𑁪. 𑀓𑀲𑀺𑀪𑀸𑀭𑀤𑁆𑀯𑀸𑀚𑀲𑀼𑀢𑁆𑀢𑀯𑀡𑁆𑀡𑀦𑀸

𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀓𑀲𑀺𑀪𑀸𑀭𑀤𑁆𑀯𑀸𑀚𑀲𑀼𑀢𑁆𑀢𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀫𑀕𑀥𑁂𑀲𑀼 𑀯𑀺𑀳𑀭𑀦𑁆𑀢𑁄 𑀤𑀓𑁆𑀔𑀺𑀡𑀸𑀕𑀺𑀭𑀺𑀲𑁆𑀫𑀺𑀁 𑀏𑀓𑀦𑀸𑀮𑀸𑀬𑀁 𑀩𑁆𑀭𑀸𑀳𑁆𑀫𑀡𑀕𑀸𑀫𑁂 𑀧𑀼𑀭𑁂𑀪𑀢𑁆𑀢𑀓𑀺𑀘𑁆𑀘𑀁 𑀧𑀘𑁆𑀙𑀸𑀪𑀢𑁆𑀢𑀓𑀺𑀘𑁆𑀘𑀦𑁆𑀢𑀺 𑀇𑀫𑁂𑀲𑀼 𑀤𑁆𑀯𑀻𑀲𑀼 𑀩𑀼𑀤𑁆𑀥𑀓𑀺𑀘𑁆𑀘𑁂𑀲𑀼 𑀧𑀼𑀭𑁂𑀪𑀢𑁆𑀢𑀓𑀺𑀘𑁆𑀘𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀓𑀲𑀺𑀪𑀸𑀭𑀤𑁆𑀯𑀸𑀚𑀁 𑀩𑁆𑀭𑀸𑀳𑁆𑀫𑀡𑀁 𑀅𑀭𑀳𑀢𑁆𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀁 𑀤𑀺𑀲𑁆𑀯𑀸 ‘‘𑀢𑀢𑁆𑀣 𑀫𑀬𑀺 𑀕𑀢𑁂 𑀬𑀣𑀸 𑀧𑀯𑀢𑁆𑀢𑀺𑀲𑁆𑀲𑀢𑀺, 𑀢𑀢𑁄 𑀓𑀣𑀸𑀯𑀲𑀸𑀦𑁂 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀏𑀲 𑀩𑁆𑀭𑀸𑀳𑁆𑀫𑀡𑁄 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀢𑀻’’𑀢𑀺 𑀘 𑀜𑀢𑁆𑀯𑀸, 𑀢𑀢𑁆𑀣 𑀕𑀦𑁆𑀢𑁆𑀯𑀸, 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸, 𑀇𑀫𑀁 𑀲𑀼𑀢𑁆𑀢𑀁 𑀅𑀪𑀸𑀲𑀺.

𑀢𑀢𑁆𑀣 𑀲𑀺𑀬𑀸 ‘‘𑀓𑀢𑀫𑀁 𑀩𑀼𑀤𑁆𑀥𑀸𑀦𑀁 𑀧𑀼𑀭𑁂𑀪𑀢𑁆𑀢𑀓𑀺𑀘𑁆𑀘𑀁, 𑀓𑀢𑀫𑀁 𑀧𑀘𑁆𑀙𑀸𑀪𑀢𑁆𑀢𑀓𑀺𑀘𑁆𑀘’’𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋 𑀩𑀼𑀤𑁆𑀥𑁄 𑀪𑀕𑀯𑀸 𑀧𑀸𑀢𑁄 𑀏𑀯 𑀉𑀝𑁆𑀞𑀸𑀬 𑀉𑀧𑀝𑁆𑀞𑀸𑀓𑀸𑀦𑀼𑀕𑁆𑀕𑀳𑀢𑁆𑀣𑀁 𑀲𑀭𑀻𑀭𑀨𑀸𑀲𑀼𑀓𑀢𑁆𑀣𑀜𑁆𑀘 𑀫𑀼𑀔𑀥𑁄𑀯𑀦𑀸𑀤𑀺𑀲𑀭𑀻𑀭𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀬𑀸𑀯 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸, 𑀢𑀸𑀯 𑀯𑀺𑀯𑀺𑀢𑁆𑀢𑀸𑀲𑀦𑁂 𑀯𑀻𑀢𑀺𑀦𑀸𑀫𑁂𑀢𑁆𑀯𑀸, 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸𑀬 𑀦𑀺𑀯𑀸𑀲𑁂𑀢𑁆𑀯𑀸, 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸, 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸, 𑀧𑀢𑁆𑀢𑀫𑀸𑀤𑀸𑀬 𑀓𑀤𑀸𑀘𑀺 𑀏𑀓𑀓𑁄𑀯 𑀓𑀤𑀸𑀘𑀺 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑀺, 𑀓𑀤𑀸𑀘𑀺 𑀧𑀓𑀢𑀺𑀬𑀸, 𑀓𑀤𑀸𑀘𑀺 𑀅𑀦𑁂𑀓𑁂𑀳𑀺 𑀧𑀸𑀝𑀺𑀳𑀸𑀭𑀺𑀬𑁂𑀳𑀺 𑀯𑀢𑁆𑀢𑀫𑀸𑀦𑁂𑀳𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑁄 𑀮𑁄𑀓𑀦𑀸𑀣𑀲𑁆𑀲 𑀧𑀼𑀭𑀢𑁄 𑀧𑀼𑀭𑀢𑁄 𑀕𑀦𑁆𑀢𑁆𑀯𑀸 𑀫𑀼𑀤𑀼𑀕𑀢𑀺𑀬𑁄 𑀯𑀸𑀢𑀸 𑀧𑀣𑀯𑀺𑀁 𑀲𑁄𑀥𑁂𑀦𑁆𑀢𑀺; 𑀯𑀮𑀸𑀳𑀓𑀸 𑀉𑀤𑀓𑀨𑀼𑀲𑀺𑀢𑀸𑀦𑀺 𑀫𑀼𑀜𑁆𑀘𑀦𑁆𑀢𑀸 𑀫𑀕𑁆𑀕𑁂 𑀭𑁂𑀡𑀼𑀁 𑀯𑀽𑀧𑀲𑀫𑁂𑀢𑁆𑀯𑀸 𑀉𑀧𑀭𑀺 𑀯𑀺𑀢𑀸𑀦𑀁 𑀳𑀼𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺. 𑀅𑀧𑀭𑁂 𑀯𑀸𑀢𑀸 𑀧𑀼𑀧𑁆𑀨𑀸𑀦𑀺 𑀉𑀧𑀲𑀁𑀳𑀭𑀺𑀢𑁆𑀯𑀸 𑀫𑀕𑁆𑀕𑁂 𑀑𑀓𑀺𑀭𑀦𑁆𑀢𑀺, 𑀉𑀦𑁆𑀦𑀢𑀸 𑀪𑀽𑀫𑀺𑀧𑁆𑀧𑀤𑁂𑀲𑀸 𑀑𑀦𑀫𑀦𑁆𑀢𑀺, 𑀑𑀦𑀢𑀸 𑀉𑀦𑁆𑀦𑀫𑀦𑁆𑀢𑀺, 𑀧𑀸𑀤𑀦𑀺𑀓𑁆𑀔𑁂𑀧𑀲𑀫𑀬𑁂 𑀲𑀫𑀸𑀯 𑀪𑀽𑀫𑀺 𑀳𑁄𑀢𑀺, 𑀲𑀼𑀔𑀲𑀫𑁆𑀨𑀲𑁆𑀲𑀸𑀦𑀺 𑀭𑀣𑀘𑀓𑁆𑀓𑀫𑀢𑁆𑀢𑀸𑀦𑀺 𑀧𑀤𑀼𑀫𑀧𑀼𑀧𑁆𑀨𑀸𑀦𑀺 𑀯𑀸 𑀧𑀸𑀤𑁂 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀺, 𑀇𑀦𑁆𑀤𑀔𑀻𑀮𑀲𑁆𑀲 𑀅𑀦𑁆𑀢𑁄 𑀞𑀧𑀺𑀢𑀫𑀢𑁆𑀢𑁂 𑀤𑀓𑁆𑀔𑀺𑀡𑀧𑀸𑀤𑁂 𑀲𑀭𑀻𑀭𑀸 𑀙𑀩𑁆𑀩𑀡𑁆𑀡𑀭𑀲𑁆𑀫𑀺𑀬𑁄 𑀦𑀺𑀘𑁆𑀙𑀭𑀺𑀢𑁆𑀯𑀸 𑀲𑀼𑀯𑀡𑁆𑀡𑀭𑀲𑀧𑀺𑀜𑁆𑀚𑀭𑀸𑀦𑀺 𑀯𑀺𑀬 𑀘𑀺𑀢𑁆𑀭𑀧𑀝𑀧𑀭𑀺𑀓𑁆𑀔𑀺𑀢𑁆𑀢𑀸𑀦𑀺 𑀯𑀺𑀬 𑀘 𑀧𑀸𑀲𑀸𑀤𑀓𑀽𑀝𑀸𑀕𑀸𑀭𑀸𑀤𑀻𑀦𑀺 𑀓𑀭𑁄𑀦𑁆𑀢𑀺𑀬𑁄 𑀇𑀢𑁄 𑀘𑀺𑀢𑁄 𑀘 𑀯𑀺𑀥𑀸𑀯𑀦𑁆𑀢𑀺, 𑀳𑀢𑁆𑀣𑀺𑀅𑀲𑁆𑀲𑀯𑀺𑀳𑀗𑁆𑀕𑀸𑀤𑀬𑁄 𑀲𑀓𑀲𑀓𑀝𑁆𑀞𑀸𑀦𑁂𑀲𑀼 𑀞𑀺𑀢𑀸𑀬𑁂𑀯 𑀫𑀥𑀼𑀭𑁂𑀦𑀸𑀓𑀸𑀭𑁂𑀦 𑀲𑀤𑁆𑀤𑀁 𑀓𑀭𑁄𑀦𑁆𑀢𑀺, 𑀢𑀣𑀸 𑀪𑁂𑀭𑀺𑀯𑀻𑀡𑀸𑀤𑀻𑀦𑀺 𑀢𑀽𑀭𑀺𑀬𑀸𑀦𑀺 𑀫𑀦𑀼𑀲𑁆𑀲𑀸𑀦𑀁 𑀓𑀸𑀬𑀽𑀧𑀕𑀸𑀦𑀺 𑀘 𑀆𑀪𑀭𑀡𑀸𑀦𑀺, 𑀢𑁂𑀦 𑀲𑀜𑁆𑀜𑀸𑀡𑁂𑀦 𑀫𑀦𑀼𑀲𑁆𑀲𑀸 𑀚𑀸𑀦𑀦𑁆𑀢𑀺 ‘‘𑀅𑀚𑁆𑀚 𑀪𑀕𑀯𑀸 𑀇𑀥 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑁄’’𑀢𑀺. 𑀢𑁂 𑀲𑀼𑀦𑀺𑀯𑀢𑁆𑀣𑀸 𑀲𑀼𑀧𑀸𑀭𑀼𑀢𑀸 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀦𑀺 𑀆𑀤𑀸𑀬 𑀖𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑁆𑀢𑀭𑀯𑀻𑀣𑀺𑀁 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀳𑀺 𑀲𑀓𑁆𑀓𑀘𑁆𑀘𑀁 𑀧𑀽𑀚𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑁋 ‘‘𑀅𑀫𑁆𑀳𑀸𑀓𑀁, 𑀪𑀦𑁆𑀢𑁂, 𑀤𑀲 𑀪𑀺𑀓𑁆𑀔𑀽, 𑀅𑀫𑁆𑀳𑀸𑀓𑀁 𑀯𑀻𑀲𑀢𑀺, 𑀅𑀫𑁆𑀳𑀸𑀓𑀁 𑀪𑀺𑀓𑁆𑀔𑀼𑀲𑀢𑀁 𑀤𑁂𑀣𑀸’’𑀢𑀺 𑀬𑀸𑀘𑀺𑀢𑁆𑀯𑀸 𑀪𑀕𑀯𑀢𑁄𑀧𑀺 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸, 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀲𑀓𑁆𑀓𑀘𑁆𑀘𑀁 𑀧𑀺𑀡𑁆𑀟𑀧𑀸𑀢𑁂𑀦 𑀧𑀝𑀺𑀫𑀸𑀦𑁂𑀦𑁆𑀢𑀺.

𑀪𑀕𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀢𑁂𑀲𑀁 𑀲𑀦𑁆𑀢𑀸𑀦𑀸𑀦𑀺 𑀑𑀮𑁄𑀓𑁂𑀢𑁆𑀯𑀸 𑀢𑀣𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀬𑀣𑀸 𑀓𑁂𑀘𑀺 𑀲𑀭𑀡𑀕𑀫𑀦𑁂 𑀧𑀢𑀺𑀝𑁆𑀞𑀳𑀦𑁆𑀢𑀺, 𑀓𑁂𑀘𑀺 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼, 𑀓𑁂𑀘𑀺 𑀲𑁄𑀢𑀸𑀧𑀢𑁆𑀢𑀺𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀺𑀨𑀮𑀸𑀦𑀁 𑀅𑀜𑁆𑀜𑀢𑀭𑀲𑁆𑀫𑀺𑀁, 𑀓𑁂𑀘𑀺 𑀧𑀩𑁆𑀩𑀚𑀺𑀢𑁆𑀯𑀸 𑀅𑀕𑁆𑀕𑀨𑀮𑁂 𑀅𑀭𑀳𑀢𑁆𑀢𑁂𑀢𑀺. 𑀏𑀯𑀁 𑀢𑀣𑀸 𑀢𑀣𑀸 𑀚𑀦𑀁 𑀅𑀦𑀼𑀕𑁆𑀕𑀳𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀕𑀘𑁆𑀙𑀢𑀺. 𑀢𑀢𑁆𑀣 𑀫𑀡𑁆𑀟𑀮𑀫𑀸𑀴𑁂 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀻𑀤𑀢𑀺 𑀪𑀺𑀓𑁆𑀔𑀽𑀦𑀁 𑀪𑀢𑁆𑀢𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑀁 𑀆𑀕𑀫𑀬𑀫𑀸𑀦𑁄. 𑀢𑀢𑁄 𑀪𑀺𑀓𑁆𑀔𑀽𑀦𑀁 𑀪𑀢𑁆𑀢𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀧𑀝𑁆𑀞𑀸𑀓𑁄 𑀪𑀕𑀯𑀢𑁄 𑀦𑀺𑀯𑁂𑀤𑁂𑀢𑀺. 𑀅𑀣 𑀪𑀕𑀯𑀸 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀲𑀢𑀺. 𑀇𑀤𑀁 𑀢𑀸𑀯 𑀧𑀼𑀭𑁂𑀪𑀢𑁆𑀢𑀓𑀺𑀘𑁆𑀘𑀁. 𑀬𑀜𑁆𑀘𑁂𑀢𑁆𑀣 𑀦 𑀯𑀼𑀢𑁆𑀢𑀁, 𑀢𑀁 𑀩𑁆𑀭𑀳𑁆𑀫𑀸𑀬𑀼𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀕𑀳𑁂𑀢𑀩𑁆𑀩𑀁.

𑀅𑀣 𑀪𑀕𑀯𑀸 𑀏𑀯𑀁 𑀓𑀢𑀧𑀼𑀭𑁂𑀪𑀢𑁆𑀢𑀓𑀺𑀘𑁆𑀘𑁄 𑀕𑀦𑁆𑀥𑀓𑀼𑀝𑀺𑀬𑀸 𑀉𑀧𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀧𑀸𑀤𑁂 𑀧𑀓𑁆𑀔𑀸𑀮𑁂𑀢𑁆𑀯𑀸, 𑀧𑀸𑀤𑀧𑀻𑀞𑁂 𑀞𑀢𑁆𑀯𑀸, 𑀪𑀺𑀓𑁆𑀔𑀼𑀲𑀗𑁆𑀖𑀁 𑀑𑀯𑀤𑀢𑀺 𑁋 ‘‘𑀪𑀺𑀓𑁆𑀔𑀯𑁂, 𑀅𑀧𑁆𑀧𑀫𑀸𑀤𑁂𑀦 𑀲𑀫𑁆𑀧𑀸𑀤𑁂𑀣, 𑀩𑀼𑀤𑁆𑀥𑀼𑀧𑁆𑀧𑀸𑀤𑁄 𑀤𑀼𑀮𑁆𑀮𑀪𑁄 𑀮𑁄𑀓𑀲𑁆𑀫𑀺𑀁, 𑀫𑀦𑀼𑀲𑁆𑀲𑀧𑀝𑀺𑀮𑀸𑀪𑁄 𑀤𑀼𑀮𑁆𑀮𑀪𑁄, 𑀲𑀤𑁆𑀥𑀸𑀲𑀫𑁆𑀧𑀢𑁆𑀢𑀺 𑀤𑀼𑀮𑁆𑀮𑀪𑀸, 𑀧𑀩𑁆𑀩𑀚𑁆𑀚𑀸 𑀤𑀼𑀮𑁆𑀮𑀪𑀸, 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀁 𑀤𑀼𑀮𑁆𑀮𑀪𑀁 𑀮𑁄𑀓𑀲𑁆𑀫𑀺’’𑀦𑁆𑀢𑀺. 𑀢𑀢𑁄 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀧𑀼𑀘𑁆𑀙𑀦𑁆𑀢𑀺. 𑀅𑀣 𑀪𑀕𑀯𑀸 𑀪𑀺𑀓𑁆𑀔𑀽𑀦𑀁 𑀘𑀭𑀺𑀬𑀯𑀲𑁂𑀦 𑀓𑀫𑁆𑀫𑀝𑁆𑀞𑀸𑀦𑀁 𑀤𑁂𑀢𑀺. 𑀢𑁂 𑀓𑀫𑁆𑀫𑀝𑁆𑀞𑀸𑀦𑀁 𑀉𑀕𑁆𑀕𑀳𑁂𑀢𑁆𑀯𑀸, 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸, 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑀺; 𑀓𑁂𑀘𑀺 𑀅𑀭𑀜𑁆𑀜𑀁, 𑀓𑁂𑀘𑀺 𑀭𑀼𑀓𑁆𑀔𑀫𑀽𑀮𑀁, 𑀓𑁂𑀘𑀺 𑀧𑀩𑁆𑀩𑀢𑀸𑀤𑀻𑀦𑀁 𑀅𑀜𑁆𑀜𑀢𑀭𑀁, 𑀓𑁂𑀘𑀺 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀪𑀯𑀦𑀁…𑀧𑁂… 𑀓𑁂𑀘𑀺 𑀯𑀲𑀯𑀢𑁆𑀢𑀺𑀪𑀯𑀦𑀦𑁆𑀢𑀺. 𑀢𑀢𑁄 𑀪𑀕𑀯𑀸 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀲𑀺𑀢𑁆𑀯𑀸 𑀲𑀘𑁂 𑀆𑀓𑀗𑁆𑀔𑀢𑀺, 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀫𑀼𑀳𑀼𑀢𑁆𑀢𑀁 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺. 𑀅𑀣 𑀲𑀫𑀲𑁆𑀲𑀸𑀲𑀺𑀢𑀓𑀸𑀬𑁄 𑀉𑀝𑁆𑀞𑀳𑀺𑀢𑁆𑀯𑀸 𑀤𑀼𑀢𑀺𑀬𑀪𑀸𑀕𑁂 𑀮𑁄𑀓𑀁 𑀯𑁄𑀮𑁄𑀓𑁂𑀢𑀺. 𑀢𑀢𑀺𑀬𑀪𑀸𑀕𑁂 𑀬𑀁 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀺, 𑀢𑀢𑁆𑀣 𑀚𑀦𑁄 𑀧𑀼𑀭𑁂𑀪𑀢𑁆𑀢𑀁 𑀤𑀸𑀦𑀁 𑀤𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀲𑀼𑀦𑀺𑀯𑀢𑁆𑀣𑁄 𑀲𑀼𑀧𑀸𑀭𑀼𑀢𑁄 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀦𑀺 𑀆𑀤𑀸𑀬 𑀯𑀺𑀳𑀸𑀭𑁂 𑀲𑀦𑁆𑀦𑀺𑀧𑀢𑀢𑀺. 𑀢𑀢𑁄 𑀪𑀕𑀯𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀅𑀦𑀼𑀭𑀽𑀧𑁂𑀦 𑀧𑀸𑀝𑀺𑀳𑀸𑀭𑀺𑀬𑁂𑀦 𑀕𑀦𑁆𑀢𑁆𑀯𑀸 𑀥𑀫𑁆𑀫𑀲𑀪𑀸𑀬𑀁 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀚𑁆𑀚 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀓𑀸𑀮𑀬𑀼𑀢𑁆𑀢𑀁 𑀧𑀫𑀸𑀡𑀬𑀼𑀢𑁆𑀢𑀁. 𑀅𑀣 𑀓𑀸𑀮𑀁 𑀯𑀺𑀤𑀺𑀢𑁆𑀯𑀸 𑀧𑀭𑀺𑀲𑀁 𑀉𑀬𑁆𑀬𑁄𑀚𑁂𑀢𑀺.

𑀢𑀢𑁄 𑀲𑀘𑁂 𑀕𑀢𑁆𑀢𑀸𑀦𑀺 𑀑𑀲𑀺𑀜𑁆𑀘𑀺𑀢𑀼𑀓𑀸𑀫𑁄 𑀳𑁄𑀢𑀺. 𑀅𑀣 𑀩𑀼𑀤𑁆𑀥𑀸𑀲𑀦𑀸 𑀉𑀝𑁆𑀞𑀸𑀬 𑀉𑀧𑀝𑁆𑀞𑀸𑀓𑁂𑀦 𑀉𑀤𑀓𑀧𑀝𑀺𑀬𑀸𑀤𑀺𑀢𑁄𑀓𑀸𑀲𑀁 𑀕𑀦𑁆𑀢𑁆𑀯𑀸, 𑀉𑀧𑀝𑁆𑀞𑀸𑀓𑀳𑀢𑁆𑀣𑀢𑁄 𑀉𑀤𑀓𑀲𑀸𑀝𑀺𑀓𑀁 𑀕𑀳𑁂𑀢𑁆𑀯𑀸, 𑀦𑁆𑀳𑀸𑀦𑀓𑁄𑀝𑁆𑀞𑀓𑀁 𑀧𑀯𑀺𑀲𑀢𑀺. 𑀉𑀧𑀝𑁆𑀞𑀸𑀓𑁄𑀧𑀺 𑀩𑀼𑀤𑁆𑀥𑀸𑀲𑀦𑀁 𑀆𑀦𑁂𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀧𑀭𑀺𑀯𑁂𑀡𑁂 𑀧𑀜𑁆𑀜𑀸𑀧𑁂𑀢𑀺. 𑀪𑀕𑀯𑀸 𑀕𑀢𑁆𑀢𑀸𑀦𑀺 𑀑𑀲𑀺𑀜𑁆𑀘𑀺𑀢𑁆𑀯𑀸, 𑀲𑀼𑀭𑀢𑁆𑀢𑀤𑀼𑀧𑀝𑁆𑀝𑀁 𑀦𑀺𑀯𑀸𑀲𑁂𑀢𑁆𑀯𑀸, 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸, 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀢𑁆𑀯𑀸, 𑀢𑀢𑁆𑀣 𑀆𑀕𑀦𑁆𑀢𑁆𑀯𑀸, 𑀦𑀺𑀲𑀻𑀤𑀢𑀺 𑀏𑀓𑀓𑁄𑀯 𑀫𑀼𑀳𑀼𑀢𑁆𑀢𑀁 𑀧𑀝𑀺𑀲𑀮𑁆𑀮𑀻𑀦𑁄. 𑀅𑀣 𑀪𑀺𑀓𑁆𑀔𑀽 𑀢𑀢𑁄 𑀢𑀢𑁄 𑀆𑀕𑀫𑁆𑀫 𑀪𑀕𑀯𑀢𑁄 𑀉𑀧𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑀺. 𑀢𑀢𑁆𑀣 𑀏𑀓𑀘𑁆𑀘𑁂 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑀺, 𑀏𑀓𑀘𑁆𑀘𑁂 𑀓𑀫𑁆𑀫𑀝𑁆𑀞𑀸𑀦𑀁, 𑀏𑀓𑀘𑁆𑀘𑁂 𑀥𑀫𑁆𑀫𑀲𑁆𑀲𑀯𑀦𑀁 𑀬𑀸𑀘𑀦𑁆𑀢𑀺. 𑀪𑀕𑀯𑀸 𑀢𑁂𑀲𑀁 𑀅𑀥𑀺𑀧𑁆𑀧𑀸𑀬𑀁 𑀲𑀫𑁆𑀧𑀸𑀤𑁂𑀦𑁆𑀢𑁄 𑀧𑀞𑀫𑀁 𑀬𑀸𑀫𑀁 𑀯𑀻𑀢𑀺𑀦𑀸𑀫𑁂𑀢𑀺.

𑀫𑀚𑁆𑀛𑀺𑀫𑀬𑀸𑀫𑁂 𑀲𑀓𑀮𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀤𑁂𑀯𑀢𑀸𑀬𑁄 𑀑𑀓𑀸𑀲𑀁 𑀮𑀪𑀫𑀸𑀦𑀸 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑀺 𑀬𑀣𑀸𑀪𑀺𑀲𑀗𑁆𑀔𑀢𑀁 𑀅𑀦𑁆𑀢𑀫𑀲𑁄 𑀘𑀢𑀼𑀭𑀓𑁆𑀔𑀭𑀫𑁆𑀧𑀺. 𑀪𑀕𑀯𑀸 𑀢𑀸𑀲𑀁 𑀤𑁂𑀯𑀢𑀸𑀦𑀁 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀫𑀚𑁆𑀛𑀺𑀫𑀬𑀸𑀫𑀁 𑀯𑀻𑀢𑀺𑀦𑀸𑀫𑁂𑀢𑀺. 𑀢𑀢𑁄 𑀧𑀘𑁆𑀙𑀺𑀫𑀬𑀸𑀫𑀁 𑀘𑀢𑁆𑀢𑀸𑀭𑁄 𑀪𑀸𑀕𑁂 𑀓𑀢𑁆𑀯𑀸 𑀏𑀓𑀁 𑀪𑀸𑀕𑀁 𑀘𑀗𑁆𑀓𑀫𑀁 𑀅𑀥𑀺𑀝𑁆𑀞𑀸𑀢𑀺, 𑀤𑀼𑀢𑀺𑀬𑀪𑀸𑀕𑀁 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀲𑀺𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀢𑀢𑀺𑀬𑀪𑀸𑀕𑀁 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀯𑀻𑀢𑀺𑀦𑀸𑀫𑁂𑀢𑀺, 𑀘𑀢𑀼𑀢𑁆𑀣𑀪𑀸𑀕𑀁 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀁 𑀧𑀯𑀺𑀲𑀺𑀢𑁆𑀯𑀸 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀢𑀺 𑀅𑀧𑁆𑀧𑀭𑀚𑀓𑁆𑀔𑀫𑀳𑀸𑀭𑀚𑀓𑁆𑀔𑀸𑀤𑀺𑀲𑀢𑁆𑀢𑀤𑀲𑁆𑀲𑀦𑀢𑁆𑀣𑀁. 𑀇𑀤𑀁 𑀧𑀘𑁆𑀙𑀸𑀪𑀢𑁆𑀢𑀓𑀺𑀘𑁆𑀘𑀁.

𑀏𑀯𑀫𑀺𑀫𑀲𑁆𑀲 𑀧𑀘𑁆𑀙𑀸𑀪𑀢𑁆𑀢𑀓𑀺𑀘𑁆𑀘𑀲𑁆𑀲 𑀮𑁄𑀓𑀯𑁄𑀮𑁄𑀓𑀦𑀲𑀗𑁆𑀔𑀸𑀢𑁂 𑀘𑀢𑀼𑀢𑁆𑀣𑀪𑀸𑀕𑀸𑀯𑀲𑀸𑀦𑁂 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑁂𑀲𑀼 𑀤𑀸𑀦𑀲𑀻𑀮𑀉𑀧𑁄𑀲𑀣𑀓𑀫𑁆𑀫𑀸𑀤𑀻𑀲𑀼 𑀘 𑀅𑀓𑀢𑀸𑀥𑀺𑀓𑀸𑀭𑁂 𑀓𑀢𑀸𑀥𑀺𑀓𑀸𑀭𑁂 𑀘 𑀅𑀦𑀼𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑁂 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑁂 𑀘 𑀲𑀢𑁆𑀢𑁂 𑀧𑀲𑁆𑀲𑀺𑀢𑀼𑀁 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀓𑀲𑀺𑀪𑀸𑀭𑀤𑁆𑀯𑀸𑀚𑀁 𑀩𑁆𑀭𑀸𑀳𑁆𑀫𑀡𑀁 𑀅𑀭𑀳𑀢𑁆𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀁 𑀤𑀺𑀲𑁆𑀯𑀸 ‘‘𑀢𑀢𑁆𑀣 𑀫𑀬𑀺 𑀕𑀢𑁂 𑀓𑀣𑀸 𑀧𑀯𑀢𑁆𑀢𑀺𑀲𑁆𑀲𑀢𑀺, 𑀢𑀢𑁄 𑀓𑀣𑀸𑀯𑀲𑀸𑀦𑁂 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀏𑀲 𑀩𑁆𑀭𑀸𑀳𑁆𑀫𑀡𑁄 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀢𑀻’’𑀢𑀺 𑀘 𑀜𑀢𑁆𑀯𑀸, 𑀢𑀢𑁆𑀣 𑀕𑀦𑁆𑀢𑁆𑀯𑀸, 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀇𑀫𑀁 𑀲𑀼𑀢𑁆𑀢𑀫𑀪𑀸𑀲𑀺.

