𑁭. 𑀅𑀕𑁆𑀕𑀺𑀓𑀪𑀸𑀭𑀤𑁆𑀯𑀸𑀚𑀲𑀼𑀢𑁆𑀢𑀯𑀡𑁆𑀡𑀦𑀸

𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀅𑀕𑁆𑀕𑀺𑀓𑀪𑀸𑀭𑀤𑁆𑀯𑀸𑀚𑀲𑀼𑀢𑁆𑀢𑀁, ‘‘𑀯𑀲𑀮𑀲𑀼𑀢𑁆𑀢’’𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀓𑀲𑀺𑀪𑀸𑀭𑀤𑁆𑀯𑀸𑀚𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦 𑀧𑀘𑁆𑀙𑀸𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀅𑀕𑁆𑀕𑀺𑀓𑀪𑀸𑀭𑀤𑁆𑀯𑀸𑀚𑀁 𑀩𑁆𑀭𑀸𑀳𑁆𑀫𑀡𑀁 𑀲𑀭𑀡𑀲𑀺𑀓𑁆𑀔𑀸𑀧𑀤𑀸𑀦𑀁 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀁 𑀤𑀺𑀲𑁆𑀯𑀸 ‘‘𑀢𑀢𑁆𑀣 𑀫𑀬𑀺 𑀕𑀢𑁂 𑀓𑀣𑀸 𑀧𑀯𑀢𑁆𑀢𑀺𑀲𑁆𑀲𑀢𑀺, 𑀢𑀢𑁄 𑀓𑀣𑀸𑀯𑀲𑀸𑀦𑁂 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀏𑀲 𑀩𑁆𑀭𑀸𑀳𑁆𑀫𑀡𑁄 𑀲𑀭𑀡𑀁 𑀕𑀦𑁆𑀢𑁆𑀯𑀸 𑀲𑀺𑀓𑁆𑀔𑀸𑀧𑀤𑀸𑀦𑀺 𑀲𑀫𑀸𑀤𑀺𑀬𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸, 𑀢𑀢𑁆𑀣 𑀕𑀦𑁆𑀢𑁆𑀯𑀸, 𑀧𑀯𑀢𑁆𑀢𑀸𑀬 𑀓𑀣𑀸𑀬 𑀩𑁆𑀭𑀸𑀳𑁆𑀫𑀡𑁂𑀦 𑀥𑀫𑁆𑀫𑀤𑁂𑀲𑀦𑀁 𑀬𑀸𑀘𑀺𑀢𑁄 𑀇𑀫𑀁 𑀲𑀼𑀢𑁆𑀢𑀁 𑀅𑀪𑀸𑀲𑀺. 𑀢𑀢𑁆𑀣 ‘‘𑀏𑀯𑀁 𑀫𑁂 𑀲𑀼𑀢’’𑀦𑁆𑀢𑀺𑀆𑀤𑀺𑀁 𑀫𑀗𑁆𑀕𑀮𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 𑀯𑀡𑁆𑀡𑀬𑀺𑀲𑁆𑀲𑀸𑀫, ‘‘𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬’’𑀦𑁆𑀢𑀺𑀆𑀤𑀺 𑀓𑀲𑀺𑀪𑀸𑀭𑀤𑁆𑀯𑀸𑀚𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀕𑁆𑀕𑀺𑀓𑀪𑀸𑀭𑀤𑁆𑀯𑀸𑀚𑀲𑁆𑀲𑀸𑀢𑀺 𑀬𑀁 𑀬𑀁 𑀅𑀯𑀼𑀢𑁆𑀢𑀧𑀼𑀩𑁆𑀩𑀁, 𑀢𑀁 𑀢𑀤𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀲𑁂𑀬𑁆𑀬𑀣𑀺𑀤𑀁 𑁋 𑀲𑁄 𑀳𑀺 𑀩𑁆𑀭𑀸𑀳𑁆𑀫𑀡𑁄 𑀅𑀕𑁆𑀕𑀺𑀁 𑀚𑀼𑀳𑀢𑀺 𑀧𑀭𑀺𑀘𑀭𑀢𑀻𑀢𑀺 𑀓𑀢𑁆𑀯𑀸 𑀅𑀕𑁆𑀕𑀺𑀓𑁄𑀢𑀺 𑀦𑀸𑀫𑁂𑀦 𑀧𑀸𑀓𑀝𑁄 𑀅𑀳𑁄𑀲𑀺, 𑀪𑀸𑀭𑀤𑁆𑀯𑀸𑀚𑁄𑀢𑀺 𑀕𑁄𑀢𑁆𑀢𑁂𑀦. 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀅𑀕𑁆𑀕𑀺𑀓𑀪𑀸𑀭𑀤𑁆𑀯𑀸𑀚𑀲𑁆𑀲𑀸’’𑀢𑀺. 𑀦𑀺𑀯𑁂𑀲𑀦𑁂𑀢𑀺 𑀖𑀭𑁂. 𑀢𑀲𑁆𑀲 𑀓𑀺𑀭 𑀩𑁆𑀭𑀸𑀳𑁆𑀫𑀡𑀲𑁆𑀲 𑀦𑀺𑀯𑁂𑀲𑀦𑀤𑁆𑀯𑀸𑀭𑁂 𑀅𑀦𑁆𑀢𑀭𑀯𑀻𑀣𑀺𑀬𑀁 𑀅𑀕𑁆𑀕𑀺𑀳𑀼𑀢𑀲𑀸𑀮𑀸 𑀅𑀳𑁄𑀲𑀺. 𑀢𑀢𑁄 ‘‘𑀦𑀺𑀯𑁂𑀲𑀦𑀤𑁆𑀯𑀸𑀭𑁂’’𑀢𑀺 𑀯𑀢𑁆𑀢𑀩𑁆𑀩𑁂 𑀢𑀲𑁆𑀲𑀧𑀺 𑀧𑀤𑁂𑀲𑀲𑁆𑀲 𑀦𑀺𑀯𑁂𑀲𑀦𑁂𑀬𑁂𑀯 𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 ‘‘𑀦𑀺𑀯𑁂𑀲𑀦𑁂’’𑀢𑀺 𑀯𑀼𑀢𑁆𑀢𑀁. 𑀲𑀫𑀻𑀧𑀢𑁆𑀣𑁂 𑀯𑀸 𑀪𑀼𑀫𑁆𑀫𑀯𑀘𑀦𑀁, 𑀦𑀺𑀯𑁂𑀲𑀦𑀲𑀫𑀻𑀧𑁂𑀢𑀺 𑀅𑀢𑁆𑀣𑁄. 𑀅𑀕𑁆𑀕𑀺 𑀧𑀚𑁆𑀚𑀮𑀺𑀢𑁄 𑀳𑁄𑀢𑀻𑀢𑀺 𑀅𑀕𑁆𑀕𑀺𑀬𑀸𑀥𑀸𑀦𑁂 𑀞𑀺𑀢𑁄 𑀅𑀕𑁆𑀕𑀺 𑀓𑀢𑀩𑁆𑀪𑀼𑀤𑁆𑀥𑀭𑀡𑁄 𑀲𑀫𑀺𑀥𑀸𑀧𑀓𑁆𑀔𑁂𑀧𑀁 𑀩𑀻𑀚𑀦𑀯𑀸𑀢𑀜𑁆𑀘 𑀮𑀪𑀺𑀢𑁆𑀯𑀸 𑀚𑀮𑀺𑀢𑁄 𑀉𑀤𑁆𑀥𑀁 𑀲𑀫𑀼𑀕𑁆𑀕𑀢𑀘𑁆𑀘𑀺𑀲𑀫𑀸𑀓𑀼𑀮𑁄 𑀳𑁄𑀢𑀺. 𑀆𑀳𑀼𑀢𑀺 𑀧𑀕𑁆𑀕𑀳𑀺𑀢𑀸𑀢𑀺 𑀲𑀲𑀻𑀲𑀁 𑀦𑁆𑀳𑀸𑀬𑀺𑀢𑁆𑀯𑀸 𑀫𑀳𑀢𑀸 𑀲𑀓𑁆𑀓𑀸𑀭𑁂𑀦 𑀧𑀸𑀬𑀸𑀲𑀲𑀧𑁆𑀧𑀺𑀫𑀥𑀼𑀨𑀸𑀡𑀺𑀢𑀸𑀤𑀻𑀦𑀺 𑀅𑀪𑀺𑀲𑀗𑁆𑀔𑀢𑀸𑀦𑀺 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀬𑀜𑁆𑀳𑀺 𑀓𑀺𑀜𑁆𑀘𑀺 𑀅𑀕𑁆𑀕𑀺𑀫𑁆𑀳𑀺 𑀚𑀼𑀳𑀺𑀢𑀩𑁆𑀩𑀁, 𑀢𑀁 𑀲𑀩𑁆𑀩𑀁 ‘‘𑀆𑀳𑀼𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀲𑀧𑀤𑀸𑀦𑀦𑁆𑀢𑀺 𑀅𑀦𑀼𑀖𑀭𑀁. 𑀪𑀕𑀯𑀸 𑀳𑀺 𑀲𑀩𑁆𑀩𑀚𑀦𑀸𑀦𑀼𑀕𑁆𑀕𑀳𑀢𑁆𑀣𑀸𑀬 𑀆𑀳𑀸𑀭𑀲𑀦𑁆𑀢𑀼𑀝𑁆𑀞𑀺𑀬𑀸 𑀘 𑀉𑀘𑁆𑀘𑀦𑀻𑀘𑀓𑀼𑀮𑀁 𑀅𑀯𑁄𑀓𑁆𑀓𑀫𑁆𑀫 𑀧𑀺𑀡𑁆𑀟𑀸𑀬 𑀘𑀭𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀧𑀤𑀸𑀦𑀁 𑀧𑀺𑀡𑁆𑀟𑀸𑀬 𑀘𑀭𑀫𑀸𑀦𑁄’’𑀢𑀺.

𑀅𑀣 𑀓𑀺𑀫𑀢𑁆𑀣𑀁 𑀲𑀩𑁆𑀩𑀸𑀓𑀸𑀭𑀲𑀫𑁆𑀧𑀦𑁆𑀦𑀁 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀘𑀺𑀢𑁆𑀢𑀁 𑀦𑀧𑁆𑀧𑀲𑀻𑀤𑀢𑀺? 𑀓𑀲𑁆𑀫𑀸 𑀘 𑀏𑀯𑀁 𑀨𑀭𑀼𑀲𑁂𑀦 𑀯𑀘𑀦𑁂𑀦 𑀪𑀕𑀯𑀦𑁆𑀢𑀁 𑀲𑀫𑀼𑀤𑀸𑀘𑀭𑀢𑀻𑀢𑀺? 𑀯𑀼𑀘𑁆𑀘𑀢𑁂 𑁋 𑀅𑀬𑀁 𑀓𑀺𑀭 𑀩𑁆𑀭𑀸𑀳𑁆𑀫𑀡𑁄 ‘‘𑀫𑀗𑁆𑀕𑀮𑀓𑀺𑀘𑁆𑀘𑁂𑀲𑀼 𑀲𑀫𑀡𑀤𑀲𑁆𑀲𑀦𑀁 𑀅𑀯𑀫𑀗𑁆𑀕𑀮’’𑀦𑁆𑀢𑀺 𑀏𑀯𑀁𑀤𑀺𑀝𑁆𑀞𑀺𑀓𑁄, 𑀢𑀢𑁄 ‘‘𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀪𑀼𑀜𑁆𑀚𑀦𑀯𑁂𑀮𑀸𑀬 𑀓𑀸𑀴𑀓𑀡𑁆𑀡𑀻 𑀫𑀼𑀡𑁆𑀟𑀓𑀲𑀫𑀡𑀓𑁄 𑀫𑀫 𑀦𑀺𑀯𑁂𑀲𑀦𑀁 𑀉𑀧𑀲𑀗𑁆𑀓𑀫𑀢𑀻’’𑀢𑀺 𑀫𑀦𑁆𑀢𑁆𑀯𑀸 𑀘𑀺𑀢𑁆𑀢𑀁 𑀦𑀧𑁆𑀧𑀲𑀸𑀤𑁂𑀲𑀺, 𑀅𑀜𑁆𑀜𑀤𑀢𑁆𑀣𑀼 𑀤𑁄𑀲𑀯𑀲𑀁𑀬𑁂𑀯 𑀅𑀕𑀫𑀸𑀲𑀺. 𑀅𑀣 𑀓𑀼𑀤𑁆𑀥𑁄 𑀅𑀦𑀢𑁆𑀢𑀫𑀦𑁄 𑀅𑀦𑀢𑁆𑀢𑀫𑀦𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀲𑀺 ‘‘𑀢𑀢𑁆𑀭𑁂𑀯 𑀫𑀼𑀡𑁆𑀟𑀓𑀸’’𑀢𑀺𑀆𑀤𑀺. 𑀢𑀢𑁆𑀭𑀸𑀧𑀺 𑀘 𑀬𑀲𑁆𑀫𑀸 ‘‘𑀫𑀼𑀡𑁆𑀟𑁄 𑀅𑀲𑀼𑀤𑁆𑀥𑁄 𑀳𑁄𑀢𑀻’’𑀢𑀺 𑀩𑁆𑀭𑀸𑀳𑁆𑀫𑀡𑀸𑀦𑀁 𑀤𑀺𑀝𑁆𑀞𑀺, 𑀢𑀲𑁆𑀫𑀸 ‘‘𑀅𑀬𑀁 𑀅𑀲𑀼𑀤𑁆𑀥𑁄, 𑀢𑁂𑀦 𑀤𑁂𑀯𑀩𑁆𑀭𑀸𑀳𑁆𑀫𑀡𑀧𑀽𑀚𑀓𑁄 𑀦 𑀳𑁄𑀢𑀻’’𑀢𑀺 𑀚𑀺𑀕𑀼𑀘𑁆𑀙𑀦𑁆𑀢𑁄 ‘‘𑀫𑀼𑀡𑁆𑀟𑀓𑀸’’𑀢𑀺 𑀆𑀳. 𑀫𑀼𑀡𑁆𑀟𑀓𑀢𑁆𑀢𑀸 𑀯𑀸 𑀉𑀘𑁆𑀙𑀺𑀝𑁆𑀞𑁄 𑀏𑀲, 𑀦 𑀇𑀫𑀁 𑀧𑀤𑁂𑀲𑀁 𑀅𑀭𑀳𑀢𑀺 𑀆𑀕𑀘𑁆𑀙𑀺𑀢𑀼𑀦𑁆𑀢𑀺 𑀲𑀫𑀡𑁄 𑀳𑀼𑀢𑁆𑀯𑀸𑀧𑀺 𑀈𑀤𑀺𑀲𑀁 𑀓𑀸𑀬𑀓𑀺𑀮𑁂𑀲𑀁 𑀦 𑀯𑀡𑁆𑀡𑁂𑀢𑀻𑀢𑀺 𑀘 𑀲𑀫𑀡𑀪𑀸𑀯𑀁 𑀚𑀺𑀕𑀼𑀘𑁆𑀙𑀦𑁆𑀢𑁄 ‘‘𑀲𑀫𑀡𑀓𑀸’’𑀢𑀺 𑀆𑀳. 𑀦 𑀓𑁂𑀯𑀮𑀁 𑀤𑁄𑀲𑀯𑀲𑁂𑀦𑁂𑀯, 𑀯𑀲𑀮𑁂 𑀯𑀸 𑀧𑀩𑁆𑀩𑀸𑀚𑁂𑀢𑁆𑀯𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀏𑀓𑀢𑁄 𑀲𑀫𑁆𑀪𑁄𑀕𑀧𑀭𑀺𑀪𑁄𑀕𑀓𑀭𑀡𑁂𑀦 𑀧𑀢𑀺𑀢𑁄 𑀅𑀬𑀁 𑀯𑀲𑀮𑀢𑁄𑀧𑀺 𑀧𑀸𑀧𑀢𑀭𑁄𑀢𑀺 𑀚𑀺𑀕𑀼𑀘𑁆𑀙𑀦𑁆𑀢𑁄 ‘‘𑀯𑀲𑀮𑀓𑀸’’𑀢𑀺 𑀆𑀳 𑁋 ‘‘𑀯𑀲𑀮𑀚𑀸𑀢𑀺𑀓𑀸𑀦𑀁 𑀯𑀸 𑀆𑀳𑀼𑀢𑀺𑀤𑀲𑁆𑀲𑀦𑀫𑀢𑁆𑀢𑀲𑀯𑀦𑁂𑀦 𑀧𑀸𑀧𑀁 𑀳𑁄𑀢𑀻’’𑀢𑀺 𑀫𑀜𑁆𑀜𑀫𑀸𑀦𑁄𑀧𑀺 𑀏𑀯𑀫𑀸𑀳.

𑀪𑀕𑀯𑀸 𑀢𑀣𑀸 𑀯𑀼𑀢𑁆𑀢𑁄𑀧𑀺 𑀯𑀺𑀧𑁆𑀧𑀲𑀦𑁆𑀦𑁂𑀦𑁂𑀯 𑀫𑀼𑀔𑀯𑀡𑁆𑀡𑁂𑀦 𑀫𑀥𑀼𑀭𑁂𑀦 𑀲𑀭𑁂𑀦 𑀩𑁆𑀭𑀸𑀳𑁆𑀫𑀡𑀲𑁆𑀲 𑀉𑀧𑀭𑀺 𑀅𑀦𑀼𑀓𑀫𑁆𑀧𑀸𑀲𑀻𑀢𑀮𑁂𑀦 𑀘𑀺𑀢𑁆𑀢𑁂𑀦 𑀅𑀢𑁆𑀢𑀦𑁄 𑀲𑀩𑁆𑀩𑀲𑀢𑁆𑀢𑁂𑀳𑀺 𑀅𑀲𑀸𑀥𑀸𑀭𑀡𑀢𑀸𑀤𑀺𑀪𑀸𑀯𑀁 𑀧𑀓𑀸𑀲𑁂𑀦𑁆𑀢𑁄 𑀆𑀳 ‘‘𑀚𑀸𑀦𑀸𑀲𑀺 𑀧𑀦, 𑀢𑁆𑀯𑀁 𑀩𑁆𑀭𑀸𑀳𑁆𑀫𑀡𑀸’’𑀢𑀺. 𑀅𑀣 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀢𑁄 𑀫𑀼𑀔𑀧𑁆𑀧𑀲𑀸𑀤𑀲𑀽𑀘𑀺𑀢𑀁 𑀢𑀸𑀤𑀺𑀪𑀸𑀯𑀁 𑀜𑀢𑁆𑀯𑀸 𑀅𑀦𑀼𑀓𑀫𑁆𑀧𑀸𑀲𑀻𑀢𑀮𑁂𑀦 𑀘𑀺𑀢𑁆𑀢𑁂𑀦 𑀦𑀺𑀘𑁆𑀙𑀸𑀭𑀺𑀢𑀁 𑀫𑀥𑀼𑀭𑀲𑁆𑀲𑀭𑀁 𑀲𑀼𑀢𑁆𑀯𑀸 𑀅𑀫𑀢𑁂𑀦𑁂𑀯 𑀅𑀪𑀺𑀲𑀺𑀢𑁆𑀢𑀳𑀤𑀬𑁄 𑀅𑀢𑁆𑀢𑀫𑀦𑁄 𑀯𑀺𑀧𑁆𑀧𑀲𑀦𑁆𑀦𑀺𑀦𑁆𑀤𑁆𑀭𑀺𑀬𑁄 𑀦𑀺𑀳𑀢𑀫𑀸𑀦𑁄 𑀳𑀼𑀢𑁆𑀯𑀸 𑀢𑀁 𑀚𑀸𑀢𑀺𑀲𑀪𑀸𑀯𑀁 𑀯𑀺𑀲𑀉𑀕𑁆𑀕𑀺𑀭𑀲𑀤𑀺𑀲𑀁 𑀲𑀫𑀼𑀤𑀸𑀘𑀸𑀭𑀯𑀘𑀦𑀁 𑀧𑀳𑀸𑀬 ‘‘𑀦𑀽𑀦 𑀬𑀫𑀳𑀁 𑀳𑀻𑀦𑀚𑀘𑁆𑀘𑀁 𑀯𑀲𑀮𑀦𑁆𑀢𑀺 𑀧𑀘𑁆𑀘𑁂𑀫𑀺, 𑀦 𑀲𑁄 𑀧𑀭𑀫𑀢𑁆𑀣𑀢𑁄 𑀯𑀲𑀮𑁄, 𑀦 𑀘 𑀳𑀻𑀦𑀚𑀘𑁆𑀘𑀢𑀸 𑀏𑀯 𑀯𑀲𑀮𑀓𑀭𑀡𑁄 𑀥𑀫𑁆𑀫𑁄’’𑀢𑀺 𑀫𑀜𑁆𑀜𑀫𑀸𑀦𑁄 ‘‘𑀦 𑀔𑁆𑀯𑀸𑀳𑀁, 𑀪𑁄 𑀕𑁄𑀢𑀫𑀸’’𑀢𑀺 𑀆𑀳. 𑀥𑀫𑁆𑀫𑀢𑀸 𑀳𑁂𑀲𑀸, 𑀬𑀁 𑀳𑁂𑀢𑀼𑀲𑀫𑁆𑀧𑀦𑁆𑀦𑁄 𑀧𑀘𑁆𑀘𑀬𑀸𑀮𑀸𑀪𑁂𑀦 𑀨𑀭𑀼𑀲𑁄𑀧𑀺 𑀲𑀫𑀸𑀦𑁄 𑀮𑀤𑁆𑀥𑀫𑀢𑁆𑀢𑁂 𑀧𑀘𑁆𑀘𑀬𑁂 𑀫𑀼𑀤𑀼𑀓𑁄 𑀳𑁄𑀢𑀻𑀢𑀺.

𑀢𑀢𑁆𑀣 𑀲𑀸𑀥𑀽𑀢𑀺 𑀅𑀬𑀁 𑀲𑀤𑁆𑀤𑁄 𑀆𑀬𑀸𑀘𑀦𑀲𑀫𑁆𑀧𑀝𑀺𑀘𑁆𑀙𑀦𑀲𑀫𑁆𑀧𑀳𑀁𑀲𑀦𑀲𑀼𑀦𑁆𑀤𑀭𑀤𑀴𑁆𑀳𑀻𑀓𑀫𑁆𑀫𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. ‘‘𑀲𑀸𑀥𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑀽’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁪.𑁯𑁫; 𑀅. 𑀦𑀺. 𑁭.𑁮𑁩) 𑀳𑀺 𑀆𑀬𑀸𑀘𑀦𑁂. ‘‘𑀲𑀸𑀥𑀼, 𑀪𑀦𑁆𑀢𑁂𑀢𑀺 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁮𑁬) 𑀲𑀫𑁆𑀧𑀝𑀺𑀘𑁆𑀙𑀦𑁂. ‘‘𑀲𑀸𑀥𑀼, 𑀲𑀸𑀥𑀼, 𑀲𑀸𑀭𑀺𑀧𑀼𑀢𑁆𑀢𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁩.𑁩𑁪𑁯) 𑀲𑀫𑁆𑀧𑀳𑀁𑀲𑀦𑁂.

‘‘𑀲𑀸𑀥𑀼 𑀥𑀫𑁆𑀫𑀭𑀼𑀘𑀻 𑀭𑀸𑀚𑀸, 𑀲𑀸𑀥𑀼 𑀧𑀜𑁆𑀜𑀸𑀡𑀯𑀸 𑀦𑀭𑁄;

𑀲𑀸𑀥𑀼 𑀫𑀺𑀢𑁆𑀢𑀸𑀦𑀫𑀤𑁆𑀤𑀼𑀩𑁆𑀪𑁄, 𑀧𑀸𑀧𑀲𑁆𑀲𑀸𑀓𑀭𑀡𑀁 𑀲𑀼𑀔’’𑀦𑁆𑀢𑀺. (𑀚𑀸. 𑁨.𑁧𑁮.𑁧𑁦𑁧) 𑁋

𑀆𑀤𑀻𑀲𑀼 𑀲𑀼𑀦𑁆𑀤𑀭𑁂. ‘‘𑀢𑀁 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁧) 𑀤𑀴𑁆𑀳𑀻𑀓𑀫𑁆𑀫𑁂. 𑀇𑀥 𑀧𑀦 𑀆𑀬𑀸𑀘𑀦𑁂.

