𑁨. 𑀥𑀦𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮. 𑀧𑀓𑁆𑀓𑁄𑀤𑀦𑁄𑀢𑀺 𑀥𑀦𑀺𑀬𑀲𑀼𑀢𑁆𑀢𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺. 𑀢𑁂𑀦 𑀲𑀫𑀬𑁂𑀦 𑀥𑀦𑀺𑀬𑁄 𑀕𑁄𑀧𑁄 𑀫𑀳𑀻𑀢𑀻𑀭𑁂 𑀧𑀝𑀺𑀯𑀲𑀢𑀺. 𑀢𑀲𑁆𑀲𑀸𑀬𑀁 𑀧𑀼𑀩𑁆𑀩𑀬𑁄𑀕𑁄 𑁋 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀧𑀸𑀯𑀘𑀦𑁂 𑀤𑀺𑀩𑁆𑀩𑀫𑀸𑀦𑁂 𑀯𑀻𑀲𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀤𑀺𑀯𑀲𑁂 𑀤𑀺𑀯𑀲𑁂 𑀲𑀗𑁆𑀖𑀲𑁆𑀲 𑀯𑀻𑀲𑀢𑀺 𑀲𑀮𑀸𑀓𑀪𑀢𑁆𑀢𑀸𑀦𑀺 𑀅𑀤𑀸𑀲𑀺. 𑀲𑁄 𑀢𑀢𑁄 𑀘𑀼𑀢𑁄 𑀤𑁂𑀯𑁂𑀲𑀼 𑀉𑀧𑁆𑀧𑀦𑁆𑀦𑁄. 𑀏𑀯𑀁 𑀤𑁂𑀯𑀮𑁄𑀓𑁂 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀔𑁂𑀧𑁂𑀢𑁆𑀯𑀸 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀓𑀸𑀮𑁂 𑀯𑀺𑀤𑁂𑀳𑀭𑀝𑁆𑀞𑀫𑀚𑁆𑀛𑁂 𑀧𑀩𑁆𑀩𑀢𑀭𑀝𑁆𑀞𑀁 𑀦𑀸𑀫 𑀅𑀢𑁆𑀣𑀺 𑀢𑀢𑁆𑀣 𑀥𑀫𑁆𑀫𑀓𑁄𑀭𑀡𑁆𑀟𑀁 𑀦𑀸𑀫 𑀦𑀕𑀭𑀁, 𑀢𑀲𑁆𑀫𑀺𑀁 𑀦𑀕𑀭𑁂 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀅𑀪𑀺𑀦𑀺𑀩𑁆𑀩𑀢𑁆𑀢𑁄, 𑀕𑁄𑀬𑀽𑀣𑀁 𑀦𑀺𑀲𑁆𑀲𑀸𑀬 𑀚𑀻𑀯𑀢𑀺. 𑀢𑀲𑁆𑀲 𑀳𑀺 𑀢𑀺𑀁𑀲𑀫𑀢𑁆𑀢𑀸𑀦𑀺 𑀕𑁄𑀲𑀳𑀲𑁆𑀲𑀸𑀦𑀺 𑀳𑁄𑀦𑁆𑀢𑀺, 𑀲𑀢𑁆𑀢𑀯𑀻𑀲𑀲𑀳𑀲𑁆𑀲𑀸 𑀕𑀸𑀯𑁄 𑀔𑀻𑀭𑀁 𑀤𑀼𑀬𑁆𑀳𑀦𑁆𑀢𑀺. 𑀕𑁄𑀧𑀸 𑀦𑀸𑀫 𑀦𑀺𑀩𑀤𑁆𑀥𑀯𑀸𑀲𑀺𑀦𑁄 𑀦 𑀳𑁄𑀦𑁆𑀢𑀺. 𑀯𑀲𑁆𑀲𑀺𑀓𑁂 𑀘𑀢𑁆𑀢𑀸𑀭𑁄𑀫𑀸𑀲𑁂 𑀣𑀮𑁂 𑀯𑀲𑀦𑁆𑀢𑀺, 𑀅𑀯𑀲𑁂𑀲𑁂 𑀅𑀝𑁆𑀞𑀫𑀸𑀲𑁂 𑀬𑀢𑁆𑀣 𑀢𑀺𑀡𑁄𑀤𑀓𑀁 𑀲𑀼𑀔𑀁 𑀮𑀩𑁆𑀪𑀢𑀺, 𑀢𑀢𑁆𑀣 𑀯𑀲𑀦𑁆𑀢𑀺. 𑀢𑀜𑁆𑀘 𑀦𑀤𑀻𑀢𑀻𑀭𑀁 𑀯𑀸 𑀚𑀸𑀢𑀲𑁆𑀲𑀭𑀢𑀻𑀭𑀁 𑀯𑀸 𑀳𑁄𑀢𑀺. 𑀅𑀣𑀸𑀬𑀫𑁆𑀧𑀺 𑀯𑀲𑁆𑀲𑀓𑀸𑀮𑁂 𑀅𑀢𑁆𑀢𑀦𑁄 𑀯𑀲𑀺𑀢𑀕𑀸𑀫𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀼𑀦𑁆𑀦𑀁 𑀨𑀸𑀲𑀼𑀯𑀺𑀳𑀸𑀭𑀢𑁆𑀣𑀸𑀬 𑀑𑀓𑀸𑀲𑀁 𑀕𑀯𑁂𑀲𑀦𑁆𑀢𑁄 𑀫𑀳𑀸𑀫𑀳𑀻 𑀪𑀺𑀚𑁆𑀚𑀺𑀢𑁆𑀯𑀸 𑀏𑀓𑀢𑁄 𑀓𑀸𑀮𑀫𑀳𑀻 𑀏𑀓𑀢𑁄 𑀫𑀳𑀸𑀫𑀳𑀺𑀘𑁆𑀘𑁂𑀯 𑀲𑀗𑁆𑀔𑀁 𑀕𑀦𑁆𑀢𑁆𑀯𑀸 𑀲𑀦𑁆𑀤𑀫𑀸𑀦𑀸 𑀧𑀼𑀦 𑀲𑀫𑀼𑀤𑁆𑀤𑀲𑀫𑀻𑀧𑁂 𑀲𑀫𑀸𑀕𑀦𑁆𑀢𑁆𑀯𑀸 𑀧𑀯𑀢𑁆𑀢𑀸. 𑀬𑀁 𑀑𑀓𑀸𑀲𑀁 𑀅𑀦𑁆𑀢𑀭𑀤𑀻𑀧𑀁 𑀅𑀓𑀸𑀲𑀺, 𑀢𑀁 𑀧𑀯𑀺𑀲𑀺𑀢𑁆𑀯𑀸 𑀯𑀘𑁆𑀙𑀸𑀦𑀁 𑀲𑀸𑀮𑀁 𑀅𑀢𑁆𑀢𑀦𑁄 𑀘 𑀦𑀺𑀯𑁂𑀲𑀦𑀁 𑀫𑀸𑀧𑁂𑀢𑁆𑀯𑀸 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀢𑀲𑁆𑀲 𑀲𑀢𑁆𑀢 𑀧𑀼𑀢𑁆𑀢𑀸, 𑀲𑀢𑁆𑀢 𑀥𑀻𑀢𑀭𑁄, 𑀲𑀢𑁆𑀢 𑀲𑀼𑀡𑀺𑀲𑀸, 𑀅𑀦𑁂𑀓𑁂 𑀘 𑀓𑀫𑁆𑀫𑀓𑀸𑀭𑀸 𑀳𑁄𑀦𑁆𑀢𑀺. 𑀕𑁄𑀧𑀸 𑀦𑀸𑀫 𑀯𑀲𑁆𑀲𑀦𑀺𑀫𑀺𑀢𑁆𑀢𑀁 𑀚𑀸𑀦𑀦𑁆𑀢𑀺. 𑀬𑀤𑀸 𑀲𑀓𑀼𑀡𑀺𑀓𑀸 𑀓𑀼𑀮𑀸𑀯𑀓𑀸𑀦𑀺 𑀭𑀼𑀓𑁆𑀔𑀕𑁆𑀕𑁂 𑀓𑀭𑁄𑀦𑁆𑀢𑀺, 𑀓𑀓𑁆𑀓𑀝𑀓𑀸 𑀉𑀤𑀓𑀲𑀫𑀻𑀧𑁂 𑀤𑁆𑀯𑀸𑀭𑀁 𑀧𑀺𑀤𑀳𑀺𑀢𑁆𑀯𑀸 𑀣𑀮𑀲𑀫𑀻𑀧𑀤𑁆𑀯𑀸𑀭𑁂𑀦 𑀯𑀴𑀜𑁆𑀚𑁂𑀦𑁆𑀢𑀺, 𑀢𑀤𑀸 𑀲𑀼𑀯𑀼𑀝𑁆𑀞𑀺𑀓𑀸 𑀪𑀯𑀺𑀲𑁆𑀲𑀢𑀻𑀢𑀺 𑀕𑀡𑁆𑀳𑀦𑁆𑀢𑀺. 𑀬𑀤𑀸 𑀧𑀦 𑀲𑀓𑀼𑀡𑀺𑀓𑀸 𑀓𑀼𑀮𑀸𑀯𑀓𑀸𑀦𑀺 𑀦𑀻𑀘𑀝𑁆𑀞𑀸𑀦𑁂 𑀉𑀤𑀓𑀧𑀺𑀝𑁆𑀞𑁂 𑀓𑀭𑁄𑀦𑁆𑀢𑀺, 𑀓𑀓𑁆𑀓𑀝𑀓𑀸 𑀣𑀮𑀲𑀫𑀻𑀧𑁂 𑀤𑁆𑀯𑀸𑀭𑀁 𑀧𑀺𑀤𑀳𑀺𑀢𑁆𑀯𑀸 𑀉𑀤𑀓𑀲𑀫𑀻𑀧𑀤𑁆𑀯𑀸𑀭𑁂𑀦 𑀯𑀴𑀜𑁆𑀚𑁂𑀦𑁆𑀢𑀺, 𑀢𑀤𑀸 𑀤𑀼𑀩𑁆𑀩𑀼𑀝𑁆𑀞𑀺𑀓𑀸 𑀪𑀯𑀺𑀲𑁆𑀲𑀢𑀻𑀢𑀺 𑀕𑀡𑁆𑀳𑀦𑁆𑀢𑀺.

𑀅𑀣 𑀲𑁄 𑀥𑀦𑀺𑀬𑁄 𑀲𑀼𑀯𑀼𑀝𑁆𑀞𑀺𑀓𑀦𑀺𑀫𑀺𑀢𑁆𑀢𑀸𑀦𑀺 𑀉𑀧𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀉𑀧𑀓𑀝𑁆𑀞𑁂 𑀯𑀲𑁆𑀲𑀓𑀸𑀮𑁂 𑀅𑀦𑁆𑀢𑀭𑀤𑀻𑀧𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀳𑀸𑀫𑀳𑀺𑀬𑀸 𑀧𑀭𑀢𑀻𑀭𑁂 𑀲𑀢𑁆𑀢𑀲𑀢𑁆𑀢𑀸𑀳𑀫𑁆𑀧𑀺 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀉𑀤𑀓𑁂𑀦 𑀅𑀦𑀚𑁆𑀛𑁄𑀢𑁆𑀣𑀭𑀡𑁄𑀓𑀸𑀲𑁂 𑀅𑀢𑁆𑀢𑀦𑁄 𑀯𑀲𑀦𑁄𑀓𑀸𑀲𑀁 𑀓𑀢𑁆𑀯𑀸 𑀲𑀫𑀦𑁆𑀢𑀸 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸, 𑀯𑀘𑁆𑀙𑀲𑀸𑀮𑀸𑀬𑁄 𑀫𑀸𑀧𑁂𑀢𑁆𑀯𑀸, 𑀢𑀢𑁆𑀣 𑀦𑀺𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀅𑀣𑀲𑁆𑀲 𑀤𑀸𑀭𑀼𑀢𑀺𑀡𑀸𑀤𑀺𑀲𑀗𑁆𑀕𑀳𑁂 𑀓𑀢𑁂 𑀲𑀩𑁆𑀩𑁂𑀲𑀼 𑀧𑀼𑀢𑁆𑀢𑀤𑀸𑀭𑀓𑀫𑁆𑀫𑀓𑀭𑀧𑁄𑀭𑀺𑀲𑁂𑀲𑀼 𑀲𑀫𑀸𑀦𑀺𑀬𑁂𑀲𑀼 𑀚𑀸𑀢𑁂𑀲𑀼 𑀦𑀸𑀦𑀧𑁆𑀧𑀓𑀸𑀭𑁂 𑀔𑀚𑁆𑀚𑀪𑁄𑀚𑁆𑀚𑁂 𑀧𑀝𑀺𑀬𑀢𑁆𑀢𑁂 𑀲𑀫𑀦𑁆𑀢𑀸 𑀘𑀢𑀼𑀤𑁆𑀤𑀺𑀲𑀸 𑀫𑁂𑀖𑀫𑀡𑁆𑀟𑀮𑀸𑀦𑀺 𑀉𑀝𑁆𑀞𑀳𑀺𑀁𑀲𑀼. 𑀲𑁄 𑀥𑁂𑀦𑀼𑀬𑁄 𑀤𑀼𑀳𑀸𑀧𑁂𑀢𑁆𑀯𑀸, 𑀯𑀘𑁆𑀙𑀲𑀸𑀮𑀸𑀲𑀼 𑀯𑀘𑁆𑀙𑁂 𑀲𑀡𑁆𑀞𑀸𑀧𑁂𑀢𑁆𑀯𑀸, 𑀕𑀼𑀦𑁆𑀦𑀁 𑀘𑀢𑀼𑀤𑁆𑀤𑀺𑀲𑀸 𑀥𑀽𑀫𑀁 𑀓𑀸𑀭𑀸𑀧𑁂𑀢𑁆𑀯𑀸, 𑀲𑀩𑁆𑀩𑀧𑀭𑀺𑀚𑀦𑀁 𑀪𑁄𑀚𑀸𑀧𑁂𑀢𑁆𑀯𑀸, 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀓𑀸𑀭𑀸𑀧𑁂𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀤𑀻𑀧𑁂 𑀉𑀚𑁆𑀚𑀸𑀮𑀸𑀧𑁂𑀢𑁆𑀯𑀸, 𑀲𑀬𑀁 𑀔𑀻𑀭𑁂𑀦 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸, 𑀫𑀳𑀸𑀲𑀬𑀦𑁂 𑀲𑀬𑀦𑁆𑀢𑁄 𑀅𑀢𑁆𑀢𑀦𑁄 𑀲𑀺𑀭𑀺𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸, 𑀢𑀼𑀝𑁆𑀞𑀘𑀺𑀢𑁆𑀢𑁄 𑀳𑀼𑀢𑁆𑀯𑀸, 𑀅𑀧𑀭𑀤𑀺𑀲𑀸𑀬 𑀫𑁂𑀖𑀢𑁆𑀣𑀦𑀺𑀢𑀲𑀤𑁆𑀤𑀁 𑀲𑀼𑀢𑁆𑀯𑀸 𑀦𑀺𑀧𑀦𑁆𑀦𑁄 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 ‘‘𑀧𑀓𑁆𑀓𑁄𑀤𑀦𑁄 𑀤𑀼𑀤𑁆𑀥𑀔𑀻𑀭𑁄𑀳𑀫𑀲𑁆𑀫𑀻’’𑀢𑀺.

𑀢𑀢𑁆𑀭𑀸𑀬𑀁 𑀅𑀢𑁆𑀣𑀯𑀡𑁆𑀡𑀦𑀸 𑁋 𑀧𑀓𑁆𑀓𑁄𑀤𑀦𑁄𑀢𑀺 𑀲𑀺𑀤𑁆𑀥𑀪𑀢𑁆𑀢𑁄. 𑀤𑀼𑀤𑁆𑀥𑀔𑀻𑀭𑁄𑀢𑀺 𑀕𑀸𑀯𑁄 𑀤𑀼𑀳𑀺𑀢𑁆𑀯𑀸 𑀕𑀳𑀺𑀢𑀔𑀻𑀭𑁄. 𑀅𑀳𑀦𑁆𑀢𑀺 𑀅𑀢𑁆𑀢𑀸𑀦𑀁 𑀦𑀺𑀤𑀲𑁆𑀲𑁂𑀢𑀺, 𑀅𑀲𑁆𑀫𑀻𑀢𑀺 𑀅𑀢𑁆𑀢𑀦𑁄 𑀢𑀣𑀸𑀪𑀸𑀯𑀁. 𑀧𑀓𑁆𑀓𑁄𑀤𑀦𑁄 𑀤𑀼𑀤𑁆𑀥𑀔𑀻𑀭𑁄 𑀘 𑀅𑀳𑀫𑀲𑁆𑀫𑀺 𑀪𑀯𑀸𑀫𑀻𑀢𑀺 𑀅𑀢𑁆𑀣𑁄. 𑀇𑀢𑀻𑀢𑀺 𑀏𑀯𑀫𑀸𑀳𑀸𑀢𑀺 𑀅𑀢𑁆𑀣𑁄. 𑀦𑀺𑀤𑁆𑀤𑁂𑀲𑁂 𑀧𑀦 ‘‘𑀇𑀢𑀻𑀢𑀺 𑀧𑀤𑀲𑀦𑁆𑀥𑀺, 𑀧𑀤𑀲𑀁𑀲𑀕𑁆𑀕𑁄, 𑀧𑀤𑀧𑀸𑀭𑀺𑀧𑀽𑀭𑀺, 𑀅𑀓𑁆𑀔𑀭𑀲𑀫𑀯𑀸𑀬𑁄 𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸 𑀧𑀤𑀸𑀦𑀼𑀧𑀼𑀩𑁆𑀩𑀢𑀸𑀫𑁂𑀢’’𑀦𑁆𑀢𑀺 (𑀘𑀽𑀴𑀦𑀺. 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁧) 𑀏𑀯𑀫𑀲𑁆𑀲 𑀅𑀢𑁆𑀣𑁄 𑀯𑀡𑁆𑀡𑀺𑀢𑁄. 𑀲𑁄𑀧𑀺 𑀇𑀤𑀫𑁂𑀯 𑀲𑀦𑁆𑀥𑀸𑀬𑀸𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑀁 𑀬𑀁 𑀳𑀺 𑀧𑀤𑀁 𑀧𑀼𑀩𑁆𑀩𑀧𑀤𑁂𑀦 𑀯𑀼𑀢𑁆𑀢𑀁, 𑀢𑀲𑁆𑀲 𑀢𑀲𑁆𑀲 𑀏𑀯𑀫𑀸𑀳𑀸𑀢𑀺 𑀏𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄𑀬𑁂𑀯 𑀇𑀢𑀺𑀲𑀤𑁆𑀤𑁄 𑀧𑀘𑁆𑀙𑀺𑀫𑁂𑀦 𑀧𑀤𑁂𑀦 𑀫𑁂𑀢𑁆𑀢𑁂𑀬𑁆𑀬𑁄 𑀇𑀢𑀺 𑀯𑀸 𑀪𑀕𑀯𑀸 𑀇𑀢𑀺 𑀯𑀸 𑀏𑀯𑀫𑀸𑀤𑀺𑀦𑀸 𑀧𑀤𑀲𑀦𑁆𑀥𑀺 𑀳𑁄𑀢𑀺, 𑀦𑀸𑀜𑁆𑀜𑀣𑀸.

𑀥𑀦𑀺𑀬𑁄 𑀕𑁄𑀧𑁄𑀢𑀺 𑀢𑀲𑁆𑀲 𑀲𑁂𑀝𑁆𑀞𑀺𑀧𑀼𑀢𑁆𑀢𑀲𑁆𑀲 𑀦𑀸𑀫𑀲𑀫𑁄𑀥𑀸𑀦𑀁. 𑀲𑁄 𑀳𑀺 𑀬𑀸𑀦𑀺𑀫𑀸𑀦𑀺 𑀣𑀸𑀯𑀭𑀸𑀤𑀻𑀦𑀺 𑀧𑀜𑁆𑀘 𑀥𑀦𑀸𑀦𑀺, 𑀢𑁂𑀲𑀼 𑀞𑀧𑁂𑀢𑁆𑀯𑀸 𑀤𑀸𑀦𑀲𑀻𑀮𑀸𑀤𑀺𑀅𑀦𑀼𑀕𑀸𑀫𑀺𑀓𑀥𑀦𑀁, 𑀔𑁂𑀢𑁆𑀢𑀯𑀢𑁆𑀣𑀼-𑀆𑀭𑀸𑀫𑀸𑀤𑀺𑀢𑁄 𑀣𑀸𑀯𑀭𑀥𑀦𑀢𑁄𑀧𑀺, 𑀕𑀯𑀲𑁆𑀲𑀸𑀤𑀺𑀢𑁄 𑀚𑀗𑁆𑀕𑀫𑀥𑀦𑀢𑁄𑀧𑀺 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀺𑀢𑁄 𑀲𑀁𑀳𑀸𑀭𑀺𑀫𑀥𑀦𑀢𑁄𑀧𑀺, 𑀲𑀺𑀧𑁆𑀧𑀸𑀬𑀢𑀦𑀸𑀤𑀺𑀢𑁄 𑀅𑀗𑁆𑀕𑀲𑀫𑀥𑀦𑀢𑁄𑀧𑀺 𑀬𑀁 𑀢𑀁 𑀮𑁄𑀓𑀲𑁆𑀲 𑀧𑀜𑁆𑀘𑀕𑁄𑀭𑀲𑀸𑀦𑀼𑀧𑁆𑀧𑀤𑀸𑀦𑁂𑀦 𑀩𑀳𑀽𑀧𑀓𑀸𑀭𑀁 𑀢𑀁 𑀲𑀦𑁆𑀥𑀸𑀬 ‘‘𑀦𑀢𑁆𑀣𑀺 𑀕𑁄𑀲𑀫𑀺𑀢𑀁 𑀥𑀦’’𑀦𑁆𑀢𑀺 (𑀲𑀁. 𑀦𑀺. 𑁧.𑁧𑁩; 𑀦𑁂𑀢𑁆𑀢𑀺. 𑁧𑁨𑁩) 𑀏𑀯𑀁 𑀯𑀺𑀲𑁂𑀲𑀺𑀢𑀁 𑀕𑁄𑀥𑀦𑀁, 𑀢𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀥𑀦𑀺𑀬𑁄, 𑀕𑀼𑀦𑁆𑀦𑀁 𑀧𑀸𑀮𑀦𑀢𑁄 𑀕𑁄𑀧𑁄. 𑀬𑁄 𑀳𑀺 𑀅𑀢𑁆𑀢𑀦𑁄 𑀕𑀸𑀯𑁄 𑀧𑀸𑀮𑁂𑀢𑀺, 𑀲𑁄 ‘‘𑀕𑁄𑀧𑁄’’𑀢𑀺 𑀯𑀼𑀘𑁆𑀘𑀢𑀺. 𑀬𑁄 𑀧𑀭𑁂𑀲𑀁 𑀯𑁂𑀢𑀦𑁂𑀦 𑀪𑀝𑁄 𑀳𑀼𑀢𑁆𑀯𑀸, 𑀲𑁄 𑀕𑁄𑀧𑀸𑀮𑀓𑁄. 𑀅𑀬𑀁 𑀧𑀦 𑀅𑀢𑁆𑀢𑀦𑁄𑀬𑁂𑀯, 𑀢𑁂𑀦 𑀕𑁄𑀧𑁄𑀢𑀺 𑀯𑀼𑀢𑁆𑀢𑁄.

𑀅𑀦𑀼𑀢𑀻𑀭𑁂𑀢𑀺 𑀢𑀻𑀭𑀲𑁆𑀲 𑀲𑀫𑀻𑀧𑁂. 𑀫𑀳𑀺𑀬𑀸𑀢𑀺 𑀫𑀳𑀸𑀫𑀳𑀻𑀦𑀸𑀫𑀺𑀓𑀸𑀬 𑀦𑀤𑀺𑀬𑀸. 𑀲𑀫𑀸𑀦𑁂𑀦 𑀅𑀦𑀼𑀓𑀽𑀮𑀯𑀢𑁆𑀢𑀺𑀦𑀸 𑀧𑀭𑀺𑀚𑀦𑁂𑀦 𑀲𑀤𑁆𑀥𑀺𑀁 𑀯𑀸𑀲𑁄 𑀬𑀲𑁆𑀲 𑀲𑁄 𑀲𑀫𑀸𑀦𑀯𑀸𑀲𑁄, 𑀅𑀬𑀜𑁆𑀘 𑀢𑀣𑀸𑀯𑀺𑀥𑁄. 𑀢𑁂𑀦𑀸𑀳 ‘‘𑀲𑀫𑀸𑀦𑀯𑀸𑀲𑁄’’𑀢𑀺. 𑀙𑀦𑁆𑀦𑀸𑀢𑀺 𑀢𑀺𑀡𑀧𑀡𑁆𑀡𑀘𑁆𑀙𑀤𑀦𑁂𑀳𑀺 𑀅𑀦𑁄𑀯𑀲𑁆𑀲𑀓𑀸 𑀓𑀢𑀸. 𑀓𑀼𑀝𑀻𑀢𑀺 𑀯𑀲𑀦𑀖𑀭𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀆𑀳𑀺𑀢𑁄𑀢𑀺 𑀆𑀪𑀢𑁄, 𑀚𑀸𑀮𑀺𑀢𑁄 𑀯𑀸. 𑀕𑀺𑀦𑀻𑀢𑀺 𑀅𑀕𑁆𑀕𑀺. 𑀢𑁂𑀲𑀼 𑀢𑁂𑀲𑀼 𑀞𑀸𑀦𑁂𑀲𑀼 𑀅𑀕𑁆𑀕𑀺 ‘‘𑀕𑀺𑀦𑀻’’𑀢𑀺 𑀯𑁄𑀳𑀭𑀻𑀬𑀢𑀺. 𑀅𑀣 𑀘𑁂 𑀧𑀢𑁆𑀣𑀬𑀲𑀻𑀢𑀺 𑀇𑀤𑀸𑀦𑀺 𑀬𑀤𑀺 𑀇𑀘𑁆𑀙𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀯𑀲𑁆𑀲𑀸𑀢𑀺 𑀲𑀺𑀜𑁆𑀘, 𑀧𑀕𑁆𑀖𑀭, 𑀉𑀤𑀓𑀁 𑀫𑀼𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀤𑁂𑀯𑀸𑀢𑀺 𑀫𑁂𑀖𑀁 𑀆𑀮𑀧𑀢𑀺. 𑀅𑀬𑀁 𑀢𑀸𑀯𑁂𑀢𑁆𑀣 𑀧𑀤𑀯𑀡𑁆𑀡𑀦𑀸.

