𑁯. 𑀦𑀦𑁆𑀤𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸𑀢𑀺 𑀆𑀬𑀲𑁆𑀫𑀢𑁄 𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀁 𑀓𑀺𑀭 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀲𑀬𑀫𑁆𑀧𑀺 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀦𑁆𑀢𑁄 𑀪𑀕𑀯𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀧𑀽𑀚𑀸𑀲𑀓𑁆𑀓𑀸𑀭𑀩𑀳𑀼𑀮𑀁 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸, ‘‘𑀅𑀳𑀫𑁆𑀧𑀺 𑀅𑀦𑀸𑀕𑀢𑁂 𑀢𑀼𑀫𑁆𑀳𑀸𑀤𑀺𑀲𑀲𑁆𑀲 𑀩𑀼𑀤𑁆𑀥𑀲𑁆𑀲 𑀏𑀯𑀭𑀽𑀧𑁄 𑀲𑀸𑀯𑀓𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀧𑀡𑀺𑀥𑀸𑀦𑀁 𑀓𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀅𑀢𑁆𑀣𑀤𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀯𑀺𑀦𑀢𑀸𑀬 𑀦𑀸𑀫 𑀦𑀤𑀺𑀬𑀸 𑀫𑀳𑀦𑁆𑀢𑁄 𑀓𑀘𑁆𑀙𑀧𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄 𑀏𑀓𑀤𑀺𑀯𑀲𑀁 𑀲𑀢𑁆𑀣𑀸𑀭𑀁 𑀦𑀤𑀺𑀬𑀸 𑀧𑀸𑀭𑀁 𑀕𑀦𑁆𑀢𑀼𑀁 𑀢𑀻𑀭𑁂 𑀞𑀺𑀢𑀁 𑀤𑀺𑀲𑁆𑀯𑀸 𑀲𑀬𑀁 𑀪𑀕𑀯𑀦𑁆𑀢𑀁 𑀢𑀸𑀭𑁂𑀢𑀼𑀓𑀸𑀫𑁄 𑀲𑀢𑁆𑀣𑀼 𑀧𑀸𑀤𑀫𑀽𑀮𑁂 𑀦𑀺𑀧𑀚𑁆𑀚𑀺. 𑀲𑀢𑁆𑀣𑀸 𑀢𑀲𑁆𑀲 𑀅𑀚𑁆𑀛𑀸𑀲𑀬𑀁 𑀑𑀮𑁄𑀓𑁂𑀢𑁆𑀯𑀸 𑀧𑀺𑀝𑁆𑀞𑀺𑀁 𑀅𑀪𑀺𑀭𑀼𑀳𑀺. 𑀲𑁄 𑀳𑀝𑁆𑀞𑀢𑀼𑀝𑁆𑀞𑁄 𑀯𑁂𑀕𑁂𑀦 𑀲𑁄𑀢𑀁 𑀙𑀺𑀦𑁆𑀤𑀦𑁆𑀢𑁄 𑀲𑀻𑀖𑀢𑀭𑀁 𑀧𑀭𑀢𑀻𑀭𑀫𑁂𑀯 𑀧𑀸𑀧𑁂𑀲𑀺. 𑀪𑀕𑀯𑀸 𑀢𑀲𑁆𑀲 𑀅𑀦𑀼𑀫𑁄𑀤𑀦𑀁 𑀯𑀤𑀦𑁆𑀢𑁄 𑀪𑀸𑀯𑀺𑀦𑀺𑀁 𑀲𑀫𑁆𑀧𑀢𑁆𑀢𑀺𑀁 𑀓𑀣𑁂𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀲𑀼𑀕𑀢𑀻𑀲𑀼𑀬𑁂𑀯 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀲𑁆𑀲 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀫𑀳𑀸𑀧𑀚𑀸𑀧𑀢𑀺𑀬𑀸 𑀕𑁄𑀢𑀫𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀜𑀸𑀢𑀺𑀲𑀗𑁆𑀖𑀁 𑀦𑀦𑁆𑀤𑁂𑀦𑁆𑀢𑁄 𑀚𑀸𑀢𑁄𑀢𑀺 𑀦𑀦𑁆𑀤𑁄𑀢𑁆𑀯𑁂𑀯 𑀦𑀸𑀫𑀁 𑀅𑀓𑀁𑀲𑀼. 