𑁨𑁧. 𑀫𑀳𑀸𑀦𑀺𑀧𑀸𑀢𑁄

𑁧. 𑀯𑀗𑁆𑀕𑀻𑀲𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀲𑀢𑁆𑀢𑀢𑀺𑀦𑀺𑀧𑀸𑀢𑁂 𑀦𑀺𑀓𑁆𑀔𑀦𑁆𑀢𑀁 𑀯𑀢 𑀫𑀁 𑀲𑀦𑁆𑀢𑀦𑁆𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀯𑀗𑁆𑀕𑀻𑀲𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀁 𑀓𑀺𑀭 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀫𑀳𑀸𑀪𑁄𑀕𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄, 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀧𑀝𑀺𑀪𑀸𑀦𑀯𑀦𑁆𑀢𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀲𑀢𑁆𑀣𑀼 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑁋 ‘‘𑀅𑀳𑀫𑁆𑀧𑀺 𑀅𑀦𑀸𑀕𑀢𑁂 𑀧𑀝𑀺𑀪𑀸𑀦𑀯𑀦𑁆𑀢𑀸𑀦𑀁 𑀅𑀕𑁆𑀕𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀦𑀁 𑀓𑀢𑁆𑀯𑀸, 𑀲𑀢𑁆𑀣𑀸𑀭𑀸 𑀩𑁆𑀬𑀸𑀓𑀢𑁄 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀗𑁆𑀕𑀻𑀲𑁄𑀢𑀺 𑀮𑀤𑁆𑀥𑀦𑀸𑀫𑁄 𑀢𑀬𑁄 𑀩𑁂𑀤𑁂 𑀉𑀕𑁆𑀕𑀡𑁆𑀳𑀦𑁆𑀢𑁄 𑀆𑀘𑀭𑀺𑀬𑀁 𑀆𑀭𑀸𑀥𑁂𑀢𑁆𑀯𑀸, 𑀙𑀯𑀲𑀻𑀲𑀫𑀦𑁆𑀢𑀁 𑀦𑀸𑀫 𑀲𑀺𑀓𑁆𑀔𑀺𑀢𑁆𑀯𑀸 𑀙𑀯𑀲𑀻𑀲𑀁 𑀦𑀔𑁂𑀦 𑀆𑀓𑁄𑀝𑁂𑀢𑁆𑀯𑀸 ‘‘𑀅𑀬𑀁 𑀲𑀢𑁆𑀢𑁄 𑀅𑀲𑀼𑀓𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑁄’’𑀢𑀺 𑀚𑀸𑀦𑀸𑀢𑀺.

𑀩𑁆𑀭𑀸𑀳𑁆𑀫𑀡𑀸 ‘‘𑀅𑀬𑀁 𑀅𑀫𑁆𑀳𑀸𑀓𑀁 𑀚𑀻𑀯𑀺𑀢𑀫𑀕𑁆𑀕𑁄’’𑀢𑀺 𑀜𑀢𑁆𑀯𑀸 𑀯𑀗𑁆𑀕𑀻𑀲𑀁 𑀕𑀳𑁂𑀢𑁆𑀯𑀸 𑀧𑀝𑀺𑀘𑁆𑀙𑀦𑁆𑀦𑀬𑀸𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀺𑀬𑁄 𑀯𑀺𑀘𑀭𑀦𑁆𑀢𑀺. 𑀯𑀗𑁆𑀕𑀻𑀲𑁄𑀧𑀺 𑀢𑀺𑀯𑀲𑁆𑀲𑀫𑀢𑁆𑀣𑀓𑁂 𑀫𑀢𑀸𑀦𑀫𑁆𑀧𑀺 𑀲𑀻𑀲𑀁 𑀆𑀳𑀭𑀸𑀧𑁂𑀢𑁆𑀯𑀸 𑀦𑀔𑁂𑀦 𑀆𑀓𑁄𑀝𑁂𑀢𑁆𑀯𑀸 ‘‘𑀅𑀬𑀁 𑀲𑀢𑁆𑀢𑁄 𑀅𑀲𑀼𑀓𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑁄’’𑀢𑀺 𑀯𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀓𑀗𑁆𑀔𑀘𑁆𑀙𑁂𑀤𑀦𑀢𑁆𑀣𑀁 𑀢𑁂 𑀢𑁂 𑀚𑀦𑁂 𑀆𑀯𑀸𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀕𑀢𑀺𑀁 𑀓𑀣𑀸𑀧𑁂𑀢𑀺. 𑀢𑁂𑀦 𑀢𑀲𑁆𑀫𑀺𑀁 𑀫𑀳𑀸𑀚𑀦𑁄 𑀅𑀪𑀺𑀧𑁆𑀧𑀲𑀻𑀤𑀢𑀺. 𑀲𑁄 𑀢𑀁 𑀦𑀺𑀲𑁆𑀲𑀸𑀬 𑀫𑀳𑀸𑀚𑀦𑀲𑁆𑀲 𑀳𑀢𑁆𑀣𑀢𑁄 𑀲𑀢𑀫𑁆𑀧𑀺 𑀲𑀳𑀲𑁆𑀲𑀫𑁆𑀧𑀺 𑀮𑀪𑀢𑀻𑀢𑀺. 𑀩𑁆𑀭𑀸𑀳𑁆𑀫𑀡𑀸 𑀯𑀗𑁆𑀕𑀻𑀲𑀫𑀸𑀤𑀸𑀬 𑀬𑀣𑀸𑀭𑀼𑀘𑀺𑀁 𑀯𑀺𑀘𑀭𑀺𑀢𑁆𑀯𑀸 𑀧𑀼𑀦 𑀲𑀸𑀯𑀢𑁆𑀣𑀺𑀁 𑀅𑀕𑀫𑀁𑀲𑀼. 𑀯𑀗𑁆𑀕𑀻𑀲𑁄 𑀲𑀢𑁆𑀣𑀼 𑀕𑀼𑀡𑁂 𑀲𑀼𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑀼𑀓𑀸𑀫𑁄 𑀅𑀳𑁄𑀲𑀺. 𑀩𑁆𑀭𑀸𑀳𑁆𑀫𑀡𑀸 ‘‘𑀲𑀫𑀡𑁄 𑀕𑁄𑀢𑀫𑁄 𑀫𑀸𑀬𑀸𑀬 𑀢𑀁 𑀆𑀯𑀝𑁆𑀝𑁂𑀲𑁆𑀲𑀢𑀻’’𑀢𑀺 𑀧𑀝𑀺𑀓𑁆𑀔𑀺𑀧𑀺𑀁𑀲𑀼. 𑀯𑀗𑁆𑀕𑀻𑀲𑁄 𑀢𑁂𑀲𑀁 𑀯𑀘𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀫𑀥𑀼𑀭𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺.

