𑁧𑁦. 𑀉𑀢𑁆𑀢𑀭𑀫𑀸𑀢𑀼𑀧𑁂𑀢𑀺𑀯𑀢𑁆𑀣𑀼𑀯𑀡𑁆𑀡𑀦𑀸

𑀤𑀺𑀯𑀸𑀯𑀺𑀳𑀸𑀭𑀕𑀢𑀁 𑀪𑀺𑀓𑁆𑀔𑀼𑀦𑁆𑀢𑀺 𑀇𑀤𑀁 𑀉𑀢𑁆𑀢𑀭𑀫𑀸𑀢𑀼𑀧𑁂𑀢𑀺𑀯𑀢𑁆𑀣𑀼. 𑀢𑀢𑁆𑀭𑀸𑀬𑀁 𑀅𑀢𑁆𑀣𑀯𑀺𑀪𑀸𑀯𑀦𑀸 𑁋 𑀲𑀢𑁆𑀣𑀭𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀬𑀸 𑀧𑀯𑀢𑁆𑀢𑀺𑀢𑀸𑀬 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀬𑀦𑁄 𑀤𑁆𑀯𑀸𑀤𑀲𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀓𑁄𑀲𑀫𑁆𑀩𑀺𑀬𑀸 𑀅𑀯𑀺𑀤𑀽𑀭𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀅𑀭𑀜𑁆𑀜𑀸𑀬𑀢𑀦𑁂 𑀯𑀺𑀳𑀸𑀲𑀺. 𑀢𑁂𑀦 𑀘 𑀲𑀫𑀬𑁂𑀦 𑀭𑀜𑁆𑀜𑁄 𑀉𑀤𑁂𑀦𑀲𑁆𑀲 𑀅𑀜𑁆𑀜𑀢𑀭𑁄 𑀅𑀫𑀘𑁆𑀘𑁄 𑀓𑀸𑀮𑀫𑀓𑀸𑀲𑀺, 𑀢𑁂𑀦 𑀘 𑀧𑀼𑀩𑁆𑀩𑁂 𑀦𑀕𑀭𑁂 𑀓𑀫𑁆𑀫𑀦𑁆𑀢𑀸 𑀅𑀥𑀺𑀝𑁆𑀞𑀺𑀢𑀸 𑀅𑀳𑁂𑀲𑀼𑀁. 𑀅𑀣 𑀭𑀸𑀚𑀸 𑀢𑀲𑁆𑀲 𑀧𑀼𑀢𑁆𑀢𑀁 𑀉𑀢𑁆𑀢𑀭𑀁 𑀦𑀸𑀫 𑀫𑀸𑀡𑀯𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀢𑁆𑀯𑀜𑁆𑀘 𑀧𑀺𑀢𑀭𑀸 𑀅𑀥𑀺𑀝𑁆𑀞𑀺𑀢𑁂 𑀓𑀫𑁆𑀫𑀦𑁆𑀢𑁂 𑀲𑀫𑀦𑀼𑀲𑀸𑀲𑀸’’𑀢𑀺 𑀢𑁂𑀦 𑀞𑀺𑀢𑀝𑁆𑀞𑀸𑀦𑁂 𑀞𑀧𑁂𑀲𑀺.