𑀢𑀲𑁆𑀲 𑀯𑀬𑀧𑁆𑀧𑀢𑁆𑀢𑀓𑀸𑀮𑁂 𑀲𑀢𑁆𑀣𑀸 𑀧𑀯𑀢𑁆𑀢𑀯𑀭𑀥𑀫𑁆𑀫𑀘𑀓𑁆𑀓𑁄 𑀮𑁄𑀓𑀸𑀦𑀼𑀕𑁆𑀕𑀳𑀁 𑀓𑀭𑁄𑀦𑁆𑀢𑁄 𑀓𑀧𑀺𑀮𑀯𑀢𑁆𑀣𑀼𑀁 𑀕𑀦𑁆𑀢𑁆𑀯𑀸 𑀜𑀸𑀢𑀺𑀲𑀫𑀸𑀕𑀫𑁂 𑀧𑁄𑀓𑁆𑀔𑀭𑀯𑀲𑁆𑀲𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀯𑁂𑀲𑁆𑀲𑀦𑁆𑀢𑀭𑀚𑀸𑀢𑀓𑀁 (𑀚𑀸. 𑁨.𑁨𑁨.𑁧𑁬𑁫𑁫 𑀆𑀤𑀬𑁄) 𑀓𑀣𑁂𑀢𑁆𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑁄 ‘‘𑀉𑀢𑁆𑀢𑀺𑀝𑁆𑀞𑁂 𑀦𑀧𑁆𑀧𑀫𑀚𑁆𑀚𑁂𑀬𑁆𑀬𑀸’’𑀢𑀺 (𑀥. 𑀧. 𑁧𑁬𑁮) 𑀕𑀸𑀣𑀸𑀬 𑀧𑀺𑀢𑀭𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀦𑀺𑀯𑁂𑀲𑀦𑀁 𑀕𑀦𑁆𑀢𑁆𑀯𑀸 ‘‘𑀥𑀫𑁆𑀫𑀁 𑀘𑀭𑁂 𑀲𑀼𑀘𑀭𑀺𑀢’’𑀦𑁆𑀢𑀺 (𑀥. 𑀧. 𑁧𑁬𑁯) 𑀕𑀸𑀣𑀸𑀬 𑀫𑀳𑀸𑀧𑀚𑀸𑀧𑀢𑀺𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀭𑀸𑀚𑀸𑀦𑀁 𑀲𑀓𑀤𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀢𑀢𑀺𑀬𑁂 𑀤𑀺𑀯𑀲𑁂 𑀦𑀦𑁆𑀤𑀓𑀼𑀫𑀸𑀭𑀲𑁆𑀲 𑀅𑀪𑀺𑀲𑁂𑀓𑀦𑀺𑀯𑁂𑀲𑀦𑀧𑁆𑀧𑀯𑁂𑀲𑀦𑀯𑀺𑀯𑀸𑀳𑀫𑀗𑁆𑀕𑀮𑁂𑀲𑀼 𑀯𑀢𑁆𑀢𑀫𑀸𑀦𑁂𑀲𑀼 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀢𑁆𑀯𑀸 𑀦𑀦𑁆𑀤𑀓𑀼𑀫𑀸𑀭𑀲𑁆𑀲 𑀳𑀢𑁆𑀣𑁂 𑀧𑀢𑁆𑀢𑀁 𑀤𑀢𑁆𑀯𑀸 𑀫𑀗𑁆𑀕𑀮𑀁 𑀯𑀢𑁆𑀯𑀸 𑀢𑀲𑁆𑀲 𑀳𑀢𑁆𑀣𑀢𑁄 𑀧𑀢𑁆𑀢𑀁 𑀅𑀕𑀳𑁂𑀢𑁆𑀯𑀸𑀯 𑀯𑀺𑀳𑀸𑀭𑀁 𑀕𑀢𑁄 𑀢𑀁 𑀧𑀢𑁆𑀢𑀳𑀢𑁆𑀣𑀁 𑀯𑀺𑀳𑀸𑀭𑀁 𑀆𑀕𑀢𑀁 𑀅𑀦𑀺𑀘𑁆𑀙𑀫𑀸𑀦𑀁𑀬𑁂𑀯 𑀧𑀩𑁆𑀩𑀸𑀚𑁂𑀢𑁆𑀯𑀸 𑀢𑀣𑀸 𑀧𑀩𑁆𑀩𑀚𑀺𑀢𑀢𑁆𑀢𑀸𑀬𑁂𑀯 𑀅𑀦𑀪𑀺𑀭𑀢𑀺𑀬𑀸 𑀧𑀻𑀴𑀺𑀢𑀁 𑀜𑀢𑁆𑀯𑀸 𑀉𑀧𑀸𑀬𑁂𑀦 𑀢𑀲𑁆𑀲 𑀢𑀁 𑀅𑀦𑀪𑀺𑀭𑀢𑀺𑀁 𑀯𑀺𑀦𑁄𑀤𑁂𑀲𑀺. 𑀲𑁄 𑀬𑁄𑀦𑀺𑀲𑁄 𑀧𑀝𑀺𑀲𑀗𑁆𑀔𑀸𑀬 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭 𑁨.𑁪𑁯.𑁧𑁪𑁮-𑁧𑁬𑁩) 𑁋

