𑁨. 𑀲𑀼𑀦𑀻𑀢𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀦𑀻𑀘𑁂 𑀓𑀼𑀮𑀫𑁆𑀳𑀻𑀢𑀺𑀆𑀤𑀺𑀓𑀸 𑀆𑀬𑀲𑁆𑀫𑀢𑁄 𑀲𑀼𑀦𑀻𑀢𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀺𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀩𑀼𑀤𑁆𑀥𑀲𑁆𑀲 𑀲𑀼𑀜𑁆𑀜𑀓𑀸𑀮𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀩𑀸𑀮𑀚𑀦𑁂𑀳𑀺 𑀲𑀤𑁆𑀥𑀺𑀁 𑀓𑀻𑀴𑀸𑀧𑀲𑀼𑀢𑁄 𑀳𑀼𑀢𑁆𑀯𑀸 𑀯𑀺𑀘𑀭𑀦𑁆𑀢𑁄 𑀏𑀓𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀁 𑀤𑀺𑀲𑁆𑀯𑀸, ‘‘𑀓𑀺𑀁 𑀢𑀼𑀬𑁆𑀳𑀁 𑀲𑀩𑁆𑀩𑀲𑁄 𑀯𑀡𑀺𑀢𑀲𑀭𑀻𑀭𑀲𑁆𑀲 𑀯𑀺𑀬 𑀲𑀓𑀮𑀁 𑀓𑀸𑀬𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀪𑀺𑀓𑁆𑀔𑀸𑀘𑀭𑀡𑁂𑀦, 𑀦𑀦𑀼 𑀦𑀸𑀫 𑀓𑀲𑀺𑀯𑀸𑀡𑀺𑀚𑁆𑀚𑀸𑀤𑀻𑀳𑀺 𑀚𑀻𑀯𑀺𑀓𑀸 𑀓𑀧𑁆𑀧𑁂𑀢𑀩𑁆𑀩𑀸? 𑀢𑀸𑀦𑀺 𑀘𑁂 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀲𑀺, 𑀖𑀭𑁂 𑀖𑀭𑁂 𑀫𑀼𑀢𑁆𑀢𑀓𑀭𑀻𑀲𑀸𑀤𑀻𑀦𑀺 𑀦𑀻𑀳𑀭𑀦𑁆𑀢𑁄 𑀧𑀘𑁆𑀙𑀸 𑀯𑀢𑁆𑀣𑀼𑀲𑁄𑀥𑀦𑁂𑀦 𑀚𑀻𑀯𑀸𑀳𑀻’’𑀢𑀺 𑀅𑀓𑁆𑀓𑁄𑀲𑀺. 𑀲𑁄 𑀢𑁂𑀦 𑀓𑀫𑁆𑀫𑁂𑀦 𑀦𑀺𑀭𑀬𑁂 𑀧𑀘𑁆𑀘𑀺𑀢𑁆𑀯𑀸 𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀸𑀯𑀲𑁂𑀲𑁂𑀦 𑀫𑀦𑀼𑀲𑁆𑀲𑀮𑁄𑀓𑁂𑀧𑀺 𑀩𑀳𑀽𑀦𑀺 𑀚𑀸𑀢𑀺𑀲𑀢𑀸𑀦𑀺 𑀧𑀼𑀧𑁆𑀨𑀙𑀟𑁆𑀟𑀓𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀣𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀺. 𑀇𑀫𑀲𑁆𑀫𑀺𑀜𑁆𑀘 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀧𑀼𑀧𑁆𑀨𑀙𑀟𑁆𑀟𑀓𑀓𑀼𑀮𑁂 𑀏𑀯 𑀦𑀺𑀩𑁆𑀩𑀢𑁆𑀢𑁄 𑀉𑀓𑁆𑀓𑀸𑀭𑀲𑁄𑀥𑀦𑀓𑀫𑁆𑀫𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺 𑀖𑀸𑀲𑀘𑁆𑀙𑀸𑀤𑀦𑀫𑀢𑁆𑀢𑀫𑁆𑀧𑀺 𑀅𑀮𑀪𑀦𑁆𑀢𑁄.

𑀅𑀣 𑀪𑀕𑀯𑀸 𑀧𑀘𑁆𑀙𑀺𑀫𑀬𑀸𑀫𑁂 𑀩𑀼𑀤𑁆𑀥𑀸𑀘𑀺𑀡𑁆𑀡𑀁 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀲𑀼𑀦𑀻𑀢𑀲𑁆𑀲 𑀳𑀤𑀬𑀩𑁆𑀪𑀦𑁆𑀢𑀭𑁂 𑀖𑀝𑁂 𑀧𑀤𑀻𑀧𑀁 𑀯𑀺𑀬 𑀧𑀚𑁆𑀚𑀮𑀦𑁆𑀢𑀁 𑀅𑀭𑀳𑀢𑁆𑀢𑀽𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 𑀯𑀺𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀭𑀸𑀚𑀕𑀳𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑁄. 𑀬𑀲𑁆𑀲𑀁 𑀯𑀻𑀣𑀺𑀬𑀁 𑀲𑀼𑀦𑀻𑀢𑁄 𑀉𑀓𑁆𑀓𑀸𑀭𑀲𑁄𑀥𑀦𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀁 𑀯𑀻𑀣𑀺𑀁 𑀧𑀝𑀺𑀧𑀚𑁆𑀚𑀺. 𑀲𑀼𑀦𑀻𑀢𑁄𑀧𑀺 𑀢𑀢𑁆𑀣 𑀢𑀢𑁆𑀣 𑀯𑀺𑀖𑀸𑀲𑀼𑀘𑁆𑀘𑀸𑀭𑀲𑀗𑁆𑀓𑀸𑀭𑀸𑀤𑀺𑀓𑀁 𑀭𑀸𑀲𑀺𑀁 𑀓𑀢𑁆𑀯𑀸 𑀧𑀺𑀝𑀓𑁂𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀸𑀚𑁂𑀦𑀸𑀤𑀸𑀬 𑀧𑀭𑀺𑀳𑀭𑀦𑁆𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑀁 𑀲𑀢𑁆𑀣𑀸𑀭𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀲𑀸𑀭𑀚𑁆𑀚𑀫𑀸𑀦𑁄 𑀲𑀫𑁆𑀪𑀫𑀸𑀓𑀼𑀮𑀳𑀤𑀬𑁄 𑀕𑀫𑀦𑀫𑀕𑁆𑀕𑀁 𑀦𑀺𑀮𑀻𑀬𑀦𑁄𑀓𑀸𑀲𑀜𑁆𑀘 𑀅𑀮𑀪𑀦𑁆𑀢𑁄 𑀓𑀸𑀚𑀁 𑀪𑀺𑀢𑁆𑀢𑀺𑀧𑀲𑁆𑀲𑁂 𑀞𑀧𑁂𑀢𑁆𑀯𑀸 𑀏𑀓𑁂𑀦 𑀧𑀲𑁆𑀲𑁂𑀦 𑀅𑀦𑀼𑀧𑀯𑀺𑀲𑀦𑁆𑀢𑁄 𑀯𑀺𑀬 𑀪𑀺𑀢𑁆𑀢𑀺𑀁 𑀅𑀮𑁆𑀮𑀻𑀦𑁄 𑀧𑀜𑁆𑀚𑀮𑀺𑀓𑁄 𑀅𑀝𑁆𑀞𑀸𑀲𑀺. ‘‘𑀪𑀺𑀢𑁆𑀢𑀺𑀙𑀺𑀤𑁆𑀤𑁂𑀦 𑀅𑀧𑀓𑁆𑀓𑀫𑀺𑀢𑀼𑀓𑀸𑀫𑁄 𑀅𑀳𑁄𑀲𑀻’’𑀢𑀺𑀧𑀺 𑀯𑀤𑀦𑁆𑀢𑀺.

