𑁧. 𑀢𑀸𑀮𑀧𑀼𑀝𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀧𑀜𑁆𑀜𑀸𑀲𑀦𑀺𑀧𑀸𑀢𑁂 𑀓𑀤𑀸 𑀦𑀼𑀳𑀦𑁆𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀢𑀸𑀮𑀧𑀼𑀝𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀭𑀸𑀚𑀕𑀳𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀦𑀝𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀓𑀼𑀮𑀸𑀦𑀼𑀭𑀽𑀧𑁂𑀲𑀼 𑀦𑀘𑁆𑀘𑀝𑁆𑀞𑀸𑀦𑁂𑀲𑀼 𑀦𑀺𑀧𑁆𑀨𑀢𑁆𑀢𑀺𑀁 𑀕𑀦𑁆𑀢𑁆𑀯𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀧𑀸𑀓𑀝𑁄 𑀦𑀝𑀕𑀸𑀫𑀡𑀺 𑀅𑀳𑁄𑀲𑀺. 𑀲𑁄 𑀧𑀜𑁆𑀘𑀲𑀢𑀫𑀸𑀢𑀼𑀕𑀸𑀫𑀧𑀭𑀺𑀯𑀸𑀭𑁄 𑀫𑀳𑀢𑀸 𑀦𑀝𑀯𑀺𑀪𑀯𑁂𑀦 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀻𑀲𑀼 𑀲𑀫𑀚𑁆𑀚𑀁 𑀤𑀲𑁆𑀲𑁂𑀢𑁆𑀯𑀸, 𑀫𑀳𑀦𑁆𑀢𑀁 𑀧𑀽𑀚𑀸𑀲𑀓𑁆𑀓𑀸𑀭𑀁 𑀮𑀪𑀺𑀢𑁆𑀯𑀸, 𑀯𑀺𑀘𑀭𑀦𑁆𑀢𑁄 𑀭𑀸𑀚𑀕𑀳𑀁 𑀆𑀕𑀦𑁆𑀢𑁆𑀯𑀸, 𑀦𑀕𑀭𑀯𑀸𑀲𑀻𑀦𑀁 𑀲𑀫𑀚𑁆𑀚𑀁 𑀤𑀲𑁆𑀲𑁂𑀢𑁆𑀯𑀸, 𑀮𑀤𑁆𑀥𑀲𑀫𑁆𑀫𑀸𑀦𑀲𑀓𑁆𑀓𑀸𑀭𑁄 𑀜𑀸𑀡𑀲𑁆𑀲 𑀧𑀭𑀺𑀧𑀸𑀓𑀁 𑀕𑀢𑀢𑁆𑀢𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀼𑀢𑀫𑁂𑀢𑀁, 𑀪𑀦𑁆𑀢𑁂, 𑀧𑀼𑀩𑁆𑀩𑀓𑀸𑀦𑀁 𑀆𑀘𑀭𑀺𑀬𑀧𑀸𑀘𑀭𑀺𑀬𑀸𑀦𑀁 𑀦𑀝𑀸𑀦𑀁 𑀪𑀸𑀲𑀫𑀸𑀦𑀸𑀦𑀁 ‘𑀬𑁄 𑀲𑁄 𑀦𑀝𑁄 𑀭𑀗𑁆𑀕𑀫𑀚𑁆𑀛𑁂 𑀲𑀫𑀚𑁆𑀚𑀫𑀚𑁆𑀛𑁂 𑀲𑀘𑁆𑀘𑀸𑀮𑀺𑀓𑁂𑀦 𑀚𑀦𑀁 𑀳𑀸𑀲𑁂𑀢𑀺 𑀭𑀫𑁂𑀢𑀺, 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀧𑀳𑀸𑀲𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀻’𑀢𑀺, 𑀇𑀥 𑀪𑀕𑀯𑀸 𑀓𑀺𑀫𑀸𑀳𑀸’’𑀢𑀺. 𑀅𑀣 𑀦𑀁 𑀪𑀕𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀧𑀝𑀺𑀓𑁆𑀔𑀺𑀧𑀺 ‘‘𑀫𑀸 𑀫𑀁 𑀏𑀢𑀁 𑀧𑀼𑀘𑁆𑀙𑀻’’𑀢𑀺. 𑀘𑀢𑀼𑀢𑁆𑀣𑀯𑀸𑀭𑀁 𑀧𑀼𑀝𑁆𑀞𑁄 𑀆𑀳 𑁋 ‘‘𑀕𑀸𑀫𑀡𑀺, 𑀇𑀫𑁂 𑀲𑀢𑁆𑀢𑀸 𑀧𑀓𑀢𑀺𑀬𑀸𑀧𑀺 𑀭𑀸𑀕𑀩𑀦𑁆𑀥𑀦𑀩𑀤𑁆𑀥𑀸 𑀤𑁄𑀲𑀩𑀦𑁆𑀥𑀦𑀩𑀤𑁆𑀥𑀸 𑀫𑁄𑀳𑀩𑀦𑁆𑀥𑀦𑀩𑀤𑁆𑀥𑀸 𑀢𑁂𑀲𑀁 𑀪𑀺𑀬𑁆𑀬𑁄𑀧𑀺 𑀭𑀚𑀦𑀻𑀬𑁂 𑀤𑁄𑀲𑀦𑀻𑀬𑁂 𑀫𑁄𑀳𑀦𑀻𑀬𑁂 𑀥𑀫𑁆𑀫𑁂 𑀉𑀧𑀲𑀁𑀳𑀭𑀦𑁆𑀢𑁄 𑀧𑀫𑀸𑀤𑁂𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀦𑀺𑀭𑀬𑁂 𑀉𑀧𑀧𑀚𑁆𑀚𑀢𑀺. 𑀲𑀘𑁂 𑀧𑀦𑀲𑁆𑀲 𑀏𑀯𑀁𑀤𑀺𑀝𑁆𑀞𑀺 𑀳𑁄𑀢𑀺 ‘𑀬𑁄 𑀲𑁄 𑀦𑀝𑁄 𑀭𑀗𑁆𑀕𑀫𑀚𑁆𑀛𑁂 𑀲𑀫𑀚𑁆𑀚𑀫𑀚𑁆𑀛𑁂 𑀲𑀘𑁆𑀘𑀸𑀮𑀺𑀓𑁂𑀦 𑀚𑀦𑀁 𑀳𑀸𑀲𑁂𑀢𑀺 𑀭𑀫𑁂𑀢𑀺, 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀧𑀳𑀸𑀲𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀻’’’𑀢𑀺 𑀲𑀸𑀲𑁆𑀲 𑀳𑁄𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀲𑁆𑀲 𑀘 𑀤𑁆𑀯𑀺𑀦𑁆𑀦𑀁 𑀕𑀢𑀻𑀦𑀁 𑀅𑀜𑁆𑀜𑀢𑀭𑀸 𑀕𑀢𑀺 𑀇𑀘𑁆𑀙𑀺𑀢𑀩𑁆𑀩𑀸, 𑀦𑀺𑀭𑀬𑀲𑁆𑀲 𑀯𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀸 𑀯𑀸𑀢𑀺. 𑀢𑀁 𑀲𑀼𑀢𑁆𑀯𑀸 𑀢𑀸𑀮𑀧𑀼𑀝𑁄 𑀕𑀸𑀫𑀡𑀺 𑀧𑀭𑁄𑀤𑀺. 𑀦𑀦𑀼 𑀕𑀸𑀫𑀡𑀺 𑀧𑀕𑁂𑀯 𑀫𑀬𑀸 𑀧𑀝𑀺𑀓𑁆𑀔𑀺𑀢𑁆𑀢𑁄 ‘‘𑀫𑀸 𑀫𑀁 𑀏𑀢𑀁 𑀧𑀼𑀘𑁆𑀙𑀻’’𑀢𑀺 (𑀲𑀁. 𑀦𑀺. 𑁪.𑁩𑁫𑁪)? ‘‘𑀦𑀸𑀳𑀁, 𑀪𑀦𑁆𑀢𑁂, 𑀏𑀢𑀁 𑀭𑁄𑀤𑀸𑀫𑀺, 𑀬𑀁 𑀫𑀁 𑀪𑀕𑀯𑀸 𑀦𑀝𑀸𑀦𑀁 𑀅𑀪𑀺𑀲𑀫𑁆𑀧𑀭𑀸𑀬𑀁 𑀏𑀯𑀫𑀸𑀳𑀸’’𑀢𑀺. 𑀅𑀧𑀺 𑀘𑀸𑀳𑀁, 𑀪𑀦𑁆𑀢𑁂, 𑀧𑀼𑀩𑁆𑀩𑀓𑁂𑀳𑀺 𑀆𑀘𑀭𑀺𑀬𑀧𑀸𑀘𑀭𑀺𑀬𑁂𑀳𑀺 𑀦𑀝𑁂𑀳𑀺 𑀯𑀜𑁆𑀘𑀺𑀢𑁄 ‘‘𑀦𑀝𑁄 𑀫𑀳𑀸𑀚𑀦𑀲𑁆𑀲 𑀦𑀝𑀲𑀫𑀚𑁆𑀚𑀁 𑀤𑀲𑁆𑀲𑁂𑀢𑁆𑀯𑀸 𑀲𑀼𑀕𑀢𑀺𑀁 𑀉𑀧𑀧𑀚𑁆𑀚𑀢𑀻’’𑀢𑀺. 𑀲𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀮𑀤𑁆𑀥𑀽𑀧𑀲𑀫𑁆𑀧𑀦𑁆𑀦𑁄 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺, 𑀅𑀥𑀺𑀕𑀢𑀸𑀭𑀳𑀢𑁆𑀢𑁄 𑀧𑀦 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀢𑁄 𑀧𑀼𑀩𑁆𑀩𑁂 𑀬𑁂𑀦𑀸𑀓𑀸𑀭𑁂𑀦 𑀅𑀢𑁆𑀢𑀦𑁄 𑀘𑀺𑀢𑁆𑀢𑀁 𑀦𑀺𑀕𑁆𑀕𑀡𑁆𑀳𑀦𑀯𑀲𑁂𑀦 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀉𑀤𑀧𑀸𑀤𑀺, 𑀢𑀁 𑀅𑀦𑁂𑀓𑀥𑀸 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑁋

𑁧𑁦𑁯𑁪. ‘‘𑀓𑀤𑀸 𑀦𑀼𑀳𑀁 𑀧𑀩𑁆𑀩𑀢𑀓𑀦𑁆𑀤𑀭𑀸𑀲𑀼, 𑀏𑀓𑀸𑀓𑀺𑀬𑁄 𑀅𑀤𑁆𑀤𑀼𑀢𑀺𑀬𑁄 𑀯𑀺𑀳𑀲𑁆𑀲𑀁;

𑀅𑀦𑀺𑀘𑁆𑀘𑀢𑁄 𑀲𑀩𑁆𑀩𑀪𑀯𑀁 𑀯𑀺𑀧𑀲𑁆𑀲𑀁, 𑀢𑀁 𑀫𑁂 𑀇𑀤𑀁 𑀢𑀁 𑀦𑀼 𑀓𑀤𑀸 𑀪𑀯𑀺𑀲𑁆𑀲𑀢𑀺.

𑁧𑁦𑁯𑁫. ‘‘𑀓𑀤𑀸 𑀦𑀼𑀳𑀁 𑀪𑀺𑀦𑁆𑀦𑀧𑀝𑀦𑁆𑀥𑀭𑁄 𑀫𑀼𑀦𑀺, 𑀓𑀸𑀲𑀸𑀯𑀯𑀢𑁆𑀣𑁄 𑀅𑀫𑀫𑁄 𑀦𑀺𑀭𑀸𑀲𑁄;

𑀭𑀸𑀕𑀜𑁆𑀘 𑀤𑁄𑀲𑀜𑁆𑀘 𑀢𑀣𑁂𑀯 𑀫𑁄𑀳𑀁, 𑀳𑀦𑁆𑀢𑁆𑀯𑀸 𑀲𑀼𑀔𑀻 𑀧𑀯𑀦𑀕𑀢𑁄 𑀯𑀺𑀳𑀲𑁆𑀲𑀁.

𑁧𑁦𑁯𑁬. ‘‘𑀓𑀤𑀸 𑀅𑀦𑀺𑀘𑁆𑀘𑀁 𑀯𑀥𑀭𑁄𑀕𑀦𑀻𑀴𑀁, 𑀓𑀸𑀬𑀁 𑀇𑀫𑀁 𑀫𑀘𑁆𑀘𑀼𑀚𑀭𑀸𑀬𑀼𑀧𑀤𑁆𑀤𑀼𑀢𑀁;

𑀯𑀺𑀧𑀲𑁆𑀲𑀫𑀸𑀦𑁄 𑀯𑀻𑀢𑀪𑀬𑁄 𑀯𑀺𑀳𑀲𑁆𑀲𑀁, 𑀏𑀓𑁄 𑀯𑀦𑁂 𑀢𑀁 𑀦𑀼 𑀓𑀤𑀸 𑀪𑀯𑀺𑀲𑁆𑀲𑀢𑀺.

𑁧𑁦𑁯𑁭. ‘‘𑀓𑀤𑀸 𑀦𑀼𑀳𑀁 𑀪𑀬𑀚𑀦𑀦𑀺𑀁 𑀤𑀼𑀔𑀸𑀯𑀳𑀁, 𑀢𑀡𑁆𑀳𑀸𑀮𑀢𑀁 𑀩𑀳𑀼𑀯𑀺𑀥𑀸𑀦𑀼𑀯𑀢𑁆𑀢𑀦𑀺𑀁;

𑀧𑀜𑁆𑀜𑀸𑀫𑀬𑀁 𑀢𑀺𑀔𑀺𑀡𑀫𑀲𑀺𑀁 𑀕𑀳𑁂𑀢𑁆𑀯𑀸, 𑀙𑁂𑀢𑁆𑀯𑀸 𑀯𑀲𑁂 𑀢𑀫𑁆𑀧𑀺 𑀓𑀤𑀸 𑀪𑀯𑀺𑀲𑁆𑀲𑀢𑀺.

𑁧𑁦𑁯𑁮. ‘‘𑀓𑀤𑀸 𑀦𑀼 𑀧𑀜𑁆𑀜𑀸𑀫𑀬𑀫𑀼𑀕𑁆𑀕𑀢𑁂𑀚𑀁, 𑀲𑀢𑁆𑀣𑀁 𑀇𑀲𑀻𑀦𑀁 𑀲𑀳𑀲𑀸𑀤𑀺𑀬𑀺𑀢𑁆𑀯𑀸;

𑀫𑀸𑀭𑀁 𑀲𑀲𑁂𑀦𑀁 𑀲𑀳𑀲𑀸 𑀪𑀜𑁆𑀚𑀺𑀲𑁆𑀲𑀁, 𑀲𑀻𑀳𑀸𑀲𑀦𑁂 𑀢𑀁 𑀦𑀼 𑀓𑀤𑀸 𑀪𑀯𑀺𑀲𑁆𑀲𑀢𑀺.

𑁧𑁦𑁯𑁯. ‘‘𑀓𑀤𑀸 𑀦𑀼𑀳𑀁 𑀲𑀩𑁆𑀪𑀺 𑀲𑀫𑀸𑀕𑀫𑁂𑀲𑀼, 𑀤𑀺𑀝𑁆𑀞𑁄 𑀪𑀯𑁂 𑀥𑀫𑁆𑀫𑀕𑀭𑀽𑀳𑀺 𑀢𑀸𑀤𑀺𑀪𑀺;

𑀬𑀸𑀣𑀸𑀯𑀤𑀲𑁆𑀲𑀻𑀳𑀺 𑀚𑀺𑀢𑀺𑀦𑁆𑀤𑁆𑀭𑀺𑀬𑁂𑀳𑀺, 𑀧𑀥𑀸𑀦𑀺𑀬𑁄 𑀢𑀁 𑀦𑀼 𑀓𑀤𑀸 𑀪𑀯𑀺𑀲𑁆𑀲𑀢𑀺.

𑁧𑁧𑁦𑁦. ‘‘𑀓𑀤𑀸 𑀦𑀼 𑀫𑀁 𑀢𑀦𑁆𑀤𑀺 𑀔𑀼𑀤𑀸 𑀧𑀺𑀧𑀸𑀲𑀸, 𑀯𑀸𑀢𑀸𑀢𑀧𑀸 𑀓𑀻𑀝𑀲𑀭𑀻𑀲𑀧𑀸 𑀯𑀸;

𑀦 𑀩𑀸𑀥𑀬𑀺𑀲𑁆𑀲𑀦𑁆𑀢𑀺 𑀦 𑀢𑀁 𑀕𑀺𑀭𑀺𑀩𑁆𑀩𑀚𑁂, 𑀅𑀢𑁆𑀣𑀢𑁆𑀣𑀺𑀬𑀁 𑀢𑀁 𑀦𑀼 𑀓𑀤𑀸 𑀪𑀯𑀺𑀲𑁆𑀲𑀢𑀺.

𑁧𑁧𑁦𑁧. ‘‘𑀓𑀤𑀸 𑀦𑀼 𑀔𑁄 𑀬𑀁 𑀯𑀺𑀤𑀺𑀢𑀁 𑀫𑀳𑁂𑀲𑀺𑀦𑀸, 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀲𑀼𑀤𑀼𑀤𑁆𑀤𑀲𑀸𑀦𑀺;

𑀲𑀫𑀸𑀳𑀺𑀢𑀢𑁆𑀢𑁄 𑀲𑀢𑀺𑀫𑀸 𑀅𑀕𑀘𑁆𑀙𑀁, 𑀧𑀜𑁆𑀜𑀸𑀬 𑀢𑀁 𑀢𑀁 𑀦𑀼 𑀓𑀤𑀸 𑀪𑀯𑀺𑀲𑁆𑀲𑀢𑀺.

𑁧𑁧𑁦𑁨. ‘‘𑀓𑀤𑀸 𑀦𑀼 𑀭𑀽𑀧𑁂 𑀅𑀫𑀺𑀢𑁂 𑀘 𑀲𑀤𑁆𑀤𑁂, 𑀕𑀦𑁆𑀥𑁂 𑀭𑀲𑁂 𑀨𑀼𑀲𑀺𑀢𑀩𑁆𑀩𑁂 𑀘 𑀥𑀫𑁆𑀫𑁂;

𑀆𑀤𑀺𑀢𑁆𑀢𑀢𑁄𑀳𑀁 𑀲𑀫𑀣𑁂𑀳𑀺 𑀬𑀼𑀢𑁆𑀢𑁄, 𑀧𑀜𑁆𑀜𑀸𑀬 𑀤𑀘𑁆𑀙𑀁 𑀢𑀤𑀺𑀤𑀁 𑀓𑀤𑀸 𑀫𑁂.

𑁧𑁧𑁦𑁩. ‘‘𑀓𑀤𑀸 𑀦𑀼𑀳𑀁 𑀤𑀼𑀩𑁆𑀩𑀘𑀦𑁂𑀦 𑀯𑀼𑀢𑁆𑀢𑁄, 𑀢𑀢𑁄 𑀦𑀺𑀫𑀺𑀢𑁆𑀢𑀁 𑀯𑀺𑀫𑀦𑁄 𑀦 𑀳𑁂𑀲𑁆𑀲𑀁;

𑀅𑀣𑁄 𑀧𑀲𑀢𑁆𑀣𑁄𑀧𑀺 𑀢𑀢𑁄 𑀦𑀺𑀫𑀺𑀢𑁆𑀢𑀁, 𑀢𑀼𑀝𑁆𑀞𑁄 𑀦 𑀳𑁂𑀲𑁆𑀲𑀁 𑀢𑀤𑀺𑀤𑀁 𑀓𑀤𑀸 𑀫𑁂.

