𑁧𑁦. 𑀯𑀺𑀫𑀮𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸

𑀥𑀭𑀡𑀻 𑀘 𑀲𑀺𑀜𑁆𑀘𑀢𑀺 𑀯𑀸𑀢𑀺 𑀆𑀬𑀲𑁆𑀫𑀢𑁄 𑀯𑀺𑀫𑀮𑀢𑁆𑀣𑁂𑀭𑀲𑁆𑀲 𑀕𑀸𑀣𑀸. 𑀓𑀸 𑀉𑀧𑁆𑀧𑀢𑁆𑀢𑀺? 𑀲𑁄𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀉𑀧𑀘𑀺𑀦𑀦𑁆𑀢𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀲𑀗𑁆𑀔𑀥𑀫𑀦𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀢𑀲𑁆𑀫𑀺𑀁 𑀲𑀺𑀧𑁆𑀧𑁂 𑀦𑀺𑀧𑁆𑀨𑀢𑁆𑀢𑀺𑀁 𑀕𑀢𑁄 𑀏𑀓𑀤𑀺𑀯𑀲𑀁 𑀯𑀺𑀧𑀲𑁆𑀲𑀺𑀁 𑀪𑀕𑀯𑀦𑁆𑀢𑀁 𑀧𑀲𑁆𑀲𑀺𑀢𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀲𑀗𑁆𑀔𑀥𑀫𑀦𑁂𑀦 𑀧𑀽𑀚𑀁 𑀓𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀓𑀸𑀮𑁂𑀦 𑀓𑀸𑀮𑀁 𑀲𑀢𑁆𑀣𑀼 𑀉𑀧𑀝𑁆𑀞𑀸𑀦𑀁 𑀅𑀓𑀸𑀲𑀺. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀅𑀧𑀭𑀸𑀧𑀭𑀁 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 ‘‘𑀅𑀦𑀸𑀕𑀢𑁂 𑀫𑁂 𑀯𑀺𑀫𑀮𑁄 𑀯𑀺𑀲𑀼𑀤𑁆𑀥𑁄 𑀓𑀸𑀬𑁄 𑀳𑁄𑀢𑀽’’𑀢𑀺 𑀩𑁄𑀥𑀺𑀭𑀼𑀓𑁆𑀔𑀁 𑀕𑀦𑁆𑀥𑁄𑀤𑀓𑁂𑀳𑀺 𑀦𑁆𑀳𑀸𑀧𑁂𑀲𑀺, 𑀘𑁂𑀢𑀺𑀬𑀗𑁆𑀕𑀡𑀩𑁄𑀥𑀺𑀬𑀗𑁆𑀕𑀡𑁂𑀲𑀼 𑀆𑀲𑀦𑀸𑀦𑀺 𑀥𑁄𑀯𑀸𑀧𑁂𑀲𑀺, 𑀪𑀺𑀓𑁆𑀔𑀽𑀦𑀫𑁆𑀧𑀺 𑀓𑀺𑀮𑀺𑀝𑁆𑀞𑁂 𑀲𑀫𑀡𑀧𑀭𑀺𑀓𑁆𑀔𑀸𑀭𑁂 𑀥𑁄𑀯𑀸𑀧𑁂𑀲𑀺.