𑀲𑀢𑁆𑀣𑀸 𑀢𑀲𑁆𑀲 𑀲𑀫𑀻𑀧𑀁 𑀧𑀢𑁆𑀯𑀸 ‘‘𑀅𑀬𑀁 𑀅𑀢𑁆𑀢𑀦𑁄 𑀓𑀼𑀲𑀮𑀫𑀽𑀮𑀲𑀜𑁆𑀘𑁄𑀤𑀺𑀢𑀁 𑀉𑀧𑀕𑀢𑀁 𑀫𑀁 𑀲𑀸𑀭𑀚𑁆𑀚𑀫𑀸𑀦𑁄 𑀚𑀸𑀢𑀺𑀬𑀸 𑀓𑀫𑁆𑀫𑀲𑁆𑀲 𑀘 𑀦𑀺𑀳𑀻𑀦𑀢𑀸𑀬 𑀲𑀫𑁆𑀫𑀼𑀔𑀻𑀪𑀸𑀯𑀫𑁆𑀧𑀺 𑀮𑀚𑁆𑀚𑀢𑀺, 𑀳𑀦𑁆𑀤𑀲𑁆𑀲 𑀯𑁂𑀲𑀸𑀭𑀚𑁆𑀚𑀁 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀻’’𑀢𑀺 𑀓𑀭𑀯𑀻𑀓𑀭𑀼𑀢𑀫𑀜𑁆𑀚𑀼𑀦𑀸 𑀲𑀓𑀮𑀦𑀕𑀭𑀦𑀺𑀦𑁆𑀦𑀸𑀤𑀯𑀭-𑀕𑀫𑁆𑀪𑀻𑀭𑁂𑀦 𑀩𑁆𑀭𑀳𑁆𑀫𑀲𑁆𑀲𑀭𑁂𑀦 ‘‘𑀲𑀼𑀦𑀻𑀢𑀸’’𑀢𑀺 𑀆𑀮𑀧𑀺𑀢𑁆𑀯𑀸 ‘‘𑀓𑀺𑀁 𑀇𑀫𑀸𑀬 𑀤𑀼𑀓𑁆𑀔𑀚𑀻𑀯𑀺𑀓𑀸𑀬 𑀧𑀩𑁆𑀩𑀚𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺 𑀆𑀳. 𑀲𑀼𑀦𑀻𑀢𑁄 𑀢𑁂𑀦 𑀲𑀢𑁆𑀣𑀼 𑀯𑀘𑀦𑁂𑀦 𑀅𑀫𑀢𑁂𑀦 𑀯𑀺𑀬 𑀅𑀪𑀺𑀲𑀺𑀢𑁆𑀢𑁄 𑀉𑀴𑀸𑀭𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑁄 ‘‘𑀪𑀕𑀯𑀸, 𑀲𑀘𑁂 𑀫𑀸𑀤𑀺𑀲𑀸𑀧𑀺 𑀇𑀥 𑀧𑀩𑁆𑀩𑀚𑁆𑀚𑀁 𑀮𑀪𑀦𑁆𑀢𑀺, 𑀓𑀲𑁆𑀫𑀸𑀳𑀁 𑀦 𑀧𑀩𑁆𑀩𑀚𑀺𑀲𑁆𑀲𑀸𑀫𑀺, 𑀧𑀩𑁆𑀩𑀸𑀚𑁂𑀣 𑀫𑀁 𑀪𑀕𑀯𑀸’’𑀢𑀺 𑀆𑀳. 𑀲𑀢𑁆𑀣𑀸 ‘‘𑀏𑀳𑀺, 𑀪𑀺𑀓𑁆𑀔𑀽’’𑀢𑀺 𑀆𑀳. 𑀲𑁄 𑀢𑀸𑀯𑀤𑁂𑀯 𑀏𑀳𑀺𑀪𑀺𑀓𑁆𑀔𑀼𑀪𑀸𑀯𑁂𑀦 𑀧𑀩𑁆𑀩𑀚𑁆𑀚𑀁 𑀉𑀧𑀲𑀫𑁆𑀧𑀤𑀜𑁆𑀘 𑀮𑀪𑀺𑀢𑁆𑀯𑀸 𑀇𑀤𑁆𑀥𑀺𑀫𑀬𑀧𑀢𑁆𑀢𑀘𑀻𑀯𑀭𑀥𑀭𑁄 𑀯𑀲𑁆𑀲𑀲𑀝𑁆𑀞𑀺𑀓𑀢𑁆𑀣𑁂𑀭𑁄 𑀯𑀺𑀬 𑀳𑀼𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀅𑀝𑁆𑀞𑀸𑀲𑀺. 𑀪𑀕𑀯𑀸 𑀢𑀁 𑀯𑀺𑀳𑀸𑀭𑀁 𑀦𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀺. 𑀲𑁄 𑀧𑀞𑀫𑀁 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄, 𑀧𑀜𑁆𑀘 𑀘 𑀅𑀪𑀺𑀜𑁆𑀜𑀸𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀙𑀴𑀪𑀺𑀜𑁆𑀜𑁄 𑀅𑀳𑁄𑀲𑀺. 𑀢𑀁 𑀲𑀓𑁆𑀓𑀸𑀤𑀬𑁄 𑀤𑁂𑀯𑀸 𑀩𑁆𑀭𑀳𑁆𑀫𑀸𑀦𑁄 𑀘 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀦𑀫𑀲𑁆𑀲𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀢𑀸 𑀤𑁂𑀯𑀢𑀸 𑀲𑀢𑁆𑀢𑀲𑀢𑀸 𑀉𑀴𑀸𑀭𑀸, 𑀩𑁆𑀭𑀳𑁆𑀫𑀸 𑀘 𑀇𑀦𑁆𑀤𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸;