𑀢𑀁 𑀲𑀢𑁆𑀣𑀸 𑀧𑀼𑀘𑁆𑀙𑀺 𑁋 ‘‘𑀯𑀗𑁆𑀕𑀻𑀲, 𑀓𑀺𑀜𑁆𑀘𑀺 𑀲𑀺𑀧𑁆𑀧𑀁 𑀚𑀸𑀦𑀸𑀲𑀻’’𑀢𑀺? ‘‘𑀆𑀫, 𑀪𑁄 𑀕𑁄𑀢𑀫, 𑀙𑀯𑀲𑀻𑀲𑀫𑀦𑁆𑀢𑀁 𑀦𑀸𑀫 𑀚𑀸𑀦𑀸𑀫𑀺. 𑀢𑁂𑀦 𑀢𑀺𑀯𑀲𑁆𑀲𑀫𑀢𑁆𑀣𑀓𑁂 𑀫𑀢𑀸𑀦𑀫𑁆𑀧𑀺 𑀲𑀻𑀲𑀁 𑀦𑀔𑁂𑀦 𑀆𑀓𑁄𑀝𑁂𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑀁 𑀚𑀸𑀦𑀸𑀫𑀻’’𑀢𑀺. 𑀲𑀢𑁆𑀣𑀸 𑀢𑀲𑁆𑀲 𑀏𑀓𑀁 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀲𑁆𑀲 𑀲𑀻𑀲𑀁 𑀤𑀲𑁆𑀲𑁂𑀲𑀺, 𑀏𑀓𑀁 𑀫𑀦𑀼𑀲𑁆𑀲𑁂𑀲𑀼, 𑀏𑀓𑀁 𑀤𑁂𑀯𑁂𑀲𑀼, 𑀏𑀓𑀁 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀲𑀻𑀲𑀁 𑀤𑀲𑁆𑀲𑁂𑀲𑀺. 𑀲𑁄 𑀧𑀞𑀫𑀁 𑀲𑀻𑀲𑀁 𑀆𑀓𑁄𑀝𑁂𑀢𑁆𑀯𑀸, ‘‘𑀪𑁄 𑀕𑁄𑀢𑀫, 𑀅𑀬𑀁 𑀲𑀢𑁆𑀢𑁄 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑁄’’𑀢𑀺 𑀆𑀳. ‘‘𑀲𑀸𑀥𑀼, 𑀯𑀗𑁆𑀕𑀻𑀲, 𑀲𑀼𑀝𑁆𑀞𑀼 𑀢𑀬𑀸 𑀤𑀺𑀝𑁆𑀞𑀁. 𑀅𑀬𑀁 𑀲𑀢𑁆𑀢𑁄 𑀓𑀼𑀳𑀺𑀁 𑀦𑀺𑀩𑁆𑀩𑀢𑁆𑀢𑁄’’𑀢𑀺 𑀧𑀼𑀘𑁆𑀙𑀺. ‘‘𑀫𑀦𑀼𑀲𑁆𑀲𑀮𑁄𑀓𑁂’’𑀢𑀺. ‘‘𑀅𑀬𑀁 𑀓𑀼𑀳𑀺’’𑀦𑁆𑀢𑀺? ‘‘𑀤𑁂𑀯𑀮𑁄𑀓𑁂’’𑀢𑀺 𑀢𑀺𑀡𑁆𑀡𑀦𑁆𑀦𑀫𑁆𑀧𑀺 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑀁 𑀓𑀣𑁂𑀲𑀺. 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀧𑀦 𑀲𑀻𑀲𑀁 𑀦𑀔𑁂𑀦 𑀆𑀓𑁄𑀝𑁂𑀦𑁆𑀢𑁄 𑀦𑁂𑀯 𑀅𑀦𑁆𑀢𑀁 𑀦 𑀓𑁄𑀝𑀺𑀁 𑀧𑀲𑁆𑀲𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀦 𑀲𑀓𑁆𑀓𑁄𑀲𑀺 𑀯𑀗𑁆𑀕𑀻𑀲𑀸’’𑀢𑀺 𑀧𑀼𑀘𑁆𑀙𑀺. ‘‘𑀉𑀧𑀧𑀭𑀺𑀓𑁆𑀔𑀸𑀫𑀺 𑀢𑀸𑀯𑀸’’𑀢𑀺 𑀧𑀼𑀦𑀧𑁆𑀧𑀼𑀦𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀆𑀓𑁄𑀝𑁂𑀦𑁆𑀢𑁄𑀧𑀺 𑀩𑀸𑀳𑀺𑀭𑀓𑀫𑀦𑁆𑀢𑁂𑀦 𑀔𑀻𑀡𑀸𑀲𑀯𑀲𑁆𑀲 𑀕𑀢𑀺𑀁 𑀓𑀣𑀁 𑀚𑀸𑀦𑀺𑀲𑁆𑀲𑀢𑀺, 𑀅𑀣𑀲𑁆𑀲 𑀫𑀢𑁆𑀣𑀓𑀢𑁄 𑀲𑁂𑀤𑁄 𑀫𑀼𑀘𑁆𑀘𑀺. 𑀲𑁄 𑀮𑀚𑁆𑀚𑀺𑀢𑁆𑀯𑀸 𑀢𑀼𑀡𑁆𑀳𑀻𑀪𑀽𑀢𑁄 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀲𑀢𑁆𑀣𑀸 𑁋 ‘‘𑀓𑀺𑀮𑀫𑀲𑀺, 𑀯𑀗𑁆𑀕𑀻𑀲𑀸’’𑀢𑀺 𑀆𑀳. ‘‘𑀆𑀫, 𑀪𑁄 𑀕𑁄𑀢𑀫, 𑀇𑀫𑀲𑁆𑀲 𑀉𑀧𑁆𑀧𑀦𑁆𑀦𑀝𑁆𑀞𑀸𑀦𑀁 𑀚𑀸𑀦𑀺𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀲𑀘𑁂 𑀢𑀼𑀫𑁆𑀳𑁂 𑀚𑀸𑀦𑀸𑀣, 𑀓𑀣𑁂𑀣𑀸’’𑀢𑀺. ‘‘𑀯𑀗𑁆𑀕𑀻𑀲, 𑀅𑀳𑀁 𑀏𑀢𑀫𑁆𑀧𑀺 𑀚𑀸𑀦𑀸𑀫𑀺, 𑀇𑀢𑁄 𑀉𑀢𑁆𑀢𑀭𑀺𑀢𑀭𑀫𑁆𑀧𑀺 𑀚𑀸𑀦𑀸𑀫𑀻’’𑀢𑀺 𑀯𑀢𑁆𑀯𑀸 𑁋

‘‘𑀘𑀼𑀢𑀺𑀁 𑀬𑁄 𑀯𑁂𑀤𑀺 𑀲𑀢𑁆𑀢𑀸𑀦𑀁, 𑀉𑀧𑀧𑀢𑁆𑀢𑀺𑀜𑁆𑀘 𑀲𑀩𑁆𑀩𑀲𑁄;

𑀅𑀲𑀢𑁆𑀢𑀁 𑀲𑀼𑀕𑀢𑀁 𑀩𑀼𑀤𑁆𑀥𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

‘‘𑀬𑀲𑁆𑀲 𑀕𑀢𑀺𑀁 𑀦 𑀚𑀸𑀦𑀦𑁆𑀢𑀺, 𑀤𑁂𑀯𑀸 𑀕𑀦𑁆𑀥𑀩𑁆𑀩𑀫𑀸𑀦𑀼𑀲𑀸;

𑀔𑀻𑀡𑀸𑀲𑀯𑀁 𑀅𑀭𑀳𑀦𑁆𑀢𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡’’𑀦𑁆𑀢𑀺. (𑀥. 𑀧. 𑁪𑁧𑁯-𑁪𑁨𑁦; 𑀲𑀼. 𑀦𑀺. 𑁬𑁪𑁮-𑁬𑁪𑁯) 𑁋