‘‘𑀅𑀢𑁆𑀣𑀤𑀲𑁆𑀲𑀻 𑀢𑀼 𑀪𑀕𑀯𑀸, 𑀲𑀬𑀫𑁆𑀪𑀽 𑀮𑁄𑀓𑀦𑀸𑀬𑀓𑁄;

𑀯𑀺𑀦𑀢𑀸𑀦𑀤𑀺𑀬𑀸 𑀢𑀻𑀭𑀁, 𑀉𑀧𑀸𑀕𑀘𑁆𑀙𑀺 𑀢𑀣𑀸𑀕𑀢𑁄.

‘‘𑀉𑀤𑀓𑀸 𑀅𑀪𑀺𑀦𑀺𑀓𑁆𑀔𑀫𑁆𑀫, 𑀓𑀘𑁆𑀙𑀧𑁄 𑀯𑀸𑀭𑀺𑀕𑁄𑀘𑀭𑁄;

𑀩𑀼𑀤𑁆𑀥𑀁 𑀢𑀸𑀭𑁂𑀢𑀼𑀓𑀸𑀫𑁄𑀳𑀁, 𑀉𑀧𑁂𑀲𑀺𑀁 𑀮𑁄𑀓𑀦𑀸𑀬𑀓𑀁.

‘‘𑀅𑀪𑀺𑀭𑀽𑀳𑀢𑀼 𑀫𑀁 𑀩𑀼𑀤𑁆𑀥𑁄, 𑀅𑀢𑁆𑀣𑀤𑀲𑁆𑀲𑀻 𑀫𑀳𑀸𑀫𑀼𑀦𑀺;

𑀅𑀳𑀁 𑀢𑀁 𑀢𑀸𑀭𑀬𑀺𑀲𑁆𑀲𑀸𑀫𑀺, 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀢𑀼𑀯𑀁.

‘‘𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀅𑀢𑁆𑀣𑀤𑀲𑁆𑀲𑀻 𑀫𑀳𑀸𑀬𑀲𑁄;

𑀅𑀪𑀺𑀭𑀽𑀳𑀺𑀢𑁆𑀯𑀸 𑀫𑁂 𑀧𑀺𑀝𑁆𑀞𑀺𑀁, 𑀅𑀝𑁆𑀞𑀸𑀲𑀺 𑀮𑁄𑀓𑀦𑀸𑀬𑀓𑁄.

‘‘𑀬𑀢𑁄 𑀲𑀭𑀸𑀫𑀺 𑀅𑀢𑁆𑀢𑀸𑀦𑀁, 𑀬𑀢𑁄 𑀧𑀢𑁆𑀢𑁄𑀲𑁆𑀫𑀺 𑀯𑀺𑀜𑁆𑀜𑀼𑀢𑀁;

𑀲𑀼𑀔𑀁 𑀫𑁂 𑀢𑀸𑀤𑀺𑀲𑀁 𑀦𑀢𑁆𑀣𑀺, 𑀨𑀼𑀝𑁆𑀞𑁂 𑀧𑀸𑀤𑀢𑀮𑁂 𑀬𑀣𑀸.