𑀲𑁄 𑀘 𑀲𑀸𑀥𑀽𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀏𑀓𑀤𑀺𑀯𑀲𑀁 𑀦𑀕𑀭𑀧𑀝𑀺𑀲𑀗𑁆𑀔𑀭𑀡𑀺𑀬𑀸𑀦𑀁 𑀤𑀸𑀭𑀽𑀦𑀁 𑀅𑀢𑁆𑀣𑀸𑀬 𑀯𑀟𑁆𑀠𑀓𑀺𑀬𑁄 𑀕𑀳𑁂𑀢𑁆𑀯𑀸 𑀅𑀭𑀜𑁆𑀜𑀁 𑀕𑀢𑁄. 𑀢𑀢𑁆𑀣 𑀆𑀬𑀲𑁆𑀫𑀢𑁄 𑀫𑀳𑀸𑀓𑀘𑁆𑀘𑀸𑀬𑀦𑀢𑁆𑀣𑁂𑀭𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀉𑀧𑀕𑀦𑁆𑀢𑁆𑀯𑀸 𑀣𑁂𑀭𑀁 𑀢𑀢𑁆𑀣 𑀧𑀁𑀲𑀼𑀓𑀽𑀮𑀘𑀻𑀯𑀭𑀥𑀭𑀁 𑀯𑀺𑀯𑀺𑀢𑁆𑀢𑀁 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 𑀇𑀭𑀺𑀬𑀸𑀧𑀣𑁂𑀬𑁂𑀯 𑀧𑀲𑀻𑀤𑀺𑀢𑁆𑀯𑀸 𑀓𑀢𑀧𑀝𑀺𑀲𑀦𑁆𑀣𑀸𑀭𑁄 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀣𑁂𑀭𑁄 𑀢𑀲𑁆𑀲 𑀥𑀫𑁆𑀫𑀁 𑀓𑀣𑁂𑀲𑀺. 𑀲𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀭𑀢𑀦𑀢𑁆𑀢𑀬𑁂 𑀲𑀜𑁆𑀚𑀸𑀢𑀧𑁆𑀧𑀲𑀸𑀤𑁄 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀸𑀬 𑀣𑁂𑀭𑀁 𑀦𑀺𑀫𑀦𑁆𑀢𑁂𑀲𑀺 𑁋 ‘‘𑀅𑀥𑀺𑀯𑀸𑀲𑁂𑀣 𑀫𑁂, 𑀪𑀦𑁆𑀢𑁂, 𑀲𑁆𑀯𑀸𑀢𑀦𑀸𑀬 𑀪𑀢𑁆𑀢𑀁 𑀲𑀤𑁆𑀥𑀺𑀁 𑀪𑀺𑀓𑁆𑀔𑀽𑀳𑀺 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸’’𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀣𑁂𑀭𑁄 𑀢𑀼𑀡𑁆𑀳𑀻𑀪𑀸𑀯𑁂𑀦. 𑀲𑁄 𑀢𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀦𑀕𑀭𑀁 𑀕𑀦𑁆𑀢𑁆𑀯𑀸 𑀅𑀜𑁆𑀜𑁂𑀲𑀁 𑀉𑀧𑀸𑀲𑀓𑀸𑀦𑀁 𑀆𑀘𑀺𑀓𑁆𑀔𑀺 𑁋 ‘‘𑀣𑁂𑀭𑁄 𑀫𑀬𑀸 𑀲𑁆𑀯𑀸𑀢𑀦𑀸𑀬 𑀦𑀺𑀫𑀦𑁆𑀢𑀺𑀢𑁄, 𑀢𑀼𑀫𑁆𑀳𑁂𑀳𑀺𑀧𑀺 𑀫𑀫 𑀤𑀸𑀦𑀕𑁆𑀕𑀁 𑀆𑀕𑀦𑁆𑀢𑀩𑁆𑀩’’𑀦𑁆𑀢𑀺.