𑀇𑀫𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺. 𑀯𑀗𑁆𑀕𑀻𑀲𑁄 ‘‘𑀢𑁂𑀦 𑀳𑀺, 𑀪𑁄 𑀕𑁄𑀢𑀫, 𑀢𑀁 𑀯𑀺𑀚𑁆𑀚𑀁 𑀫𑁂 𑀤𑁂𑀣𑀸’’𑀢𑀺 𑀅𑀧𑀘𑀺𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀺. 𑀲𑀢𑁆𑀣𑀸 ‘‘𑀅𑀫𑁆𑀳𑁂𑀳𑀺 𑀲𑀫𑀸𑀦𑀮𑀺𑀗𑁆𑀕𑀲𑁆𑀲 𑀤𑁂𑀫𑀸’’𑀢𑀺 𑀆𑀳. 𑀯𑀗𑁆𑀕𑀻𑀲𑁄 ‘‘𑀬𑀁𑀓𑀺𑀜𑁆𑀘𑀺 𑀓𑀢𑁆𑀯𑀸 𑀫𑀬𑀸 𑀇𑀫𑀁 𑀫𑀦𑁆𑀢𑀁 𑀕𑀳𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀩𑁆𑀭𑀸𑀳𑁆𑀫𑀡𑁂 𑀆𑀳 𑁋 ‘‘𑀢𑀼𑀫𑁆𑀳𑁂 𑀫𑀬𑀺 𑀧𑀩𑁆𑀩𑀚𑀦𑁆𑀢𑁂 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣, 𑀅𑀳𑀁 𑀫𑀦𑁆𑀢𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀚𑁂𑀝𑁆𑀞𑀓𑁄 𑀪𑀯𑀺𑀲𑁆𑀲𑀸𑀫𑀺, 𑀢𑀼𑀫𑁆𑀳𑀸𑀓𑀫𑁆𑀧𑀺 𑀢𑁂𑀦 𑀪𑀤𑁆𑀤𑀓𑀫𑁂𑀯 𑀪𑀯𑀺𑀲𑁆𑀲𑀢𑀻’’𑀢𑀺 𑀫𑀦𑁆𑀢𑀢𑁆𑀣𑀸𑀬 𑀲𑀢𑁆𑀣𑀼𑀲𑀦𑁆𑀢𑀺𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀢𑀤𑀸 𑀘 𑀣𑁂𑀭𑁄 𑀦𑀺𑀕𑁆𑀭𑁄𑀥𑀓𑀧𑁆𑀧𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀞𑀺𑀢𑁄 𑀳𑁄𑀢𑀺, 𑀢𑀁 𑀪𑀕𑀯𑀸 𑀆𑀡𑀸𑀧𑁂𑀲𑀺 𑁋 ‘‘𑀦𑀺𑀕𑁆𑀭𑁄𑀥𑀓𑀧𑁆𑀧, 𑀇𑀫𑀁 𑀧𑀩𑁆𑀩𑀸𑀚𑁂𑀳𑀻’’𑀢𑀺. 𑀲𑁄 𑀲𑀢𑁆𑀣𑀼 𑀆𑀡𑀸𑀬 𑀢𑀁 𑀧𑀩𑁆𑀩𑀸𑀚𑁂𑀲𑀺. 𑀅𑀣𑀲𑁆𑀲 𑀲𑀢𑁆𑀣𑀸 ‘‘𑀫𑀦𑁆𑀢𑀧𑀭𑀺𑀯𑀸𑀭𑀁 𑀢𑀸𑀯 𑀉𑀕𑁆𑀕𑀡𑁆𑀳𑀸𑀳𑀻’’𑀢𑀺 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀓𑀫𑁆𑀫𑀝𑁆𑀞𑀸𑀦𑀁 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀝𑁆𑀞𑀸𑀦𑀜𑁆𑀘 𑀆𑀘𑀺𑀓𑁆𑀔𑀺. 𑀲𑁄 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀁 𑀲𑀚𑁆𑀛𑀸𑀬𑀦𑁆𑀢𑁄𑀯 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀲𑀺. 𑀩𑁆𑀭𑀸𑀳𑁆𑀫𑀡𑀸 𑀯𑀗𑁆𑀕𑀻𑀲𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀓𑀺𑀁, 𑀪𑁄 𑀯𑀗𑁆𑀕𑀻𑀲, 𑀲𑀫𑀡𑀲𑁆𑀫 𑀕𑁄𑀢𑀫𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀧𑁆𑀧𑀁 𑀲𑀺𑀓𑁆𑀔𑀺𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀁𑀲𑀼. ‘‘𑀓𑀺𑀁 𑀲𑀺𑀧𑁆𑀧𑀲𑀺𑀓𑁆𑀔𑀦𑁂𑀦, 𑀕𑀘𑁆𑀙𑀣 𑀢𑀼𑀫𑁆𑀳𑁂, 𑀦 𑀫𑀬𑁆𑀳𑀁 𑀢𑀼𑀫𑁆𑀳𑁂𑀳𑀺 𑀓𑀢𑁆𑀢𑀩𑁆𑀩𑀓𑀺𑀘𑁆𑀘’’𑀦𑁆𑀢𑀺. 𑀩𑁆𑀭𑀸𑀳𑁆𑀫𑀡𑀸 ‘‘𑀢𑁆𑀯𑀫𑁆𑀧𑀺 𑀤𑀸𑀦𑀺 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀯𑀲𑀁 𑀆𑀧𑀦𑁆𑀦𑁄, 𑀫𑀸𑀬𑀸𑀬 𑀆𑀯𑀝𑁆𑀝𑀺𑀢𑁄, 𑀓𑀺𑀁 𑀫𑀬𑀁 𑀢𑀯 𑀲𑀦𑁆𑀢𑀺𑀓𑁂 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀆𑀕𑀢𑀫𑀕𑁆𑀕𑁂𑀦𑁂𑀯 𑀧𑀓𑁆𑀓𑀫𑀺𑀁𑀲𑀼. 𑀯𑀗𑁆𑀕𑀻𑀲𑀢𑁆𑀣𑁂𑀭𑁄 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀲𑀘𑁆𑀙𑀸𑀓𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭 𑁨.𑁫𑁫.𑁯𑁬-𑁧𑁪𑁨) 𑁋

‘‘𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀲𑀩𑁆𑀩𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀫𑀸;

𑀇𑀢𑁄 𑀲𑀢𑀲𑀳𑀲𑁆𑀲𑀫𑁆𑀳𑀺, 𑀓𑀧𑁆𑀧𑁂 𑀉𑀧𑁆𑀧𑀚𑁆𑀚𑀺 𑀦𑀸𑀬𑀓𑁄.

‘‘𑀬𑀣𑀸𑀧𑀺 𑀲𑀸𑀕𑀭𑁂 𑀊𑀫𑀺, 𑀕𑀕𑀦𑁂 𑀯𑀺𑀬 𑀢𑀸𑀭𑀓𑀸;

𑀏𑀯𑀁 𑀧𑀸𑀯𑀘𑀦𑀁 𑀢𑀲𑁆𑀲, 𑀅𑀭𑀳𑀦𑁆𑀢𑁂𑀳𑀺 𑀘𑀺𑀢𑁆𑀢𑀺𑀢𑀁.

‘‘𑀲𑀤𑁂𑀯𑀸𑀲𑀼𑀭𑀦𑀸𑀕𑁂𑀳𑀺, 𑀫𑀦𑀼𑀚𑁂𑀳𑀺 𑀧𑀼𑀭𑀓𑁆𑀔𑀢𑁄;

𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀓𑀺𑀡𑁆𑀡𑁂, 𑀚𑀦𑀫𑀚𑁆𑀛𑁂 𑀚𑀺𑀦𑀼𑀢𑁆𑀢𑀫𑁄.

‘‘𑀧𑀪𑀸𑀳𑀺 𑀅𑀦𑀼𑀭𑀜𑁆𑀚𑀦𑁆𑀢𑁄, 𑀮𑁄𑀓𑁂 𑀮𑁄𑀓𑀦𑁆𑀢𑀕𑀽 𑀚𑀺𑀦𑁄;

𑀯𑀘𑀦𑁂𑀦 𑀯𑀺𑀩𑁄𑀥𑁂𑀦𑁆𑀢𑁄, 𑀯𑁂𑀦𑁂𑀬𑁆𑀬𑀧𑀤𑀼𑀫𑀸𑀦𑀺 𑀲𑁄.

‘‘𑀯𑁂𑀲𑀸𑀭𑀚𑁆𑀚𑁂𑀳𑀺 𑀲𑀫𑁆𑀧𑀦𑁆𑀦𑁄, 𑀘𑀢𑀽𑀳𑀺 𑀧𑀼𑀭𑀺𑀲𑀼𑀢𑁆𑀢𑀫𑁄;

𑀧𑀳𑀻𑀦𑀪𑀬𑀲𑀸𑀭𑀚𑁆𑀚𑁄, 𑀔𑁂𑀫𑀧𑁆𑀧𑀢𑁆𑀢𑁄 𑀯𑀺𑀲𑀸𑀭𑀤𑁄.

‘‘𑀆𑀲𑀪𑀁 𑀧𑀯𑀭𑀁 𑀞𑀸𑀦𑀁, 𑀩𑀼𑀤𑁆𑀥𑀪𑀽𑀫𑀺𑀜𑁆𑀘 𑀓𑁂𑀯𑀮𑀁;

𑀧𑀝𑀺𑀚𑀸𑀦𑀸𑀢𑀺 𑀮𑁄𑀓𑀕𑁆𑀕𑁄, 𑀦𑀢𑁆𑀣𑀺 𑀲𑀜𑁆𑀘𑁄𑀤𑀓𑁄 𑀓𑁆𑀯𑀘𑀺.

‘‘𑀲𑀻𑀳𑀦𑀸𑀤𑀫𑀲𑀫𑁆𑀪𑀻𑀢𑀁, 𑀦𑀤𑀢𑁄 𑀢𑀲𑁆𑀲 𑀢𑀸𑀤𑀺𑀦𑁄;

𑀤𑁂𑀯𑀸 𑀦𑀭𑁄 𑀯𑀸 𑀩𑁆𑀭𑀳𑁆𑀫𑀸 𑀯𑀸, 𑀧𑀝𑀺𑀯𑀢𑁆𑀢𑀸 𑀦 𑀯𑀺𑀚𑁆𑀚𑀢𑀺.

‘‘𑀤𑁂𑀲𑁂𑀦𑁆𑀢𑁄 𑀧𑀯𑀭𑀁 𑀥𑀫𑁆𑀫𑀁, 𑀲𑀦𑁆𑀢𑀸𑀭𑁂𑀦𑁆𑀢𑁄 𑀲𑀤𑁂𑀯𑀓𑀁;

𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀺, 𑀧𑀭𑀺𑀲𑀸𑀲𑀼 𑀯𑀺𑀲𑀸𑀭𑀤𑁄.