‘‘𑀉𑀢𑁆𑀢𑀭𑀺𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑁄, 𑀅𑀢𑁆𑀣𑀤𑀲𑁆𑀲𑀻 𑀫𑀳𑀸𑀬𑀲𑁄;

𑀦𑀤𑀺𑀢𑀻𑀭𑀫𑁆𑀳𑀺 𑀞𑀢𑁆𑀯𑀸𑀦, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

‘‘𑀬𑀸𑀯𑀢𑀸 𑀯𑀢𑁆𑀢𑀢𑁂 𑀘𑀺𑀢𑁆𑀢𑀁, 𑀕𑀗𑁆𑀕𑀸𑀲𑁄𑀢𑀁 𑀢𑀭𑀸𑀫𑀳𑀁;

𑀅𑀬𑀜𑁆𑀘 𑀓𑀘𑁆𑀙𑀧𑁄 𑀭𑀸𑀚𑀸, 𑀢𑀸𑀭𑁂𑀲𑀺 𑀫𑀫 𑀧𑀜𑁆𑀜𑀯𑀸.

‘‘𑀇𑀫𑀺𑀦𑀸 𑀩𑀼𑀤𑁆𑀥𑀢𑀭𑀡𑁂𑀦, 𑀫𑁂𑀢𑁆𑀢𑀘𑀺𑀢𑁆𑀢𑀯𑀢𑀸𑀬 𑀘;

𑀅𑀝𑁆𑀞𑀸𑀭𑀲𑁂 𑀓𑀧𑁆𑀧𑀲𑀢𑁂, 𑀤𑁂𑀯𑀮𑁄𑀓𑁂 𑀭𑀫𑀺𑀲𑁆𑀲𑀢𑀺.

‘‘𑀤𑁂𑀯𑀮𑁄𑀓𑀸 𑀇𑀥𑀸𑀕𑀦𑁆𑀢𑁆𑀯𑀸, 𑀲𑀼𑀓𑁆𑀓𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀏𑀓𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀓𑀗𑁆𑀔𑀸𑀲𑁄𑀢𑀁 𑀢𑀭𑀺𑀲𑁆𑀲𑀢𑀺.

‘‘𑀬𑀣𑀸𑀧𑀺 𑀪𑀤𑁆𑀤𑀓𑁂 𑀔𑁂𑀢𑁆𑀢𑁂, 𑀩𑀻𑀚𑀁 𑀅𑀧𑁆𑀧𑀫𑁆𑀧𑀺 𑀭𑁄𑀧𑀺𑀢𑀁;

𑀲𑀫𑁆𑀫𑀸𑀥𑀸𑀭𑀁 𑀧𑀯𑁂𑀘𑁆𑀙𑀦𑁆𑀢𑁂, 𑀨𑀮𑀁 𑀢𑁄𑀲𑁂𑀢𑀺 𑀓𑀲𑁆𑀲𑀓𑀁.

‘‘𑀢𑀣𑁂𑀯𑀺𑀤𑀁 𑀩𑀼𑀤𑁆𑀥𑀔𑁂𑀢𑁆𑀢𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀤𑁂𑀲𑀺𑀢𑀁;

𑀲𑀫𑁆𑀫𑀸𑀥𑀸𑀭𑀁 𑀧𑀯𑁂𑀘𑁆𑀙𑀦𑁆𑀢𑁂, 𑀨𑀮𑀁 𑀫𑀁 𑀢𑁄𑀲𑀬𑀺𑀲𑁆𑀲𑀢𑀺.

‘‘𑀧𑀥𑀸𑀦𑀧𑀳𑀺𑀢𑀢𑁆𑀢𑁄𑀫𑁆𑀳𑀺, 𑀉𑀧𑀲𑀦𑁆𑀢𑁄 𑀦𑀺𑀭𑀽𑀧𑀥𑀺;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