𑀆𑀚𑀸𑀦𑀻𑀬𑀁 𑀚𑀸𑀢𑀺𑀚𑀭𑀸𑀪𑀺𑀪𑀽𑀢𑀁, 𑀲𑀼𑀦𑀻𑀢𑀁 𑀦𑀫𑀲𑁆𑀲𑀦𑁆𑀢𑀺 𑀧𑀲𑀦𑁆𑀦𑀘𑀺𑀢𑁆𑀢𑀸’’𑀢𑀺𑀆𑀤𑀺.

𑀪𑀕𑀯𑀸 𑀢𑀁𑀬𑁂𑀯 𑀤𑁂𑀯𑀲𑀗𑁆𑀖𑀧𑀼𑀭𑀓𑁆𑀔𑀢𑀁 𑀤𑀺𑀲𑁆𑀯𑀸 𑀲𑀺𑀢𑀁 𑀓𑀢𑁆𑀯𑀸 𑀧𑀲𑀁𑀲𑀦𑁆𑀢𑁄 ‘‘𑀢𑀧𑁂𑀦 𑀩𑁆𑀭𑀳𑁆𑀫𑀘𑀭𑀺𑀬𑁂𑀦𑀸’’𑀢𑀺 𑀕𑀸𑀣𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀅𑀣 𑀦𑀁 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀲𑀻𑀳𑀦𑀸𑀤𑀁 𑀦𑀤𑀸𑀧𑁂𑀢𑀼𑀓𑀸𑀫𑀸, ‘‘𑀆𑀯𑀼𑀲𑁄 𑀲𑀼𑀦𑀻𑀢, 𑀓𑀲𑁆𑀫𑀸 𑀓𑀼𑀮𑀸 𑀢𑁆𑀯𑀁 𑀧𑀩𑁆𑀩𑀚𑀺𑀢𑁄, 𑀓𑀣𑀁 𑀯𑀸 𑀧𑀩𑁆𑀩𑀚𑀺𑀢𑁄, 𑀓𑀣𑀜𑁆𑀘 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀻’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀲𑁄 𑀢𑀁 𑀲𑀩𑁆𑀩𑀁 𑀧𑀓𑀸𑀲𑁂𑀦𑁆𑀢𑁄 𑁋

𑁬𑁨𑁦. ‘‘𑀦𑀻𑀘𑁂 𑀓𑀼𑀮𑀫𑁆𑀳𑀺 𑀚𑀸𑀢𑁄𑀳𑀁, 𑀤𑀮𑀺𑀤𑁆𑀤𑁄 𑀅𑀧𑁆𑀧𑀪𑁄𑀚𑀦𑁄;

𑀳𑀻𑀦𑀓𑀫𑁆𑀫𑀁 𑀫𑀫𑀁 𑀆𑀲𑀺, 𑀅𑀳𑁄𑀲𑀺𑀁 𑀧𑀼𑀧𑁆𑀨𑀙𑀟𑁆𑀟𑀓𑁄.

𑁬𑁨𑁧. ‘‘𑀚𑀺𑀕𑀼𑀘𑁆𑀙𑀺𑀢𑁄 𑀫𑀦𑀼𑀲𑁆𑀲𑀸𑀦𑀁, 𑀧𑀭𑀺𑀪𑀽𑀢𑁄 𑀘 𑀯𑀫𑁆𑀪𑀺𑀢𑁄;

𑀦𑀻𑀘𑀁 𑀫𑀦𑀁 𑀓𑀭𑀺𑀢𑁆𑀯𑀸𑀦, 𑀯𑀦𑁆𑀤𑀺𑀲𑁆𑀲𑀁 𑀩𑀳𑀼𑀓𑀁 𑀚𑀦𑀁.

𑁬𑁨𑁨. ‘‘𑀅𑀣𑀤𑁆𑀤𑀲𑀸𑀲𑀺𑀁 𑀲𑀫𑁆𑀩𑀼𑀤𑁆𑀥𑀁, 𑀪𑀺𑀓𑁆𑀔𑀼𑀲𑀗𑁆𑀖𑀧𑀼𑀭𑀓𑁆𑀔𑀢𑀁;

𑀧𑀯𑀺𑀲𑀦𑁆𑀢𑀁 𑀫𑀳𑀸𑀯𑀻𑀭𑀁, 𑀫𑀕𑀥𑀸𑀦𑀁 𑀧𑀼𑀭𑀼𑀢𑁆𑀢𑀫𑀁.

𑁬𑁨𑁩. ‘‘𑀦𑀺𑀓𑁆𑀔𑀺𑀧𑀺𑀢𑁆𑀯𑀸𑀦 𑀩𑁆𑀬𑀸𑀪𑀗𑁆𑀕𑀺𑀁, 𑀯𑀦𑁆𑀤𑀺𑀢𑀼𑀁 𑀉𑀧𑀲𑀗𑁆𑀓𑀫𑀺𑀁;

𑀫𑀫𑁂𑀯 𑀅𑀦𑀼𑀓𑀫𑁆𑀧𑀸𑀬, 𑀅𑀝𑁆𑀞𑀸𑀲𑀺 𑀧𑀼𑀭𑀺𑀲𑀼𑀢𑁆𑀢𑀫𑁄.