‘‘𑀧𑀝𑀺𑀪𑀸𑀦𑀯𑀢𑀁 𑀅𑀕𑁆𑀕𑀁, 𑀲𑀸𑀯𑀓𑀁 𑀲𑀸𑀥𑀼𑀲𑀫𑁆𑀫𑀢𑀁;

𑀕𑀼𑀡𑀁 𑀩𑀳𑀼𑀁 𑀧𑀓𑀺𑀢𑁆𑀢𑁂𑀢𑁆𑀯𑀸, 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺 𑀢𑀁.

‘‘𑀢𑀤𑀸𑀳𑀁 𑀳𑀁𑀲𑀯𑀢𑀺𑀬𑀁, 𑀩𑁆𑀭𑀸𑀳𑁆𑀫𑀡𑁄 𑀲𑀸𑀥𑀼𑀲𑀫𑁆𑀫𑀢𑁄;

𑀲𑀩𑁆𑀩𑀯𑁂𑀤𑀯𑀺𑀤𑀽 𑀚𑀸𑀢𑁄, 𑀯𑀸𑀕𑀻𑀲𑁄 𑀯𑀸𑀤𑀺𑀲𑀽𑀤𑀦𑁄.

‘‘𑀉𑀧𑁂𑀘𑁆𑀘 𑀢𑀁 𑀫𑀳𑀸𑀯𑀻𑀭𑀁, 𑀲𑀼𑀢𑁆𑀯𑀸𑀳𑀁 𑀥𑀫𑁆𑀫𑀤𑁂𑀲𑀦𑀁;

𑀧𑀻𑀢𑀺𑀯𑀭𑀁 𑀧𑀝𑀺𑀮𑀪𑀺𑀁, 𑀲𑀸𑀯𑀓𑀲𑁆𑀲 𑀕𑀼𑀡𑁂 𑀭𑀢𑁄.

‘‘𑀦𑀺𑀫𑀦𑁆𑀢𑁂𑀢𑁆𑀯𑀸𑀯 𑀲𑀼𑀕𑀢𑀁, 𑀲𑀲𑀗𑁆𑀖𑀁 𑀮𑁄𑀓𑀦𑀦𑁆𑀤𑀦𑀁;

𑀲𑀢𑁆𑀢𑀸𑀳𑀁 𑀪𑁄𑀚𑀬𑀺𑀢𑁆𑀯𑀸𑀳𑀁, 𑀤𑀼𑀲𑁆𑀲𑁂𑀳𑀘𑁆𑀙𑀸𑀤𑀬𑀺𑀁 𑀢𑀤𑀸.

‘‘𑀦𑀺𑀧𑀘𑁆𑀘 𑀲𑀺𑀭𑀲𑀸 𑀧𑀸𑀤𑁂, 𑀓𑀢𑁄𑀓𑀸𑀲𑁄 𑀓𑀢𑀜𑁆𑀚𑀮𑀻;

𑀏𑀓𑀫𑀦𑁆𑀢𑀁 𑀞𑀺𑀢𑁄 𑀳𑀝𑁆𑀞𑁄, 𑀲𑀦𑁆𑀣𑀯𑀺𑀁 𑀚𑀺𑀦𑀫𑀼𑀢𑁆𑀢𑀫𑀁.

‘‘𑀦𑀫𑁄 𑀢𑁂 𑀯𑀸𑀤𑀺𑀫𑀤𑁆𑀤𑀦, 𑀦𑀫𑁄 𑀢𑁂 𑀇𑀲𑀺𑀲𑀢𑁆𑀢𑀫;

𑀦𑀫𑁄 𑀢𑁂 𑀲𑀩𑁆𑀩𑀮𑁄𑀓𑀕𑁆𑀕, 𑀦𑀫𑁄 𑀢𑁂 𑀅𑀪𑀬𑀁 𑀓𑀭.

‘‘𑀦𑀫𑁄 𑀢𑁂 𑀫𑀸𑀭𑀫𑀣𑀦, 𑀦𑀫𑁄 𑀢𑁂 𑀤𑀺𑀝𑁆𑀞𑀺𑀲𑀽𑀤𑀦;

𑀦𑀫𑁄 𑀢𑁂 𑀲𑀦𑁆𑀢𑀺𑀲𑀼𑀔𑀤, 𑀦𑀫𑁄 𑀢𑁂 𑀲𑀭𑀡𑀁 𑀓𑀭.

‘‘𑀅𑀦𑀸𑀣𑀸𑀦𑀁 𑀪𑀯𑀁 𑀦𑀸𑀣𑁄, 𑀪𑀻𑀢𑀸𑀦𑀁 𑀅𑀪𑀬𑀧𑁆𑀧𑀤𑁄;

𑀯𑀺𑀲𑁆𑀲𑀸𑀫𑀪𑀽𑀫𑀺 𑀲𑀦𑁆𑀢𑀸𑀦𑀁, 𑀲𑀭𑀡𑀁 𑀲𑀭𑀡𑁂𑀲𑀺𑀦𑀁.

‘‘𑀏𑀯𑀫𑀸𑀤𑀻𑀳𑀺 𑀲𑀫𑁆𑀩𑀼𑀤𑁆𑀥𑀁, 𑀲𑀦𑁆𑀣𑀯𑀺𑀢𑁆𑀯𑀸 𑀫𑀳𑀸𑀕𑀼𑀡𑀁;

𑀅𑀯𑁄𑀘𑀁 𑀯𑀸𑀤𑀺𑀲𑀽𑀤𑀲𑁆𑀲, 𑀕𑀢𑀺𑀁 𑀧𑀧𑁆𑀧𑁄𑀫𑀺 𑀪𑀺𑀓𑁆𑀔𑀼𑀦𑁄.

‘‘𑀢𑀤𑀸 𑀅𑀯𑁄𑀘 𑀪𑀕𑀯𑀸, 𑀅𑀦𑀦𑁆𑀢𑀧𑀝𑀺𑀪𑀸𑀦𑀯𑀸;

𑀬𑁄 𑀲𑁄 𑀩𑀼𑀤𑁆𑀥𑀁 𑀅𑀪𑁄𑀚𑁂𑀲𑀺, 𑀲𑀢𑁆𑀢𑀸𑀳𑀁 𑀲𑀳𑀲𑀸𑀯𑀓𑀁.

‘‘𑀕𑀼𑀡𑀜𑁆𑀘 𑀫𑁂 𑀧𑀓𑀺𑀢𑁆𑀢𑁂𑀲𑀺, 𑀧𑀲𑀦𑁆𑀦𑁄 𑀲𑁂𑀳𑀺 𑀧𑀸𑀡𑀺𑀪𑀺;

𑀏𑀲𑁄 𑀧𑀢𑁆𑀣𑀬𑀢𑁂 𑀞𑀸𑀦𑀁, 𑀯𑀸𑀤𑀺𑀲𑀽𑀤𑀲𑁆𑀲 𑀪𑀺𑀓𑁆𑀔𑀼𑀦𑁄.

‘‘𑀅𑀦𑀸𑀕𑀢𑀫𑁆𑀳𑀺 𑀅𑀤𑁆𑀥𑀸𑀦𑁂, 𑀮𑀘𑁆𑀙𑀲𑁂 𑀢𑀁 𑀫𑀦𑁄𑀭𑀣𑀁;

𑀤𑁂𑀯𑀫𑀸𑀦𑀼𑀲𑀲𑀫𑁆𑀧𑀢𑁆𑀢𑀺𑀁, 𑀅𑀦𑀼𑀪𑁄𑀢𑁆𑀯𑀸 𑀅𑀦𑀧𑁆𑀧𑀓𑀁.

‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

‘‘𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑁄, 𑀑𑀭𑀲𑁄 𑀥𑀫𑁆𑀫𑀦𑀺𑀫𑁆𑀫𑀺𑀢𑁄;

𑀯𑀗𑁆𑀕𑀻𑀲𑁄 𑀦𑀸𑀫 𑀦𑀸𑀫𑁂𑀦, 𑀳𑁂𑀲𑁆𑀲𑀢𑀺 𑀲𑀢𑁆𑀣𑀼 𑀲𑀸𑀯𑀓𑁄.

