀅𑀥𑀺𑀓𑁄, 𑀧𑀜𑁆𑀜𑀸 𑀢𑀢𑁆𑀣 𑀕𑀼𑀡𑀻𑀪𑀽𑀢𑀸 𑀳𑁄𑀢𑀺 𑀧𑀜𑁆𑀜𑀸𑀬 𑀧𑀼𑀩𑁆𑀩𑀗𑁆𑀕𑀫𑀸𑀢𑀺 𑀓𑀢𑁆𑀯𑀸. 𑀲𑀢𑀺𑀧𑀼𑀩𑁆𑀩𑀗𑁆𑀕𑀫𑀸𑀬 𑀧𑀜𑁆𑀜𑀸𑀬 𑀅𑀢𑁆𑀣𑀧𑁆𑀧𑀝𑀺𑀯𑁂𑀥𑀲𑀫𑀢𑁆𑀣𑀢𑀸. 𑀅𑀢𑁆𑀣𑀲𑁆𑀲 𑀳𑀺 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑁄 𑀆𑀓𑀸𑀭𑁄 𑀕𑀫𑁆𑀪𑀻𑀭𑁄𑀢𑀺 𑀧𑀜𑁆𑀜𑀸𑀬 𑀩𑁆𑀬𑀸𑀧𑀸𑀭𑁄 𑀅𑀥𑀺𑀓𑁄, 𑀲𑀢𑀺 𑀢𑀢𑁆𑀣 𑀕𑀼𑀡𑀻𑀪𑀽𑀢𑀸𑀬𑁂𑀯𑀸𑀢𑀺 𑀲𑀢𑀺𑀬𑀸 𑀧𑀼𑀩𑁆𑀩𑀗𑁆𑀕𑀫𑀸𑀬𑀸𑀢𑀺 𑀓𑀢𑁆𑀯𑀸. 𑀢𑀤𑀼𑀪𑀬𑀲𑀫𑀢𑁆𑀣𑀢𑀸𑀬𑁄𑀕𑁂𑀦 𑀅𑀢𑁆𑀣𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑀲𑁆𑀲 𑀥𑀫𑁆𑀫𑀓𑁄𑀲𑀲𑁆𑀲 𑀅𑀦𑀼𑀧𑀸𑀮𑀦𑀲𑀫𑀢𑁆𑀣𑀢𑀸𑀬 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑀢𑁆𑀢𑀲𑀺𑀤𑁆𑀥𑀺.

𑀅𑀧𑀭𑁄 𑀦𑀬𑁄 𑁋 𑀏𑀯𑀦𑁆𑀢𑀺𑀯𑀘𑀦𑁂𑀦 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀤𑀻𑀧𑁂𑀢𑀺, 𑀢𑁂𑀦 𑀘 𑀯𑀼𑀘𑁆𑀘𑀫𑀸𑀦𑀸𑀦𑀁 𑀆𑀓𑀸𑀭𑀦𑀺𑀤𑀲𑁆𑀲𑀦𑀸𑀯𑀥𑀸𑀭𑀡𑀢𑁆𑀣𑀸𑀦𑀁 𑀉𑀧𑀭𑀺 𑀯𑀓𑁆𑀔𑀫𑀸𑀦𑀸𑀦𑀁 𑀦𑀸𑀦𑀧𑁆𑀧𑀓𑀸𑀭𑀧𑁆𑀧𑀝𑀺𑀯𑁂𑀥𑀚𑁄𑀢𑀓𑀸𑀦𑀁 𑀅𑀯𑀺𑀧𑀭𑀻𑀢𑀲𑀺𑀤𑁆𑀥𑀺 𑀥𑀫𑁆𑀫𑀯𑀺𑀲𑀬𑀢𑁆𑀢𑀸. 𑀦 𑀳𑀺 𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀭𑁄𑀢𑁄 𑀦𑀸𑀦𑀧𑁆𑀧𑀓𑀸𑀭𑀧𑁆𑀧𑀝𑀺𑀯𑁂𑀥𑁄 𑀲𑀫𑁆𑀪𑀯𑀢𑀺. 𑀲𑀼𑀢𑀦𑁆𑀢𑀺𑀯𑀘𑀦𑁂𑀦 𑀅𑀯𑀺𑀓𑁆𑀔𑁂𑀧𑀁 𑀤𑀻𑀧𑁂𑀢𑀺, ‘‘𑀧𑀞𑀫𑀩𑁄𑀥𑀺𑀲𑀼𑀢𑁆𑀢𑀁 𑀓𑀢𑁆𑀣 𑀪𑀸𑀲𑀺𑀢’’𑀦𑁆𑀢𑀺𑀆𑀤𑀺𑀧𑀼𑀘𑁆𑀙𑀸𑀯𑀲𑁂𑀦 𑀧𑀓𑀭𑀡𑀧𑀢𑁆𑀢𑀲𑁆𑀲 𑀯𑀓𑁆𑀔𑀫𑀸𑀦𑀲𑁆𑀲 𑀲𑀼𑀢𑁆𑀢𑀲𑁆𑀲 𑀲𑀯𑀦𑀁 𑀲𑀫𑀸𑀥𑀸𑀦𑀫𑀦𑁆𑀢𑀭𑁂𑀦 𑀦 𑀲𑀫𑁆𑀪𑀯𑀢𑀺 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀲𑁆𑀲 𑀲𑀯𑀦𑀸𑀪𑀸𑀯𑀢𑁄. 𑀢𑀣𑀸 𑀳𑀺 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀧𑀼𑀕𑁆𑀕𑀮𑁄 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑀸 𑀯𑀼𑀘𑁆𑀘𑀫𑀸𑀦𑁄𑀧𑀺 ‘‘𑀦 𑀫𑀬𑀸 𑀲𑀼𑀢𑀁, 𑀧𑀼𑀦 𑀪𑀡𑀣𑀸’’𑀢𑀺 𑀪𑀡𑀢𑀺. 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀘𑁂𑀢𑁆𑀣 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀺𑀁 𑀧𑀼𑀩𑁆𑀩𑁂 𑀘 𑀓𑀢𑀧𑀼𑀜𑁆𑀜𑀢𑀁 𑀲𑀸𑀥𑁂𑀢𑀺 𑀲𑀫𑁆𑀫𑀸 𑀅𑀧𑁆𑀧𑀡𑀺𑀳𑀺𑀢𑀢𑁆𑀢𑀲𑁆𑀲 𑀧𑀼𑀩𑁆𑀩𑁂 𑀅𑀓𑀢𑀧𑀼𑀜𑁆𑀜𑀲𑁆𑀲 𑀯𑀸 𑀢𑀤𑀪𑀸𑀯𑀢𑁄. 𑀅𑀯𑀺𑀓𑁆𑀔𑁂𑀧𑁂𑀦 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀁 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀜𑁆𑀘 𑀲𑀸𑀥𑁂𑀢𑀺 𑀅𑀲𑁆𑀲𑀼𑀢𑀯𑀢𑁄 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀯𑀺𑀭𑀳𑀺𑀢𑀲𑁆𑀲 𑀘 𑀢𑀤𑀪𑀸𑀯𑀢𑁄. 𑀦 𑀳𑀺 𑀯𑀺𑀓𑁆𑀔𑀺𑀢𑁆𑀢𑁄 𑀲𑁄𑀢𑀼𑀁 𑀲𑀓𑁆𑀓𑁄𑀢𑀺, 𑀦 𑀘 𑀲𑀧𑁆𑀧𑀼𑀭𑀺𑀲𑁂 𑀅𑀦𑀼𑀧𑀦𑀺𑀲𑁆𑀲𑀬𑀫𑀸𑀦𑀲𑁆𑀲 𑀲𑀯𑀦𑀁 𑀅𑀢𑁆𑀣𑀻𑀢𑀺.

𑀅𑀧𑀭𑁄 𑀦𑀬𑁄 𑁋 ‘‘𑀬𑀲𑁆𑀲 𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀦𑀸𑀦𑀧𑁆𑀧𑀓𑀸𑀭𑀧𑁆𑀧𑀯𑀢𑁆𑀢𑀺𑀬𑀸 𑀦𑀸𑀦𑀢𑁆𑀣𑀩𑁆𑀬𑀜𑁆𑀚𑀦𑀕𑁆𑀕𑀳𑀡𑀁 𑀳𑁄𑀢𑀺, 𑀢𑀲𑁆𑀲 𑀦𑀸𑀦𑀸𑀓𑀸𑀭𑀦𑀺𑀤𑁆𑀤𑁂𑀲𑁄’’𑀢𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀘 𑀲𑁄 𑀪𑀕𑀯𑀢𑁄 𑀯𑀘𑀦𑀲𑁆𑀲 𑀅𑀢𑁆𑀣𑀩𑁆𑀬𑀜𑁆𑀚𑀦𑀧𑁆𑀧𑀪𑁂𑀤𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀲𑀓𑀮𑀲𑀸𑀲𑀦𑀲𑀫𑁆𑀧𑀢𑁆𑀢𑀺𑀑𑀕𑀸𑀳𑀦𑁂𑀦 𑀦𑀺𑀭𑀯𑀲𑁂𑀲𑀁 𑀧𑀭𑀳𑀺𑀢𑀧𑀸𑀭𑀺𑀧𑀽𑀭𑀻𑀓𑀭𑀡𑀪𑀽𑀢𑁄 𑀏𑀯𑀁 𑀪𑀤𑁆𑀤𑀓𑁄 𑀆𑀓𑀸𑀭𑁄 𑀦 𑀲𑀫𑁆𑀫𑀸 𑀅𑀧𑁆𑀧𑀡𑀺𑀳𑀺𑀢𑀢𑁆𑀢𑀲𑁆𑀲 𑀧𑀼𑀩𑁆𑀩𑁂 𑀅𑀓𑀢𑀧𑀼𑀜𑁆𑀜𑀲𑁆𑀲 𑀯𑀸 𑀳𑁄𑀢𑀺. 𑀢𑀲𑁆𑀫𑀸 𑀏𑀯𑀦𑁆𑀢𑀺 𑀇𑀫𑀺𑀦𑀸 𑀪𑀤𑁆𑀤𑀓𑁂𑀦 𑀆𑀓𑀸𑀭𑁂𑀦 𑀧𑀘𑁆𑀙𑀺𑀫𑀘𑀓𑁆𑀓𑀤𑁆𑀯𑀬𑀲𑀫𑁆𑀧𑀢𑁆𑀢𑀺𑀫𑀢𑁆𑀢𑀦𑁄 𑀤𑀻𑀧𑁂𑀢𑀺, 𑀲𑀼𑀢𑀦𑁆𑀢𑀺 𑀲𑀯𑀦𑀬𑁄𑀕𑁂𑀦 𑀧𑀼𑀭𑀺𑀫𑀘𑀓𑁆𑀓𑀤𑁆𑀯𑀬𑀲𑀫𑁆𑀧𑀢𑁆𑀢𑀺𑀁. 𑀦 𑀳𑀺 𑀅𑀧𑁆𑀧𑀢𑀺𑀭𑀽𑀧𑁂 𑀤𑁂𑀲𑁂 𑀯𑀲𑀢𑁄 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀯𑀺𑀭𑀳𑀺𑀢𑀲𑁆𑀲 𑀘 𑀲𑀯𑀦𑀁 𑀅𑀢𑁆𑀣𑀺. 𑀇𑀘𑁆𑀘𑀲𑁆𑀲 𑀧𑀘𑁆𑀙𑀺𑀫𑀘𑀓𑁆𑀓𑀤𑁆𑀯𑀬𑀲𑀺𑀤𑁆𑀥𑀺𑀬𑀸 𑀆𑀲𑀬𑀲𑀼𑀤𑁆𑀥𑀺 𑀲𑀺𑀤𑁆𑀥𑀸 𑀳𑁄𑀢𑀺. 𑀲𑀫𑁆𑀫𑀸 𑀧𑀡𑀺𑀳𑀺𑀢𑀘𑀺𑀢𑁆𑀢𑁄 𑀧𑀼𑀩𑁆𑀩𑁂 𑀘 𑀓𑀢𑀧𑀼𑀜𑁆𑀜𑁄 𑀯𑀺𑀲𑀼𑀤𑁆𑀥𑀸𑀲𑀬𑁄 𑀳𑁄𑀢𑀺 𑀢𑀤𑀲𑀼𑀤𑁆𑀥𑀺𑀳𑁂𑀢𑀽𑀦𑀁 𑀓𑀺𑀮𑁂𑀲𑀸𑀦𑀁 𑀤𑀽𑀭𑀻𑀪𑀸𑀯𑀢𑁄. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀲𑀫𑁆𑀫𑀸 𑀧𑀡𑀺𑀳𑀺𑀢𑀁 𑀘𑀺𑀢𑁆𑀢𑀁, 𑀲𑁂𑀬𑁆𑀬𑀲𑁄 𑀦𑀁 𑀢𑀢𑁄 𑀓𑀭𑁂’’𑀢𑀺 (𑀥. 𑀧. 𑁪𑁩) ‘‘𑀓𑀢𑀧𑀼𑀜𑁆𑀜𑁄𑀲𑀺 𑀢𑁆𑀯𑀁, 𑀆𑀦𑀦𑁆𑀤, 𑀧𑀥𑀸𑀦𑀫𑀦𑀼𑀬𑀼𑀜𑁆𑀚, 𑀔𑀺𑀧𑁆𑀧𑀁 𑀳𑁄𑀳𑀺𑀲𑀺 𑀅𑀦𑀸𑀲𑀯𑁄’’𑀢𑀺 (𑀤𑀻. 𑀦𑀺. 𑁨.𑁨𑁦𑁭) 𑀘. 𑀧𑀼𑀭𑀺𑀫𑀘𑀓𑁆𑀓𑀤𑁆𑀯𑀬𑀲𑀺𑀤𑁆𑀥𑀺𑀬𑀸 𑀧𑀬𑁄𑀕𑀲𑀼𑀤𑁆𑀥𑀺. 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑁂𑀦 𑀳𑀺 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑁂𑀦 𑀘 𑀲𑀸𑀥𑀽𑀦𑀁 𑀤𑀺𑀝𑁆𑀞𑀸𑀦𑀼𑀕𑀢𑀺𑀆𑀧𑀚𑁆𑀚𑀦𑁂𑀦 𑀧𑀭𑀺𑀲𑀼𑀤𑁆𑀥𑀧𑁆𑀧𑀬𑁄𑀕𑁄 𑀳𑁄𑀢𑀺. 𑀢𑀸𑀬 𑀘 𑀆𑀲𑀬𑀲𑀼𑀤𑁆𑀥𑀺𑀬𑀸 𑀅𑀥𑀺𑀕𑀫𑀩𑁆𑀬𑀢𑁆𑀢𑀺𑀲𑀺𑀤𑁆𑀥𑀺, 𑀧𑀼𑀩𑁆𑀩𑁂𑀬𑁂𑀯 𑀢𑀡𑁆𑀳𑀸𑀤𑀺𑀝𑁆𑀞𑀺𑀲𑀁𑀓𑀺𑀮𑁂𑀲𑀸𑀦𑀁 𑀯𑀺𑀲𑁄𑀥𑀺𑀢𑀢𑁆𑀢𑀸 𑀧𑀬𑁄𑀕𑀲𑀼𑀤𑁆𑀥𑀺𑀬𑀸 𑀆𑀕𑀫𑀩𑁆𑀬𑀢𑁆𑀢𑀺𑀲𑀺𑀤𑁆𑀥𑀺. 𑀲𑀼𑀧𑀭𑀺𑀲𑀼𑀤𑁆𑀥𑀓𑀸𑀬𑀯𑀘𑀻𑀧𑀬𑁄𑀕𑁄 𑀳𑀺 𑀯𑀺𑀧𑁆𑀧𑀝𑀺𑀲𑀸𑀭𑀸𑀪𑀸𑀯𑀢𑁄 𑀅𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀧𑀭𑀺𑀬𑀢𑁆𑀢𑀺𑀬𑀁 𑀯𑀺𑀲𑀸𑀭𑀤𑁄 𑀳𑁄𑀢𑀺. 𑀇𑀢𑀺 𑀧𑀬𑁄𑀕𑀸𑀲𑀬𑀲𑀼𑀤𑁆𑀥𑀲𑁆𑀲 𑀆𑀕𑀫𑀸𑀥𑀺𑀕𑀫𑀲𑀫𑁆𑀧𑀦𑁆𑀦𑀲𑁆𑀲 𑀯𑀘𑀦𑀁 𑀅𑀭𑀼𑀡𑀼𑀕𑁆𑀕𑀫𑀦𑀁 𑀯𑀺𑀬 𑀲𑀽𑀭𑀺𑀬𑀲𑁆𑀲 𑀉𑀤𑀬𑀢𑁄 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀯𑀺𑀬 𑀘 𑀓𑀼𑀲𑀮𑀓𑀫𑁆𑀫𑀲𑁆𑀲 𑀅𑀭𑀳𑀢𑀺 𑀪𑀕𑀯𑀢𑁄 𑀯𑀘𑀦𑀲𑁆𑀲 𑀧𑀼𑀩𑁆𑀩𑀗𑁆𑀕𑀫𑀁 𑀪𑀯𑀺𑀢𑀼𑀦𑁆𑀢𑀺 𑀞𑀸𑀦𑁂 𑀦𑀺𑀤𑀸𑀦𑀁 𑀞𑀧𑁂𑀦𑁆𑀢𑁄 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺𑀆𑀤𑀺𑀫𑀸𑀳.

𑀅𑀧𑀭𑁄 𑀦𑀬𑁄 𑁋 𑀏𑀯𑀦𑁆𑀢𑀺 𑀇𑀫𑀺𑀦𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀦𑀸𑀦𑀧𑁆𑀧𑀓𑀸𑀭𑀧𑁆𑀧𑀝𑀺𑀯𑁂𑀥𑀤𑀻𑀧𑀓𑁂𑀦 𑀯𑀘𑀦𑁂𑀦 𑀅𑀢𑁆𑀢𑀦𑁄 𑀅𑀢𑁆𑀣𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀲𑀫𑁆𑀧𑀢𑁆𑀢𑀺𑀲𑀩𑁆𑀪𑀸𑀯𑀁 𑀤𑀻𑀧𑁂𑀢𑀺. 𑀲𑀼𑀢𑀦𑁆𑀢𑀺 𑀇𑀫𑀺𑀦𑀸 𑀏𑀯𑀁𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑀢𑁄 𑀯𑀓𑁆𑀔𑀫𑀸𑀦𑀸𑀧𑁂𑀓𑁆𑀔𑀸𑀬 𑀯𑀸 𑀲𑁄𑀢𑀩𑁆𑀩𑀪𑁂𑀤𑀧𑁆𑀧𑀝𑀺𑀯𑁂𑀥𑀤𑀻𑀧𑀓𑁂𑀦 𑀥𑀫𑁆𑀫𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸𑀲𑀫𑁆𑀧𑀢𑁆𑀢𑀺𑀲𑀩𑁆𑀪𑀸𑀯𑀁 𑀤𑀻𑀧𑁂𑀢𑀺. 𑀏𑀯𑀦𑁆𑀢𑀺 𑀘 𑀇𑀤𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀤𑀻𑀧𑀓𑀯𑀘𑀦𑀁 𑀪𑀸𑀲𑀫𑀸𑀦𑁄 ‘‘𑀏𑀢𑁂 𑀥𑀫𑁆𑀫𑀸 𑀫𑀬𑀸 𑀫𑀦𑀲𑀸𑀦𑀼𑀧𑁂𑀓𑁆𑀔𑀺𑀢𑀸 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸’’𑀢𑀺 𑀤𑀻𑀧𑁂𑀢𑀺. 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄 𑀳𑀺 ‘‘𑀇𑀥 𑀲𑀻𑀮𑀁 𑀓𑀣𑀺𑀢𑀁, 𑀇𑀥 𑀲𑀫𑀸𑀥𑀺, 𑀇𑀥 𑀧𑀜𑁆𑀜𑀸, 𑀏𑀢𑁆𑀢𑀓𑀸 𑀏𑀢𑁆𑀣 𑀅𑀦𑀼𑀲𑀦𑁆𑀥𑀺𑀬𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀫𑀦𑀲𑀸 𑀅𑀦𑀼𑀧𑁂𑀓𑁆𑀔𑀺𑀢𑁄 𑀅𑀦𑀼𑀲𑁆𑀲𑀯𑀸𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑀲𑀳𑀺𑀢𑀸𑀬 𑀥𑀫𑁆𑀫𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀪𑀽𑀢𑀸𑀬 𑀜𑀸𑀢𑀧𑀭𑀺𑀜𑁆𑀜𑀸𑀲𑀗𑁆𑀔𑀸𑀢𑀸𑀬 𑀯𑀸 𑀤𑀺𑀝𑁆𑀞𑀺𑀬𑀸 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀭𑀽𑀧𑀸𑀭𑀽𑀧𑀥𑀫𑁆𑀫𑁂 ‘‘𑀇𑀢𑀺 𑀭𑀽𑀧𑀁, 𑀏𑀢𑁆𑀢𑀓𑀁 𑀭𑀽𑀧’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀼𑀝𑁆𑀞𑀼 𑀯𑀯𑀢𑁆𑀣𑀧𑁂𑀢𑁆𑀯𑀸 𑀧𑀝𑀺𑀯𑀺𑀤𑁆𑀥𑁄 𑀅𑀢𑁆𑀢𑀦𑁄 𑀘 𑀧𑀭𑁂𑀲𑀜𑁆𑀘 𑀳𑀺𑀢𑀲𑀼𑀔𑀸𑀯𑀳𑁄 𑀳𑁄𑀢𑀻𑀢𑀺. 𑀲𑀼𑀢𑀦𑁆𑀢𑀺 𑀇𑀤𑀁 𑀲𑀯𑀦𑀬𑁄𑀕𑀤𑀻𑀧𑀓𑀯𑀘𑀦𑀁 𑀪𑀸𑀲𑀫𑀸𑀦𑁄 ‘‘𑀩𑀳𑀽 𑀫𑀬𑀸 𑀥𑀫𑁆𑀫𑀸 𑀲𑀼𑀢𑀸 𑀥𑀸𑀢𑀸 𑀯𑀘𑀲𑀸 𑀧𑀭𑀺𑀘𑀺𑀢𑀸’’𑀢𑀺 𑀤𑀻𑀧𑁂𑀢𑀺. 𑀲𑁄𑀢𑀸𑀯𑀥𑀸𑀦𑀧𑁆𑀧𑀝𑀺𑀩𑀤𑁆𑀥𑀸 𑀳𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀲𑁆𑀲 𑀲𑀯𑀦𑀥𑀸𑀭𑀡𑀧𑀭𑀺𑀘𑀬𑀸. 𑀢𑀤𑀼𑀪𑀬𑁂𑀦𑀧𑀺 𑀥𑀫𑁆𑀫𑀲𑁆𑀲 𑀲𑁆𑀯𑀸𑀓𑁆𑀔𑀸𑀢𑀪𑀸𑀯𑁂𑀦, 𑀅𑀢𑁆𑀣𑀩𑁆𑀬𑀜𑁆𑀚𑀦𑀧𑀸𑀭𑀺𑀧𑀽𑀭𑀺𑀁 𑀤𑀻𑀧𑁂𑀦𑁆𑀢𑁄 𑀲𑀯𑀦𑁂 𑀆𑀤𑀭𑀁 𑀚𑀦𑁂𑀢𑀺. 𑀅𑀢𑁆𑀣𑀩𑁆𑀬𑀜𑁆𑀚𑀦𑀧𑀭𑀺𑀧𑀼𑀡𑁆𑀡𑀜𑁆𑀳𑀺 𑀥𑀫𑁆𑀫𑀁 𑀆𑀤𑀭𑁂𑀦 𑀅𑀲𑁆𑀲𑀼𑀡𑀦𑁆𑀢𑁄 𑀫𑀳𑀢𑀸 𑀳𑀺𑀢𑀸 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀻𑀢𑀺 𑀆𑀤𑀭𑀁 𑀚𑀦𑁂𑀢𑁆𑀯𑀸 𑀲𑀓𑁆𑀓𑀘𑁆𑀘𑀁 𑀥𑀫𑁆𑀫𑁄 𑀲𑁄𑀢𑀩𑁆𑀩𑁄.

‘‘𑀏𑀯𑀁 𑀫𑁂 𑀲𑀼𑀢’’𑀦𑁆𑀢𑀺 𑀇𑀫𑀺𑀦𑀸 𑀧𑀦 𑀲𑀓𑀮𑁂𑀦 𑀯𑀘𑀦𑁂𑀦 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀁 𑀥𑀫𑁆𑀫𑀁 𑀅𑀢𑁆𑀢𑀦𑁄 𑀅𑀤𑀳𑀦𑁆𑀢𑁄 𑀅𑀲𑀧𑁆𑀧𑀼𑀭𑀺𑀲𑀪𑀽𑀫𑀺𑀁 𑀅𑀢𑀺𑀓𑁆𑀓𑀫𑀢𑀺, 𑀲𑀸𑀯𑀓𑀢𑁆𑀢𑀁 𑀧𑀝𑀺𑀚𑀸𑀦𑀦𑁆𑀢𑁄 𑀲𑀧𑁆𑀧𑀼𑀭𑀺𑀲𑀪𑀽𑀫𑀺𑀁 𑀑𑀓𑁆𑀓𑀫𑀢𑀺. 𑀢𑀣𑀸 𑀅𑀲𑀤𑁆𑀥𑀫𑁆𑀫𑀸 𑀘𑀺𑀢𑁆𑀢𑀁 𑀯𑀼𑀝𑁆𑀞𑀸𑀧𑁂𑀢𑀺, 𑀲𑀤𑁆𑀥𑀫𑁆𑀫𑁂 𑀘𑀺𑀢𑁆𑀢𑀁 𑀧𑀢𑀺𑀝𑁆𑀞𑀸𑀧𑁂𑀢𑀺. ‘‘𑀓𑁂𑀯𑀮𑀁 𑀲𑀼𑀢𑀫𑁂𑀯𑁂𑀢𑀁 𑀫𑀬𑀸, 𑀢𑀲𑁆𑀲𑁂𑀯 𑀧𑀦 𑀪𑀕𑀯𑀢𑁄 𑀯𑀘𑀦’’𑀦𑁆𑀢𑀺 𑀤𑀻𑀧𑁂𑀦𑁆𑀢𑁄 𑀅𑀢𑁆𑀢𑀸𑀦𑀁 𑀧𑀭𑀺𑀫𑁄𑀘𑁂𑀢𑀺, 𑀲𑀢𑁆𑀣𑀸𑀭𑀁 𑀅𑀧𑀤𑀺𑀲𑀢𑀺, 𑀚𑀺𑀦𑀯𑀘𑀦𑀁 𑀅𑀧𑁆𑀧𑁂𑀢𑀺, 𑀥𑀫𑁆𑀫𑀦𑁂𑀢𑁆𑀢𑀺𑀁 𑀧𑀢𑀺𑀝𑁆𑀞𑀸𑀧𑁂𑀢𑀺.

𑀅𑀧𑀺𑀘 ‘‘𑀏𑀯𑀁 𑀫𑁂 𑀲𑀼𑀢’’𑀦𑁆𑀢𑀺 𑀅𑀢𑁆𑀢𑀦𑀸 𑀉𑀧𑁆𑀧𑀸𑀤𑀺𑀢𑀪𑀸𑀯𑀁 𑀅𑀧𑁆𑀧𑀝𑀺𑀚𑀸𑀦𑀦𑁆𑀢𑁄 𑀧𑀼𑀭𑀺𑀫𑀲𑁆𑀲𑀯𑀦𑀁 𑀯𑀺𑀯𑀭𑀦𑁆𑀢𑁄 ‘‘𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀫𑀺𑀤𑀁 𑀫𑀬𑀸 𑀢𑀲𑁆𑀲 𑀪𑀕𑀯𑀢𑁄 𑀘𑀢𑀼𑀯𑁂𑀲𑀸𑀭𑀚𑁆𑀚𑀯𑀺𑀲𑀸𑀭𑀤𑀲𑁆𑀲 𑀤𑀲𑀩𑀮𑀥𑀭𑀲𑁆𑀲 𑀆𑀲𑀪𑀝𑁆𑀞𑀸𑀦𑀝𑁆𑀞𑀸𑀬𑀺𑀦𑁄 𑀲𑀻𑀳𑀦𑀸𑀤𑀦𑀸𑀤𑀺𑀦𑁄 𑀲𑀩𑁆𑀩𑀲𑀢𑁆𑀢𑀼𑀢𑁆𑀢𑀫𑀲𑁆𑀲 𑀥𑀫𑁆𑀫𑀺𑀲𑁆𑀲𑀭𑀲𑁆𑀲 𑀥𑀫𑁆𑀫𑀭𑀸𑀚𑀲𑁆𑀲 𑀥𑀫𑁆𑀫𑀸𑀥𑀺𑀧𑀢𑀺𑀦𑁄 𑀥𑀫𑁆𑀫𑀤𑀻𑀧𑀲𑁆𑀲 𑀥𑀫𑁆𑀫𑀲𑀭𑀡𑀲𑁆𑀲 𑀲𑀤𑁆𑀥𑀫𑁆𑀫𑀯𑀭𑀘𑀓𑁆𑀓𑀯𑀢𑁆𑀢𑀺𑀦𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲, 𑀦 𑀏𑀢𑁆𑀣 𑀅𑀢𑁆𑀣𑁂 𑀯𑀸 𑀥𑀫𑁆𑀫𑁂 𑀯𑀸 𑀧𑀤𑁂 𑀯𑀸 𑀩𑁆𑀬𑀜𑁆𑀚𑀦𑁂 𑀯𑀸 𑀓𑀗𑁆𑀔𑀸 𑀯𑀸 𑀯𑀺𑀫𑀢𑀺 𑀯𑀸 𑀓𑀢𑁆𑀢𑀩𑁆𑀩𑀸’’𑀢𑀺 𑀲𑀩𑁆𑀩𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀇𑀫𑀲𑁆𑀫𑀺𑀁 𑀥𑀫𑁆𑀫𑁂 𑀅𑀲𑁆𑀲𑀤𑁆𑀥𑀺𑀬𑀁 𑀯𑀺𑀦𑀸𑀲𑁂𑀢𑀺, 𑀲𑀤𑁆𑀥𑀸𑀲𑀫𑁆𑀧𑀤𑀁 𑀉𑀧𑁆𑀧𑀸𑀤𑁂𑀢𑀺. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀯𑀺𑀦𑀸𑀲𑀬𑀢𑀺 𑀅𑀲𑁆𑀲𑀤𑁆𑀥𑀁, 𑀲𑀤𑁆𑀥𑀁 𑀯𑀟𑁆𑀠𑁂𑀢𑀺 𑀲𑀸𑀲𑀦𑁂;

𑀏𑀯𑀁 𑀫𑁂 𑀲𑀼𑀢𑀫𑀺𑀘𑁆𑀘𑁂𑀯𑀁, 𑀯𑀤𑀁 𑀕𑁄𑀢𑀫𑀲𑀸𑀯𑀓𑁄’’𑀢𑀺.

𑀏𑀓𑀦𑁆𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑀦𑀺𑀤𑁆𑀤𑁂𑀲𑁄. 𑀅𑀬𑀜𑁆𑀳𑀺 𑀏𑀓𑀲𑀤𑁆𑀤𑁄 𑀅𑀜𑁆𑀜𑀲𑁂𑀝𑁆𑀞𑀸𑀲𑀳𑀸𑀬𑀲𑀗𑁆𑀔𑁆𑀬𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀢𑀣𑀸 𑀳𑀺 𑀅𑀬𑀁 ‘‘𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜𑀦𑁆𑀢𑀺 𑀇𑀢𑁆𑀣𑁂𑀓𑁂 𑀅𑀪𑀺𑀯𑀤𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁨𑁭; 𑀉𑀤𑀸. 𑁫𑁫) 𑀅𑀜𑁆𑀜𑁂 𑀤𑀺𑀲𑁆𑀲𑀢𑀺. ‘‘𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯’’𑀦𑁆𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁧𑁧; 𑀤𑀻. 𑀦𑀺. 𑁧.𑁨𑁨𑁮) 𑀲𑁂𑀝𑁆𑀞𑁂. ‘‘𑀏𑀓𑁄 𑀯𑀽𑀧𑀓𑀝𑁆𑀞𑁄’’𑀢𑀺𑀆𑀤𑀻𑀲𑀼 (𑀘𑀽𑀴𑀯. 𑁪𑁪𑁫; 𑀤𑀻. 𑀦𑀺. 𑁧.𑁪𑁦𑁫) 𑀅𑀲𑀳𑀸𑀬𑁂. ‘‘𑀏𑀓𑁄𑀯 𑀔𑁄, 𑀪𑀺𑀓𑁆𑀔𑀯𑁂, 𑀔𑀡𑁄 𑀘 𑀲𑀫𑀬𑁄 𑀘 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀸𑀬𑀸’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁮.𑁨𑁯) 𑀲𑀗𑁆𑀔𑁆𑀬𑀸𑀬𑀁, 𑀇𑀥𑀸𑀧𑀺 𑀲𑀗𑁆𑀔𑁆𑀬𑀸𑀬𑀫𑁂𑀯 𑀤𑀝𑁆𑀞𑀩𑁆𑀩𑁄. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀏𑀓𑀦𑁆𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑀦𑀺𑀤𑁆𑀤𑁂𑀲𑁄’’𑀢𑀺.

𑀲𑀫𑀬𑀦𑁆𑀢𑀺 𑀧𑀭𑀺𑀘𑁆𑀙𑀺𑀦𑁆𑀦𑀦𑀺𑀤𑁆𑀤𑁂𑀲𑁄. 𑀏𑀓𑀁 𑀲𑀫𑀬𑀦𑁆𑀢𑀺 𑀅𑀦𑀺𑀬𑀫𑀺𑀢𑀧𑀭𑀺𑀤𑀻𑀧𑀦𑀁. 𑀢𑀢𑁆𑀣 𑀲𑀫𑀬𑀲𑀤𑁆𑀤𑁄 𑁋

‘‘𑀲𑀫𑀯𑀸𑀬𑁂 𑀔𑀡𑁂 𑀓𑀸𑀮𑁂, 𑀲𑀫𑀽𑀳𑁂 𑀳𑁂𑀢𑀼𑀤𑀺𑀝𑁆𑀞𑀺𑀲𑀼;

𑀧𑀝𑀺𑀮𑀸𑀪𑁂 𑀧𑀳𑀸𑀦𑁂 𑀘, 𑀧𑀝𑀺𑀯𑁂𑀥𑁂 𑀘 𑀤𑀺𑀲𑁆𑀲𑀢𑀺’’.

𑀢𑀣𑀸 𑀳𑀺𑀲𑁆𑀲 ‘‘𑀅𑀧𑁆𑀧𑁂𑀯 𑀦𑀸𑀫 𑀲𑁆𑀯𑁂𑀧𑀺 𑀉𑀧𑀲𑀗𑁆𑀓𑀫𑁂𑀬𑁆𑀬𑀸𑀫 𑀓𑀸𑀮𑀜𑁆𑀘 𑀲𑀫𑀬𑀜𑁆𑀘 𑀉𑀧𑀸𑀤𑀸𑀬𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀤𑀻. 𑀦𑀺. 𑁧.𑁪𑁪𑁭) 𑀲𑀫𑀯𑀸𑀬𑁄 𑀅𑀢𑁆𑀣𑁄, 𑀬𑀼𑀢𑁆𑀢𑀓𑀸𑀮𑀜𑁆𑀘 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀜𑁆𑀘 𑀮𑀪𑀺𑀢𑁆𑀯𑀸𑀢𑀺 𑀳𑀺 𑀅𑀥𑀺𑀧𑁆𑀧𑀸𑀬𑁄, 𑀢𑀲𑁆𑀫𑀸 𑀧𑀘𑁆𑀘𑀬𑀲𑀫𑀯𑀸𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. ‘‘𑀏𑀓𑁄𑀯 𑀔𑁄, 𑀪𑀺𑀓𑁆𑀔𑀯𑁂, 𑀔𑀡𑁄 𑀘 𑀲𑀫𑀬𑁄 𑀘 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀸𑀬𑀸’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁮.𑁨𑁯) 𑀔𑀡𑁄, 𑀑𑀓𑀸𑀲𑁄𑀢𑀺 𑀅𑀢𑁆𑀣𑁄. 𑀢𑀣𑀸𑀕𑀢𑀼𑀧𑁆𑀧𑀸𑀤𑀸𑀤𑀺𑀓𑁄 𑀳𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀑𑀓𑀸𑀲𑁄 𑀢𑀧𑁆𑀧𑀘𑁆𑀘𑀬𑀧𑁆𑀧𑀝𑀺𑀮𑀸𑀪𑀳𑁂𑀢𑀼𑀢𑁆𑀢𑀸, 𑀔𑀡𑁄 𑀏𑀯 𑀘 𑀲𑀫𑀬𑁄, 𑀬𑁄 𑀔𑀡𑁄𑀢𑀺 𑀘 𑀲𑀫𑀬𑁄𑀢𑀺 𑀘 𑀯𑀼𑀘𑁆𑀘𑀢𑀺, 𑀲𑁄 𑀏𑀓𑁄 𑀬𑁂𑀯𑀸𑀢𑀺 𑀳𑀺 𑀅𑀢𑁆𑀣𑁄. ‘‘𑀉𑀡𑁆𑀳𑀲𑀫𑀬𑁄 𑀧𑀭𑀺𑀴𑀸𑀳𑀲𑀫𑀬𑁄’’𑀢𑀺𑀆𑀤𑀻𑀲𑀼 (𑀧𑀸𑀘𑀺. 𑁩𑁫𑁮) 𑀓𑀸𑀮𑁄. ‘‘𑀫𑀳𑀸𑀲𑀫𑀬𑁄 𑀧𑀯𑀦𑀲𑁆𑀫𑀺’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁩𑁩𑁨) 𑀲𑀫𑀽𑀳𑁄. 𑀫𑀳𑀸𑀲𑀫𑀬𑁄𑀢𑀺 𑀳𑀺 𑀪𑀺𑀓𑁆𑀔𑀽𑀦𑀁 𑀤𑁂𑀯𑀢𑀸𑀦𑀜𑁆𑀘 𑀫𑀳𑀸𑀲𑀦𑁆𑀦𑀺𑀧𑀸𑀢𑁄𑀢𑀺 𑀅𑀢𑁆𑀣𑁄. ‘‘𑀲𑀫𑀬𑁄𑀧𑀺 𑀔𑁄 𑀢𑁂, 𑀪𑀤𑁆𑀤𑀸𑀮𑀺, 𑀅𑀧𑁆𑀧𑀝𑀺𑀯𑀺𑀤𑁆𑀥𑁄 𑀅𑀳𑁄𑀲𑀺, 𑀪𑀕𑀯𑀸 𑀔𑁄 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺, 𑀪𑀕𑀯𑀸𑀧𑀺 𑀫𑀁 𑀚𑀸𑀦𑀺𑀲𑁆𑀲𑀢𑀺 ‘𑀪𑀤𑁆𑀤𑀸𑀮𑀺 𑀦𑀸𑀫 𑀪𑀺𑀓𑁆𑀔𑀼 𑀲𑀢𑁆𑀣𑀼𑀲𑀸𑀲𑀦𑁂 𑀲𑀺𑀓𑁆𑀔𑀸𑀬 𑀦 𑀧𑀭𑀺𑀧𑀽𑀭𑀓𑀸𑀭𑀻’𑀢𑀺, 𑀅𑀬𑀫𑁆𑀧𑀺 𑀔𑁄 𑀢𑁂, 𑀪𑀤𑁆𑀤𑀸𑀮𑀺, 𑀲𑀫𑀬𑁄 𑀅𑀧𑁆𑀧𑀝𑀺𑀯𑀺𑀤𑁆𑀥𑁄 𑀅𑀳𑁄𑀲𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁧𑁩𑁫) 𑀳𑁂𑀢𑀼. 𑀲𑀺𑀓𑁆𑀔𑀸𑀧𑀤𑀲𑁆𑀲 𑀓𑀸𑀭𑀡𑀜𑁆𑀳𑀺 𑀇𑀥 𑀲𑀫𑀬𑁄𑀢𑀺 𑀅𑀥𑀺𑀧𑁆𑀧𑁂𑀢𑀁. ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀉𑀕𑁆𑀕𑀸𑀳𑀫𑀸𑀦𑁄 𑀧𑀭𑀺𑀩𑁆𑀩𑀸𑀚𑀓𑁄 𑀲𑀫𑀡𑀫𑀼𑀡𑁆𑀟𑀺𑀓𑀸𑀧𑀼𑀢𑁆𑀢𑁄 𑀲𑀫𑀬𑀧𑁆𑀧𑀯𑀸𑀤𑀓𑁂 𑀢𑀺𑀦𑁆𑀤𑀼𑀓𑀸𑀘𑀻𑀭𑁂 𑀏𑀓𑀲𑀸𑀮𑀓𑁂 𑀫𑀮𑁆𑀮𑀺𑀓𑀸𑀬 𑀆𑀭𑀸𑀫𑁂 𑀧𑀝𑀺𑀯𑀲𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁨𑁬𑁦) 𑀤𑀺𑀝𑁆𑀞𑀺. 𑀢𑀢𑁆𑀣 𑀳𑀺 𑀦𑀺𑀲𑀺𑀦𑁆𑀦𑀸 𑀢𑀺𑀢𑁆𑀣𑀺𑀬𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑀁 𑀲𑀫𑀬𑀁 𑀧𑀯𑀤𑀦𑁆𑀢𑀻𑀢𑀺 𑀲𑁄 𑀧𑀭𑀺𑀩𑁆𑀩𑀸𑀚𑀓𑀸𑀭𑀸𑀫𑁄 ‘‘𑀲𑀫𑀬𑀧𑁆𑀧𑀯𑀸𑀤𑀓𑁄’’𑀢𑀺 𑀯𑀼𑀘𑁆𑀘𑀢𑀺.