𑁬𑁨𑁪. ‘‘𑀯𑀦𑁆𑀤𑀺𑀢𑁆𑀯𑀸 𑀲𑀢𑁆𑀣𑀼𑀦𑁄 𑀧𑀸𑀤𑁂, 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀢𑀤𑀸;

𑀧𑀩𑁆𑀩𑀚𑁆𑀚𑀁 𑀅𑀳𑀫𑀸𑀬𑀸𑀘𑀺𑀁, 𑀲𑀩𑁆𑀩𑀲𑀢𑁆𑀢𑀸𑀦𑀫𑀼𑀢𑁆𑀢𑀫𑀁.

𑁬𑁨𑁫. ‘‘𑀢𑀢𑁄 𑀓𑀸𑀭𑀼𑀡𑀺𑀓𑁄 𑀲𑀢𑁆𑀣𑀸, 𑀲𑀩𑁆𑀩𑀮𑁄𑀓𑀸𑀦𑀼𑀓𑀫𑁆𑀧𑀓𑁄;

‘𑀏𑀳𑀺 𑀪𑀺𑀓𑁆𑀔𑀽’𑀢𑀺 𑀫𑀁 𑀆𑀳, 𑀲𑀸 𑀫𑁂 𑀆𑀲𑀽𑀧𑀲𑀫𑁆𑀧𑀤𑀸.

𑁬𑁨𑁬. ‘‘𑀲𑁄𑀳𑀁 𑀏𑀓𑁄 𑀅𑀭𑀜𑁆𑀜𑀲𑁆𑀫𑀺𑀁, 𑀯𑀺𑀳𑀭𑀦𑁆𑀢𑁄 𑀅𑀢𑀦𑁆𑀤𑀺𑀢𑁄.

𑀅𑀓𑀸𑀲𑀺𑀁 𑀲𑀢𑁆𑀣𑀼 𑀯𑀘𑀦𑀁, 𑀬𑀣𑀸 𑀫𑀁 𑀑𑀯𑀤𑀻 𑀚𑀺𑀦𑁄.

𑁬𑁨𑁭. ‘‘𑀭𑀢𑁆𑀢𑀺𑀬𑀸 𑀧𑀞𑀫𑀁 𑀬𑀸𑀫𑀁, 𑀧𑀼𑀩𑁆𑀩𑀚𑀸𑀢𑀺𑀫𑀦𑀼𑀲𑁆𑀲𑀭𑀺𑀁;

𑀭𑀢𑁆𑀢𑀺𑀬𑀸 𑀫𑀚𑁆𑀛𑀺𑀫𑀁 𑀬𑀸𑀫𑀁, 𑀤𑀺𑀩𑁆𑀩𑀘𑀓𑁆𑀔𑀼𑀁 𑀯𑀺𑀲𑁄𑀥𑀬𑀺𑀁;

𑀭𑀢𑁆𑀢𑀺𑀬𑀸 𑀧𑀘𑁆𑀙𑀺𑀫𑁂 𑀬𑀸𑀫𑁂, 𑀢𑀫𑁄𑀔𑀦𑁆𑀥𑀁 𑀧𑀤𑀸𑀮𑀬𑀺𑀁.

𑁬𑁨𑁮. ‘‘𑀢𑀢𑁄 𑀭𑀢𑁆𑀬𑀸𑀯𑀺𑀯𑀲𑀸𑀦𑁂, 𑀲𑀽𑀭𑀺𑀬𑀼𑀕𑁆𑀕𑀫𑀦𑀁 𑀧𑀢𑀺; (𑀚𑀸. 𑁧.𑁧𑁧.𑁭𑁯);

𑀇𑀦𑁆𑀤𑁄 𑀩𑁆𑀭𑀳𑁆𑀫𑀸 𑀘 𑀆𑀕𑀦𑁆𑀢𑁆𑀯𑀸, 𑀫𑀁 𑀦𑀫𑀲𑁆𑀲𑀺𑀁𑀲𑀼 𑀧𑀜𑁆𑀚𑀮𑀻.

𑁬𑁨𑁯. ‘‘𑀦𑀫𑁄 𑀢𑁂 𑀧𑀼𑀭𑀺𑀲𑀸𑀚𑀜𑁆𑀜, 𑀦𑀫𑁄 𑀢𑁂 𑀧𑀼𑀭𑀺𑀲𑀼𑀢𑁆𑀢𑀫;

𑀬𑀲𑁆𑀲 𑀢𑁂 𑀆𑀲𑀯𑀸 𑀔𑀻𑀡𑀸, 𑀤𑀓𑁆𑀔𑀺𑀡𑁂𑀬𑁆𑀬𑁄𑀲𑀺 𑀫𑀸𑀭𑀺𑀲.

𑁬𑁩𑁦. ‘‘𑀢𑀢𑁄 𑀤𑀺𑀲𑁆𑀯𑀸𑀦 𑀫𑀁 𑀲𑀢𑁆𑀣𑀸, 𑀤𑁂𑀯𑀲𑀗𑁆𑀖𑀧𑀼𑀭𑀓𑁆𑀔𑀢𑀁;

𑀲𑀺𑀢𑀁 𑀧𑀸𑀢𑀼𑀓𑀭𑀺𑀢𑁆𑀯𑀸𑀦, 𑀇𑀫𑀫𑀢𑁆𑀣𑀁 𑀅𑀪𑀸𑀲𑀣.

𑁬𑁩𑁧. ‘‘𑀢𑀧𑁂𑀦 𑀩𑁆𑀭𑀳𑁆𑀫𑀘𑀭𑀺𑀬𑁂𑀦, 𑀲𑀁𑀬𑀫𑁂𑀦 𑀤𑀫𑁂𑀦 𑀘;

𑀏𑀢𑁂𑀦 𑀩𑁆𑀭𑀸𑀳𑁆𑀫𑀡𑁄 𑀳𑁄𑀢𑀺, 𑀏𑀢𑀁 𑀩𑁆𑀭𑀸𑀳𑁆𑀫𑀡𑀫𑀼𑀢𑁆𑀢𑀫’’𑀦𑁆𑀢𑀺. 𑁋

𑀇𑀫𑀸𑀳𑀺 𑀕𑀸𑀣𑀸𑀳𑀺 𑀲𑀻𑀳𑀦𑀸𑀤𑀁 𑀦𑀤𑀺.