𑀅𑀬𑀁 𑀧𑀦 𑀅𑀢𑁆𑀣𑀯𑀡𑁆𑀡𑀦𑀸 𑁋 𑀏𑀯𑀫𑀬𑀁 𑀥𑀦𑀺𑀬𑁄 𑀕𑁄𑀧𑁄 𑀅𑀢𑁆𑀢𑀦𑁄 𑀲𑀬𑀦𑀖𑀭𑁂 𑀫𑀳𑀸𑀲𑀬𑀦𑁂 𑀦𑀺𑀧𑀦𑁆𑀦𑁄 𑀫𑁂𑀖𑀢𑁆𑀣𑀦𑀺𑀢𑀁 𑀲𑀼𑀢𑁆𑀯𑀸 ‘‘𑀧𑀓𑁆𑀓𑁄𑀤𑀦𑁄𑀳𑀫𑀲𑁆𑀫𑀻’’𑀢𑀺 𑀪𑀡𑀦𑁆𑀢𑁄 𑀓𑀸𑀬𑀤𑀼𑀓𑁆𑀔𑀯𑀽𑀧𑀲𑀫𑀽𑀧𑀸𑀬𑀁 𑀓𑀸𑀬𑀲𑀼𑀔𑀳𑁂𑀢𑀼𑀜𑁆𑀘 𑀅𑀢𑁆𑀢𑀦𑁄 𑀲𑀦𑁆𑀦𑀺𑀳𑀺𑀢𑀁 𑀤𑀻𑀧𑁂𑀢𑀺. ‘‘𑀤𑀼𑀤𑁆𑀥𑀔𑀻𑀭𑁄𑀳𑀫𑀲𑁆𑀫𑀻’’𑀢𑀺 𑀪𑀡𑀦𑁆𑀢𑁄 𑀘𑀺𑀢𑁆𑀢𑀤𑀼𑀓𑁆𑀔𑀯𑀽𑀧𑀲𑀫𑀽𑀧𑀸𑀬𑀁 𑀘𑀺𑀢𑁆𑀢𑀲𑀼𑀔𑀳𑁂𑀢𑀼𑀜𑁆𑀘. ‘‘𑀅𑀦𑀼𑀢𑀻𑀭𑁂 𑀫𑀳𑀺𑀬𑀸’’𑀢𑀺 𑀦𑀺𑀯𑀸𑀲𑀝𑁆𑀞𑀸𑀦𑀲𑀫𑁆𑀧𑀢𑁆𑀢𑀺𑀁, ‘‘𑀲𑀫𑀸𑀦𑀯𑀸𑀲𑁄’’𑀢𑀺 𑀢𑀸𑀤𑀺𑀲𑁂 𑀓𑀸𑀮𑁂 𑀧𑀺𑀬𑀯𑀺𑀧𑁆𑀧𑀬𑁄𑀕𑀧𑀤𑀝𑁆𑀞𑀸𑀦𑀲𑁆𑀲 𑀲𑁄𑀓𑀲𑁆𑀲𑀸𑀪𑀸𑀯𑀁. ‘‘𑀙𑀦𑁆𑀦𑀸 𑀓𑀼𑀝𑀻’’𑀢𑀺 𑀓𑀸𑀬𑀤𑀼𑀓𑁆𑀔𑀸𑀧𑀕𑀫𑀧𑀝𑀺𑀖𑀸𑀢𑀁. ‘‘𑀆𑀳𑀺𑀢𑁄 𑀕𑀺𑀦𑀻’’𑀢𑀺 𑀬𑀲𑁆𑀫𑀸 𑀕𑁄𑀧𑀸𑀮𑀓𑀸 𑀧𑀭𑀺𑀓𑁆𑀔𑁂𑀧𑀥𑀽𑀫𑀤𑀸𑀭𑀼𑀅𑀕𑁆𑀕𑀺𑀯𑀲𑁂𑀦 𑀢𑀬𑁄 𑀅𑀕𑁆𑀕𑀻 𑀓𑀭𑁄𑀦𑁆𑀢𑀺. 𑀢𑁂 𑀘 𑀢𑀲𑁆𑀲 𑀕𑁂𑀳𑁂 𑀲𑀩𑁆𑀩𑁂 𑀓𑀢𑀸, 𑀢𑀲𑁆𑀫𑀸 𑀲𑀩𑁆𑀩𑀤𑀺𑀲𑀸𑀲𑀼 𑀧𑀭𑀺𑀓𑁆𑀔𑁂𑀧𑀕𑁆𑀕𑀺𑀁 𑀲𑀦𑁆𑀥𑀸𑀬 ‘‘𑀆𑀳𑀺𑀢𑁄 𑀕𑀺𑀦𑀻’’𑀢𑀺 𑀪𑀡𑀦𑁆𑀢𑁄 𑀯𑀸𑀴𑀫𑀺𑀕𑀸𑀕𑀫𑀦𑀦𑀺𑀯𑀸𑀭𑀡𑀁 𑀤𑀻𑀧𑁂𑀢𑀺, 𑀕𑀼𑀦𑁆𑀦𑀁 𑀫𑀚𑁆𑀛𑁂 𑀕𑁄𑀫𑀬𑀸𑀤𑀻𑀳𑀺 𑀥𑀽𑀫𑀕𑁆𑀕𑀺𑀁 𑀲𑀦𑁆𑀥𑀸𑀬 𑀟𑀁𑀲𑀫𑀓𑀲𑀸𑀤𑀻𑀳𑀺 𑀕𑀼𑀦𑁆𑀦𑀁 𑀅𑀦𑀸𑀩𑀸𑀥𑀁, 𑀕𑁄𑀧𑀸𑀮𑀓𑀸𑀦𑀁 𑀲𑀬𑀦𑀝𑁆𑀞𑀸𑀦𑁂 𑀤𑀸𑀭𑀼𑀅𑀕𑁆𑀕𑀺𑀁 𑀲𑀦𑁆𑀥𑀸𑀬 𑀕𑁄𑀧𑀸𑀮𑀓𑀸𑀦𑀁 𑀲𑀻𑀢𑀸𑀩𑀸𑀥𑀧𑀝𑀺𑀖𑀸𑀢𑀁. 𑀲𑁄 𑀏𑀯𑀁 𑀤𑀻𑀧𑁂𑀦𑁆𑀢𑁄 𑀅𑀢𑁆𑀢𑀦𑁄 𑀯𑀸 𑀕𑀼𑀦𑁆𑀦𑀁 𑀯𑀸 𑀧𑀭𑀺𑀚𑀦𑀲𑁆𑀲 𑀯𑀸 𑀯𑀼𑀝𑁆𑀞𑀺𑀧𑀘𑁆𑀘𑀬𑀲𑁆𑀲 𑀓𑀲𑁆𑀲𑀘𑀺 𑀆𑀩𑀸𑀥𑀲𑁆𑀲 𑀅𑀪𑀸𑀯𑀢𑁄 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑁄 𑀆𑀳 𑁋 ‘‘𑀅𑀣 𑀘𑁂 𑀧𑀢𑁆𑀣𑀬𑀲𑀻 𑀧𑀯𑀲𑁆𑀲 𑀤𑁂𑀯𑀸’’𑀢𑀺.

𑁧𑁯. 𑀏𑀯𑀁 𑀥𑀦𑀺𑀬𑀲𑁆𑀲 𑀇𑀫𑀁 𑀕𑀸𑀣𑀁 𑀪𑀸𑀲𑀫𑀸𑀦𑀲𑁆𑀲 𑀅𑀲𑁆𑀲𑁄𑀲𑀺 𑀪𑀕𑀯𑀸 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸 𑀯𑀺𑀲𑀼𑀤𑁆𑀥𑀸𑀬 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀺𑀓𑀸𑀬 𑀚𑁂𑀢𑀯𑀦𑀫𑀳𑀸𑀯𑀺𑀳𑀸𑀭𑁂 𑀕𑀦𑁆𑀥𑀓𑀼𑀝𑀺𑀬𑀁 𑀯𑀺𑀳𑀭𑀦𑁆𑀢𑁄. 𑀲𑀼𑀢𑁆𑀯𑀸 𑀘 𑀧𑀦 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀅𑀤𑁆𑀤𑀲 𑀥𑀦𑀺𑀬𑀜𑁆𑀘 𑀧𑀚𑀸𑀧𑀢𑀺𑀜𑁆𑀘𑀲𑁆𑀲 ‘‘𑀇𑀫𑁂 𑀉𑀪𑁄𑀧𑀺 𑀳𑁂𑀢𑀼𑀲𑀫𑁆𑀧𑀦𑁆𑀦𑀸. 𑀲𑀘𑁂 𑀅𑀳𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀺, 𑀉𑀪𑁄𑀧𑀺 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑀺. 𑀦𑁄 𑀘𑁂 𑀕𑀫𑀺𑀲𑁆𑀲𑀸𑀫𑀺, 𑀲𑁆𑀯𑁂 𑀉𑀤𑀓𑁄𑀖𑁂𑀦 𑀯𑀺𑀦𑀲𑁆𑀲𑀺𑀲𑁆𑀲𑀦𑁆𑀢𑀻’’𑀢𑀺 𑀢𑀁 𑀔𑀡𑁂𑀬𑁂𑀯 𑀲𑀸𑀯𑀢𑁆𑀣𑀺𑀢𑁄 𑀲𑀢𑁆𑀢 𑀬𑁄𑀚𑀦𑀲𑀢𑀸𑀦𑀺 𑀥𑀦𑀺𑀬𑀲𑁆𑀲 𑀦𑀺𑀯𑀸𑀲𑀝𑁆𑀞𑀸𑀦𑀁 𑀆𑀓𑀸𑀲𑁂𑀦 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀓𑀼𑀝𑀺𑀬𑀸 𑀉𑀧𑀭𑀺 𑀅𑀝𑁆𑀞𑀸𑀲𑀺. 𑀥𑀦𑀺𑀬𑁄 𑀢𑀁 𑀕𑀸𑀣𑀁 𑀧𑀼𑀦𑀧𑁆𑀧𑀼𑀦𑀁 𑀪𑀸𑀲𑀢𑀺𑀬𑁂𑀯, 𑀦 𑀦𑀺𑀝𑁆𑀞𑀸𑀧𑁂𑀢𑀺, 𑀪𑀕𑀯𑀢𑀺 𑀕𑀢𑁂𑀧𑀺 𑀪𑀸𑀲𑀢𑀺. 𑀪𑀕𑀯𑀸 𑀘 𑀢𑀁 𑀲𑀼𑀢𑁆𑀯𑀸 ‘‘𑀦 𑀏𑀢𑁆𑀢𑀓𑁂𑀦 𑀲𑀦𑁆𑀢𑀼𑀝𑁆𑀞𑀸 𑀯𑀸 𑀯𑀺𑀲𑁆𑀲𑀢𑁆𑀣𑀸 𑀯𑀸 𑀳𑁄𑀦𑁆𑀢𑀺, 𑀏𑀯𑀁 𑀧𑀦 𑀳𑁄𑀦𑁆𑀢𑀻’’𑀢𑀺 𑀤𑀲𑁆𑀲𑁂𑀢𑀼𑀁 𑁋

‘‘𑀅𑀓𑁆𑀓𑁄𑀥𑀦𑁄 𑀯𑀺𑀕𑀢𑀔𑀺𑀮𑁄𑀳𑀫𑀲𑁆𑀫𑀺,𑀅𑀦𑀼𑀢𑀻𑀭𑁂 𑀫𑀳𑀺𑀬𑁂𑀓𑀭𑀢𑁆𑀢𑀺𑀯𑀸𑀲𑁄;

𑀯𑀺𑀯𑀝𑀸 𑀓𑀼𑀝𑀺 𑀦𑀺𑀩𑁆𑀩𑀼𑀢𑁄 𑀕𑀺𑀦𑀺,𑀅𑀣 𑀘𑁂 𑀧𑀢𑁆𑀣𑀬𑀲𑀻 𑀧𑀯𑀲𑁆𑀲 𑀤𑁂𑀯𑀸’’𑀢𑀺. 𑁋

𑀇𑀫𑀁 𑀧𑀝𑀺𑀕𑀸𑀣𑀁 𑀅𑀪𑀸𑀲𑀺 𑀩𑁆𑀬𑀜𑁆𑀚𑀦𑀲𑀪𑀸𑀕𑀁 𑀦𑁄 𑀅𑀢𑁆𑀣𑀲𑀪𑀸𑀕𑀁. 𑀦 𑀳𑀺 ‘‘𑀧𑀓𑁆𑀓𑁄𑀤𑀦𑁄’’𑀢𑀺, ‘‘𑀅𑀓𑁆𑀓𑁄𑀥𑀦𑁄’’𑀢𑀺 𑀘 𑀆𑀤𑀻𑀦𑀺 𑀧𑀤𑀸𑀦𑀺 𑀅𑀢𑁆𑀣𑀢𑁄 𑀲𑀫𑁂𑀦𑁆𑀢𑀺 𑀫𑀳𑀸𑀲𑀫𑀼𑀤𑁆𑀤𑀲𑁆𑀲 𑀑𑀭𑀺𑀫𑀧𑀸𑀭𑀺𑀫𑀢𑀻𑀭𑀸𑀦𑀺 𑀯𑀺𑀬, 𑀩𑁆𑀬𑀜𑁆𑀚𑀦𑀁 𑀧𑀦𑁂𑀢𑁆𑀣 𑀓𑀺𑀜𑁆𑀘𑀺 𑀓𑀺𑀜𑁆𑀘𑀺 𑀲𑀫𑁂𑀢𑀻𑀢𑀺 𑀩𑁆𑀬𑀜𑁆𑀚𑀦𑀲𑀪𑀸𑀕𑀸𑀦𑀺 𑀳𑁄𑀦𑁆𑀢𑀺. 𑀢𑀢𑁆𑀣 𑀧𑀼𑀭𑀺𑀫𑀕𑀸𑀣𑀸𑀬 𑀲𑀤𑀺𑀲𑀧𑀤𑀸𑀦𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀯𑀺𑀲𑁂𑀲𑀧𑀤𑀸𑀦𑀁 𑀧𑀦𑀸𑀬𑀁 𑀧𑀤𑀢𑁄 𑀅𑀢𑁆𑀣𑀢𑁄 𑀘 𑀯𑀡𑁆𑀡𑀦𑀸 𑁋 𑀅𑀓𑁆𑀓𑁄𑀥𑀦𑁄𑀢𑀺 𑀅𑀓𑀼𑀚𑁆𑀛𑀦𑀲𑀪𑀸𑀯𑁄. 𑀬𑁄 𑀳𑀺 𑀲𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀆𑀖𑀸𑀢𑀯𑀢𑁆𑀣𑀼𑀲𑀫𑁆𑀪𑀯𑁄 𑀓𑁄𑀥𑁄 𑀏𑀓𑀘𑁆𑀘𑀲𑁆𑀲 𑀲𑀼𑀧𑀭𑀺𑀢𑁆𑀢𑁄𑀧𑀺 𑀉𑀧𑁆𑀧𑀚𑁆𑀚𑀫𑀸𑀦𑁄 𑀳𑀤𑀬𑀁 𑀲𑀦𑁆𑀢𑀸𑀧𑁂𑀢𑁆𑀯𑀸 𑀯𑀽𑀧𑀲𑀫𑁆𑀫𑀢𑀺, 𑀬𑁂𑀦 𑀘 𑀢𑀢𑁄 𑀩𑀮𑀯𑀢𑀭𑀼𑀧𑁆𑀧𑀦𑁆𑀦𑁂𑀦 𑀏𑀓𑀘𑁆𑀘𑁄 𑀫𑀼𑀔𑀯𑀺𑀓𑀼𑀡𑀦𑀫𑀢𑁆𑀢𑀁 𑀓𑀭𑁄𑀢𑀺, 𑀢𑀢𑁄 𑀩𑀮𑀯𑀢𑀭𑁂𑀦 𑀏𑀓𑀘𑁆𑀘𑁄 𑀨𑀭𑀼𑀲𑀁 𑀯𑀢𑁆𑀢𑀼𑀓𑀸𑀫𑁄 𑀳𑀦𑀼𑀲𑀜𑁆𑀘𑀮𑀦𑀫𑀢𑁆𑀢𑀁 𑀓𑀭𑁄𑀢𑀺, 𑀅𑀧𑀭𑁄 𑀢𑀢𑁄 𑀩𑀮𑀯𑀢𑀭𑁂𑀦 𑀨𑀭𑀼𑀲𑀁 𑀪𑀡𑀢𑀺, 𑀅𑀧𑀭𑁄 𑀢𑀢𑁄 𑀩𑀮𑀯𑀢𑀭𑁂𑀦 𑀤𑀡𑁆𑀟𑀁 𑀯𑀸 𑀲𑀢𑁆𑀣𑀁 𑀯𑀸 𑀕𑀯𑁂𑀲𑀦𑁆𑀢𑁄 𑀤𑀺𑀲𑀸 𑀯𑀺𑀮𑁄𑀓𑁂𑀢𑀺, 𑀅𑀧𑀭𑁄 𑀢𑀢𑁄 𑀩𑀮𑀯𑀢𑀭𑁂𑀦 𑀤𑀡𑁆𑀟𑀁 𑀯𑀸 𑀲𑀢𑁆𑀣𑀁 𑀯𑀸 𑀆𑀫𑀲𑀢𑀺, 𑀅𑀧𑀭𑁄 𑀢𑀢𑁄 𑀩𑀮𑀯𑀢𑀭𑁂𑀦 𑀤𑀡𑁆𑀟𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀉𑀧𑀥𑀸𑀯𑀢𑀺, 𑀅𑀧𑀭𑁄 𑀢𑀢𑁄 𑀩𑀮𑀯𑀢𑀭𑁂𑀦 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀧𑀳𑀸𑀭𑁂 𑀤𑁂𑀢𑀺, 𑀅𑀧𑀭𑁄 𑀢𑀢𑁄 𑀩𑀮𑀯𑀢𑀭𑁂𑀦 𑀅𑀧𑀺 𑀜𑀸𑀢𑀺𑀲𑀸𑀮𑁄𑀳𑀺𑀢𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀺, 𑀏𑀓𑀘𑁆𑀘𑁄 𑀢𑀢𑁄 𑀩𑀮𑀯𑀢𑀭𑁂𑀦 𑀧𑀘𑁆𑀙𑀸 𑀯𑀺𑀧𑁆𑀧𑀝𑀺𑀲𑀸𑀭𑀻 𑀅𑀢𑁆𑀢𑀸𑀦𑀫𑁆𑀧𑀺 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀺 𑀲𑀻𑀳𑀴𑀤𑀻𑀧𑁂 𑀓𑀸𑀮𑀕𑀸𑀫𑀯𑀸𑀲𑀻 𑀅𑀫𑀘𑁆𑀘𑁄 𑀯𑀺𑀬. 𑀏𑀢𑁆𑀢𑀸𑀯𑀢𑀸 𑀘 𑀓𑁄𑀥𑁄 𑀧𑀭𑀫𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑁄 𑀳𑁄𑀢𑀺. 𑀲𑁄 𑀪𑀕𑀯𑀢𑀸 𑀩𑁄𑀥𑀺𑀫𑀡𑁆𑀟𑁂𑀬𑁂𑀯 𑀲𑀩𑁆𑀩𑀲𑁄 𑀧𑀳𑀻𑀦𑁄 𑀉𑀘𑁆𑀙𑀺𑀦𑁆𑀦𑀫𑀽𑀮𑁄 𑀢𑀸𑀮𑀸𑀯𑀢𑁆𑀣𑀼𑀓𑀢𑁄, 𑀢𑀲𑁆𑀫𑀸 𑀪𑀕𑀯𑀸 ‘‘𑀅𑀓𑁆𑀓𑁄𑀥𑀦𑁄𑀳𑀫𑀲𑁆𑀫𑀻’’𑀢𑀺 𑀆𑀳.

𑀯𑀺𑀕𑀢𑀔𑀺𑀮𑁄𑀢𑀺 𑀅𑀧𑀕𑀢𑀔𑀺𑀮𑁄. 𑀬𑁂 𑀳𑀺 𑀢𑁂 𑀘𑀺𑀢𑁆𑀢𑀩𑀦𑁆𑀥𑀪𑀸𑀯𑁂𑀦 𑀧𑀜𑁆𑀘 𑀘𑁂𑀢𑁄𑀔𑀺𑀮𑀸 𑀯𑀼𑀢𑁆𑀢𑀸, 𑀬𑁂 𑀳𑀺 𑀘 𑀔𑀺𑀮𑀪𑀽𑀢𑁂 𑀘𑀺𑀢𑁆𑀢𑁂 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀔𑀺𑀮𑁂 𑀪𑀽𑀫𑀺𑀪𑀸𑀕𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀯𑀲𑁆𑀲𑀦𑁆𑀢𑁂𑀧𑀺 𑀤𑁂𑀯𑁂 𑀲𑀲𑁆𑀲𑀸𑀦𑀺 𑀦 𑀭𑀼𑀳𑀦𑁆𑀢𑀺, 𑀏𑀯𑀫𑁂𑀯𑀁 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀸𑀤𑀺𑀓𑀼𑀲𑀮𑀳𑁂𑀢𑀼𑀯𑀲𑁆𑀲𑁂 𑀯𑀲𑁆𑀲𑀦𑁆𑀢𑁂𑀧𑀺 𑀓𑀼𑀲𑀮𑀁 𑀦 𑀭𑀼𑀳𑀢𑀺 𑀢𑁂 𑀘 𑀪𑀕𑀯𑀢𑀸 𑀩𑁄𑀥𑀺𑀫𑀡𑁆𑀟𑁂𑀬𑁂𑀯 𑀲𑀩𑁆𑀩𑀲𑁄 𑀧𑀳𑀻𑀦𑀸, 𑀢𑀲𑁆𑀫𑀸 𑀪𑀕𑀯𑀸 ‘‘𑀯𑀺𑀕𑀢𑀔𑀺𑀮𑁄𑀳𑀫𑀲𑁆𑀫𑀻’’𑀢𑀺 𑀆𑀳.

𑀏𑀓𑀭𑀢𑁆𑀢𑀺𑀁 𑀯𑀸𑀲𑁄 𑀅𑀲𑁆𑀲𑀸𑀢𑀺 𑀏𑀓𑀭𑀢𑁆𑀢𑀺𑀯𑀸𑀲𑁄. 𑀬𑀣𑀸 𑀳𑀺 𑀥𑀦𑀺𑀬𑁄 𑀢𑀢𑁆𑀣 𑀘𑀢𑁆𑀢𑀸𑀭𑁄 𑀯𑀲𑁆𑀲𑀺𑀓𑁂 𑀫𑀸𑀲𑁂 𑀦𑀺𑀩𑀤𑁆𑀥𑀯𑀸𑀲𑀁 𑀉𑀧𑀕𑀢𑁄, 𑀦 𑀢𑀣𑀸 𑀪𑀕𑀯𑀸. 𑀪𑀕𑀯𑀸 𑀳𑀺 𑀢𑀁𑀬𑁂𑀯 𑀭𑀢𑁆𑀢𑀺𑀁 𑀢𑀲𑁆𑀲 𑀅𑀢𑁆𑀣𑀓𑀸𑀫𑀢𑀸𑀬 𑀢𑀢𑁆𑀣 𑀯𑀸𑀲𑀁 𑀉𑀧𑀕𑀢𑁄. 𑀢𑀲𑁆𑀫𑀸 ‘‘𑀏𑀓𑀭𑀢𑁆𑀢𑀺𑀯𑀸𑀲𑁄’’𑀢𑀺 𑀆𑀳. 𑀯𑀺𑀯𑀝𑀸𑀢𑀺 𑀅𑀧𑀦𑀻𑀢𑀘𑁆𑀙𑀤𑀦𑀸. 𑀓𑀼𑀝𑀻𑀢𑀺 𑀅𑀢𑁆𑀢𑀪𑀸𑀯𑁄. 𑀅𑀢𑁆𑀢𑀪𑀸𑀯𑁄 𑀳𑀺 𑀢𑀁 𑀢𑀁 𑀅𑀢𑁆𑀣𑀯𑀲𑀁 𑀧𑀝𑀺𑀘𑁆𑀘 𑀓𑀸𑀬𑁄𑀢𑀺𑀧𑀺 𑀕𑀼𑀳𑀸𑀢𑀺𑀧𑀺 𑀤𑁂𑀳𑁄𑀢𑀺𑀧𑀺 𑀲𑀦𑁆𑀤𑁂𑀳𑁄𑀢𑀺𑀧𑀺 𑀦𑀸𑀯𑀸𑀢𑀺𑀧𑀺 𑀭𑀣𑁄𑀢𑀺𑀧𑀺 𑀯𑀡𑁄𑀢𑀺𑀧𑀺 𑀥𑀚𑁄𑀢𑀺𑀧𑀺 𑀯𑀫𑁆𑀫𑀺𑀓𑁄𑀢𑀺𑀧𑀺 𑀓𑀼𑀝𑀻𑀢𑀺𑀧𑀺 𑀓𑀼𑀝𑀺𑀓𑀸𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀇𑀥 𑀧𑀦 𑀓𑀝𑁆𑀞𑀸𑀤𑀻𑀦𑀺 𑀧𑀝𑀺𑀘𑁆𑀘 𑀕𑁂𑀳𑀦𑀸𑀫𑀺𑀓𑀸 𑀓𑀼𑀝𑀺 𑀯𑀺𑀬 𑀅𑀝𑁆𑀞𑀺𑀆𑀤𑀻𑀦𑀺 𑀧𑀝𑀺𑀘𑁆𑀘 𑀲𑀗𑁆𑀔𑁆𑀬𑀁 𑀕𑀢𑀢𑁆𑀢𑀸 ‘‘𑀓𑀼𑀝𑀻’’𑀢𑀺 𑀯𑀼𑀢𑁆𑀢𑁄. 𑀬𑀣𑀸𑀳 𑁋

‘‘𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄, 𑀓𑀝𑁆𑀞𑀜𑁆𑀘 𑀧𑀝𑀺𑀘𑁆𑀘, 𑀯𑀮𑁆𑀮𑀺𑀜𑁆𑀘 𑀧𑀝𑀺𑀘𑁆𑀘, 𑀫𑀢𑁆𑀢𑀺𑀓𑀜𑁆𑀘 𑀧𑀝𑀺𑀘𑁆𑀘, 𑀢𑀺𑀡𑀜𑁆𑀘 𑀧𑀝𑀺𑀘𑁆𑀘, 𑀆𑀓𑀸𑀲𑁄 𑀧𑀭𑀺𑀯𑀸𑀭𑀺𑀢𑁄 𑀅𑀕𑀸𑀭𑀁𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺; 𑀏𑀯𑀫𑁂𑀯 𑀔𑁄, 𑀆𑀯𑀼𑀲𑁄, 𑀅𑀝𑁆𑀞𑀺𑀜𑁆𑀘 𑀧𑀝𑀺𑀘𑁆𑀘, 𑀦𑁆𑀳𑀸𑀭𑀼𑀜𑁆𑀘 𑀧𑀝𑀺𑀘𑁆𑀘, 𑀫𑀁𑀲𑀜𑁆𑀘 𑀧𑀝𑀺𑀘𑁆𑀘, 𑀘𑀫𑁆𑀫𑀜𑁆𑀘 𑀧𑀝𑀺𑀘𑁆𑀘, 𑀆𑀓𑀸𑀲𑁄 𑀧𑀭𑀺𑀯𑀸𑀭𑀺𑀢𑁄 𑀭𑀽𑀧𑀦𑁆𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀻’’𑀢𑀺 (𑀫. 𑀦𑀺. 𑁧.𑁩𑁦𑁬).

