𑁧𑁪. 𑀢𑀺𑀁𑀲𑀦𑀺𑀧𑀸𑀢𑁄

𑁧. 𑀲𑀼𑀪𑀸𑀚𑀻𑀯𑀓𑀫𑁆𑀩𑀯𑀦𑀺𑀓𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸

𑀢𑀺𑀁𑀲𑀦𑀺𑀧𑀸𑀢𑁂 𑀚𑀻𑀯𑀓𑀫𑁆𑀩𑀯𑀦𑀁 𑀭𑀫𑁆𑀫𑀦𑁆𑀢𑀺𑀆𑀤𑀺𑀓𑀸 𑀲𑀼𑀪𑀸𑀬 𑀚𑀻𑀯𑀓𑀫𑁆𑀩𑀯𑀦𑀺𑀓𑀸𑀬 𑀣𑁂𑀭𑀺𑀬𑀸 𑀕𑀸𑀣𑀸. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀦𑁆𑀢𑀻, 𑀲𑀫𑁆𑀪𑀸𑀯𑀺𑀢𑀓𑀼𑀲𑀮𑀫𑀽𑀮𑀸 𑀅𑀦𑀼𑀓𑁆𑀓𑀫𑁂𑀦 𑀧𑀭𑀺𑀩𑁆𑀭𑀽𑀳𑀺𑀢𑀯𑀺𑀫𑁄𑀓𑁆𑀔𑀲𑀫𑁆𑀪𑀸𑀭𑀸 𑀧𑀭𑀺𑀧𑀓𑁆𑀓𑀜𑀸𑀡𑀸 𑀳𑀼𑀢𑁆𑀯𑀸, 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀭𑀸𑀚𑀕𑀳𑁂 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺, 𑀲𑀼𑀪𑀸𑀢𑀺𑀲𑁆𑀲𑀸 𑀦𑀸𑀫𑀫𑀳𑁄𑀲𑀺. 𑀢𑀲𑁆𑀲𑀸 𑀓𑀺𑀭 𑀲𑀭𑀻𑀭𑀸𑀯𑀬𑀯𑀸 𑀲𑁄𑀪𑀦𑀯𑀡𑁆𑀡𑀬𑀼𑀢𑁆𑀢𑀸 𑀅𑀳𑁂𑀲𑀼𑀁, 𑀢𑀲𑁆𑀫𑀸 𑀲𑀼𑀪𑀸𑀢𑀺 𑀅𑀦𑁆𑀯𑀢𑁆𑀣𑀫𑁂𑀯 𑀦𑀸𑀫𑀁 𑀚𑀸𑀢𑀁. 𑀲𑀸 𑀲𑀢𑁆𑀣𑀼 𑀭𑀸𑀚𑀕𑀳𑀧𑁆𑀧𑀯𑁂𑀲𑀦𑁂 𑀧𑀝𑀺𑀮𑀤𑁆𑀥𑀲𑀤𑁆𑀥𑀸 𑀉𑀧𑀸𑀲𑀺𑀓𑀸 𑀳𑀼𑀢𑁆𑀯𑀸 𑀅𑀧𑀭𑀪𑀸𑀕𑁂 𑀲𑀁𑀲𑀸𑀭𑁂 𑀚𑀸𑀢𑀲𑀁𑀯𑁂𑀕𑀸 𑀓𑀸𑀫𑁂𑀲𑀼 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀦𑁂𑀓𑁆𑀔𑀫𑁆𑀫𑀜𑁆𑀘 𑀔𑁂𑀫𑀢𑁄 𑀲𑀮𑁆𑀮𑀓𑁆𑀔𑀦𑁆𑀢𑀻 𑀫𑀳𑀸𑀧𑀚𑀸𑀧𑀢𑀺𑀬𑀸 𑀕𑁄𑀢𑀫𑀺𑀬𑀸 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑀻 𑀓𑀢𑀺𑀧𑀸𑀳𑁂𑀦𑁂𑀯 𑀅𑀦𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺.

𑀅𑀣 𑀦𑀁 𑀏𑀓𑀤𑀺𑀯𑀲𑀁 𑀅𑀜𑁆𑀜𑀢𑀭𑁄 𑀭𑀸𑀚𑀕𑀳𑀯𑀸𑀲𑀻 𑀥𑀼𑀢𑁆𑀢𑀧𑀼𑀭𑀺𑀲𑁄 𑀢𑀭𑀼𑀡𑁄 𑀧𑀞𑀫𑀬𑁄𑀩𑁆𑀩𑀦𑁂 𑀞𑀺𑀢𑁄 𑀚𑀻𑀯𑀓𑀫𑁆𑀩𑀯𑀦𑁂 𑀤𑀺𑀯𑀸𑀯𑀺𑀳𑀸𑀭𑀸𑀬 𑀕𑀘𑁆𑀙𑀦𑁆𑀢𑀺𑀁 𑀤𑀺𑀲𑁆𑀯𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀫𑀕𑁆𑀕𑀁 𑀑𑀯𑀭𑀦𑁆𑀢𑁄 𑀓𑀸𑀫𑁂𑀳𑀺 𑀦𑀺𑀫𑀦𑁆𑀢𑁂𑀲𑀺. 𑀲𑀸 𑀢𑀲𑁆𑀲 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀓𑀸𑀫𑀸𑀦𑀁 𑀆𑀤𑀻𑀦𑀯𑀁 𑀅𑀢𑁆𑀢𑀦𑁄 𑀘 𑀦𑁂𑀓𑁆𑀔𑀫𑁆𑀫𑀚𑁆𑀛𑀸𑀲𑀬𑀁 𑀧𑀯𑁂𑀤𑁂𑀦𑁆𑀢𑀻 𑀥𑀫𑁆𑀫𑀁 𑀓𑀣𑁂𑀲𑀺. 𑀲𑁄 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸𑀧𑀺 𑀦 𑀧𑀝𑀺𑀓𑁆𑀓𑀫𑀢𑀺, 𑀦𑀺𑀩𑀦𑁆𑀥𑀢𑀺𑀬𑁂𑀯. 𑀣𑁂𑀭𑀻 𑀦𑀁 𑀅𑀢𑁆𑀢𑀦𑁄 𑀯𑀘𑀦𑁂 𑀅𑀢𑀺𑀝𑁆𑀞𑀦𑁆𑀢𑀁 𑀅𑀓𑁆𑀔𑀺𑀫𑁆𑀳𑀺 𑀘 𑀅𑀪𑀺𑀭𑀢𑁆𑀢𑀁 𑀤𑀺𑀲𑁆𑀯𑀸, ‘‘𑀳𑀦𑁆𑀤, 𑀢𑀬𑀸 𑀲𑀫𑁆𑀪𑀸𑀯𑀺𑀢𑀁 𑀅𑀓𑁆𑀔𑀺’’𑀦𑁆𑀢𑀺 𑀅𑀢𑁆𑀢𑀦𑁄 𑀏𑀓𑀁 𑀅𑀓𑁆𑀔𑀺𑀁 𑀉𑀧𑁆𑀧𑀸𑀝𑁂𑀢𑁆𑀯𑀸 𑀢𑀲𑁆𑀲 𑀉𑀧𑀦𑁂𑀲𑀺. 𑀢𑀢𑁄 𑀲𑁄 𑀧𑀼𑀭𑀺𑀲𑁄 𑀲𑀦𑁆𑀢𑀸𑀲𑁄 𑀲𑀁𑀯𑁂𑀕𑀚𑀸𑀢𑁄 𑀢𑀢𑁆𑀣 𑀯𑀺𑀕𑀢𑀭𑀸𑀕𑁄𑀯 𑀳𑀼𑀢𑁆𑀯𑀸 𑀣𑁂𑀭𑀺𑀁 𑀔𑀫𑀸𑀧𑁂𑀢𑁆𑀯𑀸 𑀕𑀢𑁄. 𑀣𑁂𑀭𑀻 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀲𑀢𑁆𑀣𑀼𑀦𑁄 𑀲𑀳 𑀤𑀲𑁆𑀲𑀦𑁂𑀦𑁂𑀯𑀲𑁆𑀲𑀸 𑀅𑀓𑁆𑀔𑀺 𑀧𑀝𑀺𑀧𑀸𑀓𑀢𑀺𑀓𑀁 𑀅𑀳𑁄𑀲𑀺. 𑀢𑀢𑁄 𑀲𑀸 𑀩𑀼𑀤𑁆𑀥𑀕𑀢𑀸𑀬 𑀧𑀻𑀢𑀺𑀬𑀸 𑀦𑀺𑀭𑀦𑁆𑀢𑀭𑀁 𑀨𑀼𑀝𑀸 𑀳𑀼𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀲𑀢𑁆𑀣𑀸 𑀢𑀲𑁆𑀲𑀸 𑀘𑀺𑀢𑁆𑀢𑀸𑀘𑀸𑀭𑀁 𑀜𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀅𑀕𑁆𑀕𑀫𑀕𑁆𑀕𑀢𑁆𑀣𑀸𑀬 𑀓𑀫𑁆𑀫𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀺. 𑀲𑀸 𑀧𑀻𑀢𑀺𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀢𑀸𑀯𑀤𑁂𑀯 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀨𑀮𑀲𑀼𑀔𑁂𑀦 𑀦𑀺𑀩𑁆𑀩𑀸𑀦𑀲𑀼𑀔𑁂𑀦 𑀯𑀺𑀳𑀭𑀦𑁆𑀢𑀻 𑀅𑀢𑁆𑀢𑀦𑁄 𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀅𑀢𑁆𑀢𑀦𑀸 𑀢𑁂𑀦 𑀘 𑀥𑀼𑀢𑁆𑀢𑀧𑀼𑀭𑀺𑀲𑁂𑀦 𑀯𑀼𑀢𑁆𑀢𑀕𑀸𑀣𑀸 𑀉𑀤𑀸𑀦𑀯𑀲𑁂𑀦 𑁋

𑁩𑁬𑁮. ‘‘𑀚𑀻𑀯𑀓𑀫𑁆𑀩𑀯𑀦𑀁 𑀭𑀫𑁆𑀫𑀁, 𑀕𑀘𑁆𑀙𑀦𑁆𑀢𑀺𑀁 𑀪𑀺𑀓𑁆𑀔𑀼𑀦𑀺𑀁 𑀲𑀼𑀪𑀁;

𑀥𑀼𑀢𑁆𑀢𑀓𑁄 𑀲𑀦𑁆𑀦𑀺𑀯𑀸𑀭𑁂𑀲𑀺, 𑀢𑀫𑁂𑀦𑀁 𑀅𑀩𑁆𑀭𑀯𑀻 𑀲𑀼𑀪𑀸.

𑁩𑁬𑁯. ‘‘𑀓𑀺𑀁 𑀢𑁂 𑀅𑀧𑀭𑀸𑀥𑀺𑀢𑀁 𑀫𑀬𑀸, 𑀬𑀁 𑀫𑀁 𑀑𑀯𑀭𑀺𑀬𑀸𑀦 𑀢𑀺𑀝𑁆𑀞𑀲𑀺;

𑀦 𑀳𑀺 𑀧𑀩𑁆𑀩𑀚𑀺𑀢𑀸𑀬 𑀆𑀯𑀼𑀲𑁄, 𑀧𑀼𑀭𑀺𑀲𑁄 𑀲𑀫𑁆𑀨𑀼𑀲𑀦𑀸𑀬 𑀓𑀧𑁆𑀧𑀢𑀺.

𑁩𑁭𑁦. ‘‘𑀕𑀭𑀼𑀓𑁂 𑀫𑀫 𑀲𑀢𑁆𑀣𑀼𑀲𑀸𑀲𑀦𑁂, 𑀬𑀸 𑀲𑀺𑀓𑁆𑀔𑀸 𑀲𑀼𑀕𑀢𑁂𑀦 𑀤𑁂𑀲𑀺𑀢𑀸;

𑀧𑀭𑀺𑀲𑀼𑀤𑁆𑀥𑀧𑀤𑀁 𑀅𑀦𑀗𑁆𑀕𑀡𑀁, 𑀓𑀺𑀁 𑀫𑀁 𑀑𑀯𑀭𑀺𑀬𑀸𑀦 𑀢𑀺𑀝𑁆𑀞𑀲𑀺.

𑁩𑁭𑁧. ‘‘𑀆𑀯𑀺𑀮𑀘𑀺𑀢𑁆𑀢𑁄 𑀅𑀦𑀸𑀯𑀺𑀮𑀁, 𑀲𑀭𑀚𑁄 𑀯𑀻𑀢𑀭𑀚𑀁 𑀅𑀦𑀗𑁆𑀕𑀡𑀁;

𑀲𑀩𑁆𑀩𑀢𑁆𑀣 𑀯𑀺𑀫𑀼𑀢𑁆𑀢𑀫𑀸𑀦𑀲𑀁, 𑀓𑀺𑀁 𑀫𑀁 𑀑𑀯𑀭𑀺𑀬𑀸𑀦 𑀢𑀺𑀝𑁆𑀞𑀲𑀺.

𑁩𑁭𑁨. ‘‘𑀤𑀳𑀭𑀸 𑀘 𑀅𑀧𑀸𑀧𑀺𑀓𑀸 𑀘𑀲𑀺, 𑀓𑀺𑀁 𑀢𑁂 𑀧𑀩𑁆𑀩𑀚𑁆𑀚𑀸 𑀓𑀭𑀺𑀲𑁆𑀲𑀢𑀺;

𑀦𑀺𑀓𑁆𑀔𑀺𑀧 𑀓𑀸𑀲𑀸𑀬𑀘𑀻𑀯𑀭𑀁, 𑀏𑀳𑀺 𑀭𑀫𑀸𑀫 𑀲𑀼𑀧𑀼𑀧𑁆𑀨𑀺𑀢𑁂 𑀯𑀦𑁂.

𑁩𑁭𑁩. ‘‘𑀫𑀥𑀼𑀭𑀜𑁆𑀘 𑀧𑀯𑀦𑁆𑀢𑀺 𑀲𑀩𑁆𑀩𑀲𑁄, 𑀓𑀼𑀲𑀼𑀫𑀭𑀚𑁂𑀦 𑀲𑀫𑀼𑀝𑁆𑀞𑀺𑀢𑀸 𑀤𑀼𑀫𑀸;

𑀧𑀞𑀫𑀯𑀲𑀦𑁆𑀢𑁄 𑀲𑀼𑀔𑁄 𑀉𑀢𑀼, 𑀏𑀳𑀺 𑀭𑀫𑀸𑀫 𑀲𑀼𑀧𑀼𑀧𑁆𑀨𑀺𑀢𑁂 𑀯𑀦𑁂.

𑁩𑁭𑁪. ‘‘𑀓𑀼𑀲𑀼𑀫𑀺𑀢𑀲𑀺𑀔𑀭𑀸 𑀘 𑀧𑀸𑀤𑀧𑀸, 𑀅𑀪𑀺𑀕𑀚𑁆𑀚𑀦𑁆𑀢𑀺𑀯 𑀫𑀸𑀮𑀼𑀢𑁂𑀭𑀺𑀢𑀸;

𑀓𑀸 𑀢𑀼𑀬𑁆𑀳𑀁 𑀭𑀢𑀺 𑀪𑀯𑀺𑀲𑁆𑀲𑀢𑀺, 𑀬𑀤𑀺 𑀏𑀓𑀸 𑀯𑀦𑀫𑁄𑀕𑀳𑀺𑀲𑁆𑀲𑀲𑀺.

𑁩𑁭𑁫. ‘‘𑀯𑀸𑀴𑀫𑀺𑀕𑀲𑀗𑁆𑀖𑀲𑁂𑀯𑀺𑀢𑀁, 𑀓𑀼𑀜𑁆𑀚𑀭𑀫𑀢𑁆𑀢𑀓𑀭𑁂𑀡𑀼𑀮𑁄𑀴𑀺𑀢𑀁;

𑀅𑀲𑀳𑀸𑀬𑀺𑀓𑀸 𑀕𑀦𑁆𑀢𑀼𑀫𑀺𑀘𑁆𑀙𑀲𑀺, 𑀭𑀳𑀺𑀢𑀁 𑀪𑀺𑀁𑀲𑀦𑀓𑀁 𑀫𑀳𑀸𑀯𑀦𑀁.

𑁩𑁭𑁬. ‘‘𑀢𑀧𑀦𑀻𑀬𑀓𑀢𑀸𑀯 𑀥𑀻𑀢𑀺𑀓𑀸, 𑀯𑀺𑀘𑀭𑀲𑀺 𑀘𑀺𑀢𑁆𑀢𑀮𑀢𑁂𑀯 𑀅𑀘𑁆𑀙𑀭𑀸;

𑀓𑀸𑀲𑀺𑀓𑀲𑀼𑀔𑀼𑀫𑁂𑀳𑀺 𑀯𑀕𑁆𑀕𑀼𑀪𑀺, 𑀲𑁄𑀪𑀲𑀻 𑀲𑀼𑀯𑀲𑀦𑁂𑀳𑀺 𑀦𑀽𑀧𑀫𑁂.

𑁩𑁭𑁭. ‘‘𑀅𑀳𑀁 𑀢𑀯 𑀯𑀲𑀸𑀦𑀼𑀕𑁄 𑀲𑀺𑀬𑀁, 𑀬𑀤𑀺 𑀯𑀺𑀳𑀭𑁂𑀫𑀲𑁂 𑀓𑀸𑀦𑀦𑀦𑁆𑀢𑀭𑁂;

𑀦 𑀳𑀺 𑀫𑀢𑁆𑀣𑀺 𑀢𑀬𑀸 𑀧𑀺𑀬𑀢𑁆𑀢𑀭𑁄, 𑀧𑀸𑀡𑁄 𑀓𑀺𑀦𑁆𑀦𑀭𑀺𑀫𑀦𑁆𑀤𑀮𑁄𑀘𑀦𑁂.