‘‘𑀤𑀺𑀝𑁆𑀞𑁂 𑀥𑀫𑁆𑀫𑁂 𑀘 𑀬𑁄 𑀅𑀢𑁆𑀣𑁄, 𑀬𑁄 𑀘𑀢𑁆𑀣𑁄 𑀲𑀫𑁆𑀧𑀭𑀸𑀬𑀺𑀓𑁄;

𑀅𑀢𑁆𑀣𑀸𑀪𑀺𑀲𑀫𑀬𑀸 𑀥𑀻𑀭𑁄, 𑀧𑀡𑁆𑀟𑀺𑀢𑁄𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺. (𑀲𑀁. 𑀦𑀺. 𑁧.𑁧𑁨𑁯) 𑁋

𑀆𑀤𑀻𑀲𑀼 𑀧𑀝𑀺𑀮𑀸𑀪𑁄. 𑀅𑀢𑁆𑀣𑀸𑀪𑀺𑀲𑀫𑀬𑀸𑀢𑀺 𑀳𑀺 𑀅𑀢𑁆𑀣𑀲𑁆𑀲 𑀅𑀥𑀺𑀕𑀫𑀸𑀢𑀺 𑀅𑀢𑁆𑀣𑁄. ‘‘𑀲𑀫𑁆𑀫𑀸 𑀫𑀸𑀦𑀸𑀪𑀺𑀲𑀫𑀬𑀸 𑀅𑀦𑁆𑀢𑀫𑀓𑀸𑀲𑀺 𑀤𑀼𑀓𑁆𑀔𑀲𑁆𑀲𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁮) 𑀧𑀳𑀸𑀦𑀁. 𑀅𑀥𑀺𑀓𑀭𑀡𑀁 𑀲𑀫𑀬𑀁 𑀯𑀽𑀧𑀲𑀫𑀦𑀁 𑀅𑀧𑀕𑀫𑁄𑀢𑀺 𑀅𑀪𑀺𑀲𑀫𑀬𑁄 𑀧𑀳𑀸𑀦𑀁. ‘‘𑀤𑀼𑀓𑁆𑀔𑀲𑁆𑀲 𑀧𑀻𑀴𑀦𑀝𑁆𑀞𑁄 𑀲𑀗𑁆𑀔𑀢𑀝𑁆𑀞𑁄 𑀲𑀦𑁆𑀢𑀸𑀧𑀝𑁆𑀞𑁄 𑀯𑀺𑀧𑀭𑀺𑀡𑀸𑀫𑀝𑁆𑀞𑁄 𑀅𑀪𑀺𑀲𑀫𑀬𑀝𑁆𑀞𑁄’’𑀢𑀺𑀆𑀤𑀻𑀲𑀼 (𑀧𑀝𑀺. 𑀫. 𑁨.𑁮) 𑀧𑀝𑀺𑀯𑁂𑀥𑁄. 𑀧𑀝𑀺𑀯𑁂𑀥𑁄𑀢𑀺 𑀳𑀺 𑀅𑀪𑀺𑀲𑀫𑁂𑀢𑀩𑁆𑀩𑀢𑁄 𑀅𑀪𑀺𑀲𑀫𑀬𑁄, 𑀅𑀪𑀺𑀲𑀫𑀬𑁄𑀯 𑀅𑀢𑁆𑀣𑁄 𑀅𑀪𑀺𑀲𑀫𑀬𑀝𑁆𑀞𑁄𑀢𑀺 𑀧𑀻𑀴𑀦𑀸𑀤𑀻𑀦𑀺 𑀅𑀪𑀺𑀲𑀫𑁂𑀢𑀩𑁆𑀩𑀪𑀸𑀯𑁂𑀦 𑀏𑀓𑀻𑀪𑀸𑀯𑀁 𑀉𑀧𑀦𑁂𑀢𑁆𑀯𑀸 𑀯𑀼𑀢𑁆𑀢𑀸𑀦𑀺, 𑀅𑀪𑀺𑀲𑀫𑀬𑀲𑁆𑀲 𑀯𑀸 𑀧𑀝𑀺𑀯𑁂𑀥𑀲𑁆𑀲 𑀯𑀺𑀲𑀬𑀪𑀽𑀢𑁄 𑀅𑀢𑁆𑀣𑁄 𑀅𑀪𑀺𑀲𑀫𑀬𑀝𑁆𑀞𑁄𑀢𑀺 𑀢𑀸𑀦𑁂𑀯 𑀢𑀣𑀸 𑀏𑀓𑀦𑁆𑀢𑁂𑀦 𑀯𑀼𑀢𑁆𑀢𑀸𑀦𑀺. 𑀢𑀢𑁆𑀣 𑀧𑀻𑀴𑀦𑀁 𑀤𑀼𑀓𑁆𑀔𑀲𑀘𑁆𑀘𑀲𑁆𑀲 𑀢𑀁𑀲𑀫𑀗𑁆𑀕𑀺𑀦𑁄 𑀳𑀺𑀁𑀲𑀦𑀁 𑀅𑀯𑀺𑀧𑁆𑀨𑀸𑀭𑀺𑀓𑀢𑀸𑀓𑀭𑀡𑀁. 𑀲𑀦𑁆𑀢𑀸𑀧𑁄 𑀤𑀼𑀓𑁆𑀔𑀤𑀼𑀓𑁆𑀔𑀢𑀸𑀤𑀺𑀯𑀲𑁂𑀦 𑀲𑀦𑁆𑀢𑀧𑁆𑀧𑀦𑀁 𑀧𑀭𑀺𑀤𑀳𑀦𑀁.

𑀏𑀢𑁆𑀣 𑀘 𑀲𑀳𑀓𑀸𑀭𑀻𑀓𑀸𑀭𑀡𑀲𑀦𑁆𑀦𑀺𑀚𑁆𑀛𑀁 𑀲𑀫𑁂𑀢𑀺 𑀲𑀫𑀯𑁂𑀢𑀻𑀢𑀺 𑀲𑀫𑀯𑀸𑀬𑁄 𑀲𑀫𑀬𑁄. 𑀲𑀫𑁂𑀢𑀺 𑀲𑀫𑀸𑀕𑀘𑁆𑀙𑀢𑀺 𑀏𑀢𑁆𑀣 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀁 𑀢𑀤𑀸𑀥𑀸𑀭𑀧𑀼𑀕𑁆𑀕𑀮𑁂𑀳𑀻𑀢𑀺 𑀔𑀡𑁄 𑀲𑀫𑀬𑁄. 𑀲𑀫𑁂𑀢𑀺 𑀏𑀢𑁆𑀣 𑀏𑀢𑁂𑀦 𑀯𑀸 𑀲𑀁𑀕𑀘𑁆𑀙𑀢𑀺 𑀲𑀢𑁆𑀢𑁄 𑀲𑀪𑀸𑀯𑀥𑀫𑁆𑀫𑁄 𑀯𑀸 𑀉𑀧𑁆𑀧𑀸𑀤𑀸𑀤𑀻𑀳𑀺 𑀲𑀳𑀚𑀸𑀢𑀸𑀤𑀻𑀳𑀺 𑀯𑀸𑀢𑀺 𑀓𑀸𑀮𑁄 𑀲𑀫𑀬𑁄. 𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀫𑀢𑁆𑀢𑀢𑀸𑀬 𑀅𑀢𑁆𑀣𑀢𑁄 𑀅𑀪𑀽𑀢𑁄𑀧𑀺 𑀳𑀺 𑀓𑀸𑀮𑁄 𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀬𑀸 𑀅𑀥𑀺𑀓𑀭𑀡𑀁 𑀓𑀭𑀡𑀁 𑀯𑀺𑀬 𑀘 𑀓𑀧𑁆𑀧𑀦𑀸𑀫𑀢𑁆𑀢𑀲𑀺𑀤𑁆𑀥𑁂𑀦𑀸𑀦𑀼𑀭𑀽𑀧𑁂𑀦 𑀯𑁄𑀳𑀭𑀻𑀬𑀢𑀻𑀢𑀺. 𑀲𑀫𑀁, 𑀲𑀳 𑀯𑀸 𑀅𑀯𑀬𑀯𑀸𑀦𑀁 𑀅𑀬𑀦𑀁 𑀧𑀯𑀢𑁆𑀢𑀺 𑀅𑀯𑀝𑁆𑀞𑀸𑀦𑀦𑁆𑀢𑀺 𑀲𑀫𑀽𑀳𑁄 𑀲𑀫𑀬𑁄 𑀬𑀣𑀸 𑀲𑀫𑀼𑀤𑀸𑀬𑁄𑀢𑀺. 𑀅𑀯𑀬𑀯𑀲𑀳𑀸𑀯𑀝𑁆𑀞𑀸𑀦𑀫𑁂𑀯 𑀳𑀺 𑀲𑀫𑀽𑀳𑁄. 𑀅𑀯𑀲𑁂𑀲𑀧𑀘𑁆𑀘𑀬𑀸𑀦𑀁 𑀲𑀫𑀸𑀕𑀫𑁂 𑀲𑀢𑀺 𑀏𑀢𑀺 𑀨𑀮𑀫𑁂𑀢𑀲𑁆𑀫𑀸 𑀉𑀧𑁆𑀧𑀚𑁆𑀚𑀢𑀺 𑀧𑀯𑀢𑁆𑀢𑀢𑀻𑀢𑀺 𑀲𑀫𑀬𑁄 𑀳𑁂𑀢𑀼 𑀬𑀣𑀸 𑀲𑀫𑀼𑀤𑀬𑁄𑀢𑀺. 𑀲𑀫𑁂𑀢𑀺 𑀲𑀁𑀬𑁄𑀚𑀦𑀪𑀸𑀯𑀢𑁄 𑀲𑀫𑁆𑀩𑀦𑁆𑀥𑁄 𑀏𑀢𑀺 𑀅𑀢𑁆𑀢𑀦𑁄 𑀯𑀺𑀲𑀬𑁂 𑀧𑀯𑀢𑁆𑀢𑀢𑀺, 𑀤𑀴𑁆𑀳𑀕𑁆𑀕𑀳𑀡𑀪𑀸𑀯𑀢𑁄 𑀯𑀸 𑀲𑀁𑀬𑀼𑀢𑁆𑀢𑀸 𑀅𑀬𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀺 𑀲𑀢𑁆𑀢𑀸 𑀬𑀣𑀸𑀪𑀺𑀦𑀺𑀯𑁂𑀲𑀁 𑀏𑀢𑁂𑀦𑀸𑀢𑀺 𑀲𑀫𑀬𑁄 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺𑀲𑀁𑀬𑁄𑀚𑀦𑁂𑀦 𑀳𑀺 𑀲𑀢𑁆𑀢𑀸 𑀅𑀢𑀺𑀯𑀺𑀬 𑀩𑀚𑁆𑀛𑀦𑁆𑀢𑀻𑀢𑀺. 𑀲𑀫𑀺𑀢𑀺 𑀲𑀗𑁆𑀕𑀢𑀺 𑀲𑀫𑁄𑀥𑀸𑀦𑀦𑁆𑀢𑀺 𑀲𑀫𑀬𑁄 𑀧𑀝𑀺𑀮𑀸𑀪𑁄. 𑀲𑀫𑀬𑀦𑀁 𑀉𑀧𑀲𑀫𑀬𑀦𑀁 𑀅𑀧𑀕𑀫𑁄𑀢𑀺 𑀲𑀫𑀬𑁄 𑀧𑀳𑀸𑀦𑀁. 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀪𑀸𑀯𑀢𑁄 𑀧𑀦 𑀅𑀥𑀺𑀓𑁄 𑀲𑀫𑀬𑁄𑀢𑀺 𑀅𑀪𑀺𑀲𑀫𑀬𑁄 𑀬𑀣𑀸 𑀅𑀪𑀺𑀥𑀫𑁆𑀫𑁄𑀢𑀺. 𑀅𑀪𑀺𑀫𑀼𑀔𑀁 𑀜𑀸𑀡𑁂𑀦 𑀲𑀫𑁆𑀫𑀸 𑀏𑀢𑀩𑁆𑀩𑁄 𑀅𑀪𑀺𑀲𑀫𑁂𑀢𑀩𑁆𑀩𑁄𑀢𑀺 𑀅𑀪𑀺𑀲𑀫𑀬𑁄, 𑀥𑀫𑁆𑀫𑀸𑀦𑀁 𑀅𑀯𑀺𑀧𑀭𑀻𑀢𑀲𑀪𑀸𑀯𑁄. 𑀅𑀪𑀺𑀫𑀼𑀔𑀪𑀸𑀯𑁂𑀦 𑀲𑀫𑁆𑀫𑀸 𑀏𑀢𑀺 𑀕𑀘𑁆𑀙𑀢𑀺 𑀩𑀼𑀚𑁆𑀛𑀢𑀻𑀢𑀺 𑀅𑀪𑀺𑀲𑀫𑀬𑁄, 𑀥𑀫𑁆𑀫𑀸𑀦𑀁 𑀬𑀣𑀸𑀪𑀽𑀢𑀲𑀪𑀸𑀯𑀸𑀯𑀩𑁄𑀥𑁄. 𑀏𑀯𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀲𑀫𑀬𑀲𑀤𑁆𑀤𑀲𑁆𑀲 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀲𑀫𑀬𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑁂 𑀅𑀪𑀺𑀲𑀫𑀬𑀲𑀤𑁆𑀤𑀲𑁆𑀲 𑀕𑀳𑀡𑁂 𑀓𑀸𑀭𑀡𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀇𑀥 𑀧𑀦𑀲𑁆𑀲 𑀓𑀸𑀮𑁄 𑀅𑀢𑁆𑀣𑁄 𑀲𑀫𑀯𑀸𑀬𑀸𑀤𑀻𑀦𑀁 𑀅𑀲𑀫𑁆𑀪𑀯𑀢𑁄. 𑀤𑁂𑀲𑀤𑁂𑀲𑀓𑀧𑀭𑀺𑀲𑀸 𑀯𑀺𑀬 𑀳𑀺 𑀤𑁂𑀲𑀦𑀸𑀬 𑀦𑀺𑀤𑀸𑀦𑀪𑀸𑀯𑁂 𑀓𑀸𑀮𑁄 𑀏𑀯 𑀇𑀘𑁆𑀙𑀺𑀢𑀩𑁆𑀩𑁄𑀢𑀺. 𑀬𑀲𑁆𑀫𑀸 𑀧𑀦𑁂𑀢𑁆𑀣 𑀲𑀫𑀬𑁄𑀢𑀺 𑀓𑀸𑀮𑁄 𑀅𑀥𑀺𑀧𑁆𑀧𑁂𑀢𑁄, 𑀢𑀲𑁆𑀫𑀸 𑀲𑀁𑀯𑀘𑁆𑀙𑀭𑀉𑀢𑀼𑀫𑀸𑀲𑀤𑁆𑀥𑀫𑀸𑀲𑀭𑀢𑁆𑀢𑀺𑀤𑀺𑀯𑀲𑀧𑀼𑀩𑁆𑀩𑀡𑁆𑀳𑀫𑀚𑁆𑀛𑀦𑁆𑀳𑀺𑀓𑀲𑀸𑀬𑀦𑁆𑀳𑀧𑀞𑀫𑀬𑀸𑀫- 𑀫𑀚𑁆𑀛𑀺𑀫𑀬𑀸𑀫𑀧𑀘𑁆𑀙𑀺𑀫𑀬𑀸𑀫𑀫𑀼𑀳𑀼𑀢𑁆𑀢𑀸𑀤𑀻𑀲𑀼 𑀓𑀸𑀮𑀪𑁂𑀤𑀪𑀽𑀢𑁂𑀲𑀼 𑀲𑀫𑀬𑁂𑀲𑀼 𑀏𑀓𑀁 𑀲𑀫𑀬𑀦𑁆𑀢𑀺 𑀤𑀻𑀧𑁂𑀢𑀺.

𑀓𑀲𑁆𑀫𑀸 𑀧𑀦𑁂𑀢𑁆𑀣 𑀅𑀦𑀺𑀬𑀫𑀺𑀢𑀯𑀲𑁂𑀦𑁂𑀯 𑀓𑀸𑀮𑁄 𑀦𑀺𑀤𑁆𑀤𑀺𑀝𑁆𑀞𑁄, 𑀦 𑀉𑀢𑀼𑀲𑀁𑀯𑀘𑁆𑀙𑀭𑀸𑀤𑀺𑀯𑀲𑁂𑀦 𑀦𑀺𑀬𑀫𑁂𑀢𑁆𑀯𑀸 𑀦𑀺𑀤𑁆𑀤𑀺𑀝𑁆𑀞𑁄𑀢𑀺 𑀘𑁂? 𑀓𑀺𑀜𑁆𑀘𑀸𑀧𑀺 𑀏𑀢𑁂𑀲𑀼 𑀲𑀁𑀯𑀘𑁆𑀙𑀭𑀸𑀤𑀻𑀲𑀼 𑀲𑀫𑀬𑁂𑀲𑀼 𑀬𑀁 𑀬𑀁 𑀲𑀼𑀢𑁆𑀢𑀁 𑀬𑀲𑁆𑀫𑀺𑀁 𑀬𑀲𑁆𑀫𑀺𑀁 𑀲𑀁𑀯𑀘𑁆𑀙𑀭𑁂 𑀉𑀢𑀼𑀫𑁆𑀳𑀺 𑀫𑀸𑀲𑁂 𑀧𑀓𑁆𑀔𑁂 𑀭𑀢𑁆𑀢𑀺𑀪𑀸𑀕𑁂 𑀤𑀺𑀯𑀲𑀪𑀸𑀕𑁂 𑀯𑀸 𑀯𑀼𑀢𑁆𑀢𑀁, 𑀲𑀩𑁆𑀩𑀫𑁆𑀧𑀺 𑀢𑀁 𑀣𑁂𑀭𑀲𑁆𑀲 𑀲𑀼𑀯𑀺𑀤𑀺𑀢𑀁 𑀲𑀼𑀯𑀯𑀢𑁆𑀣𑀸𑀧𑀺𑀢𑀁 𑀧𑀜𑁆𑀜𑀸𑀬. 𑀬𑀲𑁆𑀫𑀸 𑀧𑀦 ‘‘𑀏𑀯𑀁 𑀫𑁂 𑀲𑀼𑀢𑀁 𑀅𑀲𑀼𑀓𑀲𑀁𑀯𑀘𑁆𑀙𑀭𑁂 𑀅𑀲𑀼𑀓𑀉𑀢𑀼𑀫𑁆𑀳𑀺 𑀅𑀲𑀼𑀓𑀫𑀸𑀲𑁂 𑀅𑀲𑀼𑀓𑀧𑀓𑁆𑀔𑁂 𑀅𑀲𑀼𑀓𑀭𑀢𑁆𑀢𑀺𑀪𑀸𑀕𑁂 𑀅𑀲𑀼𑀓𑀤𑀺𑀯𑀲𑀪𑀸𑀕𑁂 𑀯𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑁂 𑀦 𑀲𑀓𑁆𑀓𑀸 𑀲𑀼𑀔𑁂𑀦 𑀥𑀸𑀭𑁂𑀢𑀼𑀁 𑀯𑀸 𑀉𑀤𑁆𑀤𑀺𑀲𑀺𑀢𑀼𑀁 𑀯𑀸 𑀉𑀤𑁆𑀤𑀺𑀲𑀸𑀧𑁂𑀢𑀼𑀁 𑀯𑀸, 𑀩𑀳𑀼 𑀘 𑀯𑀢𑁆𑀢𑀩𑁆𑀩𑀁 𑀳𑁄𑀢𑀺, 𑀢𑀲𑁆𑀫𑀸 𑀏𑀓𑁂𑀦𑁂𑀯 𑀧𑀤𑁂𑀦 𑀢𑀫𑀢𑁆𑀣𑀁 𑀲𑀫𑁄𑀥𑀸𑀦𑁂𑀢𑁆𑀯𑀸 ‘‘𑀏𑀓𑀁 𑀲𑀫𑀬’’𑀦𑁆𑀢𑀺 𑀆𑀳.

𑀬𑁂 𑀯𑀸 𑀇𑀫𑁂 𑀕𑀩𑁆𑀪𑁄𑀓𑁆𑀓𑀦𑁆𑀢𑀺𑀲𑀫𑀬𑁄 𑀚𑀸𑀢𑀺𑀲𑀫𑀬𑁄 𑀲𑀁𑀯𑁂𑀕𑀲𑀫𑀬𑁄 𑀅𑀪𑀺𑀦𑀺𑀓𑁆𑀔𑀫𑀦𑀲𑀫𑀬𑁄 𑀤𑀼𑀓𑁆𑀓𑀭𑀓𑀸𑀭𑀺𑀓𑀲𑀫𑀬𑁄 𑀫𑀸𑀭𑀯𑀺𑀚𑀬𑀲𑀫𑀬𑁄 𑀅𑀪𑀺𑀲𑀫𑁆𑀩𑁄𑀥𑀺𑀲𑀫𑀬𑁄 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀲𑀫𑀬𑁄 𑀤𑁂𑀲𑀦𑀸𑀲𑀫𑀬𑁄 𑀧𑀭𑀺𑀦𑀺𑀩𑁆𑀩𑀸𑀦𑀲𑀫𑀬𑁄𑀢𑀺 𑀏𑀯𑀫𑀸𑀤𑀬𑁄 𑀪𑀕𑀯𑀢𑁄 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀅𑀢𑀺𑀯𑀺𑀬 𑀧𑀓𑀸𑀲𑀸 𑀅𑀦𑁂𑀓𑀓𑀸𑀮𑀧𑁆𑀧𑀪𑁂𑀤𑀸 𑀏𑀯 𑀲𑀫𑀬𑀸, 𑀢𑁂𑀲𑀼 𑀲𑀫𑀬𑁂𑀲𑀼 𑀤𑁂𑀲𑀦𑀸𑀲𑀫𑀬𑀲𑀗𑁆𑀔𑀸𑀢𑀁 𑀏𑀓𑀁 𑀲𑀫𑀬𑀦𑁆𑀢𑀺 𑀤𑀻𑀧𑁂𑀢𑀺. 𑀬𑁄 𑀯𑀸𑀬𑀁 𑀜𑀸𑀡𑀓𑀭𑀼𑀡𑀸𑀓𑀺𑀘𑁆𑀘𑀲𑀫𑀬𑁂𑀲𑀼 𑀓𑀭𑀼𑀡𑀸𑀓𑀺𑀘𑁆𑀘𑀲𑀫𑀬𑁄, 𑀅𑀢𑁆𑀢𑀳𑀺𑀢𑀧𑀭𑀳𑀺𑀢𑀧𑁆𑀧𑀝𑀺𑀧𑀢𑁆𑀢𑀺𑀲𑀫𑀬𑁂𑀲𑀼 𑀧𑀭𑀳𑀺𑀢𑀧𑁆𑀧𑀝𑀺𑀧𑀢𑁆𑀢𑀺𑀲𑀫𑀬𑁄, 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀓𑀭𑀡𑀻𑀬𑀤𑁆𑀯𑀬𑀲𑀫𑀬𑁂𑀲𑀼 𑀥𑀫𑁆𑀫𑀓𑀣𑀸𑀲𑀫𑀬𑁄, 𑀤𑁂𑀲𑀦𑀸𑀧𑀝𑀺𑀧𑀢𑁆𑀢𑀺𑀲𑀫𑀬𑁂𑀲𑀼 𑀤𑁂𑀲𑀦𑀸𑀲𑀫𑀬𑁄, 𑀢𑁂𑀲𑀼 𑀲𑀫𑀬𑁂𑀲𑀼 𑀅𑀜𑁆𑀜𑀢𑀭𑀲𑀫𑀬𑀁 𑀲𑀦𑁆𑀥𑀸𑀬 ‘‘𑀏𑀓𑀁 𑀲𑀫𑀬’’𑀦𑁆𑀢𑀺 𑀆𑀳.

𑀓𑀲𑁆𑀫𑀸 𑀧𑀦𑁂𑀢𑁆𑀣 𑀬𑀣𑀸 𑀅𑀪𑀺𑀥𑀫𑁆𑀫𑁂 ‘‘𑀬𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀻’’𑀢𑀺 (𑀥. 𑀲. 𑁧) 𑀘 𑀇𑀢𑁄 𑀅𑀜𑁆𑀜𑁂𑀲𑀼 𑀲𑀼𑀢𑁆𑀢𑀧𑀤𑁂𑀲𑀼 ‘‘𑀬𑀲𑁆𑀫𑀺𑀁 𑀲𑀫𑀬𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀻’’𑀢𑀺 (𑀅. 𑀦𑀺. 𑁪.𑁨𑁦𑁦) 𑀘 𑀪𑀼𑀫𑁆𑀫𑀯𑀘𑀦𑁂𑀦 𑀦𑀺𑀤𑁆𑀤𑁂𑀲𑁄 𑀓𑀢𑁄, 𑀯𑀺𑀦𑀬𑁂 𑀘 ‘‘𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸’’𑀢𑀺 (𑀧𑀸𑀭𑀸. 𑁧) 𑀓𑀭𑀡𑀯𑀘𑀦𑁂𑀦 𑀦𑀺𑀤𑁆𑀤𑁂𑀲𑁄 𑀓𑀢𑁄, 𑀢𑀣𑀸 𑀅𑀓𑀢𑁆𑀯𑀸 ‘‘𑀏𑀓𑀁 𑀲𑀫𑀬’’𑀦𑁆𑀢𑀺 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑁂𑀦 𑀦𑀺𑀤𑁆𑀤𑁂𑀲𑁄 𑀓𑀢𑁄𑀢𑀺? 𑀢𑀢𑁆𑀣 𑀢𑀣𑀸, 𑀇𑀥 𑀘 𑀅𑀜𑁆𑀜𑀣𑀸 𑀅𑀢𑁆𑀣𑀲𑀫𑁆𑀪𑀯𑀢𑁄. 𑀢𑀢𑁆𑀣 𑀳𑀺 𑀅𑀪𑀺𑀥𑀫𑁆𑀫𑁂 𑀇𑀢𑁄 𑀅𑀜𑁆𑀜𑁂𑀲𑀼 𑀘 𑀲𑀼𑀢𑁆𑀢𑀦𑁆𑀢𑁂𑀲𑀼 𑀆𑀥𑀸𑀭𑀯𑀺𑀲𑀬𑀲𑀗𑁆𑀔𑀸𑀢𑁄 𑀅𑀥𑀺𑀓𑀭𑀡𑀢𑁆𑀣𑁄 𑀓𑀺𑀭𑀺𑀬𑀸𑀬 𑀓𑀺𑀭𑀺𑀬𑀦𑁆𑀢𑀭𑀮𑀓𑁆𑀔𑀡𑀲𑀗𑁆𑀔𑀸𑀢𑁄 𑀪𑀸𑀯𑁂𑀦𑀪𑀸𑀯𑀮𑀓𑁆𑀔𑀡𑀢𑁆𑀣𑁄 𑀘 𑀲𑀫𑁆𑀪𑀯𑀢𑀻𑀢𑀺. 𑀅𑀥𑀺𑀓𑀭𑀡𑀜𑁆𑀳𑀺 𑀓𑀸𑀮𑀢𑁆𑀣𑁄 𑀲𑀫𑀽𑀳𑀢𑁆𑀣𑁄 𑀘 𑀲𑀫𑀬𑁄 𑀢𑀢𑁆𑀣 𑀯𑀼𑀢𑁆𑀢𑀸𑀦𑀁 𑀨𑀲𑁆𑀲𑀸𑀤𑀺𑀥𑀫𑁆𑀫𑀸𑀦𑀁, 𑀢𑀣𑀸 𑀓𑀸𑀮𑁄 𑀲𑀪𑀸𑀯𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀫𑀢𑁆𑀢𑀢𑀸𑀬 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑁄𑀧𑀺 𑀆𑀥𑀸𑀭𑀪𑀸𑀯𑁂𑀦 𑀧𑀜𑁆𑀜𑀸𑀢𑁄 𑀢𑀗𑁆𑀔𑀡𑀧𑁆𑀧𑀯𑀢𑁆𑀢𑀸𑀦𑀁 𑀢𑀢𑁄 𑀧𑀼𑀩𑁆𑀩𑁂 𑀧𑀭𑀢𑁄 𑀘 𑀅𑀪𑀸𑀯𑀢𑁄 𑀬𑀣𑀸 ‘‘𑀧𑀼𑀩𑁆𑀩𑀡𑁆𑀳𑁂 𑀚𑀸𑀢𑁄 𑀲𑀸𑀬𑀦𑁆𑀳𑁂 𑀚𑀸𑀢𑁄’’𑀢𑀺𑀆𑀤𑀻𑀲𑀼. 𑀲𑀫𑀽𑀳𑁄𑀢𑀺𑀧𑀺 𑀅𑀯𑀬𑀯𑀯𑀺𑀦𑀺𑀫𑀼𑀢𑁆𑀢𑁄 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑁄𑀧𑀺 𑀓𑀧𑁆𑀧𑀦𑀸𑀫𑀢𑁆𑀢𑀲𑀺𑀤𑁆𑀥𑁂𑀦 𑀭𑀽𑀧𑁂𑀦 𑀅𑀯𑀬𑀯𑀸𑀦𑀁 𑀆𑀥𑀸𑀭𑀪𑀸𑀯𑁂𑀦 𑀧𑀜𑁆𑀜𑀸𑀧𑀻𑀬𑀢𑀺, 𑀬𑀣𑀸 ‘‘𑀭𑀼𑀓𑁆𑀔𑁂 𑀲𑀸𑀔𑀸, 𑀬𑀯𑁄 𑀬𑀯𑀭𑀸𑀲𑀺𑀫𑁆𑀳𑀺 𑀲𑀫𑀼𑀝𑁆𑀞𑀺𑀢𑁄’’𑀢𑀺𑀆𑀤𑀻𑀲𑀼. 𑀬𑀲𑁆𑀫𑀺𑀁 𑀓𑀸𑀮𑁂 𑀥𑀫𑁆𑀫𑀧𑀼𑀜𑁆𑀚𑁂 𑀘 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀢𑀲𑁆𑀫𑀺𑀁𑀬𑁂𑀯 𑀓𑀸𑀮𑁂 𑀥𑀫𑁆𑀫𑀧𑀼𑀜𑁆𑀚𑁂 𑀘 𑀨𑀲𑁆𑀲𑀸𑀤𑀬𑁄𑀧𑀺 𑀳𑁄𑀦𑁆𑀢𑀻𑀢𑀺 𑀅𑀬𑀜𑁆𑀳𑀺 𑀢𑀢𑁆𑀣 𑀅𑀢𑁆𑀣𑁄. 𑀢𑀣𑀸 𑀔𑀡𑀲𑀫𑀯𑀸𑀬𑀳𑁂𑀢𑀼𑀲𑀗𑁆𑀔𑀸𑀢𑀲𑁆𑀲 𑀲𑀫𑀬𑀲𑁆𑀲 𑀪𑀸𑀯𑁂𑀦 𑀢𑀢𑁆𑀣 𑀯𑀼𑀢𑁆𑀢𑀸𑀦𑀁 𑀨𑀲𑁆𑀲𑀸𑀤𑀺𑀥𑀫𑁆𑀫𑀸𑀦𑀁 𑀪𑀸𑀯𑁄 𑀮𑀓𑁆𑀔𑀻𑀬𑀢𑀺. 𑀬𑀣𑀸 𑀳𑀺 ‘‘𑀕𑀸𑀯𑀻𑀲𑀼 𑀤𑀼𑀬𑁆𑀳𑀫𑀸𑀦𑀸𑀲𑀼 𑀕𑀢𑁄, 𑀤𑀼𑀤𑁆𑀥𑀸𑀲𑀼 𑀆𑀕𑀢𑁄’’𑀢𑀺 𑀏𑀢𑁆𑀣 𑀕𑀸𑀯𑀻𑀦𑀁 𑀤𑁄𑀳𑀦𑀓𑀺𑀭𑀺𑀬𑀸𑀬 𑀕𑀫𑀦𑀓𑀺𑀭𑀺𑀬𑀸 𑀮𑀓𑁆𑀔𑀻𑀬𑀢𑀺, 𑀏𑀯𑀁 𑀇𑀥𑀸𑀧𑀺 𑀬𑀲𑁆𑀫𑀺𑀁 𑀲𑀫𑀬𑁂𑀢𑀺 𑀯𑀼𑀢𑁆𑀢𑁂 𑀘 𑀧𑀤𑀢𑁆𑀣𑀲𑁆𑀲 𑀲𑀢𑁆𑀢𑀸𑀯𑀺𑀭𑀳𑀸𑀪𑀸𑀯𑀢𑁄 𑀲𑀢𑀻𑀢𑀺 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀫𑀸𑀦𑁄 𑀏𑀯 𑀳𑁄𑀢𑀻𑀢𑀺 𑀲𑀫𑀬𑀲𑁆𑀲 𑀲𑀢𑁆𑀢𑀸𑀓𑀺𑀭𑀺𑀬𑀸𑀬 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑀺𑀭𑀺𑀬𑀸 𑀨𑀲𑁆𑀲𑀸𑀤𑀻𑀦𑀁 𑀪𑀯𑀦𑀓𑀺𑀭𑀺𑀬𑀸 𑀘 𑀮𑀓𑁆𑀔𑀻𑀬𑀢𑀺. 𑀢𑀣𑀸 𑀬𑀲𑁆𑀫𑀺𑀁 𑀲𑀫𑀬𑁂 𑀬𑀲𑁆𑀫𑀺𑀁 𑀦𑀯𑀫𑁂 𑀔𑀡𑁂 𑀬𑀲𑁆𑀫𑀺𑀁 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀤𑀺𑀳𑁂𑀢𑀼𑀫𑁆𑀳𑀺 𑀧𑀘𑁆𑀘𑀬𑀲𑀫𑀯𑀸𑀬𑁂 𑀯𑀸 𑀲𑀢𑀺 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀲𑀫𑀬𑁂 𑀔𑀡𑁂 𑀳𑁂𑀢𑀼𑀫𑁆𑀳𑀺 𑀧𑀘𑁆𑀘𑀬𑀲𑀫𑀯𑀸𑀬𑁂 𑀘 𑀨𑀲𑁆𑀲𑀸𑀤𑀬𑁄𑀧𑀺 𑀳𑁄𑀦𑁆𑀢𑀻𑀢𑀺. 𑀢𑀲𑁆𑀫𑀸 𑀢𑀤𑀢𑁆𑀣𑀚𑁄𑀢𑀦𑀢𑁆𑀣𑀁 𑀪𑀼𑀫𑁆𑀫𑀯𑀘𑀦𑁂𑀦 𑀦𑀺𑀤𑁆𑀤𑁂𑀲𑁄 𑀓𑀢𑁄.

𑀯𑀺𑀦𑀬𑁂 𑀘 ‘‘𑀅𑀦𑁆𑀦𑁂𑀦 𑀯𑀲𑀢𑀺, 𑀅𑀚𑁆𑀛𑁂𑀦𑁂𑀦 𑀯𑀲𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀳𑁂𑀢𑀼𑀅𑀢𑁆𑀣𑁄, ‘‘𑀨𑀭𑀲𑀼𑀦𑀸 𑀙𑀺𑀦𑁆𑀤𑀢𑀺, 𑀓𑀼𑀤𑀸𑀮𑁂𑀦 𑀔𑀡𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀓𑀭𑀡𑀢𑁆𑀣𑁄 𑀘 𑀲𑀫𑁆𑀪𑀯𑀢𑀺. 𑀬𑁄 𑀳𑀺 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀲𑀫𑀬𑁄 𑀥𑀫𑁆𑀫𑀲𑁂𑀦𑀸𑀧𑀢𑀺𑀆𑀤𑀻𑀳𑀺𑀧𑀺 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑁄, 𑀢𑁂𑀦 𑀲𑀫𑀬𑁂𑀦 𑀓𑀭𑀡𑀪𑀽𑀢𑁂𑀦 𑀳𑁂𑀢𑀼𑀪𑀽𑀢𑁂𑀦 𑀘 𑀯𑀻𑀢𑀺𑀓𑁆𑀓𑀫𑀁 𑀲𑀼𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀑𑀢𑀺𑀡𑁆𑀡𑀯𑀢𑁆𑀣𑀼𑀓𑀁 𑀧𑀼𑀕𑁆𑀕𑀮𑀁 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀕𑀭𑀳𑀺𑀢𑁆𑀯𑀸 𑀘 𑀢𑀁 𑀢𑀁 𑀯𑀢𑁆𑀣𑀼𑀁 𑀑𑀢𑀺𑀡𑁆𑀡𑀲𑀫𑀬𑀲𑀗𑁆𑀔𑀸𑀢𑀁 𑀓𑀸𑀮𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀜𑁆𑀜𑀸𑀧𑁂𑀦𑁆𑀢𑁄 𑀢𑀢𑀺𑀬𑀧𑀸𑀭𑀸𑀚𑀺𑀓𑀸𑀤𑀻𑀦𑀁 𑀯𑀺𑀬 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀳𑁂𑀢𑀼𑀁 𑀅𑀧𑁂𑀓𑁆𑀔𑀫𑀸𑀦𑁄 𑀢𑀢𑁆𑀣 𑀢𑀢𑁆𑀣 𑀯𑀺𑀳𑀸𑀲𑀺, 𑀢𑀲𑁆𑀫𑀸 𑀢𑀤𑀢𑁆𑀣𑀚𑁄𑀢𑀦𑀢𑁆𑀣𑀁 𑀯𑀺𑀦𑀬𑁂 𑀓𑀭𑀡𑀯𑀘𑀦𑁂𑀦 𑀦𑀺𑀤𑁆𑀤𑁂𑀲𑁄 𑀓𑀢𑁄.