‘‘𑀢𑀁 𑀲𑀼𑀢𑁆𑀯𑀸 𑀫𑀼𑀤𑀺𑀢𑁄 𑀳𑀼𑀢𑁆𑀯𑀸, 𑀬𑀸𑀯𑀚𑀻𑀯𑀁 𑀢𑀤𑀸 𑀚𑀺𑀦𑀁;

𑀧𑀘𑁆𑀘𑀬𑁂𑀳𑀺 𑀉𑀧𑀝𑁆𑀞𑀸𑀲𑀺𑀁, 𑀫𑁂𑀢𑁆𑀢𑀘𑀺𑀢𑁆𑀢𑁄 𑀢𑀣𑀸𑀕𑀢𑀁.

‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀼𑀲𑀺𑀢𑀁 𑀅𑀕𑀫𑀸𑀲𑀳𑀁.

‘‘𑀧𑀘𑁆𑀙𑀺𑀫𑁂 𑀘 𑀪𑀯𑁂 𑀤𑀸𑀦𑀺, 𑀚𑀸𑀢𑁄 𑀯𑀺𑀧𑁆𑀧𑀓𑀼𑀮𑁂 𑀅𑀳𑀁;

𑀧𑀘𑁆𑀘𑀸𑀚𑀸𑀢𑁄 𑀬𑀤𑀸 𑀆𑀲𑀺𑀁, 𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑀺𑀓𑁄.

‘‘𑀲𑀩𑁆𑀩𑀯𑁂𑀤𑀯𑀺𑀤𑀽 𑀚𑀸𑀢𑁄, 𑀯𑀸𑀤𑀲𑀢𑁆𑀣𑀯𑀺𑀲𑀸𑀭𑀤𑁄;

𑀯𑀸𑀤𑀺𑀲𑁆𑀲𑀭𑁄 𑀘𑀺𑀢𑁆𑀢𑀓𑀣𑀻, 𑀧𑀭𑀯𑀸𑀤𑀧𑁆𑀧𑀫𑀤𑁆𑀤𑀦𑁄.

‘‘𑀯𑀗𑁆𑀕𑁂 𑀚𑀸𑀢𑁄𑀢𑀺 𑀯𑀗𑁆𑀕𑀻𑀲𑁄, 𑀯𑀘𑀦𑁂 𑀇𑀲𑁆𑀲𑀭𑁄𑀢𑀺 𑀯𑀸;

𑀯𑀗𑁆𑀕𑀻𑀲𑁄 𑀇𑀢𑀺 𑀫𑁂 𑀦𑀸𑀫𑀁, 𑀅𑀪𑀯𑀻 𑀮𑁄𑀓𑀲𑀫𑁆𑀫𑀢𑀁.

‘‘𑀬𑀤𑀸𑀳𑀁 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄, 𑀞𑀺𑀢𑁄 𑀧𑀞𑀫𑀬𑁄𑀩𑁆𑀩𑀦𑁂;

𑀢𑀤𑀸 𑀭𑀸𑀚𑀕𑀳𑁂 𑀭𑀫𑁆𑀫𑁂, 𑀲𑀸𑀭𑀺𑀧𑀼𑀢𑁆𑀢𑀫𑀳𑀤𑁆𑀤𑀲𑀁.

‘‘𑀧𑀺𑀡𑁆𑀟𑀸𑀬 𑀯𑀺𑀘𑀭𑀦𑁆𑀢𑀁 𑀢𑀁, 𑀧𑀢𑁆𑀢𑀧𑀸𑀡𑀺𑀁 𑀲𑀼𑀲𑀁𑀯𑀼𑀢𑀁;

𑀅𑀮𑁄𑀮𑀓𑁆𑀔𑀺𑀁 𑀫𑀺𑀢𑀪𑀸𑀡𑀺𑀁, 𑀬𑀼𑀕𑀫𑀢𑁆𑀢𑀁 𑀦𑀺𑀤𑀓𑁆𑀔𑀺𑀢𑀁.

‘‘𑀢𑀁 𑀤𑀺𑀲𑁆𑀯𑀸 𑀯𑀺𑀫𑁆𑀳𑀺𑀢𑁄 𑀳𑀼𑀢𑁆𑀯𑀸, 𑀅𑀯𑁄𑀘𑀁 𑀫𑀫𑀦𑀼𑀘𑁆𑀙𑀯𑀁;

𑀓𑀡𑀺𑀓𑀸𑀭𑀁𑀯 𑀦𑀺𑀘𑀺𑀢𑀁, 𑀘𑀺𑀢𑁆𑀢𑀁 𑀕𑀸𑀣𑀸𑀧𑀤𑀁 𑀅𑀳𑀁.

‘‘𑀆𑀘𑀺𑀓𑁆𑀔𑀺 𑀲𑁄 𑀫𑁂 𑀲𑀢𑁆𑀣𑀸𑀭𑀁, 𑀲𑀫𑁆𑀩𑀼𑀤𑁆𑀥𑀁 𑀮𑁄𑀓𑀦𑀸𑀬𑀓𑀁;

𑀢𑀤𑀸 𑀲𑁄 𑀧𑀡𑁆𑀟𑀺𑀢𑁄 𑀯𑀻𑀭𑁄, 𑀉𑀢𑁆𑀢𑀭𑀺𑀁 𑀲𑀫𑀯𑁄𑀘 𑀫𑁂.

‘‘𑀯𑀺𑀭𑀸𑀕𑀲𑀁𑀳𑀺𑀢𑀁 𑀯𑀸𑀓𑁆𑀬𑀁, 𑀓𑀢𑁆𑀯𑀸 𑀤𑀼𑀤𑁆𑀤𑀲𑀫𑀼𑀢𑁆𑀢𑀫𑀁;

𑀯𑀺𑀘𑀺𑀢𑁆𑀢𑀧𑀝𑀺𑀪𑀸𑀦𑁂𑀳𑀺, 𑀢𑁄𑀲𑀺𑀢𑁄 𑀢𑁂𑀦 𑀢𑀸𑀤𑀺𑀦𑀸.

‘‘𑀦𑀺𑀧𑀘𑁆𑀘 𑀲𑀺𑀭𑀲𑀸 𑀧𑀸𑀤𑁂, 𑀧𑀩𑁆𑀩𑀸𑀚𑁂𑀳𑀻𑀢𑀺 𑀫𑀁 𑀩𑁆𑀭𑀯𑀺;

𑀢𑀢𑁄 𑀫𑀁 𑀲 𑀫𑀳𑀸𑀧𑀜𑁆𑀜𑁄, 𑀩𑀼𑀤𑁆𑀥𑀲𑁂𑀝𑁆𑀞𑀫𑀼𑀧𑀸𑀦𑀬𑀺.

‘‘𑀦𑀺𑀧𑀘𑁆𑀘 𑀲𑀺𑀭𑀲𑀸 𑀧𑀸𑀤𑁂, 𑀦𑀺𑀲𑀻𑀤𑀺𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂;

𑀫𑀫𑀸𑀳 𑀯𑀤𑀢𑀁 𑀲𑁂𑀝𑁆𑀞𑁄, 𑀓𑀘𑁆𑀘𑀺 𑀯𑀗𑁆𑀕𑀻𑀲 𑀚𑀸𑀦𑀸𑀲𑀺.

‘‘𑀓𑀺𑀜𑁆𑀘𑀺 𑀲𑀺𑀧𑁆𑀧𑀦𑁆𑀢𑀺 𑀢𑀲𑁆𑀲𑀸𑀳𑀁, 𑀚𑀸𑀦𑀸𑀫𑀻𑀢𑀺 𑀘 𑀅𑀩𑁆𑀭𑀯𑀺𑀁;

𑀫𑀢𑀲𑀻𑀲𑀁 𑀯𑀦𑀘𑁆𑀙𑀼𑀤𑁆𑀥𑀁, 𑀅𑀧𑀺 𑀩𑀸𑀭𑀲𑀯𑀲𑁆𑀲𑀺𑀓𑀁;

𑀢𑀯 𑀯𑀺𑀚𑁆𑀚𑀸𑀯𑀺𑀲𑁂𑀲𑁂𑀦, 𑀲𑀘𑁂 𑀲𑀓𑁆𑀓𑁄𑀲𑀺 𑀯𑀸𑀘𑀬.

‘‘𑀆𑀫𑁄𑀢𑀺 𑀫𑁂 𑀧𑀝𑀺𑀜𑁆𑀜𑀸𑀢𑁂, 𑀢𑀻𑀡𑀺 𑀲𑀻𑀲𑀸𑀦𑀺 𑀤𑀲𑁆𑀲𑀬𑀺;

𑀦𑀺𑀭𑀬𑀦𑀭𑀤𑁂𑀯𑁂𑀲𑀼, 𑀉𑀧𑀧𑀦𑁆𑀦𑁂 𑀅𑀯𑀸𑀘𑀬𑀺𑀁.