𑀢𑀢𑁆𑀣 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺𑀆𑀤𑀺 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀸𑀮𑁂 𑀥𑀫𑁆𑀫𑀲𑀗𑁆𑀕𑀻𑀢𑀺𑀁 𑀓𑀭𑁄𑀦𑁆𑀢𑁂𑀦 𑀆𑀬𑀲𑁆𑀫𑀢𑀸 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁂𑀦 𑀧𑀼𑀝𑁆𑀞𑁂𑀦 𑀧𑀜𑁆𑀘𑀦𑁆𑀦𑀁 𑀅𑀭𑀳𑀦𑁆𑀢𑀲𑀢𑀸𑀦𑀁 𑀯𑀼𑀢𑁆𑀢𑀁, ‘‘𑀅𑀳𑀁, 𑀔𑁄, 𑀲𑀫𑀡 𑀓𑀲𑀸𑀫𑀺 𑀘 𑀯𑀧𑀸𑀫𑀺 𑀘𑀸’’𑀢𑀺 𑀓𑀲𑀺𑀪𑀸𑀭𑀤𑁆𑀯𑀸𑀚𑁂𑀦 𑀯𑀼𑀢𑁆𑀢𑀁, ‘‘𑀅𑀳𑀫𑁆𑀧𑀺 𑀔𑁄 𑀩𑁆𑀭𑀸𑀳𑁆𑀫𑀡 𑀓𑀲𑀸𑀫𑀺 𑀘 𑀯𑀧𑀸𑀫𑀺 𑀘𑀸’’𑀢𑀺𑀆𑀤𑀺 𑀪𑀕𑀯𑀢𑀸 𑀯𑀼𑀢𑁆𑀢𑀁. 𑀢𑀤𑁂𑀢𑀁 𑀲𑀩𑁆𑀩𑀫𑁆𑀧𑀺 𑀲𑀫𑁄𑀥𑀸𑀦𑁂𑀢𑁆𑀯𑀸 ‘‘𑀓𑀲𑀺𑀪𑀸𑀭𑀤𑁆𑀯𑀸𑀚𑀲𑀼𑀢𑁆𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀢𑀢𑁆𑀣 𑀏𑀯𑀦𑁆𑀢𑀺 𑀅𑀬𑀁 𑀆𑀓𑀸𑀭𑀦𑀺𑀤𑀲𑁆𑀲𑀦𑀸𑀯𑀥𑀸𑀭𑀡𑀢𑁆𑀣𑁄 𑀏𑀯𑀁-𑀲𑀤𑁆𑀤𑁄. 𑀆𑀓𑀸𑀭𑀢𑁆𑀣𑁂𑀦 𑀳𑀺 𑀏𑀢𑁂𑀦 𑀏𑀢𑀫𑀢𑁆𑀣𑀁 𑀤𑀻𑀧𑁂𑀢𑀺 𑁋 𑀦𑀸𑀦𑀸𑀦𑀬𑀦𑀺𑀧𑀼𑀡𑀫𑀦𑁂𑀓𑀚𑁆𑀛𑀸𑀲𑀬𑀲𑀫𑀼𑀝𑁆𑀞𑀸𑀦𑀁 𑀅𑀢𑁆𑀣𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑀁 𑀯𑀺𑀯𑀺𑀥𑀧𑀸𑀝𑀺𑀳𑀸𑀭𑀺𑀬𑀁 𑀥𑀫𑁆𑀫𑀢𑁆𑀣𑀤𑁂𑀲𑀦𑀸𑀧𑀝𑀺𑀯𑁂𑀥𑀕𑀫𑁆𑀪𑀻𑀭𑀁 𑀲𑀩𑁆𑀩𑀲𑀢𑁆𑀢𑁂𑀳𑀺 𑀲𑀓𑀲𑀓𑀪𑀸𑀲𑀸𑀦𑀼𑀭𑀽𑀧𑀫𑀼𑀧𑀮𑀓𑁆𑀔𑀡𑀺𑀬𑀲𑀪𑀸𑀯𑀁 𑀢𑀲𑁆𑀲 𑀪𑀕𑀯𑀢𑁄 𑀯𑀘𑀦𑀁, 𑀢𑀁 𑀲𑀩𑁆𑀩𑀸𑀓𑀸𑀭𑁂𑀦 𑀓𑁄 𑀲𑀫𑀢𑁆𑀣𑁄 𑀯𑀺𑀜𑁆𑀜𑀸𑀢𑀼𑀁; 𑀅𑀣, 𑀔𑁄, ‘‘𑀏𑀯𑀁 𑀫𑁂 𑀲𑀼𑀢𑀁, 𑀫𑀬𑀸𑀧𑀺 𑀏𑀓𑁂𑀦𑀸𑀓𑀸𑀭𑁂𑀦 𑀲𑀼𑀢’’𑀦𑁆𑀢𑀺. 𑀦𑀺𑀤𑀲𑁆𑀲𑀦𑀢𑁆𑀣𑁂𑀦 ‘‘𑀦𑀸𑀳𑀁 𑀲𑀬𑀫𑁆𑀪𑀽, 𑀦 𑀫𑀬𑀸 𑀇𑀤𑀁 𑀲𑀘𑁆𑀙𑀺𑀓𑀢’’𑀦𑁆𑀢𑀺 𑀅𑀢𑁆𑀢𑀸𑀦𑀁 𑀧𑀭𑀺𑀫𑁄𑀘𑁂𑀦𑁆𑀢𑁄 ‘‘𑀏𑀯𑀁 𑀫𑁂 𑀲𑀼𑀢𑀁, 𑀫𑀬𑀸 𑀏𑀯𑀁 𑀲𑀼𑀢’’𑀦𑁆𑀢𑀺 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀁 𑀲𑀓𑀮𑀲𑀼𑀢𑁆𑀢𑀁 𑀦𑀺𑀤𑀲𑁆𑀲𑁂𑀢𑀺. 𑀅𑀯𑀥𑀸𑀭𑀡𑀢𑁆𑀣𑁂𑀦 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀩𑀳𑀼𑀲𑁆𑀲𑀼𑀢𑀸𑀦𑀁 𑀬𑀤𑀺𑀤𑀁 𑀆𑀦𑀦𑁆𑀤𑁄, 𑀕𑀢𑀺𑀫𑀦𑁆𑀢𑀸𑀦𑀁, 𑀲𑀢𑀺𑀫𑀦𑁆𑀢𑀸𑀦𑀁, 𑀥𑀺𑀢𑀺𑀫𑀦𑁆𑀢𑀸𑀦𑀁, 𑀉𑀧𑀝𑁆𑀞𑀸𑀓𑀸𑀦𑀁 𑀬𑀤𑀺𑀤𑀁 𑀆𑀦𑀦𑁆𑀤𑁄’’𑀢𑀺 (𑀅. 𑀦𑀺. 𑁧.𑁨𑁧𑁯-𑁨𑁨𑁩) 𑀏𑀯𑀁 𑀪𑀕𑀯𑀢𑀸 𑀧𑀲𑀢𑁆𑀣𑀪𑀸𑀯𑀸𑀦𑀼𑀭𑀽𑀧𑀁 𑀅𑀢𑁆𑀢𑀦𑁄 𑀥𑀸𑀭𑀡𑀩𑀮𑀁 𑀤𑀲𑁆𑀲𑁂𑀦𑁆𑀢𑁄 𑀲𑀢𑁆𑀢𑀸𑀦𑀁 𑀲𑁄𑀢𑀼𑀓𑀫𑁆𑀬𑀢𑀁 𑀚𑀦𑁂𑀢𑀺 ‘‘𑀏𑀯𑀁 𑀫𑁂 𑀲𑀼𑀢𑀁 𑀢𑀜𑁆𑀘 𑀅𑀢𑁆𑀣𑀢𑁄 𑀯𑀸 𑀩𑁆𑀬𑀜𑁆𑀚𑀦𑀢𑁄 𑀯𑀸 𑀅𑀦𑀽𑀦𑀫𑀦𑀥𑀺𑀓𑀁, 𑀏𑀯𑀫𑁂𑀯, 𑀦 𑀅𑀜𑁆𑀜𑀣𑀸 𑀤𑀝𑁆𑀞𑀩𑁆𑀩’’𑀦𑁆𑀢𑀺. 𑀫𑁂 𑀲𑀼𑀢𑀦𑁆𑀢𑀺 𑀏𑀢𑁆𑀣 𑀫𑀬𑀸𑀲𑀤𑁆𑀤𑀢𑁆𑀣𑁄 𑀫𑁂-𑀲𑀤𑁆𑀤𑁄, 𑀲𑁄𑀢𑀤𑁆𑀯𑀸𑀭𑀯𑀺𑀜𑁆𑀜𑀸𑀡𑀢𑁆𑀣𑁄 𑀲𑀼𑀢𑀲𑀤𑁆𑀤𑁄. 𑀢𑀲𑁆𑀫𑀸 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀏𑀯𑀁 𑀫𑀬𑀸 𑀲𑁄𑀢𑀯𑀺𑀜𑁆𑀜𑀸𑀡𑀧𑀼𑀩𑁆𑀩𑀗𑁆𑀕𑀫𑀸𑀬 𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀉𑀧𑀥𑀸𑀭𑀺𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀏𑀓𑀁 𑀲𑀫𑀬𑀦𑁆𑀢𑀺 𑀏𑀓𑀁 𑀓𑀸𑀮𑀁. 𑀪𑀕𑀯𑀸𑀢𑀺 𑀪𑀸𑀕𑁆𑀬𑀯𑀸, 𑀪𑀕𑁆𑀕𑀯𑀸, 𑀪𑀢𑁆𑀢𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀕𑀥𑁂𑀲𑀼 𑀯𑀺𑀳𑀭𑀢𑀻𑀢𑀺 𑀫𑀕𑀥𑀸 𑀦𑀸𑀫 𑀚𑀦𑀧𑀤𑀺𑀦𑁄 𑀭𑀸𑀚𑀓𑀼𑀫𑀸𑀭𑀸, 𑀢𑁂𑀲𑀁 𑀦𑀺𑀯𑀸𑀲𑁄 𑀏𑀓𑁄𑀧𑀺 𑀚𑀦𑀧𑀤𑁄 𑀭𑀼𑀴𑁆𑀳𑀻𑀲𑀤𑁆𑀤𑁂𑀦 ‘‘𑀫𑀕𑀥𑀸’’𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀺𑀁 𑀫𑀕𑀥𑁂𑀲𑀼 𑀚𑀦𑀧𑀤𑁂. 𑀓𑁂𑀘𑀺 𑀧𑀦 ‘‘𑀬𑀲𑁆𑀫𑀸 𑀘𑁂𑀢𑀺𑀬𑀭𑀸𑀚𑀸 𑀫𑀼𑀲𑀸𑀯𑀸𑀤𑀁 𑀪𑀡𑀺𑀢𑁆𑀯𑀸 𑀪𑀽𑀫𑀺𑀁 𑀧𑀯𑀺𑀲𑀦𑁆𑀢𑁄 ‘𑀫𑀸 𑀕𑀥𑀁 𑀧𑀯𑀺𑀲𑀸’𑀢𑀺 𑀯𑀼𑀢𑁆𑀢𑁄, 𑀬𑀲𑁆𑀫𑀸 𑀯𑀸 𑀢𑀁 𑀭𑀸𑀚𑀸𑀦𑀁 𑀫𑀕𑁆𑀕𑀦𑁆𑀢𑀸 𑀪𑀽𑀫𑀺𑀁 𑀔𑀦𑀦𑁆𑀢𑀸 𑀧𑀼𑀭𑀺𑀲𑀸 ‘𑀫𑀸 𑀕𑀥𑀁 𑀓𑀭𑁄𑀣𑀸’𑀢𑀺 𑀯𑀼𑀢𑁆𑀢𑀸, 𑀢𑀲𑁆𑀫𑀸 𑀫𑀕𑀥𑀸’’𑀢𑀺 𑀏𑀯𑀫𑀸𑀤𑀻𑀳𑀺 𑀦𑀬𑁂𑀳𑀺 𑀩𑀳𑀼𑀥𑀸 𑀧𑀧𑀜𑁆𑀘𑁂𑀦𑁆𑀢𑀺. 𑀬𑀁 𑀭𑀼𑀘𑁆𑀘𑀢𑀺, 𑀢𑀁 𑀕𑀳𑁂𑀢𑀩𑁆𑀩𑀦𑁆𑀢𑀺. 𑀯𑀺𑀳𑀭𑀢𑀻𑀢𑀺 𑀏𑀓𑀁 𑀇𑀭𑀺𑀬𑀸𑀧𑀣𑀩𑀸𑀥𑀦𑀁 𑀅𑀧𑀭𑁂𑀦 𑀇𑀭𑀺𑀬𑀸𑀧𑀣𑁂𑀦 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀧𑀭𑀺𑀧𑀢𑀦𑁆𑀢𑀁 𑀅𑀢𑁆𑀢𑀪𑀸𑀯𑀁 𑀳𑀭𑀢𑀺, 𑀧𑀯𑀢𑁆𑀢𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑀺𑀩𑁆𑀩𑀩𑁆𑀭𑀳𑁆𑀫𑀅𑀭𑀺𑀬𑀯𑀺𑀳𑀸𑀭𑁂𑀳𑀺 𑀯𑀸 𑀲𑀢𑁆𑀢𑀸𑀦𑀁 𑀯𑀺𑀯𑀺𑀥𑀁 𑀳𑀺𑀢𑀁 𑀳𑀭𑀢𑀻𑀢𑀺 𑀯𑀺𑀳𑀭𑀢𑀺. 𑀳𑀭𑀢𑀻𑀢𑀺 𑀉𑀧𑀲𑀁𑀳𑀭𑀢𑀺, 𑀉𑀧𑀦𑁂𑀢𑀺, 𑀚𑀦𑁂𑀢𑀺, 𑀉𑀧𑁆𑀧𑀸𑀤𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀣𑀸 𑀳𑀺 𑀬𑀤𑀸 𑀲𑀢𑁆𑀢𑀸 𑀓𑀸𑀫𑁂𑀲𑀼 𑀯𑀺𑀧𑁆𑀧𑀝𑀺𑀧𑀚𑁆𑀚𑀦𑁆𑀢𑀺, 𑀢𑀤𑀸 𑀓𑀺𑀭 𑀪𑀕𑀯𑀸 𑀤𑀺𑀩𑁆𑀩𑁂𑀦 𑀯𑀺𑀳𑀸𑀭𑁂𑀦 𑀯𑀺𑀳𑀭𑀢𑀺 𑀢𑁂𑀲𑀁 𑀅𑀮𑁄𑀪𑀓𑀼𑀲𑀮𑀫𑀽𑀮𑀼𑀧𑁆𑀧𑀸𑀤𑀦𑀢𑁆𑀣𑀁 𑁋 ‘‘𑀅𑀧𑁆𑀧𑁂𑀯 𑀦𑀸𑀫 𑀇𑀫𑀁 𑀧𑀝𑀺𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀏𑀢𑁆𑀣 𑀭𑀼𑀘𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀓𑀸𑀫𑁂𑀲𑀼 𑀯𑀺𑀭𑀚𑁆𑀚𑁂𑀬𑁆𑀬𑀼’’𑀦𑁆𑀢𑀺. 𑀬𑀤𑀸 𑀧𑀦 𑀇𑀲𑁆𑀲𑀭𑀺𑀬𑀢𑁆𑀣𑀁 𑀲𑀢𑁆𑀢𑁂𑀲𑀼 𑀯𑀺𑀧𑁆𑀧𑀝𑀺𑀧𑀚𑁆𑀚𑀦𑁆𑀢𑀺, 𑀢𑀤𑀸 𑀩𑁆𑀭𑀳𑁆𑀫𑀯𑀺𑀳𑀸𑀭𑁂𑀦 𑀯𑀺𑀳𑀭𑀢𑀺 𑀢𑁂𑀲𑀁 𑀅𑀤𑁄𑀲𑀓𑀼𑀲𑀮𑀫𑀽𑀮𑀼𑀧𑁆𑀧𑀸𑀤𑀦𑀢𑁆𑀣𑀁 𑁋 ‘‘𑀅𑀧𑁆𑀧𑁂𑀯 𑀦𑀸𑀫 𑀇𑀫𑀁 𑀧𑀝𑀺𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀏𑀢𑁆𑀣 𑀭𑀼𑀘𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀅𑀤𑁄𑀲𑁂𑀦 𑀤𑁄𑀲𑀁 𑀯𑀽𑀧𑀲𑀫𑁂𑀬𑁆𑀬𑀼’’𑀦𑁆𑀢𑀺. 𑀬𑀤𑀸 𑀧𑀦 𑀧𑀩𑁆𑀩𑀚𑀺𑀢𑀸 𑀥𑀫𑁆𑀫𑀸𑀥𑀺𑀓𑀭𑀡𑀁 𑀯𑀺𑀯𑀤𑀦𑁆𑀢𑀺, 𑀢𑀤𑀸 𑀅𑀭𑀺𑀬𑀯𑀺𑀳𑀸𑀭𑁂𑀦 𑀯𑀺𑀳𑀭𑀢𑀺 𑀢𑁂𑀲𑀁 𑀅𑀫𑁄𑀳𑀓𑀼𑀲𑀮𑀫𑀽𑀮𑀼𑀧𑁆𑀧𑀸𑀤𑀦𑀢𑁆𑀣𑀁 𑁋 ‘‘𑀅𑀧𑁆𑀧𑁂𑀯 𑀦𑀸𑀫 𑀇𑀫𑀁 𑀧𑀝𑀺𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀏𑀢𑁆𑀣 𑀭𑀼𑀘𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀅𑀫𑁄𑀳𑁂𑀦 𑀫𑁄𑀳𑀁 𑀯𑀽𑀧𑀲𑀫𑁂𑀬𑁆𑀬𑀼’’𑀦𑁆𑀢𑀺. 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁂𑀦 𑀧𑀦 𑀦 𑀓𑀤𑀸𑀘𑀺 𑀦 𑀯𑀺𑀳𑀭𑀢𑀺 𑀢𑀁 𑀯𑀺𑀦𑀸 𑀅𑀢𑁆𑀢𑀪𑀸𑀯𑀧𑀭𑀺𑀳𑀭𑀡𑀸𑀪𑀸𑀯𑀢𑁄𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑀁 𑀧𑀦 𑀫𑀗𑁆𑀕𑀮𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 𑀯𑀓𑁆𑀔𑀸𑀫.

𑀤𑀓𑁆𑀔𑀺𑀡𑀸𑀕𑀺𑀭𑀺𑀲𑁆𑀫𑀺𑀦𑁆𑀢𑀺 𑀬𑁄 𑀲𑁄 𑀭𑀸𑀚𑀕𑀳𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑁄 𑀕𑀺𑀭𑀺, 𑀢𑀲𑁆𑀲 𑀤𑀓𑁆𑀔𑀺𑀡𑀧𑀲𑁆𑀲𑁂 𑀚𑀦𑀧𑀤𑁄 ‘‘𑀤𑀓𑁆𑀔𑀺𑀡𑀸𑀕𑀺𑀭𑀻’’𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀺𑀁 𑀚𑀦𑀧𑀤𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀯𑀺𑀳𑀸𑀭𑀲𑁆𑀲𑀸𑀧𑀺 𑀢𑀤𑁂𑀯 𑀦𑀸𑀫𑀁. 𑀏𑀓𑀦𑀸𑀴𑀸𑀬𑀁 𑀩𑁆𑀭𑀸𑀳𑁆𑀫𑀡𑀕𑀸𑀫𑁂𑀢𑀺 𑀏𑀓𑀦𑀸𑀴𑀸𑀢𑀺 𑀢𑀲𑁆𑀲 𑀕𑀸𑀫𑀲𑁆𑀲 𑀦𑀸𑀫𑀁. 𑀩𑁆𑀭𑀸𑀳𑁆𑀫𑀡𑀸 𑀘𑁂𑀢𑁆𑀣 𑀲𑀫𑁆𑀩𑀳𑀼𑀮𑀸 𑀧𑀝𑀺𑀯𑀲𑀦𑁆𑀢𑀺, 𑀩𑁆𑀭𑀸𑀳𑁆𑀫𑀡𑀪𑁄𑀕𑁄 𑀯𑀸 𑀲𑁄, 𑀢𑀲𑁆𑀫𑀸 ‘‘𑀩𑁆𑀭𑀸𑀳𑁆𑀫𑀡𑀕𑀸𑀫𑁄’’𑀢𑀺 𑀯𑀼𑀘𑁆𑀘𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦𑀸𑀢𑀺 𑀬𑀁 𑀲𑀫𑀬𑀁 𑀪𑀕𑀯𑀸 𑀅𑀧𑀭𑀸𑀚𑀺𑀢𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀺𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁄 𑀫𑀕𑀥𑀭𑀝𑁆𑀞𑁂 𑀏𑀓𑀦𑀸𑀴𑀁 𑀩𑁆𑀭𑀸𑀳𑁆𑀫𑀡𑀕𑀸𑀫𑀁 𑀉𑀧𑀦𑀺𑀲𑁆𑀲𑀸𑀬 𑀤𑀓𑁆𑀔𑀺𑀡𑀸𑀕𑀺𑀭𑀺𑀫𑀳𑀸𑀯𑀺𑀳𑀸𑀭𑁂 𑀩𑁆𑀭𑀸𑀳𑁆𑀫𑀡𑀲𑁆𑀲 𑀇𑀦𑁆𑀤𑁆𑀭𑀺𑀬𑀧𑀭𑀺𑀧𑀸𑀓𑀁 𑀆𑀕𑀫𑀬𑀫𑀸𑀦𑁄 𑀯𑀺𑀳𑀭𑀢𑀺, 𑀢𑁂𑀦 𑀲𑀫𑀬𑁂𑀦 𑀓𑀭𑀡𑀪𑀽𑀢𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀔𑁄 𑀧𑀦𑀸𑀢𑀺 𑀇𑀤𑀁 𑀧𑀦𑁂𑀢𑁆𑀣 𑀦𑀺𑀧𑀸𑀢𑀤𑁆𑀯𑀬𑀁 𑀧𑀤𑀧𑀽𑀭𑀡𑀫𑀢𑁆𑀢𑀁, 𑀅𑀥𑀺𑀓𑀸𑀭𑀦𑁆𑀢𑀭𑀤𑀲𑁆𑀲𑀦𑀢𑁆𑀣𑀁 𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀲𑀺𑀪𑀸𑀭𑀤𑁆𑀯𑀸𑀚𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲𑀸𑀢𑀺 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀓𑀲𑀺𑀬𑀸 𑀚𑀻𑀯𑀢𑀺, 𑀪𑀸𑀭𑀤𑁆𑀯𑀸𑀚𑁄𑀢𑀺 𑀘𑀲𑁆𑀲 𑀕𑁄𑀢𑁆𑀢𑀁, 𑀢𑀲𑁆𑀫𑀸 𑀏𑀯𑀁 𑀯𑀼𑀘𑁆𑀘𑀢𑀺. 𑀧𑀜𑁆𑀘𑀫𑀢𑁆𑀢𑀸𑀦𑀻𑀢𑀺 𑀬𑀣𑀸 𑁋 ‘‘𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀽’’𑀢𑀺 𑀏𑀢𑁆𑀣 𑀫𑀢𑁆𑀢𑀲𑀤𑁆𑀤𑁄 𑀧𑀫𑀸𑀡𑁂 𑀯𑀢𑁆𑀢𑀢𑀺, 𑀏𑀯𑀫𑀺𑀥𑀸𑀧𑀺, 𑀢𑀲𑁆𑀫𑀸 𑀧𑀜𑁆𑀘𑀧𑀫𑀸𑀡𑀸𑀦𑀺 𑀅𑀦𑀽𑀦𑀸𑀦𑀺 𑀅𑀦𑀥𑀺𑀓𑀸𑀦𑀺, 𑀧𑀜𑁆𑀘𑀦𑀗𑁆𑀕𑀮𑀲𑀢𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀬𑀼𑀢𑁆𑀢𑀸𑀦𑀻𑀢𑀺 𑀧𑀬𑁄𑀚𑀺𑀢𑀸𑀦𑀺, 𑀩𑀮𑀺𑀩𑀤𑁆𑀤𑀸𑀦𑀁 𑀔𑀦𑁆𑀥𑁂𑀲𑀼 𑀞𑀧𑁂𑀢𑁆𑀯𑀸 𑀬𑀼𑀕𑁂 𑀬𑁄𑀢𑁆𑀢𑁂𑀳𑀺 𑀬𑁄𑀚𑀺𑀢𑀸𑀦𑀺 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀯𑀧𑁆𑀧𑀓𑀸𑀮𑁂𑀢𑀺 𑀯𑀧𑀦𑀓𑀸𑀮𑁂, 𑀩𑀻𑀚𑀦𑀺𑀓𑁆𑀔𑀺𑀧𑀓𑀸𑀮𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀤𑁆𑀯𑁂 𑀯𑀧𑁆𑀧𑀸𑀦𑀺 𑀓𑀮𑀮𑀯𑀧𑁆𑀧𑀜𑁆𑀘, 𑀧𑀁𑀲𑀼𑀯𑀧𑁆𑀧𑀜𑁆𑀘. 𑀧𑀁𑀲𑀼𑀯𑀧𑁆𑀧𑀁 𑀇𑀥 𑀅𑀥𑀺𑀧𑁆𑀧𑁂𑀢𑀁. 𑀢𑀜𑁆𑀘 𑀔𑁄 𑀧𑀞𑀫𑀤𑀺𑀯𑀲𑁂 𑀫𑀗𑁆𑀕𑀮𑀯𑀧𑁆𑀧𑀁. 𑀢𑀢𑁆𑀣𑀸𑀬𑀁 𑀉𑀧𑀓𑀭𑀡𑀲𑀫𑁆𑀧𑀤𑀸 𑁋 𑀢𑀻𑀡𑀺 𑀩𑀮𑀺𑀩𑀤𑁆𑀤𑀲𑀳𑀲𑁆𑀲𑀸𑀦𑀺 𑀉𑀧𑀝𑁆𑀞𑀸𑀧𑀺𑀢𑀸𑀦𑀺 𑀳𑁄𑀦𑁆𑀢𑀺, 𑀲𑀩𑁆𑀩𑁂𑀲𑀁 𑀲𑀼𑀯𑀡𑁆𑀡𑀫𑀬𑀸𑀦𑀺 𑀲𑀺𑀗𑁆𑀕𑀸𑀦𑀺 𑀧𑀝𑀺𑀫𑀼𑀓𑁆𑀓𑀸𑀦𑀺, 𑀭𑀚𑀢𑀫𑀬𑀸 𑀔𑀼𑀭𑀸, 𑀲𑀩𑁆𑀩𑁂 𑀲𑁂𑀢𑀫𑀸𑀮𑀸𑀳𑀺 𑀲𑀩𑁆𑀩𑀕𑀦𑁆𑀥𑀲𑀼𑀕𑀦𑁆𑀥𑁂𑀳𑀺 𑀧𑀜𑁆𑀘𑀗𑁆𑀕𑀼𑀮𑀺𑀓𑁂𑀳𑀺 𑀘 𑀅𑀮𑀗𑁆𑀓𑀢𑀸 𑀧𑀭𑀺𑀧𑀼𑀡𑁆𑀡𑀗𑁆𑀕𑀧𑀘𑁆𑀘𑀗𑁆𑀕𑀸 𑀲𑀩𑁆𑀩𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀸, 𑀏𑀓𑀘𑁆𑀘𑁂 𑀓𑀸𑀴𑀸 𑀅𑀜𑁆𑀚𑀦𑀯𑀡𑁆𑀡𑀸𑀬𑁂𑀯, 𑀏𑀓𑀘𑁆𑀘𑁂 𑀲𑁂𑀢𑀸 𑀨𑀮𑀺𑀓𑀯𑀡𑁆𑀡𑀸, 𑀏𑀓𑀘𑁆𑀘𑁂 𑀭𑀢𑁆𑀢𑀸 𑀧𑀯𑀸𑀴𑀯𑀡𑁆𑀡𑀸, 𑀏𑀓𑀘𑁆𑀘𑁂 𑀓𑀫𑁆𑀫𑀸𑀲𑀸 𑀫𑀲𑀸𑀭𑀕𑀮𑁆𑀮𑀯𑀡𑁆𑀡𑀸. 𑀧𑀜𑁆𑀘𑀲𑀢𑀸 𑀓𑀲𑁆𑀲𑀓𑀧𑀼𑀭𑀺𑀲𑀸 𑀲𑀩𑁆𑀩𑁂 𑀅𑀳𑀢𑀲𑁂𑀢𑀯𑀢𑁆𑀣𑀦𑀺𑀯𑀢𑁆𑀣𑀸 𑀫𑀸𑀮𑀸𑀮𑀗𑁆𑀓𑀢𑀸 𑀤𑀓𑁆𑀔𑀺𑀡𑀅𑀁𑀲𑀓𑀽𑀝𑁂𑀲𑀼 𑀞𑀧𑀺𑀢𑀧𑀼𑀧𑁆𑀨𑀘𑀼𑀫𑁆𑀩𑀝𑀓𑀸 𑀳𑀭𑀺𑀢𑀸𑀮𑀫𑀦𑁄𑀲𑀺𑀮𑀸𑀮𑀜𑁆𑀙𑀦𑀼𑀚𑁆𑀚𑀮𑀺𑀢𑀕𑀢𑁆𑀢𑀪𑀸𑀕𑀸 𑀤𑀲 𑀤𑀲 𑀦𑀗𑁆𑀕𑀮𑀸 𑀏𑀓𑁂𑀓𑀕𑀼𑀫𑁆𑀩𑀸 𑀳𑀼𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀦𑀗𑁆𑀕𑀮𑀸𑀦𑀁 𑀲𑀻𑀲𑀜𑁆𑀘 𑀬𑀼𑀕𑀜𑁆𑀘 𑀧𑀢𑁄𑀤𑀸 𑀘 𑀲𑀼𑀯𑀡𑁆𑀡𑀯𑀺𑀦𑀤𑁆𑀥𑀸. 𑀧𑀞𑀫𑀦𑀗𑁆𑀕𑀮𑁂 𑀅𑀝𑁆𑀞 𑀩𑀮𑀺𑀩𑀤𑁆𑀤𑀸 𑀬𑀼𑀢𑁆𑀢𑀸, 𑀲𑁂𑀲𑁂𑀲𑀼 𑀘𑀢𑁆𑀢𑀸𑀭𑁄 𑀘𑀢𑁆𑀢𑀸𑀭𑁄, 𑀅𑀯𑀲𑁂𑀲𑀸 𑀓𑀺𑀮𑀦𑁆𑀢𑀧𑀭𑀺𑀯𑀢𑁆𑀢𑀦𑀢𑁆𑀣𑀁 𑀆𑀦𑀻𑀢𑀸. 𑀏𑀓𑁂𑀓𑀕𑀼𑀫𑁆𑀩𑁂 𑀏𑀓𑀫𑁂𑀓𑀁 𑀩𑀻𑀚𑀲𑀓𑀝𑀁 𑀏𑀓𑁂𑀓𑁄 𑀓𑀲𑀢𑀺, 𑀏𑀓𑁂𑀓𑁄 𑀯𑀧𑀢𑀺.

𑀩𑁆𑀭𑀸𑀳𑁆𑀫𑀡𑁄 𑀧𑀦 𑀧𑀕𑁂𑀯 𑀫𑀲𑁆𑀲𑀼𑀓𑀫𑁆𑀫𑀁 𑀓𑀸𑀭𑀸𑀧𑁂𑀢𑁆𑀯𑀸 𑀦𑁆𑀳𑀢𑁆𑀯𑀸 𑀲𑀼𑀕𑀦𑁆𑀥𑀕𑀦𑁆𑀥𑁂𑀳𑀺 𑀯𑀺𑀮𑀺𑀢𑁆𑀢𑁄 𑀧𑀜𑁆𑀘𑀲𑀢𑀕𑁆𑀖𑀦𑀓𑀁 𑀯𑀢𑁆𑀣𑀁 𑀦𑀺𑀯𑀸𑀲𑁂𑀢𑁆𑀯𑀸 𑀲𑀳𑀲𑁆𑀲𑀕𑁆𑀖𑀦𑀓𑀁 𑀏𑀓𑀁𑀲𑀁 𑀓𑀭𑀺𑀢𑁆𑀯𑀸 𑀏𑀓𑀫𑁂𑀓𑀺𑀲𑁆𑀲𑀸 𑀅𑀗𑁆𑀕𑀼𑀮𑀺𑀬𑀸 𑀤𑁆𑀯𑁂 𑀤𑁆𑀯𑁂 𑀓𑀢𑁆𑀯𑀸 𑀯𑀻𑀲𑀢𑀺 𑀅𑀗𑁆𑀕𑀼𑀮𑀺𑀫𑀼𑀤𑁆𑀤𑀺𑀓𑀸𑀬𑁄, 𑀓𑀡𑁆𑀡𑁂𑀲𑀼 𑀲𑀻𑀳𑀓𑀼𑀡𑁆𑀟𑀮𑀸𑀦𑀺, 𑀲𑀻𑀲𑁂 𑀘 𑀩𑁆𑀭𑀳𑁆𑀫𑀯𑁂𑀞𑀦𑀁 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸 𑀲𑀼𑀯𑀡𑁆𑀡𑀫𑀸𑀮𑀁 𑀓𑀡𑁆𑀞𑁂 𑀓𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀕𑀡𑀧𑀭𑀺𑀯𑀼𑀢𑁄 𑀓𑀫𑁆𑀫𑀦𑁆𑀢𑀁 𑀯𑁄𑀲𑀸𑀲𑀢𑀺. 𑀅𑀣𑀲𑁆𑀲 𑀩𑁆𑀭𑀸𑀳𑁆𑀫𑀡𑀻 𑀅𑀦𑁂𑀓𑀲𑀢𑀪𑀸𑀚𑀦𑁂𑀲𑀼 𑀧𑀸𑀬𑀸𑀲𑀁 𑀧𑀘𑀸𑀧𑁂𑀢𑁆𑀯𑀸 𑀫𑀳𑀸𑀲𑀓𑀝𑁂𑀲𑀼 𑀆𑀭𑁄𑀧𑁂𑀢𑁆𑀯𑀸 𑀕𑀦𑁆𑀥𑁄𑀤𑀓𑁂𑀦 𑀦𑁆𑀳𑀸𑀬𑀺𑀢𑁆𑀯𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑀯𑀺𑀪𑀽𑀲𑀺𑀢𑀸 𑀩𑁆𑀭𑀸𑀳𑁆𑀫𑀡𑀻𑀕𑀡𑀧𑀭𑀺𑀯𑀼𑀢𑀸 𑀓𑀫𑁆𑀫𑀦𑁆𑀢𑀁 𑀅𑀕𑀫𑀸𑀲𑀺. 𑀕𑁂𑀳𑀫𑁆𑀧𑀺𑀲𑁆𑀲 𑀲𑀩𑁆𑀩𑀢𑁆𑀣 𑀕𑀦𑁆𑀥𑁂𑀳𑀺 𑀲𑀼𑀯𑀺𑀮𑀺𑀢𑁆𑀢𑀁 𑀧𑀼𑀧𑁆𑀨𑁂𑀳𑀺 𑀲𑀼𑀓𑀢𑀩𑀮𑀺𑀓𑀫𑁆𑀫𑀁, 𑀔𑁂𑀢𑁆𑀢𑀜𑁆𑀘 𑀢𑁂𑀲𑀼 𑀢𑁂𑀲𑀼 𑀞𑀸𑀦𑁂𑀲𑀼 𑀲𑀫𑀼𑀲𑁆𑀲𑀺𑀢𑀧𑀝𑀸𑀓𑀁 𑀅𑀳𑁄𑀲𑀺. 𑀧𑀭𑀺𑀚𑀦𑀓𑀫𑁆𑀫𑀓𑀸𑀭𑁂𑀳𑀺 𑀲𑀳 𑀓𑀫𑁆𑀫𑀦𑁆𑀢𑀁 𑀑𑀲𑀝𑀧𑀭𑀺𑀲𑀸 𑀅𑀟𑁆𑀠𑀢𑁂𑀬𑁆𑀬𑀲𑀳𑀲𑁆𑀲𑀸 𑀅𑀳𑁄𑀲𑀺. 𑀲𑀩𑁆𑀩𑁂 𑀅𑀳𑀢𑀯𑀢𑁆𑀣𑀦𑀺𑀯𑀢𑁆𑀣𑀸, 𑀲𑀩𑁆𑀩𑁂𑀲𑀜𑁆𑀘 𑀧𑀸𑀬𑀸𑀲𑀪𑁄𑀚𑀦𑀁 𑀧𑀝𑀺𑀬𑀢𑁆𑀢𑀁 𑀅𑀳𑁄𑀲𑀺.

𑀅𑀣 𑀩𑁆𑀭𑀸𑀳𑁆𑀫𑀡𑁄 𑀬𑀢𑁆𑀣 𑀲𑀸𑀫𑀁 𑀪𑀼𑀜𑁆𑀚𑀢𑀺, 𑀢𑀁 𑀲𑀼𑀯𑀡𑁆𑀡𑀧𑀸𑀢𑀺𑀁 𑀥𑁄𑀯𑀸𑀧𑁂𑀢𑁆𑀯𑀸 𑀧𑀸𑀬𑀸𑀲𑀲𑁆𑀲 𑀧𑀽𑀭𑁂𑀢𑁆𑀯𑀸 𑀲𑀧𑁆𑀧𑀺𑀫𑀥𑀼𑀨𑀸𑀡𑀺𑀢𑀸𑀤𑀻𑀦𑀺 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀦𑀗𑁆𑀕𑀮𑀩𑀮𑀺𑀓𑀫𑁆𑀫𑀁 𑀓𑀸𑀭𑀸𑀧𑁂𑀲𑀺. 𑀩𑁆𑀭𑀸𑀳𑁆𑀫𑀡𑀻 𑀧𑀜𑁆𑀘 𑀓𑀲𑁆𑀲𑀓𑀲𑀢𑀸𑀦𑀺 𑀲𑀼𑀯𑀡𑁆𑀡𑀭𑀚𑀢𑀓𑀁𑀲𑀢𑀫𑁆𑀩𑀫𑀬𑀸𑀦𑀺 𑀪𑀸𑀚𑀦𑀸𑀦𑀺 𑀕𑀳𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸𑀦𑀺 𑀲𑀼𑀯𑀡𑁆𑀡𑀓𑀝𑀘𑁆𑀙𑀼𑀁 𑀕𑀳𑁂𑀢𑁆𑀯𑀸 𑀧𑀸𑀬𑀸𑀲𑁂𑀦 𑀧𑀭𑀺𑀯𑀺𑀲𑀦𑁆𑀢𑀻 𑀕𑀘𑁆𑀙𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀧𑀦 𑀩𑀮𑀺𑀓𑀫𑁆𑀫𑀁 𑀓𑀸𑀭𑀸𑀧𑁂𑀢𑁆𑀯𑀸 𑀭𑀢𑁆𑀢𑀲𑀼𑀯𑀡𑁆𑀡𑀩𑀦𑁆𑀥𑀽𑀧𑀸𑀳𑀦𑀸𑀬𑁄 𑀆𑀭𑁄𑀳𑀺𑀢𑁆𑀯𑀸 𑀭𑀢𑁆𑀢𑀲𑀼𑀯𑀡𑁆𑀡𑀤𑀡𑁆𑀟𑀁 𑀕𑀳𑁂𑀢𑁆𑀯𑀸 ‘‘𑀇𑀥 𑀧𑀸𑀬𑀸𑀲𑀁 𑀤𑁂𑀣, 𑀇𑀥 𑀲𑀧𑁆𑀧𑀺𑀁, 𑀇𑀥 𑀲𑀓𑁆𑀔𑀭𑀁 𑀤𑁂𑀣𑀸’’𑀢𑀺 𑀯𑁄𑀲𑀸𑀲𑀫𑀸𑀦𑁄 𑀯𑀺𑀘𑀭𑀢𑀺. 𑀅𑀣 𑀪𑀕𑀯𑀸 𑀕𑀦𑁆𑀥𑀓𑀼𑀝𑀺𑀬𑀁 𑀦𑀺𑀲𑀺𑀦𑁆𑀦𑁄𑀯 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀭𑀺𑀯𑁂𑀲𑀦𑀁 𑀯𑀢𑁆𑀢𑀫𑀸𑀦𑀁 𑀜𑀢𑁆𑀯𑀸 ‘‘𑀅𑀬𑀁 𑀓𑀸𑀮𑁄 𑀩𑁆𑀭𑀸𑀳𑁆𑀫𑀡𑀁 𑀤𑀫𑁂𑀢𑀼’’𑀦𑁆𑀢𑀺 𑀦𑀺𑀯𑀸𑀲𑁂𑀢𑁆𑀯𑀸, 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸, 𑀲𑀗𑁆𑀖𑀸𑀝𑀺𑀁 𑀧𑀸𑀭𑀼𑀧𑀺𑀢𑁆𑀯𑀸, 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸, 𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑀺 𑀬𑀣𑀸 𑀢𑀁 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺. 𑀢𑁂𑀦𑀸𑀳 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 ‘‘𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸’’𑀢𑀺.