‘‘𑀅𑀝𑁆𑀞𑀸𑀭𑀲𑁂 𑀓𑀧𑁆𑀧𑀲𑀢𑁂, 𑀬𑀁 𑀓𑀫𑁆𑀫𑀫𑀓𑀭𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀢𑀭𑀡𑀸𑀬 𑀇𑀤𑀁 𑀨𑀮𑀁.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀯𑀺𑀫𑀼𑀢𑁆𑀢𑀺𑀲𑀼𑀔𑀁 𑀅𑀦𑀼𑀪𑀯𑀦𑁆𑀢𑁄 ‘‘𑀅𑀳𑁄 𑀲𑀢𑁆𑀣𑀼 𑀉𑀧𑀸𑀬𑀓𑁄𑀲𑀮𑁆𑀮𑀁, 𑀬𑁂𑀦𑀸𑀳𑀁 𑀪𑀯𑀧𑀗𑁆𑀓𑀢𑁄 𑀉𑀤𑁆𑀥𑀭𑀺𑀢𑁆𑀯𑀸 𑀦𑀺𑀩𑁆𑀩𑀸𑀦𑀣𑀮𑁂 𑀧𑀢𑀺𑀝𑁆𑀞𑀸𑀧𑀺𑀢𑁄’’𑀢𑀺 𑀅𑀢𑁆𑀢𑀦𑁄 𑀧𑀳𑀻𑀦𑀲𑀁𑀓𑀺𑀮𑁂𑀲𑀁 𑀧𑀝𑀺𑀮𑀤𑁆𑀥𑀜𑁆𑀘 𑀲𑀼𑀔𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀲𑀜𑁆𑀚𑀸𑀢𑀲𑁄𑀫𑀦𑀲𑁆𑀲𑁄 𑀉𑀤𑀸𑀦𑀯𑀲𑁂𑀦 𑁋

𑁧𑁫𑁭. ‘‘𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸, 𑀫𑀡𑁆𑀟𑀦𑀁 𑀅𑀦𑀼𑀬𑀼𑀜𑁆𑀚𑀺𑀲𑀁;

𑀉𑀤𑁆𑀥𑀢𑁄 𑀘𑀧𑀮𑁄 𑀘𑀸𑀲𑀺𑀁, 𑀓𑀸𑀫𑀭𑀸𑀕𑁂𑀦 𑀅𑀝𑁆𑀝𑀺𑀢𑁄.

𑁧𑁫𑁮. ‘‘𑀉𑀧𑀸𑀬𑀓𑀼𑀲𑀮𑁂𑀦𑀸𑀳𑀁, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀬𑁄𑀦𑀺𑀲𑁄 𑀧𑀝𑀺𑀧𑀚𑁆𑀚𑀺𑀢𑁆𑀯𑀸, 𑀪𑀯𑁂 𑀘𑀺𑀢𑁆𑀢𑀁 𑀉𑀤𑀩𑁆𑀩𑀳𑀺’’𑀦𑁆𑀢𑀺. 𑁋 𑀕𑀸𑀣𑀸𑀤𑁆𑀯𑀬𑀁 𑀅𑀪𑀸𑀲𑀺;

