𑁫. 𑀓𑀼𑀫𑀸𑀭𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑀅𑀘𑁆𑀙𑁂𑀭𑀭𑀽𑀧𑀁 𑀲𑀼𑀕𑀢𑀲𑁆𑀲 𑀜𑀸𑀡𑀦𑁆𑀢𑀺 𑀇𑀤𑀁 𑀓𑀼𑀫𑀸𑀭𑀧𑁂𑀢𑀯𑀢𑁆𑀣𑀼. 𑀢𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀲𑀸𑀯𑀢𑁆𑀣𑀺𑀬𑀁 𑀓𑀺𑀭 𑀩𑀳𑀽 𑀉𑀧𑀸𑀲𑀓𑀸 𑀥𑀫𑁆𑀫𑀕𑀡𑀸 𑀳𑀼𑀢𑁆𑀯𑀸 𑀦𑀕𑀭𑁂 𑀫𑀳𑀦𑁆𑀢𑀁 𑀫𑀡𑁆𑀟𑀧𑀁 𑀓𑀸𑀭𑁂𑀢𑁆𑀯𑀸 𑀢𑀁 𑀦𑀸𑀦𑀸𑀯𑀡𑁆𑀡𑁂𑀳𑀺 𑀯𑀢𑁆𑀣𑁂𑀳𑀺 𑀅𑀮𑀗𑁆𑀓𑀭𑀺𑀢𑁆𑀯𑀸 𑀓𑀸𑀮𑀲𑁆𑀲𑁂𑀯 𑀲𑀢𑁆𑀣𑀸𑀭𑀁 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘 𑀦𑀺𑀫𑀦𑁆𑀢𑁂𑀢𑁆𑀯𑀸 𑀫𑀳𑀸𑀭𑀳𑀯𑀭𑀧𑀘𑁆𑀘𑀢𑁆𑀣𑀭𑀡𑀢𑁆𑀣𑀢𑁂𑀲𑀼 𑀆𑀲𑀦𑁂𑀲𑀼 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀳𑀺 𑀧𑀽𑀚𑁂𑀢𑁆𑀯𑀸 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀦𑁆𑀢𑀺. 𑀢𑀁 𑀤𑀺𑀲𑁆𑀯𑀸 𑀅𑀜𑁆𑀜𑀢𑀭𑁄 𑀫𑀘𑁆𑀙𑁂𑀭𑀫𑀮𑀧𑀭𑀺𑀬𑀼𑀝𑁆𑀞𑀺𑀢𑀘𑀺𑀢𑁆𑀢𑁄 𑀧𑀼𑀭𑀺𑀲𑁄 𑀢𑀁 𑀲𑀓𑁆𑀓𑀸𑀭𑀁 𑀅𑀲𑀳𑀫𑀸𑀦𑁄 𑀏𑀯𑀫𑀸𑀳 𑁋 ‘‘𑀯𑀭𑀫𑁂𑀢𑀁 𑀲𑀩𑁆𑀩𑀁 𑀲𑀗𑁆𑀓𑀸𑀭𑀓𑀽𑀝𑁂 𑀙𑀟𑁆𑀟𑀺𑀢𑀁, 𑀦 𑀢𑁆𑀯𑁂𑀯 𑀇𑀫𑁂𑀲𑀁 𑀫𑀼𑀡𑁆𑀟𑀓𑀸𑀦𑀁 𑀤𑀺𑀦𑁆𑀦’’𑀦𑁆𑀢𑀺. 𑀢𑀁 𑀲𑀼𑀢𑁆𑀯𑀸 𑀉𑀧𑀸𑀲𑀓𑀸 𑀲𑀁𑀯𑀺𑀕𑁆𑀕𑀫𑀸𑀦𑀲𑀸 ‘‘𑀪𑀸𑀭𑀺𑀬𑀁 𑀯𑀢 𑀇𑀫𑀺𑀦𑀸 𑀧𑀼𑀭𑀺𑀲𑁂𑀦 𑀧𑀸𑀧𑀁 𑀧𑀲𑀼𑀢𑀁, 𑀬𑁂𑀦 𑀏𑀯𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑁂 𑀪𑀺𑀓𑁆𑀔𑀼𑀲𑀗𑁆𑀖𑁂 𑀅𑀧𑀭𑀤𑁆𑀥’’𑀦𑁆𑀢𑀺 𑀢𑀫𑀢𑁆𑀣𑀁 𑀢𑀲𑁆𑀲 𑀫𑀸𑀢𑀼𑀬𑀸 𑀆𑀭𑁄𑀘𑁂𑀢𑁆𑀯𑀸 ‘‘𑀕𑀘𑁆𑀙, 𑀢𑁆𑀯𑀁 𑀲𑀲𑀸𑀯𑀓𑀲𑀗𑁆𑀖𑀁 𑀪𑀕𑀯𑀦𑁆𑀢𑀁 𑀔𑀫𑀸𑀧𑁂𑀳𑀻’’𑀢𑀺 𑀆𑀳𑀁𑀲𑀼. 𑀲𑀸 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀧𑀼𑀢𑁆𑀢𑀁 𑀲𑀦𑁆𑀢𑀚𑁆𑀚𑁂𑀦𑁆𑀢𑀻 𑀲𑀜𑁆𑀜𑀸𑀧𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀢𑁆𑀢𑁂𑀦 𑀓𑀢𑀅𑀘𑁆𑀘𑀬𑀁 𑀤𑁂𑀲𑁂𑀦𑁆𑀢𑀻 𑀔𑀫𑀸𑀧𑁂𑀢𑁆𑀯𑀸 𑀪𑀕𑀯𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀲𑀢𑁆𑀢𑀸𑀳𑀁 𑀬𑀸𑀕𑀼𑀤𑀸𑀦𑁂𑀦 𑀧𑀽𑀚𑀁 𑀅𑀓𑀸𑀲𑀺. 𑀢𑀲𑁆𑀲𑀸 𑀧𑀼𑀢𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀓𑀸𑀮𑀁 𑀓𑀢𑁆𑀯𑀸 𑀓𑀺𑀮𑀺𑀝𑁆𑀞𑀓𑀫𑁆𑀫𑀽𑀧𑀚𑀻𑀯𑀺𑀦𑀺𑀬𑀸 𑀕𑀡𑀺𑀓𑀸𑀬 𑀓𑀼𑀘𑁆𑀙𑀺𑀬𑀁 𑀦𑀺𑀩𑁆𑀩𑀢𑁆𑀢𑀺. 𑀲𑀸 𑀘 𑀦𑀁 𑀚𑀸𑀢𑀫𑀢𑁆𑀢𑀁𑀬𑁂𑀯 ‘‘𑀤𑀸𑀭𑀓𑁄’’𑀢𑀺 𑀜𑀢𑁆𑀯𑀸 𑀲𑀼𑀲𑀸𑀦𑁂 𑀙𑀟𑁆𑀟𑀸𑀧𑁂𑀲𑀺. 𑀲𑁄 𑀢𑀢𑁆𑀣 𑀅𑀢𑁆𑀢𑀦𑁄 𑀧𑀼𑀜𑁆𑀜𑀩𑀮𑁂𑀦𑁂𑀯 𑀕𑀳𑀺𑀢𑀸𑀭𑀓𑁆𑀔𑁄 𑀓𑁂𑀦𑀘𑀺 𑀅𑀦𑀼𑀧𑀤𑁆𑀤𑀼𑀢𑁄 𑀫𑀸𑀢𑀼-𑀅𑀗𑁆𑀓𑁂 𑀯𑀺𑀬 𑀲𑀼𑀔𑀁 𑀲𑀼𑀧𑀺. 𑀤𑁂𑀯𑀢𑀸 𑀢𑀲𑁆𑀲 𑀆𑀭𑀓𑁆𑀔𑀁 𑀕𑀡𑁆𑀳𑀺𑀁𑀲𑀽𑀢𑀺 𑀘 𑀯𑀤𑀦𑁆𑀢𑀺.