𑀘𑀺𑀢𑁆𑀢𑀫𑀓𑁆𑀓𑀝𑀲𑁆𑀲 𑀦𑀺𑀯𑀸𑀲𑀢𑁄 𑀯𑀸 𑀓𑀼𑀝𑀺. 𑀬𑀣𑀸𑀳 𑁋

‘‘𑀅𑀝𑁆𑀞𑀺𑀓𑀗𑁆𑀓𑀮𑀓𑀼𑀝𑀺 𑀘𑁂 𑀲𑀸, 𑀫𑀓𑁆𑀓𑀝𑀸𑀯𑀲𑀣𑁄 𑀇𑀢𑀺;

𑀫𑀓𑁆𑀓𑀝𑁄 𑀧𑀜𑁆𑀘𑀤𑁆𑀯𑀸𑀭𑀸𑀬, 𑀓𑀼𑀝𑀺𑀓𑀸𑀬 𑀧𑀲𑀓𑁆𑀓𑀺𑀬;

𑀤𑁆𑀯𑀸𑀭𑁂𑀦 𑀅𑀦𑀼𑀧𑀭𑀺𑀬𑀸𑀢𑀺, 𑀖𑀝𑁆𑀝𑀬𑀦𑁆𑀢𑁄 𑀧𑀼𑀦𑀧𑁆𑀧𑀼𑀦’’𑀦𑁆𑀢𑀺. (𑀣𑁂𑀭𑀕𑀸. 𑁧𑁨𑁫);

𑀲𑀸 𑀓𑀼𑀝𑀺 𑀬𑁂𑀦 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀙𑀤𑀦𑁂𑀦 𑀲𑀢𑁆𑀢𑀸𑀦𑀁 𑀙𑀦𑁆𑀦𑀢𑁆𑀢𑀸 𑀧𑀼𑀦𑀧𑁆𑀧𑀼𑀦𑀁 𑀭𑀸𑀕𑀸𑀤𑀺𑀓𑀺𑀮𑁂𑀲𑀯𑀲𑁆𑀲𑀁 𑀅𑀢𑀺𑀯𑀲𑁆𑀲𑀢𑀺. 𑀬𑀣𑀸𑀳 𑁋

‘‘𑀙𑀦𑁆𑀦𑀫𑀢𑀺𑀯𑀲𑁆𑀲𑀢𑀺, 𑀯𑀺𑀯𑀝𑀁 𑀦𑀸𑀢𑀺𑀯𑀲𑁆𑀲𑀢𑀺;

𑀢𑀲𑁆𑀫𑀸 𑀙𑀦𑁆𑀦𑀁 𑀯𑀺𑀯𑀭𑁂𑀣, 𑀏𑀯𑀁 𑀢𑀁 𑀦𑀸𑀢𑀺𑀯𑀲𑁆𑀲𑀢𑀻’’𑀢𑀺. (𑀉𑀤𑀸. 𑁪𑁫; 𑀣𑁂𑀭𑀕𑀸. 𑁪𑁪𑁭; 𑀧𑀭𑀺. 𑁩𑁩𑁯);

𑀅𑀬𑀁 𑀕𑀸𑀣𑀸 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀯𑀼𑀢𑁆𑀢𑀸 𑀔𑀦𑁆𑀥𑀓𑁂 𑀣𑁂𑀭𑀕𑀸𑀣𑀸𑀬𑀜𑁆𑀘. 𑀔𑀦𑁆𑀥𑀓𑁂 𑀳𑀺 ‘‘𑀬𑁄 𑀆𑀧𑀢𑁆𑀢𑀺𑀁 𑀧𑀝𑀺𑀘𑁆𑀙𑀸𑀤𑁂𑀢𑀺, 𑀢𑀲𑁆𑀲 𑀓𑀺𑀮𑁂𑀲𑀸 𑀘 𑀧𑀼𑀦𑀧𑁆𑀧𑀼𑀦𑀁 𑀆𑀧𑀢𑁆𑀢𑀺𑀬𑁄 𑀘 𑀅𑀢𑀺𑀯𑀲𑁆𑀲𑀦𑁆𑀢𑀺, 𑀬𑁄 𑀧𑀦 𑀦 𑀧𑀝𑀺𑀘𑁆𑀙𑀸𑀤𑁂𑀢𑀺, 𑀢𑀲𑁆𑀲 𑀦𑀸𑀢𑀺𑀯𑀲𑁆𑀲𑀦𑁆𑀢𑀻’’𑀢𑀺 𑀇𑀫𑀁 𑀅𑀢𑁆𑀣𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀸. 𑀣𑁂𑀭𑀕𑀸𑀣𑀸𑀬𑀁 ‘‘𑀬𑀲𑁆𑀲 𑀭𑀸𑀕𑀸𑀤𑀺𑀘𑁆𑀙𑀤𑀦𑀁 𑀅𑀢𑁆𑀣𑀺, 𑀢𑀲𑁆𑀲 𑀧𑀼𑀦 𑀇𑀝𑁆𑀞𑀸𑀭𑀫𑁆𑀫𑀡𑀸𑀤𑀻𑀲𑀼 𑀭𑀸𑀕𑀸𑀤𑀺𑀲𑀫𑁆𑀪𑀯𑀢𑁄 𑀙𑀦𑁆𑀦𑀫𑀢𑀺𑀯𑀲𑁆𑀲𑀢𑀺. 𑀬𑁄 𑀯𑀸 𑀉𑀧𑁆𑀧𑀦𑁆𑀦𑁂 𑀓𑀺𑀮𑁂𑀲𑁂 𑀅𑀥𑀺𑀯𑀸𑀲𑁂𑀢𑀺, 𑀢𑀲𑁆𑀲𑁂𑀯 𑀅𑀥𑀺𑀯𑀸𑀲𑀺𑀢𑀓𑀺𑀮𑁂𑀲𑀘𑁆𑀙𑀤𑀦𑀘𑁆𑀙𑀦𑁆𑀦𑀸 𑀅𑀢𑁆𑀢𑀪𑀸𑀯𑀓𑀼𑀝𑀺 𑀧𑀼𑀦𑀧𑁆𑀧𑀼𑀦𑀁 𑀓𑀺𑀮𑁂𑀲𑀯𑀲𑁆𑀲𑀁 𑀅𑀢𑀺𑀯𑀲𑁆𑀲𑀢𑀺. 𑀬𑀲𑁆𑀲 𑀧𑀦 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀯𑀸𑀢𑁂𑀦 𑀓𑀺𑀮𑁂𑀲𑀘𑁆𑀙𑀤𑀦𑀲𑁆𑀲 𑀯𑀺𑀤𑁆𑀥𑀁𑀲𑀺𑀢𑀢𑁆𑀢𑀸 𑀯𑀺𑀯𑀝𑀸, 𑀢𑀲𑁆𑀲 𑀦𑀸𑀢𑀺𑀯𑀲𑁆𑀲𑀢𑀻’’𑀢𑀺. 𑀅𑀬𑀫𑀢𑁆𑀣𑁄 𑀇𑀥 𑀅𑀥𑀺𑀧𑁆𑀧𑁂𑀢𑁄. 𑀪𑀕𑀯𑀢𑀸 𑀳𑀺 𑀬𑀣𑀸𑀯𑀼𑀢𑁆𑀢𑀁 𑀙𑀤𑀦𑀁 𑀬𑀣𑀸𑀯𑀼𑀢𑁆𑀢𑁂𑀦𑁂𑀯 𑀦𑀬𑁂𑀦 𑀯𑀺𑀤𑁆𑀥𑀁𑀲𑀺𑀢𑀁, 𑀢𑀲𑁆𑀫𑀸 ‘‘𑀯𑀺𑀯𑀝𑀸 𑀓𑀼𑀝𑀻’’𑀢𑀺 𑀆𑀳. 𑀦𑀺𑀩𑁆𑀩𑀼𑀢𑁄𑀢𑀺 𑀉𑀧𑀲𑀦𑁆𑀢𑁄. 𑀕𑀺𑀦𑀻𑀢𑀺 𑀅𑀕𑁆𑀕𑀺. 𑀬𑁂𑀦 𑀳𑀺 𑀏𑀓𑀸𑀤𑀲𑀯𑀺𑀥𑁂𑀦 𑀅𑀕𑁆𑀕𑀺𑀦𑀸 𑀲𑀩𑁆𑀩𑀫𑀺𑀤𑀁 𑀆𑀤𑀺𑀢𑁆𑀢𑀁. 𑀬𑀣𑀸𑀳 𑁋 ‘‘𑀆𑀤𑀺𑀢𑁆𑀢𑀁 𑀭𑀸𑀕𑀕𑁆𑀕𑀺𑀦𑀸’’𑀢𑀺 𑀯𑀺𑀢𑁆𑀣𑀸𑀭𑁄. 𑀲𑁄 𑀅𑀕𑁆𑀕𑀺 𑀪𑀕𑀯𑀢𑁄 𑀩𑁄𑀥𑀺𑀫𑀽𑀮𑁂𑀬𑁂𑀯 𑀅𑀭𑀺𑀬𑀫𑀕𑁆𑀕𑀲𑀮𑀺𑀮𑀲𑁂𑀓𑁂𑀦 𑀦𑀺𑀩𑁆𑀩𑀼𑀢𑁄, 𑀢𑀲𑁆𑀫𑀸 ‘‘𑀦𑀺𑀩𑁆𑀩𑀼𑀢𑁄 𑀕𑀺𑀦𑀻’’𑀢𑀺 𑀆𑀳.

𑀏𑀯𑀁 𑀯𑀤𑀦𑁆𑀢𑁄 𑀘 𑀥𑀦𑀺𑀬𑀁 𑀅𑀢𑀼𑀝𑁆𑀞𑀩𑁆𑀩𑁂𑀦 𑀢𑀼𑀲𑁆𑀲𑀫𑀸𑀦𑀁 𑀅𑀜𑁆𑀜𑀸𑀧𑀤𑁂𑀲𑁂𑀦𑁂𑀯 𑀧𑀭𑀺𑀪𑀸𑀲𑀢𑀺, 𑀑𑀯𑀤𑀢𑀺, 𑀅𑀦𑀼𑀲𑀸𑀲𑀢𑀺. 𑀓𑀣𑀁? ‘‘𑀅𑀓𑁆𑀓𑁄𑀥𑀦𑁄’’𑀢𑀺 𑀳𑀺 𑀯𑀤𑀫𑀸𑀦𑁄, 𑀥𑀦𑀺𑀬, 𑀢𑁆𑀯𑀁 ‘‘𑀧𑀓𑁆𑀓𑁄𑀤𑀦𑁄𑀳𑀫𑀲𑁆𑀫𑀻’’𑀢𑀺 𑀢𑀼𑀝𑁆𑀞𑁄, 𑀑𑀤𑀦𑀧𑀸𑀓𑁄 𑀘 𑀬𑀸𑀯𑀚𑀻𑀯𑀁 𑀥𑀦𑀧𑀭𑀺𑀓𑁆𑀔𑀬𑁂𑀦 𑀓𑀢𑁆𑀢𑀩𑁆𑀩𑁄, 𑀥𑀦𑀧𑀭𑀺𑀓𑁆𑀔𑀬𑁄 𑀘 𑀆𑀭𑀓𑁆𑀔𑀸𑀤𑀺𑀤𑀼𑀓𑁆𑀔𑀧𑀤𑀝𑁆𑀞𑀸𑀦𑁄, 𑀏𑀯𑀁 𑀲𑀦𑁆𑀢𑁂 𑀤𑀼𑀓𑁆𑀔𑁂𑀦𑁂𑀯 𑀢𑀼𑀝𑁆𑀞𑁄 𑀳𑁄𑀲𑀺. 𑀅𑀳𑀁 𑀧𑀦 ‘‘𑀅𑀓𑁆𑀓𑁄𑀥𑀦𑁄𑀳𑀫𑀲𑁆𑀫𑀻’’𑀢𑀺 𑀢𑀼𑀲𑁆𑀲𑀦𑁆𑀢𑁄 𑀲𑀦𑁆𑀤𑀺𑀝𑁆𑀞𑀺𑀓𑀲𑀫𑁆𑀧𑀭𑀸𑀬𑀺𑀓𑀤𑀼𑀓𑁆𑀔𑀸𑀪𑀸𑀯𑁂𑀦 𑀢𑀼𑀝𑁆𑀞𑁄 𑀳𑁄𑀫𑀻𑀢𑀺 𑀤𑀻𑀧𑁂𑀢𑀺. ‘‘𑀯𑀺𑀕𑀢𑀔𑀺𑀮𑁄’’𑀢𑀺 𑀯𑀤𑀫𑀸𑀦𑁄 𑀢𑁆𑀯𑀁 ‘‘𑀤𑀼𑀤𑁆𑀥𑀔𑀻𑀭𑁄𑀳𑀫𑀲𑁆𑀫𑀻’’𑀢𑀺 𑀢𑀼𑀲𑁆𑀲𑀦𑁆𑀢𑁄 𑀅𑀓𑀢𑀓𑀺𑀘𑁆𑀘𑁄𑀯 ‘‘𑀓𑀢𑀓𑀺𑀘𑁆𑀘𑁄𑀳𑀫𑀲𑁆𑀫𑀻’’𑀢𑀺 𑀫𑀦𑁆𑀢𑁆𑀯𑀸 𑀢𑀼𑀝𑁆𑀞𑁄, 𑀅𑀳𑀁 𑀧𑀦 ‘‘𑀯𑀺𑀕𑀢𑀔𑀺𑀮𑁄𑀳𑀫𑀲𑁆𑀫𑀻’’𑀢𑀺 𑀢𑀼𑀲𑁆𑀲𑀦𑁆𑀢𑁄 𑀓𑀢𑀓𑀺𑀘𑁆𑀘𑁄𑀯 𑀢𑀼𑀝𑁆𑀞𑁄 𑀳𑁄𑀫𑀻𑀢𑀺 𑀤𑀻𑀧𑁂𑀢𑀺. ‘‘𑀅𑀦𑀼𑀢𑀻𑀭𑁂 𑀫𑀳𑀺𑀬𑁂𑀓𑀭𑀢𑁆𑀢𑀺𑀯𑀸𑀲𑁄’’𑀢𑀺 𑀯𑀤𑀫𑀸𑀦𑁄 𑀢𑁆𑀯𑀁 𑀅𑀦𑀼𑀢𑀻𑀭𑁂 𑀫𑀳𑀺𑀬𑀸 𑀲𑀫𑀸𑀦𑀯𑀸𑀲𑁄𑀢𑀺 𑀢𑀼𑀲𑁆𑀲𑀦𑁆𑀢𑁄 𑀘𑀢𑀼𑀫𑀸𑀲𑀦𑀺𑀩𑀤𑁆𑀥𑀯𑀸𑀲𑁂𑀦 𑀢𑀼𑀝𑁆𑀞𑁄. 𑀦𑀺𑀩𑀤𑁆𑀥𑀯𑀸𑀲𑁄 𑀘 𑀆𑀯𑀸𑀲𑀲𑀗𑁆𑀕𑁂𑀦 𑀳𑁄𑀢𑀺, 𑀲𑁄 𑀘 𑀤𑀼𑀓𑁆𑀔𑁄, 𑀏𑀯𑀁 𑀲𑀦𑁆𑀢𑁂 𑀤𑀼𑀓𑁆𑀔𑁂𑀦𑁂𑀯 𑀢𑀼𑀝𑁆𑀞𑁄 𑀳𑁄𑀲𑀺. 𑀅𑀳𑀁 𑀧𑀦 𑀏𑀓𑀭𑀢𑁆𑀢𑀺𑀯𑀸𑀲𑁄𑀢𑀺 𑀢𑀼𑀲𑁆𑀲𑀦𑁆𑀢𑁄 𑀅𑀦𑀺𑀩𑀤𑁆𑀥𑀯𑀸𑀲𑁂𑀦 𑀢𑀼𑀝𑁆𑀞𑁄, 𑀅𑀦𑀺𑀩𑀤𑁆𑀥𑀯𑀸𑀲𑁄 𑀘 𑀆𑀯𑀸𑀲𑀲𑀗𑁆𑀕𑀸𑀪𑀸𑀯𑁂𑀦 𑀳𑁄𑀢𑀺, 𑀆𑀯𑀸𑀲𑀲𑀗𑁆𑀕𑀸𑀪𑀸𑀯𑁄 𑀘 𑀲𑀼𑀔𑁄𑀢𑀺 𑀲𑀼𑀔𑁂𑀦𑁂𑀯 𑀢𑀼𑀝𑁆𑀞𑁄 𑀳𑁄𑀫𑀻𑀢𑀺 𑀤𑀻𑀧𑁂𑀢𑀺.

‘‘𑀯𑀺𑀯𑀝𑀸 𑀓𑀼𑀝𑀻’’𑀢𑀺 𑀯𑀤𑀫𑀸𑀦𑁄 𑀢𑁆𑀯𑀁 𑀙𑀦𑁆𑀦𑀸 𑀓𑀼𑀝𑀻𑀢𑀺 𑀢𑀼𑀲𑁆𑀲𑀦𑁆𑀢𑁄 𑀙𑀦𑁆𑀦𑀕𑁂𑀳𑀢𑀸𑀬 𑀢𑀼𑀝𑁆𑀞𑁄, 𑀕𑁂𑀳𑁂 𑀘 𑀢𑁂 𑀙𑀦𑁆𑀦𑁂𑀧𑀺 𑀅𑀢𑁆𑀢𑀪𑀸𑀯𑀓𑀼𑀝𑀺𑀓𑀁 𑀓𑀺𑀮𑁂𑀲𑀯𑀲𑁆𑀲𑀁 𑀅𑀢𑀺𑀯𑀲𑁆𑀲𑀢𑀺, 𑀬𑁂𑀦 𑀲𑀜𑁆𑀚𑀦𑀺𑀢𑁂𑀳𑀺 𑀘𑀢𑀽𑀳𑀺 𑀫𑀳𑁄𑀖𑁂𑀳𑀺 𑀯𑀼𑀬𑁆𑀳𑀫𑀸𑀦𑁄 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑀼𑀡𑁂𑀬𑁆𑀬𑀸𑀲𑀺, 𑀏𑀯𑀁 𑀲𑀦𑁆𑀢𑁂 𑀅𑀢𑀼𑀝𑁆𑀞𑀩𑁆𑀩𑁂𑀦𑁂𑀯 𑀢𑀼𑀝𑁆𑀞𑁄 𑀳𑁄𑀲𑀺. 𑀅𑀳𑀁 𑀧𑀦 ‘‘𑀯𑀺𑀯𑀝𑀸 𑀓𑀼𑀝𑀻’’𑀢𑀺 𑀢𑀼𑀲𑁆𑀲𑀦𑁆𑀢𑁄 𑀅𑀢𑁆𑀢𑀪𑀸𑀯𑀓𑀼𑀝𑀺𑀬𑀸 𑀓𑀺𑀮𑁂𑀲𑀘𑁆𑀙𑀤𑀦𑀸𑀪𑀸𑀯𑁂𑀦 𑀢𑀼𑀝𑁆𑀞𑁄. 𑀏𑀯𑀜𑁆𑀘 𑀫𑁂 𑀯𑀺𑀯𑀝𑀸𑀬 𑀓𑀼𑀝𑀺𑀬𑀸 𑀦 𑀢𑀁 𑀓𑀺𑀮𑁂𑀲𑀯𑀲𑁆𑀲𑀁 𑀅𑀢𑀺𑀯𑀲𑁆𑀲𑀢𑀺, 𑀬𑁂𑀦 𑀲𑀜𑁆𑀚𑀦𑀺𑀢𑁂𑀳𑀺 𑀘𑀢𑀽𑀳𑀺 𑀫𑀳𑁄𑀖𑁂𑀳𑀺 𑀯𑀼𑀬𑁆𑀳𑀫𑀸𑀦𑁄 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑀼𑀡𑁂𑀬𑁆𑀬𑀁, 𑀏𑀯𑀁 𑀲𑀦𑁆𑀢𑁂 𑀢𑀼𑀝𑁆𑀞𑀩𑁆𑀩𑁂𑀦𑁂𑀯 𑀢𑀼𑀝𑁆𑀞𑁄 𑀳𑁄𑀫𑀻𑀢𑀺 𑀤𑀻𑀧𑁂𑀢𑀺. ‘‘𑀦𑀺𑀩𑁆𑀩𑀼𑀢𑁄 𑀕𑀺𑀦𑀻’’𑀢𑀺 𑀯𑀤𑀫𑀸𑀦𑁄 𑀢𑁆𑀯𑀁 𑀆𑀳𑀺𑀢𑁄 𑀕𑀺𑀦𑀻𑀢𑀺 𑀢𑀼𑀲𑁆𑀲𑀦𑁆𑀢𑁄 𑀅𑀓𑀢𑀽𑀧𑀤𑁆𑀤𑀯𑀦𑀺𑀯𑀸𑀭𑀡𑁄𑀯 𑀓𑀢𑀽𑀧𑀤𑁆𑀤𑀯𑀦𑀺𑀯𑀸𑀭𑀡𑁄𑀲𑁆𑀫𑀻𑀢𑀺 𑀫𑀦𑁆𑀢𑁆𑀯𑀸 𑀢𑀼𑀝𑁆𑀞𑁄. 𑀅𑀳𑀁 𑀧𑀦 𑀦𑀺𑀩𑁆𑀩𑀼𑀢𑁄 𑀕𑀺𑀦𑀻𑀢𑀺 𑀢𑀼𑀲𑁆𑀲𑀦𑁆𑀢𑁄 𑀏𑀓𑀸𑀤𑀲𑀕𑁆𑀕𑀺𑀧𑀭𑀺𑀴𑀸𑀳𑀸𑀪𑀸𑀯𑀢𑁄 𑀓𑀢𑀽𑀧𑀤𑁆𑀤𑀯𑀦𑀺𑀯𑀸𑀭𑀡𑀢𑀸𑀬𑁂𑀯 𑀢𑀼𑀝𑁆𑀞𑁄𑀢𑀺 𑀤𑀻𑀧𑁂𑀢𑀺. ‘‘𑀅𑀣 𑀘𑁂 𑀧𑀢𑁆𑀣𑀬𑀲𑀻 𑀧𑀯𑀲𑁆𑀲 𑀤𑁂𑀯𑀸’’𑀢𑀺 𑀯𑀤𑀫𑀸𑀦𑁄 𑀏𑀯𑀁 𑀯𑀺𑀕𑀢𑀤𑀼𑀓𑁆𑀔𑀸𑀦𑀁 𑀅𑀦𑀼𑀧𑁆𑀧𑀢𑁆𑀢𑀲𑀼𑀔𑀸𑀦𑀁 𑀓𑀢𑀲𑀩𑁆𑀩𑀓𑀺𑀘𑁆𑀘𑀸𑀦𑀁 𑀅𑀫𑁆𑀳𑀸𑀤𑀺𑀲𑀸𑀦𑀁 𑀏𑀢𑀁 𑀯𑀘𑀦𑀁 𑀲𑁄𑀪𑀢𑀺, 𑀅𑀣 𑀘𑁂 𑀧𑀢𑁆𑀣𑀬𑀲𑀺, 𑀧𑀯𑀲𑁆𑀲 𑀤𑁂𑀯, 𑀦 𑀦𑁄 𑀢𑀬𑀺 𑀯𑀲𑁆𑀲𑀦𑁆𑀢𑁂 𑀯𑀸 𑀅𑀯𑀲𑁆𑀲𑀦𑁆𑀢𑁂 𑀯𑀸 𑀯𑀼𑀟𑁆𑀠𑀺 𑀯𑀸 𑀳𑀸𑀦𑀺 𑀯𑀸 𑀅𑀢𑁆𑀣𑀺, 𑀢𑁆𑀯𑀁 𑀧𑀦 𑀓𑀲𑁆𑀫𑀸 𑀏𑀯𑀁 𑀯𑀤𑀲𑀻𑀢𑀺 𑀤𑀻𑀧𑁂𑀢𑀺. 𑀢𑀲𑁆𑀫𑀸 𑀬𑀁 𑀯𑀼𑀢𑁆𑀢𑀁 ‘‘𑀏𑀯𑀁 𑀯𑀤𑀦𑁆𑀢𑁄 𑀘 𑀥𑀦𑀺𑀬 𑀅𑀢𑀼𑀝𑁆𑀞𑀩𑁆𑀩𑁂𑀦𑁂𑀯 𑀢𑀼𑀲𑁆𑀲𑀫𑀸𑀦𑀁 𑀅𑀜𑁆𑀜𑀸𑀧𑀤𑁂𑀲𑁂𑀦𑁂𑀯 𑀧𑀭𑀺𑀪𑀸𑀲𑀢𑀺 𑀑𑀯𑀤𑀢𑀺, 𑀅𑀦𑀼𑀲𑀸𑀲𑀢𑀻’’𑀢𑀺, 𑀢𑀁 𑀲𑀫𑁆𑀫𑀤𑁂𑀯 𑀯𑀼𑀢𑁆𑀢𑀦𑁆𑀢𑀺.