𑀢𑁂𑀦 𑀳𑀻𑀢𑀺 𑀢𑀲𑁆𑀲𑀸𑀥𑀺𑀧𑁆𑀧𑀸𑀬𑀦𑀺𑀤𑀲𑁆𑀲𑀦𑀁, 𑀲𑀘𑁂 𑀜𑀸𑀢𑀼𑀓𑀸𑀫𑁄𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀸𑀭𑀡𑀯𑀘𑀦𑀁 𑀯𑀸, 𑀢𑀲𑁆𑀲 𑀬𑀲𑁆𑀫𑀸 𑀜𑀸𑀢𑀼𑀓𑀸𑀫𑁄𑀲𑀺, 𑀢𑀲𑁆𑀫𑀸, 𑀩𑁆𑀭𑀸𑀳𑁆𑀫𑀡, 𑀲𑀼𑀡𑀸𑀳𑀺, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀳𑀺, 𑀢𑀣𑀸 𑀢𑁂 𑀪𑀸𑀲𑀺𑀲𑁆𑀲𑀸𑀫𑀺, 𑀬𑀣𑀸 𑀢𑁆𑀯𑀁 𑀚𑀸𑀦𑀺𑀲𑁆𑀲𑀲𑀻𑀢𑀺 𑀏𑀯𑀁 𑀧𑀭𑀧𑀤𑁂𑀳𑀺 𑀲𑀤𑁆𑀥𑀺𑀁 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀭 𑀘 𑀲𑀼𑀡𑀸𑀳𑀻𑀢𑀺 𑀲𑁄𑀢𑀺𑀦𑁆𑀤𑁆𑀭𑀺𑀬𑀯𑀺𑀓𑁆𑀔𑁂𑀧𑀯𑀸𑀭𑀡𑀁, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀳𑀻𑀢𑀺 𑀫𑀦𑀲𑀺𑀓𑀸𑀭𑁂 𑀤𑀴𑁆𑀳𑀻𑀓𑀫𑁆𑀫𑀦𑀺𑀬𑁄𑀚𑀦𑁂𑀦 𑀫𑀦𑀺𑀦𑁆𑀤𑁆𑀭𑀺𑀬𑀯𑀺𑀓𑁆𑀔𑁂𑀧𑀯𑀸𑀭𑀡𑀁. 𑀧𑀼𑀭𑀺𑀫𑀜𑁆𑀘𑁂𑀢𑁆𑀣 𑀩𑁆𑀬𑀜𑁆𑀚𑀦𑀯𑀺𑀧𑀮𑁆𑀮𑀸𑀲𑀕𑁆𑀕𑀸𑀳𑀯𑀸𑀭𑀡𑀁, 𑀧𑀘𑁆𑀙𑀺𑀫𑀁 𑀅𑀢𑁆𑀣𑀯𑀺𑀧𑀮𑁆𑀮𑀸𑀲𑀕𑁆𑀕𑀸𑀳𑀯𑀸𑀭𑀡𑀁. 𑀧𑀼𑀭𑀺𑀫𑁂𑀦 𑀘 𑀥𑀫𑁆𑀫𑀲𑁆𑀲𑀯𑀦𑁂 𑀦𑀺𑀬𑁄𑀚𑁂𑀢𑀺, 𑀧𑀘𑁆𑀙𑀺𑀫𑁂𑀦 𑀲𑀼𑀢𑀸𑀦𑀁 𑀥𑀫𑁆𑀫𑀸𑀦𑀁 𑀥𑀸𑀭𑀡𑀢𑁆𑀣𑀽𑀧𑀧𑀭𑀺𑀓𑁆𑀔𑀸𑀤𑀻𑀲𑀼. 𑀧𑀼𑀭𑀺𑀫𑁂𑀦 𑀘 ‘‘𑀲𑀩𑁆𑀬𑀜𑁆𑀚𑀦𑁄 𑀅𑀬𑀁 𑀥𑀫𑁆𑀫𑁄, 𑀢𑀲𑁆𑀫𑀸 𑀲𑀯𑀦𑀻𑀬𑁄’’𑀢𑀺 𑀤𑀻𑀧𑁂𑀢𑀺, 𑀧𑀘𑁆𑀙𑀺𑀫𑁂𑀦 ‘‘𑀲𑀸𑀢𑁆𑀣𑁄, 𑀢𑀲𑁆𑀫𑀸 𑀫𑀦𑀲𑀺 𑀓𑀸𑀢𑀩𑁆𑀩𑁄’’𑀢𑀺. 𑀲𑀸𑀥𑀼𑀓𑀧𑀤𑀁 𑀯𑀸 𑀉𑀪𑀬𑀧𑀤𑁂𑀳𑀺 𑀬𑁄𑀚𑁂𑀢𑁆𑀯𑀸 ‘‘𑀬𑀲𑁆𑀫𑀸 𑀅𑀬𑀁 𑀥𑀫𑁆𑀫𑁄 𑀥𑀫𑁆𑀫𑀕𑀫𑁆𑀪𑀻𑀭𑁄 𑀘 𑀤𑁂𑀲𑀦𑀸𑀕𑀫𑁆𑀪𑀻𑀭𑁄 𑀘, 𑀢𑀲𑁆𑀫𑀸 𑀲𑀼𑀡𑀸𑀳𑀺 𑀲𑀸𑀥𑀼𑀓𑀁. 𑀬𑀲𑁆𑀫𑀸 𑀅𑀢𑁆𑀣𑀕𑀫𑁆𑀪𑀻𑀭𑁄 𑀧𑀝𑀺𑀯𑁂𑀥𑀕𑀫𑁆𑀪𑀻𑀭𑁄 𑀘, 𑀢𑀲𑁆𑀫𑀸 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀳𑀻’’𑀢𑀺 𑀏𑀢𑀫𑀢𑁆𑀣𑀁 𑀤𑀻𑀧𑁂𑀦𑁆𑀢𑁄 𑀆𑀳 𑁋 ‘‘𑀲𑀼𑀡𑀸𑀳𑀺 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀳𑀻’’𑀢𑀺.

𑀢𑀢𑁄 ‘‘𑀏𑀯𑀁 𑀕𑀫𑁆𑀪𑀻𑀭𑁂 𑀓𑀣𑀫𑀳𑀁 𑀧𑀢𑀺𑀝𑁆𑀞𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀯𑀺𑀲𑀻𑀤𑀦𑁆𑀢𑀫𑀺𑀯 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀲𑀫𑀼𑀲𑁆𑀲𑀸𑀳𑁂𑀦𑁆𑀢𑁄 𑀆𑀳 𑁋 ‘‘𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. 𑀢𑀢𑁆𑀣 ‘‘𑀬𑀣𑀸 𑀢𑁆𑀯𑀁 𑀜𑀲𑁆𑀲𑀲𑀺, 𑀢𑀣𑀸 𑀧𑀭𑀺𑀫𑀡𑁆𑀟𑀮𑁂𑀳𑀺 𑀧𑀤𑀩𑁆𑀬𑀜𑁆𑀚𑀦𑁂𑀳𑀺 𑀉𑀢𑁆𑀢𑀸𑀦𑁂𑀦 𑀦𑀬𑁂𑀦 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀫𑀥𑀺𑀧𑁆𑀧𑀸𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁄 𑀉𑀲𑁆𑀲𑀸𑀳𑀚𑀸𑀢𑁄 𑀳𑀼𑀢𑁆𑀯𑀸 ‘‘𑀏𑀯𑀁 𑀪𑁄’’𑀢𑀺 𑀔𑁄 𑀅𑀕𑁆𑀕𑀺𑀓𑀪𑀸𑀭𑀤𑁆𑀯𑀸𑀚𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺, 𑀲𑀫𑁆𑀧𑀝𑀺𑀘𑁆𑀙𑀺 𑀧𑀝𑀺𑀕𑁆𑀕𑀳𑁂𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀬𑀣𑀸𑀦𑀼𑀲𑀺𑀝𑁆𑀞𑀁 𑀯𑀸 𑀧𑀝𑀺𑀧𑀚𑁆𑀚𑀦𑁂𑀦 𑀅𑀪𑀺𑀫𑀼𑀔𑁄 𑀅𑀲𑁆𑀲𑁄𑀲𑀻𑀢𑀺. 𑀅𑀣𑀲𑁆𑀲 ‘‘𑀪𑀕𑀯𑀸 𑀏𑀢𑀤𑀯𑁄𑀘𑀸’’𑀢𑀺 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀓𑁄𑀥𑀦𑁄 𑀉𑀧𑀦𑀸𑀳𑀻’’𑀢𑀺 𑀏𑀯𑀫𑀸𑀤𑀺𑀓𑀁.

𑁧𑁧𑁬. 𑀢𑀢𑁆𑀣 𑀓𑁄𑀥𑀦𑁄𑀢𑀺 𑀓𑀼𑀚𑁆𑀛𑀦𑀲𑀻𑀮𑁄. 𑀉𑀧𑀦𑀸𑀳𑀻𑀢𑀺 𑀢𑀲𑁆𑀲𑁂𑀯 𑀓𑁄𑀥𑀲𑁆𑀲 𑀤𑀴𑁆𑀳𑀻𑀓𑀫𑁆𑀫𑁂𑀦 𑀉𑀧𑀦𑀸𑀳𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀧𑀭𑁂𑀲𑀁 𑀕𑀼𑀡𑁂 𑀫𑀓𑁆𑀔𑁂𑀢𑀺 𑀧𑀼𑀜𑁆𑀙𑀢𑀻𑀢𑀺 𑀫𑀓𑁆𑀔𑀻, 𑀧𑀸𑀧𑁄 𑀘 𑀲𑁄 𑀫𑀓𑁆𑀔𑀻 𑀘𑀸𑀢𑀺 𑀧𑀸𑀧𑀫𑀓𑁆𑀔𑀻. 𑀯𑀺𑀧𑀦𑁆𑀦𑀤𑀺𑀝𑁆𑀞𑀻𑀢𑀺 𑀯𑀺𑀦𑀝𑁆𑀞𑀲𑀫𑁆𑀫𑀸𑀤𑀺𑀝𑁆𑀞𑀺, 𑀯𑀺𑀧𑀦𑁆𑀦𑀸𑀬 𑀯𑀸 𑀯𑀺𑀭𑀽𑀧𑀁 𑀕𑀢𑀸𑀬 𑀤𑀲𑀯𑀢𑁆𑀣𑀼𑀓𑀸𑀬 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑁄. 𑀫𑀸𑀬𑀸𑀯𑀻𑀢𑀺 𑀅𑀢𑁆𑀢𑀦𑀺 𑀯𑀺𑀚𑁆𑀚𑀫𑀸𑀦𑀤𑁄𑀲𑀧𑀝𑀺𑀘𑁆𑀙𑀸𑀤𑀦𑀮𑀓𑁆𑀔𑀡𑀸𑀬 𑀫𑀸𑀬𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀢𑀁 𑀚𑀜𑁆𑀜𑀸 𑀯𑀲𑀮𑁄 𑀇𑀢𑀻𑀢𑀺 𑀢𑀁 𑀏𑀯𑀭𑀽𑀧𑀁 𑀧𑀼𑀕𑁆𑀕𑀮𑀁 𑀏𑀢𑁂𑀲𑀁 𑀳𑀻𑀦𑀥𑀫𑁆𑀫𑀸𑀦𑀁 𑀯𑀲𑁆𑀲𑀦𑀢𑁄 𑀲𑀺𑀜𑁆𑀘𑀦𑀢𑁄 𑀅𑀦𑁆𑀯𑀸𑀲𑁆𑀲𑀯𑀦𑀢𑁄 ‘‘𑀯𑀲𑀮𑁄’’𑀢𑀺 𑀚𑀸𑀦𑁂𑀬𑁆𑀬𑀸𑀢𑀺, 𑀏𑀢𑁂𑀳𑀺 𑀲𑀩𑁆𑀩𑁂𑀳𑀺 𑀩𑁆𑀭𑀸𑀳𑁆𑀫𑀡𑀫𑀢𑁆𑀣𑀓𑁂 𑀚𑀸𑀢𑁄. 𑀅𑀬𑀜𑁆𑀳𑀺 𑀧𑀭𑀫𑀢𑁆𑀣𑀢𑁄 𑀯𑀲𑀮𑁄 𑀏𑀯, 𑀅𑀢𑁆𑀢𑀦𑁄 𑀳𑀤𑀬𑀢𑀼𑀝𑁆𑀞𑀺𑀫𑀢𑁆𑀢𑀁, 𑀦 𑀧𑀭𑀦𑁆𑀢𑀺. 𑀏𑀯𑀫𑁂𑀢𑁆𑀣 𑀪𑀕𑀯𑀸 𑀆𑀤𑀺𑀧𑀤𑁂𑀦𑁂𑀯 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀓𑁄𑀥𑀦𑀺𑀕𑁆𑀕𑀳𑀁 𑀓𑀢𑁆𑀯𑀸 ‘‘𑀓𑁄𑀥𑀸𑀤𑀺𑀥𑀫𑁆𑀫𑁄 𑀳𑀻𑀦𑀧𑀼𑀕𑁆𑀕𑀮𑁄’’𑀢𑀺 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬 𑀘 𑀤𑁂𑀲𑀦𑀸𑀬 𑀓𑁄𑀥𑀸𑀤𑀺𑀥𑀫𑁆𑀫𑁂 𑀤𑁂𑀲𑁂𑀦𑁆𑀢𑁄 𑀏𑀓𑁂𑀦 𑀢𑀸𑀯 𑀧𑀭𑀺𑀬𑀸𑀬𑁂𑀦 𑀯𑀲𑀮𑀜𑁆𑀘 𑀯𑀲𑀮𑀓𑀭𑀡𑁂 𑀘 𑀥𑀫𑁆𑀫𑁂 𑀤𑁂𑀲𑁂𑀲𑀺. 𑀏𑀯𑀁 𑀤𑁂𑀲𑁂𑀦𑁆𑀢𑁄 𑀘 ‘‘𑀢𑁆𑀯𑀁 𑀅𑀳’’𑀦𑁆𑀢𑀺 𑀧𑀭𑀯𑀫𑁆𑀪𑀦𑀁 𑀅𑀢𑁆𑀢𑀼𑀓𑁆𑀓𑀁𑀲𑀦𑀜𑁆𑀘 𑀅𑀓𑀢𑁆𑀯𑀸 𑀥𑀫𑁆𑀫𑁂𑀦𑁂𑀯 𑀲𑀫𑁂𑀦 𑀜𑀸𑀬𑁂𑀦 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀯𑀲𑀮𑀪𑀸𑀯𑁂, 𑀅𑀢𑁆𑀢𑀸𑀦𑀜𑁆𑀘 𑀩𑁆𑀭𑀸𑀳𑁆𑀫𑀡𑀪𑀸𑀯𑁂 𑀞𑀧𑁂𑀲𑀺.

𑁧𑁧𑁭. 𑀇𑀤𑀸𑀦𑀺 𑀬𑀸𑀬𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀤𑀺𑀝𑁆𑀞𑀺 ‘‘𑀓𑀤𑀸𑀘𑀺 𑀧𑀸𑀡𑀸𑀢𑀺𑀧𑀸𑀢𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑁄𑀧𑀺 𑀩𑁆𑀭𑀸𑀳𑁆𑀫𑀡𑁄 𑀏𑀯𑀸’’𑀢𑀺. 𑀢𑀁 𑀤𑀺𑀝𑁆𑀞𑀺𑀁 𑀧𑀝𑀺𑀲𑁂𑀥𑁂𑀦𑁆𑀢𑁄, 𑀬𑁂 𑀘 𑀲𑀢𑁆𑀢𑀯𑀺𑀳𑀺𑀁𑀲𑀸𑀤𑀻𑀲𑀼 𑀅𑀓𑀼𑀲𑀮𑀥𑀫𑁆𑀫𑁂𑀲𑀼 𑀢𑁂𑀳𑀺 𑀢𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀆𑀤𑀻𑀦𑀯𑀁 𑀅𑀧𑀲𑁆𑀲𑀦𑁆𑀢𑀸 𑀢𑁂 𑀥𑀫𑁆𑀫𑁂 𑀉𑀧𑁆𑀧𑀸𑀤𑁂𑀦𑁆𑀢𑀺, 𑀢𑁂𑀲𑀁 ‘‘𑀳𑀻𑀦𑀸 𑀏𑀢𑁂 𑀥𑀫𑁆𑀫𑀸 𑀯𑀲𑀮𑀓𑀭𑀡𑀸’’𑀢𑀺 𑀢𑀢𑁆𑀣 𑀆𑀤𑀻𑀦𑀯𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 𑀅𑀧𑀭𑁂𑀳𑀺𑀧𑀺 𑀧𑀭𑀺𑀬𑀸𑀬𑁂𑀳𑀺 𑀯𑀲𑀮𑀜𑁆𑀘 𑀯𑀲𑀮𑀓𑀭𑀡𑁂 𑀘 𑀥𑀫𑁆𑀫𑁂 𑀤𑁂𑀲𑁂𑀢𑀼𑀁 ‘‘𑀏𑀓𑀚𑀁 𑀯𑀸 𑀤𑁆𑀯𑀺𑀚𑀁 𑀯𑀸’’𑀢𑀺 𑀏𑀯𑀫𑀸𑀤𑀺𑀕𑀸𑀣𑀸𑀬𑁄 𑀅𑀪𑀸𑀲𑀺.

𑀢𑀢𑁆𑀣 𑀏𑀓𑀚𑁄𑀢𑀺 𑀞𑀧𑁂𑀢𑁆𑀯𑀸 𑀅𑀡𑁆𑀟𑀚𑀁 𑀅𑀯𑀲𑁂𑀲𑀬𑁄𑀦𑀺𑀚𑁄. 𑀲𑁄 𑀳𑀺 𑀏𑀓𑀤𑀸 𑀏𑀯 𑀚𑀸𑀬𑀢𑀺. 𑀤𑁆𑀯𑀺𑀚𑁄𑀢𑀺 𑀅𑀡𑁆𑀟𑀚𑁄. 𑀲𑁄 𑀳𑀺 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀅𑀡𑁆𑀟𑀓𑁄𑀲𑀢𑁄 𑀘𑀸𑀢𑀺 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀚𑀸𑀬𑀢𑀺. 𑀢𑀁 𑀏𑀓𑀚𑀁 𑀯𑀸 𑀤𑁆𑀯𑀺𑀚𑀁 𑀯𑀸𑀧𑀺. 𑀬𑁄𑀥 𑀧𑀸𑀡𑀦𑁆𑀢𑀺 𑀬𑁄 𑀇𑀥 𑀲𑀢𑁆𑀢𑀁. 𑀯𑀺𑀳𑀺𑀁𑀲𑀢𑀻𑀢𑀺 𑀓𑀸𑀬𑀤𑁆𑀯𑀸𑀭𑀺𑀓𑀘𑁂𑀢𑀦𑀸𑀲𑀫𑀼𑀝𑁆𑀞𑀺𑀢𑁂𑀦 𑀯𑀸 𑀯𑀘𑀻𑀤𑁆𑀯𑀸𑀭𑀺𑀓𑀘𑁂𑀢𑀦𑀸𑀲𑀫𑀼𑀝𑁆𑀞𑀺𑀢𑁂𑀦 𑀯𑀸 𑀧𑀬𑁄𑀕𑁂𑀦 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀺. ‘‘𑀧𑀸𑀡𑀸𑀦𑀺 𑀳𑀺𑀁𑀲𑀢𑀻’’𑀢𑀺𑀧𑀺 𑀧𑀸𑀞𑁄. 𑀢𑀢𑁆𑀣 𑀏𑀓𑀚𑀁 𑀯𑀸 𑀤𑁆𑀯𑀺𑀚𑀁 𑀯𑀸𑀢𑀺 𑀏𑀯𑀁𑀧𑀪𑁂𑀤𑀸𑀦𑀺 𑀬𑁄𑀥 𑀧𑀸𑀡𑀸𑀦𑀺 𑀳𑀺𑀁𑀲𑀢𑀻𑀢𑀺 𑀏𑀯𑀁 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀲𑁆𑀲 𑀧𑀸𑀡𑁂 𑀤𑀬𑀸 𑀦𑀢𑁆𑀣𑀻𑀢𑀺 𑀏𑀢𑁂𑀦 𑀫𑀦𑀲𑀸 𑀅𑀦𑀼𑀓𑀫𑁆𑀧𑀸𑀬 𑀅𑀪𑀸𑀯𑀁 𑀆𑀳. 𑀲𑁂𑀲𑀫𑁂𑀢𑁆𑀣 𑀯𑀼𑀢𑁆𑀢𑀦𑀬𑀫𑁂𑀯. 𑀇𑀢𑁄 𑀧𑀭𑀸𑀲𑀼 𑀘 𑀕𑀸𑀣𑀸𑀲𑀼, 𑀬𑀢𑁄 𑀏𑀢𑁆𑀢𑀓𑀫𑁆𑀧𑀺 𑀅𑀯𑀢𑁆𑀯𑀸 𑀇𑀢𑁄 𑀧𑀭𑀁 𑀉𑀢𑁆𑀢𑀸𑀦𑀢𑁆𑀣𑀸𑀦𑀺 𑀧𑀤𑀸𑀦𑀺 𑀧𑀭𑀺𑀳𑀭𑀦𑁆𑀢𑀸 𑀅𑀯𑀡𑁆𑀡𑀺𑀢𑀧𑀤𑀯𑀡𑁆𑀡𑀦𑀸𑀫𑀢𑁆𑀢𑀫𑁂𑀯 𑀓𑀭𑀺𑀲𑁆𑀲𑀸𑀫.

𑁧𑁧𑁮. 𑀳𑀦𑁆𑀢𑀻𑀢𑀺 𑀳𑀦𑀢𑀺 𑀯𑀺𑀦𑀸𑀲𑁂𑀢𑀺. 𑀧𑀭𑀺𑀭𑀼𑀦𑁆𑀥𑀢𑀻𑀢𑀺 𑀲𑁂𑀦𑀸𑀬 𑀧𑀭𑀺𑀯𑀸𑀭𑁂𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀕𑀸𑀫𑀸𑀦𑀺 𑀦𑀺𑀕𑀫𑀸𑀦𑀺 𑀘𑀸𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁂𑀦 𑀦𑀕𑀭𑀸𑀦𑀻𑀢𑀺𑀧𑀺 𑀯𑀢𑁆𑀢𑀩𑁆𑀩𑀁. 𑀦𑀺𑀕𑁆𑀕𑀸𑀳𑀓𑁄 𑀲𑀫𑀜𑁆𑀜𑀸𑀢𑁄𑀢𑀺 𑀇𑀫𑀺𑀦𑀸 𑀳𑀦𑀦𑀧𑀭𑀺𑀭𑀼𑀦𑁆𑀥𑀦𑁂𑀦 𑀕𑀸𑀫𑀦𑀺𑀕𑀫𑀦𑀕𑀭𑀖𑀸𑀢𑀓𑁄𑀢𑀺 𑀮𑁄𑀓𑁂 𑀯𑀺𑀤𑀺𑀢𑁄.

𑁧𑁧𑁯. 𑀕𑀸𑀫𑁂 𑀯𑀸 𑀬𑀤𑀺 𑀯𑀸𑀭𑀜𑁆𑀜𑁂𑀢𑀺 𑀕𑀸𑀫𑁄𑀧𑀺 𑀦𑀺𑀕𑀫𑁄𑀧𑀺 𑀦𑀕𑀭𑀫𑁆𑀧𑀺 𑀲𑀩𑁆𑀩𑁄𑀯 𑀇𑀥 𑀕𑀸𑀫𑁄 𑀲𑀤𑁆𑀥𑀺𑀁 𑀉𑀧𑀘𑀸𑀭𑁂𑀦, 𑀢𑀁 𑀞𑀧𑁂𑀢𑁆𑀯𑀸 𑀲𑁂𑀲𑀁 𑀅𑀭𑀜𑁆𑀜𑀁. 𑀢𑀲𑁆𑀫𑀺𑀁 𑀕𑀸𑀫𑁂 𑀯𑀸 𑀬𑀤𑀺 𑀯𑀸𑀭𑀜𑁆𑀜𑁂 𑀬𑀁 𑀧𑀭𑁂𑀲𑀁 𑀫𑀫𑀸𑀬𑀺𑀢𑀁, 𑀬𑀁 𑀧𑀭𑀲𑀢𑁆𑀢𑀸𑀦𑀁 𑀧𑀭𑀺𑀕𑁆𑀕𑀳𑀺𑀢𑀫𑀧𑀭𑀺𑀘𑁆𑀘𑀢𑁆𑀢𑀁 𑀲𑀢𑁆𑀢𑁄 𑀯𑀸 𑀲𑀗𑁆𑀔𑀸𑀭𑁄 𑀯𑀸. 𑀣𑁂𑀬𑁆𑀬𑀸 𑀅𑀤𑀺𑀦𑁆𑀦𑀫𑀸𑀤𑁂𑀢𑀻𑀢𑀺 𑀢𑁂𑀳𑀺 𑀅𑀤𑀺𑀦𑁆𑀦𑀁 𑀅𑀦𑀦𑀼𑀜𑁆𑀜𑀸𑀢𑀁 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀆𑀤𑀺𑀬𑀢𑀺, 𑀬𑁂𑀦 𑀓𑁂𑀦𑀘𑀺 𑀧𑀬𑁄𑀕𑁂𑀦 𑀬𑁂𑀦 𑀓𑁂𑀦𑀘𑀺 𑀅𑀯𑀳𑀸𑀭𑁂𑀦 𑀅𑀢𑁆𑀢𑀦𑁄 𑀕𑀳𑀡𑀁 𑀲𑀸𑀥𑁂𑀢𑀺.

𑁧𑁨𑁦. 𑀇𑀡𑀫𑀸𑀤𑀸𑀬𑀸𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀓𑀺𑀜𑁆𑀘𑀺 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀦𑀺𑀓𑁆𑀔𑁂𑀧𑀕𑁆𑀕𑀳𑀡𑁂𑀦 𑀯𑀸, 𑀓𑀺𑀜𑁆𑀘𑀺 𑀅𑀦𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀏𑀢𑁆𑀢𑀓𑁂𑀦 𑀓𑀸𑀮𑁂𑀦 𑀏𑀢𑁆𑀢𑀓𑀁 𑀯𑀟𑁆𑀠𑀺𑀁 𑀤𑀲𑁆𑀲𑀸𑀫𑀻’’𑀢𑀺 𑀯𑀟𑁆𑀠𑀺𑀕𑁆𑀕𑀳𑀡𑁂𑀦 𑀯𑀸, ‘‘𑀬𑀁 𑀇𑀢𑁄 𑀉𑀤𑀬𑀁 𑀪𑀯𑀺𑀲𑁆𑀲𑀢𑀺, 𑀢𑀁 𑀫𑀬𑁆𑀳𑀁 𑀫𑀽𑀮𑀁 𑀢𑀯𑁂𑀯 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑀸 ‘‘𑀉𑀤𑀬𑀁 𑀉𑀪𑀺𑀦𑁆𑀦𑀫𑁆𑀧𑀺 𑀲𑀸𑀥𑀸𑀭𑀡’’𑀦𑁆𑀢𑀺 𑀯𑀸 𑀏𑀯𑀁 𑀢𑀁𑀢𑀁𑀆𑀬𑁄𑀕𑀕𑁆𑀕𑀳𑀡𑁂𑀦 𑀯𑀸 𑀇𑀡𑀁 𑀕𑀳𑁂𑀢𑁆𑀯𑀸. 𑀘𑀼𑀚𑁆𑀚𑀫𑀸𑀦𑁄 𑀧𑀮𑀸𑀬𑀢𑀺 𑀦 𑀳𑀺 𑀢𑁂 𑀇𑀡𑀫𑀢𑁆𑀣𑀻𑀢𑀺 𑀢𑁂𑀦 𑀇𑀡𑀸𑀬𑀺𑀓𑁂𑀦 ‘‘𑀤𑁂𑀳𑀺 𑀫𑁂 𑀇𑀡’’𑀦𑁆𑀢𑀺 𑀘𑁄𑀤𑀺𑀬𑀫𑀸𑀦𑁄 ‘‘𑀦 𑀳𑀺 𑀢𑁂 𑀇𑀡𑀫𑀢𑁆𑀣𑀺, 𑀫𑀬𑀸 𑀕𑀳𑀺𑀢𑀦𑁆𑀢𑀺 𑀓𑁄 𑀲𑀓𑁆𑀔𑀻’’𑀢𑀺 𑀏𑀯𑀁 𑀪𑀡𑀦𑁂𑀦 𑀖𑀭𑁂 𑀯𑀲𑀦𑁆𑀢𑁄𑀧𑀺 𑀧𑀮𑀸𑀬𑀢𑀺.