𑀲𑁄 𑀤𑀼𑀢𑀺𑀬𑀤𑀺𑀯𑀲𑁂 𑀓𑀸𑀮𑀲𑁆𑀲𑁂𑀯 𑀧𑀡𑀻𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀧𑀝𑀺𑀬𑀸𑀤𑀸𑀧𑁂𑀢𑁆𑀯𑀸 𑀓𑀸𑀮𑀁 𑀆𑀭𑁄𑀘𑀸𑀧𑁂𑀢𑁆𑀯𑀸 𑀲𑀤𑁆𑀥𑀺𑀁 𑀪𑀺𑀓𑁆𑀔𑀽𑀳𑀺 𑀆𑀕𑀘𑁆𑀙𑀦𑁆𑀢𑀲𑁆𑀲 𑀣𑁂𑀭𑀲𑁆𑀲 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀼𑀭𑀓𑁆𑀔𑀢𑁆𑀯𑀸 𑀕𑁂𑀳𑀁 𑀧𑀯𑁂𑀲𑁂𑀲𑀺. 𑀅𑀣 𑀫𑀳𑀸𑀭𑀳𑀓𑀧𑁆𑀧𑀺𑀬𑀧𑀘𑁆𑀘𑀢𑁆𑀣𑀭𑀡𑀅𑀢𑁆𑀣𑀢𑁂𑀲𑀼 𑀆𑀲𑀦𑁂𑀲𑀼 𑀣𑁂𑀭𑁂 𑀘 𑀪𑀺𑀓𑁆𑀔𑀽𑀲𑀼 𑀘 𑀦𑀺𑀲𑀺𑀦𑁆𑀦𑁂𑀲𑀼 𑀕𑀦𑁆𑀥𑀧𑀼𑀧𑁆𑀨𑀥𑀽𑀧𑁂𑀳𑀺 𑀧𑀽𑀚𑀁 𑀓𑀢𑁆𑀯𑀸 𑀧𑀡𑀻𑀢𑁂𑀦 𑀅𑀦𑁆𑀦𑀧𑀸𑀦𑁂𑀦 𑀢𑁂 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀲𑀜𑁆𑀚𑀸𑀢𑀧𑁆𑀧𑀲𑀸𑀤𑁄 𑀓𑀢𑀜𑁆𑀚𑀮𑀻 𑀅𑀦𑀼𑀫𑁄𑀤𑀦𑀁 𑀲𑀼𑀡𑀺𑀢𑁆𑀯𑀸 𑀓𑀢𑀪𑀢𑁆𑀢𑀸𑀦𑀼𑀫𑁄𑀤𑀦𑁂 𑀣𑁂𑀭𑁂 𑀕𑀘𑁆𑀙𑀦𑁆𑀢𑁂 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀅𑀦𑀼𑀕𑀘𑁆𑀙𑀦𑁆𑀢𑁄 𑀦𑀕𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀝𑀺𑀦𑀺𑀯𑀢𑁆𑀢𑀦𑁆𑀢𑁄 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂𑀳𑀺 𑀦𑀺𑀘𑁆𑀘𑀁 𑀫𑀫 𑀕𑁂𑀳𑀁 𑀧𑀯𑀺𑀲𑀺𑀢𑀩𑁆𑀩’’𑀦𑁆𑀢𑀺 𑀬𑀸𑀘𑀺𑀢𑁆𑀯𑀸 𑀣𑁂𑀭𑀲𑁆𑀲 𑀅𑀥𑀺𑀯𑀸𑀲𑀦𑀁 𑀜𑀢𑁆𑀯𑀸 𑀦𑀺𑀯𑀢𑁆𑀢𑀺. 𑀏𑀯𑀁 𑀲𑁄 𑀣𑁂𑀭𑀁 𑀉𑀧𑀝𑁆𑀞𑀳𑀦𑁆𑀢𑁄 𑀢𑀲𑁆𑀲 𑀑𑀯𑀸𑀤𑁂 𑀧𑀢𑀺𑀝𑁆𑀞𑀸𑀬 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀸𑀧𑀼𑀡𑀺, 𑀯𑀺𑀳𑀸𑀭𑀜𑁆𑀘 𑀓𑀸𑀭𑁂𑀲𑀺, 𑀲𑀩𑁆𑀩𑁂 𑀘 𑀅𑀢𑁆𑀢𑀦𑁄 𑀜𑀸𑀢𑀓𑁂 𑀲𑀸𑀲𑀦𑁂 𑀅𑀪𑀺𑀧𑁆𑀧𑀲𑀦𑁆𑀦𑁂 𑀅𑀓𑀸𑀲𑀺.