𑀅𑀣 𑀪𑀕𑀯𑀸 𑀧𑀘𑁆𑀘𑀽𑀲𑀲𑀫𑀬𑁂 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀢𑀁 𑀤𑀸𑀭𑀓𑀁 𑀲𑀺𑀯𑀣𑀺𑀓𑀸𑀬 𑀙𑀟𑁆𑀟𑀺𑀢𑀁 𑀤𑀺𑀲𑁆𑀯𑀸 𑀲𑀽𑀭𑀺𑀬𑀼𑀕𑁆𑀕𑀫𑀦𑀯𑁂𑀮𑀸𑀬 𑀲𑀺𑀯𑀣𑀺𑀓𑀁 𑀅𑀕𑀫𑀸𑀲𑀺. ‘‘𑀲𑀢𑁆𑀣𑀸 𑀇𑀥𑀸𑀕𑀢𑁄, 𑀓𑀸𑀭𑀡𑁂𑀦𑁂𑀢𑁆𑀣 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀫𑀳𑀸𑀚𑀦𑁄 𑀲𑀦𑁆𑀦𑀺𑀧𑀢𑀺. 𑀪𑀕𑀯𑀸 𑀲𑀦𑁆𑀦𑀺𑀧𑀢𑀺𑀢𑀧𑀭𑀺𑀲𑀸𑀬 ‘‘𑀦𑀸𑀬𑀁 𑀤𑀸𑀭𑀓𑁄 𑀑𑀜𑁆𑀜𑀸𑀢𑀩𑁆𑀩𑁄, 𑀬𑀤𑀺𑀧𑀺 𑀇𑀤𑀸𑀦𑀺 𑀲𑀼𑀲𑀸𑀦𑁂 𑀙𑀟𑁆𑀟𑀺𑀢𑁄 𑀅𑀦𑀸𑀣𑁄 𑀞𑀺𑀢𑁄, 𑀆𑀬𑀢𑀺𑀁 𑀧𑀦 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀅𑀪𑀺𑀲𑀫𑁆𑀧𑀭𑀸𑀬𑀜𑁆𑀘 𑀉𑀴𑀸𑀭𑀲𑀫𑁆𑀧𑀢𑁆𑀢𑀺𑀁 𑀧𑀝𑀺𑀮𑀪𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀫𑀦𑀼𑀲𑁆𑀲𑁂𑀳𑀺 ‘‘𑀓𑀺𑀁 𑀦𑀼 𑀔𑁄, 𑀪𑀦𑁆𑀢𑁂, 𑀇𑀫𑀺𑀦𑀸 𑀧𑀼𑀭𑀺𑀫𑀚𑀸𑀢𑀺𑀬𑀁 𑀓𑀢𑀁 𑀓𑀫𑁆𑀫’’𑀦𑁆𑀢𑀺 𑀧𑀼𑀝𑁆𑀞𑁄 𑁋

‘‘𑀩𑀼𑀤𑁆𑀥𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲, 𑀧𑀽𑀚𑀁 𑀅𑀓𑀸𑀲𑀺 𑀚𑀦𑀢𑀸 𑀉𑀴𑀸𑀭𑀁;

𑀢𑀢𑁆𑀭𑀲𑁆𑀲 𑀘𑀺𑀢𑁆𑀢𑀲𑁆𑀲𑀳𑀼 𑀅𑀜𑁆𑀜𑀣𑀢𑁆𑀢𑀁, 𑀯𑀸𑀘𑀁 𑀅𑀪𑀸𑀲𑀺 𑀨𑀭𑀼𑀲𑀁 𑀅𑀲𑀩𑁆𑀪’’𑀦𑁆𑀢𑀺. 𑁋

𑀆𑀤𑀺𑀦𑀸 𑀦𑀬𑁂𑀦 𑀤𑀸𑀭𑀓𑁂𑀦 𑀓𑀢𑀓𑀫𑁆𑀫𑀁 𑀆𑀬𑀢𑀺𑀁 𑀧𑀢𑁆𑀢𑀩𑁆𑀩𑀁 𑀲𑀫𑁆𑀧𑀢𑁆𑀢𑀺𑀜𑁆𑀘 𑀧𑀓𑀸𑀲𑁂𑀢𑁆𑀯𑀸 𑀲𑀦𑁆𑀦𑀺𑀧𑀢𑀺𑀢𑀸𑀬 𑀧𑀭𑀺𑀲𑀸𑀬 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀥𑀫𑁆𑀫𑀁 𑀓𑀣𑁂𑀢𑁆𑀯𑀸 𑀉𑀧𑀭𑀺 𑀲𑀸𑀫𑀼𑀓𑁆𑀓𑀁𑀲𑀺𑀓𑀁 𑀥𑀫𑁆𑀫𑀤𑁂𑀲𑀦𑀁 𑀅𑀓𑀸𑀲𑀺. 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺, 𑀢𑀜𑁆𑀘 𑀤𑀸𑀭𑀓𑀁 𑀅𑀲𑀻𑀢𑀺𑀓𑁄𑀝𑀺𑀯𑀺𑀪𑀯𑁄 𑀏𑀓𑁄 𑀓𑀼𑀝𑀼𑀫𑁆𑀩𑀺𑀓𑁄 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸𑀯 ‘‘𑀫𑀬𑁆𑀳𑀁 𑀧𑀼𑀢𑁆𑀢𑁄’’𑀢𑀺 𑀅𑀕𑁆𑀕𑀳𑁂𑀲𑀺. 𑀪𑀕𑀯𑀸 ‘‘𑀏𑀢𑁆𑀢𑀓𑁂𑀦 𑀅𑀬𑀁 𑀤𑀸𑀭𑀓𑁄 𑀭𑀓𑁆𑀔𑀺𑀢𑁄, 𑀫𑀳𑀸𑀚𑀦𑀲𑁆𑀲 𑀘 𑀅𑀦𑀼𑀕𑁆𑀕𑀳𑁄 𑀓𑀢𑁄’’𑀢𑀺 𑀯𑀺𑀳𑀸𑀭𑀁 𑀅𑀕𑀫𑀸𑀲𑀺.

𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀢𑀲𑁆𑀫𑀺𑀁 𑀓𑀼𑀝𑀼𑀫𑁆𑀩𑀺𑀓𑁂 𑀓𑀸𑀮𑀓𑀢𑁂 𑀢𑁂𑀦 𑀦𑀺𑀬𑁆𑀬𑀸𑀤𑀺𑀢𑀁 𑀥𑀦𑀁 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀓𑀼𑀝𑀼𑀫𑁆𑀩𑀁 𑀲𑀡𑁆𑀞𑀧𑁂𑀦𑁆𑀢𑁄 𑀢𑀲𑁆𑀫𑀺𑀁 𑀦𑀕𑀭𑁂𑀬𑁂𑀯 𑀫𑀳𑀸𑀯𑀺𑀪𑀯𑁄 𑀕𑀳𑀧𑀢𑀺 𑀳𑀼𑀢𑁆𑀯𑀸 𑀤𑀸𑀦𑀸𑀤𑀺𑀦𑀺𑀭𑀢𑁄 𑀅𑀳𑁄𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀅𑀳𑁄 𑀦𑀽𑀦 𑀲𑀢𑁆𑀣𑀸 𑀲𑀢𑁆𑀢𑁂𑀲𑀼 𑀅𑀦𑀼𑀓𑀫𑁆𑀧𑀓𑁄, 𑀲𑁄𑀧𑀺 𑀦𑀸𑀫 𑀤𑀸𑀭𑀓𑁄 𑀢𑀤𑀸 𑀅𑀦𑀸𑀣𑁄 𑀞𑀺𑀢𑁄 𑀏𑀢𑀭𑀳𑀺 𑀫𑀳𑀢𑀺𑀁 𑀲𑀫𑁆𑀧𑀢𑁆𑀢𑀺𑀁 𑀧𑀘𑁆𑀘𑀦𑀼𑀪𑀯𑀢𑀺, 𑀉𑀴𑀸𑀭𑀸𑀦𑀺 𑀘 𑀧𑀼𑀜𑁆𑀜𑀸𑀦𑀺 𑀓𑀭𑁄𑀢𑀻’’𑀢𑀺. 𑀢𑀁 𑀲𑀼𑀢𑁆𑀯𑀸 𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀢𑀲𑁆𑀲 𑀏𑀢𑁆𑀢𑀓𑀸𑀯 𑀲𑀫𑁆𑀧𑀢𑁆𑀢𑀺, 𑀅𑀣 𑀔𑁄 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀢𑀸𑀯𑀢𑀺𑀁𑀲𑀪𑀯𑀦𑁂 𑀲𑀓𑁆𑀓𑀲𑁆𑀲 𑀤𑁂𑀯𑀭𑀜𑁆𑀜𑁄 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺, 𑀫𑀳𑀢𑀺𑀁 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀜𑁆𑀘 𑀧𑀝𑀺𑀮𑀪𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀢𑀁 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽 𑀘 𑀫𑀳𑀸𑀚𑀦𑁄 𑀘 ‘‘𑀇𑀤𑀁 𑀓𑀺𑀭 𑀓𑀸𑀭𑀡𑀁 𑀤𑀺𑀲𑁆𑀯𑀸 𑀤𑀻𑀖𑀤𑀲𑁆𑀲𑀻 𑀪𑀕𑀯𑀸 𑀚𑀸𑀢𑀫𑀢𑁆𑀢𑀲𑁆𑀲𑁂𑀯𑀲𑁆𑀲 𑀆𑀫𑀓𑀲𑀼𑀲𑀸𑀦𑁂 𑀙𑀟𑁆𑀟𑀺𑀢𑀲𑁆𑀲 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀲𑀗𑁆𑀕𑀳𑀁 𑀅𑀓𑀸𑀲𑀻’’𑀢𑀺 𑀲𑀢𑁆𑀣𑀼 𑀜𑀸𑀡𑀯𑀺𑀲𑁂𑀲𑀁 𑀣𑁄𑀫𑁂𑀢𑁆𑀯𑀸 𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀢𑀲𑁆𑀲 𑀧𑀯𑀢𑁆𑀢𑀺𑀁 𑀓𑀣𑁂𑀲𑀼𑀁. 𑀢𑀫𑀢𑁆𑀣𑀁 𑀤𑀻𑀧𑁂𑀦𑁆𑀢𑀸 𑀲𑀗𑁆𑀕𑀻𑀢𑀺𑀓𑀸𑀭𑀸 𑁋

𑁪𑁫𑁩. ‘‘𑀅𑀘𑁆𑀙𑁂𑀭𑀭𑀽𑀧𑀁 𑀲𑀼𑀕𑀢𑀲𑁆𑀲 𑀜𑀸𑀡𑀁, 𑀲𑀢𑁆𑀣𑀸 𑀬𑀣𑀸 𑀧𑀼𑀕𑁆𑀕𑀮𑀁 𑀩𑁆𑀬𑀸𑀓𑀸𑀲𑀺;

𑀉𑀲𑁆𑀲𑀦𑁆𑀦𑀧𑀼𑀜𑁆𑀜𑀸𑀧𑀺 𑀪𑀯𑀦𑁆𑀢𑀺 𑀳𑁂𑀓𑁂, 𑀧𑀭𑀺𑀢𑁆𑀢𑀧𑀼𑀜𑁆𑀜𑀸𑀧𑀺 𑀪𑀯𑀦𑁆𑀢𑀺 𑀳𑁂𑀓𑁂.

𑁪𑁫𑁪. ‘‘𑀅𑀬𑀁 𑀓𑀼𑀫𑀸𑀭𑁄 𑀲𑀻𑀯𑀣𑀺𑀓𑀸𑀬 𑀙𑀟𑁆𑀟𑀺𑀢𑁄, 𑀅𑀗𑁆𑀕𑀼𑀝𑁆𑀞𑀲𑁆𑀦𑁂𑀳𑁂𑀦 𑀬𑀸𑀧𑁂𑀢𑀺 𑀭𑀢𑁆𑀢𑀺𑀁;

𑀦 𑀬𑀓𑁆𑀔𑀪𑀽𑀢𑀸 𑀦 𑀲𑀭𑀻𑀲𑀧𑀸 𑀯𑀸, 𑀯𑀺𑀳𑁂𑀞𑀬𑁂𑀬𑁆𑀬𑀼𑀁 𑀓𑀢𑀧𑀼𑀜𑁆𑀜𑀁 𑀓𑀼𑀫𑀸𑀭𑀁.