𑁧𑁨𑁧. 𑀓𑀺𑀜𑁆𑀘𑀺𑀓𑁆𑀔𑀓𑀫𑁆𑀬𑀢𑀸𑀢𑀺 𑀅𑀧𑁆𑀧𑀫𑀢𑁆𑀢𑀓𑁂𑀧𑀺 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀇𑀘𑁆𑀙𑀸𑀬. 𑀧𑀦𑁆𑀣𑀲𑁆𑀫𑀺𑀁 𑀯𑀚𑀦𑁆𑀢𑀁 𑀚𑀦𑀦𑁆𑀢𑀺 𑀫𑀕𑁆𑀕𑁂 𑀕𑀘𑁆𑀙𑀦𑁆𑀢𑀁 𑀬𑀁𑀓𑀺𑀜𑁆𑀘𑀺 𑀇𑀢𑁆𑀣𑀺𑀁 𑀯𑀸 𑀧𑀼𑀭𑀺𑀲𑀁 𑀯𑀸. 𑀳𑀦𑁆𑀢𑁆𑀯𑀸 𑀓𑀺𑀜𑁆𑀘𑀺𑀓𑁆𑀔𑀫𑀸𑀤𑁂𑀢𑀻𑀢𑀺 𑀫𑀸𑀭𑁂𑀢𑁆𑀯𑀸 𑀓𑁄𑀝𑁆𑀝𑁂𑀢𑁆𑀯𑀸 𑀢𑀁 𑀪𑀡𑁆𑀟𑀓𑀁 𑀕𑀡𑁆𑀳𑀸𑀢𑀺.

𑁧𑁨𑁨. 𑀅𑀢𑁆𑀢𑀳𑁂𑀢𑀽𑀢𑀺 𑀅𑀢𑁆𑀢𑀦𑁄 𑀚𑀻𑀯𑀺𑀢𑀓𑀸𑀭𑀡𑀸, 𑀢𑀣𑀸 𑀧𑀭𑀳𑁂𑀢𑀼. 𑀥𑀦𑀳𑁂𑀢𑀽𑀢𑀺 𑀲𑀓𑀥𑀦𑀲𑁆𑀲 𑀯𑀸 𑀧𑀭𑀥𑀦𑀲𑁆𑀲 𑀯𑀸 𑀓𑀸𑀭𑀡𑀸. 𑀘-𑀓𑀸𑀭𑁄 𑀲𑀩𑁆𑀩𑀢𑁆𑀣 𑀯𑀺𑀓𑀧𑁆𑀧𑀦𑀢𑁆𑀣𑁄. 𑀲𑀓𑁆𑀔𑀺𑀧𑀼𑀝𑁆𑀞𑁄𑀢𑀺 𑀬𑀁 𑀚𑀸𑀦𑀸𑀲𑀺, 𑀢𑀁 𑀯𑀤𑁂𑀳𑀻𑀢𑀺 𑀧𑀼𑀘𑁆𑀙𑀺𑀢𑁄. 𑀫𑀼𑀲𑀸 𑀩𑁆𑀭𑀽𑀢𑀻𑀢𑀺 𑀚𑀸𑀦𑀦𑁆𑀢𑁄 𑀯𑀸 ‘‘𑀦 𑀚𑀸𑀦𑀸𑀫𑀻’’𑀢𑀺 𑀅𑀚𑀸𑀦𑀦𑁆𑀢𑁄 𑀯𑀸 ‘‘𑀚𑀸𑀦𑀸𑀫𑀻’’𑀢𑀺 𑀪𑀡𑀢𑀺, 𑀲𑀸𑀫𑀺𑀓𑁂 𑀅𑀲𑀸𑀫𑀺𑀓𑁂, 𑀅𑀲𑀸𑀫𑀺𑀓𑁂 𑀘 𑀲𑀸𑀫𑀺𑀓𑁂 𑀓𑀭𑁄𑀢𑀺.

𑁧𑁨𑁩. 𑀜𑀸𑀢𑀻𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑀻𑀦𑀁. 𑀲𑀔𑀻𑀦𑀦𑁆𑀢𑀺 𑀯𑀬𑀲𑁆𑀲𑀸𑀦𑀁 𑀤𑀸𑀭𑁂𑀲𑀽𑀢𑀺 𑀧𑀭𑀧𑀭𑀺𑀕𑁆𑀕𑀳𑀺𑀢𑁂𑀲𑀼. 𑀧𑀝𑀺𑀤𑀺𑀲𑁆𑀲𑀢𑀻𑀢𑀺 𑀧𑀝𑀺𑀓𑀽𑀮𑁂𑀦 𑀤𑀺𑀲𑁆𑀲𑀢𑀺, 𑀅𑀢𑀺𑀘𑀭𑀦𑁆𑀢𑁄 𑀤𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀲𑀸𑀳𑀲𑀸𑀢𑀺 𑀩𑀮𑀓𑁆𑀓𑀸𑀭𑁂𑀦 𑀅𑀦𑀺𑀘𑁆𑀙𑀁. 𑀲𑀫𑁆𑀧𑀺𑀬𑁂𑀦𑀸𑀢𑀺 𑀢𑁂𑀳𑀺 𑀢𑁂𑀲𑀁 𑀤𑀸𑀭𑁂𑀳𑀺 𑀧𑀢𑁆𑀣𑀺𑀬𑀫𑀸𑀦𑁄 𑀲𑀬𑀜𑁆𑀘 𑀧𑀢𑁆𑀣𑀬𑀫𑀸𑀦𑁄, 𑀉𑀪𑀬𑀲𑀺𑀦𑁂𑀳𑀯𑀲𑁂𑀦𑀸𑀧𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁧𑁨𑁪. 𑀫𑀸𑀢𑀭𑀁 𑀧𑀺𑀢𑀭𑀁 𑀯𑀸𑀢𑀺 𑀏𑀯𑀁 𑀫𑁂𑀢𑁆𑀢𑀸𑀬 𑀧𑀤𑀝𑁆𑀞𑀸𑀦𑀪𑀽𑀢𑀫𑁆𑀧𑀺, 𑀚𑀺𑀡𑁆𑀡𑀓𑀁 𑀕𑀢𑀬𑁄𑀩𑁆𑀩𑀦𑀦𑁆𑀢𑀺 𑀏𑀯𑀁 𑀓𑀭𑀼𑀡𑀸𑀬 𑀧𑀤𑀝𑁆𑀞𑀸𑀦𑀪𑀽𑀢𑀫𑁆𑀧𑀺. 𑀧𑀳𑀼 𑀲𑀦𑁆𑀢𑁄 𑀦 𑀪𑀭𑀢𑀻𑀢𑀺 𑀅𑀢𑁆𑀣𑀲𑀫𑁆𑀧𑀦𑁆𑀦𑁄 𑀉𑀧𑀓𑀭𑀡𑀲𑀫𑁆𑀧𑀦𑁆𑀦𑁄 𑀳𑀼𑀢𑁆𑀯𑀸𑀧𑀺 𑀦 𑀧𑁄𑀲𑁂𑀢𑀺.

𑁧𑁨𑁫. 𑀲𑀲𑀼𑀦𑁆𑀢𑀺 𑀲𑀲𑁆𑀲𑀼𑀁. 𑀳𑀦𑁆𑀢𑀻𑀢𑀺 𑀧𑀸𑀡𑀺𑀦𑀸 𑀯𑀸 𑀮𑁂𑀟𑁆𑀟𑀼𑀦𑀸 𑀯𑀸 𑀅𑀜𑁆𑀜𑁂𑀦 𑀯𑀸 𑀓𑁂𑀦𑀘𑀺 𑀧𑀳𑀭𑀢𑀺. 𑀭𑁄𑀲𑁂𑀢𑀻𑀢𑀺 𑀓𑁄𑀥𑀫𑀲𑁆𑀲 𑀲𑀜𑁆𑀚𑀦𑁂𑀢𑀺 𑀯𑀸𑀘𑀸𑀬 𑀨𑀭𑀼𑀲𑀯𑀘𑀦𑁂𑀦.

𑁧𑁨𑁬. 𑀅𑀢𑁆𑀣𑀦𑁆𑀢𑀺 𑀲𑀦𑁆𑀤𑀺𑀝𑁆𑀞𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑁂𑀲𑀼 𑀬𑀁𑀓𑀺𑀜𑁆𑀘𑀺. 𑀧𑀼𑀘𑁆𑀙𑀺𑀢𑁄 𑀲𑀦𑁆𑀢𑁄𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄. 𑀅𑀦𑀢𑁆𑀣𑀫𑀦𑀼𑀲𑀸𑀲𑀢𑀻𑀢𑀺 𑀢𑀲𑁆𑀲 𑀅𑀳𑀺𑀢𑀫𑁂𑀯 𑀆𑀘𑀺𑀓𑁆𑀔𑀢𑀺. 𑀧𑀝𑀺𑀘𑁆𑀙𑀦𑁆𑀦𑁂𑀦 𑀫𑀦𑁆𑀢𑁂𑀢𑀻𑀢𑀺 𑀅𑀢𑁆𑀣𑀁 𑀆𑀘𑀺𑀓𑁆𑀔𑀦𑁆𑀢𑁄𑀧𑀺 𑀬𑀣𑀸 𑀲𑁄 𑀦 𑀚𑀸𑀦𑀸𑀢𑀺, 𑀢𑀣𑀸 𑀅𑀧𑀸𑀓𑀝𑁂𑀳𑀺 𑀧𑀤𑀩𑁆𑀬𑀜𑁆𑀚𑀦𑁂𑀳𑀺 𑀧𑀝𑀺𑀘𑁆𑀙𑀦𑁆𑀦𑁂𑀦 𑀯𑀘𑀦𑁂𑀦 𑀫𑀦𑁆𑀢𑁂𑀢𑀺, 𑀆𑀘𑀭𑀺𑀬𑀫𑀼𑀝𑁆𑀞𑀺𑀁 𑀯𑀸 𑀓𑀢𑁆𑀯𑀸 𑀤𑀻𑀖𑀭𑀢𑁆𑀢𑀁 𑀯𑀲𑀸𑀧𑁂𑀢𑁆𑀯𑀸 𑀲𑀸𑀯𑀲𑁂𑀲𑀫𑁂𑀯 𑀫𑀦𑁆𑀢𑁂𑀢𑀺.

𑁧𑁨𑁭. 𑀬𑁄 𑀓𑀢𑁆𑀯𑀸𑀢𑀺 𑀏𑀢𑁆𑀣 𑀫𑀬𑀸 𑀧𑀼𑀩𑁆𑀩𑀪𑀸𑀕𑁂 𑀧𑀸𑀧𑀺𑀘𑁆𑀙𑀢𑀸 𑀯𑀼𑀢𑁆𑀢𑀸. 𑀬𑀸 𑀲𑀸 ‘‘𑀇𑀥𑁂𑀓𑀘𑁆𑀘𑁄 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸, 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸, 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸, 𑀢𑀲𑁆𑀲 𑀧𑀝𑀺𑀘𑁆𑀙𑀸𑀤𑀦𑀳𑁂𑀢𑀼 𑀧𑀸𑀧𑀺𑀓𑀁 𑀇𑀘𑁆𑀙𑀁 𑀧𑀡𑀺𑀤𑀳𑀢𑀺, 𑀫𑀸 𑀫𑀁 𑀚𑀜𑁆𑀜𑀸𑀢𑀺 𑀇𑀘𑁆𑀙𑀢𑀻’’𑀢𑀺 𑀏𑀯𑀁 𑀆𑀕𑀢𑀸. 𑀬𑀣𑀸 𑀅𑀜𑁆𑀜𑁂 𑀦 𑀚𑀸𑀦𑀦𑁆𑀢𑀺, 𑀢𑀣𑀸 𑀓𑀭𑀡𑁂𑀦 𑀓𑀢𑀸𑀦𑀜𑁆𑀘 𑀅𑀯𑀺𑀯𑀭𑀡𑁂𑀦 𑀧𑀝𑀺𑀘𑁆𑀙𑀦𑁆𑀦𑀸 𑀅𑀲𑁆𑀲 𑀓𑀫𑁆𑀫𑀦𑁆𑀢𑀸𑀢𑀺 𑀧𑀝𑀺𑀘𑁆𑀙𑀦𑁆𑀦𑀓𑀫𑁆𑀫𑀦𑁆𑀢𑁄.

𑁧𑁨𑁮. 𑀧𑀭𑀓𑀼𑀮𑀦𑁆𑀢𑀺 𑀜𑀸𑀢𑀺𑀓𑀼𑀮𑀁 𑀯𑀸 𑀫𑀺𑀢𑁆𑀢𑀓𑀼𑀮𑀁 𑀯𑀸. 𑀆𑀕𑀢𑀦𑁆𑀢𑀺 𑀬𑀲𑁆𑀲 𑀢𑁂𑀦 𑀓𑀼𑀮𑁂 𑀪𑀼𑀢𑁆𑀢𑀁, 𑀢𑀁 𑀅𑀢𑁆𑀢𑀦𑁄 𑀕𑁂𑀳𑀫𑀸𑀕𑀢𑀁 𑀧𑀸𑀦𑀪𑁄𑀚𑀦𑀸𑀤𑀻𑀳𑀺 𑀦𑀧𑁆𑀧𑀝𑀺𑀧𑀽𑀚𑁂𑀢𑀺, 𑀦 𑀯𑀸 𑀤𑁂𑀢𑀺, 𑀅𑀯𑀪𑀼𑀢𑁆𑀢𑀁 𑀯𑀸 𑀤𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁧𑁨𑁯. 𑀬𑁄 𑀩𑁆𑀭𑀸𑀳𑁆𑀫𑀡𑀁 𑀯𑀸𑀢𑀺 𑀧𑀭𑀸𑀪𑀯𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑀫𑁂𑀯.

𑁧𑁩𑁦. 𑀪𑀢𑁆𑀢𑀓𑀸𑀮𑁂 𑀉𑀧𑀝𑁆𑀞𑀺𑀢𑁂𑀢𑀺 𑀪𑁄𑀚𑀦𑀓𑀸𑀮𑁂 𑀚𑀸𑀢𑁂. 𑀉𑀧𑀝𑁆𑀞𑀺𑀢𑀦𑁆𑀢𑀺𑀧𑀺 𑀧𑀸𑀞𑁄, 𑀪𑀢𑁆𑀢𑀓𑀸𑀮𑁂 𑀆𑀕𑀢𑀦𑁆𑀢𑀺 𑀅𑀢𑁆𑀣𑁄. 𑀭𑁄𑀲𑁂𑀢𑀺 𑀯𑀸𑀘𑀸 𑀦 𑀘 𑀤𑁂𑀢𑀻𑀢𑀺 ‘‘𑀅𑀢𑁆𑀣𑀓𑀸𑀫𑁄 𑀫𑁂 𑀅𑀬𑀁 𑀩𑀮𑀓𑁆𑀓𑀸𑀭𑁂𑀦 𑀫𑀁 𑀧𑀼𑀜𑁆𑀜𑀁 𑀓𑀸𑀭𑀸𑀧𑁂𑀢𑀼𑀁 𑀆𑀕𑀢𑁄’’𑀢𑀺 𑀅𑀘𑀺𑀦𑁆𑀢𑁂𑀢𑁆𑀯𑀸 𑀅𑀧𑁆𑀧𑀢𑀺𑀭𑀽𑀧𑁂𑀦 𑀨𑀭𑀼𑀲𑀯𑀘𑀦𑁂𑀦 𑀭𑁄𑀲𑁂𑀢𑀺, 𑀅𑀦𑁆𑀢𑀫𑀲𑁄 𑀲𑀫𑁆𑀫𑀼𑀔𑀪𑀸𑀯𑀫𑀢𑁆𑀢𑀫𑁆𑀧𑀺 𑀘𑀲𑁆𑀲 𑀦 𑀤𑁂𑀢𑀺, 𑀧𑀕𑁂𑀯 𑀪𑁄𑀚𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁧𑁩𑁧. 𑀅𑀲𑀢𑀁 𑀬𑁄𑀥 𑀧𑀩𑁆𑀭𑀽𑀢𑀻𑀢𑀺 𑀬𑁄 𑀇𑀥 𑀬𑀣𑀸 𑀦𑀺𑀫𑀺𑀢𑁆𑀢𑀸𑀦𑀺 𑀤𑀺𑀲𑁆𑀲𑀦𑁆𑀢𑀺 ‘‘𑀅𑀲𑀼𑀓𑀤𑀺𑀯𑀲𑁂 𑀇𑀤𑀜𑁆𑀘𑀺𑀤𑀜𑁆𑀘 𑀢𑁂 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀅𑀲𑀚𑁆𑀚𑀦𑀸𑀦𑀁 𑀯𑀘𑀦𑀁 𑀧𑀩𑁆𑀭𑀽𑀢𑀺. ‘‘𑀅𑀲𑀦𑁆𑀢’’𑀦𑁆𑀢𑀺𑀧𑀺 𑀧𑀸𑀞𑁄, 𑀅𑀪𑀽𑀢𑀦𑁆𑀢𑀺 𑀅𑀢𑁆𑀣𑁄. 𑀧𑀩𑁆𑀭𑀽𑀢𑀻𑀢𑀺 𑀪𑀡𑀢𑀺 ‘‘𑀅𑀫𑀼𑀓𑀲𑁆𑀫𑀺𑀁 𑀦𑀸𑀫 𑀕𑀸𑀫𑁂 𑀫𑀬𑁆𑀳𑀁 𑀈𑀤𑀺𑀲𑁄 𑀖𑀭𑀯𑀺𑀪𑀯𑁄, 𑀏𑀳𑀺 𑀢𑀢𑁆𑀣 𑀕𑀘𑁆𑀙𑀸𑀫, 𑀖𑀭𑀡𑀻 𑀫𑁂 𑀪𑀯𑀺𑀲𑁆𑀲𑀲𑀺, 𑀇𑀤𑀜𑁆𑀘𑀺𑀤𑀜𑁆𑀘 𑀢𑁂 𑀤𑀲𑁆𑀲𑀸𑀫𑀻’’𑀢𑀺 𑀧𑀭𑀪𑀭𑀺𑀬𑀁 𑀧𑀭𑀤𑀸𑀲𑀺𑀁 𑀯𑀸 𑀯𑀜𑁆𑀘𑁂𑀦𑁆𑀢𑁄 𑀥𑀼𑀢𑁆𑀢𑁄 𑀯𑀺𑀬. 𑀦𑀺𑀚𑀺𑀕𑀻𑀲𑀸𑀦𑁄𑀢𑀺 𑀦𑀺𑀚𑀺𑀕𑀻𑀲𑀫𑀸𑀦𑁄 𑀫𑀕𑁆𑀕𑀫𑀸𑀦𑁄, 𑀢𑀁 𑀯𑀜𑁆𑀘𑁂𑀢𑁆𑀯𑀸 𑀬𑀁𑀓𑀺𑀜𑁆𑀘𑀺 𑀕𑀳𑁂𑀢𑁆𑀯𑀸 𑀧𑀮𑀸𑀬𑀺𑀢𑀼𑀓𑀸𑀫𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁧𑁩𑁨. 𑀬𑁄 𑀘𑀢𑁆𑀢𑀸𑀦𑀦𑁆𑀢𑀺 𑀬𑁄 𑀘 𑀅𑀢𑁆𑀢𑀸𑀦𑀁. 𑀲𑀫𑀼𑀓𑁆𑀓𑀁𑀲𑁂𑀢𑀺 𑀚𑀸𑀢𑀺𑀆𑀤𑀻𑀳𑀺 𑀲𑀫𑀼𑀓𑁆𑀓𑀁𑀲𑀢𑀺 𑀉𑀘𑁆𑀘𑀝𑁆𑀞𑀸𑀦𑁂 𑀞𑀧𑁂𑀢𑀺. 𑀧𑀭𑁂 𑀘 𑀫𑀯𑀚𑀸𑀦𑀸𑀢𑀻𑀢𑀺 𑀢𑁂𑀳𑀺𑀬𑁂𑀯 𑀧𑀭𑁂 𑀅𑀯𑀚𑀸𑀦𑀸𑀢𑀺, 𑀦𑀻𑀘𑀁 𑀓𑀭𑁄𑀢𑀺. 𑀫-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄. 𑀦𑀺𑀳𑀻𑀦𑁄𑀢𑀺 𑀕𑀼𑀡𑀯𑀼𑀟𑁆𑀠𑀺𑀢𑁄 𑀧𑀭𑀺𑀳𑀻𑀦𑁄, 𑀅𑀥𑀫𑀪𑀸𑀯𑀁 𑀯𑀸 𑀕𑀢𑁄. 𑀲𑁂𑀦 𑀫𑀸𑀦𑁂𑀦𑀸𑀢𑀺 𑀢𑁂𑀦 𑀉𑀓𑁆𑀓𑀁𑀲𑀦𑀸𑀯𑀚𑀸𑀦𑀦𑀲𑀗𑁆𑀔𑀸𑀢𑁂𑀦 𑀅𑀢𑁆𑀢𑀦𑁄 𑀫𑀸𑀦𑁂𑀦.

𑁧𑁩𑁩. 𑀭𑁄𑀲𑀓𑁄𑀢𑀺 𑀓𑀸𑀬𑀯𑀸𑀘𑀸𑀳𑀺 𑀧𑀭𑁂𑀲𑀁 𑀭𑁄𑀲𑀚𑀦𑀓𑁄. 𑀓𑀤𑀭𑀺𑀬𑁄𑀢𑀺 𑀣𑀤𑁆𑀥𑀫𑀘𑁆𑀙𑀭𑀻, 𑀬𑁄 𑀧𑀭𑁂 𑀧𑀭𑁂𑀲𑀁 𑀤𑁂𑀦𑁆𑀢𑁂 𑀅𑀜𑁆𑀜𑀁 𑀯𑀸 𑀧𑀼𑀜𑁆𑀜𑀁 𑀓𑀭𑁄𑀦𑁆𑀢𑁂 𑀯𑀸𑀭𑁂𑀢𑀺, 𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀧𑀸𑀧𑀺𑀘𑁆𑀙𑁄𑀢𑀺 𑀅𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑀺𑀘𑁆𑀙𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀫𑀘𑁆𑀙𑀭𑀻𑀢𑀺 𑀆𑀯𑀸𑀲𑀸𑀤𑀺𑀫𑀘𑁆𑀙𑀭𑀺𑀬𑀬𑀼𑀢𑁆𑀢𑁄. 𑀲𑀞𑁄𑀢𑀺 𑀅𑀲𑀦𑁆𑀢𑀕𑀼𑀡𑀧𑁆𑀧𑀓𑀸𑀲𑀦𑀮𑀓𑁆𑀔𑀡𑁂𑀦 𑀲𑀸𑀞𑁂𑀬𑁆𑀬𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀅𑀲𑀫𑁆𑀫𑀸𑀪𑀸𑀲𑀻 𑀯𑀸 𑀅𑀓𑀸𑀢𑀼𑀓𑀸𑀫𑁄𑀧𑀺 ‘‘𑀓𑀭𑁄𑀫𑀻’’𑀢𑀺𑀆𑀤𑀺𑀯𑀘𑀦𑁂𑀦. 𑀦𑀸𑀲𑁆𑀲 𑀧𑀸𑀧𑀚𑀺𑀕𑀼𑀘𑁆𑀙𑀦𑀮𑀓𑁆𑀔𑀡𑀸 𑀳𑀺𑀭𑀻, 𑀦𑀸𑀲𑁆𑀲 𑀉𑀢𑁆𑀢𑀸𑀲𑀦𑀢𑁄 𑀉𑀩𑁆𑀩𑁂𑀕𑀮𑀓𑁆𑀔𑀡𑀁 𑀑𑀢𑁆𑀢𑀧𑁆𑀧𑀦𑁆𑀢𑀺 𑀅𑀳𑀺𑀭𑀺𑀓𑁄 𑀅𑀦𑁄𑀢𑁆𑀢𑀧𑁆𑀧𑀻.