𑁧𑁧𑁦𑁪. ‘‘𑀓𑀤𑀸 𑀦𑀼 𑀓𑀝𑁆𑀞𑁂 𑀘 𑀢𑀺𑀡𑁂 𑀮𑀢𑀸 𑀘, 𑀔𑀦𑁆𑀥𑁂 𑀇𑀫𑁂𑀳𑀁 𑀅𑀫𑀺𑀢𑁂 𑀘 𑀥𑀫𑁆𑀫𑁂;

𑀅𑀚𑁆𑀛𑀢𑁆𑀢𑀺𑀓𑀸𑀦𑁂𑀯 𑀘 𑀩𑀸𑀳𑀺𑀭𑀸𑀦𑀺 𑀘, 𑀲𑀫𑀁 𑀢𑀼𑀮𑁂𑀬𑁆𑀬𑀁 𑀢𑀤𑀺𑀤𑀁 𑀓𑀤𑀸 𑀫𑁂.

𑁧𑁧𑁦𑁫. ‘‘𑀓𑀤𑀸 𑀦𑀼 𑀫𑀁 𑀧𑀸𑀯𑀼𑀲𑀓𑀸𑀮𑀫𑁂𑀖𑁄, 𑀦𑀯𑁂𑀦 𑀢𑁄𑀬𑁂𑀦 𑀲𑀘𑀻𑀯𑀭𑀁 𑀯𑀦𑁂;

𑀇𑀲𑀺𑀧𑁆𑀧𑀬𑀸𑀢𑀫𑁆𑀳𑀺 𑀧𑀣𑁂 𑀯𑀚𑀦𑁆𑀢𑀁, 𑀑𑀯𑀲𑁆𑀲𑀢𑁂 𑀢𑀁 𑀦𑀼 𑀓𑀤𑀸 𑀪𑀯𑀺𑀲𑁆𑀲𑀢𑀺.

𑁧𑁧𑁦𑁬. ‘‘𑀓𑀤𑀸 𑀫𑀬𑀽𑀭𑀲𑁆𑀲 𑀲𑀺𑀔𑀡𑁆𑀟𑀺𑀦𑁄 𑀯𑀦𑁂, 𑀤𑀺𑀚𑀲𑁆𑀲 𑀲𑀼𑀢𑁆𑀯𑀸 𑀕𑀺𑀭𑀺𑀕𑀩𑁆𑀪𑀭𑁂 𑀭𑀼𑀢𑀁;

𑀧𑀘𑁆𑀘𑀼𑀝𑁆𑀞𑀳𑀺𑀢𑁆𑀯𑀸 𑀅𑀫𑀢𑀲𑁆𑀲 𑀧𑀢𑁆𑀢𑀺𑀬𑀸, 𑀲𑀁𑀘𑀺𑀦𑁆𑀢𑀬𑁂 𑀢𑀁 𑀦𑀼 𑀓𑀤𑀸 𑀪𑀯𑀺𑀲𑁆𑀲𑀢𑀺.

𑁧𑁧𑁦𑁭. ‘‘𑀓𑀤𑀸 𑀦𑀼 𑀕𑀗𑁆𑀕𑀁 𑀬𑀫𑀼𑀦𑀁 𑀲𑀭𑀲𑁆𑀲𑀢𑀺𑀁, 𑀧𑀸𑀢𑀸𑀮𑀔𑀺𑀢𑁆𑀢𑀁 𑀯𑀴𑀯𑀸𑀫𑀼𑀔𑀜𑁆𑀘;

𑀅𑀲𑀚𑁆𑀚𑀫𑀸𑀦𑁄 𑀧𑀢𑀭𑁂𑀬𑁆𑀬𑀫𑀺𑀤𑁆𑀥𑀺𑀬𑀸, 𑀯𑀺𑀪𑀺𑀁𑀲𑀦𑀁 𑀢𑀁 𑀦𑀼 𑀓𑀤𑀸 𑀪𑀯𑀺𑀲𑁆𑀲𑀢𑀺.

𑁧𑁧𑁦𑁮. ‘‘𑀓𑀤𑀸 𑀦𑀼 𑀦𑀸𑀕𑁄𑀯 𑀅𑀲𑀗𑁆𑀕𑀘𑀸𑀭𑀻, 𑀧𑀤𑀸𑀮𑀬𑁂 𑀓𑀸𑀫𑀕𑀼𑀡𑁂𑀲𑀼 𑀙𑀦𑁆𑀤𑀁;

𑀦𑀺𑀩𑁆𑀩𑀚𑁆𑀚𑀬𑀁 𑀲𑀩𑁆𑀩𑀲𑀼𑀪𑀁 𑀦𑀺𑀫𑀺𑀢𑁆𑀢𑀁, 𑀛𑀸𑀦𑁂 𑀬𑀼𑀢𑁄 𑀢𑀁 𑀦𑀼 𑀓𑀤𑀸 𑀪𑀯𑀺𑀲𑁆𑀲𑀢𑀺.

𑁧𑁧𑁦𑁯. ‘‘𑀓𑀤𑀸 𑀇𑀡𑀝𑁆𑀝𑁄𑀯 𑀤𑀮𑀺𑀤𑁆𑀤𑀓𑁄 𑀦𑀺𑀥𑀺𑀁, 𑀆𑀭𑀸𑀥𑀬𑀺𑀢𑁆𑀯𑀸 𑀥𑀦𑀺𑀓𑁂𑀳𑀺 𑀧𑀻𑀴𑀺𑀢𑁄;

𑀢𑀼𑀝𑁆𑀞𑁄 𑀪𑀯𑀺𑀲𑁆𑀲𑀁 𑀅𑀥𑀺𑀕𑀫𑁆𑀫 𑀲𑀸𑀲𑀦𑀁, 𑀫𑀳𑁂𑀲𑀺𑀦𑁄 𑀢𑀁 𑀦𑀼 𑀓𑀤𑀸 𑀪𑀯𑀺𑀲𑁆𑀲𑀢𑀺.

𑁧𑁧𑁧𑁦. ‘‘𑀩𑀳𑀽𑀦𑀺 𑀯𑀲𑁆𑀲𑀸𑀦𑀺 𑀢𑀬𑀸𑀫𑁆𑀳𑀺 𑀬𑀸𑀘𑀺𑀢𑁄, 𑀅𑀕𑀸𑀭𑀯𑀸𑀲𑁂𑀦 𑀅𑀮𑀁 𑀦𑀼 𑀢𑁂 𑀇𑀤𑀁;

𑀢𑀁 𑀤𑀸𑀦𑀺 𑀫𑀁 𑀧𑀩𑁆𑀩𑀚𑀺𑀢𑀁 𑀲𑀫𑀸𑀦𑀁, 𑀓𑀺𑀁𑀓𑀸𑀭𑀡𑀸 𑀘𑀺𑀢𑁆𑀢 𑀢𑀼𑀯𑀁 𑀦 𑀬𑀼𑀜𑁆𑀚𑀲𑀺.

𑁧𑁧𑁧𑁧. ‘‘𑀦𑀦𑀼 𑀅𑀳𑀁 𑀘𑀺𑀢𑁆𑀢 𑀢𑀬𑀸𑀫𑁆𑀳𑀺 𑀬𑀸𑀘𑀺𑀢𑁄, 𑀕𑀺𑀭𑀺𑀩𑁆𑀩𑀚𑁂 𑀘𑀺𑀢𑁆𑀭𑀙𑀤𑀸 𑀯𑀺𑀳𑀗𑁆𑀕𑀫𑀸;

𑀫𑀳𑀺𑀦𑁆𑀤𑀖𑁄𑀲𑀢𑁆𑀣𑀦𑀺𑀢𑀸𑀪𑀺𑀕𑀚𑁆𑀚𑀺𑀦𑁄, 𑀢𑁂 𑀢𑀁 𑀭𑀫𑁂𑀲𑁆𑀲𑀦𑁆𑀢𑀺 𑀯𑀦𑀫𑁆𑀳𑀺 𑀛𑀸𑀬𑀺𑀦𑀁.

𑁧𑁧𑁧𑁨. ‘‘𑀓𑀼𑀮𑀫𑁆𑀳𑀺 𑀫𑀺𑀢𑁆𑀢𑁂 𑀘 𑀧𑀺𑀬𑁂 𑀘 𑀜𑀸𑀢𑀓𑁂, 𑀔𑀺𑀟𑁆𑀟𑀸𑀭𑀢𑀺𑀁 𑀓𑀸𑀫𑀕𑀼𑀡𑀜𑁆𑀘 𑀮𑁄𑀓𑁂;

𑀲𑀩𑁆𑀩𑀁 𑀧𑀳𑀸𑀬 𑀇𑀫𑀫𑀚𑁆𑀛𑀼𑀧𑀸𑀕𑀢𑁄, 𑀅𑀣𑁄𑀧𑀺 𑀢𑁆𑀯𑀁 𑀘𑀺𑀢𑁆𑀢 𑀦 𑀫𑀬𑁆𑀳 𑀢𑀼𑀲𑁆𑀲𑀲𑀺.

𑁧𑁧𑁧𑁩. ‘‘𑀫𑀫𑁂𑀯 𑀏𑀢𑀁 𑀦 𑀳𑀺 𑀢𑁆𑀯𑀁 𑀧𑀭𑁂𑀲𑀁, 𑀲𑀦𑁆𑀦𑀸𑀳𑀓𑀸𑀮𑁂 𑀧𑀭𑀺𑀤𑁂𑀯𑀺𑀢𑁂𑀦 𑀓𑀺𑀁;

𑀲𑀩𑁆𑀩𑀁 𑀇𑀤𑀁 𑀘𑀮𑀫𑀺𑀢𑀺 𑀧𑁂𑀓𑁆𑀔𑀫𑀸𑀦𑁄, 𑀅𑀪𑀺𑀦𑀺𑀓𑁆𑀔𑀫𑀺𑀁 𑀅𑀫𑀢𑀧𑀤𑀁 𑀚𑀺𑀕𑀻𑀲𑀁.

𑁧𑁧𑁧𑁪. ‘‘𑀲𑀼𑀬𑀼𑀢𑁆𑀢𑀯𑀸𑀤𑀻 𑀤𑁆𑀯𑀺𑀧𑀤𑀸𑀦𑀫𑀼𑀢𑁆𑀢𑀫𑁄, 𑀫𑀳𑀸𑀪𑀺𑀲𑀓𑁆𑀓𑁄 𑀦𑀭𑀤𑀫𑁆𑀫𑀲𑀸𑀭𑀣𑀺;

𑀘𑀺𑀢𑁆𑀢𑀁 𑀘𑀮𑀁 𑀫𑀓𑁆𑀓𑀝𑀲𑀦𑁆𑀦𑀺𑀪𑀁 𑀇𑀢𑀺, 𑀅𑀯𑀻𑀢𑀭𑀸𑀕𑁂𑀦 𑀲𑀼𑀤𑀼𑀦𑁆𑀦𑀺𑀯𑀸𑀭𑀬𑀁.

𑁧𑁧𑁧𑁫. ‘‘𑀓𑀸𑀫𑀸 𑀳𑀺 𑀘𑀺𑀢𑁆𑀭𑀸 𑀫𑀥𑀼𑀭𑀸 𑀫𑀦𑁄𑀭𑀫𑀸, 𑀅𑀯𑀺𑀤𑁆𑀤𑀲𑀽 𑀬𑀢𑁆𑀣 𑀲𑀺𑀢𑀸 𑀧𑀼𑀣𑀼𑀚𑁆𑀚𑀦𑀸;

𑀢𑁂 𑀤𑀼𑀓𑁆𑀔𑀫𑀺𑀘𑁆𑀙𑀦𑁆𑀢𑀺 𑀧𑀼𑀦𑀩𑁆𑀪𑀯𑁂𑀲𑀺𑀦𑁄, 𑀘𑀺𑀢𑁆𑀢𑁂𑀦 𑀦𑀻𑀢𑀸 𑀦𑀺𑀭𑀬𑁂 𑀦𑀺𑀭𑀸𑀓𑀢𑀸.

𑁧𑁧𑁧𑁬. ‘‘𑀫𑀬𑀽𑀭𑀓𑁄𑀜𑁆𑀘𑀸𑀪𑀺𑀭𑀼𑀢𑀫𑁆𑀳𑀺 𑀓𑀸𑀦𑀦𑁂, 𑀤𑀻𑀧𑀻𑀳𑀺 𑀩𑁆𑀬𑀕𑁆𑀖𑁂𑀳𑀺 𑀧𑀼𑀭𑀓𑁆𑀔𑀢𑁄 𑀯𑀲𑀁;

𑀓𑀸𑀬𑁂 𑀅𑀧𑁂𑀓𑁆𑀔𑀁 𑀚𑀳 𑀫𑀸 𑀯𑀺𑀭𑀸𑀥𑀬, 𑀇𑀢𑀺𑀲𑁆𑀲𑀼 𑀫𑀁 𑀘𑀺𑀢𑁆𑀢 𑀧𑀼𑀭𑁂 𑀦𑀺𑀬𑀼𑀜𑁆𑀚𑀲𑀺.

𑁧𑁧𑁧𑁭. ‘‘𑀪𑀸𑀯𑁂𑀳𑀺 𑀛𑀸𑀦𑀸𑀦𑀺 𑀘 𑀇𑀦𑁆𑀤𑁆𑀭𑀺𑀬𑀸𑀦𑀺 𑀘, 𑀩𑀮𑀸𑀦𑀺 𑀩𑁄𑀚𑁆𑀛𑀗𑁆𑀕𑀲𑀫𑀸𑀥𑀺𑀪𑀸𑀯𑀦𑀸;

𑀢𑀺𑀲𑁆𑀲𑁄 𑀘 𑀯𑀺𑀚𑁆𑀚𑀸 𑀨𑀼𑀲 𑀩𑀼𑀤𑁆𑀥𑀲𑀸𑀲𑀦𑁂, 𑀇𑀢𑀺𑀲𑁆𑀲𑀼 𑀫𑀁 𑀘𑀺𑀢𑁆𑀢 𑀧𑀼𑀭𑁂 𑀦𑀺𑀬𑀼𑀜𑁆𑀚𑀲𑀺.

𑁧𑁧𑁧𑁮. ‘‘𑀪𑀸𑀯𑁂𑀳𑀺 𑀫𑀕𑁆𑀕𑀁 𑀅𑀫𑀢𑀲𑁆𑀲 𑀧𑀢𑁆𑀢𑀺𑀬𑀸, 𑀦𑀺𑀬𑁆𑀬𑀸𑀦𑀺𑀓𑀁 𑀲𑀩𑁆𑀩𑀤𑀼𑀔𑀓𑁆𑀔𑀬𑁄𑀕𑀥𑀁;

𑀅𑀝𑁆𑀞𑀗𑁆𑀕𑀺𑀓𑀁 𑀲𑀩𑁆𑀩𑀓𑀺𑀮𑁂𑀲𑀲𑁄𑀥𑀦𑀁, 𑀇𑀢𑀺𑀲𑁆𑀲𑀼 𑀫𑀁 𑀘𑀺𑀢𑁆𑀢 𑀧𑀼𑀭𑁂 𑀦𑀺𑀬𑀼𑀜𑁆𑀚𑀲𑀺.

𑁧𑁧𑁧𑁯. ‘‘𑀤𑀼𑀓𑁆𑀔𑀦𑁆𑀢𑀺 𑀔𑀦𑁆𑀥𑁂 𑀧𑀝𑀺𑀧𑀲𑁆𑀲 𑀬𑁄𑀦𑀺𑀲𑁄, 𑀬𑀢𑁄 𑀘 𑀤𑀼𑀓𑁆𑀔𑀁 𑀲𑀫𑀼𑀤𑁂𑀢𑀺 𑀢𑀁 𑀚𑀳;

𑀇𑀥𑁂𑀯 𑀤𑀼𑀓𑁆𑀔𑀲𑁆𑀲 𑀓𑀭𑁄𑀳𑀺 𑀅𑀦𑁆𑀢𑀁, 𑀇𑀢𑀺𑀲𑁆𑀲𑀼 𑀫𑀁 𑀘𑀺𑀢𑁆𑀢 𑀧𑀼𑀭𑁂 𑀦𑀺𑀬𑀼𑀜𑁆𑀚𑀲𑀺.

𑁧𑁧𑁨𑁦. ‘‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀦𑁆𑀢𑀺 𑀯𑀺𑀧𑀲𑁆𑀲 𑀬𑁄𑀦𑀺𑀲𑁄, 𑀲𑀼𑀜𑁆𑀜𑀁 𑀅𑀦𑀢𑁆𑀢𑀸𑀢𑀺 𑀅𑀖𑀁 𑀯𑀥𑀦𑁆𑀢𑀺 𑀘;

𑀫𑀦𑁄𑀯𑀺𑀘𑀸𑀭𑁂 𑀉𑀧𑀭𑀼𑀦𑁆𑀥 𑀘𑁂𑀢𑀲𑁄, 𑀇𑀢𑀺𑀲𑁆𑀲𑀼 𑀫𑀁 𑀘𑀺𑀢𑁆𑀢 𑀧𑀼𑀭𑁂 𑀦𑀺𑀬𑀼𑀜𑁆𑀚𑀲𑀺.

𑁧𑁧𑁨𑁧. ‘‘𑀫𑀼𑀡𑁆𑀟𑁄 𑀯𑀺𑀭𑀽𑀧𑁄 𑀅𑀪𑀺𑀲𑀸𑀧𑀫𑀸𑀕𑀢𑁄, 𑀓𑀧𑀸𑀮𑀳𑀢𑁆𑀣𑁄𑀯 𑀓𑀼𑀮𑁂𑀲𑀼 𑀪𑀺𑀓𑁆𑀔𑀲𑀼;

𑀬𑀼𑀜𑁆𑀚𑀲𑁆𑀲𑀼 𑀲𑀢𑁆𑀣𑀼𑀯𑀘𑀦𑁂 𑀫𑀳𑁂𑀲𑀺𑀦𑁄, 𑀇𑀢𑀺𑀲𑁆𑀲𑀼 𑀫𑀁 𑀘𑀺𑀢𑁆𑀢 𑀧𑀼𑀭𑁂 𑀦𑀺𑀬𑀼𑀜𑁆𑀚𑀲𑀺.

𑁧𑁧𑁨𑁨. ‘‘𑀲𑀼𑀲𑀁𑀯𑀼𑀢𑀢𑁆𑀢𑁄 𑀯𑀺𑀲𑀺𑀔𑀦𑁆𑀢𑀭𑁂 𑀘𑀭𑀁, 𑀓𑀼𑀮𑁂𑀲𑀼 𑀓𑀸𑀫𑁂𑀲𑀼 𑀅𑀲𑀗𑁆𑀕𑀫𑀸𑀦𑀲𑁄;

𑀘𑀦𑁆𑀤𑁄 𑀬𑀣𑀸 𑀤𑁄𑀲𑀺𑀦𑀧𑀼𑀡𑁆𑀡𑀫𑀸𑀲𑀺𑀬𑀸, 𑀇𑀢𑀺𑀲𑁆𑀲𑀼 𑀫𑀁 𑀘𑀺𑀢𑁆𑀢 𑀧𑀼𑀭𑁂 𑀦𑀺𑀬𑀼𑀜𑁆𑀚𑀲𑀺.

𑁧𑁧𑁨𑁩. ‘‘𑀆𑀭𑀜𑁆𑀜𑀺𑀓𑁄 𑀳𑁄𑀳𑀺 𑀘 𑀧𑀺𑀡𑁆𑀟𑀧𑀸𑀢𑀺𑀓𑁄, 𑀲𑁄𑀲𑀸𑀦𑀺𑀓𑁄 𑀳𑁄𑀳𑀺 𑀘 𑀧𑀁𑀲𑀼𑀓𑀽𑀮𑀺𑀓𑁄;

𑀦𑁂𑀲𑀚𑁆𑀚𑀺𑀓𑁄 𑀳𑁄𑀳𑀺 𑀲𑀤𑀸 𑀥𑀼𑀢𑁂 𑀭𑀢𑁄, 𑀇𑀢𑀺𑀲𑁆𑀲𑀼 𑀫𑀁 𑀘𑀺𑀢𑁆𑀢 𑀧𑀼𑀭𑁂 𑀦𑀺𑀬𑀼𑀜𑁆𑀚𑀲𑀺.