𑀫𑀸𑀢𑀸 𑀧𑀦𑀲𑁆𑀲 𑀫𑀘𑁆𑀙𑁂𑀭𑀫𑀮𑀧𑀭𑀺𑀬𑀼𑀝𑁆𑀞𑀺𑀢𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀏𑀯𑀁 𑀧𑀭𑀺𑀪𑀸𑀲𑀺 𑁋 ‘‘𑀬𑀁 𑀢𑁆𑀯𑀁 𑀫𑀫 𑀅𑀦𑀺𑀘𑁆𑀙𑀦𑁆𑀢𑀺𑀬𑀸 𑀏𑀯 𑀲𑀫𑀡𑀸𑀦𑀁 𑀅𑀦𑁆𑀦𑀧𑀸𑀦𑀁 𑀤𑁂𑀲𑀺, 𑀢𑀁 𑀢𑁂 𑀧𑀭𑀮𑁄𑀓𑁂 𑀮𑁄𑀳𑀺𑀢𑀁 𑀲𑀫𑁆𑀧𑀚𑁆𑀚𑀢𑀽’’𑀢𑀺. 𑀏𑀓𑀁 𑀧𑀦 𑀫𑁄𑀭𑀧𑀺𑀜𑁆𑀙𑀓𑀮𑀸𑀧𑀁 𑀯𑀺𑀳𑀸𑀭𑀫𑀳𑀤𑀺𑀯𑀲𑁂 𑀤𑀺𑀬𑁆𑀬𑀫𑀸𑀦𑀁 𑀅𑀦𑀼𑀚𑀸𑀦𑀺. 𑀲𑀸 𑀓𑀸𑀮𑀁 𑀓𑀢𑁆𑀯𑀸 𑀧𑁂𑀢𑀬𑁄𑀦𑀺𑀬𑀁 𑀉𑀧𑁆𑀧𑀚𑁆𑀚𑀺, 𑀫𑁄𑀭𑀧𑀺𑀜𑁆𑀙𑀓𑀮𑀸𑀧𑀤𑀸𑀦𑀸𑀦𑀼𑀫𑁄𑀤𑀦𑁂𑀦 𑀧𑀦𑀲𑁆𑀲𑀸 𑀓𑁂𑀲𑀸 𑀦𑀻𑀮𑀸 𑀲𑀺𑀦𑀺𑀤𑁆𑀥𑀸 𑀯𑁂𑀮𑁆𑀮𑀺𑀢𑀕𑁆𑀕𑀸 𑀲𑀼𑀔𑀼𑀫𑀸 𑀤𑀻𑀖𑀸 𑀘 𑀅𑀳𑁂𑀲𑀼𑀁. 𑀲𑀸 𑀬𑀤𑀸 𑀕𑀗𑁆𑀕𑀸𑀦𑀤𑀺𑀁 ‘‘𑀧𑀸𑀦𑀻𑀬𑀁 𑀧𑀺𑀯𑀺𑀲𑁆𑀲𑀸𑀫𑀻’’𑀢𑀺 𑀑𑀢𑀭𑀢𑀺, 𑀢𑀤𑀸 𑀦𑀤𑀻 𑀮𑁄𑀳𑀺𑀢𑀧𑀽𑀭𑀸 𑀳𑁄𑀢𑀺. 𑀲𑀸 𑀧𑀜𑁆𑀘𑀧𑀡𑁆𑀡𑀸𑀲 𑀯𑀲𑁆𑀲𑀸𑀦𑀺 𑀔𑀼𑀧𑁆𑀧𑀺𑀧𑀸𑀲𑀸𑀪𑀺𑀪𑀽𑀢𑀸 𑀯𑀺𑀘𑀭𑀺𑀢𑁆𑀯𑀸 𑀏𑀓𑀤𑀺𑀯𑀲𑀁 𑀓𑀗𑁆𑀔𑀸𑀭𑁂𑀯𑀢𑀢𑁆𑀣𑁂𑀭𑀁 𑀕𑀗𑁆𑀕𑀸𑀬 𑀢𑀻𑀭𑁂 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 𑀅𑀢𑁆𑀢𑀸𑀦𑀁 𑀅𑀢𑁆𑀢𑀦𑁄 𑀓𑁂𑀲𑁂𑀳𑀺 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀸𑀦𑀻𑀬𑀁 𑀬𑀸𑀘𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋

𑁩𑁩𑁧. ‘‘𑀤𑀺𑀯𑀸𑀯𑀺𑀳𑀸𑀭𑀕𑀢𑀁 𑀪𑀺𑀓𑁆𑀔𑀼𑀁, 𑀕𑀗𑁆𑀕𑀸𑀢𑀻𑀭𑁂 𑀦𑀺𑀲𑀺𑀦𑁆𑀦𑀓𑀁;

𑀢𑀁 𑀧𑁂𑀢𑀻 𑀉𑀧𑀲𑀗𑁆𑀓𑀫𑁆𑀫, 𑀤𑀼𑀩𑁆𑀩𑀡𑁆𑀡𑀸 𑀪𑀻𑀭𑀼𑀤𑀲𑁆𑀲𑀦𑀸.

𑁩𑁩𑁨. ‘‘𑀓𑁂𑀲𑀸 𑀘𑀲𑁆𑀲𑀸 𑀅𑀢𑀺𑀤𑀻𑀖𑀸, 𑀬𑀸𑀯𑀪𑀽𑀫𑀸𑀯𑀮𑀫𑁆𑀩𑀭𑁂;

𑀓𑁂𑀲𑁂𑀳𑀺 𑀲𑀸 𑀧𑀝𑀺𑀘𑁆𑀙𑀦𑁆𑀦𑀸, 𑀲𑀫𑀡𑀁 𑀏𑀢𑀤𑀩𑁆𑀭𑀯𑀻’’𑀢𑀺. 𑁋

𑀇𑀫𑀸 𑀤𑁆𑀯𑁂 𑀕𑀸𑀣𑀸 𑀲𑀗𑁆𑀕𑀻𑀢𑀺𑀓𑀸𑀭𑀓𑁂𑀳𑀺 𑀇𑀥 𑀆𑀤𑀺𑀢𑁄 𑀞𑀧𑀺𑀢𑀸.