𑁧𑁩𑁪. 𑀩𑀼𑀤𑁆𑀥𑀦𑁆𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁. 𑀧𑀭𑀺𑀪𑀸𑀲𑀢𑀻𑀢𑀺 ‘‘𑀅𑀲𑀩𑁆𑀩𑀜𑁆𑀜𑀽’’𑀢𑀺𑀆𑀤𑀻𑀳𑀺 𑀅𑀧𑀯𑀤𑀢𑀺, 𑀲𑀸𑀯𑀓𑀜𑁆𑀘 ‘‘𑀤𑀼𑀧𑁆𑀧𑀝𑀺𑀧𑀦𑁆𑀦𑁄’’𑀢𑀺𑀆𑀤𑀻𑀳𑀺. 𑀧𑀭𑀺𑀩𑁆𑀩𑀸𑀚𑀁 𑀕𑀳𑀝𑁆𑀞𑀁 𑀯𑀸𑀢𑀺 𑀲𑀸𑀯𑀓𑀯𑀺𑀲𑁂𑀲𑀦𑀫𑁂𑀯𑁂𑀢𑀁 𑀧𑀩𑁆𑀩𑀚𑀺𑀢𑀁 𑀯𑀸 𑀢𑀲𑁆𑀲 𑀲𑀸𑀯𑀓𑀁, 𑀕𑀳𑀝𑁆𑀞𑀁 𑀯𑀸 𑀧𑀘𑁆𑀘𑀬𑀤𑀸𑀬𑀓𑀦𑁆𑀢𑀺 𑀅𑀢𑁆𑀣𑁄. 𑀩𑀸𑀳𑀺𑀭𑀓𑀁 𑀯𑀸 𑀧𑀭𑀺𑀩𑁆𑀩𑀸𑀚𑀓𑀁 𑀬𑀁𑀓𑀺𑀜𑁆𑀘𑀺 𑀕𑀳𑀝𑁆𑀞𑀁 𑀯𑀸 𑀅𑀪𑀽𑀢𑁂𑀦 𑀤𑁄𑀲𑁂𑀦 𑀧𑀭𑀺𑀪𑀸𑀲𑀢𑀻𑀢𑀺 𑀏𑀯𑀫𑁆𑀧𑁂𑀢𑁆𑀣 𑀅𑀢𑁆𑀣𑀁 𑀇𑀘𑁆𑀙𑀦𑁆𑀢𑀺 𑀧𑁄𑀭𑀸𑀡𑀸.

𑁧𑁩𑁫. 𑀅𑀦𑀭𑀳𑀁 𑀲𑀦𑁆𑀢𑁄𑀢𑀺 𑀅𑀔𑀻𑀡𑀸𑀲𑀯𑁄 𑀲𑀫𑀸𑀦𑁄. 𑀅𑀭𑀳𑀁 𑀧𑀝𑀺𑀚𑀸𑀦𑀸𑀢𑀻𑀢𑀺 ‘‘𑀅𑀳𑀁 𑀅𑀭𑀳𑀸’’𑀢𑀺 𑀧𑀝𑀺𑀚𑀸𑀦𑀸𑀢𑀺, 𑀬𑀣𑀸 𑀦𑀁 ‘‘𑀅𑀭𑀳𑀸 𑀅𑀬’’𑀦𑁆𑀢𑀺 𑀚𑀸𑀦𑀦𑁆𑀢𑀺, 𑀢𑀣𑀸 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀢𑀺, 𑀓𑀸𑀬𑁂𑀦 𑀧𑀭𑀓𑁆𑀓𑀫𑀢𑀺, 𑀘𑀺𑀢𑁆𑀢𑁂𑀦 𑀇𑀘𑁆𑀙𑀢𑀺 𑀅𑀥𑀺𑀯𑀸𑀲𑁂𑀢𑀺. 𑀘𑁄𑀭𑁄𑀢𑀺 𑀣𑁂𑀦𑁄. 𑀲𑀩𑁆𑀭𑀳𑁆𑀫𑀓𑁂 𑀮𑁄𑀓𑁂𑀢𑀺 𑀉𑀓𑁆𑀓𑀝𑁆𑀞𑀯𑀲𑁂𑀦 𑀆𑀳 𑁋 𑀲𑀩𑁆𑀩𑀮𑁄𑀓𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀮𑁄𑀓𑁂 𑀳𑀺 𑀲𑀦𑁆𑀥𑀺𑀘𑁆𑀙𑁂𑀤𑀦𑀦𑀺𑀮𑁆𑀮𑁄𑀧𑀳𑀭𑀡𑀏𑀓𑀸𑀕𑀸𑀭𑀺𑀓𑀓𑀭𑀡𑀧𑀭𑀺𑀧𑀦𑁆𑀣𑀢𑀺𑀝𑁆𑀞𑀦𑀸𑀤𑀻𑀳𑀺 𑀧𑀭𑁂𑀲𑀁 𑀥𑀦𑀁 𑀯𑀺𑀮𑀼𑀫𑁆𑀧𑀦𑁆𑀢𑀸 𑀘𑁄𑀭𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀲𑀸𑀲𑀦𑁂 𑀧𑀦 𑀧𑀭𑀺𑀲𑀲𑀫𑁆𑀧𑀢𑁆𑀢𑀺𑀆𑀤𑀻𑀳𑀺 𑀧𑀘𑁆𑀘𑀬𑀸𑀤𑀻𑀦𑀺 𑀯𑀺𑀮𑀼𑀫𑁆𑀧𑀦𑁆𑀢𑀸. 𑀬𑀣𑀸𑀳 𑁋

‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀫𑀳𑀸𑀘𑁄𑀭𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀧𑀜𑁆𑀘? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑀲𑁆𑀲 𑀫𑀳𑀸𑀘𑁄𑀭𑀲𑁆𑀲 𑀏𑀯𑀁 𑀳𑁄𑀢𑀺 ‘𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀁 𑀲𑀢𑁂𑀦 𑀯𑀸 𑀲𑀳𑀲𑁆𑀲𑁂𑀦 𑀯𑀸 𑀧𑀭𑀺𑀯𑀼𑀢𑁄 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀻𑀲𑀼 𑀆𑀳𑀺𑀡𑁆𑀟𑀺𑀲𑁆𑀲𑀸𑀫𑀺 𑀳𑀦𑀦𑁆𑀢𑁄, 𑀖𑀸𑀢𑁂𑀦𑁆𑀢𑁄, 𑀙𑀺𑀦𑁆𑀤𑀦𑁆𑀢𑁄, 𑀙𑁂𑀤𑀸𑀧𑁂𑀦𑁆𑀢𑁄, 𑀧𑀘𑀦𑁆𑀢𑁄 𑀧𑀸𑀘𑁂𑀦𑁆𑀢𑁄𑀢𑀺, 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀲𑀢𑁂𑀦 𑀯𑀸 𑀲𑀳𑀲𑁆𑀲𑁂𑀦 𑀯𑀸 𑀧𑀭𑀺𑀯𑀼𑀢𑁄 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀻𑀲𑀼 𑀆𑀳𑀺𑀡𑁆𑀟𑀢𑀺 𑀳𑀦𑀦𑁆𑀢𑁄…𑀧𑁂… 𑀧𑀸𑀘𑁂𑀦𑁆𑀢𑁄. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑀲𑁆𑀲 𑀧𑀸𑀧𑀪𑀺𑀓𑁆𑀔𑀼𑀦𑁄 𑀏𑀯𑀁 𑀳𑁄𑀢𑀺 ‘𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀁 𑀲𑀢𑁂𑀦 𑀯𑀸…𑀧𑁂… 𑀭𑀸𑀚𑀥𑀸𑀦𑀻𑀲𑀼 𑀘𑀸𑀭𑀺𑀓𑀁 𑀘𑀭𑀺𑀲𑁆𑀲𑀸𑀫𑀺 𑀲𑀓𑁆𑀓𑀢𑁄, 𑀕𑀭𑀼𑀓𑀢𑁄, 𑀫𑀸𑀦𑀺𑀢𑁄, 𑀧𑀽𑀚𑀺𑀢𑁄, 𑀅𑀧𑀘𑀺𑀢𑁄, 𑀕𑀳𑀝𑁆𑀞𑀸𑀦𑀜𑁆𑀘𑁂𑀯 𑀧𑀩𑁆𑀩𑀚𑀺𑀢𑀸𑀦𑀜𑁆𑀘 𑀮𑀸𑀪𑀻 𑀘𑀻𑀯𑀭…𑀧𑁂… 𑀧𑀭𑀺𑀓𑁆𑀔𑀸𑀭𑀸𑀦’𑀦𑁆𑀢𑀺. 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀲𑀢𑁂𑀦 𑀯𑀸 𑀲𑀳𑀲𑁆𑀲𑁂𑀦 𑀯𑀸 𑀧𑀭𑀺𑀯𑀼𑀢𑁄 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀻𑀲𑀼 𑀘𑀸𑀭𑀺𑀓𑀁 𑀘𑀭𑀢𑀺 𑀲𑀓𑁆𑀓𑀢𑁄…𑀧𑁂… 𑀧𑀭𑀺𑀓𑁆𑀔𑀸𑀭𑀸𑀦𑀁. 𑀅𑀬𑀁, 𑀪𑀺𑀓𑁆𑀔𑀯𑁂, 𑀧𑀞𑀫𑁄 𑀫𑀳𑀸𑀘𑁄𑀭𑁄 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑁄 𑀮𑁄𑀓𑀲𑁆𑀫𑀺𑀁.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀧𑀸𑀧𑀪𑀺𑀓𑁆𑀔𑀼 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀁 𑀥𑀫𑁆𑀫𑀯𑀺𑀦𑀬𑀁 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸 𑀅𑀢𑁆𑀢𑀦𑁄 𑀤𑀳𑀢𑀺, 𑀅𑀬𑀁, 𑀪𑀺𑀓𑁆𑀔𑀯𑁂, 𑀤𑀼𑀢𑀺𑀬𑁄…𑀧𑁂… 𑀮𑁄𑀓𑀲𑁆𑀫𑀺𑀁.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀧𑀸𑀧𑀪𑀺𑀓𑁆𑀔𑀼 𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀸𑀭𑀺𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀁 𑀅𑀫𑀽𑀮𑀓𑁂𑀦 𑀅𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀅𑀦𑀼𑀤𑁆𑀥𑀁𑀲𑁂𑀢𑀺. 𑀅𑀬𑀁, 𑀪𑀺𑀓𑁆𑀔𑀯𑁂, 𑀢𑀢𑀺𑀬𑁄…𑀧𑁂… 𑀮𑁄𑀓𑀲𑁆𑀫𑀺𑀁.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄, 𑀧𑀸𑀧𑀪𑀺𑀓𑁆𑀔𑀼 𑀬𑀸𑀦𑀺 𑀢𑀸𑀦𑀺 𑀲𑀗𑁆𑀖𑀲𑁆𑀲 𑀕𑀭𑀼𑀪𑀡𑁆𑀟𑀸𑀦𑀺 𑀕𑀭𑀼𑀧𑀭𑀺𑀓𑁆𑀔𑀸𑀭𑀸𑀦𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀆𑀭𑀸𑀫𑁄, 𑀆𑀭𑀸𑀫𑀯𑀢𑁆𑀣𑀼, 𑀯𑀺𑀳𑀸𑀭𑁄, 𑀯𑀺𑀳𑀸𑀭𑀯𑀢𑁆𑀣𑀼, 𑀫𑀜𑁆𑀘𑁄, 𑀧𑀻𑀞𑀁, 𑀪𑀺𑀲𑀺, 𑀩𑀺𑀫𑁆𑀩𑁄𑀳𑀦𑀁, 𑀮𑁄𑀳𑀓𑀼𑀫𑁆𑀪𑀻, 𑀮𑁄𑀳𑀪𑀸𑀡𑀓𑀁, 𑀮𑁄𑀳𑀯𑀸𑀭𑀓𑁄, 𑀮𑁄𑀳𑀓𑀝𑀸𑀳𑀁, 𑀯𑀸𑀲𑀺, 𑀨𑀭𑀲𑀼, 𑀓𑀼𑀞𑀸𑀭𑀻, 𑀓𑀼𑀤𑀸𑀮𑁄, 𑀦𑀺𑀔𑀸𑀤𑀦𑀁, 𑀯𑀮𑁆𑀮𑀺, 𑀯𑁂𑀴𑀼, 𑀫𑀼𑀜𑁆𑀚𑀁, 𑀧𑀩𑁆𑀩𑀚𑀁, 𑀢𑀺𑀡𑀁, 𑀫𑀢𑁆𑀢𑀺𑀓𑀸, 𑀤𑀸𑀭𑀼𑀪𑀡𑁆𑀟𑀁, 𑀫𑀢𑁆𑀢𑀺𑀓𑀸𑀪𑀡𑁆𑀟𑀁, 𑀢𑁂𑀳𑀺 𑀕𑀺𑀳𑀺𑀁 𑀲𑀗𑁆𑀕𑀡𑁆𑀳𑀸𑀢𑀺 𑀉𑀧𑀮𑀸𑀧𑁂𑀢𑀺. 𑀅𑀬𑀁, 𑀪𑀺𑀓𑁆𑀔𑀯𑁂, 𑀘𑀢𑀼𑀢𑁆𑀣𑁄…𑀧𑁂… 𑀮𑁄𑀓𑀲𑁆𑀫𑀺𑀁.

‘‘𑀲𑀤𑁂𑀯𑀓𑁂, 𑀪𑀺𑀓𑁆𑀔𑀯𑁂, 𑀮𑁄𑀓𑁂…𑀧𑁂… 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀅𑀬𑀁 𑀅𑀕𑁆𑀕𑁄 𑀫𑀳𑀸𑀘𑁄𑀭𑁄, 𑀬𑁄 𑀅𑀲𑀦𑁆𑀢𑀁 𑀅𑀪𑀽𑀢𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀉𑀮𑁆𑀮𑀧𑀢𑀻’’𑀢𑀺 (𑀧𑀸𑀭𑀸. 𑁧𑁯𑁫).

𑀢𑀢𑁆𑀣 𑀮𑁄𑀓𑀺𑀬𑀘𑁄𑀭𑀸 𑀮𑁄𑀓𑀺𑀬𑀫𑁂𑀯 𑀥𑀦𑀥𑀜𑁆𑀜𑀸𑀤𑀺𑀁 𑀣𑁂𑀦𑁂𑀦𑁆𑀢𑀺. 𑀲𑀸𑀲𑀦𑁂 𑀯𑀼𑀢𑁆𑀢𑀘𑁄𑀭𑁂𑀲𑀼 𑀧𑀞𑀫𑁄 𑀢𑀣𑀸𑀭𑀽𑀧𑀫𑁂𑀯 𑀘𑀻𑀯𑀭𑀸𑀤𑀺𑀧𑀘𑁆𑀘𑀬𑀫𑀢𑁆𑀢𑀁, 𑀤𑀼𑀢𑀺𑀬𑁄 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀁, 𑀢𑀢𑀺𑀬𑁄 𑀧𑀭𑀲𑁆𑀲 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀘𑀢𑀼𑀢𑁆𑀣𑁄 𑀲𑀗𑁆𑀖𑀺𑀓𑀕𑀭𑀼𑀪𑀡𑁆𑀟𑀁, 𑀧𑀜𑁆𑀘𑀫𑁄 𑀛𑀸𑀦𑀲𑀫𑀸𑀥𑀺𑀲𑀫𑀸𑀧𑀢𑁆𑀢𑀺𑀫𑀕𑁆𑀕𑀨𑀮𑀧𑁆𑀧𑀪𑁂𑀤𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀕𑀼𑀡𑀥𑀦𑀁, 𑀮𑁄𑀓𑀺𑀬𑀜𑁆𑀘 𑀘𑀻𑀯𑀭𑀸𑀤𑀺𑀧𑀘𑁆𑀘𑀬𑀚𑀸𑀢𑀁. 𑀬𑀣𑀸𑀳 𑁋 ‘‘𑀣𑁂𑀬𑁆𑀬𑀸𑀬 𑀯𑁄, 𑀪𑀺𑀓𑁆𑀔𑀯𑁂, 𑀭𑀝𑁆𑀞𑀧𑀺𑀡𑁆𑀟𑁄 𑀪𑀼𑀢𑁆𑀢𑁄’’𑀢𑀺. 𑀢𑀢𑁆𑀣 𑀬𑁆𑀯𑀸𑀬𑀁 𑀧𑀜𑁆𑀘𑀫𑁄 𑀫𑀳𑀸𑀘𑁄𑀭𑁄, 𑀢𑀁 𑀲𑀦𑁆𑀥𑀸𑀬𑀸𑀳 𑀪𑀕𑀯𑀸 ‘‘𑀘𑁄𑀭𑁄 𑀲𑀩𑁆𑀭𑀳𑁆𑀫𑀓𑁂 𑀮𑁄𑀓𑁂’’𑀢𑀺. 𑀲𑁄 𑀳𑀺 ‘‘𑀲𑀤𑁂𑀯𑀓𑁂, 𑀪𑀺𑀓𑁆𑀔𑀯𑁂, 𑀮𑁄𑀓𑁂…𑀧𑁂… 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀅𑀬𑀁 𑀅𑀕𑁆𑀕𑁄 𑀫𑀳𑀸𑀘𑁄𑀭𑁄, 𑀬𑁄 𑀅𑀲𑀦𑁆𑀢𑀁 𑀅𑀪𑀽𑀢𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀉𑀮𑁆𑀮𑀧𑀢𑀻’’𑀢𑀺 (𑀧𑀸𑀭𑀸. 𑁧𑁯𑁫) 𑀏𑀯𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀥𑀦𑀣𑁂𑀦𑀦𑀢𑁄 𑀅𑀕𑁆𑀕𑁄 𑀫𑀳𑀸𑀘𑁄𑀭𑁄𑀢𑀺 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀢𑀁 𑀇𑀥𑀸𑀧𑀺 ‘‘𑀲𑀩𑁆𑀭𑀳𑁆𑀫𑀓𑁂 𑀮𑁄𑀓𑁂’’𑀢𑀺 𑀇𑀫𑀺𑀦𑀸 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁂𑀦 𑀧𑀓𑀸𑀲𑁂𑀲𑀺.

𑀏𑀲𑁄 𑀔𑁄 𑀯𑀲𑀮𑀸𑀥𑀫𑁄𑀢𑀺. 𑀏𑀢𑁆𑀣 𑀔𑁄𑀢𑀺 𑀅𑀯𑀥𑀸𑀭𑀡𑀢𑁆𑀣𑁄, 𑀢𑁂𑀦 𑀏𑀲𑁄 𑀏𑀯 𑀯𑀲𑀮𑀸𑀥𑀫𑁄. 𑀯𑀲𑀮𑀸𑀦𑀁 𑀳𑀻𑀦𑁄 𑀲𑀩𑁆𑀩𑀧𑀘𑁆𑀙𑀺𑀫𑀓𑁄𑀢𑀺 𑀅𑀯𑀥𑀸𑀭𑁂𑀢𑀺. 𑀓𑀲𑁆𑀫𑀸? 𑀯𑀺𑀲𑀺𑀝𑁆𑀞𑀯𑀢𑁆𑀣𑀼𑀫𑁆𑀳𑀺 𑀣𑁂𑀬𑁆𑀬𑀥𑀫𑁆𑀫𑀯𑀲𑁆𑀲𑀦𑀢𑁄, 𑀬𑀸𑀯 𑀢𑀁 𑀧𑀝𑀺𑀜𑁆𑀜𑀁 𑀦 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀢𑀸𑀯 𑀅𑀯𑀺𑀕𑀢𑀯𑀲𑀮𑀓𑀭𑀡𑀥𑀫𑁆𑀫𑀢𑁄 𑀘𑀸𑀢𑀺.

𑀏𑀢𑁂 𑀔𑁄 𑀯𑀲𑀮𑀸𑀢𑀺. 𑀇𑀤𑀸𑀦𑀺 𑀬𑁂 𑀢𑁂 𑀧𑀞𑀫𑀕𑀸𑀣𑀸𑀬 𑀆𑀲𑀬𑀯𑀺𑀧𑀢𑁆𑀢𑀺𑀯𑀲𑁂𑀦 𑀓𑁄𑀥𑀦𑀸𑀤𑀬𑁄 𑀧𑀜𑁆𑀘, 𑀧𑀸𑀧𑀫𑀓𑁆𑀔𑀺𑀁 𑀯𑀸 𑀤𑁆𑀯𑀺𑀥𑀸 𑀓𑀢𑁆𑀯𑀸 𑀙, 𑀤𑀼𑀢𑀺𑀬𑀕𑀸𑀣𑀸𑀬 𑀧𑀬𑁄𑀕𑀯𑀺𑀧𑀢𑁆𑀢𑀺𑀯𑀲𑁂𑀦 𑀧𑀸𑀡𑀳𑀺𑀁𑀲𑀓𑁄 𑀏𑀓𑁄, 𑀢𑀢𑀺𑀬𑀸𑀬 𑀧𑀬𑁄𑀕𑀯𑀺𑀧𑀢𑁆𑀢𑀺𑀯𑀲𑁂𑀦𑁂𑀯 𑀕𑀸𑀫𑀦𑀺𑀕𑀫𑀦𑀺𑀕𑁆𑀕𑀸𑀳𑀓𑁄 𑀏𑀓𑁄, 𑀘𑀢𑀼𑀢𑁆𑀣𑀸𑀬 𑀣𑁂𑀬𑁆𑀬𑀸𑀯𑀳𑀸𑀭𑀯𑀲𑁂𑀦 𑀏𑀓𑁄, 𑀧𑀜𑁆𑀘𑀫𑀸𑀬 𑀇𑀡𑀯𑀜𑁆𑀘𑀦𑀯𑀲𑁂𑀦 𑀏𑀓𑁄, 𑀙𑀝𑁆𑀞𑀸𑀬 𑀧𑀲𑀬𑁆𑀳𑀸𑀯𑀳𑀸𑀭𑀯𑀲𑁂𑀦 𑀧𑀦𑁆𑀣𑀤𑀽𑀲𑀓𑁄 𑀏𑀓𑁄, 𑀲𑀢𑁆𑀢𑀫𑀸𑀬 𑀓𑀽𑀝𑀲𑀓𑁆𑀔𑀺𑀯𑀲𑁂𑀦 𑀏𑀓𑁄, 𑀅𑀝𑁆𑀞𑀫𑀸𑀬 𑀫𑀺𑀢𑁆𑀢𑀤𑀼𑀩𑁆𑀪𑀺𑀯𑀲𑁂𑀦 𑀏𑀓𑁄, 𑀦𑀯𑀫𑀸𑀬 𑀅𑀓𑀢𑀜𑁆𑀜𑀼𑀯𑀲𑁂𑀦 𑀏𑀓𑁄, 𑀤𑀲𑀫𑀸𑀬 𑀓𑀢𑀦𑀸𑀲𑀦𑀯𑀺𑀳𑁂𑀲𑀦𑀯𑀲𑁂𑀦 𑀏𑀓𑁄, 𑀏𑀓𑀸𑀤𑀲𑀫𑀸𑀬 𑀳𑀤𑀬𑀯𑀜𑁆𑀘𑀦𑀯𑀲𑁂𑀦 𑀏𑀓𑁄, 𑀤𑁆𑀯𑀸𑀤𑀲𑀫𑀸𑀬 𑀧𑀝𑀺𑀘𑁆𑀙𑀦𑁆𑀦𑀓𑀫𑁆𑀫𑀦𑁆𑀢𑀯𑀲𑁂𑀦 𑀤𑁆𑀯𑁂, 𑀢𑁂𑀭𑀲𑀫𑀸𑀬 𑀅𑀓𑀢𑀜𑁆𑀜𑀼𑀯𑀲𑁂𑀦 𑀏𑀓𑁄, 𑀘𑀼𑀤𑁆𑀤𑀲𑀫𑀸𑀬 𑀯𑀜𑁆𑀘𑀦𑀯𑀲𑁂𑀦 𑀏𑀓𑁄, 𑀧𑀦𑁆𑀦𑀭𑀲𑀫𑀸𑀬 𑀯𑀺𑀳𑁂𑀲𑀦𑀯𑀲𑁂𑀦 𑀏𑀓𑁄, 𑀲𑁄𑀴𑀲𑀫𑀸𑀬 𑀯𑀜𑁆𑀘𑀦𑀯𑀲𑁂𑀦 𑀏𑀓𑁄, 𑀲𑀢𑁆𑀢𑀭𑀲𑀫𑀸𑀬 𑀅𑀢𑁆𑀢𑀼𑀓𑁆𑀓𑀁𑀲𑀦𑀧𑀭𑀯𑀫𑁆𑀪𑀦𑀯𑀲𑁂𑀦 𑀤𑁆𑀯𑁂, 𑀅𑀝𑁆𑀞𑀸𑀭𑀲𑀫𑀸𑀬 𑀧𑀬𑁄𑀕𑀸𑀲𑀬𑀯𑀺𑀧𑀢𑁆𑀢𑀺𑀯𑀲𑁂𑀦 𑀭𑁄𑀲𑀓𑀸𑀤𑀬𑁄 𑀲𑀢𑁆𑀢, 𑀏𑀓𑀽𑀦𑀯𑀻𑀲𑀢𑀺𑀫𑀸𑀬 𑀧𑀭𑀺𑀪𑀸𑀲𑀦𑀯𑀲𑁂𑀦 𑀤𑁆𑀯𑁂, 𑀯𑀻𑀲𑀢𑀺𑀫𑀸𑀬 𑀅𑀕𑁆𑀕𑀫𑀳𑀸𑀘𑁄𑀭𑀯𑀲𑁂𑀦 𑀏𑀓𑁄𑀢𑀺 𑀏𑀯𑀁 𑀢𑁂𑀢𑁆𑀢𑀺𑀁𑀲 𑀘𑀢𑀼𑀢𑁆𑀢𑀺𑀁𑀲 𑀯𑀸 𑀯𑀲𑀮𑀸 𑀯𑀼𑀢𑁆𑀢𑀸. 𑀢𑁂 𑀦𑀺𑀤𑁆𑀤𑀺𑀲𑀦𑁆𑀢𑁄 𑀆𑀳 ‘‘𑀏𑀢𑁂 𑀔𑁄 𑀯𑀲𑀮𑀸 𑀯𑀼𑀢𑁆𑀢𑀸, 𑀫𑀬𑀸 𑀬𑁂 𑀢𑁂 𑀧𑀓𑀸𑀲𑀺𑀢𑀸’’𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀬𑁂 𑀢𑁂 𑀫𑀬𑀸 𑀧𑀼𑀩𑁆𑀩𑁂 ‘‘𑀚𑀸𑀦𑀸𑀲𑀺 𑀧𑀦 𑀢𑁆𑀯𑀁, 𑀩𑁆𑀭𑀸𑀳𑁆𑀫𑀡, 𑀯𑀲𑀮’’𑀦𑁆𑀢𑀺 𑀏𑀯𑀁 𑀲𑀗𑁆𑀔𑁂𑀧𑀢𑁄 𑀯𑀲𑀮𑀸 𑀯𑀼𑀢𑁆𑀢𑀸, 𑀢𑁂 𑀯𑀺𑀢𑁆𑀣𑀸𑀭𑀢𑁄 𑀏𑀢𑁂 𑀔𑁄 𑀧𑀓𑀸𑀲𑀺𑀢𑀸𑀢𑀺. 𑀅𑀣 𑀯𑀸 𑀬𑁂 𑀢𑁂 𑀫𑀬𑀸 𑀧𑀼𑀕𑁆𑀕𑀮𑀯𑀲𑁂𑀦 𑀯𑀼𑀢𑁆𑀢𑀸, 𑀢𑁂 𑀥𑀫𑁆𑀫𑀯𑀲𑁂𑀦𑀸𑀧𑀺 𑀏𑀢𑁂 𑀔𑁄 𑀧𑀓𑀸𑀲𑀺𑀢𑀸. 𑀅𑀣 𑀯𑀸 𑀏𑀢𑁂 𑀔𑁄 𑀯𑀲𑀮𑀸 𑀯𑀼𑀢𑁆𑀢𑀸 𑀅𑀭𑀺𑀬𑁂𑀳𑀺 𑀓𑀫𑁆𑀫𑀯𑀲𑁂𑀦, 𑀦 𑀚𑀸𑀢𑀺𑀯𑀲𑁂𑀦, 𑀫𑀬𑀸 𑀬𑁂 𑀢𑁂 𑀧𑀓𑀸𑀲𑀺𑀢𑀸 ‘‘𑀓𑁄𑀥𑀦𑁄 𑀉𑀧𑀦𑀸𑀳𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦.