𑁧𑁧𑁨𑁪. ‘‘𑀭𑁄𑀧𑁂𑀢𑁆𑀯 𑀭𑀼𑀓𑁆𑀔𑀸𑀦𑀺 𑀬𑀣𑀸 𑀨𑀮𑁂𑀲𑀻, 𑀫𑀽𑀮𑁂 𑀢𑀭𑀼𑀁 𑀙𑁂𑀢𑁆𑀢𑀼 𑀢𑀫𑁂𑀯 𑀇𑀘𑁆𑀙𑀲𑀺;

𑀢𑀣𑀽𑀧𑀫𑀁 𑀘𑀺𑀢𑁆𑀢𑀫𑀺𑀤𑀁 𑀓𑀭𑁄𑀲𑀺, 𑀬𑀁 𑀫𑀁 𑀅𑀦𑀺𑀘𑁆𑀘𑀫𑁆𑀳𑀺 𑀘𑀮𑁂 𑀦𑀺𑀬𑀼𑀜𑁆𑀚𑀲𑀺.

𑁧𑁧𑁨𑁫. ‘‘𑀅𑀭𑀽𑀧 𑀤𑀽𑀭𑀗𑁆𑀕𑀫 𑀏𑀓𑀘𑀸𑀭𑀺, 𑀦 𑀢𑁂 𑀓𑀭𑀺𑀲𑁆𑀲𑀁 𑀯𑀘𑀦𑀁 𑀇𑀤𑀸𑀦𑀺𑀳𑀁;

𑀤𑀼𑀓𑁆𑀔𑀸 𑀳𑀺 𑀓𑀸𑀫𑀸 𑀓𑀝𑀼𑀓𑀸 𑀫𑀳𑀩𑁆𑀪𑀬𑀸, 𑀦𑀺𑀩𑁆𑀩𑀸𑀦𑀫𑁂𑀯𑀸𑀪𑀺𑀫𑀦𑁄 𑀘𑀭𑀺𑀲𑁆𑀲𑀁.

𑁧𑁧𑁨𑁬. ‘‘𑀦𑀸𑀳𑀁 𑀅𑀮𑀓𑁆𑀔𑁆𑀬𑀸 𑀅𑀳𑀺𑀭𑀺𑀓𑁆𑀓𑀢𑀸𑀬 𑀯𑀸,

𑀦 𑀘𑀺𑀢𑁆𑀢𑀳𑁂𑀢𑀽 𑀦 𑀘 𑀤𑀽𑀭𑀓𑀦𑁆𑀢𑀦𑀸;

𑀆𑀚𑀻𑀯𑀳𑁂𑀢𑀽 𑀘 𑀅𑀳𑀁 𑀦 𑀦𑀺𑀓𑁆𑀔𑀫𑀺𑀁,

𑀓𑀢𑁄 𑀘 𑀢𑁂 𑀘𑀺𑀢𑁆𑀢 𑀧𑀝𑀺𑀲𑁆𑀲𑀯𑁄 𑀫𑀬𑀸.

𑁧𑁧𑁨𑁭. ‘‘𑀅𑀧𑁆𑀧𑀺𑀘𑁆𑀙𑀢𑀸 𑀲𑀧𑁆𑀧𑀼𑀭𑀺𑀲𑁂𑀳𑀺 𑀯𑀡𑁆𑀡𑀺𑀢𑀸, 𑀫𑀓𑁆𑀔𑀧𑁆𑀧𑀳𑀸𑀦𑀁 𑀯𑀽𑀧𑀲𑀫𑁄 𑀤𑀼𑀔𑀲𑁆𑀲;

𑀇𑀢𑀺𑀲𑁆𑀲𑀼 𑀫𑀁 𑀘𑀺𑀢𑁆𑀢 𑀢𑀤𑀸 𑀦𑀺𑀬𑀼𑀜𑁆𑀚𑀲𑀺, 𑀇𑀤𑀸𑀦𑀺 𑀢𑁆𑀯𑀁 𑀕𑀘𑁆𑀙𑀲𑀺 𑀧𑀼𑀩𑁆𑀩𑀘𑀺𑀡𑁆𑀡𑀁.

𑁧𑁧𑁨𑁮. ‘‘𑀢𑀡𑁆𑀳𑀸 𑀅𑀯𑀺𑀚𑁆𑀚𑀸 𑀘 𑀧𑀺𑀬𑀸𑀧𑀺𑀬𑀜𑁆𑀘, 𑀲𑀼𑀪𑀸𑀦𑀺 𑀭𑀽𑀧𑀸𑀦𑀺 𑀲𑀼𑀔𑀸 𑀘 𑀯𑁂𑀤𑀦𑀸;

𑀫𑀦𑀸𑀧𑀺𑀬𑀸 𑀓𑀸𑀫𑀕𑀼𑀡𑀸 𑀘 𑀯𑀦𑁆𑀢𑀸, 𑀯𑀦𑁆𑀢𑁂 𑀅𑀳𑀁 𑀆𑀯𑀫𑀺𑀢𑀼𑀁 𑀦 𑀉𑀲𑁆𑀲𑀳𑁂.

𑁧𑁧𑁨𑁯. ‘‘𑀲𑀩𑁆𑀩𑀢𑁆𑀣 𑀢𑁂 𑀘𑀺𑀢𑁆𑀢 𑀯𑀘𑁄 𑀓𑀢𑀁 𑀫𑀬𑀸, 𑀩𑀳𑀽𑀲𑀼 𑀚𑀸𑀢𑀻𑀲𑀼 𑀦𑀫𑁂𑀲𑀺 𑀓𑁄𑀧𑀺𑀢𑁄;

𑀅𑀚𑁆𑀛𑀢𑁆𑀢𑀲𑀫𑁆𑀪𑀯𑁄 𑀓𑀢𑀜𑁆𑀜𑀼𑀢𑀸𑀬 𑀢𑁂, 𑀤𑀼𑀓𑁆𑀔𑁂 𑀘𑀺𑀭𑀁 𑀲𑀁𑀲𑀭𑀺𑀢𑀁 𑀢𑀬𑀸 𑀓𑀢𑁂.

𑁧𑁧𑁩𑁦. ‘‘𑀢𑁆𑀯𑀜𑁆𑀜𑁂𑀯 𑀦𑁄 𑀘𑀺𑀢𑁆𑀢 𑀓𑀭𑁄𑀲𑀺 𑀩𑁆𑀭𑀸𑀳𑁆𑀫𑀡𑁄, 𑀢𑁆𑀯𑀁 𑀔𑀢𑁆𑀢𑀺𑀬𑁄 𑀭𑀸𑀚𑀤𑀲𑀻 𑀓𑀭𑁄𑀲𑀺;

𑀯𑁂𑀲𑁆𑀲𑀸 𑀘 𑀲𑀼𑀤𑁆𑀤𑀸 𑀘 𑀪𑀯𑀸𑀫 𑀏𑀓𑀤𑀸, 𑀤𑁂𑀯𑀢𑁆𑀢𑀦𑀁 𑀯𑀸𑀧𑀺 𑀢𑀯𑁂𑀯 𑀯𑀸𑀳𑀲𑀸.

𑁧𑁧𑁩𑁧. ‘‘𑀢𑀯𑁂𑀯 𑀳𑁂𑀢𑀽 𑀅𑀲𑀼𑀭𑀸 𑀪𑀯𑀸𑀫𑀲𑁂, 𑀢𑁆𑀯𑀁𑀫𑀽𑀮𑀓𑀁 𑀦𑁂𑀭𑀬𑀺𑀓𑀸 𑀪𑀯𑀸𑀫𑀲𑁂;

𑀅𑀣𑁄 𑀢𑀺𑀭𑀘𑁆𑀙𑀸𑀦𑀕𑀢𑀸𑀧𑀺 𑀏𑀓𑀤𑀸, 𑀧𑁂𑀢𑀢𑁆𑀢𑀦𑀁 𑀯𑀸𑀧𑀺 𑀢𑀯𑁂𑀯 𑀯𑀸𑀳𑀲𑀸.

𑁧𑁧𑁩𑁨. ‘‘𑀦𑀦𑀼 𑀤𑀼𑀩𑁆𑀪𑀺𑀲𑁆𑀲𑀲𑀺 𑀫𑀁 𑀧𑀼𑀦𑀧𑁆𑀧𑀼𑀦𑀁, 𑀫𑀼𑀳𑀼𑀁 𑀫𑀼𑀳𑀼𑀁 𑀘𑀸𑀭𑀡𑀺𑀓𑀁𑀯 𑀤𑀲𑁆𑀲𑀬𑀁;

𑀉𑀫𑁆𑀫𑀢𑁆𑀢𑀓𑁂𑀦𑁂𑀯 𑀫𑀬𑀸 𑀧𑀮𑁄𑀪𑀲𑀺, 𑀓𑀺𑀜𑁆𑀘𑀸𑀧𑀺 𑀢𑁂 𑀘𑀺𑀢𑁆𑀢 𑀯𑀺𑀭𑀸𑀥𑀺𑀢𑀁 𑀫𑀬𑀸.

𑁧𑁧𑁩𑁩. ‘‘𑀇𑀤𑀁 𑀧𑀼𑀭𑁂 𑀘𑀺𑀢𑁆𑀢𑀫𑀘𑀸𑀭𑀺 𑀘𑀸𑀭𑀺𑀓𑀁, 𑀬𑁂𑀦𑀺𑀘𑁆𑀙𑀓𑀁 𑀬𑀢𑁆𑀣𑀓𑀸𑀫𑀁 𑀬𑀣𑀸𑀲𑀼𑀔𑀁;

𑀢𑀤𑀚𑁆𑀚𑀳𑀁 𑀦𑀺𑀕𑁆𑀕𑀳𑁂𑀲𑁆𑀲𑀸𑀫𑀺 𑀬𑁄𑀦𑀺𑀲𑁄, 𑀳𑀢𑁆𑀣𑀺𑀧𑁆𑀧𑀪𑀺𑀦𑁆𑀦𑀁 𑀯𑀺𑀬 𑀅𑀗𑁆𑀕𑀼𑀲𑀕𑁆𑀕𑀳𑁄.

𑁧𑁧𑁩𑁪. ‘‘𑀲𑀢𑁆𑀣𑀸 𑀘 𑀫𑁂 𑀮𑁄𑀓𑀫𑀺𑀫𑀁 𑀅𑀥𑀺𑀝𑁆𑀞𑀳𑀺, 𑀅𑀦𑀺𑀘𑁆𑀘𑀢𑁄 𑀅𑀤𑁆𑀥𑀼𑀯𑀢𑁄 𑀅𑀲𑀸𑀭𑀢𑁄;

𑀧𑀓𑁆𑀔𑀦𑁆𑀤 𑀫𑀁 𑀘𑀺𑀢𑁆𑀢 𑀚𑀺𑀦𑀲𑁆𑀲 𑀲𑀸𑀲𑀦𑁂, 𑀢𑀸𑀭𑁂𑀳𑀺 𑀑𑀖𑀸 𑀫𑀳𑀢𑀸 𑀲𑀼𑀤𑀼𑀢𑁆𑀢𑀭𑀸.

𑁧𑁧𑁩𑁫. ‘‘𑀦 𑀢𑁂 𑀇𑀤𑀁 𑀘𑀺𑀢𑁆𑀢 𑀬𑀣𑀸 𑀧𑀼𑀭𑀸𑀡𑀓𑀁, 𑀦𑀸𑀳𑀁 𑀅𑀮𑀁 𑀢𑀼𑀬𑁆𑀳 𑀯𑀲𑁂 𑀦𑀺𑀯𑀢𑁆𑀢𑀺𑀢𑀼𑀁;

𑀫𑀳𑁂𑀲𑀺𑀦𑁄 𑀧𑀩𑁆𑀩𑀚𑀺𑀢𑁄𑀫𑁆𑀳𑀺 𑀲𑀸𑀲𑀦𑁂, 𑀦 𑀫𑀸𑀤𑀺𑀲𑀸 𑀳𑁄𑀦𑁆𑀢𑀺 𑀯𑀺𑀦𑀸𑀲𑀥𑀸𑀭𑀺𑀦𑁄.

𑁧𑁧𑁩𑁬. ‘‘𑀦𑀕𑀸 𑀲𑀫𑀼𑀤𑁆𑀤𑀸 𑀲𑀭𑀺𑀢𑀸 𑀯𑀲𑀼𑀦𑁆𑀥𑀭𑀸, 𑀤𑀺𑀲𑀸 𑀘𑀢𑀲𑁆𑀲𑁄 𑀯𑀺𑀤𑀺𑀲𑀸 𑀅𑀥𑁄 𑀤𑀺𑀯𑀸;

𑀲𑀩𑁆𑀩𑁂 𑀅𑀦𑀺𑀘𑁆𑀘𑀸 𑀢𑀺𑀪𑀯𑀸 𑀉𑀧𑀤𑁆𑀤𑀼𑀢𑀸, 𑀓𑀼𑀳𑀺𑀁 𑀕𑀢𑁄 𑀘𑀺𑀢𑁆𑀢 𑀲𑀼𑀔𑀁 𑀭𑀫𑀺𑀲𑁆𑀲𑀲𑀺.

𑁧𑁧𑁩𑁭. ‘‘𑀥𑀺𑀢𑀺𑀧𑁆𑀧𑀭𑀁 𑀓𑀺𑀁 𑀫𑀫 𑀘𑀺𑀢𑁆𑀢 𑀓𑀸𑀳𑀺𑀲𑀺, 𑀦 𑀢𑁂 𑀅𑀮𑀁 𑀘𑀺𑀢𑁆𑀢 𑀯𑀲𑀸𑀦𑀼𑀯𑀢𑁆𑀢𑀓𑁄;

𑀦 𑀚𑀸𑀢𑀼 𑀪𑀲𑁆𑀢𑀁 𑀉𑀪𑀢𑁄𑀫𑀼𑀔𑀁 𑀙𑀼𑀧𑁂, 𑀥𑀺𑀭𑀢𑁆𑀣𑀼 𑀧𑀽𑀭𑀁 𑀦𑀯𑀲𑁄𑀢𑀲𑀦𑁆𑀤𑀦𑀺𑀁.

𑁧𑁧𑁩𑁮. ‘‘𑀯𑀭𑀸𑀳𑀏𑀡𑁂𑀬𑁆𑀬𑀯𑀺𑀕𑀸𑀴𑁆𑀳𑀲𑁂𑀯𑀺𑀢𑁂, 𑀧𑀩𑁆𑀪𑀸𑀭𑀓𑀼𑀝𑁆𑀝𑁂 𑀧𑀓𑀢𑁂𑀯 𑀲𑀼𑀦𑁆𑀤𑀭𑁂;

𑀦𑀯𑀫𑁆𑀩𑀼𑀦𑀸 𑀧𑀸𑀯𑀼𑀲𑀲𑀺𑀢𑁆𑀢𑀓𑀸𑀦𑀦𑁂, 𑀢𑀳𑀺𑀁 𑀕𑀼𑀳𑀸𑀕𑁂𑀳𑀕𑀢𑁄 𑀭𑀫𑀺𑀲𑁆𑀲𑀲𑀺.

𑁧𑁧𑁩𑁯. ‘‘𑀲𑀼𑀦𑀻𑀮𑀕𑀻𑀯𑀸 𑀲𑀼𑀲𑀺𑀔𑀸 𑀲𑀼𑀧𑁂𑀔𑀼𑀦𑀸, 𑀲𑀼𑀘𑀺𑀢𑁆𑀢𑀧𑀢𑁆𑀢𑀘𑁆𑀙𑀤𑀦𑀸 𑀯𑀺𑀳𑀗𑁆𑀕𑀫𑀸;

𑀲𑀼𑀫𑀜𑁆𑀚𑀼𑀖𑁄𑀲𑀢𑁆𑀣𑀦𑀺𑀢𑀸𑀪𑀺𑀕𑀚𑁆𑀚𑀺𑀦𑁄, 𑀢𑁂 𑀢𑀁 𑀭𑀫𑁂𑀲𑁆𑀲𑀦𑁆𑀢𑀺 𑀯𑀦𑀫𑁆𑀳𑀺 𑀛𑀸𑀬𑀺𑀦𑀁.

𑁧𑁧𑁪𑁦. ‘‘𑀯𑀼𑀝𑁆𑀞𑀫𑁆𑀳𑀺 𑀤𑁂𑀯𑁂 𑀘𑀢𑀼𑀭𑀗𑁆𑀕𑀼𑀮𑁂 𑀢𑀺𑀡𑁂, 𑀲𑀁𑀧𑀼𑀧𑁆𑀨𑀺𑀢𑁂 𑀫𑁂𑀖𑀦𑀺𑀪𑀫𑁆𑀳𑀺 𑀓𑀸𑀦𑀦𑁂;

𑀦𑀕𑀦𑁆𑀢𑀭𑁂 𑀯𑀺𑀝𑀧𑀺𑀲𑀫𑁄 𑀲𑀬𑀺𑀲𑁆𑀲𑀁, 𑀢𑀁 𑀫𑁂 𑀫𑀼𑀤𑀽 𑀳𑁂𑀳𑀺𑀢𑀺 𑀢𑀽𑀮𑀲𑀦𑁆𑀦𑀺𑀪𑀁.

𑁧𑁧𑁪𑁧. ‘‘𑀢𑀣𑀸 𑀢𑀼 𑀓𑀲𑁆𑀲𑀸𑀫𑀺 𑀬𑀣𑀸𑀧𑀺 𑀇𑀲𑁆𑀲𑀭𑁄, 𑀬𑀁 𑀮𑀩𑁆𑀪𑀢𑀺 𑀢𑁂𑀦𑀧𑀺 𑀳𑁄𑀢𑀼 𑀫𑁂 𑀅𑀮𑀁;

𑀦 𑀢𑀸𑀳𑀁 𑀓𑀲𑁆𑀲𑀸𑀫𑀺 𑀬𑀣𑀸 𑀅𑀢𑀦𑁆𑀤𑀺𑀢𑁄, 𑀩𑀺𑀴𑀸𑀭𑀪𑀲𑁆𑀢𑀁𑀯 𑀬𑀣𑀸 𑀲𑀼𑀫𑀤𑁆𑀤𑀺𑀢𑀁.

𑁧𑁧𑁪𑁨. ‘‘𑀢𑀣𑀸 𑀢𑀼 𑀓𑀲𑁆𑀲𑀸𑀫𑀺 𑀬𑀣𑀸𑀧𑀺 𑀇𑀲𑁆𑀲𑀭𑁄, 𑀬𑀁 𑀮𑀩𑁆𑀪𑀢𑀺 𑀢𑁂𑀦𑀧𑀺 𑀳𑁄𑀢𑀼 𑀫𑁂 𑀅𑀮𑀁;

𑀯𑀺𑀭𑀺𑀬𑁂𑀦 𑀢𑀁 𑀫𑀬𑁆𑀳 𑀯𑀲𑀸𑀦𑀬𑀺𑀲𑁆𑀲𑀁, 𑀕𑀚𑀁𑀯 𑀫𑀢𑁆𑀢𑀁 𑀓𑀼𑀲𑀮𑀗𑁆𑀓𑀼𑀲𑀕𑁆𑀕𑀳𑁄.

𑁧𑁧𑁪𑁩. ‘‘𑀢𑀬𑀸 𑀲𑀼𑀤𑀦𑁆𑀢𑁂𑀦 𑀅𑀯𑀝𑁆𑀞𑀺𑀢𑁂𑀦 𑀳𑀺, 𑀳𑀬𑁂𑀦 𑀬𑁄𑀕𑁆𑀕𑀸𑀘𑀭𑀺𑀬𑁄𑀯 𑀉𑀚𑁆𑀚𑀼𑀦𑀸;

𑀧𑀳𑁄𑀫𑀺 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺𑀢𑀼𑀁 𑀲𑀺𑀯𑀁, 𑀘𑀺𑀢𑁆𑀢𑀸𑀦𑀼𑀭𑀓𑁆𑀔𑀻𑀳𑀺 𑀲𑀤𑀸 𑀦𑀺𑀲𑁂𑀯𑀺𑀢𑀁.