‘‘𑀢𑀤𑀸 𑀔𑀻𑀡𑀸𑀲𑀯𑀲𑁆𑀲𑁂𑀯, 𑀲𑀻𑀲𑀁 𑀤𑀲𑁆𑀲𑁂𑀲𑀺 𑀦𑀸𑀬𑀓𑁄;

𑀢𑀢𑁄𑀳𑀁 𑀯𑀺𑀳𑀢𑀸𑀭𑀩𑁆𑀪𑁄, 𑀧𑀩𑁆𑀩𑀚𑁆𑀚𑀁 𑀲𑀫𑀬𑀸𑀘𑀺𑀲𑀁.

‘‘𑀧𑀩𑁆𑀩𑀚𑀺𑀢𑁆𑀯𑀸𑀦 𑀲𑀼𑀕𑀢𑀁, 𑀲𑀦𑁆𑀣𑀯𑀸𑀫𑀺 𑀢𑀳𑀺𑀁 𑀢𑀳𑀺𑀁;

𑀢𑀢𑁄 𑀫𑀁 𑀓𑀩𑁆𑀩𑀯𑀺𑀢𑁆𑀢𑁄𑀲𑀺, 𑀉𑀚𑁆𑀛𑀸𑀬𑀦𑁆𑀢𑀺𑀳 𑀪𑀺𑀓𑁆𑀔𑀯𑁄.

‘‘𑀢𑀢𑁄 𑀯𑀻𑀫𑀁𑀲𑀦𑀢𑁆𑀣𑀁 𑀫𑁂, 𑀆𑀳 𑀩𑀼𑀤𑁆𑀥𑁄 𑀯𑀺𑀦𑀸𑀬𑀓𑁄;

𑀢𑀓𑁆𑀓𑀺𑀓𑀸 𑀧𑀦𑀺𑀫𑀸 𑀕𑀸𑀣𑀸, 𑀞𑀸𑀦𑀲𑁄 𑀧𑀝𑀺𑀪𑀦𑁆𑀢𑀺 𑀢𑀁.

‘‘𑀦 𑀓𑀩𑁆𑀩𑀯𑀺𑀢𑁆𑀢𑁄𑀳𑀁 𑀯𑀻𑀭, 𑀞𑀸𑀦𑀲𑁄 𑀧𑀝𑀺𑀪𑀦𑁆𑀢𑀺 𑀫𑀁;

𑀢𑁂𑀦 𑀳𑀺 𑀤𑀸𑀦𑀺 𑀯𑀗𑁆𑀕𑀻𑀲, 𑀞𑀸𑀦𑀲𑁄 𑀲𑀦𑁆𑀣𑀯𑀸𑀳𑀺 𑀫𑀁.

‘‘𑀢𑀤𑀸𑀳𑀁 𑀲𑀦𑁆𑀣𑀯𑀺𑀁 𑀯𑀻𑀭𑀁, 𑀕𑀸𑀣𑀸𑀳𑀺 𑀇𑀲𑀺𑀲𑀢𑁆𑀢𑀫𑀁;

𑀞𑀸𑀦𑀲𑁄 𑀫𑁂 𑀢𑀤𑀸 𑀢𑀼𑀝𑁆𑀞𑁄, 𑀚𑀺𑀦𑁄 𑀅𑀕𑁆𑀕𑁂 𑀞𑀧𑁂𑀲𑀺 𑀫𑀁.

‘‘𑀧𑀝𑀺𑀪𑀸𑀦𑁂𑀦 𑀘𑀺𑀢𑁆𑀢𑁂𑀦, 𑀅𑀜𑁆𑀜𑁂𑀲𑀫𑀢𑀺𑀫𑀜𑁆𑀜𑀳𑀁;

𑀧𑁂𑀲𑀮𑁂 𑀢𑁂𑀦 𑀲𑀁𑀯𑀺𑀕𑁆𑀕𑁄, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁.

‘‘𑀧𑀝𑀺𑀪𑀸𑀦𑀯𑀢𑀁 𑀅𑀕𑁆𑀕𑁄, 𑀅𑀜𑁆𑀜𑁄 𑀓𑁄𑀘𑀺 𑀦 𑀯𑀺𑀚𑁆𑀚𑀢𑀺;

𑀬𑀣𑀸𑀬𑀁 𑀪𑀺𑀓𑁆𑀔𑀼 𑀯𑀗𑁆𑀕𑀻𑀲𑁄, 𑀏𑀯𑀁 𑀥𑀸𑀭𑁂𑀣 𑀪𑀺𑀓𑁆𑀔𑀯𑁄.

‘‘𑀲𑀢𑀲𑀳𑀲𑁆𑀲𑁂 𑀓𑀢𑀁 𑀓𑀫𑁆𑀫𑀁, 𑀨𑀮𑀁 𑀤𑀲𑁆𑀲𑁂𑀲𑀺 𑀫𑁂 𑀇𑀥;

𑀲𑀼𑀫𑀼𑀢𑁆𑀢𑁄 𑀲𑀭𑀯𑁂𑀕𑁄𑀯, 𑀓𑀺𑀮𑁂𑀲𑁂 𑀛𑀸𑀧𑀬𑀺𑀁 𑀫𑀫.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀦𑀸𑀕𑁄𑀯 𑀩𑀦𑁆𑀥𑀦𑀁 𑀙𑁂𑀢𑁆𑀯𑀸, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀲𑀦𑁆𑀢𑀺𑀓𑁂;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀸 𑀧𑀦 𑀳𑀼𑀢𑁆𑀯𑀸 𑀣𑁂𑀭𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀘𑁆𑀙𑀦𑁆𑀢𑁄 𑀘𑀓𑁆𑀔𑀼𑀧𑀣𑀢𑁄 𑀧𑀝𑁆𑀞𑀸𑀬 𑀘𑀦𑁆𑀤𑁂𑀦, 𑀲𑀽𑀭𑀺𑀬𑁂𑀦, 𑀆𑀓𑀸𑀲𑁂𑀦, 𑀫𑀳𑀸𑀲𑀫𑀼𑀤𑁆𑀤𑁂𑀦, 𑀲𑀺𑀦𑁂𑀭𑀼𑀦𑀸 𑀧𑀩𑁆𑀩𑀢𑀭𑀸𑀚𑁂𑀦, 𑀲𑀻𑀳𑁂𑀦 𑀫𑀺𑀕𑀭𑀜𑁆𑀜𑀸, 𑀳𑀢𑁆𑀣𑀺𑀦𑀸𑀕𑁂𑀦𑀸𑀢𑀺 𑀢𑁂𑀦 𑀢𑁂𑀦 𑀲𑀤𑁆𑀥𑀺𑀁 𑀉𑀧𑀫𑁂𑀦𑁆𑀢𑁄 𑀅𑀦𑁂𑀓𑁂𑀳𑀺 𑀧𑀤𑀲𑀢𑁂𑀳𑀺 𑀲𑀢𑁆𑀣𑀸𑀭𑀁 𑀯𑀡𑁆𑀡𑁂𑀦𑁆𑀢𑁄𑀯 𑀉𑀧𑀕𑀘𑁆𑀙𑀢𑀺. 𑀢𑁂𑀦 𑀢𑀁 𑀲𑀢𑁆𑀣𑀸 𑀲𑀗𑁆𑀖𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 𑀧𑀝𑀺𑀪𑀸𑀦𑀯𑀦𑁆𑀢𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀅𑀣 𑀣𑁂𑀭𑁂𑀦 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀢𑁄 𑀧𑀼𑀩𑁆𑀩𑁂 𑀘 𑀧𑀘𑁆𑀙𑀸 𑀘 𑀢𑀁 𑀢𑀁 𑀘𑀺𑀢𑁆𑀢𑀁 𑀆𑀕𑀫𑁆𑀫 𑀪𑀸𑀲𑀺𑀢𑀸. 𑀣𑁂𑀭𑀁 𑀉𑀤𑁆𑀤𑀺𑀲𑁆𑀲 𑀆𑀦𑀦𑁆𑀤𑀢𑁆𑀣𑁂𑀭𑀸𑀤𑀻𑀳𑀺 𑀪𑀸𑀲𑀺𑀢𑀸 𑀘 𑁋

𑁧𑁨𑁧𑁮. ‘‘𑀦𑀺𑀓𑁆𑀔𑀦𑁆𑀢𑀁 𑀯𑀢 𑀫𑀁 𑀲𑀦𑁆𑀢𑀁, 𑀅𑀕𑀸𑀭𑀲𑁆𑀫𑀸𑀦𑀕𑀸𑀭𑀺𑀬𑀁;

𑀯𑀺𑀢𑀓𑁆𑀓𑀸 𑀉𑀧𑀥𑀸𑀯𑀦𑁆𑀢𑀺, 𑀧𑀕𑀩𑁆𑀪𑀸 𑀓𑀡𑁆𑀳𑀢𑁄 𑀇𑀫𑁂.

