𑁮. 𑀅𑀪𑀬𑀫𑀸𑀢𑀼𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀉𑀤𑁆𑀥𑀁 𑀧𑀸𑀤𑀢𑀮𑀸𑀢𑀺𑀆𑀤𑀺𑀓𑀸 𑀅𑀪𑀬𑀫𑀸𑀢𑀸𑀬 𑀣𑁂𑀭𑀺𑀬𑀸 𑀕𑀸𑀣𑀸. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑀻 𑀢𑀺𑀲𑁆𑀲𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀏𑀓𑀤𑀺𑀯𑀲𑀁 𑀲𑀢𑁆𑀣𑀸𑀭𑀁 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀓𑀝𑀘𑁆𑀙𑀼𑀫𑀢𑁆𑀢𑀁 𑀪𑀺𑀓𑁆𑀔𑀁 𑀅𑀤𑀸𑀲𑀺. 𑀲𑀸 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑀻 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀢𑀸𑀤𑀺𑀲𑁂𑀦 𑀓𑀫𑁆𑀫𑀦𑀺𑀲𑁆𑀲𑀦𑁆𑀤𑁂𑀦 𑀉𑀚𑁆𑀚𑁂𑀦𑀺𑀬𑀁 𑀧𑀤𑀼𑀫𑀯𑀢𑀻 𑀦𑀸𑀫 𑀦𑀕𑀭𑀲𑁄𑀪𑀺𑀡𑀻 𑀅𑀳𑁄𑀲𑀺. 𑀭𑀸𑀚𑀸 𑀩𑀺𑀫𑁆𑀩𑀺𑀲𑀸𑀭𑁄 𑀢𑀲𑁆𑀲𑀸 𑀭𑀽𑀧𑀲𑀫𑁆𑀧𑀢𑁆𑀢𑀺𑀆𑀤𑀺𑀓𑁂 𑀕𑀼𑀡𑁂 𑀲𑀼𑀢𑁆𑀯𑀸 𑀧𑀼𑀭𑁄𑀳𑀺𑀢𑀲𑁆𑀲 𑀆𑀘𑀺𑀓𑁆𑀔𑀺 𑁋 ‘‘𑀉𑀚𑁆𑀚𑁂𑀦𑀺𑀬𑀁 𑀓𑀺𑀭 𑀧𑀤𑀼𑀫𑀯𑀢𑀻 𑀦𑀸𑀫 𑀕𑀡𑀺𑀓𑀸 𑀅𑀳𑁄𑀲𑀺, 𑀢𑀫𑀳𑀁 𑀤𑀝𑁆𑀞𑀼𑀓𑀸𑀫𑁄𑀫𑁆𑀳𑀻’’𑀢𑀺. 𑀧𑀼𑀭𑁄𑀳𑀺𑀢𑁄 ‘‘𑀲𑀸𑀥𑀼, 𑀤𑁂𑀯𑀸’’𑀢𑀺 𑀫𑀦𑁆𑀢𑀩𑀮𑁂𑀦 𑀓𑀼𑀫𑁆𑀪𑀻𑀭𑀁 𑀦𑀸𑀫 𑀬𑀓𑁆𑀔𑀁 𑀆𑀯𑀳𑁂𑀢𑁆𑀯𑀸 𑀬𑀓𑁆𑀔𑀸𑀦𑀼𑀪𑀸𑀯𑁂𑀦 𑀭𑀸𑀚𑀸𑀦𑀁 𑀢𑀸𑀯𑀤𑁂𑀯 𑀉𑀚𑁆𑀚𑁂𑀦𑀻𑀦𑀕𑀭𑀁 𑀦𑁂𑀲𑀺. 𑀭𑀸𑀚𑀸 𑀢𑀸𑀬 𑀲𑀤𑁆𑀥𑀺𑀁 𑀏𑀓𑀭𑀢𑁆𑀢𑀺𑀁 𑀲𑀁𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀲𑀸 𑀢𑁂𑀦 𑀕𑀩𑁆𑀪𑀁 𑀕𑀡𑁆𑀳𑀺. 