𑁧𑁧𑁪𑁪. ‘‘𑀆𑀭𑀫𑁆𑀫𑀡𑁂 𑀢𑀁 𑀩𑀮𑀲𑀸 𑀦𑀺𑀩𑀦𑁆𑀥𑀺𑀲𑀁, 𑀦𑀸𑀕𑀁𑀯 𑀣𑀫𑁆𑀪𑀫𑁆𑀳𑀺 𑀤𑀴𑁆𑀳𑀸𑀬 𑀭𑀚𑁆𑀚𑀼𑀬𑀸;

𑀢𑀁 𑀫𑁂 𑀲𑀼𑀕𑀼𑀢𑁆𑀢𑀁 𑀲𑀢𑀺𑀬𑀸 𑀲𑀼𑀪𑀸𑀯𑀺𑀢𑀁, 𑀅𑀦𑀺𑀲𑁆𑀲𑀺𑀢𑀁 𑀲𑀩𑁆𑀩𑀪𑀯𑁂𑀲𑀼 𑀳𑁂𑀳𑀺𑀲𑀺.

𑁧𑁧𑁪𑁫. ‘‘𑀧𑀜𑁆𑀜𑀸𑀬 𑀙𑁂𑀢𑁆𑀯𑀸 𑀯𑀺𑀧𑀣𑀸𑀦𑀼𑀲𑀸𑀭𑀺𑀦𑀁, 𑀬𑁄𑀕𑁂𑀦 𑀦𑀺𑀕𑁆𑀕𑀬𑁆𑀳 𑀧𑀣𑁂 𑀦𑀺𑀯𑁂𑀲𑀺𑀬;

𑀤𑀺𑀲𑁆𑀯𑀸 𑀲𑀫𑀼𑀤𑀬𑀁 𑀯𑀺𑀪𑀯𑀜𑁆𑀘 𑀲𑀫𑁆𑀪𑀯𑀁, 𑀤𑀸𑀬𑀸𑀤𑀓𑁄 𑀳𑁂𑀳𑀺𑀲𑀺 𑀅𑀕𑁆𑀕𑀯𑀸𑀤𑀺𑀦𑁄.

𑁧𑁧𑁪𑁬. ‘‘𑀘𑀢𑀼𑀩𑁆𑀩𑀺𑀧𑀮𑁆𑀮𑀸𑀲𑀯𑀲𑀁 𑀅𑀥𑀺𑀝𑁆𑀞𑀺𑀢𑀁, 𑀕𑀸𑀫𑀡𑁆𑀟𑀮𑀁𑀯 𑀧𑀭𑀺𑀦𑁂𑀲𑀺 𑀘𑀺𑀢𑁆𑀢 𑀫𑀁;

𑀦𑀦𑀼 𑀲𑀁𑀬𑁄𑀚𑀦𑀩𑀦𑁆𑀥𑀦𑀘𑁆𑀙𑀺𑀤𑀁, 𑀲𑀁𑀲𑁂𑀯𑀲𑁂 𑀓𑀸𑀭𑀼𑀡𑀺𑀓𑀁 𑀫𑀳𑀸𑀫𑀼𑀦𑀺𑀁.

𑁧𑁧𑁪𑁭. ‘‘𑀫𑀺𑀕𑁄 𑀬𑀣𑀸 𑀲𑁂𑀭𑀺 𑀲𑀼𑀘𑀺𑀢𑁆𑀢𑀓𑀸𑀦𑀦𑁂, 𑀭𑀫𑁆𑀫𑀁 𑀕𑀺𑀭𑀺𑀁 𑀧𑀸𑀯𑀼𑀲𑀅𑀩𑁆𑀪𑀫𑀸𑀮𑀺𑀦𑀺𑀁;

𑀅𑀦𑀸𑀓𑀼𑀮𑁂 𑀢𑀢𑁆𑀣 𑀦𑀕𑁂 𑀭𑀫𑀺𑀲𑁆𑀲𑀁, 𑀅𑀲𑀁𑀲𑀬𑀁 𑀘𑀺𑀢𑁆𑀢 𑀧𑀭𑀸 𑀪𑀯𑀺𑀲𑁆𑀲𑀲𑀺.

𑁧𑁧𑁪𑁮. ‘‘𑀬𑁂 𑀢𑀼𑀬𑁆𑀳 𑀙𑀦𑁆𑀤𑁂𑀦 𑀯𑀲𑁂𑀦 𑀯𑀢𑁆𑀢𑀺𑀦𑁄,

𑀦𑀭𑀸 𑀘 𑀦𑀸𑀭𑀻 𑀘 𑀅𑀦𑀼𑀪𑁄𑀦𑁆𑀢𑀺 𑀬𑀁 𑀲𑀼𑀔𑀁;

𑀅𑀯𑀺𑀤𑁆𑀤𑀲𑀽 𑀫𑀸𑀭𑀯𑀲𑀸𑀦𑀼𑀯𑀢𑁆𑀢𑀺𑀦𑁄,

𑀪𑀯𑀸𑀪𑀺𑀦𑀦𑁆𑀤𑀻 𑀢𑀯 𑀘𑀺𑀢𑁆𑀢 𑀲𑀸𑀯𑀓𑀸’’𑀢𑀺.

𑀢𑀢𑁆𑀣 𑀓𑀤𑀸 𑀦𑀼𑀳𑀦𑁆𑀢𑀺 𑀓𑀤𑀸 𑀦𑀼 𑀅𑀳𑀁. 𑀧𑀩𑁆𑀩𑀢𑀓𑀦𑁆𑀤𑀭𑀸𑀲𑀽𑀢𑀺 𑀧𑀩𑁆𑀩𑀢𑁂𑀲𑀼 𑀘 𑀓𑀦𑁆𑀤𑀭𑁂𑀲𑀼 𑀘, 𑀧𑀩𑁆𑀩𑀢𑀲𑁆𑀲 𑀯𑀸 𑀓𑀦𑁆𑀤𑀭𑀸𑀲𑀼. 𑀏𑀓𑀸𑀓𑀺𑀬𑁄𑀢𑀺 𑀏𑀓𑀓𑁄. 𑀅𑀤𑁆𑀤𑀼𑀢𑀺𑀬𑁄𑀢𑀺 𑀦𑀺𑀢𑁆𑀢𑀡𑁆𑀳𑁄. 𑀢𑀡𑁆𑀳𑀸 𑀳𑀺 𑀧𑀼𑀭𑀺𑀲𑀲𑁆𑀲 𑀤𑀼𑀢𑀺𑀬𑀸 𑀦𑀸𑀫. 𑀯𑀺𑀳𑀲𑁆𑀲𑀦𑁆𑀢𑀺 𑀯𑀺𑀳𑀭𑀺𑀲𑁆𑀲𑀸𑀫𑀺. 𑀅𑀦𑀺𑀘𑁆𑀘𑀢𑁄 𑀲𑀩𑁆𑀩𑀪𑀯𑀁 𑀯𑀺𑀧𑀲𑁆𑀲𑀦𑁆𑀢𑀺 𑀓𑀸𑀫𑀪𑀯𑀸𑀤𑀺𑀪𑁂𑀤𑀁 𑀲𑀩𑁆𑀩𑀫𑁆𑀧𑀺 𑀪𑀯𑀁 ‘‘𑀳𑀼𑀢𑁆𑀯𑀸 𑀅𑀪𑀸𑀯𑀝𑁆𑀞𑁂𑀦 𑀅𑀦𑀺𑀘𑁆𑀘’’𑀦𑁆𑀢𑀺 𑀯𑀺𑀧𑀲𑁆𑀲𑀦𑁆𑀢𑁄 𑀓𑀤𑀸 𑀦𑀼 𑀯𑀺𑀳𑀭𑀺𑀲𑁆𑀲𑀦𑁆𑀢𑀺 𑀬𑁄𑀚𑀦𑀸. 𑀦𑀺𑀤𑀲𑁆𑀲𑀦𑀫𑀢𑁆𑀢𑀜𑁆𑀘𑁂𑀢𑀁, ‘‘𑀬𑀤𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔𑀁, 𑀬𑀁 𑀤𑀼𑀓𑁆𑀔𑀁 𑀢𑀤𑀦𑀢𑁆𑀢𑀸’’𑀢𑀺 𑀯𑀘𑀦𑀢𑁄 (𑀲𑀁. 𑀦𑀺. 𑁩.𑁧𑁫) 𑀇𑀢𑀭𑀫𑁆𑀧𑀺 𑀮𑀓𑁆𑀔𑀡𑀤𑁆𑀯𑀬𑀁 𑀯𑀼𑀢𑁆𑀢𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀁 𑀫𑁂 𑀇𑀤𑀁 𑀢𑀁 𑀦𑀼 𑀓𑀤𑀸 𑀪𑀯𑀺𑀲𑁆𑀲𑀢𑀻𑀢𑀺 𑀢𑀁 𑀇𑀤𑀁 𑀫𑁂 𑀧𑀭𑀺𑀯𑀺𑀢𑀓𑁆𑀓𑀺𑀢𑀁 𑀓𑀤𑀸 𑀦𑀼 𑀪𑀯𑀺𑀲𑁆𑀲𑀢𑀺, 𑀓𑀤𑀸 𑀦𑀼 𑀔𑁄 𑀫𑀢𑁆𑀣𑀓𑀁 𑀧𑀸𑀧𑀼𑀡𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀢𑀁 𑀦𑀽𑀢𑀺 𑀘𑁂𑀢𑁆𑀣 𑀢𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀅𑀬𑀜𑁆𑀳𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀓𑀤𑀸 𑀦𑀼 𑀔𑁄 𑀅𑀳𑀁 𑀫𑀳𑀸𑀕𑀚𑁄 𑀯𑀺𑀬 𑀲𑀗𑁆𑀔𑀮𑀺𑀓𑀩𑀦𑁆𑀥𑀦𑀁, 𑀕𑀺𑀳𑀺𑀩𑀦𑁆𑀥𑀦𑀁 𑀙𑀺𑀦𑁆𑀤𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀓𑀸𑀬𑀯𑀺𑀯𑁂𑀓𑀁 𑀧𑀭𑀺𑀩𑁆𑀭𑀽𑀳𑀬𑀦𑁆𑀢𑁄 𑀏𑀓𑀸𑀓𑀻 𑀧𑀩𑁆𑀩𑀢𑀓𑀦𑁆𑀤𑀭𑀸𑀲𑀼 𑀅𑀤𑀼𑀢𑀺𑀬𑁄 𑀲𑀩𑁆𑀩𑀢𑁆𑀣 𑀦𑀺𑀭𑀧𑁂𑀓𑁆𑀔𑁄 𑀲𑀩𑁆𑀩𑀲𑀗𑁆𑀔𑀸𑀭𑀕𑀢𑀁 𑀅𑀦𑀺𑀘𑁆𑀘𑀸𑀤𑀺𑀢𑁄 𑀯𑀺𑀧𑀲𑁆𑀲𑀦𑁆𑀢𑁄 𑀯𑀺𑀳𑀭𑀺𑀲𑁆𑀲𑀸𑀫𑀻𑀢𑀺.

𑀪𑀺𑀦𑁆𑀦𑀧𑀝𑀦𑁆𑀥𑀭𑁄𑀢𑀺 𑀪𑀺𑀦𑁆𑀦𑀯𑀢𑁆𑀣𑀥𑀭𑁄, 𑀕𑀸𑀣𑀸𑀲𑀼𑀔𑀢𑁆𑀣𑀁 𑀦𑀓𑀸𑀭𑀸𑀕𑀫𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀲𑀢𑁆𑀣𑀓𑀘𑁆𑀙𑀺𑀦𑁆𑀦𑀅𑀕𑁆𑀖𑀨𑀲𑁆𑀲𑀯𑀡𑁆𑀡𑀪𑀺𑀦𑁆𑀦𑀁 𑀧𑀝𑀘𑀻𑀯𑀭𑀁 𑀥𑀸𑀭𑁂𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀫𑀼𑀦𑀻𑀢𑀺 𑀧𑀩𑁆𑀩𑀚𑀺𑀢𑁄. 𑀅𑀫𑀫𑁄𑀢𑀺 𑀓𑀼𑀮𑁂 𑀯𑀸 𑀕𑀡𑁂 𑀯𑀸 𑀫𑀫𑀢𑁆𑀢𑀸𑀪𑀸𑀯𑁂𑀦 𑀅𑀫𑀫𑁄. 𑀓𑀢𑁆𑀣𑀘𑀺𑀧𑀺 𑀆𑀭𑀫𑁆𑀫𑀡𑁂 𑀆𑀲𑀻𑀲𑀦𑀸𑀬 𑀅𑀪𑀸𑀯𑁂𑀦 𑀦𑀺𑀭𑀸𑀲𑁄. 𑀳𑀦𑁆𑀢𑁆𑀯𑀸 𑀲𑀼𑀔𑀻 𑀧𑀯𑀦𑀕𑀢𑁄 𑀯𑀺𑀳𑀲𑁆𑀲𑀦𑁆𑀢𑀺 𑀭𑀸𑀕𑀸𑀤𑀺𑀓𑁂 𑀓𑀺𑀮𑁂𑀲𑁂 𑀅𑀭𑀺𑀬𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀫𑀕𑁆𑀕𑀲𑀼𑀔𑁂𑀦 𑀨𑀮𑀲𑀼𑀔𑁂𑀦 𑀲𑀼𑀔𑀻 𑀫𑀳𑀸𑀯𑀦𑀕𑀢𑁄 𑀓𑀤𑀸 𑀦𑀼 𑀔𑁄 𑀅𑀳𑀁 𑀯𑀺𑀳𑀭𑀺𑀲𑁆𑀲𑀸𑀫𑀺.

𑀯𑀥𑀭𑁄𑀕𑀦𑀻𑀴𑀦𑁆𑀢𑀺 𑀫𑀭𑀡𑀲𑁆𑀲 𑀘 𑀭𑁄𑀕𑀲𑁆𑀲 𑀘 𑀓𑀼𑀮𑀸𑀯𑀓𑀪𑀽𑀢𑀁. 𑀓𑀸𑀬𑀁 𑀇𑀫𑀦𑁆𑀢𑀺 𑀇𑀫𑀁 𑀔𑀦𑁆𑀥𑀧𑀜𑁆𑀘𑀓𑀲𑀗𑁆𑀔𑀸𑀢𑀁 𑀓𑀸𑀬𑀁. 𑀔𑀦𑁆𑀥𑀧𑀜𑁆𑀘𑀓𑁄𑀧𑀺 𑀳𑀺 ‘‘𑀅𑀯𑀺𑀚𑁆𑀚𑀸𑀕𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑀧𑀼𑀕𑁆𑀕𑀮𑀲𑁆𑀲 𑀢𑀡𑁆𑀳𑀸𑀦𑀼𑀕𑀢𑀲𑁆𑀲 𑀅𑀬𑀫𑁂𑀯 𑀓𑀸𑀬𑁄 𑀩𑀳𑀺𑀤𑁆𑀥𑀸 𑀦𑀸𑀫𑀭𑀽𑀧’’𑀦𑁆𑀢𑀺𑀆𑀤𑀻𑀲𑀼 𑀓𑀸𑀬𑁄 𑀯𑀼𑀘𑁆𑀘𑀢𑀺. 𑀫𑀘𑁆𑀘𑀼𑀚𑀭𑀸𑀬𑀼𑀧𑀤𑁆𑀤𑀼𑀢𑀦𑁆𑀢𑀺 𑀫𑀭𑀡𑁂𑀦 𑀘𑁂𑀯 𑀚𑀭𑀸𑀬 𑀘 𑀧𑀻𑀴𑀺𑀢𑀁, 𑀯𑀺𑀧𑀲𑁆𑀲𑀫𑀸𑀦𑁄 𑀅𑀳𑀁 𑀪𑀬𑀳𑁂𑀢𑀼𑀧𑀳𑀸𑀦𑁂𑀦 𑀯𑀻𑀢𑀪𑀬𑁄, 𑀢𑀁 𑀦𑀼 𑀓𑀤𑀸 𑀪𑀯𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄.

𑀪𑀬𑀚𑀦𑀦𑀺𑀦𑁆𑀢𑀺 𑀧𑀜𑁆𑀘𑀯𑀻𑀲𑀢𑀺𑀬𑀸 𑀫𑀳𑀸𑀪𑀬𑀸𑀦𑀁 𑀉𑀧𑁆𑀧𑀸𑀤𑀓𑀸𑀭𑀡𑀪𑀽𑀢𑀁 𑀓𑀸𑀬𑀺𑀓𑀲𑁆𑀲 𑀘 𑀘𑁂𑀢𑀲𑀺𑀓𑀲𑁆𑀲 𑀘 𑀲𑀓𑀮𑀲𑁆𑀲𑀧𑀺 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀆𑀯𑀳𑀦𑀢𑁄 𑀤𑀼𑀔𑀸𑀯𑀳𑀁. 𑀢𑀡𑁆𑀳𑀸𑀮𑀢𑀁 𑀩𑀳𑀼𑀯𑀺𑀥𑀸𑀦𑀼𑀯𑀢𑁆𑀢𑀦𑀺𑀦𑁆𑀢𑀺 𑀩𑀳𑀼𑀯𑀺𑀥𑀜𑁆𑀘 𑀆𑀭𑀫𑁆𑀫𑀡𑀁 𑀪𑀯𑀫𑁂𑀯 𑀯𑀸 𑀅𑀦𑀼𑀯𑀢𑁆𑀢𑀢𑀺 𑀲𑀦𑁆𑀢𑀦𑁄𑀢𑀻𑀢𑀺 𑀩𑀳𑀼𑀯𑀺𑀥𑀸𑀦𑀼𑀯𑀢𑁆𑀢𑀦𑀺𑀁, 𑀢𑀡𑁆𑀳𑀸𑀲𑀗𑁆𑀔𑀸𑀢𑀮𑀢𑀁. 𑀧𑀜𑁆𑀜𑀸𑀫𑀬𑀦𑁆𑀢𑀺 𑀫𑀕𑁆𑀕𑀧𑀜𑁆𑀜𑀸𑀫𑀬𑀁 𑀲𑀼𑀦𑀺𑀲𑀺𑀢𑀁 𑀅𑀲𑀺𑀔𑀕𑁆𑀕𑀁 𑀯𑀻𑀭𑀺𑀬𑀧𑀕𑁆𑀕𑀳𑀺𑀢𑁂𑀦 𑀲𑀤𑁆𑀥𑀸𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀲𑀫𑀼𑀘𑁆𑀙𑀺𑀦𑁆𑀤𑀺𑀢𑁆𑀯𑀸 ‘‘𑀓𑀤𑀸 𑀦𑀼𑀳𑀁 𑀯𑀲𑁂’’𑀢𑀺 𑀬𑀁 𑀧𑀭𑀺𑀯𑀺𑀢𑀓𑁆𑀓𑀺𑀢𑀁, 𑀢𑀫𑁆𑀧𑀺 𑀓𑀤𑀸 𑀪𑀯𑀺𑀲𑁆𑀲𑀢𑀻𑀢𑀺 𑀬𑁄𑀚𑀦𑀸.