𑀇𑀥 𑀧𑀦 𑀅𑀜𑁆𑀜𑀲𑁆𑀫𑀺𑀜𑁆𑀘 𑀏𑀯𑀁𑀚𑀸𑀢𑀺𑀓𑁂 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀢𑁆𑀣𑁄 𑀲𑀫𑁆𑀪𑀯𑀢𑀺. 𑀬𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀲𑀳 𑀲𑀫𑀼𑀝𑁆𑀞𑀸𑀦𑀳𑁂𑀢𑀼𑀦𑀸 𑀇𑀤𑀁 𑀉𑀤𑀸𑀦𑀁 𑀉𑀧𑁆𑀧𑀦𑁆𑀦𑀁, 𑀅𑀘𑁆𑀘𑀦𑁆𑀢𑀫𑁂𑀯 𑀢𑀁 𑀲𑀫𑀬𑀁 𑀅𑀭𑀺𑀬𑀯𑀺𑀳𑀸𑀭𑀧𑀼𑀩𑁆𑀩𑀗𑁆𑀕𑀫𑀸𑀬 𑀥𑀫𑁆𑀫𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀪𑀕𑀯𑀸 𑀯𑀺𑀳𑀸𑀲𑀺, 𑀢𑀲𑁆𑀫𑀸 ‘‘𑀫𑀸𑀲𑀁 𑀅𑀚𑁆𑀛𑁂𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀉𑀧𑀬𑁄𑀕𑀢𑁆𑀣𑀚𑁄𑀢𑀦𑀢𑁆𑀣𑀁 𑀇𑀥 𑀉𑀧𑀬𑁄𑀕𑀯𑀘𑀦𑁂𑀦 𑀦𑀺𑀤𑁆𑀤𑁂𑀲𑁄 𑀓𑀢𑁄. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀢𑀁 𑀢𑀁 𑀅𑀢𑁆𑀣𑀫𑀧𑁂𑀓𑁆𑀔𑀺𑀢𑁆𑀯𑀸, 𑀪𑀼𑀫𑁆𑀫𑁂𑀦 𑀓𑀭𑀡𑁂𑀦 𑀘;

𑀅𑀜𑁆𑀜𑀢𑁆𑀭 𑀲𑀫𑀬𑁄 𑀯𑀼𑀢𑁆𑀢𑁄, 𑀉𑀧𑀬𑁄𑀕𑁂𑀦 𑀲𑁄 𑀇𑀥𑀸’’𑀢𑀺.

𑀧𑁄𑀭𑀸𑀡𑀸 𑀧𑀦 𑀯𑀡𑁆𑀡𑀬𑀦𑁆𑀢𑀺 𑁋 ‘‘𑀬𑀲𑁆𑀫𑀺𑀁 𑀲𑀫𑀬𑁂’’𑀢𑀺 𑀯𑀸 ‘‘𑀢𑁂𑀦 𑀲𑀫𑀬𑁂𑀦𑀸’’𑀢𑀺 𑀯𑀸 ‘‘𑀏𑀓𑀁 𑀲𑀫𑀬’’𑀦𑁆𑀢𑀺 𑀯𑀸 𑀅𑀪𑀺𑀮𑀸𑀧𑀫𑀢𑁆𑀢𑀪𑁂𑀤𑁄 𑀏𑀲 𑀦𑀺𑀤𑁆𑀤𑁂𑀲𑁄, 𑀲𑀩𑁆𑀩𑀢𑁆𑀣 𑀪𑀼𑀫𑁆𑀫𑀫𑁂𑀯 𑀅𑀢𑁆𑀣𑁄𑀢𑀺. 𑀢𑀲𑁆𑀫𑀸 ‘‘𑀏𑀓𑀁 𑀲𑀫𑀬’’𑀦𑁆𑀢𑀺 𑀯𑀼𑀢𑁆𑀢𑁂𑀧𑀺 𑀏𑀓𑀲𑁆𑀫𑀺𑀁 𑀲𑀫𑀬𑁂𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀪𑀕𑀯𑀸𑀢𑀺 𑀕𑀭𑀼. 𑀕𑀭𑀼𑀜𑁆𑀳𑀺 𑀮𑁄𑀓𑁂 ‘‘𑀪𑀕𑀯𑀸’’𑀢𑀺 𑀯𑀤𑀦𑁆𑀢𑀺. 𑀅𑀬𑀜𑁆𑀘 𑀲𑀩𑁆𑀩𑀕𑀼𑀡𑀯𑀺𑀲𑀺𑀝𑁆𑀞𑀢𑀸𑀬 𑀲𑀩𑁆𑀩𑀲𑀢𑁆𑀢𑀸𑀦𑀁 𑀕𑀭𑀼, 𑀢𑀲𑁆𑀫𑀸 𑀪𑀕𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀧𑁄𑀭𑀸𑀡𑁂𑀳𑀺𑀧𑀺 𑀯𑀼𑀢𑁆𑀢𑀁 𑁋

‘‘𑀪𑀕𑀯𑀸𑀢𑀺 𑀯𑀘𑀦𑀁 𑀲𑁂𑀝𑁆𑀞𑀁, 𑀪𑀕𑀯𑀸𑀢𑀺 𑀯𑀘𑀦𑀫𑀼𑀢𑁆𑀢𑀫𑀁;

𑀕𑀭𑀼 𑀕𑀸𑀭𑀯𑀬𑀼𑀢𑁆𑀢𑁄 𑀲𑁄, 𑀪𑀕𑀯𑀸 𑀢𑁂𑀦 𑀯𑀼𑀘𑁆𑀘𑀢𑀻’’𑀢𑀺.

𑀢𑀢𑁆𑀣 𑀲𑁂𑀝𑁆𑀞𑀯𑀸𑀘𑀓𑀯𑀘𑀦𑀁 𑀲𑁂𑀝𑁆𑀞𑀦𑁆𑀢𑀺 𑀯𑀼𑀢𑁆𑀢𑀁 𑀲𑁂𑀝𑁆𑀞𑀕𑀼𑀡𑀲𑀳𑀘𑀭𑀡𑀢𑁄. 𑀅𑀣 𑀯𑀸 𑀯𑀼𑀘𑁆𑀘𑀢𑀻𑀢𑀺 𑀯𑀘𑀦𑀁, 𑀅𑀢𑁆𑀣𑁄. 𑀪𑀕𑀯𑀸𑀢𑀺 𑀯𑀘𑀦𑀁 𑀲𑁂𑀝𑁆𑀞𑀦𑁆𑀢𑀺 𑀪𑀕𑀯𑀸𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦 𑀯𑀘𑀦𑀻𑀬𑁄 𑀬𑁄 𑀅𑀢𑁆𑀣𑁄, 𑀲𑁄 𑀲𑁂𑀝𑁆𑀞𑁄𑀢𑀺 𑀅𑀢𑁆𑀣𑁄. 𑀪𑀕𑀯𑀸𑀢𑀺 𑀯𑀘𑀦𑀫𑀼𑀢𑁆𑀢𑀫𑀦𑁆𑀢𑀺 𑀏𑀢𑁆𑀣𑀸𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀕𑀸𑀭𑀯𑀬𑀼𑀢𑁆𑀢𑁄𑀢𑀺 𑀕𑀭𑀼𑀪𑀸𑀯𑀬𑀼𑀢𑁆𑀢𑁄 𑀕𑀭𑀼𑀕𑀼𑀡𑀬𑁄𑀕𑀢𑁄 𑀯𑀺𑀲𑁂𑀲𑀕𑀭𑀼𑀓𑀭𑀡𑀸𑀭𑀳𑀢𑀸𑀬 𑀯𑀸 𑀕𑀸𑀭𑀯𑀬𑀼𑀢𑁆𑀢𑁄. 𑀏𑀯𑀁 𑀕𑀼𑀡𑀯𑀺𑀲𑀺𑀝𑁆𑀞𑀲𑀢𑁆𑀢𑀼𑀢𑁆𑀢𑀫𑀕𑀭𑀼𑀕𑀸𑀭𑀯𑀸𑀥𑀺𑀯𑀘𑀦𑀁 𑀪𑀕𑀯𑀸𑀢𑀺 𑀇𑀤𑀁 𑀯𑀘𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀧𑀺𑀘 𑁋

‘‘𑀪𑀕𑀻 𑀪𑀚𑀻 𑀪𑀸𑀕𑀻 𑀯𑀺𑀪𑀢𑁆𑀢𑀯𑀸 𑀇𑀢𑀺,

𑀅𑀓𑀸𑀲𑀺 𑀪𑀕𑁆𑀕𑀦𑁆𑀢𑀺 𑀕𑀭𑀽𑀢𑀺 𑀪𑀸𑀕𑁆𑀬𑀯𑀸;

𑀩𑀳𑀽𑀳𑀺 𑀜𑀸𑀬𑁂𑀳𑀺 𑀲𑀼𑀪𑀸𑀯𑀺𑀢𑀢𑁆𑀢𑀦𑁄,

𑀪𑀯𑀦𑁆𑀢𑀕𑁄 𑀲𑁄 𑀪𑀕𑀯𑀸𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑁋

𑀦𑀺𑀤𑁆𑀤𑁂𑀲𑁂 (𑀫𑀳𑀸𑀦𑀺. 𑁮𑁪) 𑀆𑀕𑀢𑀦𑀬𑁂𑀦 𑁋

‘‘𑀪𑀸𑀕𑁆𑀬𑀯𑀸 𑀪𑀕𑁆𑀕𑀯𑀸 𑀬𑀼𑀢𑁆𑀢𑁄, 𑀪𑀕𑁂𑀳𑀺 𑀘 𑀯𑀺𑀪𑀢𑁆𑀢𑀯𑀸;

𑀪𑀢𑁆𑀢𑀯𑀸 𑀯𑀦𑁆𑀢𑀕𑀫𑀦𑁄, 𑀪𑀯𑁂𑀲𑀼 𑀪𑀕𑀯𑀸 𑀢𑀢𑁄’’𑀢𑀺. 𑁋

𑀇𑀫𑀸𑀬 𑀕𑀸𑀣𑀸𑀬 𑀘 𑀯𑀲𑁂𑀦 𑀪𑀕𑀯𑀸𑀢𑀺 𑀧𑀤𑀲𑁆𑀲 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀧𑀦𑀸𑀬𑀁 𑀅𑀢𑁆𑀣𑁄 𑀲𑀩𑁆𑀩𑀸𑀓𑀸𑀭𑁂𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁧𑁪𑁨) 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀯𑀭𑀺𑀢𑀩𑁆𑀩𑁄.

𑀅𑀧𑀺𑀘 𑀪𑀸𑀕𑁂 𑀯𑀦𑀺, 𑀪𑀕𑁂 𑀯𑀸 𑀯𑀫𑀻𑀢𑀺 𑀪𑀕𑀯𑀸. 𑀢𑀣𑀸𑀕𑀢𑁄 𑀳𑀺 𑀤𑀸𑀦𑀲𑀻𑀮𑀸𑀤𑀺𑀧𑀸𑀭𑀫𑀺𑀥𑀫𑁆𑀫𑁂 𑀛𑀸𑀦𑀯𑀺𑀫𑁄𑀓𑁆𑀔𑀸𑀤𑀺𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁂 𑀯𑀦𑀺 𑀪𑀚𑀺 𑀲𑁂𑀯𑀺 𑀩𑀳𑀼𑀮𑀫𑀓𑀸𑀲𑀺, 𑀢𑀲𑁆𑀫𑀸 𑀪𑀕𑀯𑀸. 𑀅𑀣 𑀯𑀸 𑀢𑁂𑀬𑁂𑀯 ‘‘𑀯𑁂𑀦𑁂𑀬𑁆𑀬𑀲𑀢𑁆𑀢𑀲𑀦𑁆𑀢𑀸𑀦𑁂𑀲𑀼 𑀓𑀣𑀁 𑀦𑀼 𑀔𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀼’’𑀦𑁆𑀢𑀺 𑀯𑀦𑀺 𑀅𑀪𑀺𑀧𑀢𑁆𑀣𑀬𑀻𑀢𑀺 𑀪𑀕𑀯𑀸. 𑀅𑀣 𑀯𑀸 𑀪𑀕𑀲𑀗𑁆𑀔𑀸𑀢𑀁 𑀇𑀲𑁆𑀲𑀭𑀺𑀬𑀁 𑀬𑀲𑀜𑁆𑀘 𑀯𑀫𑀺 𑀉𑀕𑁆𑀕𑀺𑀭𑀺 𑀔𑁂𑀴𑀧𑀺𑀡𑁆𑀟𑀁 𑀯𑀺𑀬 𑀅𑀦𑀧𑁂𑀓𑁆𑀔𑁄 𑀙𑀟𑁆𑀟𑀬𑀻𑀢𑀺 𑀪𑀕𑀯𑀸. 𑀢𑀣𑀸 𑀳𑀺 𑀢𑀣𑀸𑀕𑀢𑁄 𑀳𑀢𑁆𑀣𑀕𑀢𑀁 𑀘𑀓𑁆𑀓𑀯𑀢𑁆𑀢𑀺𑀲𑀺𑀭𑀺𑀁 𑀤𑁂𑀯𑀮𑁄𑀓𑀸𑀥𑀺𑀧𑀘𑁆𑀘𑀲𑀤𑀺𑀲𑀁 𑀘𑀸𑀢𑀼𑀤𑁆𑀤𑀻𑀧𑀺𑀲𑁆𑀲𑀭𑀺𑀬𑀁, 𑀘𑀓𑁆𑀓𑀯𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀲𑀦𑁆𑀦𑀺𑀲𑁆𑀲𑀬𑀜𑁆𑀘 𑀲𑀢𑁆𑀢𑀭𑀢𑀦𑀲𑀫𑀼𑀚𑁆𑀚𑀮𑀁 𑀬𑀲𑀁 𑀢𑀺𑀡𑀸𑀬𑀧𑀺 𑀅𑀫𑀜𑁆𑀜𑀫𑀸𑀦𑁄 𑀦𑀺𑀭𑀧𑁂𑀓𑁆𑀔𑁄 𑀧𑀳𑀸𑀬 𑀅𑀪𑀺𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄, 𑀢𑀲𑁆𑀫𑀸 𑀇𑀫𑁂 𑀲𑀺𑀭𑀺𑀆𑀤𑀺𑀓𑁂 𑀪𑀕𑁂 𑀯𑀫𑀻𑀢𑀺 𑀪𑀕𑀯𑀸. 𑀅𑀣 𑀯𑀸 𑀪𑀸𑀦𑀺 𑀦𑀸𑀫 𑀦𑀓𑁆𑀔𑀢𑁆𑀢𑀸𑀦𑀺, 𑀢𑁂𑀳𑀺 𑀲𑀫𑀁 𑀕𑀘𑁆𑀙𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀻𑀢𑀺 𑀪𑀕𑀸. 𑀲𑀺𑀦𑁂𑀭𑀼𑀬𑀼𑀕𑀦𑁆𑀥𑀭𑀉𑀢𑁆𑀢𑀭𑀓𑀼𑀭𑀼𑀳𑀺𑀫𑀯𑀦𑁆𑀢𑀸𑀤𑀺𑀪𑀸𑀚𑀦𑀮𑁄𑀓𑀯𑀺𑀲𑁂𑀲𑀲𑀦𑁆𑀦𑀺𑀲𑁆𑀲𑀬𑀲𑁄𑀪𑀸 𑀓𑀧𑁆𑀧𑀝𑁆𑀞𑀺𑀢𑀺𑀪𑀸𑀯𑀢𑁄, 𑀢𑁂𑀧𑀺 𑀪𑀕𑁂 𑀯𑀫𑀺, 𑀢𑀦𑁆𑀦𑀺𑀯𑀸𑀲𑀺𑀲𑀢𑁆𑀢𑀸𑀯𑀸𑀲𑀲𑀫𑀢𑀺𑀓𑁆𑀓𑀫𑀦𑀢𑁄 𑀢𑀧𑁆𑀧𑀝𑀺𑀩𑀤𑁆𑀥𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑁂𑀦 𑀧𑀚𑀳𑀻𑀢𑀺. 𑀏𑀯𑀫𑁆𑀧𑀺 𑀪𑀕𑁂 𑀯𑀫𑀻𑀢𑀺 𑀪𑀕𑀯𑀸𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀪𑀕𑀯𑀸𑀢𑀺 𑀧𑀤𑀲𑁆𑀲 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀢𑁆𑀢𑀸𑀯𑀢𑀸 𑀘𑁂𑀢𑁆𑀣 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀯𑀘𑀦𑁂𑀦 𑀬𑀣𑀸𑀲𑀼𑀢𑀁 𑀥𑀫𑁆𑀫𑀁 𑀲𑀯𑀦𑀯𑀲𑁂𑀦 𑀪𑀸𑀲𑀦𑁆𑀢𑁄 𑀪𑀕𑀯𑀢𑁄 𑀥𑀫𑁆𑀫𑀲𑀭𑀻𑀭𑀁 𑀧𑀘𑁆𑀘𑀓𑁆𑀔𑀁 𑀓𑀭𑁄𑀢𑀺, 𑀢𑁂𑀦 ‘‘𑀦𑀬𑀺𑀤𑀁 𑀅𑀢𑀺𑀓𑁆𑀓𑀦𑁆𑀢𑀲𑀢𑁆𑀣𑀼𑀓𑀁 𑀧𑀸𑀯𑀘𑀦𑀁, 𑀅𑀬𑀁 𑀯𑁄 𑀲𑀢𑁆𑀣𑀸’’𑀢𑀺 𑀲𑀢𑁆𑀣𑀼 𑀅𑀤𑀲𑁆𑀲𑀦𑁂𑀦 𑀉𑀓𑁆𑀓𑀡𑁆𑀞𑀺𑀢𑀁 𑀚𑀦𑀁 𑀲𑀫𑀲𑁆𑀲𑀸𑀲𑁂𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 ‘‘𑀬𑁄 𑀔𑁄, 𑀆𑀦𑀦𑁆𑀤, 𑀫𑀬𑀸 𑀥𑀫𑁆𑀫𑁄 𑀘 𑀯𑀺𑀦𑀬𑁄 𑀘 𑀤𑁂𑀲𑀺𑀢𑁄 𑀧𑀜𑁆𑀜𑀢𑁆𑀢𑁄, 𑀲𑁄 𑀯𑁄 𑀫𑀫𑀘𑁆𑀘𑀬𑁂𑀦 𑀲𑀢𑁆𑀣𑀸’’𑀢𑀺 (𑀤𑀻. 𑀦𑀺. 𑁨.𑁨𑁧𑁬; 𑀫𑀺. 𑀧. 𑁪.𑁧.𑁧). 𑀏𑀓𑀁 𑀲𑀫𑀬𑀁 𑀪𑀕𑀯𑀸𑀢𑀺 𑀯𑀘𑀦𑁂𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀪𑀕𑀯𑀢𑁄 𑀅𑀯𑀺𑀚𑁆𑀚𑀫𑀸𑀦𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀭𑀽𑀧𑀓𑀸𑀬𑀧𑀭𑀺𑀦𑀺𑀩𑁆𑀩𑀸𑀦𑀁 𑀲𑀸𑀥𑁂𑀢𑀺, 𑀢𑁂𑀦 ‘‘𑀏𑀯𑀁𑀯𑀺𑀥𑀲𑁆𑀲 𑀦𑀸𑀫 𑀥𑀫𑁆𑀫𑀲𑁆𑀲 𑀤𑁂𑀲𑁂𑀢𑀸 𑀤𑀲𑀩𑀮𑀥𑀭𑁄 𑀯𑀚𑀺𑀭𑀲𑀗𑁆𑀖𑀸𑀢𑀲𑀫𑀸𑀦𑀓𑀸𑀬𑁄 𑀲𑁄𑀧𑀺 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀓𑁂𑀦𑀜𑁆𑀜𑁂𑀦 𑀚𑀻𑀯𑀺𑀢𑁂 𑀆𑀲𑀸 𑀚𑀦𑁂𑀢𑀩𑁆𑀩𑀸’’𑀢𑀺 𑀚𑀻𑀯𑀺𑀢𑀫𑀤𑀫𑀢𑁆𑀢𑀁 𑀚𑀦𑀁 𑀲𑀁𑀯𑁂𑀚𑁂𑀢𑀺, 𑀲𑀤𑁆𑀥𑀫𑁆𑀫𑁂 𑀘𑀲𑁆𑀲 𑀉𑀲𑁆𑀲𑀸𑀳𑀁 𑀚𑀦𑁂𑀢𑀺.

𑀏𑀯𑀦𑁆𑀢𑀺 𑀘 𑀪𑀡𑀦𑁆𑀢𑁄 𑀤𑁂𑀲𑀦𑀸𑀲𑀫𑁆𑀧𑀢𑁆𑀢𑀺𑀁 𑀦𑀺𑀤𑁆𑀤𑀺𑀲𑀢𑀺, 𑀯𑀓𑁆𑀔𑀫𑀸𑀦𑀲𑁆𑀲 𑀲𑀓𑀮𑀲𑀼𑀢𑁆𑀢𑀲𑁆𑀲 𑀏𑀯𑀦𑁆𑀢𑀺 𑀦𑀺𑀤𑀲𑁆𑀲𑀦𑀢𑁄. 𑀫𑁂 𑀲𑀼𑀢𑀦𑁆𑀢𑀺 𑀲𑀸𑀯𑀓𑀲𑀫𑁆𑀧𑀢𑁆𑀢𑀺𑀁 𑀲𑀯𑀦𑀲𑀫𑁆𑀧𑀢𑁆𑀢𑀺𑀜𑁆𑀘 𑀦𑀺𑀤𑁆𑀤𑀺𑀲𑀢𑀺, 𑀧𑀝𑀺𑀲𑀫𑁆𑀪𑀺𑀤𑀸𑀧𑀢𑁆𑀢𑁂𑀦 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀪𑀕𑀯𑀢𑀸 𑀏𑀢𑀤𑀕𑁆𑀕𑁂 𑀞𑀧𑀺𑀢𑁂𑀦 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑁂𑀦 𑀲𑀼𑀢𑀪𑀸𑀯𑀤𑀻𑀧𑀦𑀢𑁄 ‘‘𑀢𑀜𑁆𑀘 𑀔𑁄 𑀫𑀬𑀸𑀯 𑀲𑀼𑀢𑀁, 𑀦 𑀅𑀦𑀼𑀲𑁆𑀲𑀼𑀢𑀺𑀓𑀁, 𑀦 𑀧𑀭𑀫𑁆𑀧𑀭𑀸𑀪𑀢’’𑀦𑁆𑀢𑀺 𑀇𑀫𑀲𑁆𑀲 𑀘𑀢𑁆𑀣𑀲𑁆𑀲 𑀤𑀻𑀧𑀦𑀢𑁄. 𑀏𑀓𑀁 𑀲𑀫𑀬𑀦𑁆𑀢𑀺 𑀓𑀸𑀮𑀲𑀫𑁆𑀧𑀢𑁆𑀢𑀺𑀁 𑀦𑀺𑀤𑁆𑀤𑀺𑀲𑀢𑀺 𑀪𑀕𑀯𑀢𑁄 𑀉𑀭𑀼𑀯𑁂𑀮𑀸𑀬𑀁 𑀯𑀺𑀳𑀭𑀡𑀲𑀫𑀬𑀪𑀸𑀯𑁂𑀦 𑀩𑀼𑀤𑁆𑀥𑀼𑀧𑁆𑀧𑀸𑀤𑀧𑁆𑀧𑀝𑀺𑀫𑀡𑁆𑀟𑀺𑀢𑀪𑀸𑀯𑀤𑀻𑀧𑀦𑀢𑁄. 𑀩𑀼𑀤𑁆𑀥𑀼𑀧𑁆𑀧𑀸𑀤𑀧𑀭𑀫𑀸 𑀳𑀺 𑀓𑀸𑀮𑀲𑀫𑁆𑀧𑀤𑀸. 𑀪𑀕𑀯𑀸𑀢𑀺 𑀤𑁂𑀲𑀓𑀲𑀫𑁆𑀧𑀢𑁆𑀢𑀺𑀁 𑀦𑀺𑀤𑁆𑀤𑀺𑀲𑀢𑀺 𑀕𑀼𑀡𑀯𑀺𑀲𑀺𑀝𑁆𑀞𑀲𑀢𑁆𑀢𑀼𑀢𑁆𑀢𑀫𑀕𑀭𑀼𑀪𑀸𑀯𑀤𑀻𑀧𑀦𑀢𑁄.

𑀉𑀭𑀼𑀯𑁂𑀮𑀸𑀬𑀦𑁆𑀢𑀺 𑀫𑀳𑀸𑀯𑁂𑀮𑀸𑀬𑀁, 𑀫𑀳𑀦𑁆𑀢𑁂 𑀯𑀸𑀮𑀼𑀓𑀸𑀭𑀸𑀲𑀺𑀫𑁆𑀳𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀉𑀭𑀽𑀢𑀺 𑀯𑀸𑀮𑀼𑀓𑀸 𑀯𑀼𑀘𑁆𑀘𑀢𑀺, 𑀯𑁂𑀮𑀸𑀢𑀺 𑀫𑀭𑀺𑀬𑀸𑀤𑀸. 𑀯𑁂𑀮𑀸𑀢𑀺𑀓𑁆𑀓𑀫𑀦𑀳𑁂𑀢𑀼 𑀆𑀪𑀢𑀸 𑀉𑀭𑀼 𑀉𑀭𑀼𑀯𑁂𑀮𑀸𑀢𑀺 𑀏𑀯𑀫𑁆𑀧𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀅𑀢𑀻𑀢𑁂 𑀓𑀺𑀭 𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀤𑀲𑀲𑀳𑀲𑁆𑀲𑀢𑀸𑀧𑀲𑀸 𑀢𑀲𑁆𑀫𑀺𑀁 𑀧𑀤𑁂𑀲𑁂 𑀯𑀺𑀳𑀭𑀦𑁆𑀢𑀸 ‘‘𑀓𑀸𑀬𑀓𑀫𑁆𑀫𑀯𑀘𑀻𑀓𑀫𑁆𑀫𑀸𑀦𑀺 𑀧𑀭𑁂𑀲𑀫𑁆𑀧𑀺 𑀧𑀸𑀓𑀝𑀸𑀦𑀺 𑀳𑁄𑀦𑁆𑀢𑀺, 𑀫𑀦𑁄𑀓𑀫𑁆𑀫𑀁 𑀧𑀦 𑀅𑀧𑀸𑀓𑀝𑀁. 𑀢𑀲𑁆𑀫𑀸 𑀬𑁄 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀁 𑀯𑀺𑀢𑀓𑁆𑀓𑁂𑀢𑀺, 𑀲𑁄 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀘𑁄𑀤𑁂𑀢𑁆𑀯𑀸 𑀧𑀢𑁆𑀢𑀧𑀼𑀝𑁂𑀦 𑀯𑀸𑀮𑀼𑀓𑀁 𑀆𑀳𑀭𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀆𑀓𑀺𑀭𑀢𑀼, 𑀇𑀤𑀫𑀲𑁆𑀲 𑀤𑀡𑁆𑀟𑀓𑀫𑁆𑀫’’𑀦𑁆𑀢𑀺 𑀓𑀢𑀺𑀓𑀯𑀢𑁆𑀢𑀁 𑀓𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀬𑁄 𑀢𑀸𑀤𑀺𑀲𑀁 𑀯𑀺𑀢𑀓𑁆𑀓𑀁 𑀯𑀺𑀢𑀓𑁆𑀓𑁂𑀢𑀺, 𑀲𑁄 𑀢𑀢𑁆𑀣 𑀧𑀢𑁆𑀢𑀧𑀼𑀝𑁂𑀦 𑀯𑀸𑀮𑀼𑀓𑀁 𑀆𑀳𑀭𑀺𑀢𑁆𑀯𑀸 𑀆𑀓𑀺𑀭𑀢𑀺. 𑀏𑀯𑀁 𑀢𑀢𑁆𑀣 𑀅𑀦𑀼𑀓𑁆𑀓𑀫𑁂𑀦 𑀫𑀳𑀸𑀯𑀸𑀮𑀼𑀓𑀸𑀭𑀸𑀲𑀺 𑀚𑀸𑀢𑁄, 𑀢𑀢𑁄 𑀦𑀁 𑀧𑀘𑁆𑀙𑀺𑀫𑀸 𑀚𑀦𑀢𑀸 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀘𑁂𑀢𑀺𑀬𑀝𑁆𑀞𑀸𑀦𑀫𑀓𑀸𑀲𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀉𑀭𑀼𑀯𑁂𑀮𑀸𑀬𑀦𑁆𑀢𑀺 𑀫𑀳𑀸𑀯𑁂𑀮𑀸𑀬𑀁, 𑀫𑀳𑀦𑁆𑀢𑁂 𑀯𑀸𑀮𑀼𑀓𑀸𑀭𑀸𑀲𑀺𑀫𑁆𑀳𑀻𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄’’𑀢𑀺.

𑀯𑀺𑀳𑀭𑀢𑀻𑀢𑀺 𑀅𑀯𑀺𑀲𑁂𑀲𑁂𑀦 𑀇𑀭𑀺𑀬𑀸𑀧𑀣𑀤𑀺𑀩𑁆𑀩𑀩𑁆𑀭𑀳𑁆𑀫𑀅𑀭𑀺𑀬𑀯𑀺𑀳𑀸𑀭𑁂𑀲𑀼 𑀅𑀜𑁆𑀜𑀢𑀭𑀯𑀺𑀳𑀸𑀭𑀲𑀫𑀗𑁆𑀕𑀺𑀢𑀸𑀧𑀭𑀺𑀤𑀻𑀧𑀦𑀁. 𑀇𑀥 𑀧𑀦 𑀞𑀸𑀦𑀦𑀺𑀲𑀚𑁆𑀚𑀸𑀕𑀫𑀦𑀲𑀬𑀦𑀧𑁆𑀧𑀪𑁂𑀤𑁂𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀆𑀲𑀦𑀲𑀗𑁆𑀔𑀸𑀢𑀇𑀭𑀺𑀬𑀸𑀧𑀣𑀲𑀫𑀸𑀬𑁄𑀕𑀧𑀭𑀺𑀤𑀻𑀧𑀦𑀁 𑀅𑀭𑀺𑀬𑀯𑀺𑀳𑀸𑀭𑀲𑀫𑀗𑁆𑀕𑀺𑀢𑀸𑀧𑀭𑀺𑀤𑀻𑀧𑀦𑀜𑁆𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀬𑀲𑁆𑀫𑀸 𑀏𑀓𑀁 𑀇𑀭𑀺𑀬𑀸𑀧𑀣𑀩𑀸𑀥𑀦𑀁 𑀅𑀜𑁆𑀜𑁂𑀦 𑀇𑀭𑀺𑀬𑀸𑀧𑀣𑁂𑀦 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀧𑀭𑀺𑀧𑀢𑀦𑁆𑀢𑀁 𑀅𑀢𑁆𑀢𑀪𑀸𑀯𑀁 𑀳𑀭𑀢𑀺 𑀧𑀯𑀢𑁆𑀢𑁂𑀢𑀺, 𑀢𑀲𑁆𑀫𑀸 𑀯𑀺𑀳𑀭𑀢𑀻𑀢𑀺 𑀧𑀤𑀲𑁆𑀲 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑀯𑀲𑁂𑀦𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀲𑁆𑀫𑀸 𑀧𑀦 𑀪𑀕𑀯𑀸 𑀤𑀺𑀩𑁆𑀩𑀯𑀺𑀳𑀸𑀭𑀸𑀤𑀻𑀳𑀺 𑀲𑀢𑁆𑀢𑀸𑀦𑀁 𑀯𑀺𑀯𑀺𑀥𑀁 𑀳𑀺𑀢𑀁 𑀳𑀭𑀢𑀺 𑀉𑀧𑀳𑀭𑀢𑀺 𑀉𑀧𑀦𑁂𑀢𑀺 𑀉𑀧𑁆𑀧𑀸𑀤𑁂𑀢𑀺, 𑀢𑀲𑁆𑀫𑀸 𑀢𑁂𑀲𑀫𑁆𑀧𑀺 𑀯𑀲𑁂𑀦 𑀯𑀺𑀯𑀺𑀥𑀁 𑀳𑀭𑀢𑀻𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀦𑀚𑁆𑀚𑀸𑀢𑀺 𑀦𑀤𑀢𑀺 𑀲𑀦𑁆𑀤𑀢𑀻𑀢𑀺 𑀦𑀤𑀻, 𑀢𑀲𑁆𑀲𑀸 𑀦𑀚𑁆𑀚𑀸, 𑀦𑀤𑀺𑀬𑀸 𑀦𑀺𑀦𑁆𑀦𑀕𑀸𑀬𑀸𑀢𑀺 𑀅𑀢𑁆𑀣𑁄. 𑀦𑁂𑀭𑀜𑁆𑀚𑀭𑀸𑀬𑀸𑀢𑀺 𑀦𑁂𑀮𑀁 𑀚𑀮𑀫𑀲𑁆𑀲𑀸𑀢𑀺 ‘‘𑀦𑁂𑀮𑀜𑁆𑀚𑀮𑀸𑀬𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀮𑀓𑀸𑀭𑀲𑁆𑀲 𑀭𑀓𑀸𑀭𑀁 𑀓𑀢𑁆𑀯𑀸 ‘‘𑀦𑁂𑀭𑀜𑁆𑀚𑀭𑀸𑀬𑀸’’𑀢𑀺 𑀯𑀼𑀢𑁆𑀢𑀁, 𑀓𑀤𑁆𑀤𑀫𑀲𑁂𑀯𑀸𑀮𑀧𑀡𑀓𑀸𑀤𑀺𑀤𑁄𑀲𑀭𑀳𑀺𑀢𑀲𑀮𑀺𑀮𑀸𑀬𑀸𑀢𑀺 𑀅𑀢𑁆𑀣𑁄. 𑀓𑁂𑀘𑀺 ‘‘𑀦𑀻𑀮𑀚𑀮𑀸𑀬𑀸𑀢𑀺 𑀯𑀢𑁆𑀢𑀩𑁆𑀩𑁂 𑀦𑁂𑀭𑀜𑁆𑀚𑀭𑀸𑀬𑀸𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺. 𑀦𑀸𑀫𑀫𑁂𑀯 𑀯𑀸 𑀏𑀢𑀁 𑀏𑀢𑀺𑀲𑁆𑀲𑀸 𑀦𑀤𑀺𑀬𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀲𑁆𑀲𑀸 𑀦𑀤𑀺𑀬𑀸 𑀢𑀻𑀭𑁂 𑀬𑀢𑁆𑀣 𑀪𑀕𑀯𑀸 𑀯𑀺𑀳𑀸𑀲𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀩𑁄𑀥𑀺 𑀯𑀼𑀘𑁆𑀘𑀢𑀺 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀜𑀸𑀡’’𑀦𑁆𑀢𑀺 𑀏𑀢𑁆𑀣 (𑀘𑀽𑀴𑀦𑀺. 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀦𑀺𑀤𑁆𑀤𑁂𑀲 𑁧𑁨𑁧) 𑀫𑀕𑁆𑀕𑀜𑀸𑀡𑀁 𑀩𑁄𑀥𑀻𑀢𑀺 𑀯𑀼𑀢𑁆𑀢𑀁. ‘‘𑀧𑀧𑁆𑀧𑁄𑀢𑀺 𑀩𑁄𑀥𑀺𑀁 𑀯𑀭𑀪𑀽𑀭𑀺𑀫𑁂𑀥𑀲𑁄’’𑀢𑀺 𑀏𑀢𑁆𑀣 (𑀤𑀻. 𑀦𑀺. 𑁩.𑁨𑁧𑁭) 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁. 𑀢𑀤𑀼𑀪𑀬𑀫𑁆𑀧𑀺 𑀩𑁄𑀥𑀺𑀁 𑀪𑀕𑀯𑀸 𑀏𑀢𑁆𑀣 𑀧𑀢𑁆𑀢𑁄𑀢𑀺 𑀭𑀼𑀓𑁆𑀔𑁄𑀧𑀺 𑀩𑁄𑀥𑀺𑀭𑀼𑀓𑁆𑀔𑁄𑀢𑁆𑀯𑁂𑀯 𑀦𑀸𑀫𑀁 𑀮𑀪𑀺. 𑀅𑀣 𑀯𑀸 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀩𑀼𑀚𑁆𑀛𑀻𑀢𑀺 𑀪𑀕𑀯𑀸 𑀩𑁄𑀥𑀺, 𑀢𑁂𑀦 𑀩𑀼𑀚𑁆𑀛𑀦𑁆𑀢𑁂𑀦 𑀲𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸 𑀲𑁄 𑀭𑀼𑀓𑁆𑀔𑁄𑀧𑀺 𑀩𑁄𑀥𑀺𑀭𑀼𑀓𑁆𑀔𑁄𑀢𑀺 𑀦𑀸𑀫𑀁 𑀮𑀪𑀺, 𑀢𑀲𑁆𑀲 𑀩𑁄𑀥𑀺𑀭𑀼𑀓𑁆𑀔𑀲𑁆𑀲. 𑀫𑀽𑀮𑁂𑀢𑀺 𑀲𑀫𑀻𑀧𑁂. 𑀅𑀬𑀜𑁆𑀳𑀺 𑀫𑀽𑀮𑀲𑀤𑁆𑀤𑁄 ‘‘𑀫𑀽𑀮𑀸𑀦𑀺 𑀉𑀤𑁆𑀥𑀭𑁂𑀬𑁆𑀬 𑀅𑀦𑁆𑀢𑀫𑀲𑁄 𑀉𑀲𑀻𑀭𑀦𑀸𑀴𑀫𑀢𑁆𑀢𑀸𑀦𑀺𑀧𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁧𑁯𑁫) 𑀫𑀽𑀮𑀫𑀽𑀮𑁂 𑀤𑀺𑀲𑁆𑀲𑀢𑀺. ‘‘𑀮𑁄𑀪𑁄 𑀅𑀓𑀼𑀲𑀮𑀫𑀽𑀮’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁩.𑁩𑁦𑁫) 𑀅𑀲𑀸𑀥𑀸𑀭𑀡𑀳𑁂𑀢𑀼𑀫𑁆𑀳𑀺. ‘‘𑀬𑀸𑀯𑀢𑀸 𑀫𑀚𑁆𑀛𑀦𑁆𑀳𑀺𑀓𑁂 𑀓𑀸𑀮𑁂 𑀙𑀸𑀬𑀸 𑀨𑀭𑀢𑀺, 𑀦𑀺𑀯𑀸𑀢𑁂 𑀧𑀡𑁆𑀡𑀸𑀦𑀺 𑀧𑀢𑀦𑁆𑀢𑀺, 𑀏𑀢𑁆𑀢𑀸𑀯𑀢𑀸 𑀭𑀼𑀓𑁆𑀔𑀫𑀽𑀮’’𑀦𑁆𑀢𑀺𑀆𑀤𑀻𑀲𑀼 𑀲𑀫𑀻𑀧𑁂. 𑀇𑀥𑀸𑀧𑀺 𑀲𑀫𑀻𑀧𑁂 𑀅𑀥𑀺𑀧𑁆𑀧𑁂𑀢𑁄, 𑀢𑀲𑁆𑀫𑀸 𑀩𑁄𑀥𑀺𑀭𑀼𑀓𑁆𑀔𑀲𑁆𑀲 𑀫𑀽𑀮𑁂 𑀲𑀫𑀻𑀧𑁂𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀧𑀞𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀧𑀞𑀫𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸, 𑀲𑀩𑁆𑀩𑀧𑀞𑀫𑀁𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀢𑀸𑀯𑀢𑀸 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑁂𑀦 𑀉𑀤𑀸𑀦𑀤𑁂𑀲𑀦𑀸𑀬 𑀦𑀺𑀤𑀸𑀦𑀁 𑀞𑀧𑁂𑀦𑁆𑀢𑁂𑀦 𑀓𑀸𑀮𑀤𑁂𑀲𑀤𑁂𑀲𑀓𑀸𑀧𑀤𑁂𑀲𑀸 𑀲𑀳 𑀯𑀺𑀲𑁂𑀲𑁂𑀦 𑀧𑀓𑀸𑀲𑀺𑀢𑀸 𑀳𑁄𑀦𑁆𑀢𑀺.