𑀢𑀢𑁆𑀣 𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸𑀢𑀺 𑀅𑀦𑀼𑀧𑀸𑀬𑀫𑀦𑀲𑀺𑀓𑀸𑀭𑀢𑁄 𑀅𑀲𑀼𑀪𑀁 𑀓𑀸𑀬𑀁 𑀲𑀼𑀪𑀢𑁄 𑀫𑀦𑀲𑀺 𑀓𑀭𑀺𑀢𑁆𑀯𑀸 𑀲𑀼𑀪𑀢𑁄 𑀫𑀦𑀲𑀺𑀓𑀸𑀭𑀳𑁂𑀢𑀼, 𑀅𑀲𑀼𑀪𑀁 𑀓𑀸𑀬𑀁 𑀲𑀼𑀪𑀲𑀜𑁆𑀜𑀸𑀬𑀸𑀢𑀺 𑀅𑀢𑁆𑀣𑁄. 𑀫𑀡𑁆𑀟𑀦𑀦𑁆𑀢𑀺 𑀳𑀢𑁆𑀣𑀽𑀧𑀕𑀸𑀤𑀺𑀆𑀪𑀭𑀡𑁂𑀳𑀺 𑀘𑁂𑀯 𑀫𑀸𑀮𑀸𑀕𑀦𑁆𑀥𑀸𑀤𑀻𑀳𑀺 𑀘 𑀅𑀢𑁆𑀢𑀪𑀸𑀯𑀲𑁆𑀲 𑀅𑀮𑀗𑁆𑀓𑀭𑀡𑀁. 𑀅𑀦𑀼𑀬𑀼𑀜𑁆𑀚𑀺𑀲𑀦𑁆𑀢𑀺 𑀅𑀦𑀼𑀬𑀼𑀜𑁆𑀚𑀺𑀁, 𑀲𑀭𑀻𑀭𑀲𑁆𑀲 𑀯𑀺𑀪𑀽𑀲𑀦𑀧𑁆𑀧𑀲𑀼𑀢𑁄 𑀅𑀳𑁄𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀉𑀤𑁆𑀥𑀢𑁄𑀢𑀺 𑀚𑀸𑀢𑀺𑀕𑁄𑀢𑁆𑀢𑀭𑀽𑀧𑀬𑁄𑀩𑁆𑀩𑀦𑀫𑀤𑀸𑀤𑀻𑀳𑀺 𑀉𑀤𑁆𑀥𑀢𑁄 𑀅𑀯𑀽𑀧𑀲𑀦𑁆𑀢𑀘𑀺𑀢𑁆𑀢𑁄. 𑀘𑀧𑀮𑁄𑀢𑀺 𑀯𑀦𑀫𑀓𑁆𑀓𑀝𑁄 𑀯𑀺𑀬 𑀅𑀦𑀯𑀝𑁆𑀞𑀺𑀢𑀘𑀺𑀢𑁆𑀢𑀢𑀸𑀬 𑀮𑁄𑀮𑁄, 𑀓𑀸𑀬𑀫𑀡𑁆𑀟𑀦𑀯𑀢𑁆𑀣𑀫𑀡𑁆𑀟𑀦𑀸𑀤𑀺𑀘𑀸𑀧𑀮𑁆𑀬𑁂 𑀬𑀼𑀢𑁆𑀢𑀢𑀸𑀬 𑀯𑀸 𑀘𑀧𑀮𑁄 𑀘. 𑀆𑀲𑀺𑀦𑁆𑀢𑀺 𑀅𑀳𑁄𑀲𑀺𑀁. 𑀓𑀸𑀫𑀭𑀸𑀕𑁂𑀦𑀸𑀢𑀺 𑀯𑀢𑁆𑀣𑀼𑀓𑀸𑀫𑁂𑀲𑀼 𑀙𑀦𑁆𑀤𑀭𑀸𑀕𑁂𑀦 𑀅𑀝𑁆𑀝𑀺𑀢𑁄 𑀧𑀻𑀴𑀺𑀢𑁄 𑀯𑀺𑀩𑀸𑀥𑀺𑀢𑁄 𑀆𑀲𑀺𑀦𑁆𑀢𑀺 𑀬𑁄𑀚𑀦𑀸.