𑁩𑁭𑁮. ‘‘𑀬𑀤𑀺 𑀫𑁂 𑀯𑀘𑀦𑀁 𑀓𑀭𑀺𑀲𑁆𑀲𑀲𑀺, 𑀲𑀼𑀔𑀺𑀢𑀸 𑀏𑀳𑀺 𑀅𑀕𑀸𑀭𑀫𑀸𑀯𑀲;

𑀧𑀸𑀲𑀸𑀤𑀦𑀺𑀯𑀸𑀢𑀯𑀸𑀲𑀺𑀦𑀻, 𑀧𑀭𑀺𑀓𑀫𑁆𑀫𑀁 𑀢𑁂 𑀓𑀭𑁄𑀦𑁆𑀢𑀼 𑀦𑀸𑀭𑀺𑀬𑁄.

𑁩𑁭𑁯. ‘‘𑀓𑀸𑀲𑀺𑀓𑀲𑀼𑀔𑀼𑀫𑀸𑀦𑀺 𑀥𑀸𑀭𑀬, 𑀅𑀪𑀺𑀭𑁄𑀧𑁂𑀳𑀺 𑀘 𑀫𑀸𑀮𑀯𑀡𑁆𑀡𑀓𑀁;

𑀓𑀜𑁆𑀘𑀦𑀫𑀡𑀺𑀫𑀼𑀢𑁆𑀢𑀓𑀁 𑀩𑀳𑀼𑀁, 𑀯𑀺𑀯𑀺𑀥𑀁 𑀆𑀪𑀭𑀡𑀁 𑀓𑀭𑁄𑀫𑀺 𑀢𑁂.

𑁩𑁮𑁦. ‘‘𑀲𑀼𑀥𑁄𑀢𑀭𑀚𑀧𑀘𑁆𑀙𑀤𑀁 𑀲𑀼𑀪𑀁, 𑀕𑁄𑀦𑀓𑀢𑀽𑀮𑀺𑀓𑀲𑀦𑁆𑀣𑀢𑀁 𑀦𑀯𑀁;

𑀅𑀪𑀺𑀭𑀼𑀳 𑀲𑀬𑀦𑀁 𑀫𑀳𑀸𑀭𑀳𑀁, 𑀘𑀦𑁆𑀤𑀦𑀫𑀡𑁆𑀟𑀺𑀢𑀲𑀸𑀭𑀕𑀦𑁆𑀥𑀺𑀓𑀁.

𑁩𑁮𑁧. ‘‘𑀉𑀧𑁆𑀧𑀮𑀁 𑀘𑀼𑀤𑀓𑀸 𑀲𑀫𑀼𑀕𑁆𑀕𑀢𑀁, 𑀬𑀣𑀸 𑀢𑀁 𑀅𑀫𑀦𑀼𑀲𑁆𑀲𑀲𑁂𑀯𑀺𑀢𑀁;

𑀏𑀯𑀁 𑀢𑁆𑀯𑀁 𑀩𑁆𑀭𑀳𑁆𑀫𑀘𑀸𑀭𑀺𑀦𑀻, 𑀲𑀓𑁂𑀲𑀗𑁆𑀕𑁂𑀲𑀼 𑀚𑀭𑀁 𑀕𑀫𑀺𑀲𑁆𑀲𑀲𑀺.

𑁩𑁮𑁨. ‘‘𑀓𑀺𑀁 𑀢𑁂 𑀇𑀥 𑀲𑀸𑀭𑀲𑀫𑁆𑀫𑀢𑀁, 𑀓𑀼𑀡𑀧𑀧𑀽𑀭𑀫𑁆𑀳𑀺 𑀲𑀼𑀲𑀸𑀦𑀯𑀟𑁆𑀠𑀦𑁂;

𑀪𑁂𑀤𑀦𑀥𑀫𑁆𑀫𑁂 𑀓𑀴𑁂𑀯𑀭𑁂, 𑀬𑀁 𑀤𑀺𑀲𑁆𑀯𑀸 𑀯𑀺𑀫𑀦𑁄 𑀉𑀤𑀺𑀓𑁆𑀔𑀲𑀺.

𑁩𑁮𑁩. ‘‘𑀅𑀓𑁆𑀔𑀻𑀦𑀺 𑀘 𑀢𑀽𑀭𑀺𑀬𑀸𑀭𑀺𑀯, 𑀓𑀺𑀦𑁆𑀦𑀭𑀺𑀬𑀸𑀭𑀺𑀯 𑀧𑀩𑁆𑀩𑀢𑀦𑁆𑀢𑀭𑁂;

𑀢𑀯 𑀫𑁂 𑀦𑀬𑀦𑀸𑀦𑀺 𑀤𑀓𑁆𑀔𑀺𑀬, 𑀪𑀺𑀬𑁆𑀬𑁄 𑀓𑀸𑀫𑀭𑀢𑀻 𑀧𑀯𑀟𑁆𑀠𑀢𑀺.

𑁩𑁮𑁪. ‘‘𑀉𑀧𑁆𑀧𑀮𑀲𑀺𑀔𑀭𑁄𑀧𑀫𑀸𑀦𑀺 𑀢𑁂, 𑀯𑀺𑀫𑀮𑁂 𑀳𑀸𑀝𑀓𑀲𑀦𑁆𑀦𑀺𑀪𑁂 𑀫𑀼𑀔𑁂;

𑀢𑀯 𑀫𑁂 𑀦𑀬𑀦𑀸𑀦𑀺 𑀤𑀓𑁆𑀔𑀺𑀬, 𑀪𑀺𑀬𑁆𑀬𑁄 𑀓𑀸𑀫𑀕𑀼𑀡𑁄 𑀧𑀯𑀟𑁆𑀠𑀢𑀺.

𑁩𑁮𑁫. ‘‘𑀅𑀧𑀺 𑀤𑀽𑀭𑀕𑀢𑀸 𑀲𑀭𑀫𑁆𑀳𑀲𑁂, 𑀆𑀬𑀢𑀧𑀫𑁆𑀳𑁂 𑀯𑀺𑀲𑀼𑀤𑁆𑀥𑀤𑀲𑁆𑀲𑀦𑁂;

𑀦 𑀳𑀺 𑀫𑀢𑁆𑀣𑀺 𑀢𑀬𑀸 𑀧𑀺𑀬𑀢𑁆𑀢𑀭𑁄, 𑀦𑀬𑀦𑀸 𑀓𑀺𑀦𑁆𑀦𑀭𑀺𑀫𑀦𑁆𑀤𑀮𑁄𑀘𑀦𑁂.

𑁩𑁮𑁬. ‘‘𑀅𑀧𑀣𑁂𑀦 𑀧𑀬𑀸𑀢𑀼𑀫𑀺𑀘𑁆𑀙𑀲𑀺, 𑀘𑀦𑁆𑀤𑀁 𑀓𑀻𑀴𑀦𑀓𑀁 𑀕𑀯𑁂𑀲𑀲𑀺;

𑀫𑁂𑀭𑀼𑀁 𑀮𑀗𑁆𑀖𑁂𑀢𑀼𑀫𑀺𑀘𑁆𑀙𑀲𑀺, 𑀬𑁄 𑀢𑁆𑀯𑀁 𑀩𑀼𑀤𑁆𑀥𑀲𑀼𑀢𑀁 𑀫𑀕𑁆𑀕𑀬𑀲𑀺.

𑁩𑁮𑁭. ‘‘𑀦𑀢𑁆𑀣𑀺 𑀳𑀺 𑀮𑁄𑀓𑁂 𑀲𑀤𑁂𑀯𑀓𑁂, 𑀭𑀸𑀕𑁄 𑀬𑀢𑁆𑀣𑀧𑀺 𑀤𑀸𑀦𑀺 𑀫𑁂 𑀲𑀺𑀬𑀸;

𑀦𑀧𑀺 𑀦𑀁 𑀚𑀸𑀦𑀸𑀫𑀺 𑀓𑀻𑀭𑀺𑀲𑁄, 𑀅𑀣 𑀫𑀕𑁆𑀕𑁂𑀦 𑀳𑀢𑁄 𑀲𑀫𑀽𑀮𑀓𑁄.

𑁩𑁮𑁮. ‘‘𑀇𑀗𑁆𑀕𑀸𑀮𑀓𑀼𑀬𑀸𑀯 𑀉𑀚𑁆𑀛𑀺𑀢𑁄, 𑀯𑀺𑀲𑀧𑀢𑁆𑀢𑁄𑀭𑀺𑀯 𑀅𑀕𑁆𑀕𑀺𑀢𑁄 𑀓𑀢𑁄;

𑀦𑀧𑀺 𑀦𑀁 𑀧𑀲𑁆𑀲𑀸𑀫𑀺 𑀓𑀻𑀭𑀺𑀲𑁄, 𑀅𑀣 𑀫𑀕𑁆𑀕𑁂𑀦 𑀳𑀢𑁄 𑀲𑀫𑀽𑀮𑀓𑁄.

𑁩𑁮𑁯. ‘‘𑀬𑀲𑁆𑀲𑀸 𑀲𑀺𑀬𑀸 𑀅𑀧𑀘𑁆𑀘𑀯𑁂𑀓𑁆𑀔𑀺𑀢𑀁, 𑀲𑀢𑁆𑀣𑀸 𑀯𑀸 𑀅𑀦𑀼𑀧𑀸𑀲𑀺𑀢𑁄 𑀲𑀺𑀬𑀸;

𑀢𑁆𑀯𑀁 𑀢𑀸𑀤𑀺𑀲𑀺𑀓𑀁 𑀧𑀮𑁄𑀪𑀬, 𑀚𑀸𑀦𑀦𑁆𑀢𑀺𑀁 𑀲𑁄 𑀇𑀫𑀁 𑀯𑀺𑀳𑀜𑁆𑀜𑀲𑀺.

𑁩𑁯𑁦. ‘‘𑀫𑀬𑁆𑀳𑀜𑁆𑀳𑀺 𑀅𑀓𑁆𑀓𑀼𑀝𑁆𑀞𑀯𑀦𑁆𑀤𑀺𑀢𑁂, 𑀲𑀼𑀔𑀤𑀼𑀓𑁆𑀔𑁂 𑀘 𑀲𑀢𑀻 𑀉𑀧𑀝𑁆𑀞𑀺𑀢𑀸;

𑀲𑀗𑁆𑀔𑀢𑀫𑀲𑀼𑀪𑀦𑁆𑀢𑀺 𑀚𑀸𑀦𑀺𑀬, 𑀲𑀩𑁆𑀩𑀢𑁆𑀣𑁂𑀯 𑀫𑀦𑁄 𑀦 𑀮𑀺𑀫𑁆𑀧𑀢𑀺.

𑁩𑁯𑁧. ‘‘𑀲𑀸𑀳𑀁 𑀲𑀼𑀕𑀢𑀲𑁆𑀲 𑀲𑀸𑀯𑀺𑀓𑀸, 𑀫𑀕𑁆𑀕𑀝𑁆𑀞𑀗𑁆𑀕𑀺𑀓𑀬𑀸𑀦𑀬𑀸𑀬𑀺𑀦𑀻;

𑀉𑀤𑁆𑀥𑀝𑀲𑀮𑁆𑀮𑀸 𑀅𑀦𑀸𑀲𑀯𑀸, 𑀲𑀼𑀜𑁆𑀜𑀸𑀕𑀸𑀭𑀕𑀢𑀸 𑀭𑀫𑀸𑀫𑀳𑀁.

𑁩𑁯𑁨. ‘‘𑀤𑀺𑀝𑁆𑀞𑀸 𑀳𑀺 𑀫𑀬𑀸 𑀲𑀼𑀘𑀺𑀢𑁆𑀢𑀺𑀢𑀸, 𑀲𑁄𑀫𑁆𑀪𑀸 𑀤𑀸𑀭𑀼𑀓𑀧𑀺𑀮𑁆𑀮𑀓𑀸𑀦𑀺 𑀯𑀸;

𑀢𑀦𑁆𑀢𑀻𑀳𑀺 𑀘 𑀔𑀻𑀮𑀓𑁂𑀳𑀺 𑀘, 𑀯𑀺𑀦𑀺𑀩𑀤𑁆𑀥𑀸 𑀯𑀺𑀯𑀺𑀥𑀁 𑀧𑀦𑀘𑁆𑀘𑀓𑀸.

𑁩𑁯𑁩. ‘‘𑀢𑀫𑁆𑀳𑀼𑀤𑁆𑀥𑀝𑁂 𑀢𑀦𑁆𑀢𑀺𑀔𑀻𑀮𑀓𑁂, 𑀯𑀺𑀲𑁆𑀲𑀝𑁆𑀞𑁂 𑀯𑀺𑀓𑀮𑁂 𑀧𑀭𑀺𑀓𑁆𑀭𑀺𑀢𑁂;

𑀦 𑀯𑀺𑀦𑁆𑀤𑁂𑀬𑁆𑀬 𑀔𑀡𑁆𑀟𑀲𑁄 𑀓𑀢𑁂, 𑀓𑀺𑀫𑁆𑀳𑀺 𑀢𑀢𑁆𑀣 𑀫𑀦𑀁 𑀦𑀺𑀯𑁂𑀲𑀬𑁂.

𑁩𑁯𑁪. ‘‘𑀢𑀣𑀽𑀧𑀫𑀸 𑀤𑁂𑀳𑀓𑀸𑀦𑀺 𑀫𑀁, 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀯𑀺𑀦𑀸 𑀦 𑀯𑀢𑁆𑀢𑀦𑁆𑀢𑀺;

𑀥𑀫𑁆𑀫𑁂𑀳𑀺 𑀯𑀺𑀦𑀸 𑀦 𑀯𑀢𑁆𑀢𑀢𑀺, 𑀓𑀺𑀫𑁆𑀳𑀺 𑀢𑀢𑁆𑀣 𑀫𑀦𑀁 𑀦𑀺𑀯𑁂𑀲𑀬𑁂.

𑁩𑁯𑁫. ‘‘𑀬𑀣𑀸 𑀳𑀭𑀺𑀢𑀸𑀮𑁂𑀦 𑀫𑀓𑁆𑀔𑀺𑀢𑀁, 𑀅𑀤𑁆𑀤𑀲 𑀘𑀺𑀢𑁆𑀢𑀺𑀓𑀁 𑀪𑀺𑀢𑁆𑀢𑀺𑀬𑀸 𑀓𑀢𑀁;

𑀢𑀫𑁆𑀳𑀺 𑀢𑁂 𑀯𑀺𑀧𑀭𑀻𑀢𑀤𑀲𑁆𑀲𑀦𑀁, 𑀲𑀜𑁆𑀜𑀸 𑀫𑀸𑀦𑀼𑀲𑀺𑀓𑀸 𑀦𑀺𑀭𑀢𑁆𑀣𑀺𑀓𑀸.

𑁩𑁯𑁬. ‘‘𑀫𑀸𑀬𑀁 𑀯𑀺𑀬 𑀅𑀕𑁆𑀕𑀢𑁄 𑀓𑀢𑀁, 𑀲𑀼𑀧𑀺𑀦𑀦𑁆𑀢𑁂𑀯 𑀲𑀼𑀯𑀡𑁆𑀡𑀧𑀸𑀤𑀧𑀁;

𑀉𑀧𑀕𑀘𑁆𑀙𑀲𑀺 𑀅𑀦𑁆𑀥 𑀭𑀺𑀢𑁆𑀢𑀓𑀁, 𑀚𑀦𑀫𑀚𑁆𑀛𑁂𑀭𑀺𑀯 𑀭𑀼𑀧𑁆𑀧𑀭𑀽𑀧𑀓𑀁.

𑁩𑁯𑁭. ‘‘𑀯𑀝𑁆𑀝𑀦𑀺𑀭𑀺𑀯 𑀓𑁄𑀝𑀭𑁄𑀳𑀺𑀢𑀸, 𑀫𑀚𑁆𑀛𑁂 𑀧𑀼𑀩𑁆𑀩𑀼𑀴𑀓𑀸 𑀲𑀅𑀲𑁆𑀲𑀼𑀓𑀸;

𑀧𑀻𑀴𑀓𑁄𑀴𑀺𑀓𑀸 𑀘𑁂𑀢𑁆𑀣 𑀚𑀸𑀬𑀢𑀺, 𑀯𑀺𑀯𑀺𑀥𑀸 𑀘𑀓𑁆𑀔𑀼𑀯𑀺𑀥𑀸 𑀘 𑀧𑀺𑀡𑁆𑀟𑀺𑀢𑀸.

𑁩𑁯𑁮. ‘‘𑀉𑀧𑁆𑀧𑀸𑀝𑀺𑀬 𑀘𑀸𑀭𑀼𑀤𑀲𑁆𑀲𑀦𑀸, 𑀦 𑀘 𑀧𑀚𑁆𑀚𑀺𑀢𑁆𑀣 𑀅𑀲𑀗𑁆𑀕𑀫𑀸𑀦𑀲𑀸;

𑀳𑀦𑁆𑀤 𑀢𑁂 𑀘𑀓𑁆𑀔𑀼𑀁 𑀳𑀭𑀲𑁆𑀲𑀼 𑀢𑀁, 𑀢𑀲𑁆𑀲 𑀦𑀭𑀲𑁆𑀲 𑀅𑀤𑀸𑀲𑀺 𑀢𑀸𑀯𑀤𑁂.

𑁩𑁯𑁯. ‘‘𑀢𑀲𑁆𑀲 𑀘 𑀯𑀺𑀭𑀫𑀸𑀲𑀺 𑀢𑀸𑀯𑀤𑁂, 𑀭𑀸𑀕𑁄 𑀢𑀢𑁆𑀣 𑀔𑀫𑀸𑀧𑀬𑀻 𑀘 𑀦𑀁;

𑀲𑁄𑀢𑁆𑀣𑀺 𑀲𑀺𑀬𑀸 𑀩𑁆𑀭𑀳𑁆𑀫𑀘𑀸𑀭𑀺𑀦𑀻, 𑀦 𑀧𑀼𑀦𑁄 𑀏𑀤𑀺𑀲𑀓𑀁 𑀪𑀯𑀺𑀲𑁆𑀲𑀢𑀺.