𑀲𑁄 𑀢𑀢𑁄 𑀘𑀯𑀺𑀢𑁆𑀯𑀸 𑀤𑁂𑀯𑁂𑀲𑀼 𑀘 𑀫𑀦𑀼𑀲𑁆𑀲𑁂𑀲𑀼 𑀘 𑀧𑀭𑀺𑀯𑀢𑁆𑀢𑁂𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀭𑀸𑀚𑀕𑀳𑁂 𑀇𑀩𑁆𑀪𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀫𑀸𑀢𑀼𑀓𑀼𑀘𑁆𑀙𑀺𑀬𑀁 𑀯𑀲𑀦𑁆𑀢𑀲𑁆𑀲 𑀦𑀺𑀓𑁆𑀔𑀫𑀦𑁆𑀢𑀲𑁆𑀲 𑀘 𑀓𑀸𑀬𑁄 𑀧𑀺𑀢𑁆𑀢𑀲𑁂𑀫𑁆𑀳𑀸𑀤𑀻𑀳𑀺 𑀅𑀲𑀁𑀓𑀺𑀮𑀺𑀝𑁆𑀞𑁄 𑀧𑀤𑀼𑀫𑀧𑀮𑀸𑀲𑁂 𑀉𑀤𑀓𑀩𑀺𑀦𑁆𑀤𑀼 𑀯𑀺𑀬 𑀅𑀮𑀕𑁆𑀕𑁄 𑀧𑀘𑁆𑀙𑀺𑀫𑀪𑀯𑀺𑀓𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀺𑀬 𑀲𑀼𑀯𑀺𑀲𑀼𑀤𑁆𑀥𑁄 𑀅𑀳𑁄𑀲𑀺, 𑀢𑁂𑀦𑀲𑁆𑀲 𑀯𑀺𑀫𑀮𑁄𑀢𑁆𑀯𑁂𑀯 𑀦𑀸𑀫𑀁 𑀅𑀓𑀁𑀲𑀼. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀭𑀸𑀚𑀕𑀳𑀧𑁆𑀧𑀯𑁂𑀲𑀦𑁂 𑀩𑀼𑀤𑁆𑀥𑀸𑀦𑀼𑀪𑀸𑀯𑀁 𑀤𑀺𑀲𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀓𑁄𑀲𑀮𑀭𑀝𑁆𑀞𑁂 𑀧𑀩𑁆𑀩𑀢𑀕𑀼𑀳𑀸𑀬𑀁 𑀯𑀺𑀳𑀭𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀘𑀸𑀢𑀼𑀤𑁆𑀤𑀻𑀧𑀺𑀓𑀫𑀳𑀸𑀫𑁂𑀖𑁄 𑀲𑀓𑀮𑀁 𑀘𑀓𑁆𑀓𑀯𑀸𑀴𑀕𑀩𑁆𑀪𑀁 𑀧𑀢𑁆𑀣𑀭𑀺𑀢𑁆𑀯𑀸 𑀧𑀸𑀯𑀲𑁆𑀲𑀺. 𑀯𑀺𑀯𑀝𑁆𑀝𑀝𑁆𑀞𑀸𑀬𑀺𑀫𑁆𑀳𑀺 𑀩𑀼𑀤𑁆𑀥𑀸𑀦𑀁 𑀘𑀓𑁆𑀓𑀯𑀢𑁆𑀢𑀻𑀦𑀜𑁆𑀘 𑀥𑀭𑀫𑀸𑀦𑀓𑀸𑀮𑁂 𑀏𑀯 𑀓𑀺𑀭 𑀏𑀯𑀁 𑀯𑀲𑁆𑀲𑀢𑀺. 𑀖𑀫𑁆𑀫𑀧𑀭𑀺𑀴𑀸𑀳𑀯𑀽𑀧𑀲𑀫𑀢𑁄 𑀉𑀢𑀼𑀲𑀧𑁆𑀧𑀸𑀬𑀮𑀸𑀪𑁂𑀦 𑀣𑁂𑀭𑀲𑁆𑀲 𑀘𑀺𑀢𑁆𑀢𑀁 𑀲𑀫𑀸𑀳𑀺𑀢𑀁 𑀅𑀳𑁄𑀲𑀺 𑀏𑀓𑀕𑁆𑀕𑀁. 𑀲𑁄 𑀲𑀫𑀸𑀳𑀺𑀢𑀘𑀺𑀢𑁆𑀢𑁄 𑀢𑀸𑀯𑀤𑁂𑀯 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭 𑁧.𑁧𑁦.𑁫𑁬-𑁬𑁦) 𑁋

‘‘𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄, 𑀅𑀳𑁄𑀲𑀺𑀁 𑀲𑀗𑁆𑀔𑀥𑀫𑁆𑀫𑀓𑁄;

𑀦𑀺𑀘𑁆𑀘𑀼𑀧𑀝𑁆𑀞𑀸𑀦𑀬𑀼𑀢𑁆𑀢𑁄𑀫𑁆𑀳𑀺, 𑀲𑀼𑀕𑀢𑀲𑁆𑀲 𑀫𑀳𑁂𑀲𑀺𑀦𑁄.