𑁧𑁨𑁧𑁯. ‘‘𑀉𑀕𑁆𑀕𑀧𑀼𑀢𑁆𑀢𑀸 𑀫𑀳𑀺𑀲𑁆𑀲𑀸𑀲𑀸, 𑀲𑀺𑀓𑁆𑀔𑀺𑀢𑀸 𑀤𑀴𑁆𑀳𑀥𑀫𑁆𑀫𑀺𑀦𑁄;

𑀲𑀫𑀦𑁆𑀢𑀸 𑀧𑀭𑀺𑀓𑀺𑀭𑁂𑀬𑁆𑀬𑀼𑀁, 𑀲𑀳𑀲𑁆𑀲𑀁 𑀅𑀧𑀮𑀸𑀬𑀺𑀦𑀁.

𑁧𑁨𑁨𑁦. ‘‘𑀲𑀘𑁂𑀧𑀺 𑀏𑀢𑁆𑀢𑀓𑀸 𑀪𑀺𑀬𑁆𑀬𑁄, 𑀆𑀕𑀫𑀺𑀲𑁆𑀲𑀦𑁆𑀢𑀺 𑀇𑀢𑁆𑀣𑀺𑀬𑁄;

𑀦𑁂𑀯 𑀫𑀁 𑀩𑁆𑀬𑀸𑀥𑀬𑀺𑀲𑁆𑀲𑀦𑁆𑀢𑀺, 𑀥𑀫𑁆𑀫𑁂 𑀲𑀫𑁆𑀳𑀺 𑀧𑀢𑀺𑀝𑁆𑀞𑀺𑀢𑁄.

𑁧𑁨𑁨𑁧. ‘‘𑀲𑀓𑁆𑀔𑀻 𑀳𑀺 𑀫𑁂 𑀲𑀼𑀢𑀁 𑀏𑀢𑀁, 𑀩𑀼𑀤𑁆𑀥𑀲𑁆𑀲𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑁄;

𑀦𑀺𑀩𑁆𑀩𑀸𑀦𑀕𑀫𑀦𑀁 𑀫𑀕𑁆𑀕𑀁, 𑀢𑀢𑁆𑀣 𑀫𑁂 𑀦𑀺𑀭𑀢𑁄 𑀫𑀦𑁄.

𑁧𑁨𑁨𑁨. ‘‘𑀏𑀯𑀜𑁆𑀘𑁂 𑀫𑀁 𑀯𑀺𑀳𑀭𑀦𑁆𑀢𑀁, 𑀧𑀸𑀧𑀺𑀫 𑀉𑀧𑀕𑀘𑁆𑀙𑀲𑀺;

𑀢𑀣𑀸 𑀫𑀘𑁆𑀘𑀼 𑀓𑀭𑀺𑀲𑁆𑀲𑀸𑀫𑀺, 𑀦 𑀫𑁂 𑀫𑀕𑁆𑀕𑀫𑁆𑀧𑀺 𑀤𑀓𑁆𑀔𑀲𑀺.

𑁧𑁨𑁨𑁩. ‘‘𑀅𑀭𑀢𑀺𑀜𑁆𑀘 𑀭𑀢𑀺𑀜𑁆𑀘 𑀧𑀳𑀸𑀬, 𑀲𑀩𑁆𑀩𑀲𑁄 𑀕𑁂𑀳𑀲𑀺𑀢𑀜𑁆𑀘 𑀯𑀺𑀢𑀓𑁆𑀓𑀁;

𑀯𑀦𑀣𑀁 𑀦 𑀓𑀭𑁂𑀬𑁆𑀬 𑀓𑀼𑀳𑀺𑀜𑁆𑀘𑀺, 𑀦𑀺𑀩𑁆𑀩𑀦𑀣𑁄 𑀅𑀯𑀦𑀣𑁄 𑀲 𑀪𑀺𑀓𑁆𑀔𑀼.

𑁧𑁨𑁨𑁪. ‘‘𑀬𑀫𑀺𑀥 𑀧𑀣𑀯𑀺𑀜𑁆𑀘 𑀯𑁂𑀳𑀸𑀲𑀁, 𑀭𑀽𑀧𑀕𑀢𑀁 𑀚𑀕𑀢𑁄𑀕𑀥𑀁 𑀓𑀺𑀜𑁆𑀘𑀺;

𑀧𑀭𑀺𑀚𑀻𑀬𑀢𑀺 𑀲𑀩𑁆𑀩𑀫𑀦𑀺𑀘𑁆𑀘𑀁, 𑀏𑀯𑀁 𑀲𑀫𑁂𑀘𑁆𑀘 𑀘𑀭𑀦𑁆𑀢𑀺 𑀫𑀼𑀢𑀢𑁆𑀢𑀸.

𑁧𑁨𑁨𑁫. ‘‘𑀉𑀧𑀥𑀻𑀲𑀼 𑀚𑀦𑀸 𑀕𑀥𑀺𑀢𑀸𑀲𑁂, 𑀤𑀺𑀝𑁆𑀞𑀲𑀼𑀢𑁂 𑀧𑀝𑀺𑀖𑁂 𑀘 𑀫𑀼𑀢𑁂 𑀘;

𑀏𑀢𑁆𑀣 𑀯𑀺𑀦𑁄𑀤𑀬 𑀙𑀦𑁆𑀤𑀫𑀦𑁂𑀚𑁄, 𑀬𑁄 𑀳𑁂𑀢𑁆𑀣 𑀦 𑀮𑀺𑀫𑁆𑀧𑀢𑀺 𑀫𑀼𑀦𑀺 𑀢𑀫𑀸𑀳𑀼.

𑁧𑁨𑁨𑁬. ‘‘𑀅𑀣 𑀲𑀝𑁆𑀞𑀺𑀲𑀺𑀢𑀸 𑀲𑀯𑀺𑀢𑀓𑁆𑀓𑀸, 𑀧𑀼𑀣𑀼𑀚𑁆𑀚𑀦𑀢𑀸𑀬 𑀅𑀥𑀫𑁆𑀫𑀸 𑀦𑀺𑀯𑀺𑀝𑁆𑀞𑀸;

𑀦 𑀘 𑀯𑀕𑁆𑀕𑀕𑀢𑀲𑁆𑀲 𑀓𑀼𑀳𑀺𑀜𑁆𑀘𑀺, 𑀦𑁄 𑀧𑀦 𑀤𑀼𑀝𑁆𑀞𑀼𑀮𑁆𑀮𑀕𑀸𑀳𑀻 𑀲 𑀪𑀺𑀓𑁆𑀔𑀼.

𑁧𑁨𑁨𑁭. ‘‘𑀤𑀩𑁆𑀩𑁄 𑀘𑀺𑀭𑀭𑀢𑁆𑀢𑀲𑀫𑀸𑀳𑀺𑀢𑁄, 𑀅𑀓𑀼𑀳𑀓𑁄 𑀦𑀺𑀧𑀓𑁄 𑀅𑀧𑀺𑀳𑀸𑀮𑀼;

𑀲𑀦𑁆𑀢𑀁 𑀧𑀤𑀁 𑀅𑀚𑁆𑀛𑀕𑀫𑀸 𑀫𑀼𑀦𑀺, 𑀧𑀝𑀺𑀘𑁆𑀘 𑀧𑀭𑀺𑀦𑀺𑀩𑁆𑀩𑀼𑀢𑁄 𑀓𑀗𑁆𑀔𑀢𑀺 𑀓𑀸𑀮𑀁.

𑁧𑁨𑁨𑁮. ‘‘𑀫𑀸𑀦𑀁 𑀧𑀚𑀳𑀲𑁆𑀲𑀼 𑀕𑁄𑀢𑀫, 𑀫𑀸𑀦𑀧𑀣𑀜𑁆𑀘 𑀚𑀳𑀲𑁆𑀲𑀼 𑀅𑀲𑁂𑀲𑀁;

𑀫𑀸𑀦𑀧𑀣𑀫𑁆𑀳𑀺 𑀲 𑀫𑀼𑀘𑁆𑀙𑀺𑀢𑁄, 𑀯𑀺𑀧𑁆𑀧𑀝𑀺𑀲𑀸𑀭𑀻𑀳𑀼𑀯𑀸 𑀘𑀺𑀭𑀭𑀢𑁆𑀢𑀁.