𑀉𑀧𑀸𑀬𑀓𑀼𑀲𑀮𑁂𑀦𑀸𑀢𑀺 𑀯𑀺𑀦𑁂𑀬𑁆𑀬𑀸𑀦𑀁 𑀤𑀫𑀦𑀽𑀧𑀸𑀬𑀘𑁆𑀙𑁂𑀓𑁂𑀦 𑀓𑁄𑀯𑀺𑀤𑁂𑀦 𑀩𑀼𑀤𑁆𑀥𑁂𑀦 𑀪𑀕𑀯𑀢𑀸 𑀳𑁂𑀢𑀼𑀪𑀽𑀢𑁂𑀦. 𑀳𑁂𑀢𑀼𑀅𑀢𑁆𑀣𑁂 𑀳𑀺 𑀏𑀢𑀁 𑀓𑀭𑀡𑀯𑀘𑀦𑀁. 𑀧𑀮𑀼𑀝𑁆𑀞𑀫𑀓𑁆𑀓𑀝𑀻𑀤𑁂𑀯𑀘𑁆𑀙𑀭𑀸𑀤𑀲𑁆𑀲𑀦𑁂𑀦 𑀳𑀺 𑀉𑀧𑀓𑁆𑀓𑀺𑀢𑀯𑀸𑀤𑀘𑁄𑀤𑀦𑀸𑀬 𑀅𑀢𑁆𑀢𑀦𑁄 𑀓𑀸𑀫𑀭𑀸𑀕𑀸𑀧𑀦𑀬𑀦𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀪𑀕𑀯𑀸 𑀳𑀺 𑀆𑀬𑀲𑁆𑀫𑀦𑁆𑀢𑀁 𑀦𑀦𑁆𑀤𑀢𑁆𑀣𑁂𑀭𑀁 𑀧𑀞𑀫𑀁 𑀚𑀦𑀧𑀤𑀓𑀮𑁆𑀬𑀸𑀡𑀺𑀁 𑀉𑀧𑀸𑀤𑀸𑀬 ‘‘𑀬𑀣𑀸𑀬𑀁 𑀫𑀓𑁆𑀓𑀝𑀻, 𑀏𑀯𑀁 𑀓𑀓𑀼𑀝𑀧𑀸𑀤𑀺𑀦𑀺𑀬𑁄 𑀉𑀧𑀸𑀤𑀸𑀬 𑀚𑀦𑀧𑀤𑀓𑀮𑁆𑀬𑀸𑀡𑀻’’𑀢𑀺 𑀫𑀳𑀢𑀺𑀬𑀸 𑀆𑀡𑀺𑀬𑀸 𑀔𑀼𑀤𑁆𑀤𑀓𑀁 𑀆𑀡𑀺𑀁 𑀦𑀻𑀳𑀭𑀦𑁆𑀢𑁄 𑀙𑀟𑁆𑀟𑀓𑁄 𑀯𑀺𑀬, 𑀲𑀺𑀦𑁂𑀳𑀧𑀸𑀦𑁂𑀦 𑀲𑀭𑀻𑀭𑀁 𑀓𑀺𑀮𑁂𑀤𑁂𑀢𑁆𑀯𑀸 𑀯𑀫𑀦𑀯𑀺𑀭𑁂𑀘𑀦𑁂𑀳𑀺 𑀤𑁄𑀲𑀁 𑀦𑀻𑀳𑀭𑀦𑁆𑀢𑁄 𑀪𑀺𑀲𑀓𑁆𑀓𑁄 𑀯𑀺𑀬 𑀘 𑀓𑀓𑀼𑀝𑀧𑀸𑀤𑀺𑀦𑀺𑀤𑀲𑁆𑀲𑀦𑁂𑀦 𑀚𑀦𑀧𑀤𑀓𑀮𑁆𑀬𑀸𑀡𑀺𑀬𑀁 𑀯𑀺𑀭𑀢𑁆𑀢𑀘𑀺𑀢𑁆𑀢𑀁 𑀓𑀸𑀭𑁂𑀢𑁆𑀯𑀸 𑀧𑀼𑀦 𑀉𑀧𑀓𑁆𑀓𑀺𑀢𑀯𑀸𑀤𑁂𑀦 𑀓𑀓𑀼𑀝𑀧𑀸𑀤𑀺𑀦𑀻𑀲𑀼𑀧𑀺 𑀘𑀺𑀢𑁆𑀢𑀁 𑀯𑀺𑀭𑀸𑀚𑁂𑀢𑁆𑀯𑀸 𑀲𑀫𑁆𑀫𑀤𑁂𑀯 𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀼𑀬𑁄𑀕𑁂𑀦 𑀅𑀭𑀺𑀬𑀫𑀕𑁆𑀕𑁂 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑁄𑀦𑀺𑀲𑁄 𑀧𑀝𑀺𑀧𑀚𑁆𑀚𑀺𑀢𑁆𑀯𑀸, 𑀪𑀯𑁂 𑀘𑀺𑀢𑁆𑀢𑀁 𑀉𑀤𑀩𑁆𑀩𑀳𑀺’’𑀦𑁆𑀢𑀺. 𑀉𑀧𑀸𑀬𑁂𑀦 𑀜𑀸𑀬𑁂𑀦 𑀲𑀫𑁆𑀫𑀤𑁂𑀯 𑀲𑀫𑀣𑀯𑀺𑀧𑀲𑁆𑀲𑀦𑀸𑀬 𑀯𑀺𑀲𑀼𑀤𑁆𑀥𑀺𑀧𑀝𑀺𑀧𑀤𑀁 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀪𑀯𑁂 𑀲𑀁𑀲𑀸𑀭𑀧𑀗𑁆𑀓𑁂 𑀦𑀺𑀫𑀼𑀕𑁆𑀕𑀜𑁆𑀘 𑀫𑁂 𑀘𑀺𑀢𑁆𑀢𑀁 𑀅𑀭𑀺𑀬𑀫𑀕𑁆𑀕𑁂𑀦 𑀳𑀢𑁆𑀣𑁂𑀦 𑀉𑀢𑁆𑀢𑀸𑀭𑀺𑀁, 𑀦𑀺𑀩𑁆𑀩𑀸𑀦𑀣𑀮𑁂 𑀧𑀢𑀺𑀝𑁆𑀞𑀸𑀧𑁂𑀲𑀺𑀦𑁆𑀢𑀺 𑀅𑀢𑁆𑀣𑁄.

𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀢𑁆𑀯𑀸 𑀣𑁂𑀭𑁄 𑀧𑀼𑀦𑀤𑀺𑀯𑀲𑁂 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀬𑀁 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀧𑀸𑀝𑀺𑀪𑁄𑀕𑁄 𑀧𑀜𑁆𑀘𑀦𑁆𑀦𑀁 𑀅𑀘𑁆𑀙𑀭𑀸𑀲𑀢𑀸𑀦𑀁 𑀧𑀝𑀺𑀮𑀸𑀪𑀸𑀬 𑀓𑀓𑀼𑀝𑀧𑀸𑀤𑀸𑀦𑀁, 𑀫𑀼𑀜𑁆𑀘𑀸𑀫𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀏𑀢𑀲𑁆𑀫𑀸 𑀧𑀝𑀺𑀲𑁆𑀲𑀯𑀸’’𑀢𑀺 (𑀉𑀤𑀸. 𑁨𑁨). 𑀪𑀕𑀯𑀸𑀧𑀺, ‘‘𑀬𑀤𑁂𑀯 𑀔𑁄 𑀢𑁂, 𑀦𑀦𑁆𑀤, 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀢𑁆𑀢𑀁, 𑀅𑀣𑀸𑀳𑀁 𑀫𑀼𑀢𑁆𑀢𑁄 𑀏𑀢𑀲𑁆𑀫𑀸 𑀧𑀝𑀺𑀲𑁆𑀲𑀯𑀸’’𑀢𑀺 (𑀉𑀤𑀸. 𑁨𑁨) 𑀆𑀳. 𑀅𑀣𑀲𑁆𑀲 𑀪𑀕𑀯𑀸 𑀲𑀯𑀺𑀲𑁂𑀲𑀁 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀁 𑀜𑀢𑁆𑀯𑀸 𑀢𑀁 𑀕𑀼𑀡𑀁 𑀯𑀺𑀪𑀸𑀯𑁂𑀦𑁆𑀢𑁄, ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀸𑀦𑀁 𑀬𑀤𑀺𑀤𑀁 𑀦𑀦𑁆𑀤𑁄’’𑀢𑀺 (𑀅. 𑀦𑀺. 𑁧.𑁨𑁧𑁯, 𑁨𑁩𑁦) 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀪𑀸𑀯𑁂𑀦 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀣𑁂𑀭𑁄 𑀳𑀺 ‘‘𑀬𑀫𑁂𑀯𑀸𑀳𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀅𑀲𑀁𑀯𑀭𑀁 𑀦𑀺𑀲𑁆𑀲𑀸𑀬 𑀇𑀫𑀁 𑀯𑀺𑀧𑁆𑀧𑀓𑀸𑀭𑀁 𑀧𑀢𑁆𑀢𑁄, 𑀢𑀫𑁂𑀯𑀸𑀳𑀁 𑀲𑀼𑀝𑁆𑀞𑀼 𑀦𑀺𑀕𑁆𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀉𑀲𑁆𑀲𑀸𑀳𑀚𑀸𑀢𑁄 𑀩𑀮𑀯𑀳𑀺𑀭𑁄𑀢𑁆𑀢𑀧𑁆𑀧𑁄 𑀢𑀢𑁆𑀣 𑀘 𑀓𑀢𑀸𑀥𑀺𑀓𑀸𑀭𑀢𑁆𑀢𑀸 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁂 𑀉𑀓𑁆𑀓𑀁𑀲𑀧𑀸𑀭𑀫𑀺𑀁 𑀅𑀕𑀫𑀸𑀲𑀻𑀢𑀺.

𑀦𑀦𑁆𑀤𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.