𑁨𑁦. 𑀏𑀯𑀫𑀺𑀫𑀁 𑀪𑀕𑀯𑀢𑀸 𑀯𑀼𑀢𑁆𑀢𑀁 𑀕𑀸𑀣𑀁 𑀲𑀼𑀢𑁆𑀯𑀸𑀧𑀺 𑀥𑀦𑀺𑀬𑁄 𑀕𑁄𑀧𑁄 ‘‘𑀓𑁄 𑀅𑀬𑀁 𑀕𑀸𑀣𑀁 𑀪𑀸𑀲𑀢𑀻’’𑀢𑀺 𑀅𑀯𑀢𑁆𑀯𑀸 𑀢𑁂𑀦 𑀲𑀼𑀪𑀸𑀲𑀺𑀢𑁂𑀦 𑀧𑀭𑀺𑀢𑀼𑀝𑁆𑀞𑁄 𑀧𑀼𑀦𑀧𑀺 𑀢𑀣𑀸𑀭𑀽𑀧𑀁 𑀲𑁄𑀢𑀼𑀓𑀸𑀫𑁄 𑀅𑀧𑀭𑀫𑁆𑀧𑀺 𑀕𑀸𑀣𑀫𑀸𑀳 ‘‘𑀅𑀦𑁆𑀥𑀓𑀫𑀓𑀲𑀸’’𑀢𑀺. 𑀢𑀢𑁆𑀣 𑀅𑀦𑁆𑀥𑀓𑀸𑀢𑀺 𑀓𑀸𑀴𑀫𑀓𑁆𑀔𑀺𑀓𑀸𑀦𑀁 𑀅𑀥𑀺𑀯𑀘𑀦𑀁, 𑀧𑀺𑀗𑁆𑀕𑀮𑀫𑀓𑁆𑀔𑀺𑀓𑀸𑀦𑀦𑁆𑀢𑀺𑀧𑀺 𑀏𑀓𑁂. 𑀫𑀓𑀲𑀸𑀢𑀺 𑀫𑀓𑀲𑀸𑀬𑁂𑀯. 𑀦 𑀯𑀺𑀚𑁆𑀚𑀭𑁂𑀢𑀺 𑀦𑀢𑁆𑀣𑀺. 𑀓𑀘𑁆𑀙𑁂𑀢𑀺 𑀤𑁆𑀯𑁂 𑀓𑀘𑁆𑀙𑀸 𑁋 𑀦𑀤𑀻𑀓𑀘𑁆𑀙𑁄 𑀘 𑀧𑀩𑁆𑀩𑀢𑀓𑀘𑁆𑀙𑁄 𑀘. 𑀇𑀥 𑀦𑀤𑀻𑀓𑀘𑁆𑀙𑁄. 𑀭𑀼𑀴𑁆𑀳𑀢𑀺𑀡𑁂𑀢𑀺 𑀲𑀜𑁆𑀚𑀸𑀢𑀢𑀺𑀡𑁂. 𑀘𑀭𑀦𑁆𑀢𑀻𑀢𑀺 𑀪𑀢𑁆𑀢𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀺. 𑀯𑀼𑀝𑁆𑀞𑀺𑀫𑁆𑀧𑀻𑀢𑀺 𑀯𑀸𑀢𑀯𑀼𑀝𑁆𑀞𑀺𑀆𑀤𑀺𑀓𑀸 𑀅𑀦𑁂𑀓𑀸 𑀯𑀼𑀝𑁆𑀞𑀺𑀬𑁄, 𑀢𑀸 𑀆𑀴𑀯𑀓𑀲𑀼𑀢𑁆𑀢𑁂 𑀧𑀓𑀸𑀲𑀬𑀺𑀲𑁆𑀲𑀸𑀫. 𑀇𑀥 𑀧𑀦 𑀯𑀲𑁆𑀲𑀯𑀼𑀝𑁆𑀞𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀳𑁂𑀬𑁆𑀬𑀼𑀦𑁆𑀢𑀺 𑀔𑀫𑁂𑀬𑁆𑀬𑀼𑀁. 𑀲𑁂𑀲𑀁 𑀧𑀸𑀓𑀝𑀫𑁂𑀯. 𑀏𑀢𑁆𑀣 𑀥𑀦𑀺𑀬𑁄 𑀬𑁂 𑀅𑀦𑁆𑀥𑀓𑀫𑀓𑀲𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀭𑀼𑀥𑀺𑀭𑁂 𑀧𑀺𑀯𑀦𑁆𑀢𑀸 𑀫𑀼𑀳𑀼𑀢𑁆𑀢𑁂𑀦𑁂𑀯 𑀕𑀸𑀯𑁄 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑁂𑀦𑁆𑀢𑀺, 𑀢𑀲𑁆𑀫𑀸 𑀯𑀼𑀝𑁆𑀞𑀺𑀢𑀫𑀢𑁆𑀢𑁂𑀬𑁂𑀯 𑀢𑁂 𑀕𑁄𑀧𑀸𑀮𑀓𑀸 𑀧𑀁𑀲𑀼𑀦𑀸 𑀘 𑀲𑀸𑀔𑀸𑀳𑀺 𑀘 𑀫𑀸𑀭𑁂𑀦𑁆𑀢𑀺, 𑀢𑁂𑀲𑀁 𑀅𑀪𑀸𑀯𑁂𑀦 𑀕𑀼𑀦𑁆𑀦𑀁 𑀔𑁂𑀫𑀢𑀁, 𑀓𑀘𑁆𑀙𑁂 𑀭𑀼𑀴𑁆𑀳𑀢𑀺𑀡𑀘𑀭𑀡𑁂𑀦 𑀅𑀤𑁆𑀥𑀸𑀦𑀕𑀫𑀦𑀧𑀭𑀺𑀲𑁆𑀲𑀫𑀸𑀪𑀸𑀯𑀁 𑀯𑀢𑁆𑀯𑀸 𑀔𑀼𑀤𑀸𑀓𑀺𑀮𑀫𑀣𑀸𑀪𑀸𑀯𑀜𑁆𑀘 𑀤𑀻𑀧𑁂𑀦𑁆𑀢𑁄 ‘‘𑀬𑀣𑀸 𑀅𑀜𑁆𑀜𑁂𑀲𑀁 𑀕𑀸𑀯𑁄 𑀅𑀦𑁆𑀥𑀓𑀫𑀓𑀲𑀲𑀫𑁆𑀨𑀲𑁆𑀲𑁂𑀳𑀺 𑀤𑀺𑀲𑁆𑀲𑀫𑀸𑀦𑀸 𑀅𑀤𑁆𑀥𑀸𑀦𑀕𑀫𑀦𑁂𑀦 𑀓𑀺𑀮𑀦𑁆𑀢𑀸 𑀔𑀼𑀤𑀸𑀬 𑀫𑀺𑀮𑀸𑀬𑀫𑀸𑀦𑀸 𑀏𑀓𑀯𑀼𑀝𑁆𑀞𑀺𑀦𑀺𑀧𑀸𑀢𑀫𑁆𑀧𑀺 𑀦 𑀲𑀳𑁂𑀬𑁆𑀬𑀼𑀁, 𑀦 𑀫𑁂 𑀢𑀣𑀸 𑀕𑀸𑀯𑁄, 𑀫𑀬𑁆𑀳𑀁 𑀧𑀦 𑀕𑀸𑀯𑁄 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀪𑀸𑀯𑀸 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀸 𑀢𑀺𑀓𑁆𑀔𑀢𑀼𑀁 𑀯𑀸 𑀯𑀼𑀝𑁆𑀞𑀺𑀫𑁆𑀧𑀺 𑀲𑀳𑁂𑀬𑁆𑀬𑀼’’𑀦𑁆𑀢𑀺 𑀤𑀻𑀧𑁂𑀢𑀺.

𑁨𑁧. 𑀢𑀢𑁄 𑀪𑀕𑀯𑀸 𑀬𑀲𑁆𑀫𑀸 𑀥𑀦𑀺𑀬𑁄 𑀅𑀦𑁆𑀢𑀭𑀤𑀻𑀧𑁂 𑀯𑀲𑀦𑁆𑀢𑁄 𑀪𑀬𑀁 𑀤𑀺𑀲𑁆𑀯𑀸, 𑀓𑀼𑀮𑁆𑀮𑀁 𑀩𑀦𑁆𑀥𑀺𑀢𑁆𑀯𑀸, 𑀫𑀳𑀸𑀫𑀳𑀺𑀁 𑀢𑀭𑀺𑀢𑁆𑀯𑀸, 𑀢𑀁 𑀓𑀘𑁆𑀙𑀁 𑀆𑀕𑀫𑁆𑀫 ‘‘𑀅𑀳𑀁 𑀲𑀼𑀝𑁆𑀞𑀼 𑀆𑀕𑀢𑁄, 𑀦𑀺𑀩𑁆𑀪𑀬𑁂𑀯 𑀞𑀸𑀦𑁂 𑀞𑀺𑀢𑁄’’𑀢𑀺 𑀫𑀜𑁆𑀜𑀫𑀸𑀦𑁄 𑀏𑀯𑀫𑀸𑀳, 𑀲𑀪𑀬𑁂 𑀏𑀯 𑀘 𑀲𑁄 𑀞𑀸𑀦𑁂 𑀞𑀺𑀢𑁄, 𑀢𑀲𑁆𑀫𑀸 𑀢𑀲𑁆𑀲 𑀆𑀕𑀫𑀦𑀝𑁆𑀞𑀸𑀦𑀸 𑀅𑀢𑁆𑀢𑀦𑁄 𑀆𑀕𑀫𑀦𑀝𑁆𑀞𑀸𑀦𑀁 𑀉𑀢𑁆𑀢𑀭𑀺𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘 𑀯𑀡𑁆𑀡𑁂𑀦𑁆𑀢𑁄 ‘‘𑀩𑀤𑁆𑀥𑀸𑀲𑀺 𑀪𑀺𑀲𑀻’’𑀢𑀺 𑀇𑀫𑀁 𑀕𑀸𑀣𑀫𑀪𑀸𑀲𑀺, 𑀅𑀢𑁆𑀣𑀲𑀪𑀸𑀕𑀁 𑀦𑁄 𑀩𑁆𑀬𑀜𑁆𑀚𑀦𑀲𑀪𑀸𑀕𑀁.

𑀢𑀢𑁆𑀣 𑀪𑀺𑀲𑀻𑀢𑀺 𑀧𑀢𑁆𑀣𑀭𑀺𑀢𑁆𑀯𑀸 𑀧𑀼𑀣𑀼𑀮𑀁 𑀓𑀢𑁆𑀯𑀸 𑀩𑀤𑁆𑀥𑀓𑀼𑀮𑁆𑀮𑁄 𑀯𑀼𑀘𑁆𑀘𑀢𑀺 𑀮𑁄𑀓𑁂. 𑀅𑀭𑀺𑀬𑀲𑁆𑀲 𑀧𑀦 𑀥𑀫𑁆𑀫𑀯𑀺𑀦𑀬𑁂 𑀅𑀭𑀺𑀬𑀫𑀕𑁆𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀭𑀺𑀬𑀫𑀕𑁆𑀕𑁄 𑀳𑀺 𑁋

‘‘𑀫𑀕𑁆𑀕𑁄 𑀧𑀚𑁆𑀚𑁄 𑀧𑀣𑁄 𑀧𑀦𑁆𑀣𑁄, 𑀅𑀜𑁆𑀚𑀲𑀁 𑀯𑀝𑀼𑀫𑀸𑀬𑀦𑀁;

𑀦𑀸𑀯𑀸 𑀉𑀢𑁆𑀢𑀭𑀲𑁂𑀢𑀼 𑀘, 𑀓𑀼𑀮𑁆𑀮𑁄 𑀘 𑀪𑀺𑀲𑀺 𑀲𑀗𑁆𑀓𑀫𑁄’’. (𑀘𑀽𑀴𑀦𑀺. 𑀧𑀸𑀭𑀸𑀬𑀦𑀢𑁆𑀣𑀼𑀢𑀺𑀕𑀸𑀣𑀸𑀦𑀺𑀤𑁆𑀤𑁂𑀲 𑁧𑁦𑁧);

‘‘𑀅𑀤𑁆𑀥𑀸𑀦𑀁 𑀧𑀪𑀯𑁄 𑀘𑁂𑀯, 𑀢𑀢𑁆𑀣 𑀢𑀢𑁆𑀣 𑀧𑀓𑀸𑀲𑀺𑀢𑁄’’.

𑀇𑀫𑀸𑀬𑀧𑀺 𑀕𑀸𑀣𑀸𑀬 𑀪𑀕𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀢𑀁 𑀑𑀯𑀤𑀦𑁆𑀢𑁄 𑀇𑀫𑀁 𑀅𑀢𑁆𑀣𑀁 𑀆𑀳𑀸𑀢𑀺 𑀯𑁂𑀤𑀺𑀢𑀩𑁆𑀩𑁄 𑁋 𑀥𑀦𑀺𑀬, 𑀢𑁆𑀯𑀁 𑀓𑀼𑀮𑁆𑀮𑀁 𑀩𑀦𑁆𑀥𑀺𑀢𑁆𑀯𑀸, 𑀫𑀳𑀺𑀁 𑀢𑀭𑀺𑀢𑁆𑀯𑀸, 𑀇𑀫𑀁 𑀞𑀸𑀦𑀫𑀸𑀕𑀢𑁄, 𑀧𑀼𑀦𑀧𑀺 𑀘 𑀢𑁂 𑀓𑀼𑀮𑁆𑀮𑁄 𑀩𑀦𑁆𑀥𑀺𑀢𑀩𑁆𑀩𑁄 𑀏𑀯 𑀪𑀯𑀺𑀲𑁆𑀲𑀢𑀺, 𑀦𑀤𑀻 𑀘 𑀢𑀭𑀺𑀢𑀩𑁆𑀩𑀸, 𑀦 𑀘𑁂𑀢𑀁 𑀞𑀸𑀦𑀁 𑀔𑁂𑀫𑀁. 𑀫𑀬𑀸 𑀧𑀦 𑀏𑀓𑀘𑀺𑀢𑁆𑀢𑁂 𑀫𑀕𑁆𑀕𑀗𑁆𑀕𑀸𑀦𑀺 𑀲𑀫𑁄𑀥𑀸𑀦𑁂𑀢𑁆𑀯𑀸 𑀜𑀸𑀡𑀩𑀦𑁆𑀥𑀦𑁂𑀦 𑀩𑀤𑁆𑀥𑀸 𑀅𑀳𑁄𑀲𑀺 𑀪𑀺𑀲𑀺. 𑀲𑀸 𑀘 𑀲𑀢𑁆𑀢𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀧𑀭𑀺𑀧𑀼𑀡𑁆𑀡𑀢𑀸𑀬 𑀏𑀓𑀭𑀲𑀪𑀸𑀯𑀽𑀧𑀕𑀢𑀢𑁆𑀢𑀸 𑀅𑀜𑁆𑀜𑀫𑀜𑁆𑀜𑀁 𑀅𑀦𑀢𑀺𑀯𑀢𑁆𑀢𑀦𑁂𑀦 𑀧𑀼𑀦 𑀩𑀦𑁆𑀥𑀺𑀢𑀩𑁆𑀩𑀧𑁆𑀧𑀬𑁄𑀚𑀦𑀸𑀪𑀸𑀯𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀓𑁂𑀦𑀘𑀺 𑀫𑁄𑀘𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀘 𑀲𑀼𑀲𑀗𑁆𑀔𑀢𑀸. 𑀢𑀸𑀬 𑀘𑀫𑁆𑀳𑀺 𑀢𑀺𑀡𑁆𑀡𑁄, 𑀧𑀼𑀩𑁆𑀩𑁂 𑀧𑀢𑁆𑀣𑀺𑀢𑀁 𑀢𑀻𑀭𑀧𑁆𑀧𑀤𑁂𑀲𑀁 𑀕𑀢𑁄. 𑀕𑀘𑁆𑀙𑀦𑁆𑀢𑁄𑀧𑀺 𑀘 𑀦 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀯𑀺𑀬 𑀓𑀜𑁆𑀘𑀺𑀤𑁂𑀯 𑀧𑀤𑁂𑀲𑀁 𑀕𑀢𑁄. 𑀅𑀣 𑀔𑁄 𑀧𑀸𑀭𑀕𑀢𑁄 𑀲𑀩𑁆𑀩𑀸𑀲𑀯𑀓𑁆𑀔𑀬𑀁 𑀲𑀩𑁆𑀩𑀥𑀫𑁆𑀫𑀧𑀸𑀭𑀁 𑀧𑀭𑀫𑀁 𑀔𑁂𑀫𑀁 𑀦𑀺𑀩𑁆𑀩𑀸𑀦𑀁 𑀕𑀢𑁄, 𑀢𑀺𑀡𑁆𑀡𑁄𑀢𑀺 𑀯𑀸 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄, 𑀧𑀸𑀭𑀕𑀢𑁄𑀢𑀺 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄. 𑀓𑀺𑀁 𑀯𑀺𑀦𑁂𑀬𑁆𑀬 𑀧𑀸𑀭𑀕𑀢𑁄𑀢𑀺 𑀘𑁂? 𑀯𑀺𑀦𑁂𑀬𑁆𑀬 𑀑𑀖𑀁, 𑀓𑀸𑀫𑁄𑀖𑀸𑀤𑀺𑀘𑀢𑀼𑀩𑁆𑀩𑀺𑀥𑀁 𑀑𑀖𑀁 𑀢𑀭𑀺𑀢𑁆𑀯𑀸 𑀅𑀢𑀺𑀓𑁆𑀓𑀫𑁆𑀫 𑀢𑀁 𑀧𑀸𑀭𑀁 𑀕𑀢𑁄𑀢𑀺. 𑀇𑀤𑀸𑀦𑀺 𑀘 𑀧𑀦 𑀫𑁂 𑀧𑀼𑀦 𑀢𑀭𑀺𑀢𑀩𑁆𑀩𑀸𑀪𑀸𑀯𑀢𑁄 𑀅𑀢𑁆𑀣𑁄 𑀪𑀺𑀲𑀺𑀬𑀸 𑀦 𑀯𑀺𑀚𑁆𑀚𑀢𑀺, 𑀢𑀲𑁆𑀫𑀸 𑀫𑀫𑁂𑀯 𑀬𑀼𑀢𑁆𑀢𑀁 𑀯𑀢𑁆𑀢𑀼𑀁 ‘‘𑀅𑀣 𑀘𑁂 𑀧𑀢𑁆𑀣𑀬𑀲𑀻 𑀧𑀯𑀲𑁆𑀲 𑀤𑁂𑀯𑀸’’𑀢𑀺.

𑁨𑁨. 𑀢𑀫𑁆𑀧𑀺 𑀲𑀼𑀢𑁆𑀯𑀸 𑀥𑀦𑀺𑀬𑁄 𑀧𑀼𑀭𑀺𑀫𑀦𑀬𑁂𑀦𑁂𑀯 ‘‘𑀕𑁄𑀧𑀻 𑀫𑀫 𑀅𑀲𑁆𑀲𑀯𑀸’’𑀢𑀺 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺. 𑀢𑀢𑁆𑀣 𑀕𑁄𑀧𑀻𑀢𑀺 𑀪𑀭𑀺𑀬𑀁 𑀦𑀺𑀤𑁆𑀤𑀺𑀲𑀢𑀺. 𑀅𑀲𑁆𑀲𑀯𑀸𑀢𑀺 𑀯𑀘𑀦𑀓𑀭𑀸 𑀓𑀺𑀁𑀓𑀸𑀭𑀧𑀝𑀺𑀲𑀸𑀯𑀺𑀦𑀻. 𑀅𑀮𑁄𑀮𑀸𑀢𑀺 𑀫𑀸𑀢𑀼𑀕𑀸𑀫𑁄 𑀳𑀺 𑀧𑀜𑁆𑀘𑀳𑀺 𑀮𑁄𑀮𑀢𑀸𑀳𑀺 𑀮𑁄𑀮𑁄 𑀳𑁄𑀢𑀺 𑁋 𑀆𑀳𑀸𑀭𑀮𑁄𑀮𑀢𑀸𑀬, 𑀅𑀮𑀗𑁆𑀓𑀸𑀭𑀮𑁄𑀮𑀢𑀸𑀬, 𑀧𑀭𑀧𑀼𑀭𑀺𑀲𑀮𑁄𑀮𑀢𑀸𑀬, 𑀥𑀦𑀮𑁄𑀮𑀢𑀸𑀬, 𑀧𑀸𑀤𑀮𑁄𑀮𑀢𑀸𑀬. 𑀢𑀣𑀸 𑀳𑀺 𑀫𑀸𑀢𑀼𑀕𑀸𑀫𑁄 𑀪𑀢𑁆𑀢𑀧𑀽𑀯𑀲𑀼𑀭𑀸𑀤𑀺𑀪𑁂𑀤𑁂 𑀆𑀳𑀸𑀭𑁂 𑀮𑁄𑀮𑀢𑀸𑀬 𑀅𑀦𑁆𑀢𑀫𑀲𑁄 𑀧𑀸𑀭𑀺𑀯𑀸𑀲𑀺𑀓𑀪𑀢𑁆𑀢𑀫𑁆𑀧𑀺 𑀪𑀼𑀜𑁆𑀚𑀢𑀺, 𑀳𑀢𑁆𑀣𑁄𑀢𑀸𑀧𑀓𑀫𑁆𑀧𑀺 𑀔𑀸𑀤𑀢𑀺, 𑀤𑀺𑀕𑀼𑀡𑀁 𑀥𑀦𑀫𑀦𑀼𑀧𑁆𑀧𑀤𑀢𑁆𑀯𑀸𑀧𑀺 𑀲𑀼𑀭𑀁 𑀧𑀺𑀯𑀢𑀺. 𑀅𑀮𑀗𑁆𑀓𑀸𑀭𑀮𑁄𑀮𑀢𑀸𑀬 𑀅𑀜𑁆𑀜𑀁 𑀅𑀮𑀗𑁆𑀓𑀸𑀭𑀁 𑀅𑀮𑀪𑀫𑀸𑀦𑁄 𑀅𑀦𑁆𑀢𑀫𑀲𑁄 𑀉𑀤𑀓𑀢𑁂𑀮𑀓𑁂𑀦𑀧𑀺 𑀓𑁂𑀲𑁂 𑀑𑀲𑀡𑁆𑀟𑁂𑀢𑁆𑀯𑀸 𑀫𑀼𑀔𑀁 𑀧𑀭𑀺𑀫𑀚𑁆𑀚𑀢𑀺. 𑀧𑀭𑀧𑀼𑀭𑀺𑀲𑀮𑁄𑀮𑀢𑀸𑀬 𑀅𑀦𑁆𑀢𑀫𑀲𑁄 𑀧𑀼𑀢𑁆𑀢𑁂𑀦𑀧𑀺 𑀢𑀸𑀤𑀺𑀲𑁂 𑀧𑀤𑁂𑀲𑁂 𑀧𑀓𑁆𑀓𑁄𑀲𑀺𑀬𑀫𑀸𑀦𑁄 𑀧𑀞𑀫𑀁 𑀅𑀲𑀤𑁆𑀥𑀫𑁆𑀫𑀯𑀲𑁂𑀦 𑀘𑀺𑀦𑁆𑀢𑁂𑀢𑀺. 𑀥𑀦𑀮𑁄𑀮𑀢𑀸𑀬 ‘‘𑀳𑀁𑀲𑀭𑀸𑀚𑀁 𑀕𑀳𑁂𑀢𑁆𑀯𑀸𑀦 𑀲𑀼𑀯𑀡𑁆𑀡𑀸 𑀧𑀭𑀺𑀳𑀸𑀬𑀣’’. 𑀧𑀸𑀤𑀮𑁄𑀮𑀢𑀸𑀬 𑀆𑀭𑀸𑀫𑀸𑀤𑀺𑀕𑀫𑀦𑀲𑀻𑀮𑁄 𑀳𑀼𑀢𑁆𑀯𑀸 𑀲𑀩𑁆𑀩𑀁 𑀥𑀦𑀁 𑀯𑀺𑀦𑀸𑀲𑁂𑀢𑀺. 𑀢𑀢𑁆𑀣 𑀥𑀦𑀺𑀬𑁄 ‘‘𑀏𑀓𑀸𑀧𑀺 𑀮𑁄𑀮𑀢𑀸 𑀫𑀬𑁆𑀳𑀁 𑀕𑁄𑀧𑀺𑀬𑀸 𑀦𑀢𑁆𑀣𑀻’’𑀢𑀺 𑀤𑀲𑁆𑀲𑁂𑀦𑁆𑀢𑁄 𑀅𑀮𑁄𑀮𑀸𑀢𑀺 𑀆𑀳.