𑀭𑀜𑁆𑀜𑁄 𑀘 𑀆𑀭𑁄𑀘𑁂𑀲𑀺 𑁋 ‘‘𑀫𑀫 𑀓𑀼𑀘𑁆𑀙𑀺𑀬𑀁 𑀕𑀩𑁆𑀪𑁄 𑀧𑀢𑀺𑀝𑁆𑀞𑀳𑀻’’𑀢𑀺. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀦𑀁 ‘‘𑀲𑀘𑁂 𑀧𑀼𑀢𑁆𑀢𑁄 𑀪𑀯𑁂𑀬𑁆𑀬, 𑀯𑀟𑁆𑀠𑁂𑀢𑁆𑀯𑀸 𑀫𑀫𑀁 𑀤𑀲𑁆𑀲𑁂𑀳𑀻’’𑀢𑀺 𑀯𑀢𑁆𑀯𑀸 𑀦𑀸𑀫𑀫𑀼𑀤𑁆𑀤𑀺𑀓𑀁 𑀤𑀢𑁆𑀯𑀸 𑀅𑀕𑀫𑀸𑀲𑀺. 𑀲𑀸 𑀤𑀲𑀫𑀸𑀲𑀘𑁆𑀘𑀬𑁂𑀦 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺𑀢𑁆𑀯𑀸 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀅𑀪𑀬𑁄𑀢𑀺 𑀦𑀸𑀫𑀁 𑀅𑀓𑀸𑀲𑀺. 𑀧𑀼𑀢𑁆𑀢𑀜𑁆𑀘 𑀲𑀢𑁆𑀢𑀯𑀲𑁆𑀲𑀺𑀓𑀓𑀸𑀮𑁂 ‘‘𑀢𑀯 𑀧𑀺𑀢𑀸 𑀩𑀺𑀫𑁆𑀩𑀺𑀲𑀸𑀭𑀫𑀳𑀸𑀭𑀸𑀚𑀸’’𑀢𑀺 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀧𑀳𑀺𑀡𑀺. 𑀭𑀸𑀚𑀸 𑀢𑀁 𑀧𑀼𑀢𑁆𑀢𑀁 𑀧𑀲𑁆𑀲𑀺𑀢𑁆𑀯𑀸 𑀧𑀼𑀢𑁆𑀢𑀲𑀺𑀦𑁂𑀳𑀁 𑀧𑀝𑀺𑀮𑀪𑀺𑀢𑁆𑀯𑀸 𑀓𑀼𑀫𑀸𑀭𑀓𑀧𑀭𑀺𑀳𑀸𑀭𑁂𑀦 𑀯𑀟𑁆𑀠𑁂𑀲𑀺. 𑀢𑀲𑁆𑀲 𑀲𑀤𑁆𑀥𑀸𑀧𑀝𑀺𑀮𑀸𑀪𑁄 𑀧𑀩𑁆𑀩𑀚𑁆𑀚𑀸 𑀯𑀺𑀲𑁂𑀲𑀸𑀥𑀺𑀕𑀫𑁄 𑀘 𑀳𑁂𑀝𑁆𑀞𑀸 𑀆𑀕𑀢𑁄𑀬𑁂𑀯. 𑀢𑀲𑁆𑀲 𑀫𑀸𑀢𑀸 𑀅𑀧𑀭𑀪𑀸𑀕𑁂 𑀧𑀼𑀢𑁆𑀢𑀲𑁆𑀲 𑀅𑀪𑀬𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑀸 𑀪𑀺𑀓𑁆𑀔𑀼𑀦𑀻𑀲𑀼 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑀻 𑀦𑀘𑀺𑀭𑀲𑁆𑀲𑁂𑀯 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭𑀻 𑁨.𑁧.𑁬𑁦-𑁭𑁦) 𑁋