𑀉𑀕𑁆𑀕𑀢𑁂𑀚𑀦𑁆𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀦𑀺𑀲𑀺𑀢𑀢𑀸𑀬 𑀢𑀺𑀓𑁆𑀔𑀢𑁂𑀚𑀁. 𑀲𑀢𑁆𑀣𑀁 𑀇𑀲𑀻𑀦𑀦𑁆𑀢𑀺 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀅𑀭𑀺𑀬𑀲𑀸𑀯𑀓𑀇𑀲𑀻𑀦𑀁 𑀲𑀢𑁆𑀣𑀪𑀽𑀢𑀁. 𑀫𑀸𑀭𑀁 𑀲𑀲𑁂𑀦𑀁 𑀲𑀳𑀲𑀸 𑀪𑀜𑁆𑀚𑀺𑀲𑁆𑀲𑀦𑁆𑀢𑀺 𑀓𑀺𑀮𑁂𑀲𑀲𑁂𑀦𑀸𑀬 𑀲𑀲𑁂𑀦𑀁 𑀅𑀪𑀺𑀲𑀗𑁆𑀔𑀸𑀭𑀸𑀤𑀺𑀫𑀸𑀭𑀁 𑀲𑀳𑀲𑀸 𑀲𑀻𑀖𑀫𑁂𑀯 𑀪𑀜𑁆𑀚𑀺𑀲𑁆𑀲𑀸𑀫𑀺. 𑀲𑀻𑀳𑀸𑀲𑀦𑁂𑀢𑀺 𑀣𑀺𑀭𑀸𑀲𑀦𑁂, 𑀅𑀧𑀭𑀸𑀚𑀺𑀢𑀧𑀮𑁆𑀮𑀗𑁆𑀓𑁂𑀢𑀺 𑀅𑀢𑁆𑀣𑁄.

𑀲𑀩𑁆𑀪𑀺 𑀲𑀫𑀸𑀕𑀫𑁂𑀲𑀼 𑀤𑀺𑀝𑁆𑀞𑁄 𑀪𑀯𑁂𑀢𑀺 𑀥𑀫𑁆𑀫𑀕𑀸𑀭𑀯𑀬𑀼𑀢𑁆𑀢𑀢𑀸𑀬 𑀥𑀫𑁆𑀫𑀕𑀭𑀽𑀳𑀺 𑀢𑀸𑀤𑀺𑀮𑀓𑁆𑀔𑀡𑀧𑁆𑀧𑀢𑁆𑀢𑀺𑀬𑀸 𑀢𑀸𑀤𑀻𑀳𑀺 𑀅𑀯𑀺𑀧𑀭𑀻𑀢𑀤𑀲𑁆𑀲𑀺𑀢𑀸𑀬 𑀬𑀸𑀣𑀸𑀯𑀤𑀲𑁆𑀲𑀻𑀳𑀺 𑀅𑀭𑀺𑀬𑀫𑀕𑁆𑀕𑁂𑀦𑁂𑀯 𑀧𑀸𑀧𑀚𑀺𑀢𑀺𑀦𑁆𑀤𑁆𑀭𑀺𑀬𑀢𑀸𑀬 𑀚𑀺𑀢𑀺𑀦𑁆𑀤𑁆𑀭𑀺𑀬𑁂𑀳𑀺 𑀩𑀼𑀤𑁆𑀥𑀸𑀤𑀻𑀳𑀺 𑀲𑀸𑀥𑀽𑀳𑀺 𑀲𑀫𑀸𑀕𑀫𑁂𑀲𑀼 ‘‘𑀓𑀤𑀸 𑀦𑀼 𑀅𑀳𑀁 𑀧𑀥𑀸𑀦𑀺𑀬𑁄𑀢𑀺 𑀤𑀺𑀝𑁆𑀞𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀬𑀁 𑀫𑁂 𑀧𑀭𑀺𑀯𑀺𑀢𑀓𑁆𑀓𑀺𑀢𑀁, 𑀢𑀁 𑀦𑀼 𑀓𑀤𑀸 𑀪𑀯𑀺𑀲𑁆𑀲𑀢𑀻𑀢𑀺 𑀬𑁄𑀚𑀦𑀸. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀢𑁆𑀣 𑀧𑀤𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸, 𑀧𑀤𑀢𑁆𑀣𑀫𑀢𑁆𑀢𑀫𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫.

𑀢𑀦𑁆𑀤𑀻𑀢𑀺 𑀆𑀮𑀲𑀺𑀬𑀁. 𑀔𑀼𑀤𑀸𑀢𑀺 𑀚𑀺𑀖𑀘𑁆𑀙𑀸. 𑀓𑀻𑀝𑀲𑀭𑀻𑀲𑀧𑀸𑀢𑀺 𑀓𑀻𑀝𑀜𑁆𑀘𑁂𑀯 𑀲𑀭𑀻𑀲𑀧𑀸 𑀘. 𑀦 𑀩𑀸𑀥𑀬𑀺𑀲𑁆𑀲𑀦𑁆𑀢𑀻𑀢𑀺 𑀫𑀁 𑀦 𑀩𑁆𑀬𑀸𑀥𑀬𑀺𑀲𑁆𑀲𑀦𑁆𑀢𑀺 𑀲𑀼𑀔𑀤𑀼𑀓𑁆𑀔𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀸𑀦𑀁 𑀛𑀸𑀦𑁂𑀳𑀺 𑀧𑀝𑀺𑀩𑀸𑀳𑀺𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀕𑀺𑀭𑀺𑀩𑁆𑀩𑀚𑁂𑀢𑀺 𑀧𑀩𑁆𑀩𑀢𑀓𑀦𑁆𑀤𑀭𑀸𑀬. 𑀅𑀢𑁆𑀣𑀢𑁆𑀣𑀺𑀬𑀦𑁆𑀢𑀺 𑀲𑀤𑀢𑁆𑀣𑀲𑀗𑁆𑀔𑀸𑀢𑁂𑀦 𑀅𑀢𑁆𑀣𑁂𑀦 𑀅𑀢𑁆𑀣𑀺𑀓𑀁.

𑀬𑀁 𑀯𑀺𑀤𑀺𑀢𑀁 𑀫𑀳𑁂𑀲𑀺𑀦𑀸𑀢𑀺 𑀬𑀁 𑀘𑀢𑀼𑀲𑀘𑁆𑀘𑀁 𑀫𑀳𑁂𑀲𑀺𑀦𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀲𑀬𑀫𑁆𑀪𑀽𑀜𑀸𑀡𑁂𑀦 𑀜𑀸𑀢𑀁 𑀧𑀝𑀺𑀯𑀺𑀤𑁆𑀥𑀁, 𑀢𑀸𑀦𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀅𑀦𑀼𑀧𑀘𑀺𑀢𑀓𑀼𑀲𑀮𑀲𑀫𑁆𑀪𑀸𑀭𑁂𑀳𑀺 𑀲𑀼𑀝𑁆𑀞𑀼 𑀤𑀼𑀤𑁆𑀤𑀲𑀸𑀦𑀺 𑀫𑀕𑁆𑀕𑀲𑀫𑀸𑀥𑀺𑀦𑀸 𑀲𑀫𑀸𑀳𑀺𑀢𑀢𑁆𑀢𑁄, 𑀲𑀫𑁆𑀫𑀸𑀲𑀢𑀺𑀬𑀸 𑀲𑀢𑀺𑀫𑀸, 𑀅𑀭𑀺𑀬𑀫𑀕𑁆𑀕𑀧𑀜𑁆𑀜𑀸𑀬 𑀅𑀳𑀁 𑀅𑀕𑀘𑁆𑀙𑀁 𑀧𑀝𑀺𑀯𑀺𑀚𑁆𑀛𑀺𑀲𑁆𑀲𑀁 𑀅𑀥𑀺𑀕𑀫𑀺𑀲𑁆𑀲𑀦𑁆𑀢𑀺 𑀅𑀢𑁆𑀣𑁄.

𑀭𑀽𑀧𑁂𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀭𑀽𑀧𑁂. 𑀅𑀫𑀺𑀢𑁂𑀢𑀺 𑀜𑀸𑀡𑁂𑀦 𑀅𑀫𑀺𑀢𑁂, 𑀅𑀧𑀭𑀺𑀘𑁆𑀙𑀺𑀦𑁆𑀦𑁂 𑀅𑀧𑀭𑀺𑀜𑁆𑀜𑀸𑀢𑁂𑀢𑀺 𑀅𑀢𑁆𑀣𑁄. 𑀨𑀼𑀲𑀺𑀢𑀩𑁆𑀩𑁂𑀢𑀺, 𑀨𑁄𑀝𑁆𑀞𑀩𑁆𑀩𑁂. 𑀥𑀫𑁆𑀫𑁂𑀢𑀺 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑀥𑀫𑁆𑀫𑁂. 𑀅𑀫𑀺𑀢𑁂𑀢𑀺 𑀯𑀸 𑀅𑀧𑀭𑀺𑀫𑀸𑀡𑁂 𑀦𑀻𑀮𑀸𑀤𑀺𑀯𑀲𑁂𑀦 𑀅𑀦𑁂𑀓𑀪𑁂𑀤𑀪𑀺𑀦𑁆𑀦𑁂 𑀭𑀽𑀧𑁂 𑀪𑁂𑀭𑀺𑀲𑀤𑁆𑀤𑀸𑀤𑀺𑀯𑀲𑁂𑀦, 𑀫𑀽𑀮𑀭𑀲𑀸𑀤𑀺𑀯𑀲𑁂𑀦, 𑀓𑀓𑁆𑀔𑀴𑀫𑀼𑀤𑀼𑀢𑀸𑀤𑀺𑀯𑀲𑁂𑀦, 𑀲𑀼𑀔𑀤𑀼𑀓𑁆𑀔𑀸𑀤𑀺𑀯𑀲𑁂𑀦 𑀘, 𑀅𑀦𑁂𑀓𑀪𑁂𑀤𑀲𑀤𑁆𑀤𑀸𑀤𑀺𑀓𑁂 𑀘𑀸𑀢𑀺 𑀅𑀢𑁆𑀣𑁄. 𑀆𑀤𑀺𑀢𑁆𑀢𑀢𑁄𑀢𑀺 𑀏𑀓𑀸𑀤𑀲𑀳𑀺 𑀅𑀕𑁆𑀕𑀻𑀳𑀺 𑀆𑀤𑀺𑀢𑁆𑀢𑀪𑀸𑀯𑀢𑁄. 𑀲𑀫𑀣𑁂𑀳𑀺 𑀬𑀼𑀢𑁆𑀢𑁄𑀢𑀺 𑀛𑀸𑀦𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀲𑀫𑀸𑀥𑀻𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀧𑀜𑁆𑀜𑀸𑀬 𑀤𑀘𑁆𑀙𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀲𑀳𑀺𑀢𑀸𑀬 𑀫𑀕𑁆𑀕𑀧𑀜𑁆𑀜𑀸𑀬 𑀤𑀓𑁆𑀔𑀺𑀲𑁆𑀲𑀁.

𑀤𑀼𑀩𑁆𑀩𑀘𑀦𑁂𑀦 𑀯𑀼𑀢𑁆𑀢𑁄𑀢𑀺 𑀤𑀼𑀭𑀼𑀢𑁆𑀢𑀯𑀘𑀦𑁂𑀦 𑀖𑀝𑁆𑀝𑀺𑀢𑁄. 𑀢𑀢𑁄 𑀦𑀺𑀫𑀺𑀢𑁆𑀢𑀦𑁆𑀢𑀺 𑀨𑀭𑀼𑀲𑀯𑀸𑀘𑀸𑀳𑁂𑀢𑀼. 𑀯𑀺𑀫𑀦𑁄 𑀦 𑀳𑁂𑀲𑁆𑀲𑀦𑁆𑀢𑀺 𑀤𑁄𑀫𑀦𑀲𑁆𑀲𑀺𑀢𑁄 𑀦 𑀪𑀯𑁂𑀬𑁆𑀬𑀁. 𑀅𑀣𑁄𑀢𑀺 𑀅𑀣. 𑀧𑀲𑀢𑁆𑀣𑁄𑀢𑀺 𑀓𑁂𑀦𑀘𑀺 𑀧𑀲𑀁𑀲𑀺𑀢𑁄.

𑀓𑀝𑁆𑀞𑁂𑀢𑀺 𑀤𑀸𑀭𑀼𑀓𑁆𑀔𑀦𑁆𑀥𑁂. 𑀢𑀺𑀡𑁂𑀢𑀺 𑀢𑀺𑀡𑀸𑀦𑀁 𑀔𑀦𑁆𑀥𑁂. 𑀇𑀫𑁂𑀢𑀺 𑀇𑀫𑁂 𑀫𑀫 𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑁂 𑀧𑀜𑁆𑀘 𑀔𑀦𑁆𑀥𑁂. 𑀅𑀫𑀺𑀢𑁂 𑀘 𑀥𑀫𑁆𑀫𑁂𑀢𑀺 𑀢𑀢𑁄 𑀅𑀜𑁆𑀜𑁂𑀦 𑀇𑀦𑁆𑀤𑁆𑀭𑀺𑀬𑀓𑁆𑀔𑀦𑁆𑀥𑁂𑀦 𑀅𑀫𑀺𑀢𑁂 𑀭𑀽𑀧𑀥𑀫𑁆𑀫𑁂. 𑀢𑁂𑀦𑀸𑀳 𑁋 ‘‘𑀅𑀚𑁆𑀛𑀢𑁆𑀢𑀺𑀓𑀸𑀦𑁂𑀯 𑀘 𑀩𑀸𑀳𑀺𑀭𑀸𑀦𑀺 𑀘𑀸’’𑀢𑀺. 𑀲𑀫𑀁 𑀢𑀼𑀮𑁂𑀬𑁆𑀬𑀦𑁆𑀢𑀺 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀘𑁂𑀯 𑀅𑀲𑀸𑀭𑀸𑀤𑀺𑀉𑀧𑀫𑀸𑀯𑀲𑁂𑀦 𑀘 𑀲𑀩𑁆𑀩𑀁 𑀲𑀫𑀫𑁂𑀯 𑀓𑀢𑁆𑀯𑀸 𑀢𑀻𑀭𑁂𑀬𑁆𑀬𑀁.

𑀇𑀲𑀺𑀧𑁆𑀧𑀬𑀸𑀢𑀫𑁆𑀳𑀺 𑀧𑀣𑁂 𑀯𑀚𑀦𑁆𑀢𑀦𑁆𑀢𑀺 𑀩𑀼𑀤𑁆𑀥𑀸𑀤𑀻𑀳𑀺 𑀫𑀳𑁂𑀲𑀻𑀳𑀺 𑀲𑀫𑁆𑀫𑀤𑁂𑀯 𑀧𑀬𑀸𑀢𑁂 𑀲𑀫𑀣𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑁂 𑀯𑀚𑀦𑁆𑀢𑀁 𑀧𑀝𑀺𑀧𑀚𑁆𑀚𑀦𑁆𑀢𑀁. 𑀧𑀸𑀯𑀼𑀲𑀲𑀫𑀬𑁂 𑀓𑀸𑀮𑀫𑁂𑀖𑁄 𑀦𑀯𑁂𑀦 𑀢𑁄𑀬𑁂𑀦 𑀯𑀲𑁆𑀲𑁄𑀤𑀓𑁂𑀦 𑀲𑀘𑀻𑀯𑀭𑀁 𑀧𑀯𑀦𑁂 𑀓𑀤𑀸 𑀦𑀼 𑀑𑀯𑀲𑁆𑀲𑀢𑀺, 𑀢𑁂𑀫𑁂𑀢𑀻𑀢𑀺 𑀅𑀢𑁆𑀢𑀦𑁄 𑀅𑀩𑁆𑀪𑁄𑀓𑀸𑀲𑀺𑀓𑀪𑀸𑀯𑀧𑀭𑀺𑀯𑀺𑀢𑀓𑁆𑀓𑀺𑀢𑀁 𑀤𑀲𑁆𑀲𑁂𑀢𑀺.

𑀫𑀬𑀽𑀭𑀲𑁆𑀲 𑀲𑀺𑀔𑀡𑁆𑀟𑀺𑀦𑁄 𑀯𑀦𑁂 𑀤𑀺𑀚𑀲𑁆𑀲𑀸𑀢𑀺 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀅𑀡𑁆𑀟𑀓𑁄𑀲𑀢𑁄 𑀘𑀸𑀢𑀺 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀚𑀸𑀬𑀦𑀯𑀲𑁂𑀦 𑀤𑀺𑀚𑀲𑁆𑀲, 𑀲𑀺𑀔𑀸𑀲𑀫𑁆𑀪𑀯𑁂𑀦 𑀲𑀺𑀔𑀡𑁆𑀟𑀺𑀦𑁄 𑀘 𑀫𑀬𑀽𑀭𑀲𑁆𑀲 𑀯𑀦𑁂 𑀓𑀤𑀸 𑀧𑀦 𑀕𑀺𑀭𑀺𑀕𑀩𑁆𑀪𑀭𑁂 𑀭𑀼𑀢𑀁 𑀓𑁂𑀓𑀸𑀭𑀯𑀁 𑀲𑀼𑀢𑁆𑀯𑀸 𑀯𑁂𑀮𑀁 𑀲𑀮𑁆𑀮𑀓𑁆𑀔𑀺𑀢𑁆𑀯𑀸 𑀲𑀬𑀦𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸 𑀅𑀫𑀢𑀲𑁆𑀲 𑀧𑀢𑁆𑀢𑀺𑀬𑀸 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀸𑀬. 𑀲𑀁𑀘𑀺𑀦𑁆𑀢𑀬𑁂𑀢𑀺 𑀯𑀼𑀘𑁆𑀘𑀫𑀸𑀦𑁂 𑀪𑀯𑁂 𑀅𑀦𑀺𑀘𑁆𑀘𑀸𑀤𑀺𑀢𑁄 𑀫𑀦𑀲𑀺 𑀓𑀭𑁂𑀬𑁆𑀬𑀁 𑀯𑀺𑀧𑀲𑁆𑀲𑁂𑀬𑁆𑀬𑀦𑁆𑀢𑀺 𑀅𑀢𑁆𑀣𑁄.