𑁪𑁫𑁫. ‘‘𑀲𑀼𑀦𑀔𑀸𑀧𑀺𑀫𑀲𑁆𑀲 𑀧𑀮𑀺𑀳𑀺𑀁𑀲𑀼 𑀧𑀸𑀤𑁂, 𑀥𑀗𑁆𑀓𑀸 𑀲𑀺𑀗𑁆𑀕𑀸𑀮𑀸 𑀧𑀭𑀺𑀯𑀢𑁆𑀢𑀬𑀦𑁆𑀢𑀺;

𑀕𑀩𑁆𑀪𑀸𑀲𑀬𑀁 𑀧𑀓𑁆𑀔𑀺𑀕𑀡𑀸 𑀳𑀭𑀦𑁆𑀢𑀺, 𑀓𑀸𑀓𑀸 𑀧𑀦 𑀅𑀓𑁆𑀔𑀺𑀫𑀮𑀁 𑀳𑀭𑀦𑁆𑀢𑀺.

𑁪𑁫𑁬. ‘‘𑀦𑀬𑀺𑀫𑀲𑁆𑀲 𑀭𑀓𑁆𑀔𑀁 𑀯𑀺𑀤𑀳𑀺𑀁𑀲𑀼 𑀓𑁂𑀘𑀺, 𑀦 𑀑𑀲𑀥𑀁 𑀲𑀸𑀲𑀧𑀥𑀽𑀧𑀦𑀁 𑀯𑀸;

𑀦𑀓𑁆𑀔𑀢𑁆𑀢𑀬𑁄𑀕𑀫𑁆𑀧𑀺 𑀦 𑀅𑀕𑁆𑀕𑀳𑁂𑀲𑀼𑀁, 𑀦 𑀲𑀩𑁆𑀩𑀥𑀜𑁆𑀜𑀸𑀦𑀺𑀧𑀺 𑀆𑀓𑀺𑀭𑀺𑀁𑀲𑀼.

𑁪𑁫𑁭. ‘‘𑀏𑀢𑀸𑀤𑀺𑀲𑀁 𑀉𑀢𑁆𑀢𑀫𑀓𑀺𑀘𑁆𑀙𑀧𑀢𑁆𑀢𑀁, 𑀭𑀢𑁆𑀢𑀸𑀪𑀢𑀁 𑀲𑀻𑀯𑀣𑀺𑀓𑀸𑀬 𑀙𑀟𑁆𑀟𑀺𑀢𑀁;

𑀦𑁄𑀦𑀻𑀢𑀧𑀺𑀡𑁆𑀟𑀁𑀯 𑀧𑀯𑁂𑀥𑀫𑀸𑀦𑀁, 𑀲𑀲𑀁𑀲𑀬𑀁 𑀚𑀻𑀯𑀺𑀢𑀲𑀸𑀯𑀲𑁂𑀲𑀁.

𑁪𑁫𑁮. ‘‘𑀢𑀫𑀤𑁆𑀤𑀲𑀸 𑀤𑁂𑀯𑀫𑀦𑀼𑀲𑁆𑀲𑀧𑀽𑀚𑀺𑀢𑁄, 𑀤𑀺𑀲𑁆𑀯𑀸 𑀘 𑀢𑀁 𑀩𑁆𑀬𑀸𑀓𑀭𑀺 𑀪𑀽𑀭𑀺𑀧𑀜𑁆𑀜𑁄;

‘𑀅𑀬𑀁 𑀓𑀼𑀫𑀸𑀭𑁄 𑀦𑀕𑀭𑀲𑁆𑀲𑀺𑀫𑀲𑁆𑀲, 𑀅𑀕𑁆𑀕𑀓𑀼𑀮𑀺𑀓𑁄 𑀪𑀯𑀺𑀲𑁆𑀲𑀢𑀺 𑀪𑁄𑀕𑀢𑁄 𑀘’.

𑁪𑁫𑁯. ‘‘𑀓𑀺𑀲𑁆𑀲 𑀯𑀢𑀁 𑀓𑀺𑀁 𑀧𑀦 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀺𑀲𑁆𑀲 𑀲𑀼𑀘𑀺𑀡𑁆𑀡𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄;

𑀏𑀢𑀸𑀤𑀺𑀲𑀁 𑀩𑁆𑀬𑀲𑀦𑀁 𑀧𑀸𑀧𑀼𑀡𑀺𑀢𑁆𑀯𑀸, 𑀢𑀁 𑀢𑀸𑀤𑀺𑀲𑀁 𑀧𑀘𑁆𑀘𑀦𑀼𑀪𑁄𑀲𑁆𑀲𑀢𑀺𑀤𑁆𑀥𑀺’’𑀦𑁆𑀢𑀺. 𑁋

𑀙 𑀕𑀸𑀣𑀸 𑀅𑀯𑁄𑀘𑀼𑀁.

𑁪𑁫𑁩. 𑀢𑀢𑁆𑀣 𑀅𑀘𑁆𑀙𑁂𑀭𑀭𑀽𑀧𑀦𑁆𑀢𑀺 𑀅𑀘𑁆𑀙𑀭𑀺𑀬𑀲𑀪𑀸𑀯𑀁. 𑀲𑀼𑀕𑀢𑀲𑁆𑀲 𑀜𑀸𑀡𑀦𑁆𑀢𑀺 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀜𑀸𑀡𑀁, 𑀆𑀲𑀬𑀸𑀦𑀼𑀲𑀬𑀜𑀸𑀡𑀸𑀤𑀺𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀬𑀺𑀤𑀁 𑀅𑀜𑁆𑀜𑁂𑀲𑀁 𑀅𑀯𑀺𑀲𑀬𑀪𑀽𑀢𑀁 𑀓𑀣𑀁 𑀜𑀸𑀡𑀦𑁆𑀢𑀺 𑀆𑀳 ‘‘𑀲𑀢𑁆𑀣𑀸 𑀬𑀣𑀸 𑀧𑀼𑀕𑁆𑀕𑀮𑀁 𑀩𑁆𑀬𑀸𑀓𑀸𑀲𑀻’’𑀢𑀺. 𑀢𑁂𑀦 𑀲𑀢𑁆𑀣𑀼 𑀤𑁂𑀲𑀦𑀸𑀬 𑀏𑀯 𑀜𑀸𑀡𑀲𑁆𑀲 𑀅𑀘𑁆𑀙𑀭𑀺𑀬𑀪𑀸𑀯𑁄 𑀯𑀺𑀜𑁆𑀜𑀸𑀬𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀇𑀤𑀸𑀦𑀺 𑀩𑁆𑀬𑀸𑀓𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀉𑀲𑁆𑀲𑀦𑁆𑀦𑀧𑀼𑀜𑁆𑀜𑀸𑀧𑀺 𑀪𑀯𑀦𑁆𑀢𑀺 𑀳𑁂𑀓𑁂, 𑀧𑀭𑀺𑀢𑁆𑀢𑀧𑀼𑀜𑁆𑀜𑀸𑀧𑀺 𑀪𑀯𑀦𑁆𑀢𑀺 𑀳𑁂𑀓𑁂’’𑀢𑀺 𑀆𑀳. 𑀢𑀲𑁆𑀲𑀢𑁆𑀣𑁄 𑁋 𑀉𑀲𑁆𑀲𑀦𑁆𑀦𑀓𑀼𑀲𑀮𑀥𑀫𑁆𑀫𑀸𑀧𑀺 𑀇𑀥𑁂𑀓𑀘𑁆𑀘𑁂 𑀧𑀼𑀕𑁆𑀕𑀮𑀸 𑀮𑀤𑁆𑀥𑀧𑀘𑁆𑀘𑀬𑀲𑁆𑀲 𑀅𑀧𑀼𑀜𑁆𑀜𑀲𑁆𑀲 𑀯𑀲𑁂𑀦 𑀚𑀸𑀢𑀺𑀆𑀤𑀺𑀦𑀸 𑀦𑀺𑀳𑀻𑀦𑀸 𑀪𑀯𑀦𑁆𑀢𑀺, 𑀧𑀭𑀺𑀢𑁆𑀢𑀧𑀼𑀜𑁆𑀜𑀸𑀧𑀺 𑀅𑀧𑁆𑀧𑀢𑀭𑀧𑀼𑀜𑁆𑀜𑀥𑀫𑁆𑀫𑀸𑀧𑀺 𑀏𑀓𑁂 𑀲𑀢𑁆𑀢𑀸 𑀔𑁂𑀢𑁆𑀢𑀲𑀫𑁆𑀧𑀢𑁆𑀢𑀺𑀆𑀤𑀺𑀦𑀸 𑀢𑀲𑁆𑀲 𑀧𑀼𑀜𑁆𑀜𑀲𑁆𑀲 𑀫𑀳𑀸𑀚𑀼𑀢𑀺𑀓𑀢𑀸𑀬 𑀉𑀴𑀸𑀭𑀸 𑀪𑀯𑀦𑁆𑀢𑀻𑀢𑀺.