‘‘𑀧𑀺𑀡𑁆𑀟𑀘𑀸𑀭𑀁 𑀘𑀭𑀦𑁆𑀢𑀲𑁆𑀲, 𑀢𑀺𑀲𑁆𑀲𑀦𑀸𑀫𑀲𑁆𑀲 𑀲𑀢𑁆𑀣𑀼𑀦𑁄;

𑀓𑀝𑀘𑁆𑀙𑀼𑀪𑀺𑀓𑁆𑀔𑀁 𑀧𑀕𑁆𑀕𑀬𑁆𑀳, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲𑀤𑀸𑀲𑀳𑀁.

‘‘𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀲𑀫𑁆𑀩𑀼𑀤𑁆𑀥𑁄, 𑀢𑀺𑀲𑁆𑀲𑁄 𑀮𑁄𑀓𑀕𑁆𑀕𑀦𑀸𑀬𑀓𑁄;

𑀯𑀻𑀣𑀺𑀬𑀸 𑀲𑀡𑁆𑀞𑀺𑀢𑁄 𑀲𑀢𑁆𑀣𑀸, 𑀅𑀓𑀸 𑀫𑁂 𑀅𑀦𑀼𑀫𑁄𑀤𑀦𑀁.

‘‘𑀓𑀝𑀘𑁆𑀙𑀼𑀪𑀺𑀓𑁆𑀔𑀁 𑀤𑀢𑁆𑀯𑀸𑀦, 𑀢𑀸𑀯𑀢𑀺𑀁𑀲𑀁 𑀕𑀫𑀺𑀲𑁆𑀲𑀲𑀺;

𑀙𑀢𑁆𑀢𑀺𑀁𑀲𑀤𑁂𑀯𑀭𑀸𑀚𑀽𑀦𑀁, 𑀫𑀳𑁂𑀲𑀺𑀢𑁆𑀢𑀁 𑀓𑀭𑀺𑀲𑁆𑀲𑀲𑀺.

‘‘𑀧𑀜𑁆𑀜𑀸𑀲𑀁 𑀘𑀓𑁆𑀓𑀯𑀢𑁆𑀢𑀻𑀦𑀁, 𑀫𑀳𑁂𑀲𑀺𑀢𑁆𑀢𑀁 𑀓𑀭𑀺𑀲𑁆𑀲𑀲𑀺;

𑀫𑀦𑀲𑀸 𑀧𑀢𑁆𑀣𑀺𑀢𑀁 𑀲𑀩𑁆𑀩𑀁, 𑀧𑀝𑀺𑀮𑀘𑁆𑀙𑀲𑀺 𑀲𑀩𑁆𑀩𑀤𑀸.

‘‘𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑁄𑀢𑁆𑀯𑀸𑀦, 𑀧𑀩𑁆𑀩𑀚𑀺𑀲𑁆𑀲𑀲𑀺 𑀓𑀺𑀜𑁆𑀘𑀦𑀸;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀦𑀺𑀩𑁆𑀩𑀸𑀬𑀺𑀲𑁆𑀲𑀲𑀺𑀦𑀸𑀲𑀯𑀸.

‘‘𑀇𑀤𑀁 𑀯𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑁄, 𑀢𑀺𑀲𑁆𑀲𑁄 𑀮𑁄𑀓𑀕𑁆𑀕𑀦𑀸𑀬𑀓𑁄;

𑀦𑀪𑀁 𑀅𑀩𑁆𑀪𑀼𑀕𑁆𑀕𑀫𑀻 𑀯𑀻𑀭𑁄, 𑀳𑀁𑀲𑀭𑀸𑀚𑀸𑀯 𑀅𑀫𑁆𑀩𑀭𑁂.

‘‘𑀲𑀼𑀤𑀺𑀦𑁆𑀦𑀁 𑀫𑁂 𑀤𑀸𑀦𑀯𑀭𑀁, 𑀲𑀼𑀬𑀺𑀝𑁆𑀞𑀸 𑀬𑀸𑀕𑀲𑀫𑁆𑀧𑀤𑀸;

𑀓𑀝𑀘𑁆𑀙𑀼𑀪𑀺𑀓𑁆𑀔𑀁 𑀤𑀢𑁆𑀯𑀸𑀦, 𑀧𑀢𑁆𑀢𑀸𑀳𑀁 𑀅𑀘𑀮𑀁 𑀧𑀤𑀁.