𑀤𑀻𑀖𑀭𑀢𑁆𑀢𑀁 𑀲𑀁𑀯𑀸𑀲𑀺𑀬𑀸𑀢𑀺 𑀤𑀻𑀖𑀓𑀸𑀮𑀁 𑀲𑀤𑁆𑀥𑀺𑀁 𑀯𑀲𑀫𑀸𑀦𑀸 𑀓𑁄𑀫𑀸𑀭𑀪𑀸𑀯𑀢𑁄 𑀧𑀪𑀼𑀢𑀺 𑀏𑀓𑀢𑁄 𑀯𑀟𑁆𑀠𑀺𑀢𑀸. 𑀢𑁂𑀦 𑀧𑀭𑀧𑀼𑀭𑀺𑀲𑁂 𑀦 𑀚𑀸𑀦𑀸𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀫𑀦𑀸𑀧𑀸𑀢𑀺 𑀏𑀯𑀁 𑀧𑀭𑀧𑀼𑀭𑀺𑀲𑁂 𑀅𑀚𑀸𑀦𑀦𑁆𑀢𑀻 𑀫𑀫𑁂𑀯 𑀫𑀦𑀁 𑀅𑀮𑁆𑀮𑀻𑀬𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑀲𑁆𑀲𑀸 𑀦 𑀲𑀼𑀡𑀸𑀫𑀺 𑀓𑀺𑀜𑁆𑀘𑀺 𑀧𑀸𑀧𑀦𑁆𑀢𑀺 ‘‘𑀇𑀢𑁆𑀣𑀦𑁆𑀦𑀸𑀫𑁂𑀦 𑀦𑀸𑀫 𑀲𑀤𑁆𑀥𑀺𑀁 𑀇𑀫𑀸𑀬 𑀳𑀲𑀺𑀢𑀁 𑀯𑀸 𑀮𑀧𑀺𑀢𑀁 𑀯𑀸’’𑀢𑀺 𑀏𑀯𑀁 𑀢𑀲𑁆𑀲𑀸 𑀦 𑀲𑀼𑀡𑀸𑀫𑀺, 𑀓𑀜𑁆𑀘𑀺 𑀅𑀢𑀺𑀘𑀸𑀭𑀤𑁄𑀲𑀦𑁆𑀢𑀺 𑀤𑀲𑁆𑀲𑁂𑀢𑀺.

𑁨𑁩. 𑀅𑀣 𑀪𑀕𑀯𑀸 𑀏𑀢𑁂𑀳𑀺 𑀕𑀼𑀡𑁂𑀳𑀺 𑀕𑁄𑀧𑀺𑀬𑀸 𑀢𑀼𑀝𑁆𑀞𑀁 𑀥𑀦𑀺𑀬𑀁 𑀑𑀯𑀤𑀦𑁆𑀢𑁄 𑀧𑀼𑀭𑀺𑀫𑀦𑀬𑁂𑀦𑁂𑀯 ‘‘𑀘𑀺𑀢𑁆𑀢𑀁 𑀫𑀫 𑀅𑀲𑁆𑀲𑀯’’𑀦𑁆𑀢𑀺 𑀇𑀫𑀁 𑀕𑀸𑀣𑀫𑀪𑀸𑀲𑀺, 𑀅𑀢𑁆𑀣𑀲𑀪𑀸𑀕𑀁, 𑀩𑁆𑀬𑀜𑁆𑀚𑀦𑀲𑀪𑀸𑀕𑀜𑁆𑀘. 𑀢𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯 𑀧𑀤𑀸𑀦𑀺. 𑀅𑀬𑀁 𑀧𑀦 𑀅𑀥𑀺𑀧𑁆𑀧𑀸𑀬𑁄 𑁋 𑀥𑀦𑀺𑀬, 𑀢𑁆𑀯𑀁 ‘‘𑀕𑁄𑀧𑀻 𑀫𑀫 𑀅𑀲𑁆𑀲𑀯𑀸’’𑀢𑀺 𑀢𑀼𑀝𑁆𑀞𑁄, 𑀲𑀸 𑀧𑀦 𑀢𑁂 𑀅𑀲𑁆𑀲𑀯𑀸 𑀪𑀯𑁂𑀬𑁆𑀬 𑀯𑀸 𑀦 𑀯𑀸; 𑀤𑀼𑀚𑁆𑀚𑀸𑀦𑀁 𑀧𑀭𑀘𑀺𑀢𑁆𑀢𑀁, 𑀯𑀺𑀲𑁂𑀲𑀢𑁄 𑀫𑀸𑀢𑀼𑀕𑀸𑀫𑀲𑁆𑀲. 𑀫𑀸𑀢𑀼𑀕𑀸𑀫𑀜𑁆𑀳𑀺 𑀓𑀼𑀘𑁆𑀙𑀺𑀬𑀸 𑀧𑀭𑀺𑀳𑀭𑀦𑁆𑀢𑀸𑀧𑀺 𑀭𑀓𑁆𑀔𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀏𑀯𑀁 𑀤𑀼𑀭𑀓𑁆𑀔𑀘𑀺𑀢𑁆𑀢𑀢𑁆𑀢𑀸 𑀏𑀯 𑀦 𑀲𑀓𑁆𑀓𑀸 𑀢𑀼𑀫𑁆𑀳𑀸𑀤𑀺𑀲𑁂𑀳𑀺 𑀇𑀢𑁆𑀣𑀻 𑀅𑀮𑁄𑀮𑀸𑀢𑀺 𑀯𑀸 𑀲𑀁𑀯𑀸𑀲𑀺𑀬𑀸𑀢𑀺 𑀯𑀸 𑀫𑀦𑀸𑀧𑀸𑀢𑀺 𑀯𑀸 𑀦𑀺𑀧𑁆𑀧𑀸𑀧𑀸𑀢𑀺 𑀯𑀸 𑀚𑀸𑀦𑀺𑀢𑀼𑀁. 𑀫𑀬𑁆𑀳𑀁 𑀧𑀦 𑀘𑀺𑀢𑁆𑀢𑀁 𑀅𑀲𑁆𑀲𑀯𑀁 𑀑𑀯𑀸𑀤𑀧𑀝𑀺𑀓𑀭𑀁 𑀫𑀫 𑀯𑀲𑁂 𑀯𑀢𑁆𑀢𑀢𑀺, 𑀦𑀸𑀳𑀁 𑀢𑀲𑁆𑀲 𑀯𑀲𑁂 𑀯𑀢𑁆𑀢𑀸𑀫𑀺. 𑀲𑁄 𑀘𑀲𑁆𑀲 𑀅𑀲𑁆𑀲𑀯𑀪𑀸𑀯𑁄 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑁂 𑀙𑀦𑁆𑀦𑀁 𑀯𑀡𑁆𑀡𑀸𑀦𑀁 𑀅𑀕𑁆𑀕𑀺𑀥𑀸𑀭𑀸𑀲𑀼 𑀘 𑀉𑀤𑀓𑀥𑀸𑀭𑀸𑀲𑀼 𑀘 𑀧𑀯𑀢𑁆𑀢𑀫𑀸𑀦𑀸𑀲𑀼 𑀲𑀩𑁆𑀩𑀚𑀦𑀲𑁆𑀲 𑀧𑀸𑀓𑀝𑁄 𑀅𑀳𑁄𑀲𑀺. 𑀅𑀕𑁆𑀕𑀺𑀦𑀺𑀫𑁆𑀫𑀸𑀦𑁂 𑀳𑀺 𑀢𑁂𑀚𑁄𑀓𑀲𑀺𑀡𑀁 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀁 𑀉𑀤𑀓𑀦𑀺𑀫𑁆𑀫𑀸𑀦𑁂 𑀆𑀧𑁄𑀓𑀲𑀺𑀡𑀁, 𑀦𑀻𑀮𑀸𑀤𑀺𑀦𑀺𑀫𑁆𑀫𑀸𑀦𑁂 𑀦𑀻𑀮𑀸𑀤𑀺𑀓𑀲𑀺𑀡𑀸𑀦𑀺. 𑀩𑀼𑀤𑁆𑀥𑀸𑀦𑀫𑁆𑀧𑀺 𑀳𑀺 𑀤𑁆𑀯𑁂 𑀘𑀺𑀢𑁆𑀢𑀸𑀦𑀺 𑀏𑀓𑀢𑁄 𑀦𑀧𑁆𑀧𑀯𑀢𑁆𑀢𑀦𑁆𑀢𑀺, 𑀏𑀓𑀫𑁂𑀯 𑀧𑀦 𑀅𑀲𑁆𑀲𑀯𑀪𑀸𑀯𑁂𑀦 𑀏𑀯𑀁 𑀯𑀲𑀯𑀢𑁆𑀢𑀺 𑀅𑀳𑁄𑀲𑀺. 𑀢𑀜𑁆𑀘 𑀔𑁄 𑀧𑀦 𑀲𑀩𑁆𑀩𑀓𑀺𑀮𑁂𑀲𑀩𑀦𑁆𑀥𑀦𑀸𑀧𑀕𑀫𑀸 𑀯𑀺𑀫𑀼𑀢𑁆𑀢𑀁, 𑀯𑀺𑀫𑀼𑀢𑁆𑀢𑀢𑁆𑀢𑀸 𑀢𑀤𑁂𑀯 𑀅𑀮𑁄𑀮𑀁, 𑀦 𑀢𑀯 𑀕𑁄𑀧𑀻. 𑀤𑀻𑀧𑀗𑁆𑀓𑀭𑀩𑀼𑀤𑁆𑀥𑀓𑀸𑀮𑀢𑁄 𑀘 𑀧𑀪𑀼𑀢𑀺 𑀤𑀸𑀦𑀲𑀻𑀮𑀸𑀤𑀻𑀳𑀺 𑀤𑀻𑀖𑀭𑀢𑁆𑀢𑀁 𑀧𑀭𑀺𑀪𑀸𑀯𑀺𑀢𑀢𑁆𑀢𑀸 𑀲𑀁𑀯𑀸𑀲𑀺𑀬𑀁, 𑀦 𑀢𑀯 𑀕𑁄𑀧𑀻. 𑀢𑀤𑁂𑀢𑀁 𑀅𑀦𑀼𑀢𑁆𑀢𑀭𑁂𑀦 𑀤𑀫𑀣𑁂𑀦 𑀤𑀫𑀺𑀢𑀢𑁆𑀢𑀸 𑀲𑀼𑀤𑀦𑁆𑀢𑀁, 𑀲𑀼𑀤𑀦𑁆𑀢𑀢𑁆𑀢𑀸 𑀅𑀢𑁆𑀢𑀦𑁄 𑀯𑀲𑁂𑀦 𑀙𑀤𑁆𑀯𑀸𑀭𑀯𑀺𑀲𑁂𑀯𑀦𑀁 𑀧𑀳𑀸𑀬 𑀫𑀫𑁂𑀯 𑀅𑀥𑀺𑀧𑁆𑀧𑀸𑀬𑀫𑀦𑀲𑁆𑀲 𑀯𑀲𑁂𑀦𑀸𑀦𑀼𑀯𑀢𑁆𑀢𑀦𑀢𑁄 𑀫𑀦𑀸𑀧𑀁, 𑀦 𑀢𑀯 𑀕𑁄𑀧𑀻.

𑀧𑀸𑀧𑀁 𑀧𑀦 𑀫𑁂 𑀦 𑀯𑀺𑀚𑁆𑀚𑀢𑀻𑀢𑀺 𑀇𑀫𑀺𑀦𑀸 𑀧𑀦 𑀪𑀕𑀯𑀸 𑀢𑀲𑁆𑀲 𑀅𑀢𑁆𑀢𑀦𑁄 𑀘𑀺𑀢𑁆𑀢𑀲𑁆𑀲 𑀧𑀸𑀧𑀸𑀪𑀸𑀯𑀁 𑀤𑀲𑁆𑀲𑁂𑀢𑀺, 𑀥𑀦𑀺𑀬𑁄 𑀯𑀺𑀬 𑀕𑁄𑀧𑀺𑀬𑀸. 𑀲𑁄 𑀘𑀲𑁆𑀲 𑀧𑀸𑀧𑀸𑀪𑀸𑀯𑁄 𑀦 𑀓𑁂𑀯𑀮𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂𑀬𑁂𑀯, 𑀏𑀓𑀽𑀦𑀢𑀺𑀁𑀲 𑀯𑀲𑁆𑀲𑀸𑀦𑀺 𑀲𑀭𑀸𑀕𑀸𑀤𑀺𑀓𑀸𑀮𑁂 𑀅𑀕𑀸𑀭𑀫𑀚𑁆𑀛𑁂 𑀯𑀲𑀦𑁆𑀢𑀲𑁆𑀲𑀸𑀧𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀤𑀸𑀧𑀺 𑀳𑀺𑀲𑁆𑀲 𑀅𑀕𑀸𑀭𑀺𑀬𑀪𑀸𑀯𑀸𑀦𑀼𑀭𑀽𑀧𑀁 𑀯𑀺𑀜𑁆𑀜𑀼𑀧𑀝𑀺𑀓𑀼𑀝𑁆𑀞𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀯𑀸 𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀯𑀸 𑀫𑀦𑁄𑀤𑀼𑀘𑁆𑀘𑀭𑀺𑀢𑀁 𑀯𑀸 𑀦 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀁. 𑀢𑀢𑁄 𑀧𑀭𑀁 𑀫𑀸𑀭𑁄𑀧𑀺 𑀙𑀩𑁆𑀩𑀲𑁆𑀲𑀸𑀦𑀺 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀁, 𑀏𑀓𑀁 𑀯𑀲𑁆𑀲𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑀦𑁆𑀢𑀺 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀢𑀣𑀸𑀕𑀢𑀁 𑀅𑀦𑀼𑀩𑀦𑁆𑀥𑀺 ‘‘𑀅𑀧𑁆𑀧𑁂𑀯 𑀦𑀸𑀫 𑀯𑀸𑀮𑀕𑁆𑀕𑀦𑀺𑀢𑀼𑀤𑀦𑀫𑀢𑁆𑀢𑀫𑁆𑀧𑀺𑀲𑁆𑀲 𑀧𑀸𑀧𑀲𑀫𑀸𑀘𑀸𑀭𑀁 𑀧𑀲𑁆𑀲𑁂𑀬𑁆𑀬’’𑀦𑁆𑀢𑀺. 𑀲𑁄 𑀅𑀤𑀺𑀲𑁆𑀯𑀸𑀯 𑀦𑀺𑀩𑁆𑀩𑀺𑀦𑁆𑀦𑁄 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀲𑀢𑁆𑀢 𑀯𑀲𑁆𑀲𑀸𑀦𑀺 𑀪𑀕𑀯𑀦𑁆𑀢𑀁, 𑀅𑀦𑀼𑀩𑀦𑁆𑀥𑀺𑀁 𑀧𑀤𑀸𑀧𑀤𑀁;

𑀑𑀢𑀸𑀭𑀁 𑀦𑀸𑀥𑀺𑀕𑀘𑁆𑀙𑀺𑀲𑁆𑀲𑀁, 𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀢𑀻𑀫𑀢𑁄’’𑀢𑀺. (𑀲𑀼. 𑀦𑀺. 𑁪𑁪𑁮);

𑀩𑀼𑀤𑁆𑀥𑀓𑀸𑀮𑁂𑀧𑀺 𑀦𑀁 𑀉𑀢𑁆𑀢𑀭𑀫𑀸𑀡𑀯𑁄 𑀲𑀢𑁆𑀢 𑀫𑀸𑀲𑀸𑀦𑀺 𑀅𑀦𑀼𑀩𑀦𑁆𑀥𑀺 𑀆𑀪𑀺𑀲𑀫𑀸𑀘𑀸𑀭𑀺𑀓𑀁 𑀤𑀝𑁆𑀞𑀼𑀓𑀸𑀫𑁄. 𑀲𑁄 𑀓𑀺𑀜𑁆𑀘𑀺 𑀯𑀚𑁆𑀚𑀁 𑀅𑀤𑀺𑀲𑁆𑀯𑀸𑀯 𑀧𑀭𑀺𑀲𑀼𑀤𑁆𑀥𑀲𑀫𑀸𑀘𑀸𑀭𑁄 𑀪𑀕𑀯𑀸𑀢𑀺 𑀕𑀢𑁄. 𑀘𑀢𑁆𑀢𑀸𑀭𑀺 𑀳𑀺 𑀢𑀣𑀸𑀕𑀢𑀲𑁆𑀲 𑀅𑀭𑀓𑁆𑀔𑁂𑀬𑁆𑀬𑀸𑀦𑀺. 𑀬𑀣𑀸𑀳 𑁋

‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲 𑀅𑀭𑀓𑁆𑀔𑁂𑀬𑁆𑀬𑀸𑀦𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀧𑀭𑀺𑀲𑀼𑀤𑁆𑀥𑀓𑀸𑀬𑀲𑀫𑀸𑀘𑀸𑀭𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄, 𑀦𑀢𑁆𑀣𑀺 𑀢𑀣𑀸𑀕𑀢𑀲𑁆𑀲 𑀓𑀸𑀬𑀤𑀼𑀘𑁆𑀘𑀭𑀺𑀢𑀁, 𑀬𑀁 𑀢𑀣𑀸𑀕𑀢𑁄 𑀭𑀓𑁆𑀔𑁂𑀬𑁆𑀬 ‘𑀫𑀸 𑀫𑁂 𑀇𑀤𑀁 𑀧𑀭𑁄 𑀅𑀜𑁆𑀜𑀸𑀲𑀻’𑀢𑀺, 𑀧𑀭𑀺𑀲𑀼𑀤𑁆𑀥𑀯𑀘𑀻𑀲𑀫𑀸𑀘𑀸𑀭𑁄…𑀧𑁂… 𑀧𑀭𑀺𑀲𑀼𑀤𑁆𑀥𑀫𑀦𑁄𑀲𑀫𑀸𑀘𑀸𑀭𑁄…𑀧𑁂… 𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄, 𑀦𑀢𑁆𑀣𑀺 𑀢𑀣𑀸𑀕𑀢𑀲𑁆𑀲 𑀫𑀺𑀘𑁆𑀙𑀸𑀚𑀻𑀯𑁄, 𑀬𑀁 𑀢𑀣𑀸𑀕𑀢𑁄 𑀭𑀓𑁆𑀔𑁂𑀬𑁆𑀬 ‘𑀫𑀸 𑀫𑁂 𑀇𑀤𑀁 𑀧𑀭𑁄 𑀅𑀜𑁆𑀜𑀸𑀲𑀻’’’𑀢𑀺 (𑀅. 𑀦𑀺. 𑁭.𑁫𑁮).

𑀏𑀯𑀁 𑀬𑀲𑁆𑀫𑀸 𑀢𑀣𑀸𑀕𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀦 𑀓𑁂𑀯𑀮𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂, 𑀧𑀼𑀩𑁆𑀩𑁂𑀧𑀺 𑀧𑀸𑀧𑀁 𑀦𑀢𑁆𑀣𑀺 𑀏𑀯, 𑀢𑀲𑁆𑀫𑀸 𑀆𑀳 𑁋 ‘‘𑀧𑀸𑀧𑀁 𑀧𑀦 𑀫𑁂 𑀦 𑀯𑀺𑀚𑁆𑀚𑀢𑀻’’𑀢𑀺. 𑀢𑀲𑁆𑀲𑀸𑀥𑀺𑀧𑁆𑀧𑀸𑀬𑁄 𑁋 𑀫𑀫𑁂𑀯 𑀘𑀺𑀢𑁆𑀢𑀲𑁆𑀲 𑀧𑀸𑀧𑀁 𑀦 𑀲𑀓𑁆𑀓𑀸 𑀲𑀼𑀡𑀺𑀢𑀼𑀁, 𑀦 𑀢𑀯 𑀕𑁄𑀧𑀺𑀬𑀸. 𑀢𑀲𑁆𑀫𑀸 𑀬𑀤𑀺 𑀏𑀢𑁂𑀳𑀺 𑀕𑀼𑀡𑁂𑀳𑀺 𑀢𑀼𑀝𑁆𑀞𑁂𑀦 ‘‘𑀅𑀣 𑀘𑁂 𑀧𑀢𑁆𑀣𑀬𑀲𑀻 𑀧𑀯𑀲𑁆𑀲 𑀤𑁂𑀯𑀸’’𑀢𑀺 𑀯𑀢𑁆𑀢𑀩𑁆𑀩𑀁, 𑀫𑀬𑀸𑀯𑁂𑀢𑀁 𑀯𑀢𑁆𑀢𑀩𑁆𑀩𑀦𑁆𑀢𑀺.

𑁨𑁪. 𑀢𑀫𑁆𑀧𑀺 𑀲𑀼𑀢𑁆𑀯𑀸 𑀥𑀦𑀺𑀬𑁄 𑀢𑀢𑀼𑀢𑁆𑀢𑀭𑀺𑀧𑀺 𑀲𑀼𑀪𑀸𑀲𑀺𑀢𑀭𑀲𑀸𑀬𑀦𑀁 𑀧𑀺𑀯𑀺𑀢𑀼𑀓𑀸𑀫𑁄 𑀅𑀢𑁆𑀢𑀦𑁄 𑀪𑀼𑀚𑀺𑀲𑁆𑀲𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀢𑁆𑀢𑀯𑁂𑀢𑀦𑀪𑀢𑁄𑀳𑀫𑀲𑁆𑀫𑀻’’𑀢𑀺. 𑀢𑀢𑁆𑀣 𑀅𑀢𑁆𑀢𑀯𑁂𑀢𑀦𑀪𑀢𑁄𑀢𑀺 𑀅𑀢𑁆𑀢𑀦𑀺𑀬𑁂𑀦𑁂𑀯 𑀖𑀸𑀲𑀘𑁆𑀙𑀸𑀤𑀦𑁂𑀦 𑀪𑀢𑁄, 𑀅𑀢𑁆𑀢𑀦𑁄𑀬𑁂𑀯 𑀓𑀫𑁆𑀫𑀁 𑀓𑀢𑁆𑀯𑀸 𑀚𑀻𑀯𑀸𑀫𑀺, 𑀦 𑀧𑀭𑀲𑁆𑀲 𑀯𑁂𑀢𑀦𑀁 𑀕𑀳𑁂𑀢𑁆𑀯𑀸 𑀧𑀭𑀲𑁆𑀲 𑀓𑀫𑁆𑀫𑀁 𑀓𑀭𑁄𑀫𑀻𑀢𑀺 𑀤𑀲𑁆𑀲𑁂𑀢𑀺. 𑀧𑀼𑀢𑁆𑀢𑀸𑀢𑀺 𑀥𑀻𑀢𑀭𑁄 𑀘 𑀧𑀼𑀢𑁆𑀢𑀸 𑀘, 𑀢𑁂 𑀲𑀩𑁆𑀩𑁂 𑀧𑀼𑀢𑁆𑀢𑀸𑀢𑁆𑀯𑁂𑀯 𑀏𑀓𑀚𑁆𑀛𑀁 𑀯𑀼𑀘𑁆𑀘𑀦𑁆𑀢𑀺. 𑀲𑀫𑀸𑀦𑀺𑀬𑀸𑀢𑀺 𑀲𑀦𑁆𑀦𑀺𑀳𑀺𑀢𑀸 𑀅𑀯𑀺𑀧𑁆𑀧𑀯𑀼𑀝𑁆𑀞𑀸. 𑀅𑀭𑁄𑀕𑀸𑀢𑀺 𑀦𑀺𑀭𑀸𑀩𑀸𑀥𑀸, 𑀲𑀩𑁆𑀩𑁂𑀯 𑀊𑀭𑀼𑀩𑀸𑀳𑀼𑀩𑀮𑀸𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀲𑀁 𑀦 𑀲𑀼𑀡𑀸𑀫𑀺 𑀓𑀺𑀜𑁆𑀘𑀺 𑀧𑀸𑀧𑀦𑁆𑀢𑀺 𑀢𑁂𑀲𑀁 𑀘𑁄𑀭𑀸𑀢𑀺 𑀯𑀸 𑀧𑀭𑀤𑀸𑀭𑀺𑀓𑀸𑀢𑀺 𑀯𑀸 𑀤𑀼𑀲𑁆𑀲𑀻𑀮𑀸𑀢𑀺 𑀯𑀸 𑀓𑀺𑀜𑁆𑀘𑀺 𑀧𑀸𑀧𑀁 𑀦 𑀲𑀼𑀡𑀸𑀫𑀻𑀢𑀺.