𑀕𑀗𑁆𑀕𑀁 𑀬𑀫𑀼𑀦𑀁 𑀲𑀭𑀲𑁆𑀲𑀢𑀺𑀦𑁆𑀢𑀺 𑀏𑀢𑀸 𑀫𑀳𑀸𑀦𑀤𑀺𑀬𑁄 𑀅𑀲𑀚𑁆𑀚𑀫𑀸𑀦𑁄 𑀪𑀸𑀯𑀦𑀸𑀫𑀬𑀸𑀬 𑀇𑀤𑁆𑀥𑀺𑀬𑀸 𑀓𑀤𑀸 𑀦𑀼 𑀧𑀢𑀭𑁂𑀬𑁆𑀬𑀦𑁆𑀢𑀺 𑀬𑁄𑀚𑀦𑀸. 𑀧𑀸𑀢𑀸𑀮𑀔𑀺𑀢𑁆𑀢𑀁 𑀩𑀴𑀯𑀸𑀫𑀼𑀔𑀜𑁆𑀘𑀸𑀢𑀺 𑀧𑀸𑀢𑀸𑀬 𑀅𑀮𑀁 𑀧𑀭𑀺𑀬𑀢𑁆𑀢𑀦𑁆𑀢𑀺 𑀧𑀸𑀢𑀸𑀮𑀁, 𑀢𑀤𑁂𑀯 𑀔𑀺𑀢𑁆𑀢𑀁, 𑀧𑀣𑀯𑀺𑀬𑀸 𑀲𑀡𑁆𑀞𑀳𑀦𑀓𑀸𑀮𑁂 𑀢𑀣𑀸 𑀞𑀺𑀢𑀦𑁆𑀢𑀺 𑀧𑀸𑀢𑀸𑀮𑀔𑀺𑀢𑁆𑀢𑀁. 𑀬𑁄𑀚𑀦𑀲𑀢𑀺𑀓𑀸𑀤𑀺𑀪𑁂𑀤𑀸𑀦𑀺 𑀲𑀫𑀼𑀤𑁆𑀤𑀲𑁆𑀲 𑀅𑀦𑁆𑀢𑁄𑀧𑀣𑀯𑀺𑀬𑀸 𑀢𑀻𑀭𑀝𑁆𑀞𑀸𑀦𑀸𑀦𑀺, 𑀬𑁂𑀲𑀼 𑀓𑀸𑀦𑀺𑀘𑀺 𑀦𑀸𑀕𑀸𑀤𑀻𑀦𑀁 𑀯𑀲𑀦𑀝𑁆𑀞𑀸𑀦𑀸𑀦𑀺 𑀳𑁄𑀦𑁆𑀢𑀺, 𑀓𑀸𑀦𑀺𑀘𑀺 𑀲𑀼𑀜𑁆𑀜𑀸𑀦𑀺𑀬𑁂𑀯 𑀳𑀼𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺. 𑀩𑀴𑀯𑀸𑀫𑀼𑀔𑀦𑁆𑀢𑀺 𑀫𑀳𑀸𑀲𑀫𑀼𑀤𑁆𑀤𑁂 𑀫𑀳𑀦𑁆𑀢𑀁 𑀆𑀯𑀝𑁆𑀝𑀫𑀼𑀔𑀁. 𑀫𑀳𑀸𑀦𑀺𑀭𑀬𑀤𑁆𑀯𑀸𑀭𑀲𑁆𑀲 𑀳𑀺 𑀯𑀺𑀯𑀝𑀓𑀸𑀮𑁂 𑀫𑀳𑀸𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀢𑀢𑁄 𑀦𑀺𑀓𑁆𑀔𑀦𑁆𑀢𑁄 𑀢𑀤𑀪𑀺𑀫𑀼𑀔𑀁 𑀅𑀦𑁂𑀓𑀬𑁄𑀚𑀦𑀲𑀢𑀸𑀬𑀸𑀫𑀯𑀺𑀢𑁆𑀣𑀸𑀭𑀁 𑀳𑁂𑀝𑁆𑀞𑀸 𑀲𑀫𑀼𑀤𑁆𑀤𑀧𑀤𑁂𑀲𑀁 𑀟𑀳𑀢𑀺, 𑀢𑀲𑁆𑀫𑀺𑀁 𑀤𑀟𑁆𑀠𑁂 𑀉𑀧𑀭𑀺 𑀉𑀤𑀓𑀁 𑀆𑀯𑀝𑁆𑀝𑀸𑀓𑀸𑀭𑁂𑀦 𑀧𑀭𑀺𑀩𑁆𑀪𑀫𑀦𑁆𑀢𑀁 𑀫𑀳𑀢𑀸 𑀲𑀤𑁆𑀤𑁂𑀦 𑀳𑁂𑀝𑁆𑀞𑀸 𑀦𑀺𑀧𑀢𑀢𑀺. 𑀢𑀢𑁆𑀣 𑀩𑀴𑀯𑀸𑀫𑀼𑀔𑀲𑀫𑀜𑁆𑀜𑀸, 𑀇𑀢𑀺 𑀢𑀜𑁆𑀘 𑀧𑀸𑀢𑀸𑀮𑀔𑀺𑀢𑁆𑀢𑀁 𑀩𑀴𑀯𑀸𑀫𑀼𑀔𑀜𑁆𑀘 𑀯𑀺𑀪𑀺𑀁𑀲𑀦𑀁 𑀪𑀬𑀸𑀦𑀓𑀁 𑀅𑀲𑀚𑁆𑀚𑀫𑀸𑀦𑁄 𑀇𑀤𑁆𑀥𑀺𑀬𑀸 𑀓𑀤𑀸 𑀦𑀼 𑀧𑀢𑀭𑁂𑀬𑁆𑀬𑀦𑁆𑀢𑀺 𑀬𑀁 𑀧𑀭𑀺𑀯𑀺𑀢𑀓𑁆𑀓𑀺𑀢𑀁, 𑀢𑀁 𑀓𑀤𑀸 𑀦𑀼 𑀪𑀯𑀺𑀲𑁆𑀲𑀢𑀺, 𑀪𑀸𑀯𑀦𑀸𑀫𑀬𑀁 𑀇𑀤𑁆𑀥𑀺𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀓𑀤𑀸 𑀦𑀼 𑀏𑀯𑀁 𑀇𑀤𑁆𑀥𑀺𑀁 𑀯𑀴𑀜𑁆𑀚𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄.

𑀦𑀸𑀕𑁄𑀯 𑀅𑀲𑀗𑁆𑀕𑀘𑀸𑀭𑀻 𑀧𑀤𑀸𑀮𑀬𑁂𑀢𑀺 𑀬𑀣𑀸 𑀫𑀢𑁆𑀢𑀯𑀸𑀭𑀡𑁄 𑀤𑀴𑁆𑀳𑀣𑀫𑁆𑀪𑀁 𑀪𑀺𑀦𑁆𑀤𑀺𑀢𑁆𑀯𑀸 𑀅𑀬𑀲𑀗𑁆𑀔𑀮𑀺𑀓𑀁 𑀯𑀺𑀤𑁆𑀥𑀁𑀲𑁂𑀢𑁆𑀯𑀸 𑀅𑀲𑀗𑁆𑀕𑀘𑀸𑀭𑀻 𑀯𑀦𑀁 𑀧𑀯𑀺𑀲𑀺𑀢𑁆𑀯𑀸 𑀏𑀓𑁄 𑀅𑀤𑀼𑀢𑀺𑀬𑁄 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀭𑀼𑀘𑀺𑀯𑀲𑁂𑀦 𑀘𑀭𑀢𑀺, 𑀏𑀯𑀫𑀳𑀁 𑀓𑀤𑀸 𑀦𑀼 𑀲𑀩𑁆𑀩𑀲𑀼𑀪𑀁 𑀦𑀺𑀫𑀺𑀢𑁆𑀢𑀁 𑀦𑀺𑀩𑁆𑀩𑀚𑁆𑀚𑀬𑀁 𑀦𑀺𑀭𑀯𑀲𑁂𑀲𑀢𑁄 𑀯𑀚𑁆𑀚𑀬𑀦𑁆𑀢𑁄 𑀓𑀸𑀫𑀘𑁆𑀙𑀦𑁆𑀤𑀯𑀲𑁄 𑀅𑀳𑀼𑀢𑁆𑀯𑀸 𑀛𑀸𑀦𑁂 𑀬𑀼𑀢𑁄 𑀧𑀬𑀼𑀢𑁆𑀢𑁄 𑀓𑀸𑀫𑀕𑀼𑀡𑁂𑀲𑀼 𑀙𑀦𑁆𑀤𑀁 𑀲𑀫𑁆𑀫𑀤𑁂𑀯 𑀧𑀤𑀸𑀮𑁂𑀬𑁆𑀬𑀁 𑀙𑀺𑀦𑁆𑀤𑁂𑀬𑁆𑀬𑀁 𑀧𑀚𑀳𑁂𑀬𑁆𑀬𑀦𑁆𑀢𑀺 𑀬𑀁 𑀧𑀭𑀺𑀯𑀺𑀢𑀓𑁆𑀓𑀺𑀢𑀁, 𑀢𑀁 𑀦𑀼 𑀓𑀤𑀸 𑀪𑀯𑀺𑀲𑁆𑀲𑀢𑀺.

𑀇𑀡𑀝𑁆𑀝𑁄𑀯 𑀤𑀮𑀺𑀤𑁆𑀤𑀓𑁄 𑀦𑀺𑀥𑀺𑀁 𑀆𑀭𑀸𑀥𑀬𑀺𑀢𑁆𑀯𑀸𑀢𑀺 𑀬𑀣𑀸 𑀓𑁄𑀘𑀺 𑀤𑀮𑀺𑀤𑁆𑀤𑁄 𑀚𑀻𑀯𑀺𑀓𑀧𑀓𑀢𑁄 𑀇𑀡𑀁 𑀕𑀳𑁂𑀢𑁆𑀯𑀸 𑀢𑀁 𑀲𑁄𑀥𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀇𑀡𑀝𑁆𑀝𑁄 𑀇𑀡𑁂𑀦 𑀅𑀝𑁆𑀝𑀺𑀢𑁄 𑀥𑀦𑀺𑀓𑁂𑀳𑀺 𑀧𑀻𑀴𑀺𑀢𑁄 𑀦𑀺𑀥𑀺𑀁 𑀆𑀭𑀸𑀥𑀬𑀺𑀢𑁆𑀯𑀸 𑀅𑀥𑀺𑀕𑀦𑁆𑀢𑁆𑀯𑀸 𑀇𑀡𑀜𑁆𑀘 𑀲𑁄𑀥𑁂𑀢𑁆𑀯𑀸 𑀲𑀼𑀔𑁂𑀦 𑀘 𑀚𑀻𑀯𑀦𑁆𑀢𑁄 𑀢𑀼𑀝𑁆𑀞𑁄 𑀪𑀯𑁂𑀬𑁆𑀬, 𑀏𑀯𑀁 𑀅𑀳𑀫𑁆𑀧𑀺 𑀓𑀤𑀸 𑀦𑀼 𑀇𑀡𑀲𑀤𑀺𑀲𑀁 𑀓𑀸𑀫𑀘𑁆𑀙𑀦𑁆𑀤𑀁 𑀧𑀳𑀸𑀬 𑀫𑀳𑁂𑀲𑀺𑀦𑁄 𑀅𑀭𑀺𑀬𑀥𑀦𑀲𑀫𑁆𑀧𑀼𑀡𑁆𑀡𑀢𑀸𑀬 𑀫𑀡𑀺𑀓𑀦𑀓𑀸𑀤𑀺𑀭𑀢𑀦𑀲𑀫𑁆𑀧𑀼𑀡𑁆𑀡𑀦𑀺𑀥𑀺𑀲𑀤𑀺𑀲𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁 𑀅𑀥𑀺𑀕𑀦𑁆𑀢𑁆𑀯𑀸 𑀢𑀼𑀝𑁆𑀞𑁄 𑀪𑀯𑁂𑀬𑁆𑀬𑀦𑁆𑀢𑀺 𑀬𑀁 𑀧𑀭𑀺𑀯𑀺𑀢𑀓𑁆𑀓𑀺𑀢𑀁, 𑀢𑀁 𑀓𑀤𑀸 𑀦𑀼 𑀪𑀯𑀺𑀲𑁆𑀲𑀢𑀻𑀢𑀺.

𑀏𑀯𑀁 𑀧𑀩𑁆𑀩𑀚𑁆𑀚𑀢𑁄 𑀧𑀼𑀩𑁆𑀩𑁂 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑀯𑀲𑁂𑀦 𑀧𑀯𑀢𑁆𑀢𑀁 𑀅𑀢𑁆𑀢𑀦𑁄 𑀯𑀺𑀢𑀓𑁆𑀓𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀩𑁆𑀩𑀚𑀺𑀢𑁆𑀯𑀸 𑀬𑁂𑀳𑀸𑀓𑀸𑀭𑁂𑀳𑀺 𑀅𑀢𑁆𑀢𑀸𑀦𑀁 𑀑𑀯𑀤𑀺𑀢𑁆𑀯𑀸 𑀅𑀥𑀺𑀕𑀘𑁆𑀙𑀺, 𑀢𑁂 𑀤𑀲𑁆𑀲𑁂𑀦𑁆𑀢𑁄 ‘‘𑀩𑀳𑀽𑀦𑀺 𑀯𑀲𑁆𑀲𑀸𑀦𑀻’’𑀢𑀺𑀆𑀤𑀺𑀓𑀸 𑀕𑀸𑀣𑀸 𑀅𑀪𑀸𑀲𑀺. 𑀢𑀢𑁆𑀣 𑀩𑀳𑀽𑀦𑀺 𑀯𑀲𑁆𑀲𑀸𑀦𑀺 𑀢𑀬𑀸𑀫𑁆𑀳𑀺 𑀬𑀸𑀘𑀺𑀢𑁄, 𑀅𑀕𑀸𑀭𑀯𑀸𑀲𑁂𑀦 𑀅𑀮𑀁 𑀦𑀼 𑀢𑁂 𑀇𑀤𑀦𑁆𑀢𑀺 𑀅𑀦𑁂𑀓𑀲𑀁𑀯𑀘𑁆𑀙𑀭𑀸𑀦𑀺 𑀯𑀺𑀯𑀺𑀥𑀤𑀼𑀓𑁆𑀔𑀸𑀦𑀼𑀩𑀦𑁆𑀥𑁂𑀦 𑀅𑀕𑀸𑀭𑀫𑀚𑁆𑀛𑁂 𑀯𑀸𑀲𑁂𑀦 𑀅𑀮𑀁 𑀧𑀭𑀺𑀬𑀢𑁆𑀢𑀫𑁂𑀯 𑀢𑁂𑀢𑀺, 𑀅𑀫𑁆𑀪𑁄 𑀘𑀺𑀢𑁆𑀢, 𑀇𑀤𑀁 𑀢𑀬𑀸 𑀅𑀦𑁂𑀓𑀸𑀦𑀺 𑀲𑀁𑀯𑀘𑁆𑀙𑀭𑀸𑀦𑀺 𑀅𑀳𑀁 𑀅𑀫𑁆𑀳𑀺 𑀦𑀦𑀼 𑀬𑀸𑀘𑀺𑀢𑁄. 𑀢𑀁 𑀤𑀸𑀦𑀺 𑀫𑀁 𑀧𑀩𑁆𑀩𑀚𑀺𑀢𑀁 𑀲𑀫𑀸𑀦𑀦𑁆𑀢𑀺 𑀢𑀁 𑀫𑀁 𑀢𑀬𑀸 𑀢𑀣𑀸 𑀉𑀲𑁆𑀲𑀸𑀳𑀦𑁂𑀦 𑀧𑀩𑁆𑀩𑀚𑀺𑀢𑀁 𑀲𑀫𑀸𑀦𑀁 𑀓𑁂𑀦 𑀓𑀸𑀭𑀡𑁂𑀦 𑀘𑀺𑀢𑁆𑀢 𑀢𑀼𑀯𑀁 𑀦 𑀬𑀼𑀜𑁆𑀚𑀲𑀺, 𑀲𑀫𑀣𑀯𑀺𑀧𑀲𑁆𑀲𑀦𑀁 𑀙𑀟𑁆𑀟𑁂𑀢𑁆𑀯𑀸 𑀦𑀺𑀳𑀻𑀦𑁂 𑀆𑀮𑀲𑀺𑀬𑁂 𑀦𑀺𑀬𑁄𑀚𑁂𑀲𑀻𑀢𑀺 𑀅𑀢𑁆𑀣𑁄.

𑀦𑀦𑀼 𑀅𑀳𑀁, 𑀘𑀺𑀢𑁆𑀢, 𑀢𑀬𑀸𑀫𑁆𑀳𑀺 𑀬𑀸𑀘𑀺𑀢𑁄𑀢𑀺, 𑀅𑀫𑁆𑀪𑁄 𑀘𑀺𑀢𑁆𑀢, 𑀅𑀳𑀁 𑀢𑀬𑀸 𑀦𑀦𑀼 𑀬𑀸𑀘𑀺𑀢𑁄 𑀅𑀫𑁆𑀳𑀺 𑀆𑀬𑀸𑀘𑀺𑀢𑁄 𑀫𑀜𑁆𑀜𑁂. 𑀬𑀤𑀺 𑀬𑀸𑀘𑀺𑀢𑁄, 𑀓𑀲𑁆𑀫𑀸 𑀇𑀤𑀸𑀦𑀺 𑀢𑀤𑀦𑀼𑀭𑀽𑀧𑀁 𑀦 𑀧𑀝𑀺𑀧𑀚𑁆𑀚𑀲𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀕𑀺𑀭𑀺𑀩𑁆𑀩𑀚𑁂’’𑀢𑀺𑀆𑀤𑀺𑀦𑀸 𑀬𑀸𑀘𑀺𑀢𑀸𑀓𑀸𑀭𑀁 𑀤𑀲𑁆𑀲𑁂𑀢𑀺. 𑀘𑀺𑀢𑁆𑀭𑀙𑀤𑀸 𑀯𑀺𑀳𑀗𑁆𑀕𑀫𑀸 𑀯𑀺𑀘𑀺𑀢𑁆𑀭𑀧𑁂𑀔𑀼𑀡𑀧𑀓𑁆𑀔𑀺𑀦𑁄, 𑀫𑀬𑀽𑀭𑀸𑀢𑀺 𑀅𑀢𑁆𑀣𑁄. 𑀫𑀳𑀺𑀦𑁆𑀤𑀖𑁄𑀲𑀢𑁆𑀣𑀦𑀺𑀢𑀸𑀪𑀺𑀕𑀚𑁆𑀚𑀺𑀦𑁄𑀢𑀺 𑀚𑀮𑀖𑁄𑀲𑀢𑁆𑀣𑀦𑀺𑀢𑁂𑀦 𑀳𑁂𑀢𑀼𑀦𑀸 𑀲𑀼𑀝𑁆𑀞𑀼 𑀕𑀚𑁆𑀚𑀦𑀲𑀻𑀮𑀸. 𑀢𑁂 𑀢𑀁 𑀭𑀫𑁂𑀲𑁆𑀲𑀦𑁆𑀢𑀺 𑀯𑀦𑀫𑁆𑀳𑀺 𑀛𑀸𑀬𑀺𑀦𑀦𑁆𑀢𑀺 𑀢𑁂 𑀫𑀬𑀽𑀭𑀸 𑀢𑀁 𑀯𑀦𑁂 𑀛𑀸𑀦𑀧𑀲𑀼𑀢𑀁 𑀭𑀫𑁂𑀲𑁆𑀲𑀦𑁆𑀢𑀻𑀢𑀺 𑀦𑀦𑀼 𑀢𑀬𑀸 𑀬𑀸𑀘𑀺𑀢𑁄𑀢𑀺 𑀤𑀲𑁆𑀲𑁂𑀢𑀺.

𑀓𑀼𑀮𑀫𑁆𑀳𑀻𑀢𑀺 𑀓𑀼𑀮𑀧𑀭𑀺𑀯𑀝𑁆𑀝𑁂. 𑀇𑀫𑀫𑀚𑁆𑀛𑀼𑀧𑀸𑀕𑀢𑁄𑀢𑀺 𑀇𑀫𑀁 𑀅𑀭𑀜𑁆𑀜𑀝𑁆𑀞𑀸𑀦𑀁 𑀧𑀩𑁆𑀩𑀚𑁆𑀚𑀁 𑀯𑀸 𑀅𑀚𑁆𑀛𑀼𑀧𑀸𑀕𑀢𑁄. 𑀅𑀣𑁄𑀧𑀺 𑀢𑁆𑀯𑀁, 𑀘𑀺𑀢𑁆𑀢, 𑀦 𑀫𑀬𑁆𑀳 𑀢𑀼𑀲𑁆𑀲𑀲𑀻𑀢𑀺 𑀢𑁆𑀯𑀁 𑀅𑀦𑀼𑀯𑀢𑁆𑀢𑀺𑀢𑁆𑀯𑀸 𑀞𑀺𑀢𑀫𑁆𑀧𑀺 𑀫𑀁 𑀦𑀸𑀭𑀸𑀥𑁂𑀲𑁆𑀲𑀲𑀻𑀢𑀺 𑀅𑀢𑁆𑀣𑁄.