𑀏𑀢𑁆𑀣𑀸𑀳 ‘‘𑀓𑀲𑁆𑀫𑀸 𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀳𑁂 𑀓𑀬𑀺𑀭𑀫𑀸𑀦𑁂 𑀦𑀺𑀤𑀸𑀦𑀯𑀘𑀦𑀁 𑀯𑀼𑀢𑁆𑀢𑀁, 𑀦𑀦𑀼 𑀪𑀕𑀯𑀢𑀸 𑀪𑀸𑀲𑀺𑀢𑀯𑀘𑀦𑀲𑁆𑀲𑁂𑀯 𑀲𑀗𑁆𑀕𑀳𑁄 𑀓𑀸𑀢𑀩𑁆𑀩𑁄’’𑀢𑀺? 𑀯𑀼𑀘𑁆𑀘𑀢𑁂 𑁋 𑀤𑁂𑀲𑀦𑀸𑀬 𑀘𑀺𑀭𑀝𑁆𑀞𑀺𑀢𑀺𑀅𑀲𑀫𑁆𑀫𑁄𑀲𑀲𑀤𑁆𑀥𑁂𑀬𑁆𑀬𑀪𑀸𑀯𑀲𑀫𑁆𑀧𑀸𑀤𑀦𑀢𑁆𑀣𑀁. 𑀓𑀸𑀮𑀤𑁂𑀲𑀤𑁂𑀲𑀓𑀯𑀢𑁆𑀣𑀼𑀆𑀤𑀻𑀳𑀺 𑀉𑀧𑀦𑀺𑀩𑀦𑁆𑀥𑀺𑀢𑁆𑀯𑀸 𑀞𑀧𑀺𑀢𑀸 𑀳𑀺 𑀤𑁂𑀲𑀦𑀸 𑀘𑀺𑀭𑀝𑁆𑀞𑀺𑀢𑀺𑀓𑀸 𑀳𑁄𑀢𑀺 𑀅𑀲𑀫𑁆𑀫𑁄𑀲𑀸 𑀲𑀤𑁆𑀥𑁂𑀬𑁆𑀬𑀸 𑀘 𑀤𑁂𑀲𑀓𑀸𑀮𑀓𑀢𑁆𑀢𑀼𑀳𑁂𑀢𑀼𑀦𑀺𑀫𑀺𑀢𑁆𑀢𑁂𑀳𑀺 𑀉𑀧𑀦𑀺𑀩𑀤𑁆𑀥𑁄 𑀯𑀺𑀬 𑀯𑁄𑀳𑀸𑀭𑀯𑀺𑀦𑀺𑀘𑁆𑀙𑀬𑁄. 𑀢𑁂𑀦𑁂𑀯 𑀘 𑀆𑀬𑀲𑁆𑀫𑀢𑀸 𑀫𑀳𑀸𑀓𑀲𑁆𑀲𑀧𑁂𑀦 ‘‘𑀧𑀞𑀫𑀁, 𑀆𑀯𑀼𑀲𑁄 𑀆𑀦𑀦𑁆𑀤, 𑀉𑀤𑀸𑀦𑀁 𑀓𑀢𑁆𑀣 𑀪𑀸𑀲𑀺𑀢’’𑀦𑁆𑀢𑀺𑀆𑀤𑀺𑀦𑀸 𑀤𑁂𑀲𑀸𑀤𑀻𑀲𑀼 𑀧𑀼𑀘𑁆𑀙𑀸𑀬 𑀓𑀢𑀸𑀬 𑀯𑀺𑀲𑁆𑀲𑀚𑁆𑀚𑀦𑀁 𑀓𑀭𑁄𑀦𑁆𑀢𑁂𑀦 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑁂𑀦 ‘‘𑀏𑀯𑀁 𑀫𑁂 𑀲𑀼𑀢’’𑀦𑁆𑀢𑀺𑀆𑀤𑀺𑀦𑀸 𑀉𑀤𑀸𑀦𑀲𑁆𑀲 𑀦𑀺𑀤𑀸𑀦𑀁 𑀪𑀸𑀲𑀺𑀢𑀦𑁆𑀢𑀺.

𑀅𑀧𑀺𑀘 𑀲𑀢𑁆𑀣𑀼 𑀲𑀫𑁆𑀧𑀢𑁆𑀢𑀺𑀧𑀓𑀸𑀲𑀦𑀢𑁆𑀣𑀁 𑀦𑀺𑀤𑀸𑀦𑀯𑀘𑀦𑀁. 𑀢𑀣𑀸𑀕𑀢𑀲𑁆𑀲 𑀳𑀺 𑀪𑀕𑀯𑀢𑁄 𑀧𑀼𑀩𑁆𑀩𑀭𑀘𑀦𑀸𑀦𑀼𑀫𑀸𑀦𑀸𑀕𑀫𑀢𑀓𑁆𑀓𑀸𑀪𑀸𑀯𑀢𑁄 𑀲𑀫𑁆𑀩𑀼𑀤𑁆𑀥𑀢𑁆𑀢𑀲𑀺𑀤𑁆𑀥𑀺. 𑀦 𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀼𑀩𑁆𑀩𑀭𑀘𑀦𑀸𑀤𑀻𑀳𑀺 𑀅𑀢𑁆𑀣𑁄 𑀅𑀢𑁆𑀣𑀺 𑀲𑀩𑁆𑀩𑀢𑁆𑀣 𑀅𑀧𑁆𑀧𑀝𑀺𑀳𑀢𑀜𑀸𑀡𑀘𑀸𑀭𑀢𑀸𑀬 𑀏𑀓𑀧𑁆𑀧𑀫𑀸𑀡𑀢𑁆𑀢𑀸 𑀜𑁂𑀬𑁆𑀬𑀥𑀫𑁆𑀫𑁂𑀲𑀼. 𑀢𑀣𑀸 𑀆𑀘𑀭𑀺𑀬𑀫𑀼𑀝𑁆𑀞𑀺𑀥𑀫𑁆𑀫𑀫𑀘𑁆𑀙𑀭𑀺𑀬𑀲𑀸𑀲𑀦𑀲𑀸𑀯𑀓𑀸𑀦𑀼𑀭𑀸𑀕𑀸𑀪𑀸𑀯𑀢𑁄 𑀔𑀻𑀡𑀸𑀲𑀯𑀢𑁆𑀢𑀲𑀺𑀤𑁆𑀥𑀺. 𑀦 𑀳𑀺 𑀲𑀩𑁆𑀩𑀲𑁄 𑀧𑀭𑀺𑀓𑁆𑀔𑀻𑀡𑀸𑀲𑀯𑀲𑁆𑀲 𑀓𑀢𑁆𑀣𑀘𑀺𑀧𑀺 𑀆𑀘𑀭𑀺𑀬𑀫𑀼𑀝𑁆𑀞𑀺𑀆𑀤𑀻𑀦𑀁 𑀲𑀫𑁆𑀪𑀯𑁄𑀢𑀺 𑀲𑀼𑀯𑀺𑀲𑀼𑀤𑁆𑀥𑀲𑁆𑀲 𑀧𑀭𑀸𑀦𑀼𑀕𑁆𑀕𑀳𑀧𑁆𑀧𑀯𑀢𑁆𑀢𑀺. 𑀇𑀢𑀺 𑀤𑁂𑀲𑀓𑀤𑁄𑀲𑀪𑀽𑀢𑀸𑀦𑀁 𑀤𑀺𑀝𑁆𑀞𑀺𑀲𑀻𑀮𑀲𑀫𑁆𑀧𑀢𑁆𑀢𑀺𑀤𑀽𑀲𑀓𑀸𑀦𑀁 𑀅𑀘𑁆𑀘𑀦𑁆𑀢𑀁 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀦𑀁 𑀅𑀪𑀸𑀯𑀲𑀁𑀲𑀽𑀘𑀓𑁂𑀳𑀺 𑀜𑀸𑀡𑀲𑀫𑁆𑀧𑀤𑀸𑀧𑀳𑀸𑀦𑀲𑀫𑁆𑀧𑀤𑀸𑀪𑀺𑀩𑁆𑀬𑀜𑁆𑀚𑀓𑁂𑀳𑀺 𑀘 𑀲𑀫𑁆𑀩𑀼𑀤𑁆𑀥𑀯𑀺𑀲𑀼𑀤𑁆𑀥𑀪𑀸𑀯𑁂𑀳𑀺 𑀧𑀼𑀭𑀺𑀫𑀯𑁂𑀲𑀸𑀭𑀚𑁆𑀚𑀤𑁆𑀯𑀬𑀲𑀺𑀤𑁆𑀥𑀺, 𑀢𑀢𑁄 𑀘 𑀅𑀦𑁆𑀢𑀭𑀸𑀬𑀺𑀓𑀦𑀺𑀬𑁆𑀬𑀸𑀦𑀺𑀓𑀥𑀫𑁆𑀫𑁂𑀲𑀼 𑀲𑀫𑁆𑀫𑁄𑀳𑀸𑀪𑀸𑀯𑀲𑀺𑀤𑁆𑀥𑀺𑀢𑁄 𑀧𑀘𑁆𑀙𑀺𑀫𑀯𑁂𑀲𑀸𑀭𑀚𑁆𑀚𑀤𑁆𑀯𑀬𑀲𑀺𑀤𑁆𑀥𑀻𑀢𑀺 𑀪𑀕𑀯𑀢𑁄 𑀘𑀢𑀼𑀯𑁂𑀲𑀸𑀭𑀚𑁆𑀚𑀲𑀫𑀦𑁆𑀦𑀸𑀕𑀫𑁄 𑀅𑀢𑁆𑀢𑀳𑀺𑀢𑀧𑀭𑀳𑀺𑀢𑀧𑁆𑀧𑀝𑀺𑀧𑀢𑁆𑀢𑀺 𑀘 𑀦𑀺𑀤𑀸𑀦𑀯𑀘𑀦𑁂𑀦 𑀧𑀓𑀸𑀲𑀺𑀢𑀸 𑀳𑁄𑀦𑁆𑀢𑀺, 𑀢𑀢𑁆𑀣 𑀢𑀢𑁆𑀣 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀞𑀸𑀦𑀼𑀧𑁆𑀧𑀢𑁆𑀢𑀺𑀓𑀧𑁆𑀧𑀝𑀺𑀪𑀸𑀦𑁂𑀦 𑀥𑀫𑁆𑀫𑀤𑁂𑀲𑀦𑀸𑀤𑀻𑀧𑀦𑀢𑁄. 𑀇𑀥 𑀧𑀦 𑀯𑀺𑀫𑀼𑀢𑁆𑀢𑀺𑀲𑀼𑀔𑀧𑁆𑀧𑀝𑀺𑀲𑀁𑀯𑁂𑀤𑀦𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀫𑀦𑀲𑀺𑀓𑀸𑀭𑀧𑀓𑀸𑀲𑀦𑁂𑀦𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀢𑁆𑀣𑀼 𑀲𑀫𑁆𑀧𑀢𑁆𑀢𑀺𑀧𑀓𑀸𑀲𑀦𑀢𑁆𑀣𑀁 𑀦𑀺𑀤𑀸𑀦𑀯𑀘𑀦’’𑀦𑁆𑀢𑀺.

𑀢𑀣𑀸 𑀲𑀸𑀲𑀦𑀲𑀫𑁆𑀧𑀢𑁆𑀢𑀺𑀧𑀓𑀸𑀲𑀦𑀢𑁆𑀣𑀁 𑀦𑀺𑀤𑀸𑀦𑀯𑀘𑀦𑀁. 𑀜𑀸𑀡𑀓𑀭𑀼𑀡𑀸𑀧𑀭𑀺𑀕𑁆𑀕𑀳𑀺𑀢𑀲𑀩𑁆𑀩𑀓𑀺𑀭𑀺𑀬𑀲𑁆𑀲 𑀳𑀺 𑀪𑀕𑀯𑀢𑁄 𑀦𑀢𑁆𑀣𑀺 𑀦𑀺𑀭𑀢𑁆𑀣𑀓𑀸 𑀧𑀝𑀺𑀧𑀢𑁆𑀢𑀺 𑀅𑀢𑁆𑀢𑀳𑀺𑀢𑀸 𑀯𑀸. 𑀢𑀲𑁆𑀫𑀸 𑀧𑀭𑁂𑀲𑀁𑀬𑁂𑀯 𑀅𑀢𑁆𑀣𑀸𑀬 𑀧𑀯𑀢𑁆𑀢𑀲𑀩𑁆𑀩𑀓𑀺𑀭𑀺𑀬𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀓𑀮𑀫𑁆𑀧𑀺 𑀓𑀸𑀬𑀯𑀘𑀻𑀫𑀦𑁄𑀓𑀫𑁆𑀫𑀁 𑀬𑀣𑀸𑀧𑀯𑀢𑁆𑀢𑀁 𑀯𑀼𑀘𑁆𑀘𑀫𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑁂𑀳𑀺 𑀬𑀣𑀸𑀭𑀳𑀁 𑀲𑀢𑁆𑀢𑀸𑀦𑀁 𑀅𑀦𑀼𑀲𑀸𑀲𑀦𑀝𑁆𑀞𑁂𑀦 𑀲𑀸𑀲𑀦𑀁, 𑀦 𑀓𑀩𑁆𑀩𑀭𑀘𑀦𑀸. 𑀢𑀬𑀺𑀤𑀁 𑀲𑀢𑁆𑀣𑀼 𑀘𑀭𑀺𑀢𑀁 𑀓𑀸𑀮𑀤𑁂𑀲𑀤𑁂𑀲𑀓𑀧𑀭𑀺𑀲𑀸𑀧𑀤𑁂𑀲𑀸𑀤𑀻𑀳𑀺 𑀲𑀤𑁆𑀥𑀺𑀁 𑀢𑀢𑁆𑀣 𑀢𑀢𑁆𑀣 𑀦𑀺𑀤𑀸𑀦𑀯𑀘𑀦𑁂𑀦 𑀬𑀣𑀸𑀭𑀳𑀁 𑀧𑀓𑀸𑀲𑀻𑀬𑀢𑀺, 𑀇𑀥 𑀧𑀦 𑀅𑀪𑀺𑀲𑀫𑁆𑀩𑁄𑀥𑀺𑀯𑀺𑀫𑀼𑀢𑁆𑀢𑀺𑀲𑀼𑀔𑀧𑁆𑀧𑀝𑀺𑀲𑀁𑀯𑁂𑀤𑀦𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀫𑀦𑀲𑀺𑀓𑀸𑀭𑁂𑀦𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀸𑀲𑀦𑀲𑀫𑁆𑀧𑀢𑁆𑀢𑀺𑀧𑀓𑀸𑀲𑀦𑀢𑁆𑀣𑀁 𑀦𑀺𑀤𑀸𑀦𑀯𑀘𑀦’’𑀦𑁆𑀢𑀺.

𑀅𑀧𑀺𑀘 𑀲𑀢𑁆𑀣𑀼𑀦𑁄 𑀧𑀫𑀸𑀡𑀪𑀸𑀯𑀧𑁆𑀧𑀓𑀸𑀲𑀦𑁂𑀦 𑀲𑀸𑀲𑀦𑀲𑁆𑀲 𑀧𑀫𑀸𑀡𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀦𑀺𑀤𑀸𑀦𑀯𑀘𑀦𑀁. 𑀲𑀸 𑀘𑀲𑁆𑀲 𑀧𑀫𑀸𑀡𑀪𑀸𑀯𑀤𑀲𑁆𑀲𑀦𑀢𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀪𑀕𑀯𑀸𑀢𑀺 𑀳𑀺 𑀇𑀫𑀺𑀦𑀸 𑀢𑀣𑀸𑀕𑀢𑀲𑁆𑀲 𑀭𑀸𑀕𑀤𑁄𑀲𑀫𑁄𑀳𑀸𑀤𑀺𑀲𑀩𑁆𑀩𑀓𑀺𑀮𑁂𑀲𑀫𑀮𑀤𑀼𑀘𑁆𑀘𑀭𑀺𑀢𑀸𑀤𑀺𑀤𑁄𑀲𑀧𑁆𑀧𑀳𑀸𑀦𑀤𑀻𑀧𑀦𑁂𑀦, 𑀲𑀩𑁆𑀩𑀲𑀢𑁆𑀢𑀼𑀢𑁆𑀢𑀫𑀪𑀸𑀯𑀤𑀻𑀧𑀦𑁂𑀦 𑀘 𑀅𑀦𑀜𑁆𑀜𑀲𑀸𑀥𑀸𑀭𑀡𑀜𑀸𑀡𑀓𑀭𑀼𑀡𑀸𑀤𑀺𑀕𑀼𑀡𑀯𑀺𑀲𑁂𑀲𑀬𑁄𑀕𑀧𑀭𑀺𑀤𑀻𑀧𑀦𑁂𑀦, 𑀅𑀬𑀫𑀢𑁆𑀣𑁄 𑀲𑀩𑁆𑀩𑀣𑀸 𑀧𑀓𑀸𑀲𑀺𑀢𑁄 𑀳𑁄𑀢𑀻𑀢𑀺 𑀇𑀤𑀫𑁂𑀢𑁆𑀣 𑀦𑀺𑀤𑀸𑀦𑀯𑀘𑀦𑀧𑁆𑀧𑀬𑁄𑀚𑀦𑀲𑁆𑀲 𑀫𑀼𑀔𑀫𑀢𑁆𑀢𑀤𑀲𑁆𑀲𑀦𑀁.

𑀢𑀁 𑀧𑀦𑁂𑀢𑀁 ‘‘𑀏𑀯𑀁 𑀫𑁂 𑀲𑀼𑀢’’𑀦𑁆𑀢𑀺 𑀆𑀭𑀪𑀺𑀢𑁆𑀯𑀸 𑀬𑀸𑀯 ‘‘𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀻’’𑀢𑀺 𑀧𑀤𑀁, 𑀢𑀸𑀯 𑀇𑀫𑀲𑁆𑀲 𑀉𑀤𑀸𑀦𑀲𑁆𑀲 𑀦𑀺𑀤𑀸𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀣𑀸 𑀳𑀺 𑀢𑀁 𑀬𑀣𑀸 𑀧𑀝𑀺𑀧𑀦𑁆𑀦𑁄 𑀪𑀕𑀯𑀸 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺, 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀢𑀲𑁆𑀲 𑀓𑀸𑀬𑀺𑀓𑀘𑁂𑀢𑀲𑀺𑀓𑀧𑁆𑀧𑀝𑀺𑀧𑀢𑁆𑀢𑀺𑀬𑀸 𑀧𑀓𑀸𑀲𑀦𑀢𑁆𑀣𑀁 𑀲𑀗𑁆𑀕𑀻𑀢𑀺𑀓𑀸𑀭𑁂𑀳𑀺 𑀲𑀗𑁆𑀕𑀻𑀢𑀺𑀓𑀸𑀮𑁂 𑀪𑀸𑀲𑀺𑀢𑀯𑀘𑀦𑀁.

𑀦𑀦𑀼 𑀘 ‘‘𑀇𑀫𑀲𑁆𑀫𑀺𑀁 𑀲𑀢𑀺 𑀇𑀤𑀁 𑀳𑁄𑀢𑀻’’𑀢𑀺𑀆𑀤𑀺 𑀪𑀕𑀯𑀢𑁄 𑀏𑀯 𑀯𑀘𑀦𑀁 𑀪𑀯𑀺𑀢𑀼𑀁 𑀅𑀭𑀳𑀢𑀺, 𑀦 𑀳𑀺 𑀲𑀢𑁆𑀣𑀸𑀭𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀤𑁂𑀲𑁂𑀢𑀼𑀁 𑀲𑀫𑀢𑁆𑀣𑁄 𑀳𑁄𑀢𑀻𑀢𑀺? 𑀲𑀘𑁆𑀘𑀫𑁂𑀢𑀁, 𑀬𑀣𑀸 𑀧𑀦 𑀪𑀕𑀯𑀸 𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂 𑀥𑀫𑁆𑀫𑀲𑀪𑀸𑀯𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑁂𑀦 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀫𑀦𑀲𑀸𑀓𑀸𑀲𑀺, 𑀢𑀣𑁂𑀯 𑀦𑀁 𑀩𑁄𑀥𑀦𑁂𑀬𑁆𑀬𑀩𑀦𑁆𑀥𑀯𑀸𑀦𑀁 𑀩𑁄𑀥𑀦𑀢𑁆𑀣𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑀻𑀳𑀦𑀸𑀤𑀲𑀼𑀢𑁆𑀢𑀸𑀤𑀻𑀲𑀼 𑀤𑁂𑀲𑀺𑀢𑀲𑁆𑀲 𑀘 𑀯𑀘𑀦𑀸𑀦𑀁 𑀤𑁂𑀲𑀺𑀢𑀸𑀓𑀸𑀭𑀲𑁆𑀲 𑀅𑀦𑀼𑀓𑀭𑀡𑀯𑀲𑁂𑀦 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲 𑀫𑀦𑀲𑀺𑀓𑀸𑀭𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀪𑀕𑀯𑀢𑀸 𑀪𑀸𑀲𑀺𑀢𑀲𑁆𑀲 𑀇𑀫𑀲𑁆𑀲 𑀉𑀤𑀸𑀦𑀲𑁆𑀲 𑀥𑀫𑁆𑀫𑀲𑀗𑁆𑀕𑀸𑀳𑀓𑀸 𑀫𑀳𑀸𑀣𑁂𑀭𑀸 𑀦𑀺𑀤𑀸𑀦𑀁 𑀲𑀗𑁆𑀕𑀸𑀬𑀺𑀁𑀲𑀽𑀢𑀺 𑀬𑀣𑀸𑀯𑀼𑀢𑁆𑀢𑀯𑀘𑀦𑀁 𑀲𑀗𑁆𑀕𑀻𑀢𑀺𑀓𑀸𑀭𑀸𑀦𑀫𑁂𑀯 𑀯𑀘𑀦𑀦𑁆𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁. 𑀇𑀢𑁄 𑀧𑀭𑁂𑀲𑀼𑀧𑀺 𑀲𑀼𑀢𑁆𑀢𑀦𑁆𑀢𑁂𑀲𑀼 𑀏𑀲𑁂𑀯 𑀦𑀬𑁄.

𑀏𑀢𑁆𑀣 𑀘 𑀅𑀢𑁆𑀢𑀚𑁆𑀛𑀸𑀲𑀬𑁄 𑀧𑀭𑀚𑁆𑀛𑀸𑀲𑀬𑁄 𑀧𑀼𑀘𑁆𑀙𑀸𑀯𑀲𑀺𑀓𑁄 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑁄𑀢𑀺 𑀘𑀢𑁆𑀢𑀸𑀭𑁄 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀸 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸 𑀳𑀺 𑀅𑀦𑁂𑀓𑀲𑀢𑀅𑀦𑁂𑀓𑀲𑀳𑀲𑁆𑀲𑀪𑁂𑀤𑀸𑀦𑀺𑀧𑀺 𑀲𑀼𑀢𑁆𑀢𑀸𑀦𑀺 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸𑀤𑀺𑀧𑀝𑁆𑀞𑀸𑀦𑀦𑀬𑁂𑀦 𑀲𑁄𑀴𑀲𑀯𑀺𑀥𑀢𑀁 𑀦𑀸𑀢𑀺𑀯𑀢𑁆𑀢𑀦𑁆𑀢𑀺, 𑀏𑀯𑀁 𑀢𑀸𑀦𑀺 𑀲𑀩𑁆𑀩𑀸𑀦𑀺𑀧𑀺 𑀅𑀢𑁆𑀢𑀚𑁆𑀛𑀸𑀲𑀬𑀸𑀤𑀺𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀪𑀸𑀯𑀁 𑀦𑀸𑀢𑀺𑀯𑀢𑁆𑀢𑀦𑁆𑀢𑀺. 𑀓𑀸𑀫𑀜𑁆𑀘𑁂𑀢𑁆𑀣 𑀅𑀢𑁆𑀢𑀚𑁆𑀛𑀸𑀲𑀬𑀲𑁆𑀲 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀘 𑀧𑀭𑀚𑁆𑀛𑀸𑀲𑀬𑀧𑀼𑀘𑁆𑀙𑀸𑀯𑀲𑀺𑀓𑁂𑀳𑀺 𑀲𑀤𑁆𑀥𑀺𑀁 𑀲𑀁𑀲𑀕𑁆𑀕𑀪𑁂𑀤𑁄 𑀲𑀫𑁆𑀪𑀯𑀢𑀺 𑀅𑀚𑁆𑀛𑀸𑀲𑀬𑀸𑀦𑀼𑀲𑀦𑁆𑀥𑀺𑀧𑀼𑀘𑁆𑀙𑀸𑀦𑀼𑀲𑀦𑁆𑀥𑀺𑀲𑀫𑁆𑀪𑀯𑀢𑁄, 𑀅𑀢𑁆𑀢𑀚𑁆𑀛𑀸𑀲𑀬𑀅𑀝𑁆𑀞𑀼𑀧𑁆𑀧𑀢𑁆𑀢𑀻𑀦𑀁 𑀅𑀜𑁆𑀜𑀫𑀜𑁆𑀜𑀁 𑀲𑀁𑀲𑀕𑁆𑀕𑁄 𑀦𑀢𑁆𑀣𑀻𑀢𑀺 𑀦𑀺𑀭𑀯𑀲𑁂𑀲𑁄 𑀧𑀝𑁆𑀞𑀸𑀦𑀦𑀬𑁄 𑀦 𑀲𑀫𑁆𑀪𑀯𑀢𑀺. 𑀢𑀤𑀦𑁆𑀢𑁄𑀕𑀥𑀢𑁆𑀢𑀸 𑀯𑀸 𑀲𑀫𑁆𑀪𑀯𑀦𑁆𑀢𑀸𑀦𑀁 𑀲𑁂𑀲𑀦𑀺𑀓𑁆𑀔𑁂𑀧𑀸𑀦𑀁 𑀫𑀽𑀮𑀦𑀺𑀓𑁆𑀔𑁂𑀧𑀯𑀲𑁂𑀦 𑀘𑀢𑁆𑀢𑀸𑀭𑁄 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀸𑀢𑀺 𑀯𑀼𑀢𑁆𑀢𑀁.

𑀢𑀢𑁆𑀭𑀸𑀬𑀁 𑀯𑀘𑀦𑀢𑁆𑀣𑁄 𑁋 𑀦𑀺𑀓𑁆𑀔𑀺𑀧𑀦𑀁 𑀦𑀺𑀓𑁆𑀔𑁂𑀧𑁄, 𑀲𑀼𑀢𑁆𑀢𑀲𑁆𑀲 𑀦𑀺𑀓𑁆𑀔𑁂𑀧𑁄 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑁄, 𑀲𑀼𑀢𑁆𑀢𑀤𑁂𑀲𑀦𑀸𑀢𑀺 𑀅𑀢𑁆𑀣𑁄. 𑀦𑀺𑀓𑁆𑀔𑀺𑀧𑀻𑀬𑀢𑀻𑀢𑀺 𑀯𑀸 𑀦𑀺𑀓𑁆𑀔𑁂𑀧𑁄, 𑀲𑀼𑀢𑁆𑀢𑀁 𑀏𑀯 𑀦𑀺𑀓𑁆𑀔𑁂𑀧𑁄 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑁄. 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑁄 𑀅𑀢𑁆𑀢𑀚𑁆𑀛𑀸𑀲𑀬𑁄, 𑀲𑁄 𑀅𑀲𑁆𑀲 𑀅𑀢𑁆𑀣𑀺 𑀓𑀸𑀭𑀡𑀪𑀽𑀢𑁄𑀢𑀺 𑀅𑀢𑁆𑀢𑀚𑁆𑀛𑀸𑀲𑀬𑁄, 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑁄 𑀏𑀢𑀲𑁆𑀲𑀸𑀢𑀺 𑀯𑀸 𑀅𑀢𑁆𑀢𑀚𑁆𑀛𑀸𑀲𑀬𑁄. 𑀧𑀭𑀚𑁆𑀛𑀸𑀲𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀧𑀼𑀘𑁆𑀙𑀸𑀬 𑀯𑀲𑁄 𑀧𑀼𑀘𑁆𑀙𑀸𑀯𑀲𑁄, 𑀲𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀧𑀼𑀘𑁆𑀙𑀸𑀯𑀲𑀺𑀓𑁄. 𑀲𑀼𑀢𑁆𑀢𑀤𑁂𑀲𑀦𑀸𑀬 𑀯𑀢𑁆𑀣𑀼𑀪𑀽𑀢𑀲𑁆𑀲 𑀅𑀢𑁆𑀣𑀲𑁆𑀲 𑀉𑀧𑁆𑀧𑀢𑁆𑀢𑀺 𑀅𑀢𑁆𑀣𑀼𑀧𑁆𑀧𑀢𑁆𑀢𑀺, 𑀅𑀢𑁆𑀣𑀼𑀧𑁆𑀧𑀢𑁆𑀢𑀺 𑀏𑀯 𑀅𑀝𑁆𑀞𑀼𑀧𑁆𑀧𑀢𑁆𑀢𑀺, 𑀲𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑁄. 𑀅𑀣 𑀯𑀸 𑀦𑀺𑀓𑁆𑀔𑀺𑀧𑀻𑀬𑀢𑀺 𑀲𑀼𑀢𑁆𑀢𑀁 𑀏𑀢𑁂𑀦𑀸𑀢𑀺 𑀦𑀺𑀓𑁆𑀔𑁂𑀧𑁄, 𑀅𑀢𑁆𑀢𑀚𑁆𑀛𑀸𑀲𑀬𑀸𑀤𑀺 𑀏𑀯. 𑀏𑀢𑀲𑁆𑀫𑀺𑀁 𑀧𑀦 𑀅𑀢𑁆𑀣𑀯𑀺𑀓𑀧𑁆𑀧𑁂 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑁄 𑀅𑀢𑁆𑀢𑀚𑁆𑀛𑀸𑀲𑀬𑁄. 𑀧𑀭𑁂𑀲𑀁 𑀅𑀚𑁆𑀛𑀸𑀲𑀬𑁄 𑀧𑀭𑀚𑁆𑀛𑀸𑀲𑀬𑁄. 𑀧𑀼𑀘𑁆𑀙𑀻𑀬𑀢𑀻𑀢𑀺 𑀧𑀼𑀘𑁆𑀙𑀸, 𑀧𑀼𑀘𑁆𑀙𑀺𑀢𑀩𑁆𑀩𑁄 𑀅𑀢𑁆𑀣𑁄. 𑀧𑀼𑀘𑁆𑀙𑀦𑀯𑀲𑁂𑀦 𑀧𑀯𑀢𑁆𑀢𑀁 𑀥𑀫𑁆𑀫𑀧𑁆𑀧𑀝𑀺𑀕𑁆𑀕𑀸𑀳𑀓𑀸𑀦𑀁 𑀯𑀘𑀦𑀁 𑀧𑀼𑀘𑁆𑀙𑀸𑀯𑀲𑀁, 𑀢𑀤𑁂𑀯 𑀦𑀺𑀓𑁆𑀔𑁂𑀧𑀲𑀤𑁆𑀤𑀸𑀧𑁂𑀓𑁆𑀔𑀸𑀬 𑀧𑀼𑀘𑁆𑀙𑀸𑀯𑀲𑀺𑀓𑁄𑀢𑀺 𑀧𑀼𑀮𑁆𑀮𑀺𑀗𑁆𑀕𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀣𑀸 𑀅𑀢𑁆𑀣𑀼𑀧𑁆𑀧𑀢𑁆𑀢𑀺𑀬𑁂𑀯 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑁄𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀢𑁆𑀣 𑀘 𑀧𑀭𑁂𑀲𑀁 𑀇𑀦𑁆𑀤𑁆𑀭𑀺𑀬𑀧𑀭𑀺𑀧𑀸𑀓𑀸𑀤𑀺𑀓𑀸𑀭𑀡𑀦𑀺𑀭𑀧𑁂𑀓𑁆𑀔𑀢𑁆𑀢𑀸 𑀅𑀢𑁆𑀢𑀚𑁆𑀛𑀸𑀲𑀬𑀲𑁆𑀲 𑀯𑀺𑀲𑀼𑀁 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀪𑀸𑀯𑁄 𑀬𑀼𑀢𑁆𑀢𑁄 𑀓𑁂𑀯𑀮𑀁 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑁂𑀦𑁂𑀯 𑀥𑀫𑁆𑀫𑀢𑀦𑁆𑀢𑀺𑀞𑀧𑀦𑀢𑁆𑀣𑀁 𑀧𑀯𑀢𑁆𑀢𑀺𑀢𑀤𑁂𑀲𑀦𑀢𑁆𑀢𑀸, 𑀧𑀭𑀚𑁆𑀛𑀸𑀲𑀬𑀧𑀼𑀘𑁆𑀙𑀸𑀯𑀲𑀺𑀓𑀸𑀦𑀁 𑀧𑀦 𑀧𑀭𑁂𑀲𑀁 𑀅𑀚𑁆𑀛𑀸𑀲𑀬𑀧𑀼𑀘𑁆𑀙𑀸𑀦𑀁 𑀤𑁂𑀲𑀦𑀸𑀧𑀯𑀢𑁆𑀢𑀺𑀳𑁂𑀢𑀼𑀪𑀽𑀢𑀸𑀦𑀁 𑀉𑀧𑁆𑀧𑀢𑁆𑀢𑀺𑀬𑀁 𑀧𑀯𑀢𑁆𑀢𑀺𑀢𑀸𑀦𑀁 𑀓𑀣𑀫𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀅𑀦𑀯𑀭𑁄𑀥𑁄, 𑀧𑀼𑀘𑁆𑀙𑀸𑀯𑀲𑀺𑀓𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀧𑀼𑀩𑁆𑀩𑀓𑀸𑀦𑀁 𑀯𑀸 𑀧𑀭𑀚𑁆𑀛𑀸𑀲𑀬𑀸𑀦𑀼𑀭𑁄𑀥𑁂𑀦 𑀧𑀯𑀢𑁆𑀢𑀺𑀢𑀸𑀦𑀁 𑀓𑀣𑀁 𑀧𑀭𑀚𑁆𑀛𑀸𑀲𑀬𑁂 𑀅𑀦𑀯𑀭𑁄𑀥𑁄𑀢𑀺? 𑀦 𑀘𑁄𑀤𑁂𑀢𑀩𑁆𑀩𑀫𑁂𑀢𑀁. 𑀧𑀭𑁂𑀲𑀜𑁆𑀳𑀺 𑀅𑀪𑀺𑀦𑀻𑀳𑀸𑀭𑀧𑀭𑀺𑀧𑀼𑀘𑁆𑀙𑀸𑀤𑀺𑀯𑀺𑀦𑀺𑀘𑁆𑀙𑀬𑀸𑀤𑀺𑀯𑀺𑀦𑀺𑀫𑀼𑀢𑁆𑀢𑀲𑁆𑀲𑁂𑀯 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀓𑀸𑀭𑀡𑀼𑀧𑁆𑀧𑀸𑀤𑀲𑁆𑀲 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀪𑀸𑀯𑁂𑀦 𑀕𑀳𑀺𑀢𑀢𑁆𑀢𑀸 𑀧𑀭𑀚𑁆𑀛𑀸𑀲𑀬𑀧𑀼𑀘𑁆𑀙𑀸𑀯𑀲𑀺𑀓𑀸𑀦𑀁 𑀯𑀺𑀲𑀼𑀁 𑀕𑀳𑀡𑀁. 𑀢𑀣𑀸 𑀳𑀺 𑀩𑁆𑀭𑀳𑁆𑀫𑀚𑀸𑀮𑀥𑀫𑁆𑀫𑀤𑀸𑀬𑀸𑀤𑀲𑀼𑀢𑁆𑀢𑀸𑀤𑀻𑀦𑀁 𑀯𑀡𑁆𑀡𑀸𑀯𑀡𑁆𑀡𑀆𑀫𑀺𑀲𑀼𑀧𑁆𑀧𑀸𑀤𑀸𑀤𑀺𑀤𑁂𑀲𑀦𑀸𑀦𑀺𑀫𑀺𑀢𑁆𑀢𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺 𑀯𑀼𑀘𑁆𑀘𑀢𑀺, 𑀧𑀭𑁂𑀲𑀁 𑀧𑀼𑀘𑁆𑀙𑀸𑀬 𑀯𑀺𑀦𑀸 𑀅𑀚𑁆𑀛𑀸𑀲𑀬𑀫𑁂𑀯 𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸 𑀤𑁂𑀲𑀺𑀢𑁄 𑀧𑀭𑀚𑁆𑀛𑀸𑀲𑀬𑁄, 𑀧𑀼𑀘𑁆𑀙𑀸𑀯𑀲𑁂𑀦 𑀤𑁂𑀲𑀺𑀢𑁄 𑀧𑀼𑀘𑁆𑀙𑀸𑀯𑀲𑀺𑀓𑁄𑀢𑀺 𑀧𑀸𑀓𑀝𑁄𑀬𑀫𑀢𑁆𑀣𑁄𑀢𑀺.