𑁧𑁩𑁬. 𑀏𑀯𑀁 𑀪𑀕𑀯𑀸 𑀯𑀲𑀮𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑀲𑁆𑀫𑀸 𑀩𑁆𑀭𑀸𑀳𑁆𑀫𑀡𑁄 𑀲𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀢𑀻𑀯 𑀅𑀪𑀺𑀦𑀺𑀯𑀺𑀝𑁆𑀞𑁄 𑀳𑁄𑀢𑀺, 𑀢𑀲𑁆𑀫𑀸 𑀢𑀁 𑀤𑀺𑀝𑁆𑀞𑀺𑀁 𑀧𑀝𑀺𑀲𑁂𑀥𑁂𑀦𑁆𑀢𑁄 𑀆𑀳 ‘‘𑀦 𑀚𑀘𑁆𑀘𑀸 𑀯𑀲𑀮𑁄 𑀳𑁄𑀢𑀻’’𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀧𑀭𑀫𑀢𑁆𑀣𑀢𑁄 𑀳𑀺 𑀦 𑀚𑀘𑁆𑀘𑀸 𑀯𑀲𑀮𑁄 𑀳𑁄𑀢𑀺, 𑀦 𑀚𑀘𑁆𑀘𑀸 𑀳𑁄𑀢𑀺 𑀩𑁆𑀭𑀸𑀳𑁆𑀫𑀡𑁄, 𑀅𑀧𑀺𑀘 𑀔𑁄 𑀓𑀫𑁆𑀫𑀼𑀦𑀸 𑀯𑀲𑀮𑁄 𑀳𑁄𑀢𑀺, 𑀓𑀫𑁆𑀫𑀼𑀦𑀸 𑀳𑁄𑀢𑀺 𑀩𑁆𑀭𑀸𑀳𑁆𑀫𑀡𑁄, 𑀅𑀧𑀭𑀺𑀲𑀼𑀤𑁆𑀥𑀓𑀫𑁆𑀫𑀯𑀲𑁆𑀲𑀦𑀢𑁄 𑀯𑀲𑀮𑁄 𑀳𑁄𑀢𑀺, 𑀧𑀭𑀺𑀲𑀼𑀤𑁆𑀥𑁂𑀦 𑀓𑀫𑁆𑀫𑀼𑀦𑀸 𑀅𑀧𑀭𑀺𑀲𑀼𑀤𑁆𑀥𑀯𑀸𑀳𑀦𑀢𑁄 𑀩𑁆𑀭𑀸𑀳𑁆𑀫𑀡𑁄 𑀳𑁄𑀢𑀺. 𑀬𑀲𑁆𑀫𑀸 𑀯𑀸 𑀢𑀼𑀫𑁆𑀳𑁂 𑀳𑀻𑀦𑀁 𑀯𑀲𑀮𑀁 𑀉𑀓𑁆𑀓𑀝𑁆𑀞𑀁 𑀩𑁆𑀭𑀸𑀳𑁆𑀫𑀡𑀁 𑀫𑀜𑁆𑀜𑀺𑀢𑁆𑀣, 𑀢𑀲𑁆𑀫𑀸 𑀳𑀻𑀦𑁂𑀦 𑀓𑀫𑁆𑀫𑀼𑀦𑀸 𑀯𑀲𑀮𑁄 𑀳𑁄𑀢𑀺, 𑀉𑀓𑁆𑀓𑀝𑁆𑀞𑁂𑀦 𑀓𑀫𑁆𑀫𑀼𑀦𑀸 𑀩𑁆𑀭𑀸𑀳𑁆𑀫𑀡𑁄 𑀳𑁄𑀢𑀻𑀢𑀺 𑀏𑀯𑀫𑁆𑀧𑀺 𑀅𑀢𑁆𑀣𑀁 𑀜𑀸𑀧𑁂𑀦𑁆𑀢𑁄 𑀏𑀯𑀫𑀸𑀳.

𑁧𑁩𑁭-𑁧𑁩𑁯. 𑀇𑀤𑀸𑀦𑀺 𑀢𑀫𑁂𑀯𑀢𑁆𑀣𑀁 𑀦𑀺𑀤𑀲𑁆𑀲𑀦𑁂𑀦 𑀲𑀸𑀥𑁂𑀢𑀼𑀁 ‘‘𑀢𑀤𑀫𑀺𑀦𑀸𑀧𑀺 𑀚𑀸𑀦𑀸𑀣𑀸’’𑀢𑀺𑀆𑀤𑀺𑀓𑀸 𑀢𑀺𑀲𑁆𑀲𑁄 𑀕𑀸𑀣𑀸𑀬𑁄 𑀆𑀳. 𑀢𑀸𑀲𑀼 𑀤𑁆𑀯𑁂 𑀘𑀢𑀼𑀧𑁆𑀧𑀸𑀤𑀸, 𑀏𑀓𑀸 𑀙𑀧𑁆𑀧𑀸𑀤𑀸, 𑀢𑀸𑀲𑀁 𑀅𑀢𑁆𑀣𑁄 𑁋 𑀬𑀁 𑀫𑀬𑀸 𑀯𑀼𑀢𑁆𑀢𑀁 ‘‘𑀦 𑀚𑀘𑁆𑀘𑀸 𑀯𑀲𑀮𑁄 𑀳𑁄𑀢𑀻’’𑀢𑀺𑀆𑀤𑀺, 𑀢𑀤𑀫𑀺𑀦𑀸𑀧𑀺 𑀚𑀸𑀦𑀸𑀣, 𑀬𑀣𑀸 𑀫𑁂𑀤𑀁 𑀦𑀺𑀤𑀲𑁆𑀲𑀦𑀁, 𑀢𑀁 𑀇𑀫𑀺𑀦𑀸𑀧𑀺 𑀧𑀓𑀸𑀭𑁂𑀦 𑀚𑀸𑀦𑀸𑀣, 𑀬𑁂𑀦 𑀫𑁂 𑀧𑀓𑀸𑀭𑁂𑀦 𑀬𑁂𑀦 𑀲𑀸𑀫𑀜𑁆𑀜𑁂𑀦 𑀇𑀤𑀁 𑀦𑀺𑀤𑀲𑁆𑀲𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀢𑀫𑀁 𑀦𑀺𑀤𑀲𑁆𑀲𑀦𑀦𑁆𑀢𑀺 𑀘𑁂? 𑀘𑀡𑁆𑀟𑀸𑀮𑀧𑀼𑀢𑁆𑀢𑁄 𑀲𑁄𑀧𑀸𑀓𑁄…𑀧𑁂… 𑀩𑁆𑀭𑀳𑁆𑀫𑀮𑁄𑀓𑀽𑀧𑀧𑀢𑁆𑀢𑀺𑀬𑀸𑀢𑀺.

𑀘𑀡𑁆𑀟𑀸𑀮𑀲𑁆𑀲 𑀧𑀼𑀢𑁆𑀢𑁄 𑀘𑀡𑁆𑀟𑀸𑀮𑀧𑀼𑀢𑁆𑀢𑁄. 𑀅𑀢𑁆𑀢𑀦𑁄 𑀔𑀸𑀤𑀦𑀢𑁆𑀣𑀸𑀬 𑀫𑀢𑁂 𑀲𑀼𑀦𑀔𑁂 𑀮𑀪𑀺𑀢𑁆𑀯𑀸 𑀧𑀘𑀢𑀻𑀢𑀺 𑀲𑁄𑀧𑀸𑀓𑁄. 𑀫𑀸𑀢𑀗𑁆𑀕𑁄𑀢𑀺 𑀏𑀯𑀁𑀦𑀸𑀫𑁄 𑀯𑀺𑀲𑁆𑀲𑀼𑀢𑁄𑀢𑀺 𑀏𑀯𑀁 𑀳𑀻𑀦𑀸𑀬 𑀚𑀸𑀢𑀺𑀬𑀸 𑀘 𑀚𑀻𑀯𑀺𑀓𑀸𑀬 𑀘 𑀦𑀸𑀫𑁂𑀦 𑀘 𑀧𑀸𑀓𑀝𑁄.

𑀲𑁄𑀢𑀺 𑀧𑀼𑀭𑀺𑀫𑀧𑀤𑁂𑀦 𑀲𑀫𑁆𑀩𑀦𑁆𑀥𑀺𑀢𑁆𑀯𑀸 𑀲𑁄 𑀫𑀸𑀢𑀗𑁆𑀕𑁄 𑀬𑀲𑀁 𑀧𑀭𑀫𑀁 𑀧𑀢𑁆𑀢𑁄, 𑀅𑀩𑁆𑀪𑀼𑀢𑀁 𑀉𑀢𑁆𑀢𑀫𑀁 𑀅𑀢𑀺𑀯𑀺𑀲𑀺𑀝𑁆𑀞𑀁 𑀬𑀲𑀁 𑀓𑀺𑀢𑁆𑀢𑀺𑀁 𑀧𑀲𑀁𑀲𑀁 𑀧𑀢𑁆𑀢𑁄. 𑀬𑀁 𑀲𑀼𑀤𑀼𑀮𑁆𑀮𑀪𑀦𑁆𑀢𑀺 𑀬𑀁 𑀉𑀴𑀸𑀭𑀓𑀼𑀮𑀽𑀧𑀧𑀦𑁆𑀦𑁂𑀦𑀸𑀧𑀺 𑀤𑀼𑀮𑁆𑀮𑀪𑀁, 𑀳𑀻𑀦𑀓𑀼𑀮𑀽𑀧𑀧𑀦𑁆𑀦𑁂𑀦 𑀲𑀼𑀤𑀼𑀮𑁆𑀮𑀪𑀁. 𑀏𑀯𑀁 𑀬𑀲𑀧𑁆𑀧𑀢𑁆𑀢𑀲𑁆𑀲 𑀘 𑀆𑀕𑀘𑁆𑀙𑀼𑀁 𑀢𑀲𑁆𑀲𑀼𑀧𑀝𑁆𑀞𑀸𑀦𑀁, 𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀩𑀳𑀽, 𑀢𑀲𑁆𑀲 𑀫𑀸𑀢𑀗𑁆𑀕𑀲𑁆𑀲 𑀧𑀸𑀭𑀺𑀘𑀭𑀺𑀬𑀢𑁆𑀣𑀁 𑀔𑀢𑁆𑀢𑀺𑀬𑀸 𑀘 𑀩𑁆𑀭𑀸𑀳𑁆𑀫𑀡𑀸 𑀘 𑀅𑀜𑁆𑀜𑁂 𑀘 𑀩𑀳𑀽 𑀯𑁂𑀲𑁆𑀲𑀲𑀼𑀤𑁆𑀤𑀸𑀤𑀬𑁄 𑀚𑀫𑁆𑀩𑀼𑀤𑀻𑀧𑀫𑀦𑀼𑀲𑁆𑀲𑀸 𑀬𑁂𑀪𑀼𑀬𑁆𑀬𑁂𑀦 𑀉𑀧𑀝𑁆𑀞𑀸𑀦𑀁 𑀆𑀕𑀫𑀺𑀁𑀲𑀽𑀢𑀺 𑀅𑀢𑁆𑀣𑁄.

𑀏𑀯𑀁 𑀉𑀧𑀝𑁆𑀞𑀸𑀦𑀲𑀫𑁆𑀧𑀦𑁆𑀦𑁄 𑀲𑁄 𑀫𑀸𑀢𑀗𑁆𑀕𑁄 𑀯𑀺𑀕𑀢𑀓𑀺𑀮𑁂𑀲𑀭𑀚𑀢𑁆𑀢𑀸 𑀯𑀺𑀭𑀚𑀁, 𑀫𑀳𑀦𑁆𑀢𑁂𑀳𑀺 𑀩𑀼𑀤𑁆𑀥𑀸𑀤𑀻𑀳𑀺 𑀧𑀝𑀺𑀧𑀦𑁆𑀦𑀢𑁆𑀢𑀸 𑀫𑀳𑀸𑀧𑀣𑀁, 𑀩𑁆𑀭𑀳𑁆𑀫𑀮𑁄𑀓𑀲𑀗𑁆𑀔𑀸𑀢𑀁 𑀤𑁂𑀯𑀮𑁄𑀓𑀁 𑀬𑀸𑀧𑁂𑀢𑀼𑀁 𑀲𑀫𑀢𑁆𑀣𑀢𑁆𑀢𑀸 𑀤𑁂𑀯𑀮𑁄𑀓𑀬𑀸𑀦𑀲𑀜𑁆𑀜𑀺𑀢𑀁 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀬𑀸𑀦𑀁 𑀅𑀪𑀺𑀭𑀼𑀬𑁆𑀳, 𑀢𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀓𑀸𑀫𑀭𑀸𑀕𑀁 𑀯𑀺𑀭𑀸𑀚𑁂𑀢𑁆𑀯𑀸, 𑀓𑀸𑀬𑀲𑁆𑀲 𑀪𑁂𑀤𑀸 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑁄 𑀅𑀳𑀼, 𑀲𑀸 𑀢𑀣𑀸 𑀳𑀻𑀦𑀸𑀧𑀺 𑀦 𑀦𑀁 𑀚𑀸𑀢𑀺 𑀦𑀺𑀯𑀸𑀭𑁂𑀲𑀺 𑀩𑁆𑀭𑀳𑁆𑀫𑀮𑁄𑀓𑀽𑀧𑀧𑀢𑁆𑀢𑀺𑀬𑀸, 𑀩𑁆𑀭𑀳𑁆𑀫𑀮𑁄𑀓𑀽𑀧𑀧𑀢𑁆𑀢𑀺𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀬𑀁 𑀧𑀦𑀢𑁆𑀣𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄 𑁋 𑀅𑀢𑀻𑀢𑁂 𑀓𑀺𑀭 𑀫𑀳𑀸𑀧𑀼𑀭𑀺𑀲𑁄 𑀢𑁂𑀦 𑀢𑁂𑀦𑀼𑀧𑀸𑀬𑁂𑀦 𑀲𑀢𑁆𑀢𑀳𑀺𑀢𑀁 𑀓𑀭𑁄𑀦𑁆𑀢𑁄 𑀲𑁄𑀧𑀸𑀓𑀚𑀻𑀯𑀺𑀓𑁂 𑀘𑀡𑁆𑀟𑀸𑀮𑀓𑀼𑀮𑁂 𑀉𑀧𑁆𑀧𑀚𑁆𑀚𑀺. 𑀲𑁄 𑀦𑀸𑀫𑁂𑀦 𑀫𑀸𑀢𑀗𑁆𑀕𑁄, 𑀭𑀽𑀧𑁂𑀦 𑀤𑀼𑀤𑁆𑀤𑀲𑀺𑀓𑁄 𑀳𑀼𑀢𑁆𑀯𑀸 𑀩𑀳𑀺𑀦𑀕𑀭𑁂 𑀘𑀫𑁆𑀫𑀓𑀼𑀝𑀺𑀓𑀸𑀬 𑀯𑀲𑀢𑀺, 𑀅𑀦𑁆𑀢𑁄𑀦𑀕𑀭𑁂 𑀪𑀺𑀓𑁆𑀔𑀁 𑀘𑀭𑀺𑀢𑁆𑀯𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀢𑀲𑁆𑀫𑀺𑀁 𑀦𑀕𑀭𑁂 𑀲𑀼𑀭𑀸𑀦𑀓𑁆𑀔𑀢𑁆𑀢𑁂 𑀖𑁄𑀲𑀺𑀢𑁂 𑀥𑀼𑀢𑁆𑀢𑀸 𑀬𑀣𑀸𑀲𑀓𑁂𑀦 𑀧𑀭𑀺𑀯𑀸𑀭𑁂𑀦 𑀓𑀻𑀴𑀦𑁆𑀢𑀺. 𑀅𑀜𑁆𑀜𑀢𑀭𑀸𑀧𑀺 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀥𑀻𑀢𑀸 𑀧𑀦𑁆𑀦𑀭𑀲𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀸 𑀤𑁂𑀯𑀓𑀜𑁆𑀜𑀸 𑀯𑀺𑀬 𑀭𑀽𑀧𑁂𑀦 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸 ‘‘𑀅𑀢𑁆𑀢𑀦𑁄 𑀓𑀼𑀮𑀯𑀁𑀲𑀸𑀦𑀼𑀭𑀽𑀧𑀁 𑀓𑀻𑀴𑀺𑀲𑁆𑀲𑀸𑀫𑀻’’𑀢𑀺 𑀧𑀳𑀽𑀢𑀁 𑀔𑀚𑁆𑀚𑀪𑁄𑀚𑁆𑀚𑀸𑀤𑀺𑀓𑀻𑀴𑀦𑀲𑀫𑁆𑀪𑀸𑀭𑀁 𑀲𑀓𑀝𑁂𑀲𑀼 𑀆𑀭𑁄𑀧𑁂𑀢𑁆𑀯𑀸 𑀲𑀩𑁆𑀩𑀲𑁂𑀢𑀯𑀴𑀯𑀬𑀼𑀢𑁆𑀢𑀁 𑀬𑀸𑀦𑀫𑀸𑀭𑀼𑀬𑁆𑀳 𑀫𑀳𑀸𑀧𑀭𑀺𑀯𑀸𑀭𑁂𑀦 𑀉𑀬𑁆𑀬𑀸𑀦𑀪𑀽𑀫𑀺𑀁 𑀕𑀘𑁆𑀙𑀢𑀺 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀢𑀺 𑀦𑀸𑀫𑁂𑀦. 𑀲𑀸 𑀓𑀺𑀭 ‘‘𑀤𑀼𑀲𑁆𑀲𑀡𑁆𑀞𑀺𑀢𑀁 𑀭𑀽𑀧𑀁 𑀅𑀯𑀫𑀗𑁆𑀕𑀮’’𑀦𑁆𑀢𑀺 𑀤𑀝𑁆𑀞𑀼𑀁 𑀦 𑀇𑀘𑁆𑀙𑀢𑀺, 𑀢𑁂𑀦𑀲𑁆𑀲𑀸 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀢𑁆𑀯𑁂𑀯 𑀲𑀗𑁆𑀔𑀸 𑀉𑀤𑀧𑀸𑀤𑀺.

𑀢𑀤𑀸 𑀲𑁄 𑀫𑀸𑀢𑀗𑁆𑀕𑁄 𑀓𑀸𑀮𑀲𑁆𑀲𑁂𑀯 𑀯𑀼𑀝𑁆𑀞𑀸𑀬 𑀧𑀝𑀧𑀺𑀮𑁄𑀢𑀺𑀓𑀁 𑀦𑀺𑀯𑀸𑀲𑁂𑀢𑁆𑀯𑀸, 𑀓𑀁𑀲𑀢𑀸𑀴𑀁 𑀳𑀢𑁆𑀣𑁂 𑀩𑀦𑁆𑀥𑀺𑀢𑁆𑀯𑀸, 𑀪𑀸𑀚𑀦𑀳𑀢𑁆𑀣𑁄 𑀦𑀕𑀭𑀁 𑀧𑀯𑀺𑀲𑀢𑀺, 𑀫𑀦𑀼𑀲𑁆𑀲𑁂 𑀤𑀺𑀲𑁆𑀯𑀸 𑀤𑀽𑀭𑀢𑁄 𑀏𑀯 𑀓𑀁𑀲𑀢𑀸𑀴𑀁 𑀆𑀓𑁄𑀝𑁂𑀦𑁆𑀢𑁄. 𑀅𑀣 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸 ‘‘𑀉𑀲𑁆𑀲𑀭𑀣, 𑀉𑀲𑁆𑀲𑀭𑀣𑀸’’𑀢𑀺 𑀧𑀼𑀭𑀢𑁄 𑀧𑀼𑀭𑀢𑁄 𑀳𑀻𑀦𑀚𑀦𑀁 𑀅𑀧𑀦𑁂𑀦𑁆𑀢𑁂𑀳𑀺 𑀧𑀼𑀭𑀺𑀲𑁂𑀳𑀺 𑀦𑀻𑀬𑀫𑀸𑀦𑀸 𑀦𑀕𑀭𑀤𑁆𑀯𑀸𑀭𑀫𑀚𑁆𑀛𑁂 𑀫𑀸𑀢𑀗𑁆𑀕𑀁 𑀤𑀺𑀲𑁆𑀯𑀸 ‘‘𑀓𑁄 𑀏𑀲𑁄’’𑀢𑀺 𑀆𑀳. 𑀅𑀳𑀁 𑀫𑀸𑀢𑀗𑁆𑀕𑀘𑀡𑁆𑀟𑀸𑀮𑁄𑀢𑀺. 𑀲𑀸 ‘‘𑀈𑀤𑀺𑀲𑀁 𑀤𑀺𑀲𑁆𑀯𑀸 𑀕𑀢𑀸𑀦𑀁 𑀓𑀼𑀢𑁄 𑀯𑀼𑀟𑁆𑀠𑀻’’𑀢𑀺 𑀬𑀸𑀦𑀁 𑀦𑀺𑀯𑀢𑁆𑀢𑀸𑀧𑁂𑀲𑀺. 𑀫𑀦𑀼𑀲𑁆𑀲𑀸 ‘‘𑀬𑀁 𑀫𑀬𑀁 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀔𑀚𑁆𑀚𑀪𑁄𑀚𑁆𑀚𑀸𑀤𑀺𑀁 𑀮𑀪𑁂𑀬𑁆𑀬𑀸𑀫, 𑀢𑀲𑁆𑀲 𑀦𑁄 𑀫𑀸𑀢𑀗𑁆𑀕𑁂𑀦 𑀅𑀦𑁆𑀢𑀭𑀸𑀬𑁄 𑀓𑀢𑁄’’𑀢𑀺 𑀓𑀼𑀧𑀺𑀢𑀸 ‘‘𑀕𑀡𑁆𑀳𑀣 𑀘𑀡𑁆𑀟𑀸𑀮’’𑀦𑁆𑀢𑀺 𑀮𑁂𑀟𑁆𑀟𑀽𑀳𑀺 𑀧𑀳𑀭𑀺𑀢𑁆𑀯𑀸 ‘‘𑀫𑀢𑁄’’𑀢𑀺 𑀧𑀸𑀤𑁂 𑀕𑀳𑁂𑀢𑁆𑀯𑀸 𑀏𑀓𑀫𑀦𑁆𑀢𑁂 𑀙𑀟𑁆𑀟𑁂𑀢𑁆𑀯𑀸 𑀓𑀘𑀯𑀭𑁂𑀦 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀫𑀁𑀲𑀼. 𑀲𑁄 𑀲𑀢𑀺𑀁 𑀧𑀝𑀺𑀮𑀪𑀺𑀢𑁆𑀯𑀸 𑀉𑀝𑁆𑀞𑀸𑀬 𑀫𑀦𑀼𑀲𑁆𑀲𑁂 𑀧𑀼𑀘𑁆𑀙𑀺 𑁋 ‘‘𑀓𑀺𑀁, 𑀅𑀬𑁆𑀬𑀸, 𑀤𑁆𑀯𑀸𑀭𑀁 𑀦𑀸𑀫 𑀲𑀩𑁆𑀩𑀲𑀸𑀥𑀸𑀭𑀡𑀁, 𑀉𑀤𑀸𑀳𑀼 𑀩𑁆𑀭𑀸𑀳𑁆𑀫𑀡𑀸𑀦𑀁𑀬𑁂𑀯 𑀓𑀢’’𑀦𑁆𑀢𑀺? 𑀫𑀦𑀼𑀲𑁆𑀲𑀸 𑀆𑀳𑀁𑀲𑀼 𑁋 ‘‘𑀲𑀩𑁆𑀩𑁂𑀲𑀁 𑀲𑀸𑀥𑀸𑀭𑀡’’𑀦𑁆𑀢𑀺. ‘‘𑀏𑀯𑀁 𑀲𑀩𑁆𑀩𑀲𑀸𑀥𑀸𑀭𑀡𑀤𑁆𑀯𑀸𑀭𑁂𑀦 𑀧𑀯𑀺𑀲𑀺𑀢𑁆𑀯𑀸 𑀪𑀺𑀓𑁆𑀔𑀸𑀳𑀸𑀭𑁂𑀦 𑀬𑀸𑀧𑁂𑀦𑁆𑀢𑀁 𑀫𑀁 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀬 𑀫𑀦𑀼𑀲𑁆𑀲𑀸 𑀇𑀫𑀁 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑁂𑀲𑀼’’𑀦𑁆𑀢𑀺 𑀭𑀣𑀺𑀓𑀸𑀬 𑀭𑀣𑀺𑀓𑀁 𑀆𑀳𑀺𑀡𑁆𑀟𑀦𑁆𑀢𑁄 𑀫𑀦𑀼𑀲𑁆𑀲𑀸𑀦𑀁 𑀆𑀭𑁄𑀘𑁂𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀖𑀭𑀤𑁆𑀯𑀸𑀭𑁂 𑀦𑀺𑀧𑀚𑁆𑀚𑀺 𑁋 ‘‘𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀁 𑀅𑀮𑀤𑁆𑀥𑀸 𑀦 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺.