𑁨𑁫. 𑀏𑀯𑀁 𑀯𑀼𑀢𑁆𑀢𑁂 𑀪𑀕𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀥𑀦𑀺𑀬𑀁 𑀑𑀯𑀤𑀦𑁆𑀢𑁄 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋 ‘‘𑀦𑀸𑀳𑀁 𑀪𑀢𑀓𑁄’’𑀢𑀺. 𑀅𑀢𑁆𑀭𑀸𑀧𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯 𑀧𑀤𑀸𑀦𑀺. 𑀅𑀬𑀁 𑀧𑀦 𑀅𑀥𑀺𑀧𑁆𑀧𑀸𑀬𑁄 𑁋 𑀢𑁆𑀯𑀁 ‘‘𑀪𑀼𑀚𑀺𑀲𑁆𑀲𑁄𑀳𑀫𑀲𑁆𑀫𑀻’’𑀢𑀺 𑀫𑀦𑁆𑀢𑁆𑀯𑀸 𑀢𑀼𑀝𑁆𑀞𑁄, 𑀧𑀭𑀫𑀢𑁆𑀣𑀢𑁄 𑀘 𑀅𑀢𑁆𑀢𑀦𑁄 𑀓𑀫𑁆𑀫𑀁 𑀓𑀭𑀺𑀢𑁆𑀯𑀸 𑀚𑀻𑀯𑀦𑁆𑀢𑁄𑀧𑀺 𑀤𑀸𑀲𑁄 𑀏𑀯𑀸𑀲𑀺 𑀢𑀡𑁆𑀳𑀸𑀤𑀸𑀲𑀢𑁆𑀢𑀸, 𑀪𑀢𑀓𑀯𑀸𑀤𑀸 𑀘 𑀦 𑀧𑀭𑀺𑀫𑀼𑀘𑁆𑀘𑀲𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀊𑀦𑁄 𑀮𑁄𑀓𑁄 𑀅𑀢𑀺𑀢𑁆𑀢𑁄 𑀢𑀡𑁆𑀳𑀸𑀤𑀸𑀲𑁄’’𑀢𑀺 (𑀫. 𑀦𑀺. 𑁨.𑁩𑁦𑁫). 𑀧𑀭𑀫𑀢𑁆𑀣𑀢𑁄 𑀧𑀦 𑀦𑀸𑀳𑀁 𑀪𑀢𑀓𑁄𑀲𑁆𑀫𑀺 𑀓𑀲𑁆𑀲𑀘𑀺. 𑀅𑀳𑀜𑁆𑀳𑀺 𑀓𑀲𑁆𑀲𑀘𑀺 𑀧𑀭𑀲𑁆𑀲 𑀯𑀸 𑀅𑀢𑁆𑀢𑀦𑁄 𑀯𑀸 𑀪𑀢𑀓𑁄 𑀦 𑀳𑁄𑀫𑀺. 𑀓𑀺𑀁 𑀓𑀸𑀭𑀡𑀸? 𑀬𑀲𑁆𑀫𑀸 𑀦𑀺𑀩𑁆𑀩𑀺𑀝𑁆𑀞𑁂𑀦 𑀘𑀭𑀸𑀫𑀺 𑀲𑀩𑁆𑀩𑀮𑁄𑀓𑁂. 𑀅𑀳𑀜𑁆𑀳𑀺 𑀤𑀻𑀧𑀗𑁆𑀓𑀭𑀧𑀸𑀤𑀫𑀽𑀮𑀢𑁄 𑀬𑀸𑀯 𑀩𑁄𑀥𑀺, 𑀢𑀸𑀯 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀪𑀢𑀓𑁄 𑀅𑀳𑁄𑀲𑀺𑀁. 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄 𑀧𑀦 𑀦𑀺𑀩𑁆𑀩𑀺𑀝𑁆𑀞𑁄 𑀦𑀺𑀩𑁆𑀩𑀺𑀲𑁄 𑀭𑀸𑀚𑀪𑀢𑁄 𑀯𑀺𑀬. 𑀢𑁂𑀦𑁂𑀯 𑀦𑀺𑀩𑁆𑀩𑀺𑀝𑁆𑀞𑁂𑀦 𑀲𑀩𑁆𑀩𑀜𑁆𑀜𑀼𑀪𑀸𑀯𑁂𑀦 𑀮𑁄𑀓𑀼𑀢𑁆𑀢𑀭𑀲𑀫𑀸𑀥𑀺𑀲𑀼𑀔𑁂𑀦 𑀘 𑀚𑀻𑀯𑀸𑀫𑀺. 𑀢𑀲𑁆𑀲 𑀫𑁂 𑀇𑀤𑀸𑀦𑀺 𑀉𑀢𑁆𑀢𑀭𑀺𑀓𑀭𑀡𑀻𑀬𑀲𑁆𑀲 𑀓𑀢𑀧𑀭𑀺𑀘𑀬𑀲𑁆𑀲 𑀯𑀸 𑀅𑀪𑀸𑀯𑀢𑁄 𑀅𑀧𑁆𑀧𑀳𑀻𑀦𑀧𑀝𑀺𑀲𑀦𑁆𑀥𑀺𑀓𑀸𑀦𑀁 𑀢𑀸𑀤𑀺𑀲𑀸𑀦𑀁 𑀯𑀺𑀬 𑀧𑀢𑁆𑀢𑀩𑁆𑀩𑁄 𑀓𑁄𑀘𑀺 𑀅𑀢𑁆𑀣𑁄 𑀪𑀢𑀺𑀬𑀸 𑀦 𑀯𑀺𑀚𑁆𑀚𑀢𑀺. ‘‘𑀪𑀝𑀺𑀬𑀸’’𑀢𑀺𑀧𑀺 𑀧𑀸𑀞𑁄. 𑀢𑀲𑁆𑀫𑀸 𑀬𑀤𑀺 𑀪𑀼𑀚𑀺𑀲𑁆𑀲𑀢𑀸𑀬 𑀢𑀼𑀝𑁆𑀞𑁂𑀦 ‘‘𑀅𑀣 𑀘𑁂 𑀧𑀢𑁆𑀣𑀬𑀲𑀻 𑀧𑀯𑀲𑁆𑀲 𑀤𑁂𑀯𑀸’’𑀢𑀺 𑀯𑀢𑁆𑀢𑀩𑁆𑀩𑀁, 𑀫𑀬𑀸𑀯𑁂𑀢𑀁 𑀯𑀢𑁆𑀢𑀩𑁆𑀩𑀦𑁆𑀢𑀺.

𑁨𑁬. 𑀢𑀫𑁆𑀧𑀺 𑀲𑀼𑀢𑁆𑀯𑀸 𑀥𑀦𑀺𑀬𑁄 𑀅𑀢𑀺𑀢𑁆𑀢𑁄𑀯 𑀲𑀼𑀪𑀸𑀲𑀺𑀢𑀸𑀫𑀢𑁂𑀦 𑀅𑀢𑁆𑀢𑀦𑁄 𑀧𑀜𑁆𑀘𑀧𑁆𑀧𑀓𑀸𑀭𑀕𑁄𑀫𑀡𑁆𑀟𑀮𑀧𑀭𑀺𑀧𑀼𑀡𑁆𑀡𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀢𑁆𑀣𑀺 𑀯𑀲𑀸’’𑀢𑀺. 𑀢𑀢𑁆𑀣 𑀯𑀲𑀸𑀢𑀺 𑀅𑀤𑀫𑀺𑀢𑀯𑀼𑀟𑁆𑀠𑀯𑀘𑁆𑀙𑀓𑀸. 𑀥𑁂𑀦𑀼𑀧𑀸𑀢𑀺 𑀥𑁂𑀦𑀼𑀁 𑀧𑀺𑀯𑀦𑁆𑀢𑀸 𑀢𑀭𑀼𑀡𑀯𑀘𑁆𑀙𑀓𑀸, 𑀔𑀻𑀭𑀤𑀸𑀬𑀺𑀓𑀸 𑀯𑀸 𑀕𑀸𑀯𑁄. 𑀕𑁄𑀥𑀭𑀡𑀺𑀬𑁄𑀢𑀺 𑀕𑀩𑁆𑀪𑀺𑀦𑀺𑀬𑁄. 𑀧𑀯𑁂𑀡𑀺𑀬𑁄𑀢𑀺 𑀯𑀬𑀧𑁆𑀧𑀢𑁆𑀢𑀸 𑀩𑀮𑀻𑀩𑀤𑁆𑀤𑁂𑀳𑀺 𑀲𑀤𑁆𑀥𑀺𑀁 𑀫𑁂𑀣𑀼𑀦𑀧𑀢𑁆𑀣𑀦𑀓𑀕𑀸𑀯𑁄. 𑀉𑀲𑀪𑁄𑀧𑀺 𑀕𑀯𑀫𑁆𑀧𑀢𑀻𑀢𑀺 𑀬𑁄 𑀕𑁄𑀧𑀸𑀮𑀓𑁂𑀳𑀺 𑀧𑀸𑀢𑁄 𑀏𑀯 𑀦𑁆𑀳𑀸𑀧𑁂𑀢𑁆𑀯𑀸, 𑀪𑁄𑀚𑁂𑀢𑁆𑀯𑀸, 𑀧𑀜𑁆𑀘𑀗𑁆𑀕𑀼𑀮𑀁 𑀤𑀢𑁆𑀯𑀸, 𑀫𑀸𑀮𑀁 𑀩𑀦𑁆𑀥𑀺𑀢𑁆𑀯𑀸 𑁋 ‘‘𑀏𑀳𑀺, 𑀢𑀸𑀢, 𑀕𑀸𑀯𑁄 𑀕𑁄𑀘𑀭𑀁 𑀧𑀸𑀧𑁂𑀢𑁆𑀯𑀸 𑀭𑀓𑁆𑀔𑀺𑀢𑁆𑀯𑀸 𑀆𑀦𑁂𑀳𑀻’’𑀢𑀺 𑀧𑁂𑀲𑀻𑀬𑀢𑀺, 𑀏𑀯𑀁 𑀧𑁂𑀲𑀺𑀢𑁄 𑀘 𑀢𑀸 𑀕𑀸𑀯𑁄 𑀅𑀕𑁄𑀘𑀭𑀁 𑀧𑀭𑀺𑀳𑀭𑀺𑀢𑁆𑀯𑀸, 𑀕𑁄𑀘𑀭𑁂 𑀘𑀸𑀭𑁂𑀢𑁆𑀯𑀸, 𑀲𑀻𑀳𑀩𑁆𑀬𑀕𑁆𑀖𑀸𑀤𑀺𑀪𑀬𑀸 𑀧𑀭𑀺𑀢𑁆𑀢𑀸𑀬𑀺𑀢𑁆𑀯𑀸 𑀆𑀦𑁂𑀢𑀺, 𑀢𑀣𑀸𑀭𑀽𑀧𑁄 𑀉𑀲𑀪𑁄𑀧𑀺 𑀕𑀯𑀫𑁆𑀧𑀢𑀺 𑀇𑀥 𑀫𑀬𑁆𑀳𑀁 𑀕𑁄𑀫𑀡𑁆𑀟𑀮𑁂 𑀅𑀢𑁆𑀣𑀻𑀢𑀺 𑀤𑀲𑁆𑀲𑁂𑀲𑀺.

𑁨𑁭. 𑀏𑀯𑀁 𑀯𑀼𑀢𑁆𑀢𑁂 𑀪𑀕𑀯𑀸 𑀢𑀣𑁂𑀯 𑀥𑀦𑀺𑀬𑀁 𑀑𑀯𑀤𑀦𑁆𑀢𑁄 𑀇𑀫𑀁 𑀧𑀘𑁆𑀘𑀦𑀻𑀓𑀕𑀸𑀣𑀁 𑀆𑀳 ‘‘𑀦𑀢𑁆𑀣𑀺 𑀯𑀲𑀸’’𑀢𑀺. 𑀏𑀢𑁆𑀣 𑀘𑁂𑀲 𑀅𑀥𑀺𑀧𑁆𑀧𑀸𑀬𑁄 𑁋 𑀇𑀥 𑀅𑀫𑁆𑀳𑀸𑀓𑀁 𑀲𑀸𑀲𑀦𑁂 𑀅𑀤𑀫𑀺𑀢𑀝𑁆𑀞𑁂𑀦 𑀯𑀼𑀟𑁆𑀠𑀝𑁆𑀞𑁂𑀦 𑀘 𑀯𑀲𑀸𑀲𑀗𑁆𑀔𑀸𑀢𑀸 𑀧𑀭𑀺𑀬𑀼𑀝𑁆𑀞𑀸𑀦𑀸 𑀯𑀸, 𑀢𑀭𑀼𑀡𑀯𑀘𑁆𑀙𑀓𑁂 𑀲𑀦𑁆𑀥𑀸𑀬 𑀯𑀲𑀸𑀦𑀁 𑀫𑀽𑀮𑀝𑁆𑀞𑁂𑀦 𑀔𑀻𑀭𑀤𑀸𑀬𑀺𑀦𑀺𑀬𑁄 𑀲𑀦𑁆𑀥𑀸𑀬 𑀧𑀕𑁆𑀖𑀭𑀡𑀝𑁆𑀞𑁂𑀦 𑀥𑁂𑀦𑀼𑀧𑀸𑀲𑀗𑁆𑀔𑀸𑀢𑀸 𑀅𑀦𑀼𑀲𑀬𑀸 𑀯𑀸, 𑀧𑀝𑀺𑀲𑀦𑁆𑀥𑀺𑀕𑀩𑁆𑀪𑀥𑀸𑀭𑀡𑀝𑁆𑀞𑁂𑀦 𑀕𑁄𑀥𑀭𑀡𑀺𑀲𑀗𑁆𑀔𑀸𑀢𑀸 𑀧𑀼𑀜𑁆𑀜𑀸𑀧𑀼𑀜𑁆𑀜𑀸𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀘𑁂𑀢𑀦𑀸 𑀯𑀸, 𑀲𑀁𑀬𑁄𑀕𑀧𑀢𑁆𑀣𑀦𑀝𑁆𑀞𑁂𑀦 𑀧𑀯𑁂𑀡𑀺𑀲𑀗𑁆𑀔𑀸𑀢𑀸 𑀧𑀢𑁆𑀣𑀦𑀸 𑀢𑀡𑁆𑀳𑀸 𑀯𑀸, 𑀆𑀥𑀺𑀧𑀘𑁆𑀘𑀝𑁆𑀞𑁂𑀦 𑀧𑀼𑀩𑁆𑀩𑀗𑁆𑀕𑀫𑀝𑁆𑀞𑁂𑀦 𑀲𑁂𑀝𑁆𑀞𑀝𑁆𑀞𑁂𑀦 𑀘 𑀕𑀯𑀫𑁆𑀧𑀢𑀺𑀉𑀲𑀪𑀲𑀗𑁆𑀔𑀸𑀢𑀁 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀁 𑀯𑀸 𑀦𑀢𑁆𑀣𑀺, 𑀲𑁆𑀯𑀸𑀳𑀁 𑀇𑀫𑀸𑀬 𑀲𑀩𑁆𑀩𑀬𑁄𑀕𑀓𑁆𑀔𑁂𑀫𑀪𑀽𑀢𑀸𑀬 𑀦𑀢𑁆𑀣𑀺𑀢𑀸𑀬 𑀢𑀼𑀝𑁆𑀞𑁄. 𑀢𑁆𑀯𑀁 𑀧𑀦 𑀲𑁄𑀓𑀸𑀤𑀺𑀯𑀢𑁆𑀣𑀼𑀪𑀽𑀢𑀸𑀬 𑀅𑀢𑁆𑀣𑀺𑀢𑀸𑀬 𑀢𑀼𑀝𑁆𑀞𑁄. 𑀢𑀲𑁆𑀫𑀸 𑀲𑀩𑁆𑀩𑀬𑁄𑀕𑀓𑁆𑀔𑁂𑀫𑀢𑀸𑀬 𑀢𑀼𑀝𑁆𑀞𑀲𑁆𑀲 𑀫𑀫𑁂𑀯𑁂𑀢𑀁 𑀬𑀼𑀢𑁆𑀢𑀁 𑀯𑀢𑁆𑀢𑀼𑀁 ‘‘𑀅𑀣 𑀘𑁂 𑀧𑀢𑁆𑀣𑀬𑀲𑀻 𑀧𑀯𑀲𑁆𑀲 𑀤𑁂𑀯𑀸’’𑀢𑀺.

𑁨𑁮. 𑀢𑀫𑁆𑀧𑀺 𑀲𑀼𑀢𑁆𑀯𑀸 𑀥𑀦𑀺𑀬𑁄 𑀢𑀢𑀼𑀢𑁆𑀢𑀭𑀺𑀧𑀺 𑀲𑀼𑀪𑀸𑀲𑀺𑀢𑀁 𑀅𑀫𑀢𑀭𑀲𑀁 𑀅𑀥𑀺𑀕𑀦𑁆𑀢𑀼𑀓𑀸𑀫𑁄 𑀅𑀢𑁆𑀢𑀦𑁄 𑀕𑁄𑀕𑀡𑀲𑁆𑀲 𑀔𑀺𑀮𑀩𑀦𑁆𑀥𑀦𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀔𑀺𑀮𑀸 𑀦𑀺𑀔𑀸𑀢𑀸’’𑀢𑀺. 𑀢𑀢𑁆𑀣 𑀔𑀺𑀮𑀸𑀢𑀺 𑀕𑀼𑀦𑁆𑀦𑀁 𑀩𑀦𑁆𑀥𑀦𑀢𑁆𑀣𑀫𑁆𑀪𑀸. 𑀦𑀺𑀔𑀸𑀢𑀸𑀢𑀺 𑀆𑀓𑁄𑀝𑁂𑀢𑁆𑀯𑀸 𑀪𑀽𑀫𑀺𑀬𑀁 𑀧𑀯𑁂𑀲𑀺𑀢𑀸 𑀔𑀼𑀤𑁆𑀤𑀓𑀸 𑀫𑀳𑀦𑁆𑀢𑀸 𑀔𑀡𑀺𑀢𑁆𑀯𑀸 𑀞𑀧𑀺𑀢𑀸. 𑀅𑀲𑀫𑁆𑀧𑀯𑁂𑀥𑀻𑀢𑀺 𑀅𑀓𑀫𑁆𑀧𑀓𑀸. 𑀤𑀸𑀫𑀸𑀢𑀺 𑀯𑀘𑁆𑀙𑀓𑀸𑀦𑀁 𑀩𑀦𑁆𑀥𑀦𑀢𑁆𑀣𑀸𑀬 𑀓𑀢𑀸 𑀕𑀦𑁆𑀣𑀺𑀢𑀧𑀸𑀲𑀬𑀼𑀢𑁆𑀢𑀸 𑀭𑀚𑁆𑀚𑀼𑀩𑀦𑁆𑀥𑀦𑀯𑀺𑀲𑁂𑀲𑀸. 𑀫𑀼𑀜𑁆𑀚𑀫𑀬𑀸𑀢𑀺 𑀫𑀼𑀜𑁆𑀚𑀢𑀺𑀡𑀫𑀬𑀸. 𑀦𑀯𑀸𑀢𑀺 𑀅𑀘𑀺𑀭𑀓𑀢𑀸. 𑀲𑀼𑀲𑀡𑁆𑀞𑀸𑀦𑀸𑀢𑀺 𑀲𑀼𑀝𑁆𑀞𑀼 𑀲𑀡𑁆𑀞𑀸𑀦𑀸, 𑀲𑀼𑀯𑀝𑁆𑀝𑀺𑀢𑀲𑀡𑁆𑀞𑀸𑀦𑀸 𑀯𑀸. 𑀦 𑀳𑀺 𑀲𑀓𑁆𑀔𑀺𑀦𑁆𑀢𑀻𑀢𑀺 𑀦𑁂𑀯 𑀲𑀓𑁆𑀔𑀺𑀲𑁆𑀲𑀦𑁆𑀢𑀺. 𑀥𑁂𑀦𑀼𑀧𑀸𑀧𑀺 𑀙𑁂𑀢𑁆𑀢𑀼𑀦𑁆𑀢𑀺 𑀢𑀭𑀼𑀡𑀯𑀘𑁆𑀙𑀓𑀸𑀧𑀺 𑀙𑀺𑀦𑁆𑀤𑀺𑀢𑀼𑀁.

𑁨𑁯. 𑀏𑀯𑀁 𑀯𑀼𑀢𑁆𑀢𑁂 𑀪𑀕𑀯𑀸 𑀥𑀦𑀺𑀬𑀲𑁆𑀲 𑀇𑀦𑁆𑀤𑁆𑀭𑀺𑀬-𑀧𑀭𑀺𑀧𑀸𑀓𑀓𑀸𑀮𑀁 𑀜𑀢𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀢𑀁 𑀑𑀯𑀤𑀦𑁆𑀢𑁄 𑀇𑀫𑀁 𑀘𑀢𑀼𑀲𑀘𑁆𑀘𑀤𑀻𑀧𑀺𑀓𑀁 𑀕𑀸𑀣𑀁 𑀅𑀪𑀸𑀲𑀺 ‘‘𑀉𑀲𑀪𑁄𑀭𑀺𑀯 𑀙𑁂𑀢𑁆𑀯𑀸’’𑀢𑀺. 𑀢𑀢𑁆𑀣 𑀉𑀲𑀪𑁄𑀢𑀺 𑀕𑁄𑀧𑀺𑀢𑀸 𑀕𑁄𑀧𑀭𑀺𑀡𑀸𑀬𑀓𑁄 𑀕𑁄𑀬𑀽𑀣𑀧𑀢𑀺 𑀩𑀮𑀻𑀩𑀤𑁆𑀤𑁄. 𑀓𑁂𑀘𑀺 𑀧𑀦 𑀪𑀡𑀦𑁆𑀢𑀺 ‘‘𑀕𑀯𑀲𑀢𑀚𑁂𑀝𑁆𑀞𑁄 𑀉𑀲𑀪𑁄, 𑀲𑀳𑀲𑁆𑀲𑀚𑁂𑀝𑁆𑀞𑁄 𑀯𑀲𑀪𑁄, 𑀲𑀢𑀲𑀳𑀲𑁆𑀲𑀚𑁂𑀝𑁆𑀞𑁄 𑀦𑀺𑀲𑀪𑁄’’𑀢𑀺. 𑀅𑀧𑀭𑁂 ‘‘𑀏𑀓𑀕𑀸𑀫𑀔𑁂𑀢𑁆𑀢𑁂 𑀚𑁂𑀝𑁆𑀞𑁄 𑀉𑀲𑀪𑁄, 𑀤𑁆𑀯𑀻𑀲𑀼 𑀚𑁂𑀝𑁆𑀞𑁄 𑀯𑀲𑀪𑁄, 𑀲𑀩𑁆𑀩𑀢𑁆𑀣 𑀅𑀧𑁆𑀧𑀝𑀺𑀳𑀢𑁄 𑀦𑀺𑀲𑀪𑁄’’𑀢𑀺. 𑀲𑀩𑁆𑀩𑁂𑀧𑁂𑀢𑁂 𑀧𑀧𑀜𑁆𑀘𑀸, 𑀅𑀧𑀺𑀘 𑀔𑁄 𑀧𑀦 𑀉𑀲𑀪𑁄𑀢𑀺 𑀯𑀸 𑀯𑀲𑀪𑁄𑀢𑀺 𑀯𑀸 𑀦𑀺𑀲𑀪𑁄𑀢𑀺 𑀯𑀸 𑀲𑀩𑁆𑀩𑁂𑀧𑁂𑀢𑁂 𑀅𑀧𑁆𑀧𑀝𑀺𑀲𑀫𑀝𑁆𑀞𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸𑀳 𑁋 ‘‘𑀦𑀺𑀲𑀪𑁄 𑀯𑀢 𑀪𑁄 𑀲𑀫𑀡𑁄 𑀕𑁄𑀢𑀫𑁄’’𑀢𑀺 (𑀲𑀁. 𑀦𑀺. 𑁧.𑁩𑁮). 𑀭-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄. 𑀩𑀦𑁆𑀥𑀦𑀸𑀦𑀻𑀢𑀺 𑀭𑀚𑁆𑀚𑀼𑀩𑀦𑁆𑀥𑀦𑀸𑀦𑀺 𑀓𑀺𑀮𑁂𑀲𑀩𑀦𑁆𑀥𑀦𑀸𑀦𑀺 𑀘. 𑀦𑀸𑀕𑁄𑀢𑀺 𑀳𑀢𑁆𑀣𑀻. 𑀧𑀽𑀢𑀺𑀮𑀢𑀦𑁆𑀢𑀺 𑀕𑀴𑁄𑀘𑀻𑀮𑀢𑀁. 𑀬𑀣𑀸 𑀳𑀺 𑀲𑀼𑀯𑀡𑁆𑀡𑀯𑀡𑁆𑀡𑁄𑀧𑀺 𑀓𑀸𑀬𑁄 𑀧𑀽𑀢𑀺𑀓𑀸𑀬𑁄, 𑀯𑀲𑁆𑀲𑀲𑀢𑀺𑀓𑁄𑀧𑀺 𑀲𑀼𑀦𑀔𑁄 𑀓𑀼𑀓𑁆𑀓𑀼𑀭𑁄, 𑀢𑀤𑀳𑀼𑀚𑀸𑀢𑁄𑀧𑀺 𑀲𑀺𑀗𑁆𑀕𑀸𑀮𑁄 ‘‘𑀚𑀭𑀲𑀺𑀗𑁆𑀕𑀸𑀮𑁄’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀅𑀪𑀺𑀦𑀯𑀸𑀧𑀺 𑀕𑀴𑁄𑀘𑀻𑀮𑀢𑀸 𑀅𑀲𑀸𑀭𑀓𑀢𑁆𑀢𑁂𑀦 ‘‘𑀧𑀽𑀢𑀺𑀮𑀢𑀸’’𑀢𑀺 𑀯𑀼𑀘𑁆𑀘𑀢𑀺. 𑀤𑀸𑀮𑀬𑀺𑀢𑁆𑀯𑀸𑀢𑀺 𑀙𑀺𑀦𑁆𑀤𑀺𑀢𑁆𑀯𑀸. 𑀕𑀩𑁆𑀪𑀜𑁆𑀘 𑀲𑁂𑀬𑁆𑀬𑀜𑁆𑀘 𑀕𑀩𑁆𑀪𑀲𑁂𑀬𑁆𑀬𑀁. 𑀢𑀢𑁆𑀣 𑀕𑀩𑁆𑀪𑀕𑁆𑀕𑀳𑀡𑁂𑀦 𑀚𑀮𑀸𑀩𑀼𑀚𑀬𑁄𑀦𑀺, 𑀲𑁂𑀬𑁆𑀬𑀕𑁆𑀕𑀳𑀡𑁂𑀦 𑀅𑀯𑀲𑁂𑀲𑀸. 𑀕𑀩𑁆𑀪𑀲𑁂𑀬𑁆𑀬𑀫𑀼𑀔𑁂𑀦 𑀯𑀸 𑀲𑀩𑁆𑀩𑀸𑀧𑀺 𑀢𑀸 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑁂𑀲𑀫𑁂𑀢𑁆𑀣 𑀧𑀤𑀢𑁆𑀣𑀢𑁄 𑀉𑀢𑁆𑀢𑀸𑀦𑀫𑁂𑀯.