𑀢𑀢𑁆𑀣 𑀧𑀞𑀫𑀸𑀤𑀻𑀦𑀺 𑀢𑀻𑀡𑀺 𑀩𑁄𑀥𑀺𑀲𑀼𑀢𑁆𑀢𑀸𑀦𑀺 𑀫𑀼𑀘𑀮𑀺𑀦𑁆𑀤𑀲𑀼𑀢𑁆𑀢𑀁, 𑀆𑀬𑀼𑀲𑀗𑁆𑀔𑀸𑀭𑁄𑀲𑁆𑀲𑀚𑁆𑀚𑀦𑀲𑀼𑀢𑁆𑀢𑀁, 𑀧𑀘𑁆𑀘𑀯𑁂𑀓𑁆𑀔𑀡𑀲𑀼𑀢𑁆𑀢𑀁, 𑀧𑀧𑀜𑁆𑀘𑀲𑀜𑁆𑀜𑀸𑀲𑀼𑀢𑁆𑀢𑀦𑁆𑀢𑀺 𑀇𑀫𑁂𑀲𑀁 𑀉𑀤𑀸𑀦𑀸𑀦𑀁 𑀅𑀢𑁆𑀢𑀚𑁆𑀛𑀸𑀲𑀬𑁄 𑀦𑀺𑀓𑁆𑀔𑁂𑀧𑁄. 𑀳𑀼𑀳𑀼𑀗𑁆𑀓𑀲𑀼𑀢𑁆𑀢𑀁, 𑀩𑁆𑀭𑀸𑀳𑁆𑀫𑀡𑀚𑀸𑀢𑀺𑀓𑀲𑀼𑀢𑁆𑀢𑀁, 𑀩𑀸𑀳𑀺𑀬𑀲𑀼𑀢𑁆𑀢𑀦𑁆𑀢𑀺 𑀇𑀫𑁂𑀲𑀁 𑀉𑀤𑀸𑀦𑀸𑀦𑀁 𑀧𑀼𑀘𑁆𑀙𑀸𑀯𑀲𑀺𑀓𑁄 𑀦𑀺𑀓𑁆𑀔𑁂𑀧𑁄. 𑀭𑀸𑀚𑀲𑀼𑀢𑁆𑀢𑀁, 𑀲𑀓𑁆𑀓𑀸𑀭𑀲𑀼𑀢𑁆𑀢𑀁, 𑀉𑀘𑁆𑀙𑀸𑀤𑀦𑀲𑀼𑀢𑁆𑀢𑀁, 𑀧𑀺𑀡𑁆𑀟𑀧𑀸𑀢𑀺𑀓𑀲𑀼𑀢𑁆𑀢𑀁, 𑀲𑀺𑀧𑁆𑀧𑀲𑀼𑀢𑁆𑀢𑀁, 𑀕𑁄𑀧𑀸𑀮𑀲𑀼𑀢𑁆𑀢𑀁, 𑀲𑀼𑀦𑁆𑀤𑀭𑀺𑀓𑀲𑀼𑀢𑁆𑀢𑀁, 𑀫𑀸𑀢𑀼𑀲𑀼𑀢𑁆𑀢𑀁, 𑀲𑀗𑁆𑀖𑀪𑁂𑀤𑀓𑀲𑀼𑀢𑁆𑀢𑀁, 𑀉𑀤𑀧𑀸𑀦𑀲𑀼𑀢𑁆𑀢𑀁, 𑀢𑀣𑀸𑀕𑀢𑀼𑀧𑁆𑀧𑀸𑀤𑀲𑀼𑀢𑁆𑀢𑀁, 𑀫𑁄𑀦𑁂𑀬𑁆𑀬𑀲𑀼𑀢𑁆𑀢𑀁, 𑀧𑀸𑀝𑀮𑀺𑀕𑀸𑀫𑀺𑀬𑀲𑀼𑀢𑁆𑀢𑀁, 𑀤𑁆𑀯𑁂𑀧𑀺 𑀤𑀩𑁆𑀩𑀲𑀼𑀢𑁆𑀢𑀸𑀦𑀻𑀢𑀺 𑀏𑀢𑁂𑀲𑀁 𑀉𑀤𑀸𑀦𑀸𑀦𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑁄 𑀦𑀺𑀓𑁆𑀔𑁂𑀧𑁄. 𑀧𑀸𑀮𑀺𑀮𑁂𑀬𑁆𑀬𑀲𑀼𑀢𑁆𑀢𑀁, 𑀧𑀺𑀬𑀲𑀼𑀢𑁆𑀢𑀁, 𑀦𑀸𑀕𑀲𑀫𑀸𑀮𑀲𑀼𑀢𑁆𑀢𑀁, 𑀯𑀺𑀲𑀸𑀔𑀸𑀲𑀼𑀢𑁆𑀢𑀜𑁆𑀘𑀸𑀢𑀺 𑀇𑀫𑁂𑀲𑀁 𑀉𑀤𑀸𑀦𑀸𑀦𑀁 𑀅𑀢𑁆𑀢𑀚𑁆𑀛𑀸𑀲𑀬𑁄 𑀧𑀭𑀚𑁆𑀛𑀸𑀲𑀬𑁄 𑀘 𑀦𑀺𑀓𑁆𑀔𑁂𑀧𑁄. 𑀲𑁂𑀲𑀸𑀦𑀁 𑀏𑀓𑀧𑀜𑁆𑀜𑀸𑀲𑀸𑀬 𑀲𑀼𑀢𑁆𑀢𑀸𑀦𑀁 𑀧𑀭𑀚𑁆𑀛𑀸𑀲𑀬𑁄 𑀦𑀺𑀓𑁆𑀔𑁂𑀧𑁄. 𑀏𑀯𑀫𑁂𑀢𑁂𑀲𑀁 𑀉𑀤𑀸𑀦𑀸𑀦𑀁 𑀅𑀢𑁆𑀢𑀚𑁆𑀛𑀸𑀲𑀬𑀸𑀤𑀺𑀯𑀲𑁂𑀦 𑀦𑀺𑀓𑁆𑀔𑁂𑀧𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀢𑁆𑀣 𑀘 𑀬𑀸𑀦𑀺 𑀉𑀤𑀸𑀦𑀸𑀦𑀺 𑀪𑀕𑀯𑀢𑀸 𑀪𑀺𑀓𑁆𑀔𑀽𑀦𑀁 𑀲𑀫𑁆𑀫𑀼𑀔𑀸 𑀪𑀸𑀲𑀺𑀢𑀸𑀦𑀺, 𑀢𑀸𑀦𑀺 𑀢𑁂𑀳𑀺 𑀬𑀣𑀸𑀪𑀸𑀲𑀺𑀢𑀲𑀼𑀢𑁆𑀢𑀸𑀦𑀺 𑀯𑀘𑀲𑀸 𑀧𑀭𑀺𑀘𑀺𑀢𑀸𑀦𑀺 𑀫𑀦𑀲𑀸𑀦𑀼𑀧𑁂𑀓𑁆𑀔𑀺𑀢𑀸𑀦𑀺 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲 𑀓𑀣𑀺𑀢𑀸𑀦𑀺. 𑀬𑀸𑀦𑀺 𑀧𑀦 𑀪𑀕𑀯𑀢𑀸 𑀪𑀺𑀓𑁆𑀔𑀽𑀦𑀁 𑀅𑀲𑀫𑁆𑀫𑀼𑀔𑀸 𑀪𑀸𑀲𑀺𑀢𑀸𑀦𑀺, 𑀢𑀸𑀦𑀺𑀧𑀺 𑀅𑀧𑀭𑀪𑀸𑀕𑁂 𑀪𑀕𑀯𑀢𑀸 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲 𑀧𑀼𑀦 𑀪𑀸𑀲𑀺𑀢𑀸𑀦𑀺. 𑀏𑀯𑀁 𑀲𑀩𑁆𑀩𑀸𑀦𑀺𑀧𑀺 𑀢𑀸𑀦𑀺 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀥𑀸𑀭𑁂𑀦𑁆𑀢𑁄 𑀪𑀺𑀓𑁆𑀔𑀽𑀦𑀜𑁆𑀘 𑀯𑀸𑀘𑁂𑀦𑁆𑀢𑁄 𑀅𑀧𑀭𑀪𑀸𑀕𑁂 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀸𑀮𑁂 𑀉𑀤𑀸𑀦𑀦𑁆𑀢𑁆𑀯𑁂𑀯 𑀲𑀗𑁆𑀕𑀳𑀁 𑀆𑀭𑁄𑀧𑁂𑀲𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦𑀸𑀢𑀺𑀆𑀤𑀻𑀲𑀼 𑀢𑁂𑀦 𑀲𑀫𑀬𑁂𑀦𑀸𑀢𑀺 𑀘 𑀪𑀼𑀫𑁆𑀫𑀢𑁆𑀣𑁂 𑀓𑀭𑀡𑀯𑀘𑀦𑀁, 𑀔𑁄 𑀧𑀦𑀸𑀢𑀺 𑀦𑀺𑀧𑀸𑀢𑁄, 𑀢𑀲𑁆𑀫𑀺𑀁 𑀲𑀫𑀬𑁂𑀢𑀺 𑀅𑀢𑁆𑀣𑁄. 𑀓𑀲𑁆𑀫𑀺𑀁 𑀧𑀦 𑀲𑀫𑀬𑁂? 𑀬𑀁 𑀲𑀫𑀬𑀁 𑀪𑀕𑀯𑀸 𑀉𑀭𑀼𑀯𑁂𑀮𑀸𑀬𑀁 𑀯𑀺𑀳𑀭𑀢𑀺 𑀦𑀚𑁆𑀚𑀸 𑀦𑁂𑀭𑀜𑁆𑀚𑀭𑀸𑀬 𑀢𑀻𑀭𑁂 𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂 𑀧𑀞𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑁄. 𑀢𑀲𑁆𑀫𑀺𑀁 𑀲𑀫𑀬𑁂. 𑀲𑀢𑁆𑀢𑀸𑀳𑀦𑁆𑀢𑀺 𑀲𑀢𑁆𑀢 𑀅𑀳𑀸𑀦𑀺 𑀲𑀢𑁆𑀢𑀸𑀳𑀁, 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀢𑁆𑀣𑁂 𑀏𑀢𑀁 𑀉𑀧𑀬𑁄𑀕𑀯𑀘𑀦𑀁. 𑀬𑀲𑁆𑀫𑀸 𑀪𑀕𑀯𑀸 𑀢𑀁 𑀲𑀢𑁆𑀢𑀸𑀳𑀁 𑀦𑀺𑀭𑀦𑁆𑀢𑀭𑀢𑀸𑀬 𑀅𑀘𑁆𑀘𑀦𑁆𑀢𑀫𑁂𑀯 𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑁂𑀦 𑀯𑀺𑀳𑀸𑀲𑀺, 𑀢𑀲𑁆𑀫𑀸 𑀲𑀢𑁆𑀢𑀸𑀳𑀦𑁆𑀢𑀺 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀯𑀲𑁂𑀦 𑀉𑀧𑀬𑁄𑀕𑀯𑀘𑀦𑀁 𑀯𑀼𑀢𑁆𑀢𑀁. 𑀏𑀓𑀧𑀮𑁆𑀮𑀗𑁆𑀓𑁂𑀦𑀸𑀢𑀺 𑀯𑀺𑀲𑀸𑀔𑀸𑀧𑀼𑀡𑁆𑀡𑀫𑀸𑀬 𑀅𑀦𑀢𑁆𑀣𑀗𑁆𑀕𑀢𑁂𑀬𑁂𑀯 𑀲𑀽𑀭𑀺𑀬𑁂 𑀅𑀧𑀭𑀸𑀚𑀺𑀢𑀧𑀮𑁆𑀮𑀗𑁆𑀓𑀯𑀭𑁂 𑀯𑀚𑀺𑀭𑀸𑀲𑀦𑁂 𑀦𑀺𑀲𑀺𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀓𑀺𑀫𑁆𑀧𑀺 𑀅𑀦𑀼𑀝𑁆𑀞𑀳𑀺𑀢𑁆𑀯𑀸 𑀬𑀣𑀸𑀆𑀪𑀼𑀚𑀺𑀢𑁂𑀦 𑀏𑀓𑁂𑀦𑁂𑀯 𑀧𑀮𑁆𑀮𑀗𑁆𑀓𑁂𑀦.

𑀯𑀺𑀫𑀼𑀢𑁆𑀢𑀺𑀲𑀼𑀔𑀧𑀝𑀺𑀲𑀁𑀯𑁂𑀤𑀻𑀢𑀺 𑀯𑀺𑀫𑀼𑀢𑁆𑀢𑀺𑀲𑀼𑀔𑀁 𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑀺𑀬𑀫𑀸𑀦𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀯𑀺𑀫𑀼𑀢𑁆𑀢𑀻𑀢𑀺 𑀢𑀤𑀗𑁆𑀕𑀯𑀺𑀫𑀼𑀢𑁆𑀢𑀺, 𑀯𑀺𑀓𑁆𑀔𑀫𑁆𑀪𑀦𑀯𑀺𑀫𑀼𑀢𑁆𑀢𑀺, 𑀲𑀫𑀼𑀘𑁆𑀙𑁂𑀤𑀯𑀺𑀫𑀼𑀢𑁆𑀢𑀺, 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀺𑀫𑀼𑀢𑁆𑀢𑀺, 𑀦𑀺𑀲𑁆𑀲𑀭𑀡𑀯𑀺𑀫𑀼𑀢𑁆𑀢𑀻𑀢𑀺 𑀧𑀜𑁆𑀘 𑀯𑀺𑀫𑀼𑀢𑁆𑀢𑀺𑀬𑁄. 𑀢𑀸𑀲𑀼 𑀬𑀁 𑀤𑁂𑀬𑁆𑀬𑀥𑀫𑁆𑀫𑀧𑀭𑀺𑀘𑁆𑀘𑀸𑀕𑀸𑀤𑀻𑀳𑀺 𑀢𑁂𑀳𑀺 𑀢𑁂𑀳𑀺 𑀕𑀼𑀡𑀗𑁆𑀕𑁂𑀳𑀺 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑀸𑀤𑀻𑀳𑀺 𑀯𑀺𑀧𑀲𑁆𑀲𑀦𑀗𑁆𑀕𑁂𑀳𑀺 𑀘 𑀬𑀸𑀯 𑀢𑀲𑁆𑀲 𑀢𑀲𑁆𑀲 𑀅𑀗𑁆𑀕𑀲𑁆𑀲 𑀅𑀧𑀭𑀺𑀳𑀸𑀦𑀺𑀯𑀲𑁂𑀦 𑀧𑀯𑀢𑁆𑀢𑀺, 𑀢𑀸𑀯 𑀢𑀁𑀢𑀁𑀧𑀝𑀺𑀧𑀓𑁆𑀔𑀢𑁄 𑀯𑀺𑀫𑀼𑀘𑁆𑀘𑀦𑀢𑁄 𑀯𑀺𑀫𑀼𑀘𑁆𑀘𑀦𑀁 𑀧𑀳𑀸𑀦𑀁. 𑀲𑁂𑀬𑁆𑀬𑀣𑀺𑀤𑀁? 𑀤𑀸𑀦𑁂𑀦 𑀫𑀘𑁆𑀙𑀭𑀺𑀬𑀮𑁄𑀪𑀸𑀤𑀺𑀢𑁄, 𑀲𑀻𑀮𑁂𑀦 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀢𑁄, 𑀦𑀸𑀫𑀭𑀽𑀧𑀯𑀯𑀢𑁆𑀣𑀸𑀦𑁂𑀦 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀢𑁄, 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂𑀦 𑀅𑀳𑁂𑀢𑀼𑀯𑀺𑀲𑀫𑀳𑁂𑀢𑀼𑀤𑀺𑀝𑁆𑀞𑀻𑀳𑀺, 𑀢𑀲𑁆𑀲𑁂𑀯 𑀅𑀧𑀭𑀪𑀸𑀕𑁂𑀦 𑀓𑀗𑁆𑀔𑀸𑀯𑀺𑀢𑀭𑀡𑁂𑀦 𑀓𑀣𑀁𑀓𑀣𑀻𑀪𑀸𑀯𑀢𑁄, 𑀓𑀮𑀸𑀧𑀲𑀫𑁆𑀫𑀲𑀦𑁂𑀦 ‘‘𑀅𑀳𑀁 𑀫𑀫𑀸’’𑀢𑀺 𑀕𑀸𑀳𑀢𑁄, 𑀫𑀕𑁆𑀕𑀸𑀫𑀕𑁆𑀕𑀯𑀯𑀢𑁆𑀣𑀸𑀦𑁂𑀦 𑀅𑀫𑀕𑁆𑀕𑁂 𑀫𑀕𑁆𑀕𑀲𑀜𑁆𑀜𑀸𑀬, 𑀉𑀤𑀬𑀤𑀲𑁆𑀲𑀦𑁂𑀦 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑀸, 𑀯𑀬𑀤𑀲𑁆𑀲𑀦𑁂𑀦 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀸, 𑀪𑀬𑀤𑀲𑁆𑀲𑀦𑁂𑀦 𑀲𑀪𑀬𑁂 𑀅𑀪𑀬𑀲𑀜𑁆𑀜𑀸𑀬, 𑀆𑀤𑀻𑀦𑀯𑀤𑀲𑁆𑀲𑀦𑁂𑀦 𑀅𑀲𑁆𑀲𑀸𑀤𑀲𑀜𑁆𑀜𑀸𑀬, 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑁂𑀦 𑀅𑀪𑀺𑀭𑀢𑀺𑀲𑀜𑁆𑀜𑀸𑀬, 𑀫𑀼𑀘𑁆𑀘𑀺𑀢𑀼𑀓𑀫𑁆𑀬𑀢𑀸𑀜𑀸𑀡𑁂𑀦 𑀅𑀫𑀼𑀘𑁆𑀘𑀺𑀢𑀼𑀓𑀫𑁆𑀬𑀢𑀸𑀬, 𑀉𑀧𑁂𑀓𑁆𑀔𑀸𑀜𑀸𑀡𑁂𑀦 𑀅𑀦𑀼𑀧𑁂𑀓𑁆𑀔𑀸𑀬, 𑀅𑀦𑀼𑀮𑁄𑀫𑁂𑀦 𑀥𑀫𑁆𑀫𑀝𑁆𑀞𑀺𑀢𑀺𑀬𑀁 𑀦𑀺𑀩𑁆𑀩𑀸𑀦𑁂 𑀘 𑀧𑀝𑀺𑀮𑁄𑀫𑀪𑀸𑀯𑀢𑁄, 𑀕𑁄𑀢𑁆𑀭𑀪𑀼𑀦𑀸 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀪𑀸𑀯𑀢𑁄 𑀯𑀺𑀫𑀼𑀘𑁆𑀘𑀦𑀁, 𑀅𑀬𑀁 𑀢𑀤𑀗𑁆𑀕𑀯𑀺𑀫𑀼𑀢𑁆𑀢𑀺 𑀦𑀸𑀫. 𑀬𑀁 𑀧𑀦 𑀉𑀧𑀘𑀸𑀭𑀧𑁆𑀧𑀦𑀸𑀪𑁂𑀤𑁂𑀦 𑀲𑀫𑀸𑀥𑀺𑀦𑀸 𑀬𑀸𑀯𑀲𑁆𑀲 𑀅𑀧𑀭𑀺𑀳𑀸𑀦𑀺𑀯𑀲𑁂𑀦 𑀧𑀯𑀢𑁆𑀢𑀺, 𑀢𑀸𑀯 𑀓𑀸𑀫𑀘𑁆𑀙𑀦𑁆𑀤𑀸𑀤𑀻𑀦𑀁 𑀦𑀻𑀯𑀭𑀡𑀸𑀦𑀜𑁆𑀘𑁂𑀯, 𑀯𑀺𑀢𑀓𑁆𑀓𑀸𑀤𑀻𑀦𑀜𑁆𑀘 𑀧𑀘𑁆𑀘𑀦𑀻𑀓𑀥𑀫𑁆𑀫𑀸𑀦𑀁, 𑀅𑀦𑀼𑀧𑁆𑀧𑀢𑁆𑀢𑀺𑀲𑀜𑁆𑀜𑀺𑀢𑀁 𑀯𑀺𑀫𑀼𑀘𑁆𑀘𑀦𑀁, 𑀅𑀬𑀁 𑀯𑀺𑀓𑁆𑀔𑀫𑁆𑀪𑀦𑀯𑀺𑀫𑀼𑀢𑁆𑀢𑀺 𑀦𑀸𑀫. 𑀬𑀁 𑀘𑀢𑀼𑀦𑁆𑀦𑀁 𑀅𑀭𑀺𑀬𑀫𑀕𑁆𑀕𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀢𑀁𑀢𑀁𑀫𑀕𑁆𑀕𑀯𑀢𑁄 𑀅𑀭𑀺𑀬𑀲𑁆𑀲 𑀲𑀦𑁆𑀢𑀸𑀦𑁂 𑀬𑀣𑀸𑀭𑀳𑀁 ‘‘𑀤𑀺𑀝𑁆𑀞𑀺𑀕𑀢𑀸𑀦𑀁 𑀧𑀳𑀸𑀦𑀸𑀬𑀸’’𑀢𑀺𑀆𑀤𑀺𑀦𑀸 (𑀥. 𑀲. 𑁨𑁭𑁭; 𑀯𑀺𑀪. 𑁬𑁨𑁮) 𑀦𑀬𑁂𑀦 𑀯𑀼𑀢𑁆𑀢𑀲𑁆𑀲 𑀲𑀫𑀼𑀤𑀬𑀧𑀓𑁆𑀔𑀺𑀬𑀲𑁆𑀲 𑀓𑀺𑀮𑁂𑀲𑀕𑀡𑀲𑁆𑀲 𑀧𑀼𑀦 𑀅𑀘𑁆𑀘𑀦𑁆𑀢𑀁 𑀅𑀧𑁆𑀧𑀯𑀢𑁆𑀢𑀺𑀪𑀸𑀯𑁂𑀦 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀯𑀲𑁂𑀦 𑀯𑀺𑀫𑀼𑀘𑁆𑀘𑀦𑀁, 𑀅𑀬𑀁 𑀲𑀫𑀼𑀘𑁆𑀙𑁂𑀤𑀯𑀺𑀫𑀼𑀢𑁆𑀢𑀺 𑀦𑀸𑀫. 𑀬𑀁 𑀧𑀦 𑀨𑀮𑀓𑁆𑀔𑀡𑁂 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀢𑁆𑀢𑀁 𑀓𑀺𑀮𑁂𑀲𑀸𑀦𑀁, 𑀅𑀬𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀺𑀫𑀼𑀢𑁆𑀢𑀺 𑀦𑀸𑀫. 𑀲𑀩𑁆𑀩𑀲𑀗𑁆𑀔𑀢𑀦𑀺𑀲𑁆𑀲𑀝𑀢𑁆𑀢𑀸 𑀧𑀦 𑀲𑀩𑁆𑀩𑀲𑀗𑁆𑀔𑀸𑀭𑀯𑀺𑀫𑀼𑀢𑁆𑀢𑀁 𑀦𑀺𑀩𑁆𑀩𑀸𑀦𑀁, 𑀅𑀬𑀁 𑀦𑀺𑀲𑁆𑀲𑀭𑀡𑀯𑀺𑀫𑀼𑀢𑁆𑀢𑀺 𑀦𑀸𑀫. 𑀇𑀥 𑀧𑀦 𑀪𑀕𑀯𑀢𑁄 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀸 𑀨𑀮𑀯𑀺𑀫𑀼𑀢𑁆𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀯𑀺𑀫𑀼𑀢𑁆𑀢𑀺𑀲𑀼𑀔𑀧𑀝𑀺𑀲𑀁𑀯𑁂𑀤𑀻𑀢𑀺 𑀯𑀺𑀫𑀼𑀢𑁆𑀢𑀺𑀲𑀼𑀔𑀁 𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑀺𑀬𑀫𑀸𑀦𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄’’𑀢𑀺.

𑀯𑀺𑀫𑀼𑀢𑁆𑀢𑀻𑀢𑀺 𑀘 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀯𑀺𑀫𑀼𑀢𑁆𑀢𑀪𑀸𑀯𑁄, 𑀘𑀺𑀢𑁆𑀢𑀫𑁂𑀯 𑀯𑀸 𑀢𑀣𑀸 𑀯𑀺𑀫𑀼𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁, 𑀢𑀸𑀬 𑀯𑀺𑀫𑀼𑀢𑁆𑀢𑀺𑀬𑀸 𑀚𑀸𑀢𑀁 𑀲𑀫𑁆𑀧𑀬𑀼𑀢𑁆𑀢𑀁 𑀯𑀸 𑀲𑀼𑀔𑀁 𑀯𑀺𑀫𑀼𑀢𑁆𑀢𑀺𑀲𑀼𑀔𑀁. ‘‘𑀬𑀸𑀬𑀁, 𑀪𑀦𑁆𑀢𑁂, 𑀉𑀧𑁂𑀓𑁆𑀔𑀸 𑀲𑀦𑁆𑀢𑁂 𑀲𑀼𑀔𑁂 𑀯𑀼𑀢𑁆𑀢𑀸 𑀪𑀕𑀯𑀢𑀸’’𑀢𑀺 (𑀫. 𑀦𑀺. 𑁨.𑁮𑁮) 𑀯𑀘𑀦𑀢𑁄 𑀉𑀧𑁂𑀓𑁆𑀔𑀸𑀧𑀺 𑀘𑁂𑀢𑁆𑀣 𑀲𑀼𑀔𑀫𑀺𑀘𑁆𑀘𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀢𑀣𑀸 𑀘 𑀯𑀼𑀢𑁆𑀢𑀁 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀁 ‘‘𑀉𑀧𑁂𑀓𑁆𑀔𑀸 𑀧𑀦 𑀲𑀦𑁆𑀢𑀢𑁆𑀢𑀸, 𑀲𑀼𑀔𑀫𑀺𑀘𑁆𑀘𑁂𑀯 𑀪𑀸𑀲𑀺𑀢𑀸’’𑀢𑀺 (𑀯𑀺𑀪. 𑀅𑀝𑁆𑀞. 𑁨𑁩𑁨). 𑀪𑀕𑀯𑀸 𑀳𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀁 𑀅𑀭𑀳𑀢𑁆𑀢𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀢𑀺, 𑀦 𑀇𑀢𑀭𑀁. 𑀅𑀣 𑀯𑀸 ‘‘𑀢𑁂𑀲𑀁 𑀯𑀽𑀧𑀲𑀫𑁄 𑀲𑀼𑀔𑁄’’𑀢𑀺𑀆𑀤𑀻𑀲𑀼 𑀬𑀣𑀸 𑀲𑀗𑁆𑀔𑀸𑀭𑀤𑀼𑀓𑁆𑀔𑀽𑀧𑀲𑀫𑁄 𑀲𑀼𑀔𑁄𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀲𑀓𑀮𑀓𑀺𑀮𑁂𑀲𑀤𑀼𑀓𑁆𑀔𑀽𑀧𑀲𑀫𑀪𑀸𑀯𑀢𑁄 𑀅𑀕𑁆𑀕𑀨𑀮𑁂 𑀮𑀩𑁆𑀪𑀫𑀸𑀦𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀺𑀫𑀼𑀢𑁆𑀢𑀺 𑀏𑀯 𑀇𑀥 𑀲𑀼𑀔𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀬𑀺𑀤𑀁 𑀯𑀺𑀫𑀼𑀢𑁆𑀢𑀺𑀲𑀼𑀔𑀁 𑀫𑀕𑁆𑀕𑀯𑀻𑀣𑀺𑀬𑀁 𑀓𑀸𑀮𑀦𑁆𑀢𑀭𑁂𑀢𑀺 𑀨𑀮𑀘𑀺𑀢𑁆𑀢𑀲𑁆𑀲 𑀧𑀯𑀢𑁆𑀢𑀺𑀯𑀺𑀪𑀸𑀕𑁂𑀦 𑀤𑀼𑀯𑀺𑀥𑀁 𑀳𑁄𑀢𑀺. 𑀏𑀓𑁂𑀓𑀲𑁆𑀲 𑀳𑀺 𑀅𑀭𑀺𑀬𑀫𑀕𑁆𑀕𑀲𑁆𑀲 𑀅𑀦𑀦𑁆𑀢𑀭𑀸 𑀢𑀲𑁆𑀲 𑀢𑀲𑁆𑀲𑁂𑀯 𑀯𑀺𑀧𑀸𑀓𑀪𑀽𑀢𑀸𑀦𑀺 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀸𑀦𑀺 𑀢𑀻𑀡𑀺 𑀤𑁆𑀯𑁂 𑀯𑀸 𑀨𑀮𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀦𑀦𑁆𑀢𑀭𑀯𑀺𑀧𑀸𑀓𑀢𑁆𑀢𑀸 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀸𑀦𑀁. 𑀬𑀲𑁆𑀫𑀺𑀜𑁆𑀳𑀺 𑀚𑀯𑀦𑀯𑀸𑀭𑁂 𑀅𑀭𑀺𑀬𑀫𑀕𑁆𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣 𑀬𑀤𑀸 𑀤𑁆𑀯𑁂 𑀅𑀦𑀼𑀮𑁄𑀫𑀸𑀦𑀺, 𑀢𑀤𑀸 𑀢𑀢𑀺𑀬𑀁 𑀕𑁄𑀢𑁆𑀭𑀪𑀼, 𑀘𑀢𑀼𑀢𑁆𑀣𑀁 𑀫𑀕𑁆𑀕𑀘𑀺𑀢𑁆𑀢𑀁, 𑀢𑀢𑁄 𑀧𑀭𑀁 𑀢𑀻𑀡𑀺 𑀨𑀮𑀘𑀺𑀢𑁆𑀢𑀸𑀦𑀺 𑀳𑁄𑀦𑁆𑀢𑀺. 𑀬𑀤𑀸 𑀧𑀦 𑀢𑀻𑀡𑀺 𑀅𑀦𑀼𑀮𑁄𑀫𑀸𑀦𑀺, 𑀢𑀤𑀸 𑀘𑀢𑀼𑀢𑁆𑀣𑀁 𑀕𑁄𑀢𑁆𑀭𑀪𑀼, 𑀧𑀜𑁆𑀘𑀫𑀁 𑀫𑀕𑁆𑀕𑀘𑀺𑀢𑁆𑀢𑀁, 𑀢𑀢𑁄 𑀧𑀭𑀁 𑀤𑁆𑀯𑁂 𑀨𑀮𑀘𑀺𑀢𑁆𑀢𑀸𑀦𑀺 𑀳𑁄𑀦𑁆𑀢𑀺. 𑀏𑀯𑀁 𑀘𑀢𑀼𑀢𑁆𑀣𑀁 𑀧𑀜𑁆𑀘𑀫𑀁 𑀅𑀧𑁆𑀧𑀦𑀸𑀯𑀲𑁂𑀦 𑀧𑀯𑀢𑁆𑀢𑀢𑀺, 𑀦 𑀢𑀢𑁄 𑀧𑀭𑀁 𑀪𑀯𑀗𑁆𑀕𑀲𑁆𑀲 𑀆𑀲𑀦𑁆𑀦𑀢𑁆𑀢𑀸. 𑀓𑁂𑀘𑀺 𑀧𑀦 ‘‘𑀙𑀝𑁆𑀞𑀫𑁆𑀧𑀺 𑀘𑀺𑀢𑁆𑀢𑀁 𑀅𑀧𑁆𑀧𑁂𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀅𑀝𑁆𑀞𑀓𑀣𑀸𑀲𑀼 (𑀯𑀺𑀲𑀼𑀤𑁆𑀥𑀺. 𑁨.𑁮𑁧𑁧) 𑀧𑀝𑀺𑀓𑁆𑀔𑀺𑀢𑁆𑀢𑀁. 𑀏𑀯𑀁 𑀫𑀕𑁆𑀕𑀯𑀻𑀣𑀺𑀬𑀁 𑀨𑀮𑀁 𑀯𑁂𑀤𑀺𑀢𑀩𑁆𑀩𑀁. 𑀓𑀸𑀮𑀦𑁆𑀢𑀭𑁂 𑀨𑀮𑀁 𑀧𑀦 𑀨𑀮𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀧𑀯𑀢𑁆𑀢𑀁, 𑀦𑀺𑀭𑁄𑀥𑀸 𑀯𑀼𑀝𑁆𑀞𑀳𑀦𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀫𑀸𑀦𑀜𑁆𑀘 𑀏𑀢𑁂𑀦𑁂𑀯 𑀲𑀗𑁆𑀕𑀳𑀺𑀢𑀁. 𑀲𑀸 𑀧𑀦𑀸𑀬𑀁 𑀨𑀮𑀲𑀫𑀸𑀧𑀢𑁆𑀢𑀺 𑀅𑀢𑁆𑀣𑀢𑁄 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀸𑀦𑀁 𑀯𑀺𑀧𑀸𑀓𑀪𑀽𑀢𑀸 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀸 𑀅𑀧𑁆𑀧𑀦𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀓𑁂 𑀢𑀁 𑀲𑀫𑀸𑀧𑀚𑁆𑀚𑀦𑁆𑀢𑀺, 𑀓𑁂 𑀦 𑀲𑀫𑀸𑀧𑀚𑁆𑀚𑀦𑁆𑀢𑀻𑀢𑀺? 𑀲𑀩𑁆𑀩𑁂𑀧𑀺 𑀧𑀼𑀣𑀼𑀚𑁆𑀚𑀦𑀸 𑀦 𑀲𑀫𑀸𑀧𑀚𑁆𑀚𑀦𑁆𑀢𑀺 𑀅𑀦𑀥𑀺𑀕𑀢𑀢𑁆𑀢𑀸. 𑀢𑀣𑀸 𑀳𑁂𑀝𑁆𑀞𑀺𑀫𑀸 𑀅𑀭𑀺𑀬𑀸 𑀉𑀧𑀭𑀺𑀫𑀁, 𑀉𑀧𑀭𑀺𑀫𑀸𑀧𑀺 𑀅𑀭𑀺𑀬𑀸 𑀳𑁂𑀝𑁆𑀞𑀺𑀫𑀁 𑀦 𑀲𑀫𑀸𑀧𑀚𑁆𑀚𑀦𑁆𑀢𑀺𑀬𑁂𑀯 𑀧𑀼𑀕𑁆𑀕𑀮𑀦𑁆𑀢𑀭𑀪𑀸𑀯𑀽𑀧𑀕𑀫𑀦𑁂𑀦 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀪𑀸𑀯𑀢𑁄. 𑀅𑀢𑁆𑀢𑀦𑁄 𑀏𑀯 𑀨𑀮𑀁 𑀢𑁂 𑀢𑁂 𑀅𑀭𑀺𑀬𑀸 𑀲𑀫𑀸𑀧𑀚𑁆𑀚𑀦𑁆𑀢𑀺. 𑀓𑁂𑀘𑀺 𑀧𑀦 ‘‘𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀦𑁄 𑀨𑀮𑀲𑀫𑀸𑀧𑀢𑁆𑀢𑀺𑀁 𑀦 𑀲𑀫𑀸𑀧𑀚𑁆𑀚𑀦𑁆𑀢𑀺, 𑀉𑀧𑀭𑀺𑀫𑀸 𑀤𑁆𑀯𑁂𑀬𑁂𑀯 𑀲𑀫𑀸𑀧𑀚𑁆𑀚𑀦𑁆𑀢𑀺 𑀲𑀫𑀸𑀥𑀺𑀲𑁆𑀫𑀺𑀁 𑀧𑀭𑀺𑀧𑀽𑀭𑀓𑀸𑀭𑀺𑀪𑀸𑀯𑀢𑁄’’𑀢𑀺 𑀯𑀤𑀦𑁆𑀢𑀺. 𑀢𑀁 𑀅𑀓𑀸𑀭𑀡𑀁 𑀧𑀼𑀣𑀼𑀚𑁆𑀚𑀦𑀲𑁆𑀲𑀸𑀧𑀺 𑀅𑀢𑁆𑀢𑀦𑀸 𑀧𑀝𑀺𑀮𑀤𑁆𑀥𑀮𑁄𑀓𑀺𑀬𑀲𑀫𑀸𑀥𑀺𑀲𑀫𑀸𑀧𑀚𑁆𑀚𑀦𑀢𑁄. 𑀓𑀺𑀁 𑀯𑀸 𑀏𑀢𑁆𑀣 𑀓𑀸𑀭𑀡𑀘𑀺𑀦𑁆𑀢𑀸𑀬? 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 ‘‘𑀓𑀢𑀫𑀸 𑀤𑀲 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺 (𑀧𑀝𑀺. 𑀫. 𑁧.𑁫𑁭), 𑀓𑀢𑀫𑁂 𑀤𑀲 𑀕𑁄𑀢𑁆𑀭𑀪𑀼𑀥𑀫𑁆𑀫𑀸 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 (𑀧𑀝𑀺. 𑀫. 𑁧.𑁬𑁦) 𑀇𑀫𑁂𑀲𑀁 𑀧𑀜𑁆𑀳𑀸𑀦𑀁 𑀯𑀺𑀲𑁆𑀲𑀚𑁆𑀚𑀦𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀫𑀸𑀧𑀢𑁆𑀢𑀢𑁆𑀣𑀸𑀬 𑀲𑀓𑀤𑀸𑀕𑀸𑀫𑀺𑀨𑀮𑀲𑀫𑀸𑀧𑀢𑁆𑀢𑀢𑁆𑀣𑀸𑀬𑀸𑀢𑀺 𑀢𑁂𑀲𑀫𑁆𑀧𑀺 𑀅𑀭𑀺𑀬𑀸𑀦𑀁 𑀨𑀮𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑀁 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀲𑀩𑁆𑀩𑁂𑀧𑀺 𑀅𑀭𑀺𑀬𑀸 𑀬𑀣𑀸𑀲𑀓𑀁 𑀨𑀮𑀁 𑀲𑀫𑀸𑀧𑀚𑁆𑀚𑀦𑁆𑀢𑀻𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁.

𑀓𑀲𑁆𑀫𑀸 𑀧𑀦 𑀢𑁂 𑀲𑀫𑀸𑀧𑀚𑁆𑀚𑀦𑁆𑀢𑀻𑀢𑀺? 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀢𑁆𑀣𑀁. 𑀬𑀣𑀸 𑀳𑀺 𑀭𑀸𑀚𑀸𑀦𑁄 𑀭𑀚𑁆𑀚𑀲𑀼𑀔𑀁, 𑀤𑁂𑀯𑀢𑀸 𑀤𑀺𑀩𑁆𑀩𑀲𑀼𑀔𑀁 𑀅𑀦𑀼𑀪𑀯𑀦𑁆𑀢𑀺, 𑀏𑀯𑀁 𑀅𑀭𑀺𑀬𑀸 ‘‘𑀮𑁄𑀓𑀼𑀢𑁆𑀢𑀭𑀲𑀼𑀔𑀁 𑀅𑀦𑀼𑀪𑀯𑀺𑀲𑁆𑀲𑀸𑀫𑀸’’𑀢𑀺 𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 𑀇𑀘𑁆𑀙𑀺𑀢𑀓𑁆𑀔𑀡𑁂 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀦𑁆𑀢𑀺.