𑀩𑁆𑀭𑀸𑀳𑁆𑀫𑀡𑁄 ‘‘𑀖𑀭𑀤𑁆𑀯𑀸𑀭𑁂 𑀫𑀸𑀢𑀗𑁆𑀕𑁄 𑀦𑀺𑀧𑀦𑁆𑀦𑁄’’𑀢𑀺 𑀲𑀼𑀢𑁆𑀯𑀸 ‘‘𑀢𑀲𑁆𑀲 𑀓𑀸𑀓𑀡𑀺𑀓𑀁 𑀤𑁂𑀣, 𑀢𑁂𑀮𑁂𑀦 𑀅𑀗𑁆𑀕𑀁 𑀫𑀓𑁆𑀔𑁂𑀢𑁆𑀯𑀸 𑀕𑀘𑁆𑀙𑀢𑀽’’𑀢𑀺 𑀆𑀳. 𑀲𑁄 𑀢𑀁 𑀦 𑀇𑀘𑁆𑀙𑀢𑀺, ‘‘𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀁 𑀅𑀮𑀤𑁆𑀥𑀸 𑀦 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀺’’𑀘𑁆𑀘𑁂𑀯 𑀆𑀳. 𑀢𑀢𑁄 𑀩𑁆𑀭𑀸𑀳𑁆𑀫𑀡𑁄 ‘‘𑀤𑁆𑀯𑁂 𑀓𑀸𑀓𑀡𑀺𑀓𑀸𑀬𑁄 𑀤𑁂𑀣, 𑀓𑀸𑀓𑀡𑀺𑀓𑀸𑀬 𑀧𑀽𑀯𑀁 𑀔𑀸𑀤𑀢𑀼, 𑀓𑀸𑀓𑀡𑀺𑀓𑀸𑀬 𑀢𑁂𑀮𑁂𑀦 𑀅𑀗𑁆𑀕𑀁 𑀫𑀓𑁆𑀔𑁂𑀢𑁆𑀯𑀸 𑀕𑀘𑁆𑀙𑀢𑀽’’𑀢𑀺 𑀆𑀳. 𑀲𑁄 𑀢𑀁 𑀦 𑀇𑀘𑁆𑀙𑀢𑀺, 𑀢𑀣𑁂𑀯 𑀯𑀤𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀲𑀼𑀢𑁆𑀯𑀸 ‘‘𑀫𑀸𑀲𑀓𑀁 𑀤𑁂𑀣, 𑀧𑀸𑀤𑀁, 𑀉𑀧𑀟𑁆𑀠𑀓𑀳𑀸𑀧𑀡𑀁, 𑀓𑀳𑀸𑀧𑀡𑀁 𑀤𑁆𑀯𑁂 𑀢𑀻𑀡𑀻’’𑀢𑀺 𑀬𑀸𑀯 𑀲𑀢𑀁 𑀆𑀡𑀸𑀧𑁂𑀲𑀺. 𑀲𑁄 𑀦 𑀇𑀘𑁆𑀙𑀢𑀺, 𑀢𑀣𑁂𑀯 𑀯𑀤𑀢𑀺. 𑀏𑀯𑀁 𑀬𑀸𑀘𑀦𑁆𑀢𑀸𑀦𑀁𑀬𑁂𑀯 𑀲𑀽𑀭𑀺𑀬𑁄 𑀅𑀢𑁆𑀣𑀗𑁆𑀕𑀢𑁄. 𑀅𑀣 𑀩𑁆𑀭𑀸𑀳𑁆𑀫𑀡𑀻 𑀧𑀸𑀲𑀸𑀤𑀸 𑀑𑀭𑀼𑀬𑁆𑀳 𑀲𑀸𑀡𑀺𑀧𑀸𑀓𑀸𑀭𑀁 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀬𑀸𑀘𑀺 𑁋 ‘‘𑀢𑀸𑀢 𑀫𑀸𑀢𑀗𑁆𑀕, 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀬 𑀅𑀧𑀭𑀸𑀥𑀁 𑀔𑀫, 𑀲𑀳𑀲𑁆𑀲𑀁 𑀕𑀡𑁆𑀳𑀸𑀳𑀺, 𑀤𑁆𑀯𑁂 𑀢𑀻𑀡𑀻’’𑀢𑀺 𑀬𑀸𑀯 ‘‘𑀲𑀢𑀲𑀳𑀲𑁆𑀲𑀁 𑀕𑀡𑁆𑀳𑀸𑀳𑀻’’𑀢𑀺 𑀆𑀳. 𑀲𑁄 𑀢𑀼𑀡𑁆𑀳𑀻𑀪𑀽𑀢𑁄 𑀦𑀺𑀧𑀚𑁆𑀚𑀺𑀬𑁂𑀯.

𑀏𑀯𑀁 𑀘𑀢𑀽𑀳𑀧𑀜𑁆𑀘𑀸𑀳𑁂 𑀯𑀻𑀢𑀺𑀯𑀢𑁆𑀢𑁂 𑀩𑀳𑀼𑀫𑁆𑀧𑀺 𑀧𑀡𑁆𑀡𑀸𑀓𑀸𑀭𑀁 𑀤𑀢𑁆𑀯𑀸 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀁 𑀅𑀮𑀪𑀦𑁆𑀢𑀸 𑀔𑀢𑁆𑀢𑀺𑀬𑀓𑀼𑀫𑀸𑀭𑀸𑀤𑀬𑁄 𑀫𑀸𑀢𑀗𑁆𑀕𑀲𑁆𑀲 𑀉𑀧𑀓𑀡𑁆𑀡𑀓𑁂 𑀆𑀭𑁄𑀘𑀸𑀧𑁂𑀲𑀼𑀁 𑁋 ‘‘𑀧𑀼𑀭𑀺𑀲𑀸 𑀦𑀸𑀫 𑀅𑀦𑁂𑀓𑀸𑀦𑀺𑀧𑀺 𑀲𑀁𑀯𑀘𑁆𑀙𑀭𑀸𑀦𑀺 𑀯𑀻𑀭𑀺𑀬𑀁 𑀓𑀢𑁆𑀯𑀸 𑀇𑀘𑁆𑀙𑀺𑀢𑀢𑁆𑀣𑀁 𑀧𑀸𑀧𑀼𑀡𑀦𑁆𑀢𑀺, 𑀫𑀸 𑀔𑁄 𑀢𑁆𑀯𑀁 𑀦𑀺𑀩𑁆𑀩𑀺𑀚𑁆𑀚𑀺, 𑀅𑀤𑁆𑀥𑀸 𑀤𑁆𑀯𑀻𑀳𑀢𑀻𑀳𑀘𑁆𑀘𑀬𑁂𑀦 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀁 𑀮𑀘𑁆𑀙𑀲𑀻’’𑀢𑀺. 𑀲𑁄 𑀢𑀼𑀡𑁆𑀳𑀻𑀪𑀽𑀢𑁄 𑀦𑀺𑀧𑀚𑁆𑀚𑀺𑀬𑁂𑀯. 𑀅𑀣 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀫𑀦𑁆𑀢𑀸 𑀧𑀝𑀺𑀯𑀺𑀲𑁆𑀲𑀓𑀸 𑀉𑀝𑁆𑀞𑀳𑀺𑀢𑁆𑀯𑀸 ‘‘𑀢𑀼𑀫𑁆𑀳𑁂 𑀫𑀸𑀢𑀗𑁆𑀕𑀁 𑀯𑀸 𑀉𑀝𑁆𑀞𑀸𑀧𑁂𑀣, 𑀤𑀸𑀭𑀺𑀓𑀁 𑀯𑀸 𑀤𑁂𑀣, 𑀫𑀸 𑀅𑀫𑁆𑀳𑁂 𑀲𑀩𑁆𑀩𑁂 𑀦𑀸𑀲𑀬𑀺𑀢𑁆𑀣𑀸’’𑀢𑀺 𑀆𑀳𑀁𑀲𑀼. 𑀢𑁂𑀲𑀁 𑀓𑀺𑀭 𑀅𑀬𑀁 𑀤𑀺𑀝𑁆𑀞𑀺 ‘‘𑀬𑀲𑁆𑀲 𑀖𑀭𑀤𑁆𑀯𑀸𑀭𑁂 𑀏𑀯𑀁 𑀦𑀺𑀧𑀦𑁆𑀦𑁄 𑀘𑀡𑁆𑀟𑀸𑀮𑁄 𑀫𑀭𑀢𑀺, 𑀢𑀲𑁆𑀲 𑀖𑀭𑁂𑀦 𑀲𑀳 𑀲𑀫𑀦𑁆𑀢𑀸 𑀲𑀢𑁆𑀢𑀲𑀢𑁆𑀢𑀖𑀭𑀯𑀸𑀲𑀺𑀦𑁄 𑀘𑀡𑁆𑀟𑀸𑀮𑀸 𑀳𑁄𑀦𑁆𑀢𑀻’’𑀢𑀺. 𑀢𑀢𑁄 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀁 𑀦𑀻𑀮𑀧𑀝𑀧𑀺𑀮𑁄𑀢𑀺𑀓𑀁 𑀦𑀺𑀯𑀸𑀲𑀸𑀧𑁂𑀢𑁆𑀯𑀸 𑀉𑀴𑀼𑀗𑁆𑀓𑀓𑀴𑁄𑀧𑀺𑀓𑀸𑀤𑀻𑀦𑀺 𑀤𑀢𑁆𑀯𑀸 𑀧𑀭𑀺𑀤𑁂𑀯𑀫𑀸𑀦𑀁 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀦𑁂𑀢𑁆𑀯𑀸 ‘‘𑀕𑀡𑁆𑀳 𑀤𑀸𑀭𑀺𑀓𑀁, 𑀉𑀝𑁆𑀞𑀸𑀬 𑀕𑀘𑁆𑀙𑀸𑀳𑀻’’𑀢𑀺 𑀅𑀤𑀁𑀲𑀼. 𑀲𑀸 𑀧𑀲𑁆𑀲𑁂 𑀞𑀢𑁆𑀯𑀸 ‘‘𑀉𑀝𑁆𑀞𑀸𑀳𑀻’’𑀢𑀺 𑀆𑀳, 𑀲𑁄 ‘‘𑀳𑀢𑁆𑀣𑁂𑀦 𑀫𑀁 𑀕𑀳𑁂𑀢𑁆𑀯𑀸 𑀉𑀝𑁆𑀞𑀸𑀧𑁂𑀳𑀻’’𑀢𑀺 𑀆𑀳. 𑀲𑀸 𑀦𑀁 𑀉𑀝𑁆𑀞𑀸𑀧𑁂𑀲𑀺. 𑀲𑁄 𑀦𑀺𑀲𑀻𑀤𑀺𑀢𑁆𑀯𑀸 𑀆𑀳 𑁋 ‘‘𑀫𑀬𑀁 𑀅𑀦𑁆𑀢𑁄𑀦𑀕𑀭𑁂 𑀯𑀲𑀺𑀢𑀼𑀁 𑀦 𑀮𑀪𑀸𑀫, 𑀏𑀳𑀺 𑀫𑀁 𑀩𑀳𑀺𑀦𑀕𑀭𑁂 𑀘𑀫𑁆𑀫𑀓𑀼𑀝𑀺𑀁 𑀦𑁂𑀳𑀻’’𑀢𑀺. 𑀲𑀸 𑀦𑀁 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 𑀢𑀢𑁆𑀣 𑀦𑁂𑀲𑀺. ‘‘𑀧𑀺𑀝𑁆𑀞𑀺𑀬𑀁 𑀆𑀭𑁄𑀧𑁂𑀢𑁆𑀯𑀸’’𑀢𑀺 𑀚𑀸𑀢𑀓𑀪𑀸𑀡𑀓𑀸. 𑀦𑁂𑀢𑁆𑀯𑀸 𑀘𑀲𑁆𑀲 𑀲𑀭𑀻𑀭𑀁 𑀢𑁂𑀮𑁂𑀦 𑀫𑀓𑁆𑀔𑁂𑀢𑁆𑀯𑀸, 𑀉𑀡𑁆𑀳𑁄𑀤𑀓𑁂𑀦 𑀦𑁆𑀳𑀸𑀧𑁂𑀢𑁆𑀯𑀸, 𑀬𑀸𑀕𑀼𑀁 𑀧𑀘𑀺𑀢𑁆𑀯𑀸 𑀅𑀤𑀸𑀲𑀺. 𑀲𑁄 ‘‘𑀩𑁆𑀭𑀸𑀳𑁆𑀫𑀡𑀓𑀜𑁆𑀜𑀸 𑀅𑀬𑀁 𑀫𑀸 𑀯𑀺𑀦𑀲𑁆𑀲𑀻’’𑀢𑀺 𑀚𑀸𑀢𑀺𑀲𑀫𑁆𑀪𑁂𑀤𑀁 𑀅𑀓𑀢𑁆𑀯𑀸𑀯 𑀅𑀟𑁆𑀠𑀫𑀸𑀲𑀫𑀢𑁆𑀢𑀁 𑀩𑀮𑀁 𑀕𑀳𑁂𑀢𑁆𑀯𑀸 ‘‘𑀅𑀳𑀁 𑀯𑀦𑀁 𑀕𑀘𑁆𑀙𑀸𑀫𑀺, ‘𑀅𑀢𑀺𑀘𑀺𑀭𑀸𑀬𑀢𑀻’𑀢𑀺 𑀫𑀸 𑀢𑁆𑀯𑀁 𑀉𑀓𑁆𑀓𑀡𑁆𑀞𑀻’’𑀢𑀺 𑀯𑀢𑁆𑀯𑀸 𑀖𑀭𑀫𑀸𑀦𑀼𑀲𑀓𑀸𑀦𑀺 𑀘 ‘‘𑀇𑀫𑀁 𑀫𑀸 𑀧𑀫𑀚𑁆𑀚𑀺𑀢𑁆𑀣𑀸’’𑀢𑀺 𑀆𑀡𑀸𑀧𑁂𑀢𑁆𑀯𑀸 𑀖𑀭𑀸 𑀦𑀺𑀓𑁆𑀔𑀫𑁆𑀫 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸, 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸, 𑀓𑀢𑀺𑀧𑀸𑀳𑁂𑀦𑁂𑀯 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀧𑀜𑁆𑀘 𑀘 𑀅𑀪𑀺𑀜𑁆𑀜𑀸𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 ‘‘𑀇𑀤𑀸𑀦𑀸𑀳𑀁 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀬 𑀫𑀦𑀸𑀧𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀦𑀕𑀭𑀤𑁆𑀯𑀸𑀭𑁂 𑀑𑀭𑁄𑀳𑀺𑀢𑁆𑀯𑀸 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀬 𑀲𑀦𑁆𑀢𑀺𑀓𑀁 𑀧𑁂𑀲𑁂𑀲𑀺.

𑀲𑀸 𑀲𑀼𑀢𑁆𑀯𑀸 ‘‘𑀓𑁄𑀘𑀺 𑀫𑀜𑁆𑀜𑁂 𑀫𑀫 𑀜𑀸𑀢𑀓𑁄 𑀧𑀩𑁆𑀩𑀚𑀺𑀢𑁄 𑀫𑀁 𑀤𑀼𑀓𑁆𑀔𑀺𑀢𑀁 𑀜𑀢𑁆𑀯𑀸 𑀤𑀝𑁆𑀞𑀼𑀁 𑀆𑀕𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑀬𑀫𑀸𑀦𑀸 𑀕𑀦𑁆𑀢𑁆𑀯𑀸, 𑀢𑀁 𑀜𑀢𑁆𑀯𑀸, 𑀧𑀸𑀤𑁂𑀲𑀼 𑀦𑀺𑀧𑀢𑀺𑀢𑁆𑀯𑀸 ‘‘𑀓𑀺𑀲𑁆𑀲 𑀫𑀁 𑀅𑀦𑀸𑀣𑀁 𑀢𑀼𑀫𑁆𑀳𑁂 𑀅𑀓𑀢𑁆𑀣𑀸’’𑀢𑀺 𑀆𑀳. 𑀫𑀳𑀸𑀧𑀼𑀭𑀺𑀲𑁄 ‘‘𑀫𑀸 𑀢𑁆𑀯𑀁 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑁂 𑀤𑀼𑀓𑁆𑀔𑀺𑀦𑀻 𑀅𑀳𑁄𑀲𑀺, 𑀲𑀓𑀮𑀚𑀫𑁆𑀩𑀼𑀤𑀻𑀧𑀯𑀸𑀲𑀻𑀳𑀺 𑀢𑁂 𑀲𑀓𑁆𑀓𑀸𑀭𑀁 𑀓𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀏𑀢𑀤𑀯𑁄𑀘 𑁋 ‘‘𑀕𑀘𑁆𑀙 𑀢𑁆𑀯𑀁 𑀖𑁄𑀲𑀦𑀁 𑀓𑀭𑁄𑀳𑀺 𑁋 ‘𑀫𑀳𑀸𑀩𑁆𑀭𑀳𑁆𑀫𑀸 𑀫𑀫 𑀲𑀸𑀫𑀺𑀓𑁄 𑀦 𑀫𑀸𑀢𑀗𑁆𑀕𑁄, 𑀲𑁄 𑀘𑀦𑁆𑀤𑀯𑀺𑀫𑀸𑀦𑀁 𑀪𑀺𑀦𑁆𑀤𑀺𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀫𑀫 𑀲𑀦𑁆𑀢𑀺𑀓𑀁 𑀆𑀕𑀫𑀺𑀲𑁆𑀲𑀢𑀻’’’𑀢𑀺. 𑀲𑀸 𑀆𑀳 𑁋 ‘‘𑀅𑀳𑀁, 𑀪𑀦𑁆𑀢𑁂, 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀥𑀻𑀢𑀸 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀧𑀸𑀧𑀓𑀫𑁆𑀫𑁂𑀦 𑀇𑀫𑀁 𑀘𑀡𑁆𑀟𑀸𑀮𑀪𑀸𑀯𑀁 𑀧𑀢𑁆𑀢𑀸, 𑀦 𑀲𑀓𑁆𑀓𑁄𑀫𑀺 𑀏𑀯𑀁 𑀯𑀢𑁆𑀢𑀼’’𑀦𑁆𑀢𑀺. 𑀫𑀳𑀸𑀧𑀼𑀭𑀺𑀲𑁄 ‘‘𑀦 𑀢𑁆𑀯𑀁 𑀫𑀸𑀢𑀗𑁆𑀕𑀲𑁆𑀲 𑀆𑀦𑀼𑀪𑀸𑀯𑀁 𑀚𑀸𑀦𑀸𑀲𑀻’’𑀢𑀺 𑀯𑀢𑁆𑀯𑀸 𑀬𑀣𑀸 𑀲𑀸 𑀲𑀤𑁆𑀤𑀳𑀢𑀺, 𑀢𑀣𑀸 𑀅𑀦𑁂𑀓𑀸𑀦𑀺 𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀢𑀣𑁂𑀯 𑀢𑀁 𑀆𑀡𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀢𑀺𑀁 𑀅𑀕𑀫𑀸𑀲𑀺. 𑀲𑀸 𑀢𑀣𑀸 𑀅𑀓𑀸𑀲𑀺.

𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀳𑀲𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫𑀸𑀬𑀁 𑀅𑀢𑁆𑀢𑀦𑁄 𑀧𑀸𑀧𑀓𑀫𑁆𑀫𑁂𑀦 𑀘𑀡𑁆𑀟𑀸𑀮𑀪𑀸𑀯𑀁 𑀧𑀢𑁆𑀯𑀸 𑀧𑀼𑀦 𑀢𑀁 𑀫𑀳𑀸𑀩𑁆𑀭𑀳𑁆𑀫𑀸𑀦𑀁 𑀓𑀭𑀺𑀲𑁆𑀲𑀢𑀻’’𑀢𑀺. 𑀲𑀸 𑀅𑀥𑀺𑀫𑀸𑀦𑀸 𑀏𑀯 𑀳𑀼𑀢𑁆𑀯𑀸 𑀤𑀺𑀯𑀲𑁂 𑀤𑀺𑀯𑀲𑁂 𑀖𑁄𑀲𑀦𑁆𑀢𑀻 𑀦𑀕𑀭𑀁 𑀆𑀳𑀺𑀡𑁆𑀟𑀢𑀺 ‘‘𑀇𑀢𑁄 𑀙𑀝𑁆𑀞𑁂 𑀤𑀺𑀯𑀲𑁂, 𑀧𑀜𑁆𑀘𑀫𑁂, 𑀘𑀢𑀼𑀢𑁆𑀣𑁂, 𑀢𑀢𑀺𑀬𑁂, 𑀲𑀼𑀯𑁂, 𑀅𑀚𑁆𑀚 𑀆𑀕𑀫𑀺𑀲𑁆𑀲𑀢𑀻’’𑀢𑀺. 𑀫𑀦𑀼𑀲𑁆𑀲𑀸 𑀢𑀲𑁆𑀲𑀸 𑀯𑀺𑀲𑁆𑀲𑀢𑁆𑀣𑀯𑀸𑀘𑀁 𑀲𑀼𑀢𑁆𑀯𑀸 ‘‘𑀓𑀤𑀸𑀘𑀺 𑀏𑀯𑀫𑁆𑀧𑀺 𑀲𑀺𑀬𑀸’’𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀖𑀭𑀤𑁆𑀯𑀸𑀭𑁂𑀲𑀼 𑀫𑀡𑁆𑀟𑀧𑀁 𑀓𑀸𑀭𑀸𑀧𑁂𑀢𑁆𑀯𑀸, 𑀲𑀸𑀡𑀺𑀧𑀸𑀓𑀸𑀭𑀁 𑀲𑀚𑁆𑀚𑁂𑀢𑁆𑀯𑀸, 𑀯𑀬𑀧𑁆𑀧𑀢𑁆𑀢𑀸 𑀤𑀸𑀭𑀺𑀓𑀸𑀬𑁄 𑀅𑀮𑀗𑁆𑀓𑀭𑀺𑀢𑁆𑀯𑀸 ‘‘𑀫𑀳𑀸𑀩𑁆𑀭𑀳𑁆𑀫𑀦𑀺 𑀆𑀕𑀢𑁂 𑀓𑀜𑁆𑀜𑀸𑀤𑀸𑀦𑀁 𑀤𑀲𑁆𑀲𑀸𑀫𑀸’’𑀢𑀺 𑀆𑀓𑀸𑀲𑀁 𑀉𑀮𑁆𑀮𑁄𑀓𑁂𑀦𑁆𑀢𑀸 𑀦𑀺𑀲𑀻𑀤𑀺𑀁𑀲𑀼. 𑀅𑀣 𑀫𑀳𑀸𑀧𑀼𑀭𑀺𑀲𑁄 𑀧𑀼𑀡𑁆𑀡𑀫𑀤𑀺𑀯𑀲𑁂 𑀕𑀕𑀦𑀢𑀮𑀁 𑀉𑀧𑀸𑀭𑀽𑀴𑁆𑀳𑁂 𑀘𑀦𑁆𑀤𑁂 𑀘𑀦𑁆𑀤𑀯𑀺𑀫𑀸𑀦𑀁 𑀨𑀸𑀮𑁂𑀢𑁆𑀯𑀸 𑀧𑀲𑁆𑀲𑀢𑁄 𑀫𑀳𑀸𑀚𑀦𑀲𑁆𑀲 𑀫𑀳𑀸𑀩𑁆𑀭𑀳𑁆𑀫𑀭𑀽𑀧𑁂𑀦 𑀦𑀺𑀕𑁆𑀕𑀘𑁆𑀙𑀺. 𑀫𑀳𑀸𑀚𑀦𑁄 ‘‘𑀤𑁆𑀯𑁂 𑀘𑀦𑁆𑀤𑀸 𑀚𑀸𑀢𑀸’’𑀢𑀺 𑀅𑀢𑀺𑀫𑀜𑁆𑀜𑀺. 𑀢𑀢𑁄 𑀅𑀦𑀼𑀓𑁆𑀓𑀫𑁂𑀦 𑀆𑀕𑀢𑀁 𑀤𑀺𑀲𑁆𑀯𑀸 ‘‘𑀲𑀘𑁆𑀘𑀁 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸 𑀆𑀳, 𑀫𑀳𑀸𑀩𑁆𑀭𑀳𑁆𑀫𑀸𑀯 𑀅𑀬𑀁 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀁 𑀤𑀫𑁂𑀢𑀼𑀁 𑀧𑀼𑀩𑁆𑀩𑁂 𑀫𑀸𑀢𑀗𑁆𑀕𑀯𑁂𑀲𑁂𑀦𑀸𑀕𑀘𑁆𑀙𑀻’’𑀢𑀺 𑀦𑀺𑀝𑁆𑀞𑀁 𑀅𑀕𑀫𑀸𑀲𑀺. 𑀏𑀯𑀁 𑀲𑁄 𑀫𑀳𑀸𑀚𑀦𑁂𑀦 𑀤𑀺𑀲𑁆𑀲𑀫𑀸𑀦𑁄 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀬 𑀯𑀲𑀦𑀝𑁆𑀞𑀸𑀦𑁂 𑀏𑀯 𑀑𑀢𑀭𑀺. 𑀲𑀸 𑀘 𑀢𑀤𑀸 𑀉𑀢𑀼𑀦𑀻 𑀅𑀳𑁄𑀲𑀺. 𑀲𑁄 𑀢𑀲𑁆𑀲𑀸 𑀦𑀸𑀪𑀺𑀁 𑀅𑀗𑁆𑀕𑀼𑀝𑁆𑀞𑀓𑁂𑀦 𑀧𑀭𑀸𑀫𑀲𑀺. 𑀢𑁂𑀦 𑀨𑀲𑁆𑀲𑁂𑀦 𑀕𑀩𑁆𑀪𑁄 𑀧𑀢𑀺𑀝𑁆𑀞𑀸𑀲𑀺. 𑀢𑀢𑁄 𑀦𑀁 ‘‘𑀕𑀩𑁆𑀪𑁄 𑀢𑁂 𑀲𑀡𑁆𑀞𑀺𑀢𑁄, 𑀧𑀼𑀢𑁆𑀢𑀫𑁆𑀳𑀺 𑀚𑀸𑀢𑁂 𑀢𑀁 𑀦𑀺𑀲𑁆𑀲𑀸𑀬 𑀚𑀻𑀯𑀸𑀳𑀻’’𑀢𑀺 𑀯𑀢𑁆𑀯𑀸 𑀧𑀲𑁆𑀲𑀢𑁄 𑀫𑀳𑀸𑀚𑀦𑀲𑁆𑀲 𑀧𑀼𑀦 𑀘𑀦𑁆𑀤𑀯𑀺𑀫𑀸𑀦𑀁 𑀧𑀸𑀯𑀺𑀲𑀺.