𑁪𑁫𑁪. 𑀲𑀻𑀯𑀣𑀺𑀓𑀸𑀬𑀸𑀢𑀺 𑀲𑀼𑀲𑀸𑀦𑁂. 𑀅𑀗𑁆𑀕𑀼𑀝𑁆𑀞𑀲𑁆𑀦𑁂𑀳𑁂𑀦𑀸𑀢𑀺 𑀅𑀗𑁆𑀕𑀼𑀝𑁆𑀞𑀢𑁄 𑀧𑀯𑀢𑁆𑀢𑀲𑁆𑀦𑁂𑀳𑁂𑀦, 𑀤𑁂𑀯𑀢𑀸𑀬 𑀅𑀗𑁆𑀕𑀼𑀝𑁆𑀞𑀢𑁄 𑀧𑀕𑁆𑀖𑀭𑀺𑀢𑀔𑀻𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀦 𑀬𑀓𑁆𑀔𑀪𑀽𑀢𑀸 𑀦 𑀲𑀭𑀻𑀲𑀧𑀸 𑀯𑀸𑀢𑀺 𑀧𑀺𑀲𑀸𑀘𑀪𑀽𑀢𑀸 𑀯𑀸 𑀬𑀓𑁆𑀔𑀪𑀽𑀢𑀸 𑀯𑀸 𑀲𑀭𑀻𑀲𑀧𑀸 𑀯𑀸 𑀬𑁂 𑀓𑁂𑀘𑀺 𑀲𑀭𑀦𑁆𑀢𑀸 𑀕𑀘𑁆𑀙𑀦𑁆𑀢𑀸 𑀯𑀸 𑀦 𑀯𑀺𑀳𑁂𑀞𑀬𑁂𑀬𑁆𑀬𑀼𑀁 𑀦 𑀩𑀸𑀥𑁂𑀬𑁆𑀬𑀼𑀁.

𑁪𑁫𑁫. 𑀧𑀮𑀺𑀳𑀺𑀁𑀲𑀼 𑀧𑀸𑀤𑁂𑀢𑀺 𑀅𑀢𑁆𑀢𑀦𑁄 𑀚𑀺𑀯𑁆𑀳𑀸𑀬 𑀧𑀸𑀤𑁂 𑀮𑀺𑀳𑀺𑀲𑀼𑀁. 𑀥𑀗𑁆𑀓𑀸𑀢𑀺 𑀓𑀸𑀓𑀸. 𑀧𑀭𑀺𑀯𑀢𑁆𑀢𑀬𑀦𑁆𑀢𑀻𑀢𑀺 ‘‘𑀫𑀸 𑀦𑀁 𑀓𑀼𑀫𑀸𑀭𑀁 𑀓𑁂𑀘𑀺 𑀯𑀺𑀳𑁂𑀞𑁂𑀬𑁆𑀬𑀼’’𑀦𑁆𑀢𑀺 𑀭𑀓𑁆𑀔𑀦𑁆𑀢𑀸 𑀦𑀺𑀭𑁄𑀕𑀪𑀸𑀯𑀚𑀸𑀦𑀦𑀢𑁆𑀣𑀁 𑀅𑀧𑀭𑀸𑀧𑀭𑀁 𑀧𑀭𑀺𑀯𑀢𑁆𑀢𑀦𑁆𑀢𑀺. 𑀕𑀩𑁆𑀪𑀸𑀲𑀬𑀦𑁆𑀢𑀺 𑀕𑀩𑁆𑀪𑀫𑀮𑀁. 𑀧𑀓𑁆𑀔𑀺𑀕𑀡𑀸𑀢𑀺 𑀕𑀺𑀚𑁆𑀛𑀓𑀼𑀮𑀮𑀸𑀤𑀬𑁄 𑀲𑀓𑀼𑀡𑀕𑀡𑀸. 𑀳𑀭𑀦𑁆𑀢𑀻𑀢𑀺 𑀅𑀧𑀦𑁂𑀦𑁆𑀢𑀺. 𑀅𑀓𑁆𑀔𑀺𑀫𑀮𑀦𑁆𑀢𑀺 𑀅𑀓𑁆𑀔𑀺𑀕𑀽𑀣𑀁.