𑀢𑀢𑁆𑀣 𑀅𑀣 𑀇𑀢𑀺 𑀦𑀺𑀧𑀸𑀢𑁄 𑀅𑀜𑁆𑀜𑀸𑀥𑀺𑀓𑀸𑀭𑀯𑀘𑀦𑀸𑀭𑀫𑁆𑀪𑁂 𑀔𑁄𑀢𑀺 𑀧𑀤𑀧𑀽𑀭𑀡𑁂. 𑀪𑀕𑀯𑀸𑀢𑀺 𑀯𑀼𑀢𑁆𑀢𑀦𑀬𑀫𑁂𑀯. 𑀧𑀼𑀩𑁆𑀩𑀡𑁆𑀳𑀲𑀫𑀬𑀦𑁆𑀢𑀺 𑀤𑀺𑀯𑀲𑀲𑁆𑀲 𑀧𑀼𑀩𑁆𑀩𑀪𑀸𑀕𑀲𑀫𑀬𑀁, 𑀧𑀼𑀩𑁆𑀩𑀡𑁆𑀳𑀲𑀫𑀬𑁂𑀢𑀺 𑀅𑀢𑁆𑀣𑁄, 𑀧𑀼𑀩𑁆𑀩𑀡𑁆𑀳𑁂 𑀯𑀸 𑀲𑀫𑀬𑀁 𑀧𑀼𑀩𑁆𑀩𑀡𑁆𑀳𑀲𑀫𑀬𑀁, 𑀧𑀼𑀩𑁆𑀩𑀡𑁆𑀳𑁂 𑀏𑀓𑀁 𑀔𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁 𑀮𑀩𑁆𑀪𑀢𑀺. 𑀦𑀺𑀯𑀸𑀲𑁂𑀢𑁆𑀯𑀸𑀢𑀺 𑀧𑀭𑀺𑀤𑀳𑀺𑀢𑁆𑀯𑀸, 𑀯𑀺𑀳𑀸𑀭𑀦𑀺𑀯𑀸𑀲𑀦𑀧𑀭𑀺𑀯𑀢𑁆𑀢𑀦𑀯𑀲𑁂𑀦𑁂𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀦 𑀳𑀺 𑀪𑀕𑀯𑀸 𑀢𑀢𑁄 𑀧𑀼𑀩𑁆𑀩𑁂 𑀅𑀦𑀺𑀯𑀢𑁆𑀣𑁄 𑀆𑀲𑀺. 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬𑀸𑀢𑀺 𑀧𑀢𑁆𑀢𑀁 𑀳𑀢𑁆𑀣𑁂𑀳𑀺, 𑀘𑀻𑀯𑀭𑀁 𑀓𑀸𑀬𑁂𑀦 𑀆𑀤𑀺𑀬𑀺𑀢𑁆𑀯𑀸, 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀥𑀸𑀭𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀪𑀕𑀯𑀢𑁄 𑀓𑀺𑀭 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀢𑀼𑀓𑀸𑀫𑀲𑁆𑀲 𑀪𑀫𑀭𑁄 𑀯𑀺𑀬 𑀯𑀺𑀓𑀲𑀺𑀢𑀧𑀤𑀼𑀫𑀤𑁆𑀯𑀬𑀫𑀚𑁆𑀛𑀁, 𑀇𑀦𑁆𑀤𑀦𑀻𑀮𑀫𑀡𑀺𑀯𑀡𑁆𑀡𑀁 𑀲𑁂𑀮𑀫𑀬𑀁 𑀧𑀢𑁆𑀢𑀁 𑀳𑀢𑁆𑀣𑀤𑁆𑀯𑀬𑀫𑀚𑁆𑀛𑀁 𑀆𑀕𑀘𑁆𑀙𑀢𑀺. 𑀢𑀲𑁆𑀫𑀸 𑀏𑀯𑀫𑀸𑀕𑀢𑀁 𑀧𑀢𑁆𑀢𑀁 𑀳𑀢𑁆𑀣𑁂𑀳𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀘𑀻𑀯𑀭𑀜𑁆𑀘 𑀧𑀭𑀺𑀫𑀡𑁆𑀟𑀮𑀁 𑀧𑀸𑀭𑀼𑀢𑀁 𑀓𑀸𑀬𑁂𑀦 𑀥𑀸𑀭𑁂𑀢𑁆𑀯𑀸𑀢𑀺 𑀏𑀯𑀫𑀲𑁆𑀲 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀬𑁂𑀦 𑀯𑀸 𑀢𑁂𑀦 𑀯𑀸 𑀳𑀺 𑀧𑀓𑀸𑀭𑁂𑀦 𑀕𑀡𑁆𑀳𑀦𑁆𑀢𑁄 𑀆𑀤𑀸𑀬 𑀇𑀘𑁆𑀘𑁂𑀯 𑀯𑀼𑀘𑁆𑀘𑀢𑀺 𑀬𑀣𑀸 ‘‘𑀲𑀫𑀸𑀤𑀸𑀬𑁂𑀯 𑀧𑀓𑁆𑀓𑀫𑀢𑀻’’𑀢𑀺.

𑀬𑁂𑀦𑀸𑀢𑀺 𑀬𑁂𑀦 𑀫𑀕𑁆𑀕𑁂𑀦. 𑀓𑀫𑁆𑀫𑀦𑁆𑀢𑁄𑀢𑀺 𑀓𑀫𑁆𑀫𑀓𑀭𑀡𑁄𑀓𑀸𑀲𑁄. 𑀢𑁂𑀦𑀸𑀢𑀺 𑀢𑁂𑀦 𑀫𑀕𑁆𑀕𑁂𑀦. 𑀉𑀧𑀲𑀗𑁆𑀓𑀫𑀻𑀢𑀺 𑀕𑀢𑁄, 𑀬𑁂𑀦 𑀫𑀕𑁆𑀕𑁂𑀦 𑀓𑀲𑀺𑀪𑀸𑀭𑀤𑁆𑀯𑀸𑀚𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀓𑀫𑁆𑀫𑀦𑁆𑀢𑁄 𑀕𑀫𑁆𑀫𑀢𑀺, 𑀢𑁂𑀦 𑀫𑀕𑁆𑀕𑁂𑀦 𑀕𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣 𑀓𑀲𑁆𑀫𑀸, 𑀪𑀺𑀓𑁆𑀔𑀽, 𑀪𑀕𑀯𑀦𑁆𑀢𑀁 𑀦𑀸𑀦𑀼𑀩𑀦𑁆𑀥𑀺𑀁𑀲𑀽𑀢𑀺? 𑀯𑀼𑀘𑁆𑀘𑀢𑁂 𑁋 𑀬𑀤𑀸 𑀪𑀕𑀯𑀸 𑀏𑀓𑀓𑁄𑀯 𑀓𑀢𑁆𑀣𑀘𑀺 𑀉𑀧𑀲𑀗𑁆𑀓𑀫𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸𑀬𑀁 𑀤𑁆𑀯𑀸𑀭𑀁 𑀧𑀺𑀤𑀳𑀺𑀢𑁆𑀯𑀸 𑀅𑀦𑁆𑀢𑁄𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀲𑀢𑀺. 𑀢𑀢𑁄 𑀪𑀺𑀓𑁆𑀔𑀽 𑀢𑀸𑀬 𑀲𑀜𑁆𑀜𑀸𑀬 𑀚𑀸𑀦𑀦𑁆𑀢𑀺 𑁋 ‘‘𑀅𑀚𑁆𑀚 𑀪𑀕𑀯𑀸 𑀏𑀓𑀓𑁄𑀯 𑀕𑀸𑀫𑀁 𑀧𑀯𑀺𑀲𑀺𑀢𑀼𑀓𑀸𑀫𑁄, 𑀅𑀤𑁆𑀥𑀸 𑀓𑀜𑁆𑀘𑀺 𑀏𑀯 𑀯𑀺𑀦𑁂𑀢𑀩𑁆𑀩𑀧𑀼𑀕𑁆𑀕𑀮𑀁 𑀅𑀤𑁆𑀤𑀲𑀸’’𑀢𑀺. 𑀢𑁂 𑀅𑀢𑁆𑀢𑀦𑁄 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸, 𑀕𑀦𑁆𑀥𑀓𑀼𑀝𑀺𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸, 𑀪𑀺𑀓𑁆𑀔𑀸𑀘𑀸𑀭𑀁 𑀕𑀘𑁆𑀙𑀦𑁆𑀢𑀺. 𑀢𑀤𑀸 𑀘 𑀪𑀕𑀯𑀸 𑀏𑀯𑀫𑀓𑀸𑀲𑀺. 𑀢𑀲𑁆𑀫𑀸 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀦𑀸𑀦𑀼𑀩𑀦𑁆𑀥𑀺𑀁𑀲𑀽𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦𑀸𑀢𑀺 𑀬𑁂𑀦 𑀲𑀫𑀬𑁂𑀦 𑀪𑀕𑀯𑀸 𑀓𑀫𑁆𑀫𑀦𑁆𑀢𑀁 𑀉𑀧𑀲𑀗𑁆𑀓𑀫𑀺, 𑀢𑁂𑀦 𑀲𑀫𑀬𑁂𑀦 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀭𑀺𑀯𑁂𑀲𑀦𑀸 𑀯𑀢𑁆𑀢𑀢𑀺, 𑀪𑀢𑁆𑀢𑀯𑀺𑀲𑁆𑀲𑀕𑁆𑀕𑁄 𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀬𑀁 𑀧𑀼𑀩𑁆𑀩𑁂 𑀅𑀯𑁄𑀘𑀼𑀫𑁆𑀳 𑁋 ‘‘𑀩𑁆𑀭𑀸𑀳𑁆𑀫𑀡𑀻 𑀧𑀜𑁆𑀘 𑀓𑀲𑁆𑀲𑀓𑀲𑀢𑀸𑀦𑀺 𑀲𑀼𑀯𑀡𑁆𑀡𑀭𑀚𑀢𑀓𑀁𑀲𑀢𑀫𑁆𑀩𑀫𑀬𑀸𑀦𑀺 𑀪𑀸𑀚𑀦𑀸𑀦𑀺 𑀕𑀳𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸𑀦𑀺 𑀲𑀼𑀯𑀡𑁆𑀡𑀓𑀝𑀘𑁆𑀙𑀼𑀁 𑀕𑀳𑁂𑀢𑁆𑀯𑀸 𑀧𑀸𑀬𑀸𑀲𑁂𑀦 𑀧𑀭𑀺𑀯𑀺𑀲𑀦𑁆𑀢𑀻 𑀕𑀘𑁆𑀙𑀢𑀻’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀬𑁂𑀦 𑀧𑀭𑀺𑀯𑁂𑀲𑀦𑀸 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀓𑀺𑀁 𑀓𑀸𑀭𑀡𑀸𑀢𑀺? 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀦𑀼𑀕𑁆𑀕𑀳𑀓𑀭𑀡𑀢𑁆𑀣𑀁. 𑀦 𑀳𑀺 𑀪𑀕𑀯𑀸 𑀓𑀧𑀡𑀧𑀼𑀭𑀺𑀲𑁄 𑀯𑀺𑀬 𑀪𑁄𑀢𑁆𑀢𑀼𑀓𑀸𑀫𑀢𑀸𑀬 𑀧𑀭𑀺𑀯𑁂𑀲𑀦𑀁 𑀉𑀧𑀲𑀗𑁆𑀓𑀫𑀢𑀺. 𑀪𑀕𑀯𑀢𑁄 𑀳𑀺 𑀤𑁆𑀯𑁂 𑀅𑀲𑀻𑀢𑀺𑀲𑀳𑀲𑁆𑀲𑀲𑀗𑁆𑀔𑁆𑀬𑀸 𑀲𑀓𑁆𑀬𑀓𑁄𑀮𑀺𑀬𑀭𑀸𑀚𑀸𑀦𑁄 𑀜𑀸𑀢𑀬𑁄, 𑀢𑁂 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀺𑀬𑀸 𑀦𑀺𑀩𑀤𑁆𑀥𑀪𑀢𑁆𑀢𑀁 𑀤𑀸𑀢𑀼𑀁 𑀉𑀲𑁆𑀲𑀳𑀦𑁆𑀢𑀺. 𑀦 𑀧𑀦 𑀪𑀕𑀯𑀸 𑀪𑀢𑁆𑀢𑀢𑁆𑀣𑀸𑀬 𑀧𑀩𑁆𑀩𑀚𑀺𑀢𑁄, 𑀅𑀧𑀺𑀘 𑀔𑁄 𑀧𑀦 ‘‘𑀅𑀦𑁂𑀓𑀸𑀦𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀧𑀜𑁆𑀘 𑀫𑀳𑀸𑀧𑀭𑀺𑀘𑁆𑀘𑀸𑀕𑁂 𑀧𑀭𑀺𑀘𑁆𑀘𑀚𑀦𑁆𑀢𑁄 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀫𑀼𑀢𑁆𑀢𑁄 𑀫𑁄𑀘𑁂𑀲𑁆𑀲𑀸𑀫𑀺, 𑀤𑀦𑁆𑀢𑁄 𑀤𑀫𑁂𑀲𑁆𑀲𑀸𑀫𑀺; 𑀲𑀦𑁆𑀢𑁄 𑀲𑀫𑁂𑀲𑁆𑀲𑀸𑀫𑀺, 𑀧𑀭𑀺𑀦𑀺𑀩𑁆𑀩𑀼𑀢𑁄 𑀧𑀭𑀺𑀦𑀺𑀩𑁆𑀩𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀧𑀩𑁆𑀩𑀚𑀺𑀢𑁄. 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀫𑀼𑀢𑁆𑀢𑀢𑁆𑀢𑀸…𑀧𑁂… 𑀧𑀭𑀺𑀦𑀺𑀩𑁆𑀩𑀼𑀢𑀢𑁆𑀢𑀸 𑀘 𑀧𑀭𑀁 𑀫𑁄𑀘𑁂𑀦𑁆𑀢𑁄…𑀧𑁂… 𑀧𑀭𑀺𑀦𑀺𑀩𑁆𑀩𑀸𑀧𑁂𑀦𑁆𑀢𑁄 𑀘 𑀮𑁄𑀓𑁂 𑀯𑀺𑀘𑀭𑀦𑁆𑀢𑁄 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀦𑀼𑀕𑁆𑀕𑀳𑀓𑀭𑀡𑀢𑁆𑀣𑀁 𑀬𑁂𑀦 𑀧𑀭𑀺𑀯𑁂𑀲𑀦𑀸 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀻𑀢𑀺 𑀏𑀯𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀘 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄, 𑀏𑀓𑁄𑀓𑀸𑀲𑀁 𑀏𑀓𑀧𑀲𑁆𑀲𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀪𑀼𑀫𑁆𑀫𑀢𑁆𑀣𑁂 𑀯𑀸 𑀉𑀧𑀬𑁄𑀕𑀯𑀘𑀦𑀁, 𑀢𑀲𑁆𑀲 𑀤𑀲𑁆𑀲𑀦𑀽𑀧𑀘𑀸𑀭𑁂 𑀓𑀣𑀸𑀲𑀯𑀦𑀝𑁆𑀞𑀸𑀦𑁂, 𑀬𑀢𑁆𑀣 𑀞𑀺𑀢𑀁 𑀩𑁆𑀭𑀸𑀳𑁆𑀫𑀡𑁄 𑀧𑀲𑁆𑀲𑀢𑀺, 𑀢𑀢𑁆𑀣 𑀉𑀘𑁆𑀘𑀝𑁆𑀞𑀸𑀦𑁂 𑀅𑀝𑁆𑀞𑀸𑀲𑀺. 𑀞𑀢𑁆𑀯𑀸 𑀘 𑀲𑀼𑀯𑀡𑁆𑀡𑀭𑀲𑀧𑀺𑀜𑁆𑀚𑀭𑀁 𑀲𑀳𑀲𑁆𑀲𑀘𑀦𑁆𑀤𑀲𑀽𑀭𑀺𑀬𑁄𑀪𑀸𑀲𑀸𑀢𑀺𑀪𑀸𑀲𑀬𑀫𑀸𑀦𑀁 𑀲𑀭𑀻𑀭𑀸𑀪𑀁 𑀫𑀼𑀜𑁆𑀘𑀺 𑀲𑀫𑀦𑁆𑀢𑀢𑁄 𑀅𑀲𑀻𑀢𑀺𑀳𑀢𑁆𑀣𑀧𑀭𑀺𑀫𑀸𑀡𑀁, 𑀬𑀸𑀬 𑀅𑀚𑁆𑀛𑁄𑀢𑁆𑀣𑀭𑀺𑀢𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀓𑀫𑁆𑀫𑀦𑁆𑀢𑀲𑀸𑀮𑀸𑀪𑀺𑀢𑁆𑀢𑀺𑀭𑀼𑀓𑁆𑀔𑀓𑀲𑀺𑀢𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑀸𑀤𑀬𑁄 𑀲𑀼𑀯𑀡𑁆𑀡𑀫𑀬𑀸 𑀯𑀺𑀬 𑀅𑀳𑁂𑀲𑀼𑀁. 𑀅𑀣 𑀫𑀦𑀼𑀲𑁆𑀲𑀸 𑀧𑀸𑀬𑀸𑀲𑀁 𑀪𑀼𑀢𑁆𑀢𑀸 𑀅𑀲𑀻𑀢𑀺𑀅𑀦𑀼𑀩𑁆𑀬𑀜𑁆𑀚𑀦𑀧𑀭𑀺𑀯𑀸𑀭𑀤𑁆𑀯𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑀧𑀝𑀺𑀫𑀡𑁆𑀟𑀺𑀢𑀲𑀭𑀻𑀭𑀁 𑀩𑁆𑀬𑀸𑀫𑀧𑁆𑀧𑀪𑀸𑀧𑀭𑀺𑀓𑁆𑀔𑁂𑀧𑀯𑀺𑀪𑀽𑀲𑀺𑀢𑀩𑀸𑀳𑀼𑀬𑀼𑀕𑀴𑀁 𑀓𑁂𑀢𑀼𑀫𑀸𑀮𑀸𑀲𑀫𑀼𑀚𑁆𑀚𑀮𑀺𑀢𑀲𑀲𑁆𑀲𑀺𑀭𑀺𑀓𑀤𑀲𑁆𑀲𑀦𑀁 𑀚𑀗𑁆𑀕𑀫𑀫𑀺𑀯 𑀧𑀤𑀼𑀫𑀲𑁆𑀲𑀭𑀁, 𑀭𑀁𑀲𑀺𑀚𑀸𑀮𑀼𑀚𑁆𑀚𑀮𑀺𑀢𑀢𑀸𑀭𑀸𑀕𑀡𑀫𑀺𑀯 𑀕𑀕𑀦𑀢𑀮𑀁, 𑀆𑀤𑀺𑀢𑁆𑀢𑀫𑀺𑀯 𑀘 𑀓𑀦𑀓𑀕𑀺𑀭𑀺𑀲𑀺𑀔𑀭𑀁 𑀲𑀺𑀭𑀺𑀬𑀸 𑀚𑀮𑀫𑀸𑀦𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀏𑀓𑀫𑀦𑁆𑀢𑀁 𑀞𑀺𑀢𑀁 𑀤𑀺𑀲𑁆𑀯𑀸 𑀳𑀢𑁆𑀣𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀲𑀫𑁆𑀧𑀭𑀺𑀯𑀸𑀭𑁂𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀏𑀯𑀁 𑀢𑁂𑀳𑀺 𑀲𑀫𑁆𑀧𑀭𑀺𑀯𑀸𑀭𑀺𑀢𑀁 𑀅𑀤𑁆𑀤𑀲 𑀔𑁄 𑀓𑀲𑀺𑀪𑀸𑀭𑀤𑁆𑀯𑀸𑀚𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀧𑀺𑀡𑁆𑀟𑀸𑀬 𑀞𑀺𑀢𑀁. 𑀤𑀺𑀲𑁆𑀯𑀸𑀦 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ‘‘𑀅𑀳𑀁 𑀔𑁄, 𑀲𑀫𑀡, 𑀓𑀲𑀸𑀫𑀺 𑀘 𑀯𑀧𑀸𑀫𑀺 𑀘𑀸’’𑀢𑀺.

𑀓𑀲𑁆𑀫𑀸 𑀧𑀦𑀸𑀬𑀁 𑀏𑀯𑀫𑀸𑀳? 𑀓𑀺𑀁 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑁂 𑀧𑀲𑀸𑀤𑀦𑀻𑀬𑁂 𑀉𑀢𑁆𑀢𑀫𑀤𑀫𑀣𑀲𑀫𑀣𑀫𑀦𑀼𑀧𑁆𑀧𑀢𑁆𑀢𑁂𑀧𑀺 𑀪𑀕𑀯𑀢𑀺 𑀅𑀧𑁆𑀧𑀲𑀸𑀤𑁂𑀦, 𑀉𑀤𑀸𑀳𑀼 𑀅𑀟𑁆𑀠𑀢𑁂𑀬𑁆𑀬𑀸𑀦𑀁 𑀚𑀦𑀲𑀳𑀲𑁆𑀲𑀸𑀦𑀁 𑀧𑀸𑀬𑀸𑀲𑀁 𑀧𑀝𑀺𑀬𑀸𑀤𑁂𑀢𑁆𑀯𑀸𑀧𑀺 𑀓𑀝𑀘𑁆𑀙𑀼𑀪𑀺𑀓𑁆𑀔𑀸𑀬 𑀫𑀘𑁆𑀙𑁂𑀭𑁂𑀦𑀸𑀢𑀺? 𑀉𑀪𑀬𑀣𑀸𑀧𑀺 𑀦𑁄, 𑀅𑀧𑀺𑀘 𑀔𑁆𑀯𑀸𑀲𑁆𑀲 𑀪𑀕𑀯𑀢𑁄 𑀤𑀲𑁆𑀲𑀦𑁂𑀦 𑀅𑀢𑀺𑀢𑁆𑀢𑀁 𑀦𑀺𑀓𑁆𑀔𑀺𑀢𑁆𑀢𑀓𑀫𑁆𑀫𑀦𑁆𑀢𑀁 𑀚𑀦𑀁 𑀤𑀺𑀲𑁆𑀯𑀸 ‘‘𑀓𑀫𑁆𑀫𑀪𑀗𑁆𑀕𑀁 𑀫𑁂 𑀓𑀸𑀢𑀼𑀁 𑀆𑀕𑀢𑁄’’𑀢𑀺 𑀅𑀦𑀢𑁆𑀢𑀫𑀦𑀢𑀸 𑀅𑀳𑁄𑀲𑀺. 𑀢𑀲𑁆𑀫𑀸 𑀏𑀯𑀫𑀸𑀳. 𑀪𑀕𑀯𑀢𑁄 𑀘 𑀮𑀓𑁆𑀔𑀡𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 ‘‘𑀲𑀘𑀸𑀬𑀁 𑀓𑀫𑁆𑀫𑀦𑁆𑀢𑁂 𑀧𑀬𑁄𑀚𑀬𑀺𑀲𑁆𑀲, 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀫𑀦𑀼𑀲𑁆𑀲𑀸𑀦𑀁 𑀲𑀻𑀲𑁂 𑀘𑀽𑀴𑀸𑀫𑀡𑀺 𑀯𑀺𑀬 𑀅𑀪𑀯𑀺𑀲𑁆𑀲, 𑀓𑁄 𑀦𑀸𑀫𑀲𑁆𑀲 𑀅𑀢𑁆𑀣𑁄 𑀦 𑀲𑀫𑁆𑀧𑀚𑁆𑀚𑀺𑀲𑁆𑀲, 𑀏𑀯𑀫𑁂𑀯𑀁 𑀅𑀮𑀲𑀢𑀸𑀬 𑀓𑀫𑁆𑀫𑀦𑁆𑀢𑁂 𑀅𑀧𑁆𑀧𑀬𑁄𑀚𑁂𑀢𑁆𑀯𑀸 𑀯𑀧𑁆𑀧𑀫𑀗𑁆𑀕𑀮𑀸𑀤𑀻𑀲𑀼 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑁄 𑀓𑀸𑀬𑀤𑀴𑁆𑀳𑀻𑀩𑀳𑀼𑀮𑁄 𑀯𑀺𑀘𑀭𑀢𑀻’’𑀢𑀺𑀧𑀺𑀲𑁆𑀲 𑀅𑀳𑁄𑀲𑀺. 𑀢𑁂𑀦𑀸𑀳 𑁋 ‘‘𑀅𑀳𑀁 𑀔𑁄, 𑀲𑀫𑀡, 𑀓𑀲𑀸𑀫𑀺 𑀘 𑀯𑀧𑀸𑀫𑀺 𑀘, 𑀓𑀲𑀺𑀢𑁆𑀯𑀸 𑀘 𑀯𑀧𑀺𑀢𑁆𑀯𑀸 𑀘 𑀪𑀼𑀜𑁆𑀚𑀸𑀫𑀻’’𑀢𑀺. 𑀦 𑀫𑁂 𑀓𑀫𑁆𑀫𑀦𑁆𑀢𑀸 𑀩𑁆𑀬𑀸𑀧𑀚𑁆𑀚𑀦𑁆𑀢𑀺, 𑀦 𑀘𑀫𑁆𑀳𑀺 𑀬𑀣𑀸 𑀢𑁆𑀯𑀁 𑀏𑀯𑀁 𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁆𑀯𑀫𑁆𑀧𑀺 𑀲𑀫𑀡…𑀧𑁂… 𑀪𑀼𑀜𑁆𑀚𑀲𑁆𑀲𑀼, 𑀓𑁄 𑀢𑁂 𑀅𑀢𑁆𑀣𑁄 𑀦 𑀲𑀫𑁆𑀧𑀚𑁆𑀚𑁂𑀬𑁆𑀬 𑀏𑀯𑀁 𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀧𑀺𑀘𑀸𑀬𑀁 𑀅𑀲𑁆𑀲𑁄𑀲𑀺 𑁋 ‘‘𑀲𑀓𑁆𑀬𑀭𑀸𑀚𑀓𑀼𑀮𑁂 𑀓𑀺𑀭 𑀓𑀼𑀫𑀸𑀭𑁄 𑀉𑀧𑁆𑀧𑀦𑁆𑀦𑁄, 𑀲𑁄 𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁄’’𑀢𑀺. 𑀢𑀲𑁆𑀫𑀸 ‘‘𑀇𑀤𑀸𑀦𑀺 𑀅𑀬𑀁 𑀲𑁄’’𑀢𑀺 𑀜𑀢𑁆𑀯𑀸 ‘‘𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀁 𑀓𑀺𑀭 𑀧𑀳𑀸𑀬 𑀓𑀺𑀮𑀦𑁆𑀢𑁄𑀲𑀻’’𑀢𑀺 𑀉𑀧𑀸𑀭𑀫𑁆𑀪𑀁 𑀓𑀭𑁄𑀦𑁆𑀢𑁄 𑀆𑀳 ‘‘𑀅𑀳𑀁 𑀔𑁄 𑀲𑀫𑀡𑀸’’𑀢𑀺. 𑀅𑀧𑀺𑀘𑀸𑀬𑀁 𑀢𑀺𑀓𑁆𑀔𑀧𑀜𑁆𑀜𑁄 𑀩𑁆𑀭𑀸𑀳𑁆𑀫𑀡𑁄, 𑀦 𑀪𑀕𑀯𑀦𑁆𑀢𑀁 𑀅𑀯𑀓𑁆𑀔𑀺𑀧𑀦𑁆𑀢𑁄 𑀪𑀡𑀢𑀺, 𑀪𑀕𑀯𑀢𑁄 𑀧𑀦 𑀭𑀽𑀧𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀧𑀜𑁆𑀜𑀸𑀲𑀫𑁆𑀧𑀢𑁆𑀢𑀺𑀁 𑀲𑀫𑁆𑀪𑀸𑀯𑀬𑀫𑀸𑀦𑁄 𑀓𑀣𑀸𑀧𑀯𑀢𑁆𑀢𑀦𑀢𑁆𑀣𑀫𑁆𑀧𑀺 𑀏𑀯𑀫𑀸𑀳 𑁋 ‘‘𑀅𑀳𑀁 𑀔𑁄 𑀲𑀫𑀡𑀸’’𑀢𑀺. 𑀢𑀢𑁄 𑀪𑀕𑀯𑀸 𑀯𑁂𑀦𑁂𑀬𑁆𑀬𑀯𑀲𑁂𑀦 𑀲𑀤𑁂𑀯𑀓𑁂 𑀮𑁄𑀓𑁂 𑀅𑀕𑁆𑀕𑀓𑀲𑁆𑀲𑀓𑀯𑀧𑁆𑀧𑀓𑀪𑀸𑀯𑀁 𑀅𑀢𑁆𑀢𑀦𑁄 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀳𑀫𑁆𑀧𑀺 𑀔𑁄 𑀩𑁆𑀭𑀸𑀳𑁆𑀫𑀡𑀸’’𑀢𑀺.

𑀅𑀣 𑀩𑁆𑀭𑀸𑀳𑁆𑀫𑀡𑀲𑁆𑀲 𑀘𑀺𑀦𑁆𑀢𑀸 𑀉𑀤𑀧𑀸𑀤𑀺 𑁋 ‘‘𑀅𑀬𑀁 𑀲𑀫𑀡𑁄 ‘𑀓𑀲𑀸𑀫𑀺 𑀘 𑀯𑀧𑀸𑀫𑀺 𑀘𑀸’𑀢𑀺 𑀆𑀳. 𑀦 𑀘𑀲𑁆𑀲 𑀑𑀴𑀸𑀭𑀺𑀓𑀸𑀦𑀺 𑀬𑀼𑀕𑀦𑀗𑁆𑀕𑀮𑀸𑀤𑀻𑀦𑀺 𑀓𑀲𑀺𑀪𑀡𑁆𑀟𑀸𑀦𑀺 𑀧𑀲𑁆𑀲𑀸𑀫𑀺, 𑀲𑁄 𑀫𑀼𑀲𑀸 𑀦𑀼 𑀔𑁄 𑀪𑀡𑀢𑀺, 𑀦𑁄’’𑀢𑀺 𑀪𑀕𑀯𑀦𑁆𑀢𑀁 𑀧𑀸𑀤𑀢𑀮𑀸 𑀧𑀝𑁆𑀞𑀸𑀬 𑀬𑀸𑀯 𑀉𑀧𑀭𑀺 𑀓𑁂𑀲𑀦𑁆𑀢𑀸 𑀲𑀫𑁆𑀫𑀸𑀮𑁄𑀓𑀬𑀫𑀸𑀦𑁄 𑀅𑀗𑁆𑀕𑀯𑀺𑀚𑁆𑀚𑀸𑀬 𑀓𑀢𑀸𑀥𑀺𑀓𑀸𑀭𑀢𑁆𑀢𑀸 𑀤𑁆𑀯𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑀲𑀫𑁆𑀧𑀢𑁆𑀢𑀺𑀫𑀲𑁆𑀲 𑀜𑀢𑁆𑀯𑀸 ‘‘𑀅𑀝𑁆𑀞𑀸𑀦𑀫𑁂𑀢𑀁 𑀅𑀦𑀯𑀓𑀸𑀲𑁄, 𑀬𑀁 𑀏𑀯𑀭𑀽𑀧𑁄 𑀫𑀼𑀲𑀸 𑀪𑀡𑁂𑀬𑁆𑀬𑀸’’𑀢𑀺 𑀢𑀸𑀯𑀤𑁂𑀯 𑀲𑀜𑁆𑀚𑀸𑀢𑀩𑀳𑀼𑀫𑀸𑀦𑁄 𑀪𑀕𑀯𑀢𑀺 𑀲𑀫𑀡𑀯𑀸𑀤𑀁 𑀧𑀳𑀸𑀬 𑀕𑁄𑀢𑁆𑀢𑁂𑀦 𑀪𑀕𑀯𑀦𑁆𑀢𑀁 𑀲𑀫𑀼𑀤𑀸𑀘𑀭𑀫𑀸𑀦𑁄 𑀆𑀳 ‘‘𑀦 𑀔𑁄 𑀧𑀦 𑀫𑀬𑀁 𑀧𑀲𑁆𑀲𑀸𑀫 𑀪𑁄𑀢𑁄 𑀕𑁄𑀢𑀫𑀲𑁆𑀲𑀸’’𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀢𑀺𑀓𑁆𑀔𑀧𑀜𑁆𑀜𑁄 𑀩𑁆𑀭𑀸𑀳𑁆𑀫𑀡𑁄 ‘‘𑀕𑀫𑁆𑀪𑀻𑀭𑀢𑁆𑀣𑀁 𑀲𑀦𑁆𑀥𑀸𑀬 𑀇𑀫𑀺𑀦𑀸 𑀏𑀢𑀁 𑀯𑀼𑀢𑁆𑀢’’𑀦𑁆𑀢𑀺 𑀜𑀢𑁆𑀯𑀸 𑀧𑀼𑀘𑁆𑀙𑀺𑀢𑁆𑀯𑀸 𑀢𑀫𑀢𑁆𑀣𑀁 𑀜𑀸𑀢𑀼𑀓𑀸𑀫𑁄 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺. 𑀢𑁂𑀦𑀸𑀳 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 ‘‘𑀅𑀣 𑀔𑁄 𑀓𑀲𑀺𑀪𑀸𑀭𑀤𑁆𑀯𑀸𑀚𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀻’’𑀢𑀺. 𑀢𑀢𑁆𑀣 𑀕𑀸𑀣𑀸𑀬𑀸𑀢𑀺 𑀅𑀓𑁆𑀔𑀭𑀧𑀤𑀦𑀺𑀬𑀫𑀺𑀢𑁂𑀦 𑀯𑀘𑀦𑁂𑀦. 𑀅𑀚𑁆𑀛𑀪𑀸𑀲𑀻𑀢𑀺 𑀅𑀪𑀸𑀲𑀺.