‘‘𑀤𑁆𑀯𑁂𑀦𑀯𑀼𑀢𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀤𑀸𑀦𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀪𑀺𑀓𑁆𑀔𑀸𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀢𑁆𑀢𑁂𑀦 𑀅𑀪𑀬𑀢𑁆𑀣𑁂𑀭𑁂𑀦 𑀥𑀫𑁆𑀫𑀁 𑀓𑀣𑁂𑀦𑁆𑀢𑁂𑀦 𑀑𑀯𑀸𑀤𑀯𑀲𑁂𑀦 𑀬𑀸 𑀕𑀸𑀣𑀸 𑀪𑀸𑀲𑀺𑀢𑀸, 𑀉𑀤𑀸𑀦𑀯𑀲𑁂𑀦 𑀲𑀬𑀫𑁆𑀧𑀺 𑀢𑀸 𑀏𑀯 𑀧𑀘𑁆𑀘𑀼𑀤𑀸𑀳𑀭𑀦𑁆𑀢𑀻 𑁋

𑁩𑁩. ‘‘𑀉𑀤𑁆𑀥𑀁 𑀧𑀸𑀤𑀢𑀮𑀸 𑀅𑀫𑁆𑀫, 𑀅𑀥𑁄 𑀯𑁂 𑀓𑁂𑀲𑀫𑀢𑁆𑀣𑀓𑀸;

𑀧𑀘𑁆𑀘𑀯𑁂𑀓𑁆𑀔𑀲𑁆𑀲𑀼𑀫𑀁 𑀓𑀸𑀬𑀁, 𑀅𑀲𑀼𑀘𑀺𑀁 𑀧𑀽𑀢𑀺𑀕𑀦𑁆𑀥𑀺𑀓𑀁.

𑁩𑁪. ‘‘𑀏𑀯𑀁 𑀯𑀺𑀳𑀭𑀫𑀸𑀦𑀸𑀬, 𑀲𑀩𑁆𑀩𑁄 𑀭𑀸𑀕𑁄 𑀲𑀫𑀽𑀳𑀢𑁄;

𑀧𑀭𑀺𑀴𑀸𑀳𑁄 𑀲𑀫𑀼𑀘𑁆𑀙𑀺𑀦𑁆𑀦𑁄, 𑀲𑀻𑀢𑀺𑀪𑀽𑀢𑀸𑀫𑁆𑀳𑀺 𑀦𑀺𑀩𑁆𑀩𑀼𑀢𑀸’’𑀢𑀺. 𑁋 𑀆𑀳;

𑀢𑀢𑁆𑀣 𑀧𑀞𑀫𑀕𑀸𑀣𑀸𑀬 𑀢𑀸𑀯 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀅𑀫𑁆𑀫 𑀧𑀤𑀼𑀫𑀯𑀢𑀺, 𑀧𑀸𑀤𑀢𑀮𑀢𑁄 𑀉𑀤𑁆𑀥𑀁 𑀓𑁂𑀲𑀫𑀢𑁆𑀣𑀓𑀢𑁄 𑀅𑀥𑁄 𑀦𑀸𑀦𑀧𑁆𑀧𑀓𑀸𑀭𑀅𑀲𑀼𑀘𑀺𑀧𑀽𑀭𑀺𑀢𑀸𑀬 𑀅𑀲𑀼𑀘𑀺𑀁 𑀲𑀩𑁆𑀩𑀓𑀸𑀮𑀁 𑀧𑀽𑀢𑀺𑀕𑀦𑁆𑀥𑀯𑀸𑀬𑀦𑀢𑁄 𑀧𑀽𑀢𑀺𑀕𑀦𑁆𑀥𑀺𑀓𑀁, 𑀇𑀫𑀁 𑀓𑀼𑀘𑁆𑀙𑀺𑀢𑀸𑀦𑀁 𑀆𑀬𑀢𑀦𑀢𑀸𑀬 𑀓𑀸𑀬𑀁 𑀲𑀭𑀻𑀭𑀁 𑀜𑀸𑀡𑀘𑀓𑁆𑀔𑀼𑀦𑀸 𑀧𑀘𑁆𑀘𑀯𑁂𑀓𑁆𑀔𑀲𑁆𑀲𑀽𑀢𑀺. 𑀅𑀬𑀜𑁆𑀳𑀺 𑀢𑀲𑁆𑀲𑀸 𑀧𑀼𑀢𑁆𑀢𑁂𑀦 𑀑𑀯𑀸𑀤𑀤𑀸𑀦𑀯𑀲𑁂𑀦 𑀪𑀸𑀲𑀺𑀢𑀸 𑀕𑀸𑀣𑀸.