𑁪𑁫𑁬. 𑀓𑁂𑀘𑀻𑀢𑀺 𑀓𑁂𑀘𑀺 𑀫𑀦𑀼𑀲𑁆𑀲𑀸, 𑀅𑀫𑀦𑀼𑀲𑁆𑀲𑀸 𑀧𑀦 𑀭𑀓𑁆𑀔𑀁 𑀲𑀁𑀯𑀺𑀤𑀳𑀺𑀁𑀲𑀼. 𑀑𑀲𑀥𑀦𑁆𑀢𑀺 𑀢𑀤𑀸 𑀆𑀬𑀢𑀺𑀜𑁆𑀘 𑀆𑀭𑁄𑀕𑁆𑀬𑀸𑀯𑀳𑀁 𑀅𑀕𑀤𑀁. 𑀲𑀸𑀲𑀧𑀥𑀽𑀧𑀦𑀁 𑀯𑀸𑀢𑀺 𑀬𑀁 𑀚𑀸𑀢𑀲𑁆𑀲 𑀤𑀸𑀭𑀓𑀲𑁆𑀲 𑀭𑀓𑁆𑀔𑀡𑀢𑁆𑀣𑀁 𑀲𑀸𑀲𑀧𑁂𑀦 𑀥𑀽𑀧𑀦𑀁 𑀓𑀭𑁄𑀦𑁆𑀢𑀺, 𑀢𑀫𑁆𑀧𑀺 𑀢𑀲𑁆𑀲 𑀓𑀭𑁄𑀦𑁆𑀢𑀸 𑀦𑀸𑀳𑁂𑀲𑀼𑀦𑁆𑀢𑀺 𑀤𑀻𑀧𑁂𑀦𑁆𑀢𑀺. 𑀦𑀓𑁆𑀔𑀢𑁆𑀢𑀬𑁄𑀕𑀫𑁆𑀧𑀺 𑀦 𑀅𑀕𑁆𑀕𑀳𑁂𑀲𑀼𑀦𑁆𑀢𑀺 𑀦𑀓𑁆𑀔𑀢𑁆𑀢𑀬𑀼𑀢𑁆𑀢𑀫𑁆𑀧𑀺 𑀦 𑀕𑀡𑁆𑀳𑀺𑀁𑀲𑀼. ‘‘𑀅𑀲𑀼𑀓𑀫𑁆𑀳𑀺 𑀦𑀓𑁆𑀔𑀢𑁆𑀢𑁂 𑀢𑀺𑀣𑀺𑀫𑁆𑀳𑀺 𑀫𑀼𑀳𑀼𑀢𑁆𑀢𑁂 𑀅𑀬𑀁 𑀚𑀸𑀢𑁄’’𑀢𑀺 𑀏𑀯𑀁 𑀚𑀸𑀢𑀓𑀫𑁆𑀫𑀫𑁆𑀧𑀺𑀲𑁆𑀲 𑀦 𑀓𑁂𑀘𑀺 𑀅𑀓𑀁𑀲𑀽𑀢𑀺 𑀅𑀢𑁆𑀣𑁄. 𑀦 𑀲𑀩𑁆𑀩𑀥𑀜𑁆𑀜𑀸𑀦𑀺𑀧𑀺 𑀆𑀓𑀺𑀭𑀺𑀁𑀲𑀽𑀢𑀺 𑀫𑀗𑁆𑀕𑀮𑀁 𑀓𑀭𑁄𑀦𑁆𑀢𑀸 𑀅𑀕𑀤𑀯𑀲𑁂𑀦 𑀬𑀁 𑀲𑀸𑀲𑀧𑀢𑁂𑀮𑀫𑀺𑀲𑁆𑀲𑀺𑀢𑀁 𑀲𑀸𑀮𑀺𑀆𑀤𑀺𑀥𑀜𑁆𑀜𑀁 𑀆𑀓𑀺𑀭𑀦𑁆𑀢𑀺, 𑀢𑀫𑁆𑀧𑀺𑀲𑁆𑀲 𑀦𑀸𑀓𑀁𑀲𑀽𑀢𑀺 𑀅𑀢𑁆𑀣𑁄.

𑁪𑁫𑁭. 𑀏𑀢𑀸𑀤𑀺𑀲𑀦𑁆𑀢𑀺 𑀏𑀯𑀭𑀽𑀧𑀁. 𑀉𑀢𑁆𑀢𑀫𑀓𑀺𑀘𑁆𑀙𑀧𑀢𑁆𑀢𑀦𑁆𑀢𑀺 𑀧𑀭𑀫𑀓𑀺𑀘𑁆𑀙𑀁 𑀆𑀧𑀦𑁆𑀦𑀁 𑀅𑀢𑀺𑀯𑀺𑀬 𑀤𑀼𑀓𑁆𑀔𑀧𑁆𑀧𑀢𑁆𑀢𑀁. 𑀭𑀢𑁆𑀢𑀸𑀪𑀢𑀦𑁆𑀢𑀺 𑀭𑀢𑁆𑀢𑀺𑀬𑀁 𑀆𑀪𑀢𑀁. 𑀦𑁄𑀦𑀻𑀢𑀧𑀺𑀡𑁆𑀟𑀁 𑀯𑀺𑀬𑀸𑀢𑀺 𑀦𑀯𑀦𑀻𑀢𑀧𑀺𑀡𑁆𑀟𑀲𑀤𑀺𑀲𑀁, 𑀫𑀁𑀲𑀧𑁂𑀲𑀺𑀫𑀢𑁆𑀢𑀢𑀸 𑀏𑀯𑀁 𑀯𑀼𑀢𑁆𑀢𑀁. 𑀧𑀯𑁂𑀥𑀫𑀸𑀦𑀦𑁆𑀢𑀺 𑀤𑀼𑀩𑁆𑀩𑀮𑀪𑀸𑀯𑁂𑀦 𑀧𑀓𑀫𑁆𑀧𑀫𑀸𑀦𑀁. 𑀲𑀲𑀁𑀲𑀬𑀦𑁆𑀢𑀺 ‘‘𑀚𑀻𑀯𑀢𑀺 𑀦𑀼 𑀔𑁄 𑀦 𑀦𑀼 𑀔𑁄 𑀚𑀻𑀯𑀢𑀻’’𑀢𑀺 𑀲𑀁𑀲𑀬𑀺𑀢𑀢𑀸𑀬 𑀲𑀁𑀲𑀬𑀯𑀦𑁆𑀢𑀁. 𑀚𑀻𑀯𑀺𑀢𑀲𑀸𑀯𑀲𑁂𑀲𑀦𑁆𑀢𑀺 𑀚𑀻𑀯𑀺𑀢𑀝𑁆𑀞𑀺𑀢𑀺𑀬𑀸 𑀳𑁂𑀢𑀼𑀪𑀽𑀢𑀸𑀦𑀁 𑀲𑀸𑀥𑀦𑀸𑀦𑀁 𑀅𑀪𑀸𑀯𑁂𑀦 𑀓𑁂𑀯𑀮𑀁 𑀚𑀻𑀯𑀺𑀢𑀫𑀢𑁆𑀢𑀸𑀯𑀲𑁂𑀲𑀓𑀁.

𑁪𑁫𑁮. 𑀅𑀕𑁆𑀕𑀓𑀼𑀮𑀺𑀓𑁄 𑀪𑀯𑀺𑀲𑁆𑀲𑀢𑀺 𑀪𑁄𑀕𑀢𑁄 𑀘𑀸𑀢𑀺 𑀪𑁄𑀕𑀦𑀺𑀫𑀺𑀢𑁆𑀢𑀁 𑀪𑁄𑀕𑀲𑁆𑀲 𑀯𑀲𑁂𑀦 𑀅𑀕𑁆𑀕𑀓𑀼𑀮𑀺𑀓𑁄 𑀲𑁂𑀝𑁆𑀞𑀓𑀼𑀮𑀺𑀓𑁄 𑀪𑀯𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄.