𑀢𑀢𑁆𑀣 𑀪𑀻𑀭𑀼𑀤𑀲𑁆𑀲𑀦𑀸𑀢𑀺 𑀪𑀬𑀸𑀦𑀓𑀤𑀲𑁆𑀲𑀦𑀸. ‘‘𑀭𑀼𑀤𑁆𑀤𑀤𑀲𑁆𑀲𑀦𑀸’’𑀢𑀺 𑀯𑀸 𑀧𑀸𑀞𑁄, 𑀩𑀻𑀪𑀘𑁆𑀙𑀪𑀸𑀭𑀺𑀬𑀤𑀲𑁆𑀲𑀦𑀸𑀢𑀺 𑀅𑀢𑁆𑀣𑁄. 𑀬𑀸𑀯𑀪𑀽𑀫𑀸𑀯𑀮𑀫𑁆𑀩𑀭𑁂𑀢𑀺 𑀬𑀸𑀯 𑀪𑀽𑀫𑀺, 𑀢𑀸𑀯 𑀑𑀮𑀫𑁆𑀩𑀦𑁆𑀢𑀺. 𑀧𑀼𑀩𑁆𑀩𑁂 ‘‘𑀪𑀺𑀓𑁆𑀔𑀼’’𑀦𑁆𑀢𑀺 𑀘 𑀧𑀘𑁆𑀙𑀸 ‘‘𑀲𑀫𑀡’’𑀦𑁆𑀢𑀺 𑀘 𑀓𑀗𑁆𑀔𑀸𑀭𑁂𑀯𑀢𑀢𑁆𑀣𑁂𑀭𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀲𑀸 𑀧𑀦 𑀧𑁂𑀢𑀻 𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀸𑀦𑀻𑀬𑀁 𑀬𑀸𑀘𑀦𑁆𑀢𑀻 𑁋

𑁩𑁩𑁩. ‘‘𑀧𑀜𑁆𑀘𑀧𑀡𑁆𑀡𑀸𑀲 𑀯𑀲𑁆𑀲𑀸𑀦𑀺, 𑀬𑀢𑁄 𑀓𑀸𑀮𑀓𑀢𑀸 𑀅𑀳𑀁;

𑀦𑀸𑀪𑀺𑀚𑀸𑀦𑀸𑀫𑀺 𑀪𑀼𑀢𑁆𑀢𑀁 𑀯𑀸, 𑀧𑀻𑀢𑀁 𑀯𑀸 𑀧𑀦 𑀧𑀸𑀦𑀺𑀬𑀁;

𑀤𑁂𑀳𑀺 𑀢𑁆𑀯𑀁 𑀧𑀸𑀦𑀺𑀬𑀁 𑀪𑀦𑁆𑀢𑁂, 𑀢𑀲𑀺𑀢𑀸 𑀧𑀸𑀦𑀺𑀬𑀸𑀬 𑀫𑁂’’𑀢𑀺. 𑁋 𑀇𑀫𑀁 𑀕𑀸𑀣𑀫𑀸𑀳;

𑁩𑁩𑁩. 𑀢𑀢𑁆𑀣 𑀦𑀸𑀪𑀺𑀚𑀸𑀦𑀸𑀫𑀺 𑀪𑀼𑀢𑁆𑀢𑀁 𑀯𑀸𑀢𑀺 𑀏𑀯𑀁 𑀤𑀻𑀖𑀫𑀦𑁆𑀢𑀭𑁂 𑀓𑀸𑀮𑁂 𑀪𑁄𑀚𑀦𑀁 𑀪𑀼𑀢𑁆𑀢𑀁 𑀯𑀸 𑀧𑀸𑀦𑀻𑀬𑀁 𑀧𑀻𑀢𑀁 𑀯𑀸 𑀦𑀸𑀪𑀺𑀚𑀸𑀦𑀸𑀫𑀺, 𑀦 𑀪𑀼𑀢𑁆𑀢𑀁 𑀦 𑀧𑀻𑀢𑀦𑁆𑀢𑀺 𑀅𑀢𑁆𑀣𑁄. 𑀢𑀲𑀺𑀢𑀸𑀢𑀺 𑀧𑀺𑀧𑀸𑀲𑀺𑀢𑀸. 𑀧𑀸𑀦𑀺𑀬𑀸𑀬𑀸𑀢𑀺 𑀧𑀸𑀦𑀻𑀬𑀢𑁆𑀣𑀸𑀬 𑀆𑀳𑀺𑀡𑁆𑀟𑀦𑁆𑀢𑀺𑀬𑀸 𑀫𑁂 𑀧𑀸𑀦𑀻𑀬𑀁 𑀤𑁂𑀳𑀺, 𑀪𑀦𑁆𑀢𑁂𑀢𑀺 𑀬𑁄𑀚𑀦𑀸.