𑁭𑁬-𑁭𑁭. 𑀢𑀢𑁆𑀣 𑀩𑁆𑀭𑀸𑀳𑁆𑀫𑀡𑁄 ‘‘𑀓𑀲𑀺’’𑀦𑁆𑀢𑀺 𑀬𑀼𑀕𑀦𑀗𑁆𑀕𑀮𑀸𑀤𑀺𑀓𑀲𑀺𑀲𑀫𑁆𑀪𑀸𑀭𑀲𑀫𑀸𑀬𑁄𑀕𑀁 𑀯𑀤𑀢𑀺. 𑀪𑀕𑀯𑀸 𑀧𑀦 𑀬𑀲𑁆𑀫𑀸 𑀧𑀼𑀩𑁆𑀩𑀥𑀫𑁆𑀫𑀲𑀪𑀸𑀕𑁂𑀦 𑀭𑁄𑀧𑁂𑀢𑁆𑀯𑀸 𑀓𑀣𑀦𑀁 𑀦𑀸𑀫 𑀩𑀼𑀤𑁆𑀥𑀸𑀦𑀁 𑀆𑀦𑀼𑀪𑀸𑀯𑁄, 𑀢𑀲𑁆𑀫𑀸 𑀩𑀼𑀤𑁆𑀥𑀸𑀦𑀼𑀪𑀸𑀯𑀁 𑀤𑀻𑀧𑁂𑀦𑁆𑀢𑁄 𑀧𑀼𑀩𑁆𑀩𑀥𑀫𑁆𑀫𑀲𑀪𑀸𑀕𑁂𑀦 𑀭𑁄𑀧𑁂𑀦𑁆𑀢𑁄 𑀆𑀳 𑁋 ‘‘𑀲𑀤𑁆𑀥𑀸 𑀩𑀻𑀚’’𑀦𑁆𑀢𑀺. 𑀓𑁄 𑀧𑀦𑁂𑀢𑁆𑀣 𑀧𑀼𑀩𑁆𑀩𑀥𑀫𑁆𑀫𑀲𑀪𑀸𑀕𑁄, 𑀦𑀦𑀼 𑀩𑁆𑀭𑀸𑀳𑁆𑀫𑀡𑁂𑀦 𑀪𑀕𑀯𑀸 𑀬𑀼𑀕𑀦𑀗𑁆𑀕𑀮𑀸𑀤𑀺𑀓𑀲𑀺𑀲𑀫𑁆𑀪𑀸𑀭𑀲𑀫𑀸𑀬𑁄𑀕𑀁 𑀧𑀼𑀘𑁆𑀙𑀺𑀢𑁄 𑀅𑀣 𑀘 𑀧𑀦 𑀅𑀧𑀼𑀘𑁆𑀙𑀺𑀢𑀲𑁆𑀲 𑀩𑀻𑀚𑀲𑁆𑀲 𑀲𑀪𑀸𑀕𑁂𑀦 𑀭𑁄𑀧𑁂𑀦𑁆𑀢𑁄 𑀆𑀳 𑁋 ‘‘𑀲𑀤𑁆𑀥𑀸 𑀩𑀻𑀚’’𑀦𑁆𑀢𑀺, 𑀏𑀯𑀜𑁆𑀘 𑀲𑀢𑀺 𑀅𑀦𑀦𑀼𑀲𑀦𑁆𑀥𑀺𑀓𑀸𑀯 𑀅𑀬𑀁 𑀓𑀣𑀸 𑀳𑁄𑀢𑀻𑀢𑀺? 𑀯𑀼𑀘𑁆𑀘𑀢𑁂 𑁋 𑀦 𑀩𑀼𑀤𑁆𑀥𑀸𑀦𑀁 𑀅𑀦𑀦𑀼𑀲𑀦𑁆𑀥𑀺𑀓𑀸 𑀦𑀸𑀫 𑀓𑀣𑀸 𑀅𑀢𑁆𑀣𑀺, 𑀦𑀸𑀧𑀺 𑀩𑀼𑀤𑁆𑀥𑀸 𑀧𑀼𑀩𑁆𑀩𑀥𑀫𑁆𑀫𑀲𑀪𑀸𑀕𑀁 𑀅𑀦𑀸𑀭𑁄𑀧𑁂𑀢𑁆𑀯𑀸 𑀓𑀣𑁂𑀦𑁆𑀢𑀺. 𑀏𑀯𑀜𑁆𑀘𑁂𑀢𑁆𑀣 𑀅𑀦𑀼𑀲𑀦𑁆𑀥𑀺 𑀯𑁂𑀤𑀺𑀢𑀩𑁆𑀩𑀸 𑁋 𑀅𑀦𑁂𑀦 𑀳𑀺 𑀩𑁆𑀭𑀸𑀳𑁆𑀫𑀡𑁂𑀦 𑀪𑀕𑀯𑀸 𑀬𑀼𑀕𑀦𑀗𑁆𑀕𑀮𑀸𑀤𑀺𑀓𑀲𑀺𑀲𑀫𑁆𑀪𑀸𑀭𑀯𑀲𑁂𑀦 𑀓𑀲𑀺𑀁 𑀧𑀼𑀘𑁆𑀙𑀺𑀢𑁄. 𑀲𑁄 𑀢𑀲𑁆𑀲 𑀅𑀦𑀼𑀓𑀫𑁆𑀧𑀸𑀬 ‘‘𑀇𑀤𑀁 𑀅𑀧𑀼𑀘𑁆𑀙𑀺𑀢’’𑀦𑁆𑀢𑀺 𑀅𑀧𑀭𑀺𑀳𑀸𑀧𑁂𑀢𑁆𑀯𑀸 𑀲𑀫𑀽𑀮𑀁 𑀲𑀉𑀧𑀓𑀸𑀭𑀁 𑀲𑀲𑀫𑁆𑀪𑀸𑀭𑀁 𑀲𑀨𑀮𑀁 𑀓𑀲𑀺𑀁 𑀜𑀸𑀧𑁂𑀢𑀼𑀁 𑀫𑀽𑀮𑀢𑁄 𑀧𑀝𑁆𑀞𑀸𑀬 𑀓𑀲𑀺𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀲𑀤𑁆𑀥𑀸 𑀩𑀻𑀚’’𑀦𑁆𑀢𑀺. 𑀩𑀻𑀚𑀜𑁆𑀳𑀺 𑀓𑀲𑀺𑀬𑀸 𑀫𑀽𑀮𑀁 𑀢𑀲𑁆𑀫𑀺𑀁 𑀲𑀢𑀺 𑀓𑀢𑁆𑀢𑀩𑁆𑀩𑀢𑁄, 𑀅𑀲𑀢𑀺 𑀅𑀓𑀢𑁆𑀢𑀩𑁆𑀩𑀢𑁄, 𑀢𑀧𑁆𑀧𑀫𑀸𑀡𑁂𑀦 𑀘 𑀓𑀢𑁆𑀢𑀩𑁆𑀩𑀢𑁄. 𑀩𑀻𑀚𑁂 𑀳𑀺 𑀲𑀢𑀺 𑀓𑀲𑀺𑀁 𑀓𑀭𑁄𑀦𑁆𑀢𑀺, 𑀅𑀲𑀢𑀺 𑀦 𑀓𑀭𑁄𑀦𑁆𑀢𑀺. 𑀩𑀻𑀚𑀧𑁆𑀧𑀫𑀸𑀡𑁂𑀦 𑀘 𑀓𑀼𑀲𑀮𑀸 𑀓𑀲𑁆𑀲𑀓𑀸 𑀔𑁂𑀢𑁆𑀢𑀁 𑀓𑀲𑀦𑁆𑀢𑀺, 𑀦 𑀊𑀦𑀁 ‘‘𑀫𑀸 𑀦𑁄 𑀲𑀲𑁆𑀲𑀁 𑀧𑀭𑀺𑀳𑀸𑀬𑀻’’𑀢𑀺, 𑀦 𑀅𑀥𑀺𑀓𑀁 ‘‘𑀫𑀸 𑀦𑁄 𑀫𑁄𑀖𑁄 𑀯𑀸𑀬𑀸𑀫𑁄 𑀅𑀳𑁄𑀲𑀻’’𑀢𑀺. 𑀬𑀲𑁆𑀫𑀸 𑀘 𑀩𑀻𑀚𑀫𑁂𑀯 𑀫𑀽𑀮𑀁, 𑀢𑀲𑁆𑀫𑀸 𑀪𑀕𑀯𑀸 𑀫𑀽𑀮𑀢𑁄 𑀧𑀝𑁆𑀞𑀸𑀬 𑀓𑀲𑀺𑀁 𑀤𑀲𑁆𑀲𑁂𑀦𑁆𑀢𑁄 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀓𑀲𑀺𑀬𑀸 𑀧𑀼𑀩𑁆𑀩𑀥𑀫𑁆𑀫𑀲𑁆𑀲 𑀩𑀻𑀚𑀲𑁆𑀲 𑀲𑀪𑀸𑀕𑁂𑀦 𑀅𑀢𑁆𑀢𑀦𑁄 𑀓𑀲𑀺𑀬𑀸 𑀧𑀼𑀩𑁆𑀩𑀥𑀫𑁆𑀫𑀁 𑀭𑁄𑀧𑁂𑀦𑁆𑀢𑁄 𑀆𑀳 𑁋 ‘‘𑀲𑀤𑁆𑀥𑀸 𑀩𑀻𑀚’’𑀦𑁆𑀢𑀺. 𑀏𑀯𑀫𑁂𑀢𑁆𑀣 𑀧𑀼𑀩𑁆𑀩𑀥𑀫𑁆𑀫𑀲𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄.

𑀧𑀼𑀘𑁆𑀙𑀺𑀢𑀁𑀬𑁂𑀯 𑀯𑀢𑁆𑀯𑀸 𑀅𑀧𑀼𑀘𑁆𑀙𑀺𑀢𑀁 𑀧𑀘𑁆𑀙𑀸 𑀓𑀺𑀁 𑀦 𑀯𑀼𑀢𑁆𑀢𑀦𑁆𑀢𑀺 𑀘𑁂? 𑀢𑀲𑁆𑀲 𑀉𑀧𑀓𑀸𑀭𑀪𑀸𑀯𑀢𑁄 𑀥𑀫𑁆𑀫𑀲𑀫𑁆𑀩𑀦𑁆𑀥𑀲𑀫𑀢𑁆𑀣𑀪𑀸𑀯𑀢𑁄 𑀘. 𑀅𑀬𑀜𑁆𑀳𑀺 𑀩𑁆𑀭𑀸𑀳𑁆𑀫𑀡𑁄 𑀧𑀜𑁆𑀜𑀯𑀸, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀼𑀮𑁂 𑀧𑀦 𑀚𑀸𑀢𑀢𑁆𑀢𑀸 𑀲𑀤𑁆𑀥𑀸𑀯𑀺𑀭𑀳𑀺𑀢𑁄. 𑀲𑀤𑁆𑀥𑀸𑀯𑀺𑀭𑀳𑀺𑀢𑁄 𑀘 𑀧𑀜𑁆𑀜𑀯𑀸 𑀧𑀭𑁂𑀲𑀁 𑀲𑀤𑁆𑀥𑀸𑀬 𑀅𑀢𑁆𑀢𑀦𑁄 𑀯𑀺𑀲𑀬𑁂 𑀅𑀧𑀝𑀺𑀧𑀚𑁆𑀚𑀫𑀸𑀦𑁄 𑀯𑀺𑀲𑁂𑀲𑀁 𑀦𑀸𑀥𑀺𑀕𑀘𑁆𑀙𑀢𑀺, 𑀓𑀺𑀮𑁂𑀲𑀓𑀸𑀮𑀼𑀲𑁆𑀲𑀺𑀬𑀪𑀸𑀯𑀸𑀧𑀕𑀫𑀧𑁆𑀧𑀲𑀸𑀤𑀫𑀢𑁆𑀢𑀮𑀓𑁆𑀔𑀡𑀸𑀧𑀺 𑀘𑀲𑁆𑀲 𑀤𑀼𑀩𑁆𑀩𑀮𑀸 𑀲𑀤𑁆𑀥𑀸 𑀩𑀮𑀯𑀢𑀺𑀬𑀸 𑀧𑀜𑁆𑀜𑀸𑀬 𑀲𑀳 𑀯𑀢𑁆𑀢𑀫𑀸𑀦𑀸 𑀅𑀢𑁆𑀣𑀲𑀺𑀤𑁆𑀥𑀺𑀁 𑀦 𑀓𑀭𑁄𑀢𑀺, 𑀳𑀢𑁆𑀣𑀺𑀦𑀸 𑀲𑀳 𑀏𑀓𑀥𑀼𑀭𑁂 𑀬𑀼𑀢𑁆𑀢𑀕𑁄𑀡𑁄 𑀯𑀺𑀬. 𑀢𑀲𑁆𑀫𑀸 𑀢𑀲𑁆𑀲 𑀲𑀤𑁆𑀥𑀸 𑀉𑀧𑀓𑀸𑀭𑀺𑀓𑀸. 𑀏𑀯𑀁 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀉𑀧𑀓𑀸𑀭𑀪𑀸𑀯𑀢𑁄 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀲𑀤𑁆𑀥𑀸𑀬 𑀧𑀢𑀺𑀝𑁆𑀞𑀸𑀧𑁂𑀦𑁆𑀢𑁂𑀦 𑀧𑀘𑁆𑀙𑀸𑀧𑀺 𑀯𑀢𑁆𑀢𑀩𑁆𑀩𑁄 𑀅𑀬𑀫𑀢𑁆𑀣𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑁄 𑀤𑁂𑀲𑀦𑀸𑀓𑀼𑀲𑀮𑀢𑀸𑀬 𑀬𑀣𑀸 𑀅𑀜𑁆𑀜𑀢𑁆𑀭𑀸𑀧𑀺 ‘‘𑀲𑀤𑁆𑀥𑀸 𑀩𑀦𑁆𑀥𑀢𑀺 𑀧𑀸𑀣𑁂𑀬𑁆𑀬’’𑀦𑁆𑀢𑀺 (𑀲𑀁. 𑀦𑀺. 𑁧.𑁭𑁯) 𑀘, ‘‘𑀲𑀤𑁆𑀥𑀸 𑀤𑀼𑀢𑀺𑀬𑀸 𑀧𑀼𑀭𑀺𑀲𑀲𑁆𑀲 𑀳𑁄𑀢𑀻’’𑀢𑀺 (𑀲𑀁. 𑀦𑀺. 𑁧.𑁫𑁯) 𑀘, ‘‘𑀲𑀤𑁆𑀥𑀻𑀥 𑀯𑀺𑀢𑁆𑀢𑀁 𑀧𑀼𑀭𑀺𑀲𑀲𑁆𑀲 𑀲𑁂𑀝𑁆𑀞’’𑀦𑁆𑀢𑀺 (𑀲𑀁. 𑀦𑀺. 𑁧.𑁭𑁩, 𑁨𑁪𑁬; 𑀲𑀼. 𑀦𑀺. 𑁧𑁮𑁪) 𑀘, ‘‘𑀲𑀤𑁆𑀥𑀸𑀬 𑀢𑀭𑀢𑀺 𑀑𑀖’’𑀦𑁆𑀢𑀺 (𑀲𑀁. 𑀦𑀺. 𑁧.𑁨𑁪𑁬) 𑀘, ‘‘𑀲𑀤𑁆𑀥𑀸𑀳𑀢𑁆𑀣𑁄 𑀫𑀳𑀸𑀦𑀸𑀕𑁄’’𑀢𑀺 (𑀅. 𑀦𑀺. 𑁬.𑁪𑁩; 𑀣𑁂𑀭𑀕𑀸. 𑁬𑁯𑁪) 𑀘, ‘‘𑀲𑀤𑁆𑀥𑁂𑀲𑀺𑀓𑁄 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄𑀢𑀺 𑀘𑀸’’𑀢𑀺 (𑀅. 𑀦𑀺. 𑁭.𑁬𑁭). 𑀩𑀻𑀚𑀲𑁆𑀲 𑀘 𑀉𑀧𑀓𑀸𑀭𑀺𑀓𑀸 𑀯𑀼𑀝𑁆𑀞𑀺, 𑀲𑀸 𑀢𑀤𑀦𑀦𑁆𑀢𑀭𑀜𑁆𑀜𑁂𑀯 𑀯𑀼𑀘𑁆𑀘𑀫𑀸𑀦𑀸 𑀲𑀫𑀢𑁆𑀣𑀸 𑀳𑁄𑀢𑀺. 𑀏𑀯𑀁 𑀥𑀫𑁆𑀫𑀲𑀫𑁆𑀩𑀦𑁆𑀥𑀲𑀫𑀢𑁆𑀣𑀪𑀸𑀯𑀢𑁄 𑀧𑀘𑁆𑀙𑀸𑀧𑀺 𑀯𑀢𑁆𑀢𑀩𑁆𑀩𑁄 𑀅𑀬𑀫𑀢𑁆𑀣𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑁄, 𑀅𑀜𑁆𑀜𑁄 𑀘 𑀏𑀯𑀁𑀯𑀺𑀥𑁄 𑀈𑀲𑀸𑀬𑁄𑀢𑁆𑀢𑀸𑀤𑀺.

𑀢𑀢𑁆𑀣 𑀲𑀫𑁆𑀧𑀲𑀸𑀤𑀦𑀮𑀓𑁆𑀔𑀡𑀸 𑀲𑀤𑁆𑀥𑀸, 𑀑𑀓𑀧𑁆𑀧𑀦𑀮𑀓𑁆𑀔𑀡𑀸 𑀯𑀸, 𑀧𑀓𑁆𑀔𑀦𑁆𑀤𑀦𑀭𑀲𑀸, 𑀅𑀥𑀺𑀫𑀼𑀢𑁆𑀢𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀅𑀓𑀸𑀮𑀼𑀲𑁆𑀲𑀺𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀯𑀸, 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑀧𑀤𑀝𑁆𑀞𑀸𑀦𑀸, 𑀲𑀤𑁆𑀤𑀳𑀺𑀢𑀩𑁆𑀩𑀥𑀫𑁆𑀫𑀧𑀤𑀝𑁆𑀞𑀸𑀦𑀸 𑀯𑀸, 𑀆𑀤𑀸𑀲𑀚𑀮𑀢𑀮𑀸𑀤𑀻𑀦𑀁 𑀧𑀲𑀸𑀤𑁄 𑀯𑀺𑀬 𑀘𑁂𑀢𑀲𑁄 𑀧𑀲𑀸𑀤𑀪𑀽𑀢𑀸, 𑀉𑀤𑀓𑀧𑁆𑀧𑀲𑀸𑀤𑀓𑀫𑀡𑀺 𑀯𑀺𑀬 𑀉𑀤𑀓𑀲𑁆𑀲, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀧𑀲𑀸𑀤𑀺𑀓𑀸. 𑀩𑀻𑀚𑀦𑁆𑀢𑀺 𑀧𑀜𑁆𑀘𑀯𑀺𑀥𑀁 𑁋 𑀫𑀽𑀮𑀩𑀻𑀚𑀁, 𑀔𑀦𑁆𑀥𑀩𑀻𑀚𑀁, 𑀨𑀮𑀼𑀩𑀻𑀚𑀁, 𑀅𑀕𑁆𑀕𑀩𑀻𑀚𑀁, 𑀩𑀻𑀚𑀩𑀻𑀚𑀫𑁂𑀯 𑀧𑀜𑁆𑀘𑀫𑀦𑁆𑀢𑀺. 𑀢𑀁 𑀲𑀩𑁆𑀩𑀫𑁆𑀧𑀺 𑀯𑀺𑀭𑀼𑀳𑀦𑀝𑁆𑀞𑁂𑀦 𑀩𑀻𑀚𑀁𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀬𑀣𑀸𑀳 𑁋 ‘‘𑀩𑀻𑀚𑀜𑁆𑀘𑁂𑀢𑀁 𑀯𑀺𑀭𑀼𑀳𑀦𑀝𑁆𑀞𑁂𑀦𑀸’’𑀢𑀺.

𑀢𑀢𑁆𑀣 𑀬𑀣𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀓𑀲𑀺𑀬𑀸 𑀫𑀽𑀮𑀪𑀽𑀢𑀁 𑀩𑀻𑀚𑀁 𑀤𑁆𑀯𑁂 𑀓𑀺𑀘𑁆𑀘𑀸𑀦𑀺 𑀓𑀭𑁄𑀢𑀺, 𑀳𑁂𑀝𑁆𑀞𑀸 𑀫𑀽𑀮𑁂𑀦 𑀧𑀢𑀺𑀝𑁆𑀞𑀸𑀢𑀺, 𑀉𑀧𑀭𑀺 𑀅𑀗𑁆𑀓𑀼𑀭𑀁 𑀉𑀝𑁆𑀞𑀸𑀧𑁂𑀢𑀺; 𑀏𑀯𑀁 𑀪𑀕𑀯𑀢𑁄 𑀓𑀲𑀺𑀬𑀸 𑀫𑀽𑀮𑀪𑀽𑀢𑀸 𑀲𑀤𑁆𑀥𑀸 𑀳𑁂𑀝𑁆𑀞𑀸 𑀲𑀻𑀮𑀫𑀽𑀮𑁂𑀦 𑀧𑀢𑀺𑀝𑁆𑀞𑀸𑀢𑀺, 𑀉𑀧𑀭𑀺 𑀲𑀫𑀣𑀯𑀺𑀧𑀲𑁆𑀲𑀦𑀗𑁆𑀓𑀼𑀭𑀁 𑀉𑀝𑁆𑀞𑀸𑀧𑁂𑀢𑀺. 𑀬𑀣𑀸 𑀘 𑀢𑀁 𑀫𑀽𑀮𑁂𑀦 𑀧𑀣𑀯𑀺𑀭𑀲𑀁 𑀆𑀧𑁄𑀭𑀲𑀁 𑀕𑀳𑁂𑀢𑁆𑀯𑀸 𑀦𑀸𑀴𑁂𑀦 𑀥𑀜𑁆𑀜𑀧𑀭𑀺𑀧𑀸𑀓𑀕𑀳𑀡𑀢𑁆𑀣𑀁 𑀯𑀟𑁆𑀠𑀢𑀺; 𑀏𑀯𑀫𑀬𑀁 𑀲𑀻𑀮𑀫𑀽𑀮𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀸𑀭𑀲𑀁 𑀕𑀳𑁂𑀢𑁆𑀯𑀸 𑀅𑀭𑀺𑀬𑀫𑀕𑁆𑀕𑀦𑀸𑀴𑁂𑀦 𑀅𑀭𑀺𑀬𑀨𑀮𑀥𑀜𑁆𑀜𑀧𑀭𑀺𑀧𑀸𑀓𑀕𑀳𑀡𑀢𑁆𑀣𑀁 𑀯𑀟𑁆𑀠𑀢𑀺. 𑀬𑀣𑀸 𑀘 𑀢𑀁 𑀲𑀼𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀫𑀽𑀮𑀗𑁆𑀓𑀼𑀭𑀧𑀡𑁆𑀡𑀦𑀸𑀴𑀓𑀡𑁆𑀟𑀧𑁆𑀧𑀲𑀯𑁂𑀳𑀺 𑀯𑀼𑀟𑁆𑀠𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀧𑀢𑁆𑀯𑀸, 𑀔𑀻𑀭𑀁 𑀚𑀦𑁂𑀢𑁆𑀯𑀸, 𑀅𑀦𑁂𑀓𑀲𑀸𑀮𑀺𑀨𑀮𑀪𑀭𑀺𑀢𑀁 𑀲𑀸𑀮𑀺𑀲𑀻𑀲𑀁 𑀦𑀺𑀧𑁆𑀨𑀸𑀤𑁂𑀢𑀺; 𑀏𑀯𑀫𑀬𑀁 𑀘𑀺𑀢𑁆𑀢𑀲𑀦𑁆𑀢𑀸𑀦𑁂 𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀲𑀻𑀮𑀘𑀺𑀢𑁆𑀢𑀤𑀺𑀝𑁆𑀞𑀺𑀓𑀗𑁆𑀔𑀸𑀯𑀺𑀢𑀭𑀡𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀻𑀳𑀺 𑀯𑀼𑀟𑁆𑀠𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀧𑀢𑁆𑀯𑀸 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀔𑀻𑀭𑀁 𑀚𑀦𑁂𑀢𑁆𑀯𑀸 𑀅𑀦𑁂𑀓𑀧𑀝𑀺𑀲𑀫𑁆𑀪𑀺𑀤𑀸𑀪𑀺𑀜𑁆𑀜𑀸𑀪𑀭𑀺𑀢𑀁 𑀅𑀭𑀳𑀢𑁆𑀢𑀨𑀮𑀁 𑀦𑀺𑀧𑁆𑀨𑀸𑀤𑁂𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀲𑀤𑁆𑀥𑀸 𑀩𑀻𑀚’’𑀦𑁆𑀢𑀺.

𑀢𑀢𑁆𑀣 𑀲𑀺𑀬𑀸 ‘‘𑀧𑀭𑁄𑀧𑀜𑁆𑀜𑀸𑀲𑀓𑀼𑀲𑀮𑀥𑀫𑁆𑀫𑁂𑀲𑀼 𑀏𑀓𑀢𑁄 𑀉𑀧𑁆𑀧𑀚𑁆𑀚𑀫𑀸𑀦𑁂𑀲𑀼 𑀓𑀲𑁆𑀫𑀸 𑀲𑀤𑁆𑀥𑀸𑀯 𑀩𑀻𑀚𑀦𑁆𑀢𑀺 𑀯𑀼𑀢𑁆𑀢𑀸’’𑀢𑀺? 𑀯𑀼𑀘𑁆𑀘𑀢𑁂 𑁋 𑀩𑀻𑀚𑀓𑀺𑀘𑁆𑀘𑀓𑀭𑀡𑀢𑁄. 𑀬𑀣𑀸 𑀳𑀺 𑀢𑁂𑀲𑀼 𑀯𑀺𑀜𑁆𑀜𑀸𑀡𑀁𑀬𑁂𑀯 𑀯𑀺𑀚𑀸𑀦𑀦𑀓𑀺𑀘𑁆𑀘𑀁 𑀓𑀭𑁄𑀢𑀺, 𑀏𑀯𑀁 𑀲𑀤𑁆𑀥𑀸 𑀩𑀻𑀚𑀓𑀺𑀘𑁆𑀘𑀁, 𑀲𑀸 𑀘 𑀲𑀩𑁆𑀩𑀓𑀼𑀲𑀮𑀸𑀦𑀁 𑀫𑀽𑀮𑀪𑀽𑀢𑀸. 𑀬𑀣𑀸𑀳 𑁋

‘‘𑀲𑀤𑁆𑀥𑀸𑀚𑀸𑀢𑁄 𑀉𑀧𑀲𑀗𑁆𑀓𑀫𑀢𑀺, 𑀉𑀧𑀲𑀗𑁆𑀓𑀫𑀦𑁆𑀢𑁄 𑀧𑀬𑀺𑀭𑀼𑀧𑀸𑀲𑀢𑀺, 𑀧𑀬𑀺𑀭𑀼𑀧𑀸𑀲𑀦𑁆𑀢𑁄 𑀲𑁄𑀢𑀁 𑀑𑀤𑀳𑀢𑀺, 𑀑𑀳𑀺𑀢𑀲𑁄𑀢𑁄 𑀥𑀫𑁆𑀫𑀁 𑀲𑀼𑀡𑀸𑀢𑀺, 𑀲𑀼𑀢𑁆𑀯𑀸 𑀥𑀫𑁆𑀫𑀁 𑀥𑀸𑀭𑁂𑀢𑀺, 𑀥𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀢𑁆𑀣𑀁 𑀉𑀧𑀧𑀭𑀺𑀓𑁆𑀔𑀢𑀺, 𑀅𑀢𑁆𑀣𑀁 𑀉𑀧𑀧𑀭𑀺𑀓𑁆𑀔𑀢𑁄 𑀥𑀫𑁆𑀫𑀸 𑀦𑀺𑀚𑁆𑀛𑀸𑀦𑀁 𑀔𑀫𑀦𑁆𑀢𑀺, 𑀥𑀫𑁆𑀫𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸 𑀲𑀢𑀺 𑀙𑀦𑁆𑀤𑁄 𑀚𑀸𑀬𑀢𑀺, 𑀙𑀦𑁆𑀤𑀚𑀸𑀢𑁄 𑀉𑀲𑁆𑀲𑀳𑀢𑀺, 𑀉𑀲𑁆𑀲𑀸𑀳𑁂𑀢𑁆𑀯𑀸 𑀢𑀼𑀮𑀬𑀢𑀺, 𑀢𑀼𑀮𑀬𑀺𑀢𑁆𑀯𑀸 𑀧𑀤𑀳𑀢𑀺, 𑀧𑀳𑀺𑀢𑀢𑁆𑀢𑁄 𑀲𑀫𑀸𑀦𑁄 𑀓𑀸𑀬𑁂𑀦 𑀘𑁂𑀯 𑀧𑀭𑀫𑀲𑀘𑁆𑀘𑀁 𑀲𑀘𑁆𑀙𑀺𑀓𑀭𑁄𑀢𑀺, 𑀧𑀜𑁆𑀜𑀸𑀬 𑀘 𑀦𑀁 𑀅𑀢𑀺𑀯𑀺𑀚𑁆𑀛𑀧𑀲𑁆𑀲𑀢𑀻’’𑀢𑀺 (𑀫. 𑀦𑀺. 𑁨.𑁧𑁮𑁩, 𑁪𑁩𑁨).

𑀢𑀧𑀢𑀺 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀓𑀸𑀬𑀜𑁆𑀘𑀸𑀢𑀺 𑀢𑀧𑁄; 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀯𑀻𑀭𑀺𑀬𑀥𑀼𑀢𑀗𑁆𑀕𑀤𑀼𑀓𑁆𑀓𑀭𑀓𑀸𑀭𑀺𑀓𑀸𑀦𑀁 𑀏𑀢𑀁 𑀅𑀥𑀺𑀯𑀘𑀦𑀁. 𑀇𑀥 𑀧𑀦 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀅𑀥𑀺𑀧𑁆𑀧𑁂𑀢𑁄. 𑀯𑀼𑀝𑁆𑀞𑀻𑀢𑀺 𑀯𑀲𑁆𑀲𑀯𑀼𑀝𑁆𑀞𑀺𑀯𑀸𑀢𑀯𑀼𑀝𑁆𑀞𑀻𑀢𑀺𑀆𑀤𑀺𑀦𑀸 𑀅𑀦𑁂𑀓𑀯𑀺𑀥𑀸. 𑀇𑀥 𑀯𑀲𑁆𑀲𑀯𑀼𑀝𑁆𑀞𑀺 𑀅𑀥𑀺𑀧𑁆𑀧𑁂𑀢𑀸. 𑀬𑀣𑀸 𑀳𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀲𑁆𑀲𑀯𑀼𑀝𑁆𑀞𑀺𑀲𑀫𑀦𑀼𑀕𑁆𑀕𑀳𑀺𑀢𑀁 𑀩𑀻𑀚𑀁 𑀩𑀻𑀚𑀫𑀽𑀮𑀓𑀜𑁆𑀘 𑀲𑀲𑁆𑀲𑀁 𑀯𑀺𑀭𑀼𑀳𑀢𑀺 𑀦 𑀫𑀺𑀮𑀸𑀬𑀢𑀺 𑀦𑀺𑀧𑁆𑀨𑀢𑁆𑀢𑀺𑀁 𑀕𑀘𑁆𑀙𑀢𑀺, 𑀏𑀯𑀁 𑀪𑀕𑀯𑀢𑁄 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀫𑀦𑀼𑀕𑁆𑀕𑀳𑀺𑀢𑀸 𑀲𑀤𑁆𑀥𑀸 𑀲𑀤𑁆𑀥𑀸𑀫𑀽𑀮𑀸 𑀘 𑀲𑀻𑀮𑀸𑀤𑀬𑁄 𑀥𑀫𑁆𑀫𑀸 𑀯𑀺𑀭𑀼𑀳𑀦𑁆𑀢𑀺 𑀦 𑀫𑀺𑀮𑀸𑀬𑀦𑁆𑀢𑀺 𑀦𑀺𑀧𑁆𑀨𑀢𑁆𑀢𑀺𑀁 𑀕𑀘𑁆𑀙𑀦𑁆𑀢𑀺. 𑀢𑁂𑀦𑀸𑀳 𑁋 ‘‘𑀢𑀧𑁄 𑀯𑀼𑀝𑁆𑀞𑀻’’𑀢𑀺. ‘‘𑀧𑀜𑁆𑀜𑀸 𑀫𑁂’’𑀢𑀺 𑀏𑀢𑁆𑀣 𑀘 𑀯𑀼𑀢𑁆𑀢𑁄 𑀫𑁂-𑀲𑀤𑁆𑀤𑁄 𑀇𑀫𑁂𑀲𑀼𑀧𑀺 𑀧𑀤𑁂𑀲𑀼 𑀬𑁄𑀚𑁂𑀢𑀩𑁆𑀩𑁄 ‘‘𑀲𑀤𑁆𑀥𑀸 𑀫𑁂 𑀩𑀻𑀚𑀁, 𑀢𑀧𑁄 𑀫𑁂 𑀯𑀼𑀝𑁆𑀞𑀻’’𑀢𑀺. 𑀢𑁂𑀦 𑀓𑀺𑀁 𑀤𑀻𑀧𑁂𑀢𑀺? 𑀬𑀣𑀸, 𑀩𑁆𑀭𑀸𑀳𑁆𑀫𑀡, 𑀢𑀬𑀸 𑀯𑀧𑀺𑀢𑁂 𑀩𑀻𑀚𑁂 𑀲𑀘𑁂 𑀯𑀼𑀝𑁆𑀞𑀺 𑀅𑀢𑁆𑀣𑀺, 𑀲𑀸𑀥𑀼, 𑀦𑁄 𑀘𑁂 𑀅𑀢𑁆𑀣𑀺, 𑀉𑀤𑀓𑀫𑁆𑀧𑀺 𑀤𑀸𑀢𑀩𑁆𑀩𑀁 𑀳𑁄𑀢𑀺, 𑀢𑀣𑀸 𑀫𑀬𑀸 𑀳𑀺𑀭𑀺-𑀈𑀲𑁂 𑀧𑀜𑁆𑀜𑀸𑀬𑀼𑀕𑀦𑀗𑁆𑀕𑀮𑁂 𑀫𑀦𑁄𑀬𑁄𑀢𑁆𑀢𑁂𑀦 𑀏𑀓𑀸𑀩𑀤𑁆𑀥𑁂 𑀓𑀢𑁂 𑀯𑀻𑀭𑀺𑀬𑀩𑀮𑀺𑀩𑀤𑁆𑀤𑁂 𑀬𑁄𑀚𑁂𑀢𑁆𑀯𑀸 𑀲𑀢𑀺𑀧𑀸𑀘𑀦𑁂𑀦 𑀯𑀺𑀚𑁆𑀛𑀺𑀢𑁆𑀯𑀸 𑀅𑀢𑁆𑀢𑀦𑁄 𑀘𑀺𑀢𑁆𑀢𑀲𑀦𑁆𑀢𑀸𑀦𑀔𑁂𑀢𑁆𑀢𑁂 𑀲𑀤𑁆𑀥𑀸𑀩𑀻𑀚𑁂 𑀯𑀧𑀺𑀢𑁂 𑀯𑀼𑀝𑁆𑀞𑀺-𑀅𑀪𑀸𑀯𑁄 𑀦𑀸𑀫 𑀦𑀢𑁆𑀣𑀺. 𑀅𑀬𑀁 𑀧𑀦 𑀫𑁂 𑀲𑀢𑀢𑀁 𑀲𑀫𑀺𑀢𑀁 𑀢𑀧𑁄 𑀯𑀼𑀝𑁆𑀞𑀻𑀢𑀺.