‘‘𑀉𑀧𑀝𑁆𑀞𑀸𑀦𑀨𑀮𑀁 𑀧𑀲𑁆𑀲, 𑀮𑁄𑀓𑀦𑀸𑀣𑀲𑁆𑀲 𑀢𑀸𑀤𑀺𑀦𑁄;

𑀲𑀝𑁆𑀞𑀺 𑀢𑀽𑀭𑀺𑀬𑀲𑀳𑀲𑁆𑀲𑀸𑀦𑀺, 𑀧𑀭𑀺𑀯𑀸𑀭𑁂𑀦𑁆𑀢𑀺 𑀫𑀁 𑀲𑀤𑀸.

‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀉𑀧𑀝𑁆𑀞𑀳𑀺𑀁 𑀫𑀳𑀸𑀇𑀲𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀉𑀧𑀝𑁆𑀞𑀸𑀦𑀲𑁆𑀲𑀺𑀤𑀁 𑀨𑀮𑀁.

‘‘𑀘𑀢𑀼𑀯𑀻𑀲𑁂 𑀇𑀢𑁄 𑀓𑀧𑁆𑀧𑁂, 𑀫𑀳𑀸𑀦𑀺𑀕𑁆𑀖𑁄𑀲𑀦𑀸𑀫𑀓𑀸;

𑀲𑁄𑀴𑀲𑀸𑀲𑀺𑀁𑀲𑀼 𑀭𑀸𑀚𑀸𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

𑀅𑀭𑀳𑀢𑁆𑀢𑀁 𑀧𑀦 𑀧𑀢𑁆𑀯𑀸 𑀓𑀢𑀓𑀺𑀘𑁆𑀘𑀢𑀸𑀬 𑀢𑀼𑀝𑁆𑀞𑀫𑀸𑀦𑀲𑁄 𑀉𑀤𑀸𑀦𑀁 𑀉𑀤𑀸𑀦𑁂𑀦𑁆𑀢𑁄 ‘‘𑀥𑀭𑀡𑀻 𑀘 𑀲𑀺𑀜𑁆𑀘𑀢𑀺 𑀯𑀸𑀢𑀺 𑀫𑀸𑀮𑀼𑀢𑁄’’𑀢𑀺 𑀕𑀸𑀣𑀁 𑀅𑀪𑀸𑀲𑀺.