𑁪𑁫𑁯. ‘‘𑀓𑀺𑀲𑁆𑀲 𑀯𑀢’’𑀦𑁆𑀢𑀺 𑀅𑀬𑀁 𑀕𑀸𑀣𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀞𑀺𑀢𑁂𑀳𑀺 𑀉𑀧𑀸𑀲𑀓𑁂𑀳𑀺 𑀢𑁂𑀦 𑀓𑀢𑀓𑀫𑁆𑀫𑀲𑁆𑀲 𑀧𑀼𑀘𑁆𑀙𑀸𑀯𑀲𑁂𑀦 𑀯𑀼𑀢𑁆𑀢𑀸. 𑀲𑀸 𑀘 𑀔𑁄 𑀲𑀺𑀯𑀣𑀺𑀓𑀸𑀬 𑀲𑀦𑁆𑀦𑀺𑀧𑀢𑀺𑀢𑁂𑀳𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀓𑀺𑀲𑁆𑀲𑀸𑀢𑀺 𑀓𑀺𑀁 𑀅𑀲𑁆𑀲. 𑀯𑀢𑀦𑁆𑀢𑀺 𑀯𑀢𑀲𑀫𑀸𑀤𑀸𑀦𑀁. 𑀧𑀼𑀦 𑀓𑀺𑀲𑁆𑀲𑀸𑀢𑀺 𑀓𑀻𑀤𑀺𑀲𑀲𑁆𑀲 𑀲𑀼𑀘𑀺𑀡𑁆𑀡𑀲𑁆𑀲 𑀯𑀢𑀲𑁆𑀲 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀘𑀸𑀢𑀺 𑀯𑀺𑀪𑀢𑁆𑀢𑀺𑀁 𑀯𑀺𑀧𑀭𑀺𑀡𑀸𑀫𑁂𑀢𑁆𑀯𑀸 𑀬𑁄𑀚𑀦𑀸. 𑀏𑀢𑀸𑀤𑀺𑀲𑀦𑁆𑀢𑀺 𑀕𑀡𑀺𑀓𑀸𑀬 𑀓𑀼𑀘𑁆𑀙𑀺𑀬𑀸 𑀦𑀺𑀩𑁆𑀩𑀢𑁆𑀢𑀦𑀁, 𑀲𑀼𑀲𑀸𑀦𑁂 𑀙𑀟𑁆𑀟𑀦𑀦𑁆𑀢𑀺 𑀏𑀯𑀭𑀽𑀧𑀁. 𑀩𑁆𑀬𑀲𑀦𑀦𑁆𑀢𑀺 𑀅𑀦𑀢𑁆𑀣𑀁. 𑀢𑀸𑀤𑀺𑀲𑀦𑁆𑀢𑀺 𑀢𑀣𑀸𑀭𑀽𑀧𑀁, ‘‘𑀅𑀗𑁆𑀕𑀼𑀝𑁆𑀞𑀲𑁆𑀦𑁂𑀳𑁂𑀦 𑀬𑀸𑀧𑁂𑀢𑀺 𑀭𑀢𑁆𑀢𑀺’’𑀦𑁆𑀢𑀺𑀆𑀤𑀺𑀦𑀸, ‘‘𑀅𑀬𑀁 𑀓𑀼𑀫𑀸𑀭𑁄 𑀦𑀕𑀭𑀲𑁆𑀲𑀺𑀫𑀲𑁆𑀲 𑀅𑀕𑁆𑀕𑀓𑀼𑀮𑀺𑀓𑁄 𑀪𑀯𑀺𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 𑀘 𑀯𑀼𑀢𑁆𑀢𑀧𑁆𑀧𑀓𑀸𑀭𑀦𑁆𑀢𑀺 𑀅𑀢𑁆𑀣𑁄. 𑀇𑀤𑁆𑀥𑀺𑀦𑁆𑀢𑀺 𑀤𑁂𑀯𑀺𑀤𑁆𑀥𑀺𑀁, 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀇𑀤𑀸𑀦𑀺 𑀢𑁂𑀳𑀺 𑀉𑀧𑀸𑀲𑀓𑁂𑀳𑀺 𑀧𑀼𑀝𑁆𑀞𑁄 𑀪𑀕𑀯𑀸 𑀬𑀣𑀸 𑀢𑀤𑀸 𑀩𑁆𑀬𑀸𑀓𑀸𑀲𑀺, 𑀢𑀁 𑀤𑀲𑁆𑀲𑁂𑀦𑁆𑀢𑀸 𑀲𑀗𑁆𑀕𑀻𑀢𑀺𑀓𑀸𑀭𑀸 𑁋

𑁪𑁬𑁦. ‘‘𑀩𑀼𑀤𑁆𑀥𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲, 𑀧𑀽𑀚𑀁 𑀅𑀓𑀸𑀲𑀺 𑀚𑀦𑀢𑀸 𑀉𑀴𑀸𑀭𑀁;

𑀢𑀢𑁆𑀭𑀲𑁆𑀲 𑀘𑀺𑀢𑁆𑀢𑀲𑁆𑀲𑀳𑀼 𑀅𑀜𑁆𑀜𑀣𑀢𑁆𑀢𑀁, 𑀯𑀸𑀘𑀁 𑀅𑀪𑀸𑀲𑀺 𑀨𑀭𑀼𑀲𑀁 𑀅𑀲𑀩𑁆𑀪𑀁.

𑁪𑁬𑁧. ‘‘𑀲𑁄 𑀢𑀁 𑀯𑀺𑀢𑀓𑁆𑀓𑀁 𑀧𑀯𑀺𑀦𑁄𑀤𑀬𑀺𑀢𑁆𑀯𑀸, 𑀧𑀻𑀢𑀺𑀁 𑀧𑀲𑀸𑀤𑀁 𑀧𑀝𑀺𑀮𑀤𑁆𑀥𑀸 𑀧𑀘𑁆𑀙𑀸;

𑀢𑀣𑀸𑀕𑀢𑀁 𑀚𑁂𑀢𑀯𑀦𑁂 𑀯𑀲𑀦𑁆𑀢𑀁, 𑀬𑀸𑀕𑀼𑀬𑀸 𑀉𑀧𑀝𑁆𑀞𑀸𑀲𑀺 𑀲𑀢𑁆𑀢𑀭𑀢𑁆𑀢𑀁.

𑁪𑁬𑁨. ‘‘𑀢𑀲𑁆𑀲 𑀯𑀢𑀁 𑀢𑀁 𑀧𑀦 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀢𑀲𑁆𑀲 𑀲𑀼𑀘𑀺𑀡𑁆𑀡𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄;

𑀏𑀢𑀸𑀤𑀺𑀲𑀁 𑀩𑁆𑀬𑀲𑀦𑀁 𑀧𑀸𑀧𑀼𑀡𑀺𑀢𑁆𑀯𑀸, 𑀢𑀁 𑀢𑀸𑀤𑀺𑀲𑀁 𑀧𑀘𑁆𑀘𑀦𑀼𑀪𑁄𑀲𑁆𑀲𑀢𑀺𑀤𑁆𑀥𑀺𑀁.