𑀇𑀢𑁄 𑀧𑀭𑀁 𑁋

𑁩𑁩𑁪. ‘‘𑀅𑀬𑀁 𑀲𑀻𑀢𑁄𑀤𑀺𑀓𑀸 𑀕𑀗𑁆𑀕𑀸, 𑀳𑀺𑀫𑀯𑀦𑁆𑀢𑀢𑁄 𑀲𑀦𑁆𑀤𑀢𑀺;

𑀧𑀺𑀯 𑀏𑀢𑁆𑀢𑁄 𑀕𑀳𑁂𑀢𑁆𑀯𑀸𑀦, 𑀓𑀺𑀁 𑀫𑀁 𑀬𑀸𑀘𑀲𑀺 𑀧𑀸𑀦𑀺𑀬𑀁.

𑁩𑁩𑁫. ‘‘𑀲𑀘𑀸𑀳𑀁 𑀪𑀦𑁆𑀢𑁂 𑀕𑀗𑁆𑀕𑀸𑀬, 𑀲𑀬𑀁 𑀕𑀡𑁆𑀳𑀸𑀫𑀺 𑀧𑀸𑀦𑀺𑀬𑀁;

𑀮𑁄𑀳𑀺𑀢𑀁 𑀫𑁂 𑀧𑀭𑀺𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀬𑀸𑀘𑀸𑀫𑀺 𑀧𑀸𑀦𑀺𑀬𑀁.

𑁩𑁩𑁬. ‘‘𑀓𑀺𑀁 𑀦𑀼 𑀓𑀸𑀬𑁂𑀦 𑀯𑀸𑀘𑀸𑀬, 𑀫𑀦𑀲𑀸 𑀤𑀼𑀓𑁆𑀓𑀝𑀁 𑀓𑀢𑀁;

𑀓𑀺𑀲𑁆𑀲𑀓𑀫𑁆𑀫𑀯𑀺𑀧𑀸𑀓𑁂𑀦, 𑀕𑀗𑁆𑀕𑀸 𑀢𑁂 𑀳𑁄𑀢𑀺 𑀮𑁄𑀳𑀺𑀢𑀁.

𑁩𑁩𑁭. ‘‘𑀧𑀼𑀢𑁆𑀢𑁄 𑀫𑁂 𑀉𑀢𑁆𑀢𑀭𑁄 𑀦𑀸𑀫, 𑀲𑀤𑁆𑀥𑁄 𑀆𑀲𑀺 𑀉𑀧𑀸𑀲𑀓𑁄;

𑀲𑁄 𑀘 𑀫𑀬𑁆𑀳𑀁 𑀅𑀓𑀸𑀫𑀸𑀬, 𑀲𑀫𑀡𑀸𑀦𑀁 𑀧𑀯𑁂𑀘𑁆𑀙𑀢𑀺.

𑁩𑁩𑁮. ‘‘𑀘𑀻𑀯𑀭𑀁 𑀧𑀺𑀡𑁆𑀟𑀧𑀸𑀢𑀜𑁆𑀘, 𑀧𑀘𑁆𑀘𑀬𑀁 𑀲𑀬𑀦𑀸𑀲𑀦𑀁;

𑀢𑀫𑀳𑀁 𑀧𑀭𑀺𑀪𑀸𑀲𑀸𑀫𑀺, 𑀫𑀘𑁆𑀙𑁂𑀭𑁂𑀦 𑀉𑀧𑀤𑁆𑀤𑀼𑀢𑀸.

𑁩𑁩𑁯. ‘‘𑀬𑀁 𑀢𑁆𑀯𑀁 𑀫𑀬𑁆𑀳𑀁 𑀅𑀓𑀸𑀫𑀸𑀬, 𑀲𑀫𑀡𑀸𑀦𑀁 𑀧𑀯𑁂𑀘𑁆𑀙𑀲𑀺;

𑀘𑀻𑀯𑀭𑀁 𑀧𑀺𑀡𑁆𑀟𑀧𑀸𑀢𑀜𑁆𑀘, 𑀧𑀘𑁆𑀘𑀬𑀁 𑀲𑀬𑀦𑀸𑀲𑀦𑀁.