𑀅𑀬𑀁 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀥𑀦𑀺𑀬, 𑀢𑁆𑀯𑀁 𑀩𑀦𑁆𑀥𑀦𑁂𑀦 𑀢𑀼𑀝𑁆𑀞𑁄, 𑀅𑀳𑀁 𑀧𑀦 𑀩𑀦𑁆𑀥𑀦𑁂𑀦 𑀅𑀝𑁆𑀝𑀻𑀬𑀦𑁆𑀢𑁄 𑀣𑀸𑀫𑀯𑀻𑀭𑀺𑀬𑀽𑀧𑁂𑀢𑁄 𑀫𑀳𑀸𑀉𑀲𑀪𑁄𑀭𑀺𑀯 𑀩𑀦𑁆𑀥𑀦𑀸𑀦𑀺 𑀧𑀜𑁆𑀘𑀼𑀤𑁆𑀥𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀸𑀦𑀺 𑀘𑀢𑀼𑀢𑁆𑀣𑀅𑀭𑀺𑀬𑀫𑀕𑁆𑀕𑀣𑀸𑀫𑀯𑀻𑀭𑀺𑀬𑁂𑀦 𑀙𑁂𑀢𑁆𑀯𑀸, 𑀦𑀸𑀕𑁄 𑀧𑀽𑀢𑀺𑀮𑀢𑀁𑀯 𑀧𑀜𑁆𑀘𑁄𑀭𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀩𑀦𑁆𑀥𑀦𑀸𑀦𑀺 𑀳𑁂𑀝𑁆𑀞𑀸𑀫𑀕𑁆𑀕𑀢𑁆𑀢𑀬𑀣𑀸𑀫𑀯𑀻𑀭𑀺𑀬𑁂𑀦 𑀤𑀸𑀮𑀬𑀺𑀢𑁆𑀯𑀸, 𑀅𑀣 𑀯𑀸 𑀉𑀲𑀪𑁄𑀭𑀺𑀯 𑀩𑀦𑁆𑀥𑀦𑀸𑀦𑀺 𑀅𑀦𑀼𑀲𑀬𑁂 𑀦𑀸𑀕𑁄 𑀧𑀽𑀢𑀺𑀮𑀢𑀁𑀯 𑀧𑀭𑀺𑀬𑀼𑀝𑁆𑀞𑀸𑀦𑀸𑀦𑀺 𑀙𑁂𑀢𑁆𑀯𑀸 𑀤𑀸𑀮𑀬𑀺𑀢𑁆𑀯𑀸𑀯 𑀞𑀺𑀢𑁄. 𑀢𑀲𑁆𑀫𑀸 𑀦 𑀧𑀼𑀦 𑀕𑀩𑁆𑀪𑀲𑁂𑀬𑁆𑀬𑀁 𑀉𑀧𑁂𑀲𑁆𑀲𑀁. 𑀲𑁄𑀳𑀁 𑀚𑀸𑀢𑀺𑀤𑀼𑀓𑁆𑀔𑀯𑀢𑁆𑀣𑀼𑀓𑁂𑀳𑀺 𑀲𑀩𑁆𑀩𑀤𑀼𑀓𑁆𑀔𑁂𑀳𑀺 𑀧𑀭𑀺𑀫𑀼𑀢𑁆𑀢𑁄 𑀲𑁄𑀪𑀸𑀫𑀺 𑁋 ‘‘𑀅𑀣 𑀘𑁂 𑀧𑀢𑁆𑀣𑀬𑀲𑀻 𑀧𑀯𑀲𑁆𑀲 𑀤𑁂𑀯𑀸’’𑀢𑀺 𑀯𑀤𑀫𑀸𑀦𑁄. 𑀢𑀲𑁆𑀫𑀸 𑀲𑀘𑁂 𑀢𑁆𑀯𑀫𑁆𑀧𑀺 𑀅𑀳𑀁 𑀯𑀺𑀬 𑀯𑀢𑁆𑀢𑀼𑀫𑀺𑀘𑁆𑀙𑀲𑀺, 𑀙𑀺𑀦𑁆𑀤 𑀢𑀸𑀦𑀺 𑀩𑀦𑁆𑀥𑀦𑀸𑀦𑀻𑀢𑀺. 𑀏𑀢𑁆𑀣 𑀘 𑀩𑀦𑁆𑀥𑀦𑀸𑀦𑀺 𑀲𑀫𑀼𑀤𑀬𑀲𑀘𑁆𑀘𑀁, 𑀕𑀩𑁆𑀪𑀲𑁂𑀬𑁆𑀬𑀸 𑀤𑀼𑀓𑁆𑀔𑀲𑀘𑁆𑀘𑀁, ‘‘𑀦 𑀉𑀧𑁂𑀲𑁆𑀲’’𑀦𑁆𑀢𑀺 𑀏𑀢𑁆𑀣 𑀅𑀦𑀼𑀧𑀕𑀫𑁄 𑀅𑀦𑀼𑀧𑀸𑀤𑀺𑀲𑁂𑀲𑀯𑀲𑁂𑀦, ‘‘𑀙𑁂𑀢𑁆𑀯𑀸 𑀤𑀸𑀮𑀬𑀺𑀢𑁆𑀯𑀸’’𑀢𑀺 𑀏𑀢𑁆𑀣 𑀙𑁂𑀤𑁄 𑀧𑀤𑀸𑀮𑀦𑀜𑁆𑀘 𑀲𑀉𑀧𑀸𑀤𑀺𑀲𑁂𑀲𑀯𑀲𑁂𑀦 𑀦𑀺𑀭𑁄𑀥𑀲𑀘𑁆𑀘𑀁, 𑀬𑁂𑀦 𑀙𑀺𑀦𑁆𑀤𑀢𑀺 𑀧𑀤𑀸𑀮𑁂𑀢𑀺 𑀘, 𑀢𑀁 𑀫𑀕𑁆𑀕𑀲𑀘𑁆𑀘𑀦𑁆𑀢𑀺.

𑀏𑀯𑀫𑁂𑀢𑀁 𑀘𑀢𑀼𑀲𑀘𑁆𑀘𑀤𑀻𑀧𑀺𑀓𑀁 𑀕𑀸𑀣𑀁 𑀲𑀼𑀢𑁆𑀯𑀸 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀥𑀦𑀺𑀬𑁄 𑀘 𑀧𑀚𑀸𑀧𑀢𑀺 𑀘𑀲𑁆𑀲 𑀤𑁆𑀯𑁂 𑀘 𑀥𑀻𑀢𑀭𑁄𑀢𑀺 𑀘𑀢𑁆𑀢𑀸𑀭𑁄 𑀚𑀦𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀅𑀣 𑀥𑀦𑀺𑀬𑁄 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑀬𑁄𑀕𑁂𑀦 𑀢𑀣𑀸𑀕𑀢𑁂 𑀫𑀽𑀮𑀚𑀸𑀢𑀸𑀬 𑀧𑀢𑀺𑀝𑁆𑀞𑀺𑀢𑀸𑀬 𑀲𑀤𑁆𑀥𑀸𑀬 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀪𑀕𑀯𑀢𑁄 𑀥𑀫𑁆𑀫𑀓𑀸𑀬𑀁 𑀤𑀺𑀲𑁆𑀯𑀸 𑀥𑀫𑁆𑀫𑀢𑀸𑀬 𑀘𑁄𑀤𑀺𑀢𑀳𑀤𑀬𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀩𑀦𑁆𑀥𑀦𑀸𑀦𑀺 𑀙𑀺𑀦𑁆𑀤𑀺𑀁, 𑀕𑀩𑁆𑀪𑀲𑁂𑀬𑁆𑀬𑁄 𑀘 𑀫𑁂 𑀦𑀢𑁆𑀣𑀻’’𑀢𑀺 𑀅𑀯𑀻𑀘𑀺𑀁 𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀬𑀸𑀯 𑀪𑀯𑀕𑁆𑀕𑀸 𑀓𑁄 𑀅𑀜𑁆𑀜𑁄 𑀏𑀯𑀁 𑀲𑀻𑀳𑀦𑀸𑀤𑀁 𑀦𑀤𑀺𑀲𑁆𑀲𑀢𑀺 𑀅𑀜𑁆𑀜𑀢𑁆𑀭 𑀪𑀕𑀯𑀢𑀸, 𑀆𑀕𑀢𑁄 𑀦𑀼 𑀔𑁄 𑀫𑁂 𑀲𑀢𑁆𑀣𑀸𑀢𑀺. 𑀢𑀢𑁄 𑀪𑀕𑀯𑀸 𑀙𑀩𑁆𑀩𑀡𑁆𑀡𑀭𑀲𑁆𑀫𑀺𑀚𑀸𑀮𑀯𑀺𑀘𑀺𑀢𑁆𑀭𑀁 𑀲𑀼𑀯𑀡𑁆𑀡𑀭𑀲𑀲𑁂𑀓𑀧𑀺𑀜𑁆𑀚𑀭𑀁 𑀯𑀺𑀬 𑀲𑀭𑀻𑀭𑀸𑀪𑀁 𑀥𑀦𑀺𑀬𑀲𑁆𑀲 𑀦𑀺𑀯𑁂𑀲𑀦𑁂 𑀫𑀼𑀜𑁆𑀘𑀺 ‘‘𑀧𑀲𑁆𑀲 𑀤𑀸𑀦𑀺 𑀬𑀣𑀸𑀲𑀼𑀔’’𑀦𑁆𑀢𑀺.

𑁩𑁦. 𑀅𑀣 𑀥𑀦𑀺𑀬𑁄 𑀅𑀦𑁆𑀢𑁄 𑀧𑀯𑀺𑀝𑁆𑀞𑀘𑀦𑁆𑀤𑀺𑀫𑀲𑀽𑀭𑀺𑀬𑀁 𑀯𑀺𑀬 𑀲𑀫𑀦𑁆𑀢𑀸 𑀧𑀚𑁆𑀚𑀮𑀺𑀢𑀧𑀤𑀻𑀧𑀲𑀳𑀲𑁆𑀲𑀲𑀫𑀼𑀚𑁆𑀚𑀮𑀺𑀢𑀫𑀺𑀯 𑀘 𑀦𑀺𑀯𑁂𑀲𑀦𑀁 𑀤𑀺𑀲𑁆𑀯𑀸 ‘‘𑀆𑀕𑀢𑁄 𑀪𑀕𑀯𑀸’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀲𑀺. 𑀢𑀲𑁆𑀫𑀺𑀁𑀬𑁂𑀯 𑀘 𑀲𑀫𑀬𑁂 𑀫𑁂𑀖𑁄𑀧𑀺 𑀧𑀸𑀯𑀲𑁆𑀲𑀺. 𑀢𑁂𑀦𑀸𑀳𑀼 𑀲𑀗𑁆𑀕𑀻𑀢𑀺𑀓𑀸𑀭𑀸 ‘‘𑀦𑀺𑀦𑁆𑀦𑀜𑁆𑀘 𑀣𑀮𑀜𑁆𑀘 𑀧𑀽𑀭𑀬𑀦𑁆𑀢𑁄’’𑀢𑀺. 𑀢𑀢𑁆𑀣 𑀦𑀺𑀦𑁆𑀦𑀦𑁆𑀢𑀺 𑀧𑀮𑁆𑀮𑀮𑀁. 𑀣𑀮𑀦𑁆𑀢𑀺 𑀉𑀓𑁆𑀓𑀽𑀮𑀁. 𑀏𑀯𑀫𑁂𑀢𑀁 𑀉𑀓𑁆𑀓𑀽𑀮𑀯𑀺𑀓𑀽𑀮𑀁 𑀲𑀩𑁆𑀩𑀫𑁆𑀧𑀺 𑀲𑀫𑀁 𑀓𑀢𑁆𑀯𑀸 𑀧𑀽𑀭𑀬𑀦𑁆𑀢𑁄 𑀫𑀳𑀸𑀫𑁂𑀖𑁄 𑀧𑀸𑀯𑀲𑁆𑀲𑀺, 𑀯𑀲𑁆𑀲𑀺𑀢𑀼𑀁 𑀆𑀭𑀪𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀸𑀯𑀤𑁂𑀯𑀸𑀢𑀺 𑀬𑀁 𑀔𑀡𑀁 𑀪𑀕𑀯𑀸 𑀲𑀭𑀻𑀭𑀸𑀪𑀁 𑀫𑀼𑀜𑁆𑀘𑀺, 𑀥𑀦𑀺𑀬𑁄 𑀘 ‘‘𑀲𑀢𑁆𑀣𑀸 𑀫𑁂 𑀆𑀕𑀢𑁄’’𑀢𑀺 𑀲𑀤𑁆𑀥𑀸𑀫𑀬𑀁 𑀘𑀺𑀢𑁆𑀢𑀸𑀪𑀁 𑀫𑀼𑀜𑁆𑀘𑀺, 𑀢𑀁 𑀔𑀡𑀁 𑀧𑀸𑀯𑀲𑁆𑀲𑀻𑀢𑀺. 𑀓𑁂𑀘𑀺 𑀧𑀦 ‘‘𑀲𑀽𑀭𑀺𑀬𑀼𑀕𑁆𑀕𑀫𑀦𑀫𑁆𑀧𑀺 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂’’𑀢𑀺 𑀯𑀡𑁆𑀡𑀬𑀦𑁆𑀢𑀺.

𑁩𑁧-𑁩𑁨. 𑀏𑀯𑀁 𑀢𑀲𑁆𑀫𑀺𑀁 𑀥𑀦𑀺𑀬𑀲𑁆𑀲 𑀲𑀤𑁆𑀥𑀼𑀧𑁆𑀧𑀸𑀤𑀢𑀣𑀸𑀕𑀢𑁄𑀪𑀸𑀲𑀨𑀭𑀡𑀲𑀽𑀭𑀺𑀬𑀼𑀕𑁆𑀕𑀫𑀦𑀓𑁆𑀔𑀡𑁂 𑀯𑀲𑁆𑀲𑀢𑁄 𑀤𑁂𑀯𑀲𑁆𑀲 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀥𑀦𑀺𑀬𑁄 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑁄 𑀇𑀫𑀫𑀢𑁆𑀣𑀁 𑀅𑀪𑀸𑀲𑀣 ‘‘𑀮𑀸𑀪𑀸 𑀯𑀢 𑀦𑁄 𑀅𑀦𑀧𑁆𑀧𑀓𑀸’’𑀢𑀺 𑀤𑁆𑀯𑁂 𑀕𑀸𑀣𑀸 𑀯𑀢𑁆𑀢𑀩𑁆𑀩𑀸.

𑀢𑀢𑁆𑀣 𑀬𑀲𑁆𑀫𑀸 𑀥𑀦𑀺𑀬𑁄 𑀲𑀧𑀼𑀢𑁆𑀢𑀤𑀸𑀭𑁄 𑀪𑀕𑀯𑀢𑁄 𑀅𑀭𑀺𑀬𑀫𑀕𑁆𑀕𑀧𑀝𑀺𑀯𑁂𑀥𑁂𑀦 𑀥𑀫𑁆𑀫𑀓𑀸𑀬𑀁 𑀤𑀺𑀲𑁆𑀯𑀸, 𑀮𑁄𑀓𑀼𑀢𑁆𑀢𑀭𑀘𑀓𑁆𑀔𑀼𑀦𑀸 𑀭𑀽𑀧𑀓𑀸𑀬𑀁 𑀤𑀺𑀲𑁆𑀯𑀸, 𑀮𑁄𑀓𑀺𑀬𑀘𑀓𑁆𑀔𑀼𑀦𑀸 𑀲𑀤𑁆𑀥𑀸𑀧𑀝𑀺𑀮𑀸𑀪𑀁 𑀮𑀪𑀺. 𑀢𑀲𑁆𑀫𑀸 𑀆𑀳 𑁋 ‘‘𑀮𑀸𑀪𑀸 𑀯𑀢 𑀦𑁄 𑀅𑀦𑀧𑁆𑀧𑀓𑀸, 𑀬𑁂 𑀫𑀬𑀁 𑀪𑀕𑀯𑀦𑁆𑀢𑀁 𑀅𑀤𑁆𑀤𑀲𑀸𑀫𑀸’’𑀢𑀺. 𑀢𑀢𑁆𑀣 𑀯𑀢 𑀇𑀢𑀺 𑀯𑀺𑀫𑁆𑀳𑀬𑀢𑁆𑀣𑁂 𑀦𑀺𑀧𑀸𑀢𑁄. 𑀦𑁄 𑀇𑀢𑀺 𑀅𑀫𑁆𑀳𑀸𑀓𑀁. 𑀅𑀦𑀧𑁆𑀧𑀓𑀸𑀢𑀺 𑀯𑀺𑀧𑀼𑀮𑀸. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯. 𑀲𑀭𑀡𑀁 𑀢𑀁 𑀉𑀧𑁂𑀫𑀸𑀢𑀺 𑀏𑀢𑁆𑀣 𑀧𑀦 𑀓𑀺𑀜𑁆𑀘𑀸𑀧𑀺 𑀫𑀕𑁆𑀕𑀧𑀝𑀺𑀯𑁂𑀥𑁂𑀦𑁂𑀯𑀲𑁆𑀲 𑀲𑀺𑀤𑁆𑀥𑀁 𑀲𑀭𑀡𑀕𑀫𑀦𑀁, 𑀢𑀢𑁆𑀣 𑀧𑀦 𑀦𑀺𑀘𑁆𑀙𑀬𑀕𑀫𑀦𑀫𑁂𑀯 𑀕𑀢𑁄, 𑀇𑀤𑀸𑀦𑀺 𑀯𑀸𑀘𑀸𑀬 𑀅𑀢𑁆𑀢𑀲𑀦𑁆𑀦𑀺𑀬𑁆𑀬𑀸𑀢𑀦𑀁 𑀓𑀭𑁄𑀢𑀺. 𑀫𑀕𑁆𑀕𑀯𑀲𑁂𑀦 𑀯𑀸 𑀲𑀦𑁆𑀦𑀺𑀬𑁆𑀬𑀸𑀢𑀦𑀲𑀭𑀡𑀢𑀁 𑀅𑀘𑀮𑀲𑀭𑀡𑀢𑀁 𑀧𑀢𑁆𑀢𑁄, 𑀢𑀁 𑀧𑀭𑁂𑀲𑀁 𑀯𑀸𑀘𑀸𑀬 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄 𑀧𑀡𑀺𑀧𑀸𑀢𑀲𑀭𑀡𑀕𑀫𑀦𑀁 𑀕𑀘𑁆𑀙𑀢𑀺. 𑀘𑀓𑁆𑀔𑀼𑀫𑀸𑀢𑀺 𑀪𑀕𑀯𑀸 𑀧𑀓𑀢𑀺𑀤𑀺𑀩𑁆𑀩𑀧𑀜𑁆𑀜𑀸𑀲𑀫𑀦𑁆𑀢𑀩𑀼𑀤𑁆𑀥𑀘𑀓𑁆𑀔𑀽𑀳𑀺 𑀧𑀜𑁆𑀘𑀳𑀺 𑀘𑀓𑁆𑀔𑀽𑀳𑀺 𑀘𑀓𑁆𑀔𑀼𑀫𑀸. 𑀢𑀁 𑀆𑀮𑀧𑀦𑁆𑀢𑁄 𑀆𑀳 𑁋 ‘‘𑀲𑀭𑀡𑀁 𑀢𑀁 𑀉𑀧𑁂𑀫 𑀘𑀓𑁆𑀔𑀼𑀫𑀸’’𑀢𑀺. ‘‘𑀲𑀢𑁆𑀣𑀸 𑀦𑁄 𑀳𑁄𑀳𑀺 𑀢𑀼𑀯𑀁 𑀫𑀳𑀸𑀫𑀼𑀦𑀻’’𑀢𑀺 𑀇𑀤𑀁 𑀧𑀦 𑀯𑀘𑀦𑀁 𑀲𑀺𑀲𑁆𑀲𑀪𑀸𑀯𑀽𑀧𑀕𑀫𑀦𑁂𑀦𑀸𑀧𑀺 𑀲𑀭𑀡𑀕𑀫𑀦𑀁 𑀧𑀽𑀭𑁂𑀢𑀼𑀁 𑀪𑀡𑀢𑀺, 𑀕𑁄𑀧𑀻 𑀘 𑀅𑀳𑀜𑁆𑀘 𑀅𑀲𑁆𑀲𑀯𑀸, 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀼𑀕𑀢𑁂 𑀘𑀭𑀸𑀫𑀲𑁂𑀢𑀺 𑀇𑀤𑀁 𑀲𑀫𑀸𑀤𑀸𑀦𑀯𑀲𑁂𑀦.

𑀢𑀢𑁆𑀣 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀫𑁂𑀣𑀼𑀦𑀯𑀺𑀭𑀢𑀺𑀫𑀕𑁆𑀕𑀲𑀫𑀡𑀥𑀫𑁆𑀫𑀲𑀸𑀲𑀦𑀲𑀤𑀸𑀭𑀲𑀦𑁆𑀢𑁄𑀲𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. ‘‘𑀩𑁆𑀭𑀳𑁆𑀫𑀘𑀸𑀭𑀻’’𑀢𑀺 𑀏𑀯𑀫𑀸𑀤𑀻𑀲𑀼 (𑀫. 𑀦𑀺. 𑁧.𑁮𑁩) 𑀳𑀺 𑀫𑁂𑀣𑀼𑀦𑀯𑀺𑀭𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀯𑀼𑀘𑁆𑀘𑀢𑀺. ‘‘𑀇𑀤𑀁 𑀔𑁄 𑀧𑀦 𑀫𑁂 𑀧𑀜𑁆𑀘𑀲𑀺𑀔, 𑀩𑁆𑀭𑀳𑁆𑀫𑀘𑀭𑀺𑀬𑀁 𑀏𑀓𑀦𑁆𑀢𑀦𑀺𑀩𑁆𑀩𑀺𑀤𑀸𑀬𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀤𑀻. 𑀦𑀺. 𑁨.𑁩𑁨𑁯) 𑀫𑀕𑁆𑀕𑁄. ‘‘𑀅𑀪𑀺𑀚𑀸𑀦𑀸𑀫𑀺 𑀔𑁄 𑀧𑀦𑀸𑀳𑀁, 𑀲𑀸𑀭𑀺𑀧𑀼𑀢𑁆𑀢, 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀫. 𑀦𑀺. 𑁧.𑁧𑁫𑁫) 𑀲𑀫𑀡𑀥𑀫𑁆𑀫𑁄. ‘‘𑀢𑀬𑀺𑀤𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀇𑀤𑁆𑀥𑀜𑁆𑀘𑁂𑀯 𑀨𑀻𑀢𑀜𑁆𑀘𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀤𑀻. 𑀦𑀺. 𑁩.𑁧𑁭𑁪) 𑀲𑀸𑀲𑀦𑀁.

‘‘𑀫𑀬𑀜𑁆𑀘 𑀪𑀭𑀺𑀬𑀸 𑀦𑀸𑀢𑀺𑀓𑁆𑀓𑀫𑀸𑀫, 𑀅𑀫𑁆𑀳𑁂 𑀘 𑀪𑀭𑀺𑀬𑀸 𑀦𑀸𑀢𑀺𑀓𑁆𑀓𑀫𑀦𑁆𑀢𑀺;

𑀅𑀜𑁆𑀜𑀢𑁆𑀭 𑀢𑀸𑀳𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀸𑀫, 𑀢𑀲𑁆𑀫𑀸 𑀳𑀺 𑀅𑀫𑁆𑀳𑀁 𑀤𑀳𑀭𑀸 𑀦 𑀫𑀻𑀬𑀭𑁂’’𑀢𑀺. (𑀚𑀸. 𑁧.𑁧𑁦.𑁯𑁭) 𑁋

𑀏𑀯𑀫𑀸𑀤𑀻𑀲𑀼 𑀲𑀤𑀸𑀭𑀲𑀦𑁆𑀢𑁄𑀲𑁄. 𑀇𑀥 𑀧𑀦 𑀲𑀫𑀡𑀥𑀫𑁆𑀫𑀩𑁆𑀭𑀳𑁆𑀫𑀘𑀭𑀺𑀬𑀧𑀼𑀩𑁆𑀩𑀗𑁆𑀕𑀫𑀁 𑀉𑀧𑀭𑀺𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀫𑀥𑀺𑀧𑁆𑀧𑁂𑀢𑀁. 𑀲𑀼𑀕𑀢𑁂𑀢𑀺 𑀲𑀼𑀕𑀢𑀲𑁆𑀲 𑀲𑀦𑁆𑀢𑀺𑀓𑁂. 𑀪𑀕𑀯𑀸 𑀳𑀺 𑀅𑀦𑁆𑀢𑀤𑁆𑀯𑀬𑀫𑀦𑀼𑀧𑀕𑁆𑀕𑀫𑁆𑀫 𑀲𑀼𑀝𑁆𑀞𑀼 𑀕𑀢𑀢𑁆𑀢𑀸, 𑀲𑁄𑀪𑀡𑁂𑀦 𑀘 𑀅𑀭𑀺𑀬𑀫𑀕𑁆𑀕𑀕𑀫𑀦𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸, 𑀲𑀼𑀦𑁆𑀤𑀭𑀜𑁆𑀘 𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀁 𑀞𑀸𑀦𑀁 𑀕𑀢𑀢𑁆𑀢𑀸 𑀲𑀼𑀕𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀲𑀫𑀻𑀧𑀢𑁆𑀣𑁂 𑀘𑁂𑀢𑁆𑀣 𑀪𑀼𑀫𑁆𑀫𑀯𑀘𑀦𑀁, 𑀢𑀲𑁆𑀫𑀸 𑀲𑀼𑀕𑀢𑀲𑁆𑀲 𑀲𑀦𑁆𑀢𑀺𑀓𑁂𑀢𑀺 𑀅𑀢𑁆𑀣𑁄. 𑀘𑀭𑀸𑀫𑀲𑁂𑀢𑀺 𑀘𑀭𑀸𑀫. 𑀬𑀜𑁆𑀳𑀺 𑀢𑀁 𑀲𑀓𑁆𑀓𑀢𑁂 𑀘𑀭𑀸𑀫𑀲𑀻𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀇𑀥 𑀘𑀭𑀸𑀫𑀲𑁂𑀢𑀺. 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑀧𑀦 ‘‘𑀲𑁂𑀢𑀺 𑀦𑀺𑀧𑀸𑀢𑁄’’𑀢𑀺 𑀪𑀡𑀦𑁆𑀢𑀺. 𑀢𑁂𑀦𑁂𑀯 𑀘𑁂𑀢𑁆𑀣 𑀆𑀬𑀸𑀘𑀦𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀘𑀭𑁂𑀫 𑀲𑁂’’𑀢𑀺𑀧𑀺 𑀧𑀸𑀞𑀁 𑀯𑀺𑀓𑀧𑁆𑀧𑁂𑀦𑁆𑀢𑀺. 𑀬𑀁 𑀭𑀼𑀘𑁆𑀘𑀢𑀺, 𑀢𑀁 𑀕𑀳𑁂𑀢𑀩𑁆𑀩𑀁.