𑁪𑁦𑁦. ‘‘𑀆𑀲𑀸𑀤𑀺𑀬 𑀏𑀤𑀺𑀲𑀁 𑀚𑀦𑀁, 𑀅𑀕𑁆𑀕𑀺𑀁 𑀧𑀚𑁆𑀚𑀮𑀺𑀢𑀁𑀯 𑀮𑀺𑀗𑁆𑀕𑀺𑀬;

𑀕𑀡𑁆𑀳𑀺𑀬 𑀆𑀲𑀻𑀯𑀺𑀲𑀁 𑀯𑀺𑀬, 𑀅𑀧𑀺 𑀦𑀼 𑀲𑁄𑀢𑁆𑀣𑀺 𑀲𑀺𑀬𑀸 𑀔𑀫𑁂𑀳𑀺 𑀦𑁄.

𑁪𑁦𑁧. ‘‘𑀫𑀼𑀢𑁆𑀢𑀸 𑀘 𑀢𑀢𑁄 𑀲𑀸 𑀪𑀺𑀓𑁆𑀔𑀼𑀦𑀻, 𑀅𑀕𑀫𑀻 𑀩𑀼𑀤𑁆𑀥𑀯𑀭𑀲𑁆𑀲 𑀲𑀦𑁆𑀢𑀺𑀓𑀁;

𑀧𑀲𑁆𑀲𑀺𑀬 𑀯𑀭𑀧𑀼𑀜𑁆𑀜𑀮𑀓𑁆𑀔𑀡𑀁, 𑀘𑀓𑁆𑀔𑀼 𑀆𑀲𑀺 𑀬𑀣𑀸 𑀧𑀼𑀭𑀸𑀡𑀓’’𑀦𑁆𑀢𑀺. 𑁋

𑀇𑀫𑀸 𑀕𑀸𑀣𑀸 𑀧𑀘𑁆𑀘𑀼𑀤𑀸𑀳𑀸𑀲𑀺.

𑀢𑀢𑁆𑀣 𑀚𑀻𑀯𑀓𑀫𑁆𑀩𑀯𑀦𑀦𑁆𑀢𑀺 𑀚𑀻𑀯𑀓𑀲𑁆𑀲 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀅𑀫𑁆𑀩𑀯𑀦𑀁. 𑀭𑀫𑁆𑀫𑀦𑁆𑀢𑀺 𑀭𑀫𑀡𑀻𑀬𑀁. 𑀢𑀁 𑀓𑀺𑀭 𑀪𑀽𑀫𑀺𑀪𑀸𑀕𑀲𑀫𑁆𑀧𑀢𑁆𑀢𑀺𑀬𑀸 𑀙𑀸𑀬𑀽𑀤𑀓𑀲𑀫𑁆𑀧𑀢𑁆𑀢𑀺𑀬𑀸 𑀘 𑀭𑀼𑀓𑁆𑀔𑀸𑀦𑀁 𑀭𑁄𑀧𑀺𑀢𑀸𑀓𑀸𑀭𑁂𑀦 𑀅𑀢𑀺𑀯𑀺𑀬 𑀫𑀦𑀼𑀜𑁆𑀜𑀁 𑀫𑀦𑁄𑀭𑀫𑀁. 𑀕𑀘𑁆𑀙𑀦𑁆𑀢𑀺𑀦𑁆𑀢𑀺 𑀅𑀫𑁆𑀩𑀯𑀦𑀁 𑀉𑀤𑁆𑀤𑀺𑀲𑁆𑀲 𑀕𑀢𑀁, 𑀤𑀺𑀯𑀸𑀯𑀺𑀳𑀸𑀭𑀸𑀬 𑀉𑀧𑀕𑀘𑁆𑀙𑀦𑁆𑀢𑀺𑀁. 𑀲𑀼𑀪𑀦𑁆𑀢𑀺 𑀏𑀯𑀁𑀦𑀸𑀫𑀺𑀓𑀁. 𑀥𑀼𑀢𑁆𑀢𑀓𑁄𑀢𑀺 𑀇𑀢𑁆𑀣𑀺𑀥𑀼𑀢𑁆𑀢𑁄. 𑀭𑀸𑀚𑀕𑀳𑀯𑀸𑀲𑀻 𑀓𑀺𑀭𑁂𑀓𑁄 𑀫𑀳𑀸𑀯𑀺𑀪𑀯𑀲𑁆𑀲 𑀲𑀼𑀯𑀡𑁆𑀡𑀓𑀸𑀭𑀲𑁆𑀲 𑀧𑀼𑀢𑁆𑀢𑁄 𑀬𑀼𑀯𑀸 𑀅𑀪𑀺𑀭𑀽𑀧𑁄 𑀇𑀢𑁆𑀣𑀺𑀥𑀼𑀢𑁆𑀢𑁄 𑀧𑀼𑀭𑀺𑀲𑁄 𑀫𑀢𑁆𑀢𑁄 𑀯𑀺𑀘𑀭𑀢𑀺. 𑀲𑁄 𑀢𑀁 𑀧𑀝𑀺𑀧𑀣𑁂 𑀤𑀺𑀲𑁆𑀯𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀫𑀕𑁆𑀕𑀁 𑀉𑀧𑀭𑀼𑀦𑁆𑀥𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀥𑀼𑀢𑁆𑀢𑀓𑁄 𑀲𑀦𑁆𑀦𑀺𑀯𑀸𑀭𑁂𑀲𑀻’’𑀢𑀺, 𑀫𑀫 𑀕𑀫𑀦𑀁 𑀦𑀺𑀲𑁂𑀥𑁂𑀲𑀻𑀢𑀺 𑀅𑀢𑁆𑀣𑁄. 𑀢𑀫𑁂𑀦𑀁 𑀅𑀩𑁆𑀭𑀯𑀻 𑀲𑀼𑀪𑀸𑀢𑀺 𑀢𑀫𑁂𑀦𑀁 𑀦𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑀁 𑀥𑀼𑀢𑁆𑀢𑀁 𑀲𑀼𑀪𑀸 𑀪𑀺𑀓𑁆𑀔𑀼𑀦𑀻 𑀓𑀣𑁂𑀲𑀺. 𑀏𑀢𑁆𑀣 𑀘 ‘‘𑀕𑀘𑁆𑀙𑀦𑁆𑀢𑀺𑀁 𑀪𑀺𑀓𑁆𑀔𑀼𑀦𑀺𑀁 𑀲𑀼𑀪𑀁, 𑀅𑀩𑁆𑀭𑀯𑀺 𑀲𑀼𑀪𑀸’’𑀢𑀺 𑀘 𑀅𑀢𑁆𑀢𑀸𑀦𑀫𑁂𑀯 𑀣𑁂𑀭𑀻 𑀅𑀜𑁆𑀜𑀁 𑀯𑀺𑀬 𑀓𑀢𑁆𑀯𑀸 𑀯𑀤𑀢𑀺. 𑀣𑁂𑀭𑀺𑀬𑀸 𑀯𑀼𑀢𑁆𑀢𑀕𑀸𑀣𑀸𑀦𑀁 𑀲𑀫𑁆𑀩𑀦𑁆𑀥𑀤𑀲𑁆𑀲𑀦𑀯𑀲𑁂𑀦 𑀲𑀗𑁆𑀕𑀻𑀢𑀺𑀓𑀸𑀭𑁂𑀳𑀺 𑀅𑀬𑀁 𑀕𑀸𑀣𑀸 𑀯𑀼𑀢𑁆𑀢𑀸.

‘‘𑀅𑀩𑁆𑀭𑀯𑀻 𑀲𑀼𑀪𑀸’’𑀢𑀺 𑀯𑀢𑁆𑀯𑀸 𑀢𑀲𑁆𑀲𑀸 𑀯𑀼𑀢𑁆𑀢𑀸𑀓𑀸𑀭𑀤𑀲𑁆𑀲𑀦𑀢𑁆𑀣𑀁 𑀆𑀳 ‘‘𑀓𑀺𑀁 𑀢𑁂 𑀅𑀧𑀭𑀸𑀥𑀺𑀢’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀓𑀺𑀁 𑀢𑁂 𑀅𑀧𑀭𑀸𑀥𑀺𑀢𑀁 𑀫𑀬𑀸𑀢𑀺 𑀓𑀺𑀁 𑀢𑀼𑀬𑁆𑀳𑀁, 𑀆𑀯𑀼𑀲𑁄, 𑀫𑀬𑀸 𑀅𑀧𑀭𑀤𑁆𑀥𑀁. 𑀬𑀁 𑀫𑀁 𑀑𑀯𑀭𑀺𑀬𑀸𑀦 𑀢𑀺𑀝𑁆𑀞𑀲𑀻𑀢𑀺 𑀬𑁂𑀦 𑀅𑀧𑀭𑀸𑀥𑁂𑀦 𑀫𑀁 𑀕𑀘𑁆𑀙𑀦𑁆𑀢𑀺𑀁 𑀑𑀯𑀭𑀺𑀢𑁆𑀯𑀸 𑀕𑀫𑀦𑀁 𑀦𑀺𑀲𑁂𑀥𑁂𑀢𑁆𑀯𑀸 𑀢𑀺𑀝𑁆𑀞𑀲𑀺, 𑀲𑁄 𑀦𑀢𑁆𑀣𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀣 𑀇𑀢𑁆𑀣𑀻𑀢𑀺𑀲𑀜𑁆𑀜𑀸𑀬 𑀏𑀯𑀁 𑀧𑀝𑀺𑀧𑀚𑁆𑀚𑀲𑀺, 𑀏𑀯𑀫𑁆𑀧𑀺 𑀦 𑀬𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑀻 𑀆𑀳 𑁋 ‘‘𑀦 𑀳𑀺 𑀧𑀩𑁆𑀩𑀚𑀺𑀢𑀸𑀬, 𑀆𑀯𑀼𑀲𑁄, 𑀧𑀼𑀭𑀺𑀲𑁄 𑀲𑀫𑁆𑀨𑀼𑀲𑀦𑀸𑀬 𑀓𑀧𑁆𑀧𑀢𑀻’’𑀢𑀺, 𑀆𑀯𑀼𑀲𑁄 𑀲𑀼𑀯𑀡𑁆𑀡𑀓𑀸𑀭𑀧𑀼𑀢𑁆𑀢, 𑀮𑁄𑀓𑀺𑀬𑀘𑀸𑀭𑀺𑀢𑁆𑀢𑁂𑀦𑀧𑀺 𑀧𑀼𑀭𑀺𑀲𑀲𑁆𑀲 𑀧𑀩𑁆𑀩𑀚𑀺𑀢𑀸𑀦𑀁 𑀲𑀫𑁆𑀨𑀼𑀲𑀦𑀸𑀬 𑀦 𑀓𑀧𑁆𑀧𑀢𑀺, 𑀧𑀩𑁆𑀩𑀚𑀺𑀢𑀸𑀬 𑀧𑀦 𑀧𑀼𑀭𑀺𑀲𑁄 𑀢𑀺𑀭𑀘𑁆𑀙𑀸𑀦𑀕𑀢𑁄𑀧𑀺 𑀲𑀫𑁆𑀨𑀼𑀲𑀦𑀸𑀬 𑀦 𑀓𑀧𑁆𑀧𑀢𑀺, 𑀢𑀺𑀝𑁆𑀞𑀢𑀼 𑀢𑀸𑀯 𑀧𑀼𑀭𑀺𑀲𑀨𑀼𑀲𑀦𑀸, 𑀭𑀸𑀕𑀯𑀲𑁂𑀦𑀲𑁆𑀲𑀸 𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀧𑀼𑀭𑀺𑀲𑀲𑁆𑀲 𑀦𑀺𑀲𑁆𑀲𑀕𑁆𑀕𑀺𑀬𑀲𑁆𑀲𑀸𑀧𑀺 𑀨𑀼𑀲𑀦𑀸 𑀦 𑀓𑀧𑁆𑀧𑀢𑁂𑀯.

𑀢𑁂𑀦𑀸𑀳 ‘‘𑀕𑀭𑀼𑀓𑁂 𑀫𑀫 𑀲𑀢𑁆𑀣𑀼𑀲𑀸𑀲𑀦𑁂’’𑀢𑀺𑀆𑀤𑀺. 𑀢𑀲𑁆𑀲𑀢𑁆𑀣𑁄 𑁋 𑀕𑀭𑀼𑀓𑁂 𑀧𑀸𑀲𑀸𑀡𑀘𑁆𑀙𑀢𑁆𑀢𑀁 𑀯𑀺𑀬 𑀕𑀭𑀼𑀓𑀸𑀢𑀩𑁆𑀩𑁂 𑀫𑀬𑁆𑀳𑀁 𑀲𑀢𑁆𑀣𑀼 𑀲𑀸𑀲𑀦𑁂 𑀬𑀸 𑀲𑀺𑀓𑁆𑀔𑀸 𑀪𑀺𑀓𑁆𑀔𑀼𑀦𑀺𑀬𑁄 𑀉𑀤𑁆𑀤𑀺𑀲𑁆𑀲 𑀲𑀼𑀕𑀢𑁂𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑀸 𑀧𑀜𑁆𑀜𑀢𑁆𑀢𑀸. 𑀢𑀸𑀳𑀺 𑀧𑀭𑀺𑀲𑀼𑀤𑁆𑀥𑀧𑀤𑀁 𑀧𑀭𑀺𑀲𑀼𑀤𑁆𑀥𑀓𑀼𑀲𑀮𑀓𑁄𑀝𑁆𑀞𑀸𑀲𑀁, 𑀭𑀸𑀕𑀸𑀤𑀺𑀅𑀗𑁆𑀕𑀡𑀸𑀦𑀁 𑀲𑀩𑁆𑀩𑀲𑁄 𑀅𑀪𑀸𑀯𑁂𑀦 𑀅𑀦𑀗𑁆𑀕𑀡𑀁, 𑀏𑀯𑀁𑀪𑀽𑀢𑀁 𑀫𑀁 𑀕𑀘𑁆𑀙𑀦𑁆𑀢𑀺𑀁 𑀓𑁂𑀦 𑀓𑀸𑀭𑀡𑁂𑀦 𑀆𑀯𑀭𑀺𑀢𑁆𑀯𑀸 𑀢𑀺𑀝𑁆𑀞𑀲𑀻𑀢𑀺.

𑀆𑀯𑀺𑀮𑀘𑀺𑀢𑁆𑀢𑁄𑀢𑀺 𑀘𑀺𑀢𑁆𑀢𑀲𑁆𑀲 𑀆𑀯𑀺𑀮𑀪𑀸𑀯𑀓𑀭𑀸𑀦𑀁 𑀓𑀸𑀫𑀯𑀺𑀢𑀓𑁆𑀓𑀸𑀤𑀻𑀦𑀁 𑀯𑀲𑁂𑀦 𑀆𑀯𑀺𑀮𑀘𑀺𑀢𑁆𑀢𑁄, 𑀢𑁆𑀯𑀁 𑀢𑀤𑀪𑀸𑀯𑀢𑁄 𑀅𑀦𑀸𑀯𑀺𑀮𑀁, 𑀭𑀸𑀕𑀭𑀚𑀸𑀤𑀻𑀦𑀁 𑀯𑀲𑁂𑀦 𑀲𑀭𑀚𑁄, 𑀲𑀸𑀗𑁆𑀕𑀡𑁄 𑀢𑀤𑀪𑀸𑀯𑀢𑁄 𑀯𑀻𑀢𑀭𑀚𑀁 𑀅𑀦𑀗𑁆𑀕𑀡𑀁 𑀲𑀩𑁆𑀩𑀢𑁆𑀣 𑀔𑀦𑁆𑀥𑀧𑀜𑁆𑀘𑀓𑁂 𑀲𑀫𑀼𑀘𑁆𑀙𑁂𑀤𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀢𑁆𑀢𑀫𑀸𑀦𑀲𑀁, 𑀫𑀁 𑀓𑀲𑁆𑀫𑀸 𑀑𑀯𑀭𑀺𑀢𑁆𑀯𑀸 𑀢𑀺𑀝𑁆𑀞𑀲𑀻𑀢𑀺?

𑀏𑀯𑀁 𑀣𑁂𑀭𑀺𑀬𑀸 𑀯𑀼𑀢𑁆𑀢𑁂 𑀥𑀼𑀢𑁆𑀢𑀓𑁄 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀤𑀳𑀭𑀸 𑀘𑀸’’𑀢𑀺𑀆𑀤𑀺𑀦𑀸 𑀤𑀲 𑀕𑀸𑀣𑀸 𑀅𑀪𑀸𑀲𑀺. 𑀢𑀢𑁆𑀣 𑀤𑀳𑀭𑀸𑀢𑀺 𑀢𑀭𑀼𑀡𑀻 𑀧𑀞𑀫𑁂 𑀬𑁄𑀩𑁆𑀩𑀦𑁂 𑀞𑀺𑀢𑀸. 𑀅𑀧𑀸𑀧𑀺𑀓𑀸 𑀘𑀲𑀻𑀢𑀺 𑀭𑀽𑀧𑁂𑀦 𑀅𑀮𑀸𑀫𑀺𑀓𑀸 𑀘 𑀅𑀲𑀺, 𑀉𑀢𑁆𑀢𑀫𑀭𑀽𑀧𑀥𑀭𑀸 𑀘𑀸𑀳𑁄𑀲𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀺𑀁 𑀢𑁂 𑀧𑀩𑁆𑀩𑀚𑁆𑀚𑀸 𑀓𑀭𑀺𑀲𑁆𑀲𑀢𑀻𑀢𑀺 𑀢𑀼𑀬𑁆𑀳𑀁 𑀏𑀯𑀁 𑀧𑀞𑀫𑀯𑀬𑁂 𑀞𑀺𑀢𑀸𑀬 𑀭𑀽𑀧𑀲𑀫𑁆𑀧𑀦𑁆𑀦𑀸𑀬 𑀧𑀩𑁆𑀩𑀚𑁆𑀚𑀸 𑀓𑀺𑀁 𑀓𑀭𑀺𑀲𑁆𑀲𑀢𑀺, 𑀯𑀼𑀟𑁆𑀠𑀸𑀬 𑀩𑀻𑀪𑀘𑁆𑀙𑀭𑀽𑀧𑀸𑀬 𑀯𑀸 𑀧𑀩𑁆𑀩𑀚𑀺𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀤𑀢𑀺. 𑀦𑀺𑀓𑁆𑀔𑀺𑀧𑀸𑀢𑀺 𑀙𑀟𑁆𑀟𑁂𑀳𑀺. ‘‘𑀉𑀓𑁆𑀔𑀺𑀧𑀸’’𑀢𑀺 𑀯𑀸 𑀧𑀸𑀞𑁄, 𑀅𑀧𑀦𑁂𑀳𑀻𑀢𑀺 𑀅𑀢𑁆𑀣𑁄.