𑀫𑀫𑁂𑀯 𑀏𑀢𑀁 𑀦 𑀳𑀺 𑀢𑁆𑀯𑀁 𑀧𑀭𑁂𑀲𑀦𑁆𑀢𑀺 𑀏𑀢𑀁, 𑀘𑀺𑀢𑁆𑀢, 𑀫𑀫𑁂𑀯 𑀢𑀲𑁆𑀫𑀸 𑀢𑁆𑀯𑀁 𑀧𑀭𑁂𑀲𑀁 𑀦 𑀳𑁄𑀲𑀺. 𑀢𑁆𑀯𑀁 𑀧𑀦 𑀅𑀜𑁆𑀜𑁂𑀲𑀁 𑀯𑀺𑀬 𑀓𑀢𑁆𑀯𑀸 𑀲𑀦𑁆𑀦𑀸𑀳𑀓𑀸𑀮𑁂 𑀓𑀺𑀮𑁂𑀲𑀫𑀸𑀭𑁂 𑀬𑀼𑀚𑁆𑀛𑀺𑀢𑀼𑀁 𑀪𑀸𑀯𑀦𑀸𑀲𑀦𑁆𑀦𑀸𑀳𑀓𑀸𑀮𑁂 𑀦𑀢𑀺 𑀯𑀢𑁆𑀯𑀸 𑀧𑀭𑀺𑀤𑁂𑀯𑀺𑀢𑁂𑀦 𑀓𑀺𑀁 𑀧𑀬𑁄𑀚𑀦𑀁, 𑀇𑀤𑀸𑀦𑀺 𑀢𑀁 𑀅𑀜𑁆𑀜𑀣𑀸 𑀯𑀢𑁆𑀢𑀺𑀢𑀼𑀁 𑀦 𑀤𑀲𑁆𑀲𑀸𑀫𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀩𑁆𑀩𑀁 𑀇𑀤𑀁 𑀘𑀮𑀫𑀺𑀢𑀺 𑀧𑁂𑀓𑁆𑀔𑀫𑀸𑀦𑁄𑀢𑀺 𑀬𑀲𑁆𑀫𑀸 ‘‘𑀇𑀤𑀁 𑀘𑀺𑀢𑁆𑀢𑀁 𑀅𑀜𑁆𑀜𑀜𑁆𑀘 𑀲𑀩𑁆𑀩𑀁 𑀢𑁂𑀪𑀽𑀫𑀓𑀲𑀗𑁆𑀔𑀸𑀭𑀁 𑀘𑀮𑀁 𑀅𑀦𑀯𑀝𑁆𑀞𑀺𑀢’’𑀦𑁆𑀢𑀺 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀑𑀮𑁄𑀓𑁂𑀦𑁆𑀢𑁄 𑀕𑁂𑀳𑀢𑁄 𑀓𑀸𑀫𑁂𑀳𑀺 𑀘 𑀅𑀪𑀺𑀦𑀺𑀓𑁆𑀔𑀫𑀺𑀁 𑀅𑀫𑀢𑀧𑀤𑀁 𑀦𑀺𑀩𑁆𑀩𑀸𑀦𑀁 𑀚𑀺𑀕𑀻𑀲𑀁 𑀧𑀭𑀺𑀬𑁂𑀲𑀦𑁆𑀢𑁄, 𑀢𑀲𑁆𑀫𑀸, 𑀘𑀺𑀢𑁆𑀢, 𑀅𑀦𑀦𑀼𑀯𑀢𑁆𑀢𑀦𑁆𑀢𑁄 𑀦𑀺𑀩𑁆𑀩𑀸𑀦𑀁 𑀧𑀭𑀺𑀬𑁂𑀲𑀦𑀫𑁂𑀯 𑀓𑀭𑁄𑀫𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀯𑀻𑀢𑀭𑀸𑀕𑁂𑀦 𑀲𑀼𑀤𑀼𑀦𑁆𑀦𑀺𑀯𑀸𑀭𑀬𑀁 𑀘𑀺𑀢𑁆𑀢𑀁 𑀘𑀮𑀁 𑀫𑀓𑁆𑀓𑀝𑀲𑀦𑁆𑀦𑀺𑀪𑀁 𑀯𑀦𑀫𑀓𑁆𑀓𑀝𑀲𑀤𑀺𑀲𑀁 𑀇𑀢𑀺 𑀲𑀼𑀬𑀼𑀢𑁆𑀢𑀯𑀸𑀤𑀻 𑀲𑀼𑀪𑀸𑀲𑀺𑀢𑀯𑀸𑀤𑀻 𑀤𑁆𑀯𑀺𑀧𑀤𑀸𑀦𑀫𑀼𑀢𑁆𑀢𑀫𑁄 𑀫𑀳𑀸𑀪𑀺𑀲𑀓𑁆𑀓𑁄 𑀦𑀭𑀤𑀫𑁆𑀫𑀲𑀸𑀭𑀣𑀻𑀢𑀺 𑀬𑁄𑀚𑀦𑀸.

𑀅𑀯𑀺𑀤𑁆𑀤𑀲𑀽 𑀬𑀢𑁆𑀣 𑀲𑀺𑀢𑀸 𑀧𑀼𑀣𑀼𑀚𑁆𑀚𑀦𑀸𑀢𑀺 𑀬𑀢𑁆𑀣 𑀬𑁂𑀲𑀼 𑀯𑀢𑁆𑀣𑀼𑀓𑀸𑀫𑁂𑀲𑀼 𑀓𑀺𑀮𑁂𑀲𑀓𑀸𑀫𑁂𑀲𑀼 𑀘 𑀲𑀺𑀢𑀸 𑀧𑀝𑀺𑀩𑀤𑁆𑀥𑀸 𑀢𑁂 𑀅𑀦𑁆𑀥𑀧𑀼𑀣𑀼𑀚𑁆𑀚𑀦𑀸 𑀢𑁂𑀦 𑀓𑀸𑀫𑀭𑀸𑀕𑁂𑀦 𑀧𑀼𑀦𑀩𑁆𑀪𑀯𑁂𑀲𑀺𑀦𑁄 𑀏𑀓𑀦𑁆𑀢𑁂𑀦𑁂𑀯 𑀤𑀼𑀓𑁆𑀔𑀫𑀺𑀘𑁆𑀙𑀦𑁆𑀢𑀺. 𑀇𑀘𑁆𑀙𑀦𑁆𑀢𑀸 𑀘 𑀘𑀺𑀢𑁆𑀢𑁂𑀦 𑀦𑀻𑀢𑀸 𑀦𑀺𑀭𑀬𑁂 𑀦𑀺𑀭𑀸𑀓𑀢𑀸𑀢𑀺 𑀘𑀺𑀢𑁆𑀢𑀯𑀲𑀺𑀓𑀸 𑀦𑀺𑀭𑀬𑀲𑀁𑀯𑀢𑁆𑀢𑀦𑀺𑀓𑀁 𑀓𑀫𑁆𑀫𑀁 𑀓𑀭𑁄𑀦𑁆𑀢𑀸 𑀳𑀺𑀢𑀲𑀼𑀔𑀢𑁄 𑀦𑀺𑀭𑀸𑀓𑀢𑀸 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀘𑀺𑀢𑁆𑀢𑁂𑀦𑁂𑀯 𑀦𑀺𑀭𑀬𑁂 𑀦𑀻𑀢𑀸 𑀦 𑀅𑀜𑁆𑀜𑀣𑀸𑀢𑀺 𑀘𑀺𑀢𑁆𑀢𑀲𑁆𑀲𑁂𑀯 𑀦𑀺𑀕𑁆𑀕𑀳𑁂𑀢𑀩𑁆𑀩𑀢𑀁 𑀤𑀲𑁆𑀲𑁂𑀢𑀺.

𑀧𑀼𑀦𑀧𑀺 𑀘𑀺𑀢𑁆𑀢𑀁𑀬𑁂𑀯 𑀦𑀺𑀕𑁆𑀕𑀳𑁂𑀢𑀼𑀁 𑀫𑀦𑁆𑀢𑁂𑀦𑁆𑀢𑁄 ‘‘𑀫𑀬𑀽𑀭𑀓𑁄𑀜𑁆𑀘𑀸𑀪𑀺𑀭𑀼𑀢𑀫𑁆𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀫𑀬𑀽𑀭𑀓𑁄𑀜𑁆𑀘𑀸𑀪𑀺𑀭𑀼𑀢𑀫𑁆𑀳𑀻𑀢𑀺 𑀲𑀺𑀔𑀻𑀳𑀺 𑀲𑀸𑀭𑀲𑁂𑀳𑀺 𑀘 𑀅𑀪𑀺𑀓𑀽𑀚𑀺𑀢𑁂. 𑀤𑀻𑀧𑀻𑀳𑀺 𑀩𑁆𑀬𑀕𑁆𑀖𑁂𑀳𑀺 𑀧𑀼𑀭𑀓𑁆𑀔𑀢𑁄 𑀯𑀲𑀦𑁆𑀢𑀺 𑀫𑁂𑀢𑁆𑀢𑀸𑀯𑀺𑀳𑀸𑀭𑀺𑀢𑀸𑀬 𑀏𑀯𑀭𑀽𑀧𑁂𑀳𑀺 𑀢𑀺𑀭𑀘𑁆𑀙𑀸𑀦𑀕𑀢𑁂𑀳𑀺 𑀧𑀼𑀭𑀓𑁆𑀔𑀢𑁄 𑀧𑀭𑀺𑀯𑀸𑀭𑀺𑀢𑁄 𑀳𑀼𑀢𑁆𑀯𑀸 𑀯𑀦𑁂 𑀯𑀲𑀦𑁆𑀢𑁄, 𑀏𑀢𑁂𑀦 𑀲𑀼𑀜𑁆𑀜𑀪𑀸𑀯𑀧𑀭𑀺𑀩𑁆𑀭𑀽𑀳𑀦𑀫𑀸𑀳. 𑀓𑀸𑀬𑁂 𑀅𑀧𑁂𑀓𑁆𑀔𑀁 𑀚𑀳𑀸𑀢𑀺 𑀲𑀩𑁆𑀩𑀲𑁄 𑀓𑀸𑀬𑁂 𑀦𑀺𑀭𑀧𑁂𑀓𑁆𑀔𑁄 𑀚𑀳, 𑀏𑀢𑁂𑀦 𑀧𑀳𑀺𑀢𑀢𑁆𑀢𑀢𑀁 𑀯𑀤𑀢𑀺. 𑀫𑀸 𑀯𑀺𑀭𑀸𑀥𑀬𑀸𑀢𑀺 𑀇𑀫𑀁 𑀲𑀼𑀤𑀼𑀮𑁆𑀮𑀪𑀁 𑀦𑀯𑀫𑀁 𑀔𑀡𑀁 𑀫𑀸 𑀯𑀺𑀭𑀸𑀥𑁂𑀳𑀺. 𑀇𑀢𑀺𑀲𑁆𑀲𑀼 𑀫𑀁, 𑀘𑀺𑀢𑁆𑀢, 𑀧𑀼𑀭𑁂 𑀦𑀺𑀬𑀼𑀜𑁆𑀚𑀲𑀻𑀢𑀺 𑀏𑀯𑀜𑁆𑀳𑀺 𑀢𑁆𑀯𑀁, 𑀘𑀺𑀢𑁆𑀢, 𑀫𑀁 𑀧𑀩𑁆𑀩𑀚𑁆𑀚𑀢𑁄 𑀧𑀼𑀩𑁆𑀩𑁂 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀁 𑀉𑀬𑁆𑀬𑁄𑀚𑁂𑀲𑀻𑀢𑀺 𑀅𑀢𑁆𑀣𑁄.

𑀪𑀸𑀯𑁂𑀳𑀻𑀢𑀺 𑀉𑀧𑁆𑀧𑀸𑀤𑁂𑀳𑀺 𑀯𑀟𑁆𑀠𑁂𑀳𑀺 𑀘. 𑀛𑀸𑀦𑀸𑀦𑀻𑀢𑀺 𑀧𑀞𑀫𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺. 𑀇𑀦𑁆𑀤𑁆𑀭𑀺𑀬𑀸𑀦𑀻𑀢𑀺 𑀲𑀤𑁆𑀥𑀸𑀤𑀻𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺. 𑀩𑀮𑀸𑀦𑀻𑀢𑀺 𑀢𑀸𑀦𑀺𑀬𑁂𑀯 𑀧𑀜𑁆𑀘 𑀩𑀮𑀸𑀦𑀺. 𑀩𑁄𑀚𑁆𑀛𑀗𑁆𑀕𑀲𑀫𑀸𑀥𑀺𑀪𑀸𑀯𑀦𑀸𑀢𑀺 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀘𑀢𑀲𑁆𑀲𑁄 𑀲𑀫𑀸𑀥𑀺𑀪𑀸𑀯𑀦𑀸 𑀘. 𑀢𑀺𑀲𑁆𑀲𑁄 𑀘 𑀯𑀺𑀚𑁆𑀚𑀸𑀢𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀸𑀤𑀺𑀓𑀸 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀘. 𑀨𑀼𑀲 𑀧𑀸𑀧𑀼𑀡𑀸𑀳𑀺 𑀩𑀼𑀤𑁆𑀥𑀲𑀸𑀲𑀦𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀑𑀯𑀸𑀤𑁂 𑀞𑀺𑀢𑁄.

𑀦𑀺𑀬𑁆𑀬𑀸𑀦𑀺𑀓𑀦𑁆𑀢𑀺 𑀯𑀝𑁆𑀝𑀤𑀼𑀓𑁆𑀔𑀢𑁄 𑀦𑀺𑀬𑁆𑀳𑀸𑀦𑀯𑀳𑀁. 𑀲𑀩𑁆𑀩𑀤𑀼𑀓𑁆𑀔𑀓𑁆𑀔𑀬𑁄𑀕𑀥𑀦𑁆𑀢𑀺 𑀅𑀫𑀢𑁄𑀕𑀥𑀁 𑀦𑀺𑀩𑁆𑀩𑀸𑀦𑀧𑀢𑀺𑀝𑁆𑀞𑀁 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀁. 𑀲𑀩𑁆𑀩𑀓𑀺𑀮𑁂𑀲𑀲𑁄𑀥𑀦𑀦𑁆𑀢𑀺 𑀅𑀦𑀯𑀲𑁂𑀲𑀓𑀺𑀮𑁂𑀲𑀫𑀮𑀯𑀺𑀲𑁄𑀥𑀦𑀁.

𑀔𑀦𑁆𑀥𑁂𑀢𑀺 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂. 𑀧𑀝𑀺𑀧𑀲𑁆𑀲 𑀬𑁄𑀦𑀺𑀲𑁄𑀢𑀺 𑀭𑁄𑀕𑀢𑁄 𑀕𑀡𑁆𑀟𑀢𑁄 𑀲𑀮𑁆𑀮𑀢𑁄 𑀅𑀖𑀢𑁄 𑀆𑀩𑀸𑀥𑀢𑁄𑀢𑀺 𑀏𑀯𑀫𑀸𑀤𑀻𑀳𑀺 𑀯𑀺𑀯𑀺𑀥𑁂𑀳𑀺 𑀧𑀓𑀸𑀭𑁂𑀳𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀦 𑀲𑀫𑁆𑀫𑀸 𑀉𑀧𑀸𑀬𑁂𑀦 𑀦𑀬𑁂𑀦 𑀧𑀲𑁆𑀲. 𑀢𑀁 𑀚𑀳𑀸𑀢𑀺 𑀢𑀁 𑀤𑀼𑀓𑁆𑀔𑀲𑁆𑀲 𑀲𑀫𑀼𑀤𑀬𑀁 𑀢𑀡𑁆𑀳𑀁 𑀧𑀚𑀳, 𑀲𑀫𑀼𑀘𑁆𑀙𑀺𑀦𑁆𑀤. 𑀇𑀥𑁂𑀯𑀸𑀢𑀺 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂.

𑀅𑀦𑀺𑀘𑁆𑀘𑀦𑁆𑀢𑀺𑀆𑀤𑀺 𑀅𑀦𑁆𑀢𑀯𑀦𑁆𑀢𑀢𑁄 𑀅𑀦𑀺𑀘𑁆𑀘𑀦𑁆𑀢𑀺𑀓𑀢𑁄 𑀢𑀸𑀯𑀓𑀸𑀮𑀺𑀓𑀢𑁄 𑀦𑀺𑀘𑁆𑀘𑀧𑀝𑀺𑀓𑁆𑀔𑁂𑀧𑀢𑁄 𑀘 𑀅𑀦𑀺𑀘𑁆𑀘𑀦𑁆𑀢𑀺 𑀯𑀸 𑀧𑀲𑁆𑀲. 𑀤𑀼𑀓𑁆𑀔𑀦𑁆𑀢𑀺 𑀢𑁂 𑀉𑀤𑀬𑀩𑁆𑀩𑀬𑀧𑀝𑀺𑀧𑀻𑀴𑀦𑀢𑁄 𑀲𑀧𑁆𑀧𑀝𑀺𑀪𑀬𑀢𑁄 𑀤𑀼𑀓𑁆𑀔𑀫𑀢𑁄 𑀲𑀼𑀔𑀧𑀝𑀺𑀓𑁆𑀔𑁂𑀧𑀢𑁄 𑀤𑀼𑀓𑁆𑀔𑀦𑁆𑀢𑀺 𑀯𑀸 𑀧𑀲𑁆𑀲. 𑀲𑀼𑀜𑁆𑀜𑀦𑁆𑀢𑀺 𑀅𑀯𑀲𑀯𑀢𑁆𑀢𑀦𑀢𑁄 𑀅𑀲𑀸𑀫𑀺𑀓𑀢𑁄 𑀅𑀲𑀸𑀭𑀢𑁄 𑀅𑀢𑁆𑀢𑀧𑀝𑀺𑀓𑁆𑀔𑁂𑀧𑀢𑁄 𑀘 𑀲𑀼𑀜𑁆𑀜𑀁, 𑀢𑀢𑁄 𑀏𑀯 𑀅𑀦𑀢𑁆𑀢𑀸𑀢𑀺. 𑀯𑀺𑀕𑀭𑀳𑀺𑀢𑀩𑁆𑀩𑀢𑁄 𑀅𑀯𑀟𑁆𑀠𑀺𑀆𑀩𑀸𑀥𑀦𑀢𑁄 𑀘 𑀅𑀖𑀦𑁆𑀢𑀺 𑀘 𑀯𑀥𑀦𑁆𑀢𑀺 𑀘 𑀯𑀺𑀧𑀲𑁆𑀲 𑀬𑁄𑀦𑀺𑀲𑁄𑀢𑀺 𑀬𑁄𑀚𑀦𑀸. 𑀫𑀦𑁄𑀯𑀺𑀘𑀸𑀭𑁂 𑀉𑀧𑀭𑀼𑀦𑁆𑀥 𑀘𑁂𑀢𑀲𑁄𑀢𑀺 𑀫𑀦𑁄𑀯𑀺𑀘𑀸𑀭𑀲𑀜𑁆𑀜𑀺𑀦𑁄 𑀕𑁂𑀳𑀲𑀺𑀢𑀲𑁄𑀫𑀦𑀲𑁆𑀲𑀼𑀧𑀯𑀺𑀘𑀸𑀭𑀸𑀤𑀺𑀓𑁂 𑀅𑀝𑁆𑀞𑀸𑀭𑀲 𑀘𑁂𑀢𑀲𑁄 𑀉𑀧𑀭𑀼𑀦𑁆𑀥 𑀯𑀸𑀭𑁂𑀳𑀺 𑀦𑀺𑀭𑁄𑀥𑁂𑀳𑀺.

𑀫𑀼𑀡𑁆𑀟𑁄𑀢𑀺 𑀫𑀼𑀡𑁆𑀟𑀪𑀸𑀯𑀁 𑀉𑀧𑀕𑀢𑁄, 𑀑𑀳𑀸𑀭𑀺𑀢𑀓𑁂𑀲𑀫𑀲𑁆𑀲𑀼𑀓𑁄. 𑀯𑀺𑀭𑀽𑀧𑁄𑀢𑀺 𑀢𑁂𑀦 𑀫𑀼𑀡𑁆𑀟𑀪𑀸𑀯𑁂𑀦 𑀧𑀭𑀽𑀴𑁆𑀳𑀮𑁄𑀫𑀢𑀸𑀬 𑀙𑀺𑀦𑁆𑀦𑀪𑀺𑀦𑁆𑀦𑀓𑀸𑀲𑀸𑀬 𑀯𑀢𑁆𑀣𑀢𑀸𑀬 𑀯𑀺𑀭𑀽𑀧𑁄 𑀯𑁂𑀯𑀡𑁆𑀡𑀺𑀬𑀁 𑀉𑀧𑀕𑀢𑁄. 𑀅𑀪𑀺𑀲𑀸𑀧𑀫𑀸𑀕𑀢𑁄𑀢𑀺 ‘‘𑀧𑀺𑀡𑁆𑀟𑁄𑀮𑁄 𑀯𑀺𑀘𑀭𑀢𑀺 𑀧𑀢𑁆𑀢𑀧𑀸𑀡𑀻’’𑀢𑀺 𑀅𑀭𑀺𑀬𑁂𑀳𑀺 𑀓𑀸𑀢𑀩𑁆𑀩𑀁 𑀅𑀪𑀺𑀲𑀸𑀧𑀁 𑀉𑀧𑀕𑀢𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀅𑀪𑀺𑀲𑀸𑀧𑁄𑀬𑀁, 𑀪𑀺𑀓𑁆𑀔𑀯𑁂, 𑀮𑁄𑀓𑀲𑁆𑀫𑀺𑀁 𑀧𑀺𑀡𑁆𑀟𑁄𑀮𑁄 𑀯𑀺𑀘𑀭𑀲𑀺 𑀧𑀢𑁆𑀢𑀧𑀸𑀡𑀻’’𑀢𑀺 (𑀲𑀁. 𑀦𑀺. 𑁩.𑁮𑁦). 𑀢𑁂𑀦𑀸𑀳 ‘‘𑀓𑀧𑀸𑀮𑀳𑀢𑁆𑀣𑁄𑀯 𑀓𑀼𑀮𑁂𑀲𑀼 𑀪𑀺𑀓𑁆𑀔𑀲𑀽’’𑀢𑀺. 𑀬𑀼𑀜𑁆𑀚𑀲𑁆𑀲𑀼 𑀲𑀢𑁆𑀣𑀼𑀯𑀘𑀦𑁂𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀑𑀯𑀸𑀤𑁂 𑀬𑁄𑀕𑀁 𑀓𑀭𑁄𑀳𑀺 𑀅𑀦𑀼𑀬𑀼𑀜𑁆𑀚𑀲𑁆𑀲𑀼.