𑀧𑀚𑀸𑀦𑀸𑀢𑀺 𑀏𑀢𑀸𑀬 𑀧𑀼𑀕𑁆𑀕𑀮𑁄, 𑀲𑀬𑀁 𑀯𑀸 𑀧𑀚𑀸𑀦𑀸𑀢𑀻𑀢𑀺 𑀧𑀜𑁆𑀜𑀸, 𑀲𑀸 𑀓𑀸𑀫𑀸𑀯𑀘𑀭𑀸𑀤𑀺𑀪𑁂𑀤𑀢𑁄 𑀅𑀦𑁂𑀓𑀯𑀺𑀥𑀸. 𑀇𑀥 𑀧𑀦 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑀧𑀜𑁆𑀜𑀸 𑀅𑀥𑀺𑀧𑁆𑀧𑁂𑀢𑀸. 𑀬𑀼𑀕𑀦𑀗𑁆𑀕𑀮𑀦𑁆𑀢𑀺 𑀬𑀼𑀕𑀜𑁆𑀘 𑀦𑀗𑁆𑀕𑀮𑀜𑁆𑀘. 𑀬𑀣𑀸 𑀳𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀬𑀼𑀕𑀦𑀗𑁆𑀕𑀮𑀁, 𑀏𑀯𑀁 𑀪𑀕𑀯𑀢𑁄 𑀤𑀼𑀯𑀺𑀥𑀸𑀧𑀺 𑀧𑀜𑁆𑀜𑀸. 𑀢𑀢𑁆𑀣 𑀬𑀣𑀸 𑀬𑀼𑀕𑀁 𑀈𑀲𑀸𑀬 𑀉𑀧𑀦𑀺𑀲𑁆𑀲𑀬𑀁 𑀳𑁄𑀢𑀺, 𑀧𑀼𑀭𑀢𑁄 𑀳𑁄𑀢𑀺, 𑀈𑀲𑀸𑀩𑀤𑁆𑀥𑀁 𑀳𑁄𑀢𑀺, 𑀬𑁄𑀢𑁆𑀢𑀸𑀦𑀁 𑀦𑀺𑀲𑁆𑀲𑀬𑀁 𑀳𑁄𑀢𑀺, 𑀩𑀮𑀺𑀩𑀤𑁆𑀤𑀸𑀦𑀁 𑀏𑀓𑀢𑁄 𑀕𑀫𑀦𑀁 𑀥𑀸𑀭𑁂𑀢𑀺, 𑀏𑀯𑀁 𑀧𑀜𑁆𑀜𑀸 𑀳𑀺𑀭𑀺𑀧𑀫𑀼𑀔𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑀦𑀺𑀲𑁆𑀲𑀬𑀸 𑀳𑁄𑀢𑀺. 𑀬𑀣𑀸𑀳 𑁋 ‘‘𑀧𑀜𑁆𑀜𑀼𑀢𑁆𑀢𑀭𑀸 𑀲𑀩𑁆𑀩𑁂 𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺 (𑀅. 𑀦𑀺. 𑁮.𑁮𑁩) 𑀘, ‘‘𑀧𑀜𑁆𑀜𑀸 𑀳𑀺 𑀲𑁂𑀝𑁆𑀞𑀸 𑀓𑀼𑀲𑀮𑀸 𑀯𑀤𑀦𑁆𑀢𑀺, 𑀦𑀓𑁆𑀔𑀢𑁆𑀢𑀭𑀸𑀚𑀸𑀭𑀺𑀯 𑀢𑀸𑀭𑀓𑀸𑀦’’𑀦𑁆𑀢𑀺 (𑀚𑀸. 𑁨.𑁧𑁭.𑁮𑁧) 𑀘. 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀼𑀩𑁆𑀩𑀗𑁆𑀕𑀫𑀝𑁆𑀞𑁂𑀦 𑀧𑀼𑀭𑀢𑁄 𑀘 𑀳𑁄𑀢𑀺. 𑀬𑀣𑀸𑀳 𑁋 ‘‘𑀲𑀻𑀮𑀁 𑀳𑀺𑀭𑀻 𑀘𑀸𑀧𑀺 𑀲𑀢𑀜𑁆𑀘 𑀥𑀫𑁆𑀫𑁄, 𑀅𑀦𑁆𑀯𑀸𑀬𑀺𑀓𑀸 𑀧𑀜𑁆𑀜𑀯𑀢𑁄 𑀪𑀯𑀦𑁆𑀢𑀻’’𑀢𑀺. 𑀳𑀺𑀭𑀺𑀯𑀺𑀧𑁆𑀧𑀬𑁄𑀕𑁂𑀦 𑀅𑀦𑀼𑀧𑁆𑀧𑀢𑁆𑀢𑀺𑀢𑁄 𑀈𑀲𑀸𑀩𑀤𑁆𑀥𑀸 𑀳𑁄𑀢𑀺, 𑀫𑀦𑁄𑀲𑀗𑁆𑀔𑀸𑀢𑀲𑁆𑀲 𑀲𑀫𑀸𑀥𑀺𑀬𑁄𑀢𑁆𑀢𑀲𑁆𑀲 𑀦𑀺𑀲𑁆𑀲𑀬𑀧𑀘𑁆𑀘𑀬𑀢𑁄 𑀬𑁄𑀢𑁆𑀢𑀸𑀦𑀁 𑀦𑀺𑀲𑁆𑀲𑀬𑁄 𑀳𑁄𑀢𑀺, 𑀅𑀘𑁆𑀘𑀸𑀭𑀤𑁆𑀥𑀸𑀢𑀺𑀮𑀻𑀦𑀪𑀸𑀯𑀧𑀝𑀺𑀲𑁂𑀥𑀦𑀢𑁄 𑀯𑀻𑀭𑀺𑀬𑀩𑀮𑀺𑀩𑀤𑁆𑀤𑀸𑀦𑀁 𑀏𑀓𑀢𑁄 𑀕𑀫𑀦𑀁 𑀥𑀸𑀭𑁂𑀢𑀺. 𑀬𑀣𑀸 𑀘 𑀦𑀗𑁆𑀕𑀮𑀁 𑀨𑀸𑀮𑀬𑀼𑀢𑁆𑀢𑀁 𑀓𑀲𑀦𑀓𑀸𑀮𑁂 𑀧𑀣𑀯𑀺𑀖𑀦𑀁 𑀪𑀺𑀦𑁆𑀤𑀢𑀺, 𑀫𑀽𑀮𑀲𑀦𑁆𑀢𑀸𑀦𑀓𑀸𑀦𑀺 𑀧𑀤𑀸𑀮𑁂𑀢𑀺, 𑀏𑀯𑀁 𑀲𑀢𑀺𑀬𑀼𑀢𑁆𑀢𑀸 𑀧𑀜𑁆𑀜𑀸 𑀯𑀺𑀧𑀲𑁆𑀲𑀦𑀸𑀓𑀸𑀮𑁂 𑀥𑀫𑁆𑀫𑀸𑀦𑀁 𑀲𑀦𑁆𑀢𑀢𑀺𑀲𑀫𑀽𑀳𑀓𑀺𑀘𑁆𑀘𑀸𑀭𑀫𑁆𑀫𑀡𑀖𑀦𑀁 𑀪𑀺𑀦𑁆𑀤𑀢𑀺, 𑀲𑀩𑁆𑀩𑀓𑀺𑀮𑁂𑀲𑀫𑀽𑀮𑀲𑀦𑁆𑀢𑀸𑀦𑀓𑀸𑀦𑀺 𑀧𑀤𑀸𑀮𑁂𑀢𑀺. 𑀲𑀸 𑀘 𑀔𑁄 𑀮𑁄𑀓𑀼𑀢𑁆𑀢𑀭𑀸𑀯 𑀇𑀢𑀭𑀸 𑀧𑀦 𑀮𑁄𑀓𑀺𑀬𑀸𑀧𑀺 𑀲𑀺𑀬𑀸. 𑀢𑁂𑀦𑀸𑀳 𑁋 ‘‘𑀧𑀜𑁆𑀜𑀸 𑀫𑁂 𑀬𑀼𑀕𑀦𑀗𑁆𑀕𑀮’’𑀦𑁆𑀢𑀺.

𑀳𑀺𑀭𑀻𑀬𑀢𑀺 𑀏𑀢𑀸𑀬 𑀧𑀼𑀕𑁆𑀕𑀮𑁄, 𑀲𑀬𑀁 𑀯𑀸 𑀳𑀺𑀭𑀻𑀬𑀢𑀺 𑀅𑀓𑀼𑀲𑀮𑀧𑁆𑀧𑀯𑀢𑁆𑀢𑀺𑀁 𑀚𑀺𑀕𑀼𑀘𑁆𑀙𑀢𑀻𑀢𑀺 𑀳𑀺𑀭𑀻. 𑀢𑀕𑁆𑀕𑀳𑀡𑁂𑀦 𑀲𑀳𑀘𑀭𑀡𑀪𑀸𑀯𑀢𑁄 𑀑𑀢𑁆𑀢𑀧𑁆𑀧𑀁 𑀕𑀳𑀺𑀢𑀁𑀬𑁂𑀯 𑀳𑁄𑀢𑀺. 𑀈𑀲𑀸𑀢𑀺 𑀬𑀼𑀕𑀦𑀗𑁆𑀕𑀮𑀲𑀦𑁆𑀥𑀸𑀭𑀺𑀓𑀸 𑀤𑀸𑀭𑀼𑀬𑀝𑁆𑀞𑀺. 𑀬𑀣𑀸 𑀳𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀈𑀲𑀸 𑀬𑀼𑀕𑀦𑀗𑁆𑀕𑀮𑀁 𑀲𑀦𑁆𑀥𑀸𑀭𑁂𑀢𑀺, 𑀏𑀯𑀁 𑀪𑀕𑀯𑀢𑁄𑀧𑀺 𑀳𑀺𑀭𑀻 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀧𑀜𑁆𑀜𑀸𑀲𑀗𑁆𑀔𑀸𑀢𑀁 𑀬𑀼𑀕𑀦𑀗𑁆𑀕𑀮𑀁 𑀲𑀦𑁆𑀥𑀸𑀭𑁂𑀢𑀺 𑀳𑀺𑀭𑀺𑀬𑀸 𑀅𑀲𑀢𑀺 𑀧𑀜𑁆𑀜𑀸𑀬 𑀅𑀪𑀸𑀯𑀢𑁄. 𑀬𑀣𑀸 𑀘 𑀈𑀲𑀸𑀧𑀝𑀺𑀩𑀤𑁆𑀥𑀁 𑀬𑀼𑀕𑀦𑀗𑁆𑀕𑀮𑀁 𑀓𑀺𑀘𑁆𑀘𑀓𑀭𑀁 𑀳𑁄𑀢𑀺 𑀅𑀘𑀮𑀁 𑀅𑀲𑀺𑀣𑀺𑀮𑀁, 𑀏𑀯𑀁 𑀳𑀺𑀭𑀺𑀧𑀝𑀺𑀩𑀤𑁆𑀥𑀸 𑀘 𑀧𑀜𑁆𑀜𑀸 𑀓𑀺𑀘𑁆𑀘𑀓𑀸𑀭𑀻 𑀳𑁄𑀢𑀺 𑀅𑀘𑀮𑀸 𑀅𑀲𑀺𑀣𑀺𑀮𑀸 𑀅𑀩𑁆𑀩𑁄𑀓𑀺𑀡𑁆𑀡𑀸 𑀅𑀳𑀺𑀭𑀺𑀓𑁂𑀦. 𑀢𑁂𑀦𑀸𑀳 ‘‘𑀳𑀺𑀭𑀻 𑀈𑀲𑀸’’𑀢𑀺.

𑀫𑀼𑀦𑀸𑀢𑀻𑀢𑀺 𑀫𑀦𑁄, 𑀘𑀺𑀢𑁆𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀇𑀥 𑀧𑀦 𑀫𑀦𑁄𑀲𑀻𑀲𑁂𑀦 𑀢𑀁𑀲𑀫𑁆𑀧𑀬𑀼𑀢𑁆𑀢𑁄 𑀲𑀫𑀸𑀥𑀺 𑀅𑀥𑀺𑀧𑁆𑀧𑁂𑀢𑁄. 𑀬𑁄𑀢𑁆𑀢𑀦𑁆𑀢𑀺 𑀭𑀚𑁆𑀚𑀼𑀩𑀦𑁆𑀥𑀦𑀁. 𑀢𑀁 𑀢𑀺𑀯𑀺𑀥𑀁 𑀈𑀲𑀸𑀬 𑀲𑀳 𑀬𑀼𑀕𑀲𑁆𑀲 𑀩𑀦𑁆𑀥𑀦𑀁, 𑀬𑀼𑀕𑁂𑀦 𑀲𑀳 𑀩𑀮𑀺𑀩𑀤𑁆𑀤𑀸𑀦𑀁 𑀩𑀦𑁆𑀥𑀦𑀁, 𑀲𑀸𑀭𑀣𑀺𑀦𑀸 𑀲𑀳 𑀩𑀮𑀺𑀩𑀤𑁆𑀤𑀸𑀦𑀁 𑀩𑀦𑁆𑀥𑀦𑀦𑁆𑀢𑀺. 𑀢𑀢𑁆𑀣 𑀬𑀣𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀬𑁄𑀢𑁆𑀢𑀁 𑀈𑀲𑀸𑀬𑀼𑀕𑀩𑀮𑀺𑀩𑀤𑁆𑀤𑁂 𑀏𑀓𑀸𑀩𑀤𑁆𑀥𑁂 𑀓𑀢𑁆𑀯𑀸 𑀲𑀓𑀓𑀺𑀘𑁆𑀘𑁂 𑀧𑀝𑀺𑀧𑀸𑀤𑁂𑀢𑀺, 𑀏𑀯𑀁 𑀪𑀕𑀯𑀢𑁄 𑀲𑀫𑀸𑀥𑀺 𑀲𑀩𑁆𑀩𑁂𑀯 𑀢𑁂 𑀳𑀺𑀭𑀺𑀧𑀜𑁆𑀜𑀸𑀯𑀻𑀭𑀺𑀬𑀥𑀫𑁆𑀫𑁂 𑀏𑀓𑀸𑀭𑀫𑁆𑀫𑀡𑁂 𑀅𑀯𑀺𑀓𑁆𑀔𑁂𑀧𑀪𑀸𑀯𑁂𑀦 𑀩𑀦𑁆𑀥𑀺𑀢𑁆𑀯𑀸 𑀲𑀓𑀓𑀺𑀘𑁆𑀘𑁂 𑀧𑀝𑀺𑀧𑀸𑀤𑁂𑀢𑀺. 𑀢𑁂𑀦𑀸𑀳 𑁋 ‘‘𑀫𑀦𑁄 𑀬𑁄𑀢𑁆𑀢’’𑀦𑁆𑀢𑀺.

𑀲𑀭𑀢𑀺 𑀏𑀢𑀸𑀬 𑀘𑀺𑀭𑀓𑀢𑀸𑀤𑀺𑀫𑀢𑁆𑀣𑀁 𑀧𑀼𑀕𑁆𑀕𑀮𑁄, 𑀲𑀬𑀁 𑀯𑀸 𑀲𑀭𑀢𑀻𑀢𑀺 𑀲𑀢𑀺, 𑀲𑀸 𑀅𑀲𑀫𑁆𑀫𑀼𑀲𑁆𑀲𑀦𑀮𑀓𑁆𑀔𑀡𑀸. 𑀨𑀸𑀮𑁂𑀢𑀻𑀢𑀺 𑀨𑀸𑀮𑁄. 𑀧𑀸𑀚𑁂𑀢𑀺 𑀏𑀢𑁂𑀦𑀸𑀢𑀺 𑀧𑀸𑀚𑀦𑀁. 𑀢𑀁 𑀇𑀥 ‘‘𑀧𑀸𑀘𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀧𑀢𑁄𑀤𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀨𑀸𑀮𑁄 𑀘 𑀧𑀸𑀘𑀦𑀜𑁆𑀘 𑀨𑀸𑀮𑀧𑀸𑀘𑀦𑀁. 𑀬𑀣𑀸 𑀳𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀨𑀸𑀮𑀧𑀸𑀘𑀦𑀁, 𑀏𑀯𑀁 𑀪𑀕𑀯𑀢𑁄 𑀯𑀺𑀧𑀲𑁆𑀲𑀦𑀸𑀬𑀼𑀢𑁆𑀢𑀸 𑀫𑀕𑁆𑀕𑀬𑀼𑀢𑁆𑀢𑀸 𑀘 𑀲𑀢𑀺. 𑀢𑀢𑁆𑀣 𑀬𑀣𑀸 𑀨𑀸𑀮𑁄 𑀦𑀗𑁆𑀕𑀮𑀫𑀦𑀼𑀭𑀓𑁆𑀔𑀢𑀺, 𑀧𑀼𑀭𑀢𑁄 𑀘𑀲𑁆𑀲 𑀕𑀘𑁆𑀙𑀢𑀺, 𑀏𑀯𑀁 𑀲𑀢𑀺 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀕𑀢𑀺𑀬𑁄 𑀲𑀫𑀦𑁆𑀯𑁂𑀲𑀫𑀸𑀦𑀸 𑀆𑀭𑀫𑁆𑀫𑀡𑁂 𑀯𑀸 𑀉𑀧𑀝𑁆𑀞𑀸𑀧𑀬𑀫𑀸𑀦𑀸 𑀧𑀜𑁆𑀜𑀸𑀦𑀗𑁆𑀕𑀮𑀁 𑀭𑀓𑁆𑀔𑀢𑀺, 𑀢𑀣𑀸 𑀳𑀺 ‘‘𑀲𑀢𑀸𑀭𑀓𑁆𑀔𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁧𑁦.𑁨𑁦) ‘‘𑀆𑀭𑀓𑁆𑀔𑀸’’𑀢𑀺 𑀯𑀼𑀢𑁆𑀢𑀸. 𑀅𑀲𑀫𑁆𑀫𑀼𑀲𑁆𑀲𑀦𑀯𑀲𑁂𑀦 𑀘𑀲𑁆𑀲 𑀧𑀼𑀭𑀢𑁄 𑀳𑁄𑀢𑀺. 𑀲𑀢𑀺𑀧𑀭𑀺𑀘𑀺𑀢𑁂 𑀳𑀺 𑀥𑀫𑁆𑀫𑁂 𑀧𑀜𑁆𑀜𑀸 𑀧𑀚𑀸𑀦𑀸𑀢𑀺, 𑀦𑁄 𑀲𑀫𑁆𑀫𑀼𑀝𑁆𑀞𑁂. 𑀬𑀣𑀸 𑀘 𑀧𑀸𑀘𑀦𑀁 𑀩𑀮𑀺𑀩𑀤𑁆𑀤𑀸𑀦𑀁 𑀯𑀺𑀚𑁆𑀛𑀦𑀪𑀬𑀁 𑀤𑀲𑁆𑀲𑁂𑀦𑁆𑀢𑀁 𑀲𑀁𑀲𑀻𑀤𑀦𑀁 𑀦 𑀤𑁂𑀢𑀺, 𑀉𑀧𑁆𑀧𑀣𑀕𑀫𑀦𑀜𑁆𑀘 𑀯𑀸𑀭𑁂𑀢𑀺, 𑀏𑀯𑀁 𑀲𑀢𑀺 𑀯𑀻𑀭𑀺𑀬𑀩𑀮𑀺𑀩𑀤𑁆𑀤𑀸𑀦𑀁 𑀅𑀧𑀸𑀬𑀪𑀬𑀁 𑀤𑀲𑁆𑀲𑁂𑀦𑁆𑀢𑀻 𑀓𑁄𑀲𑀚𑁆𑀚𑀲𑀁𑀲𑀻𑀤𑀦𑀁 𑀦 𑀤𑁂𑀢𑀺, 𑀓𑀸𑀫𑀕𑀼𑀡𑀲𑀗𑁆𑀔𑀸𑀢𑁂 𑀅𑀕𑁄𑀘𑀭𑁂 𑀘𑀸𑀭𑀁 𑀦𑀺𑀯𑀸𑀭𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑁂 𑀦𑀺𑀬𑁄𑀚𑁂𑀦𑁆𑀢𑀻 𑀉𑀧𑁆𑀧𑀣𑀕𑀫𑀦𑀜𑁆𑀘 𑀯𑀸𑀭𑁂𑀢𑀺. 𑀢𑁂𑀦𑀸𑀳 𑁋 ‘‘𑀲𑀢𑀺 𑀫𑁂 𑀨𑀸𑀮𑀧𑀸𑀘𑀦’’𑀦𑁆𑀢𑀺.

𑁭𑁮. 𑀓𑀸𑀬𑀕𑀼𑀢𑁆𑀢𑁄𑀢𑀺 𑀢𑀺𑀯𑀺𑀥𑁂𑀦 𑀓𑀸𑀬𑀲𑀼𑀘𑀭𑀺𑀢𑁂𑀦 𑀕𑀼𑀢𑁆𑀢𑁄. 𑀯𑀘𑀻𑀕𑀼𑀢𑁆𑀢𑁄𑀢𑀺 𑀘𑀢𑀼𑀩𑁆𑀩𑀺𑀥𑁂𑀦 𑀯𑀘𑀻𑀲𑀼𑀘𑀭𑀺𑀢𑁂𑀦 𑀕𑀼𑀢𑁆𑀢𑁄. 𑀏𑀢𑁆𑀢𑀸𑀯𑀢𑀸 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀁 𑀯𑀼𑀢𑁆𑀢𑀁. 𑀆𑀳𑀸𑀭𑁂 𑀉𑀤𑀭𑁂 𑀬𑀢𑁄𑀢𑀺 𑀏𑀢𑁆𑀣 𑀆𑀳𑀸𑀭𑀫𑀼𑀔𑁂𑀦 𑀲𑀩𑁆𑀩𑀧𑀘𑁆𑀘𑀬𑀸𑀦𑀁 𑀲𑀗𑁆𑀕𑀳𑀺𑀢𑀢𑁆𑀢𑀸 𑀘𑀢𑀼𑀩𑁆𑀩𑀺𑀥𑁂𑀧𑀺 𑀧𑀘𑁆𑀘𑀬𑁂 𑀬𑀢𑁄 𑀲𑀁𑀬𑀢𑁄 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑁄𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀯𑀼𑀢𑁆𑀢𑀁. 𑀉𑀤𑀭𑁂 𑀬𑀢𑁄𑀢𑀺 𑀉𑀤𑀭𑁂 𑀬𑀢𑁄 𑀲𑀁𑀬𑀢𑁄 𑀫𑀺𑀢𑀪𑁄𑀚𑀻, 𑀆𑀳𑀸𑀭𑁂 𑀫𑀢𑁆𑀢𑀜𑁆𑀜𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀫𑀺𑀦𑀸 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸𑀫𑀼𑀔𑁂𑀦 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀲𑀻𑀮𑀁 𑀯𑀼𑀢𑁆𑀢𑀁. 𑀢𑁂𑀦 𑀓𑀺𑀁 𑀤𑀻𑀧𑁂𑀢𑀺? 𑀬𑀣𑀸 𑀢𑁆𑀯𑀁, 𑀩𑁆𑀭𑀸𑀳𑁆𑀫𑀡, 𑀩𑀻𑀚𑀁 𑀯𑀧𑀺𑀢𑁆𑀯𑀸 𑀲𑀲𑁆𑀲𑀧𑀭𑀺𑀧𑀸𑀮𑀦𑀢𑁆𑀣𑀁 𑀓𑀡𑁆𑀝𑀓𑀯𑀢𑀺𑀁 𑀯𑀸 𑀭𑀼𑀓𑁆𑀔𑀯𑀢𑀺𑀁 𑀯𑀸 𑀧𑀸𑀓𑀸𑀭𑀧𑀭𑀺𑀓𑁆𑀔𑁂𑀧𑀁 𑀯𑀸 𑀓𑀭𑁄𑀲𑀺, 𑀢𑁂𑀦 𑀢𑁂 𑀕𑁄𑀫𑀳𑀺𑀁𑀲𑀫𑀺𑀕𑀕𑀡𑀸 𑀧𑀯𑁂𑀲𑀁 𑀅𑀮𑀪𑀦𑁆𑀢𑀸 𑀲𑀲𑁆𑀲𑀁 𑀦 𑀯𑀺𑀮𑀼𑀫𑁆𑀧𑀦𑁆𑀢𑀺, 𑀏𑀯𑀫𑀳𑀫𑁆𑀧𑀺 𑀲𑀤𑁆𑀥𑀸𑀩𑀻𑀚𑀁 𑀯𑀧𑀺𑀢𑁆𑀯𑀸 𑀦𑀸𑀦𑀧𑁆𑀧𑀓𑀸𑀭𑀓𑀼𑀲𑀮𑀲𑀲𑁆𑀲𑀧𑀭𑀺𑀧𑀸𑀮𑀦𑀢𑁆𑀣𑀁 𑀓𑀸𑀬𑀯𑀘𑀻𑀆𑀳𑀸𑀭𑀕𑀼𑀢𑁆𑀢𑀺𑀫𑀬𑀁 𑀢𑀺𑀯𑀺𑀥𑀧𑀭𑀺𑀓𑁆𑀔𑁂𑀧𑀁 𑀓𑀭𑁄𑀫𑀺. 𑀢𑁂𑀦 𑀫𑁂 𑀭𑀸𑀕𑀸𑀤𑀺𑀅𑀓𑀼𑀲𑀮𑀥𑀫𑁆𑀫𑀕𑁄𑀫𑀳𑀺𑀁𑀲𑀫𑀺𑀕𑀕𑀡𑀸 𑀧𑀯𑁂𑀲𑀁 𑀅𑀮𑀪𑀦𑁆𑀢𑀸 𑀦𑀸𑀦𑀧𑁆𑀧𑀓𑀸𑀭𑀓𑀼𑀲𑀮𑀲𑀲𑁆𑀲𑀁 𑀦 𑀯𑀺𑀮𑀼𑀫𑁆𑀧𑀦𑁆𑀢𑀻𑀢𑀺.

𑀲𑀘𑁆𑀘𑀁 𑀓𑀭𑁄𑀫𑀺 𑀦𑀺𑀤𑁆𑀤𑀸𑀦𑀦𑁆𑀢𑀺 𑀏𑀢𑁆𑀣 𑀤𑁆𑀯𑀻𑀳𑀺 𑀤𑁆𑀯𑀸𑀭𑁂𑀳𑀺 𑀅𑀯𑀺𑀲𑀁𑀯𑀸𑀤𑀦𑀁 𑀲𑀘𑁆𑀘𑀁. 𑀦𑀺𑀤𑁆𑀤𑀸𑀦𑀦𑁆𑀢𑀺 𑀙𑁂𑀤𑀦𑀁 𑀮𑀼𑀦𑀦𑀁 𑀉𑀧𑁆𑀧𑀸𑀝𑀦𑀁, 𑀓𑀭𑀡𑀢𑁆𑀣𑁂 𑀘𑁂𑀢𑀁 𑀉𑀧𑀬𑁄𑀕𑀯𑀘𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀜𑁆𑀳𑀺 𑀏𑀢𑁆𑀣 𑀅𑀢𑁆𑀣𑁄 ‘‘𑀲𑀘𑁆𑀘𑁂𑀦 𑀓𑀭𑁄𑀫𑀺 𑀦𑀺𑀤𑁆𑀤𑀸𑀦’’𑀦𑁆𑀢𑀺. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑀣𑀸 𑀢𑁆𑀯𑀁 𑀩𑀸𑀳𑀺𑀭𑀁 𑀓𑀲𑀺𑀁 𑀓𑀲𑀺𑀢𑁆𑀯𑀸 𑀲𑀲𑁆𑀲𑀤𑀽𑀲𑀓𑀸𑀦𑀁 𑀢𑀺𑀡𑀸𑀦𑀁 𑀳𑀢𑁆𑀣𑁂𑀦 𑀯𑀸 𑀅𑀲𑀺𑀢𑁂𑀦 𑀯𑀸 𑀦𑀺𑀤𑁆𑀤𑀸𑀦𑀁 𑀓𑀭𑁄𑀲𑀺; 𑀏𑀯𑀫𑀳𑀫𑁆𑀧𑀺 𑀅𑀚𑁆𑀛𑀢𑁆𑀢𑀺𑀓𑀁 𑀓𑀲𑀺𑀁 𑀓𑀲𑀺𑀢𑁆𑀯𑀸 𑀓𑀼𑀲𑀮𑀲𑀲𑁆𑀲𑀤𑀽𑀲𑀓𑀸𑀦𑀁 𑀯𑀺𑀲𑀁𑀯𑀸𑀤𑀦𑀢𑀺𑀡𑀸𑀦𑀁 𑀲𑀘𑁆𑀘𑁂𑀦 𑀦𑀺𑀤𑁆𑀤𑀸𑀦𑀁 𑀓𑀭𑁄𑀫𑀺. 𑀜𑀸𑀡𑀲𑀘𑁆𑀘𑀁 𑀯𑀸 𑀏𑀢𑁆𑀣 𑀲𑀘𑁆𑀘𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁, 𑀬𑀁 𑀢𑀁 𑀬𑀣𑀸𑀪𑀽𑀢𑀜𑀸𑀡𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦 𑀅𑀢𑁆𑀢𑀲𑀜𑁆𑀜𑀸𑀤𑀻𑀦𑀁 𑀢𑀺𑀡𑀸𑀦𑀁 𑀦𑀺𑀤𑁆𑀤𑀸𑀦𑀁 𑀓𑀭𑁄𑀫𑀻𑀢𑀺 𑀏𑀯𑀁 𑀬𑁄𑀚𑁂𑀢𑀩𑁆𑀩𑀁. 𑀅𑀣 𑀯𑀸 𑀦𑀺𑀤𑁆𑀤𑀸𑀦𑀦𑁆𑀢𑀺 𑀙𑁂𑀤𑀓𑀁 𑀮𑀸𑀯𑀓𑀁, 𑀉𑀧𑁆𑀧𑀸𑀝𑀓𑀦𑁆𑀢𑀺 𑀅𑀢𑁆𑀣𑁄. 𑀏𑀯𑀁 𑀲𑀦𑁆𑀢𑁂 𑀬𑀣𑀸 𑀢𑁆𑀯𑀁 𑀤𑀸𑀲𑀁 𑀯𑀸 𑀓𑀫𑁆𑀫𑀓𑀭𑀁 𑀯𑀸 𑀦𑀺𑀤𑁆𑀤𑀸𑀦𑀁 𑀓𑀭𑁄𑀲𑀺, ‘‘𑀦𑀺𑀤𑁆𑀤𑁂𑀳𑀺 𑀢𑀺𑀡𑀸𑀦𑀻’’𑀢𑀺 𑀢𑀺𑀡𑀸𑀦𑀁 𑀙𑁂𑀤𑀓𑀁 𑀮𑀸𑀯𑀓𑀁 𑀉𑀧𑁆𑀧𑀸𑀝𑀓𑀁 𑀓𑀭𑁄𑀲𑀺; 𑀏𑀯𑀫𑀳𑀁 𑀲𑀘𑁆𑀘𑀁 𑀓𑀭𑁄𑀫𑀻𑀢𑀺 𑀉𑀧𑀬𑁄𑀕𑀯𑀘𑀦𑁂𑀦𑁂𑀯 𑀯𑀢𑁆𑀢𑀼𑀁 𑀬𑀼𑀚𑁆𑀚𑀢𑀺. 𑀅𑀣 𑀯𑀸 𑀲𑀘𑁆𑀘𑀦𑁆𑀢𑀺 𑀤𑀺𑀝𑁆𑀞𑀺𑀲𑀘𑁆𑀘𑀁. 𑀢𑀫𑀳𑀁 𑀦𑀺𑀤𑁆𑀤𑀸𑀦𑀁 𑀓𑀭𑁄𑀫𑀺, 𑀙𑀺𑀦𑁆𑀤𑀺𑀢𑀩𑁆𑀩𑀁 𑀮𑀼𑀦𑀺𑀢𑀩𑁆𑀩𑀁 𑀉𑀧𑁆𑀧𑀸𑀝𑁂𑀢𑀩𑁆𑀩𑀁 𑀓𑀭𑁄𑀫𑀻𑀢𑀺 𑀏𑀯𑀫𑁆𑀧𑀺 𑀉𑀧𑀬𑁄𑀕𑀯𑀘𑀦𑁂𑀦𑁂𑀯 𑀯𑀢𑁆𑀢𑀼𑀁 𑀬𑀼𑀚𑁆𑀚𑀢𑀺.