𑁩𑁪𑁦. ‘‘𑀏𑀢𑀁 𑀢𑁂 𑀧𑀭𑀮𑁄𑀓𑀲𑁆𑀫𑀺𑀁, 𑀮𑁄𑀳𑀺𑀢𑀁 𑀳𑁄𑀢𑀼 𑀉𑀢𑁆𑀢𑀭;

𑀢𑀲𑁆𑀲𑀓𑀫𑁆𑀫𑀯𑀺𑀧𑀸𑀓𑁂𑀦, 𑀕𑀗𑁆𑀕𑀸 𑀫𑁂 𑀳𑁄𑀢𑀺 𑀮𑁄𑀳𑀺𑀢’’𑀦𑁆𑀢𑀺. 𑁋

𑀇𑀫𑀸 𑀣𑁂𑀭𑀲𑁆𑀲 𑀘 𑀧𑁂𑀢𑀺𑀬𑀸 𑀘 𑀯𑀘𑀦𑀧𑀝𑀺𑀯𑀘𑀦𑀕𑀸𑀣𑀸.

𑁩𑁩𑁪. 𑀢𑀢𑁆𑀣 𑀳𑀺𑀫𑀯𑀦𑁆𑀢𑀢𑁄𑀢𑀺 𑀫𑀳𑀢𑁄 𑀳𑀺𑀫𑀲𑁆𑀲 𑀅𑀢𑁆𑀣𑀺𑀢𑀸𑀬 ‘‘𑀳𑀺𑀫𑀯𑀸’’𑀢𑀺 𑀮𑀤𑁆𑀥𑀦𑀸𑀫𑀢𑁄 𑀧𑀩𑁆𑀩𑀢𑀭𑀸𑀚𑀢𑁄. 𑀲𑀦𑁆𑀤𑀢𑀻𑀢𑀺 𑀧𑀯𑀢𑁆𑀢𑀢𑀺. 𑀏𑀢𑁆𑀢𑁄𑀢𑀺 𑀇𑀢𑁄 𑀫𑀳𑀸𑀕𑀗𑁆𑀕𑀸𑀢𑁄. 𑀓𑀺𑀦𑁆𑀢𑀺 𑀓𑀲𑁆𑀫𑀸 𑀫𑀁 𑀬𑀸𑀘𑀲𑀺 𑀧𑀸𑀦𑀻𑀬𑀁, 𑀕𑀗𑁆𑀕𑀸𑀦𑀤𑀺𑀁 𑀑𑀢𑀭𑀺𑀢𑁆𑀯𑀸 𑀬𑀣𑀸𑀭𑀼𑀘𑀺 𑀧𑀺𑀯𑀸𑀢𑀺 𑀤𑀲𑁆𑀲𑁂𑀢𑀺.

𑁩𑁩𑁫. 𑀮𑁄𑀳𑀺𑀢𑀁 𑀫𑁂 𑀧𑀭𑀺𑀯𑀢𑁆𑀢𑀢𑀻𑀢𑀺 𑀉𑀤𑀓𑀁 𑀲𑀦𑁆𑀤𑀫𑀸𑀦𑀁 𑀫𑀬𑁆𑀳𑀁 𑀧𑀸𑀧𑀓𑀫𑁆𑀫𑀨𑀮𑁂𑀦 𑀮𑁄𑀳𑀺𑀢𑀁 𑀳𑀼𑀢𑁆𑀯𑀸 𑀧𑀭𑀺𑀯𑀢𑁆𑀢𑀢𑀺 𑀧𑀭𑀺𑀡𑀫𑀢𑀺, 𑀢𑀸𑀬 𑀕𑀳𑀺𑀢𑀫𑀢𑁆𑀢𑀁 𑀉𑀤𑀓𑀁 𑀮𑁄𑀳𑀺𑀢𑀁 𑀚𑀸𑀬𑀢𑀺.