𑀫𑀥𑀼𑀭𑀦𑁆𑀢𑀺 𑀲𑀼𑀪𑀁, 𑀲𑀼𑀕𑀦𑁆𑀥𑀦𑁆𑀢𑀺 𑀅𑀢𑁆𑀣𑁄. 𑀧𑀯𑀦𑁆𑀢𑀻𑀢𑀺 𑀯𑀸𑀬𑀦𑁆𑀢𑀺. 𑀲𑀩𑁆𑀩𑀲𑁄𑀢𑀺 𑀲𑀫𑀦𑁆𑀢𑀢𑁄. 𑀓𑀼𑀲𑀼𑀫𑀭𑀚𑁂𑀦 𑀲𑀫𑀼𑀝𑁆𑀞𑀺𑀢𑀸 𑀤𑀼𑀫𑀸𑀢𑀺 𑀇𑀫𑁂 𑀭𑀼𑀓𑁆𑀔𑀸 𑀫𑀦𑁆𑀤𑀯𑀸𑀢𑁂𑀦 𑀲𑀫𑀼𑀝𑁆𑀞𑀳𑀫𑀸𑀦𑀓𑀼𑀲𑀼𑀫𑀭𑁂𑀡𑀼𑀚𑀸𑀢𑁂𑀦 𑀅𑀢𑁆𑀢𑀦𑁄 𑀓𑀼𑀲𑀼𑀫𑀭𑀚𑁂𑀦 𑀲𑀬𑀁 𑀲𑀫𑀼𑀝𑁆𑀞𑀺𑀢𑀸 𑀯𑀺𑀬 𑀳𑀼𑀢𑁆𑀯𑀸 𑀲𑀫𑀦𑁆𑀢𑀢𑁄 𑀲𑀼𑀭𑀪𑀻 𑀯𑀸𑀬𑀦𑁆𑀢𑀺. 𑀧𑀞𑀫𑀯𑀲𑀦𑁆𑀢𑁄 𑀲𑀼𑀔𑁄 𑀉𑀢𑀽𑀢𑀺 𑀅𑀬𑀁 𑀧𑀞𑀫𑁄 𑀯𑀲𑀦𑁆𑀢𑀫𑀸𑀲𑁄 𑀲𑀼𑀔𑀲𑀫𑁆𑀨𑀲𑁆𑀲𑁄 𑀘 𑀉𑀢𑀼 𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄.

𑀓𑀼𑀲𑀼𑀫𑀺𑀢𑀲𑀺𑀔𑀭𑀸𑀢𑀺 𑀲𑀼𑀧𑀼𑀧𑁆𑀨𑀺𑀢𑀕𑁆𑀕𑀸. 𑀅𑀪𑀺𑀕𑀚𑁆𑀚𑀦𑁆𑀢𑀺𑀯 𑀫𑀸𑀮𑀼𑀢𑁂𑀭𑀺𑀢𑀸𑀢𑀺 𑀯𑀸𑀢𑁂𑀦 𑀲𑀜𑁆𑀘𑀮𑀺𑀢𑀸 𑀅𑀪𑀺𑀕𑀚𑁆𑀚𑀦𑁆𑀢𑀺𑀯 𑀅𑀪𑀺𑀢𑁆𑀣𑀦𑀺𑀢𑀸 𑀯𑀺𑀬 𑀢𑀺𑀝𑁆𑀞𑀦𑁆𑀢𑀺. 𑀬𑀤𑀺 𑀏𑀓𑀸 𑀯𑀦𑀫𑁄𑀕𑀳𑀺𑀲𑁆𑀲𑀲𑀻𑀢𑀺 𑀲𑀘𑁂 𑀢𑁆𑀯𑀁 𑀏𑀓𑀺𑀓𑀸 𑀯𑀦𑀫𑁄𑀕𑀸𑀳𑀺𑀲𑁆𑀲𑀲𑀺, 𑀓𑀸 𑀦𑀸𑀫 𑀢𑁂 𑀢𑀢𑁆𑀣 𑀭𑀢𑀺 𑀪𑀯𑀺𑀲𑁆𑀲𑀢𑀻𑀢𑀺 𑀅𑀢𑁆𑀢𑀦𑀸 𑀩𑀤𑁆𑀥𑀲𑀼𑀔𑀸𑀪𑀺𑀭𑀢𑁆𑀢𑀢𑁆𑀢𑀸 𑀏𑀯𑀫𑀸𑀳.

𑀯𑀸𑀴𑀫𑀺𑀕𑀲𑀗𑁆𑀖𑀲𑁂𑀯𑀺𑀢𑀦𑁆𑀢𑀺 𑀲𑀻𑀳𑀩𑁆𑀬𑀕𑁆𑀖𑀸𑀤𑀺𑀯𑀸𑀴𑀫𑀺𑀕𑀲𑀫𑀽𑀳𑁂𑀳𑀺 𑀢𑀢𑁆𑀣 𑀢𑀢𑁆𑀣 𑀉𑀧𑀲𑁂𑀯𑀺𑀢𑀁. 𑀓𑀼𑀜𑁆𑀚𑀭𑀫𑀢𑁆𑀢𑀓𑀭𑁂𑀡𑀼𑀮𑁄𑀴𑀺𑀢𑀦𑁆𑀢𑀺 𑀫𑀢𑁆𑀢𑀓𑀼𑀜𑁆𑀚𑀭𑁂𑀳𑀺 𑀳𑀢𑁆𑀣𑀺𑀦𑀻𑀳𑀺 𑀘 𑀫𑀺𑀕𑀸𑀦𑀁 𑀘𑀺𑀢𑁆𑀢𑀢𑀸𑀧𑀦𑁂𑀦 𑀭𑀼𑀓𑁆𑀔𑀕𑀘𑁆𑀙𑀸𑀤𑀻𑀦𑀁 𑀲𑀸𑀔𑀸𑀪𑀜𑁆𑀚𑀦𑁂𑀦 𑀘 𑀆𑀮𑁄𑀴𑀺𑀢𑀧𑀤𑁂𑀲𑀁. 𑀓𑀺𑀜𑁆𑀘𑀸𑀧𑀺 𑀢𑀲𑁆𑀫𑀺𑀁 𑀯𑀦𑁂 𑀈𑀤𑀺𑀲𑀁 𑀢𑀤𑀸 𑀦𑀢𑁆𑀣𑀺, 𑀯𑀦𑀁 𑀦𑀸𑀫 𑀏𑀯𑀭𑀽𑀧𑀦𑁆𑀢𑀺 𑀢𑀁 𑀪𑀺𑀁𑀲𑀸𑀧𑁂𑀢𑀼𑀓𑀸𑀫𑁄 𑀏𑀯𑀫𑀸𑀳. 𑀭𑀳𑀺𑀢𑀦𑁆𑀢𑀺 𑀚𑀦𑀭𑀳𑀺𑀢𑀁 𑀯𑀺𑀚𑀦𑀁. 𑀪𑀺𑀁𑀲𑀦𑀓𑀦𑁆𑀢𑀺 𑀪𑀬𑀚𑀦𑀓𑀁.

𑀢𑀧𑀦𑀻𑀬𑀓𑀢𑀸𑀯 𑀥𑀻𑀢𑀺𑀓𑀸𑀢𑀺 𑀭𑀢𑁆𑀢𑀲𑀼𑀯𑀡𑁆𑀡𑁂𑀦 𑀯𑀺𑀘𑀭𑀺𑀢𑀸 𑀥𑀻𑀢𑀮𑀺𑀓𑀸 𑀯𑀺𑀬 𑀲𑀼𑀓𑀼𑀲𑀮𑁂𑀦 𑀬𑀦𑁆𑀢𑀸𑀘𑀭𑀺𑀬𑁂𑀦 𑀬𑀦𑁆𑀢𑀬𑁄𑀕𑀯𑀲𑁂𑀦 𑀲𑀚𑁆𑀚𑀺𑀢𑀸 𑀲𑀼𑀯𑀡𑁆𑀡𑀧𑀝𑀺𑀫𑀸 𑀯𑀺𑀬 𑀯𑀺𑀘𑀭𑀲𑀺, 𑀇𑀤𑀸𑀦𑁂𑀯 𑀇𑀢𑁄 𑀘𑀺𑀢𑁄 𑀘 𑀲𑀜𑁆𑀘𑀭𑀲𑀺. 𑀘𑀺𑀢𑁆𑀢𑀮𑀢𑁂𑀯 𑀅𑀘𑁆𑀙𑀭𑀸𑀢𑀺 𑀘𑀺𑀢𑁆𑀢𑀮𑀢𑀸𑀦𑀸𑀫𑀓𑁂 𑀉𑀬𑁆𑀬𑀸𑀦𑁂 𑀤𑁂𑀯𑀘𑁆𑀙𑀭𑀸 𑀯𑀺𑀬. 𑀓𑀸𑀲𑀺𑀓𑀲𑀼𑀔𑀼𑀫𑁂𑀳𑀻𑀢𑀺 𑀓𑀸𑀲𑀺𑀭𑀝𑁆𑀞𑁂 𑀉𑀧𑁆𑀧𑀦𑁆𑀦𑁂𑀳𑀺 𑀅𑀢𑀺𑀯𑀺𑀬 𑀲𑀼𑀔𑀼𑀫𑁂𑀳𑀺. 𑀯𑀕𑁆𑀕𑀼𑀪𑀻𑀢𑀺 𑀲𑀺𑀦𑀺𑀤𑁆𑀥𑀫𑀝𑁆𑀞𑁂𑀳𑀺. 𑀲𑁄𑀪𑀲𑀻 𑀲𑀼𑀯𑀲𑀦𑁂𑀳𑀺 𑀦𑀽𑀧𑀫𑁂𑀢𑀺 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀯𑀢𑁆𑀣𑁂𑀳𑀺 𑀅𑀦𑀼𑀧𑀫𑁂 𑀉𑀧𑀫𑀸𑀭𑀳𑀺𑀢𑁂 𑀢𑁆𑀯𑀁 𑀇𑀤𑀸𑀦𑀺 𑀫𑁂 𑀯𑀲𑀸𑀦𑀼𑀕𑁄 𑀲𑁄𑀪𑀲𑀻𑀢𑀺 𑀪𑀸𑀯𑀺𑀦𑀁 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀯𑀲𑁂𑀦 𑀏𑀓𑀦𑁆𑀢𑀺𑀓𑀁 𑀯𑀢𑁆𑀢𑀫𑀸𑀦𑀁 𑀯𑀺𑀬 𑀓𑀢𑁆𑀯𑀸 𑀯𑀤𑀢𑀺.

𑀅𑀳𑀁 𑀢𑀯 𑀯𑀲𑀸𑀦𑀼𑀕𑁄 𑀲𑀺𑀬𑀦𑁆𑀢𑀺 𑀅𑀳𑀫𑁆𑀧𑀺 𑀢𑀼𑀬𑁆𑀳𑀁 𑀯𑀲𑀸𑀦𑀼𑀕𑁄 𑀓𑀺𑀁𑀓𑀸𑀭𑀧𑀝𑀺𑀲𑁆𑀲𑀸𑀯𑀻 𑀪𑀯𑁂𑀬𑁆𑀬𑀁. 𑀬𑀤𑀺 𑀯𑀺𑀳𑀭𑁂𑀫𑀲𑁂 𑀓𑀸𑀦𑀦𑀦𑁆𑀢𑀭𑁂𑀢𑀺 𑀬𑀤𑀺 𑀫𑀬𑀁 𑀉𑀪𑁄𑀧𑀺 𑀯𑀦𑀦𑁆𑀢𑀭𑁂 𑀲𑀳 𑀯𑀲𑀸𑀫 𑀭𑀫𑀸𑀫. 𑀦 𑀳𑀺 𑀫𑀢𑁆𑀣𑀺 𑀢𑀬𑀸 𑀧𑀺𑀬𑀢𑁆𑀢𑀭𑁄𑀢𑀺 𑀯𑀲𑀸𑀦𑀼𑀕𑀪𑀸𑀯𑀲𑁆𑀲 𑀓𑀸𑀭𑀡𑀫𑀸𑀳. 𑀧𑀸𑀡𑁄𑀢𑀺 𑀲𑀢𑁆𑀢𑁄, 𑀅𑀜𑁆𑀜𑁄 𑀓𑁄𑀘𑀺𑀧𑀺 𑀲𑀢𑁆𑀢𑁄 𑀢𑀬𑀸 𑀧𑀺𑀬𑀢𑀭𑁄 𑀫𑀬𑁆𑀳𑀁 𑀦 𑀳𑀺 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀧𑀸𑀡𑁄𑀢𑀺 𑀅𑀢𑁆𑀢𑀦𑁄 𑀚𑀻𑀯𑀺𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺, 𑀫𑀬𑁆𑀳𑀁 𑀚𑀻𑀯𑀺𑀢𑀁 𑀢𑀬𑀸 𑀧𑀺𑀬𑀢𑀭𑀁 𑀦 𑀳𑀺 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀓𑀺𑀦𑁆𑀦𑀭𑀺𑀫𑀦𑁆𑀤𑀮𑁄𑀘𑀦𑁂𑀢𑀺 𑀓𑀺𑀦𑁆𑀦𑀭𑀺𑀬𑀸 𑀯𑀺𑀬 𑀫𑀦𑁆𑀤𑀧𑀼𑀣𑀼𑀯𑀺𑀮𑁄𑀘𑀦𑁂.

𑀬𑀤𑀺 𑀫𑁂 𑀯𑀘𑀦𑀁 𑀓𑀭𑀺𑀲𑁆𑀲𑀲𑀺, 𑀲𑀼𑀔𑀺𑀢𑀸 𑀏𑀳𑀺 𑀅𑀕𑀸𑀭𑀫𑀸𑀯𑀲𑀸𑀢𑀺 𑀲𑀘𑁂 𑀢𑁆𑀯𑀁 𑀫𑀫 𑀯𑀘𑀦𑀁 𑀓𑀭𑀺𑀲𑁆𑀲𑀲𑀺, 𑀏𑀓𑀸𑀲𑀦𑀁 𑀏𑀓𑀲𑁂𑀬𑁆𑀬𑀁 𑀩𑁆𑀭𑀳𑁆𑀫𑀘𑀭𑀺𑀬𑀤𑀼𑀓𑁆𑀔𑀁 𑀧𑀳𑀸𑀬 𑀏𑀳𑀺 𑀓𑀸𑀫𑀪𑁄𑀕𑁂𑀳𑀺 𑀲𑀼𑀔𑀺𑀢𑀸 𑀳𑀼𑀢𑁆𑀯𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲. ‘‘𑀲𑀼𑀔𑀺𑀢𑀸 𑀳𑁂𑀢𑀺 𑀅𑀕𑀸𑀭𑀫𑀸𑀯𑀲𑀦𑁆𑀢𑀻’’𑀢𑀺 𑀓𑁂𑀘𑀺 𑀧𑀞𑀦𑁆𑀢𑀺, 𑀢𑁂𑀲𑀁 𑀲𑀼𑀔𑀺𑀢𑀸 𑀪𑀯𑀺𑀲𑁆𑀲𑀢𑀺, 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀧𑀸𑀲𑀸𑀤𑀦𑀺𑀯𑀸𑀢𑀯𑀸𑀲𑀺𑀦𑀻𑀢𑀺 𑀦𑀺𑀯𑀸𑀢𑁂𑀲𑀼 𑀧𑀸𑀲𑀸𑀤𑁂𑀲𑀼 𑀯𑀸𑀲𑀺𑀦𑀻. ‘‘𑀧𑀸𑀲𑀸𑀤𑀯𑀺𑀫𑀸𑀦𑀯𑀸𑀲𑀺𑀦𑀻’’𑀢𑀺 𑀘 𑀧𑀸𑀞𑁄, 𑀯𑀺𑀫𑀸𑀦𑀲𑀤𑀺𑀲𑁂𑀲𑀼 𑀧𑀸𑀲𑀸𑀤𑁂𑀲𑀼 𑀯𑀸𑀲𑀺𑀦𑀻𑀢𑀺 𑀅𑀢𑁆𑀣𑁄. 𑀧𑀭𑀺𑀓𑀫𑁆𑀫𑀦𑁆𑀢𑀺 𑀯𑁂𑀬𑁆𑀬𑀸𑀯𑀘𑁆𑀘𑀁.