𑀲𑁄𑀭𑀘𑁆𑀘𑀁 𑀫𑁂 𑀧𑀫𑁄𑀘𑀦𑀦𑁆𑀢𑀺 𑀏𑀢𑁆𑀣 𑀬𑀁 𑀢𑀁 ‘‘𑀓𑀸𑀬𑀺𑀓𑁄 𑀅𑀯𑀻𑀢𑀺𑀓𑁆𑀓𑀫𑁄, 𑀯𑀸𑀘𑀲𑀺𑀓𑁄 𑀅𑀯𑀻𑀢𑀺𑀓𑁆𑀓𑀫𑁄’’𑀢𑀺, 𑀏𑀯𑀁 𑀲𑀻𑀮𑀫𑁂𑀯 ‘‘𑀲𑁄𑀭𑀘𑁆𑀘’’𑀦𑁆𑀢𑀺 𑀯𑀼𑀢𑁆𑀢𑀁, 𑀦 𑀢𑀁 𑀇𑀥 𑀅𑀥𑀺𑀧𑁆𑀧𑁂𑀢𑀁, 𑀯𑀼𑀢𑁆𑀢𑀫𑁂𑀯 𑀏𑀢𑀁 ‘‘𑀓𑀸𑀬𑀕𑀼𑀢𑁆𑀢𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦, 𑀅𑀭𑀳𑀢𑁆𑀢𑀨𑀮𑀁 𑀧𑀦 𑀅𑀥𑀺𑀧𑁆𑀧𑁂𑀢𑀁. 𑀢𑀫𑁆𑀧𑀺 𑀳𑀺 𑀲𑀼𑀦𑁆𑀤𑀭𑁂 𑀦𑀺𑀩𑁆𑀩𑀸𑀦𑁂 𑀭𑀢𑀪𑀸𑀯𑀢𑁄 ‘‘𑀲𑁄𑀭𑀘𑁆𑀘’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀧𑀫𑁄𑀘𑀦𑀦𑁆𑀢𑀺 𑀬𑁄𑀕𑁆𑀕𑀯𑀺𑀲𑁆𑀲𑀚𑁆𑀚𑀦𑀁. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑀣𑀸 𑀢𑀯 𑀧𑀫𑁄𑀘𑀦𑀁 𑀧𑀼𑀦𑀧𑀺 𑀲𑀸𑀬𑀦𑁆𑀳𑁂 𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 𑀯𑀸 𑀅𑀦𑀸𑀕𑀢𑀲𑀁𑀯𑀘𑁆𑀙𑀭𑁂 𑀯𑀸 𑀬𑁄𑀚𑁂𑀢𑀩𑁆𑀩𑀢𑁄 𑀅𑀧𑁆𑀧𑀫𑁄𑀘𑀦𑀫𑁂𑀯 𑀳𑁄𑀢𑀺, 𑀦 𑀫𑀫 𑀏𑀯𑀁. 𑀦 𑀳𑀺 𑀫𑀫 𑀅𑀦𑁆𑀢𑀭𑀸 𑀫𑁄𑀘𑀦𑀁 𑀦𑀸𑀫 𑀅𑀢𑁆𑀣𑀺. 𑀅𑀳𑀜𑁆𑀳𑀺 𑀤𑀻𑀧𑀗𑁆𑀓𑀭𑀤𑀲𑀩𑀮𑀓𑀸𑀮𑀢𑁄 𑀧𑀪𑀼𑀢𑀺 𑀧𑀜𑁆𑀜𑀸𑀦𑀗𑁆𑀕𑀮𑁂 𑀯𑀻𑀭𑀺𑀬𑀩𑀮𑀺𑀩𑀤𑁆𑀤𑁂 𑀬𑁄𑀚𑁂𑀢𑁆𑀯𑀸 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘 𑀫𑀳𑀸𑀓𑀲𑀺𑀁 𑀓𑀲𑀦𑁆𑀢𑁄 𑀢𑀸𑀯 𑀦 𑀫𑀼𑀜𑁆𑀘𑀺𑀁, 𑀬𑀸𑀯 𑀦 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀺. 𑀬𑀤𑀸 𑀘 𑀫𑁂 𑀲𑀩𑁆𑀩𑀁 𑀢𑀁 𑀓𑀸𑀮𑀁 𑀔𑁂𑀧𑁂𑀢𑁆𑀯𑀸 𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂 𑀅𑀧𑀭𑀸𑀚𑀺𑀢𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑀲𑁆𑀲 𑀲𑀩𑁆𑀩𑀕𑀼𑀡𑀧𑀭𑀺𑀯𑀸𑀭𑀁 𑀅𑀭𑀳𑀢𑁆𑀢𑀨𑀮𑀁 𑀉𑀤𑀧𑀸𑀤𑀺, 𑀢𑀤𑀸 𑀫𑀬𑀸 𑀢𑀁 𑀲𑀩𑁆𑀩𑀼𑀲𑁆𑀲𑀼𑀓𑁆𑀓𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀧𑁆𑀧𑀢𑁆𑀢𑀺𑀬𑀸 𑀧𑀫𑀼𑀢𑁆𑀢𑀁, 𑀦 𑀤𑀸𑀦𑀺 𑀧𑀼𑀦 𑀬𑁄𑀚𑁂𑀢𑀩𑁆𑀩𑀁 𑀪𑀯𑀺𑀲𑁆𑀲𑀢𑀻𑀢𑀺. 𑀏𑀢𑀫𑀢𑁆𑀣𑀁 𑀲𑀦𑁆𑀥𑀸𑀬𑀸𑀳 𑀪𑀕𑀯𑀸 𑁋 ‘‘𑀲𑁄𑀭𑀘𑁆𑀘𑀁 𑀫𑁂 𑀧𑀫𑁄𑀘𑀦’’𑀦𑁆𑀢𑀺.

𑁭𑁯. 𑀯𑀻𑀭𑀺𑀬𑀁 𑀫𑁂 𑀥𑀼𑀭𑀥𑁄𑀭𑀬𑁆𑀳𑀦𑁆𑀢𑀺 𑀏𑀢𑁆𑀣 𑀯𑀻𑀭𑀺𑀬𑀦𑁆𑀢𑀺 ‘‘𑀓𑀸𑀬𑀺𑀓𑁄 𑀯𑀸, 𑀘𑁂𑀢𑀲𑀺𑀓𑁄 𑀯𑀸 𑀯𑀻𑀭𑀺𑀬𑀸𑀭𑀫𑁆𑀪𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀧𑀥𑀸𑀦𑀁. 𑀥𑀼𑀭𑀸𑀬𑀁 𑀥𑁄𑀭𑀬𑁆𑀳𑀁 𑀥𑀼𑀭𑀥𑁄𑀭𑀬𑁆𑀳𑀁, 𑀥𑀼𑀭𑀁 𑀯𑀳𑀢𑀻𑀢𑀺 𑀅𑀢𑁆𑀣𑁄. 𑀬𑀣𑀸 𑀳𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀥𑀼𑀭𑀸𑀬𑀁 𑀥𑁄𑀭𑀬𑁆𑀳𑀸𑀓𑀟𑁆𑀠𑀺𑀢𑀁 𑀦𑀗𑁆𑀕𑀮𑀁 𑀪𑀽𑀫𑀺𑀖𑀦𑀁 𑀪𑀺𑀦𑁆𑀤𑀢𑀺, 𑀫𑀽𑀮𑀲𑀦𑁆𑀢𑀸𑀦𑀓𑀸𑀦𑀺 𑀘 𑀧𑀤𑀸𑀮𑁂𑀢𑀺, 𑀏𑀯𑀁 𑀪𑀕𑀯𑀢𑁄 𑀯𑀻𑀭𑀺𑀬𑀸𑀓𑀟𑁆𑀠𑀺𑀢𑀁 𑀧𑀜𑁆𑀜𑀸𑀦𑀗𑁆𑀕𑀮𑀁 𑀬𑀣𑀸𑀯𑀼𑀢𑁆𑀢𑀁 𑀖𑀦𑀁 𑀪𑀺𑀦𑁆𑀤𑀢𑀺, 𑀓𑀺𑀮𑁂𑀲𑀲𑀦𑁆𑀢𑀸𑀦𑀓𑀸𑀦𑀺 𑀘 𑀧𑀤𑀸𑀮𑁂𑀢𑀺. 𑀢𑁂𑀦𑀸𑀳 𑁋 ‘‘𑀯𑀻𑀭𑀺𑀬𑀁 𑀫𑁂 𑀥𑀼𑀭𑀥𑁄𑀭𑀬𑁆𑀳’’𑀦𑁆𑀢𑀺. 𑀅𑀣 𑀯𑀸 𑀧𑀼𑀭𑀺𑀫𑀥𑀼𑀭𑀁 𑀯𑀳𑀦𑁆𑀢𑀸 𑀥𑀼𑀭𑀸, 𑀫𑀽𑀮𑀥𑀼𑀭𑀁 𑀯𑀳𑀦𑁆𑀢𑀸 𑀥𑁄𑀭𑀬𑁆𑀳𑀸; 𑀥𑀼𑀭𑀸 𑀘 𑀥𑁄𑀭𑀬𑁆𑀳𑀸 𑀘 𑀥𑀼𑀭𑀥𑁄𑀭𑀬𑁆𑀳𑀸. 𑀢𑀢𑁆𑀣 𑀬𑀣𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀏𑀓𑀫𑁂𑀓𑀲𑁆𑀫𑀺𑀁 𑀦𑀗𑁆𑀕𑀮𑁂 𑀘𑀢𑀼𑀩𑀮𑀺𑀩𑀤𑁆𑀤𑀧𑁆𑀧𑀪𑁂𑀤𑀁 𑀥𑀼𑀭𑀥𑁄𑀭𑀬𑁆𑀳𑀁 𑀯𑀳𑀦𑁆𑀢𑀁 𑀉𑀧𑁆𑀧𑀦𑁆𑀦𑀸𑀦𑀼𑀧𑁆𑀧𑀦𑁆𑀦𑀢𑀺𑀡𑀫𑀽𑀮𑀖𑀸𑀢𑀁 𑀲𑀲𑁆𑀲𑀲𑀫𑁆𑀧𑀢𑁆𑀢𑀺𑀜𑁆𑀘 𑀲𑀸𑀥𑁂𑀢𑀺, 𑀏𑀯𑀁 𑀪𑀕𑀯𑀢𑁄 𑀘𑀢𑀼𑀲𑀫𑁆𑀫𑀧𑁆𑀧𑀥𑀸𑀦𑀯𑀻𑀭𑀺𑀬𑀧𑁆𑀧𑀪𑁂𑀤𑀁 𑀥𑀼𑀭𑀥𑁄𑀭𑀬𑁆𑀳𑀁 𑀯𑀳𑀦𑁆𑀢𑀁 𑀉𑀧𑁆𑀧𑀦𑁆𑀦𑀸𑀦𑀼𑀧𑁆𑀧𑀦𑁆𑀦𑀸𑀓𑀼𑀲𑀮𑀫𑀽𑀮𑀖𑀸𑀢𑀁 𑀓𑀼𑀲𑀮𑀲𑀫𑁆𑀧𑀢𑁆𑀢𑀺𑀜𑁆𑀘 𑀲𑀸𑀥𑁂𑀢𑀺. 𑀢𑁂𑀦𑀸𑀳 𑁋 ‘‘𑀯𑀻𑀭𑀺𑀬𑀁 𑀫𑁂 𑀥𑀼𑀭𑀥𑁄𑀭𑀬𑁆𑀳’’𑀦𑁆𑀢𑀺.

𑀬𑁄𑀕𑀓𑁆𑀔𑁂𑀫𑀸𑀥𑀺𑀯𑀸𑀳𑀦𑀦𑁆𑀢𑀺 𑀏𑀢𑁆𑀣 𑀬𑁄𑀕𑁂𑀳𑀺 𑀔𑁂𑀫𑀢𑁆𑀢𑀸 ‘‘𑀬𑁄𑀕𑀓𑁆𑀔𑁂𑀫’’𑀦𑁆𑀢𑀺 𑀦𑀺𑀩𑁆𑀩𑀸𑀦𑀁 𑀯𑀼𑀘𑁆𑀘𑀢𑀺, 𑀢𑀁 𑀅𑀥𑀺𑀓𑀢𑁆𑀯𑀸 𑀯𑀸𑀳𑀻𑀬𑀢𑀺, 𑀅𑀪𑀺𑀫𑀼𑀔𑀁 𑀯𑀸 𑀯𑀸𑀳𑀻𑀬𑀢𑀻𑀢𑀺 𑀅𑀥𑀺𑀯𑀸𑀳𑀦𑀁. 𑀬𑁄𑀕𑀓𑁆𑀔𑁂𑀫𑀲𑁆𑀲 𑀅𑀥𑀺𑀯𑀸𑀳𑀦𑀁 𑀬𑁄𑀕𑀓𑁆𑀔𑁂𑀫𑀸𑀥𑀺𑀯𑀸𑀳𑀦𑀁. 𑀢𑁂𑀦 𑀓𑀺𑀁 𑀤𑀻𑀧𑁂𑀢𑀺? 𑀬𑀣𑀸 𑀢𑀯 𑀥𑀼𑀭𑀥𑁄𑀭𑀬𑁆𑀳𑀁 𑀧𑀼𑀭𑀢𑁆𑀣𑀺𑀫𑀁 𑀤𑀺𑀲𑀁 𑀧𑀘𑁆𑀙𑀺𑀫𑀸𑀤𑀻𑀲𑀼 𑀯𑀸 𑀅𑀜𑁆𑀜𑀢𑀭𑀁 𑀅𑀪𑀺𑀫𑀼𑀔𑀁 𑀯𑀸𑀳𑀻𑀬𑀢𑀺, 𑀢𑀣𑀸 𑀫𑀫 𑀥𑀼𑀭𑀥𑁄𑀭𑀬𑁆𑀳𑀁 𑀦𑀺𑀩𑁆𑀩𑀸𑀦𑀸𑀪𑀺𑀫𑀼𑀔𑀁 𑀯𑀸𑀳𑀻𑀬𑀢𑀺.

𑀏𑀯𑀁 𑀯𑀸𑀳𑀺𑀬𑀫𑀸𑀦𑀜𑁆𑀘 𑀕𑀘𑁆𑀙𑀢𑀺 𑀅𑀦𑀺𑀯𑀢𑁆𑀢𑀦𑁆𑀢𑀁. 𑀬𑀣𑀸 𑀢𑀯 𑀦𑀗𑁆𑀕𑀮𑀁 𑀯𑀳𑀦𑁆𑀢𑀁 𑀥𑀼𑀭𑀥𑁄𑀭𑀬𑁆𑀳𑀁 𑀔𑁂𑀢𑁆𑀢𑀓𑁄𑀝𑀺𑀁 𑀧𑀢𑁆𑀯𑀸 𑀧𑀼𑀦 𑀦𑀺𑀯𑀢𑁆𑀢𑀢𑀺, 𑀏𑀯𑀁 𑀅𑀦𑀺𑀯𑀢𑁆𑀢𑀦𑁆𑀢𑀁 𑀤𑀻𑀧𑀗𑁆𑀓𑀭𑀓𑀸𑀮𑀢𑁄 𑀧𑀪𑀼𑀢𑀺 𑀕𑀘𑁆𑀙𑀢𑁂𑀯. 𑀬𑀲𑁆𑀫𑀸 𑀯𑀸 𑀢𑁂𑀦 𑀢𑁂𑀦 𑀫𑀕𑁆𑀕𑁂𑀦 𑀧𑀳𑀻𑀦𑀸 𑀓𑀺𑀮𑁂𑀲𑀸 𑀧𑀼𑀦𑀧𑁆𑀧𑀼𑀦𑀁 𑀧𑀳𑀸𑀢𑀩𑁆𑀩𑀸 𑀦 𑀳𑁄𑀦𑁆𑀢𑀺, 𑀬𑀣𑀸 𑀢𑀯 𑀦𑀗𑁆𑀕𑀮𑁂𑀦 𑀙𑀺𑀦𑁆𑀦𑀸𑀦𑀺 𑀢𑀺𑀡𑀸𑀦𑀺 𑀧𑀼𑀦𑀧𑀺 𑀅𑀧𑀭𑀲𑁆𑀫𑀺𑀁 𑀲𑀫𑀬𑁂 𑀙𑀺𑀦𑁆𑀤𑀺𑀢𑀩𑁆𑀩𑀸𑀦𑀺 𑀳𑁄𑀦𑁆𑀢𑀺, 𑀢𑀲𑁆𑀫𑀸𑀧𑀺 𑀏𑀢𑀁 𑀧𑀞𑀫𑀫𑀕𑁆𑀕𑀯𑀲𑁂𑀦 𑀤𑀺𑀝𑁆𑀞𑁂𑀓𑀝𑁆𑀞𑁂 𑀓𑀺𑀮𑁂𑀲𑁂, 𑀤𑀼𑀢𑀺𑀬𑀯𑀲𑁂𑀦 𑀑𑀴𑀸𑀭𑀺𑀓𑁂, 𑀢𑀢𑀺𑀬𑀯𑀲𑁂𑀦 𑀅𑀦𑀼𑀲𑀳𑀕𑀢𑁂 𑀓𑀺𑀮𑁂𑀲𑁂, 𑀘𑀢𑀼𑀢𑁆𑀣𑀯𑀲𑁂𑀦 𑀲𑀩𑁆𑀩𑀓𑀺𑀮𑁂𑀲𑁂 𑀧𑀚𑀳𑀦𑁆𑀢𑀁 𑀕𑀘𑁆𑀙𑀢𑀺 𑀅𑀦𑀺𑀯𑀢𑁆𑀢𑀦𑁆𑀢𑀁. 𑀅𑀣 𑀯𑀸 𑀕𑀘𑁆𑀙𑀢𑀺 𑀅𑀦𑀺𑀯𑀢𑁆𑀢𑀦𑁆𑀢𑀺 𑀦𑀺𑀯𑀢𑁆𑀢𑀦𑀭𑀳𑀺𑀢𑀁 𑀳𑀼𑀢𑁆𑀯𑀸 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀦𑁆𑀢𑀺 𑀢𑀁 𑀥𑀼𑀭𑀥𑁄𑀭𑀬𑁆𑀳𑀁. 𑀏𑀯𑀫𑁆𑀧𑁂𑀢𑁆𑀣 𑀧𑀤𑀘𑁆𑀙𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀕𑀘𑁆𑀙𑀦𑁆𑀢𑀜𑁆𑀘 𑀬𑀣𑀸 𑀢𑀯 𑀥𑀼𑀭𑀥𑁄𑀭𑀬𑁆𑀳𑀁 𑀦 𑀢𑀁 𑀞𑀸𑀦𑀁 𑀕𑀘𑁆𑀙𑀢𑀺, 𑀬𑀢𑁆𑀣 𑀕𑀦𑁆𑀢𑁆𑀯𑀸 𑀓𑀲𑁆𑀲𑀓𑁄 𑀅𑀲𑁄𑀓𑁄 𑀦𑀺𑀲𑁆𑀲𑁄𑀓𑁄 𑀯𑀺𑀭𑀚𑁄 𑀳𑀼𑀢𑁆𑀯𑀸 𑀦 𑀲𑁄𑀘𑀢𑀺, 𑀏𑀢𑀁 𑀧𑀦 𑀢𑀁 𑀞𑀸𑀦𑀁 𑀕𑀘𑁆𑀙𑀢𑀺, 𑀬𑀢𑁆𑀣 𑀕𑀦𑁆𑀢𑁆𑀯𑀸 𑀦 𑀲𑁄𑀘𑀢𑀺. 𑀬𑀢𑁆𑀣 𑀲𑀢𑀺𑀧𑀸𑀘𑀦𑁂𑀦 𑀏𑀢𑀁 𑀯𑀻𑀭𑀺𑀬𑀥𑀼𑀭𑀥𑁄𑀭𑀬𑁆𑀳𑀁 𑀘𑁄𑀤𑁂𑀦𑁆𑀢𑁄 𑀕𑀦𑁆𑀢𑁆𑀯𑀸 𑀫𑀸𑀤𑀺𑀲𑁄 𑀓𑀲𑁆𑀲𑀓𑁄 𑀅𑀲𑁄𑀓𑁄 𑀦𑀺𑀲𑁆𑀲𑁄𑀓𑁄 𑀯𑀺𑀭𑀚𑁄 𑀳𑀼𑀢𑁆𑀯𑀸 𑀦 𑀲𑁄𑀘𑀢𑀺, 𑀢𑀁 𑀲𑀩𑁆𑀩𑀲𑁄𑀓𑀲𑀮𑁆𑀮𑀲𑀫𑀼𑀕𑁆𑀖𑀸𑀢𑀪𑀽𑀢𑀁 𑀦𑀺𑀩𑁆𑀩𑀸𑀦𑀸𑀫𑀢𑀲𑀗𑁆𑀔𑀸𑀢𑀁 𑀞𑀸𑀦𑀁 𑀕𑀘𑁆𑀙𑀢𑀻𑀢𑀺.

𑁮𑁦. 𑀇𑀤𑀸𑀦𑀺 𑀦𑀺𑀕𑀫𑀦𑀁 𑀓𑀭𑁄𑀦𑁆𑀢𑁄 𑀪𑀕𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀏𑀯𑀫𑁂𑀲𑀸 𑀓𑀲𑀻 𑀓𑀝𑁆𑀞𑀸, 𑀲𑀸 𑀳𑁄𑀢𑀺 𑀅𑀫𑀢𑀧𑁆𑀨𑀮𑀸;

𑀏𑀢𑀁 𑀓𑀲𑀺𑀁 𑀓𑀲𑀺𑀢𑁆𑀯𑀸𑀦, 𑀲𑀩𑁆𑀩𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀻’’𑀢𑀺.

𑀢𑀲𑁆𑀲𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀫𑀬𑀸 𑀩𑁆𑀭𑀸𑀳𑁆𑀫𑀡 𑀏𑀲𑀸 𑀲𑀤𑁆𑀥𑀸𑀩𑀻𑀚𑀸 𑀢𑀧𑁄𑀯𑀼𑀝𑁆𑀞𑀺𑀬𑀸 𑀅𑀦𑀼𑀕𑁆𑀕𑀳𑀺𑀢𑀸 𑀓𑀲𑀺, 𑀧𑀜𑁆𑀜𑀸𑀫𑀬𑀁 𑀬𑀼𑀕𑀦𑀗𑁆𑀕𑀮𑀁, 𑀳𑀺𑀭𑀺𑀫𑀬𑀜𑁆𑀘 𑀈𑀲𑀁, 𑀫𑀦𑁄𑀫𑀬𑁂𑀦 𑀬𑁄𑀢𑁆𑀢𑁂𑀦, 𑀏𑀓𑀸𑀩𑀤𑁆𑀥𑀁 𑀓𑀢𑁆𑀯𑀸, 𑀧𑀜𑁆𑀜𑀸𑀦𑀗𑁆𑀕𑀮𑁂 𑀲𑀢𑀺𑀨𑀸𑀮𑀁 𑀆𑀓𑁄𑀝𑁂𑀢𑁆𑀯𑀸, 𑀲𑀢𑀺𑀧𑀸𑀘𑀦𑀁 𑀕𑀳𑁂𑀢𑁆𑀯𑀸, 𑀓𑀸𑀬𑀯𑀘𑀻𑀆𑀳𑀸𑀭𑀕𑀼𑀢𑁆𑀢𑀺𑀬𑀸 𑀕𑁄𑀧𑁂𑀢𑁆𑀯𑀸, 𑀲𑀘𑁆𑀘𑀁 𑀦𑀺𑀤𑁆𑀤𑀸𑀦𑀁 𑀓𑀢𑁆𑀯𑀸, 𑀲𑁄𑀭𑀘𑁆𑀘𑀁 𑀧𑀫𑁄𑀘𑀦𑀁 𑀯𑀻𑀭𑀺𑀬𑀁 𑀥𑀼𑀭𑀥𑁄𑀭𑀬𑁆𑀳𑀁 𑀬𑁄𑀕𑀓𑁆𑀔𑁂𑀫𑀸𑀪𑀺𑀫𑀼𑀔𑀁 𑀅𑀦𑀺𑀯𑀢𑁆𑀢𑀦𑁆𑀢𑀁 𑀯𑀸𑀳𑁂𑀦𑁆𑀢𑁂𑀦 𑀓𑀝𑁆𑀞𑀸, 𑀓𑀲𑀺𑀓𑀫𑁆𑀫𑀧𑀭𑀺𑀬𑁄𑀲𑀸𑀦𑀁 𑀘𑀢𑀼𑀩𑁆𑀩𑀺𑀥𑀁 𑀲𑀸𑀫𑀜𑁆𑀜𑀨𑀮𑀁 𑀧𑀸𑀧𑀺𑀢𑀸, 𑀲𑀸 𑀳𑁄𑀢𑀺 𑀅𑀫𑀢𑀧𑁆𑀨𑀮𑀸, 𑀲𑀸 𑀏𑀲𑀸 𑀓𑀲𑀺 𑀅𑀫𑀢𑀧𑁆𑀨𑀮𑀸 𑀳𑁄𑀢𑀺. 𑀅𑀫𑀢𑀁 𑀯𑀼𑀘𑁆𑀘𑀢𑀺 𑀦𑀺𑀩𑁆𑀩𑀸𑀦𑀁, 𑀦𑀺𑀩𑁆𑀩𑀸𑀦𑀸𑀦𑀺𑀲𑀁𑀲𑀸 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀲𑀸 𑀔𑁄 𑀧𑀦𑁂𑀲𑀸 𑀓𑀲𑀺 𑀦 𑀫𑀫𑁂𑀯𑁂𑀓𑀲𑁆𑀲 𑀅𑀫𑀢𑀧𑁆𑀨𑀮𑀸 𑀳𑁄𑀢𑀺, 𑀅𑀧𑀺𑀘, 𑀔𑁄, 𑀧𑀦 𑀬𑁄 𑀓𑁄𑀘𑀺 𑀔𑀢𑁆𑀢𑀺𑀬𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀯𑁂𑀲𑁆𑀲𑁄 𑀯𑀸 𑀲𑀼𑀤𑁆𑀤𑁄 𑀯𑀸 𑀕𑀳𑀝𑁆𑀞𑁄 𑀯𑀸 𑀧𑀩𑁆𑀩𑀚𑀺𑀢𑁄 𑀯𑀸 𑀏𑀢𑀁 𑀓𑀲𑀺𑀁 𑀓𑀲𑀢𑀺, 𑀲𑁄 𑀲𑀩𑁆𑀩𑁄𑀧𑀺 𑀏𑀢𑀁 𑀓𑀲𑀺𑀁 𑀓𑀲𑀺𑀢𑁆𑀯𑀸𑀦, 𑀲𑀩𑁆𑀩𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀺, 𑀲𑀩𑁆𑀩𑀲𑁆𑀫𑀸 𑀯𑀝𑁆𑀝𑀤𑀼𑀓𑁆𑀔𑀤𑀼𑀓𑁆𑀔𑀤𑀼𑀓𑁆𑀔𑀲𑀗𑁆𑀔𑀸𑀭𑀤𑀼𑀓𑁆𑀔𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀻𑀢𑀺. 𑀏𑀯𑀁 𑀪𑀕𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀦𑀺𑀩𑁆𑀩𑀸𑀦𑀧𑀭𑀺𑀬𑁄𑀲𑀸𑀦𑀁 𑀓𑀢𑁆𑀯𑀸 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺.

𑀢𑀢𑁄 𑀩𑁆𑀭𑀸𑀳𑁆𑀫𑀡𑁄 𑀕𑀫𑁆𑀪𑀻𑀭𑀢𑁆𑀣𑀁 𑀤𑁂𑀲𑀦𑀁 𑀲𑀼𑀢𑁆𑀯𑀸 ‘‘𑀫𑀫 𑀓𑀲𑀺𑀨𑀮𑀁 𑀪𑀼𑀜𑁆𑀚𑀺𑀢𑁆𑀯𑀸 𑀅𑀧𑀭𑀚𑁆𑀚𑀼 𑀏𑀯 𑀙𑀸𑀢𑁄 𑀳𑁄𑀢𑀺, 𑀇𑀫𑀲𑁆𑀲 𑀧𑀦 𑀓𑀲𑀺 𑀅𑀫𑀢𑀧𑁆𑀨𑀮𑀸, 𑀢𑀲𑁆𑀲𑀸 𑀨𑀮𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑀩𑁆𑀩𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀻’’𑀢𑀺 𑀘 𑀯𑀺𑀤𑀺𑀢𑁆𑀯𑀸 𑀧𑀲𑀦𑁆𑀦𑁄 𑀧𑀲𑀦𑁆𑀦𑀸𑀓𑀸𑀭𑀁 𑀓𑀸𑀢𑀼𑀁 𑀧𑀸𑀬𑀸𑀲𑀁 𑀤𑀸𑀢𑀼𑀫𑀸𑀭𑀤𑁆𑀥𑁄. 𑀢𑁂𑀦𑀸𑀳 ‘‘𑀅𑀣 𑀔𑁄 𑀓𑀲𑀺𑀪𑀸𑀭𑀤𑁆𑀯𑀸𑀚𑁄’’𑀢𑀺. 𑀢𑀢𑁆𑀣 𑀫𑀳𑀢𑀺𑀬𑀸𑀢𑀺 𑀫𑀳𑀢𑀺𑀬𑀦𑁆𑀢𑀺 𑀅𑀢𑁆𑀣𑁄. 𑀓𑀁𑀲𑀧𑀸𑀢𑀺𑀬𑀸𑀢𑀺 𑀲𑀼𑀯𑀡𑁆𑀡𑀧𑀸𑀢𑀺𑀬𑀁, 𑀲𑀢𑀲𑀳𑀲𑁆𑀲𑀕𑁆𑀖𑀦𑀓𑁂 𑀅𑀢𑁆𑀢𑀦𑁄 𑀲𑀼𑀯𑀡𑁆𑀡𑀣𑀸𑀮𑁂. 𑀯𑀟𑁆𑀠𑁂𑀢𑁆𑀯𑀸𑀢𑀺 𑀙𑀼𑀧𑀺𑀢𑁆𑀯𑀸, 𑀆𑀓𑀺𑀭𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀪𑀕𑀯𑀢𑁄 𑀉𑀧𑀦𑀸𑀫𑁂𑀲𑀻𑀢𑀺 𑀲𑀧𑁆𑀧𑀺𑀫𑀥𑀼𑀨𑀸𑀡𑀺𑀢𑀸𑀤𑀻𑀳𑀺 𑀯𑀺𑀘𑀺𑀢𑁆𑀭𑀁 𑀓𑀢𑁆𑀯𑀸, 𑀤𑀼𑀓𑀽𑀮𑀯𑀺𑀢𑀸𑀦𑁂𑀦 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸, 𑀉𑀓𑁆𑀔𑀺𑀧𑀺𑀢𑁆𑀯𑀸, 𑀲𑀓𑁆𑀓𑀘𑁆𑀘𑀁 𑀢𑀣𑀸𑀕𑀢𑀲𑁆𑀲 𑀅𑀪𑀺𑀳𑀭𑀺. 𑀓𑀺𑀦𑁆𑀢𑀺? ‘‘𑀪𑀼𑀜𑁆𑀚𑀢𑀼 𑀪𑀯𑀁 𑀕𑁄𑀢𑀫𑁄 𑀧𑀸𑀬𑀸𑀲𑀁, 𑀓𑀲𑁆𑀲𑀓𑁄 𑀪𑀯’’𑀦𑁆𑀢𑀺. 𑀢𑀢𑁄 𑀓𑀲𑁆𑀲𑀓𑀪𑀸𑀯𑀲𑀸𑀥𑀓𑀁 𑀓𑀸𑀭𑀡𑀫𑀸𑀳 ‘‘𑀬𑀜𑁆𑀳𑀺…𑀧𑁂… 𑀓𑀲𑀢𑀻’’𑀢𑀺, 𑀬𑀲𑁆𑀫𑀸 𑀪𑀯𑀁…𑀧𑁂… 𑀓𑀲𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣 𑀪𑀕𑀯𑀸 ‘‘𑀕𑀸𑀣𑀸𑀪𑀺𑀕𑀻𑀢𑀁 𑀫𑁂’’𑀢𑀺 𑀆𑀳.