𑀩𑁆𑀭𑀸𑀳𑁆𑀫𑀡𑀸 ‘‘𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸 𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀧𑀚𑀸𑀧𑀢𑀺 𑀅𑀫𑁆𑀳𑀸𑀓𑀁 𑀫𑀸𑀢𑀸 𑀚𑀸𑀢𑀸’’𑀢𑀺 𑀯𑀢𑁆𑀯𑀸 𑀢𑀢𑁄 𑀢𑀢𑁄 𑀆𑀕𑀘𑁆𑀙𑀦𑁆𑀢𑀺. 𑀢𑀁 𑀲𑀓𑁆𑀓𑀸𑀭𑀁 𑀓𑀸𑀢𑀼𑀓𑀸𑀫𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀲𑀫𑁆𑀧𑀻𑀴𑀦𑁂𑀦 𑀦𑀕𑀭𑀤𑁆𑀯𑀸𑀭𑀸𑀦𑀺 𑀅𑀦𑁄𑀓𑀸𑀲𑀸𑀦𑀺 𑀅𑀳𑁂𑀲𑀼𑀁. 𑀢𑁂 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀁 𑀳𑀺𑀭𑀜𑁆𑀜𑀭𑀸𑀲𑀺𑀫𑁆𑀳𑀺 𑀞𑀧𑁂𑀢𑁆𑀯𑀸, 𑀦𑁆𑀳𑀸𑀧𑁂𑀢𑁆𑀯𑀸, 𑀫𑀡𑁆𑀟𑁂𑀢𑁆𑀯𑀸, 𑀭𑀣𑀁 𑀆𑀭𑁄𑀧𑁂𑀢𑁆𑀯𑀸, 𑀫𑀳𑀸𑀲𑀓𑁆𑀓𑀸𑀭𑁂𑀦 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀸𑀭𑀸𑀧𑁂𑀢𑁆𑀯𑀸, 𑀦𑀕𑀭𑀫𑀚𑁆𑀛𑁂 𑀫𑀡𑁆𑀟𑀧𑀁 𑀓𑀸𑀭𑀸𑀧𑁂𑀢𑁆𑀯𑀸, 𑀢𑀢𑁆𑀭 𑀦𑀁 ‘‘𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀧𑀚𑀸𑀧𑀢𑀻’’𑀢𑀺 𑀤𑀺𑀝𑁆𑀞𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀯𑀲𑀸𑀧𑁂𑀦𑁆𑀢𑀺 ‘‘𑀬𑀸𑀯𑀲𑁆𑀲𑀸 𑀧𑀢𑀺𑀭𑀽𑀧𑀁 𑀯𑀲𑀦𑁄𑀓𑀸𑀲𑀁 𑀓𑀭𑁄𑀫, 𑀢𑀸𑀯 𑀇𑀥𑁂𑀯 𑀯𑀲𑀢𑀽’’𑀢𑀺. 𑀲𑀸 𑀫𑀡𑁆𑀟𑀧𑁂 𑀏𑀯 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀢𑀁 𑀯𑀺𑀲𑀼𑀤𑁆𑀥𑀤𑀺𑀯𑀲𑁂 𑀲𑀤𑁆𑀥𑀺𑀁 𑀧𑀼𑀢𑁆𑀢𑁂𑀦 𑀲𑀲𑀻𑀲𑀁 𑀦𑁆𑀳𑀸𑀧𑁂𑀢𑁆𑀯𑀸 𑀫𑀡𑁆𑀟𑀧𑁂 𑀚𑀸𑀢𑁄𑀢𑀺 𑀤𑀸𑀭𑀓𑀲𑁆𑀲 ‘‘𑀫𑀡𑁆𑀟𑀩𑁆𑀬𑀓𑀼𑀫𑀸𑀭𑁄’’𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀢𑀢𑁄 𑀧𑀪𑀼𑀢𑀺 𑀘 𑀦𑀁 𑀩𑁆𑀭𑀸𑀳𑁆𑀫𑀡𑀸 ‘‘𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀧𑀼𑀢𑁆𑀢𑁄’’𑀢𑀺 𑀧𑀭𑀺𑀯𑀸𑀭𑁂𑀢𑁆𑀯𑀸 𑀘𑀭𑀦𑁆𑀢𑀺. 𑀢𑀢𑁄 𑀅𑀦𑁂𑀓𑀲𑀢𑀲𑀳𑀲𑁆𑀲𑀧𑁆𑀧𑀓𑀸𑀭𑀸 𑀧𑀡𑁆𑀡𑀸𑀓𑀸𑀭𑀸 𑀆𑀕𑀘𑁆𑀙𑀦𑁆𑀢𑀺, 𑀢𑁂 𑀩𑁆𑀭𑀸𑀳𑁆𑀫𑀡𑀸 𑀓𑀼𑀫𑀸𑀭𑀲𑁆𑀲𑀸𑀭𑀓𑁆𑀔𑀁 𑀞𑀧𑁂𑀲𑀼𑀁, 𑀆𑀕𑀢𑀸 𑀮𑀳𑀼𑀁 𑀓𑀼𑀫𑀸𑀭𑀁 𑀤𑀝𑁆𑀞𑀼𑀁 𑀦 𑀮𑀪𑀦𑁆𑀢𑀺.

𑀓𑀼𑀫𑀸𑀭𑁄 𑀅𑀦𑀼𑀧𑀼𑀩𑁆𑀩𑁂𑀦 𑀯𑀼𑀟𑁆𑀠𑀺𑀫𑀦𑁆𑀯𑀸𑀬 𑀤𑀸𑀦𑀁 𑀤𑀸𑀢𑀼𑀁 𑀆𑀭𑀤𑁆𑀥𑁄. 𑀲𑁄 𑀲𑀸𑀮𑀸𑀬 𑀲𑀫𑁆𑀧𑀢𑁆𑀢𑀸𑀦𑀁 𑀓𑀧𑀡𑀤𑁆𑀥𑀺𑀓𑀸𑀦𑀁 𑀅𑀤𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀸𑀦𑀁𑀬𑁂𑀯 𑀤𑁂𑀢𑀺. 𑀫𑀳𑀸𑀧𑀼𑀭𑀺𑀲𑁄 ‘‘𑀓𑀺𑀁 𑀫𑀫 𑀧𑀼𑀢𑁆𑀢𑁄 𑀤𑀸𑀦𑀁 𑀤𑁂𑀢𑀻’’𑀢𑀺 𑀆𑀯𑀚𑁆𑀚𑁂𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀸𑀦𑀁𑀬𑁂𑀯 𑀤𑀸𑀦𑀁 𑀤𑁂𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀬𑀣𑀸 𑀲𑀩𑁆𑀩𑁂𑀲𑀁 𑀤𑀲𑁆𑀲𑀢𑀺, 𑀢𑀣𑀸 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀆𑀓𑀸𑀲𑁂𑀦 𑀆𑀕𑀫𑁆𑀫 𑀧𑀼𑀢𑁆𑀢𑀲𑁆𑀲 𑀖𑀭𑀤𑁆𑀯𑀸𑀭𑁂 𑀅𑀝𑁆𑀞𑀸𑀲𑀺. 𑀓𑀼𑀫𑀸𑀭𑁄 𑀢𑀁 𑀤𑀺𑀲𑁆𑀯𑀸 ‘‘𑀓𑀼𑀢𑁄 𑀅𑀬𑀁 𑀏𑀯𑀁 𑀯𑀺𑀭𑀽𑀧𑀯𑁂𑀲𑁄 𑀯𑀲𑀮𑁄 𑀆𑀕𑀢𑁄’’𑀢𑀺 𑀓𑀼𑀤𑁆𑀥𑁄 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀓𑀼𑀢𑁄 𑀦𑀼 𑀆𑀕𑀘𑁆𑀙𑀲𑀺 𑀤𑀼𑀫𑁆𑀫𑀯𑀸𑀲𑀻, 𑀑𑀢𑀮𑁆𑀮𑀓𑁄 𑀧𑀁𑀲𑀼𑀧𑀺𑀲𑀸𑀘𑀓𑁄𑀯;

𑀲𑀗𑁆𑀓𑀸𑀭𑀘𑁄𑀴𑀁 𑀧𑀝𑀺𑀫𑀼𑀜𑁆𑀘 𑀓𑀡𑁆𑀞𑁂, 𑀓𑁄 𑀭𑁂 𑀢𑀼𑀯𑀁 𑀳𑁄𑀲𑀺 𑀅𑀤𑀓𑁆𑀔𑀺𑀡𑁂𑀬𑁆𑀬𑁄’’𑀢𑀺.

𑀩𑁆𑀭𑀸𑀳𑁆𑀫𑀡𑀸 ‘‘𑀕𑀡𑁆𑀳𑀣 𑀕𑀡𑁆𑀳𑀣𑀸’’𑀢𑀺 𑀢𑀁 𑀕𑀳𑁂𑀢𑁆𑀯𑀸 𑀆𑀓𑁄𑀝𑁂𑀢𑁆𑀯𑀸 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑁂𑀲𑀼𑀁. 𑀲𑁄 𑀆𑀓𑀸𑀲𑁂𑀦 𑀕𑀦𑁆𑀢𑁆𑀯𑀸 𑀩𑀳𑀺𑀦𑀕𑀭𑁂 𑀧𑀘𑁆𑀘𑀝𑁆𑀞𑀸𑀲𑀺. 𑀤𑁂𑀯𑀢𑀸 𑀓𑀼𑀧𑀺𑀢𑀸 𑀓𑀼𑀫𑀸𑀭𑀁 𑀕𑀮𑁂 𑀕𑀳𑁂𑀢𑁆𑀯𑀸 𑀉𑀤𑁆𑀥𑀁𑀧𑀸𑀤𑀁 𑀅𑀥𑁄𑀲𑀺𑀭𑀁 𑀞𑀧𑁂𑀲𑀼𑀁. 𑀲𑁄 𑀅𑀓𑁆𑀔𑀻𑀳𑀺 𑀦𑀺𑀕𑁆𑀕𑀢𑁂𑀳𑀺 𑀫𑀼𑀔𑁂𑀦 𑀔𑁂𑀴𑀁 𑀧𑀕𑁆𑀖𑀭𑀦𑁆𑀢𑁂𑀦 𑀖𑀭𑀼𑀖𑀭𑀼𑀧𑀲𑁆𑀲𑀸𑀲𑀻 𑀤𑀼𑀓𑁆𑀔𑀁 𑀯𑁂𑀤𑀬𑀢𑀺. 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸 𑀲𑀼𑀢𑁆𑀯𑀸 ‘‘𑀓𑁄𑀘𑀺 𑀆𑀕𑀢𑁄 𑀅𑀢𑁆𑀣𑀻’’𑀢𑀺 𑀧𑀼𑀘𑁆𑀙𑀺. ‘‘𑀆𑀫, 𑀧𑀩𑁆𑀩𑀚𑀺𑀢𑁄 𑀆𑀕𑀘𑁆𑀙𑀻’’𑀢𑀺. ‘‘𑀓𑀼𑀳𑀺𑀁 𑀕𑀢𑁄’’𑀢𑀺? ‘‘𑀏𑀯𑀁 𑀕𑀢𑁄’’𑀢𑀺. 𑀲𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 ‘‘𑀔𑀫𑀣, 𑀪𑀦𑁆𑀢𑁂, 𑀅𑀢𑁆𑀢𑀦𑁄 𑀤𑀸𑀲𑀲𑁆𑀲𑀸’’𑀢𑀺 𑀬𑀸𑀘𑀦𑁆𑀢𑀻 𑀢𑀲𑁆𑀲 𑀧𑀸𑀤𑀫𑀽𑀮𑁂 𑀪𑀽𑀫𑀺𑀬𑀸 𑀦𑀺𑀧𑀚𑁆𑀚𑀺. 𑀢𑁂𑀦 𑀘 𑀲𑀫𑀬𑁂𑀦 𑀫𑀳𑀸𑀧𑀼𑀭𑀺𑀲𑁄 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸, 𑀬𑀸𑀕𑀼𑀁 𑀮𑀪𑀺𑀢𑁆𑀯𑀸, 𑀢𑀁 𑀧𑀺𑀯𑀦𑁆𑀢𑁄 𑀢𑀢𑁆𑀣 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀲𑁄 𑀅𑀯𑀲𑀺𑀝𑁆𑀞𑀁 𑀣𑁄𑀓𑀁 𑀬𑀸𑀕𑀼𑀁 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀬 𑀅𑀤𑀸𑀲𑀺. ‘‘𑀕𑀘𑁆𑀙 𑀇𑀫𑀁 𑀬𑀸𑀕𑀼𑀁 𑀉𑀤𑀓𑀓𑀼𑀫𑁆𑀪𑀺𑀬𑀸 𑀆𑀮𑁄𑀮𑁂𑀢𑁆𑀯𑀸 𑀬𑁂𑀲𑀁 𑀪𑀽𑀢𑀯𑀺𑀓𑀸𑀭𑁄 𑀅𑀢𑁆𑀣𑀺, 𑀢𑁂𑀲𑀁 𑀅𑀓𑁆𑀔𑀺𑀫𑀼𑀔𑀓𑀡𑁆𑀡𑀦𑀸𑀲𑀸𑀩𑀺𑀮𑁂𑀲𑀼 𑀆𑀲𑀺𑀜𑁆𑀘, 𑀲𑀭𑀻𑀭𑀜𑁆𑀘 𑀧𑀭𑀺𑀧𑁆𑀨𑁄𑀲𑁂𑀳𑀺, 𑀏𑀯𑀁 𑀦𑀺𑀩𑁆𑀩𑀺𑀓𑀸𑀭𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺. 𑀲𑀸 𑀢𑀣𑀸 𑀅𑀓𑀸𑀲𑀺. 𑀢𑀢𑁄 𑀓𑀼𑀫𑀸𑀭𑁂 𑀧𑀓𑀢𑀺𑀲𑀭𑀻𑀭𑁂 𑀚𑀸𑀢𑁂 ‘‘𑀏𑀳𑀺, 𑀢𑀸𑀢 𑀫𑀡𑁆𑀟𑀩𑁆𑀬, 𑀢𑀁 𑀔𑀫𑀸𑀧𑁂𑀲𑁆𑀲𑀸𑀫𑀸’’𑀢𑀺 𑀧𑀼𑀢𑁆𑀢𑀜𑁆𑀘 𑀲𑀩𑁆𑀩𑁂 𑀩𑁆𑀭𑀸𑀳𑁆𑀫𑀡𑁂 𑀘 𑀢𑀲𑁆𑀲 𑀧𑀸𑀤𑀫𑀽𑀮𑁂 𑀦𑀺𑀓𑁆𑀓𑀼𑀚𑁆𑀚𑀺𑀢𑁆𑀯𑀸 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀔𑀫𑀸𑀧𑁂𑀲𑀺.

𑀲𑁄 ‘‘𑀲𑀩𑁆𑀩𑀚𑀦𑀲𑁆𑀲 𑀤𑀸𑀦𑀁 𑀤𑀸𑀢𑀩𑁆𑀩’’𑀦𑁆𑀢𑀺 𑀑𑀯𑀤𑀺𑀢𑁆𑀯𑀸, 𑀥𑀫𑁆𑀫𑀓𑀣𑀁 𑀓𑀢𑁆𑀯𑀸, 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁𑀬𑁂𑀯 𑀕𑀦𑁆𑀢𑁆𑀯𑀸, 𑀘𑀺𑀦𑁆𑀢𑁂𑀲𑀺 ‘‘𑀇𑀢𑁆𑀣𑀻𑀲𑀼 𑀧𑀸𑀓𑀝𑀸 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸 𑀤𑀫𑀺𑀢𑀸, 𑀧𑀼𑀭𑀺𑀲𑁂𑀲𑀼 𑀧𑀸𑀓𑀝𑁄 𑀫𑀡𑁆𑀟𑀩𑁆𑀬𑀓𑀼𑀫𑀸𑀭𑁄, 𑀇𑀤𑀸𑀦𑀺 𑀓𑁄 𑀤𑀫𑁂𑀢𑀩𑁆𑀩𑁄’’𑀢𑀺. 𑀢𑀢𑁄 𑀚𑀸𑀢𑀺𑀫𑀦𑁆𑀢𑀢𑀸𑀧𑀲𑀁 𑀅𑀤𑁆𑀤𑀲 𑀩𑀦𑁆𑀥𑀼𑀫𑀢𑀻𑀦𑀕𑀭𑀁 𑀦𑀺𑀲𑁆𑀲𑀸𑀬 𑀓𑀼𑀫𑁆𑀪𑀯𑀢𑀻𑀦𑀤𑀻𑀢𑀻𑀭𑁂 𑀯𑀺𑀳𑀭𑀦𑁆𑀢𑀁. 𑀲𑁄 ‘‘𑀅𑀳𑀁 𑀚𑀸𑀢𑀺𑀬𑀸 𑀯𑀺𑀲𑀺𑀝𑁆𑀞𑁄, 𑀅𑀜𑁆𑀜𑁂𑀳𑀺 𑀧𑀭𑀺𑀪𑀼𑀢𑁆𑀢𑁄𑀤𑀓𑀁 𑀦 𑀧𑀭𑀺𑀪𑀼𑀜𑁆𑀚𑀸𑀫𑀻’’𑀢𑀺 𑀉𑀧𑀭𑀺𑀦𑀤𑀺𑀬𑀸 𑀯𑀲𑀢𑀺. 𑀫𑀳𑀸𑀧𑀼𑀭𑀺𑀲𑁄 𑀢𑀲𑁆𑀲 𑀉𑀧𑀭𑀺𑀪𑀸𑀕𑁂 𑀯𑀸𑀲𑀁 𑀓𑀧𑁆𑀧𑁂𑀢𑁆𑀯𑀸 𑀢𑀲𑁆𑀲 𑀉𑀤𑀓𑀧𑀭𑀺𑀪𑁄𑀕𑀯𑁂𑀮𑀸𑀬𑀁 𑀤𑀦𑁆𑀢𑀓𑀝𑁆𑀞𑀁 𑀔𑀸𑀤𑀺𑀢𑁆𑀯𑀸 𑀉𑀤𑀓𑁂 𑀧𑀓𑁆𑀔𑀺𑀧𑀺. 𑀢𑀸𑀧𑀲𑁄 𑀢𑀁 𑀉𑀤𑀓𑁂𑀦 𑀯𑀼𑀬𑁆𑀳𑀫𑀸𑀦𑀁 𑀤𑀺𑀲𑁆𑀯𑀸 ‘‘𑀓𑁂𑀦𑀺𑀤𑀁 𑀔𑀺𑀢𑁆𑀢’’𑀦𑁆𑀢𑀺 𑀧𑀝𑀺𑀲𑁄𑀢𑀁 𑀕𑀦𑁆𑀢𑁆𑀯𑀸 𑀫𑀳𑀸𑀧𑀼𑀭𑀺𑀲𑀁 𑀤𑀺𑀲𑁆𑀯𑀸 ‘‘𑀓𑁄 𑀏𑀢𑁆𑀣𑀸’’𑀢𑀺 𑀆𑀳. ‘‘𑀫𑀸𑀢𑀗𑁆𑀕𑀘𑀡𑁆𑀟𑀸𑀮𑁄, 𑀆𑀘𑀭𑀺𑀬𑀸’’𑀢𑀺. ‘‘𑀅𑀧𑁂𑀳𑀺, 𑀘𑀡𑁆𑀟𑀸𑀮, 𑀫𑀸 𑀉𑀧𑀭𑀺𑀦𑀤𑀺𑀬𑀸 𑀯𑀲𑀻’’𑀢𑀺. 𑀫𑀳𑀸𑀧𑀼𑀭𑀺𑀲𑁄 ‘‘𑀲𑀸𑀥𑀼, 𑀆𑀘𑀭𑀺𑀬𑀸’’𑀢𑀺 𑀳𑁂𑀝𑁆𑀞𑀸𑀦𑀤𑀺𑀬𑀸 𑀯𑀲𑀢𑀺, 𑀧𑀝𑀺𑀲𑁄𑀢𑀫𑁆𑀧𑀺 𑀤𑀦𑁆𑀢𑀓𑀝𑁆𑀞𑀁 𑀢𑀸𑀧𑀲𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙𑀢𑀺. 𑀢𑀸𑀧𑀲𑁄 𑀧𑀼𑀦 𑀕𑀦𑁆𑀢𑁆𑀯𑀸 ‘‘𑀅𑀧𑁂𑀳𑀺, 𑀘𑀡𑁆𑀟𑀸𑀮, 𑀫𑀸 𑀳𑁂𑀝𑁆𑀞𑀸𑀦𑀤𑀺𑀬𑀁 𑀯𑀲, 𑀉𑀧𑀭𑀺𑀦𑀤𑀺𑀬𑀸𑀬𑁂𑀯 𑀯𑀲𑀸’’𑀢𑀺 𑀆𑀳. 𑀫𑀳𑀸𑀧𑀼𑀭𑀺𑀲𑁄 ‘‘𑀲𑀸𑀥𑀼, 𑀆𑀘𑀭𑀺𑀬𑀸’’𑀢𑀺 𑀢𑀣𑀸 𑀅𑀓𑀸𑀲𑀺, 𑀧𑀼𑀦𑀧𑀺 𑀢𑀣𑁂𑀯 𑀅𑀳𑁄𑀲𑀺. 𑀢𑀸𑀧𑀲𑁄 𑀧𑀼𑀦𑀧𑀺 ‘‘𑀢𑀣𑀸 𑀓𑀭𑁄𑀢𑀻’’𑀢𑀺 𑀤𑀼𑀝𑁆𑀞𑁄 𑀫𑀳𑀸𑀧𑀼𑀭𑀺𑀲𑀁 𑀲𑀧𑀺 ‘‘𑀲𑀽𑀭𑀺𑀬𑀲𑁆𑀲 𑀢𑁂 𑀉𑀕𑁆𑀕𑀫𑀦𑀯𑁂𑀮𑀸𑀬 𑀲𑀢𑁆𑀢𑀥𑀸 𑀫𑀼𑀤𑁆𑀥𑀸 𑀨𑀮𑀢𑀽’’𑀢𑀺. 𑀫𑀳𑀸𑀧𑀼𑀭𑀺𑀲𑁄𑀧𑀺 ‘‘𑀲𑀸𑀥𑀼, 𑀆𑀘𑀭𑀺𑀬, 𑀅𑀳𑀁 𑀧𑀦 𑀲𑀽𑀭𑀺𑀬𑀼𑀝𑁆𑀞𑀸𑀦𑀁 𑀦 𑀤𑁂𑀫𑀻’’𑀢𑀺 𑀯𑀢𑁆𑀯𑀸 𑀲𑀽𑀭𑀺𑀬𑀼𑀝𑁆𑀞𑀸𑀦𑀁 𑀦𑀺𑀯𑀸𑀭𑁂𑀲𑀺. 𑀢𑀢𑁄 𑀭𑀢𑁆𑀢𑀺 𑀦 𑀯𑀺𑀪𑀸𑀬𑀢𑀺, 𑀅𑀦𑁆𑀥𑀓𑀸𑀭𑁄 𑀚𑀸𑀢𑁄, 𑀪𑀻𑀢𑀸 𑀩𑀦𑁆𑀥𑀼𑀫𑀢𑀻𑀯𑀸𑀲𑀺𑀦𑁄 𑀢𑀸𑀧𑀲𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀅𑀢𑁆𑀣𑀺 𑀦𑀼 𑀔𑁄, 𑀆𑀘𑀭𑀺𑀬, 𑀅𑀫𑁆𑀳𑀸𑀓𑀁 𑀲𑁄𑀢𑁆𑀣𑀺𑀪𑀸𑀯𑁄’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀢𑁂 𑀳𑀺 𑀢𑀁 ‘‘𑀅𑀭𑀳𑀸’’𑀢𑀺 𑀫𑀜𑁆𑀜𑀦𑁆𑀢𑀺. 𑀲𑁄 𑀢𑁂𑀲𑀁 𑀲𑀩𑁆𑀩𑀫𑀸𑀘𑀺𑀓𑁆𑀔𑀺. 𑀢𑁂 𑀫𑀳𑀸𑀧𑀼𑀭𑀺𑀲𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀲𑀽𑀭𑀺𑀬𑀁, 𑀪𑀦𑁆𑀢𑁂, 𑀫𑀼𑀜𑁆𑀘𑀣𑀸’’𑀢𑀺 𑀬𑀸𑀘𑀺𑀁𑀲𑀼. 𑀫𑀳𑀸𑀧𑀼𑀭𑀺𑀲𑁄 ‘‘𑀬𑀤𑀺 𑀢𑀼𑀫𑁆𑀳𑀸𑀓𑀁 𑀅𑀭𑀳𑀸 𑀆𑀕𑀦𑁆𑀢𑁆𑀯𑀸 𑀫𑀁 𑀔𑀫𑀸𑀧𑁂𑀢𑀺, 𑀫𑀼𑀜𑁆𑀘𑀸𑀫𑀻’’𑀢𑀺 𑀆𑀳.