𑀲𑀼𑀲𑀁𑀯𑀼𑀢𑀢𑁆𑀢𑁄𑀢𑀺 𑀲𑀼𑀝𑁆𑀞𑀼 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑁂𑀳𑀺 𑀲𑀫𑁆𑀫𑀤𑁂𑀯 𑀲𑀁𑀯𑀼𑀢𑁄. 𑀯𑀺𑀲𑀺𑀔𑀦𑁆𑀢𑀭𑁂 𑀘𑀭𑀦𑁆𑀢𑀺 𑀪𑀺𑀓𑁆𑀔𑀸𑀘𑀭𑀺𑀬𑀸𑀬 𑀇𑀘𑁆𑀙𑀸𑀯𑀺𑀲𑁂𑀲𑁂𑀲𑀼 𑀘𑀭𑀦𑁆𑀢𑁄. 𑀘𑀦𑁆𑀤𑁄 𑀬𑀣𑀸 𑀤𑁄𑀲𑀺𑀦𑀧𑀼𑀡𑁆𑀡𑀫𑀸𑀲𑀺𑀬𑀸𑀢𑀺 𑀯𑀺𑀕𑀢𑀤𑁄𑀲𑀸𑀬 𑀧𑀼𑀡𑁆𑀡𑀫𑀸𑀬 𑀓𑀼𑀮𑁂𑀲𑀼 𑀦𑀺𑀘𑁆𑀘𑀦𑀯𑀲𑀸𑀬 𑀧𑀸𑀲𑀸𑀤𑀺𑀓𑀢𑀸𑀬 𑀘𑀦𑁆𑀤𑀺𑀫𑀸 𑀯𑀺𑀬 𑀘𑀭𑀸𑀢𑀺 𑀬𑁄𑀚𑀦𑀸.

𑀲𑀤𑀸 𑀥𑀼𑀢𑁂 𑀭𑀢𑁄𑀢𑀺 𑀲𑀩𑁆𑀩𑀓𑀸𑀮𑀜𑁆𑀘 𑀥𑀼𑀢𑀕𑀼𑀡𑁂 𑀅𑀪𑀺𑀭𑀢𑁄. 𑀢𑀣𑀽𑀧𑀫𑀁 𑀘𑀺𑀢𑁆𑀢𑀫𑀺𑀤𑀁 𑀓𑀭𑁄𑀲𑀻𑀢𑀺 𑀬𑀣𑀸 𑀓𑁄𑀘𑀺 𑀧𑀼𑀭𑀺𑀲𑁄 𑀨𑀮𑀸𑀦𑀺 𑀇𑀘𑁆𑀙𑀦𑁆𑀢𑁄 𑀨𑀮𑀭𑀼𑀓𑁆𑀔𑁂 𑀭𑁄𑀧𑁂𑀢𑁆𑀯𑀸 𑀢𑀢𑁄 𑀅𑀮𑀤𑁆𑀥𑀨𑀮𑁄𑀯 𑀢𑁂 𑀫𑀽𑀮𑀢𑁄 𑀙𑀺𑀦𑁆𑀤𑀺𑀢𑀼𑀁 𑀇𑀘𑁆𑀙𑀢𑀺, 𑀘𑀺𑀢𑁆𑀢, 𑀢𑁆𑀯𑀁 𑀢𑀣𑀽𑀧𑀫𑀁 𑀢𑀧𑁆𑀧𑀝𑀺𑀪𑀸𑀕𑀁 𑀇𑀤𑀁 𑀓𑀭𑁄𑀲𑀺. 𑀬𑀁 𑀫𑀁 𑀅𑀦𑀺𑀘𑁆𑀘𑀫𑁆𑀳𑀺 𑀘𑀮𑁂 𑀦𑀺𑀬𑀼𑀜𑁆𑀚𑀲𑀻𑀢𑀺 𑀬𑀁 𑀫𑀁 𑀧𑀩𑁆𑀩𑀚𑁆𑀚𑀸𑀬 𑀦𑀺𑀬𑁄𑀚𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀅𑀤𑁆𑀥𑀸𑀕𑀢𑀁 𑀧𑀩𑁆𑀩𑀚𑁆𑀚𑀸𑀨𑀮𑀁 𑀅𑀦𑀺𑀘𑁆𑀘𑀫𑁆𑀳𑀺 𑀘𑀮𑁂 𑀲𑀁𑀲𑀸𑀭𑀫𑀼𑀔𑁂 𑀦𑀺𑀬𑀼𑀜𑁆𑀚𑀲𑀺 𑀦𑀺𑀬𑁄𑀚𑀦𑀯𑀲𑁂𑀦 𑀧𑀯𑀢𑁆𑀢𑁂𑀲𑀺.

𑀭𑀽𑀧𑀸𑀪𑀸𑀯𑀢𑁄 𑀅𑀭𑀽𑀧𑀸. 𑀘𑀺𑀢𑁆𑀢𑀲𑁆𑀲 𑀳𑀺 𑀢𑀸𑀤𑀺𑀲𑀁 𑀲𑀡𑁆𑀞𑀸𑀦𑀁 𑀦𑀻𑀮𑀸𑀤𑀺𑀯𑀡𑁆𑀡𑀪𑁂𑀤𑁄 𑀯𑀸 𑀦𑀢𑁆𑀣𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 𑀅𑀭𑀽𑀧𑀸𑀢𑀺. 𑀤𑀽𑀭𑀝𑁆𑀞𑀸𑀦𑀧𑁆𑀧𑀯𑀢𑁆𑀢𑀺𑀬𑀸 𑀤𑀽𑀭𑀗𑁆𑀕𑀫. 𑀬𑀤𑀺𑀧𑀺 𑀘𑀺𑀢𑁆𑀢𑀲𑁆𑀲 𑀫𑀓𑁆𑀓𑀝𑀲𑀼𑀢𑁆𑀢𑀫𑀢𑁆𑀢𑀫𑁆𑀧𑀺 𑀧𑀼𑀭𑀢𑁆𑀣𑀺𑀫𑀸𑀤𑀺𑀤𑀺𑀲𑀸𑀪𑀸𑀕𑁂𑀦 𑀕𑀫𑀦𑀁 𑀦𑀸𑀫 𑀦𑀢𑁆𑀣𑀺, 𑀤𑀽𑀭𑁂 𑀲𑀦𑁆𑀢𑀁 𑀧𑀦 𑀆𑀭𑀫𑁆𑀫𑀡𑀁 𑀲𑀫𑁆𑀧𑀝𑀺𑀘𑁆𑀙𑀢𑀻𑀢𑀺 𑀤𑀽𑀭𑀗𑁆𑀕𑀫. 𑀏𑀓𑁄𑀬𑁂𑀯 𑀳𑀼𑀢𑁆𑀯𑀸 𑀘𑀭𑀡𑀯𑀲𑁂𑀦 𑀧𑀯𑀢𑁆𑀢𑀦𑀢𑁄 𑀏𑀓𑀘𑀸𑀭𑀺, 𑀅𑀦𑁆𑀢𑀫𑀲𑁄 𑀤𑁆𑀯𑁂 𑀢𑀻𑀡𑀺𑀧𑀺 𑀘𑀺𑀢𑁆𑀢𑀸𑀦𑀺 𑀏𑀓𑀢𑁄 𑀉𑀧𑁆𑀧𑀚𑁆𑀚𑀺𑀢𑀼𑀁 𑀲𑀫𑀢𑁆𑀣𑀸𑀦𑀺 𑀦𑀸𑀫 𑀦𑀢𑁆𑀣𑀺, 𑀏𑀓𑀫𑁂𑀯 𑀧𑀦 𑀘𑀺𑀢𑁆𑀢𑀁 𑀏𑀓𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀉𑀧𑁆𑀧𑀚𑁆𑀚𑀢𑀺. 𑀢𑀲𑁆𑀫𑀺𑀁 𑀦𑀺𑀭𑀼𑀤𑁆𑀥𑁂 𑀅𑀧𑀭𑀫𑁆𑀧𑀺 𑀏𑀓𑀫𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀏𑀓𑀘𑀸𑀭𑀺. 𑀦 𑀢𑁂 𑀓𑀭𑀺𑀲𑁆𑀲𑀁 𑀯𑀘𑀦𑀁 𑀇𑀤𑀸𑀦𑀺𑀳𑀦𑁆𑀢𑀺 𑀬𑀤𑀺𑀧𑀺 𑀧𑀼𑀩𑁆𑀩𑁂 𑀢𑀯 𑀯𑀲𑁂 𑀅𑀦𑀼𑀯𑀢𑁆𑀢𑀺𑀁, 𑀇𑀤𑀸𑀦𑀺 𑀧𑀦 𑀲𑀢𑁆𑀣𑀼 𑀑𑀯𑀸𑀤𑀁 𑀮𑀤𑁆𑀥𑀓𑀸𑀮𑀢𑁄 𑀧𑀝𑁆𑀞𑀸𑀬 𑀘𑀺𑀢𑁆𑀢𑀯𑀲𑀺𑀓𑁄 𑀦 𑀪𑀯𑀺𑀲𑁆𑀲𑀸𑀫𑀺. 𑀓𑀲𑁆𑀫𑀸𑀢𑀺 𑀘𑁂? 𑀤𑀼𑀓𑁆𑀔𑀸 𑀳𑀺 𑀓𑀸𑀫𑀸 𑀓𑀝𑀼𑀓𑀸 𑀫𑀳𑀩𑁆𑀪𑀬𑀸 𑀓𑀸𑀫𑀸 𑀦𑀸𑀫𑁂𑀢𑁂 𑀅𑀢𑀻𑀢𑁂𑀧𑀺 𑀤𑀼𑀓𑁆𑀔𑀸, 𑀆𑀬𑀢𑀺𑀫𑁆𑀧𑀺 𑀓𑀝𑀼𑀓𑀨𑀮𑀸, 𑀅𑀢𑁆𑀢𑀸𑀦𑀼𑀯𑀸𑀤𑀸𑀤𑀺𑀪𑁂𑀤𑁂𑀦 𑀫𑀳𑀢𑀸 𑀪𑀬𑁂𑀦 𑀅𑀦𑀼𑀩𑀦𑁆𑀥𑀦𑁆𑀢𑀸 𑀫𑀳𑀩𑁆𑀪𑀬𑀸. 𑀦𑀺𑀩𑁆𑀩𑀸𑀦𑀫𑁂𑀯𑀸𑀪𑀺𑀫𑀦𑁄 𑀘𑀭𑀺𑀲𑁆𑀲𑀁 𑀢𑀲𑁆𑀫𑀸 𑀦𑀺𑀩𑁆𑀩𑀸𑀦𑀫𑁂𑀯 𑀉𑀤𑁆𑀤𑀺𑀲𑁆𑀲 𑀅𑀪𑀺𑀫𑀼𑀔𑀘𑀺𑀢𑁆𑀢𑁄 𑀯𑀺𑀳𑀭𑀺𑀲𑁆𑀲𑀁.

𑀢𑀫𑁂𑀯 𑀦𑀺𑀩𑁆𑀩𑀸𑀦𑀸𑀪𑀺𑀫𑀼𑀔𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀸𑀳𑀁 𑀅𑀮𑀓𑁆𑀔𑁆𑀬𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦𑀸𑀳𑀁 𑀅𑀮𑀓𑁆𑀔𑁆𑀬𑀸𑀢𑀺 𑀅𑀮𑀓𑁆𑀔𑀺𑀓𑀢𑀸𑀬 𑀦𑀺𑀲𑁆𑀲𑀺𑀭𑀻𑀓𑀢𑀸𑀬 𑀦𑀸𑀳𑀁 𑀕𑁂𑀳𑀢𑁄 𑀦𑀺𑀓𑁆𑀔𑀫𑀺𑀦𑁆𑀢𑀺 𑀬𑁄𑀚𑀦𑀸.

𑀅𑀳𑀺𑀭𑀺𑀓𑁆𑀓𑀢𑀸𑀬𑀸𑀢𑀺 𑀬𑀣𑀸𑀯𑀚𑁆𑀚𑀁 𑀓𑁂𑀴𑀺𑀁 𑀓𑀭𑁄𑀦𑁆𑀢𑁄 𑀯𑀺𑀬 𑀦𑀺𑀮𑁆𑀮𑀚𑁆𑀚𑀢𑀸𑀬. 𑀘𑀺𑀢𑁆𑀢𑀳𑁂𑀢𑀽𑀢𑀺 𑀏𑀓𑀤𑀸 𑀦𑀺𑀕𑀡𑁆𑀞𑁄, 𑀏𑀓𑀤𑀸 𑀧𑀭𑀺𑀩𑁆𑀩𑀸𑀚𑀓𑀸𑀤𑀺𑀓𑁄 𑀳𑁄𑀦𑁆𑀢𑁄 𑀅𑀦𑀯𑀝𑁆𑀞𑀺𑀢𑀘𑀺𑀢𑁆𑀢𑁄 𑀧𑀼𑀭𑀺𑀲𑁄 𑀯𑀺𑀬 𑀘𑀺𑀢𑁆𑀢𑀯𑀲𑀺𑀓𑁄 𑀳𑀼𑀢𑁆𑀯𑀸. 𑀤𑀽𑀭𑀓𑀦𑁆𑀢𑀦𑀸𑀢𑀺 𑀭𑀸𑀚𑀸𑀤𑀻𑀳𑀺 𑀫𑁂𑀢𑁆𑀢𑀁 𑀓𑀢𑁆𑀯𑀸 𑀢𑁂𑀲𑀼 𑀤𑀼𑀩𑁆𑀪𑀺𑀢𑁆𑀯𑀸 𑀤𑀼𑀩𑁆𑀪𑀺𑀪𑀸𑀯𑁂𑀦. 𑀆𑀚𑀻𑀯𑀳𑁂𑀢𑀽𑀢𑀺 𑀆𑀚𑀻𑀯𑀓𑀸𑀭𑀡𑀸 𑀚𑀻𑀯𑀺𑀓𑀸𑀧𑀓𑀢𑁄 𑀳𑀼𑀢𑁆𑀯𑀸 𑀆𑀚𑀻𑀯𑀺𑀓𑀸𑀪𑀬𑁂𑀦 𑀅𑀳𑀁 𑀦 𑀦𑀺𑀓𑁆𑀔𑀫𑀺𑀁 𑀦 𑀧𑀩𑁆𑀩𑀚𑀺𑀁. 𑀓𑀢𑁄 𑀘 𑀢𑁂, 𑀘𑀺𑀢𑁆𑀢, 𑀧𑀝𑀺𑀲𑁆𑀲𑀯𑁄 𑀫𑀬𑀸𑀢𑀺, ‘‘𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀦 𑀢𑀯 𑀯𑀲𑁂 𑀯𑀢𑁆𑀢𑀸𑀫𑀺, 𑀫𑀫𑁂𑀯 𑀧𑀦 𑀯𑀲𑁂 𑀯𑀢𑁆𑀢𑀸𑀫𑀻’’𑀢𑀺, 𑀘𑀺𑀢𑁆𑀢, 𑀫𑀬𑀸 𑀦𑀦𑀼 𑀧𑀝𑀺𑀜𑁆𑀜𑀸 𑀓𑀢𑀸𑀢𑀺 𑀤𑀲𑁆𑀲𑁂𑀢𑀺.

𑀅𑀧𑁆𑀧𑀺𑀘𑁆𑀙𑀢𑀸 𑀲𑀧𑁆𑀧𑀼𑀭𑀺𑀲𑁂𑀳𑀺 𑀯𑀡𑁆𑀡𑀺𑀢𑀸𑀢𑀺 ‘‘𑀧𑀘𑁆𑀘𑀬𑁂𑀲𑀼 𑀲𑀩𑁆𑀩𑀲𑁄 𑀅𑀧𑁆𑀧𑀺𑀘𑁆𑀙𑀸 𑀦𑀸𑀫 𑀲𑀸𑀥𑀽’’𑀢𑀺 𑀩𑀼𑀤𑁆𑀥𑀸𑀤𑀻𑀳𑀺 𑀧𑀲𑀝𑁆𑀞𑀸, 𑀢𑀣𑀸 𑀫𑀓𑁆𑀔𑀧𑁆𑀧𑀳𑀸𑀦𑀁 𑀧𑀭𑁂𑀲𑀁 𑀕𑀼𑀡𑁂 𑀫𑀓𑁆𑀔𑀦𑀲𑁆𑀲 𑀧𑀳𑀸𑀦𑀁 𑀯𑀽𑀧𑀲𑀫𑁄 𑀲𑀩𑁆𑀩𑀲𑁆𑀲 𑀤𑀼𑀓𑁆𑀔𑀲𑁆𑀲 𑀯𑀽𑀧𑀲𑀫𑁄 𑀦𑀺𑀩𑁆𑀩𑀸𑀧𑀦𑀁 𑀲𑀧𑁆𑀧𑀼𑀭𑀺𑀲𑁂𑀳𑀺 𑀯𑀡𑁆𑀡𑀺𑀢𑀁. 𑀇𑀢𑀺𑀲𑁆𑀲𑀼 𑀫𑀁, 𑀘𑀺𑀢𑁆𑀢, 𑀢𑀤𑀸 𑀦𑀺𑀬𑀼𑀜𑁆𑀚𑀲𑀺, ‘‘𑀲𑀫𑁆𑀫, 𑀢𑀬𑀸 𑀢𑁂𑀲𑀼 𑀕𑀼𑀡𑁂𑀲𑀼 𑀧𑀢𑀺𑀝𑁆𑀞𑀸𑀢𑀩𑁆𑀩’’𑀦𑁆𑀢𑀺, 𑀘𑀺𑀢𑁆𑀢, 𑀢𑁆𑀯𑀁 𑀏𑀯𑀁 𑀢𑀤𑀸 𑀦𑀺𑀬𑀼𑀜𑁆𑀚𑀲𑀺. 𑀇𑀤𑀸𑀦𑀺 𑀢𑁆𑀯𑀁 𑀕𑀘𑁆𑀙𑀲𑀺 𑀧𑀼𑀩𑁆𑀩𑀘𑀺𑀡𑁆𑀡𑀁 𑀇𑀤𑀸𑀦𑀺 𑀫𑀁 𑀢𑁆𑀯𑀁 𑀧𑀳𑀸𑀬 𑀅𑀢𑁆𑀢𑀦𑁄 𑀧𑀼𑀭𑀺𑀫𑀸𑀘𑀺𑀡𑁆𑀡𑀁 𑀫𑀳𑀺𑀘𑁆𑀙𑀢𑀸𑀤𑀺𑀁 𑀧𑀝𑀺𑀧𑀚𑁆𑀚𑀲𑀺, 𑀓𑀺𑀁 𑀦𑀸𑀫𑁂𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.