𑀢𑀢𑁆𑀣 𑀦𑀻𑀘𑁂𑀢𑀺 𑀮𑀸𑀫𑀓𑁂 𑀲𑀩𑁆𑀩𑀦𑀺𑀳𑀻𑀦𑁂. 𑀉𑀘𑁆𑀘𑀦𑀻𑀘𑀪𑀸𑀯𑁄 𑀳𑀺 𑀦𑀸𑀫 𑀲𑀢𑁆𑀢𑀸𑀦𑀁 𑀉𑀧𑀸𑀤𑀸𑀬𑀼𑀧𑀸𑀤𑀸𑀬, 𑀅𑀬𑀁 𑀧𑀦 𑀲𑀩𑁆𑀩𑀦𑀺𑀳𑀻𑀦𑁂 𑀧𑀼𑀓𑁆𑀓𑀼𑀲𑀓𑀼𑀮𑁂 𑀉𑀧𑁆𑀧𑀦𑁆𑀦𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀻𑀘𑁂 𑀓𑀼𑀮𑀫𑁆𑀳𑀺 𑀚𑀸𑀢𑁄’’𑀢𑀺 𑀆𑀳. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀦𑀻𑀘𑁂𑀢𑀺 𑀮𑀸𑀫𑀓𑁂 𑀲𑀩𑁆𑀩𑀦𑀺𑀳𑀻𑀦𑁂’’𑀢𑀺. 𑀤𑀮𑀺𑀤𑁆𑀤𑁄𑀢𑀺 𑀤𑀼𑀕𑁆𑀕𑀢𑁄, 𑀤𑀮𑀺𑀤𑁆𑀤𑀸𑀧𑀺 𑀓𑁂𑀘𑀺 𑀓𑀤𑀸𑀘𑀺 𑀖𑀸𑀲𑀘𑁆𑀙𑀸𑀤𑀦𑀲𑁆𑀲 𑀮𑀸𑀪𑀺𑀦𑁄, 𑀅𑀓𑀲𑀺𑀭𑀯𑀼𑀢𑁆𑀢𑀺𑀦𑁄 𑀳𑁄𑀦𑁆𑀢𑀺, 𑀅𑀳𑀁 𑀧𑀦 𑀲𑀩𑁆𑀩𑀓𑀸𑀮𑀁 𑀓𑀲𑀺𑀭𑀯𑀼𑀢𑁆𑀢𑀺𑀢𑀸𑀬 𑀳𑀻𑀦𑁄 𑀉𑀤𑁆𑀥𑀦𑀁 𑀉𑀧𑀝𑁆𑀞𑀧𑀺𑀢𑀉𑀓𑁆𑀔𑀮𑀺𑀓𑁄 𑀤𑀲𑁆𑀲𑀦𑀬𑀼𑀢𑁆𑀢𑀁 𑀣𑁂𑀯𑀓𑀫𑁆𑀧𑀺 𑀅𑀧𑀲𑁆𑀲𑀺𑀁 𑀬𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀧𑁆𑀧𑀪𑁄𑀚𑀦𑁄’’𑀢𑀺 𑀆𑀳. 𑀦𑀻𑀘𑀓𑀼𑀮𑀺𑀓𑀸 𑀤𑀮𑀺𑀤𑁆𑀤𑀸𑀧𑀺 𑀓𑁂𑀘𑀺 𑀅𑀦𑀻𑀘𑀓𑀫𑁆𑀫𑀸𑀚𑀻𑀯𑀸 𑀳𑁄𑀦𑁆𑀢𑀺, 𑀫𑀬𑁆𑀳𑀁 𑀧𑀦 𑀦 𑀢𑀣𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀳𑀻𑀦𑀓𑀫𑁆𑀫𑀁 𑀫𑀫𑀁 𑀆𑀲𑀻’’𑀢𑀺. 𑀓𑀻𑀤𑀺𑀲𑀦𑁆𑀢𑀺 𑀘𑁂? 𑀅𑀳𑁄𑀲𑀺𑀁 𑀧𑀼𑀧𑁆𑀨𑀙𑀟𑁆𑀟𑀓𑁄, 𑀳𑀢𑁆𑀣𑀯𑀺𑀓𑀮𑀲𑁆𑀲 𑀳𑀢𑁆𑀣𑀯𑀸𑀢𑀺 𑀯𑀺𑀬 𑀉𑀧𑀘𑀸𑀭𑀯𑀲𑁂𑀦𑀸𑀬𑀁 𑀇𑀫𑀲𑁆𑀲 𑀲𑀫𑀜𑁆𑀜𑀸 𑀅𑀳𑁄𑀲𑀺 𑀬𑀤𑀺𑀤𑀁 ‘‘𑀧𑀼𑀧𑁆𑀨𑀙𑀟𑁆𑀟𑀓𑁄’’𑀢𑀺. 𑀫𑀺𑀮𑀸𑀢𑀧𑀼𑀧𑁆𑀨𑀲𑀦𑁆𑀣𑀭𑀯𑀡𑁆𑀡𑀢𑀸𑀬 𑀯𑀸 𑀉𑀓𑁆𑀓𑀸𑀭𑀪𑀽𑀫𑀺𑀬𑀸 𑀏𑀯𑀁 𑀯𑀼𑀢𑁆𑀢𑁄.