𑀫𑀦𑀼𑀲𑁆𑀲𑀸 𑀕𑀦𑁆𑀢𑁆𑀯𑀸 𑀢𑀸𑀧𑀲𑀁 𑀆𑀳𑀁𑀲𑀼 𑁋 ‘‘𑀏𑀳𑀺, 𑀪𑀦𑁆𑀢𑁂, 𑀫𑀸𑀢𑀗𑁆𑀕𑀧𑀡𑁆𑀟𑀺𑀢𑀁 𑀔𑀫𑀸𑀧𑁂𑀳𑀺, 𑀫𑀸 𑀢𑀼𑀫𑁆𑀳𑀸𑀓𑀁 𑀓𑀮𑀳𑀓𑀸𑀭𑀡𑀸 𑀫𑀬𑀁 𑀦𑀲𑁆𑀲𑀺𑀫𑁆𑀳𑀸’’𑀢𑀺. 𑀲𑁄 ‘‘𑀦𑀸𑀳𑀁 𑀘𑀡𑁆𑀟𑀸𑀮𑀁 𑀔𑀫𑀸𑀧𑁂𑀫𑀻’’𑀢𑀺 𑀆𑀳. 𑀫𑀦𑀼𑀲𑁆𑀲𑀸 ‘‘𑀅𑀫𑁆𑀳𑁂 𑀢𑁆𑀯𑀁 𑀦𑀸𑀲𑁂𑀲𑀻’’𑀢𑀺 𑀢𑀁 𑀳𑀢𑁆𑀣𑀧𑀸𑀤𑁂𑀲𑀼 𑀕𑀳𑁂𑀢𑁆𑀯𑀸 𑀫𑀳𑀸𑀧𑀼𑀭𑀺𑀲𑀲𑁆𑀲 𑀲𑀦𑁆𑀢𑀺𑀓𑀁 𑀦𑁂𑀲𑀼𑀁. 𑀫𑀳𑀸𑀧𑀼𑀭𑀺𑀲𑁄 ‘‘𑀫𑀫 𑀧𑀸𑀤𑀫𑀽𑀮𑁂 𑀓𑀼𑀘𑁆𑀙𑀺𑀬𑀸 𑀦𑀺𑀧𑀚𑁆𑀚𑀺𑀢𑁆𑀯𑀸 𑀔𑀫𑀸𑀧𑁂𑀦𑁆𑀢𑁂 𑀔𑀫𑀸𑀫𑀻’’𑀢𑀺 𑀆𑀳. 𑀫𑀦𑀼𑀲𑁆𑀲𑀸 ‘‘𑀏𑀯𑀁 𑀓𑀭𑁄𑀳𑀻’’𑀢𑀺 𑀆𑀳𑀁𑀲𑀼. 𑀢𑀸𑀧𑀲𑁄 ‘‘𑀦𑀸𑀳𑀁 𑀘𑀡𑁆𑀟𑀸𑀮𑀁 𑀯𑀦𑁆𑀤𑀸𑀫𑀻’’𑀢𑀺. 𑀫𑀦𑀼𑀲𑁆𑀲𑀸 ‘‘𑀢𑀯 𑀙𑀦𑁆𑀤𑁂𑀦 𑀦 𑀯𑀦𑁆𑀤𑀺𑀲𑁆𑀲𑀲𑀻’’𑀢𑀺 𑀳𑀢𑁆𑀣𑀧𑀸𑀤𑀫𑀲𑁆𑀲𑀼𑀕𑀻𑀯𑀸𑀤𑀻𑀲𑀼 𑀕𑀳𑁂𑀢𑁆𑀯𑀸 𑀫𑀳𑀸𑀧𑀼𑀭𑀺𑀲𑀲𑁆𑀲 𑀧𑀸𑀤𑀫𑀽𑀮𑁂 𑀲𑀬𑀸𑀧𑁂𑀲𑀼𑀁. 𑀲𑁄 ‘‘𑀔𑀫𑀸𑀫𑀳𑀁 𑀇𑀫𑀲𑁆𑀲, 𑀅𑀧𑀺𑀘𑀸𑀳𑀁 𑀢𑀲𑁆𑀲𑁂𑀯𑀸𑀦𑀼𑀓𑀫𑁆𑀧𑀸𑀬 𑀲𑀽𑀭𑀺𑀬𑀁 𑀦 𑀫𑀼𑀜𑁆𑀘𑀸𑀫𑀺, 𑀲𑀽𑀭𑀺𑀬𑁂 𑀳𑀺 𑀉𑀕𑁆𑀕𑀢𑀫𑀢𑁆𑀢𑁂 𑀫𑀼𑀤𑁆𑀥𑀸 𑀅𑀲𑁆𑀲 𑀲𑀢𑁆𑀢𑀥𑀸 𑀨𑀮𑀺𑀲𑁆𑀲𑀢𑀻’’𑀢𑀺 𑀆𑀳. 𑀫𑀦𑀼𑀲𑁆𑀲𑀸 ‘‘𑀇𑀤𑀸𑀦𑀺, 𑀪𑀦𑁆𑀢𑁂, 𑀓𑀺𑀁 𑀓𑀸𑀢𑀩𑁆𑀩’’𑀦𑁆𑀢𑀺 𑀆𑀳𑀁𑀲𑀼. 𑀫𑀳𑀸𑀧𑀼𑀭𑀺𑀲𑁄 ‘‘𑀢𑁂𑀦 𑀳𑀺 𑀇𑀫𑀁 𑀕𑀮𑀧𑁆𑀧𑀫𑀸𑀡𑁂 𑀉𑀤𑀓𑁂 𑀞𑀧𑁂𑀢𑁆𑀯𑀸 𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑁂𑀦𑀲𑁆𑀲 𑀲𑀻𑀲𑀁 𑀧𑀝𑀺𑀘𑁆𑀙𑀸𑀤𑁂𑀣, 𑀲𑀽𑀭𑀺𑀬𑀭𑀲𑁆𑀫𑀻𑀳𑀺 𑀨𑀼𑀝𑁆𑀞𑁄 𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑁄 𑀲𑀢𑁆𑀢𑀥𑀸 𑀨𑀮𑀺𑀲𑁆𑀲𑀢𑀺. 𑀢𑀲𑁆𑀫𑀺𑀁 𑀨𑀮𑀺𑀢𑁂 𑀏𑀲 𑀅𑀜𑁆𑀜𑀢𑁆𑀭 𑀕𑀘𑁆𑀙𑀢𑀽’’𑀢𑀺 𑀆𑀳. 𑀢𑁂 𑀢𑀸𑀧𑀲𑀁 𑀳𑀢𑁆𑀣𑀧𑀸𑀤𑀸𑀤𑀻𑀲𑀼 𑀕𑀳𑁂𑀢𑁆𑀯𑀸 𑀢𑀣𑀸 𑀅𑀓𑀁𑀲𑀼. 𑀲𑀽𑀭𑀺𑀬𑁂 𑀫𑀼𑀜𑁆𑀘𑀺𑀢𑀫𑀢𑁆𑀢𑁂 𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑁄 𑀲𑀢𑁆𑀢𑀥𑀸 𑀨𑀮𑀺𑀢𑁆𑀯𑀸 𑀧𑀢𑀺, 𑀢𑀸𑀧𑀲𑁄 𑀪𑀻𑀢𑁄 𑀧𑀮𑀸𑀬𑀺. 𑀫𑀦𑀼𑀲𑁆𑀲𑀸 𑀤𑀺𑀲𑁆𑀯𑀸 ‘‘𑀧𑀲𑁆𑀲𑀣, 𑀪𑁄, 𑀲𑀫𑀡𑀲𑁆𑀲 𑀆𑀦𑀼𑀪𑀸𑀯’’𑀦𑁆𑀢𑀺 𑀤𑀦𑁆𑀢𑀓𑀝𑁆𑀞𑀧𑀓𑁆𑀔𑀺𑀧𑀦𑀫𑀸𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 ‘‘𑀦𑀢𑁆𑀣𑀺 𑀈𑀤𑀺𑀲𑁄 𑀲𑀫𑀡𑁄’’𑀢𑀺 𑀢𑀲𑁆𑀫𑀺𑀁 𑀧𑀲𑀻𑀤𑀺𑀁𑀲𑀼. 𑀢𑀢𑁄 𑀧𑀪𑀼𑀢𑀺 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀸𑀤𑀬𑁄 𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑀸 𑀫𑀸𑀢𑀗𑁆𑀕𑀧𑀡𑁆𑀟𑀺𑀢𑀲𑁆𑀲 𑀉𑀧𑀝𑁆𑀞𑀸𑀦𑀁 𑀅𑀕𑀫𑀁𑀲𑀼. 𑀲𑁄 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀩𑁆𑀭𑀳𑁆𑀫𑀮𑁄𑀓𑁂 𑀉𑀧𑁆𑀧𑀚𑁆𑀚𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀢𑀤𑀫𑀺𑀦𑀸𑀧𑀺 𑀚𑀸𑀦𑀸𑀣…𑀧𑁂… 𑀩𑁆𑀭𑀳𑁆𑀫𑀮𑁄𑀓𑀽𑀧𑀧𑀢𑁆𑀢𑀺𑀬𑀸’’𑀢𑀺.

𑁧𑁪𑁦-𑁧𑁪𑁧. 𑀏𑀯𑀁 ‘‘𑀦 𑀚𑀘𑁆𑀘𑀸 𑀯𑀲𑀮𑁄 𑀳𑁄𑀢𑀺, 𑀓𑀫𑁆𑀫𑀼𑀦𑀸 𑀯𑀲𑀮𑁄 𑀳𑁄𑀢𑀻’’𑀢𑀺 𑀲𑀸𑀥𑁂𑀢𑁆𑀯𑀸 𑀇𑀤𑀸𑀦𑀺 ‘‘𑀦 𑀚𑀘𑁆𑀘𑀸 𑀳𑁄𑀢𑀺 𑀩𑁆𑀭𑀸𑀳𑁆𑀫𑀡𑁄, 𑀓𑀫𑁆𑀫𑀼𑀦𑀸 𑀳𑁄𑀢𑀺 𑀩𑁆𑀭𑀸𑀳𑁆𑀫𑀡𑁄’’𑀢𑀺 𑀏𑀢𑀁 𑀲𑀸𑀥𑁂𑀢𑀼𑀁 𑀆𑀳 ‘‘𑀅𑀚𑁆𑀛𑀸𑀬𑀓𑀓𑀼𑀮𑁂 𑀚𑀸𑀢𑀸 …𑀧𑁂… 𑀤𑀼𑀕𑁆𑀕𑀢𑁆𑀬𑀸 𑀕𑀭𑀳𑀸𑀬𑀯𑀸’’𑀢𑀺. 𑀢𑀢𑁆𑀣 𑀅𑀚𑁆𑀛𑀸𑀬𑀓𑀓𑀼𑀮𑁂 𑀚𑀸𑀢𑀸𑀢𑀺 𑀫𑀦𑁆𑀢𑀚𑁆𑀛𑀸𑀬𑀓𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀚𑀸𑀢𑀸. ‘‘𑀅𑀚𑁆𑀛𑀸𑀬𑀓𑀸𑀓𑀼𑀴𑁂 𑀚𑀸𑀢𑀸’’𑀢𑀺𑀧𑀺 𑀧𑀸𑀞𑁄. 𑀫𑀦𑁆𑀢𑀸𑀦𑀁 𑀅𑀚𑁆𑀛𑀸𑀬𑀓𑁂 𑀅𑀦𑀼𑀧𑀓𑀼𑀝𑁆𑀞𑁂 𑀘 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀚𑀸𑀢𑀸𑀢𑀺 𑀅𑀢𑁆𑀣𑁄. 𑀫𑀦𑁆𑀢𑀸 𑀩𑀦𑁆𑀥𑀯𑀸 𑀏𑀢𑁂𑀲𑀦𑁆𑀢𑀺 𑀫𑀦𑁆𑀢𑀩𑀦𑁆𑀥𑀯𑀸. 𑀯𑁂𑀤𑀩𑀦𑁆𑀥𑀽 𑀯𑁂𑀤𑀧𑀝𑀺𑀲𑁆𑀲𑀭𑀡𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂 𑀘 𑀧𑀸𑀧𑁂𑀲𑀼 𑀓𑀫𑁆𑀫𑁂𑀲𑀼 𑀅𑀪𑀺𑀡𑁆𑀳𑀫𑀼𑀧𑀤𑀺𑀲𑁆𑀲𑀭𑁂𑀢𑀺 𑀢𑁂 𑀏𑀯𑀁 𑀓𑀼𑀮𑁂 𑀚𑀸𑀢𑀸 𑀫𑀦𑁆𑀢𑀩𑀦𑁆𑀥𑀯𑀸 𑀘 𑀲𑀫𑀸𑀦𑀸𑀧𑀺 𑀬𑀤𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀲𑀼 𑀧𑀸𑀧𑀓𑀫𑁆𑀫𑁂𑀲𑀼 𑀧𑀼𑀦𑀧𑁆𑀧𑀼𑀦𑀁 𑀉𑀧𑀤𑀺𑀲𑁆𑀲𑀦𑁆𑀢𑀺, 𑀅𑀣 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀕𑀸𑀭𑀬𑁆𑀳𑀸 𑀲𑀫𑁆𑀧𑀭𑀸𑀬𑁂 𑀘 𑀤𑀼𑀕𑁆𑀕𑀢𑀺 𑀢𑁂 𑀏𑀯𑀫𑀼𑀧𑀤𑀺𑀲𑁆𑀲𑀫𑀸𑀦𑀸 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀫𑀸𑀢𑀸𑀧𑀺𑀢𑀽𑀳𑀺𑀧𑀺 ‘‘𑀦𑀬𑀺𑀫𑁂 𑀅𑀫𑁆𑀳𑀸𑀓𑀁 𑀧𑀼𑀢𑁆𑀢𑀸, 𑀤𑀼𑀚𑁆𑀚𑀸𑀢𑀸 𑀏𑀢𑁂 𑀓𑀼𑀮𑀲𑁆𑀲 𑀅𑀗𑁆𑀕𑀸𑀭𑀪𑀽𑀢𑀸, 𑀦𑀺𑀓𑁆𑀓𑀟𑁆𑀠𑀣 𑀦𑁂’’𑀢𑀺, 𑀩𑁆𑀭𑀸𑀳𑁆𑀫𑀡𑁂𑀳𑀺𑀧𑀺 ‘‘𑀕𑀳𑀧𑀢𑀺𑀓𑀸 𑀏𑀢𑁂, 𑀦 𑀏𑀢𑁂 𑀩𑁆𑀭𑀸𑀳𑁆𑀫𑀡𑀸, 𑀫𑀸 𑀦𑁂𑀲𑀁 𑀲𑀤𑁆𑀥𑀬𑀜𑁆𑀜𑀣𑀸𑀮𑀺𑀧𑀸𑀓𑀸𑀤𑀻𑀲𑀼 𑀧𑀯𑁂𑀲𑀁 𑀤𑁂𑀣, 𑀫𑀸 𑀦𑁂𑀳𑀺 𑀲𑀤𑁆𑀥𑀺𑀁 𑀲𑀮𑁆𑀮𑀧𑀣𑀸’’𑀢𑀺, 𑀅𑀜𑁆𑀜𑁂𑀳𑀺𑀧𑀺 𑀫𑀦𑀼𑀲𑁆𑀲𑁂𑀳𑀺 ‘‘𑀧𑀸𑀧𑀓𑀫𑁆𑀫𑀦𑁆𑀢𑀸 𑀏𑀢𑁂, 𑀦 𑀏𑀢𑁂 𑀩𑁆𑀭𑀸𑀳𑁆𑀫𑀡𑀸’’𑀢𑀺 𑀏𑀯𑀁 𑀕𑀸𑀭𑀬𑁆𑀳𑀸 𑀳𑁄𑀦𑁆𑀢𑀺. 𑀲𑀫𑁆𑀧𑀭𑀸𑀬𑁂 𑀘 𑀦𑁂𑀲𑀁 𑀤𑀼𑀕𑁆𑀕𑀢𑀺 𑀦𑀺𑀭𑀬𑀸𑀤𑀺𑀪𑁂𑀤𑀸, 𑀤𑀼𑀕𑁆𑀕𑀢𑀺 𑀏𑀢𑁂𑀲𑀁 𑀧𑀭𑀮𑁄𑀓𑁂 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀲𑀫𑁆𑀧𑀭𑀸𑀬𑁂 𑀯𑀸𑀢𑀺𑀧𑀺 𑀧𑀸𑀞𑁄. 𑀧𑀭𑀮𑁄𑀓𑁂 𑀏𑀢𑁂𑀲𑀁 𑀤𑀼𑀓𑁆𑀔𑀲𑁆𑀲 𑀕𑀢𑀺 𑀤𑀼𑀕𑁆𑀕𑀢𑀺, 𑀤𑀼𑀓𑁆𑀔𑀧𑁆𑀧𑀢𑁆𑀢𑀺𑀬𑁂𑀯 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀦 𑀦𑁂 𑀚𑀸𑀢𑀺 𑀦𑀺𑀯𑀸𑀭𑁂𑀢𑀺, 𑀤𑀼𑀕𑁆𑀕𑀢𑁆𑀬𑀸 𑀕𑀭𑀳𑀸𑀬 𑀯𑀸𑀢𑀺 𑀲𑀸 𑀢𑀣𑀸 𑀉𑀓𑁆𑀓𑀝𑁆𑀞𑀸𑀧𑀺 𑀬𑀁 𑀢𑁆𑀯𑀁 𑀲𑀸𑀭𑀢𑁄 𑀧𑀘𑁆𑀘𑁂𑀲𑀺, 𑀚𑀸𑀢𑀺 𑀏𑀢𑁂 𑀧𑀸𑀧𑀓𑀫𑁆𑀫𑁂𑀲𑀼 𑀧𑀤𑀺𑀲𑁆𑀲𑀦𑁆𑀢𑁂 𑀩𑁆𑀭𑀸𑀳𑁆𑀫𑀡𑁂 ‘‘𑀲𑀫𑁆𑀧𑀭𑀸𑀬𑁂 𑀘 𑀤𑀼𑀕𑁆𑀕𑀢𑀻’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀬 𑀤𑀼𑀕𑁆𑀕𑀢𑀺𑀬𑀸 𑀯𑀸, ‘‘𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀕𑀸𑀭𑀬𑁆𑀳𑀸’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀬 𑀕𑀭𑀳𑀸𑀬 𑀯𑀸 𑀦 𑀦𑀺𑀯𑀸𑀭𑁂𑀢𑀺.

𑁧𑁪𑁨. 𑀏𑀯𑀁 𑀪𑀕𑀯𑀸 𑀅𑀚𑁆𑀛𑀸𑀬𑀓𑀓𑀼𑀮𑁂 𑀚𑀸𑀢𑀸𑀦𑀫𑁆𑀧𑀺 𑀩𑁆𑀭𑀸𑀳𑁆𑀫𑀡𑀸𑀦𑀁 𑀕𑀸𑀭𑀬𑁆𑀳𑀸𑀤𑀺𑀓𑀫𑁆𑀫𑀯𑀲𑁂𑀦 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀧𑀢𑀺𑀢𑀪𑀸𑀯𑀁 𑀤𑀻𑀧𑁂𑀦𑁆𑀢𑁄 𑀤𑀼𑀕𑁆𑀕𑀢𑀺𑀕𑀫𑀦𑁂𑀦 𑀘 𑀲𑀫𑁆𑀧𑀭𑀸𑀬𑁂 𑀩𑁆𑀭𑀸𑀳𑁆𑀫𑀡𑀚𑀸𑀢𑀺𑀬𑀸 𑀅𑀪𑀸𑀯𑀁 𑀤𑀻𑀧𑁂𑀦𑁆𑀢𑁄 ‘‘𑀦 𑀚𑀘𑁆𑀘𑀸 𑀳𑁄𑀢𑀺 𑀩𑁆𑀭𑀸𑀳𑁆𑀫𑀡𑁄, 𑀓𑀫𑁆𑀫𑀼𑀦𑀸 𑀳𑁄𑀢𑀺 𑀩𑁆𑀭𑀸𑀳𑁆𑀫𑀡𑁄’’𑀢𑀺 𑀏𑀢𑀫𑁆𑀧𑀺 𑀅𑀢𑁆𑀣𑀁 𑀲𑀸𑀥𑁂𑀢𑁆𑀯𑀸 𑀇𑀤𑀸𑀦𑀺 𑀤𑀼𑀯𑀺𑀥𑀫𑁆𑀧𑀺 𑀅𑀢𑁆𑀣𑀁 𑀦𑀺𑀕𑀫𑁂𑀦𑁆𑀢𑁄 𑀆𑀳, 𑀏𑀯𑀁 𑀩𑁆𑀭𑀸𑀳𑁆𑀫𑀡 𑁋

‘‘𑀦 𑀚𑀘𑁆𑀘𑀸 𑀯𑀲𑀮𑁄 𑀳𑁄𑀢𑀺, 𑀦 𑀚𑀘𑁆𑀘𑀸 𑀳𑁄𑀢𑀺 𑀩𑁆𑀭𑀸𑀳𑁆𑀫𑀡𑁄;

𑀓𑀫𑁆𑀫𑀼𑀦𑀸 𑀯𑀲𑀮𑁄 𑀳𑁄𑀢𑀺, 𑀓𑀫𑁆𑀫𑀼𑀦𑀸 𑀳𑁄𑀢𑀺 𑀩𑁆𑀭𑀸𑀳𑁆𑀫𑀡𑁄’’𑀢𑀺.

𑀲𑁂𑀲𑀁 𑀓𑀲𑀺𑀪𑀸𑀭𑀤𑁆𑀯𑀸𑀚𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑀫𑁂𑀯. 𑀯𑀺𑀲𑁂𑀲𑀢𑁄 𑀯𑀸 𑀏𑀢𑁆𑀣 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀯𑀸𑀢𑀺𑀆𑀤𑀻𑀦𑀁 𑀏𑀯𑀁 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸 𑁋 𑀬𑀣𑀸 𑀓𑁄𑀘𑀺 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀯𑀸 𑀉𑀓𑁆𑀓𑀼𑀚𑁆𑀚𑁂𑀬𑁆𑀬, 𑀏𑀯𑀁 𑀫𑀁 𑀓𑀫𑁆𑀫𑀯𑀺𑀫𑀼𑀔𑀁 𑀚𑀸𑀢𑀺𑀯𑀸𑀤𑁂 𑀧𑀢𑀺𑀢𑀁 ‘‘𑀚𑀸𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀯𑀲𑀮𑀪𑀸𑀯𑁄 𑀳𑁄𑀢𑀻’’𑀢𑀺 𑀤𑀺𑀝𑁆𑀞𑀺𑀢𑁄 𑀯𑀼𑀝𑁆𑀞𑀸𑀧𑁂𑀦𑁆𑀢𑁂𑀦, 𑀬𑀣𑀸 𑀧𑀝𑀺𑀘𑁆𑀙𑀦𑁆𑀦𑀁 𑀯𑀺𑀯𑀭𑁂𑀬𑁆𑀬, 𑀏𑀯𑀁 𑀚𑀸𑀢𑀺𑀯𑀸𑀤𑀧𑀝𑀺𑀘𑁆𑀙𑀦𑁆𑀦𑀁 𑀓𑀫𑁆𑀫𑀯𑀸𑀤𑀁 𑀯𑀺𑀯𑀭𑀦𑁆𑀢𑁂𑀦, 𑀬𑀣𑀸 𑀫𑀽𑀴𑁆𑀳𑀲𑁆𑀲 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬, 𑀏𑀯𑀁 𑀩𑁆𑀭𑀸𑀳𑁆𑀫𑀡𑀯𑀲𑀮𑀪𑀸𑀯𑀲𑁆𑀲 𑀅𑀲𑀫𑁆𑀪𑀺𑀦𑁆𑀦𑀉𑀚𑀼𑀫𑀕𑁆𑀕𑀁 𑀆𑀘𑀺𑀓𑁆𑀔𑀦𑁆𑀢𑁂𑀦, 𑀬𑀣𑀸 𑀅𑀦𑁆𑀥𑀓𑀸𑀭𑁂 𑀯𑀸 𑀢𑁂𑀮𑀧𑀚𑁆𑀚𑁄𑀢𑀁 𑀥𑀸𑀭𑁂𑀬𑁆𑀬, 𑀏𑀯𑀁 𑀫𑀸𑀢𑀗𑁆𑀕𑀸𑀤𑀺𑀦𑀺𑀤𑀲𑁆𑀲𑀦𑀧𑀚𑁆𑀚𑁄𑀢𑀥𑀸𑀭𑀡𑁂𑀦 𑀫𑀬𑁆𑀳𑀁 𑀪𑁄𑀢𑀸 𑀕𑁄𑀢𑀫𑁂𑀦 𑀏𑀢𑁂𑀳𑀺 𑀧𑀭𑀺𑀬𑀸𑀬𑁂𑀳𑀺 𑀧𑀓𑀸𑀲𑀺𑀢𑀢𑁆𑀢𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀅𑀕𑁆𑀕𑀺𑀓𑀪𑀸𑀭𑀤𑁆𑀯𑀸𑀚𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.