𑁮𑁧. 𑀢𑀢𑁆𑀣 𑀕𑀸𑀣𑀸𑀪𑀺𑀕𑀻𑀢𑀦𑁆𑀢𑀺 𑀕𑀸𑀣𑀸𑀳𑀺 𑀅𑀪𑀺𑀕𑀻𑀢𑀁, 𑀕𑀸𑀣𑀸𑀬𑁄 𑀪𑀸𑀲𑀺𑀢𑁆𑀯𑀸 𑀮𑀤𑁆𑀥𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑁂𑀢𑀺 𑀫𑀬𑀸. 𑀅𑀪𑁄𑀚𑀦𑁂𑀬𑁆𑀬𑀦𑁆𑀢𑀺 𑀪𑀼𑀜𑁆𑀚𑀦𑀸𑀭𑀳𑀁 𑀦 𑀳𑁄𑀢𑀺. 𑀲𑀫𑁆𑀧𑀲𑁆𑀲𑀢𑀦𑁆𑀢𑀺 𑀲𑀫𑁆𑀫𑀸 𑀆𑀚𑀻𑀯𑀲𑀼𑀤𑁆𑀥𑀺𑀁 𑀧𑀲𑁆𑀲𑀢𑀁, 𑀲𑀫𑀦𑁆𑀢𑀸 𑀯𑀸 𑀧𑀲𑁆𑀲𑀢𑀁 𑀲𑀫𑁆𑀧𑀲𑁆𑀲𑀢𑀁, 𑀩𑀼𑀤𑁆𑀥𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑁂𑀲 𑀥𑀫𑁆𑀫𑁄𑀢𑀺 ‘‘𑀕𑀸𑀣𑀸𑀪𑀺𑀕𑀻𑀢𑀁 𑀪𑀼𑀜𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀏𑀲 𑀥𑀫𑁆𑀫𑁄 𑀏𑀢𑀁 𑀘𑀸𑀭𑀺𑀢𑁆𑀢𑀁 𑀦 𑀳𑁄𑀢𑀺, 𑀢𑀲𑁆𑀫𑀸 𑀕𑀸𑀣𑀸𑀪𑀺𑀕𑀻𑀢𑀁 𑀧𑀦𑀼𑀤𑀦𑁆𑀢𑀺 𑀩𑀼𑀤𑁆𑀥𑀸 𑀧𑀝𑀺𑀓𑁆𑀔𑀺𑀧𑀦𑁆𑀢𑀺 𑀦 𑀪𑀼𑀜𑁆𑀚𑀦𑁆𑀢𑀻𑀢𑀺. 𑀓𑀺𑀁 𑀧𑀦 𑀪𑀕𑀯𑀢𑀸 𑀧𑀸𑀬𑀸𑀲𑀢𑁆𑀣𑀁 𑀕𑀸𑀣𑀸 𑀅𑀪𑀺𑀕𑀻𑀢𑀸, 𑀬𑁂𑀦 𑀏𑀯𑀫𑀸𑀳𑀸𑀢𑀺? 𑀦 𑀏𑀢𑀤𑀢𑁆𑀣𑀁 𑀅𑀪𑀺𑀕𑀻𑀢𑀸, 𑀅𑀧𑀺𑀘, 𑀔𑁄, 𑀧𑀦 𑀧𑀸𑀢𑁄 𑀧𑀝𑁆𑀞𑀸𑀬 𑀔𑁂𑀢𑁆𑀢𑀲𑀫𑀻𑀧𑁂 𑀞𑀢𑁆𑀯𑀸 𑀓𑀝𑀘𑁆𑀙𑀼𑀪𑀺𑀓𑁆𑀔𑀫𑁆𑀧𑀺 𑀅𑀮𑀪𑀺𑀢𑁆𑀯𑀸 𑀧𑀼𑀦 𑀲𑀓𑀮𑀩𑀼𑀤𑁆𑀥𑀕𑀼𑀡𑁂 𑀧𑀓𑀸𑀲𑁂𑀢𑁆𑀯𑀸 𑀮𑀤𑁆𑀥𑀁 𑀢𑀤𑁂𑀢𑀁 𑀦𑀝𑀦𑀘𑁆𑀘𑀓𑀸𑀤𑀻𑀳𑀺 𑀦𑀘𑁆𑀘𑀺𑀢𑁆𑀯𑀸 𑀕𑀸𑀬𑀺𑀢𑁆𑀯𑀸 𑀘 𑀮𑀤𑁆𑀥𑀲𑀤𑀺𑀲𑀁 𑀳𑁄𑀢𑀺, 𑀢𑁂𑀦 ‘‘𑀕𑀸𑀣𑀸𑀪𑀺𑀕𑀻𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀸𑀤𑀺𑀲𑀜𑁆𑀘 𑀬𑀲𑁆𑀫𑀸 𑀩𑀼𑀤𑁆𑀥𑀸𑀦𑀁 𑀦 𑀓𑀧𑁆𑀧𑀢𑀺, 𑀢𑀲𑁆𑀫𑀸 ‘‘𑀅𑀪𑁄𑀚𑀦𑁂𑀬𑁆𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀧𑁆𑀧𑀺𑀘𑁆𑀙𑀢𑀸𑀦𑀼𑀭𑀽𑀧𑀜𑁆𑀘𑁂𑀢𑀁 𑀦 𑀳𑁄𑀢𑀺, 𑀢𑀲𑁆𑀫𑀸𑀧𑀺 𑀧𑀘𑁆𑀙𑀺𑀫𑀁 𑀚𑀦𑀢𑀁 𑀅𑀦𑀼𑀓𑀫𑁆𑀧𑀫𑀸𑀦𑁂𑀦 𑀘 𑀏𑀯𑀁 𑀯𑀼𑀢𑁆𑀢𑀁. 𑀬𑀢𑁆𑀭 𑀘 𑀦𑀸𑀫 𑀧𑀭𑀧𑁆𑀧𑀓𑀸𑀲𑀺𑀢𑁂𑀦𑀸𑀧𑀺 𑀅𑀢𑁆𑀢𑀦𑁄 𑀕𑀼𑀡𑁂𑀦 𑀉𑀧𑁆𑀧𑀦𑁆𑀦𑀁 𑀮𑀸𑀪𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑀺 𑀲𑁂𑀬𑁆𑀬𑀣𑀸𑀧𑀺 𑀅𑀧𑁆𑀧𑀺𑀘𑁆𑀙𑁄 𑀖𑀝𑀺𑀓𑀸𑀭𑁄 𑀓𑀼𑀫𑁆𑀪𑀓𑀸𑀭𑁄, 𑀢𑀢𑁆𑀭 𑀓𑀣𑀁 𑀓𑁄𑀝𑀺𑀧𑁆𑀧𑀢𑁆𑀢𑀸𑀬 𑀅𑀧𑁆𑀧𑀺𑀘𑁆𑀙𑀢𑀸𑀬 𑀲𑀫𑀦𑁆𑀦𑀸𑀕𑀢𑁄 𑀪𑀕𑀯𑀸 𑀅𑀢𑁆𑀢𑀦𑀸𑀯 𑀅𑀢𑁆𑀢𑀦𑁄 𑀕𑀼𑀡𑀧𑁆𑀧𑀓𑀸𑀲𑀦𑁂𑀦 𑀉𑀧𑁆𑀧𑀦𑁆𑀦𑀁 𑀮𑀸𑀪𑀁 𑀲𑀸𑀤𑀺𑀬𑀺𑀲𑁆𑀲𑀢𑀺, 𑀬𑀢𑁄 𑀬𑀼𑀢𑁆𑀢𑀫𑁂𑀯 𑀏𑀢𑀁 𑀪𑀕𑀯𑀢𑁄 𑀯𑀢𑁆𑀢𑀼𑀦𑁆𑀢𑀺.

𑀏𑀢𑁆𑀢𑀸𑀯𑀢𑀸 ‘‘𑀅𑀧𑁆𑀧𑀲𑀦𑁆𑀦𑀁 𑀅𑀤𑀸𑀢𑀼𑀓𑀸𑀫𑀁 𑀩𑁆𑀭𑀸𑀳𑁆𑀫𑀡𑀁 𑀕𑀸𑀣𑀸𑀕𑀸𑀬𑀦𑁂𑀦 𑀤𑀸𑀢𑀼𑀓𑀸𑀫𑀁 𑀓𑀢𑁆𑀯𑀸, 𑀲𑀫𑀡𑁄 𑀕𑁄𑀢𑀫𑁄 𑀪𑁄𑀚𑀦𑀁 𑀧𑀝𑀺𑀕𑁆𑀕𑀳𑁂𑀲𑀺, 𑀆𑀫𑀺𑀲𑀓𑀸𑀭𑀡𑀸 𑀇𑀫𑀲𑁆𑀲 𑀤𑁂𑀲𑀦𑀸’’𑀢𑀺 𑀇𑀫𑀫𑁆𑀳𑀸 𑀮𑁄𑀓𑀸𑀧𑀯𑀸𑀤𑀸 𑀅𑀢𑁆𑀢𑀸𑀦𑀁 𑀫𑁄𑀘𑁂𑀦𑁆𑀢𑁄 𑀤𑁂𑀲𑀦𑀸𑀧𑀸𑀭𑀺𑀲𑀼𑀤𑁆𑀥𑀺𑀁 𑀤𑀻𑀧𑁂𑀢𑁆𑀯𑀸, 𑀇𑀤𑀸𑀦𑀺 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀁 𑀤𑀻𑀧𑁂𑀦𑁆𑀢𑁄 𑀆𑀳 ‘‘𑀥𑀫𑁆𑀫𑁂 𑀲𑀢𑀻 𑀩𑁆𑀭𑀸𑀳𑁆𑀫𑀡 𑀯𑀼𑀢𑁆𑀢𑀺𑀭𑁂𑀲𑀸’’𑀢𑀺 𑀢𑀲𑁆𑀲𑀢𑁆𑀣𑁄 𑁋 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀥𑀫𑁆𑀫𑁂 𑀯𑀸 𑀤𑀲𑀯𑀺𑀥𑀲𑀼𑀘𑀭𑀺𑀢𑀥𑀫𑁆𑀫𑁂 𑀯𑀸 𑀩𑀼𑀤𑁆𑀥𑀸𑀦𑀁 𑀘𑀸𑀭𑀺𑀢𑁆𑀢𑀥𑀫𑁆𑀫𑁂 𑀯𑀸 𑀲𑀢𑀺 𑀲𑀁𑀯𑀺𑀚𑁆𑀚𑀫𑀸𑀦𑁂 𑀅𑀦𑀼𑀧𑀳𑀢𑁂 𑀯𑀢𑁆𑀢𑀫𑀸𑀦𑁂 𑀯𑀼𑀢𑁆𑀢𑀺𑀭𑁂𑀲𑀸 𑀏𑀓𑀦𑁆𑀢𑀯𑁄𑀤𑀸𑀢𑀸 𑀆𑀓𑀸𑀲𑁂 𑀧𑀸𑀡𑀺𑀧𑁆𑀧𑀲𑀸𑀭𑀡𑀓𑀧𑁆𑀧𑀸 𑀏𑀲𑀦𑀸 𑀧𑀭𑀺𑀬𑁂𑀲𑀦𑀸 𑀚𑀻𑀯𑀺𑀢𑀯𑀼𑀢𑁆𑀢𑀺 𑀩𑀼𑀤𑁆𑀥𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀢𑀺.

𑁮𑁨. 𑀏𑀯𑀁 𑀯𑀼𑀢𑁆𑀢𑁂 𑀩𑁆𑀭𑀸𑀳𑁆𑀫𑀡𑁄 ‘‘𑀧𑀸𑀬𑀸𑀲𑀁 𑀫𑁂 𑀧𑀝𑀺𑀓𑁆𑀔𑀺𑀧𑀢𑀺, 𑀅𑀓𑀧𑁆𑀧𑀺𑀬𑀁 𑀓𑀺𑀭𑁂𑀢𑀁 𑀪𑁄𑀚𑀦𑀁, 𑀅𑀥𑀜𑁆𑀜𑁄 𑀯𑀢𑀲𑁆𑀫𑀺𑀁, 𑀤𑀸𑀦𑀁 𑀤𑀸𑀢𑀼𑀁 𑀦 𑀮𑀪𑀸𑀫𑀻’’𑀢𑀺 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 ‘‘𑀅𑀧𑁆𑀧𑁂𑀯 𑀦𑀸𑀫 𑀅𑀜𑁆𑀜𑀁 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬𑀸’’𑀢𑀺 𑀘 𑀘𑀺𑀦𑁆𑀢𑁂𑀲𑀺. 𑀢𑀁 𑀜𑀢𑁆𑀯𑀸 𑀪𑀕𑀯𑀸 ‘‘𑀅𑀳𑀁 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀆𑀕𑀢𑁄 𑁋 ‘𑀏𑀢𑁆𑀢𑀓𑁂𑀦 𑀓𑀸𑀮𑁂𑀦 𑀇𑀫𑀁 𑀩𑁆𑀭𑀸𑀳𑁆𑀫𑀡𑀁 𑀧𑀲𑀸𑀤𑁂𑀲𑁆𑀲𑀸𑀫𑀻’𑀢𑀺, 𑀩𑁆𑀭𑀸𑀳𑁆𑀫𑀡𑁄 𑀘 𑀤𑁄𑀫𑀦𑀲𑁆𑀲𑀁 𑀅𑀓𑀸𑀲𑀺. 𑀇𑀤𑀸𑀦𑀺 𑀢𑁂𑀦 𑀤𑁄𑀫𑀦𑀲𑁆𑀲𑁂𑀦 𑀫𑀬𑀺 𑀘𑀺𑀢𑁆𑀢𑀁 𑀧𑀓𑁄𑀧𑁂𑀢𑁆𑀯𑀸 𑀅𑀫𑀢𑀯𑀭𑀥𑀫𑁆𑀫𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀲𑀸𑀤𑀚𑀦𑀦𑀢𑁆𑀣𑀁 𑀢𑁂𑀦 𑀧𑀢𑁆𑀣𑀺𑀢𑀫𑀦𑁄𑀭𑀣𑀁 𑀧𑀽𑀭𑁂𑀦𑁆𑀢𑁄 𑀆𑀳 ‘‘𑀅𑀜𑁆𑀜𑁂𑀦 𑀘 𑀓𑁂𑀯𑀮𑀺𑀦’’𑀦𑁆𑀢𑀺. 𑀢𑀢𑁆𑀣 𑀓𑁂𑀯𑀮𑀺𑀦𑀦𑁆𑀢𑀺 𑀲𑀩𑁆𑀩𑀕𑀼𑀡𑀧𑀭𑀺𑀧𑀼𑀡𑁆𑀡𑀁, 𑀲𑀩𑁆𑀩𑀬𑁄𑀕𑀯𑀺𑀲𑀁𑀬𑀼𑀢𑁆𑀢𑀁 𑀯𑀸𑀢𑀺 𑀅𑀢𑁆𑀣𑁄. 𑀫𑀳𑀦𑁆𑀢𑀸𑀦𑀁 𑀲𑀻𑀮𑀓𑁆𑀔𑀦𑁆𑀥𑀸𑀤𑀻𑀦𑀁 𑀕𑀼𑀡𑀸𑀦𑀁 𑀏𑀲𑀦𑀢𑁄 𑀫𑀳𑁂𑀲𑀺𑀁. 𑀧𑀭𑀺𑀓𑁆𑀔𑀻𑀡𑀲𑀩𑁆𑀩𑀸𑀲𑀯𑀢𑁆𑀢𑀸 𑀔𑀻𑀡𑀸𑀲𑀯𑀁. 𑀳𑀢𑁆𑀣𑀧𑀸𑀤𑀓𑀼𑀓𑁆𑀓𑀼𑀘𑁆𑀘𑀫𑀸𑀤𑀺𑀁 𑀓𑀢𑁆𑀯𑀸 𑀯𑀽𑀧𑀲𑀦𑁆𑀢𑀲𑀩𑁆𑀩𑀓𑀼𑀓𑁆𑀓𑀼𑀘𑁆𑀘𑀢𑁆𑀢𑀸 𑀓𑀼𑀓𑁆𑀓𑀼𑀘𑁆𑀘𑀯𑀽𑀧𑀲𑀦𑁆𑀢𑀁. 𑀉𑀧𑀝𑁆𑀞𑀳𑀲𑁆𑀲𑀽𑀢𑀺 𑀧𑀭𑀺𑀯𑀺𑀲𑀲𑁆𑀲𑀼 𑀧𑀝𑀺𑀫𑀸𑀦𑀬𑀲𑁆𑀲𑀼. 𑀏𑀯𑀁 𑀩𑁆𑀭𑀸𑀳𑁆𑀫𑀡𑁂𑀦 𑀘𑀺𑀢𑁆𑀢𑁂 𑀉𑀧𑁆𑀧𑀸𑀤𑀺𑀢𑁂𑀧𑀺 𑀧𑀭𑀺𑀬𑀸𑀬𑀫𑁂𑀯 𑀪𑀡𑀢𑀺, 𑀦 𑀢𑀼 𑀪𑀡𑀢𑀺 ‘‘𑀤𑁂𑀳𑀺, 𑀆𑀳𑀭𑀸𑀳𑀻’’𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀅𑀣 𑀩𑁆𑀭𑀸𑀳𑁆𑀫𑀡𑁄 ‘‘𑀅𑀬𑀁 𑀧𑀸𑀬𑀸𑀲𑁄 𑀪𑀕𑀯𑀢𑁄 𑀆𑀦𑀻𑀢𑁄 𑀦𑀸𑀳𑀁 𑀅𑀭𑀳𑀸𑀫𑀺 𑀢𑀁 𑀅𑀢𑁆𑀢𑀦𑁄 𑀙𑀦𑁆𑀤𑁂𑀦 𑀓𑀲𑁆𑀲𑀘𑀺 𑀤𑀸𑀢𑀼’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀆𑀳 ‘‘𑀅𑀣 𑀓𑀲𑁆𑀲 𑀘𑀸𑀳’’𑀦𑁆𑀢𑀺. 𑀢𑀢𑁄 𑀪𑀕𑀯𑀸 ‘‘𑀢𑀁 𑀧𑀸𑀬𑀸𑀲𑀁 𑀞𑀧𑁂𑀢𑁆𑀯𑀸 𑀢𑀣𑀸𑀕𑀢𑀁 𑀢𑀣𑀸𑀕𑀢𑀲𑀸𑀯𑀓𑀜𑁆𑀘 𑀅𑀜𑁆𑀜𑀲𑁆𑀲 𑀅𑀚𑀻𑀭𑀡𑀥𑀫𑁆𑀫𑁄’’𑀢𑀺 𑀜𑀢𑁆𑀯𑀸 𑀆𑀳 𑁋 ‘‘𑀦 𑀔𑁆𑀯𑀸𑀳𑀁 𑀢’’𑀦𑁆𑀢𑀺. 𑀢𑀢𑁆𑀣 𑀲𑀤𑁂𑀯𑀓𑀯𑀘𑀦𑁂𑀦 𑀧𑀜𑁆𑀘𑀓𑀸𑀫𑀸𑀯𑀘𑀭𑀤𑁂𑀯𑀕𑁆𑀕𑀳𑀡𑀁, 𑀲𑀫𑀸𑀭𑀓𑀯𑀘𑀦𑁂𑀦 𑀙𑀝𑁆𑀞𑀓𑀸𑀫𑀸𑀯𑀘𑀭𑀤𑁂𑀯𑀕𑁆𑀕𑀳𑀡𑀁, 𑀲𑀩𑁆𑀭𑀳𑁆𑀫𑀓𑀯𑀘𑀦𑁂𑀦 𑀭𑀽𑀧𑀸𑀯𑀘𑀭𑀩𑁆𑀭𑀳𑁆𑀫𑀕𑁆𑀕𑀳𑀡𑀁 𑀅𑀭𑀽𑀧𑀸𑀯𑀘𑀭𑀸 𑀧𑀦 𑀪𑀼𑀜𑁆𑀚𑁂𑀬𑁆𑀬𑀼𑀦𑁆𑀢𑀺 𑀅𑀲𑀫𑁆𑀪𑀸𑀯𑀦𑁂𑀬𑁆𑀬𑀸. 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀯𑀘𑀦𑁂𑀦 𑀲𑀸𑀲𑀦𑀧𑀘𑁆𑀘𑀢𑁆𑀣𑀺𑀓𑀧𑀘𑁆𑀘𑀸𑀫𑀺𑀢𑁆𑀢𑀲𑀫𑀡𑀩𑁆𑀭𑀸𑀳𑁆𑀫𑀡𑀕𑁆𑀕𑀳𑀡𑀁 𑀲𑀫𑀺𑀢𑀧𑀸𑀧𑀩𑀸𑀳𑀺𑀢𑀧𑀸𑀧𑀲𑀫𑀡𑀩𑁆𑀭𑀸𑀳𑁆𑀫𑀡𑀕𑁆𑀕𑀳𑀡𑀜𑁆𑀘. 𑀧𑀚𑀸𑀯𑀘𑀦𑁂𑀦 𑀲𑀢𑁆𑀢𑀮𑁄𑀓𑀕𑁆𑀕𑀳𑀡𑀁, 𑀲𑀤𑁂𑀯𑀫𑀦𑀼𑀲𑁆𑀲𑀯𑀘𑀦𑁂𑀦 𑀲𑀫𑁆𑀫𑀼𑀢𑀺𑀤𑁂𑀯𑀅𑀯𑀲𑁂𑀲𑀫𑀦𑀼𑀲𑁆𑀲𑀕𑁆𑀕𑀳𑀡𑀁. 𑀏𑀯𑀫𑁂𑀢𑁆𑀣 𑀢𑀻𑀳𑀺 𑀯𑀘𑀦𑁂𑀳𑀺 𑀑𑀓𑀸𑀲𑀮𑁄𑀓𑁄, 𑀤𑁆𑀯𑀻𑀳𑀺 𑀧𑀚𑀸𑀯𑀲𑁂𑀦 𑀲𑀢𑁆𑀢𑀮𑁄𑀓𑁄 𑀕𑀳𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀏𑀲 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑀁 𑀧𑀦 𑀆𑀴𑀯𑀓𑀲𑀼𑀢𑁆𑀢𑁂 𑀯𑀡𑁆𑀡𑀬𑀺𑀲𑁆𑀲𑀸𑀫.

𑀓𑀲𑁆𑀫𑀸 𑀧𑀦 𑀲𑀤𑁂𑀯𑀓𑀸𑀤𑀻𑀲𑀼 𑀓𑀲𑁆𑀲𑀘𑀺 𑀦 𑀲𑀫𑁆𑀫𑀸 𑀧𑀭𑀺𑀡𑀸𑀫𑀁 𑀕𑀘𑁆𑀙𑁂𑀬𑁆𑀬𑀸𑀢𑀺? 𑀑𑀴𑀸𑀭𑀺𑀓𑁂 𑀲𑀼𑀔𑀼𑀫𑁄𑀚𑀸𑀧𑀓𑁆𑀔𑀺𑀧𑀦𑀢𑁄. 𑀇𑀫𑀲𑁆𑀫𑀺𑀜𑁆𑀳𑀺 𑀧𑀸𑀬𑀸𑀲𑁂 𑀪𑀕𑀯𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀕𑀳𑀺𑀢𑀫𑀢𑁆𑀢𑁂𑀬𑁂𑀯 𑀤𑁂𑀯𑀢𑀸𑀳𑀺 𑀑𑀚𑀸 𑀧𑀓𑁆𑀔𑀺𑀢𑁆𑀢𑀸 𑀬𑀣𑀸 𑀲𑀼𑀚𑀸𑀢𑀸𑀬 𑀧𑀸𑀬𑀸𑀲𑁂, 𑀘𑀼𑀦𑁆𑀤𑀲𑁆𑀲 𑀘 𑀲𑀽𑀓𑀭𑀫𑀤𑁆𑀤𑀯𑁂 𑀧𑀘𑁆𑀘𑀫𑀸𑀦𑁂, 𑀯𑁂𑀭𑀜𑁆𑀚𑀸𑀬𑀜𑁆𑀘 𑀪𑀕𑀯𑀢𑀸 𑀕𑀳𑀺𑀢𑀕𑀳𑀺𑀢𑀸𑀮𑁄𑀧𑁂, 𑀪𑁂𑀲𑀚𑁆𑀚𑀓𑁆𑀔𑀦𑁆𑀥𑀓𑁂 𑀘 𑀓𑀘𑁆𑀘𑀸𑀦𑀲𑁆𑀲 𑀕𑀼𑀴𑁆𑀳𑀓𑀼𑀫𑁆𑀪𑀲𑁆𑀫𑀺𑀁 𑀅𑀯𑀲𑀺𑀝𑁆𑀞𑀕𑀼𑀴𑁆𑀳𑁂. 𑀲𑁄 𑀑𑀴𑀸𑀭𑀺𑀓𑁂 𑀲𑀼𑀔𑀼𑀫𑁄𑀚𑀸𑀧𑀓𑁆𑀔𑀺𑀧𑀦𑀢𑁄 𑀤𑁂𑀯𑀸𑀦𑀁 𑀦 𑀧𑀭𑀺𑀡𑀫𑀢𑀺. 𑀤𑁂𑀯𑀸 𑀳𑀺 𑀲𑀼𑀔𑀼𑀫𑀲𑀭𑀻𑀭𑀸, 𑀢𑁂𑀲𑀁 𑀑𑀴𑀸𑀭𑀺𑀓𑁄 𑀫𑀦𑀼𑀲𑁆𑀲𑀸𑀳𑀸𑀭𑁄 𑀦 𑀲𑀫𑁆𑀫𑀸 𑀧𑀭𑀺𑀡𑀫𑀢𑀺. 𑀫𑀦𑀼𑀲𑁆𑀲𑀸𑀦𑀫𑁆𑀧𑀺 𑀦 𑀧𑀭𑀺𑀡𑀫𑀢𑀺. 𑀫𑀦𑀼𑀲𑁆𑀲𑀸 𑀳𑀺 𑀑𑀴𑀸𑀭𑀺𑀓𑀲𑀭𑀻𑀭𑀸, 𑀢𑁂𑀲𑀁 𑀲𑀼𑀔𑀼𑀫𑀸 𑀤𑀺𑀩𑁆𑀩𑁄𑀚𑀸 𑀦 𑀲𑀫𑁆𑀫𑀸 𑀧𑀭𑀺𑀡𑀫𑀢𑀺. 𑀢𑀣𑀸𑀕𑀢𑀲𑁆𑀲 𑀧𑀦 𑀧𑀓𑀢𑀺𑀅𑀕𑁆𑀕𑀺𑀦𑀸𑀯 𑀧𑀭𑀺𑀡𑀫𑀢𑀺, 𑀲𑀫𑁆𑀫𑀸 𑀚𑀻𑀭𑀢𑀺. 𑀓𑀸𑀬𑀩𑀮𑀜𑀸𑀡𑀩𑀮𑀧𑁆𑀧𑀪𑀸𑀯𑁂𑀦𑀸𑀢𑀺 𑀏𑀓𑁂 𑀢𑀣𑀸𑀕𑀢𑀲𑀸𑀯𑀓𑀲𑁆𑀲 𑀔𑀻𑀡𑀸𑀲𑀯𑀲𑁆𑀲𑁂𑀢𑀁 𑀲𑀫𑀸𑀥𑀺𑀩𑀮𑁂𑀦 𑀫𑀢𑁆𑀢𑀜𑁆𑀜𑀼𑀢𑀸𑀬 𑀘 𑀧𑀭𑀺𑀡𑀫𑀢𑀺, 𑀇𑀢𑀭𑁂𑀲𑀁 𑀇𑀤𑁆𑀥𑀺𑀫𑀦𑁆𑀢𑀸𑀦𑀫𑁆𑀧𑀺 𑀦 𑀧𑀭𑀺𑀡𑀫𑀢𑀺. 𑀅𑀘𑀺𑀦𑁆𑀢𑀦𑀻𑀬𑀁 𑀯𑀸 𑀏𑀢𑁆𑀣 𑀓𑀸𑀭𑀡𑀁, 𑀩𑀼𑀤𑁆𑀥𑀯𑀺𑀲𑀬𑁄 𑀏𑀲𑁄𑀢𑀺.

𑀢𑁂𑀦 𑀳𑀺 𑀢𑁆𑀯𑀦𑁆𑀢𑀺 𑀬𑀲𑁆𑀫𑀸 𑀅𑀜𑁆𑀜𑀁 𑀦 𑀧𑀲𑁆𑀲𑀸𑀫𑀺, 𑀫𑀫 𑀦 𑀓𑀧𑁆𑀧𑀢𑀺, 𑀫𑀫 𑀅𑀓𑀧𑁆𑀧𑀦𑁆𑀢𑀁 𑀲𑀸𑀯𑀓𑀲𑁆𑀲𑀸𑀧𑀺 𑀫𑁂 𑀦 𑀓𑀧𑁆𑀧𑀢𑀺, 𑀢𑀲𑁆𑀫𑀸 𑀢𑁆𑀯𑀁 𑀩𑁆𑀭𑀸𑀳𑁆𑀫𑀡𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀧𑁆𑀧𑀳𑀭𑀺𑀢𑁂𑀢𑀺 𑀧𑀭𑀺𑀢𑁆𑀢𑀳𑀭𑀺𑀢𑀢𑀺𑀡𑁂, 𑀅𑀧𑁆𑀧𑀭𑀼𑀴𑁆𑀳𑀭𑀺𑀢𑀢𑀺𑀡𑁂 𑀯𑀸 𑀧𑀸𑀲𑀸𑀡𑀧𑀺𑀝𑁆𑀞𑀺𑀲𑀤𑀺𑀲𑁂. 𑀅𑀧𑁆𑀧𑀸𑀡𑀓𑁂𑀢𑀺 𑀦𑀺𑀧𑁆𑀧𑀸𑀡𑀓𑁂, 𑀧𑀸𑀬𑀸𑀲𑀚𑁆𑀛𑁄𑀢𑁆𑀣𑀭𑀡𑀓𑀸𑀭𑀡𑁂𑀦 𑀫𑀭𑀺𑀢𑀩𑁆𑀩𑀧𑀸𑀡𑀭𑀳𑀺𑀢𑁂 𑀯𑀸 𑀫𑀳𑀸𑀉𑀤𑀓𑀓𑁆𑀔𑀦𑁆𑀥𑁂. 𑀲𑀳 𑀢𑀺𑀡𑀦𑀺𑀲𑁆𑀲𑀺𑀢𑁂𑀳𑀺 𑀧𑀸𑀡𑁂𑀳𑀺 𑀢𑀺𑀡𑀸𑀦𑀁 𑀧𑀸𑀡𑀓𑀸𑀦𑀜𑁆𑀘 𑀅𑀦𑀼𑀭𑀓𑁆𑀔𑀡𑀢𑁆𑀣𑀸𑀬 𑀏𑀢𑀁 𑀯𑀼𑀢𑁆𑀢𑀁. 𑀘𑀺𑀘𑁆𑀘𑀺𑀝𑀸𑀬𑀢𑀺 𑀘𑀺𑀝𑀺𑀘𑀺𑀝𑀸𑀬𑀢𑀻𑀢𑀺 𑀏𑀯𑀁 𑀲𑀤𑁆𑀤𑀁 𑀓𑀭𑁄𑀢𑀺. 𑀲𑀁𑀥𑀽𑀧𑀸𑀬𑀢𑀻𑀢𑀺 𑀲𑀫𑀦𑁆𑀢𑀸 𑀥𑀽𑀧𑀸𑀬𑀢𑀺. 𑀲𑀫𑁆𑀧𑀥𑀽𑀧𑀸𑀬𑀢𑀻𑀢𑀺 𑀢𑀣𑁂𑀯 𑀅𑀥𑀺𑀫𑀢𑁆𑀢𑀁 𑀥𑀽𑀧𑀸𑀬𑀢𑀺. 𑀓𑀲𑁆𑀫𑀸 𑀏𑀯𑀁 𑀅𑀳𑁄𑀲𑀻𑀢𑀺? 𑀪𑀕𑀯𑀢𑁄 𑀆𑀦𑀼𑀪𑀸𑀯𑁂𑀦, 𑀦 𑀉𑀤𑀓𑀲𑁆𑀲, 𑀦 𑀧𑀸𑀬𑀸𑀲𑀲𑁆𑀲, 𑀦 𑀩𑁆𑀭𑀸𑀳𑁆𑀫𑀡𑀲𑁆𑀲, 𑀦 𑀅𑀜𑁆𑀜𑁂𑀲𑀁 𑀤𑁂𑀯𑀬𑀓𑁆𑀔𑀸𑀤𑀻𑀦𑀁. 𑀪𑀕𑀯𑀸 𑀳𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀥𑀫𑁆𑀫𑀲𑀁𑀯𑁂𑀕𑀢𑁆𑀣𑀁 𑀢𑀣𑀸 𑀅𑀥𑀺𑀝𑁆𑀞𑀸𑀲𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫𑀸𑀢𑀺 𑀑𑀧𑀫𑁆𑀫𑀦𑀺𑀤𑀲𑁆𑀲𑀦𑀫𑀢𑁆𑀢𑀫𑁂𑀢𑀁, 𑀬𑀣𑀸 𑀨𑀸𑀮𑁄𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀁𑀯𑀺𑀕𑁆𑀕𑁄 𑀘𑀺𑀢𑁆𑀢𑁂𑀦, 𑀮𑁄𑀫𑀳𑀝𑁆𑀞𑀚𑀸𑀢𑁄 𑀲𑀭𑀻𑀭𑁂𑀦. 𑀲𑀭𑀻𑀭𑁂 𑀓𑀺𑀭𑀲𑁆𑀲 𑀦𑀯𑀦𑀯𑀼𑀢𑀺𑀮𑁄𑀫𑀓𑀽𑀧𑀲𑀳𑀲𑁆𑀲𑀸𑀦𑀺 𑀲𑀼𑀯𑀡𑁆𑀡𑀪𑀺𑀢𑁆𑀢𑀺𑀬𑀸 𑀆𑀳𑀢𑀫𑀡𑀺𑀦𑀸𑀕𑀤𑀦𑁆𑀢𑀸 𑀯𑀺𑀬 𑀉𑀤𑁆𑀥𑀕𑁆𑀕𑀸 𑀅𑀳𑁂𑀲𑀼𑀁. 𑀲𑁂𑀲𑀁 𑀧𑀸𑀓𑀝𑀫𑁂𑀯.

𑀧𑀸𑀤𑁂𑀲𑀼 𑀧𑀦 𑀦𑀺𑀧𑀢𑀺𑀢𑁆𑀯𑀸 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀁 𑀅𑀩𑁆𑀪𑀦𑀼𑀫𑁄𑀤𑀫𑀸𑀦𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫, 𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫𑀸’’𑀢𑀺. 𑀅𑀩𑁆𑀪𑀦𑀼𑀫𑁄𑀤𑀦𑁂 𑀳𑀺 𑀅𑀬𑀫𑀺𑀥 𑀅𑀪𑀺𑀓𑁆𑀓𑀦𑁆𑀢 𑀲𑀤𑁆𑀤𑁄. 𑀯𑀺𑀢𑁆𑀣𑀸𑀭𑀢𑁄 𑀧𑀦𑀲𑁆𑀲 𑀫𑀗𑁆𑀕𑀮𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 𑀅𑀢𑁆𑀣𑀯𑀡𑁆𑀡𑀦𑀸 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀬𑀲𑁆𑀫𑀸 𑀘 𑀅𑀩𑁆𑀪𑀦𑀼𑀫𑁄𑀤𑀦𑀢𑁆𑀣𑁂, 𑀢𑀲𑁆𑀫𑀸 𑀲𑀸𑀥𑀼 𑀲𑀸𑀥𑀼 𑀪𑁄 𑀕𑁄𑀢𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

‘‘𑀪𑀬𑁂 𑀓𑁄𑀥𑁂 𑀧𑀲𑀁𑀲𑀸𑀬𑀁, 𑀢𑀼𑀭𑀺𑀢𑁂 𑀓𑁄𑀢𑀽𑀳𑀮𑀘𑁆𑀙𑀭𑁂;

𑀳𑀸𑀲𑁂 𑀲𑁄𑀓𑁂 𑀧𑀲𑀸𑀤𑁂 𑀘, 𑀓𑀭𑁂 𑀆𑀫𑁂𑀟𑀺𑀢𑀁 𑀩𑀼𑀥𑁄’’𑀢𑀺. 𑁋

𑀇𑀫𑀺𑀦𑀸 𑀘 𑀮𑀓𑁆𑀔𑀡𑁂𑀦 𑀇𑀥 𑀧𑀲𑀸𑀤𑀯𑀲𑁂𑀦 𑀧𑀲𑀁𑀲𑀸𑀯𑀲𑁂𑀦 𑀘𑀸𑀬𑀁 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀣 𑀯𑀸 𑀅𑀪𑀺𑀓𑁆𑀓𑀦𑁆𑀢𑀦𑁆𑀢𑀺 𑀅𑀪𑀺𑀓𑀦𑁆𑀢𑀁 𑀅𑀢𑀺𑀇𑀝𑁆𑀞𑀁, 𑀅𑀢𑀺𑀫𑀦𑀸𑀧𑀁, 𑀅𑀢𑀺𑀲𑀼𑀦𑁆𑀤𑀭𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀢𑀢𑁆𑀣 𑀏𑀓𑁂𑀦 𑀅𑀪𑀺𑀓𑁆𑀓𑀦𑁆𑀢𑀲𑀤𑁆𑀤𑁂𑀦 𑀤𑁂𑀲𑀦𑀁 𑀣𑁄𑀫𑁂𑀢𑀺, 𑀏𑀓𑁂𑀦 𑀅𑀢𑁆𑀢𑀦𑁄 𑀧𑀲𑀸𑀤𑀁. 𑀅𑀬𑀜𑁆𑀳𑀺 𑀏𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫, 𑀬𑀤𑀺𑀤𑀁 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀥𑀫𑁆𑀫𑀤𑁂𑀲𑀦𑀸, 𑀅𑀪𑀺𑀓𑁆𑀓𑀦𑁆𑀢𑀁 𑀬𑀤𑀺𑀤𑀁 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀆𑀕𑀫𑁆𑀫 𑀫𑀫 𑀧𑀲𑀸𑀤𑁄𑀢𑀺. 𑀪𑀕𑀯𑀢𑁄 𑀏𑀯 𑀯𑀸 𑀯𑀘𑀦𑀁 𑀤𑁆𑀯𑁂 𑀤𑁆𑀯𑁂 𑀅𑀢𑁆𑀣𑁂 𑀲𑀦𑁆𑀥𑀸𑀬 𑀣𑁄𑀫𑁂𑀢𑀺 𑁋 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀯𑀘𑀦𑀁 𑀅𑀪𑀺𑀓𑁆𑀓𑀦𑁆𑀢𑀁 𑀤𑁄𑀲𑀦𑀸𑀲𑀦𑀢𑁄, 𑀅𑀪𑀺𑀓𑁆𑀓𑀦𑁆𑀢𑀁 𑀕𑀼𑀡𑀸𑀥𑀺𑀕𑀫𑀦𑀢𑁄, 𑀢𑀣𑀸 𑀲𑀤𑁆𑀥𑀸𑀚𑀦𑀦𑀢𑁄, 𑀧𑀜𑁆𑀜𑀸𑀚𑀦𑀦𑀢𑁄, 𑀲𑀸𑀢𑁆𑀣𑀢𑁄, 𑀲𑀩𑁆𑀬𑀜𑁆𑀚𑀦𑀢𑁄, 𑀉𑀢𑁆𑀢𑀸𑀦𑀧𑀤𑀢𑁄, 𑀕𑀫𑁆𑀪𑀻𑀭𑀢𑁆𑀣𑀢𑁄, 𑀓𑀡𑁆𑀡𑀲𑀼𑀔𑀢𑁄, 𑀳𑀤𑀬𑀗𑁆𑀕𑀫𑀢𑁄, 𑀅𑀦𑀢𑁆𑀢𑀼𑀓𑁆𑀓𑀁𑀲𑀦𑀢𑁄, 𑀅𑀧𑀭𑀯𑀫𑁆𑀪𑀦𑀢𑁄, 𑀓𑀭𑀼𑀡𑀸𑀲𑀻𑀢𑀮𑀢𑁄, 𑀧𑀜𑁆𑀜𑀸𑀯𑀤𑀸𑀢𑀢𑁄, 𑀆𑀧𑀸𑀣𑀭𑀫𑀡𑀻𑀬𑀢𑁄, 𑀯𑀺𑀫𑀤𑁆𑀤𑀓𑁆𑀔𑀫𑀢𑁄, 𑀲𑀼𑀬𑁆𑀬𑀫𑀸𑀦𑀲𑀼𑀔𑀢𑁄, 𑀯𑀻𑀫𑀁𑀲𑀺𑀬𑀫𑀸𑀦𑀳𑀺𑀢𑀢𑁄𑀢𑀺 𑀏𑀯𑀫𑀸𑀤𑀻𑀳𑀺 𑀬𑁄𑀚𑁂𑀢𑀩𑁆𑀩𑀁.