𑀚𑀺𑀕𑀼𑀘𑁆𑀙𑀺𑀢𑁄𑀢𑀺 𑀚𑀸𑀢𑀺𑀬𑀸 𑀘𑁂𑀯 𑀓𑀫𑁆𑀫𑀼𑀦𑀸 𑀘 𑀳𑀻𑀴𑀺𑀢𑁄. 𑀫𑀦𑀼𑀲𑁆𑀲𑀸𑀦𑀦𑁆𑀢𑀺 𑀫𑀦𑀼𑀲𑁆𑀲𑁂𑀳𑀺. 𑀧𑀭𑀺𑀪𑀽𑀢𑁄𑀢𑀺 𑀅𑀯𑀜𑁆𑀜𑀸𑀢𑁄. 𑀯𑀫𑁆𑀪𑀺𑀢𑁄𑀢𑀺 𑀔𑀼𑀁𑀲𑀺𑀢𑁄. 𑀦𑀻𑀘𑀁 𑀫𑀦𑀁 𑀓𑀭𑀺𑀢𑁆𑀯𑀸𑀦𑀸𑀢𑀺 𑀅𑀜𑁆𑀜𑁂 𑀫𑀦𑀼𑀲𑁆𑀲𑁂 𑀲𑀺𑀦𑁂𑀭𑀼𑀁 𑀯𑀺𑀬 𑀉𑀓𑁆𑀔𑀺𑀧𑀺𑀢𑁆𑀯𑀸 𑀢𑁂𑀲𑀁 𑀧𑀸𑀤𑀧𑀁𑀲𑀼𑀢𑁄𑀧𑀺 𑀅𑀢𑁆𑀢𑀸𑀦𑀁 𑀦𑀺𑀳𑀻𑀦𑀁 𑀓𑀢𑁆𑀯𑀸 𑀧𑀯𑀢𑁆𑀢𑀺𑀬𑀸 𑀦𑀻𑀘𑀁 𑀦𑀺𑀳𑀻𑀦𑀁 𑀫𑀦𑀁 𑀓𑀢𑁆𑀯𑀸. 𑀯𑀦𑁆𑀤𑀺𑀲𑁆𑀲𑀁 𑀩𑀳𑀼𑀓𑀁 𑀚𑀦𑀦𑁆𑀢𑀺 𑀧𑀼𑀣𑀼𑀫𑀳𑀸𑀚𑀦𑀁 𑀤𑀺𑀝𑁆𑀞𑀤𑀺𑀝𑁆𑀞𑀓𑀸𑀮𑁂 𑀯𑀦𑁆𑀤𑀺𑀁 𑀲𑀺𑀭𑀲𑀺 𑀅𑀜𑁆𑀚𑀮𑀺𑀁 𑀓𑀭𑁄𑀦𑁆𑀢𑁄 𑀧𑀡𑀸𑀫𑀺𑀁.

𑀅𑀣𑀸𑀢𑀺 𑀅𑀥𑀺𑀓𑀸𑀭𑀦𑁆𑀢𑀭𑀤𑀻𑀧𑀦𑁂 𑀦𑀺𑀧𑀸𑀢𑁄. 𑀅𑀤𑁆𑀤𑀲𑀸𑀲𑀺𑀦𑁆𑀢𑀺 𑀅𑀤𑁆𑀤𑀓𑁆𑀔𑀺𑀁. 𑀫𑀕𑀥𑀸𑀦𑀦𑁆𑀢𑀺 𑀫𑀕𑀥𑀸 𑀦𑀸𑀫 𑀚𑀸𑀦𑀧𑀤𑀺𑀦𑁄 𑀭𑀸𑀚𑀓𑀼𑀫𑀸𑀭𑀸, 𑀢𑁂𑀲𑀁 𑀦𑀺𑀯𑀸𑀲𑁄 𑀏𑀓𑁄𑀧𑀺 𑀚𑀦𑀧𑀤𑁄 𑀭𑀼𑀴𑁆𑀳𑀺𑀬𑀸 ‘‘𑀫𑀕𑀥𑀸𑀦’’𑀦𑁆𑀢𑀺 𑀯𑀼𑀢𑁆𑀢𑁄, 𑀫𑀕𑀥𑀚𑀦𑀧𑀤𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀧𑀼𑀭𑀼𑀢𑁆𑀢𑀫𑀦𑁆𑀢𑀺 𑀉𑀢𑁆𑀢𑀫𑀁 𑀦𑀕𑀭𑀁.