𑁧𑁨𑁨𑁯. ‘‘𑀫𑀓𑁆𑀔𑁂𑀦 𑀫𑀓𑁆𑀔𑀺𑀢𑀸 𑀧𑀚𑀸, 𑀫𑀸𑀦𑀳𑀢𑀸 𑀦𑀺𑀭𑀬𑀁 𑀧𑀧𑀢𑀦𑁆𑀢𑀺;

𑀲𑁄𑀘𑀦𑁆𑀢𑀺 𑀚𑀦𑀸 𑀘𑀺𑀭𑀭𑀢𑁆𑀢𑀁, 𑀫𑀸𑀦𑀳𑀢𑀸 𑀦𑀺𑀭𑀬𑀁 𑀉𑀧𑀧𑀦𑁆𑀦𑀸.

𑁧𑁨𑁩𑁦. ‘‘𑀦 𑀳𑀺 𑀲𑁄𑀘𑀢𑀺 𑀪𑀺𑀓𑁆𑀔𑀼 𑀓𑀤𑀸𑀘𑀺, 𑀫𑀕𑁆𑀕𑀚𑀺𑀦𑁄 𑀲𑀫𑁆𑀫𑀸 𑀧𑀝𑀺𑀧𑀦𑁆𑀦𑁄;

𑀓𑀺𑀢𑁆𑀢𑀺𑀜𑁆𑀘 𑀲𑀼𑀔𑀜𑁆𑀘𑀸𑀦𑀼𑀪𑁄𑀢𑀺, 𑀥𑀫𑁆𑀫𑀤𑀲𑁄𑀢𑀺 𑀢𑀫𑀸𑀳𑀼 𑀢𑀣𑀢𑁆𑀢𑀁.

𑁧𑁨𑁩𑁧. ‘‘𑀢𑀲𑁆𑀫𑀸 𑀅𑀔𑀺𑀮𑁄 𑀇𑀥 𑀧𑀥𑀸𑀦𑀯𑀸, 𑀦𑀻𑀯𑀭𑀡𑀸𑀦𑀺 𑀧𑀳𑀸𑀬 𑀯𑀺𑀲𑀼𑀤𑁆𑀥𑁄;

𑀫𑀸𑀦𑀜𑁆𑀘 𑀧𑀳𑀸𑀬 𑀅𑀲𑁂𑀲𑀁, 𑀯𑀺𑀚𑁆𑀚𑀸𑀬𑀦𑁆𑀢𑀓𑀭𑁄 𑀲𑀫𑀺𑀢𑀸𑀯𑀻.

𑁧𑁨𑁩𑁨. ‘‘𑀓𑀸𑀫𑀭𑀸𑀕𑁂𑀦 𑀟𑀬𑁆𑀳𑀸𑀫𑀺, 𑀘𑀺𑀢𑁆𑀢𑀁 𑀫𑁂 𑀧𑀭𑀺𑀟𑀬𑁆𑀳𑀢𑀺;

𑀲𑀸𑀥𑀼 𑀦𑀺𑀩𑁆𑀩𑀸𑀧𑀦𑀁 𑀩𑁆𑀭𑀽𑀳𑀺, 𑀅𑀦𑀼𑀓𑀫𑁆𑀧𑀸𑀬 𑀕𑁄𑀢𑀫.

𑁧𑁨𑁩𑁩. ‘‘𑀲𑀜𑁆𑀜𑀸𑀬 𑀯𑀺𑀧𑀭𑀺𑀬𑁂𑀲𑀸, 𑀘𑀺𑀢𑁆𑀢𑀁 𑀢𑁂 𑀧𑀭𑀺𑀟𑀬𑁆𑀳𑀢𑀺;

𑀦𑀺𑀫𑀺𑀢𑁆𑀢𑀁 𑀧𑀭𑀺𑀯𑀚𑁆𑀚𑁂𑀳𑀺, 𑀲𑀼𑀪𑀁 𑀭𑀸𑀕𑀽𑀧𑀲𑀁𑀳𑀺𑀢𑀁.

𑁧𑁨𑁩𑁪. ‘‘𑀅𑀲𑀼𑀪𑀸𑀬 𑀘𑀺𑀢𑁆𑀢𑀁 𑀪𑀸𑀯𑁂𑀳𑀺, 𑀏𑀓𑀕𑁆𑀕𑀁 𑀲𑀼𑀲𑀫𑀸𑀳𑀺𑀢𑀁;

𑀲𑀢𑀺 𑀓𑀸𑀬𑀕𑀢𑀸 𑀢𑁆𑀬𑀢𑁆𑀣𑀼, 𑀦𑀺𑀩𑁆𑀩𑀺𑀤𑀸𑀩𑀳𑀼𑀮𑁄 𑀪𑀯.

𑁧𑁨𑁩𑁫. ‘‘𑀅𑀦𑀺𑀫𑀺𑀢𑁆𑀢𑀜𑁆𑀘 𑀪𑀸𑀯𑁂𑀳𑀺, 𑀫𑀸𑀦𑀸𑀦𑀼𑀲𑀬𑀫𑀼𑀚𑁆𑀚𑀳;

𑀢𑀢𑁄 𑀫𑀸𑀦𑀸𑀪𑀺𑀲𑀫𑀬𑀸, 𑀉𑀧𑀲𑀦𑁆𑀢𑁄 𑀘𑀭𑀺𑀲𑁆𑀲𑀲𑀺.

𑁧𑁨𑁩𑁬. ‘‘𑀢𑀫𑁂𑀯 𑀯𑀸𑀘𑀁 𑀪𑀸𑀲𑁂𑀬𑁆𑀬, 𑀬𑀸𑀬𑀢𑁆𑀢𑀸𑀦𑀁 𑀦 𑀢𑀸𑀧𑀬𑁂;

𑀧𑀭𑁂 𑀘 𑀦 𑀯𑀺𑀳𑀺𑀁𑀲𑁂𑀬𑁆𑀬, 𑀲𑀸 𑀯𑁂 𑀯𑀸𑀘𑀸 𑀲𑀼𑀪𑀸𑀲𑀺𑀢𑀸.

𑁧𑁨𑁩𑁭. ‘‘𑀧𑀺𑀬𑀯𑀸𑀘𑀫𑁂𑀯 𑀪𑀸𑀲𑁂𑀬𑁆𑀬, 𑀬𑀸 𑀯𑀸𑀘𑀸 𑀧𑀝𑀺𑀦𑀦𑁆𑀤𑀺𑀢𑀸;

𑀬𑀁 𑀅𑀦𑀸𑀤𑀸𑀬 𑀧𑀸𑀧𑀸𑀦𑀺, 𑀧𑀭𑁂𑀲𑀁 𑀪𑀸𑀲𑀢𑁂 𑀧𑀺𑀬𑀁.

𑁧𑁨𑁩𑁮. ‘‘𑀲𑀘𑁆𑀘𑀁 𑀯𑁂 𑀅𑀫𑀢𑀸 𑀯𑀸𑀘𑀸, 𑀏𑀲 𑀥𑀫𑁆𑀫𑁄 𑀲𑀦𑀦𑁆𑀢𑀦𑁄;

𑀲𑀘𑁆𑀘𑁂 𑀅𑀢𑁆𑀣𑁂 𑀘 𑀥𑀫𑁆𑀫𑁂 𑀘, 𑀆𑀳𑀼 𑀲𑀦𑁆𑀢𑁄 𑀧𑀢𑀺𑀝𑁆𑀞𑀺𑀢𑀸.

𑁧𑁨𑁩𑁯. ‘‘𑀬𑀁 𑀩𑀼𑀤𑁆𑀥𑁄 𑀪𑀸𑀲𑀢𑀺 𑀯𑀸𑀘𑀁, 𑀔𑁂𑀫𑀁 𑀦𑀺𑀩𑁆𑀩𑀸𑀦𑀧𑀢𑁆𑀢𑀺𑀬𑀸;

𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀺𑀭𑀺𑀬𑀸𑀬, 𑀲𑀸 𑀯𑁂 𑀯𑀸𑀘𑀸𑀦𑀫𑀼𑀢𑁆𑀢𑀫𑀸.