𑀓𑀣𑀜𑁆𑀘𑀲𑁆𑀲𑀸 𑀲𑀫𑀸𑀧𑀚𑁆𑀚𑀦𑀁, 𑀓𑀣𑀁 𑀞𑀸𑀦𑀁, 𑀓𑀣𑀁 𑀯𑀼𑀝𑁆𑀞𑀸𑀦𑀦𑁆𑀢𑀺? 𑀤𑁆𑀯𑀻𑀳𑀺 𑀢𑀸𑀯 𑀆𑀓𑀸𑀭𑁂𑀳𑀺 𑀅𑀲𑁆𑀲𑀸 𑀲𑀫𑀸𑀧𑀚𑁆𑀚𑀦𑀁 𑀳𑁄𑀢𑀺 𑀦𑀺𑀩𑁆𑀩𑀸𑀦𑀢𑁄 𑀅𑀜𑁆𑀜𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀅𑀫𑀦𑀲𑀺𑀓𑀸𑀭𑀸, 𑀦𑀺𑀩𑁆𑀩𑀸𑀦𑀲𑁆𑀲 𑀘 𑀫𑀦𑀲𑀺𑀓𑀸𑀭𑀸. 𑀬𑀣𑀸𑀳 𑁋

‘‘𑀤𑁆𑀯𑁂 𑀔𑁄, 𑀆𑀯𑀼𑀲𑁄, 𑀧𑀘𑁆𑀘𑀬𑀸 𑀅𑀦𑀺𑀫𑀺𑀢𑁆𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀲𑀫𑀸𑀧𑀢𑁆𑀢𑀺𑀬𑀸, 𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀜𑁆𑀘 𑀅𑀫𑀦𑀲𑀺𑀓𑀸𑀭𑁄, 𑀅𑀦𑀺𑀫𑀺𑀢𑁆𑀢𑀸𑀬 𑀘 𑀥𑀸𑀢𑀼𑀬𑀸 𑀫𑀦𑀲𑀺𑀓𑀸𑀭𑁄’’𑀢𑀺 (𑀫. 𑀦𑀺. 𑁧.𑁪𑁫𑁮).

𑀅𑀬𑀁 𑀧𑀦𑁂𑀢𑁆𑀣 𑀲𑀫𑀸𑀧𑀚𑁆𑀚𑀦𑀓𑁆𑀓𑀫𑁄 𑁋 𑀨𑀮𑀲𑀫𑀸𑀧𑀢𑁆𑀢𑀺𑀢𑁆𑀣𑀺𑀓𑁂𑀦 𑀅𑀭𑀺𑀬𑀲𑀸𑀯𑀓𑁂𑀦 𑀭𑀳𑁄𑀕𑀢𑁂𑀦 𑀧𑀝𑀺𑀲𑀮𑁆𑀮𑀻𑀦𑁂𑀦 𑀉𑀤𑀬𑀩𑁆𑀩𑀬𑀸𑀤𑀺𑀯𑀲𑁂𑀦 𑀲𑀗𑁆𑀔𑀸𑀭𑀸 𑀯𑀺𑀧𑀲𑁆𑀲𑀺𑀢𑀩𑁆𑀩𑀸. 𑀢𑀲𑁆𑀲𑁂𑀯𑀁 𑀧𑀯𑀢𑁆𑀢𑀸𑀦𑀼𑀧𑀼𑀩𑁆𑀩𑀯𑀺𑀧𑀲𑁆𑀲𑀦𑀲𑁆𑀲𑁂𑀯 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀕𑁄𑀢𑁆𑀭𑀪𑀼𑀜𑀸𑀡𑀸𑀦𑀦𑁆𑀢𑀭𑀁 𑀨𑀮𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀦𑀺𑀭𑁄𑀥𑁂 𑀘𑀺𑀢𑁆𑀢𑀫𑀧𑁆𑀧𑁂𑀢𑀺, 𑀨𑀮𑀲𑀫𑀸𑀧𑀢𑁆𑀢𑀺𑀦𑀺𑀦𑁆𑀦𑀪𑀸𑀯𑁂𑀦 𑀘 𑀲𑁂𑀓𑁆𑀔𑀲𑁆𑀲𑀸𑀧𑀺 𑀨𑀮𑀫𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀦 𑀫𑀕𑁆𑀕𑁄. 𑀬𑁂 𑀧𑀦 𑀯𑀤𑀦𑁆𑀢𑀺 ‘‘𑀲𑁄𑀢𑀸𑀧𑀦𑁆𑀦𑁄 𑀅𑀢𑁆𑀢𑀦𑁄 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀲𑁆𑀲𑀸𑀫𑀻𑀢𑀺 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀲𑀓𑀤𑀸𑀕𑀸𑀫𑀻 𑀳𑁄𑀢𑀺, 𑀲𑀓𑀤𑀸𑀕𑀸𑀫𑀻 𑀘 𑀅𑀦𑀸𑀕𑀸𑀫𑀻’’𑀢𑀺. 𑀢𑁂 𑀯𑀢𑁆𑀢𑀩𑁆𑀩𑀸 𑁋 𑀏𑀯𑀁 𑀲𑀦𑁆𑀢𑁂 𑀅𑀦𑀸𑀕𑀸𑀫𑀻 𑀅𑀭𑀳𑀸 𑀪𑀯𑀺𑀲𑁆𑀲𑀢𑀺, 𑀅𑀭𑀳𑀸 𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑁄, 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀘 𑀲𑀫𑁆𑀩𑀼𑀤𑁆𑀥𑁄𑀢𑀺 𑀆𑀧𑀚𑁆𑀚𑁂𑀬𑁆𑀬, 𑀢𑀲𑁆𑀫𑀸 𑀬𑀣𑀸𑀪𑀺𑀦𑀺𑀯𑁂𑀲𑀁 𑀬𑀣𑀸𑀚𑁆𑀛𑀸𑀲𑀬𑀁 𑀯𑀺𑀧𑀲𑁆𑀲𑀦𑀸 𑀅𑀢𑁆𑀣𑀁 𑀲𑀸𑀥𑁂𑀢𑀻𑀢𑀺 𑀲𑁂𑀓𑁆𑀔𑀲𑁆𑀲𑀸𑀧𑀺 𑀨𑀮𑀫𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀦 𑀫𑀕𑁆𑀕𑁄. 𑀨𑀮𑀫𑁆𑀧𑀺 𑀢𑀲𑁆𑀲 𑀲𑀘𑁂 𑀅𑀦𑁂𑀦 𑀧𑀞𑀫𑀚𑁆𑀛𑀸𑀦𑀺𑀓𑁄 𑀫𑀕𑁆𑀕𑁄 𑀅𑀥𑀺𑀕𑀢𑁄, 𑀧𑀞𑀫𑀚𑁆𑀛𑀸𑀦𑀺𑀓𑀫𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀲𑀘𑁂 𑀤𑀼𑀢𑀺𑀬𑀸𑀤𑀻𑀲𑀼 𑀅𑀜𑁆𑀜𑀢𑀭𑀚𑁆𑀛𑀸𑀦𑀺𑀓𑁄, 𑀤𑀼𑀢𑀺𑀬𑀸𑀤𑀻𑀲𑀼 𑀅𑀜𑁆𑀜𑀢𑀭𑀚𑁆𑀛𑀸𑀦𑀺𑀓𑀫𑁂𑀯𑀸𑀢𑀺.

𑀓𑀲𑁆𑀫𑀸 𑀧𑀦𑁂𑀢𑁆𑀣 𑀕𑁄𑀢𑁆𑀭𑀪𑀼𑀜𑀸𑀡𑀁 𑀫𑀕𑁆𑀕𑀜𑀸𑀡𑀧𑀼𑀭𑁂𑀘𑀸𑀭𑀺𑀓𑀁 𑀯𑀺𑀬 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀁 𑀦 𑀳𑁄𑀢𑀻𑀢𑀺? 𑀨𑀮𑀜𑀸𑀡𑀸𑀦𑀁 𑀅𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑀢𑁄. 𑀅𑀭𑀺𑀬𑀫𑀕𑁆𑀕𑀥𑀫𑁆𑀫𑀸𑀬𑁂𑀯 𑀳𑀺 𑀦𑀺𑀬𑁆𑀬𑀸𑀦𑀺𑀓𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀓𑀢𑀫𑁂 𑀥𑀫𑁆𑀫𑀸 𑀦𑀺𑀬𑁆𑀬𑀸𑀦𑀺𑀓𑀸? 𑀘𑀢𑁆𑀢𑀸𑀭𑁄 𑀅𑀭𑀺𑀬𑀫𑀕𑁆𑀕𑀸 𑀅𑀧𑀭𑀺𑀬𑀸𑀧𑀦𑁆𑀦𑀸’’𑀢𑀺 (𑀥. 𑀲. 𑁧𑁨𑁯𑁫). 𑀢𑀲𑁆𑀫𑀸 𑀏𑀓𑀦𑁆𑀢𑁂𑀦𑁂𑀯 𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑀲𑁆𑀲 𑀉𑀪𑀢𑁄 𑀯𑀼𑀝𑁆𑀞𑀸𑀦𑀪𑀸𑀯𑁂𑀦 𑀧𑀯𑀢𑁆𑀢𑀫𑀸𑀦𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀽𑀢𑁂𑀦 𑀜𑀸𑀡𑁂𑀦 𑀦𑀺𑀫𑀺𑀢𑁆𑀢𑀢𑁄 𑀯𑀼𑀝𑁆𑀞𑀺𑀢𑁂𑀦𑁂𑀯 𑀪𑀯𑀺𑀢𑀩𑁆𑀩𑀦𑁆𑀢𑀺 𑀢𑀲𑁆𑀲 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑀸 𑀬𑀼𑀢𑁆𑀢𑀸, 𑀦 𑀧𑀦 𑀅𑀭𑀺𑀬𑀫𑀕𑁆𑀕𑀲𑁆𑀲 𑀪𑀸𑀯𑀺𑀢𑀢𑁆𑀢𑀸 𑀢𑀲𑁆𑀲 𑀯𑀺𑀧𑀸𑀓𑀪𑀸𑀯𑁂𑀦 𑀧𑀯𑀢𑁆𑀢𑀫𑀸𑀦𑀸𑀦𑀁 𑀓𑀺𑀮𑁂𑀲𑀸𑀦𑀁 𑀅𑀲𑀫𑀼𑀘𑁆𑀙𑀺𑀦𑁆𑀤𑀦𑀢𑁄 𑀅𑀦𑀺𑀬𑁆𑀬𑀸𑀦𑀺𑀓𑀢𑁆𑀢𑀸 𑀅𑀯𑀼𑀝𑁆𑀞𑀸𑀦𑀲𑀪𑀸𑀯𑀸𑀦𑀁 𑀨𑀮𑀜𑀸𑀡𑀸𑀦𑀁 𑀧𑀼𑀭𑁂𑀘𑀸𑀭𑀺𑀓𑀜𑀸𑀡𑀲𑁆𑀲 𑀓𑀤𑀸𑀘𑀺𑀧𑀺 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑀸 𑀉𑀪𑀬𑀢𑁆𑀣 𑀅𑀦𑀼𑀮𑁄𑀫𑀜𑀸𑀡𑀸𑀦𑀁 𑀅𑀢𑀼𑀮𑁆𑀬𑀸𑀓𑀸𑀭𑀢𑁄. 𑀅𑀭𑀺𑀬𑀫𑀕𑁆𑀕𑀯𑀻𑀣𑀺𑀬𑀜𑁆𑀳𑀺 𑀅𑀦𑀼𑀮𑁄𑀫𑀜𑀸𑀡𑀸𑀦𑀺 𑀅𑀦𑀺𑀩𑁆𑀩𑀺𑀤𑁆𑀥𑀧𑀼𑀩𑁆𑀩𑀸𑀦𑀁 𑀣𑀽𑀮𑀣𑀽𑀮𑀸𑀦𑀁 𑀮𑁄𑀪𑀓𑁆𑀔𑀦𑁆𑀥𑀸𑀤𑀻𑀦𑀁 𑀲𑀸𑀢𑀺𑀲𑀬𑀁 𑀧𑀤𑀸𑀮𑀦𑁂𑀦 𑀮𑁄𑀓𑀺𑀬𑀜𑀸𑀡𑁂𑀦 𑀉𑀓𑁆𑀓𑀁𑀲𑀧𑀸𑀭𑀫𑀺𑀧𑁆𑀧𑀢𑁆𑀢𑀸𑀦𑀺 𑀫𑀕𑁆𑀕𑀜𑀸𑀡𑀸𑀦𑀼𑀓𑀽𑀮𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀨𑀮𑀲𑀫𑀸𑀧𑀢𑁆𑀢𑀺𑀯𑀻𑀣𑀺𑀬𑀁 𑀧𑀦 𑀢𑀸𑀦𑀺 𑀢𑀸𑀦𑀺 𑀢𑁂𑀦 𑀢𑁂𑀦 𑀫𑀕𑁆𑀕𑁂𑀦 𑀢𑁂𑀲𑀁 𑀢𑁂𑀲𑀁 𑀓𑀺𑀮𑁂𑀲𑀸𑀦𑀁 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸 𑀢𑀢𑁆𑀣 𑀦𑀺𑀭𑀼𑀲𑁆𑀲𑀼𑀓𑁆𑀓𑀸𑀦𑀺 𑀓𑁂𑀯𑀮𑀁 𑀅𑀭𑀺𑀬𑀸𑀦𑀁 𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑀲𑀫𑀗𑁆𑀕𑀺𑀪𑀸𑀯𑀲𑁆𑀲 𑀧𑀭𑀺𑀓𑀫𑁆𑀫𑀫𑀢𑁆𑀢𑀸𑀦𑀺 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀦 𑀢𑁂𑀲𑀁 𑀓𑀼𑀢𑁄𑀘𑀺 𑀯𑀼𑀝𑁆𑀞𑀸𑀦𑀲𑀫𑁆𑀪𑀯𑁄, 𑀬𑀢𑁄 𑀢𑁂𑀲𑀁 𑀧𑀭𑀺𑀬𑁄𑀲𑀸𑀦𑁂 𑀜𑀸𑀡𑀁 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀁 𑀯𑀼𑀝𑁆𑀞𑀸𑀦𑀢𑁄 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀁 𑀲𑀺𑀬𑀸. 𑀏𑀯𑀜𑁆𑀘 𑀓𑀢𑁆𑀯𑀸 𑀲𑁂𑀓𑁆𑀔𑀲𑁆𑀲 𑀅𑀢𑁆𑀢𑀦𑁄 𑀨𑀮𑀲𑀫𑀸𑀧𑀢𑁆𑀢𑀺𑀯𑀴𑀜𑁆𑀚𑀦𑀢𑁆𑀣𑀸𑀬 𑀉𑀤𑀬𑀩𑁆𑀩𑀬𑀸𑀤𑀺𑀯𑀲𑁂𑀦 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀦𑁆𑀢𑀲𑁆𑀲 𑀯𑀺𑀧𑀲𑁆𑀲𑀦𑀸𑀜𑀸𑀡𑀸𑀦𑀼𑀧𑀼𑀩𑁆𑀩𑀸𑀬 𑀨𑀮𑀫𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀦 𑀫𑀕𑁆𑀕𑁄𑀢𑀺 𑀅𑀬𑀜𑁆𑀘 𑀅𑀢𑁆𑀣𑁄 𑀲𑀫𑀢𑁆𑀣𑀺𑀢𑁄 𑀳𑁄𑀢𑀺. 𑀏𑀯𑀁 𑀢𑀸𑀯 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀲𑀫𑀸𑀧𑀚𑁆𑀚𑀦𑀁 𑀯𑁂𑀤𑀺𑀢𑀩𑁆𑀩𑀁.

‘‘𑀢𑀬𑁄 𑀔𑁄, 𑀆𑀯𑀼𑀲𑁄, 𑀧𑀘𑁆𑀘𑀬𑀸 𑀅𑀦𑀺𑀫𑀺𑀢𑁆𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀞𑀺𑀢𑀺𑀬𑀸, 𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀁 𑀅𑀫𑀦𑀲𑀺𑀓𑀸𑀭𑁄, 𑀅𑀦𑀺𑀫𑀺𑀢𑁆𑀢𑀸𑀬 𑀘 𑀥𑀸𑀢𑀼𑀬𑀸 𑀫𑀦𑀲𑀺𑀓𑀸𑀭𑁄, 𑀧𑀼𑀩𑁆𑀩𑁂 𑀘 𑀅𑀪𑀺𑀲𑀗𑁆𑀔𑀸𑀭𑁄’’𑀢𑀺 (𑀫. 𑀦𑀺. 𑁧.𑁪𑁫𑁮) 𑁋

𑀯𑀘𑀦𑀢𑁄 𑀧𑀦𑀲𑁆𑀲𑀸 𑀢𑀻𑀳𑀸𑀓𑀸𑀭𑁂𑀳𑀺 𑀞𑀸𑀦𑀁 𑀳𑁄𑀢𑀺. 𑀢𑀢𑁆𑀣 𑀧𑀼𑀩𑁆𑀩𑁂 𑀘 𑀅𑀪𑀺𑀲𑀗𑁆𑀔𑀸𑀭𑁄𑀢𑀺 𑀲𑀫𑀸𑀧𑀢𑁆𑀢𑀺𑀢𑁄 𑀧𑀼𑀩𑁆𑀩𑁂 𑀓𑀸𑀮𑀧𑀭𑀺𑀘𑁆𑀙𑁂𑀤𑁄. ‘‘𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀓𑀸𑀮𑁂 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸 𑀳𑀺𑀲𑁆𑀲𑀸 𑀬𑀸𑀯 𑀲𑁄 𑀓𑀸𑀮𑁄 𑀦𑀸𑀕𑀘𑁆𑀙𑀢𑀺, 𑀢𑀸𑀯 𑀯𑀼𑀝𑁆𑀞𑀸𑀦𑀁 𑀦 𑀳𑁄𑀢𑀺.

‘‘𑀤𑁆𑀯𑁂 𑀔𑁄, 𑀆𑀯𑀼𑀲𑁄, 𑀧𑀘𑁆𑀘𑀬𑀸 𑀅𑀦𑀺𑀫𑀺𑀢𑁆𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀯𑀼𑀝𑁆𑀞𑀸𑀦𑀲𑁆𑀲, 𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀜𑁆𑀘 𑀫𑀦𑀲𑀺𑀓𑀸𑀭𑁄, 𑀅𑀦𑀺𑀫𑀺𑀢𑁆𑀢𑀸𑀬 𑀘 𑀥𑀸𑀢𑀼𑀬𑀸 𑀅𑀫𑀦𑀲𑀺𑀓𑀸𑀭𑁄’’𑀢𑀺 (𑀫. 𑀦𑀺. 𑁧.𑁪𑁫𑁮) 𑁋

𑀯𑀘𑀦𑀢𑁄 𑀧𑀦𑀲𑁆𑀲𑀸 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀯𑀼𑀝𑁆𑀞𑀸𑀦𑀁 𑀳𑁄𑀢𑀺. 𑀢𑀢𑁆𑀣 𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀦𑁆𑀢𑀺 𑀭𑀽𑀧𑀦𑀺𑀫𑀺𑀢𑁆𑀢𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀦𑀺𑀫𑀺𑀢𑁆𑀢𑀸𑀦𑀁. 𑀓𑀸𑀫𑀜𑁆𑀘 𑀦 𑀲𑀩𑁆𑀩𑀸𑀦𑁂𑀯𑁂𑀢𑀸𑀦𑀺 𑀏𑀓𑀢𑁄 𑀫𑀦𑀲𑀺 𑀓𑀭𑁄𑀢𑀺, 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀯𑀲𑁂𑀦 𑀧𑀦𑁂𑀯𑀁 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀬𑀁 𑀪𑀯𑀗𑁆𑀕𑀲𑁆𑀲 𑀆𑀭𑀫𑁆𑀫𑀡𑀁, 𑀢𑀲𑁆𑀲 𑀫𑀦𑀲𑀺𑀓𑀭𑀡𑁂𑀦 𑀨𑀮𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀦𑀁 𑀳𑁄𑀢𑀻𑀢𑀺 𑀏𑀯𑀁 𑀅𑀲𑁆𑀲𑀸 𑀯𑀼𑀝𑁆𑀞𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀬𑀺𑀤𑀁 𑀏𑀯𑀫𑀺𑀥 𑀲𑀫𑀸𑀧𑀚𑁆𑀚𑀦𑀯𑀼𑀝𑁆𑀞𑀸𑀦𑀁 𑀅𑀭𑀳𑀢𑁆𑀢𑀨𑀮𑀪𑀽𑀢𑀁 𑁋

‘‘𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀤𑀭𑀣𑀁, 𑀅𑀫𑀢𑀸𑀭𑀫𑁆𑀫𑀡𑀁 𑀲𑀼𑀪𑀁;

𑀯𑀦𑁆𑀢𑀮𑁄𑀓𑀸𑀫𑀺𑀲𑀁 𑀲𑀦𑁆𑀢𑀁, 𑀲𑀸𑀫𑀜𑁆𑀜𑀨𑀮𑀫𑀼𑀢𑁆𑀢𑀫𑀁’’.

𑀇𑀢𑀺 𑀯𑀼𑀢𑁆𑀢𑀁 𑀲𑀸𑀢𑀸𑀢𑀺𑀲𑀸𑀢𑀁 𑀯𑀺𑀫𑀼𑀢𑁆𑀢𑀺𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀯𑀺𑀫𑀼𑀢𑁆𑀢𑀺𑀲𑀼𑀔𑀧𑀝𑀺𑀲𑀁𑀯𑁂𑀤𑀻𑀢𑀺 𑀯𑀺𑀫𑀼𑀢𑁆𑀢𑀺𑀲𑀼𑀔𑀁 𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑀺𑀬𑀫𑀸𑀦𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄’’𑀢𑀺.

𑀅𑀣𑀸𑀢𑀺 𑀅𑀥𑀺𑀓𑀸𑀭𑀢𑁆𑀣𑁂 𑀦𑀺𑀧𑀸𑀢𑁄. 𑀔𑁄𑀢𑀺 𑀧𑀤𑀧𑀽𑀭𑀡𑁂. 𑀢𑁂𑀲𑀼 𑀅𑀥𑀺𑀓𑀸𑀭𑀢𑁆𑀣𑁂𑀦 𑀅𑀣𑀸𑀢𑀺 𑀇𑀫𑀺𑀦𑀸 𑀯𑀺𑀫𑀼𑀢𑁆𑀢𑀺𑀲𑀼𑀔𑀧𑀝𑀺𑀲𑀁𑀯𑁂𑀤𑀦𑀢𑁄 𑀅𑀜𑁆𑀜𑀁 𑀅𑀥𑀺𑀓𑀸𑀭𑀁 𑀤𑀲𑁆𑀲𑁂𑀢𑀺. 𑀓𑁄 𑀧𑀦𑁂𑀲𑁄𑀢𑀺? 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀫𑀦𑀲𑀺𑀓𑀸𑀭𑁄. 𑀅𑀣𑀸𑀢𑀺 𑀯𑀸 𑀧𑀘𑁆𑀙𑀸𑀢𑀺 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 𑀦𑀺𑀧𑀸𑀢𑁄, 𑀢𑁂𑀦 ‘‘𑀢𑀲𑁆𑀲 𑀲𑀢𑁆𑀢𑀸𑀳𑀲𑁆𑀲 𑀅𑀘𑁆𑀘𑀬𑁂𑀦𑀸’’𑀢𑀺 𑀯𑀓𑁆𑀔𑀫𑀸𑀦𑀫𑁂𑀯 𑀅𑀢𑁆𑀣𑀁 𑀚𑁄𑀢𑁂𑀢𑀺. 𑀢𑀲𑁆𑀲 𑀲𑀢𑁆𑀢𑀸𑀳𑀲𑁆𑀲𑀸𑀢𑀺 𑀧𑀮𑁆𑀮𑀗𑁆𑀓𑀲𑀢𑁆𑀢𑀸𑀳𑀲𑁆𑀲. 𑀅𑀘𑁆𑀘𑀬𑁂𑀦𑀸𑀢𑀺 𑀅𑀧𑀕𑀫𑁂𑀦. 𑀢𑀫𑁆𑀳𑀸 𑀲𑀫𑀸𑀥𑀺𑀫𑁆𑀳𑀸𑀢𑀺 𑀅𑀭𑀳𑀢𑁆𑀢𑀨𑀮𑀲𑀫𑀸𑀥𑀺𑀢𑁄. 𑀇𑀥 𑀧𑀦 𑀞𑀢𑁆𑀯𑀸 𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢 𑀲𑀢𑁆𑀢𑀸𑀳𑀸𑀦𑀺 𑀤𑀲𑁆𑀲𑁂𑀢𑀩𑁆𑀩𑀸𑀦𑀻𑀢𑀺 𑀓𑁂𑀘𑀺 𑀢𑀸𑀦𑀺 𑀯𑀺𑀢𑁆𑀣𑀸𑀭𑀬𑀺𑀁𑀲𑀼. 𑀫𑀬𑀁 𑀧𑀦 𑀢𑀸𑀦𑀺 𑀔𑀦𑁆𑀥𑀓𑀧𑀸𑀞𑁂𑀦 𑀇𑀫𑀺𑀲𑁆𑀲𑀸 𑀉𑀤𑀸𑀦𑀧𑀸𑀴𑀺𑀬𑀸 𑀅𑀯𑀺𑀭𑁄𑀥𑀤𑀲𑁆𑀲𑀦𑀫𑀼𑀔𑁂𑀦 𑀧𑀭𑀢𑁄 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀭𑀢𑁆𑀢𑀺𑀬𑀸𑀢𑀺 𑀅𑀯𑀬𑀯𑀲𑀫𑁆𑀩𑀦𑁆𑀥𑁂 𑀲𑀸𑀫𑀺𑀯𑀘𑀦𑀁. 𑀧𑀞𑀫𑀦𑁆𑀢𑀺 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁. 𑀪𑀕𑀯𑀸 𑀳𑀺 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀲𑀓𑀮𑀫𑁆𑀧𑀺 𑀧𑀞𑀫𑀁 𑀬𑀸𑀫𑀁 𑀢𑁂𑀦𑁂𑀯 𑀫𑀦𑀲𑀺𑀓𑀸𑀭𑁂𑀦 𑀬𑀼𑀢𑁆𑀢𑁄 𑀅𑀳𑁄𑀲𑀻𑀢𑀺.

𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀦𑁆𑀢𑀺 𑀧𑀘𑁆𑀘𑀬𑀥𑀫𑁆𑀫𑀁. 𑀅𑀯𑀺𑀚𑁆𑀚𑀸𑀤𑀬𑁄 𑀳𑀺 𑀧𑀘𑁆𑀘𑀬𑀥𑀫𑁆𑀫𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄. 𑀓𑀣𑀫𑀺𑀤𑀁 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀘𑁂? 𑀪𑀕𑀯𑀢𑁄 𑀯𑀘𑀦𑁂𑀦. 𑀪𑀕𑀯𑀢𑀸 𑀳𑀺 ‘‘𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀏𑀲𑁂𑀯 𑀳𑁂𑀢𑀼, 𑀏𑀢𑀁 𑀦𑀺𑀤𑀸𑀦𑀁, 𑀏𑀲 𑀲𑀫𑀼𑀤𑀬𑁄, 𑀏𑀲 𑀧𑀘𑁆𑀘𑀬𑁄 𑀚𑀭𑀸𑀫𑀭𑀡𑀲𑁆𑀲, 𑀬𑀤𑀺𑀤𑀁 𑀚𑀸𑀢𑀺…𑀧𑁂… 𑀲𑀗𑁆𑀔𑀸𑀭𑀸𑀦𑀁, 𑀬𑀤𑀺𑀤𑀁 𑀅𑀯𑀺𑀚𑁆𑀚𑀸’’𑀢𑀺 (𑀤𑀻. 𑀦𑀺. 𑁨.𑁧𑁦𑁫 𑀆𑀤𑀬𑁄) 𑀏𑀯𑀁 𑀅𑀯𑀺𑀚𑁆𑀚𑀸𑀤𑀬𑁄 𑀳𑁂𑀢𑀽𑀢𑀺 𑀯𑀼𑀢𑁆𑀢𑀸. 𑀬𑀣𑀸 𑀤𑁆𑀯𑀸𑀤𑀲 𑀧𑀘𑁆𑀘𑀬𑀸 𑀤𑁆𑀯𑀸𑀤𑀲 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸𑀢𑀺.

𑀢𑀢𑁆𑀭𑀸𑀬𑀁 𑀯𑀘𑀦𑀢𑁆𑀣𑁄 𑁋 𑀅𑀜𑁆𑀜𑀫𑀜𑁆𑀜𑀁 𑀧𑀝𑀺𑀘𑁆𑀘 𑀧𑀝𑀺𑀫𑀼𑀔𑀁 𑀓𑀢𑁆𑀯𑀸 𑀓𑀸𑀭𑀡𑀲𑀫𑀯𑀸𑀬𑀁 𑀅𑀧𑁆𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀳𑀺𑀢𑁂 𑀉𑀧𑁆𑀧𑀸𑀤𑁂𑀢𑀻𑀢𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄. 𑀅𑀣 𑀯𑀸 𑀧𑀝𑀺𑀘𑁆𑀘 𑀧𑀘𑁆𑀘𑁂𑀢𑀩𑁆𑀩𑀁 𑀧𑀘𑁆𑀘𑀬𑀸𑀭𑀳𑀢𑀁 𑀧𑀘𑁆𑀘𑀬𑀁 𑀧𑀝𑀺𑀕𑀦𑁆𑀢𑁆𑀯𑀸 𑀦 𑀯𑀺𑀦𑀸 𑀢𑁂𑀦 𑀲𑀫𑁆𑀩𑀦𑁆𑀥𑀲𑁆𑀲 𑀉𑀧𑁆𑀧𑀸𑀤𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄𑀢𑀺 𑀘𑁂𑀢𑁆𑀣 𑀲𑀫𑀼𑀧𑁆𑀧𑀸𑀤𑀧𑀤𑀝𑁆𑀞𑀸𑀦𑀯𑀘𑀦𑀯𑀺𑀜𑁆𑀜𑁂𑀬𑁆𑀬𑁄 𑀨𑀮𑀲𑁆𑀲 𑀉𑀧𑁆𑀧𑀸𑀤𑀦𑀲𑀫𑀢𑁆𑀣𑀢𑀸𑀬𑀼𑀢𑁆𑀢𑁄 𑀳𑁂𑀢𑀼, 𑀦 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀢𑁆𑀢𑀺𑀫𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀅𑀣 𑀯𑀸 𑀧𑀘𑁆𑀘𑁂𑀢𑀼𑀁 𑀅𑀭𑀳𑀦𑁆𑀢𑀺 𑀦𑀁 𑀧𑀡𑁆𑀟𑀺𑀢𑀸𑀢𑀺 𑀧𑀝𑀺𑀘𑁆𑀘𑁄, 𑀲𑀫𑁆𑀫𑀸 𑀲𑀬𑀫𑁂𑀯 𑀯𑀸 𑀉𑀧𑁆𑀧𑀸𑀤𑁂𑀢𑀻𑀢𑀺 𑀲𑀫𑀼𑀧𑁆𑀧𑀸𑀤𑁄, 𑀧𑀝𑀺𑀘𑁆𑀘𑁄 𑀘 𑀲𑁄 𑀲𑀫𑀼𑀧𑁆𑀧𑀸𑀤𑁄 𑀘𑀸𑀢𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀅𑀦𑀼𑀮𑁄𑀫𑀦𑁆𑀢𑀺 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑁄 𑀅𑀯𑀺𑀚𑁆𑀚𑀸𑀤𑀺𑀓𑁄 𑀧𑀘𑁆𑀘𑀬𑀸𑀓𑀸𑀭𑁄 𑀅𑀢𑁆𑀢𑀦𑀸 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀓𑀭𑀡𑀢𑁄 𑀅𑀦𑀼𑀮𑁄𑀫𑁄𑀢𑀺 𑀯𑀼𑀘𑁆𑀘𑀢𑀺. 𑀅𑀣 𑀯𑀸 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀅𑀦𑁆𑀢𑀁 𑀧𑀸𑀧𑁂𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸 𑀧𑀯𑀢𑁆𑀢𑀺𑀬𑀸 𑀯𑀸 𑀅𑀦𑀼𑀮𑁄𑀫𑀢𑁄 𑀅𑀦𑀼𑀮𑁄𑀫𑁄, 𑀢𑀁 𑀅𑀦𑀼𑀮𑁄𑀫𑀁. 𑀲𑀸𑀥𑀼𑀓𑀁 𑀫𑀦𑀲𑀸𑀓𑀸𑀲𑀻𑀢𑀺 𑀲𑀓𑁆𑀓𑀘𑁆𑀘𑀁 𑀫𑀦𑀲𑀺 𑀅𑀓𑀸𑀲𑀺. 𑀬𑁄 𑀬𑁄 𑀧𑀘𑁆𑀘𑀬𑀥𑀫𑁆𑀫𑁄 𑀬𑀲𑁆𑀲 𑀬𑀲𑁆𑀲 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀲𑁆𑀲 𑀬𑀣𑀸 𑀬𑀣𑀸 𑀳𑁂𑀢𑀼𑀧𑀘𑁆𑀘𑀬𑀸𑀤𑀺𑀦𑀸 𑀧𑀘𑁆𑀘𑀬𑀪𑀸𑀯𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀁 𑀲𑀩𑁆𑀩𑀁 𑀅𑀯𑀺𑀧𑀭𑀻𑀢𑀁 𑀅𑀧𑀭𑀺𑀳𑀸𑀧𑁂𑀢𑁆𑀯𑀸 𑀅𑀦𑀯𑀲𑁂𑀲𑀢𑁄 𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑁂𑀦 𑀘𑀺𑀢𑁆𑀢𑁂 𑀅𑀓𑀸𑀲𑀻𑀢𑀺 𑀅𑀢𑁆𑀣𑁄. 𑀬𑀣𑀸 𑀧𑀦 𑀪𑀕𑀯𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸𑀦𑀼𑀮𑁄𑀫𑀁 𑀫𑀦𑀲𑀸𑀓𑀸𑀲𑀺, 𑀢𑀁 𑀲𑀗𑁆𑀔𑁂𑀧𑁂𑀦 𑀢𑀸𑀯 𑀤𑀲𑁆𑀲𑁂𑀢𑀼𑀁 ‘‘𑀇𑀢𑀺 𑀇𑀫𑀲𑁆𑀫𑀺𑀁 𑀲𑀢𑀺 𑀇𑀤𑀁 𑀳𑁄𑀢𑀺, 𑀇𑀫𑀲𑁆𑀲𑀼𑀧𑁆𑀧𑀸𑀤𑀸 𑀇𑀤𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀇𑀢𑀻𑀢𑀺 𑀏𑀯𑀁, 𑀅𑀦𑁂𑀦 𑀧𑀓𑀸𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀇𑀫𑀲𑁆𑀫𑀺𑀁 𑀲𑀢𑀺 𑀇𑀤𑀁 𑀳𑁄𑀢𑀻𑀢𑀺 𑀇𑀫𑀲𑁆𑀫𑀺𑀁 𑀅𑀯𑀺𑀚𑁆𑀚𑀸𑀤𑀺𑀓𑁂 𑀧𑀘𑁆𑀘𑀬𑁂 𑀲𑀢𑀺 𑀇𑀤𑀁 𑀲𑀗𑁆𑀔𑀸𑀭𑀸𑀤𑀺𑀓𑀁 𑀨𑀮𑀁 𑀳𑁄𑀢𑀺. 𑀇𑀫𑀲𑁆𑀲𑀼𑀧𑁆𑀧𑀸𑀤𑀸 𑀇𑀤𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀇𑀫𑀲𑁆𑀲 𑀅𑀯𑀺𑀚𑁆𑀚𑀸𑀤𑀺𑀓𑀲𑁆𑀲 𑀧𑀘𑁆𑀘𑀬𑀲𑁆𑀲 𑀉𑀧𑁆𑀧𑀸𑀤𑀸 𑀇𑀤𑀁 𑀲𑀗𑁆𑀔𑀸𑀭𑀸𑀤𑀺𑀓𑀁 𑀨𑀮𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀇𑀫𑀲𑁆𑀫𑀺𑀁 𑀅𑀲𑀢𑀺 𑀇𑀤𑀁 𑀦 𑀳𑁄𑀢𑀺, 𑀇𑀫𑀲𑁆𑀲 𑀦𑀺𑀭𑁄𑀥𑀸 𑀇𑀤𑀁 𑀦𑀺𑀭𑀼𑀚𑁆𑀛𑀢𑀻𑀢𑀺 𑀅𑀯𑀺𑀚𑁆𑀚𑀸𑀤𑀻𑀦𑀁 𑀅𑀪𑀸𑀯𑁂 𑀲𑀗𑁆𑀔𑀸𑀭𑀸𑀤𑀻𑀦𑀁 𑀅𑀪𑀸𑀯𑀲𑁆𑀲 𑀅𑀯𑀺𑀚𑁆𑀚𑀸𑀤𑀻𑀦𑀁 𑀦𑀺𑀭𑁄𑀥𑁂 𑀲𑀗𑁆𑀔𑀸𑀭𑀸𑀤𑀻𑀦𑀁 𑀦𑀺𑀭𑁄𑀥𑀲𑁆𑀲 𑀘 𑀤𑀼𑀢𑀺𑀬𑀢𑀢𑀺𑀬𑀲𑀼𑀢𑁆𑀢𑀯𑀘𑀦𑁂𑀦 𑀏𑀢𑀲𑁆𑀫𑀺𑀁 𑀧𑀘𑁆𑀘𑀬𑀮𑀓𑁆𑀔𑀡𑁂 𑀦𑀺𑀬𑀫𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺 𑁋 𑀇𑀫𑀲𑁆𑀫𑀺𑀁 𑀲𑀢𑀺 𑀏𑀯, 𑀦𑀸𑀲𑀢𑀺. 𑀇𑀫𑀲𑁆𑀲𑀼𑀧𑁆𑀧𑀸𑀤𑀸 𑀏𑀯, 𑀦𑀸𑀦𑀼𑀧𑁆𑀧𑀸𑀤𑀸. 𑀅𑀦𑀺𑀭𑁄𑀥𑀸 𑀏𑀯, 𑀦 𑀦𑀺𑀭𑁄𑀥𑀸𑀢𑀺. 𑀢𑁂𑀦𑁂𑀢𑀁 𑀮𑀓𑁆𑀔𑀡𑀁 𑀅𑀦𑁆𑀢𑁄𑀕𑀥𑀦𑀺𑀬𑀫𑀁 𑀇𑀥 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀦𑀺𑀭𑁄𑀥𑁄𑀢𑀺 𑀘 𑀅𑀯𑀺𑀚𑁆𑀚𑀸𑀤𑀻𑀦𑀁 𑀯𑀺𑀭𑀸𑀕𑀸𑀥𑀺𑀕𑀫𑁂𑀦 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑁄 𑀅𑀧𑁆𑀧𑀯𑀢𑁆𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑁋 ‘‘𑀅𑀯𑀺𑀚𑁆𑀚𑀸𑀬 𑀢𑁆𑀯𑁂𑀯 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄’’𑀢𑀺𑀆𑀤𑀺. 𑀦𑀺𑀭𑁄𑀥𑀦𑀺𑀭𑁄𑀥𑀻 𑀘 𑀉𑀧𑁆𑀧𑀸𑀤𑀦𑀺𑀭𑁄𑀥𑀻𑀪𑀸𑀯𑁂𑀦 𑀯𑀼𑀢𑁆𑀢𑁄 ‘‘𑀇𑀫𑀲𑁆𑀲 𑀦𑀺𑀭𑁄𑀥𑀸 𑀇𑀤𑀁 𑀦𑀺𑀭𑀼𑀚𑁆𑀛𑀢𑀻’’𑀢𑀺.