𑀩𑁆𑀬𑀸𑀪𑀗𑁆𑀕𑀺𑀦𑁆𑀢𑀺 𑀓𑀸𑀚𑀁. 𑀧𑀩𑁆𑀩𑀚𑁆𑀚𑀁 𑀅𑀳𑀫𑀸𑀬𑀸𑀘𑀺𑀦𑁆𑀢𑀺, ‘‘𑀲𑀼𑀦𑀻𑀢, 𑀧𑀩𑁆𑀩𑀚𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀻’’𑀢𑀺 𑀲𑀢𑁆𑀣𑀸𑀭𑀸 𑀑𑀓𑀸𑀲𑁂 𑀓𑀢𑁂 𑀅𑀳𑀁 𑀧𑀩𑁆𑀩𑀚𑁆𑀚𑀁 𑀅𑀬𑀸𑀘𑀺𑀁. 𑀆𑀲𑀽𑀧𑀲𑀫𑁆𑀧𑀤𑀸𑀢𑀺 ‘‘𑀏𑀳𑀺, 𑀪𑀺𑀓𑁆𑀔𑀽’’𑀢𑀺 𑀲𑀢𑁆𑀣𑀼 𑀯𑀘𑀦𑀫𑀢𑁆𑀢𑁂𑀦 𑀆𑀲𑀺 𑀉𑀧𑀲𑀫𑁆𑀧𑀤𑀸. 𑀬𑀣𑀸 𑀫𑀁 𑀑𑀯𑀤𑀻𑀢𑀺 ‘‘𑀏𑀯𑀁 𑀲𑀫𑀣𑀧𑀼𑀩𑁆𑀩𑀗𑁆𑀕𑀫𑀁 𑀯𑀺𑀧𑀲𑁆𑀲𑀦𑀁 𑀪𑀸𑀯𑁂𑀳𑀻’’𑀢𑀺 𑀬𑀣𑀸 𑀫𑀁 𑀑𑀯𑀤𑀺, 𑀢𑀣𑀸 𑀲𑀢𑁆𑀣𑀼𑀦𑁄 𑀯𑀘𑀦𑀁 𑀅𑀓𑀸𑀲𑀺𑀁 𑀧𑀝𑀺𑀧𑀚𑁆𑀚𑀺𑀁. 𑀭𑀢𑁆𑀢𑀺𑀬𑀸𑀢𑀺𑀆𑀤𑀺 𑀢𑀲𑁆𑀲𑀸 𑀧𑀝𑀺𑀧𑀢𑁆𑀢𑀺𑀬𑀸 𑀭𑀲𑀤𑀲𑁆𑀲𑀦𑀁. 𑀢𑀢𑁆𑀣 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀁 𑀅𑀦𑀸𑀕𑀢𑀁𑀲𑀜𑀸𑀡𑀜𑁆𑀘 𑀩𑀳𑀼𑀓𑀺𑀘𑁆𑀘𑀦𑁆𑀢𑀺 ‘‘𑀧𑀞𑀫𑀁 𑀬𑀸𑀫𑀁 𑀫𑀚𑁆𑀛𑀺𑀫𑀁 𑀬𑀸𑀫’’𑀦𑁆𑀢𑀺 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀯𑀲𑁂𑀦 𑀉𑀧𑀬𑁄𑀕𑀯𑀘𑀦𑀁 𑀯𑀼𑀢𑁆𑀢𑀁. 𑀦 𑀢𑀣𑀸 𑀆𑀲𑀯𑀓𑁆𑀔𑀬𑀜𑀸𑀡𑀁 𑀏𑀓𑀸𑀪𑀺𑀲𑀫𑀬𑀯𑀲𑁂𑀦 𑀧𑀯𑀢𑁆𑀢𑀦𑀢𑁄𑀢𑀺 ‘‘𑀧𑀘𑁆𑀙𑀺𑀫𑁂 𑀬𑀸𑀫𑁂’’𑀢𑀺 𑀪𑀼𑀫𑁆𑀫𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀦𑁆𑀤𑁄𑀢𑀺 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸. 𑀩𑁆𑀭𑀳𑁆𑀫𑀸𑀢𑀺 𑀫𑀳𑀸𑀩𑁆𑀭𑀳𑁆𑀫𑀸. 𑀇𑀦𑁆𑀤𑀩𑁆𑀭𑀳𑁆𑀫𑀕𑁆𑀕𑀳𑀡𑁂𑀦 𑀅𑀜𑁆𑀜𑁂𑀲𑀁 𑀓𑀸𑀫𑀤𑁂𑀯𑀸𑀦𑀁 𑀩𑁆𑀭𑀳𑁆𑀫𑀽𑀦𑀜𑁆𑀘 𑀆𑀕𑀫𑀦𑀁 𑀯𑀼𑀢𑁆𑀢𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁄 𑀳𑁂𑀲 𑀬𑀣𑀸 ‘‘𑀭𑀸𑀚𑀸 𑀆𑀕𑀢𑁄’’𑀢𑀺. 𑀦𑀫𑀲𑁆𑀲𑀺𑀁𑀲𑀽𑀢𑀺 𑀓𑀸𑀬𑁂𑀦 𑀯𑀸𑀘𑀸𑀬 𑀘 𑀦𑀫𑀓𑁆𑀓𑀸𑀭𑀁 𑀅𑀓𑀁𑀲𑀼.

𑀢𑀢𑁆𑀣 𑀓𑀸𑀬𑁂𑀦 𑀓𑀢𑀁 𑀦𑀫𑀓𑁆𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀜𑁆𑀚𑀮𑀻’’𑀢𑀺 𑀯𑀢𑁆𑀯𑀸 𑀯𑀸𑀘𑀸𑀬 𑀓𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀦𑀫𑁄 𑀢𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀤𑁂𑀯𑀲𑀗𑁆𑀖𑀧𑀼𑀭𑀓𑁆𑀔𑀢𑀦𑁆𑀢𑀺 𑀤𑁂𑀯𑀕𑁆𑀕𑀳𑀡𑁂𑀦 𑀉𑀧𑀧𑀢𑁆𑀢𑀺𑀤𑁂𑀯𑀪𑀸𑀯𑀢𑁄 𑀩𑁆𑀭𑀳𑁆𑀫𑀸𑀦𑁄𑀧𑀺 𑀕𑀳𑀺𑀢𑀸. 𑀲𑀺𑀢𑀁 𑀧𑀸𑀢𑀼𑀓𑀭𑀺𑀢𑁆𑀯𑀸𑀦𑀸𑀢𑀺 𑀅𑀢𑁆𑀢𑀦𑁄 𑀑𑀯𑀸𑀤𑀲𑁆𑀲 𑀫𑀳𑀧𑁆𑀨𑀮𑀢𑀁 𑀤𑁂𑀯𑀩𑁆𑀭𑀳𑁆𑀫𑀽𑀦𑀜𑁆𑀘 𑀕𑀼𑀡𑀲𑀫𑁆𑀧𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀲𑀢𑁆𑀣𑀸 𑀲𑀺𑀢𑀁 𑀧𑀸𑀢𑁆𑀯𑀸𑀓𑀸𑀲𑀺. 𑀧𑀸𑀢𑀼𑀓𑀭𑁄𑀦𑁆𑀢𑁄 𑀘 𑀦 𑀅𑀜𑁆𑀜𑁂 𑀯𑀺𑀬 𑀤𑀦𑁆𑀢𑁂 𑀯𑀺𑀤𑀁𑀲𑁂𑀢𑀺, 𑀫𑀼𑀔𑀸𑀥𑀸𑀦𑀁 𑀧𑀦 𑀣𑁄𑀓𑀁 𑀯𑀺𑀯𑀭𑀢𑀺, 𑀢𑀢𑁆𑀢𑀓𑁂𑀦 𑀘 𑀅𑀪𑀺𑀪𑀽𑀢𑀤𑀺𑀩𑁆𑀩𑀨𑀮𑀺𑀓𑀫𑀼𑀢𑁆𑀢𑀭𑀲𑁆𑀫𑀺𑀬𑁄 𑀅𑀯𑀳𑀲𑀺𑀢𑀢𑀸𑀭𑀓𑀸𑀲𑀲𑀺𑀫𑀭𑀻𑀘𑀺𑀬𑁄 𑀲𑀼𑀲𑀼𑀓𑁆𑀓𑀤𑀸𑀞𑀲𑀫𑁆𑀪𑀯𑀸 𑀖𑀦𑀭𑀲𑁆𑀫𑀺𑀬𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀲𑀢𑁆𑀣𑀼 𑀫𑀼𑀔𑀁 𑀧𑀤𑀓𑁆𑀔𑀺𑀡𑀁 𑀓𑀭𑁄𑀦𑁆𑀢𑀺, 𑀢𑀁 𑀤𑀺𑀲𑁆𑀯𑀸 𑀧𑀘𑁆𑀙𑀢𑁄 𑀕𑀘𑁆𑀙𑀦𑁆𑀢𑀸𑀧𑀺 𑀲𑀢𑁆𑀣𑀸 𑀲𑀺𑀢𑀁 𑀧𑀸𑀢𑁆𑀯𑀸𑀓𑀸𑀲𑀻𑀢𑀺 𑀲𑀜𑁆𑀚𑀸𑀦𑀦𑁆𑀢𑀺.