𑀲𑀸 𑀢𑀁 𑀲𑀼𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀉𑀤𑀸𑀦𑁂𑀦𑁆𑀢𑀻 𑀆𑀘𑀭𑀺𑀬𑀧𑀽𑀚𑀸𑀯𑀲𑁂𑀦 𑀢𑀫𑁂𑀯 𑀕𑀸𑀣𑀁 𑀧𑀞𑀫𑀁 𑀯𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀓𑀣𑁂𑀦𑁆𑀢𑀻 ‘‘𑀏𑀯𑀁 𑀯𑀺𑀳𑀭𑀫𑀸𑀦𑀸𑀬𑀸’’𑀢𑀺 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳.

𑀢𑀢𑁆𑀣 𑀏𑀯𑀁 𑀯𑀺𑀳𑀭𑀫𑀸𑀦𑀸𑀬𑀸𑀢𑀺 𑀏𑀯𑀁 𑀫𑀫 𑀧𑀼𑀢𑁆𑀢𑁂𑀦 𑀅𑀪𑀬𑀢𑁆𑀣𑁂𑀭𑁂𑀦 ‘‘𑀉𑀤𑁆𑀥𑀁 𑀧𑀸𑀤𑀢𑀮𑀸’’𑀢𑀺𑀆𑀤𑀺𑀦𑀸 𑀤𑀺𑀦𑁆𑀦𑁂 𑀑𑀯𑀸𑀤𑁂 𑀞𑀢𑁆𑀯𑀸 𑀲𑀩𑁆𑀩𑀓𑀸𑀬𑀁 𑀅𑀲𑀼𑀪𑀢𑁄 𑀤𑀺𑀲𑁆𑀯𑀸 𑀏𑀓𑀕𑁆𑀕𑀘𑀺𑀢𑁆𑀢𑀸 𑀢𑀢𑁆𑀣 𑀪𑀽𑀢𑀼𑀧𑀸𑀤𑀸𑀬𑀪𑁂𑀤𑁂 𑀭𑀽𑀧𑀥𑀫𑁆𑀫𑁂 𑀢𑀧𑁆𑀧𑀝𑀺𑀩𑀤𑁆𑀥𑁂 𑀯𑁂𑀤𑀦𑀸𑀤𑀺𑀓𑁂 𑀅𑀭𑀽𑀧𑀥𑀫𑁆𑀫𑁂 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀢𑀢𑁆𑀣 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀺𑀯𑀲𑁂𑀦 𑀯𑀺𑀳𑀭𑀫𑀸𑀦𑀸𑀬. 𑀲𑀩𑁆𑀩𑁄 𑀭𑀸𑀕𑁄 𑀲𑀫𑀽𑀳𑀢𑁄𑀢𑀺 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑁂𑀦 𑀖𑀝𑀺𑀢𑀸𑀬 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀅𑀕𑁆𑀕𑀫𑀕𑁆𑀕𑁂𑀦 𑀲𑀩𑁆𑀩𑁄 𑀭𑀸𑀕𑁄 𑀫𑀬𑀸 𑀲𑀫𑀽𑀳𑀢𑁄 𑀲𑀫𑀼𑀕𑁆𑀖𑀸𑀝𑀺𑀢𑁄. 𑀧𑀭𑀺𑀴𑀸𑀳𑁄 𑀲𑀫𑀼𑀘𑁆𑀙𑀺𑀦𑁆𑀦𑁄𑀢𑀺 𑀢𑀢𑁄 𑀏𑀯 𑀲𑀩𑁆𑀩𑁄 𑀓𑀺𑀮𑁂𑀲𑀧𑀭𑀺𑀴𑀸𑀳𑁄 𑀲𑀫𑁆𑀫𑀤𑁂𑀯 𑀉𑀘𑁆𑀙𑀺𑀦𑁆𑀦𑁄, 𑀢𑀲𑁆𑀲 𑀘 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸 𑀏𑀯 𑀲𑀻𑀢𑀺𑀪𑀽𑀢𑀸 𑀲𑀉𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀦𑀺𑀩𑁆𑀩𑀼𑀢𑀸 𑀅𑀫𑁆𑀳𑀻𑀢𑀺.

𑀅𑀪𑀬𑀫𑀸𑀢𑀼𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.