𑀢𑁂𑀦𑁂𑀢𑀁 𑀤𑀲𑁆𑀲𑁂𑀢𑀺 𑁋 𑀅𑀦𑀺𑀭𑁄𑀥𑁄 𑀉𑀧𑁆𑀧𑀸𑀤𑁄 𑀦𑀸𑀫, 𑀲𑁄 𑀘𑁂𑀢𑁆𑀣 𑀅𑀢𑁆𑀣𑀺𑀪𑀸𑀯𑁄𑀢𑀺𑀧𑀺 𑀯𑀼𑀘𑁆𑀘𑀢𑀻𑀢𑀺. ‘‘𑀇𑀫𑀲𑁆𑀫𑀺𑀁 𑀲𑀢𑀺 𑀇𑀤𑀁 𑀳𑁄𑀢𑀻’’𑀢𑀺 𑀇𑀤𑀫𑁂𑀯 𑀳𑀺 𑀮𑀓𑁆𑀔𑀡𑀁 𑀧𑀭𑀺𑀬𑀸𑀬𑀦𑁆𑀢𑀭𑁂𑀦 ‘‘𑀇𑀫𑀲𑁆𑀲 𑀉𑀧𑁆𑀧𑀸𑀤𑀸 𑀇𑀤𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀤𑀦𑁆𑀢𑁂𑀦 𑀧𑀭𑁂𑀦 𑀧𑀼𑀭𑀺𑀫𑀁 𑀯𑀺𑀲𑁂𑀲𑀺𑀢𑀁 𑀳𑁄𑀢𑀺. 𑀢𑀲𑁆𑀫𑀸 𑀦 𑀥𑀭𑀫𑀸𑀦𑀢𑀁𑀬𑁂𑀯 𑀲𑀦𑁆𑀥𑀸𑀬 ‘‘𑀇𑀫𑀲𑁆𑀫𑀺𑀁 𑀲𑀢𑀻’’𑀢𑀺 𑀯𑀼𑀢𑁆𑀢𑀁, 𑀅𑀣 𑀔𑁄 𑀫𑀕𑁆𑀕𑁂𑀦 𑀅𑀦𑀺𑀭𑀼𑀤𑁆𑀥𑀪𑀸𑀯𑀜𑁆𑀘𑀸𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀬𑀲𑁆𑀫𑀸 𑀘 ‘‘𑀇𑀫𑀲𑁆𑀫𑀺𑀁 𑀅𑀲𑀢𑀺 𑀇𑀤𑀁 𑀦 𑀳𑁄𑀢𑀺, 𑀇𑀫𑀲𑁆𑀲 𑀦𑀺𑀭𑁄𑀥𑀸 𑀇𑀤𑀁 𑀦𑀺𑀭𑀼𑀚𑁆𑀛𑀢𑀻’’𑀢𑀺 𑀤𑁆𑀯𑀺𑀥𑀸𑀧𑀺 𑀉𑀤𑁆𑀤𑀺𑀝𑁆𑀞𑀲𑁆𑀲 𑀮𑀓𑁆𑀔𑀡𑀲𑁆𑀲 𑀦𑀺𑀤𑁆𑀤𑁂𑀲𑀁 𑀯𑀤𑀦𑁆𑀢𑁂𑀦 ‘‘𑀅𑀯𑀺𑀚𑁆𑀚𑀸𑀬 𑀢𑁆𑀯𑁂𑀯 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄’’𑀢𑀺𑀆𑀤𑀺𑀦𑀸 𑀦𑀺𑀭𑁄𑀥𑁄 𑀏𑀯 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀦𑀢𑁆𑀣𑀺𑀪𑀸𑀯𑁄𑀧𑀺 𑀦𑀺𑀭𑁄𑀥𑁄 𑀏𑀯𑀸𑀢𑀺 𑀦𑀢𑁆𑀣𑀺𑀪𑀸𑀯𑀯𑀺𑀭𑀼𑀤𑁆𑀥𑁄 𑀅𑀢𑁆𑀣𑀺𑀪𑀸𑀯𑁄 𑀅𑀦𑀺𑀭𑁄𑀥𑁄𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀢𑁂𑀦 𑀅𑀦𑀺𑀭𑁄𑀥𑀲𑀗𑁆𑀔𑀸𑀢𑁂𑀦 𑀅𑀢𑁆𑀣𑀺𑀪𑀸𑀯𑁂𑀦 𑀉𑀧𑁆𑀧𑀸𑀤𑀁 𑀯𑀺𑀲𑁂𑀲𑁂𑀢𑀺. 𑀢𑀢𑁄 𑀦 𑀇𑀥 𑀅𑀢𑁆𑀣𑀺𑀪𑀸𑀯𑀫𑀢𑁆𑀢𑀁 𑀉𑀧𑁆𑀧𑀸𑀤𑁄𑀢𑀺 𑀅𑀢𑁆𑀣𑁄 𑀅𑀥𑀺𑀧𑁆𑀧𑁂𑀢𑁄, 𑀅𑀣 𑀔𑁄 𑀅𑀦𑀺𑀭𑁄𑀥𑀲𑀗𑁆𑀔𑀸𑀢𑁄 𑀅𑀢𑁆𑀣𑀺𑀪𑀸𑀯𑁄 𑀘𑀸𑀢𑀺 𑀅𑀬𑀫𑀢𑁆𑀣𑁄 𑀯𑀺𑀪𑀸𑀯𑀺𑀢𑁄𑀢𑀺. 𑀏𑀯𑀫𑁂𑀢𑀁 𑀮𑀓𑁆𑀔𑀡𑀤𑁆𑀯𑀬𑀯𑀘𑀦𑀁 𑀅𑀜𑁆𑀜𑀫𑀜𑁆𑀜𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀪𑀸𑀯𑁂𑀦 𑀲𑀸𑀢𑁆𑀣𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀓𑁄 𑀧𑀦𑀸𑀬𑀁 𑀅𑀦𑀺𑀭𑁄𑀥𑁄 𑀦𑀸𑀫, 𑀬𑁄 ‘‘𑀅𑀢𑁆𑀣𑀺𑀪𑀸𑀯𑁄, 𑀉𑀧𑁆𑀧𑀸𑀤𑁄’’𑀢𑀺 𑀘 𑀯𑀼𑀘𑁆𑀘𑀢𑀻𑀢𑀺? 𑀅𑀧𑁆𑀧𑀳𑀻𑀦𑀪𑀸𑀯𑁄 𑀘, 𑀅𑀦𑀺𑀩𑁆𑀩𑀢𑁆𑀢𑀺𑀢𑀨𑀮𑀸𑀭𑀳𑀢𑀸𑀧𑀳𑀸𑀦𑁂𑀳𑀺 𑀨𑀮𑀸𑀦𑀼𑀧𑁆𑀧𑀸𑀤𑀦𑀸𑀭𑀳𑀢𑀸 𑀘. 𑀬𑁂 𑀳𑀺 𑀧𑀳𑀸𑀢𑀩𑁆𑀩𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀢𑁂𑀲𑀁 𑀅𑀭𑀺𑀬𑀫𑀕𑁆𑀕𑁂𑀦 𑀅𑀲𑀫𑀼𑀕𑁆𑀖𑀸𑀝𑀺𑀢𑀪𑀸𑀯𑁄 𑀘. 𑀬𑁂 𑀧𑀦 𑀦 𑀧𑀳𑀸𑀢𑀩𑁆𑀩𑀸 𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀥𑀫𑁆𑀫𑀸, 𑀬𑀸𑀦𑀺 𑀢𑁂𑀲𑀼 𑀲𑀁𑀬𑁄𑀚𑀦𑀸𑀦𑀺 𑀅𑀔𑀻𑀡𑀸𑀲𑀯𑀸𑀦𑀁 𑀢𑁂𑀲𑀁 𑀅𑀧𑀭𑀺𑀓𑁆𑀔𑀻𑀡𑀢𑀸 𑀘. 𑀅𑀲𑀫𑀼𑀕𑁆𑀖𑀸𑀝𑀺𑀢𑀸𑀦𑀼𑀲𑀬𑀢𑀸𑀬 𑀳𑀺 𑀲𑀲𑀁𑀬𑁄𑀚𑀦𑀸 𑀔𑀦𑁆𑀥𑀧𑁆𑀧𑀯𑀢𑁆𑀢𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄. 𑀢𑀣𑀸 𑀘 𑀯𑀼𑀢𑁆𑀢𑀁 𑁋

‘‘𑀬𑀸𑀬 𑀘, 𑀪𑀺𑀓𑁆𑀔𑀯𑁂, 𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑀲𑁆𑀲 𑀩𑀸𑀮𑀲𑁆𑀲 𑀬𑀸𑀬 𑀘 𑀢𑀡𑁆𑀳𑀸𑀬 𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀅𑀬𑀁 𑀓𑀸𑀬𑁄 𑀲𑀫𑀼𑀤𑀸𑀕𑀢𑁄, 𑀲𑀸 𑀘𑁂𑀯 𑀅𑀯𑀺𑀚𑁆𑀚𑀸 𑀩𑀸𑀮𑀲𑁆𑀲 𑀅𑀧𑁆𑀧𑀳𑀻𑀦𑀸, 𑀲𑀸 𑀘 𑀢𑀡𑁆𑀳𑀸 𑀅𑀧𑀭𑀺𑀓𑁆𑀔𑀻𑀡𑀸. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀦, 𑀪𑀺𑀓𑁆𑀔𑀯𑁂, 𑀩𑀸𑀮𑁄 𑀅𑀘𑀭𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬, 𑀢𑀲𑁆𑀫𑀸 𑀩𑀸𑀮𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀓𑀸𑀬𑀽𑀧𑀕𑁄 𑀳𑁄𑀢𑀺, 𑀲𑁄 𑀓𑀸𑀬𑀽𑀧𑀕𑁄 𑀲𑀫𑀸𑀦𑁄 𑀦 𑀧𑀭𑀺𑀫𑀼𑀘𑁆𑀘𑀢𑀺 𑀚𑀸𑀢𑀺𑀬𑀸 𑀚𑀭𑀸𑀫𑀭𑀡𑁂𑀦𑀸’’𑀢𑀺𑀆𑀤𑀺 (𑀲𑀁. 𑀦𑀺. 𑁨.𑁧𑁯).

𑀔𑀻𑀡𑀲𑀁𑀬𑁄𑀚𑀦𑀸𑀦𑀁 𑀧𑀦 𑀅𑀯𑀺𑀚𑁆𑀚𑀸𑀬 𑀅𑀪𑀸𑀯𑀢𑁄 𑀲𑀗𑁆𑀔𑀸𑀭𑀸𑀦𑀁, 𑀢𑀡𑁆𑀳𑀼𑀧𑀸𑀤𑀸𑀦𑀸𑀦𑀁 𑀅𑀪𑀸𑀯𑀢𑁄 𑀉𑀧𑀸𑀤𑀸𑀦𑀪𑀯𑀸𑀦𑀁 𑀅𑀲𑀫𑁆𑀪𑀯𑁄𑀢𑀺 𑀯𑀝𑁆𑀝𑀲𑁆𑀲 𑀉𑀧𑀘𑁆𑀙𑁂𑀤𑁄 𑀧𑀜𑁆𑀜𑀸𑀬𑀺𑀲𑁆𑀲𑀢𑀻𑀢𑀺. 𑀢𑁂𑀦𑁂𑀯𑀸𑀳 𑁋

‘‘𑀙𑀦𑁆𑀦𑀁 𑀢𑁆𑀯𑁂𑀯, 𑀨𑀕𑁆𑀕𑀼𑀡, 𑀨𑀲𑁆𑀲𑀸𑀬𑀢𑀦𑀸𑀦𑀁 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀨𑀲𑁆𑀲𑀦𑀺𑀭𑁄𑀥𑁄, 𑀨𑀲𑁆𑀲𑀦𑀺𑀭𑁄𑀥𑀸 𑀯𑁂𑀤𑀦𑀸𑀦𑀺𑀭𑁄𑀥𑁄’’𑀢𑀺𑀆𑀤𑀺 (𑀲𑀁. 𑀦𑀺. 𑁨.𑁧𑁨).

𑀦 𑀳𑀺 𑀅𑀕𑁆𑀕𑀫𑀕𑁆𑀕𑀸𑀥𑀺𑀕𑀫𑀢𑁄 𑀉𑀤𑁆𑀥𑀁 𑀬𑀸𑀯 𑀧𑀭𑀺𑀦𑀺𑀩𑁆𑀩𑀸𑀦𑀸 𑀲𑀴𑀸𑀬𑀢𑀦𑀸𑀤𑀻𑀦𑀁 𑀅𑀧𑁆𑀧𑀯𑀢𑁆𑀢𑀺. 𑀅𑀣 𑀔𑁄 𑀦𑀢𑁆𑀣𑀺𑀢𑀸 𑀦𑀺𑀭𑁄𑀥𑀲𑀤𑁆𑀤𑀯𑀘𑀦𑀻𑀬𑀢𑀸 𑀔𑀻𑀡𑀲𑀁𑀬𑁄𑀚𑀦𑀢𑀸𑀢𑀺 𑀦𑀺𑀭𑁄𑀥𑁄 𑀯𑀼𑀢𑁆𑀢𑁄. 𑀅𑀧𑀺𑀘 𑀘𑀺𑀭𑀓𑀢𑀫𑁆𑀧𑀺 𑀓𑀫𑁆𑀫𑀁 𑀅𑀦𑀺𑀩𑁆𑀩𑀢𑁆𑀢𑀺𑀢𑀨𑀮𑀢𑀸𑀬 𑀅𑀧𑁆𑀧𑀳𑀻𑀦𑀸𑀳𑀸𑀭𑀢𑀸𑀬 𑀘 𑀨𑀮𑀸𑀭𑀳𑀁 𑀲𑀦𑁆𑀢𑀁 𑀏𑀯 𑀦𑀸𑀫 𑀳𑁄𑀢𑀺, 𑀦 𑀦𑀺𑀩𑁆𑀩𑀢𑁆𑀢𑀺𑀢𑀨𑀮𑀁, 𑀦𑀸𑀧𑀺 𑀧𑀳𑀻𑀦𑀸𑀳𑀸𑀭𑀦𑁆𑀢𑀺. 𑀨𑀮𑀼𑀧𑁆𑀧𑀢𑁆𑀢𑀺𑀧𑀘𑁆𑀘𑀬𑀸𑀦𑀁 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸𑀤𑀻𑀦𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀨𑀮𑀸𑀭𑀳𑀪𑀸𑀯𑁄 𑀅𑀦𑀺𑀭𑁄𑀥𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀅𑀦𑀺𑀭𑀼𑀤𑁆𑀥𑀪𑀸𑀯𑁂𑀦𑁂𑀯 𑀳𑀺 𑀬𑁂𑀦 𑀯𑀺𑀦𑀸 𑀨𑀮𑀁 𑀦 𑀲𑀫𑁆𑀪𑀯𑀢𑀺, 𑀢𑀁 𑀓𑀸𑀭𑀡𑀁 𑀅𑀢𑀻𑀢𑀦𑁆𑀢𑀺𑀧𑀺 𑀇𑀫𑀲𑁆𑀫𑀺𑀁 𑀲𑀢𑀻𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦 𑀯𑀼𑀢𑁆𑀢𑀁. 𑀢𑀢𑁄𑀬𑁂𑀯 𑀘 𑀅𑀯𑀼𑀲𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀅𑀧𑁆𑀧𑀯𑀢𑁆𑀢𑀺𑀥𑀫𑁆𑀫𑀢𑀁 𑀅𑀦𑀸𑀧𑀦𑁆𑀦𑁄 𑀧𑀘𑁆𑀘𑀬𑀼𑀧𑁆𑀧𑀸𑀤𑁄 𑀓𑀸𑀮𑀪𑁂𑀤𑀁 𑀅𑀦𑀸𑀫𑀲𑀺𑀢𑁆𑀯𑀸 𑀅𑀦𑀺𑀯𑀢𑁆𑀢𑀦𑀸𑀬 𑀏𑀯 𑀇𑀫𑀲𑁆𑀲 𑀉𑀧𑁆𑀧𑀸𑀤𑀸𑀢𑀺 𑀯𑀼𑀢𑁆𑀢𑁄. 𑀅𑀣 𑀯𑀸 𑀅𑀯𑀲𑁂𑀲𑀧𑀘𑁆𑀘𑀬𑀲𑀫𑀯𑀸𑀬𑁂 𑀅𑀯𑀺𑀚𑁆𑀚𑀫𑀸𑀦𑀲𑁆𑀲𑀧𑀺 𑀯𑀺𑀚𑁆𑀚𑀫𑀸𑀦𑀲𑁆𑀲 𑀯𑀺𑀬 𑀧𑀕𑁂𑀯 𑀯𑀺𑀚𑁆𑀚𑀫𑀸𑀦𑀲𑁆𑀲 𑀬𑀸 𑀨𑀮𑀼𑀧𑁆𑀧𑀢𑁆𑀢𑀺𑀅𑀪𑀺𑀫𑀼𑀔𑀢𑀸, 𑀲𑀸 𑀇𑀫𑀲𑁆𑀲 𑀉𑀧𑁆𑀧𑀸𑀤𑀸𑀢𑀺 𑀯𑀼𑀢𑁆𑀢𑀸. 𑀢𑀣𑀸 𑀳𑀺 𑀢𑀢𑁄 𑀨𑀮𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀢𑀤𑀯𑀢𑁆𑀣𑀁 𑀓𑀸𑀭𑀡𑀁 𑀨𑀮𑀲𑁆𑀲 𑀉𑀧𑁆𑀧𑀸𑀤𑀦𑀪𑀸𑀯𑁂𑀦 𑀉𑀝𑁆𑀞𑀺𑀢𑀁 𑀉𑀧𑁆𑀧𑀢𑀺𑀢𑀁 𑀦𑀸𑀫 𑀳𑁄𑀢𑀺, 𑀦 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀅𑀢𑀤𑀯𑀢𑁆𑀣𑀦𑁆𑀢𑀺 𑀢𑀤𑀯𑀢𑁆𑀣𑀢𑀸 𑀉𑀧𑁆𑀧𑀸𑀤𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀣 𑀲𑀢𑀻𑀢𑀺 𑀇𑀫𑀺𑀦𑀸 𑀯𑀺𑀚𑁆𑀚𑀫𑀸𑀦𑀢𑀸𑀫𑀢𑁆𑀢𑁂𑀦 𑀧𑀘𑁆𑀘𑀬𑀪𑀸𑀯𑀁 𑀯𑀤𑀦𑁆𑀢𑁄 𑀅𑀩𑁆𑀬𑀸𑀧𑀸𑀭𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲 𑀤𑀲𑁆𑀲𑁂𑀢𑀺. 𑀉𑀧𑁆𑀧𑀸𑀤𑀸𑀢𑀺 𑀉𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀁 𑀅𑀲𑀩𑁆𑀩𑀓𑀸𑀮𑀪𑀸𑀯𑀺𑀢𑀁 𑀨𑀮𑀼𑀧𑁆𑀧𑀢𑁆𑀢𑀺𑀅𑀪𑀺𑀫𑀼𑀔𑀢𑀜𑁆𑀘 𑀤𑀻𑀧𑁂𑀦𑁆𑀢𑁄 𑀅𑀦𑀺𑀘𑁆𑀘𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲 𑀤𑀲𑁆𑀲𑁂𑀢𑀺. ‘‘𑀲𑀢𑀺, 𑀦𑀸𑀲𑀢𑀺, 𑀉𑀧𑁆𑀧𑀸𑀤𑀸, 𑀦 𑀦𑀺𑀭𑁄𑀥𑀸’’𑀢𑀺 𑀧𑀦 𑀳𑁂𑀢𑀼𑀅𑀢𑁆𑀣𑁂𑀳𑀺 𑀪𑀼𑀫𑁆𑀫𑀦𑀺𑀲𑁆𑀲𑀓𑁆𑀓𑀯𑀘𑀦𑁂𑀳𑀺 𑀲𑀫𑀢𑁆𑀣𑀺𑀢𑀁 𑀦𑀺𑀤𑀸𑀦𑀲𑀫𑀼𑀤𑀬𑀚𑀸𑀢𑀺𑀧𑀪𑀯𑀪𑀸𑀯𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲 𑀤𑀲𑁆𑀲𑁂𑀢𑀺. 𑀳𑁂𑀢𑀼𑀅𑀢𑁆𑀣𑀢𑀸 𑀘𑁂𑀢𑁆𑀣 𑀪𑀼𑀫𑁆𑀫𑀯𑀘𑀦𑁂 𑀬𑀲𑁆𑀲 𑀪𑀸𑀯𑁂 𑀢𑀤𑀯𑀺𑀦𑀸𑀪𑀸𑀯𑀺𑀨𑀮𑀲𑁆𑀲 𑀪𑀸𑀯𑁄 𑀮𑀓𑁆𑀔𑀻𑀬𑀢𑀺, 𑀢𑀢𑁆𑀣 𑀧𑀯𑀢𑁆𑀢𑀺𑀬𑀸 𑀯𑁂𑀤𑀺𑀢𑀩𑁆𑀩𑀸 𑀬𑀣𑀸 ‘‘𑀅𑀥𑀦𑀸𑀦𑀁 𑀥𑀦𑁂 𑀅𑀦𑀦𑀼𑀧𑁆𑀧𑀤𑀻𑀬𑀫𑀸𑀦𑁂 𑀤𑀸𑀮𑀺𑀤𑁆𑀤𑀺𑀬𑀁 𑀯𑁂𑀧𑀼𑀮𑁆𑀮𑀁 𑀅𑀕𑀫𑀸𑀲𑀻’’𑀢𑀺 (𑀤𑀻. 𑀦𑀺. 𑁩.𑁯𑁧) 𑀘 ‘‘𑀦𑀺𑀧𑁆𑀨𑀦𑁆𑀦𑁂𑀲𑀼 𑀲𑀲𑁆𑀲𑁂𑀲𑀼 𑀲𑀼𑀪𑀺𑀓𑁆𑀔𑀁 𑀚𑀸𑀬𑀢𑀻’’𑀢𑀺 𑀘. 𑀦𑀺𑀲𑁆𑀲𑀓𑁆𑀓𑀯𑀘𑀦𑀲𑁆𑀲𑀸𑀧𑀺 𑀳𑁂𑀢𑀼𑀅𑀢𑁆𑀣𑀢𑀸 𑀨𑀮𑀲𑁆𑀲 𑀧𑀪𑀯𑁂 𑀧𑀓𑀢𑀺𑀬𑀜𑁆𑀘 𑀧𑀯𑀢𑁆𑀢𑀺𑀢𑁄 𑀬𑀣𑀸 ‘‘𑀓𑀮𑀮𑀸 𑀳𑁄𑀢𑀺 𑀅𑀩𑁆𑀩𑀼𑀤𑀁, 𑀅𑀩𑁆𑀩𑀼𑀤𑀸 𑀚𑀸𑀬𑀢𑀻 𑀧𑁂𑀲𑀻’’𑀢𑀺 (𑀲𑀁. 𑀦𑀺. 𑁧.𑁨𑁩𑁫) 𑀘 ‘‘𑀳𑀺𑀫𑀯𑀢𑀸 𑀕𑀗𑁆𑀕𑀸 𑀧𑀪𑀯𑀦𑁆𑀢𑀺, 𑀲𑀺𑀗𑁆𑀕𑀢𑁄 𑀲𑀭𑁄 𑀚𑀸𑀬𑀢𑀻’’𑀢𑀺 𑀘. 𑀅𑀯𑀺𑀚𑁆𑀚𑀸𑀤𑀺𑀪𑀸𑀯𑁂 𑀘 𑀢𑀤𑀯𑀺𑀦𑀸𑀪𑀸𑀯𑁂𑀦 𑀲𑀗𑁆𑀔𑀸𑀭𑀸𑀤𑀺𑀪𑀸𑀯𑁄 𑀮𑀓𑁆𑀔𑀻𑀬𑀢𑀺, 𑀅𑀯𑀺𑀚𑁆𑀚𑀸𑀤𑀻𑀳𑀺 𑀘 𑀲𑀗𑁆𑀔𑀸𑀭𑀸𑀤𑀬𑁄 𑀧𑀪𑀯𑀦𑁆𑀢𑀺 𑀧𑀓𑀭𑀺𑀬𑀦𑁆𑀢𑀺 𑀘𑀸𑀢𑀺 𑀢𑁂 𑀢𑁂𑀲𑀁 𑀧𑀪𑀯𑁄 𑀧𑀓𑀢𑀺 𑀘, 𑀢𑀲𑁆𑀫𑀸 𑀢𑀤𑀢𑁆𑀣𑀤𑀻𑀧𑀦𑀢𑁆𑀣𑀁 ‘‘𑀇𑀫𑀲𑁆𑀫𑀺𑀁 𑀲𑀢𑀺 𑀇𑀫𑀲𑁆𑀲 𑀉𑀧𑁆𑀧𑀸𑀤𑀸’’𑀢𑀺 𑀳𑁂𑀢𑀼𑀅𑀢𑁆𑀣𑁂 𑀪𑀼𑀫𑁆𑀫𑀦𑀺𑀲𑁆𑀲𑀓𑁆𑀓𑀦𑀺𑀤𑁆𑀤𑁂𑀲𑀸 𑀓𑀢𑀸𑀢𑀺.

𑀬𑀲𑁆𑀫𑀸 𑀘𑁂𑀢𑁆𑀣 ‘‘𑀇𑀫𑀲𑁆𑀫𑀺𑀁 𑀲𑀢𑀺 𑀇𑀤𑀁 𑀳𑁄𑀢𑀺, 𑀇𑀫𑀲𑁆𑀲𑀼𑀧𑁆𑀧𑀸𑀤𑀸 𑀇𑀤𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀲𑀗𑁆𑀔𑁂𑀧𑁂𑀦 𑀉𑀤𑁆𑀤𑀺𑀝𑁆𑀞𑀲𑁆𑀲 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺𑀆𑀤𑀺𑀓𑁄 𑀦𑀺𑀤𑁆𑀤𑁂𑀲𑁄, 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑁄 𑀅𑀢𑁆𑀣𑀺𑀪𑀸𑀯𑁄 𑀉𑀧𑁆𑀧𑀸𑀤𑁄 𑀘 𑀢𑁂𑀲𑀁 𑀢𑁂𑀲𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀪𑀸𑀯𑁄𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀦 𑀳𑀺 𑀅𑀦𑀺𑀭𑀼𑀤𑁆𑀥𑀢𑀸𑀲𑀗𑁆𑀔𑀸𑀢𑀁 𑀅𑀢𑁆𑀣𑀺𑀪𑀸𑀯𑀁 𑀉𑀧𑁆𑀧𑀸𑀤𑀜𑁆𑀘 𑀅𑀦𑀺𑀯𑀢𑁆𑀢𑀲𑀪𑀸𑀯𑀢𑀸𑀲𑀗𑁆𑀔𑀸𑀢𑀁 𑀉𑀤𑀬𑀸𑀯𑀢𑁆𑀣𑀢𑀸𑀲𑀗𑁆𑀔𑀸𑀢𑀁 𑀯𑀸 ‘‘𑀲𑀢𑀺 𑀏𑀯, 𑀦𑀸𑀲𑀢𑀺, 𑀉𑀧𑁆𑀧𑀸𑀤𑀸 𑀏𑀯, 𑀦 𑀦𑀺𑀭𑁄𑀥𑀸’’𑀢𑀺 𑀅𑀦𑁆𑀢𑁄𑀕𑀥𑀦𑀺𑀬𑀫𑁂𑀳𑀺 𑀯𑀘𑀦𑁂𑀳𑀺 𑀅𑀪𑀺𑀳𑀺𑀢𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑁄 𑀧𑀘𑁆𑀘𑀬𑀪𑀸𑀯𑁄 𑀦𑀸𑀫 𑀅𑀢𑁆𑀣𑀺, 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑁄 𑀅𑀢𑁆𑀣𑀺𑀪𑀸𑀯𑁄 𑀉𑀧𑁆𑀧𑀸𑀤𑁄 𑀘 𑀧𑀘𑁆𑀘𑀬𑀪𑀸𑀯𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑁂𑀧𑀺 𑀧𑀝𑁆𑀞𑀸𑀦𑁂 𑀆𑀕𑀢𑀸 𑀳𑁂𑀢𑀼𑀆𑀤𑀬𑁄 𑀘𑀢𑀼𑀯𑀻𑀲𑀢𑀺 𑀧𑀘𑁆𑀘𑀬𑀸, 𑀢𑁂𑀧𑀺 𑀏𑀢𑀲𑁆𑀲𑁂𑀯 𑀧𑀘𑁆𑀘𑀬𑀪𑀸𑀯𑀲𑁆𑀲 𑀯𑀺𑀲𑁂𑀲𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀇𑀢𑀺 𑀬𑀣𑀸 𑀯𑀺𑀢𑁆𑀣𑀸𑀭𑁂𑀦 𑀅𑀦𑀼𑀮𑁄𑀫𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀫𑀦𑀲𑀺 𑀅𑀓𑀸𑀲𑀺, 𑀢𑀁 𑀤𑀲𑁆𑀲𑁂𑀢𑀼𑀁, ‘‘𑀬𑀤𑀺𑀤𑀁 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀬𑀤𑀺𑀤𑀦𑁆𑀢𑀺 𑀦𑀺𑀧𑀸𑀢𑁄, 𑀢𑀲𑁆𑀲 𑀬𑁄 𑀅𑀬𑀦𑁆𑀢𑀺 𑀅𑀢𑁆𑀣𑁄. 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸𑀢𑀺𑀆𑀤𑀻𑀲𑀼 𑀅𑀯𑀺𑀦𑁆𑀤𑀺𑀬𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀁 𑀯𑀺𑀦𑁆𑀤𑀢𑀻𑀢𑀺 𑀅𑀯𑀺𑀚𑁆𑀚𑀸, 𑀯𑀺𑀦𑁆𑀤𑀺𑀬𑀁 𑀓𑀸𑀬𑀲𑀼𑀘𑀭𑀺𑀢𑀸𑀤𑀺𑀁 𑀦 𑀯𑀺𑀦𑁆𑀤𑀢𑀻𑀢𑀺 𑀅𑀯𑀺𑀚𑁆𑀚𑀸, 𑀥𑀫𑁆𑀫𑀸𑀦𑀁 𑀅𑀯𑀺𑀧𑀭𑀻𑀢𑀲𑀪𑀸𑀯𑀁 𑀅𑀯𑀺𑀤𑀺𑀢𑀁 𑀓𑀭𑁄𑀢𑀻𑀢𑀺 𑀅𑀯𑀺𑀚𑁆𑀚𑀸, 𑀅𑀦𑁆𑀢𑀯𑀺𑀭𑀳𑀺𑀢𑁂 𑀲𑀁𑀲𑀸𑀭𑁂 𑀪𑀯𑀸𑀤𑀻𑀲𑀼 𑀲𑀢𑁆𑀢𑁂 𑀚𑀯𑀸𑀧𑁂𑀢𑀻𑀢𑀺 𑀅𑀯𑀺𑀚𑁆𑀚𑀸, 𑀅𑀯𑀺𑀚𑁆𑀚𑀫𑀸𑀦𑁂𑀲𑀼 𑀚𑀯𑀢𑀺 𑀯𑀺𑀚𑁆𑀚𑀫𑀸𑀦𑁂𑀲𑀼 𑀦 𑀚𑀯𑀢𑀻𑀢𑀺 𑀅𑀯𑀺𑀚𑁆𑀚𑀸, 𑀯𑀺𑀚𑁆𑀚𑀸𑀬 𑀧𑀝𑀺𑀧𑀓𑁆𑀔𑀸𑀢𑀺 𑀅𑀯𑀺𑀚𑁆𑀚𑀸, 𑀲𑀸 ‘‘𑀤𑀼𑀓𑁆𑀔𑁂 𑀅𑀜𑁆𑀜𑀸𑀡’’𑀦𑁆𑀢𑀺𑀆𑀤𑀺𑀦𑀸 𑀘𑀢𑀼𑀩𑁆𑀩𑀺𑀥𑀸 𑀯𑁂𑀤𑀺𑀢𑀩𑁆𑀩𑀸. 𑀧𑀝𑀺𑀘𑁆𑀘 𑀦 𑀯𑀺𑀦𑀸 𑀨𑀮𑀁 𑀏𑀢𑀺 𑀉𑀧𑁆𑀧𑀚𑁆𑀚𑀢𑀺 𑀘𑁂𑀯 𑀧𑀯𑀢𑁆𑀢𑀢𑀺 𑀘𑀸𑀢𑀺 𑀧𑀘𑁆𑀘𑀬𑁄, 𑀉𑀧𑀓𑀸𑀭𑀓𑀢𑁆𑀣𑁄 𑀯𑀸 𑀧𑀘𑁆𑀘𑀬𑁄. 𑀅𑀯𑀺𑀚𑁆𑀚𑀸 𑀘 𑀲𑀸 𑀧𑀘𑁆𑀘𑀬𑁄 𑀘𑀸𑀢𑀺 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑁄, 𑀢𑀲𑁆𑀫𑀸 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸. 𑀲𑀗𑁆𑀔𑀭𑁄𑀦𑁆𑀢𑀻𑀢𑀺 𑀲𑀗𑁆𑀔𑀸𑀭𑀸, 𑀮𑁄𑀓𑀺𑀬𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸, 𑀲𑀸 𑀧𑀼𑀜𑁆𑀜𑀸𑀧𑀼𑀜𑁆𑀜𑀸𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀢𑀺𑀯𑀺𑀥𑀸 𑀯𑁂𑀤𑀺𑀢𑀩𑁆𑀩𑀸. 𑀯𑀺𑀚𑀸𑀦𑀸𑀢𑀻𑀢𑀺 𑀯𑀺𑀜𑁆𑀜𑀸𑀡𑀁, 𑀢𑀁 𑀮𑁄𑀓𑀺𑀬𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀯𑀲𑁂𑀦 𑀤𑁆𑀯𑀢𑁆𑀢𑀺𑀁𑀲𑀯𑀺𑀥𑀁. 𑀦𑀫𑀢𑀻𑀢𑀺 𑀦𑀸𑀫𑀁, 𑀯𑁂𑀤𑀦𑀸𑀤𑀺𑀓𑁆𑀔𑀦𑁆𑀥𑀢𑁆𑀢𑀬𑀁. 𑀭𑀼𑀧𑁆𑀧𑀢𑀻𑀢𑀺 𑀭𑀽𑀧𑀁, 𑀪𑀽𑀢𑀭𑀽𑀧𑀁 𑀘𑀓𑁆𑀔𑀸𑀤𑀺𑀉𑀧𑀸𑀤𑀸𑀭𑀽𑀧𑀜𑁆𑀘. 𑀆𑀬𑀢𑀢𑀺 𑀆𑀬𑀢𑀜𑁆𑀘 𑀲𑀁𑀲𑀸𑀭𑀤𑀼𑀓𑁆𑀔𑀁 𑀦𑀬𑀢𑀻𑀢𑀺 𑀆𑀬𑀢𑀦𑀁. 𑀨𑀼𑀲𑀢𑀻𑀢𑀺 𑀨𑀲𑁆𑀲𑁄. 𑀯𑁂𑀤𑀬𑀢𑀻𑀢𑀺 𑀯𑁂𑀤𑀦𑀸. 𑀇𑀤𑀫𑁆𑀧𑀺 𑀤𑁆𑀯𑀬𑀁 𑀤𑁆𑀯𑀸𑀭𑀯𑀲𑁂𑀦 𑀙𑀩𑁆𑀩𑀺𑀥𑀁, 𑀯𑀺𑀧𑀸𑀓𑀯𑀲𑁂𑀦 𑀕𑀳𑀡𑁂 𑀙𑀢𑁆𑀢𑀺𑀁𑀲𑀯𑀺𑀥𑀁. 𑀧𑀭𑀺𑀢𑀲𑁆𑀲𑀢𑀻𑀢𑀺 𑀢𑀡𑁆𑀳𑀸, 𑀲𑀸 𑀓𑀸𑀫𑀢𑀡𑁆𑀳𑀸𑀤𑀺𑀯𑀲𑁂𑀦 𑀲𑀗𑁆𑀔𑁂𑀧𑀢𑁄 𑀢𑀺𑀯𑀺𑀥𑀸, 𑀯𑀺𑀢𑁆𑀣𑀸𑀭𑀢𑁄 𑀅𑀝𑁆𑀞𑀼𑀢𑁆𑀢𑀭𑀲𑀢𑀯𑀺𑀥𑀸 𑀘. 𑀉𑀧𑀸𑀤𑀻𑀬𑀢𑀻𑀢𑀺 𑀉𑀧𑀸𑀤𑀸𑀦𑀁, 𑀢𑀁 𑀓𑀸𑀫𑀼𑀧𑀸𑀤𑀸𑀦𑀸𑀤𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀁. 𑀪𑀯𑀢𑀺 𑀪𑀸𑀯𑀬𑀢𑀺 𑀘𑀸𑀢𑀺 𑀪𑀯𑁄, 𑀲𑁄 𑀓𑀫𑁆𑀫𑀽𑀧𑀧𑀢𑁆𑀢𑀺𑀪𑁂𑀤𑀢𑁄 𑀤𑀼𑀯𑀺𑀥𑁄. 𑀚𑀦𑀦𑀁 𑀚𑀸𑀢𑀺. 𑀚𑀻𑀭𑀡𑀁 𑀚𑀭𑀸. 𑀫𑀭𑀦𑁆𑀢𑀺 𑀢𑁂𑀦𑀸𑀢𑀺 𑀫𑀭𑀡𑀁. 𑀲𑁄𑀘𑀦𑀁 𑀲𑁄𑀓𑁄. 𑀧𑀭𑀺𑀤𑁂𑀯𑀦𑀁 𑀧𑀭𑀺𑀤𑁂𑀯𑁄. 𑀤𑀼𑀓𑁆𑀔𑀬𑀢𑀻𑀢𑀺 𑀤𑀼𑀓𑁆𑀔𑀁, 𑀉𑀧𑁆𑀧𑀸𑀤𑀝𑁆𑀞𑀺𑀢𑀺𑀯𑀲𑁂𑀦 𑀤𑁆𑀯𑁂𑀥𑀸 𑀔𑀡𑀢𑀻𑀢𑀺 𑀤𑀼𑀓𑁆𑀔𑀁. 𑀤𑀼𑀫𑀦𑀲𑁆𑀲 𑀪𑀸𑀯𑁄 𑀤𑁄𑀫𑀦𑀲𑁆𑀲𑀁. 𑀪𑀼𑀲𑁄 𑀆𑀬𑀸𑀲𑁄 𑀉𑀧𑀸𑀬𑀸𑀲𑁄. 𑀲𑀫𑁆𑀪𑀯𑀦𑁆𑀢𑀻𑀢𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀦 𑀓𑁂𑀯𑀮𑀜𑁆𑀘 𑀲𑁄𑀓𑀸𑀤𑀻𑀳𑀺𑀬𑁂𑀯, 𑀅𑀣 𑀔𑁄 𑀲𑀩𑁆𑀩𑀧𑀤𑁂𑀳𑀺 ‘‘𑀲𑀫𑁆𑀪𑀯𑀦𑁆𑀢𑀻’’𑀢𑀺 𑀧𑀤𑀲𑁆𑀲 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀏𑀯𑀜𑁆𑀳𑀺 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸 𑀲𑀫𑁆𑀪𑀯𑀦𑁆𑀢𑀻’’𑀢𑀺 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀯𑀯𑀢𑁆𑀣𑀸𑀦𑀁 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣.