𑁫𑁦. 𑀢𑀢𑁆𑀣 𑀥𑀭𑀡𑀻𑀢𑀺 𑀧𑀣𑀯𑀻, 𑀲𑀸 𑀳𑀺 𑀲𑀓𑀮𑀁 𑀥𑀭𑀸𑀥𑀭𑀁 𑀥𑀸𑀭𑁂𑀢𑀻𑀢𑀺 ‘‘𑀥𑀭𑀡𑀻’’𑀢𑀺 𑀯𑀼𑀘𑁆𑀘𑀢𑀺. 𑀲𑀺𑀜𑁆𑀘𑀢𑀻𑀢𑀺 𑀲𑀫𑀦𑁆𑀢𑀢𑁄 𑀦𑀪𑀁 𑀧𑀽𑀭𑁂𑀢𑁆𑀯𑀸 𑀅𑀪𑀺𑀧𑁆𑀧𑀯𑀲𑁆𑀲𑀢𑁄 𑀫𑀳𑀸𑀫𑁂𑀖𑀲𑁆𑀲 𑀯𑀼𑀝𑁆𑀞𑀺𑀥𑀸𑀭𑀸𑀳𑀺 𑀲𑀺𑀜𑁆𑀘𑀢𑀺. 𑀯𑀸𑀢𑀺 𑀫𑀸𑀮𑀼𑀢𑁄𑀢𑀺 𑀉𑀤𑀓𑀨𑀼𑀲𑀺𑀢𑀲𑀫𑁆𑀫𑀺𑀲𑁆𑀲𑀢𑀸𑀬 𑀲𑀻𑀢𑀮𑁄 𑀯𑀸𑀢𑁄 𑀯𑀸𑀬𑀢𑀺. 𑀯𑀺𑀚𑁆𑀚𑀼𑀢𑀸 𑀘𑀭𑀢𑀺 𑀦𑀪𑁂𑀢𑀺 𑀢𑀢𑁆𑀣 𑀢𑀢𑁆𑀣 𑀕𑀚𑁆𑀚𑀢𑀸 𑀕𑀴𑀕𑀴𑀸𑀬𑀢𑀸 𑀫𑀳𑀸𑀫𑁂𑀖𑀢𑁄 𑀦𑀺𑀘𑁆𑀙𑀭𑀦𑁆𑀢𑀺𑀬𑁄 𑀲𑀢𑁂𑀭𑀢𑀸 𑀆𑀓𑀸𑀲𑁂 𑀇𑀢𑁄 𑀘𑀺𑀢𑁄 𑀘 𑀯𑀺𑀘𑀭𑀦𑁆𑀢𑀺. 𑀉𑀧𑀲𑀫𑀦𑁆𑀢𑀺 𑀯𑀺𑀢𑀓𑁆𑀓𑀸𑀢𑀺 𑀉𑀢𑀼𑀲𑀧𑁆𑀧𑀸𑀬𑀲𑀺𑀤𑁆𑀥𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀸𑀥𑀺𑀕𑀫𑁂𑀦 𑀧𑀼𑀩𑁆𑀩𑀪𑀸𑀕𑁂 𑀢𑀤𑀗𑁆𑀕𑀸𑀤𑀺𑀯𑀲𑁂𑀦 𑀯𑀽𑀧𑀲𑀦𑁆𑀢𑀸 𑀳𑀼𑀢𑁆𑀯𑀸 𑀓𑀸𑀫𑀯𑀺𑀢𑀓𑁆𑀓𑀸𑀤𑀬𑁄 𑀲𑀩𑁆𑀩𑁂𑀧𑀺 𑀦𑀯 𑀫𑀳𑀸𑀯𑀺𑀢𑀓𑁆𑀓𑀸 𑀅𑀭𑀺𑀬𑀫𑀕𑁆𑀕𑀸𑀥𑀺𑀕𑀫𑁂𑀦 𑀉𑀧𑀲𑀫𑀦𑁆𑀢𑀺. 𑀅𑀦𑀯𑀲𑁂𑀲𑀢𑁄 𑀲𑀫𑀼𑀘𑁆𑀙𑀺𑀚𑁆𑀚𑀦𑁆𑀢𑀻𑀢𑀺. 𑀯𑀢𑁆𑀢𑀫𑀸𑀦𑀲𑀫𑀻𑀧𑀢𑀸𑀬 𑀅𑀭𑀺𑀬𑀫𑀕𑁆𑀕𑀓𑁆𑀔𑀡𑀁 𑀯𑀢𑁆𑀢𑀫𑀸𑀦𑀁 𑀓𑀢𑁆𑀯𑀸 𑀯𑀤𑀢𑀺. 𑀅𑀢𑀻𑀢𑀢𑁆𑀣𑁂 𑀯𑀸 𑀏𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀘𑀦𑀁. 𑀘𑀺𑀢𑁆𑀢𑀁 𑀲𑀼𑀲𑀫𑀸𑀳𑀺𑀢𑀁 𑀫𑀫𑀸𑀢𑀺 𑀢𑀢𑁄 𑀏𑀯 𑀮𑁄𑀓𑀼𑀢𑁆𑀢𑀭𑀲𑀫𑀸𑀥𑀺𑀦𑀸 𑀫𑀫 𑀘𑀺𑀢𑁆𑀢𑀁 𑀲𑀼𑀝𑁆𑀞𑀼 𑀲𑀫𑀸𑀳𑀺𑀢𑀁, 𑀦 𑀤𑀸𑀦𑀺 𑀢𑀲𑁆𑀲 𑀲𑀫𑀸𑀥𑀸𑀦𑁂 𑀓𑀺𑀜𑁆𑀘𑀺 𑀓𑀸𑀢𑀩𑁆𑀩𑀁 𑀅𑀢𑁆𑀣𑀻𑀢𑀺 𑀣𑁂𑀭𑁄 𑀅𑀜𑁆𑀜𑀁 𑀩𑁆𑀬𑀸𑀓𑀸𑀲𑀺.

𑀯𑀺𑀫𑀮𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀜𑁆𑀘𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.