𑀥𑀸𑀭𑀬𑀸𑀢𑀺 𑀧𑀭𑀺𑀤𑀳, 𑀦𑀺𑀯𑀸𑀲𑁂𑀳𑀺 𑀘𑁂𑀯 𑀉𑀢𑁆𑀢𑀭𑀺𑀬𑀜𑁆𑀘 𑀓𑀭𑁄𑀳𑀺. 𑀅𑀪𑀺𑀭𑁄𑀧𑁂𑀳𑀻𑀢𑀺 𑀫𑀡𑁆𑀟𑀦𑀯𑀺𑀪𑀽𑀲𑀦𑀯𑀲𑁂𑀦 𑀯𑀸 𑀲𑀭𑀻𑀭𑀁 𑀆𑀭𑁄𑀧𑀬, 𑀅𑀮𑀗𑁆𑀓𑀭𑁄𑀳𑀻𑀢𑀺 𑀅𑀢𑁆𑀣𑁄. 𑀫𑀸𑀮𑀯𑀡𑁆𑀡𑀓𑀦𑁆𑀢𑀺 𑀫𑀸𑀮𑀜𑁆𑀘𑁂𑀯 𑀕𑀦𑁆𑀥𑀯𑀺𑀮𑁂𑀧𑀦𑀜𑁆𑀘. 𑀓𑀜𑁆𑀘𑀦𑀫𑀡𑀺𑀫𑀼𑀢𑁆𑀢𑀓𑀦𑁆𑀢𑀺 𑀓𑀜𑁆𑀘𑀦𑁂𑀦 𑀫𑀡𑀺𑀫𑀼𑀢𑁆𑀢𑀸𑀳𑀺 𑀘 𑀬𑀼𑀢𑁆𑀢𑀁, 𑀲𑀼𑀯𑀡𑁆𑀡𑀫𑀬𑀫𑀡𑀺𑀫𑀼𑀢𑁆𑀢𑀸𑀳𑀺 𑀔𑀘𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀩𑀳𑀼𑀦𑁆𑀢𑀺 𑀳𑀢𑁆𑀣𑀽𑀧𑀕𑀸𑀤𑀺𑀪𑁂𑀤𑀢𑁄 𑀩𑀳𑀼𑀧𑁆𑀧𑀓𑀸𑀭𑀁. 𑀯𑀺𑀯𑀺𑀥𑀦𑁆𑀢𑀺 𑀓𑀭𑀡𑀯𑀺𑀓𑀢𑀺𑀬𑀸 𑀦𑀸𑀦𑀸𑀯𑀺𑀥𑀁.

𑀲𑀼𑀥𑁄𑀢𑀭𑀚𑀧𑀘𑁆𑀙𑀤𑀦𑁆𑀢𑀺 𑀲𑀼𑀥𑁄𑀢𑀢𑀸𑀬 𑀧𑀯𑀸𑀳𑀺𑀢𑀭𑀚𑀁 𑀉𑀢𑁆𑀢𑀭𑀘𑁆𑀙𑀤𑀁. 𑀲𑀼𑀪𑀦𑁆𑀢𑀺 𑀲𑁄𑀪𑀦𑀁. 𑀕𑁄𑀦𑀓𑀢𑀽𑀮𑀺𑀓𑀲𑀦𑁆𑀣𑀢𑀦𑁆𑀢𑀺 𑀤𑀻𑀖𑀮𑁄𑀫𑀓𑀸𑀴𑀓𑁄𑀚𑀯𑁂𑀦 𑀘𑁂𑀯 𑀳𑀁𑀲𑀮𑁄𑀫𑀸𑀤𑀺𑀧𑀼𑀡𑁆𑀡𑀸𑀬 𑀢𑀽𑀮𑀺𑀓𑀸𑀬 𑀘 𑀲𑀦𑁆𑀣𑀢𑀁. 𑀦𑀯𑀦𑁆𑀢𑀺 𑀅𑀪𑀺𑀦𑀯𑀁. 𑀫𑀳𑀸𑀭𑀳𑀦𑁆𑀢𑀺 𑀫𑀳𑀕𑁆𑀖𑀁. 𑀘𑀦𑁆𑀤𑀦𑀫𑀡𑁆𑀟𑀺𑀢𑀲𑀸𑀭𑀕𑀦𑁆𑀥𑀺𑀓𑀦𑁆𑀢𑀺 𑀕𑁄𑀲𑀻𑀲𑀓𑀸𑀤𑀺𑀲𑀸𑀭𑀘𑀦𑁆𑀤𑀦𑁂𑀦 𑀫𑀡𑁆𑀟𑀺𑀢𑀢𑀸𑀬 𑀲𑀼𑀭𑀪𑀺𑀕𑀦𑁆𑀥𑀺𑀓𑀁, 𑀏𑀯𑀭𑀽𑀧𑀁 𑀲𑀬𑀦𑀫𑀸𑀭𑀼𑀳, 𑀢𑀁 𑀆𑀭𑀼𑀳𑀺𑀢𑁆𑀯𑀸 𑀬𑀣𑀸𑀲𑀼𑀔𑀁 𑀲𑀬𑀸𑀳𑀺 𑀘𑁂𑀯 𑀦𑀺𑀲𑀻𑀤 𑀘𑀸𑀢𑀺 𑀅𑀢𑁆𑀣𑁄.

𑀉𑀧𑁆𑀧𑀮𑀁 𑀘𑀼𑀤𑀓𑀸 𑀲𑀫𑀼𑀕𑁆𑀕𑀢𑀦𑁆𑀢𑀺 𑀘-𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢𑀁, 𑀉𑀤𑀓𑀢𑁄 𑀉𑀕𑁆𑀕𑀢𑀁 𑀉𑀝𑁆𑀞𑀺𑀢𑀁 𑀅𑀘𑁆𑀘𑀼𑀕𑁆𑀕𑀫𑁆𑀫 𑀞𑀺𑀢𑀁 𑀲𑀼𑀨𑀼𑀮𑁆𑀮𑀫𑀼𑀧𑁆𑀧𑀮𑀁. 𑀬𑀣𑀸 𑀢𑀁 𑀅𑀫𑀦𑀼𑀲𑁆𑀲𑀲𑁂𑀯𑀺𑀢𑀦𑁆𑀢𑀺 𑀢𑀜𑁆𑀘 𑀭𑀓𑁆𑀔𑀲𑀧𑀭𑀺𑀕𑁆𑀕𑀳𑀺𑀢𑀸𑀬 𑀧𑁄𑀓𑁆𑀔𑀭𑀡𑀺𑀬𑀸 𑀚𑀸𑀢𑀢𑁆𑀢𑀸 𑀦𑀺𑀫𑁆𑀫𑀦𑀼𑀲𑁆𑀲𑁂𑀳𑀺 𑀲𑁂𑀯𑀺𑀢𑀁 𑀓𑁂𑀦𑀘𑀺 𑀅𑀧𑀭𑀺𑀪𑀼𑀢𑁆𑀢𑀫𑁂𑀯 𑀪𑀯𑁂𑀬𑁆𑀬. 𑀏𑀯𑀁 𑀢𑁆𑀯𑀁 𑀩𑁆𑀭𑀳𑁆𑀫𑀘𑀸𑀭𑀺𑀦𑀻𑀢𑀺 𑀏𑀯𑀫𑁂𑀯 𑀢𑀁 𑀲𑀼𑀝𑁆𑀞𑀼 𑀨𑀼𑀮𑁆𑀮𑀫𑀼𑀧𑁆𑀧𑀮𑀁 𑀯𑀺𑀬 𑀢𑀼𑀯𑀁 𑀩𑁆𑀭𑀳𑁆𑀫𑀘𑀸𑀭𑀺𑀦𑀻. 𑀲𑀓𑁂𑀲𑀗𑁆𑀕𑁂𑀲𑀼 𑀅𑀢𑁆𑀢𑀦𑁄 𑀲𑀭𑀻𑀭𑀸𑀯𑀬𑀯𑁂𑀲𑀼 𑀓𑁂𑀦𑀘𑀺 𑀅𑀧𑀭𑀺𑀪𑀼𑀢𑁆𑀢𑁂𑀲𑀼𑀬𑁂𑀯 𑀚𑀭𑀁 𑀕𑀫𑀺𑀲𑁆𑀲𑀲𑀺, 𑀫𑀼𑀥𑀸𑀬𑁂𑀯 𑀚𑀭𑀸𑀚𑀺𑀡𑁆𑀡𑀸 𑀪𑀯𑀺𑀲𑁆𑀲𑀲𑀺.

𑀏𑀯𑀁 𑀥𑀼𑀢𑁆𑀢𑀓𑁂𑀦 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑁂 𑀧𑀓𑀸𑀲𑀺𑀢𑁂 𑀣𑁂𑀭𑀻 𑀲𑀭𑀻𑀭𑀲𑀪𑀸𑀯𑀯𑀺𑀪𑀸𑀯𑀦𑁂𑀦 𑀢𑀁 𑀢𑀢𑁆𑀣 𑀯𑀺𑀘𑁆𑀙𑀺𑀦𑁆𑀤𑁂𑀦𑁆𑀢𑀻 ‘‘𑀓𑀺𑀁 𑀢𑁂 𑀇𑀥𑀸’’𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀆𑀯𑀼𑀲𑁄 𑀲𑀼𑀯𑀡𑁆𑀡𑀓𑀸𑀭𑀧𑀼𑀢𑁆𑀢, 𑀓𑁂𑀲𑀸𑀤𑀺𑀓𑀼𑀡𑀧𑀧𑀽𑀭𑁂 𑀏𑀓𑀦𑁆𑀢𑁂𑀦 𑀪𑁂𑀤𑀦𑀥𑀫𑁆𑀫𑁂 𑀲𑀼𑀲𑀸𑀦𑀯𑀟𑁆𑀠𑀦𑁂, 𑀇𑀥 𑀇𑀫𑀲𑁆𑀫𑀺𑀁 𑀓𑀸𑀬𑀲𑀜𑁆𑀜𑀺𑀢𑁂 𑀅𑀲𑀼𑀘𑀺𑀓𑀴𑁂𑀯𑀭𑁂 𑀓𑀺𑀁 𑀦𑀸𑀫 𑀢𑀯 𑀲𑀸𑀭𑀦𑁆𑀢𑀺 𑀲𑀫𑁆𑀫𑀢𑀁 𑀲𑀫𑁆𑀪𑀸𑀯𑀺𑀢𑀁, 𑀬𑀁 𑀤𑀺𑀲𑁆𑀯𑀸 𑀯𑀺𑀫𑀦𑁄 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀯𑀺𑀕𑀢𑀫𑀦𑀲𑀗𑁆𑀓𑀧𑁆𑀧𑁄, 𑀏𑀢𑁆𑀣𑁂𑀯 𑀯𑀸 𑀅𑀯𑀺𑀫𑀦𑁄 𑀲𑁄𑀫𑀦𑀲𑁆𑀲𑀺𑀓𑁄 𑀳𑀼𑀢𑁆𑀯𑀸 𑀉𑀤𑀺𑀓𑁆𑀔𑀲𑀺, 𑀢𑀁 𑀫𑀬𑁆𑀳𑀁 𑀓𑀣𑁂𑀳𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀥𑀼𑀢𑁆𑀢𑀓𑁄 𑀓𑀺𑀜𑁆𑀘𑀸𑀧𑀺 𑀢𑀲𑁆𑀲𑀸 𑀭𑀽𑀧𑀁 𑀘𑀸𑀢𑀼𑀭𑀺𑀬𑀲𑁄𑀪𑀺𑀢𑀁, 𑀧𑀞𑀫𑀤𑀲𑁆𑀲𑀦𑀢𑁄 𑀧𑀦 𑀧𑀝𑁆𑀞𑀸𑀬 𑀬𑀲𑁆𑀫𑀺𑀁 𑀤𑀺𑀝𑁆𑀞𑀺𑀧𑀸𑀢𑁂 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄, 𑀢𑀫𑁂𑀯 𑀅𑀧𑀤𑀺𑀲𑀦𑁆𑀢𑁄 ‘‘𑀅𑀓𑁆𑀔𑀻𑀦𑀺 𑀘 𑀢𑀽𑀭𑀺𑀬𑀸𑀭𑀺𑀯𑀸’’𑀢𑀺𑀆𑀤𑀺𑀫𑀸𑀳. 𑀓𑀸𑀫𑀜𑁆𑀘𑀸𑀬𑀁 𑀣𑁂𑀭𑀻 𑀲𑀼𑀝𑁆𑀞𑀼 𑀲𑀁𑀬𑀢𑀢𑀸𑀬 𑀲𑀦𑁆𑀢𑀺𑀦𑁆𑀤𑁆𑀭𑀺𑀬𑀸, 𑀢𑀸𑀬 𑀣𑀺𑀭𑀯𑀺𑀧𑁆𑀧𑀲𑀦𑁆𑀦𑀲𑁄𑀫𑁆𑀫𑀲𑀦𑁆𑀢𑀦𑀬𑀦𑀦𑀺𑀧𑀸𑀢𑁂𑀲𑀼 𑀓𑀫𑁆𑀫𑀸𑀦𑀼𑀪𑀸𑀯𑀦𑀺𑀧𑁆𑀨𑀦𑁆𑀦𑁂𑀲𑀼 𑀧𑀲𑀦𑁆𑀦𑀧𑀜𑁆𑀘𑀧𑁆𑀧𑀲𑀸𑀤𑀧𑀝𑀺𑀫𑀡𑁆𑀟𑀺𑀢𑁂𑀲𑀼 𑀦𑀬𑀦𑁂𑀲𑀼 𑀮𑀩𑁆𑀪𑀫𑀸𑀦𑁂 𑀧𑀪𑀸𑀯𑀺𑀲𑀺𑀝𑁆𑀞𑀘𑀸𑀢𑀼𑀭𑀺𑀬𑁂 𑀤𑀺𑀝𑁆𑀞𑀺𑀧𑀸𑀢𑁂, 𑀬𑀲𑁆𑀫𑀸 𑀲𑀬𑀁 𑀘𑀭𑀺𑀢𑀳𑀸𑀯𑀪𑀸𑀯𑀯𑀺𑀮𑀸𑀲𑀸𑀤𑀺𑀧𑀭𑀺𑀓𑀧𑁆𑀧𑀯𑀜𑁆𑀘𑀺𑀢𑁄 𑀲𑁄 𑀥𑀼𑀢𑁆𑀢𑁄 𑀚𑀸𑀢𑁄, 𑀢𑀲𑁆𑀫𑀸𑀲𑁆𑀲 𑀤𑀺𑀝𑁆𑀞𑀺𑀭𑀸𑀕𑁄 𑀲𑀯𑀺𑀲𑁂𑀲𑀁 𑀯𑁂𑀧𑀼𑀮𑁆𑀮𑀁 𑀅𑀕𑀫𑀸𑀲𑀺. 𑀢𑀢𑁆𑀣 𑀅𑀓𑁆𑀔𑀻𑀦𑀺 𑀘 𑀢𑀽𑀭𑀺𑀬𑀸𑀭𑀺𑀯𑀸𑀢𑀺 𑀢𑀽𑀭𑀺 𑀯𑀼𑀘𑁆𑀘𑀢𑀺 𑀫𑀺𑀕𑀻, 𑀘-𑀲𑀤𑁆𑀤𑁄 𑀦𑀺𑀧𑀸𑀢𑀫𑀢𑁆𑀢𑀁, 𑀫𑀺𑀕𑀘𑁆𑀙𑀸𑀧𑀸𑀬 𑀯𑀺𑀬 𑀢𑁂 𑀅𑀓𑁆𑀔𑀻𑀦𑀻𑀢𑀺 𑀅𑀢𑁆𑀣𑁄. ‘‘𑀓𑁄𑀭𑀺𑀬𑀸𑀭𑀺𑀯𑀸’’𑀢𑀺 𑀯𑀸 𑀧𑀸𑀴𑀺, 𑀓𑀼𑀜𑁆𑀘𑀓𑀸𑀭𑀓𑀼𑀓𑁆𑀓𑀼𑀝𑀺𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀺𑀦𑁆𑀦𑀭𑀺𑀬𑀸𑀭𑀺𑀯 𑀧𑀩𑁆𑀩𑀢𑀦𑁆𑀢𑀭𑁂𑀢𑀺 𑀧𑀩𑁆𑀩𑀢𑀓𑀼𑀘𑁆𑀙𑀺𑀬𑀁 𑀯𑀺𑀘𑀭𑀫𑀸𑀦𑀸𑀬 𑀓𑀺𑀦𑁆𑀦𑀭𑀺𑀯𑀦𑀺𑀢𑀸𑀬 𑀯𑀺𑀬 𑀘 𑀢𑁂 𑀅𑀓𑁆𑀔𑀻𑀦𑀻𑀢𑀺 𑀅𑀢𑁆𑀣𑁄. 𑀢𑀯 𑀫𑁂 𑀦𑀬𑀦𑀸𑀦𑀺 𑀤𑀓𑁆𑀔𑀺𑀬𑀸𑀢𑀺 𑀢𑀯 𑀯𑀼𑀢𑁆𑀢𑀕𑀼𑀡𑀯𑀺𑀲𑁂𑀲𑀸𑀦𑀺 𑀦𑀬𑀦𑀸𑀦𑀺 𑀤𑀺𑀲𑁆𑀯𑀸, 𑀪𑀺𑀬𑁆𑀬𑁄 𑀉𑀧𑀭𑀽𑀧𑀭𑀺 𑀫𑁂 𑀓𑀸𑀫𑀸𑀪𑀺𑀭𑀢𑀺 𑀧𑀯𑀟𑁆𑀠𑀢𑀺.