𑀏𑀯𑀁 𑀥𑀦𑀺𑀬𑁄 𑀩𑁆𑀭𑀳𑁆𑀫𑀘𑀭𑀺𑀬𑀘𑀭𑀡𑀸𑀧𑀤𑁂𑀲𑁂𑀦 𑀪𑀕𑀯𑀦𑁆𑀢𑀁 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀧𑀬𑁄𑀚𑀦𑀁 𑀤𑀻𑀧𑁂𑀦𑁆𑀢𑁄 𑀆𑀳 ‘‘𑀚𑀸𑀢𑀻𑀫𑀭𑀡𑀲𑁆𑀲 𑀧𑀸𑀭𑀕𑀽, 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑀸 𑀪𑀯𑀸𑀫𑀲𑁂’’𑀢𑀺. 𑀚𑀸𑀢𑀺𑀫𑀭𑀡𑀲𑁆𑀲 𑀧𑀸𑀭𑀁 𑀦𑀸𑀫 𑀦𑀺𑀩𑁆𑀩𑀸𑀦𑀁, 𑀢𑀁 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀕𑀘𑁆𑀙𑀸𑀫. 𑀤𑀼𑀓𑁆𑀔𑀲𑁆𑀲𑀸𑀢𑀺 𑀯𑀝𑁆𑀝𑀤𑀼𑀓𑁆𑀔𑀲𑁆𑀲. 𑀅𑀦𑁆𑀢𑀓𑀭𑀸𑀢𑀺 𑀅𑀪𑀸𑀯𑀓𑀭𑀸. 𑀪𑀯𑀸𑀫𑀲𑁂𑀢𑀺 𑀪𑀯𑀸𑀫, 𑀅𑀣 𑀯𑀸 𑀅𑀳𑁄 𑀯𑀢 𑀫𑀬𑀁 𑀪𑀯𑁂𑀬𑁆𑀬𑀸𑀫𑀸𑀢𑀺. ‘‘𑀘𑀭𑀸𑀫𑀲𑁂’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀯𑀢𑁆𑀯𑀸𑀧𑀺 𑀘 𑀧𑀼𑀦 𑀉𑀪𑁄𑀧𑀺 𑀓𑀺𑀭 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀧𑀩𑁆𑀩𑀸𑀚𑁂𑀣 𑀦𑁄 𑀪𑀕𑀯𑀸’’𑀢𑀺 𑀏𑀯𑀁 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺𑀁𑀲𑀽𑀢𑀺.

𑁩𑁩. 𑀅𑀣 𑀫𑀸𑀭𑁄 𑀧𑀸𑀧𑀺𑀫𑀸 𑀏𑀯𑀁 𑀢𑁂 𑀉𑀪𑁄𑀧𑀺 𑀯𑀦𑁆𑀤𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀦𑁆𑀢𑁂 𑀤𑀺𑀲𑁆𑀯𑀸 𑁋 ‘‘𑀇𑀫𑁂 𑀫𑀫 𑀯𑀺𑀲𑀬𑀁 𑀅𑀢𑀺𑀓𑁆𑀓𑀫𑀺𑀢𑀼𑀓𑀸𑀫𑀸, 𑀳𑀦𑁆𑀤 𑀦𑁂𑀲𑀁 𑀅𑀦𑁆𑀢𑀭𑀸𑀬𑀁 𑀓𑀭𑁄𑀫𑀻’’𑀢𑀺 𑀆𑀕𑀦𑁆𑀢𑁆𑀯𑀸 𑀖𑀭𑀸𑀯𑀸𑀲𑁂 𑀕𑀼𑀡𑀁 𑀤𑀲𑁆𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 ‘‘𑀦𑀦𑁆𑀤𑀢𑀺 𑀧𑀼𑀢𑁆𑀢𑁂𑀳𑀺 𑀧𑀼𑀢𑁆𑀢𑀺𑀫𑀸’’𑀢𑀺. 𑀢𑀢𑁆𑀣 𑀦𑀦𑁆𑀤𑀢𑀻𑀢𑀺 𑀢𑀼𑀲𑁆𑀲𑀢𑀺 𑀫𑁄𑀤𑀢𑀺. 𑀧𑀼𑀢𑁆𑀢𑁂𑀳𑀻𑀢𑀺 𑀧𑀼𑀢𑁆𑀢𑁂𑀳𑀺𑀧𑀺 𑀥𑀻𑀢𑀭𑁂𑀳𑀺𑀧𑀺, 𑀲𑀳𑀬𑁄𑀕𑀢𑁆𑀣𑁂, 𑀓𑀭𑀡𑀢𑁆𑀣𑁂 𑀯𑀸 𑀓𑀭𑀡𑀯𑀘𑀦𑀁, 𑀧𑀼𑀢𑁆𑀢𑁂𑀳𑀺 𑀲𑀳 𑀦𑀦𑁆𑀤𑀢𑀺, 𑀧𑀼𑀢𑁆𑀢𑁂𑀳𑀺 𑀓𑀭𑀡𑀪𑀽𑀢𑁂𑀳𑀺 𑀦𑀦𑁆𑀤𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀼𑀢𑁆𑀢𑀺𑀫𑀸𑀢𑀺 𑀧𑀼𑀢𑁆𑀢𑀯𑀸 𑀧𑀼𑀕𑁆𑀕𑀮𑁄. 𑀇𑀢𑀻𑀢𑀺 𑀏𑀯𑀫𑀸𑀳. 𑀫𑀸𑀭𑁄𑀢𑀺 𑀯𑀲𑀯𑀢𑁆𑀢𑀺𑀪𑀽𑀫𑀺𑀬𑀁 𑀅𑀜𑁆𑀜𑀢𑀭𑁄 𑀤𑀸𑀫𑀭𑀺𑀓𑀤𑁂𑀯𑀧𑀼𑀢𑁆𑀢𑁄. 𑀲𑁄 𑀳𑀺 𑀲𑀝𑁆𑀞𑀸𑀦𑀸𑀢𑀺𑀓𑁆𑀓𑀫𑀺𑀢𑀼𑀓𑀸𑀫𑀁 𑀚𑀦𑀁 𑀬𑀁 𑀲𑀓𑁆𑀓𑁄𑀢𑀺, 𑀢𑀁 𑀫𑀸𑀭𑁂𑀢𑀺. 𑀬𑀁 𑀦 𑀲𑀓𑁆𑀓𑁄𑀢𑀺, 𑀢𑀲𑁆𑀲𑀧𑀺 𑀫𑀭𑀡𑀁 𑀇𑀘𑁆𑀙𑀢𑀺. 𑀢𑁂𑀦 ‘‘𑀫𑀸𑀭𑁄’’𑀢𑀺 𑀯𑀼𑀘𑁆𑀘𑀢𑀺. 𑀧𑀸𑀧𑀺𑀫𑀸𑀢𑀺 𑀮𑀸𑀫𑀓𑀧𑀼𑀕𑁆𑀕𑀮𑁄, 𑀧𑀸𑀧𑀲𑀫𑀸𑀘𑀸𑀭𑁄 𑀯𑀸. 𑀲𑀗𑁆𑀕𑀻𑀢𑀺𑀓𑀸𑀭𑀸𑀦𑀫𑁂𑀢𑀁 𑀯𑀘𑀦𑀁, 𑀲𑀩𑁆𑀩𑀕𑀸𑀣𑀸𑀲𑀼 𑀘 𑀈𑀤𑀺𑀲𑀸𑀦𑀺. 𑀬𑀣𑀸 𑀘 𑀧𑀼𑀢𑁆𑀢𑁂𑀳𑀺 𑀧𑀼𑀢𑁆𑀢𑀺𑀫𑀸, 𑀕𑁄𑀧𑀺𑀬𑁄 𑀕𑁄𑀳𑀺 𑀢𑀣𑁂𑀯 𑀦𑀦𑁆𑀤𑀢𑀺. 𑀬𑀲𑁆𑀲 𑀕𑀸𑀯𑁄 𑀅𑀢𑁆𑀣𑀺, 𑀲𑁄𑀧𑀺 𑀕𑁄𑀧𑀺𑀬𑁄, 𑀕𑁄𑀳𑀺 𑀲𑀳, 𑀕𑁄𑀳𑀺 𑀯𑀸 𑀓𑀭𑀡𑀪𑀽𑀢𑁂𑀳𑀺 𑀢𑀣𑁂𑀯 𑀦𑀦𑁆𑀤𑀢𑀻𑀢𑀺 𑀅𑀢𑁆𑀣𑁄.

𑀏𑀯𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑀓𑀸𑀭𑀡𑀁 𑀦𑀺𑀤𑁆𑀤𑀺𑀲𑀢𑀺, ‘‘𑀉𑀧𑀥𑀻 𑀳𑀺 𑀦𑀭𑀲𑁆𑀲 𑀦𑀦𑁆𑀤𑀦𑀸’’𑀢𑀺. 𑀢𑀢𑁆𑀣 𑀉𑀧𑀥𑀻𑀢𑀺 𑀘𑀢𑁆𑀢𑀸𑀭𑁄 𑀉𑀧𑀥𑀬𑁄 𑁋 𑀓𑀸𑀫𑀽𑀧𑀥𑀺, 𑀔𑀦𑁆𑀥𑀽𑀧𑀥𑀺, 𑀓𑀺𑀮𑁂𑀲𑀽𑀧𑀥𑀺, 𑀅𑀪𑀺𑀲𑀗𑁆𑀔𑀸𑀭𑀽𑀧𑀥𑀻𑀢𑀺. 𑀓𑀸𑀫𑀸 𑀳𑀺 ‘‘𑀬𑀁 𑀧𑀜𑁆𑀘𑀓𑀸𑀫𑀕𑀼𑀡𑁂 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁, 𑀅𑀬𑀁 𑀓𑀸𑀫𑀸𑀦𑀁 𑀅𑀲𑁆𑀲𑀸𑀤𑁄’’𑀢𑀺 (𑀫. 𑀦𑀺. 𑁧.𑁧𑁬𑁬) 𑀏𑀯𑀁 𑀯𑀼𑀢𑁆𑀢𑀲𑁆𑀲 𑀲𑀼𑀔𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄 𑀉𑀧𑀥𑀻𑀬𑀢𑀺 𑀏𑀢𑁆𑀣 𑀲𑀼𑀔𑀦𑁆𑀢𑀺 𑀇𑀫𑀺𑀦𑀸 𑀯𑀘𑀦𑀢𑁆𑀣𑁂𑀦 𑀉𑀧𑀥𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀔𑀦𑁆𑀥𑀸𑀧𑀺 𑀔𑀦𑁆𑀥𑀫𑀽𑀮𑀓𑀤𑀼𑀓𑁆𑀔𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄, 𑀓𑀺𑀮𑁂𑀲𑀸𑀧𑀺 𑀅𑀧𑀸𑀬𑀤𑀼𑀓𑁆𑀔𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄, 𑀅𑀪𑀺𑀲𑀗𑁆𑀔𑀸𑀭𑀸𑀧𑀺 𑀪𑀯𑀤𑀼𑀓𑁆𑀔𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄𑀢𑀺. 𑀇𑀥 𑀧𑀦 𑀓𑀸𑀫𑀽𑀧𑀥𑀺 𑀅𑀥𑀺𑀧𑁆𑀧𑁂𑀢𑁄. 𑀲𑁄 𑀲𑀢𑁆𑀢𑀲𑀗𑁆𑀔𑀸𑀭𑀯𑀲𑁂𑀦 𑀤𑀼𑀯𑀺𑀥𑁄. 𑀢𑀢𑁆𑀣 𑀲𑀢𑁆𑀢𑀧𑀝𑀺𑀩𑀤𑁆𑀥𑁄 𑀧𑀥𑀸𑀦𑁄, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀼𑀢𑁆𑀢𑁂𑀳𑀺 𑀕𑁄𑀳𑀻’’𑀢𑀺 𑀯𑀢𑁆𑀯𑀸 𑀓𑀸𑀭𑀡𑀫𑀸𑀳 𑁋 ‘‘𑀉𑀧𑀥𑀻 𑀳𑀺 𑀦𑀭𑀲𑁆𑀲 𑀦𑀦𑁆𑀤𑀦𑀸’’𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀬𑀲𑁆𑀫𑀸 𑀇𑀫𑁂 𑀓𑀸𑀫𑀽𑀧𑀥𑀻 𑀦𑀭𑀲𑁆𑀲 𑀦𑀦𑁆𑀤𑀦𑀸, 𑀦𑀦𑁆𑀤𑀬𑀦𑁆𑀢𑀺 𑀦𑀭𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀉𑀧𑀲𑀁𑀳𑀭𑀦𑁆𑀢𑀸, 𑀢𑀲𑁆𑀫𑀸 𑀯𑁂𑀤𑀺𑀢𑀩𑁆𑀩𑀫𑁂𑀢𑀁 ‘‘𑀦𑀦𑁆𑀤𑀢𑀺 𑀧𑀼𑀢𑁆𑀢𑁂𑀳𑀺 𑀧𑀼𑀢𑁆𑀢𑀺𑀫𑀸, 𑀕𑁄𑀧𑀺𑀬𑁄 𑀕𑁄𑀳𑀺 𑀢𑀣𑁂𑀯 𑀦𑀦𑁆𑀤𑀢𑀺, 𑀢𑁆𑀯𑀜𑁆𑀘 𑀧𑀼𑀢𑁆𑀢𑀺𑀫𑀸 𑀕𑁄𑀧𑀺𑀬𑁄 𑀘, 𑀢𑀲𑁆𑀫𑀸 𑀏𑀢𑁂𑀳𑀺, 𑀦𑀦𑁆𑀤, 𑀫𑀸 𑀧𑀩𑁆𑀩𑀚𑁆𑀚𑀁 𑀧𑀸𑀝𑀺𑀓𑀗𑁆𑀔𑀺. 𑀧𑀩𑁆𑀩𑀚𑀺𑀢𑀲𑁆𑀲 𑀳𑀺 𑀏𑀢𑁂 𑀉𑀧𑀥𑀬𑁄 𑀦 𑀲𑀦𑁆𑀢𑀺, 𑀏𑀯𑀁 𑀲𑀦𑁆𑀢𑁂 𑀢𑁆𑀯𑀁 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀧𑀢𑁆𑀣𑁂𑀦𑁆𑀢𑁄𑀧𑀺 𑀤𑀼𑀓𑁆𑀔𑀺𑀢𑁄𑀯 𑀪𑀯𑀺𑀲𑁆𑀲𑀲𑀻’’𑀢𑀺.

𑀇𑀤𑀸𑀦𑀺 𑀢𑀲𑁆𑀲𑀧𑀺 𑀅𑀢𑁆𑀣𑀲𑁆𑀲 𑀲𑀸𑀥𑀓𑀓𑀸𑀭𑀡𑀁 𑀦𑀺𑀤𑁆𑀤𑀺𑀲𑀢𑀺 ‘‘𑀦 𑀳𑀺 𑀲𑁄 𑀦𑀦𑁆𑀤𑀢𑀺, 𑀬𑁄 𑀦𑀺𑀭𑀽𑀧𑀥𑀻’’𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀬𑀲𑁆𑀫𑀸 𑀬𑀲𑁆𑀲𑁂𑀢𑁂 𑀉𑀧𑀥𑀬𑁄 𑀦𑀢𑁆𑀣𑀺, 𑀲𑁄 𑀧𑀺𑀬𑁂𑀳𑀺 𑀜𑀸𑀢𑀻𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑁄 𑀦𑀺𑀩𑁆𑀪𑁄𑀕𑀽𑀧𑀓𑀭𑀡𑁄 𑀦 𑀦𑀦𑁆𑀤𑀢𑀺, 𑀢𑀲𑁆𑀫𑀸 𑀢𑁆𑀯𑀁 𑀇𑀫𑁂 𑀉𑀧𑀥𑀬𑁄 𑀯𑀚𑁆𑀚𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑁄 𑀤𑀼𑀓𑁆𑀔𑀺𑀢𑁄𑀯 𑀪𑀯𑀺𑀲𑁆𑀲𑀲𑀻𑀢𑀺.

𑁩𑁪. 𑀅𑀣 𑀪𑀕𑀯𑀸 ‘‘𑀫𑀸𑀭𑁄 𑀅𑀬𑀁 𑀧𑀸𑀧𑀺𑀫𑀸 𑀇𑀫𑁂𑀲𑀁 𑀅𑀦𑁆𑀢𑀭𑀸𑀬𑀸𑀬 𑀆𑀕𑀢𑁄’’𑀢𑀺 𑀯𑀺𑀤𑀺𑀢𑁆𑀯𑀸 𑀨𑀮𑁂𑀦 𑀨𑀮𑀁 𑀧𑀸𑀢𑁂𑀦𑁆𑀢𑁄 𑀯𑀺𑀬 𑀢𑀸𑀬𑁂𑀯 𑀫𑀸𑀭𑁂𑀦𑀸𑀪𑀢𑀸𑀬 𑀉𑀧𑀫𑀸𑀬 𑀫𑀸𑀭𑀯𑀸𑀤𑀁 𑀪𑀺𑀦𑁆𑀤𑀦𑁆𑀢𑁄 𑀢𑀫𑁂𑀯 𑀕𑀸𑀣𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 ‘‘𑀉𑀧𑀥𑀺 𑀲𑁄𑀓𑀯𑀢𑁆𑀣𑀽’’𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑁄𑀘𑀢𑀺 𑀧𑀼𑀢𑁆𑀢𑁂𑀳𑀺 𑀧𑀼𑀢𑁆𑀢𑀺𑀫𑀸’’𑀢𑀺. 𑀢𑀢𑁆𑀣 𑀲𑀩𑁆𑀩𑀁 𑀧𑀤𑀢𑁆𑀣𑀢𑁄 𑀉𑀢𑁆𑀢𑀸𑀦𑀫𑁂𑀯. 𑀅𑀬𑀁 𑀧𑀦 𑀅𑀥𑀺𑀧𑁆𑀧𑀸𑀬𑁄 𑁋 𑀫𑀸, 𑀧𑀸𑀧𑀺𑀫, 𑀏𑀯𑀁 𑀅𑀯𑀘 ‘‘𑀦𑀦𑁆𑀤𑀢𑀺 𑀧𑀼𑀢𑁆𑀢𑁂𑀳𑀺 𑀧𑀼𑀢𑁆𑀢𑀺𑀫𑀸’’𑀢𑀺. 𑀲𑀩𑁆𑀩𑁂𑀳𑁂𑀯 𑀳𑀺 𑀧𑀺𑀬𑁂𑀳𑀺, 𑀫𑀦𑀸𑀧𑁂𑀳𑀺 𑀦𑀸𑀦𑀸𑀪𑀸𑀯𑁄 𑀯𑀺𑀦𑀸𑀪𑀸𑀯𑁄, 𑀅𑀦𑀢𑀺𑀓𑁆𑀓𑀫𑀦𑀻𑀬𑁄 𑀅𑀬𑀁 𑀯𑀺𑀥𑀺, 𑀢𑁂𑀲𑀜𑁆𑀘 𑀧𑀺𑀬𑀫𑀦𑀸𑀧𑀸𑀦𑀁 𑀧𑀼𑀢𑁆𑀢𑀤𑀸𑀭𑀸𑀦𑀁 𑀕𑀯𑀸𑀲𑁆𑀲𑀯𑀴𑀯𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀻𑀦𑀁 𑀯𑀺𑀦𑀸𑀪𑀸𑀯𑁂𑀦 𑀅𑀥𑀺𑀫𑀢𑁆𑀢𑀲𑁄𑀓𑀲𑀮𑁆𑀮𑀲𑀫𑀧𑁆𑀧𑀺𑀢𑀳𑀤𑀬𑀸 𑀲𑀢𑁆𑀢𑀸 𑀉𑀫𑁆𑀫𑀢𑁆𑀢𑀓𑀸𑀧𑀺 𑀳𑁄𑀦𑁆𑀢𑀺 𑀔𑀺𑀢𑁆𑀢𑀘𑀺𑀢𑁆𑀢𑀸, 𑀫𑀭𑀡𑀫𑁆𑀧𑀺 𑀦𑀺𑀕𑀘𑁆𑀙𑀦𑁆𑀢𑀺 𑀫𑀭𑀡𑀫𑀢𑁆𑀢𑀫𑁆𑀧𑀺 𑀤𑀼𑀓𑁆𑀔𑀁. 𑀢𑀲𑁆𑀫𑀸 𑀏𑀯𑀁 𑀕𑀡𑁆𑀳 𑁋 𑀲𑁄𑀘𑀢𑀺 𑀧𑀼𑀢𑁆𑀢𑁂𑀳𑀺 𑀧𑀼𑀢𑁆𑀢𑀺𑀫𑀸. 𑀬𑀣𑀸 𑀘 𑀧𑀼𑀢𑁆𑀢𑁂𑀳𑀺 𑀧𑀼𑀢𑁆𑀢𑀺𑀫𑀸, 𑀕𑁄𑀧𑀺𑀬𑁄 𑀕𑁄𑀳𑀺 𑀢𑀣𑁂𑀯 𑀲𑁄𑀘𑀢𑀻𑀢𑀺. 𑀓𑀺𑀁 𑀓𑀸𑀭𑀡𑀸? 𑀉𑀧𑀥𑀻 𑀳𑀺 𑀦𑀭𑀲𑁆𑀲 𑀲𑁄𑀘𑀦𑀸. 𑀬𑀲𑁆𑀫𑀸 𑀘 𑀉𑀧𑀥𑀻 𑀳𑀺 𑀦𑀭𑀲𑁆𑀲 𑀲𑁄𑀘𑀦𑀸, 𑀢𑀲𑁆𑀫𑀸 𑀏𑀯 ‘‘𑀦 𑀳𑀺 𑀲𑁄 𑀲𑁄𑀘𑀢𑀺, 𑀬𑁄 𑀦𑀺𑀭𑀽𑀧𑀥𑀺’’. 𑀬𑁄 𑀉𑀧𑀥𑀻𑀲𑀼 𑀲𑀗𑁆𑀕𑀧𑁆𑀧𑀳𑀸𑀦𑁂𑀦 𑀦𑀺𑀭𑀼𑀧𑀥𑀺 𑀳𑁄𑀢𑀺, 𑀲𑁄 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺 𑀓𑀸𑀬𑀧𑀭𑀺𑀳𑀸𑀭𑀺𑀓𑁂𑀦 𑀘𑀻𑀯𑀭𑁂𑀦, 𑀓𑀼𑀘𑁆𑀙𑀺𑀧𑀭𑀺𑀳𑀸𑀭𑀺𑀓𑁂𑀦 𑀧𑀺𑀡𑁆𑀟𑀧𑀸𑀢𑁂𑀦, 𑀬𑁂𑀦 𑀬𑁂𑀦𑁂𑀯 𑀧𑀓𑁆𑀓𑀫𑀢𑀺, 𑀲𑀫𑀸𑀤𑀸𑀬𑁂𑀯 𑀧𑀓𑁆𑀓𑀫𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀧𑀓𑁆𑀔𑀻 𑀲𑀓𑀼𑀡𑁄 …𑀧𑁂… 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀢𑀺. 𑀏𑀯𑀁 𑀲𑀩𑁆𑀩𑀲𑁄𑀓𑀲𑀫𑀼𑀕𑁆𑀖𑀸𑀢𑀸 ‘‘𑀦 𑀳𑀺 𑀲𑁄 𑀲𑁄𑀘𑀢𑀺, 𑀬𑁄 𑀦𑀺𑀭𑀼𑀧𑀥𑀻’’𑀢𑀺. 𑀇𑀢𑀺 𑀪𑀕𑀯𑀸 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀦𑀁 𑀯𑁄𑀲𑀸𑀧𑁂𑀲𑀺. 𑀅𑀣 𑀯𑀸 𑀬𑁄 𑀦𑀺𑀭𑀼𑀧𑀥𑀺, 𑀬𑁄 𑀦𑀺𑀓𑁆𑀓𑀺𑀮𑁂𑀲𑁄, 𑀲𑁄 𑀦 𑀲𑁄𑀘𑀢𑀺. 𑀬𑀸𑀯𑀤𑁂𑀯 𑀳𑀺 𑀓𑀺𑀮𑁂𑀲𑀸 𑀲𑀦𑁆𑀢𑀺, 𑀢𑀸𑀯𑀤𑁂𑀯 𑀲𑀩𑁆𑀩𑁂 𑀉𑀧𑀥𑀬𑁄 𑀲𑁄𑀓𑀧𑁆𑀨𑀮𑀸𑀯 𑀳𑁄𑀦𑁆𑀢𑀺. 𑀓𑀺𑀮𑁂𑀲𑀧𑁆𑀧𑀳𑀸𑀦𑀸 𑀧𑀦 𑀦𑀢𑁆𑀣𑀺 𑀲𑁄𑀓𑁄𑀢𑀺. 𑀏𑀯𑀫𑁆𑀧𑀺 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦𑁂𑀯 𑀤𑁂𑀲𑀦𑀁 𑀯𑁄𑀲𑀸𑀧𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀥𑀦𑀺𑀬𑁄 𑀘 𑀕𑁄𑀧𑀻 𑀘 𑀉𑀪𑁄𑀧𑀺 𑀧𑀩𑁆𑀩𑀚𑀺𑀁𑀲𑀼. 𑀪𑀕𑀯𑀸 𑀆𑀓𑀸𑀲𑁂𑀦𑁂𑀯 𑀚𑁂𑀢𑀯𑀦𑀁 𑀅𑀕𑀫𑀸𑀲𑀺. 𑀢𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀭𑀺𑀁𑀲𑀼. 𑀯𑀲𑀦𑀝𑁆𑀞𑀸𑀦𑁂 𑀘 𑀦𑁂𑀲𑀁 𑀕𑁄𑀧𑀸𑀮𑀓𑀸 𑀯𑀺𑀳𑀸𑀭𑀁 𑀓𑀸𑀭𑁂𑀲𑀼𑀁. 𑀲𑁄 𑀅𑀚𑁆𑀚𑀸𑀧𑀺 𑀕𑁄𑀧𑀸𑀮𑀓𑀯𑀺𑀳𑀸𑀭𑁄𑀢𑁆𑀯𑁂𑀯 𑀧𑀜𑁆𑀜𑀸𑀬𑀢𑀻𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀥𑀦𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.