𑀢𑀧𑁂𑀦𑀸𑀢𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁂𑀦, ‘‘𑀥𑀼𑀢𑀥𑀫𑁆𑀫𑀲𑀫𑀸𑀤𑀸𑀦𑁂𑀦𑀸’’𑀢𑀺 𑀓𑁂𑀘𑀺. 𑀲𑀁𑀬𑀫𑁂𑀦𑀸𑀢𑀺 𑀲𑀻𑀮𑁂𑀦. 𑀤𑀫𑁂𑀦𑀸𑀢𑀺 𑀧𑀜𑁆𑀜𑀸𑀬. 𑀩𑁆𑀭𑀳𑁆𑀫𑀘𑀭𑀺𑀬𑁂𑀦𑀸𑀢𑀺 𑀅𑀯𑀲𑀺𑀝𑁆𑀞𑀲𑁂𑀝𑁆𑀞𑀘𑀭𑀺𑀬𑀸𑀬. 𑀏𑀢𑁂𑀦𑀸𑀢𑀺 𑀬𑀣𑀸𑀯𑀼𑀢𑁆𑀢𑁂𑀦 𑀢𑀧𑀸𑀤𑀺𑀦𑀸. 𑀩𑁆𑀭𑀸𑀳𑁆𑀫𑀡𑁄 𑀳𑁄𑀢𑀺 𑀩𑀸𑀳𑀺𑀢𑀧𑀸𑀧𑀪𑀸𑀯𑀢𑁄. 𑀏𑀢𑀦𑁆𑀢𑀺 𑀢𑀧𑀸𑀤𑀺 𑀬𑀣𑀸𑀯𑀼𑀢𑁆𑀢𑀁. 𑀩𑁆𑀭𑀸𑀳𑁆𑀫𑀡𑀫𑀼𑀢𑁆𑀢𑀫𑀦𑁆𑀢𑀺 𑀉𑀢𑁆𑀢𑀫𑀁 𑀩𑁆𑀭𑀸𑀳𑁆𑀫𑀡𑀁, 𑀩𑁆𑀭𑀸𑀳𑁆𑀫𑀡𑁂𑀲𑀼 𑀯𑀸 𑀉𑀢𑁆𑀢𑀫𑀁 𑀲𑀩𑁆𑀩𑀲𑁂𑀝𑁆𑀞𑀁, 𑀅𑀳𑀽𑀢𑀺 𑀯𑀘𑀦𑀲𑁂𑀲𑁄. 𑀩𑁆𑀭𑀸𑀳𑁆𑀫𑀡𑀦𑁆𑀢𑀺 𑀯𑀸 𑀩𑁆𑀭𑀳𑁆𑀫𑀜𑁆𑀜𑀫𑀸𑀳, 𑀏𑀯𑀁 𑀉𑀢𑁆𑀢𑀫𑀁 𑀩𑁆𑀭𑀳𑁆𑀫𑀜𑁆𑀜𑀁, 𑀦 𑀚𑀘𑁆𑀘𑀸𑀤𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀳𑀺 𑀚𑀸𑀢𑀺𑀓𑀼𑀮𑀧𑀤𑁂𑀲𑀕𑁄𑀢𑁆𑀢𑀲𑀫𑁆𑀧𑀢𑁆𑀢𑀺𑀆𑀤𑀬𑁄 𑀅𑀭𑀺𑀬𑀪𑀸𑀯𑀲𑁆𑀲 𑀓𑀸𑀭𑀡𑀁, 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀤𑀬𑁄 𑀏𑀯 𑀧𑀦 𑀓𑀸𑀭𑀡𑀁. 𑀢𑁂𑀦𑀸𑀳 𑁋

‘‘𑀬𑀣𑀸 𑀲𑀗𑁆𑀓𑀸𑀭𑀞𑀸𑀦𑀲𑁆𑀫𑀺𑀁, 𑀉𑀚𑁆𑀛𑀺𑀢𑀲𑁆𑀫𑀺𑀁 𑀫𑀳𑀸𑀧𑀣𑁂;

𑀧𑀤𑀼𑀫𑀁 𑀢𑀢𑁆𑀣 𑀚𑀸𑀬𑁂𑀣, 𑀲𑀼𑀘𑀺𑀕𑀦𑁆𑀥𑀁 𑀫𑀦𑁄𑀭𑀫𑀁.

‘‘𑀏𑀯𑀁 𑀲𑀗𑁆𑀓𑀸𑀭𑀪𑀽𑀢𑁂𑀲𑀼, 𑀅𑀦𑁆𑀥𑀪𑀽𑀢𑁂 𑀧𑀼𑀣𑀼𑀚𑁆𑀚𑀦𑁂;

𑀅𑀢𑀺𑀭𑁄𑀘𑀢𑀺 𑀧𑀜𑁆𑀜𑀸𑀬, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀯𑀓𑁄’’𑀢𑀺. (𑀥. 𑀧. 𑁫𑁮-𑁫𑁯);

𑀏𑀯𑀁 𑀣𑁂𑀭𑁄 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀧𑀼𑀘𑁆𑀙𑀺𑀢𑀫𑀢𑁆𑀣𑀁 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀲𑀻𑀳𑀦𑀸𑀤𑀁 𑀦𑀤𑀻𑀢𑀺.

𑀲𑀼𑀦𑀻𑀢𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑁆𑀯𑀸𑀤𑀲𑀓𑀦𑀺𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.