𑁪𑁬𑁩. ‘‘𑀞𑀢𑁆𑀯𑀸𑀦 𑀲𑁄 𑀯𑀲𑁆𑀲𑀲𑀢𑀁 𑀇𑀥𑁂𑀯, 𑀲𑀩𑁆𑀩𑁂𑀳𑀺 𑀓𑀸𑀫𑁂𑀳𑀺 𑀲𑀫𑀗𑁆𑀕𑀺𑀪𑀽𑀢𑁄;

𑀓𑀸𑀬𑀲𑁆𑀲 𑀪𑁂𑀤𑀸 𑀅𑀪𑀺𑀲𑀫𑁆𑀧𑀭𑀸𑀬𑀁, 𑀲𑀳𑀩𑁆𑀬𑀢𑀁 𑀕𑀘𑁆𑀙𑀢𑀺 𑀯𑀸𑀲𑀯𑀲𑁆𑀲𑀸’’𑀢𑀺. 𑁋

𑀘𑀢𑀲𑁆𑀲𑁄 𑀕𑀸𑀣𑀸 𑀅𑀯𑁄𑀘𑀼𑀁.

𑁪𑁬𑁦. 𑀢𑀢𑁆𑀣 𑀚𑀦𑀢𑀸𑀢𑀺 𑀚𑀦𑀲𑀫𑀽𑀳𑁄, 𑀉𑀧𑀸𑀲𑀓𑀕𑀡𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁆𑀭𑀸𑀢𑀺 𑀢𑀲𑁆𑀲𑀁 𑀧𑀽𑀚𑀸𑀬𑀁. 𑀅𑀲𑁆𑀲𑀸𑀢𑀺 𑀢𑀲𑁆𑀲 𑀤𑀸𑀭𑀓𑀲𑁆𑀲. 𑀘𑀺𑀢𑁆𑀢𑀲𑁆𑀲𑀳𑀼 𑀅𑀜𑁆𑀜𑀣𑀢𑁆𑀢𑀦𑁆𑀢𑀺 𑀧𑀼𑀭𑀺𑀫𑀪𑀯𑀲𑁆𑀫𑀺𑀁 𑀘𑀺𑀢𑁆𑀢𑀲𑁆𑀲 𑀅𑀜𑁆𑀜𑀣𑀸𑀪𑀸𑀯𑁄 𑀅𑀦𑀸𑀤𑀭𑁄 𑀅𑀕𑀸𑀭𑀯𑁄 𑀅𑀧𑀘𑁆𑀘𑀬𑁄 𑀅𑀳𑁄𑀲𑀺. 𑀅𑀲𑀩𑁆𑀪𑀦𑁆𑀢𑀺 𑀲𑀸𑀥𑀼𑀲𑀪𑀸𑀬 𑀲𑀸𑀯𑁂𑀢𑀼𑀁 𑀅𑀬𑀼𑀢𑁆𑀢𑀁 𑀨𑀭𑀼𑀲𑀁 𑀯𑀸𑀘𑀁 𑀅𑀪𑀸𑀲𑀺.

𑁪𑁬𑁧. 𑀲𑁄𑀢𑀺 𑀲𑁄 𑀅𑀬𑀁. 𑀢𑀁 𑀯𑀺𑀢𑀓𑁆𑀓𑀦𑁆𑀢𑀺 𑀢𑀁 𑀧𑀸𑀧𑀓𑀁 𑀯𑀺𑀢𑀓𑁆𑀓𑀁. 𑀧𑀯𑀺𑀦𑁄𑀤𑀬𑀺𑀢𑁆𑀯𑀸𑀢𑀺 𑀫𑀸𑀢𑀭𑀸 𑀓𑀢𑀸𑀬 𑀲𑀜𑁆𑀜𑀢𑁆𑀢𑀺𑀬𑀸 𑀯𑀽𑀧𑀲𑀫𑁂𑀢𑁆𑀯𑀸. 𑀧𑀻𑀢𑀺𑀁 𑀧𑀲𑀸𑀤𑀁 𑀧𑀝𑀺𑀮𑀤𑁆𑀥𑀸𑀢𑀺 𑀧𑀻𑀢𑀺𑀁 𑀧𑀲𑀸𑀤𑀜𑁆𑀘 𑀧𑀝𑀺𑀮𑀪𑀺𑀢𑁆𑀯𑀸 𑀉𑀧𑁆𑀧𑀸𑀤𑁂𑀢𑁆𑀯𑀸. 𑀬𑀸𑀕𑀼𑀬𑀸 𑀉𑀧𑀝𑁆𑀞𑀸𑀲𑀻𑀢𑀺 𑀬𑀸𑀕𑀼𑀤𑀸𑀦𑁂𑀦 𑀉𑀧𑀝𑁆𑀞𑀳𑀺. 𑀲𑀢𑁆𑀢𑀭𑀢𑁆𑀢𑀦𑁆𑀢𑀺 𑀲𑀢𑁆𑀢𑀤𑀺𑀯𑀲𑀁.

𑁪𑁬𑁨. 𑀢𑀲𑁆𑀲 𑀯𑀢𑀁 𑀢𑀁 𑀧𑀦 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀢𑀁 𑀫𑀬𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀅𑀢𑁆𑀢𑀦𑁄 𑀘𑀺𑀢𑁆𑀢𑀲𑁆𑀲 𑀧𑀲𑀸𑀤𑀦𑀁 𑀤𑀸𑀦𑀜𑁆𑀘 𑀇𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀯𑀢𑀁 𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀜𑁆𑀘, 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄.

𑁪𑁬𑁩. 𑀞𑀢𑁆𑀯𑀸𑀦𑀸𑀢𑀺 𑀬𑀸𑀯 𑀆𑀬𑀼𑀧𑀭𑀺𑀬𑁄𑀲𑀸𑀦𑀸 𑀇𑀥𑁂𑀯 𑀫𑀦𑀼𑀲𑁆𑀲𑀮𑁄𑀓𑁂 𑀞𑀢𑁆𑀯𑀸. 𑀅𑀪𑀺𑀲𑀫𑁆𑀧𑀭𑀸𑀬𑀦𑁆𑀢𑀺 𑀧𑀼𑀦𑀩𑁆𑀪𑀯𑁂. 𑀲𑀳𑀩𑁆𑀬𑀢𑀁 𑀕𑀘𑁆𑀙𑀢𑀺 𑀯𑀸𑀲𑀯𑀲𑁆𑀲𑀸𑀢𑀺 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀧𑀼𑀢𑁆𑀢𑀪𑀸𑀯𑁂𑀦 𑀲𑀳𑀪𑀸𑀯𑀁 𑀕𑀫𑀺𑀲𑁆𑀲𑀢𑀺. 𑀅𑀦𑀸𑀕𑀢𑀢𑁆𑀣𑁂 𑀳𑀺 𑀇𑀤𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑀯𑀘𑀦𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀓𑀼𑀫𑀸𑀭𑀧𑁂𑀢𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.