𑀉𑀧𑁆𑀧𑀮𑀲𑀺𑀔𑀭𑁄𑀧𑀫𑀸𑀦𑀺 𑀢𑁂𑀢𑀺 𑀭𑀢𑁆𑀢𑀼𑀧𑁆𑀧𑀮𑀅𑀕𑁆𑀕𑀲𑀤𑀺𑀲𑀸𑀦𑀺 𑀧𑀫𑁆𑀳𑀸𑀦𑀺 𑀢𑀯. 𑀯𑀺𑀫𑀮𑁂𑀢𑀺 𑀦𑀺𑀫𑁆𑀫𑀮𑁂. 𑀳𑀸𑀝𑀓𑀲𑀦𑁆𑀦𑀺𑀪𑁂𑀢𑀺 𑀓𑀜𑁆𑀘𑀦𑀭𑀽𑀧𑀓𑀲𑁆𑀲 𑀫𑀼𑀔𑀲𑀤𑀺𑀲𑁂 𑀢𑁂 𑀫𑀼𑀔𑁂, 𑀦𑀬𑀦𑀸𑀦𑀺 𑀤𑀓𑁆𑀔𑀺𑀬𑀸𑀢𑀺 𑀬𑁄𑀚𑀦𑀸.

𑀅𑀧𑀺 𑀤𑀽𑀭𑀕𑀢𑀸𑀢𑀺 𑀤𑀽𑀭𑀁 𑀞𑀸𑀦𑀁 𑀕𑀢𑀸𑀧𑀺. 𑀲𑀭𑀫𑁆𑀳𑀲𑁂𑀢𑀺 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀅𑀘𑀺𑀦𑁆𑀢𑁂𑀢𑁆𑀯𑀸 𑀢𑀯 𑀦𑀬𑀦𑀸𑀦𑀺 𑀏𑀯 𑀅𑀦𑀼𑀲𑁆𑀲𑀭𑀸𑀫𑀺. 𑀆𑀬𑀢𑀧𑀫𑁆𑀳𑁂𑀢𑀺 𑀤𑀻𑀖𑀧𑀔𑀼𑀫𑁂. 𑀯𑀺𑀲𑀼𑀤𑁆𑀥𑀤𑀲𑁆𑀲𑀦𑁂𑀢𑀺 𑀦𑀺𑀫𑁆𑀫𑀮𑀮𑁄𑀘𑀦𑁂. 𑀦 𑀳𑀺 𑀫𑀢𑁆𑀣𑀺 𑀢𑀬𑀸 𑀧𑀺𑀬𑀢𑁆𑀢𑀭𑁄 𑀦𑀬𑀦𑀸𑀢𑀺 𑀢𑀯 𑀦𑀬𑀦𑀢𑁄 𑀅𑀜𑁆𑀜𑁄 𑀓𑁄𑀘𑀺 𑀫𑀬𑁆𑀳𑀁 𑀧𑀺𑀬𑀢𑀭𑁄 𑀦𑀢𑁆𑀣𑀺. 𑀢𑀬𑀸𑀢𑀺 𑀳𑀺 𑀲𑀸𑀫𑀺𑀅𑀢𑁆𑀣𑁂 𑀏𑀯 𑀓𑀭𑀡𑀯𑀘𑀦𑀁.

𑀏𑀯𑀁 𑀘𑀓𑁆𑀔𑀼𑀲𑀫𑁆𑀧𑀢𑁆𑀢𑀺𑀬𑀸 𑀉𑀫𑁆𑀫𑀸𑀤𑀺𑀢𑀲𑁆𑀲 𑀯𑀺𑀬 𑀢𑀁 𑀢𑀁 𑀯𑀺𑀧𑁆𑀧𑀮𑀧𑀢𑁄 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀫𑀦𑁄𑀭𑀣𑀁 𑀯𑀺𑀧𑀭𑀺𑀯𑀢𑁆𑀢𑁂𑀦𑁆𑀢𑀻 𑀣𑁂𑀭𑀻 ‘‘𑀅𑀧𑀣𑁂𑀦𑀸’’𑀢𑀺𑀆𑀤𑀺𑀦𑀸 𑀤𑁆𑀯𑀸𑀤𑀲 𑀕𑀸𑀣𑀸 𑀅𑀪𑀸𑀲𑀺. 𑀢𑀢𑁆𑀣 𑀅𑀧𑀣𑁂𑀦 𑀧𑀬𑀸𑀢𑀼𑀫𑀺𑀘𑁆𑀙𑀲𑀻𑀢𑀺, 𑀆𑀯𑀼𑀲𑁄 𑀲𑀼𑀯𑀡𑁆𑀡𑀓𑀸𑀭𑀧𑀼𑀢𑁆𑀢, 𑀲𑀦𑁆𑀢𑁂 𑀅𑀜𑁆𑀜𑀲𑁆𑀫𑀺𑀁 𑀇𑀢𑁆𑀣𑀺𑀚𑀦𑁂 𑀬𑁄 𑀢𑁆𑀯𑀁 𑀩𑀼𑀤𑁆𑀥𑀲𑀼𑀢𑀁 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀑𑀭𑀲𑀥𑀻𑀢𑀭𑀁 𑀫𑀁 𑀫𑀕𑁆𑀕𑀬𑀲𑀺 𑀧𑀢𑁆𑀣𑁂𑀲𑀺, 𑀲𑁄 𑀢𑁆𑀯𑀁 𑀲𑀦𑁆𑀢𑁂 𑀔𑁂𑀫𑁂 𑀉𑀚𑀼𑀫𑀕𑁆𑀕𑁂 𑀅𑀧𑀣𑁂𑀦 𑀓𑀡𑁆𑀝𑀓𑀦𑀺𑀯𑀼𑀢𑁂𑀦 𑀲𑀪𑀬𑁂𑀦 𑀓𑀼𑀫𑁆𑀫𑀕𑁆𑀕𑁂𑀦 𑀧𑀬𑀸𑀢𑀼𑀫𑀺𑀘𑁆𑀙𑀲𑀺 𑀧𑀝𑀺𑀧𑀚𑁆𑀚𑀺𑀢𑀼𑀓𑀸𑀫𑁄𑀲𑀺, 𑀘𑀦𑁆𑀤𑀁 𑀓𑀻𑀴𑀦𑀓𑀁 𑀕𑀯𑁂𑀲𑀲𑀺 𑀘𑀦𑁆𑀤𑀫𑀡𑁆𑀟𑀮𑀁 𑀓𑀻𑀴𑀸𑀕𑁄𑀴𑀓𑀁 𑀓𑀸𑀢𑀼𑀓𑀸𑀫𑁄𑀲𑀺, 𑀫𑁂𑀭𑀼𑀁 𑀮𑀗𑁆𑀖𑁂𑀢𑀼𑀫𑀺𑀘𑁆𑀙𑀲𑀺 𑀘𑀢𑀼𑀭𑀸𑀲𑀻𑀢𑀺𑀬𑁄𑀚𑀦𑀲𑀳𑀲𑁆𑀲𑀼𑀩𑁆𑀩𑁂𑀥𑀁 𑀲𑀺𑀦𑁂𑀭𑀼𑀧𑀩𑁆𑀩𑀢𑀭𑀸𑀚𑀁 𑀮𑀗𑁆𑀖𑀬𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀞𑀸𑀢𑀼𑀓𑀸𑀫𑁄𑀲𑀺, 𑀲𑁄 𑀢𑁆𑀯𑀁 𑀫𑀁 𑀩𑀼𑀤𑁆𑀥𑀲𑀼𑀢𑀁 𑀫𑀕𑁆𑀕𑀬𑀲𑀻𑀢𑀺 𑀬𑁄𑀚𑀦𑀸.

𑀇𑀤𑀸𑀦𑀺 𑀢𑀲𑁆𑀲 𑀅𑀢𑁆𑀢𑀦𑁄 𑀅𑀯𑀺𑀲𑀬𑀪𑀸𑀯𑀁 𑀧𑀢𑁆𑀣𑀦𑀸𑀬 𑀘 𑀯𑀺𑀖𑀸𑀢𑀸𑀯𑀳𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀦𑀢𑁆𑀣𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀭𑀸𑀕𑁄 𑀬𑀢𑁆𑀣𑀧𑀺 𑀤𑀸𑀦𑀺 𑀫𑁂 𑀲𑀺𑀬𑀸𑀢𑀺 𑀬𑀢𑁆𑀣 𑀇𑀤𑀸𑀦𑀺 𑀫𑁂 𑀭𑀸𑀕𑁄 𑀲𑀺𑀬𑀸 𑀪𑀯𑁂𑀬𑁆𑀬, 𑀢𑀁 𑀆𑀭𑀫𑁆𑀫𑀡𑀁 𑀲𑀤𑁂𑀯𑀓𑁂 𑀮𑁄𑀓𑁂 𑀦𑀢𑁆𑀣𑀺 𑀏𑀯. 𑀦𑀧𑀺 𑀦𑀁 𑀚𑀸𑀦𑀸𑀫𑀺 𑀓𑀻𑀭𑀺𑀲𑁄𑀢𑀺 𑀦𑀁 𑀭𑀸𑀕𑀁 𑀓𑀻𑀭𑀺𑀲𑁄𑀢𑀺𑀧𑀺 𑀦 𑀚𑀸𑀦𑀸𑀫𑀺. 𑀅𑀣 𑀫𑀕𑁆𑀕𑁂𑀦 𑀳𑀢𑁄 𑀲𑀫𑀽𑀮𑀓𑁄𑀢𑀺 𑀅𑀣𑀸𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀗𑁆𑀔𑀸𑀢𑁂𑀦 𑀫𑀽𑀮𑁂𑀦 𑀲𑀫𑀽𑀮𑀓𑁄 𑀭𑀸𑀕𑁄 𑀅𑀭𑀺𑀬𑀫𑀕𑁆𑀕𑁂𑀦 𑀳𑀢𑁄 𑀲𑀫𑀼𑀕𑁆𑀖𑀸𑀢𑀺𑀢𑁄.

𑀇𑀗𑁆𑀕𑀸𑀮𑀓𑀼𑀬𑀸𑀢𑀺 𑀅𑀗𑁆𑀕𑀸𑀭𑀓𑀸𑀲𑀼𑀬𑀸. 𑀉𑀚𑁆𑀛𑀺𑀢𑁄𑀢𑀺 𑀯𑀸𑀢𑀼𑀓𑁆𑀔𑀺𑀢𑁆𑀢𑁄 𑀯𑀺𑀬 𑀬𑁄 𑀓𑁄𑀘𑀺, 𑀤𑀳𑀦𑀺𑀬𑀸 𑀇𑀦𑁆𑀥𑀦𑀁 𑀯𑀺𑀬𑀸𑀢𑀺 𑀅𑀢𑁆𑀣𑁄. 𑀯𑀺𑀲𑀧𑀢𑁆𑀢𑁄𑀭𑀺𑀯𑀸𑀢𑀺 𑀯𑀺𑀲𑀕𑀢𑀪𑀸𑀚𑀦𑀁 𑀯𑀺𑀬. 𑀅𑀕𑁆𑀕𑀺𑀢𑁄 𑀓𑀢𑁄𑀢𑀺 𑀅𑀕𑁆𑀕𑀺𑀢𑁄 𑀅𑀗𑁆𑀕𑀸𑀭𑀢𑁄 𑀅𑀧𑀕𑀢𑁄 𑀓𑀢𑁄, 𑀯𑀺𑀲𑀲𑁆𑀲 𑀮𑁂𑀲𑀫𑁆𑀧𑀺 𑀅𑀲𑁂𑀲𑁂𑀢𑁆𑀯𑀸 𑀅𑀧𑀦𑀻𑀢𑁄 𑀯𑀺𑀦𑀸𑀲𑀺𑀢𑁄𑀢𑀺 𑀅𑀢𑁆𑀣𑁄.

𑀬𑀲𑁆𑀲𑀸 𑀲𑀺𑀬𑀸 𑀅𑀧𑀘𑁆𑀘𑀯𑁂𑀓𑁆𑀔𑀺𑀢𑀦𑁆𑀢𑀺 𑀬𑀲𑁆𑀲𑀸 𑀇𑀢𑁆𑀣𑀺𑀬𑀸 𑀇𑀤𑀁 𑀔𑀦𑁆𑀥𑀧𑀜𑁆𑀘𑀓𑀁 𑀜𑀸𑀡𑁂𑀦 𑀅𑀧𑁆𑀧𑀝𑀺𑀯𑁂𑀓𑁆𑀔𑀺𑀢𑀁 𑀅𑀧𑀭𑀺𑀜𑁆𑀜𑀸𑀢𑀁 𑀲𑀺𑀬𑀸. 𑀲𑀢𑁆𑀢𑀸 𑀯𑀸 𑀅𑀦𑀼𑀲𑀸𑀲𑀺𑀢𑁄 𑀲𑀺𑀬𑀸𑀢𑀺 𑀲𑀢𑁆𑀢𑀸 𑀯𑀸 𑀥𑀫𑁆𑀫𑀲𑀭𑀻𑀭𑀲𑁆𑀲 𑀅𑀤𑀲𑁆𑀲𑀦𑁂𑀦 𑀬𑀲𑁆𑀲𑀸 𑀇𑀢𑁆𑀣𑀺𑀬𑀸 𑀅𑀦𑀦𑀼𑀲𑀸𑀲𑀺𑀢𑁄 𑀲𑀺𑀬𑀸. 𑀢𑁆𑀯𑀁 𑀢𑀸𑀤𑀺𑀲𑀺𑀓𑀁 𑀧𑀮𑁄𑀪𑀬𑀸𑀢𑀺, 𑀆𑀯𑀼𑀲𑁄, 𑀢𑁆𑀯𑀁 𑀢𑀣𑀸𑀭𑀽𑀧𑀁 𑀅𑀧𑀭𑀺𑀫𑀤𑁆𑀤𑀺𑀢𑀲𑀗𑁆𑀔𑀸𑀭𑀁 𑀅𑀧𑀘𑁆𑀘𑀯𑁂𑀓𑁆𑀔𑀺𑀢𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀓𑀸𑀫𑁂𑀳𑀺 𑀧𑀮𑁄𑀪𑀬 𑀉𑀧𑀕𑀘𑁆𑀙. 𑀚𑀸𑀦𑀦𑁆𑀢𑀺𑀁 𑀲𑁄 𑀇𑀫𑀁 𑀯𑀺𑀳𑀜𑁆𑀜𑀲𑀻𑀢𑀺 𑀲𑁄 𑀢𑁆𑀯𑀁 𑀧𑀯𑀢𑁆𑀢𑀺𑀁 𑀦𑀺𑀯𑀢𑁆𑀢𑀺𑀜𑁆𑀘 𑀬𑀸𑀣𑀸𑀯𑀢𑁄 𑀚𑀸𑀦𑀦𑁆𑀢𑀺𑀁 𑀧𑀝𑀺𑀯𑀺𑀤𑁆𑀥𑀲𑀘𑁆𑀘𑀁 𑀇𑀫𑀁 𑀲𑀼𑀪𑀁 𑀪𑀺𑀓𑁆𑀔𑀼𑀦𑀺𑀁 𑀆𑀕𑀫𑁆𑀫 𑀯𑀺𑀳𑀜𑁆𑀜𑀲𑀺, 𑀲𑀫𑁆𑀧𑀢𑀺 𑀆𑀬𑀢𑀺𑀜𑁆𑀘 𑀯𑀺𑀖𑀸𑀢𑀁 𑀤𑀼𑀓𑁆𑀔𑀁 𑀆𑀧𑀚𑁆𑀚𑀲𑀺.

𑀇𑀤𑀸𑀦𑀺𑀲𑁆𑀲 𑀯𑀺𑀖𑀸𑀢𑀸𑀧𑀢𑁆𑀢𑀺𑀢𑀁 𑀓𑀸𑀭𑀡𑀯𑀺𑀪𑀸𑀯𑀦𑁂𑀦 𑀤𑀲𑁆𑀲𑁂𑀦𑁆𑀢𑀻 ‘‘𑀫𑀬𑁆𑀳𑀁 𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀳𑀻𑀢𑀺 𑀳𑁂𑀢𑀼𑀅𑀢𑁆𑀣𑁂 𑀦𑀺𑀧𑀸𑀢𑁄. 𑀅𑀓𑁆𑀓𑀼𑀝𑁆𑀞𑀯𑀦𑁆𑀤𑀺𑀢𑁂𑀢𑀺 𑀅𑀓𑁆𑀓𑁄𑀲𑁂 𑀯𑀦𑁆𑀤𑀦𑀸𑀬 𑀘. 𑀲𑀼𑀔𑀤𑀼𑀓𑁆𑀔𑁂𑀢𑀺 𑀲𑀼𑀔𑁂 𑀘 𑀤𑀼𑀓𑁆𑀔𑁂 𑀘, 𑀇𑀝𑁆𑀞𑀸𑀦𑀺𑀝𑁆𑀞𑀯𑀺𑀲𑀬𑀲𑀫𑀸𑀬𑁄𑀕𑁂 𑀯𑀸. 𑀲𑀢𑀻 𑀉𑀧𑀝𑁆𑀞𑀺𑀢𑀸𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀬𑀼𑀢𑁆𑀢𑀸 𑀲𑀢𑀺 𑀲𑀩𑁆𑀩𑀓𑀸𑀮𑀁 𑀉𑀧𑀝𑁆𑀞𑀺𑀢𑀸. 𑀲𑀗𑁆𑀔𑀢𑀫𑀲𑀼𑀪𑀦𑁆𑀢𑀺 𑀚𑀸𑀦𑀺𑀬𑀸𑀢𑀺 𑀢𑁂𑀪𑀽𑀫𑀓𑀁 𑀲𑀗𑁆𑀔𑀸𑀭𑀕𑀢𑀁 𑀓𑀺𑀮𑁂𑀲𑀸𑀲𑀼𑀘𑀺𑀧𑀕𑁆𑀖𑀭𑀡𑁂𑀦 𑀅𑀲𑀼𑀪𑀦𑁆𑀢𑀺 𑀜𑀢𑁆𑀯𑀸. 𑀲𑀩𑁆𑀩𑀢𑁆𑀣𑁂𑀯𑀸𑀢𑀺 𑀲𑀩𑁆𑀩𑀲𑁆𑀫𑀺𑀁𑀬𑁂𑀯 𑀪𑀯𑀢𑁆𑀢𑀬𑁂 𑀫𑀬𑁆𑀳𑀁 𑀫𑀦𑁄 𑀢𑀡𑁆𑀳𑀸𑀮𑁂𑀧𑀸𑀤𑀺𑀦𑀸 𑀦 𑀉𑀧𑀮𑀺𑀫𑁆𑀧𑀢𑀺.