𑁩𑁩𑁭-𑁪𑁦. 𑀫𑀬𑁆𑀳𑀁 𑀅𑀓𑀸𑀫𑀸𑀬𑀸𑀢𑀺 𑀫𑀫 𑀅𑀦𑀺𑀘𑁆𑀙𑀦𑁆𑀢𑀺𑀬𑀸. 𑀧𑀯𑁂𑀘𑁆𑀙𑀢𑀻𑀢𑀺 𑀤𑁂𑀢𑀺. 𑀧𑀘𑁆𑀘𑀬𑀦𑁆𑀢𑀺 𑀕𑀺𑀮𑀸𑀦𑀧𑀘𑁆𑀘𑀬𑀁. 𑀏𑀢𑀦𑁆𑀢𑀺 𑀬𑀁 𑀏𑀢𑀁 𑀘𑀻𑀯𑀭𑀸𑀤𑀺𑀓𑀁 𑀧𑀘𑁆𑀘𑀬𑀚𑀸𑀢𑀁 𑀲𑀫𑀡𑀸𑀦𑀁 𑀧𑀯𑁂𑀘𑁆𑀙𑀲𑀺 𑀤𑁂𑀲𑀺, 𑀏𑀢𑀁 𑀢𑁂 𑀧𑀭𑀮𑁄𑀓𑀲𑁆𑀫𑀺𑀁 𑀮𑁄𑀳𑀺𑀢𑀁 𑀳𑁄𑀢𑀼 𑀉𑀢𑁆𑀢𑀭𑀸𑀢𑀺 𑀅𑀪𑀺𑀲𑀧𑀦𑀯𑀲𑁂𑀦 𑀓𑀢𑀁 𑀧𑀸𑀧𑀓𑀫𑁆𑀫𑀁, 𑀢𑀲𑁆𑀲 𑀯𑀺𑀧𑀸𑀓𑁂𑀦𑀸𑀢𑀺 𑀬𑁄𑀚𑀦𑀸.

𑀅𑀣𑀸𑀬𑀲𑁆𑀫𑀸 𑀭𑁂𑀯𑀢𑁄 𑀢𑀁 𑀧𑁂𑀢𑀺𑀁 𑀉𑀤𑁆𑀤𑀺𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀸𑀦𑀻𑀬𑀁 𑀅𑀤𑀸𑀲𑀺, 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀪𑀢𑁆𑀢𑀁 𑀕𑀳𑁂𑀢𑁆𑀯𑀸 𑀪𑀺𑀓𑁆𑀔𑀽𑀦𑀫𑀤𑀸𑀲𑀺, 𑀲𑀗𑁆𑀓𑀸𑀭𑀓𑀽𑀝𑀸𑀤𑀺𑀢𑁄 𑀧𑀁𑀲𑀼𑀓𑀽𑀮𑀁 𑀕𑀳𑁂𑀢𑁆𑀯𑀸 𑀥𑁄𑀯𑀺𑀢𑁆𑀯𑀸 𑀪𑀺𑀲𑀺𑀜𑁆𑀘 𑀘𑀺𑀫𑀺𑀮𑀺𑀓𑀜𑁆𑀘 𑀓𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀅𑀤𑀸𑀲𑀺, 𑀢𑁂𑀦 𑀘𑀲𑁆𑀲𑀸 𑀧𑁂𑀢𑀺𑀬𑀸 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑁄 𑀅𑀳𑁂𑀲𑀼𑀁. 𑀲𑀸 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑀸 𑀮𑀤𑁆𑀥𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀣𑁂𑀭𑀲𑁆𑀲 𑀤𑀲𑁆𑀲𑁂𑀲𑀺. 𑀣𑁂𑀭𑁄 𑀢𑀁 𑀧𑀯𑀢𑁆𑀢𑀺𑀁 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀉𑀧𑀕𑀢𑀸𑀦𑀁 𑀘𑀢𑀼𑀦𑁆𑀦𑀁 𑀧𑀭𑀺𑀲𑀸𑀦𑀁 𑀧𑀓𑀸𑀲𑁂𑀢𑁆𑀯𑀸 𑀥𑀫𑁆𑀫𑀓𑀣𑀁 𑀓𑀣𑁂𑀲𑀺. 𑀢𑁂𑀦 𑀫𑀳𑀸𑀚𑀦𑁄 𑀲𑀜𑁆𑀚𑀸𑀢𑀲𑀁𑀯𑁂𑀕𑁄 𑀯𑀺𑀕𑀢𑀫𑀮𑀫𑀘𑁆𑀙𑁂𑀭𑁄 𑀳𑀼𑀢𑁆𑀯𑀸 𑀤𑀸𑀦𑀲𑀻𑀮𑀸𑀤𑀺𑀓𑀼𑀲𑀮𑀥𑀫𑁆𑀫𑀸𑀪𑀺𑀭𑀢𑁄 𑀅𑀳𑁄𑀲𑀻𑀢𑀺. 𑀇𑀤𑀁 𑀧𑀦 𑀧𑁂𑀢𑀯𑀢𑁆𑀣𑀼 𑀤𑀼𑀢𑀺𑀬𑀲𑀗𑁆𑀕𑀻𑀢𑀺𑀬𑀁 𑀲𑀗𑁆𑀕𑀳𑀁 𑀆𑀭𑀼𑀴𑁆𑀳𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀉𑀢𑁆𑀢𑀭𑀫𑀸𑀢𑀼𑀧𑁂𑀢𑀺𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.