𑀢𑀢𑁆𑀣 𑀅𑀜𑁆𑀜𑀸𑀡𑀮𑀓𑁆𑀔𑀡𑀸 𑀅𑀯𑀺𑀚𑁆𑀚𑀸, 𑀲𑀫𑁆𑀫𑁄𑀳𑀦𑀭𑀲𑀸, 𑀙𑀸𑀤𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀆𑀲𑀯𑀧𑀤𑀝𑁆𑀞𑀸𑀦𑀸. 𑀅𑀪𑀺𑀲𑀗𑁆𑀔𑀭𑀡𑀮𑀓𑁆𑀔𑀡𑀸 𑀲𑀗𑁆𑀔𑀸𑀭𑀸, 𑀆𑀬𑀽𑀳𑀦𑀭𑀲𑀸, 𑀲𑀁𑀯𑀺𑀤𑀳𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀅𑀯𑀺𑀚𑁆𑀚𑀸𑀧𑀤𑀝𑁆𑀞𑀸𑀦𑀸. 𑀯𑀺𑀚𑀸𑀦𑀦𑀮𑀓𑁆𑀔𑀡𑀁 𑀯𑀺𑀜𑁆𑀜𑀸𑀡𑀁, 𑀧𑀼𑀩𑁆𑀩𑀗𑁆𑀕𑀫𑀭𑀲𑀁, 𑀧𑀝𑀺𑀲𑀦𑁆𑀥𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀲𑀗𑁆𑀔𑀸𑀭𑀧𑀤𑀝𑁆𑀞𑀸𑀦𑀁, 𑀯𑀢𑁆𑀣𑀸𑀭𑀫𑁆𑀫𑀡𑀧𑀤𑀝𑁆𑀞𑀸𑀦𑀁 𑀯𑀸. 𑀦𑀫𑀦𑀮𑀓𑁆𑀔𑀡𑀁 𑀦𑀸𑀫𑀁, 𑀲𑀫𑁆𑀧𑀬𑁄𑀕𑀭𑀲𑀁, 𑀅𑀯𑀺𑀦𑀺𑀩𑁆𑀪𑁄𑀕𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀯𑀺𑀜𑁆𑀜𑀸𑀡𑀧𑀤𑀝𑁆𑀞𑀸𑀦𑀁. 𑀭𑀼𑀧𑁆𑀧𑀦𑀮𑀓𑁆𑀔𑀡𑀁 𑀭𑀽𑀧𑀁, 𑀯𑀺𑀓𑀺𑀭𑀡𑀭𑀲𑀁, 𑀅𑀧𑁆𑀧𑀳𑁂𑀬𑁆𑀬𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀯𑀺𑀜𑁆𑀜𑀸𑀡𑀧𑀤𑀝𑁆𑀞𑀸𑀦𑀁. 𑀆𑀬𑀢𑀦𑀮𑀓𑁆𑀔𑀡𑀁 𑀲𑀴𑀸𑀬𑀢𑀦𑀁, 𑀤𑀲𑁆𑀲𑀦𑀸𑀤𑀺𑀭𑀲𑀁, 𑀯𑀢𑁆𑀣𑀼𑀤𑁆𑀯𑀸𑀭𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀦𑀸𑀫𑀭𑀽𑀧𑀧𑀤𑀝𑁆𑀞𑀸𑀦𑀁. 𑀨𑀼𑀲𑀦𑀮𑀓𑁆𑀔𑀡𑁄 𑀨𑀲𑁆𑀲𑁄, 𑀲𑀗𑁆𑀖𑀝𑁆𑀝𑀦𑀭𑀲𑁄, 𑀲𑀗𑁆𑀕𑀢𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀲𑀴𑀸𑀬𑀢𑀦𑀧𑀤𑀝𑁆𑀞𑀸𑀦𑁄. 𑀅𑀦𑀼𑀪𑀯𑀦𑀮𑀓𑁆𑀔𑀡𑀸 𑀯𑁂𑀤𑀦𑀸, 𑀯𑀺𑀲𑀬𑀭𑀲𑀲𑀫𑁆𑀪𑁄𑀕𑀭𑀲𑀸, 𑀲𑀼𑀔𑀤𑀼𑀓𑁆𑀔𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀨𑀲𑁆𑀲𑀧𑀤𑀝𑁆𑀞𑀸𑀦𑀸. 𑀳𑁂𑀢𑀼𑀪𑀸𑀯𑀮𑀓𑁆𑀔𑀡𑀸 𑀢𑀡𑁆𑀳𑀸, 𑀅𑀪𑀺𑀦𑀦𑁆𑀤𑀦𑀭𑀲𑀸, 𑀅𑀢𑀺𑀢𑁆𑀢𑀺𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀯𑁂𑀤𑀦𑀸𑀧𑀤𑀝𑁆𑀞𑀸𑀦𑀸. 𑀕𑀳𑀡𑀮𑀓𑁆𑀔𑀡𑀁 𑀉𑀧𑀸𑀤𑀸𑀦𑀁, 𑀅𑀫𑀼𑀜𑁆𑀘𑀦𑀭𑀲𑀁, 𑀢𑀡𑁆𑀳𑀸𑀤𑀴𑁆𑀳𑀢𑁆𑀢𑀤𑀺𑀝𑁆𑀞𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀢𑀡𑁆𑀳𑀸𑀧𑀤𑀝𑁆𑀞𑀸𑀦𑀁. 𑀓𑀫𑁆𑀫𑀓𑀫𑁆𑀫𑀨𑀮𑀮𑀓𑁆𑀔𑀡𑁄 𑀪𑀯𑁄, 𑀪𑀯𑀦𑀪𑀸𑀯𑀦𑀭𑀲𑁄, 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀉𑀧𑀸𑀤𑀸𑀦𑀧𑀤𑀝𑁆𑀞𑀸𑀦𑁄. 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀧𑀞𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡𑀸 𑀚𑀸𑀢𑀺, 𑀦𑀺𑀬𑁆𑀬𑀸𑀢𑀦𑀭𑀲𑀸, 𑀅𑀢𑀻𑀢𑀪𑀯𑀢𑁄 𑀇𑀥𑀼𑀧𑁆𑀧𑀦𑁆𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀤𑀼𑀓𑁆𑀔𑀯𑀺𑀘𑀺𑀢𑁆𑀢𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀯𑀸. 𑀔𑀦𑁆𑀥𑀧𑀭𑀺𑀧𑀸𑀓𑀮𑀓𑁆𑀔𑀡𑀸 𑀚𑀭𑀸, 𑀫𑀭𑀡𑀽𑀧𑀦𑀬𑀦𑀭𑀲𑀸, 𑀬𑁄𑀩𑁆𑀩𑀦𑀯𑀺𑀦𑀸𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀘𑀼𑀢𑀺𑀮𑀓𑁆𑀔𑀡𑀁 𑀫𑀭𑀡𑀁, 𑀯𑀺𑀲𑀁𑀬𑁄𑀕𑀭𑀲𑀁, 𑀕𑀢𑀺𑀯𑀺𑀧𑁆𑀧𑀯𑀸𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀅𑀦𑁆𑀢𑁄𑀦𑀺𑀚𑁆𑀛𑀸𑀦𑀮𑀓𑁆𑀔𑀡𑁄 𑀲𑁄𑀓𑁄, 𑀘𑁂𑀢𑀲𑁄 𑀦𑀺𑀚𑁆𑀛𑀸𑀦𑀭𑀲𑁄, 𑀅𑀦𑀼𑀲𑁄𑀘𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀮𑀸𑀮𑀧𑁆𑀧𑀦𑀮𑀓𑁆𑀔𑀡𑁄 𑀧𑀭𑀺𑀤𑁂𑀯𑁄, 𑀕𑀼𑀡𑀤𑁄𑀲𑀧𑀭𑀺𑀓𑀺𑀢𑁆𑀢𑀦𑀭𑀲𑁄, 𑀲𑀫𑁆𑀪𑀫𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀓𑀸𑀬𑀧𑀻𑀴𑀦𑀮𑀓𑁆𑀔𑀡𑀁 𑀤𑀼𑀓𑁆𑀔𑀁, 𑀤𑀼𑀧𑁆𑀧𑀜𑁆𑀜𑀸𑀦𑀁 𑀤𑁄𑀫𑀦𑀲𑁆𑀲𑀓𑀭𑀡𑀭𑀲𑀁, 𑀓𑀸𑀬𑀺𑀓𑀸𑀩𑀸𑀥𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀘𑀺𑀢𑁆𑀢𑀧𑀻𑀴𑀦𑀮𑀓𑁆𑀔𑀡𑀁 𑀤𑁄𑀫𑀦𑀲𑁆𑀲𑀁, 𑀫𑀦𑁄𑀯𑀺𑀖𑀸𑀢𑀦𑀭𑀲𑀁, 𑀫𑀸𑀦𑀲𑀩𑁆𑀬𑀸𑀥𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀘𑀺𑀢𑁆𑀢𑀧𑀭𑀺𑀤𑀳𑀦𑀮𑀓𑁆𑀔𑀡𑁄 𑀉𑀧𑀸𑀬𑀸𑀲𑁄, 𑀦𑀺𑀢𑁆𑀣𑀼𑀦𑀦𑀭𑀲𑁄, 𑀯𑀺𑀲𑀸𑀤𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀏𑀯𑀫𑁂𑀢𑁂 𑀅𑀯𑀺𑀚𑁆𑀚𑀸𑀤𑀬𑁄 𑀮𑀓𑁆𑀔𑀡𑀸𑀤𑀺𑀢𑁄𑀧𑀺 𑀯𑁂𑀤𑀺𑀢𑀩𑁆𑀩𑀸𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀲𑀩𑁆𑀩𑀸𑀓𑀸𑀭𑀲𑀫𑁆𑀧𑀦𑁆𑀦𑀁 𑀯𑀺𑀦𑀺𑀘𑁆𑀙𑀬𑀁 𑀇𑀘𑁆𑀙𑀦𑁆𑀢𑁂𑀦 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀸 (𑀯𑀺𑀪. 𑀅𑀝𑁆𑀞. 𑁨𑁨𑁫) 𑀯𑀺𑀪𑀗𑁆𑀕𑀝𑁆𑀞𑀓𑀣𑀸𑀬 𑀕𑀳𑁂𑀢𑀩𑁆𑀩𑁄.

𑀏𑀯𑀦𑁆𑀢𑀺 𑀦𑀺𑀤𑁆𑀤𑀺𑀝𑁆𑀞𑀲𑁆𑀲 𑀦𑀺𑀤𑀲𑁆𑀲𑀦𑀁, 𑀢𑁂𑀦 𑀅𑀯𑀺𑀚𑁆𑀚𑀸𑀤𑀻𑀳𑁂𑀯 𑀓𑀸𑀭𑀡𑁂𑀳𑀺, 𑀦 𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀸𑀤𑀻𑀳𑀻𑀢𑀺 𑀤𑀲𑁆𑀲𑁂𑀢𑀺. 𑀏𑀢𑀲𑁆𑀲𑀸𑀢𑀺 𑀬𑀣𑀸𑀯𑀼𑀢𑁆𑀢𑀲𑁆𑀲. 𑀓𑁂𑀯𑀮𑀲𑁆𑀲𑀸𑀢𑀺 𑀅𑀲𑀫𑁆𑀫𑀺𑀲𑁆𑀲𑀲𑁆𑀲 𑀲𑀓𑀮𑀲𑁆𑀲 𑀯𑀸. 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲𑀸𑀢𑀺 𑀤𑀼𑀓𑁆𑀔𑀲𑀫𑀽𑀳𑀲𑁆𑀲, 𑀦 𑀲𑀢𑁆𑀢𑀲𑁆𑀲, 𑀦𑀸𑀧𑀺 𑀚𑀻𑀯𑀲𑁆𑀲, 𑀦𑀸𑀧𑀺 𑀲𑀼𑀪𑀲𑀼𑀔𑀸𑀤𑀻𑀦𑀁. 𑀲𑀫𑀼𑀤𑀬𑁄 𑀳𑁄𑀢𑀻𑀢𑀺 𑀦𑀺𑀩𑁆𑀩𑀢𑁆𑀢𑀺 𑀲𑀫𑁆𑀪𑀯𑀢𑀺.

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀬𑁆𑀯𑀸𑀬𑀁 𑀅𑀯𑀺𑀚𑁆𑀚𑀸𑀤𑀺𑀯𑀲𑁂𑀦 𑀲𑀗𑁆𑀔𑀸𑀭𑀸𑀤𑀺𑀓𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑁄, 𑀲𑀩𑁆𑀩𑀸𑀓𑀸𑀭𑁂𑀦 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸. 𑀢𑀸𑀬𑀁 𑀯𑁂𑀮𑀸𑀬𑀦𑁆𑀢𑀺 𑀢𑀸𑀬𑀁 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀯𑀺𑀤𑀺𑀢𑀯𑁂𑀮𑀸𑀬𑀁. 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀻𑀢𑀺 𑀇𑀫𑀁 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀯𑀺𑀤𑀺𑀢𑁂 𑀳𑁂𑀢𑀼𑀦𑁄 𑀘 𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑀥𑀫𑁆𑀫𑀲𑁆𑀲 𑀘 𑀧𑀚𑀸𑀦𑀦𑀸𑀬 𑀆𑀦𑀼𑀪𑀸𑀯𑀤𑀻𑀧𑀓𑀁 ‘‘𑀬𑀤𑀸 𑀳𑀯𑁂 𑀧𑀸𑀢𑀼𑀪𑀯𑀦𑁆𑀢𑀻’’𑀢𑀺𑀆𑀤𑀺𑀓𑀁 𑀲𑁄𑀫𑀦𑀲𑁆𑀲𑀲𑀫𑁆𑀧𑀬𑀼𑀢𑁆𑀢𑀜𑀸𑀡𑀲𑀫𑀼𑀝𑁆𑀞𑀸𑀦𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺, 𑀅𑀢𑁆𑀢𑀫𑀦𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀬𑀤𑀸𑀢𑀺 𑀬𑀲𑁆𑀫𑀺𑀁 𑀓𑀸𑀮𑁂. 𑀳𑀯𑁂𑀢𑀺 𑀩𑁆𑀬𑀢𑁆𑀢𑀦𑁆𑀢𑀺 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀦𑀺𑀧𑀸𑀢𑁄. 𑀓𑁂𑀘𑀺 𑀧𑀦 ‘‘𑀳𑀯𑁂𑀢𑀺 𑀆𑀳𑀯𑁂 𑀬𑀼𑀤𑁆𑀥𑁂’’𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺, ‘‘𑀬𑁄𑀥𑁂𑀣 𑀫𑀸𑀭𑀁 𑀧𑀜𑁆𑀜𑀸𑀯𑀼𑀥𑁂𑀦𑀸’’𑀢𑀺 (𑀥. 𑀧. 𑁪𑁦) 𑀯𑀘𑀦𑀢𑁄 𑀓𑀺𑀮𑁂𑀲𑀫𑀸𑀭𑁂𑀦 𑀬𑀼𑀚𑁆𑀛𑀦𑀲𑀫𑀬𑁂𑀢𑀺 𑀢𑁂𑀲𑀁 𑀅𑀥𑀺𑀧𑁆𑀧𑀸𑀬𑁄. 𑀧𑀸𑀢𑀼𑀪𑀯𑀦𑁆𑀢𑀻𑀢𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀥𑀫𑁆𑀫𑀸𑀢𑀺 𑀅𑀦𑀼𑀮𑁄𑀫𑀧𑀘𑁆𑀘𑀬𑀸𑀓𑀸𑀭𑀧𑀝𑀺𑀯𑁂𑀥𑀲𑀸𑀥𑀓𑀸 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸. 𑀅𑀣 𑀯𑀸 𑀧𑀸𑀢𑀼𑀪𑀯𑀦𑁆𑀢𑀻𑀢𑀺 𑀧𑀓𑀸𑀲𑁂𑀦𑁆𑀢𑀺, 𑀅𑀪𑀺𑀲𑀫𑀬𑀯𑀲𑁂𑀦 𑀩𑁆𑀬𑀢𑁆𑀢𑀸 𑀧𑀸𑀓𑀝𑀸 𑀳𑁄𑀦𑁆𑀢𑀺. 𑀥𑀫𑁆𑀫𑀸𑀢𑀺 𑀘𑀢𑀼𑀅𑀭𑀺𑀬𑀲𑀘𑁆𑀘𑀥𑀫𑁆𑀫𑀸, 𑀆𑀢𑀸𑀧𑁄 𑀯𑀼𑀘𑁆𑀘𑀢𑀺 𑀓𑀺𑀮𑁂𑀲𑀲𑀦𑁆𑀢𑀸𑀧𑀦𑀝𑁆𑀞𑁂𑀦 𑀯𑀻𑀭𑀺𑀬𑀁. 𑀆𑀢𑀸𑀧𑀺𑀦𑁄𑀢𑀺 𑀲𑀫𑁆𑀫𑀧𑁆𑀧𑀥𑀸𑀦𑀯𑀻𑀭𑀺𑀬𑀯𑀢𑁄. 𑀛𑀸𑀬𑀢𑁄𑀢𑀺 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑁂𑀦 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑁂𑀦 𑀛𑀸𑀬𑀦𑁆𑀢𑀲𑁆𑀲. 𑀩𑁆𑀭𑀸𑀳𑁆𑀫𑀡𑀲𑁆𑀲𑀸𑀢𑀺 𑀩𑀸𑀳𑀺𑀢𑀧𑀸𑀧𑀲𑁆𑀲 𑀔𑀻𑀡𑀸𑀲𑀯𑀲𑁆𑀲. 𑀅𑀣𑀲𑁆𑀲 𑀓𑀗𑁆𑀔𑀸 𑀯𑀧𑀬𑀦𑁆𑀢𑀺 𑀲𑀩𑁆𑀩𑀸𑀢𑀺 𑀅𑀣𑀲𑁆𑀲 𑀏𑀯𑀁 𑀧𑀸𑀢𑀼𑀪𑀽𑀢𑀥𑀫𑁆𑀫𑀲𑁆𑀲 𑀬𑀸 𑀏𑀢𑀸 ‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀨𑀼𑀲𑀢𑀻𑀢𑀺. 𑀦𑁄 𑀓𑀮𑁆𑀮𑁄 𑀧𑀜𑁆𑀳𑁄𑀢𑀺 𑀪𑀕𑀯𑀸 𑀅𑀯𑁄𑀘𑀸’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁨.𑁧𑁨) 𑀦𑀬𑁂𑀦, ‘‘𑀓𑀢𑀫𑀁 𑀦𑀼 𑀔𑁄, 𑀪𑀦𑁆𑀢𑁂, 𑀚𑀭𑀸𑀫𑀭𑀡𑀁, 𑀓𑀲𑁆𑀲 𑀘 𑀧𑀦𑀺𑀤𑀁 𑀚𑀭𑀸𑀫𑀭𑀡𑀦𑁆𑀢𑀺. 𑀦𑁄 𑀓𑀮𑁆𑀮𑁄 𑀧𑀜𑁆𑀳𑁄𑀢𑀺 𑀪𑀕𑀯𑀸 𑀅𑀯𑁄𑀘𑀸’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁨.𑁩𑁫) 𑀦𑀬𑁂𑀦 𑀧𑀘𑁆𑀘𑀬𑀸𑀓𑀸𑀭𑁂 𑀓𑀗𑁆𑀔𑀸 𑀯𑀼𑀢𑁆𑀢𑀸, 𑀬𑀸 𑀘 𑀧𑀘𑁆𑀘𑀬𑀸𑀓𑀸𑀭𑀲𑁆𑀲𑁂𑀯 𑀅𑀧𑁆𑀧𑀝𑀺𑀯𑀺𑀤𑁆𑀥𑀢𑁆𑀢𑀸 ‘‘𑀅𑀳𑁄𑀲𑀺𑀁 𑀦𑀼 𑀔𑁄 𑀅𑀳𑀁 𑀅𑀢𑀻𑀢𑀫𑀤𑁆𑀥𑀸𑀦’’𑀦𑁆𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁧𑁮; 𑀲𑀁. 𑀦𑀺. 𑁨.𑁨𑁦) 𑀲𑁄𑀴𑀲 𑀓𑀗𑁆𑀔𑀸 𑀆𑀕𑀢𑀸. 𑀢𑀸 𑀲𑀩𑁆𑀩𑀸 𑀯𑀧𑀬𑀦𑁆𑀢𑀺 𑀅𑀧𑀕𑀘𑁆𑀙𑀦𑁆𑀢𑀺 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀓𑀲𑁆𑀫𑀸? 𑀬𑀢𑁄 𑀧𑀚𑀸𑀦𑀸𑀢𑀺 𑀲𑀳𑁂𑀢𑀼𑀥𑀫𑁆𑀫𑀁, 𑀬𑀲𑁆𑀫𑀸 𑀅𑀯𑀺𑀚𑁆𑀚𑀸𑀤𑀺𑀓𑁂𑀦 𑀳𑁂𑀢𑀼𑀦𑀸 𑀲𑀳𑁂𑀢𑀼𑀓𑀁 𑀇𑀫𑀁 𑀲𑀗𑁆𑀔𑀸𑀭𑀸𑀤𑀺𑀓𑀁 𑀓𑁂𑀯𑀮𑀁 𑀤𑀼𑀓𑁆𑀔𑀓𑁆𑀔𑀦𑁆𑀥𑀥𑀫𑁆𑀫𑀁 𑀧𑀚𑀸𑀦𑀸𑀢𑀺 𑀅𑀜𑁆𑀜𑀸𑀲𑀺 𑀧𑀝𑀺𑀯𑀺𑀚𑁆𑀛𑀻𑀢𑀺.

𑀓𑀤𑀸 𑀧𑀦𑀲𑁆𑀲 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸 𑀘𑀢𑀼𑀲𑀘𑁆𑀘𑀥𑀫𑁆𑀫𑀸 𑀯𑀸 𑀧𑀸𑀢𑀼𑀪𑀯𑀦𑁆𑀢𑀺 𑀉𑀧𑁆𑀧𑀚𑁆𑀚𑀦𑁆𑀢𑀺 𑀧𑀓𑀸𑀲𑁂𑀦𑁆𑀢𑀺 𑀯𑀸? 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀜𑀸𑀡𑁂𑀲𑀼. 𑀢𑀢𑁆𑀣 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀲𑀢𑀺𑀆𑀤𑀬𑁄 𑀯𑀺𑀧𑀲𑁆𑀲𑀦𑀸𑀜𑀸𑀡𑀜𑁆𑀘 𑀬𑀣𑀸𑀭𑀳𑀁 𑀅𑀢𑁆𑀢𑀦𑁄 𑀯𑀺𑀲𑀬𑁂𑀲𑀼 𑀢𑀤𑀗𑁆𑀕𑀧𑁆𑀧𑀳𑀸𑀦𑀯𑀲𑁂𑀦 𑀲𑀼𑀪𑀲𑀜𑁆𑀜𑀸𑀤𑀺𑀓𑁂 𑀧𑀚𑀳𑀦𑁆𑀢𑀸 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀤𑀺𑀯𑀲𑁂𑀦 𑀯𑀺𑀲𑀼𑀁 𑀯𑀺𑀲𑀼𑀁 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀫𑀕𑁆𑀕𑀓𑁆𑀔𑀡𑁂 𑀧𑀦 𑀢𑁂 𑀦𑀺𑀩𑁆𑀩𑀸𑀦𑀫𑀸𑀮𑀫𑁆𑀩𑀺𑀢𑁆𑀯𑀸 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀧𑀝𑀺𑀧𑀓𑁆𑀔𑁂 𑀧𑀚𑀳𑀦𑁆𑀢𑀸 𑀘𑀢𑀽𑀲𑀼𑀧𑀺 𑀅𑀭𑀺𑀬𑀲𑀘𑁆𑀘𑁂𑀲𑀼 𑀅𑀲𑀫𑁆𑀫𑁄𑀳𑀧𑁆𑀧𑀝𑀺𑀯𑁂𑀥𑀲𑀸𑀥𑀦𑀯𑀲𑁂𑀦 𑀲𑀓𑀺𑀤𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀏𑀯𑀁 𑀢𑀸𑀯𑁂𑀢𑁆𑀣 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸𑀦𑀁 𑀉𑀧𑁆𑀧𑀚𑁆𑀚𑀦𑀝𑁆𑀞𑁂𑀦 𑀧𑀸𑀢𑀼𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀭𑀺𑀬𑀲𑀘𑁆𑀘𑀥𑀫𑁆𑀫𑀸𑀦𑀁 𑀧𑀦 𑀮𑁄𑀓𑀺𑀬𑀸𑀦𑀁 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂 𑀯𑀺𑀧𑀲𑁆𑀲𑀦𑀸𑀬 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦, 𑀮𑁄𑀓𑀼𑀢𑁆𑀢𑀭𑀸𑀦𑀁 𑀢𑀤𑀥𑀺𑀫𑀼𑀢𑁆𑀢𑀢𑀸𑀯𑀲𑁂𑀦, 𑀫𑀕𑁆𑀕𑀓𑁆𑀔𑀡𑁂 𑀦𑀺𑀭𑁄𑀥𑀲𑀘𑁆𑀘𑀲𑁆𑀲 𑀆𑀭𑀫𑁆𑀫𑀡𑀸𑀪𑀺𑀲𑀫𑀬𑀯𑀲𑁂𑀦, 𑀲𑀩𑁆𑀩𑁂𑀲𑀫𑁆𑀧𑀺 𑀓𑀺𑀘𑁆𑀘𑀸𑀪𑀺𑀲𑀫𑀬𑀯𑀲𑁂𑀦 𑀧𑀸𑀓𑀝𑀪𑀸𑀯𑀢𑁄 𑀧𑀓𑀸𑀲𑀦𑀝𑁆𑀞𑁂𑀦 𑀧𑀸𑀢𑀼𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.

𑀇𑀢𑀺 𑀪𑀕𑀯𑀸 𑀲𑀢𑀺𑀧𑀺 𑀲𑀩𑁆𑀩𑀸𑀓𑀸𑀭𑁂𑀦 𑀲𑀩𑁆𑀩𑀥𑀫𑁆𑀫𑀸𑀦𑀁 𑀅𑀢𑁆𑀢𑀦𑁄 𑀜𑀸𑀡𑀲𑁆𑀲 𑀧𑀸𑀓𑀝𑀪𑀸𑀯𑁂 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀫𑀼𑀔𑁂𑀦 𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑀲𑁆𑀲 𑀓𑀢𑀢𑁆𑀢𑀸 𑀦𑀺𑀧𑀼𑀡𑀕𑀫𑁆𑀪𑀻𑀭𑀲𑀼𑀤𑀼𑀤𑁆𑀤𑀲𑀢𑀸𑀬 𑀧𑀘𑁆𑀘𑀬𑀸𑀓𑀸𑀭𑀲𑁆𑀲 𑀢𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀉𑀧𑁆𑀧𑀦𑁆𑀦𑀩𑀮𑀯𑀲𑁄𑀫𑀦𑀲𑁆𑀲𑁄 𑀧𑀝𑀺𑀧𑀓𑁆𑀔𑀲𑀫𑀼𑀘𑁆𑀙𑁂𑀤𑀯𑀺𑀪𑀸𑀯𑀦𑁂𑀦 𑀲𑀤𑁆𑀥𑀺𑀁 𑀅𑀢𑁆𑀢𑀦𑁄 𑀢𑀤𑀪𑀺𑀲𑀫𑀬𑀸𑀦𑀼𑀪𑀸𑀯𑀤𑀻𑀧𑀓𑀫𑁂𑀯𑁂𑀢𑁆𑀣 𑀉𑀤𑀸𑀦𑀁 𑀉𑀤𑀸𑀦𑁂𑀲𑀻𑀢𑀺.

𑀅𑀬𑀫𑁆𑀧𑀺 𑀉𑀤𑀸𑀦𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺 𑀅𑀬𑀁 𑀧𑀸𑀴𑀺 𑀓𑁂𑀲𑀼𑀘𑀺𑀬𑁂𑀯 𑀧𑁄𑀢𑁆𑀣𑀓𑁂𑀲𑀼 𑀤𑀺𑀲𑁆𑀲𑀢𑀺. 𑀢𑀢𑁆𑀣 𑀅𑀬𑀫𑁆𑀧𑀻𑀢𑀺 𑀧𑀺𑀲𑀤𑁆𑀤𑁄 ‘‘𑀇𑀤𑀫𑁆𑀧𑀺 𑀩𑀼𑀤𑁆𑀥𑁂 𑀭𑀢𑀦𑀁 𑀧𑀡𑀻𑀢𑀁, 𑀅𑀬𑀫𑁆𑀧𑀺 𑀧𑀸𑀭𑀸𑀚𑀺𑀓𑁄 𑀳𑁄𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄, 𑀢𑁂𑀦 𑀉𑀧𑀭𑀺𑀫𑀁 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀯𑀼𑀢𑁆𑀢𑁄𑀢𑀺 𑀅𑀬𑀁 𑀯𑀼𑀢𑁆𑀢𑀲𑀤𑁆𑀤𑁄 𑀓𑁂𑀲𑁄𑀳𑀸𑀭𑀡𑀯𑀧𑁆𑀧𑀦𑀯𑀸𑀧𑀲𑀫𑀻𑀓𑀭𑀡𑀚𑀻𑀯𑀺𑀢𑀯𑀼𑀢𑁆𑀢𑀺𑀧𑀫𑀼𑀢𑁆𑀢𑀪𑀸𑀯𑀧𑀸𑀯𑀘𑀦𑀪𑀸𑀯𑁂𑀦 𑀧𑀯𑀢𑁆𑀢𑀦 𑀅𑀚𑁆𑀛𑁂𑀦𑀓𑀣𑀦𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀢𑀣𑀸 𑀳𑁂𑀲 ‘‘𑀓𑀸𑀧𑀝𑀺𑀓𑁄 𑀫𑀸𑀡𑀯𑁄 𑀤𑀳𑀭𑁄 𑀯𑀼𑀢𑁆𑀢𑀲𑀺𑀭𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁪𑁨𑁬) 𑀓𑁂𑀲𑁄𑀳𑀸𑀭𑀡𑁂 𑀆𑀕𑀢𑁄.

‘‘𑀕𑀸𑀯𑁄 𑀢𑀲𑁆𑀲 𑀧𑀚𑀸𑀬𑀦𑁆𑀢𑀺, 𑀔𑁂𑀢𑁆𑀢𑁂 𑀯𑀼𑀢𑁆𑀢𑀁 𑀯𑀺𑀭𑀽𑀳𑀢𑀺;

𑀯𑀼𑀢𑁆𑀢𑀸𑀦𑀁 𑀨𑀮𑀫𑀲𑁆𑀦𑀸𑀢𑀺, 𑀬𑁄 𑀫𑀺𑀢𑁆𑀢𑀸𑀦𑀁 𑀦 𑀤𑀼𑀩𑁆𑀪𑀢𑀻’’𑀢𑀺. 𑁋

𑀆𑀤𑀻𑀲𑀼 (𑀚𑀸. 𑁨.𑁨𑁨.𑁧𑁯) 𑀯𑀧𑁆𑀧𑀦𑁂. ‘‘𑀦𑁄 𑀘 𑀔𑁄 𑀧𑀝𑀺𑀯𑀼𑀢𑁆𑀢’’𑀦𑁆𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁨𑁮𑁯) 𑀅𑀝𑁆𑀞𑀤𑀡𑁆𑀟𑀓𑀸𑀤𑀻𑀳𑀺 𑀯𑀸𑀧𑀲𑀫𑀻𑀓𑀭𑀡𑁂. ‘‘𑀧𑀦𑁆𑀦𑀮𑁄𑀫𑁄 𑀧𑀭𑀤𑀢𑁆𑀢𑀯𑀼𑀢𑁆𑀢𑁄 𑀫𑀺𑀕𑀪𑀽𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀸𑀫𑀻’’𑀢𑀺𑀆𑀤𑀻𑀲𑀼 (𑀘𑀽𑀴𑀯. 𑁩𑁩𑁨) 𑀚𑀻𑀯𑀺𑀢𑀯𑀼𑀢𑁆𑀢𑀺𑀬𑀁. ‘‘𑀧𑀡𑁆𑀟𑀼𑀧𑀮𑀸𑀲𑁄 𑀩𑀦𑁆𑀥𑀦𑀸 𑀧𑀯𑀼𑀢𑁆𑀢𑁄 𑀅𑀪𑀩𑁆𑀩𑁄 𑀳𑀭𑀺𑀢𑀢𑁆𑀢𑀸𑀬𑀸’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁯𑁨) 𑀩𑀦𑁆𑀥𑀦𑀢𑁄 𑀧𑀫𑀼𑀢𑁆𑀢𑀪𑀸𑀯𑁂. ‘‘𑀕𑀻𑀢𑀁 𑀯𑀼𑀢𑁆𑀢𑀁 𑀲𑀫𑀻𑀳𑀺𑀢’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁮𑁫) 𑀧𑀸𑀯𑀘𑀦𑀪𑀸𑀯𑁂𑀦 𑀧𑀯𑀢𑁆𑀢𑀺𑀢𑁂. ‘‘𑀯𑀼𑀢𑁆𑀢𑁄 𑀧𑀸𑀭𑀸𑀬𑀡𑁄’’𑀢𑀺𑀆𑀤𑀻𑀲𑀼 𑀅𑀚𑁆𑀛𑁂𑀦𑁂. ‘‘𑀯𑀼𑀢𑁆𑀢𑀁 𑀔𑁄 𑀧𑀦𑁂𑀢𑀁 𑀪𑀕𑀯𑀢𑀸 ‘𑀥𑀫𑁆𑀫𑀤𑀸𑀬𑀸𑀤𑀸 𑀫𑁂, 𑀪𑀺𑀓𑁆𑀔𑀯𑁂, 𑀪𑀯𑀣, 𑀫𑀸 𑀆𑀫𑀺𑀲𑀤𑀸𑀬𑀸𑀤𑀸’’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁩𑁦) 𑀓𑀣𑀦𑁂. 𑀇𑀥𑀸𑀧𑀺 𑀓𑀣𑀦𑁂 𑀏𑀯 𑀤𑀝𑁆𑀞𑀩𑁆𑀩𑁄, 𑀢𑁂𑀦 𑀅𑀬𑀫𑁆𑀧𑀺 𑀉𑀤𑀸𑀦𑁄 𑀪𑀸𑀲𑀺𑀢𑁄𑀢𑀺 𑀅𑀢𑁆𑀣𑁄. 𑀇𑀢𑀻𑀢𑀺 𑀏𑀯𑀁. 𑀫𑁂 𑀲𑀼𑀢𑀦𑁆𑀢𑀺 𑀧𑀤𑀤𑁆𑀯𑀬𑀲𑁆𑀲 𑀅𑀢𑁆𑀣𑁄 𑀦𑀺𑀤𑀸𑀦𑀯𑀡𑁆𑀡𑀦𑀸𑀬𑀁 𑀲𑀩𑁆𑀩𑀸𑀓𑀸𑀭𑀢𑁄 𑀯𑀼𑀢𑁆𑀢𑁄𑀬𑁂𑀯. 𑀧𑀼𑀩𑁆𑀩𑁂 ‘‘𑀏𑀯𑀁 𑀫𑁂 𑀲𑀼𑀢’’𑀦𑁆𑀢𑀺 𑀦𑀺𑀤𑀸𑀦𑀯𑀲𑁂𑀦 𑀯𑀼𑀢𑁆𑀢𑁄𑀬𑁂𑀯 𑀳𑀺 𑀅𑀢𑁆𑀣𑁄 𑀇𑀥 𑀦𑀺𑀕𑀫𑀦𑀯𑀲𑁂𑀦 ‘‘𑀇𑀢𑀺 𑀫𑁂 𑀲𑀼𑀢’’𑀦𑁆𑀢𑀺 𑀧𑀼𑀦 𑀯𑀼𑀢𑁆𑀢𑁄. 𑀯𑀼𑀢𑁆𑀢𑀲𑁆𑀲𑁂𑀯 𑀳𑀺 𑀅𑀢𑁆𑀣𑀲𑁆𑀲 𑀧𑀼𑀦 𑀯𑀘𑀦𑀁 𑀦𑀺𑀕𑀫𑀦𑀦𑁆𑀢𑀺. 𑀇𑀢𑀺𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑁄 𑀏𑀯𑀁-𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑀢𑀸𑀬 ‘‘𑀏𑀯𑀁 𑀫𑁂 𑀲𑀼𑀢’’𑀦𑁆𑀢𑀺 𑀏𑀢𑁆𑀣 𑀯𑀺𑀬, 𑀅𑀢𑁆𑀣𑀬𑁄𑀚𑀦𑀸 𑀘 𑀇𑀢𑀺𑀯𑀼𑀢𑁆𑀢𑀓𑀯𑀡𑁆𑀡𑀦𑀸𑀬 𑀅𑀫𑁆𑀳𑁂𑀳𑀺 𑀧𑀓𑀸𑀲𑀺𑀢𑀸𑀬𑁂𑀯𑀸𑀢𑀺 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀧𑀭𑀫𑀢𑁆𑀣𑀤𑀻𑀧𑀦𑀺𑀬𑀸 𑀔𑀼𑀤𑁆𑀤𑀓𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀉𑀤𑀸𑀦𑀲𑀁𑀯𑀡𑁆𑀡𑀦𑀸𑀧𑀞𑀫𑀩𑁄𑀥𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.