𑀫𑀕𑁆𑀕𑀝𑁆𑀞𑀗𑁆𑀕𑀺𑀓𑀬𑀸𑀦𑀬𑀸𑀬𑀺𑀦𑀻𑀢𑀺 𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑀲𑀗𑁆𑀔𑀸𑀢𑁂𑀦 𑀅𑀭𑀺𑀬𑀬𑀸𑀦𑁂𑀦 𑀦𑀺𑀩𑁆𑀩𑀸𑀦𑀧𑀼𑀭𑀁 𑀬𑀸𑀬𑀺𑀦𑀻 𑀉𑀧𑀕𑀢𑀸. 𑀉𑀤𑁆𑀥𑀝𑀲𑀮𑁆𑀮𑀸𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑀢𑁄 𑀲𑀫𑀼𑀤𑁆𑀥𑀝𑀭𑀸𑀕𑀸𑀤𑀺𑀲𑀮𑁆𑀮𑀸.

𑀲𑀼𑀘𑀺𑀢𑁆𑀢𑀺𑀢𑀸𑀢𑀺 𑀳𑀢𑁆𑀣𑀧𑀸𑀤𑀫𑀼𑀔𑀸𑀤𑀺𑀆𑀓𑀸𑀭𑁂𑀦 𑀲𑀼𑀝𑁆𑀞𑀼 𑀘𑀺𑀢𑁆𑀢𑀺𑀢𑀸 𑀯𑀺𑀭𑀘𑀺𑀢𑀸. 𑀲𑁄𑀫𑁆𑀪𑀸𑀢𑀺 𑀲𑀼𑀫𑁆𑀪𑀓𑀸. 𑀤𑀸𑀭𑀼𑀓𑀧𑀺𑀮𑁆𑀮𑀓𑀸𑀦𑀺 𑀯𑀸𑀢𑀺 𑀤𑀸𑀭𑀼𑀤𑀡𑁆𑀟𑀸𑀤𑀻𑀳𑀺 𑀉𑀧𑀭𑀘𑀺𑀢𑀭𑀽𑀧𑀓𑀸𑀦𑀺. 𑀢𑀦𑁆𑀢𑀻𑀳𑀻𑀢𑀺 𑀦𑁆𑀳𑀸𑀭𑀼𑀲𑀼𑀢𑁆𑀢𑀓𑁂𑀳𑀺. 𑀔𑀻𑀮𑀓𑁂𑀳𑀻𑀢𑀺 𑀳𑀢𑁆𑀣𑀧𑀸𑀤𑀧𑀺𑀝𑁆𑀞𑀺𑀓𑀡𑁆𑀡𑀸𑀤𑀺𑀅𑀢𑁆𑀣𑀸𑀬 𑀞𑀧𑀺𑀢𑀤𑀡𑁆𑀟𑁂𑀳𑀺. 𑀯𑀺𑀦𑀺𑀩𑀤𑁆𑀥𑀸𑀢𑀺 𑀯𑀺𑀯𑀺𑀥𑁂𑀦𑀸𑀓𑀸𑀭𑁂𑀦 𑀩𑀤𑁆𑀥𑀸. 𑀯𑀺𑀯𑀺𑀥𑀁 𑀧𑀦𑀘𑁆𑀘𑀓𑀸𑀢𑀺 𑀬𑀦𑁆𑀢𑀲𑀼𑀢𑁆𑀢𑀸𑀤𑀻𑀦𑀁 𑀅𑀜𑁆𑀙𑀦𑀯𑀺𑀲𑁆𑀲𑀚𑁆𑀚𑀦𑀸𑀤𑀺𑀦𑀸 𑀧𑀝𑁆𑀞𑀧𑀺𑀢𑀦𑀘𑁆𑀘𑀓𑀸, 𑀧𑀦𑀘𑁆𑀘𑀦𑁆𑀢𑀸 𑀯𑀺𑀬 𑀤𑀺𑀝𑁆𑀞𑀸𑀢𑀺 𑀬𑁄𑀚𑀦𑀸.

𑀢𑀫𑁆𑀳𑀼𑀤𑁆𑀥𑀝𑁂 𑀢𑀦𑁆𑀢𑀺𑀔𑀻𑀮𑀓𑁂𑀢𑀺 𑀲𑀦𑁆𑀦𑀺𑀯𑁂𑀲𑀯𑀺𑀲𑀺𑀝𑁆𑀞𑀭𑀘𑀦𑀸𑀯𑀺𑀲𑁂𑀲𑀬𑀼𑀢𑁆𑀢𑀁 𑀉𑀧𑀸𑀤𑀸𑀬 𑀭𑀽𑀧𑀓𑀲𑀫𑀜𑁆𑀜𑀸 𑀢𑀫𑁆𑀳𑀺 𑀢𑀦𑁆𑀢𑀺𑀫𑁆𑀳𑀺 𑀔𑀻𑀮𑀓𑁂 𑀘 𑀞𑀸𑀦𑀢𑁄 𑀉𑀤𑁆𑀥𑀝𑁂 𑀩𑀦𑁆𑀥𑀦𑁆𑀢𑁄 𑀯𑀺𑀲𑁆𑀲𑀝𑁆𑀞𑁂, 𑀯𑀺𑀲𑀼𑀁 𑀓𑀭𑀡𑁂𑀦 𑀅𑀜𑁆𑀜𑀫𑀜𑁆𑀜𑀁 𑀯𑀺𑀓𑀮𑁂, 𑀢𑀳𑀺𑀁 𑀢𑀳𑀺𑀁 𑀔𑀺𑀧𑀦𑁂𑀦 𑀧𑀭𑀺𑀓𑁆𑀭𑀺𑀢𑁂 𑀯𑀺𑀓𑀺𑀭𑀺𑀢𑁂. 𑀦 𑀯𑀺𑀦𑁆𑀤𑁂𑀬𑁆𑀬 𑀔𑀡𑁆𑀟𑀲𑁄 𑀓𑀢𑁂𑀢𑀺 𑀧𑁄𑀢𑁆𑀣𑀓𑀭𑀽𑀧𑀲𑁆𑀲 𑀅𑀯𑀬𑀯𑁂 𑀔𑀡𑁆𑀟𑀸𑀔𑀡𑁆𑀟𑀺𑀢𑁂 𑀓𑀢𑁂 𑀧𑁄𑀢𑁆𑀣𑀓𑀭𑀽𑀧𑀁 𑀦 𑀯𑀺𑀦𑁆𑀤𑁂𑀬𑁆𑀬, 𑀦 𑀉𑀧𑀮𑀪𑁂𑀬𑁆𑀬. 𑀏𑀯𑀁 𑀲𑀦𑁆𑀢𑁂 𑀓𑀺𑀫𑁆𑀳𑀺 𑀢𑀢𑁆𑀣 𑀫𑀦𑀁 𑀦𑀺𑀯𑁂𑀲𑀬𑁂 𑀢𑀲𑁆𑀫𑀺𑀁 𑀧𑁄𑀢𑁆𑀣𑀓𑀭𑀽𑀧𑀸𑀯𑀬𑀯𑁂 𑀓𑀺𑀫𑁆𑀳𑀺 𑀓𑀺𑀁 𑀔𑀸𑀡𑀼𑀓𑁂, 𑀉𑀤𑀸𑀳𑀼 𑀭𑀚𑁆𑀚𑀼𑀓𑁂, 𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑀸𑀤𑀺𑀓𑁂 𑀯𑀸 𑀫𑀦𑀁 𑀫𑀦𑀲𑀜𑁆𑀜𑀁 𑀦𑀺𑀯𑁂𑀲𑁂𑀬𑁆𑀬, 𑀯𑀺𑀲𑀗𑁆𑀔𑀸𑀭𑁂 𑀅𑀯𑀬𑀯𑁂 𑀲𑀸 𑀲𑀜𑁆𑀜𑀸 𑀓𑀤𑀸𑀘𑀺𑀧𑀺 𑀦𑀧𑀢𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀢𑀣𑀽𑀧𑀫𑀸𑀢𑀺 𑀢𑀁𑀲𑀤𑀺𑀲𑀸 𑀢𑁂𑀦 𑀧𑁄𑀢𑁆𑀣𑀓𑀭𑀽𑀧𑁂𑀦 𑀲𑀤𑀺𑀲𑀸. 𑀓𑀺𑀦𑁆𑀢𑀺 𑀘𑁂 𑀆𑀳 ‘‘𑀤𑁂𑀳𑀓𑀸𑀦𑀻’’𑀢𑀺𑀆𑀤𑀺. 𑀢𑀢𑁆𑀣 𑀤𑁂𑀳𑀓𑀸𑀦𑀻𑀢𑀺 𑀳𑀢𑁆𑀣𑀧𑀸𑀤𑀫𑀼𑀔𑀸𑀤𑀺𑀤𑁂𑀳𑀸𑀯𑀬𑀯𑀸. 𑀫𑀦𑁆𑀢𑀺 𑀫𑁂 𑀧𑀝𑀺𑀩𑀤𑁆𑀥𑀸 𑀉𑀧𑀝𑁆𑀞𑀳𑀦𑁆𑀢𑀺. 𑀢𑁂𑀳𑀺 𑀥𑀫𑁆𑀫𑁂𑀳𑀻𑀢𑀺 𑀢𑁂𑀳𑀺 𑀧𑀣𑀯𑀺𑀆𑀤𑀻𑀳𑀺 𑀘 𑀘𑀓𑁆𑀔𑀸𑀤𑀻𑀳𑀺 𑀘 𑀥𑀫𑁆𑀫𑁂𑀳𑀺. 𑀯𑀺𑀦𑀸 𑀦 𑀯𑀢𑁆𑀢𑀦𑁆𑀢𑀻𑀢𑀺 𑀦 𑀳𑀺 𑀢𑀣𑀸 𑀢𑀣𑀸 𑀲𑀦𑁆𑀦𑀺𑀯𑀺𑀝𑁆𑀞𑁂 𑀧𑀣𑀯𑀺𑀆𑀤𑀺𑀥𑀫𑁆𑀫𑁂 𑀫𑀼𑀜𑁆𑀘𑀺𑀢𑁆𑀯𑀸 𑀤𑁂𑀳𑀸 𑀦𑀸𑀫 𑀲𑀦𑁆𑀢𑀺. 𑀥𑀫𑁆𑀫𑁂𑀳𑀺 𑀯𑀺𑀦𑀸 𑀦 𑀯𑀢𑁆𑀢𑀢𑀻𑀢𑀺 𑀤𑁂𑀳𑁄 𑀅𑀯𑀬𑀯𑁂𑀳𑀺 𑀅𑀯𑀬𑀯𑀥𑀫𑁆𑀫𑁂𑀳𑀺 𑀯𑀺𑀦𑀸 𑀦 𑀯𑀢𑁆𑀢𑀢𑀺 𑀦 𑀉𑀧𑀮𑀩𑁆𑀪𑀢𑀺. 𑀏𑀯𑀁 𑀲𑀦𑁆𑀢𑁂 𑀓𑀺𑀫𑁆𑀳𑀺 𑀢𑀢𑁆𑀣 𑀫𑀦𑀁 𑀦𑀺𑀯𑁂𑀲𑀬𑁂𑀢𑀺 𑀓𑀺𑀫𑁆𑀳𑀺 𑀓𑀺𑀁 𑀧𑀣𑀯𑀺𑀬𑀁, 𑀉𑀤𑀸𑀳𑀼 𑀆𑀧𑀸𑀤𑀺𑀓𑁂 𑀤𑁂𑀳𑁄𑀢𑀺 𑀯𑀸 𑀳𑀢𑁆𑀣𑀧𑀸𑀤𑀸𑀤𑀻𑀦𑀻𑀢𑀺 𑀯𑀸 𑀫𑀦𑀁 𑀫𑀦𑀲𑀜𑁆𑀜𑀁 𑀦𑀺𑀯𑁂𑀲𑁂𑀬𑁆𑀬. 𑀬𑀲𑁆𑀫𑀸 𑀧𑀣𑀯𑀺𑀆𑀤𑀺𑀧𑀲𑀸𑀤𑀥𑀫𑁆𑀫𑀫𑀢𑁆𑀢𑁂 𑀏𑀲𑀸 𑀲𑀫𑀜𑁆𑀜𑀸, 𑀬𑀤𑀺𑀤𑀁 𑀤𑁂𑀳𑁄𑀢𑀺 𑀯𑀸 𑀳𑀢𑁆𑀣𑀧𑀸𑀤𑀸𑀤𑀻𑀦𑀻𑀢𑀺 𑀯𑀸 𑀲𑀢𑁆𑀢𑁄𑀢𑀺 𑀯𑀸 𑀇𑀢𑁆𑀣𑀻𑀢𑀺 𑀯𑀸 𑀧𑀼𑀭𑀺𑀲𑁄𑀢𑀺 𑀯𑀸, 𑀢𑀲𑁆𑀫𑀸 𑀦 𑀏𑀢𑁆𑀣 𑀚𑀸𑀦𑀢𑁄 𑀓𑁄𑀘𑀺 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀻𑀢𑀺.

𑀬𑀣𑀸 𑀳𑀭𑀺𑀢𑀸𑀮𑁂𑀦 𑀫𑀓𑁆𑀔𑀺𑀢𑀁, 𑀅𑀤𑁆𑀤𑀲 𑀘𑀺𑀢𑁆𑀢𑀺𑀓𑀁 𑀪𑀺𑀢𑁆𑀢𑀺𑀬𑀸 𑀓𑀢𑀦𑁆𑀢𑀺 𑀬𑀣𑀸 𑀓𑀼𑀲𑀮𑁂𑀦 𑀘𑀺𑀢𑁆𑀢𑀓𑀸𑀭𑁂𑀦 𑀪𑀺𑀢𑁆𑀢𑀺𑀬𑀁 𑀳𑀭𑀺𑀢𑀸𑀮𑁂𑀦 𑀫𑀓𑁆𑀔𑀺𑀢𑀁 𑀮𑀺𑀢𑁆𑀢𑀁 𑀢𑁂𑀦 𑀮𑁂𑀧𑀁 𑀤𑀢𑁆𑀯𑀸 𑀓𑀢𑀁 𑀆𑀮𑀺𑀔𑀺𑀢𑀁 𑀘𑀺𑀢𑁆𑀢𑀺𑀓𑀁 𑀇𑀢𑁆𑀣𑀺𑀭𑀽𑀧𑀁 𑀅𑀤𑁆𑀤𑀲 𑀧𑀲𑁆𑀲𑁂𑀬𑁆𑀬. 𑀢𑀢𑁆𑀣 𑀬𑀸 𑀉𑀧𑀣𑀫𑁆𑀪𑀦𑀔𑁂𑀧𑀦𑀸𑀤𑀺𑀓𑀺𑀭𑀺𑀬𑀸𑀲𑀫𑁆𑀧𑀢𑁆𑀢𑀺𑀬𑀸 𑀫𑀸𑀦𑀼𑀲𑀺𑀓𑀸 𑀦𑀼 𑀔𑁄 𑀅𑀬𑀁 𑀪𑀺𑀢𑁆𑀢𑀺 𑀅𑀧𑀲𑁆𑀲𑀸𑀬 𑀞𑀺𑀢𑀸𑀢𑀺 𑀲𑀜𑁆𑀜𑀸, 𑀲𑀸 𑀦𑀺𑀭𑀢𑁆𑀣𑀓𑀸 𑀫𑀦𑀼𑀲𑁆𑀲𑀪𑀸𑀯𑀲𑀗𑁆𑀔𑀸𑀢𑀲𑁆𑀲 𑀅𑀢𑁆𑀣𑀲𑁆𑀲 𑀢𑀢𑁆𑀣 𑀅𑀪𑀸𑀯𑀢𑁄, 𑀫𑀸𑀦𑀼𑀲𑀻𑀢𑀺 𑀧𑀦 𑀓𑁂𑀯𑀮𑀁 𑀢𑀳𑀺𑀁 𑀢𑀲𑁆𑀲 𑀘 𑀯𑀺𑀧𑀭𑀻𑀢𑀤𑀲𑁆𑀲𑀦𑀁, 𑀬𑀸𑀣𑀸𑀯𑀢𑁄 𑀕𑀳𑀡𑀁 𑀦 𑀳𑁄𑀢𑀺, 𑀥𑀫𑁆𑀫𑀧𑀼𑀜𑁆𑀚𑀫𑀢𑁆𑀢𑁂 𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀺𑀕𑀳𑀡𑀫𑁆𑀧𑀺 𑀏𑀯𑀁 𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀫𑀸𑀬𑀁 𑀯𑀺𑀬 𑀅𑀕𑁆𑀕𑀢𑁄 𑀓𑀢𑀦𑁆𑀢𑀺 𑀫𑀸𑀬𑀸𑀓𑀸𑀭𑁂𑀦 𑀧𑀼𑀭𑀢𑁄 𑀉𑀧𑀝𑁆𑀞𑀸𑀧𑀺𑀢𑀁 𑀫𑀸𑀬𑀸𑀲𑀤𑀺𑀲𑀁. 𑀲𑀼𑀧𑀺𑀦𑀦𑁆𑀢𑁂𑀯 𑀲𑀼𑀯𑀡𑁆𑀡𑀧𑀸𑀤𑀧𑀦𑁆𑀢𑀺 𑀲𑀼𑀧𑀺𑀦𑀫𑁂𑀯 𑀲𑀼𑀧𑀺𑀦𑀦𑁆𑀢𑀁, 𑀢𑀢𑁆𑀣 𑀉𑀧𑀝𑁆𑀞𑀺𑀢𑀲𑀼𑀯𑀡𑁆𑀡𑀫𑀬𑀭𑀼𑀓𑁆𑀔𑀁 𑀯𑀺𑀬. 𑀉𑀧𑀕𑀘𑁆𑀙𑀲𑀺 𑀅𑀦𑁆𑀥 𑀭𑀺𑀢𑁆𑀢𑀓𑀦𑁆𑀢𑀺 𑀅𑀦𑁆𑀥𑀩𑀸𑀮 𑀭𑀺𑀢𑁆𑀢𑀓𑀁 𑀢𑀼𑀘𑁆𑀙𑀓𑀁 𑀅𑀦𑁆𑀢𑁄𑀲𑀸𑀭𑀭𑀳𑀺𑀢𑀁 𑀇𑀫𑀁 𑀅𑀢𑁆𑀢𑀪𑀸𑀯𑀁 ‘‘𑀏𑀢𑀁 𑀫𑀫𑀸’’𑀢𑀺 𑀲𑀸𑀭𑀯𑀦𑁆𑀢𑀁 𑀯𑀺𑀬 𑀉𑀧𑀕𑀘𑁆𑀙𑀲𑀺 𑀅𑀪𑀺𑀦𑀺𑀯𑀺𑀲𑀲𑀺. 𑀚𑀦𑀫𑀚𑁆𑀛𑁂𑀭𑀺𑀯 𑀭𑀼𑀧𑁆𑀧𑀭𑀽𑀧𑀓𑀦𑁆𑀢𑀺 𑀫𑀸𑀬𑀸𑀓𑀸𑀭𑁂𑀦 𑀫𑀳𑀸𑀚𑀦𑀫𑀚𑁆𑀛𑁂 𑀤𑀲𑁆𑀲𑀺𑀢𑀁 𑀭𑀽𑀧𑀺𑀬𑀭𑀽𑀧𑀲𑀤𑀺𑀲𑀁 𑀲𑀸𑀭𑀁 𑀯𑀺𑀬 𑀉𑀧𑀝𑁆𑀞𑀳𑀦𑁆𑀢𑀁, 𑀅𑀲𑀸𑀭𑀦𑁆𑀢𑀺 𑀅𑀢𑁆𑀣𑁄.

