𑁧𑁦-𑁧𑁨. 𑀲𑀜𑁆𑀜𑁄𑀚𑀦𑀺𑀓𑀸𑀤𑀺𑀤𑀺𑀝𑁆𑀞𑀺𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁪𑁩. 𑀬𑀲𑁆𑀫𑀸 𑀲𑀜𑁆𑀜𑁄𑀚𑀦𑀺𑀓𑀸 𑀤𑀺𑀝𑁆𑀞𑀺 𑀲𑀩𑁆𑀩𑀤𑀺𑀝𑁆𑀞𑀺𑀲𑀸𑀥𑀸𑀭𑀡𑀸, 𑀢𑀲𑁆𑀫𑀸 𑀢𑀲𑁆𑀲𑀸 𑀲𑀩𑁆𑀩𑀤𑀺𑀝𑁆𑀞𑀺𑀲𑀜𑁆𑀜𑁄𑀚𑀦𑀢𑁆𑀢𑀸 𑀲𑀩𑁆𑀩𑀤𑀺𑀝𑁆𑀞𑀺𑀲𑀸𑀥𑀸𑀭𑀡𑁄 𑀅𑀢𑁆𑀣𑁄 𑀦𑀺𑀤𑁆𑀤𑀺𑀝𑁆𑀞𑁄. 𑀲𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀤𑀺𑀝𑁆𑀞𑀺𑀧𑀭𑀺𑀬𑀼𑀝𑁆𑀞𑀸𑀦𑀸𑀦𑁂𑀯.

𑁧𑁪𑁪. 𑀫𑀸𑀦𑀯𑀺𑀦𑀺𑀩𑀦𑁆𑀥𑀤𑀺𑀝𑁆𑀞𑀻𑀲𑀼 𑀘𑀓𑁆𑀔𑀼 𑀅𑀳𑀦𑁆𑀢𑀺 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄𑀢𑀺 𑀫𑀸𑀦𑀧𑀼𑀩𑁆𑀩𑀓𑁄 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄. 𑀦 𑀳𑀺 𑀤𑀺𑀝𑁆𑀞𑀺 𑀫𑀸𑀦𑀲𑀫𑁆𑀧𑀬𑀼𑀢𑁆𑀢𑀸 𑀳𑁄𑀢𑀺. 𑀢𑁂𑀦𑁂𑀯 𑀘 𑀫𑀸𑀦𑀯𑀺𑀦𑀺𑀩𑀦𑁆𑀥𑀸𑀢𑀺 𑀯𑀼𑀢𑁆𑀢𑀁, 𑀫𑀸𑀦𑀧𑀝𑀺𑀩𑀦𑁆𑀥𑀸 𑀫𑀸𑀦𑀫𑀽𑀮𑀓𑀸𑀢𑀺 𑀅𑀢𑁆𑀣𑁄.

𑁧𑁪𑁫. 𑀘𑀓𑁆𑀔𑀼 𑀫𑀫𑀦𑁆𑀢𑀺 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑁄𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀧𑀦 ‘‘𑀫𑀫𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀫𑀫’’𑀦𑁆𑀢𑀺 𑀅𑀦𑀼𑀦𑀸𑀲𑀺𑀓𑀸𑀕𑀫𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀅𑀳’’𑀦𑁆𑀢𑀺 𑀫𑀸𑀦𑀯𑀺𑀦𑀺𑀩𑀦𑁆𑀥𑀸𑀬 𑀭𑀽𑀧𑀸𑀤𑀻𑀦𑀺𑀧𑀺 𑀅𑀚𑁆𑀛𑀢𑁆𑀢𑀺𑀓𑀸𑀦𑁂𑀯. 𑀦 𑀳𑀺 𑀓𑀲𑀺𑀡𑀭𑀽𑀧𑀁 𑀯𑀺𑀦𑀸 𑀩𑀸𑀳𑀺𑀭𑀸𑀦𑀺 ‘‘𑀅𑀳’’𑀦𑁆𑀢𑀺 𑀕𑀡𑁆𑀳𑀸𑀢𑀺. ‘‘𑀫𑀫’’𑀦𑁆𑀢𑀺 𑀫𑀸𑀦𑀯𑀺𑀦𑀺𑀩𑀦𑁆𑀥𑀸𑀬 𑀧𑀦 𑀩𑀸𑀳𑀺𑀭𑀸𑀦𑀺𑀧𑀺 𑀮𑀩𑁆𑀪𑀦𑁆𑀢𑀺. 𑀩𑀸𑀳𑀺𑀭𑀸𑀦𑀺𑀧𑀺 𑀳𑀺 ‘‘𑀫𑀫’’𑀦𑁆𑀢𑀺 𑀕𑀡𑁆𑀳𑀸𑀢𑀺. 𑀬𑀲𑁆𑀫𑀸 𑀧𑀦 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀅𑀦𑀺𑀝𑁆𑀞𑀢𑁆𑀢𑀸 𑀫𑀸𑀦𑀯𑀢𑁆𑀣𑀼 𑀦 𑀳𑁄𑀢𑀺, 𑀢𑀲𑁆𑀫𑀸 𑀙 𑀯𑁂𑀤𑀦𑀸 𑀢𑀸𑀲𑀁 𑀫𑀽𑀮𑀧𑀘𑁆𑀘𑀬𑀸 𑀙 𑀨𑀲𑁆𑀲𑀸 𑀘 𑀦 𑀕𑀳𑀺𑀢𑀸. 𑀲𑀜𑁆𑀜𑀸𑀤𑀬𑁄 𑀧𑀦 𑀇𑀥 𑀧𑀘𑁆𑀙𑀺𑀦𑁆𑀦𑀢𑁆𑀢𑀸 𑀦 𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀲𑀁𑀬𑁄𑀚𑀦𑀺𑀓𑀸𑀤𑀺𑀤𑀺𑀝𑁆𑀞𑀺𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.