𑀢𑀢𑁄 𑀧𑀭𑀫𑁆𑀧𑀺 𑀘𑀢𑀽𑀳𑀺 𑀉𑀧𑀫𑀸𑀳𑀺 𑀤𑁂𑀲𑀦𑀁𑀬𑁂𑀯 𑀣𑁄𑀫𑁂𑀢𑀺. 𑀢𑀢𑁆𑀣 𑀦𑀺𑀓𑁆𑀓𑀼𑀚𑁆𑀚𑀺𑀢𑀦𑁆𑀢𑀺 𑀅𑀥𑁄𑀫𑀼𑀔𑀝𑁆𑀞𑀧𑀺𑀢𑀁, 𑀳𑁂𑀝𑁆𑀞𑀸 𑀫𑀼𑀔𑀚𑀸𑀢𑀁 𑀯𑀸. 𑀉𑀓𑁆𑀓𑀼𑀚𑁆𑀚𑁂𑀬𑁆𑀬𑀸𑀢𑀺 𑀉𑀧𑀭𑀺𑀫𑀼𑀔𑀁 𑀓𑀭𑁂𑀬𑁆𑀬. 𑀧𑀝𑀺𑀘𑁆𑀙𑀦𑁆𑀦𑀦𑁆𑀢𑀺 𑀢𑀺𑀡𑀧𑀡𑁆𑀡𑀸𑀤𑀺𑀘𑁆𑀙𑀸𑀤𑀺𑀢𑀁. 𑀯𑀺𑀯𑀭𑁂𑀬𑁆𑀬𑀸𑀢𑀺 𑀉𑀕𑁆𑀖𑀸𑀝𑁂𑀬𑁆𑀬. 𑀫𑀽𑀴𑁆𑀳𑀲𑁆𑀲𑀸𑀢𑀺 𑀤𑀺𑀲𑀸𑀫𑀽𑀴𑁆𑀳𑀲𑁆𑀲. 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬𑀸𑀢𑀺 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 ‘‘𑀏𑀲 𑀫𑀕𑁆𑀕𑁄’’𑀢𑀺 𑀯𑀤𑁂𑀬𑁆𑀬. 𑀅𑀦𑁆𑀥𑀓𑀸𑀭𑁂𑀢𑀺 𑀓𑀸𑀴𑀧𑀓𑁆𑀔𑀘𑀸𑀢𑀼𑀤𑁆𑀤𑀲𑀻𑀅𑀟𑁆𑀠𑀭𑀢𑁆𑀢𑀖𑀦𑀯𑀦𑀲𑀡𑁆𑀟𑀫𑁂𑀖𑀧𑀝𑀮𑁂𑀳𑀺 𑀘𑀢𑀼𑀭𑀗𑁆𑀕𑁂 𑀢𑀫𑀲𑀺. 𑀅𑀬𑀁 𑀢𑀸𑀯 𑀧𑀤𑀢𑁆𑀣𑁄.

𑀅𑀬𑀁 𑀧𑀦 𑀅𑀥𑀺𑀧𑁆𑀧𑀸𑀬𑀬𑁄𑀚𑀦𑀸 𑁋 𑀬𑀣𑀸 𑀓𑁄𑀘𑀺 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀉𑀓𑁆𑀓𑀼𑀚𑁆𑀚𑁂𑀬𑁆𑀬, 𑀏𑀯𑀁 𑀲𑀤𑁆𑀥𑀫𑁆𑀫𑀯𑀺𑀫𑀼𑀔𑀁 𑀅𑀲𑀤𑁆𑀥𑀫𑁆𑀫𑀧𑀢𑀺𑀢𑀁 𑀫𑀁 𑀅𑀲𑀤𑁆𑀥𑀫𑁆𑀫𑀸 𑀯𑀼𑀝𑁆𑀞𑀸𑀧𑁂𑀦𑁆𑀢𑁂𑀦, 𑀬𑀣𑀸 𑀧𑀝𑀺𑀘𑁆𑀙𑀦𑁆𑀦𑀁 𑀯𑀺𑀯𑀭𑁂𑀬𑁆𑀬; 𑀏𑀯𑀁 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑀦𑁆𑀢𑀭𑀥𑀸𑀦𑀸 𑀧𑀪𑀼𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀕𑀳𑀦𑀧𑀝𑀺𑀘𑁆𑀙𑀦𑁆𑀦𑀁 𑀲𑀸𑀲𑀦𑀁 𑀯𑀺𑀯𑀭𑀦𑁆𑀢𑁂𑀦, 𑀬𑀣𑀸 𑀫𑀽𑀴𑁆𑀳𑀲𑁆𑀲 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬, 𑀏𑀯𑀁 𑀓𑀼𑀫𑁆𑀫𑀕𑁆𑀕𑀫𑀺𑀘𑁆𑀙𑀸𑀫𑀕𑁆𑀕𑀧𑀝𑀺𑀧𑀦𑁆𑀦𑀲𑁆𑀲 𑀫𑁂 𑀲𑀕𑁆𑀕𑀫𑁄𑀓𑁆𑀔𑀫𑀕𑁆𑀕𑀁 𑀆𑀘𑀺𑀓𑁆𑀔𑀦𑁆𑀢𑁂𑀦, 𑀬𑀣𑀸 𑀅𑀦𑁆𑀥𑀓𑀸𑀭𑁂 𑀢𑁂𑀮𑀧𑀚𑁆𑀚𑁄𑀢𑀁 𑀥𑀸𑀭𑁂𑀬𑁆𑀬, 𑀏𑀯𑀁 𑀫𑁄𑀳𑀦𑁆𑀥𑀓𑀸𑀭𑀦𑀺𑀫𑀼𑀕𑁆𑀕𑀲𑁆𑀲 𑀫𑁂 𑀩𑀼𑀤𑁆𑀥𑀸𑀤𑀺𑀭𑀢𑀦𑀭𑀽𑀧𑀸𑀦𑀺 𑀅𑀧𑀲𑁆𑀲𑀢𑁄 𑀢𑀧𑁆𑀧𑀝𑀺𑀘𑁆𑀙𑀸𑀤𑀓𑀫𑁄𑀳𑀦𑁆𑀥𑀓𑀸𑀭𑀯𑀺𑀤𑁆𑀥𑀁𑀲𑀓𑀤𑁂𑀲𑀦𑀸𑀧𑀚𑁆𑀚𑁄𑀢𑀥𑀸𑀭𑀡𑁂𑀦 𑀫𑀬𑁆𑀳𑀁 𑀪𑁄𑀢𑀸 𑀕𑁄𑀢𑀫𑁂𑀦 𑀏𑀢𑁂𑀳𑀺 𑀧𑀭𑀺𑀬𑀸𑀬𑁂𑀳𑀺 𑀤𑁂𑀲𑀺𑀢𑀢𑁆𑀢𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄.

𑀅𑀣 𑀯𑀸 𑀏𑀓𑀘𑁆𑀘𑀺𑀬𑁂𑀦 𑀫𑀢𑁆𑀢𑁂𑀦 𑀬𑀲𑁆𑀫𑀸 𑀅𑀬𑀁 𑀥𑀫𑁆𑀫𑁄 𑀤𑀼𑀓𑁆𑀔𑀤𑀲𑁆𑀲𑀦𑁂𑀦 𑀅𑀲𑀼𑀪𑁂 ‘‘𑀲𑀼𑀪’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑀧𑁆𑀧𑀳𑀸𑀦𑁂𑀦 𑀘 𑀦𑀺𑀓𑁆𑀓𑀼𑀚𑁆𑀚𑀺𑀢𑀼𑀓𑁆𑀓𑀼𑀚𑁆𑀚𑀺𑀢𑀲𑀤𑀺𑀲𑁄, 𑀲𑀫𑀼𑀤𑀬𑀤𑀲𑁆𑀲𑀦𑁂𑀦 𑀤𑀼𑀓𑁆𑀔𑁂 ‘‘𑀲𑀼𑀔’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑀧𑁆𑀧𑀳𑀸𑀦𑁂𑀦 𑀘 𑀧𑀝𑀺𑀘𑁆𑀙𑀦𑁆𑀦𑀯𑀺𑀯𑀭𑀡𑀲𑀤𑀺𑀲𑁄, 𑀦𑀺𑀭𑁄𑀥𑀤𑀲𑁆𑀲𑀦𑁂𑀦 𑀅𑀦𑀺𑀘𑁆𑀘𑁂 ‘‘𑀦𑀺𑀘𑁆𑀘’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑀧𑁆𑀧𑀳𑀸𑀦𑁂𑀦 𑀘 𑀫𑀽𑀴𑁆𑀳𑀲𑁆𑀲 𑀫𑀕𑁆𑀕𑀸𑀘𑀺𑀓𑁆𑀔𑀡𑀲𑀤𑀺𑀲𑁄, 𑀫𑀕𑁆𑀕𑀤𑀲𑁆𑀲𑀦𑁂𑀦 𑀅𑀦𑀢𑁆𑀢𑀦𑀺 ‘‘𑀅𑀢𑁆𑀢𑀸’’𑀢𑀺 𑀯𑀺𑀧𑀮𑁆𑀮𑀸𑀲𑀧𑁆𑀧𑀳𑀸𑀦𑁂𑀦 𑀘 𑀅𑀦𑁆𑀥𑀓𑀸𑀭𑁂 𑀧𑀚𑁆𑀚𑁄𑀢𑀲𑀤𑀺𑀲𑁄, 𑀢𑀲𑁆𑀫𑀸 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀯𑀸 𑀉𑀓𑁆𑀓𑀼𑀚𑁆𑀚𑁂𑀬𑁆𑀬…𑀧𑁂… 𑀧𑀚𑁆𑀚𑁄𑀢𑀁 𑀥𑀸𑀭𑁂𑀬𑁆𑀬 ‘‘𑀘𑀓𑁆𑀔𑀼𑀫𑀦𑁆𑀢𑁄 𑀭𑀽𑀧𑀸𑀦𑀺 𑀤𑀓𑁆𑀔𑀦𑁆𑀢𑀻’’𑀢𑀺, 𑀏𑀯𑀁 𑀧𑀓𑀸𑀲𑀺𑀢𑁄 𑀳𑁄𑀢𑀺.

𑀬𑀲𑁆𑀫𑀸 𑀧𑀦𑁂𑀢𑁆𑀣 𑀲𑀤𑁆𑀥𑀸𑀢𑀧𑀓𑀸𑀬𑀕𑀼𑀢𑁆𑀢𑀢𑀸𑀤𑀻𑀳𑀺 𑀲𑀻𑀮𑀓𑁆𑀔𑀦𑁆𑀥𑁄 𑀧𑀓𑀸𑀲𑀺𑀢𑁄 𑀳𑁄𑀢𑀺, 𑀧𑀜𑁆𑀜𑀸𑀬 𑀧𑀜𑁆𑀜𑀸𑀓𑁆𑀔𑀦𑁆𑀥𑁄, 𑀳𑀺𑀭𑀺𑀫𑀦𑀸𑀤𑀻𑀳𑀺 𑀲𑀫𑀸𑀥𑀺𑀓𑁆𑀔𑀦𑁆𑀥𑁄, 𑀬𑁄𑀕𑀓𑁆𑀔𑁂𑀫𑁂𑀦 𑀦𑀺𑀭𑁄𑀥𑁄𑀢𑀺 𑀏𑀯𑀁 𑀢𑀺𑀓𑁆𑀔𑀦𑁆𑀥𑁄 𑀅𑀭𑀺𑀬𑀫𑀕𑁆𑀕𑁄 𑀦𑀺𑀭𑁄𑀥𑁄 𑀘𑀸𑀢𑀺 𑀲𑀭𑀽𑀧𑁂𑀦𑁂𑀯 𑀤𑁆𑀯𑁂 𑀅𑀭𑀺𑀬𑀲𑀘𑁆𑀘𑀸𑀦𑀺 𑀧𑀓𑀸𑀲𑀺𑀢𑀸𑀦𑀺. 𑀢𑀢𑁆𑀣 𑀫𑀕𑁆𑀕𑁄 𑀧𑀝𑀺𑀧𑀓𑁆𑀔𑁄 𑀲𑀫𑀼𑀤𑀬𑀲𑁆𑀲, 𑀦𑀺𑀭𑁄𑀥𑁄 𑀤𑀼𑀓𑁆𑀔𑀲𑁆𑀲𑀸𑀢𑀺 𑀧𑀝𑀺𑀧𑀓𑁆𑀔𑁂𑀦 𑀤𑁆𑀯𑁂. 𑀇𑀢𑀺 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀧𑀓𑀸𑀲𑀺𑀢𑀸𑀦𑀺. 𑀢𑀲𑁆𑀫𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀧𑀓𑀸𑀲𑀺𑀢𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀏𑀲𑀸𑀳𑀦𑁆𑀢𑀺𑀆𑀤𑀻𑀲𑀼 𑀏𑀲𑁄 𑀅𑀳𑀦𑁆𑀢𑀺 𑀏𑀲𑀸𑀳𑀁. 𑀲𑀭𑀡𑀁 𑀕𑀘𑁆𑀙𑀸𑀫𑀻𑀢𑀺 𑀧𑀸𑀤𑁂𑀲𑀼 𑀦𑀺𑀧𑀢𑀺𑀢𑁆𑀯𑀸 𑀧𑀡𑀺𑀧𑀸𑀢𑁂𑀦 𑀲𑀭𑀡𑀕𑀫𑀦𑁂𑀦 𑀕𑀢𑁄𑀧𑀺 𑀇𑀤𑀸𑀦𑀺 𑀯𑀸𑀘𑀸𑀬 𑀲𑀫𑀸𑀤𑀺𑀬𑀦𑁆𑀢𑁄 𑀆𑀳. 𑀅𑀣 𑀯𑀸 𑀧𑀡𑀺𑀧𑀸𑀢𑁂𑀦 𑀩𑀼𑀤𑁆𑀥𑀁𑀬𑁂𑀯 𑀲𑀭𑀡𑀁 𑀕𑀢𑁄𑀢𑀺 𑀇𑀤𑀸𑀦𑀺 𑀢𑀁 𑀆𑀤𑀺𑀁 𑀓𑀢𑁆𑀯𑀸 𑀲𑁂𑀲𑁂 𑀥𑀫𑁆𑀫𑀲𑀗𑁆𑀖𑁂𑀧𑀺 𑀕𑀦𑁆𑀢𑀼𑀁 𑀆𑀳. 𑀅𑀚𑁆𑀚𑀢𑀕𑁆𑀕𑁂𑀢𑀺 𑀅𑀚𑁆𑀚𑀢𑀁 𑀆𑀤𑀺𑀁 𑀓𑀢𑁆𑀯𑀸, 𑀅𑀚𑁆𑀚𑀤𑀕𑁆𑀕𑁂𑀢𑀺 𑀯𑀸 𑀧𑀸𑀞𑁄, 𑀤-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄, 𑀅𑀚𑁆𑀚 𑀅𑀕𑁆𑀕𑀁 𑀓𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀸𑀡𑁂𑀳𑀺 𑀉𑀧𑁂𑀢𑀁 𑀧𑀸𑀡𑀼𑀧𑁂𑀢𑀁, 𑀬𑀸𑀯 𑀫𑁂 𑀚𑀻𑀯𑀺𑀢𑀁 𑀧𑀯𑀢𑁆𑀢𑀢𑀺, 𑀢𑀸𑀯 𑀉𑀧𑁂𑀢𑀁, 𑀅𑀦𑀜𑁆𑀜𑀲𑀢𑁆𑀣𑀼𑀓𑀁 𑀢𑀻𑀳𑀺 𑀲𑀭𑀡𑀕𑀫𑀦𑁂𑀳𑀺 𑀲𑀭𑀡𑀁 𑀕𑀢𑀁 𑀫𑀁 𑀪𑀯𑀁 𑀕𑁄𑀢𑀫𑁄 𑀥𑀸𑀭𑁂𑀢𑀼 𑀚𑀸𑀦𑀸𑀢𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁆𑀢𑀸𑀯𑀢𑀸 𑀅𑀦𑁂𑀦 𑀲𑀼𑀢𑀸𑀦𑀼𑀭𑀽𑀧𑀸 𑀧𑀝𑀺𑀧𑀢𑁆𑀢𑀺 𑀤𑀲𑁆𑀲𑀺𑀢𑀸 𑀳𑁄𑀢𑀺. 𑀦𑀺𑀓𑁆𑀓𑀼𑀚𑁆𑀚𑀺𑀢𑀸𑀤𑀻𑀳𑀺 𑀯𑀸 𑀲𑀢𑁆𑀣𑀼𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀫𑀺𑀦𑀸 ‘‘𑀏𑀲𑀸𑀳’’𑀦𑁆𑀢𑀺𑀆𑀤𑀺𑀦𑀸 𑀲𑀺𑀲𑁆𑀲𑀲𑀫𑁆𑀧𑀢𑁆𑀢𑀺 𑀤𑀲𑁆𑀲𑀺𑀢𑀸. 𑀢𑁂𑀦 𑀯𑀸 𑀧𑀜𑁆𑀜𑀸𑀧𑀝𑀺𑀮𑀸𑀪𑀁 𑀤𑀲𑁆𑀲𑁂𑀢𑁆𑀯𑀸 𑀇𑀫𑀺𑀦𑀸 𑀲𑀤𑁆𑀥𑀸𑀧𑀝𑀺𑀮𑀸𑀪𑁄 𑀤𑀲𑁆𑀲𑀺𑀢𑁄. 𑀇𑀤𑀸𑀦𑀺 𑀏𑀯𑀁 𑀧𑀝𑀺𑀮𑀤𑁆𑀥𑀲𑀤𑁆𑀥𑁂𑀦 𑀧𑀜𑁆𑀜𑀯𑀢𑀸 𑀬𑀁 𑀓𑀢𑁆𑀢𑀩𑁆𑀩𑀁, 𑀢𑀁 𑀓𑀢𑁆𑀢𑀼𑀓𑀸𑀫𑁄 𑀪𑀕𑀯𑀦𑁆𑀢𑀁 𑀬𑀸𑀘𑀢𑀺 ‘‘𑀮𑀪𑁂𑀬𑁆𑀬𑀸𑀳’’𑀦𑁆𑀢𑀺. 𑀢𑀢𑁆𑀣 𑀪𑀕𑀯𑀢𑁄 𑀇𑀤𑁆𑀥𑀺𑀬𑀸𑀤𑀻𑀳𑀺 𑀅𑀪𑀺𑀧𑁆𑀧𑀲𑀸𑀤𑀺𑀢𑀘𑀺𑀢𑁆𑀢𑁄 ‘‘𑀪𑀕𑀯𑀸𑀧𑀺 𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁄, 𑀓𑀺𑀫𑀗𑁆𑀕𑀁 𑀧𑀦𑀸𑀳’’𑀦𑁆𑀢𑀺 𑀲𑀤𑁆𑀥𑀸𑀬 𑀧𑀩𑁆𑀩𑀚𑁆𑀚𑀁 𑀬𑀸𑀘𑀢𑀺, 𑀢𑀢𑁆𑀣 𑀧𑀭𑀺𑀧𑀽𑀭𑀓𑀸𑀭𑀺𑀢𑀁 𑀧𑀢𑁆𑀣𑁂𑀦𑁆𑀢𑁄 𑀧𑀜𑁆𑀜𑀸𑀬 𑀉𑀧𑀲𑀫𑁆𑀧𑀤𑀁. 𑀲𑁂𑀲𑀁 𑀧𑀸𑀓𑀝𑀫𑁂𑀯.

𑀏𑀓𑁄 𑀯𑀽𑀧𑀓𑀝𑁆𑀞𑁄𑀢𑀺𑀆𑀤𑀻𑀲𑀼 𑀧𑀦 𑀏𑀓𑁄 𑀓𑀸𑀬𑀯𑀺𑀯𑁂𑀓𑁂𑀦, 𑀯𑀽𑀧𑀓𑀝𑁆𑀞𑁄 𑀘𑀺𑀢𑁆𑀢𑀯𑀺𑀯𑁂𑀓𑁂𑀦, 𑀅𑀧𑁆𑀧𑀫𑀢𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑁂 𑀲𑀢𑀺𑀅𑀯𑀺𑀚𑀳𑀦𑁂𑀦, 𑀆𑀢𑀸𑀧𑀻 𑀓𑀸𑀬𑀺𑀓𑀘𑁂𑀢𑀲𑀺𑀓𑀯𑀻𑀭𑀺𑀬𑀲𑀗𑁆𑀔𑀸𑀢𑁂𑀦 𑀆𑀢𑀸𑀧𑁂𑀦, 𑀧𑀳𑀺𑀢𑀢𑁆𑀢𑁄 𑀓𑀸𑀬𑁂 𑀘 𑀚𑀻𑀯𑀺𑀢𑁂 𑀘 𑀅𑀦𑀧𑁂𑀓𑁆𑀔𑀢𑀸𑀬 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁂𑀦. 𑀦 𑀘𑀺𑀭𑀲𑁆𑀲𑁂𑀯𑀸𑀢𑀺 𑀧𑀩𑁆𑀩𑀚𑁆𑀚𑀁 𑀉𑀧𑀸𑀤𑀸𑀬 𑀯𑀼𑀘𑁆𑀘𑀢𑀺. 𑀓𑀼𑀮𑀧𑀼𑀢𑁆𑀢𑀸𑀢𑀺 𑀤𑀼𑀯𑀺𑀥𑀸 𑀓𑀼𑀮𑀧𑀼𑀢𑁆𑀢𑀸, 𑀚𑀸𑀢𑀺𑀓𑀼𑀮𑀧𑀼𑀢𑁆𑀢𑀸, 𑀆𑀘𑀸𑀭𑀓𑀼𑀮𑀧𑀼𑀢𑁆𑀢𑀸 𑀘. 𑀅𑀬𑀁 𑀧𑀦 𑀉𑀪𑀬𑀣𑀸𑀧𑀺 𑀓𑀼𑀮𑀧𑀼𑀢𑁆𑀢𑁄. 𑀅𑀕𑀸𑀭𑀲𑁆𑀫𑀸𑀢𑀺 𑀖𑀭𑀸. 𑀅𑀕𑀸𑀭𑀸𑀦𑀁 𑀳𑀺𑀢𑀁 𑀅𑀕𑀸𑀭𑀺𑀬𑀁 𑀓𑀲𑀺𑀕𑁄𑀭𑀓𑁆𑀔𑀸𑀤𑀺𑀓𑀼𑀝𑀼𑀫𑁆𑀩𑀧𑁄𑀲𑀦𑀓𑀫𑁆𑀫𑀁 𑀯𑀼𑀘𑁆𑀘𑀢𑀺. 𑀦𑀢𑁆𑀣𑀺 𑀏𑀢𑁆𑀣 𑀅𑀕𑀸𑀭𑀺𑀬𑀦𑁆𑀢𑀺 𑀅𑀦𑀕𑀸𑀭𑀺𑀬𑀁, 𑀧𑀩𑁆𑀩𑀚𑁆𑀚𑀸𑀬𑁂𑀢𑀁 𑀅𑀥𑀺𑀯𑀘𑀦𑀁 𑀧𑀩𑁆𑀩𑀚𑀦𑁆𑀢𑀻𑀢𑀺 𑀉𑀧𑀕𑀘𑁆𑀙𑀦𑁆𑀢𑀺 𑀉𑀧𑀲𑀗𑁆𑀓𑀫𑀦𑁆𑀢𑀺. 𑀢𑀤𑀦𑀼𑀢𑁆𑀢𑀭𑀦𑁆𑀢𑀺 𑀢𑀁 𑀅𑀦𑀼𑀢𑁆𑀢𑀭𑀁. 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀧𑀭𑀺𑀬𑁄𑀲𑀸𑀦𑀁, 𑀅𑀭𑀳𑀢𑁆𑀢𑀨𑀮𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀲𑁆𑀲 𑀳𑀺 𑀅𑀢𑁆𑀣𑀸𑀬 𑀓𑀼𑀮𑀧𑀼𑀢𑁆𑀢𑀸 𑀧𑀩𑁆𑀩𑀚𑀦𑁆𑀢𑀺. 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂𑀢𑀺 𑀢𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂. 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸𑀢𑀺 𑀅𑀢𑁆𑀢𑀦𑀸𑀬𑁂𑀯 𑀧𑀜𑁆𑀜𑀸𑀬 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸, 𑀅𑀧𑀭𑀧𑁆𑀧𑀘𑁆𑀘𑀬𑀁 𑀜𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀻𑀢𑀺 𑀧𑀸𑀧𑀼𑀡𑀺𑀢𑁆𑀯𑀸 𑀲𑀫𑁆𑀧𑀸𑀤𑁂𑀢𑁆𑀯𑀸 𑀯𑀸 𑀯𑀺𑀳𑀸𑀲𑀺. 𑀏𑀯𑀁 𑀯𑀺𑀳𑀭𑀦𑁆𑀢𑁄 𑀘 𑀔𑀻𑀡𑀸 𑀚𑀸𑀢𑀺…𑀧𑁂… 𑀅𑀩𑁆𑀪𑀜𑁆𑀜𑀸𑀲𑀺. 𑀏𑀢𑁂𑀦𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀪𑀽𑀫𑀺𑀁 𑀤𑀲𑁆𑀲𑁂𑀢𑀺.

𑀓𑀢𑀫𑀸 𑀧𑀦𑀲𑁆𑀲 𑀚𑀸𑀢𑀺 𑀔𑀻𑀡𑀸, 𑀓𑀣𑀜𑁆𑀘 𑀦𑀁 𑀅𑀩𑁆𑀪𑀜𑁆𑀜𑀸𑀲𑀻𑀢𑀺? 𑀯𑀼𑀘𑁆𑀘𑀢𑁂 𑁋 𑀦 𑀢𑀸𑀯𑀲𑁆𑀲 𑀅𑀢𑀻𑀢𑀸 𑀚𑀸𑀢𑀺 𑀔𑀻𑀡𑀸 𑀧𑀼𑀩𑁆𑀩𑁂𑀯 𑀔𑀻𑀡𑀢𑁆𑀢𑀸, 𑀦 𑀅𑀦𑀸𑀕𑀢𑀸 𑀅𑀦𑀸𑀕𑀢𑁂 𑀯𑀸𑀬𑀸𑀫𑀸𑀪𑀸𑀯𑀢𑁄, 𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀯𑀺𑀚𑁆𑀚𑀫𑀸𑀦𑀢𑁆𑀢𑀸. 𑀬𑀸 𑀧𑀦 𑀫𑀕𑁆𑀕𑀲𑁆𑀲 𑀅𑀪𑀸𑀯𑀺𑀢𑀢𑁆𑀢𑀸 𑀉𑀧𑁆𑀧𑀚𑁆𑀚𑁂𑀬𑁆𑀬 𑀏𑀓𑀘𑀢𑀼𑀧𑀜𑁆𑀘𑀯𑁄𑀓𑀸𑀭𑀪𑀯𑁂𑀲𑀼 𑀏𑀓𑀘𑀢𑀼𑀧𑀜𑁆𑀘𑀓𑁆𑀔𑀦𑁆𑀥𑀧𑁆𑀧𑀪𑁂𑀤𑀸 𑀚𑀸𑀢𑀺, 𑀲𑀸 𑀫𑀕𑁆𑀕𑀲𑁆𑀲 𑀪𑀸𑀯𑀺𑀢𑀢𑁆𑀢𑀸 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀢𑀁 𑀆𑀧𑀚𑁆𑀚𑀦𑁂𑀦 𑀔𑀻𑀡𑀸. 𑀢𑀁 𑀲𑁄 𑀫𑀕𑁆𑀕𑀪𑀸𑀯𑀦𑀸𑀬 𑀧𑀳𑀻𑀦𑀓𑀺𑀮𑁂𑀲𑁂 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀓𑀺𑀮𑁂𑀲𑀸𑀪𑀸𑀯𑁂 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀓𑀫𑁆𑀫𑀁 𑀆𑀬𑀢𑀺𑀁 𑀅𑀧𑀝𑀺𑀲𑀦𑁆𑀥𑀺𑀓𑀁 𑀳𑁄𑀢𑀻𑀢𑀺 𑀚𑀸𑀦𑀦𑁆𑀢𑁄 𑀚𑀸𑀦𑀸𑀢𑀺.

𑀯𑀼𑀲𑀺𑀢𑀦𑁆𑀢𑀺 𑀯𑀼𑀢𑁆𑀣𑀁 𑀧𑀭𑀺𑀯𑀼𑀢𑁆𑀣𑀁, 𑀓𑀢𑀁 𑀘𑀭𑀺𑀢𑀁 𑀦𑀺𑀝𑁆𑀞𑀸𑀧𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀁. 𑀓𑀢𑀁 𑀓𑀭𑀡𑀻𑀬𑀦𑁆𑀢𑀺 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀧𑀭𑀺𑀜𑁆𑀜𑀸𑀧𑀳𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀪𑀸𑀯𑀦𑀸𑀯𑀲𑁂𑀦 𑀲𑁄𑀴𑀲𑀯𑀺𑀥𑀫𑁆𑀧𑀺 𑀓𑀺𑀘𑁆𑀘𑀁 𑀦𑀺𑀝𑁆𑀞𑀸𑀧𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀇𑀤𑀸𑀦𑀺 𑀧𑀼𑀦 𑀇𑀢𑁆𑀣𑀪𑀸𑀯𑀸𑀬 𑀏𑀯𑀁 𑀲𑁄𑀴𑀲𑀓𑀺𑀘𑁆𑀘𑀪𑀸𑀯𑀸𑀬 𑀓𑀺𑀮𑁂𑀲𑀓𑁆𑀔𑀬𑀸𑀬 𑀯𑀸 𑀫𑀕𑁆𑀕𑀪𑀸𑀯𑀦𑀸 𑀦𑀢𑁆𑀣𑀻𑀢𑀺. 𑀅𑀣 𑀯𑀸 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀇𑀢𑁆𑀣𑀪𑀸𑀯𑀢𑁄, 𑀇𑀫𑀲𑁆𑀫𑀸 𑀏𑀯𑀁𑀧𑀓𑀸𑀭𑀸 𑀇𑀤𑀸𑀦𑀺 𑀯𑀢𑁆𑀢𑀫𑀸𑀦𑀓𑁆𑀔𑀦𑁆𑀥𑀲𑀦𑁆𑀢𑀸𑀦𑀸 𑀅𑀧𑀭𑀁 𑀔𑀦𑁆𑀥𑀲𑀦𑁆𑀢𑀸𑀦𑀁 𑀦𑀢𑁆𑀣𑀺. 𑀇𑀫𑁂 𑀧𑀦 𑀧𑀜𑁆𑀘𑀓𑁆𑀔𑀦𑁆𑀥𑀸 𑀧𑀭𑀺𑀜𑁆𑀜𑀸𑀢𑀸 𑀢𑀺𑀝𑁆𑀞𑀦𑁆𑀢𑀺 𑀙𑀺𑀦𑁆𑀦𑀫𑀽𑀮𑀓𑁄 𑀭𑀼𑀓𑁆𑀔𑁄 𑀯𑀺𑀬𑀸𑀢𑀺 𑀅𑀩𑁆𑀪𑀜𑁆𑀜𑀸𑀲𑀺. 𑀅𑀜𑁆𑀜𑀢𑀭𑁄𑀢𑀺 𑀏𑀓𑁄. 𑀅𑀭𑀳𑀢𑀦𑁆𑀢𑀺 𑀅𑀭𑀳𑀦𑁆𑀢𑀸𑀦𑀁. 𑀫𑀳𑀸𑀲𑀸𑀯𑀓𑀸𑀦𑀁 𑀅𑀩𑁆𑀪𑀦𑁆𑀢𑀭𑁄 𑀆𑀬𑀲𑁆𑀫𑀸 𑀪𑀸𑀭𑀤𑁆𑀯𑀸𑀚𑁄 𑀅𑀳𑁄𑀲𑀻𑀢𑀺 𑀅𑀬𑀁 𑀓𑀺𑀭𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀓𑀲𑀺𑀪𑀸𑀭𑀤𑁆𑀯𑀸𑀚𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.