𑀯𑀝𑁆𑀝𑀦𑀺𑀭𑀺𑀯𑀸𑀢𑀺 𑀮𑀸𑀔𑀸𑀬 𑀕𑀼𑀴𑀺𑀓𑀸 𑀯𑀺𑀬. 𑀓𑁄𑀝𑀭𑁄𑀳𑀺𑀢𑀸𑀢𑀺 𑀓𑁄𑀝𑀭𑁂 𑀭𑀼𑀓𑁆𑀔𑀲𑀼𑀲𑀺𑀭𑁂 𑀞𑀧𑀺𑀢𑀸. 𑀫𑀚𑁆𑀛𑁂 𑀧𑀼𑀩𑁆𑀩𑀼𑀴𑀓𑀸𑀢𑀺 𑀅𑀓𑁆𑀔𑀺𑀤𑀮𑀫𑀚𑁆𑀛𑁂 𑀞𑀺𑀢𑀚𑀮𑀧𑀼𑀩𑁆𑀩𑀼𑀴𑀲𑀤𑀺𑀲𑀸. 𑀲𑀅𑀲𑁆𑀲𑀼𑀓𑀸𑀢𑀺 𑀅𑀲𑁆𑀲𑀼𑀚𑀮𑀲𑀳𑀺𑀢𑀸. 𑀧𑀻𑀴𑀓𑁄𑀴𑀺𑀓𑀸𑀢𑀺 𑀅𑀓𑁆𑀔𑀺𑀕𑀽𑀣𑀓𑁄. 𑀏𑀢𑁆𑀣 𑀚𑀸𑀬𑀢𑀻𑀢𑀺 𑀏𑀢𑀲𑁆𑀫𑀺𑀁 𑀅𑀓𑁆𑀔𑀺𑀫𑀡𑁆𑀟𑀮𑁂 𑀉𑀪𑁄𑀲𑀼 𑀓𑁄𑀝𑀻𑀲𑀼 𑀯𑀺𑀲𑀕𑀦𑁆𑀥𑀁 𑀯𑀸𑀬𑀦𑁆𑀢𑁄 𑀦𑀺𑀩𑁆𑀩𑀢𑁆𑀢𑀢𑀺. 𑀧𑀻𑀴𑀓𑁄𑀴𑀺𑀓𑀸𑀢𑀺 𑀯𑀸 𑀅𑀓𑁆𑀔𑀺𑀤𑀮𑁂𑀲𑀼 𑀦𑀺𑀩𑁆𑀩𑀢𑁆𑀢𑀦𑀓𑀸 𑀧𑀻𑀴𑀓𑀸 𑀯𑀼𑀘𑁆𑀘𑀢𑀺. 𑀯𑀺𑀯𑀺𑀥𑀸𑀢𑀺 𑀲𑁂𑀢𑀦𑀻𑀮𑀫𑀡𑁆𑀟𑀮𑀸𑀦𑀜𑁆𑀘𑁂𑀯 𑀭𑀢𑁆𑀢𑀧𑀻𑀢𑀸𑀤𑀻𑀦𑀁 𑀲𑀢𑁆𑀢𑀦𑁆𑀦𑀁 𑀧𑀝𑀮𑀸𑀦𑀜𑁆𑀘 𑀯𑀲𑁂𑀦 𑀅𑀦𑁂𑀓𑀯𑀺𑀥𑀸. 𑀘𑀓𑁆𑀔𑀼𑀯𑀺𑀥𑀸𑀢𑀺 𑀘𑀓𑁆𑀔𑀼𑀪𑀸𑀕𑀸 𑀘𑀓𑁆𑀔𑀼𑀧𑁆𑀧𑀓𑀸𑀭𑀸 𑀯𑀸 𑀢𑀲𑁆𑀲 𑀅𑀦𑁂𑀓𑀓𑀮𑀸𑀧𑀕𑀢𑀪𑀸𑀯𑀢𑁄. 𑀧𑀺𑀡𑁆𑀟𑀺𑀢𑀸𑀢𑀺 𑀲𑀫𑀼𑀤𑀺𑀢𑀸.

𑀏𑀯𑀁 𑀘𑀓𑁆𑀔𑀼𑀲𑁆𑀫𑀺𑀁 𑀲𑀸𑀭𑀚𑁆𑀚𑀦𑁆𑀢𑀲𑁆𑀲 𑀘𑀓𑁆𑀔𑀼𑀦𑁄 𑀅𑀲𑀼𑀪𑀢𑀁 𑀅𑀦𑀯𑀝𑁆𑀞𑀺𑀢𑀢𑀸𑀬 𑀅𑀦𑀺𑀘𑁆𑀘𑀢𑀜𑁆𑀘 𑀯𑀺𑀪𑀸𑀯𑁂𑀲𑀺. 𑀯𑀺𑀪𑀸𑀯𑁂𑀢𑁆𑀯𑀸 𑀘 𑀬𑀣𑀸 𑀦𑀸𑀫 𑀓𑁄𑀘𑀺 𑀮𑁄𑀪𑀦𑀻𑀬𑀁 𑀪𑀡𑁆𑀟𑀁 𑀕𑀳𑁂𑀢𑁆𑀯𑀸 𑀘𑁄𑀭𑀓𑀦𑁆𑀢𑀸𑀭𑀁 𑀧𑀝𑀺𑀧𑀚𑁆𑀚𑀦𑁆𑀢𑁄 𑀘𑁄𑀭𑁂𑀳𑀺 𑀧𑀮𑀺𑀩𑀼𑀤𑁆𑀥𑁄 𑀢𑀁 𑀮𑁄𑀪𑀦𑀻𑀬𑀪𑀡𑁆𑀟𑀁 𑀤𑀢𑁆𑀯𑀸 𑀕𑀘𑁆𑀙𑀢𑀺, 𑀏𑀯𑀫𑁂𑀯 𑀘𑀓𑁆𑀔𑀼𑀫𑁆𑀳𑀺 𑀲𑀸𑀭𑀢𑁆𑀢𑁂𑀦 𑀢𑁂𑀦 𑀧𑀼𑀭𑀺𑀲𑁂𑀦 𑀧𑀮𑀺𑀩𑀼𑀤𑁆𑀥𑀸 𑀣𑁂𑀭𑀻 𑀅𑀢𑁆𑀢𑀦𑁄 𑀘𑀓𑁆𑀔𑀼𑀁 𑀉𑀧𑁆𑀧𑀸𑀝𑁂𑀢𑁆𑀯𑀸 𑀢𑀲𑁆𑀲 𑀅𑀤𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀉𑀧𑁆𑀧𑀸𑀝𑀺𑀬 𑀘𑀸𑀭𑀼𑀤𑀲𑁆𑀲𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀉𑀧𑁆𑀧𑀸𑀝𑀺𑀬𑀸𑀢𑀺 𑀉𑀧𑁆𑀧𑀸𑀝𑁂𑀢𑁆𑀯𑀸 𑀘𑀓𑁆𑀔𑀼𑀓𑀽𑀧𑀢𑁄 𑀦𑀻𑀳𑀭𑀺𑀢𑁆𑀯𑀸. 𑀘𑀸𑀭𑀼𑀤𑀲𑁆𑀲𑀦𑀸𑀢𑀺 𑀧𑀺𑀬𑀤𑀲𑁆𑀲𑀦𑀸 𑀫𑀦𑁄𑀳𑀭𑀤𑀲𑁆𑀲𑀦𑀸. 𑀦 𑀘 𑀧𑀚𑁆𑀚𑀺𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀘𑀓𑁆𑀔𑀼𑀲𑁆𑀫𑀺𑀁 𑀲𑀗𑁆𑀕𑀁 𑀦𑀸𑀧𑀚𑁆𑀚𑀺. 𑀅𑀲𑀗𑁆𑀕𑀫𑀸𑀦𑀲𑀸𑀢𑀺 𑀓𑀢𑁆𑀣𑀘𑀺𑀧𑀺 𑀆𑀭𑀫𑁆𑀫𑀡𑁂 𑀅𑀦𑀸𑀲𑀢𑁆𑀢𑀘𑀺𑀢𑁆𑀢𑀸. 𑀳𑀦𑁆𑀤 𑀢𑁂 𑀘𑀓𑁆𑀔𑀼𑀦𑁆𑀢𑀺 𑀢𑀬𑀸 𑀓𑀸𑀫𑀺𑀢𑀁 𑀢𑀢𑁄 𑀏𑀯 𑀫𑀬𑀸 𑀤𑀺𑀦𑁆𑀦𑀢𑁆𑀢𑀸 𑀢𑁂 𑀘𑀓𑁆𑀔𑀼𑀲𑀜𑁆𑀜𑀺𑀢𑀁 𑀅𑀲𑀼𑀘𑀺𑀧𑀺𑀡𑁆𑀟𑀁 𑀕𑀡𑁆𑀳, 𑀕𑀳𑁂𑀢𑁆𑀯𑀸 𑀳𑀭𑀲𑁆𑀲𑀼 𑀧𑀲𑀸𑀤𑀬𑀼𑀢𑁆𑀢𑀁 𑀇𑀘𑁆𑀙𑀺𑀢𑀁 𑀞𑀸𑀦𑀁 𑀦𑁂𑀳𑀺.

𑀢𑀲𑁆𑀲 𑀘 𑀯𑀺𑀭𑀫𑀸𑀲𑀺 𑀢𑀸𑀯𑀤𑁂𑀢𑀺 𑀢𑀲𑁆𑀲 𑀥𑀼𑀢𑁆𑀢𑀧𑀼𑀭𑀺𑀲𑀲𑁆𑀲 𑀢𑀸𑀯𑀤𑁂𑀯 𑀅𑀓𑁆𑀔𑀺𑀫𑁆𑀳𑀺 𑀉𑀧𑁆𑀧𑀸𑀝𑀺𑀢𑀓𑁆𑀔𑀡𑁂 𑀏𑀯 𑀭𑀸𑀕𑁄 𑀯𑀺𑀕𑀘𑁆𑀙𑀺. 𑀢𑀢𑁆𑀣𑀸𑀢𑀺 𑀅𑀓𑁆𑀔𑀺𑀫𑁆𑀳𑀺, 𑀢𑀲𑁆𑀲𑀁 𑀯𑀸 𑀣𑁂𑀭𑀺𑀬𑀁. 𑀅𑀣 𑀯𑀸 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂. 𑀔𑀫𑀸𑀧𑀬𑀻𑀢𑀺 𑀔𑀫𑀸𑀧𑁂𑀲𑀺. 𑀲𑁄𑀢𑁆𑀣𑀺 𑀲𑀺𑀬𑀸 𑀩𑁆𑀭𑀳𑁆𑀫𑀘𑀸𑀭𑀺𑀦𑀻𑀢𑀺 𑀲𑁂𑀝𑁆𑀞𑀘𑀸𑀭𑀺𑀦𑀺 𑀫𑀳𑁂𑀲𑀺𑀓𑁂 𑀢𑀼𑀬𑁆𑀳𑀁 𑀆𑀭𑁄𑀕𑁆𑀬𑀫𑁂𑀯 𑀪𑀯𑁂𑀬𑁆𑀬. 𑀦 𑀧𑀼𑀦𑁄 𑀏𑀤𑀺𑀲𑀓𑀁 𑀪𑀯𑀺𑀲𑁆𑀲𑀢𑀻𑀢𑀺 𑀇𑀢𑁄 𑀧𑀭𑀁 𑀏𑀯𑀭𑀽𑀧𑀁 𑀅𑀦𑀸𑀘𑀸𑀭𑀘𑀭𑀡𑀁 𑀦 𑀪𑀯𑀺𑀲𑁆𑀲𑀢𑀺, 𑀦 𑀓𑀭𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄.

𑀆𑀲𑀸𑀤𑀺𑀬𑀸𑀢𑀺 𑀖𑀝𑁆𑀝𑁂𑀢𑁆𑀯𑀸. 𑀏𑀤𑀺𑀲𑀦𑁆𑀢𑀺 𑀏𑀯𑀭𑀽𑀧𑀁 𑀲𑀩𑁆𑀩𑀢𑁆𑀣 𑀯𑀻𑀢𑀭𑀸𑀕𑀁. 𑀅𑀕𑁆𑀕𑀺𑀁 𑀧𑀚𑁆𑀚𑀮𑀺𑀢𑀁𑀯 𑀮𑀺𑀗𑁆𑀕𑀺𑀬𑀸𑀢𑀺 𑀧𑀚𑁆𑀚𑀮𑀺𑀢𑀁 𑀅𑀕𑁆𑀕𑀺𑀁 𑀆𑀮𑀺𑀗𑁆𑀕𑁂𑀢𑁆𑀯𑀸 𑀯𑀺𑀬.

𑀢𑀢𑁄𑀢𑀺 𑀢𑀲𑁆𑀫𑀸 𑀥𑀼𑀢𑁆𑀢𑀧𑀼𑀭𑀺𑀲𑀸. 𑀲𑀸 𑀪𑀺𑀓𑁆𑀔𑀼𑀦𑀻𑀢𑀺 𑀲𑀸 𑀲𑀼𑀪𑀸 𑀪𑀺𑀓𑁆𑀔𑀼𑀦𑀻. 𑀅𑀕𑀫𑀻 𑀩𑀼𑀤𑁆𑀥𑀯𑀭𑀲𑁆𑀲 𑀲𑀦𑁆𑀢𑀺𑀓𑀦𑁆𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑀁 𑀉𑀧𑀕𑀘𑁆𑀙𑀺 𑀉𑀧𑀲𑀗𑁆𑀓𑀫𑀺. 𑀧𑀲𑁆𑀲𑀺𑀬 𑀯𑀭𑀧𑀼𑀜𑁆𑀜𑀮𑀓𑁆𑀔𑀡𑀦𑁆𑀢𑀺 𑀉𑀢𑁆𑀢𑀫𑁂𑀳𑀺 𑀧𑀼𑀜𑁆𑀜𑀲𑀫𑁆𑀪𑀸𑀭𑁂𑀳𑀺 𑀦𑀺𑀩𑁆𑀩𑀢𑁆𑀢𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀁 𑀤𑀺𑀲𑁆𑀯𑀸. 𑀬𑀣𑀸 𑀧𑀼𑀭𑀸𑀡𑀓𑀦𑁆𑀢𑀺 𑀧𑁄𑀭𑀸𑀡𑀁 𑀯𑀺𑀬 𑀉𑀧𑁆𑀧𑀸𑀝𑀦𑀢𑁄 𑀧𑀼𑀩𑁆𑀩𑁂 𑀯𑀺𑀬 𑀘𑀓𑁆𑀔𑀼 𑀧𑀝𑀺𑀧𑀸𑀓𑀢𑀺𑀓𑀁 𑀅𑀳𑁄𑀲𑀺. 𑀬𑀫𑁂𑀢𑁆𑀣 𑀅𑀦𑁆𑀢𑀭𑀦𑁆𑀢𑀭𑀸 𑀦 𑀯𑀼𑀢𑁆𑀢𑀁, 𑀢𑀁 𑀯𑀼𑀢𑁆𑀢𑀦𑀬𑀢𑁆𑀢𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀲𑀼𑀪𑀸𑀚𑀻𑀯𑀓𑀫𑁆𑀩𑀯𑀦𑀺𑀓𑀸𑀣𑁂𑀭𑀻𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀺𑀁𑀲𑀦𑀺𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.